☆DA BOMB NINETEEN☆ - By Dingdi Pachuau

 ☆DA BOMB NINETEEN☆ 

By Dingdi Pachuau

*I duhawm reuh ngawt mai*

Teh ngawt chuan! Ka ner deuh sak a, hetiang lam hawi deuh hi min rawn thawn fo, he pa hian. Hetiang lam a rawn sawi hi chuan ka chhâng ngai lo. Profile picture-a mahni hmel pawh tilang ngam hlei lo, fake lutuk, chutah, a profile name lah 'Da Bomb Nineteen' tih chauh a la ni zui, fake account ațanga inbêm chu a làwmawm dàn a dang êm mai.

Thawnthu ka ziak ve fo va, mite angin thiam lêm lo mah ila ka têt lai ațanga nuam ka tih leh ka lo ziah ve fo a nih vàngin tûn thleng hian ka la tàwpsan phal lo. Website lamah leh blog lamahte ka thawnthu ziah chu mite chhiar theih tùrin ka dah chhuak ve țhìn a, an lo chhiar ve tih ka hriata an comments ka hmuhte hian phùrna min pe nasain keimah lamah țanna nasa nèn, chona thar min siamsak ve țhìn.

*I thu ziak hi i phuahchhawp nge a tak tak? I tawn a nih phei chuan a takah a rûkin  i zei ngawt ang!* 

a tih loh leh min hre sa ni àwm tak hian

*I inhmeh lo reuh e*   emaw

*I thawnthu ziah hi a buin tichhuak teh a, ka ui tlat che alawm*  a rawn ti țhìn.

Hetianga min titu hi ani kher lo pawh ka tawng nawlh nawlh fo a, ka nui mai zêl, ka ngai thutak lêm lo nain ka ngaihtuahna erawh a luah ve fo. Novelist nih kha ka châk țhìn a nih kha, tunah pawh hian ka la châk reng; mahse, kawng awmin ka hre rih lo, hmasáwnna tùr ka la ngahin zir tùr ka la ngah lutuk. Chuvàng chuan, a bu meuha chhuah tùr chuan ka la inpeih meuh lo ka ti a ni, bâkah, a chhutna man a lo ngai a, hralh theih loh hlauh phei chuan...

Kumin kumtìr ațangin min rawn message țan a, mi lah chu a han intihre êm êm zui bawk a! A tìrah chuan țha takin ka chhâng ve mai, a chhan chu ka thawnthu ziah fahrah ve tê tê chu ngaihnawm a tih thu min rawn hrilh vàng a nia, làwmthu ka lo sawi lo thei lo a ni; mahse, a hnu lamah chuan thu puarpawlêng tê tê rawn zeh a chîng țan a, ka chhâng lêt ta meuh lo; mahse, min rawn message a țhulh chuang lo, a rawn ti ve ngar ngar zêl.

Covid-19 hripuiin Mizoram min rawn luhchilh tâk avàngin nunphung a buai zo a, partial lockdown kan ti, complete lockdown kan ti leh, chumi avàng chuan pâwn lamah hna a thawh theih si loh a, thawnthu ziah lamah țan ka la ta sauh sauh a, hun âwl ka ngah a; mahse, ka mitin a dàwl rei lo khawp mai. Ka chhûngte bulah ka sawi ngam dèr lo, min hau ngei ngei dâwn tih ka hre si a.

Zan hnih thum ka chawlh hnuah chuan ka ziak ve leh mai țhìn, Da Bomb-a lah chuan ka chawlh hlek chuan chanchin min rawn zâwt ziah a, ka chhâng ve leh zawk zawk bawk a, ka mit chu dìm tùrin min rawn hrilh ve țhìn.

Mak ve deuh mai chu ka hriat mi pawh ni hlei lo zan tin deuhthawa min rawn message peih hi a ni, mak ka ti a, chhâng lêt vek lo mah ila ka chhiar chhuak ve dap țhìn tho. Nikhua a lo rei deuh hnu, thla thum thla li hnuah phei chuan zan khat lek pawh a message ka hmuh loh chuan engtin emaw tak, eng emaw kim lo deuh tlata hriatna ka nei a, ruak deuh huai leh khawhar ru ang deuh hian ka awm ta tlat a nih chu! 

