☆LAIRIL LUAHTU☆ - 21 By Dingdi Pachuau

 ☆LAIRIL LUAHTU☆ - 21 By Dingdi Pachuau

Kum a thar a, kan hun hman dàn erawh a ngai reng. Ka naute'n class an țan hnuah phei chuan kan khua a har ngawih ngawih ta; mahse, kâr tàwpah min rawn tlawh ziah tho a, tlêm tê chuan a zia deuh. Tapuia pawhin  Zorina bike chu a siam țhattîr tawh a, a lo chhe vak lo bawk nèn, rawngte a kâp țha a, a tinalh khawp mai; mahse, min rawn tlawh azâtin ka lo zilh ziah a, fîmkhur hlê tùrin ka chah ziah bawk. Tatei a rawn riak zing ve ta thung, scooty kha a duh hunah a hawl chhuak ve thei tawh bawk si a, ka pa pawhin a hnial bîk lo a ni chêk ang chu.

Zirtàwpni a ni a, tûkțhuan kan ei zo hlim hlawt ang tihah chuan Tatei'n min rawn bia a, gate hawng turin min rawn ti a, makti angreng deuh tak chuan naute chu puain gate chu ka va hawng a, Tapuia nèn an ni a, an lo inkhâi bâwr nasa mai a.

"Nutei leh Putea chuan eng thil nge an rawn ken țeuh ni?" tiin Chimchimtei chu ka bia a, Tatei chuan," Kan rawn bazàrsak che maw le, Chimchimtei ka ngai tawh lutuk!" tiin a rawn tlãn hnai vat a, a thil kai lai chu nghatin naute chu a ban nghâl a.

Tapuia chuan," Hei, i kut kha a bàl ang aw, khati'n  naute khawih tum nghâl ringawt suh," a lo ti țhat a, Tatei pawh a ding chawt mai! Chutah, rum zeta melh pah chuan," Kan thlen hunah keiman ka pawm hmasa dâwn tho tho," tiin a thil khai chu a ban leh nghâl zat a, pir zet hian kan in lam pan chuan a kal ta nghâl a, a hnunglamah chuan Tapuia nèn chuan kan nuih zui a.

Mahse, inah chuan Tapuia'n a chang hmasa zâwk leh tlat. Tatei chuan an thil min rawn leisakho dah țhat mawlh mawlh pah chuan Tapuia chu a àn khum hmarh hmarh a, ka nuih an tiza thei viau a ni. Min ngaihtuahin ka lunglèn an hlau thei viau a, an rawn kal theih loh pawh hian min rawn video-call hrãm hrâm țhin.

"U, Chimchimtei hi a kal thei tawh a nia!! En teh u!!" Tapuia'n a tih chûl tâkah chuan kan hawi phei rual țhawt a, a lo kal ve chhat chhat tak tak! A kal thei tih ka lo hre miah lo, ka kaltîr chhin ngai lo miau a.

"I kal thei tawh a nia aw...I kal theih lawm nân Àputea hian eng nge ka leisak ang che aw? Lo kal leh chhin phawt teh. Aw..A va thei tawh tak êm! Lo kal zêl rawh le," tiin a kaltîr zêl a, ka lo țang țùng mai. A kal thei chu ka lâwm tak zet, ka làwm êm avàng chuan dingin ka en reng a, a pa khân hmu ve ta se, a lâwm ve ngawt ang chu, ka ngaihtuah chhuah duh loh ka ngaihtuah leh ta. Ka mittui tla tùr chu duh lovin ka khap fak fak a.

"A pawi lo, luantîr mai mai rawh, ka hre thiam lutuk che a nia," Tatei chuan a lo ti sap a, ani hi chuan min lo hmu fuh thei a nia, han thup tum ve viau pawh hian min lo hmu kar zêl.

