☆LAIRIL LUAHTU☆ - 23 By Dingdi Pachuau

 ☆LAIRIL LUAHTU☆ - 23 By Dingdi Pachuau

Ka fanu ka hmuh ve theih meuh chuan a lo muhìl bâm tawh a, a khawsik erawh tlêm a la awm. A kutah chuan chelhin ka mittui chu dan rual loh hian a tla zawih zawih mai a, a pian tirh ata khawsik pawh la nei lo a nih avàngin chutia damdawi in khuma a mu bâm mai han hmuh meuh chuan insùm a har ém a ni, hlauhthàwnna hlîrin ka lo khat bawk nèn, pasal sûn tawh nu dinhmun ațang chuan a àwm viau a ni.

Ka muhìl ve ngam lo hrim hrim. Mahnia Chimchimtei awmpui pawh chu ka hreh ngawih ngawih, thil țha lo ber thleng thut thei tùr angin ka ngaihtuah tlat a, chuvàng chuan Sawmzuala pawh chu min hawsan mai tùrin ka ti duh lo. 

"Doctor-te pawhin a hlauhthàwnawm loh thu an sawi kha, muthilh ve tum rawh, i chau lutuk palh ang, ani pawh a ngaihtuahawm tawh loh hi, a tlai tawh bawk a," Sawmzuala'n a tih chuan," Nang engtin nge i awm dâwn? I haw lo ang tiraw?" ka lo ti vat a, zahna lam ka dah bo rih ta sa sa, lungmuang ve deuh hleka ka awm theih nân ka bula awm tùr mi ka mamawh si a. Mahni hmasial pawh min ti maithei; mahse, a pa ka chàn tawh miau avàngin ka hlauthãwng hma tawh êm a ni.

"Haw dâwn nâng, mu rawh, in nufain ka lo vêng ang che u," a tih chuan ka thla a timuang suai suai mai, hetia min chhàn hi ka lo beisei rêng bawk; mahse, muthilh erawh ka thei dâwn lo tih ka hre tho.

Chimchimtei tân chuan ka rilruin ka țawngțai mawlh mawlh reng a, a pa ka chân tawh a, hei hi chu min lâksak tawh lo hrâm tùrin Pathian chu ka ngèn lawm lawm a ni. Ani a awm loh leh chuan engtin nge ka pa nèn chauh kan awm theih ang? Kan khua a har dâwn lutuk. Ni lo, a ni thei lo, min lâksak thei tawh lo.

"Aw Lalpa, hei chauh hi ka dîl tawh ang che, ka fanu hi min tihdamsak hrâm rawh, chu chauh chu ka ngèn ang che, thil dang ka mamawh lo, ani chauh hi ka neihchhun a ni tawh si a, a tel lo chuan ka dam thei lo ang. Khawngaih takin, min chhâng lul rawh, ka fanu hi min lâksak suh aw, kan mamawh êm êm laiin a pa min lâksak tawh kha, ka fanu hi chu min zuah lul rawh," tiin mittui tla zawih zawih chuan ka dîl a, țah erawh ka țap chhuak bîk lo ve.

Zîng a lo ni a, a khawsik pawh a reh tawh a, a la muhìl chiah chiah thung. A pang a dài diai a, ka ngaih a țha ve deuh hlek tawh nain thlaphàn rûkna ka la nei tho, a dam chian var loh chuan ka ngaih a ngam zân thei lo ang.

Ka naute pahnih hmel ka hmu thut a, mak ka ti kher mai! Engtin nge hetah kan awm tih an hriat theih? Sawmzuala hian a lo hrilh em ni? A ni ngei ang, keiin ka hrilh miah si lo. Engati nge nizànte khãn ka lo hrilh loh le? Manganna leh thlaphànna khân min tuam nasa lutuk a, ka lo theihnghilh chiang hle a lo ni!

Ka pa ka ngaihtuah chhuak thut, ani pawh chanchin ka la hrilh miah lo, ka  rilru mangang lutuk avàngin ka buai vek a lo nih chiah hi.

"Tate, ka pa amah chauhin a awm a, ka ngaihtuah hle mai, ngaihtuah turin inah i kal thei ang em? A rilru pawh a lo hah viau maithei a ni, chanchin ka la hrilh miah si lo va," ka ti a.

