☆LAIRIL LUAHTU☆ - 24 By Dingdi Pachuau

 ☆LAIRIL LUAHTU☆  - 24 By Dingdi Pachuau

Ka pa duh ang leh min chah ang ngeiin Zorina phùmna bulah chuan kan phûm ve a, tunah chuan nâ nei tawh lovin a muhìl siai siai tawh ang chu. Ka lawmpui rualin ka thîk viau zâwk a ni, an sawi anga chhûngte boral tawhte nèn an inhmuh nghâl phei chuan, ka kal ve châk daih zâwk mai. Zorina a hmu dâwn bîk si a, hmuh ve ka châk ngawih ngawih asin.

Ka naute pahnihin min awmpui chawt a, ka pa bungrua chinfel tùr a tam ve tho bawk nèn, min chhâwk zângkhai khawp mai. Kei lah ka mittui a tla reng mai bawk si a, rilru ka hmang thei lo bawk nèn, ka chau ngawih ngawih. Tatei phei chuan nakîna chingfel mai tùrin min ti nghe nghe a; mahse, kei erawh chuan chinfel thuai ka duh thung, a chhan chu ka hma hun tùr ka hre lo va, helaiah pawh hian kan awm reng thei tawh lo maithei asin, keimah chauh chuan engtikawng mahin he spot hi ka enkawl thei dâwn si lo. Spot neitu Pu Zawmate țhat avànga an țhatna chhawr chhunzawm zêl ringawt lah hi a tihchi hauh si loh, min hre thiam rei tawh lutuk si a.

Ka țhianteho leh Sawmzuala pawh an rawn kal ve reng reng a, min ngaihtuahzia ka hriat hian ka lâwm a, mi an ngaihtuah nasat tawhzia ka chhût lêt a, ka chunga an țhatna zozaite hi kei hian engtikah mah ka rùl thei dâwn tawh lo, Pathian chauhin a rùl thei ang.

Ka nute chuan Tateite sawi an hria a ni maithei, ina lêt rih mai tùrin min sâwm a; mahse, chu chu khawvêla ka tum loh ber a ni awm e. Ka hnial fithla hmak a, ka naute lo ngaihven ve deuh in luah tùr pawh chu ngaihsak lovin Mami lo biak thàwi in chu ka ngaihven zâwk a, luah man an la sawi chiang chiah lo nain in chu a len fahran loh avàngin a to a ring vak lo. Kan nufa chènna tùr a ni mai a, làwilèn nuam deuh leh fâl vak lo ka duh a ni.

Hun kan neih veleh in en tùr chuan kan chhuak a, kan in luah tùr chu Bungkawn vêngthar lamah daih a lo nia, kawngpui ațangin step-a thui vak lo chhukin building ngîr khup khup kan pelh hnuah fâl deuh hlekin building pakhat hi a lo ding a, chu building hnuai chu hmun hnihah țhen a ni a, lehlam chu kan luah tùr chu a ni.  Ràl lehlamah  chuan in pawh a awm nual a, fâl lutuk tak chu a ni hran lo. Kan țhenawm hnaih têah erawh in a awm lo thung, ka duhthusàm tak chu ni lo mah se, luah man a to lêm lo a, tui a țha a, ka duh dàn takin ni êng erawh a hmu țha thung a, min zawnsaktu Mami lakah a inthlahrunawm tawh bawk nèn, fâl deuh hlekin hre mah ila luah mai chu ka tithlu ta a. Tateite erawh chuan an duh lo khawp mai; mahse, an sawisêl lang duh chuang lo va, anni sawisèl khân awmzia a nei dâwn chuang tlat lo tih an hre ve miau a ni.

Kan chhuah hun hunah Picnic Spot enkawltu tùr mi thar nupate an lût ve dâwn a, awm khawmuan vak theih a ni lo. Kan chhuah dâwn meuh chuan ka lung a chhia a, ka duh duh hunah ka tlawh thei tawh kher àwm si lo va, ka ngai ngawt ang. Zànah pawh ka muhìl thei lo, Tateite muthilh hnuah ka tho leh țhem țhem a, ka hmangaihte pafa zàlna hmunah chuan ka va țhu reng a.