Message min rawn thawn loh zàn chuan mak ka ti viau mai, a vawi khatna a ni a, eng thil nge a chungah thleng le? A dam lo em ni? Nge ka chhàn țhat lêm loh avàngin min rawn message peih tawh lo ni ang le? A, a buai ve pawh a ni mahna, a bialnu pawh ka ni lo va, a ning ve tawh a niang.

Zînga ka harha dâr zât ka en chuan messenger noti lo awm vàng chu ka hmu nghâl a, amah a nih ka ring nghâl mai a; mahse, ka en duh lawk lo, ka tho a, ka inphih fai hnuah ka en chauh.

*Nizàn khân phone khawih hman lo khawpin ka buai a*  tih a lo ni a, min rawn thawn hun chu zînglam dâr 2:07 a ni, a lo buai viau vàng a lo nih chu, a thuhrimah eng tiin nge maw a buai viau le? A, keia lo ngaihtuah a ngai lo, ka buaina a ni lo, a buainaa nih hi.

Aizâwlah ka awm ve reng a; mahse, eng mah a tih hleih theih loh avàngin kan khuaah remchâng hmasa berah ka haw ta daih a, kan khuaah chuan hna kan thawk suau suau thei a, nunphung a khaihlak ve lêm lo. Hna țûl țûl thawkin ka chhuak ve dàwr dáwr a, Aizawla ina inkhung deuh chawrh chawrh ai kha chuan a lo nuam daih mai, VLTF lamin dàn siamin inlènpawh tam loh ni se an tih pawh chu kan zàwm țha viau nain thingtlângah chuan zawm full țhak chu a lo har deuh chu a lo ni, keiniin va lènpawh lo mah ila mi dang kan ina an rawn lèn miau si chuan... mahse, kan him ve zêl chu a nih hi maw, Pathian zârah.

*In khua kha a nuam reuh ngawt mai* tia a message ka hmuh chuan mak ka tihzia mai chuh! Kan khaw hming hi ka sawi ngai si lo va, bâkah, mi min hriat tam ka duh lêm loh avàngin Fb lamah pawh țhian ka nei tam lêm lo, ka hriat deuh phei chuan friend request min rawn thawn mah se ka confirm ngai lo. Ani, ka hriat ngai pawh ni lovin chutia kan khua hria ni àwm taka a rawn sawi chuan mak ka ti lo thei lo.

*Kan khuaah i lo kal tawh maw?!*  tiin ka zâwt lêt a, thla 5 chuang messenger kaltlangin min rawn be ta a, kan khaw hming min zàwt ngai lo va, kei pawhin ka sawi ngai lo tih ka hre chiang a ni.

*Kal tawh e, kumin kumtìr lam khân*  a rawn ti leh a, a lo kal lai chuan kei chu Aizawla ka la awm lai a nih chu, min hmu lo tihna, pawi lo, a lo kal ve a ni mai a, min hre tak tak àwm lo êm mai. 

*Eng nge i lo tih a?*  tiin ka zâwt leh a, ka rinhlelh vànga zâwt pawh ka ni hran lo, a thuphungin ka zâwt mai mai.

*Hna thilah a nia*  a rawn ti țha ve mai bawk a, chutah, *I  story hi ka comment nasain ka chhiar nasa tawh a, kan inhriatna lah a rei ve tawh bawk, i number neih hi chu ka phû ve tawh i ti lo maw? Nge i ui deuh țùng zâwk?* a rawn ti leh a.

Kan inhriatna a rei tawh...!! Ka hre ve hauh lo, ani pawh hian min hre tak tak teuh lo mai! Ka hming dik tak pawh a hre hauh lo ang, 'Kan inhriatna a rei tawh' te rawn tih mai mai, ka nuih a tiza khawp mai.

*Ui ve deuh reuh e*  tiin ka chhâng a, ka ui chuang lo nain chutia chhàn chu ka duh ve rêng rêng a, ani pawh chuan  *A țha, ka duh chi tak! Mipa dang rêng rêng pawh lo pe hauh suh aw, keini chu heta țang hian kan inbe reng thei tho a, tiraw?*  a rawn ti leh mai.

Ka story ziah lai a tàwp a, zan hnih khat chu chàwl ve rih teh ang tih rilru puin ka inla thawveng rih khawp mai a, zan tin deuhthawa blog, Fb leh website lama tâp reng țhin kha a zan khatna chu ka reh ta hmak a, ka reh zàn ber kher lah chuan mitthi kan nei lehnghâl a, thingtlâng a nih vàngin YMA member chu kan tlaivâr vek mai, khawpuia mitthi an awma an section YMA executive member chin chiah tlaivâr ang kha chu kan ni ve thei lo a ni. In chhûngah erawh mi 35 bâk kan awm thei bík lo, pâwnlamah mipa an awm deuh thung. Kum dang, hun dang angin zài phal a ni bîk bawk si lo va, a hrehawm duh ngar ngar khawp mai, mitthi chhûngte pawh an khawngaihthlâk bîk ka ti.

