☆LAIRIL LUAHTU☆ - 25 By Dingdi Pachuau

 ☆LAIRIL LUAHTU☆ - 25  By Dingdi Pachuau

Krismas hunpui chu khawhar takin kan hmang dâwn emaw kan tih laiin Mami'n min rawn awmpui ta hlauh a, Tapuia a rawn riak ve bawk. Chu mai bâkah, Mami țhianpa Rinzuala'n min rawn tlawh zut bawk a, motor a neih avàngin kan mamawh thil lamin kan chhuak ve thei bawk a, a tihzia tak tak a ni. Ka pa leh Zorina thlànah pawh kalin kan tifai a, kan chei ve bawk a, Chimchimtei lah chuan nuam a'n ti khawp mai a, haw hunah pawh chuan a duh lo hial a ni.

Ka naute pahnih chu Krismas thilpêk ka pe ve ve a, thil man to tak chu ka tihsak thei chuang miah lo. Ka tâna an țhatna, min hmangaihna leh min ngaihsakna kha chu eng thil mahin ka rùl thei lo; mahse, ka làwmna chu thilpêka lantîr ve ka duh a ni, anni phei chuan an phût pawhin ka ring hauh lo.

Chimchimtei'n duhsakna a dawng nasa leh khawp mai. A țhenin Krismas thilpêk an ti, a țhen lahin," Eng mah ka la tihsak ve miah lo," tiin  thawmhnaw, toys leh a mamawh tùr nia an rin an rawn pe hlawm a, a làwmawm êm êm rualin ka inthlahrung, Zorina ka hre chhuak nghâl ziah lehnghâl a, ka mittui a lo hnai țhìn. Min la dampui ve se chuan hetianga mi khawngaihna leh duhsakna dawng țawk țawk tùr hian kan awm bîk hauh lo ang maw le, ka lung a tilêng vawng vawng mai.

Sawmzuala pawh a rawn kal a, ei tùr leh eng eng emaw a rawn kensak nual, ama duat dàn dàn hi chuan a duat ve; mahse, Chimchimtei hian a nêl lêm lo. A putea hian a duat thiam a, a duh dàn dána awm hi a peih bawk a, a putea hi a duh ber mai. 

"Chimchim, lo kal teh, hei, thil țha deuh ka nei a nia," tiin a thlêm ve ngial a, ani lah chu a putea kapkârah țhuin a naute lem chu a keng tlat bawk a, en chu a en ve zawk ngei; mahse, a bulah a va kal duh chuang lo.

"A putea hi a duh hleuh hleuh khawp a," ka lo ti a, ani pawh chuan,"Naute ngainat leh nèl tùr hian ka awm thiam lo a niang," a ti lo ti ve a, kei erawh chuan," A têt deuh lai chuan a duh ve reng che kha," ka lo ti thung a.

"Thil chinchâng an hriat deuh hnu hian min duh tawh ngai lo," a lo ti leh sup a, ka nuih a tiza khawp mai a, han nuih chu dikin ka hre chiah si lo, a thil sawi chu inhmeh ka ti lutuk ringawt.

Mami chuan," E, lungngai suh, fa i neih hunah chuan i fate chuan an duh viau ang che," a lo ti a, a nui pah hak hak a. Ani pawh chuan," Ni e, beisei ang," a lo ti ve a, Chimchimtei tâna a rawn lei ni ngei tùr Chocolate chi hrang panga vêl hi rawn phawrhin dawhkànah chuan a dah a. Chu chu a hmuh chuan Chimchimtei chu a putea kapkâr ațang chuan a rawn tho nalh a, dawhkàn lam pan chuan a rawn kal ta nghâl a.

"Ah, a lo kal e," ti supin Chocolate pakhat chu a la a, Chimchimtei hmuh theih ngei tùr chuan kengin," Tu nge duh le?" a ti a, ani chuan a chocolate ken lai chu melh a ràn a, chutah, rawn kâwkin," Papa," a rawn ti ta a.

"Papain maw duh, nangmahin i duh zâwk lo maw?" tiin a hmuh chian theih tùr chuan a'n lek kual leh a, ani pawh chuan a ît ngang a niang, pan hnaiin a lu a bu nghat nghat a. Sawmzuala chuan pêk tumin a lo ban a; mahse, Chimchimtei chuan ban ve lovin,"Theh lawh," fiah lo zet hian a lo ti thung a, Sawmzuala lah chuan hriat thiam loh hmel zet hian," Eng maw i sawi?" a lo ti a.

