☆LAIRIL LUAHTU☆ - 22 By Dingdi Pachuau

 ☆LAIRIL LUAHTU☆ - 22 By Dingdi Pachuau

"Phone leh la, 'A ngai leh lo, ka țhiante motor-ah ka chuang ta mai,' ti leh mai la?" a rawn ti leh a, kei ta pek chuan," Hei, ka chuang si lo va, eng aiah nge dâwt ka hrilh ngawt ang?" ka ti leh a, ka sawi zo chiah chu a che lai a tàwp chawt a. Che lo chuan min rawn en vang vang, mit pawh khap hauh lovin. Chutah, eng mah sawi tawh lo chuan a inher nghat a, a motor a pan a, lûtin kan lam pawh rawn hawi tawh map lo chuan a tlãn chhuak ta nghâl a.

A khawsak dàn chuan min tihrilhhai titih ringawt nia! Ka thil sawi kha a hua em ni? Eng nge huat tùr awm? Driver ka phone duh loh vàngin a thinrim deuh tihna maw?  Chu chu ka thu thu a ni sia, engah nge a thin a lo tihrim ve ngawt a? 

In kan thlen chuan a la tlai chhe lutuk lo, ka pain min lo hmuh chuan," In lo va haw hma ve..!!Ruai in țheh ve nghâl ka lo ring deuh ringawt asin," a lo ti vat a, kei pawh chuan,"Nia, min sâwm a; mahse, kan rawn ei ta lo mai," ka ti ve mai bawk a, amah ka ngaihtuah vàng a ni tih erawh ka sawi lang duh kher lo.   A theih ang angin rawng a lo bâwl ve a, chaw phei chu a lo chhùm daih tawh lehnghâl, kan kham tho tùrah ngai ang.

Ni khat chu an unaua min rawn tlawh chuan Tatei chuan," U, Chimchimtei hi ka lo lèn chhuahpui teh ang, hnute a hne chuang lo va," a rawn ti chhuak hlawl a, kei chuan rang zet hian,"A tibuai ang che, bâkah, khua a lumin boruak a ro si, a taksain a zo lo ang," ka lo ti vat a.

"Engah nge a zawh loh ngawt ang?  Nangmah anga tawm ngut ngut tùr hian dah mah ta che, naute mai a la nih hi. Nang chu puitling i ni tawh a, ani erawh khawvêl nunphung leh awm dàn zir chho zêl tùr a la ni, hetia i khung reng chuan nakinah mi zînga awm dànte a la thiam lo ang a, a la mãwl hûih mai dâwn asin, hauh hlur ringawt suh," a ti tàn tán a, a thil sawi chu ka lo ngaihtuah ngai loh lam tak a nih avàng chuan sawi mai tùr hre lo chuan ka ngawi reng a.

Tapuia chuan," Nia, bákah, a hrisêl țha a, natna a chhar phah bîk tawp nâng, kan bula a awm chuan ngaihtuah duh miah suh, ka nute pawhin an hmu châk ve lutuk a, nang lahin min rawn tlawh duh si lo, kan chhuahpui pawhin kan rawn haw harpui ang  tihna pawh a ni chuang lo va, phal ve mai la? Kan chhuahpui ve châk alawm, mite pawhin an làwm ve ngawt ang, a țha reuh sia," a o ti ve a, naute lah chuan a bânah kàiin pâwna chhuahpui tùrin a lo sâwm ve sek a, min rawn en zawk a, chutah, Chimchimtei en lehin," Aw le, Aputea nèn drun drunah kan chuang leh ang aw," tiin a pawm nawlh a, a chhuahpui ta nghâl a.

An chhuah hnu pawh chuan ka la ngawi reng a, Tatei vék chuan,"U, i huat tùrin ka sawi miah lo a nia, a nutei leh a puteate'n kan chhuahpui ve châk a, kan chhuahpui lahin kan rawn hruai haw leh tawh dâwn lo tihna a ni lo, ka nuin a hmu chãk a, i rawn chhuahpui ve țum lahin kan inah i rawn kalpui si lo va, hre thiam hrâm rawh," a ti leh duah a.