"Ka va ngai tak che u êm! Tunah hian ka bulah la awm ni ula chuan heti êm êm hian ka malin ka khua a har bîk lo ang a, kan nufaa kan chhuah pawh a la ngai lo tùr. Naktûk khian hlim taka kan chènhona țhin  ngei hi kan nufain kan chhuahsan dâwn tawh asin, in bulah kan awm thei tawh dâwn lo, in khua a lo har ang em? Nge kan chhuak tùr hi min ngeiin min haw zâwk?" tiin ka phun sap sap a, zàn boruak chu a vâwt reuh khawp mai lehnghâl a, intihlum nân ka inkuangkuah thãn a.

"Ka pa, i thlànlung pawh ka la phun hman rih lo va, min lo hre thiam hrâm mai rawh aw, ka rawn phun vat ang, rilru hahdam takin lo awm rawh, ka rawn thlahthlam rei dâwn hauh lo che," ti sapin Zorina thlànlung chu ka en leh a," Ka pa nèn chuan in lo inhmu tawh ang chu tiraw? Hlim takin in awm em? In bula lo kal ve daih ka va châk tak! Mahse, kan fanu hi ka thlahthlam thei si lo, a tân ka nun hi a la ngai si a, min lo thlîr reng rawh u aw, in tel lova hringnun ka hmang chho tùr hi ka huphurh ngawih ngawih a, chuvàng chuan min lo thlîr reng tal rawh u aw, rei ka bo lo ang, ka rawn tlawh leh thuai ang che u," ka ti sap sap a, awm rei thei pawh ka ni lo, Chimchimtei a lo harh ang tih ka hlau a, Tatei lahin ka chhuahna a hre àwm si lo.

"Naktûk kan chhuah dâwnah ka rawn kal leh ang, thlamuang takin chàwl ula; mahse, in awmna ațang erawh chuan min lo thlîr reng ang che u, ka mangțha rih ang che u, Chimchimtei a lo harh palh ang," tiin an pahniha thlàn chu ka thlîr tawn leh vang vang a, chutah, inherin in lam chu ka pan ta nghâl a.

A tûk tûkțhuan ei khamah chuan kan bungraw phur turin motor a rawn kal a, Mami tih loh țhiante dang ka hrilh hauh lo nain a hman hman an rawn kal leh tho a, motor-a bungraw load leh kan in luah tùr hmuna unload thlengin min pui leh ta vek mai. Ka țhian felzia leh ka tluk lohzia ka ngaihtuah a, heti khawpa min ngaihsaktu țhiante ka nei hi Pathian hnênah làwmthu ka sawi mawlh mawlh lo thei lo.

Thil dang ngaihtuah hmasa lovin ka pa thlànlung tùr chu ka buaipui nghâl a, ràlna pawisa tling khâwm chuan ka duhthusàm zân a daih lo deuh hlek a, ka pa tâna ka tih theih tàwp ber a nih tawh avàngin ka duhthusàm zânin ka siamtîr a, siam zawhah rei rial lovin ka phun nghâl bawk a, heti hi chuan ka pa thlarau pawh thlamuang takin a chàwl ve tak tak thei tawh ang chu.

Lunglei lamah phei lehin kan in chu ka va ngaihven leh a, kan in luahtute pawh chuan ka phei a ni tih an lo hriat chuan an rawn lêng ve nak nak hlawm a, kan chhiat tawhte kha an lo hre ve vek bawk si a, pawi an tih thute sawiin min rawn hnèm ve a, an fel hlawm ka ti tak tak a ni, kei chuan ka hre chiang hlawm miah lo a nia, kan in phel chiaha awm Pa Dikate pafa phei chuan Chimchimtei chu an làwm khawp mai a, an rawn chhaih reng mai a ni. Ani lah chuan chutia amah chhaihtute chu huat thu awm bîk hek suh, a va ko zârh zârh reng a, rilru kal ding lutuk tùr pawh a tizia khawp mai.