"'Kheh rawh' a ti a nih kha," ka lo ti vat a, ani chuan nui hawk hawk chung hian," A nu ngê ngê chuan i lo hre deuh maw," a ti phawt a, Chimchimtei chu enin," Ka khehsak chiang ang che," tiin a khehsak ta nghâl a, a pêk hnu chuan a putea hnên lamah chuan a kalsan leh ta a.

A nuih hawk hawk khân a hmêl lan dàn a dang daih! Nèlawm tak hmel puin nui ve thei leh hlim ve thei hmel a pu ve tlat. A nui hawk hawk ka hre ngai lo va, a nui ve suk erawh ka hmu zauh zauh thung a, chu pawh Chimchimtei a lawm ve lai chauhin a ni. Nau làwm thiam lo viau mah se a nui hmêl hmuh tùr a awm phah a, a zia khawp alawm. A nui ve thei lo emaw tih mai a awl asin.

Kum a lo thar a, țhianteho bengvàr zârah inhlawhna ka hmu ve dâwn e, ka vànnei leh zêl a, Khatlaah dàwr ka nghâk ve dâwn a ni. Hlawh erawh a tam thei bîk lo; mahse, ka duh tho, pawisa lâk luh ve hrim hrim kha ka duh; mahse, March thla ațang chauhin ka thawk țan thei ang.

Pa Dika pawhin min rawn bia a, Siamtei chu ni 15 ațangin a hman thei tawh dâwn a lo ni. Ka lãwm khawp mai, Pa Dika chuan rem min ruatsak zui vat bawk a, ticket lâksakin a rawn pheitîr ang a, a chuanna sumo hming leh driver hming leh number min rawn pe bawk ang a, keini'n kan lo chãng ve thung ang. A țha ka ti khawp mai, rawn phei thuai thuai se, Chimchimtei ka chhuahsan theih hma hian inawm  nêl viau hman se ka duh a ni.

Ni 15-ah chuan Siamtei chu a rawn phei ta ngei a, tlai lamah kan nufa chuan a rawn chuan pheina sumo chu Khatlaah kan han chãng a, an rawn thlen chin hre tùrin driver ka be pawp reng bawk a, an rawn thleng hnai tawh ang tihah chuan," Ka duat, i u thar chu a lo thleng hnai tawh teh a nia, i hmu châk ve tawh em?" tiin ka zâwt a, ani pawh chuan hre thiam ve ang maiin a lu a lo bu ve nghat nghat a.

Siamtei chu ka rin loh dàn deuh a lo ni reuh a. A len chu ka ring vak lo sa a, a dik bawk a; mahse, ngo vir ver reuh hi a lo ni a, en thuak chuan thingtlâng tleirâwl a ni tih a hriat miah loh! A sam ngîl zet chu a beng hnuai chinah rual zetin a tan hmarh a, a hmuhnawm reuh tawp. A zahzum hmel reuh hle nain nau làwm tak a niang, Chimchimtei a hmuh veleh chuan a be nghâl barh barh thei mai!

Zànriah ei hmain tuilumin ka inbualtîr a, thawmhnaw rawn keng vak lo tùr khân ka hrilh sa bawk a, a rawn inkeng tam lo khawp mai. Chimchimtei chuan hmel thar a nih vàngin a pawh lo rih khawp mai a, Siamtei'n a'n biaksawm viau pawh chuan a chhàwn țha duh meuh lo, a àwm ve tho e. Nèl zâwng a nei ve tho a, a la nèl lo rih a ni ve mai.

U thar kan neih min lawmpui tùrin Tateite pahnih an rawn lêng a, Tapuia chuan," Ka Chimchimte, min ngai tawh lo mai ang tih a va hlauhawm ve tiraw? U thar i nei tawh sia," a ti a, kei chuan," A luahlàn thuai ang che tih a hlauhawm khawp mai," nui chung hian ka lo ti a.