A hnua doctor-te sawi ka hriat leh chuan kan lo tlai țhelh a lo ni àwm e. Dârkâr hnih khat vêl chuan tlai ila ka fanu nunna chu an chhan thei kher lo maithei; mahse, chu erawh  chu Pathian thu thu a ni. 

Damdawi inah kâr khat deuhthaw kan awm. Kan awm chhûngin ka țhiante, ka naute leh Picnic spot neitute an fel hle, min rawn kan ãwl lo va, Tatei phei chu a phar buai khawp mai. In lama ka pa ka ngaihtuah êm avàngin damdawi in nèn a kàr tawn a, a hah ber ang chu. Sawmzuala pawh a bãng bîk lo, kan nufa vàngin a hah hrep mai. 

Damdawi in ațanga kan chhuah chuan ka nuin," Hetah zan khat tal lo riak teh u, chawhlui pawh kan siam ang a, Chimchimtei pawh chu a pu nèn pawh ka ngai ve alawm, a thla kan lo hual ang," a ti a; mahse, ka duh lo, in lama ka pa ka ngaihtuah tawh lutuk. Damdawi ina kan awm chhûng khân Tatei'n tlawh ziah mah se, ka ngaihtuah lo thei chuang lo. Ka nu thu chu hnialin kan in lamah chuan kan haw ta zâwk a, ka nute chuan an hre thiam lo tùrah pawh ka ngai chuang lo.

Kawnga kan tlàn lai chuan Sawmzuala chuan," Engati nge i hnial tlat a? An ngaihtuah tehlul che nèn, zan khat chauh a ni mai a," a ti sap a, min rawn en zauh bawk a; mahse, kei ve thung chuan," Ka pa amah chauhin a awm rei tawh a, zan khat lek pawh ka riah bosan thei tawh lo a ni, bâkah, kei chu pa duh loh, kan in pawh rap tlâk tawh lo kha ka ni miau a," ka lo ti a. A hmain ka chanchin kha ka hrilh ve nual tawh a, a bulah zêp tùr leh han sawiserh deuh tùr awm pawhin ka hre tawh chuang lo.

"Hun kal tawh a nih chu, thinrim laia thil sawi hi hriat reng tùr a ni hleinem. Fa i nei tawh a, a pa lah vànduaiah a țang ta hlauh bawk si a, a inchhîrin a inthiam lo tawh viau ang," a lo ti leh a, kei chuan,"Inchhìrnain thil a siam țha thei tawh chuang hleinem," ka lo ti ve tlat a.

A chek tlak a, chutah," Hmeichhe luhlul tak chu i ni chiang e," a rawn tih chhuah tâkah chuan ka nuih a za khawp mai. Teh thlâwt a! Ka nui sak a, a sawi dik ve bawk êm a ni.

"A dik alawm, luhlul țhat vena tak pawh a ni, luhlul viau lo ila chuan ka bei a dawng ang a, tûn dinhmun hi ka thleng pha hauh lo ang," ka ti a.

Ina kan haw hnuah chuan engtin nge Sawmzuala number kher kha ka lo thlan chhuah nalh ni tih hi ka ngaihtuah lêt a. Ani lo taxi driver pakhat number pawh kha ka la nei reng a, Tateite pahnih pawh, anni pawh phone lova ani ber kher ka phone kha ka ngaihtuah lêt hian mak ka ti a, motor a neih vàngah ka puh thlu ta ringawt; mahse, ani kha phone lo ta ila Chimchimtei nunna kha chhan hman a ni kher ang em? Khati chung pawh khân kan tlai țêp a nih kha, ka ngaihtuah  ka ngaihtuah a, a tàwpa ka thutlûkna chu ani kher min phone-tîrtu kha an awm ngei a ni tih hi a ni.

*******

Chimchimtei a dam țha chho ta zêl a, kan hlim chho ve leh ta viau mai. Chhûngkua chu dam tlàn hian kan lo hlim mai zêlin dam tlàn hi hlimna a lo ni  tihte chu ka hre chiang chho deuh deuh a, ka theih ang tâwkin ka pa leh ka fanu chu ka duat a, an dam loh ka duh tawh lo. Rilru a buai vek a, taksa mai ni lo rilru thlengin min nghawng si a, an taksa tâna țha tùr damdawi leh ei tùr ka ngaihtuah sauh sauh rêng a ni.

Ka nute pawh an ina zàn kan riah loh vàng khân an thinrim lêm lo a niang, an rawn lang leh reng tho. Ka pa tak erawh chu a rawn kal lo va, office kal a ngai miau si a ni, bâkah, a rawn kal duh pawh ka ring chuang lo, rawn kal tùr pawhin ka phût lo bawk.

