☆LAIRIL LUAHTU☆ - 9 By Dingdi Pachuau

 ☆LAIRIL LUAHTU☆ - 9 By Dingdi Pachuau

A rawn kal leh thei si lo, a pa a dam țha lo va, bâkah, picnic kal tùr an awm leh bawk. A rawn kal theih dâwn loh chuan pawi pawh ka ti tehchiam chuang lo, class kal ka ngai sia, a lo kal chuan ka țhulh ngei ngei a ngai dâwn a ni.

Kan section pawhin picnic chu kan rawt chiang mai a; mahse, a hun kan la tichiang thei lo a ni. Kan țhianho pawhin kan sawi ve nasa, kan châk viau tawh nain kan hman hun a rual thei meuh lo va, kan la kal thei lo mai a ni.

Zirtàwpni chawhnuah kan inngaihzàwn ațanga a vawi khat nân kan inhmu ve ta chiah e. Ka vànnei asin, class pawimawh ka kal vek hman a, class off ngai miah lovin engthâwl takin ka hmu thei a ni.

Mi zawng zawng min hmuh theihna hmuna hmuh ka duh loh avàngin Mami nèn chuan ka hmuhna hmun tùr chu kan sawi dùn hmasa phawt a, Mami leh pek chuan," Han inmuahte pawh in duh ve ang a, hmun fâl deuh hlek in mamawh a ni," a ti pek a.

A hnunga chum dawt pah chuan," Eksek, tenawm viau suh aw, i rilru a hmu lutuk!" ka ti vat a. Ani lah chuan," Aih, inngaizâwngte inkâra thil thleng ve pângngai alawm, kei aia i nei hmasa erawh ka lâwm vak lo," tiin a'n nui țha duh lo vêl a, a insûm vêl hmel chuan ka nuih a tiza daih zâwk.

Mamite inah kan inhmu ta daih a. A nu leh a pi awm mah se min ngaihsak hman lo, Mami room-ah engthâwl tak leh mitmei vèn ngai lovin kan inkàwm a, ani Mami lah chuan chance min pe ve ngei, titiho mai mai ila ka tih nèn, ei tùr lei chhuanlamin a chhuak ta daih a.

Mami room bathlàra țhutthlèngah chuan thlanglam hawiin kan țhu a, a tìrah chuan ka kut min vawnsak a, a hnu deuhah erawh hnunglam ațangin nghet zet hian min rawn kuah ta a, zàm vànga ka thinphu dap dap chu a hre chiang ngawtin ka ring, a bulah ka awm mai ni lovin min vuanin min kuah ta hial si a, ka awm dàn a danglam lo thei lo.

Ani pawh hi a danglam ve a ni ngei ang, a țawng duh viau kha a nia; mahse, tunah hi chuan a ngawi deuh reng a, a chânginmin kuah chung chuan  ka kut a chûl a, a chângin a hûm leh vang vang bawk a, kei lah chu ka zàm leh tawh êm avàngin ka țawng ngam lo, thâwk pawh ka thaw țha ngam dâwn hleinem le!

"A mak e, i bulah ka awm te te a, sawi tùr ka ngah nèn, a bo vek a nih chu," a ti chhuak ta sap a, chutih pah chuan ka kut chu a hmer salh a.

Ani pawh a lo ni ve tho a nih hi, sawi tura ka lo hual ve rauh rauh pawh kha an thlâwk bo leh vek tawh.

"I pa kha a dam țha chiang tawh tiraw?" sawi tùr ka hre lo lutuk chuan ka ti ta ringawt a. Ani chuan," Aw, a țha tawh lutuk, kan inhmu dâwn tih a hria a,'Min lo biak dâwn nia' a ti nghe nghe asin, rawn kal leh thuai tùr chein a chah bawk che a," a ti a.

"Rawn kal châk viau mah ila a hun hi kan la tifel thei meuh lo va, kan hman hun a inang thei lo nèn, rawn kal thuai erawh chu kan la tum ve fan," ka tih chuan," I rawn kal hunah chuan i haw leh phal tawh lovin ka chàr duh maithei che a ni," a lo ti vat a, ka nui hak a.

