☆LAIRIL LUAHTU☆ - 26 By Dingdi Pachuau

 ☆LAIRIL LUAHTU☆ - 26 By Dingdi Pachuau

An pahnih chuan an rawn kal ta ngei a, Tatei hian a star tak tak riauin ka hria. A awm dàn leh a chezia, a mitmeng thlengin a niang chu, keima tâwkah ka lo chîk ru ve a, Sawmzuala a melh zauh zauh chu ka hmu ru fo. Nula a ni a, ani tlangvâl a ni bawk a, thil àwm lo leh thleng thei lo a ni lo. Mâkpa ei siam thiam tak kan nei dâwn a ni mai a, chu achhapah Zorina țhianpa, kan nufa min ngaihsak êm êmtu a la ni zui.

Sawmzuala'n chhang a rawn keng a, a tui leh tui loh kan test a, kan ei tliar tliar a, a tui reuh khawp mai.  A sian vek an la ni zui, a siam thiam viau a ni, ka phone a rawn ri a, ka'n en chuan Robert-a a lo ni a, ka chhâng ta vat a.

"Naktûkah ka rawn kal thei dâwn lo tlat mai, ka nau entîrnaah ka hruai a ngai dâwn a, khawngaihin min lo awi mai ta che," a rawn tih chuan," E khai, a va zia lo ve! A va na àwm ve a?" ka lo ti vat a, ani lo awi chu ka huphurh hauh lo; mahse, senior zâwk Chhani a awm reng laia keimah zâwk min rawn phone tlat mai chu mak ka ti deuh hlek.

"Na lutuk lo ve, mi dang an hman lo hlawm tlat a," a rawn ti ve leh mai a, kei pawh chuan," E, lungngai suh, țha deuhin i nau chu i kalpui dâwn nia," ka ti ve a, ani chuan," Aw le, ka lâwm e. Chhani kha a awm ve reng nain ani kha chu a la nau ve lehchhâwng deuh a," a rawn ti ta chiah. A ni ve lah tak a, a naupan deuh bâkah a chîmlîm hran lo ve bawk a, thu erawh a âwih phian thung.

"Naktûk chauh a ni ang tiraw?" ka tih leh chuan," Ni tùrah ka ngai, i lo huphurh deuh a ni maw?" nui chung hian a rawn ti a, kei pawh chuan nui deuh chung hian," A, huphurh chuang lo ve, i awm khân min uap ve a," fiamthu hian ka ti lêt ve a.

Kan inbe zo chu Tatei chuan inla-spy zet hian,"Mipa aw a ni chiang mai a...chuan, a la tinui zui bawk che a," min en ràn chung hian a lo ti a, chutah, awmze nei deuh hian Sawmzuala chu a melh leh ralh a. Kei erawh chuan,"I rin ang kha chu a ni lo ang aw," ka lo ti vat a, chhang chu ka ban leh nghâl zat bawk a.

"Nakzànah i sâwm ve ngei ang chu maw?" a lo ti leh a, chutia a tih tâkah chuan ka han ngaihtuah a; mahse, sâwm pawh ni ila a hman chuang lo vang, bâkah, sàwmna hun pawh a awm tawh lo, naktûkah a rawn kal dâwn si lo. Chuti chu ni lo se chuan, Chhani nèn ka lo sâwm ve ang chu ka ti rilru asin le.

"A hman lo ang," ka ti mai a, chutah," Țhiante ka sâwm ve vek duh ang em? Kan inbuatsaih dàn tùr hi ka la hre thiam chiah lo va, ei leh in lamte hi, kan siam tam dâwn em?" ka ti leh zat a.

Tatei'n min chhàn hma chuan Sawmzuala chuan," I thu thu," a lo ti sap a, Tatei pawh chuan," Hrilh vek pawh a pawi hleinem, an rawn kal thei vek chuang nâng," a lo ti ve a,  an thuràwn chu pawmin ka sâwm vek ang, an lo kal leh kal loh chu an thu a ni tawh ang chu, sàwm vek chu a țha e.