Tlai khat chu ka pa chuan a pum a nawm loh deuh thu a sawi niah niah a, a țha lo zâwngin ka beng a verh khawp mai. Kan chawhmeh ka ngaihtuah a, pai nuam lo tùr ka siam lo tih ka hria, chaw ni se ka chhùm rum ngai lo bawk. Vawiin lama a thil ei ka ngaihtuah leh a, chutiang tùr ka hre bawk si lo. Pum lam damdawi chu ka intîr a, inentîr mai a țhat ka rin thu ka sawi chuan," A ngai lo ang, motor ka chuan phei chuan a hma aiin ka na zual dâwn asin, ka rùi ngei ngei dâwn a," a lo ti tlat thung a.

Rei lo te chu a chhâwk ve mai a; mahse, a hnu deuhah a rawn na leh a, amah upa lam a ni ve tawh nèn, min timangang thar leh a, damdawi han pêk ringawt lah chu ka ngam meuh si lo, Ulgel chu a in leh ringawt țhìn a, chu lah chuan a chhâwk rei lo ngang mai si a. Ka mangang chuan ka hmel hriatte biain doctor an hriatte number ka dîl ta ngawt a, min rawn pêkte chu zah pawh sawi lo chuan ka be kual a, ka pa pum nat dàn min rawn zâwh fiah chuan ka hriat dàn ang ang chuan ka hrilh zung zung a. Damdawi pêk tùr min hrilh pah chuan a țha berah chuan damdawi ina inentîr min rawn chawh zêl a, dik ka ti lutuk; mahse, ka pa ber hian a hreh miau mai si a, ka tilui theiin ka ring lo.

Zàn chu kan mu țha ve thei mai a; mahse, hlauhthàwnna rilru ka put miau avàngin ka mu nghet ve thei lo. A tûkah chuan ka pa chu inentîr lam bawk chu ka sawipui leh a, a pum nuam lo a lo zia deuh tawh ve deuh rih nèn, a la duh lo chhunzawm zêl a. Han tihluih viau ka duh bîk si lo; mahse, a nâ chu a chhuak leh ang a, a nasa zâwk a thleng ang tih ka hlau a ni.

Zia deuh angin lang mah se a nâ chu a lo chhuak leh zêl a, damdawi in lama kal a duh miah loh avàng chuan ka mang a ang tak zet tawh a ni. Na tak a ni lo a nih pawhin ani, upa lam tawh tân chuan a na bîk tawh ang tih ka hre ve reng si a, ka khawngaih viau a ni; mahse, damdawi ina kal a duh tlat bawk si lo, tihngaihna vâng ka va ti tak!

Kâr khat vêl zet a ni ta, a thil ei pawh a nêp sâwt ta viau, a lem hlei thei tlat lo, a ei ve deuh chuan a pum chu nâ a ti zêl mai, ka manganzia chu nasa tawh tak a ni. Doctor ka biakte lah chuan a taksa chhûnglam an check loh chuan a nat dàn an hriat theih mai loh thu min hrilhin cancer pawh a ni thut thei tih min hrilh phei chuan ka thlâ a phãng ngawih ngawih. Ka pa lah chuan inentîr chu a duh lo bur a ni tawp, sawipui theih a ni lo. Ka hnênah chuan," Inentîr ka ngai lo, ka upa tawh a, eng natna emaw chuan ka la boral ngei dâwn, inenkawl chiama sâwtna awm miah lova pawisa sèn țeuh țûl ka ti lo. Țawngthu chhe lovah, tuna ka natna hi ka kalpui ta a nih pawhin thlamuang takin ka chàwl thei tawh dâwn tho a ni, Bawiha lung kan phun tawh a, i tân enkawl buai hrep ka ngai lo bawk ang a," a ti charh charh a.

Kei chuan," Ka pa..!" ka lo ti țuau a, chutiang thil a sawi thleng daih chu ngaihthlâk nuam ka ti rêng rêng lo. Ani a awm loh phei chuan keini nufa ringawt hi engtin nge kan awm ang? A râpthlâk dâwn lutuk, ka lungchhia chu ka insûm thei lo.