Tlai khat an pafaa an rawn lèn lai chuan," Pa Dik, in khuaahte khian awmpui tùr hi an awm thei ang em le? Hlawh neia awmpui tùr a nia ka tih ni, nula kher pawh ka ti lo, tleirâwl lam deuh pawh a pawi chuang lo va," tiin Pa Dika chu ka zâwt a, ani chuan," Ka va hre chiang mai lo ve aw, chhûngkaw harsat avànga sikul kai lo tleirâwl lam khi chu an awm ve nual mai a, Dingliani fanu khi tu nge a hming kha, Mama?" tiin a fapa Mama chu a zâwt nghâl a.

Ani chuan,"Siamtei a ni em?" a lo ti vat a, Pa Dika chuan," E, ni dâwn tak e, Siamtei a ni tak alawm, kum 15 a ni vêl ang, a la nau deuh hlek a," a ti leh a, kei chuan," A pawi lo, awmpui han tihah ka chhuah duh chânga in lama nau lo awm tùr kha a ni mai a, hna hahthlâk a awm lo ang," ka lo ti vat a.

Lungleia kan awm chhûng chuan chhûngteho pawh han tlawh chhuah a țha ti viau mah ila ka tlawh ta lo. Aizawl lama kan phei dâwn chuan Pa Dika hnênah chuan ka number dahin Siamtei chanchin chu min lo thlîthlàisak tùrin ka chah leh a, ani pawh chuan a rang thei ang bera min lo ngaihvensak tùr thu a sawi chuan ka thaw a veng deuh huai a. 

Kawng lakah Chimchimtei chu a rui deuh a, a luak bârh bârh hnuah a muhìl ta vang vang a, ka pawm avàngin ka muhìl ve thei lo, bâkah, nu ka ni ve tawh, fa ngaihtuah tùr ka nei ve tawh tlat a, a muthilh theih loh. Lungleia kan in chungchâng chu ka ngaihtuah kual a, kan luah lai kha mi chu luahtîr ta ila, sum lâk luhna țha tak chu a ni ngei ang chu; mahse, Zorina nèna kan sùlhnu ka hmuh theihna awm chhun a ni tawh a, mi dangin luah ta se, an chîl pawr vek dâwn a, chu chu ka duh lo. Sum lamah erawh chuan duh loh tak tak a awm thei lo tih chu ka hria; mahse, eng êm kan nih phah lo ang chu ka ti, a hma zawng pawhin tu mahin an luah hleinem le.

Kan nufa tê chuan kan in luah tharah chuan kan han khawsa dùn rak rak a, naupang tân veranda thlanglam chu a sàn deuh avàngin a him lo ka ti a, chu lama kal chu ka phal lo hrim hrim a ni tawp. A hungna an siam chuan ka duhthû a sâm lo a ni, pipe an kham phei tawp a, hmun thumah. Naupang  eng mah la hre thiam lo tân chuan làwn mai a awlsam dâwn tlat, kawngkhàr awm chu ka hawng lo tawp mai a ni.

Tapuiate pawh an exam a hnaih tawh avàngin an rawn lêng hman tawh bîk lo va, khua a har duh khawp mai, kan in lehlam chiaha awm lah chu a han reh thei khawp mai a, țhenawm kan nei a ni tih pawh a hriat loh. In chungah erawh in neitute an awm a, anni hi chu an rual deuh a, an thãwm pawh a na deuh, bâkah țhalai deuhte an awm bawk nèn, an ri leh dar dar țhìn.

Pa Dika pawhin min rawn be leh tawh a, Siamtei chu a remchâng thei dâwn a nih hmel e. A làwmawm viau ang chu, nakinah hetiang reng hian kan awm thei àwm si lo va, Chimchimtei leikàn deuh hnuah hna thawh tùrte ka zawn ve loh chuan, pawisa a chhuak hiau hiau mai dâwn asin, kan heti kumkhua thei lo ang, pawisa hmuhna ka dap ve a ngai.