"Nge, nui lo teh, ka ti tak tak! Kei ka rawn kal zauh zauh zâwk a, chuti ni lo phei se chuan kan inhmu khât dâwn êm asin," a ti ta nang nang a, a hma aia nghet sauh hian min kuah a.

Ka zah lohna sâwm khâwmin," Mipa i nia, min hmuh duh chuan i lo kal chu a ngai miau alawm," nui deuh chung hian ka ti a, ka rilru erawh chuan ka ti tak tak, mipa zâwk a nia, hmeichhiain mipa zâwk va pan dû dû thu a awm lo ka ti ve tlat.

"A dik leh chiah, hmuh che ka duh chuan rawn pan tùr che ka ni. Nang chu class kal lai i nia, off mai mai a thiang lo, ka rawn kal ziah mai ang," a ti leh ta a.

Chutah, a lam hawi tùra min kawih her pah chuan,"Min en teh," a aw mawi zeta a rawn tih sap tâkah chuan ka hnial thei lo hrim hrim, a mitah tak erawh ka la en ngam lo va, a âwm lam chu ka melh chhuk deuh ràn a. 

Ka khabeah rawn dawm kângin kan mitah tak kan inen dùn ta siah mai, a mitmeng dum fiah zet fiah kâk maia min rawn en chuan ka rilrua awm zawng zawng hi a hre thei vek hialin ka ring, ka inthup thiam miah si lo.

Thuin hmun a chang tawh lo, kan zahna leh kan sawi tùr zawng zawng a bo vek chhan kha hei vàng hi a lo ni ngei ang, tunah chuan țawngka a sawi a ngai tawh lo va, kan chêtziain kan thil sawi tùr bo ta vek kha kan sawi ta thung a ni ber mai.

A zei a, kei zei lo ve tak pawh min kaihruai thiam viau mai. Kei chu mipa ka la fâwp chhin lo hrim hrim a, zak leh zei lo tùr chu ka ni ve hrim hrim, ka chezia ațang chuan ka hmui pawh hi a la virgin a ni tih a hre chiang khawp ang chu.

"Zei hle mai!" a rawn tih sap chuan ka ngei lutuk a, a hnungah ka sik vak ringawt. Sawi chhuah kher ka duh lo asin, hetiang lama infiam phei hi chu ka zak, ka zei lo tih ka hre ve kar bawk si a.

"A na... lo! Nge, zei tih chu i duh lo em ni a? A nih, ka duh dàn chiahin i zei," a ti leh zat, a va nghal roh tak!

Hun kan nei rei lutuk thei lo va; mahse, nuam ka ti veng veng tho. Min hmu tùr ngatin a rawn kal ve vang vang a nia, Mami a lo fel hlauh a, kan pahnihin hun fâl min siamsak bawk a, a hnuah ei tùr tui tâwk min la chhawpsak zui. A fel tak tak a ni.

*******

Ka pa pawh a la rawn rui haw tluang zêl a; hrehawm ti viau țhìn mah ila chhûngkuaah buaina a siam tawh lêm lo va, tlêm chuan a zia deuh. Ka nu pawh a inti duat thar deuh a, ei tur țha nia a hriatte hi a rawn lei haw ve ta fo mai, chubâkah, kan lakah pawh a thil phal viau. Kan unau 3 hi chuan zu in mi hi kan ngaina lo tlâng bawk a niang, ka pa a rawn haw tawh hi chuan kan țawng tlêm thei hle a, țûl tàwpah lo chuan kan țawng chhuak mai mai ngai lo; keimah ber hi ka ni zual, a zu rui hmel leh țawng ri hian ka thin a tiur tlat. Ka pa lah hian Tapuia hi a fiam ziah a, a duat thu a hrilh chàmchî bawk. Ani lah hian a lo ngai thei țhin si lo va, a nin luatah a zilh lêt ziah bawk. A fapa neih chhun a ni a, Tatei nèn hi chuan kan hre thiam viau a; mahse, a zu ruih lai khera a fiam zut leh a nui vur vur țhin hi chu kan lo ning ţhin, zîng lamah lêm, a ngawi leh hmuk zêl sia, han zilh tum pawhin a inthlahrunawm dûk țhin.