Kan buai ve khawp mai a, thingtlâng kan nih avàngin tlaivâr mah ila zîngkârah thing leh buhfai khawn a ngai a, thlàn lai tlangvâlte thingpui lumsak a ngai bawk a, mitthi chhûng khaw dang ațanga rawn kal tùrte eirawng lo bàwlsak ngai bawk nèn, kan indaih lo ve êm êm a, chauh a sawi theih ngai loh, kan tihtùr chu kan ti sang sang a. Kei pawh ina haw lovin eirawng bâwl zîngah ka tel a, mei khuin min han bawh deuh phei chuan zàn tlaivàr nèn, mit a thîp duh khawp mai.

Mikhual chaw ei tùr an rawn thleng kim a, engkim kan tih fel a kan sil fai hnuah chuan thingpui lum tùr nula an rawn kal ve tawh avàngin eirawng báwlho chu kan haw ve ta a, in ka thlen veleh ka hmai ka phih a, room-ah chhukin khumah ka let tawp a, rei lo teah chuan ka muhìl ta nghâl a.

Chawhnu dâr 3:15-ah ka harh chauh! Ka phone chu ka en vang vang a, messenger noti a lo awm leh tawh bawk, ka mit nuai deuh nak nakin ka tho a, ka hmai ka phih fai hnuah chuan in chungah ka chho leh ta chauh, message pawh chu ka en leh tawh chuang lo.

Zànah kan section khawhar inah kan kal leh a, zai theih hek loh le, mi pahnih pathum thu sawiin an ding a, rei pawh lêng lovin kan bâng a, nulahovin hmun phiatin chhuat kan nâwt fai leh a, kan haw chauh. In ka thlen pawh chuan phone khawih lovin ka mu leh nghâl daih a, chhùna ka mut kha chuan keimahah eng mah a thawk lo, ka muhìl leh nghál bawrh bawrh thei tho.

Zîngah ka nuin min rawn kai tho a, ka phone kaen chuan zîng dâr 8 a lo ri tawh! A mak ve êm êm khawp a ni, nizànah ka meng rei pawh a ni si lo va. Message lo awm chuan ka mit a lâk tâk avàngin tho chhuak lo chuan ka en leh rih a.

*Next-ah chuan ka chanchin hi ziak ve la?*  Hei chu zàn hmasa dâr 9:34-a mi a ni, pakhat chu ka en leh a, nizàn dâr 9:35-a mi ve thungah chuan  *I reh chuan ka khua a har, thil dik lo chu a awm lo tiraw?*  tih a ni ve thung.

Story ka ziah loh hi chuan ka reh ve thei êm bawk a, bâkah, mitthi kan neih avàngin phone ka khawih hman lo ve bawk a ni, tlêm chuan ka inthiam lo deuh hlek a.

*Awm lo ve, mitthi kan neih vàngin phone ka khawih lo va*  tiin ka chhâng ve ta a, a chhiar em tih pawh ngaihsak tawh chuang lo chuan ka tho ta nghâl a.

Mitthi kan neih hian thlàn nghah ni hian YMA menber-te'n mitthi chhûngte chu hna kan thawhsak țhin a; mahse, he Covid-19 vàng hian kumin chu kan thawhsak dâwn ta lo a nih hi, YMA member awmna inah phal ang tâwk pawisa an rawn khawn  ta ringawt, a rilru natthlâk duh khawp mai.

Rei rial lovin story lamah chuan chuan ka insâwrbing leh țan ta a, Da Bomb-a'n  'Ka story ziak rawh' a tih tlat avàng chuan 'A pawi lo ang chu' tiin a tlângpui min hrilh tùr chuan ka ti taa, a rawn phûr khawp mai.

Chuta țang chuan kan inkàwm nasa zual ta a, a 'hot' theih hmêlin hlim lohna pawh hi a hre ve lo ang a tih tùr hiala ka ngaih chuan chanchin lungchhiatthlâk tak a lo nei ve reng tih ka hre chhuak bawk a, kum ruk kaltaa thil thleng a ni nghe nghe a. Kei hi chu ka mittui hi a pawnlâng ve bawk a, eng emaw hlekah hi chuan a lo chhuak ve hman ziah, a thu rawn ziahte chuan ka mittui a ko chhuak thei nia maw le!