"A pa kha la dam se, hmu ve se tih chu thil ngaihtuah àwm hliah hliah a ni; mahse, a lo hmu ve ngei ang chu, a fanu a nia, a lo thlîr reng țhìn ngei ang," a tih leh sap chuan ka lo ngaihtuah loh  ngai miah loh a lo ngaihtuah zâwk a ni tih ka hre chiah, chutiang chuan ka ngaihtuah ngai lo, a hmaa ka pa bula ka sawi pawh kha ka hnemna mai mai a ni.

"I ring chiah maw?" ka tih chuan," Tehrêng mai, a chãng chuan kan hmuh miah loh te hian a rawn kanin a rawn làwm ve țhìn ni pawhin ka hria, Chimchimtei hi lawm miah loh pawh hian a nui leh var var țhìn asin," a lo ti leh a, chutah," Tunah pawh hian a kal thei tih hi a hmu ve reng ang a, a nui ve var var bawk ang chu," a ti leh a.

Naute kal thei lawm nân Tapuia chu tlân chhuak lehin cake a han lei ngei, a chhuah dâwnah eng mah a sawi bawk si lo va, pawisa pawh ka thawn lo, ka inthiam lo deuh khawp mai a; mahse," A putea ka nia, ka tum tùr alawm, ani bâk leisak tùr kan neih loh hi," a lo ti thung a, sawi tùr pawh min tihre lo lek lek a ni. A pa duat ai zawng zawng kha ani tê hian a duat vek ni maiin ka hria, ka naute pahnih hi chu an fel thlâwt a ni.

A kaltîr leh a, a phone video-in a la char char bawk a," Nakinah kan la en leh duh ang, bâkah, ka nute pawh ka hmuh ve duh, an lãwm ve dàwn êm asin," a ti a, chu mai duh tâwk lo chuan Tatei nèn engtin tin emaw an chei danglam a, thlâ an lâksak pah reng bawk a. Chutia an buaipui kual vêl chu ka pa pawhin a lo en duh khawp mai a, a chângin a nui ve hak hak bawk a. 

Chhùn dâr 12 rîk hma hretin ka pa chu ka bual a, hei hi tûn hnai deuha ka tih thar a ni. Tui lum hlîrin ka bual a, a tìrah chuan min hnial deuh dâwn a; mahse, ka duatna ka tihlan ve theihna a nih bawk avàng leh a derdêp êm avàngin ka tilui tlat a, a hnuah chutia ka bual chu nuam a ti viau a ni tih ka hre chhuak a, khua a vawh deuh chuan ni tin bual lovin ni kâr danah ka bual mai țhin.

"Ka tibuai ţhin ngawt mai che tiraw? Chimchimtei enkawl i ngai a, chhúngkhur thil engkim i kutah a awm bawk a, chutah, kei țangkaina nei lo, tibuai mai mai-" a sawi zawh hma chuan," Ka pa, chutiangin sawi tawh suh, ka pa i nih hi. Min tibuai lo va, kan nufa tân hian nang i țangkai lohin tu nge țangkai chuang ang? Ka pa i ni a, Chimchimtei tân pawh a pu i ni bawk, nang lo mi dang tu mah innghahna kan nei lo, chutiang chuan sawi tawh lo hrãm rawh aw," ka lo ti vat a, a thil sawi chuan ka rilru a tina a ni, a inthlahrung a ni tih ka hre reng si a.

"In nufa hian kan khawngaih che u a ni, kei enkawltu tùr che u lah hi heti mai hi ka ni si a, a châng chuan Pathian hi ka dem lek lek fo a ni," a tih leh charh charh chuan," Ka pa, Ani dem ringawt chu awmzia a awm tam lo êm mai, chutiang lam chu ngaihtuah pawh ngaihtuah duh tawh suh, kan dam chho ve zêl ang a, țha takin ka enkawl ve ve dâwn che u alawm. Chimchimtei a leikàn deuh hnuah phei chuan sanghate in man dùn țhìn ang a, hna thawh dànte i zirtîr bawk ang a," ka ti a, a rilru hnual tawh chu harhtîr ka tum ve a ni.