Hun a liam a, Zorina nèn pawh kan inhmu zauh zauh tawh. Min hmu tùr leh an mamawh lam tùrin a rawn kal ve mai zêl a, kei class kal ka ngai tih a hriat avàngin class ka neih full ni chuan a lo kal ngai bîk lo, kâr khatah a chângin vawi hnih a rawn kal a, rawn kal loh țum pawh a nei ve tho. Ka pa avànga ka hlim lohnate hi a bula ka awm chuan a reh vek țhìn a, hlim takin eng dang mah ngaihtuah lovin hun ka hmang ve thei ţhìn si a, hei vàng tak hian a bula awm ka thlahlel thei viau a ni.

Kan țhianho kan hman tlàn theih hun hmasa berah chuan picnic tùrin kan kal ta vat a, hemi ni hi chuan Lbi pa tibuai tawh lovin kan intodelh ve tawh, țhianho zîngah two-wheeler nei an awm nual a, kan inphur diat diat thei vek. Mami'n min phur a, kan thil mamawh zawng zawng kan lei chu kan inken sem vek a, keng rit bîk pawh kan awm chuang lo.

Zorina pawhin kan kal dâwn tih a hriat lâwk vek avàngin gate-ah min lo hmuakin gate pawh amahin min lo hawnsak nghe nghe a; ka phùrna chu tihlan loh hrâm hrâm ka tum nain harsa erawh ka ti viau mai. Mi dang hmuh laia an hriat thiam theih tùra awm ka duh loh avàngin ani pawhin min rawn ngaihven bîk chuang lo va, a hmel ațang erawh chuan a hlim tih ka hre ve tho.

Vawiin chu eirawng bâwl tùr zîngah ka awm lo bawk a, tui chêng lovin ka relhru daih ang, bâkah, hmâna ka kalnaahte khân kal leh ka duh, a hmunhma belhchian leh ka duh bawk a ni, tui chèn hi chu ka peih ve tehchiam lo.

Țhiante hmuh loh tùr chuan ka vák chhuak leh ta dên dên a, ka lumna bul ka thlen dâwn chuan," Eng nge i tih dáwn a?" tia min rawn bia an awm avàng chuan ka ding chat a. Lehhawi duh miah lo chuan," Min zui ru a ni maw?" ka ti ta vat a.

"Nula hmelțha chuan min hîp lo thei lo a ni," a rawn tih chuan ka inher a, a chhîp ațangin ka en thla dan dan a, kekawrbùl pâwlduk leh T-shirt  dum hain chapal a bun a, a ngo lêm lo nain hmuh nuam ka ti. Nichîna gate a lo hawn lai khân țhiante an awm ve avàngin ka en țha ngam lo deuh kha a ni a, tunah chuan chiang deuhin ka en ve ngam tawh a ni.

"Sawisèl tùr lai a awm em?" a rawn tih leh chuan ka zak chu ka hawi sawn a,"Min enthla tiraw?" ka ti leh a. Ani lah chuan rang zet hian," Teuh lo, min hîp tlattu a awm a, min hìp miau si chuan kal loh theih loh a nia; mahse, tu mah ka enthla lo," a lo ti leh deuh tlat a.

Ka sam chhâwllêng ka benga zeh pah chuan,"Police koh i ngam em?" ka ti leh a. Chu ka thil sawi zet chuan a thawk țha ngang mai, zâ tih hriat zet hian a nui ta hawk hawk mai a.

"Hmelțha bawk si, fiamthu thawh thiam bawk si hi ka ngaisâng,"nui chunga  a rawn tih chuan kei pawh chu ka nui lo thei lo, fiamthu thawh thiam han intih kher chu, ka nuih a tizâ.

An chènna lam pana kan kal lai chuan," Tui chèn hi i ngaina lo a ni maw?"a ti a, kei pawh chuan," Nia, ka chëng thiam lêm lo bawk a," ka lo ti ve a. "Zirtîr i duh em?" tia a ding deuh dat chu en chhoh pah hian," Ka thiam lutuk ang a, rawn chèn reng ka tum palh ang," nui chung hian ka ti a.

"A nuam ngawt ang, nang phei chu ka free zêl ang che."

Ina kan luh chuan a pa chuan min lo hmu vat a," E, i lo kal leh ta a ni maw? I lo kal khât tawh lutuk a, min rawn hre tawh lo a niang ka lo ti a," nui chung hian a lo ti  a.