True Story a nih vàng nge ni, ka rin aiin miin an lo ngaihlû a, ka lãwm khawp mai. Inbox lamah a chanchin min rawn zâwt nawlh nawlh an awm bawk a, comments lamah pawh an chhiar laia an mittui a tlâk nasatzia mawlh an rawn sawi ve bawk a. Ani pawh chuan làwmthu a rawn sawi ve ngial.

*Hawh, inhmu ang* a rawn ti hlawl mai! Ka nui sak a, a làwmzia a thup thiam lo ve ni maiah ka ngai a, ka ngaih thutaksak vak lo.

*Ka zin chhuak ngai lo, Covid-19 ka hlau a😂* tiin ka chhâng a, ani pawh chuan *He hripui zet hi chu aw...! A nih loh pawhin, i Account number min lo hrilh teh, làwmthu hrilh che ka duh a ni* a rawn ti leh a.

Ka hrilh chuang lo, a làwmna ka siamsak a, a tâwk ka ti viau. Man neia làwmna insiamsak kher zawng ka ngaih dàn a ni lo ve.

Hmel hriat ang deuhthaw hiala ka nèl ve tawh avàng chuan ka tih ngai loh dàn deuhin ka titipui ta chiam țhìn. Mipa hrim hrim hi ka be tam lo khawp a, ngaihzâwng pawh ka nei ngai chuang lo. Story ka ziak țhìn tih pawh hi ka chhûngte ka hrilh ngai lo, hriat pawh an hre lo ang, chuvàng chuan min hre chiangtu deuhte hian ka story hi chhiar ve lo se ka ti țhin, ka zak tlat.

Thu ho deuh deuhin kan in-text a, 'Vawiinah eng nge i tih?' 'I chau em?' 'Vawiin chu ka ning tak tak!' tih angreng mai maite kan inthawn a, kei pawh chuan ka tleipui chho ta viau a ni.

Fùr a lo ni a, lova ka fehnaah ka tlu a, ka ke ka tihnat bâkah thing zumin ka chàwn a tikak duai bawk a, chu chu ka hrilh chuan min rawn ngaihtuah khawp mai a, enkawl dàn tùr a hriat ang angte min rawn hrilh ve bawk a, zàna ka mut țhat theih loh phah chângin 'Ka lo menpui che aw' a rawn ti thùl, a nih loh leh, 'Tuarsak vek thei che ila' a rawn ti, ka hriat loh kârin ka rilru ka lo pe thûk viau a ni tih a dam loh thu leh damdawi ina a awm thu min rawn hrilhin ka hre ve chiah!

*Engtin nge i dam loh theih a?*  ka va ti ringawt a! Ka zawhna âtthlâkzia chu a hnuah ka hre chhuak chauh, ka lo ngaihtuah viau a lo ni. Ani pawh chuan thinrima la lo chuan *Ka lo fîmkhur tâwk lo deuh a niang* a rawn ti ve mai bawk a.

*Fîmkhur tùr che alawm, damdawi ina awm loh theih hrãm hrâm hi a țha asin, tûn ang hunah phei chuan*  ka ti leh a, kan inbiak nasat tawh avàngin ka nêl tawh a, țawngka phei chuan ni se ka vìn khar khar ngei ang; mahse, text message a ni hlauh a!

*Min vìn kher bík lo la, ka dam lo ve êm êm a, duat ka mamawh ve a nia, zanin phei chu min awm ka ngai ang, muthilh ka harsat leh dâwn si*   a rawn tih leh chuan ka ke nat laia min menpui tih a rawn sawi kha ka hre chhuak zawk a. Nia, min rawn thlamuanin min rawn hnem nasat ve êm kha maw.

*A nih chuan, țha takin damdawi kha ei la, mu hma ang che, phone khawih reng lo la*  ka ti a, phone a khawih reng chuan a dam chhuak har ang, tûn ang hunah chuan dam țhat a pawimawh ber.