"Pute, pute, pute..." tiin Chimchimtei chuan Tapuia biang chu a chùlsak dan dan a, ani chuan," Aw, ka duatte, min duat leh tawh a ni maw? Mahse, min la chuks lo a nia," a lo ti leh a, ani lah chuan rang zet hian," Pute, tuk tuk," tiin a biangah chuan a fawhsak leh zoh zoh a, kan lo nui dar dar. A putea hi chu a ko thiam ve chiang a nia, duat pawh hi a duat thiam, tu hi nge maw a chhuna a zei viau reuh ni?

Kan khum a zau bawk a, a kil sîr lamah chuan Siamtei chu ka muttîr ve mai a, a laiah Chimchimtei a mu thung. Khua a la vâwt a, kan thil sin erawh a len loh êm avàngin a hranin rizai a sin thung, vâwt a tih ka hlauh deuh avàngin ka pa tuilum ip hman țhin kha ka hmantîr a; ani erawh chuan ngai lo a lo ti viau thung.

Ni tinin kan inawm chho bawk a, Chimchimtei pawhin a nêl ta khawp mai. A u kalna apiangah a zui a, a tih ang apiang tih a tum ve ta zêl bawk a, ka awm ve pawhin a u bulah hlîr mai a tâp ta. Ka tifuh riau e, nau chhawnchhaih a thiam reuh tlat a, nèl loh theih a ni tlat lo. Rei lo tê chhûngin ka duh dàn a man thiam nghâl mai, an inah a che țhang tih a hriat viau bawkin ka hria. A sùlhnu chhui a ngai lo reuh viau a, tih tùr pawh hrilhchawp ngai lovin a hre reuh khawp bawk mai, ka mit a tlung reuh viau a ni.

Tapuia ruala chhuakin Siamtei mamawh tùr thil chu ka leisak nual a, a thawmhnaw tùr tuna leisak țeuh ai chuan nakinah amah telin chhuak ila, a duhte thlang ve se tih rilru ka put leh tâk avàngin tuna a mamawh tak tak chauh tùr ka leisak ta rih a, ei tùr eng eng emaw ka lei ta țeuh zâwk a.

Ka nuin ina pêng ve lawk tura min tih chuan chhuanlam ka siam a, inah Tatei awm ve tho mah se Chimchimtei ka ngaihtuah tawh avàngin ka hnial ve bawk a ni; mahse, Tapuia'n pèn lawk a duh avàngin kan pêng ta nge nge a, ka nu chauh a lo awm a.

Kan in chu a lo la danglam lutuk lo nain sofa thar kan lo nei ve tawh a, dining chair pawh a thar vek an lo hmang tawh. Ka hawi kual zêl a, ka rin loh deuhin Chimchimtei thlalâk, lian zeta an siamtîra an tàr chu ka hmu phut mai!

"A duhawm reuh asin, Tapuia siamtîr hi a nia, lo lêng apiang hian duhawm an tih thu an sawi ziah lehnghâl a," ka nu chuan thingpui min siamsak pah chuan a ti a, Tapuia erawh room lamah a lût nghâl daih a, eng nge a tih ka hre lo.

"Khi thlalâk khi ka nei ve miah lo, a lang duhawm reuh êm a nih ve bawk khi," ka lo ti ve a, thingpui min rawn pêk pah chuan," A u thar chu a nêl tawh bawk maw?" tiin min zâwt nghâl a, kei pawh chuan," Aw, nêl tawh lutuk, a zui kual reng mai," ka lo ti ve a.

"Hman hunah ka lo la lêng ve ang, kan inhlat tehlam lutuk a, hman ve deuh châng pawhin a rawn kal zung zung theih loh a, a buaithlâk," ka nu chuan a ti leh a, kei erawh chuan chhâng lovin thingpui chu ka in hlak a. Ka nu hmel hmuh chu a nuam riau, ka pa a rùi ngai tawh si lo va, a rilru pawh a hahdam ve tawh a ni chiang mai.

"I țha zêl tiraw? I hmel hmuh pawh a nuam riau, ka hmu țha viau che a ni," ka tih chuan ka nu pawh chuan," Aw, țha e, i pa vànga rilru hahna kha a zia ve tawh a," a lo ti ve a, ka nu hi ka lawmpui viau rêng a ni. Ka pa vàngin a rilru a hah a, keiin ka tihah belh leh a, a tawrh kha hrehawm tak tùr a lo ni.