"Umm...I lo dam țha maw?" ka ti lêt ve a, chutah," Kan rawn tibuai leh hrep dâwn che u a nih hi, kan bengchheng ve thei sia, kan rawn chingphùl leh vek dâwn che u," ka ti leh a.

"Pawi lo, in ngaihawm lutuk a, bengchheng pawh kan ti phal lo che u a nia. Hun i neih chuan min lo tlawh ziah rawh, i hmel hmuh a nuam a, kan hah pawh a dam sawng sawng thei a ni," a ti leh duah a.

Zorina chu rawn inrawlh vatin," Ka pa nèn hian kan inchuh dâwn che a ngaih hmel riau mai, tu zâwk hian nge chang ang che aw?" nui chung hian a rawn ti a, kei lah chuan," A zei zâwk zãwk a ni mai ang chu," awlsam zet,  fiamthu vêk hian ka lo ti vat a.

"A țha, ka châk zâwng tak!" a tih leh chuan ka zak chuan ka biang ka han hup a, ka nuih pawh a za meih lo, a pa ve thung chu a lo nui hai mai a, an pafa hian fiamthu an duh riau a nih àwm hi.

"Lo inkàwm r'u, ka'n zâl lawk ang e, in tùrte kha, Bawiha, lo pe la. Maria, chhìn khat ka'n chhîng lawk ang e," tiin min nuih leh sak a, room lamah chuan min luhsan ta nghâl a.

A luh hnu chuan," A dam țha vak lo em ni a?" tiin ka zâwt nghâl a, ani chuan," Aw, a kaw lam a chiang lo deuh a; mahse, a zia tawh a niang. Khatiang khân min melh lo teh, nizàn lamah pawh ka menpui ve reng tho a nia, damdawi pawh ka pêk vek alawm," a lo ti zung zung a.

"A lo ni maw? Ka lo hre lo a nih chu, i fel hle mai, nang pawh i mut a chhuak ngawt ang chu, i chau em?" tiin ka zâwt lêt ta hlauh a.

"Chau lutuk!" tiin chau ang tak chuan a'n awm der vêl a,a hnunga chumsak pah hian," Tider vêl suh aw," ka ti zui zat a.

"A nih chuan, ka pa aia ka zei leh zei loh kan test tawh dâwn em ni ang? Ka châk zâwng tak a nia," phûr zeta a rawn tih chuan," Het! Over suh, ka fiamthu mai mai a nih kha, thutaka lâk chi a ni lo," ka lo ti var a.

"Thutakah ka ngai tlat, țan tawh mai ila?" tiin min rawn hnaih nghâl kuar a, kei chuan," Ni lo, ka tifiam ka tih kha," tia tawlh sawn ka tum chu min man bet ta chat mai.

Inngaizâwngte awm dànin kan awm a, humsual erawh kan dai lo. Dai ngam lah kan ni hek lo, a pa a awm a, a tihchi bau lo. Tu dang kan ngai lo a, kan hlim a, hun kan lo ngaihtuah miah lo bawk, ka phone a rawn ri a, Mami a lo ni a.

"Khawnge i awm? Thil kan ei tawh dâwn asin," a rawn ti a, Zorina en zauh pah chuan," Aw, ka rawn kîr thuai ang," ka ti sap a, ani lah chuan," Hetah a awm a, lo ngaihtuah suh," tiin Mami chu a lo chhâng ve a, ka phone chu a hup ta vat a, lo țawng lo tùrin ka zaizir bawk a. 

"Aw, lo kîr thuai la aw, kan lo ei zo lo ang," tiin Mami chuan phone chu a dah ta a, ka bulah Zorina a awm tih a hria, a bulah mi dang an awm tih ka hre thei ve bawk, min be rei duh tlat lo.

Ka ding ta hluai a, a lo ding ve zat a, "Ka kal rih ang e, min lo ngaihtuah palh ang," ka tih chuan," Ka lo thlah ang che," a ti deuh tlat a.

"A ngai hleinem," nui chung hian ka ti a, ani chuan," Mi dangin min lo hmuh i hlau a ni maw?" a ti leh a.