*Mahse, rawn biak che ka duh dâwn asin, min khawngaih la, ka text reng dàwn che chuan ka chau zo mai ang, i number chu min pe tawh mai la?*  a rawn tih chuan ka nuih a tiza lutuk, a rawn sawi luh kual vël dàn chu a inla khawngaihthlâk lutuk a. Ka phone number ka pe duh lo chung pawhin min la rawn be reng duh a, zanin ațang phei chuan damdawi inah a awm dâwn lehnghâl a, nia, ka number hi ka pêk mai a țha ang, min biak duh mahte chuan.

Zànah chuan kan inbe ta a, min rawn be hmasa zâwk a nih chu, ka story ziah lai ka post tawh avàng chuan ka hman ve tawh a ni.  A tìrah chuan ka zak a; mahse, a aw mawi deuh mai leh dam dap chuan min hîpin a tidam chawp a nih ka ring lo ve tawp a, damloh laia bula awm atân a țha ngawt ang chu.

"I story dah thar kha ka la chhiar lo va," a rawn tih chuan," Chhiar lo ang, i dam hunah chauh i chhiar dâwn nia, i mit i hman nasat chuan i lu a nat phah ang," ka lo ti vat a.

Kan inbe rei phian. Ho tê tê a ni kan sawi ni, a chângin kan inhnial deuh a, kan inbiak dàn lah chu țhian țha inbiak ang mai mai chu a ni tawh vak lo chiang alawm, zawi tê têin kan țawng sep sep a, min be tàwp thei dâwn lo takngialin ka hria a, ka sawi chhuak ta tawp, a hnuah chuan kan duh tâwk ve ta mai bawk a, zàn dâr 11 a lo ri țëp alawm le!

Kan in-text tawh lo, kan inbe char char tawh. Damdawi in chhûng leh a awmna ward thlalãkte chu min rawn thawn a, a hmêl rawn tilang duh lovin a ke lam chauh thlalâk pawh min rawn thawn, a che ngeiawm thiam a nia. A hnu deuha min rawn biak chuan," Engtin nge i hming hi ka save dâwn? Da Bomb ka ti mai dâwn em ni?" tia kazawh chuan nui hawk hawk chung hian," Pawi miah lo, i tâna țha ber  nih ka tum tho a, 'Ka bialpa' ti pawhin min save thei ang chu," a rawn ti a, a hnu deuhah erawh chuan," Tak tak chuan, ka hming dik tak chu Ruatfela a nia," a rawn ti ta a.

Mipa min be ve deuh țhìn awm mah se Ruatfela ang hian tu mah ka be lêt ngai lo, ka chhàn țhat duh loh avàngin an beidawng ka ti mai; mahse, Ruatfela hi chu a dang ve tlat, a beidawng duh tlat lo va, ka chhàn țhat duh loh pawhin min rawn text țàng țáng tho a, ka lo kawm ngeih phah ta viau a ni, min biak lawk loh phei chuan ka khua a har a, ka thin a rim lek lek fo ta mai chu a nih hi.

Damdawi in ațangin a chhuak tawh a, in lama awm tam tùr leh lêng chhuak tam lo turin ka han chah ve ngawt a, ani lah chuan," Țúl loah chuan ka chhuak ngai bîk lo aw," a rawn ti ve a, hna thawh a nei tih ka hre tawh a; mahse, chîk deuh taka han zawh ka duh chiah bík si lo va, ka la hre chiang lo mai mai a ni.

Kan khuaa ka kawm ve ber Puii nèn chuan NREGS hnatlângah kan thawk chhuak ve a, dîl tùr kan lai a, thawk kan tam avàng chuan Puii chuan," Heti hian hnatlâng chu kan thawk dual dual a, mitthi chhûngte hna thawhpui kha phal a ni leh bawk si lo va," a ti sap a, kei chuan,"Hei chu NREGS hnatlâng a ni tlat a," ka lo ti ve a, kan nui dùn a.

Zan khat chu ka story a rawn comment leh a, a profile picture-ah  a hmel ni àwm tak a rawn lang ve ta. Ka han check vat a, mipa hmelchhe lo tak a ni, amah a nih ka'n ring lo teh ngawt a. Min rawn biak chuan ka lo zâwt vat a," I hmel dik tak dah lang ve tawh ta che, i hmel kha i ui em ni?" ka tih chuan a nui hawk a.

"Ka hmel a ni alawm, mahni hmel lo ka dah duh dâwn em ni?" a rawn ti a, kei pek chuan," A hma pawhin i dah reng kha," ka lo ti hlak a, a rawn thaw halh a.