An chhuahpui ta nge nge e, a phùrzia lah chu, a putea chu a pawt sek mai a ni. An chhuah dâwnah erawh lo hawpui thuai tùrin ka chah mawlh mawlh a, an liam hnu chuan a reh ruai mai. Chimchimtei tel lo hian ka la awm ngai si lo va, reh ka tiin ka khua a har ru ngawih ngawih thei nia. Ka pa lah huan lamah a kal leh daih tawh bawk si a, a reh lutuk chu hrehawm ka ti tak zet.

Zorina thlànah chuan ka awm deuh reng a, zàna ka mut theih hlawl loha lehkhabu ka chhiar theih hlawl lohin ka kal țhin bawk a, ka pa leh mi dang hmuh lai erawh chuan ka tlawh vak lo. An hmuha 'zuau' leh lunglêng khawhar lutuk anga lan ka duh lo, ka nihna lo deuh angin ka awm char char mai a ni; mahse, tunah chuan hun thâwl ka nei ta.

"Ka lo tlawh khât che i ti em? Mahse, ka thinlung i hre vek a tiraw? Min dem mai lo ang tih ka hria asin, ka pa leh kan fanu hmuha pachang taka ka lan a ngai a, an hmuh laia keh chhiat ka thei lo a ni, a chhan pawh i hriat vek kha. An tân nu leh fanu ka ni a, an inngahna ka tlûk chhiat hlauh chuan...ni lo, ka tlu chhe mai mai lo ang. Chuvàng chuan, chakna min pe zêl rawh, i ai ka awh tel a ngai bawk si a, keimah mai chu ni ila chuan ka rawn zui daih tawh ang che," tiin a thlarau chu ka be sap sap a, chutah, hre chhuak thutin,"I thin a rim lo tiraw? Kan fanu leh ka pa ka enkawl dànah hian i lung ka tiawi lo tiraw? Mahse, engati nge ka hmuh ngai loh che? Ka mumangah takngial pawh ka hmuh theihin i rawn inlâr ngai lo tih i hria em? Ka hmu châk êm êm țhin che asin, vawi khat tal chu ka hmuh tùrin rawn inlâr hrâm teh," ka ti leh mawlh mawlh a. 

A ni asin, damdawi ina ka awm laia ka hmuh vuai leh hrehawm zeta ka mumanga ka hmuh bâk kha ka hmu leh tawh miah lo, a reh vung vung mai a, mumangah tal hian hmu ve ila chu ka ti țhin; mahse, ka hmu ngai si lo.

"Hmalam hun hlimawm tak neih kan tum nèn tiraw? Kan hmalam hun hi kan lo hre lo êm a ni, hetiang hian i awm ang tih chu hre lâwk ila chuan i bulah ka awm hauh lo ang, keimah vàng liau liaua hetianga awm hi i ni tak si a, damdawi inah khân awm lo ni ila chuan damdawi in ațanga i haw pawh kha a ngai lo tùr hi a ni a, ka thiam loh vek a ni tiraw? Ka harsatna tawh kha keimah khân lo phur ta mai ila, ka lo telh ve kher che kha ka tihsual liau liau a ni, ka tihpalh tak zet zet aw, awmzia awm tawh lo mah se min ngaidam tùrin ka ngèn mawlh mawlh che," ka ti leh mawlh mawlh a.

"Bawihi,,," ka dàra kutin a rawn dawm chuan ka mittui chu ka hru hul nghâl vat a, ka pa chuan eng chena rei nge min lo ngaihthlâk tawh ang? A hmuh laia helaia awm leh ka mittui tla hi a hmuh ka duh hauh lo asin.

