☆EARTH ANGEL☆ - 1 By Dingdi Pachuau

 ☆EARTH ANGEL☆ - 1  By Dingdi Pachuau

Eng thil dang mah ngaihtuah ka duh lo. Thuhnu dàwn ka duh lo a, hmalam hun ngaihtuah pawh ka duh chuang lo, ka ti ang a, a tàwp vek mai ang.

Hmanhmawh angreng tak, phûr hauh si lo chuan lung tohlâwt lai tak chu ka pan phei a, ka thlen phei chuan  a chungah chuan ka ding vang vang phawt a, thlifîm lah chuan ka thil tum hre ve hauh lo chuan min chhêm tak heuh heuh a!

A tàwp dâwn ta, a tàwp vek tawh dâwn. 

Maimichhîng vang vangin,"I awm tak tak a nih pawhin min dem suh ang che, hetiang ti lo thei lo hian min-"

"Ka spot ngainat ber hmuna dingpa kha, khata ding tùr khân ka phalna i la hmasa em?"

Ka meng nghâl zawk a; mahse, ka thuchah hnuhnung sawi lai min rawn tibuaitu, chu thu rawn sawitunu lam chu ka hawi chuang lo.

"Rawn hawi teh, min en ngam lo a ni maw? Min dîl hmasa lova ka spot duh ber rawn dai ngam chu i huaisen tak tak em tih lo fiah chiah ila, hmeichhia ka nih vàng mai erawh chuan min dìm hauh suh ang che," a rawn ti leh khar khar reuh a.

Maimichhîngin tháwk ka la hawk phawt a, hmeichhe thinchhe reuh tak nèna inhmachhawn chu ka tûn dinhmun nèn hi chuan a inhmeh hlawl lo; mahse, min rawn nangchîng ta tlat bawk si.

"Han ti chiah la? I kuttum thlâwk ve mai mai kha dàwl lo tùrah min ngai suh," a rawn ti leh khar khar a.

He nu tê reuh chu, a rui a ni ngei ang. Khar khar reuh hian a! Tûnlai hmeichhe rùi hian zahpah an nei tawh lo, mipa pawh min cho ngam zêl mai chu a nih hi.

Ka inher ta a.

Nula tê tak chu a lo ni bîk awzâwng lo mai! A lo ding kâk deuh țà a, a din dàn posi ka hmuha ka hriat chhuah hmasak ber chu Dusty Fox a ni. Ka râwlthar chhuah hlim hlawt khân cowboy bu ka âtchilh a, Sudden, Dusty Fox leh  Billy the Kid kha ka ngaisângin an chanchin pawh ka chhiar nasa țhìn a nih kha. Tûna ka hmaa he nu ding kâk deuh țà mai ka hmuh hian Dusty Fox din dàn tùr ka lo mitthla țhin ang ngei kha a ni tlat a ni!

"Mipa i ni chiah em?" a rawn ti leh ta.

Chhàn pawh ka tum lo. Ka tih tùr min rawn tihsukuksak tâkah chuan heta ka awm rengna chhan tùr hi a awm tawh lo.

"Hei, min ngam nange?"

A va ninawm reuh tak!

"Mipa chuan hmeichhia chu engtiklai pawhin kan ngam sa reng," sehchilh nak chuan ka ti a, ka bike dahna lam chu ka pansan ta nghál a.

A rawn țawng chhunzawm mawlh mawlh ri chu hre mah ila ka ûksàk lo, hmun dang ka pan mai ang, mahni chauh pawha helai hmun chêp tih tawh nâklaiin, he nu nèn phei hi chuan, ka puak keh palh ang! 

Thinrim țûnin, ka duat êm êm țhin ka bike 'Dusty' chuan chak zetin ka tlân a, tunah tak hi chuan duat hleih theih pawh a ni lo, ka thin a rim êm a, ka ngaihtuah thei tawh lo. Kha nu kha awm lo se chuan tûnah hian eng mah ka ngaihtuah a ngai tawh lo tùr hi a nia! Hnek pawp mai kha chu a chãkawm; mahse, hmeichhia han hnek ngawt zawng, a dawihzepthlâk lulai deuh si a ni.