"A nih, ka rawn video-call dâwn che aw," a rawn ti ta mai. Ka chhànna nghâk lo chuan kan inbiakna chu a titàwp a, a rawn ri leh ta, min rawn video-call tak tak!!! Ka duh hleinem, ka chhe si, ka hmai pawh ka la phih lo, a mawm țha ropui si.

Ka la duh lawk lo va, a hnuah erawh ka la ta hrâm; mahse, ka intilang țha duh lo ngei a, a va naupanchhiatthlâk tak!

"Min en la, thlalâk ka dah kha ka hmel chu a ni chiah em?" a rawn tih chuan a ni tih ka hre nghâl, a chhiat lohzia chu a, min tizak zâwk!

"Kei chu ka hmai a mawm lutuk! Min rawn call thut a, ka la inphih ve hman lo va," ka tih chuan a nuih a za ngang mai, a nui hawk hawk a, a nui ri lah chu a ngaihawm thlâwt. Chutah,"Ka hmu tawh che a, hmai mawm tih vêl chu engah mah ka ngai lo, i chhe lo ka ti tho tho," a rawn tih chuan ka ner sak a.

"Khawiah nge min hmuh?" ka ti ve thung a, ani lah chuan," Ka sawi chu âwih mai rawh, ka stalk nasa che alawm," a rawn ti leh ta! Mak deuh deuh hi a rawn sawi a, min tihlauthâwng deuh tlat!

"I hlauhawm e!" ka tih chuan a nuih a za ngang a niang, a nui hmel chu hmuh a nuam, nui mawi chi a ni lehnghâl a, a chhe lo ka ti thlâwt!

"Kârleh Thawhțanni khian Lunglei ka rawn phei lawk dàwn a, hna thil vàngin. Hmaichhanah inhmu ve tawh tak tak ila? Covid - 19 ka kai hauh lo tih ka lo sawi sa aw, ka him, min hlau miah suh. Tûnah lah i hmel min hmuhtîr țha ve duh mang si lo, inhmu ang aw, i hman ang tiraw?" a rawn tih chuan," Krismas a nih dáwn tawh hi!" ka lo ti thung a.

"Nia, Krismas leh kum thar inkâra rawn kal aiin ka duh zâwk a, rawn kal a ngai dâwn tho tho si a, inhmu ang aw," a rawn ti leh a.

"Ka hmel a chhe si," ka tih chuan," A chhe lo, ka hmu tawh che ka tih tawh kha, nimin lamah pawh ka țhiante nèn story sawiin i hming kan sawi chhuak a, 'Ka bialnu a nia, lo inrawlh duh s'u' ka tih tâk kha," a rawn tih chuan ka nui hak a, a rûk tak erawh chuan nuam ka ti veng veng thung.

Ka châk a, ka huphurh tho bawk. Ani a chhe lo ropui si, kei lah thingtlâng  nula mai mai ka nia, kan inang lo dâwn chiang, ka hmu châk lutuk tho bawk si a, ka rilru a hah.

Naktûk Pathianni a ni a, a tûklehah a rawn kal dâwn, inhmuh a duh, eng chhuanlam siamin nge Lunglei chu ka kal ve tâk ang le? Dîl ila chuan ka chhûngte hian an phal dâwn lutuk, ka chhuak ngai lo lutuk záwk a, chhuah dìl ka huphurh zâwk, mak an ti ang a, min zâwt chîk viau zâwk ang.

A pawi lo, hmu tùr chuan kal tum teh ang, naktûkah ka țhiannu Puii ka hmai ka facial-tîr ang a, kan inhmuh huna ka lan pawr viau lohna tùrin. Mi chuan hria se min nuihzat ngawt ang; mahse, ka tân chuan a nuihzatthlâk loh, a phùrthlâkin a huphurhawm tho bawk si, tlangvâl anga mipa ka hmuh hmasakna ber tùr a ni asin. Ka hmuh huna ka awm dàn tùr leh sawi tùrte chu ka lo ngaihtuah lâwk a, zàm loh viau tum ve phawt teh ang; mahse, ka zãm dáwn chiang tih ka hre sa, ka laih viau phei chuan...kan inhmuh huna sawi tùr ngaihtuah chuan ka mu meng kar a.

*THIL TIH TÙR ȚHA TAK TAK SAWI CHHUAK FO, A TAKA ENG MAH TI LEH NGAI LO MI CHU A HRE CHIANG APIANGIN AN NGAINÊP ȚHÌN*