"Bawihi, i inthiam lohna kha paih bo teh, engati nge khatiang rilru kha i put a?  Khatiang ngaihtuah zêl chuan mihring nun hi a dik thei dâwn hleinem, mihring chu kan piang a, kan thi a, kan hmalam hun kan hriat miau loh avàngin hlim takin hun kan hmang a, chu chu mihring nun nawmna chu a ni. Bawiha thihna kha na viau mah se, kei chuan tu mah ka dem lo va, nang hlauh phei chu a them pawhin ka dem lo che, ka fanu duh tak i ni a, tunu duhawm lutuk min pe bawk a, i chungah hian ka lâwm tak tak a ni, thil thleng tawh hnu chu kan siam țha thei lo va, chumi hmang chuan lungngaihna pawh kan insiam duh tùr a ni lo," ka pa chuan a ti dap dap a.

"Ka pa, ka thiam loh a ni, naute an chhuahpui daih sia, ka lungno a lo chhuak leh deuh a ni e, min hre thiam rawh," tiin ka tho ta nghâl a, ani erawh chuan," Bawihi, ka dem miah lo che, i pachang ka ti ka tih tawh kha, ka tunu nèn min duatin min enkawl țha êm êm a, fapa lâksakin awm mah ila fanu țha tak leh tunu hmelțha tak pêkin ka awm a, Pathian hnênah pawh hian làwmthu ka sawi ka sawi tawh asin. Vànduaina lam chauh hmuh rùn hi chuan hringnun hi a harsa a, hlim tak pawhin hun a hman theih loh țhìn a, chu chu Setana pawhin a duh ber a ni țhìn; mahse, ka vànduai lo ka ti a ni, nang leh Chimchimtei ka la nei tlat che u a," a ti leh duah a.

Ka pa rilru sûkthlëk leh ngaihtuah chu a dik ka ti khawp mai. Kei pawh hian ka vànduaina hi ka lo dah lian deuh mah mah a ni, ka pasal chu lâksak ka ni ngei mai; mahse, kei ka hrisêl a, ka pa leh naute enkawl theiin ka la dam a, anni pahnih pawh an dam țha viau, Chimchimtei phei chuan han dam loh leh khawsik pawh a la nei meuh lo a nia, ka vànnei viau zâwk a ni. Mi țhenkhat chuan an pasal leh an fate a rualin an chân a, in leh lo nei miah lote'n an awm bawk a, chutiang chu ka tawng ve miah lo. Ka vànduaina ka lo hmu lian lutuk chu ka zak ta zâwk viau mai, tawng ve tùr erawh chuan ka hmeichhiatpuite ka duhpui hauh lo; mahse...kan thu awm hek lo le, kan hmalam hun lah chu kan hre lâwk thei bawk si lo.

Tatei'n min rawn video call a, Chimchimtei leh a pi inawm dùn lai, an chetla lai chu min rawn entîr a, a awm dàn anga a pi a awmtîr ve zêl chuan ka nuih chu a tiza khawp mai. Ka nu chuan a duat dâwn lutuk tih ka hre reng mai si a, ka ngaihtuah ngai hauh lo khawpa țhain a enkawl ngei ang tih pawh ka hria.

Mahse, ka ngai tawh a ni.

Eirawng ka bàwl laiin ka pa chu thingpui ka siam a, ani pawh chuan làwmthu lo sawi sapin," Bawihi, thil ka lo ngaihtuah kual a," a lo ti a, kei chuan," Eng thil nge ni, ka pa?" ka lo ti vat a, a bulah chuan ka țhu thla ve nghâl bawk a.

Ani chuan," I ngaih dàn a nih loh chuan ka tilui chuang miah lo che a nia..." a tih lai chuan hlauhthàwnna rilru ka lo pu hmanhmawh a, thil țha lo lam a  sawi dâwn a nih ringin," Ka pa, min tihlauthâwng a nia!" ka lo ti vat a, ani pawh chuan min rawn en vang vang phawt a, chutah,"Bawiha lung phun thuai mai hi țha ka ti mai a, chu chu sawi ka tum mai a nia, eng nge i ngaih dàn?" a lo ti leh a.