Robert-a awm lo chu kan buai phah ve khawp mai, ka buai ve êm avàng chuan Chimchimtei birthday buatsaihna thil pawh ka buaipui thei lo; mahse, ka naute pahnih an awm a, an tifel vek thei ang chu maw. 

Chhùn chawlh laiin Chhani chuan," U Robert-ate chu eng nge maw an chanchin le?" a ti vang vang a, ani pawh hian a lo ngaihtuah ru ve tho a lo ni, a nau entîra kalpui tùr a ni a, eng nâ nge a nih pawh kan hre mang si lo va, an chanchin lo ngaihven ve pawh chu kan tih tùr niin ka hria.

"Ka'n zâwt chhin dâwn em niang?" tiin ka phone chu ka phawrh a, ani pawh chuan,"I hreh loh chuan, min lo phût ru ve viau thei a," a lo ti ve leh a, a number chu ka hmet chhuak ta nghâl a.

Kan inbiakna chu Chhani'n a hriat ve theih nân loudspeaker ka on a, an hmaah mi pahnih an la awm thu rawn sawiin," In buai em?" a rawn ti zauh a, kei chuan," Buai lo ve, kan buai lo," ka lo ti vat bawk a. Chhani chuan," Boss, inthlahrung mah ta che, helam chu rawn ngaihtuah miah suh," a lo ti ve a, Chhani hi hetia a awm huat huat na hian, ka rin aiin thil a lo ngaihtuah kim reuh ka ti, chinchâng a hre tlat, sawi chhuak kher lo ta se Robert-a hi ka phone kher lo maithei asin.

Tlaia ka haw dâwn chuan Chhani chu ka sâwm ve ta tho a, ani pawh chuan," A làwmawm, ka lo kal châk viau nain ka hman dâwn tlat lo, ka pute inah chaw eiin hla kan zir leh nghâl dâwn a, hlim takin in lo hmang dâwn nia," tiin duhsakna min hlàn a, ka tlai deuh tawh avàng chuan kawngah chuan hmanhmawh deuh hian ka kal sawk sawk a.

"Lo lût rawh," tia ka bula motor a rawn din tâkah chuan ka ding ve chawt a, Sawmzuala a lo ni a, a seat hnunglamah eng eng emaw a dah țeuh avàng chuan a hmalamah chuan eng sawi set set lo chuan ka lût ve nghâl thuai a, ka hmanhmawh ve tawh a, zanin hun hman tùr nèn, ka rilru a hmanhmawh ve tawh a ni.

"Eng nge ni i phurh țeuh a?" hnunglam kawh zoh pah chuan ka ti a, ani chuan kawng chauh en ngar pah chuan," Mamawh tùr a nih kha," a lo ti ve mai a, eng thil nge ni hlawm ni? Mamawh an lo nei nual a nih àwm hi.

"Khawnge Tatei?" ka ti leh a, motor-a ka hmu lo hi mak ka ti zâwk. Inah a lo awm tawh zâwk em niang? An lo buai ngawt ang, kei lah ka haw tlai si.

"Inah a awm tawh," a lo tih chuan ka bu ta nghat a, zanriah ei an lo tum phei chuan a lo buai ve ngawt ang chu, kei chêtpui tùrin ka awm si lo.

Zanriah tùr chu an lo buaipui fel vek tawh a, in chhûng ka han hawi kual a, birthday foil balloons nèn, Chimchimtei thlalâk lian zet nèn, kan in chu an lo chei mawi tawh ngang mai, pangpar pawh a fresh ngat an lo khawi bawk, an lo va bei nasa sî êm!

Chimchimtei phùrzia lah chu, a zuang tar tar reng a, nakina a hãk tùr kawrfual mawi zet lah chu hâk a ngèn leh thùl, a awm hle hle thei lo, a za cheng a ni ber, ka hriat thiampui khawp, a u pawhin a khap zo tawh bîk lo.