Ina haw lovin țhianpa C-ate in lam ka pan a, inah a lo la awm lo zui! Ka phone lah kan in ațang khân ka ak chhuak dèr si lo, intihhlum ka tum miau avàngin a țangkaina tùr ka hre lo a ni, khawi lam nge ka pan leh tâk ang? Ka ngaihtuah kual a, pan mai tùr ka hre tawh lo. Tunah tak hian tihtak zeta țhian kawm ka neih lohzia ka hre chhuak uar uar. Țhian chu ka nei țeuh; mahse, 'țhian tak tak' tia chhàl tùr erawh ka nei lo chu a nih hi.

Ka nu leh pa inhau ri hre tùra ina haw ka peih lo, inah ka haw a nih chuan ka nuin min lo hmuh veleh min lo àn khum leh ngei bawk ang a, ka farnu neih chhun lah hmuh tùr a lo awm leh miah lo bawk ang, ka hre sa vek, kan ni tin nun dàn ni miau hek le.

Kalna tùr ber hre lovin ka tlán kual a, ka ril a țâm loh avàngin eng mah ka ei peih lo, zàn rei hnuah erawh pâwna riah ringawt ai chuan tiin ka haw ve ta hrâm a. Ka room tukverh hawng turin kan in bangah chuan ka láwn chho a, ka tih ngun tawh avàngin harsatna ka nei lo. Zanin chu rui chhum hmawk mai teh ang, ngaihtuahna hmang thei lék lova ruih ka duh, ka muhìl thei deuh mahna!

Almira ațang chuan ka 'thil' dah țhat chu ka la chhuak a, noah pawh thli chhuak duh lo chuan a bottle-in ka in chilh hmiah mai a. Zan danga  ruih hnâp nána ka in ang chin ka in hnuah pawh ka la rui thei chuang lo. Mai mai a, in zo vek ila a ni mai.

*******

Ka phone riin min tihharh avàngin phak chualin ka han meng a, khua a lo êng ut tawh mai. Mu chung chuan ka han hawi kual deuh a, khumah pawh ka lo mu lo, khum bula ka phah centre carpet, hmul deuh hlek chungah ka lo mu niin, nizàn khân ka khulh tam deuh bawk a, ka chahthlâk lai pawh ka lo hre hauh lo a lo ni!

Min rawn biak tumtu ànchhe lawh deuh nuah nuah chung chuan ka tho a, phûr lo zet chuan phone chu ka han ban a, țhianpa C-a a lo ni a.

"Min va chhâng har ve a, Eksek? Ka room-ah Duhlaii nèn kan awm mêk a nia," a rawn ti nghâl tâwng a.

"A hming pawh sawi lo teh, ka mit hmuhah rawn inlan rêng rêng suh se!" aw chher deuh chhuai chuan ka ti a.

Nimin khân mipa dang nèn ka hmu dùn a, ka rinhlelhna țhin kha a dikah ka ngai hmiah bawk.

"Eng nge thil awmzia hi?" a rawn tih leh chuan," A duh duh dànin a awm thei ang, a bialpa ka ni tawh lo," ka ti leh a, ka lu na deuh ngut ngut chu ka hmer pah a.

"Tunah khawiah nge i awm?" a rawn ti leh a.

"Chutiang sawi a ngai lo, chhuahtîr rang mai teh," kei chuan ka lo ti hlur a.

Dâr zât ka en a, ka lo mu rei phian mai ka ti. Ka chhûngte hi an chhuak  leh vek tawh ang nge, min hau tùrin an lo la awm ang? Ka awm leh awm loh an ngaihven dáwn lo tih chu ka beng hi ka hnâr a ni lo tih tluka chiangin ka hria, tûkțhuan pawh an ei leh daih tawh ang chu, dâr 10 a pèl vah tawh si a.

Ka inbual hnu chuan tlémin ka lu na bûr pawh chu a zia deuh, harh pawh ka harh phah deuh bawk. Ka room kawngkhàr chu hawngin thâwm ka han ngaichang deuh a, an chhuak vek a ni ngei ang, a reh duk mai. 