Ka țhian leh hmel hriatte ka be kual ve nasa a, ka thawh àwm tâwk min lo zawnpuia min bengvàrsak tùrin ka ngèn leh tawp hlawm mai. Tunah hi chuan ngaihtuah tùr pawhin ka tân chhuah chhuah a har si a, anni talin min lo bengvàrsak theih chuan a làwmawm dâwn êm asin.

Khua a har duh êm avàngin TV ka lei a, Chimchimtei làwmah a tla a, cartoon kan ti deyh reng ta mai. Zâi kan hmeh chhuah fuh lahin a lo zâi ve mai bawk a, an làmin a lâm ve zél a, TV chu kan hlimpui khawp a ni. 

Zan khat chu min rawn hrilh lâwk miah lovin Tapuiate unau an rawn lang hrãwk mai a, Chimchimtei'n a lo hmuh chuan nui var varin Tapuia chu a lo pan vat a, ani pawh chuan a lo pawm vat bawk a.

"E, TV thar in nei tawh a ni maw?" Tapuia'n a tih chuan Chimchimtei chuan TV chu kâwkin eng eng emaw hi a thiam ang ang chuan a lo sawi ve a, a râk deuh chûl a ni ber mai, chu chu kan nuih dar dar a.

"Eng nge in lo tih dâwn?" ka tih chuan anni lah chuan," Kan rawn lang khât tawh lutuk a, kan rawn riak dâwn," an ti mai a. Tapuia hnênah chuan," A nih, khawiah nge Bike i dah?" ka ti leh a, ani chuan," Vànneihthlâk deuhin khîti lai kãwi zau laia building lian ve deuh kha ka țhianpa Dawmate in a nia, an garage a âwl zau deuh bawk a, ka rawn dah ve hmiah mai," tiin min lo chhâng thuai a.

"A hnawk lo ang maw? I lock țha em?" ka ti leh hrâm a, ani chuan," Țha tehrêng mai, hnawk an ti lo ang, an car pakhat Champhai lamah a zin daih a, an thâwl lutuk!" a lo ti leh mai a, ka ngaih chu a țha ta deuh hlek a.

"U, Sawmzuala'n a lo tlawh tawh che em?" tia Tatei'n min zawh chuan," Tlawh lo, engati nge?" ka lo ti hâ a, ani chuan," Ka ti deuh mai mai, a zin deuh reng a, a rawn haw deuh chauh vàng pawh a ni maithei a ni," a lo ti mai a. Tapuia thung chuan," A hre thei asin, chat chat mai a," a lo ti zauh a.

Tatei chuan," Mai mai a che," a lo ti hlak a, ani lah chuan," Kha, i hmel pawh a sen țûn țûn kha aw, zêp zêp lo mai rawh, eng emaw chu a awm chiang alawm," a lo ti leh a. A ni lah tak a, Tatei chu a sen deuh țân tak tak a! Sawmzuala nèn an inkârah eng emaw chu a awm a ni ngei ang, nula tlangvâl an ni a, thil awm thei lo pawh a ni hleinem.

Zàn chu an riak ta ngei a, Chimchimtei chuan khuma mut chu  duh lovin a nuteite bula mut chu a ngèn ta tlat mai a, kan han inthlèm viau pawh chuan a duh thei lo, a nutei'n a mutna tùr chhuata mutpuan a phahah chuan a awm ve tlat a, a tàwpah phei chuan kan phah belh ta ringawt a, Tapuia erawh țhutthlèngseiah a mu thung.

"Engtikah nge in in hlui chu i tlawh leh ang? An thlàn pawh i tlawh leh duh ngei ang a," Tatei'n a tih chuan," Ka hre mai lo le; mahse, ka hman remchàn hmasak berah a ni ang, engtizia nge, i lo kal ve duh deuh em ni?" tiin ka lo zâwt lêt vat a. Ani pawh chuan," Aw, nangmah chauha kaltîr che chu a dik nâng, i hman hun min hrilh la, ka kalpui ang che," a lo ti ve a.