"Siamtei thawmhnaw tùr chu ka lo ensak ve dâwn nia, a tam ang chu, Tatei pawhin a hâk theih tawh loh a dah nual kha, ka lo siamsak dâwn nia. Nu leh pa leh chhûngte bul loah mai pawh ni lo, hmel hriat ngai loh leh la zin ngai lohnaah a rawn awm a nia, i enkawl thiam a ngai ang aw, an chhûngkaw harsat vàng liau liauin a rawn awm a nia, a khawngaihthlâk reuh êm asin," ka nuin a tih chuan ka lãwm kher mai, keimahni mai ni lova Siamtei thlenga a lo ngaihtuah tel chu ka lâwm tak zet a ni.

Haw kawngah chuan Tapuia hnênah chuan," Eng nge inah khân i tih ber? Eng nge i chhuanlam ber ni ta?" tiin ka zâwt ta chat a, ani pawh chuan awmzia awm a ti lo a niang," Kan inah i lo kal lo takngial dâwnin ka hria a, a lo remchâng bawk nèn, ka pènpui ta che a nih kha," a lo ti țha ve mai a.

Siamtei chu ka nu sawi vàng pawh ni kher lo chuan amah a fel reuh êm avàngin ka duat viau a, amah pawh chuan nuam a ti ve ta viau pawhin ka hria, a tìr lamah kha chuan a lung a lêng ve chiang mai a; mahse, bawh buaitu a nei țha ve êm mai a, a lêng rei lutuk lo ang.

"Nute," tiin min ko mai a, chutianga min koh avàng chuan Chimchimtei pawh hian," Nute," tia min koh zauh zauh a chîng a, min koh lah hian a hre thiam ve deuh țhìn nge ni, a nui sûng ziah. Ka bual zawh apiangin a uin a thawmhnaw a thlâksak chu a duh țhìn a, a nih loh pawhin a u chu kan bula a lo awm ve a ngai țhìn, chuti khawp chuan dàwra ka thawhsan hma pawhin a ngaina hman tawh. Dàwra ka thawh hnu pawhin ka ngaihtuah chânga ka biak pawhin hlim nui ar ar ri hi ka hre ziah, ka ngaihtuah lo sawt țhìn; mahse, an pahnih maia awm an nih țhin avàngin chhûnglam ațangin kawngka ka kalhtîr ziah, hmel hriat loh an kal ang tih ka hlauhpui țhìn; mahse, in chunga awmte awm loh lai an nei ngai lo va, tlêm chuan ka ngaih a țha deuh țhìn.

*******

"Eng nge i tih a?!"

"Hna ka thawk," tiin a thil duh a sawi chu ka lâk khâwmsak a, mak tih hmel zet, mit khap hauh lo hian min en rùn a; mahse, kei chuan ka hai der tlat thung. Eng vàng teh kherin nge maw hêng laiahte a rawn kal ve nawlh nawlh ni? Tih tùr a nei lo chiang êm asin.

"Hetah hian maw?" a ti leh a, țawngkaa chhâng lovin ka lu ka bu nghat a, min en leh vang vangin," Zànah ka rawn bia ang che," a ti sup a, a thil lei man chu pein dàwr ațang chuan a chhuak ta nghâl vut a.

Dàwra kan hotupa ber Robert-a chuan,"In inhria a ni maw?" tiin min zâwt a, 'Aw' tih nân ka lu ka bu nghat a, ani erawh chuan la duh táwk lo tih hriat zet hian," TV-a an kawmna kha ka en fuh a, a tumruhna kha a fakawm ka ti khawp mai," a ti leh a.

TV-ah an kàwm a ni tih pawh ka lo hre ve hleinem. Ka lo ngaihtuah ngai lêm lo bawk a, TV hiala amah kawmna an tih chhuah chuan eng emaw tak chu a ni roh ngei ang chu ka ti rilru nauh nauh a, nakinah ka la zâwt ang, a chanchin ka hriat chian lohzia ka hre chhuak uai uai mai.