"Ka pa, pasal ka neih leh thuai i ring tihna em ni? Ka pa, chutiang rilru ka pu hauh lo asin. Ka tân-" rilru na ru angreng taka ka tih lai mêk chuan ani chuan," Bawihi, chutiang lam ka lo ngaihtuah ngai hauh lo, ka dam țhat lai, ka theih ve lai hian phun mai ila tih ka lo ngaihtuah mai zâwk a ni, i rilru tihnat nân ka lo sawi palh a nih chuan a pawi ka ti, ngaihdam ka dîl nghâl e. Kan phun thuai khân ka rilru a hahdam hma dâwn a, ka lo inngaihtuah lutuk vàng a ni ang," zàwi raiha a tih tâkah chuan ka thil sawi chhuah avàng chuan ka inchhîr ru khawp mai.

"Ka pa, i tih dàn dán a ni mai. I rilru tùr ka lo ngaihtuah loh vàng a ni. Ni e, pawisa lamah harsatna a awm chuang lo va, hun remchâng hmasa berah ka lo buaipui dâwn nia, i duh dàn takin ka ti dâwn nia aw," ka ti leh ta zâwk a, ani pawh chuan," I la duh loh rih chuan ka tilui lo che a nia; mahse, phun tùr kan ni tho tho a, kan theih lai, kan remchàn lai hian a țha ka tih vàng a ni pakhat bawk a," a lo ti leh a.

Chimchimteite lo haw hnu chuan mak tak maiin Tapuia puak chu a'n ngèn tlat mai a, ani lah chuan lãwm tih hriat zet hian,"Ka puak i'n ngen ve tlat chu le! Ka paw dâwn lutuk che," tiin a hnung chu a dawh nghâl a, puakpuan ka lâksak a, a pua a, a àwi dârh dârh a, a sâng vei khawn bawk si nèn, a inhmeh dûrh dûrh khawp e.

"Nau puak hi chu i zei ve ngawt mai, i puak dàn, i awih dàn lah kha a nawm hmel bawk si a, fa neih pawh i qualify ve tawh mai ang, i thiam tlat," tiin Tatei chuan a fiam a, kan nuih dar dar a. Kei pawh chuan," A àwm ve tho alawm, in têt lai pawh khân nautelem a puak ve nasat țhin kha maw, i tih dàn apiang kha a ti ve zêl a nia, zei tùr chu a ni," ka lo ti ve a.

*******

A remchâng hmasa berah chuan Zorina lung chu kan phun ta a, a rûk tak chuan phun la phal lo hle mah ila ka pa thu hnial ka duh lo va, a thil sawi lah kha a dik ka ti viau bawk. Zorina puala a hun hnunhnung han hman meuh erawh chuan insùm chu a har ka ti khawp mai, ka țhiante leh ka naute, Picnic spot neitute leh Sawmzuala ka hrilh kual ve a, Sawmzuala phei hi chu ka hrilh hreh khawp mai a; mahse, min ngaihtuah ve êm êmtu niin Zorina ka hriat ai pawha lo hre hmasatu a nihna laiah hrilh a phû ka ti a ni. Ka sàwmte lah chuan min rawn ngaihpawihmawhsak  a, an rawn kim țhap mai. Ruai tui takin ka naute'n an buatsaih a, ka nu pawh rawn kal a duh viau nain remchàn lohna remchâng lutuk a nei thut a, a lo lang thei lo, ka pa erawh chu a rawn kal ka ring lo hrim hrim a, a duh pawh ka ring hek lo. Ka rin ang chiahin a rawn lang lo rêng bawk  a, ka rilru natna a rawn tho thar leh chiang khawp mai. A duh lo a nih pawhin amah ber a awm tawh lo va, tûn hi a puala a hun tàwp takmeuh a ni tawh bawk; mahse, ka vui lo, ka chan tâwk a ni. Ka naute bulah erawh eng mah ka tilang lo, hlim hmel takin ka awm tho.