"Bawihi, i chungah hian ka lâwm hlê a ni. Ka rin aiin i pachang daih a, i kum phû lohin i puitling ka ti bawk. Min ngaihtuahin  min hmangaih thiam a, ka thisen hrin ngei fanu pawh nei ta ngat ila, nang aia min duat hi ka ring miah lo," a tih leh chuan," Ka pa, nang lo duat tùr pa ka neih loh hi, i bula kan nufaa kan awm hian kan hlimin nuam kan ti tâwk viau a ni, min hmangaih tih ka hre bawk a," ka lo ti ve leh a.

Chhùn thingpui in lai chuan hre chhuak thutin," Nangni pahnih hi ka lo zâwt miah lo che u a, engati nge class in kal loh?" tiin ka zâwt a, Tatei chu a chek tlak phawt a, chutah," I tar deuh tawh nang pawh hi, vawiin chu chawlh a alawm chawlh," nui chung hian a lo ti a, Tapuia chu ka en a, ani pawh chu a lo nui a. Nu nih tawh chuan nî pawh hi kan hai zo vek tawh, school, college kal laite chuan chawlh te chu kan hre ve tûk tho alawm. Eng chawlh nge ni ang tiin kan banga calendar chu ka han melh phei leh a, vawiin hi Zirtawpni a ni a, chuti a nih chuan... Republic Day tihna a lo ni maw? 

"Nu nih tawh chuan chawlh tih vêl kha kan ngaihtuah thei tawh lo alawm, nî pawh kan hai lo chauh tawh a nih hi, college ka kal laite chuan ka hre ve lutuk tho," tiin Tatei chu ka melh ralh a, ani ve thung chuan," I tar deuh tawh ka tih kha pawm ve mai rawh," a lo ti a. Tapuia chuan naute pawm hleuh hleuh pah chuan," Âma chu a tar țan tawh a nih chu, a tar hma i ti ve em? Nang chu lian thuai thuai la, bike-in ka phur ţhin dâwn che nia, i len thuai thuai ka nghâkhlel a nia," tiin a chalah chuan a fawhsak zuk zuk a.

*******

Ka pa pawh a zia chho ve ta viau a, Chimchimtei a lo kal thei ve ta bawk nèn, an inchhaih peihin an inzui kual nasa thei khawp mai. In bul vêla thlai chìnna hmuna hnim țo pawh a pawt peih ve tawh viau a, a chauh leh phah ka hlauh avàngin ka phal lo țhìn ta zâwk a; mahse, "Rei lo tê tê chauh alawm," a tih ziah avàng erawh chuan a intihharh nân chuan pawi ka ti lutuk hran chuang lo; mahse, a chhuah hlekin a tunuin a zui ve nghâl lo thei si lo va, hna pawh a thawk hlei thei bîk lo, kawngah an inkai a, a nih loh pawhin walker-ah a hnûk țhin.

Kum a rawn tling chho ve a, lawmsak pawh ka tum hran lo a nia; mahse, a nutei leh a putea an rawn kal a, cake nèn an rawn ni nghâl at bawk si  a, kan han rawt chawp chûk chûk a. Chawhnu lamah ka țhian țhenkhatte an rawn lang leh bawk a, anni pawh hian ka fanu birthday a ni tih hriain an rawn kal vang vang a lo ni. Ka pain chaw ei nghâl vek tùra a sàwm avàngin Tapuia tlân chhuak lehin sa a han lei a, kan ri lè lú mai a. Piancham kan lawmsak ber lah chuan nuam hi a'n ti mai mai khawp a, a lâm a, a tlãn kual a, pawm tum pawhin a duh lo.  A intihfin ve tawh êm avàngin a țan tìr lamah zak ve deuh mah se, a hnuah erawh chuan thilpêkho pawm țûn chung chuan a lâm ãt ãt reng a, a nuih loh theih loh.