"Bawihi, in nufa hian ka ngaihtuah in ngai hleinem, Pathianin a ngaihtuah vek dâwn che u alawm. Kum upa tawhte hian țhalai zâwkte tân hun leh hmun kan ken hi a ngai a, hmalam hun hlimawm in la nei thei a, keini upa tawhte tân chuan dam rei viau pawh hi lungngaihna leh chhûngte tân buaina mai kan ni, chuvàngin, ka hun a lo thleng ve ta a nih pawhin min lawmpui zâwk ang che, i nu leh Bawiha ka hmu thuai thei dâwn a," a ti leh charh charh a.

"A, ka pa, chutiang chu sawi rih lo ang, kan bulah awma min awmpui reng tùrin ka la duh che a ni, i dam leh thuai dâwn alawm, damdawi țha ber berin kan enkawl ang che," ka ti a, ka mittui chu a hmuh loh turin ka hru hul a.

Inentîr lam ka sawipui tawh lo; mahse, doctor ka râwn kual nasa sauh a, a nat dànte chu ka hrilh chuan cancer a nih ngei kan ring ta hlawm a, inentîr theih ni hek lo le, a nâ a chhuah chânga jection-na tùr damdawi min hrilh tawp a, Tatei lei tùrin ka hrilh leh hmiah mai bawk a. Anni, ka naute pahnih hi an awm lo ang tih ka hlau ngawih ngawih, ka buai êm êm laia ka tirh theihte an ni a, nakinah eng emaw țha tak ka tihsak pawh an ngai ngei ang, ka tibuai thei êm mai.

Vànneihthlâk takin Tatei chuan a țhiannu Khawngaihi u, Hmangaihi a rawn kalpui thei hlauh a, Hmangaihi chu nurse zir chhuak tawh a ni a, a felin ka pa chhaih dàn chu a thiam viau mai lehnghâl a, a fuh dâwn khawp e. Damdawi múm a ei țha thei bawk si lo va, jection chu a lo țha khawp mai. Hmangaihi'n ka pa a jection lai chu ngun takin ka lo en a, thiam ka duh ve a ni. A chhan chu ka pa nâ chu engtik hunah pawh a chhuak thei si a, chutih hunah chuan Hmangaihi a lo remchâng lo ve thei tlat. Kei, a bula engtiklai pawha khawsa hian ka thiam chuan engkim a fel thluam mai dâwn a ni, Hmangaihi koh buai kher pawh a ngai tawh lo ang a, ani tân lah rawn kal  reng chu a buaithlâk dâwn bawk si a.

Tlai khat chu ka pa chuan," Bawihi, thil eng emaw sawipui che ka va duh êm!" a ti a, a nâ a rawn awm leh tawh rih lo va, Chimchimtei pawh âwka chuan a chhaih a chhaih peih rih a ni.

"Aw, ka pa, eng thil nge ni ta?  Mahse, min kalsan i tum lam thu kha chu ka ngaithla duh lo a nia," tiin a bul hnaiah chuan ka țhu nghâl a, Chimchimtei chu chhuata pher ka phahah chuan țhuin nautelem a khàl thung a, a chângin kan lam rawn enin a thiam ang angin a rãk ve nawk nawk bawk a.

Chimchimtei en reng pah chuan," Bawihi, ka fanu i ni a, i kutah engkim ka dah vek a, thil chhe ber a lo thleng a nih pawhin ka ngaihtuah lo che, mi chhel tak leh pachang tak i ni tih ka hre tawh a, ka ngaihtuah pawh i ngai lo rêng a ni. Lungleia kan in pawh saw a rei ve tawh viau a; mahse, kan zàwlpuite, mi harsa ve tak takte'n an luah miau a, i lo ngaihven țhin dâwn nia aw, in luah man pawh a tam ve viau tawh kha maw, khawih che miah lovin bank-ah kan dah zêl a ni a, ka Chimchimtei nèn hian hna hahthlâk thawk lova inchàwm nân in hmang thei ngei ang," a ti sap sap a.

"Ka pa..." ka tih chuan," Bawihi, thil thleng thei lo a ni hleinem, ka upa ve tâwk tawh ka tih kha, fanu fel tak nei chein tunu hmelțha tak ka hmu tawh bawk a, ka dam rei ve tâwk viau tawh a ni. Ka boral hunah chuan Bawiha phùmna bulah hian min lo phûm ve ngei ula, kan pafaa kan mut dun chuan a tu ve ve mah kan mal lo ang," a tih leh chuan ka mittui chu a lo tling leh kawl kawl tawh a, ka pain hetiang lam a sawi ziah hian min kalsan a tum hnaih tawh hmel ka ti a, ka lung a chhe sa êm êm a ni.