Zan khat chu Chimchimtei khua a rawn sik ve tlat mai, kan muthilh tawh hnuah a ni a, a tãl deuh set set a, meng lêm lo chuan ka kuah vat a; mahse, a taksa sa deuh vur chuan ka ngaih a tițha ta chiah lo va, thovin light ka chhi êng ta nghâl a. Khawsik enna chuan ka han en a, a khua a lo sik ngei e. Damdawi ka kawl ve reng chu ka pe ta nghâl vat a, a khua a sik ngai mang si lo va, ka ngaih a țha lovin ka hlauthãwng ru kher mai.

Ka muhìl ngam tawh lo hrim hrim. Mi sawi țhin ka hre ve tawh si a,' Zanlaia khawsik chu a hlauhawm bík, an na duh' tiin. A khawsik chu a sàn leh sàn loh ka en reng a, a sâng lutuk lo nain ka muhìl ngam chuang lo. Ka pa kaihthawh mai pawh ka ngaihtuah rum rum hial a; mahse, 'êm a' ka ti leh deuh, ka rilru pawh a insual viau a ni. Hmâ takah ka thawh phah a, muttîr duh lovin ka paw tlat bawk a, ka thlâ a muang thei lo, ka țhutpui thei bawk si lo va, ka vei tawn sek reng mai.

Ka pa rawn tho chuan," Engtizia nge ni? Chimchimtei a dam țha nange?" a rawn ti nghâl vat rêng a, kei pawh chuan thil awm dàn chu ka hrilh a, ani pawh chuan," A va zia lo ve aw...eng êm a ti lo ang chu maw, ani tê hi a dam țha thei reuh a, a sentût tùr emaw a tangseh tùr emaw te hi a ni lo'ng maw le?" a ti dap dap a.

A ni maithei chu pawh chu; mahse, chu pawh chu lo ni se, pa a nei tawh si lo va, keimah mai chuan ka hlauthâwng a ni. Ka rilruin thil țha lo ber ka ngaihtuah thleng nghâl zat lo thei si lo va, ka mang a ang a ni, ka pa bulah erawh ka thup hrâm hrâm thung. 

Dâr 7 vêlah a rawn harh a, a khawsik pawh a kiang rih a, a pângngai viau; mahse, hlauhthàwnna chuan min kiansan hlei thei chuang lo, vawiin chu entîr mai teh ang. Ka pa pawh chu ka râwn ve a, ani pawh chuan," E, i tih dàn dân le, entîr tluk chu a awm hleinem," a lo ti a, ka naute phone kual ai chuan tiin Rcite inneih dâwna taxi ka hman driver kha ka phone leh ta ringawt a, a number ka lo la paih lo chu ka lâwm viau a ni.

A khua a sik leh tawh rih loh avàng chuan a thisen an lâksak ringawt a, eng mah dik lo a awm loh avàng chuan a ni mahna, damdawi a chawh leh ringawt a, lungawi vak lo chuan ka hawpui leh ta ringawt a. Nilêngin a khua a sik lo va; mahse, zàn dâr 10 vêlah chuan a rawn sik leh hluah mai, a hma aiin a khawsik pawh chu a sâng zâwk lehnghâl a. Engtin nge ka tih ang? Ka pa chu a mut tawh avàngin Chimchimtei khua a rawn sik leh tih chu a rawn hre ve kher lo ang, ka kai tho duh ang em? Kai thovin hrilh pawh ni ila, eng mah tih theih a nei chuang lo, rilru hah zet chuan Chimchimtei pang chu ka dehsak ka dehsak ringawt a.

Ka fanu muhìl thei lo tãl tãl chu ka en a, nizàn kha chuan hetiang êm hian a awm lo asin, a khawsik lah hi a sâng reuh si, puan huh deuhin a chal chu ka dehsak a, ka tihuh lutuk ngam bawk si lo. Tunah tak hian Zorina ka ngai takzet, ani kha awm se engtin nge a tih ang? Ka bulah hian awm ve se ka va ti tak! Ka bula awm ve tùrin ka mamawh takzet.