"Aw, hlau deuh tho, mak an ti dâwn êm asin, min fiam vak bawk ang, ngaihzâwng ka nei ngai si lo va," ka tih chuan," A nih, dâwt tel miah lovin, i țhiante lakah min zahpui em?" a ti ta daih mai a!

Ka en chhoh vang vang hnuah chuan," Ka zahpui lo che, zahpuina chhan tùr che lah a awm hek lo," tiin dik takin ka chhâng a, a zawhna min zawh hi ka lo la ngaihtuah ngai miah loh a nih vàngin ka chhâng thei lawk lo a ni; mahse, ka zahpui ngai lo ang tih ka hre thung.

Ka kuta chelh pah chuan," Chuti? an fiam ngam miah lohna tùr chein eng emaw ka ti dâwn nia," a ti ta sap a. A sawi awmzia chu hre mah ila a tih tum chu a sawi si lo va, ka hre lo. Eng thil nge tih a tum ang le? Han zawh lah chu ka duh meuh si lo.

A kal hmasa ta a, ka zui ve dat dat a, ka kutah chuan nghet takin a chelh tlat a, ka zahna tùr chuan eng thil mah a ti lo tùrah ka ngai.

Pool sîr kawngah chuan min kalpui a, ngawi rengin ka zui zêl tawp.  Kan chhak ina ţhiante awm chuan min rawn hmu ngei a nih ka ring, an rawn 'ehem' ta tliar tliar mai.

"Wow!! Nuamti zual deuh bîk kan lo awm a ni maw?" Melorie aw ngei mai chuan a rawn ti vau vau a, chutah, Rpi ve thung chuan," Kal leh hun chu a pa lam kan hruai tel ve ngei a ngai tawh dâwn a nih chiah hi, kan inhlèp hleih ëm mai," nui awr awr chung hian a rawn ti ve leh a.

Chutah, Zorina chu ding chatin ka lam a rawn hawi ta nghâl a, makti taka ka en chho chu," Tunah le," tih leh rawn kùn hniam a rual ta nghâl a, ka biangah a rawn fâwp ta zauh a.

A thil tih chuan min țhàwn êm avàng chuan che lovin ka lo ding a, ka lo dawh ve tawp bawk. Chhak lama țhiante au nasa lutuk pawh chu ka hre lo ţêp a ni, a thil tih chuan min shock lutuk, ka țhiante lah chuan min hmu vek bawk si a.

"I la fâwp rei lo lutuk! Kha aia rei deuh leh uluk deuh khân han ti leh teh u," Melorie chuan ring zet hian a rawn ti a, mi dang pawh chu an rawn au ve tuar tuar bawk a.

"Aih, ti miah-" ka sawi zawh hma chuan a rawn kûn leh a, ka biangah bawk chuan a rawn fâwp leh, țhiante lah an lo au tuar tuar a, kut an bêng pah bawk a.

"Kan infâwp lo tih an hre miah lo ang," ka ti sap a, ani lah chuan,"A nih, hmuiah aw ni ang?" a rawn ti zat a, hawi sawn vatin," Aih, tihchi loh, chutiang chu ţhiante hmuh laia tih chi pawh a ni lo," ka lo ti tlat a.

A nui hak a," Anni chuan kan infâwpah an ngai tho ang," a ti thung a. A dik chiah bawk, an rawn țê tuar tuar a," Vawi khat leh chiah?" an rawn ti dual dual bawk a.

Chulam chu ngaihsak duh lo chuan," Min fiam vak min hlauhpui vàngin em ni he thil hi kan tih?" tiin ka záwt a, ani chuan,"Aw, ni bawk e, nang nèn hian kan ni tih hria se ka duh bawk a," a ti leh a.

Kan bula a awm ve deuh tâk reng avàngin tu vakin min fiam rih lo, kan haw dâwn thlengin min thlah, gate bul thlengin, scooty-a kan chuan hma zawng chu ka bulah ading ve reng bawk. Haw kawnga min fiam nasa thei lo  hlauh chu a tihzia ka ti tak tak! Bus  emaw khân kal ila chuan min fiam nasa dâwn lutuk, ka rethei ngawt ang chu, ka ngaihtuah duh lo zâwk!