A țha, ka chhûngte hmel hmuh pawh hi ka peih tehchiam bîk lo. Ànbûr nih phei chuan an kiang ațanga hla taka awm vang vang ka châk țhìn, tlêmin ngaiah ka nei thiam deuh tawh zâwk a, min àn khum pawhin ngawi rengin an ànhlâ ngaithla miah lovin ka tih duh ka ti mawlh mawlh mai țhìn. Pawisa mamawh ţhin lo ila chuan, ànhla ringawt ngaithla tùr chuan kan inah hian ka haw khât viau ang chu. Nimin lama 'eng thil emaw ni' ka hriat hnu phei kha chuan, ina haw hi ka chãk lo asin; mahse, in dang ka nei si lo.

*******

Chhûngkaw hausa tak tia sawi tùr ni lo mah ila, mi thil awtin ka awm ngai bîk lo. Ka mamawh ni miah lo thlengin ka nei ve thei tlat, a fapa neih chhun ka nih ve miau avàngin kei aiin ka pa hian ka tân rual a lo awt țhìn a; mahse, tûn hnu deuhah hi chuan a duh loh záwnga ka awm tâk zauh zauh avàngin min leisak êm êm tawh bîk lo. Unau pahnih chauh niin, ka farnu neih chhun Mami hi ka nuin a duat ve thung a, a duat sual ta rêng a, kan ina awm hlei thei lo, mi ina awm hlei thei bawk si lovin a awm kual a, han zilhin han hau ve dâwn ila ka nuin a lo ţan hlur zêl avàngin kei phei chuan ka zilh ngai lo, ka pa erawh chuan a en liam mai mai a, a nin ve chinah erawh chuan puitling a nih tawh thu sawi lovin a vaw thâwr mai țhin, hei vàng hian kan inah hian ka pa awm lai chuan a rawn haw khât a, a țhiante inah a riak mai țhin. Ka nuin a rûkin pawisa a pe ziah tih pawh ka hria; mahse, inrawlh ka tum lo, a fanu a ngaihsak ve a ni mai, ngaihsaktu neih chu neih loh ai chuan a țha záwk alawm le. Mahni hlimna lamah kan tlãn țheuh a, ka nu leh pa pawh, chutiangin, kei pawh, ka hlimna nia ka hriat lamah ka tlãn  ve a ni mai.

Ka pum ruak hnawh khah nân choka lam ka pan a, tu mah ka hmuh loh avàng chuan ka thaw huai mai. Chaw bàr hlek ka duh, ka chhuak leh vang vang ang a, zànah chaw ka ei lo leh emaw kha a ni ang a, ka pum ka ngaihtuah ve deuh tho alawm.

Ka ei țan chiah tihah chuan khawi lam ațangin ka nu a lo luh pawh ka hre lo," Nizànah khawiah nge i awm? Ka ngaihtuah tehlul che nèn, ka rilru hi tihah viau hlawm lo teh u, ka ning ve tawh a nia," a rawn ti leh hlaih hlaih a, ka chhâng lo. Hetiang thu hi chu ka hre tam tawh lutuk, ka thil ei lai chu ka ei chhunzawm leh mawlh mawlh a.

"I u awmna i hria em? In inhmu em?" a ti leh a, chhàn pawh ka tum chuang lo. Țawngtîr min tum vàng a ni tih ka hre ve kar a ni, ani hian ka u awmna chu a hre lutuk ang tih ka hria, a fanu a nia, pawisa a pe ziah a, a awmna a hre lo thei lo ang.

"Hetianga awm kual mai mai lo hian țha takin i u nèn hian awm ula, kan chhûngkua pawh nuam deuhin, rilru hlim deuh zâwkin kan awm thei tùr a nia, in awm dàn hi bànsan ve tawh teh u, rilru in tihah êm mai," a ti leh a, ka bulah a ding ve reng bawk si a, ka chaw ei pawh a titui nek lo ve, tui loh sa nèn, ka tho ta daih a.

"I u chu i hmuh chuan rawn hruai haw rawh aw, mi ina riah kual mai mai zawng a fuh lo êm mai, mi pawhin an lo ning ang che u. I u chuan i thu chu keia thu ai chuan a âwih zâwk ngei ang, in têt lai pawhin a duat theih êm che kha," a ti leh a, tûn țum a țawng chu tlémin a key a hniam ta deuh, bâkah, min àn khum ta miah lo, 

Ka insiam lai chuan ka room-ah chuan a rawn lût a, kan têt deuh laia a tih dàn ngai têin pawisa hi a rawn hûm lût leh țà bawk a, a rûkin ka nui sak. Ka nu hi chuan țhiante zînga hrehawm kan tih leh pawisa kan neih loh bîk kha a hlau thei viau a nih kha, ka pa hriat loh hian tihian pawisa min pài ziah a ni, min pai loh pawhin pawisa a dahna ka hria a, ka la mai țhin.