Sawmzuala pawh a rawn lang hlawl mai. A hmel ka hmuh chuan inthiam lohna ka nei nghâl zat a, a chhan chu Zorina țhianpa kha a inti ve si a, a țhianpa fanu birthday lawmnaah ka lo sâwm miah lo tih ka hriat chhuah nghâl vàng a ni; mahse, a hmelah chuan lungawi lohna han hmuh tùr pawh a awm lo. Mi dang pawhin an hriat sa vek tawh a nih vàng chuan ka sàwmah an lo ngai mai a, nuam lo ka ti ru viau mai.

Mahse, Tatei chuan," Kan u hian a fanu piancham hi lawm a tum hran miah lo va, kan unau hnih hian kan buatsaih chûk chûk zâwk a ni, țhian țhate in lo kal a, kan lâwm lutuk a nia, ani hi chu tlêm hian hriat thiam a ngai tawh a nia, a tar ve deuh tawh a," a ti ta hlauh a, huatah pawh ka chãng chuang lo. A thil sawi chuan min tilãwm daih zâwk, Sawmzuala pawhin a lo hre thiam ang chu maw.

Ka tuihnih ve hlak tho. Thilpêk avàngin làwmthu ka sawi a, min rawn ngaihven țhin avàng leh hun chêp tak kârah pawh keini chhûngkua min ngaihpawimawhna chu hlû ka tihzia sawiin làwmthu ka sawi. Ka rilru tak takin ka lâwm a ni, anni hi awm lo se tûn dinhmunah hian ka ding thei kher lo ang.

Zanriah hma deuh takah kan ei a, kan ei lai chuan Rci'n," Thlaleh ni 20 khian pasal ka nei dâwn a, in rawn kal ngei ka phût tlat dâwn nia, a la hla deuh nain ka hrilh lâwk che a nih chu aw," a rawn tih chuan min tiphu zawk mai, ka en nghâl vat bawk a.

"Lo kal lo thei nâng, Aizawl pawh rawn chuang chhuak ve tawh rawh se, a inkhung rei tawh lutuk a, a bo tawh hial maithei a ni," Mami pawh

chuan a lo ti ve a, kei erawh chuan,"Ka dinhmunah hian ding ve ta ula in chhuak thei bîk tawp lo ang," ka lo ti thung a, chutah, Rci en chung chuan," Ka lawmpui che, a la hla deuh bawk a, lo kal ngei tumin kan lo inbuatsaih ve ang chu," nui chung hian ka ti a.

"Yesss, in lo kal theih dâwn phawt chuan taxi fare tùr ka pe ang che," a lo tih chuan," A zahthlâk e a, heti khawp hian min rawn ngaihsak a, i ropui berniah chuan rawn kal ngei chu kan tih tùr a ni alawm," ka ti a,  Mami chuan,"In lo kal theih chuan kan lo hmuak ang che u," a lo ti ve a, ka âwih loh lutuk avàng chuan chhàn pawh ka chhâng lo.

Naute a sèn laiin a bawhvah theih hun ka nghâkhlel a, a bawhvah theih hnuah," Kal thei tawh se aw," ka ti leh a, a kal thei ta chêng a, awm a hahthlâk zual ta sauh a, pâwn lamah hlîr kal a tum lehnghâl a, kan inûm kawi nasa thei a nia, ka hah phah zak zak khawp mai. Hmeichhe naupang a ni na vàng vàngin a chakin a harh hle a, ka pa awm phei chu ka duh lo, a tihah dâwn lutuk. A dam țha chho ve țan chauh a, a hah phah dâwn lutuk, a chauh phah leh dêr mai ang. Kan in chhûngah thil khawih tùr a tam lo hlauh a, a zia. A thil khalh theih leh a khawih chin chu a nin tàwpah a paih țhuai mai zël a, eng mahin a daih rei thei lo.