Chimchimtei muthilh hnu chuan ka nute chanchin ka zâwt a, phone-ah inbe zauh zauh mah ila Chimchimtei chanchin bâk min zâwt vak ngai lo va, kei lahin an chanchin ka zâwt vak ngai lo bawk, bâkah, zâwt pawh ni ila a țha lo lam chu min hrilh dâwn chuang lo tih ka hre ve kar. Tatei erawh chuan zêp nei hauh lovin a sawi leh par par mai a, ani hi zawng  a fel thei a nia.

Ka pa pawh a țha chho zêl a, zu chu a la thlah chho zêl a lo ni, chhûngkaw pa ang tak takin a awm tawh a, inkhâwm pawh a peih viau tawh ni àwm a ni. A țha e, zu ruia a awm lai kha a ngaihawm loh chiang êm mai, lo țha zêl teh se. Ka nu pawh ka pa a țhat chhoh tâkah chuan a hrisèlna pawh a țha chho a, a hlim hmel pawh hmuh tùr a awm bâkah chhûngkhurah pawh nui ri hriat tùr a awm leh tawh e. Chhúngkuaah pawh hlimna a lo thlen theih nân chuan khaw dur pawh a lo ngai ve fo a lo nih àwm hi; mahse, kha khaw dur kha ka tân chuan a râpthlâk êm a ni, ka tuar chhuak ve zo lo.

Pathianni chawhnu lamah Sawmzuala pawhin min rawn tlawh ve a, ka hmu lo rei deuh hlek ta a, a hmel chu a tla ve deuhin ka hria, a  hmel chu dam lo hmel a puin ka hre si lo; mahse, ka hmu chêr deuh tlat. Kan mamawh tùr nia a rin dinner set țha zet mai min rawn ken bawk a, ama ngaih chuan in luah thar kan ni si a, kan mamawh a ring a lo ni, a ring sual hran lo ve; mahse, a làwmawm viau rualin țûl ka ti lêm lo, a man a to àwm si a, kan tân a insêng nasa tawh êm mai.

"I pu chu eng nge a an zêl ?" tia Tatei'n a zawh chuan," A zia chho tùrah ka ngai," a lo ti a, hre thiam lo tak hian ka en tawn dùn a, a pu chu a lo dam lo tih pawh ka lo hre miah lo a nia, țhian nih ka va tling lo sí êm!

"I pu a lo dam lo elo? Ka lo hre miah hleinem," tiin ka zâwt hnuhnawh a, ani pawh chuan," Dam lo ve deuh e; mahse, tunah chuan ngaihtuahawm a ni tawh lo, a țha tawh," a lo ti a, inthiam lo ru deuh hian," A zia lo ngei mai, hna lamah i buai deuh niin ka lo ring ringawt a," ka ti leh a.

"Hmunpui lamah a zuk awmpui reng alawm," Tatei'n a lo tih chuan," Engah nge min hrilh ve loh?" ka lo ti vat a, Sawmzuala erawh chuan," A, a ho êm mai, ngaihtuah tùr i ngah lutuk a, chanchin ngaihthlâk nuam lam a ni lêm lo bawk a, ka hrilh duh lo che a nih kha," a lo ti thung a.

"Ka beng a vâr lo êm mai, zawh nachâng che lah ka lo hre si lo," ka ti leh a, ka inthiam lo a ni. Aniin min ngaihtuah thei si a, kei lah ka buainaah ka lo buai tâwkin an chanchin ka lo zãwt ve hauh si lo va, ka zak a ni.

"Duh tâwk ang, in in chu hei, a nawm ve riau hi, kan awmna ațangin a hla deuh e tih lohah chuan," a tih tâkah chuan kei pawh chuan," Nuam a ni ve mai, ni hi ahmu țha a, luah man a to lêm lo va, tui lah kan nei țha bawk a," ka lo ti ve a, Tatei thingpui siam chu kan in pah a.

"Mahse, helai an siam dàn hi chu a fuh zân lo a nih hi, naupang tân a hlauhawm êm mai," tiin kei pawhin Chimchimtei tâna ka hlauhpui, ka hlauh avànga kawngka pawh ka hawn ngai lohna lam chu a kâwk a.