Chutah, sawi zawm lehin," Nang pawh i la naupang a, nakinah ka fapa ang chiaha nangmah duhtu leh hmangaihtu pawh i hmu leh ngei ang, ka fapa vàngin mi dang neih leh kha tîm miah suh ang che. Hlim taka awm leh hi i phû a, ka Chimchimtei pawhin pa a mamawh ngei bawk ang. In nufaa hmangaih theitu che u tawng leh ngei ula, chutih hunah chuan tuna ka thu sawi hi i lo hre chhuak vang vang dâwn nia. Bawiha lung pawh kan phun fel vek tawh a, Mizo dànah chuan pasal nei leh thei tawh i ni bawk, i fihlîm vek tawh," a ti leh sap sap a, a sawi thui êm avàng chuan a hah deuh a ni ang, a chàwl vang vang rih a.

"Ka pa, chutiang ngaihtuah thei pawh ka nih loh hi, i bula ka awm hian ka hlim tâwk a, Chimchimtei nèna enkawl che u hi ka la ning hauh lo bawk. Harsatna a lo thlenin kan hmachhawn dùn a, ka chakna i  ni. Min kalsan thuai i tum hi ka hre thiam thei lo che a ni, kan nufain kan la mamawh êm che hi, a rêng rêngin Pathian pawh hi ka dem rum rum mai," lehlam hawi pah chuan ka ti a, ka mittui lo tla chu a hmuh ka duh lo a ni.

"Bawihi, engkim mai hi Pathian ruat a nia, kan chungah eng thil pawh lo thleng se kan lo dawnsawn thiam hi a pawimawh êm êm a ni. Hre thiam lo ta tlat ila awmzia a awm lo, ka chunga thil thlengah hian Pathian ka dem lo a, nang pawhin dem suh aw, ka awm loh hunah pawh a enkawl reng dâwn che u ka tih kha. I pa pawh haw viau suh, min hringtupate hian an fate hi min haw rei thei hauh lo ang tih hi hriat reng tùr a ni. A duh loh záwng takin thil i ti a, a thin a rim ve a ni mai a, a haw tak tak hauh lo che, tu pa mah hian mahni fate haw reng thei kan awm hauh lo," a ti leh dap dap a.

*******

Ka pa chu cancer a nih ngei ka ring ta, a taksa a chhe sâwt khawp mai a. Tunah phei chuan ruh, vunin a tuam ang mai a ni tawh, a nâ pawh a chhuak zingin a châng chuan a damdawi pawh chuan a chhâwk țha thei tawh lo nite hian ka hre țhin. Ka khawngaih a, theihtâwpa duatin ka enkawl a, a bulah ka țhu chawt a ni mai. Tapuia leh Tatei bawk an țangkai leh ta, min awmpui chawt a, keiin ka pa ka buaipui a ngaih avàngin Chimchimtei enkawl pahin rawn picnic țhìnte an lo buaipui a, anni hi awm lo tùrin ka suangtuah ngam lo zâwk.

Țhiante an bengvâr êm êm bawk a, ka pa chu an rawn kan ãwlo bawk, a țhenin pawisa min pe a, a țhenin ei tùr, a țhenin zànah min rawn riahpui lãwp lãwp bawk. Kan chunga an țhatna hi kei hian engtikah mah ka rùl thei ngai dâwn lo tih ka hria, ka țqwngțainaah Pathian hnênah làwmthu ka sawi tawp mai a ni.

Sawmzuala pawh a rawn lang zut thei lo nain a rawn lang ve reng reng tho a, Insomnia lamah a buai ve reng a ni tih ka hria a, ka lo inthlahrung țhìn zâwk. Tatei leh Tapuiate nèn chuan an inkàwm ngeih hle a, a châng chuan Tatei nèn pawh an rawn kal dùn lâwp lâwp bawk a, hetiang țhian min ngaihsaktu ka nei hi vànnei ka inti viau a ni.

Zàn khat chu ka pa muthilh hnuah chuan kan unauho chuan kan țhu khâwm tal tal a, Tapuia'n Chimchimtei a pawm muhìl tawh bawk a, thingpui hâng kan dawm far a.