Rci pasal neihnaah chuan kal ve ngei ka duh avàngin thilpêk tùr Tatei ka lei lâwktîr a, a chhan chu Aizawl ka kal ngai loh avàng leh an inneihnia ka lei a nih chuan ka duh ang tak ka lei hman ka rin loh vàng a ni. Ka pa chu kalsan ka hreh viau nain amah zâwkin kal tùra min tih tlat avàng leh ngaihtuahawm a nih loh thu min hrilh avàngin hreh ru tak chuan kal tùrin ka inbuatsaih a. An inneih hunserh dâr 11 a nih avàngin tûkțhuan kan ei hma deuh a, taxi Tatei'n min lo biak lâwksak bawk a, chu chuan min rawn lam vang vang a ni. 

Kawnga kan tlàn lai chuan Chimchimtei nuamti chu a țê rai rai a, a riat ve nawk nawk bawk a, a àwm ve tho, motor-ah a la chuang ngai tlat lo va, chuan nuam a ti ve viau a nih ka ring.

"A hmelţhain a duhawm hle mai," tiin driver chuan a ipte a zen rak rak a, sweet pakhat hi phawrhin a rawn pe nghâl a, ka duh lo viau nain duhsakin a pe ve a ni a, lo hnial chu ka duh chiah bîk lo va, a kâwr erawh ka khehsak duh lo va. A chhan chu a thawmhnaw a tiberh vek ang tih ka hlau a ni, kan inchei nalh ve tawh bawk si a, intihfai țhatna hun kan nei thei tawh dâwn si lo.

Aizawl kan thlen chuan Mamite nèn kan innghahna tùr hmun lamah kan tlân ta vat a, kan thlen chuan an lo la awm lo va; mahse, rei kan nghâk lo. Mami pawh a rawn intinalh khawp mai, kan inhmuh chuan," I inchei han hmuh chuan nu i ni tih pawh a hriat miah loh," tia nui chung hian Chimchimtei biang chu a rawn piaisak hlak a.

"Chutiang sawi lo teh, ka confi lo teh a nia, ka inchei khât bawk si a, ka ni hûih tawhin ka hria," ka lo ti a, ani chuan min en vang vang pah chuan," I mawi lutuk, i la dik thlap," tiin a kutzungpui min hmuh a, chutah," Kan kal nghâl mai dâwn em ni ang?" a ti nghâl zat a.

Ka taxi hmanah chuan lûtin Rcite inneihna tùr hmun lam chu kan pan leh ta a, kan thlen chuan dâr 10:30 a ri thuak a, driver nèn chuan kan hman veleha inbe leh mai tùra inhrilhin taxi ațang chuan kan chhuak ta nghâl  a.

An inneihna chu a ropui khawp mai, lawmpuitu mipui pawh an tam, biak ina leng lo khawpin a nia an tam ni. Dàn Thianghlima inneihna hi chu a hlúin mite pawh hian an lo ngaihlú a lo ni, moneitu lam an awmthei thawkhat bawk a, nalh pawh an nalh dùn e, an inhmehin an lawmpuiawm khawp mai.

Inneih inkhâwm a zawha pâwn lamah thlalâk hun an hman lai chuan Sir Manuna ka hmu thut mai, Mami pawhin a lo hmi ve chiah niin," Sir chu.." kan ti chhuak rual țhat a, ani pawhin min rawn hmu ve nghâl.

"E khai, inhmuh a va khât ve!! In lo dam maw?  Maria, pasal i lo nei daih a, min hrilh ve hauh lo bawk a," tuin min en vang vang a, chutah," Chuan, hei hi i fanu a ni maw? A chhùn hle mai che a, a duhawm lutuk!" tijn Chimchimtei sam chu a chùlsak a.