Kan thawhpui tho Chhani chuan," Malsawmzuala kha maw, awii, kan star-zia chu a! A hmel a țhat bâkah ei siam a thiam si, hausa tho bawk si, model ang maia nalh ni bawk si, sî hlîr a ni mai! IG-ah pawh ka follow alawm, ka comment ziah bawk," a rawn ti ve chûl a.

"Hmeichheho lah hi a," Robert-a chuan a lo ti hmuk a, Chhani lah chuan engah mah ngai lo tih hriat tak hian," Chhiat hi chu a chhe mawlh lo alawm, amah hmuh duh vàngin Insomnia-ah pawh kan chawlh phah ziah," a lo ti leh a, ka nui sak ringawt. Ani hi zawng, a la dai tlêm deuh a, a țawng duh ve barh barh bawk. Kei aia thawk senior tawh an nih avàng hian an titi ang pawh hian ka titi ve ngam rih lo, ka țawng ve vak lo va, min biak chuan ka chhâng a, a nih loh pawhin ka nui leh ringawt zâwk țhin; mahse, an fel dùn viau a ni.

Zànah Tateite pahnih lo lèn laiin Sawmzuala chuan min rawn be ta ngei a," Engati nge min hrilh loh?" a rawn ti nghâl tâwng a. Hre thiam lo deuh hian," Eng chu maw?" ka ti a.

"Hna thawh tùr i zawng tih kha."

"Nia, ka zawng deuh thut a," ka ti ta mai mai. Ani hrilh kher ngai ka ti lém lo tih hrilh kher erawh ka tum lo, min ngaihtuah ve tih hriat hi a tâwk viau, hna a ngah ve àwm tehlul nèn, keia tihbuai chhén kha a țûl lêm lo ve.

"Restaurant-ah lo thawk la?" a tih leh chuan," Ngawi teh, ka thiam ve lo ang," tiin ka nui a, ani lah chuan,"Harsa a awm hleinem, a nih, thawmhnaw dàwrah i thawk duh em?" a rawn ti leh a.

"Ka lâwm e; mahse, hei, hna ka hmu tawh a, hlawh tam lua lo mah se kan in ațangin a hla lutuk lo va, ka tân chuan a țha mai," tiin ka chhâng a, ani erawh chuan," In in kha, a hla si," a rawn ti leh a, ka nui ta hawk a.

"Eng nge, a hlâ alawm, naupang tãn pawh a țha lo," a rawn ti leh a, a thil sawi dàn sup sup chuan ka nuih a tiza lo thei lo, a hmel ka mitthla pah a, a inhmeh lo ka ti viau dâwn a; mahse, a inhmeh ka ti leh viau si.

Pathianni tih lohah chuan dàwrah chuan ka kal ve ta zak zak a, thla hnih ka thawh hnuah chuan nuam ka ti ve thei ta viau. Chimchimteite unau erawh ka ngaihtuah lo thei lo, ka phone ziah a, Siamtei'n țha takin a lo awm ang tih hre mah ila nu rilru ațang chuan ngaihngam taka awm a har tho.

Sawmzuala lo lêng pawhin Siamtei a hmuh chuan mak a ti ve deuh a ni maithei,"A la naupan nèn, a fel reuh khawp mai, a hmel lah chu a fai veng reuh a," a ti nghe nghe a, kei lah chuan chhuang tak hian," Kan chhûngkaw member ang chiahin kan ngai, a kalna apiangah pakhat lah hian a zui kawi a, an in-unau tak tak a nia," ka lo ti a.

"Ka duh ve ngawt mai, kan ina awmpui tùr a nia ka tih. Ka nu àwl ve theitu tùr ka duh tawh a," a tih chuan ngaihsak vak lo hian," Nupui neih i ngai tawh a nih chu," ka lo ti liam puat a.

"Duh duh hunah nupui a neih theih ngawt loh," a tih chuan," A nih chuan, duh loh hunah em ni i neih ang?" ka lo ti vat a, a ngawih hmak dàn ațangin min rawn en tih ka hria, min ngei teh ang chu; mahse, ka en duh lo lui tlat thung.

"Ka pite'n an hmu châk che u a," a rawn tih chuan ka en vat a, hmun dang en lehin," Engah ngawt maw?" ka ti leh a. Ani lah chuan,"An hmu châk che u maw le. In chanchin an hre ve vek a," a lo ti leh mai a.