"Ruih nân chuan hmang suh aw Chuan, i u i hmuh hlauh chuan i pe ve dâwn nia," tiin ka jacket ipteah chuan a rawn hnawh lût nghâl a, eng zât nge tih pawh a sawi chuang lo.  Anni pahnih hi, an inhmu lo tak tak em maw ni le? Mahse, pawisa a neih loh chuan Mami chuan ka nu chu a rawn biak daih tawh ka ring bawk si.

C-a'n min rawn bia a, an ina kal ka tum sa hrim hrim a, min rawn be lo pawh ni se, zanin chu an inah ka riak ve tawh ang, he in hi kal bosan vang vang ka duh, pawisa chu nei tam viau ila chuan ka chhuak vang vang tawh ang maw le.

Ka chhuah dâwn chuan ka nu chuan ka u hmu ngei tùr chuan min chah lawm lawm a, ka hmuh chu ka ring chiah lo, bâkah, ka hmuhah pawh a inlâr duh lo ang. Kan têt lai kha chuan kan inkàwm ngeih viau a, kei aiin kum 5 chuang zetin a upa na a, min kàwm thiamin kan hlim dùn viau țhìn a nih kha. School hostel-a a awm ațangin a nungchang a dik lo ta vek a, a damdawi rui an man chhuak a, hostel ațangin an hnawt chhuak a, school pawh kal chhunzawm thei lovin thla hnih vêl zet chu inah, a room-ah a inkhung a.A hnuah ka pain school dangah a admit leh a, chutah pawh chuan, hostel ațangin a tlãn chhuak leh a, a țhiante ina a awm chu ka nuin a va hruai chhuak a, ka pa pawhin a vaw hrep. A vuak chhûngin a țap lo va, nâ tiin vawi  khat tê mah a țê chhin hek lo. Room-ah a inkhung leh ngawt ngawt a, kan chhûngkua chu kan hlim lo takzet a ni, ka pa lah chu a rui ve zauh zauh bawk nèn, ina awm chu a nuam hlawl lo. Ka u nèn kan inkàwm ngai tawh bawk si lo va, pâwn lamah ka tãl tam ta tial tial a, in aiin pâwn lam ka ngaina ta rêng a ni.

C-a room-ah chuan mi dang dang pawh an lo awm ve a, a țhen phei chu chhùn chhùnah an lo meng sen leh râm tawh a, kei erawh chu hetiang lamah hi chuan ka insûm thei viau. Ka hriatna a ţhat loh êm avàng hian hriatna țhat loh belh ka hlau a, an han tih lai laih pawh hian ka ti ve ngai lo, in kerh kerh lam hi ka duh zâwk.

"Engtin nge Duhlaii nèn chuan in intih thiam loh a?" Mapuia'n a lo tih chuan," Engtin mah," ka lo ti hmak a, C-a'n a lo hrilh leh vek tawh a ni ngei ang chu. Mi dang hriat pun vak ka duh hran lo, "Min rinawm lohsan a," han tih chu ka duh teuh lo, mipa tân a tlàwmthlâk lutuk, ka tê reuh reuh dâwn asin, min han nuihsawh zui bawk ang a...

"A chhiat loh reuh nèn, han intih thiam lohpui mai mai atân chuan a uiawm ve alawm," Joseph-a'n a lo tih chuan C-a chuan," I lo 'eat' tih sawi hauh suh!" tiin nui sûng chung hian a dàrah chuan a bensak a, an nui dar dar a, kei erawh ka nui lo. Za mawlh hek lo le, kan nih hma ațang tawh khân Joseph-a hian a star ţhìn tih ka hria, kan han ni chiah pawh kha min thîk țhìn rêng a, a mitmeng leh cheziaah ka hre ru vek; mahse, ani pawhin bialnu a nei a, a bialnu lah an hausa a, a țhen phal teuh lo.