Ka tho thut a, phone chu banin number ka neihte chu ka han enthla par par a, Sawmzuala number-ah chuan ka tàwp chat a, ani hian motor a nei, ka mangan lai hian engah nge ka biak mai loh ang? Ka naute be dâwn ila, mi dang an biak buai chhûngin thil țha lo a thleng thei. Ngaihtuah tam duh lovin ka be ta vat a.

"Maria..." a rawn tih chuan," Sawmzual, ka mang a ang a nia, Chimchimtei khua a sik nasa lutuk, khawngaihin, motor nèn i lo kal vat thei ang em?"  ka ti nawk nawk a, ka thil sawi tùr pawh chu ka ngaihtuah chiang thei lo, chu mai bâkah, a hman em tih leh a mu tawh em tih pawh ka ngaihtuahnaah a awm lo rêng rêng.

Ka pa pawh kaih thawh loh theih a ni ta si lo va, ka kai tho ta nge nge. Sawmzuala a lo tlãn mêk a ni tih ka hrilh chuan,"A țhat chu, damdawi in lamah chuan tihngaihna an lo hre daih zâwk bawk ang chu," a lo ti ve a,  kan pahnih chuan Sawmzuala chu kan lo nghâk ràn a, a lo thleng har ka ti lutuk chu ka țhu hle hle thei lo, ka vei sek mai.

Inah ka pa chu kan kalsan a, rilrua hlauhthàwnna khat țûnin Chimchimtei chu ka pawm a, ka manganna belhchhah tùrin ani lah chu a rawn țê leh deuh țhat țhat țhìn a, ka rilru a chíai, a buai, ka mangang takzet a ni. Ka mittui erawh titla lo tùr chuan ka inpetruh hrâm hrâm a, ka fanu kut chu ka chelhsak a, a chângin a pang chu ka dek leh țhìn bawk a.

Chatuan tluk zeta rei  kan tlàn hnu chuan Damdawi in chu kan thleng a, khawi damdawi in nge tih pawh ka hre lo, ka fanu duat chu ka pawm a, rilru chawmawlh vekin Sawmzuala min hruainaah chuan ka kal zêl ringawt. Min buaipui lo phei se chuan  ka che buai vek dâwn tih hriat reng, ka hlauthãwng, mangang lutuk chu ka ã vek tawhin ka hria.

Room-a luh ve an phal loh avàng chuan â ruai chung chuan pâwnah chuan ka vei ka vei a, engtin nge ka fanu chu a awm ang? A natna chu a serious viau ang em? Ni lo, chutiang chu a ni thei lo ang, a khua a sik mai chauh a ni, a reh leh vat ang.

"Maria...?!!"

Ka en hâ a, ani chuan," Ka thil sawi kha i hre miah lo a ni maw? I rilru tihah lutuk suh, damdawi in kan thleng tawh a, a zia vat mai ang,  doctor thiam tak tak an awm alawm," tiin min hnêm a. Țhutnaah chuan min pawt țhu a, ka țhu ve mai bawk a, ka rilru erawh a muang lo mai ni lovin  ka fanu ka ngaihtuah êm avàng chuan hlauhthàwnna leh a thih mai hlauhna chuan min tuam hneh lutuk a, ka țap lo chauh tawh tak tak a ni.

"A țha mai ang, an jection ngeiin ka ring a, a zia mai ang, a khawsik kha a sâng reuh êm a; mahse, a țha êm êm ang," a ti leh a, a thil sawi chu rin ka duh viau a; mahse, a zia ngei a ni tih ka hriat phawt loh chuan ka ring thei mai lo, ka kut chu ka hûm ruh tlat a, ka maimichhîng ngam lo, ka tlu thla tawp mai ang tih ka hlau.

*SIAM ȚHAT LEH VÈNHIM DUHNA HI HREMNA LEH MUALPHONA  MI VA SIAMSAK AI CHUAN A SÂWT ZÂWK NGEI ANG*