"Nia...i dam țha maw? Naute in nei daih tawh ang chu tiraw?" ka ti ve nghâl zat a, kan inchibai a, ani pawh chuan," Aw, thla hmasa lawk khân  kan nei a, mipa a ni nghe nghe a," nui var var chung hian a ti leh phawt a, chutah, thutak ta thutin," Thil thleng kha tlai khawhnuah ka lo hre ve a, a pawi ka tihpui lutuk che a nia," a ti ta sap a.

Kan indinchilh reng a, eng eng emaw kan sawi nual mai. Mo leh moneitu chu thlâ kan lâkpui ve a, Chimchimtei pawh ka rin ai chuan a awm țha, a tlàn kual chiam ka ring a nia, Biak in chhûngah lah khân a țhu ve hle hle reuh a, a hawi kual nasa deuh e tih lohah chuan naupang nungchang țha tak a ni.

Ka nuin min rawn bia a," In rawn chhuah tho chuan min rawn tlawh ula, Chimchimtei pawh ka hmu châk ve tawh a," a rawn ti a, tlawh chu a àwm viau a ni; mahse, kan in tlawh chu ka châk fahran lo.

"Kan awm dàn tur ka la hre thei mai lo, țhiante tih dàn dán a ni mai," ka ti ta ringawt a, Rci chuan chaw ei ve ngei tùrin min duh a, kan pêk tùr thil pawh kan la pe hman rih lo chu a ni.

"I hman theih hrâm chuan min lo tlawh ngei r'u aw, i pa a awm hleinem," a rawn ti leh a, ka pa vàngin ka tlawh hreh ang tih a hre ve reng tho va, a thil sawi hi a àwm lo viau chuang lo.

Ka pa in lama awm ka ngaihtuah tawh êm avàng erawh chuan ruai chu ka ei ve ta lo, haw mai ka duh tawh. Rci ka hmuh theih veleh chuan thil awm dàn chu ka hrilh a, ani pawh chuan min lo hre thiam khawp mai. Taxi driver chu ka phone a, a rawn tlàn vat  tih sawiin kan inbe tàwp ta nghâl a. Ka fanu hlim nuamti tlãn kual vêl chu ka pan a, khap beh erawh ka tum lo, a chhuah vawi khatna a ni ve a, a hlim ve a ni mai.

"A, naute hmelțha kha a nih hi. Haw in tum tawh em ni?"

Car vâr nalh zet ațanga Sawmzuala rawn chhuak ka hmuh chuan makti rilru deuh hian ka en vat a, engtun nge min lo hmuh ni? Nge helai hnaiah hian a lêng kual? Inneihna lamah kha chuan a kal ve ka ring hran miah si lo.

"Aw...khawnge i kal a? E,  inneihnaah khân i kal ve em ni?" tiin ka zâwt hû a, ani erawh chu Chimchimtei bulah chuan a lo țhu hnai tawh a, ka thu sawi pawh chu ngaihtuah hmel lêm loh hian ka fanu chauh chu a thlîr a. 

"Kal lo ve," tiin a biangah a piaisak zoh a, chutah rawn dingin," Eng nge in nghah? Ka lo thlah ang che u," a rawn ti ta a. Kei chuan," Aih, a ngai lo, taxi ka ko mêk a, a lo tlãn mêk a ni," ka lo ti thung a.

"Traffic a jam nasa tawh ang chu, a lo thleng har ang, lût mai rawh u," a ti leh a, kei pawh chuan," Kan inbe sa vek tawh a, pawisa pawh kan inpe fel vek tawh," ka lo ti leh a.

*HUN KHIRH LEH HARSA I TAWH LAIIN I RILRU KHA TIHFÌM TUM HRÂM LA, CHÎÂI  MAI LOVIN, A ÊNG ZÂWNG CHAUHA HMALAM THLÌR I TUM HRÂM HRÂM DÂWN NIA*