An peihzia chu, zànah whatsapp-ah group an lo siam pek a! A hming atân 'Swimming Pool Bul' tiin, group icon-ah kan pahniha kan ding dùn lai kha an dah bawk a, kan lang fiah vak lo hlauh a, zia tak a awm e. Group siamtu pawh chu tu dang ni lovin ka rin dàn chiah, Melorie a ni.

An han nawi lailêng khawp mai a, kei pawhin lehkha ka zir thei lo, min tiduhdah lutuk ringawt! Melorie-i'n a peih si a, thil ni miah lo, ni àwm tak takin a phuah chhuak a, ka nui nasa viau a ni. 

Inngaizâwng ve na fam chu, kan inbe ve zut a, tlai khat ka inbual hlànin Tatei'n a lo chhâng pek a niang chu, ka inbual zo ka chhuak chu ngun deuh hian min lo en a.

"U, i bialpain a lo phone che a," min en kar pah chuan a ti a.

"Âwihawm loh! Bialpa ka nei lo, tuin nge rawn phone a?" ka phone ka silent lo tih ka hre chhuak zawk, Zorina'n min rawn phone a ni ngei ang.

"'A bialpa ka nia' a ti miau alawm," a ti leh ta heu mai! Zorina'n ka nau a ni tih a hriat chuan a insawi hreh hauh lo ang tih ka hria, a lo ti tak tak em maw ni le..?

"A fiamthu a nih chu, țhiante hian fiamthu hi an duh lutuk a, ka nau i ni tih an hriat phei chuan e, dâwt hlîr an hrilh mai ang che," tiin ka țawng ta zung zung a.

"Zorina a nia, a aw kha a mawi lutuk! A hmel a țha ngawtin ka ring," a tih leh chuan ka nui sak a, Tatei en pah chuan," Chhe vak lo, eng nge a rawn sawi rêng rêng a?" tiin ka zâwt nghâl a.

Zàna min rawn call chuan an inbiak dàn chu ka zâwt a, ani chuan,"A dîlchhût reuh sia,'A bialpa ka nia' ka ti a nih kha, a pawi lo tiraw?" a rawn ti leh ta heu mai!

Pawi tawh lo mai, a sawi zo vek tawh bawk a, pawi han tih leh chuan viau chhan tùr a awm lo, Tatei erawh kha chu ka hrilh chiang ve viau kha a nia, min ringhlel tho a nih leh a pawi chuang lo, chànna a awm hleinem.

Inrinni zàn a ni a, ka pa a rui lo va, a lêng chhuak miah lo bawk. Mak ka ti deuh khawp mai a, ani hi, zu leina tùr pawisa a nei tawh lo tihna em niang aw ka ti rilru vang vang a, a ruih loh avàng erawh chuan sawi chhuak kher lo mah ila, nuam ka ti ru khawp mai. Ka nu leh naute pahnih nèn TV an en a, chaw kan ei khamna a la rei lutuk lo va, kei pawhin lehkha ka la zir lo, nimbu ka ei mai mai rih a.

Kawngka an rawn kik karh karh a, kawngka hnaih bera awm  ka nih avàngin ka lo chhàwn vat a, ka hmel hriat  ve tawh Pa Kima leh ka la hriat ngai loh pakhat hi an rawn lût a.

"Lo kal r'u, lo țhu r'u," ka lo ti ve a, ka pain a rawn hmuh chuan," In rawn lêng ta nge nge maw? Lo kal r'u helamah hian," tiin a lo be vat a, ka nu pawh chuan a lo hre ve bawk a, a lo be ve chûl a.

An țhut fel hnu chuan ka pa chuan," Bawihte, thingpui kha i pa Kimate hi han thlit ta che, an rawn lêng vang vang a nia, an chhâwl a hãl ngawt ang," a rawn ti a, kei pawhin ka nimbu ei chu dah țha rihin thingpui flask-a mi chu no hnih ka thli chhuak ta nghâl a.

Ka va pêk lai chuan Pa Kima chuan," I lo nula tak tak tawh a nih hi, kan inhmu khât deuh ta a, ka hai țêp che a ni," nui chung hian a lo ti a, kei pawh chu ka nui ve ringawt a.

"A hmel pawh hi a țha asin," ka pain a tih chuan sei fê hian lei ka chhuah khum a, puitlingho chu an lo nui dar dar a.