"'Eat'-awm deuh mai asin, nangni pawh hian in sawi lang lo mai mai a ni, in rilru chuan in hisàp ve vek tho ang," Joseph-a'n a tih leh chuan inen kualin an nui țhû hlawm a, kei chuan," In duh phawt chuan in try thei, kei nèn chuan kan maipâr thlawn miah tawh," ka lo ti a.

"Inzawmna in nei tawh lo tak tak maw?" meng zîm deuh san hian Muana chuan a lo ti a, ani hi a ruih tawh hi chuan vawk hi ang deuh a, amah thau deuh lam a lo ni bawk nèn, kan nuih nasa țhìn viau a ni.

"Nei tawh lo tawp mai!"

"Pawi hle mai, bro. Mahse, ani lo pawh i hmu leh thuai ang chu, nang zawng i tlâwntlai a țha a, hmeichhe duh chi tak hmel lah hi i pu roh a," Muana vêk chuan a ti leh a, ka nui sak a.

"Hmeichhia lam chu ngaihven rih lo phawt teh ang," tiin ka pawisa ah tlêm chu la chhuakin dawhkànah chuan ka dah a, C-a'n min rawn melh ralh a, ka lo bu nghat a.

"Tu nge kal dâwn?" a tih chuan Muana chuan," Keimah ka lo kal ang e, vawiin chu ka da deuh a, min tîr kual char char mai r'u," tiin nui chung hian ka pawisa dah chhuah chu a la a, a tho ta nghâl a.

C-a room hi a zau a, an ina luh kual kher ngai lovin in hnuai kawng ațangin a luh theih a, a zia viau mai. Thâwm lah chu in chung lam ațangin a hriat vak bawk si loh a, kan țhianho kal khâwmna ber a ni.

"Vawiin chu khawi lamah nge ni ang?" Joseph-a chuan a lu hmet nuap nuap pah chuan a ti a, Mapuia chuan rang zet hian," Ka hria alawm, Muana lo thleng phawt se," a lo ti vat a, kei erawh chu ka ngawi reng a, an duh duhna hmunah chuan kal ila pawi ka ti lo, engkim theihnghilha ruih ka châk ber, rui ila rilruah eng mah ngaihtuah thei lo ila...

Exam zawh chawlh lai a ni a, kan țhianho pawh kan hman viau mai, ni tin zan tin tih mai tùr hian kan inhmu khâwm lât lât reng mai a ni, ka țhiante bula ka awm hi chuan kan chhûngkhur boruak ka ngaihtuah lo ve deuh țhìn a, tlêm chuan zia ka ti ve țhin; mahse, tunah hi chuan ka țhiante pawh hian ka ngaihtuahna an tidang zo meuh rih lo, nun hi ka ning zual ta ngawih ngawih ni berin ka hria. 

Mapuia spot sawiah chuan kan kal a, kan thlen veleh mi dang pawh nghâk zo lo chuan kan in tùr chu ka phawrh chhuak a, ka in nghâl ta khawlh khawlh mai a, C-a'n min lo dawm vat a.

"Țhianpa, i ti nasa lutuk ang e," a ti phawt a, chutah," Chutia rilru nat phah viau nân i hman dâwn chuan Duhlaii chu ka'n bia ang e,"tiin min thlah a, a phone a phawrh nghâl a, kei erawh chuan ka thil in lai chu ka in chhunzawm leh ta nghâl a.

Duhlaii(A hming tak chu Lalrinawmi a ni a, fiamthua koh nân 'Duhlai' kan ti țhin) nèn kan inhmuh thiam loh avànga rilru nâah min ngai a nih chu, a teuh lo mai! Mahse, sawi fiah ka tum hauh lo, ka chanchin zawng zawng hi ka țhian țha ber hnênah chauh ka hrilh ang, ka țhian kawmte hnênah ni lovin. Ka țhian ţha ber, ka thurûk engkim ka hrilh ngam ngei hnênah chauh; mahse, chutiang ţhian chu engtikah nge ka neih tehlul ang le? Nge, ka thurûk hi sawi chhuah lohin thlàn thlengin ka liampui mai zâwk ang?

*I BEISEINA ÊNG SÊT SÊT KHA HLOHIN TIMIT MIAH SUH, NAKTÛK HIAN ENG THIL NGE A RAWN HER CHHUAHPUI DÂWN I HRE HAUH LO A NIA*