"U, thil chhe ber lo thleng ta se, engtin nge awm i tum ang? Hetah in nufa chauh chuan in awm thei àwm si lo va," Tatei chuan a ti sap a, Tapuia pawh chuan ka chhànna a hre châk nge ni, min rawn en nghâl vat a.

"Ka hre lo le, ka la ngaihtuah chhin miah lo; mahse, nia, hetah chuan kan awm reng thei hauh lo ang, Aizawla in kan luah ve mai pawh a ngai ang chu; mahse, Lunglei lamah kan phei ve phawt ang a, kan in va ngaihven ve pawh a ngai ang chu," ka lo ti a.

"Nia, Lungleiah chuan va awm suh u, kan inah rawn lêt leh mai la?" Tapuia'n a tih chuan za lo zet hian ka nui hak a," Ni lo ve, Tapui. Kan inah saw chuan rawn lêt ka tum tawh lo hrim hrim, sawi chhuah pawh hi ka duh lo, thinlungah thil hlui a lo thar ziah a," ka ti a. A ni lah tak a, nun hlui, hun kal tawh chu mitthlaah a rawn lang nghâl chuai chuai mai rêng a, rilru a rawn na thar leh a ni.

"Ka pu hian rei tak chu a dampui tawh miah lo ang che, Aizawlah kan in hnaih lamah in i luah ang a, hman chângin kan rawn kal zung zung thei ang a, Chimchimtei tân pawh a țha dâwn asin, a len deuh huna a school kalna tùr zawng zawngte ngaihtuah chhoh a ngai dâwn a, khawpui lamah chuan zirna a țhat bâkah thil a awlsam zâwk bawk a," Tapuia chuan a ti duah a, Tatei pawh chuan lu lo bûk nghat pah chuan," Nia, in nufa chauh in ni tawh dâwn a, mi zah pawh in kai lo mai ang, kan in hnaih lamah in luah tùr ka lo melh ang, eng emaw hlek awm palh ta se, in hlat deuha awm zawng a fuh lo," a lo ti ve a, an ngaihtuah thui dùn khawpin ka hria.

Zàn lamah kan mu thei lo ta tial tial a, ka pa chu chhel viau mah se a natna chu a na êm êm mai si a, jection pawhin a daih rei tawh lo. Ka manganzia hriain ka țhiante chuan damdawi in panpui mai an rawt a; mahse, ka pa duh loh a nih vàngin ka remti lo, a țawng thei tawh lo va, a meng ve țâwk țâwk tawh a ni mai; mahse, chuti chung chung pawh chuan min kalsan mai tùr chuan ka phal thei lo. Ka innghahna ber Zorina a awm tawh lo va, ani dawta ka innghahna ka pain min kalsan leh chu ka phal thei lo a ni, kan nufa hian kan mal dâwn lutuk. 

Ka nu pawh a rawn lang ve ta nawlh nawlh mai. Chimchimtei ka buaipui hman tawh loh avàngin Tatei leh ka nuin an inchan chhâwk a, kei chuan ka pa ka buaipui tawp tawh mai. Min kalsan hma chu duat theihtàwpa enkawl hi a phû ka ti a, ka tâna a țhatna zawng zawngte ka ngaihtuah lêt phei chuan enkawl hi ka kham lo, a natnate hi tuar țhen thei ila, min kalsan tum rih lo se ka ti.

Mahse, mihring hi chuan tih theih kan va nei tlêm sî êm! Kan duhnate hi Pathianin min hriatpui si loha A remruatnaa kan tel ve loh miau si chuan A tum hi tu mahin kan dãl thei si lo. Nilaini zînglam dâr 3:34-ah natna rêng rêng awm tawh lohna, lungngaih leh țahna awm tawh ngai lohna ramah ka pa chu A hruai ta, ka țap ngâwih ngâwih a, min kalsan mai chu ka ui a ni, kan bula la awm rih tùrin ka la duh êm asin, a tâna ka tih theih chhun chu mittui leh țah hawm hawm mai chu a ni ta.

"Ka pa, min en teh, engtin nge keini nufa chauh hi min kalsan theih? Ka pa, ka thlah phal lo che, min kalsan tùr hian ka phal lo che asin, keimah mai chuan engtin nge i  Chimchimtei hi ka lo enkawl theih ang? Ka pa, ka pa," tiin ka țap rawng rawng a.

*I TÂNA THIL ȚHA BER CHU TU EMAW, I TÂNA THIL ȚHA BER DUHTU KHA A NI*