"Nula ve uaih tawh si hi, in la mâwl mai si a,"Pa Kima chuan a ti leh a, ka nu pawh chuan," Ni e maw le, an rilru hi an țhansan țhìn a," tiin a lo tuihnih ve a.

Kan exam a hnaih tawh avàngin lehkha zir tùrin ka lût ta vat a, kazir tak tak hmain ka online leh zawk a, a hnuah chuan lehkha ka zir ta char char, ţha taka ka pass loh chuan a zahthlâk ngawt ang. Bialpa ka neih veleha ka zirlaia ka tih chhiat chuan țhiante fiam ka hlawh nasa zual ang a, Zorina pawh ka hmu ngam lo palh mai ang.

Mipa dang ka melh lo bawk a, ka inkârah buaina a awm lêm lo. Ani pawh min hmu turin a rawn kal zauh zauh a, hmeichhe dang a melh bîkin ka hre lo. Kan inah pawh a rawn kal ve ta; mahse, ka chhûngte awm loh laiin a nia a lo kal, an rawn hmu hman ang tih ka la hlau êm êm zui.

Ni khat chu kan chawlh avàngin inah ka awm a, ka nu leh ka naute pahnih pawh chu bazâr lamah an kal a, ka nuin an mamawh a leisak dâwn a ni. Zorina a rawn kal leh a, hlim takin eng dang ngaihtuah lêm lo chuan kan inkàwm a, kan pahnih chauha kan awm avàng erawh chuan kan inkhàrkhip țhiap chuang lo, ka duh lo a ni.

Tatei a rawn lût ta thut mai a, Zorina nèn kan țhut dun lai ni lo mah se ka thin a phu dawt dawt thei tho nia.

"I va lo haw hma bîk ve?" ka tih chuan," Hmun dangah an pêng kual leh rih a, ka peih tawh lo a ni," tia min chhângin Zorina chu a en a, awmze nei zet hian min rawn en leh a.

"Ka nau, ka chhang chiah Tatei a nih hi," tiin Zorina chu ka hrilh a, ani chuan,"E, phone-ah kan inbe tawh alawm, tiraw Tate?" tiin a nuih pah a, ka nauvi hmela min chhuahchhàl châk hmel lutuk chuan ka nuih a tiza kher mai.

Tatei rawn haw ațang chuan rei a awm ta lo. Kan in ațanga a chhuaha ka thlah liam veleh chuan," Dâwt i sawi chiang aw, 'Ka bialpa a ni lo' te i ti vêl a," tiin a ner nâng nâng a.

In chhûnga luh pah chuan,"I rawn haw hma lutuk a," ka ti ta ringawt a, ani lah chuan," Engtin nge in lo awm a? Nge in lo awm hman chiah lo zâwk?" tiin min rawn zui a.

"Awii, râpthlâk!! Engtin mah kan awm lo," ka ti vat a, ani lah chuan âwih loh hmel tak hian," Ka âwih lo e, i bialpa a nih kha, engtin emaw in awm ngei ngei ang," a ti leh a.

"Țhut pawh kan țhut dun loh kha maw le," ka ti leh a.

"Ka rawn thlen hma pawhin," a ti leh țâlh a, nui hakin," Engtin nge awm se min tih? Kawngkate pawh kan hawng vek a nih kha, eng thil mah kan ti lo," ka ti leh a.

"A aw ațang khân amah a ni tih ka hre chauh alawm, a hmel erawh ka rin ai chuan a țha lo deuh, khawia awm nge?" tiin chîk zet hian Zorina chanchin chu min zâwt zui ta nghâl a.

Chuta țang chuan chhûngte dang hriat loh tur hian min fiam ta zauh zauh a, eng emaw hlekah hian,"Zorina chungchâng ka sawi a ni mai," tiin fiamthu hian min vau khar khar țhìn a, ka tih peih vak loh pawh hi ka tihpui leh nge nge țhin.

*THIL DIK HI TU MAHIN 'DIK' TI LO MAH SE A DIK RENG THO A, CHUTIANG DEUH CHIAH CHUAN, THIL DIK  LO HI MIIN TI RENG THO MAH SE, DIK LO NA NA NA CHU A DIK THEI CHUANG LO*