A haw hnuah chuan ka ngaihtuah a, engtin nge a chhûngte bulah chuan min lo sawi ve ang aw? A țhianpa thihsan nufa kha kan ni ve miau a, bâkah, min ngaihtuah êm êm a, min sawi ve țhìn ngei ang, thil àwm lo tak pawh a ni chuang lo. Heti khawp hian min ngaihtuahin min țanpui țhìn a ni a, kei hian ka ngaihtuah lêt lo êm zâwk a ni, bengvâr lo pawh min ti ngawt ang chu, a chhûngte chanchin lah ka zâwt ngai si lo.

Ni khat chu min dàwrtu an awm loh laiin Robert-a chuan," Maria, fa i nei tawh tiraw?" tiin min zâwt ta khauh a, kei pawh chuan zêp lo chuan," Aw, nei tawh e," ka lo ti ve mai a. Chhani chuan," A ni maw?!! I la naupang ve tho sia, nula i la ni emaw ka ti char char asin,"a lo ti hau a.

"Mâwl lian, fa a neih tawh avàngin nula a ni tawh lo tihna pawh a ni chuang hleinem," Robert-a chuan a lo ti vat a, Chhani lah chuan,"Fa nei tawh chu nu an ni mai alawm, fa nei lo nu i hria em ni?" rum deyha melh pah hian a ti khai khai a. 

"Kan kawmchhaka mi pawh fa a la nei hleinem, nimin piah lawkah pasal a nei a, nu a ni tawh tho alawm, tu mahin nula tiin an sawi lo ang," Robert-a'n a tih leh chuan," I țawng thei ziap zuap e a, nang pawh kha i pian hmain i nuin a hring chein a nia ka rin ni!" Chhani chuan a ti leh ta érh a, an inchhànna țawngkam chuan ka nuih a lo tiza khawp mai.

Chhùn chawlh laiin Chhani chuan,"Inah tu nèn nge an lo awm a? Ka hmu ve chhin châk reuh e, a lian tawh em?" tiin Chimchimtei chanchin chu min zâwt a, ka hrilh hnu chuan," Vawi khat tal lo hruai ve chhin la, a kum zât i sawi ațang lah chuan chhaih nuam tâwk rual chiah a la ni zui," a lo ti leh a.

"Nangmah khân nei ve tawh mai raw," Robert-a'n a lo tih chuan," I ninawm tak tak! Hmeichhe titinaah lo inrawlh ve suh. A lo kal leh hunah i châk lo nasa mai ang," Chhani vêk chuan a ti leh a.

"Lo kal tùr a awm tawh léu," Robert-a'n a tih chuan," In lo chhe leh tawh a ni maw? I lêrh lutuk vàng a nih chiah kha, 'Insûm ve țhìn rawh' tiin ka hrilh ka hrilh che a, nula eng emaw deuh hlek chu i lo chukha hman ziah a, tu mahin tih tak takin an kawp rei peih nâng che," a ti leh ta érh a, an innêlin an inhre chiang tawh bawk a ni ang, an inchhànna a na thei êm mai.

Vawiin chu tlêmin ka chau deuh, ka period tùr tai nuam lo nèn, in ka thlen chuan țhutthlèngseiah chuan ka bawk vang vang a, Chimchimtei'n ka chau tih chu a hre ve a niang, ka hnungah a rawn chúl ve a, ka lo nuih sak a, ka phone a rawn rîk tâkah chuan peih lo zet hian ka han ban a, Tatei a lo ni a.

"Zaninah Sawmzuala nèn kan rawn kal dâwn, Chimchimtei birthday lawm dàn tùr sawiho tùrin," a rawn tih chuan ka fanu birthday pawh ka lo mangnghilh țêp a ni tih ka hre chiah, ka va hre chhuak lo tehlul êm!

"A țha alawm," ka lo ti ringawt a, Tatei chuan," Inthlahrung miah suh, Sawmzuala hian sum a ngah teh a nia, ka'n bêm tak tak ang e," nui ar ar chung hian a rawn ti leh a.

*HUN KHIRH LEH HARSA TAK A TAWH LAI PAWHA ȚANPUI NÂN CHE A KUT A RAWN PHAR A NIH CHUAN, CHU CHU HMANGAIHNA CHU A NI*