"Nia, kei pawhin ka hlauh avàngin khalaia kawngkhàr awm pawh kha ka hawng ngai lo," ka lo ti ve a, ani chuan," Siam țhat a ngai a nih hi, naupang tân hlauhawm lo se chuan a nawm dâwn tehlul nèn!" a ti leh a.

A mak ka ti țhìn. Ka hriat țantirh lai vêl kha ka ngsihtuah chhuak lo thei lo va, khatih hunlaia a nèlawm loh theihzia kha, a ngêngin nuih pawh a nui ngai lo a nih kha. Tunah hi chuan a țawng duh tain a hlim hmel pawh a lantîr ve ta hial a, Chimchimtei bulah phei chuan a nui ve hial țhìn a nia, a awm dàn a thlâk lutuk hi mak tih loh rual chu a ni lo a ni.

Zanriah ei tùrin ka sâwm a, ani erawh chuan a lo hnial a, an in lamah Sir Manunate chhûng chaw ei tùrin an kal dâwn a, ani ber a awm bo daih chuan a fuh loh a hlau a ni. Ka sâwm lui duh ta bîk lo, Sir Manunate chhûngkua chu min lo biak tùrin ka chah ta ringawt a.

Hun remchângah Tatei nèn chuan Zorinate pafa thlàn tlawh tùr chuan kan kal a, Spot-a thawk tharte chuan min lo hmuh chuan min lo hre nghâl vat a, min lo làwm ve chûl a, an in ni taah chuan thingpuite inin kan chàwl lût nghe nghe a, in pawh an lo la tidanglam vak lo, țhutthlèng hùn dan erawh an lo tidanglam deuh thung.

Zorinate pafa thlànah chuan ka awm deuh reng a, Chimchimtei erawh Tatei'n a lo kal kualpui a, min rawn tibuai lêm lo.

"In khua a lo har hman em? Ka rawn tlawh har ta deuh che u a, in lo thinrim hman loh hrâm ka beisei. Hei, pangpâr pawh ka rawn kensak che u a, a mawi in ti em?" tiin ka țawng mawlh mawlh a, pangpar chu an thlànlung nghèng chuan ka dah ve ve a.

"In tel lovin Krismas kan hmang dâwn chu a ni si a, ka huphurh tak zet a ni. Chimchimtei nèn ngawt chuan kan khua a har ngawt ang, kan inhlat tawh bawk si a, ka rawn tlawh zung zung theih loh che u pawhin min lo hre thiam hrâm r'u aw, keimah mai chuan pachan hi har ka ti a, in puihna ka mamawh țhìn. Mumang lamahte hian vawi khat tal chu rawn inlâr ve ula? Min ngaih thu leh min hmangaih thute hi hriat leh ka châk asin, in hmel ka hmu thei tawh lo a nih tal pawhin in țawngkam khat talin min rawn bia ula," ka ti leh mawlh mawlh a.

Chimchimtei leh a nutei țê rai rai ri ka hriat chuan," Zorin, kan fanu pawh a lian ve tawhin a fel tawh lutuk asin, i lo hmu tiraw? Pa azawng pa țha ber mai a nei a ni tih leh pa azawnga pa hmelțha ber mai a nei che tih lah chu a la hre thiam hauh si lo, a chhunzia che hi i hmu tiraw? A țhang lian chho hi min enkawlpui rawh aw, lo thlîr reng la, vàn ațanga lo thlîr rengtu pa a nei a ni tih a hriat chuan a hlim ve dâwn êm asin. Keimah mai chuan ka enkawl thiam lo ang, a mamawh êm êm pa dinhmun lah ka luah zo dâwn si lo, chak taka awm thei tùrin min pui rawh," ka ti leh mawlh mawlh a.

*I HRINGNUNAH HARSATNA A LO THLENIN BEIDAWNGA INDAWM KUNA ' ENGATI NGE KA CHUNGAH KHER?' TI MAI LOVIN 'KA TÂN CHONA THAR A NI, KA HNEH THEI NGEI ANG' TIH TUM ȚHÌN ANG CHE*