Zanriah ei kham hlawtah Sawmzuala chu a tlãn chhuak leh nghâl zat a, mamawh eng emaw a la leh dâwn a niang. Tatei lah chuan a ngaihsak mang bawk si lo va, mak ka lo tiru khawp mai.

Țhiante an rawn kal vek thei lo va, Mami, Hruaii leh Tetei an rawn kal a, ka lâwm êm êm tho mai.  Tatei'n Chimchimtei kawrfual thar chu a hâktîr tawh a, crown a khumtîr bawk a, inhmeh a inti ngang mai. A hlim hmel chu hmuh nuam ka ti asin, chhûngrilah ka lo nui ve var var reng, hetiang hian a hlimpui ka ring pha miah lo a nia.

Sawmzuala a rawn lût a, a hnunga ka nu leh ka pain an rawn zui ka hmuh chuan ka lo en reng ringawt! Anni hruai tùr hian a lo tlãn chhuak leh tih hriat reng! Ka pa chu ka melh zawk a, ka hmela ka rilru tilang lo tùr chuan hmun dang ka en ta daih a.

Hlim takin hun chu kan hmang a, hlim takin han ti ila kei erawh chu ka chhûngrilah ka țang țùng mai. Ka pa hi rawn lang lo se chuan hetiang hian ka awm miah lo ang, Chimchimtei chu a pawm ve a, hlim hmel takin a nuih bawk a, chu chu ka hmuh chuan ka thin a tiur deuh țùng thei. Ka rilru hi ka thunun a ngai, tuna kan hun hman nèn phei hi chuan a inhmeh miah lo a nia.

Zàn mutnaah chuan ka ngaihtuahna a vâk kual nasa hle a ni. Kan in ka chhuahsanna kha kum thum zet zawt a ni tawh a, khata țang khân ka pa hi ka hmu ta miah lo, zanin khân ka hmu leh ta chiah. Engtiziaa lo kal ve nge a nih? Ka sâwm hauh lo, ka nu pawh ka sâwm chuang lo, Sawmzuala khân ama thuin a rawn hruai ringawt a ni chiang, duh aiin min ngam mah mah tawh chu a ni. Ka rilru min ngaihtuahpui se chuan a rawn hruai lo tawp ang, a rawn hruai dâwn tih chu hria ila birthday lawm pawh kha ka duh hek lo ang. Ka rilru a tina êm a, ka thinlungah hian ser a hnutchhiah nasa tawh lutuk a, a dam mai thei tawh rih lo a ni. Ti lutuk pawh min ti maithei; mahse, ka tawrh kha nâ ka ti êm asin, ka chunga thil thleng zawng zawng, a bul ațanga tûn thlenga kan awm dàn ngaihtuah chhoh zêl phei hi chuan rilru a dam thei lo a ni.

WhatsApp message tone a rawn ri a, ka phone ka lo silent leh lo pek, ka ban vat a, Sawmzuala a lo ni a.

*Zanin khân i țhianpa a lo lan ka ring a nia* 

Tu ka țhianpa a sawina nge ni? E, Robert-a kha a niang, anni kha eng nge maw an chanchin ni ta le? Ka zâwt leh ta miah lo va.

*A hman lo a*  tiin ka chhâng ve mai a, naktûk zîng chu phone ngei ngei tùr a ni, bengvâr lo min lo tiru viau tawh ang chu. Zanin lah kha birthday kan làwm atalângin ka lo mangnghilh daih si a.

Zîngah chuan Robert-a chu ka phone ta ngei a, vawiin lamah chanchin kimchang min hrilh a tiam a, kan inbe rei lo. "Sawi țeuh tùr a awm," ti ringawtin min hrilh a, a nau chuan natna a ngah hle a nih ka'n ring deuh ngawt a.

Ka lo ring dik viau a ni. Natna a lo ngah khawp mai a, a kal a țha lo va, chu chuan natna chi dang dang a kai chhuak a, enkawl chawt a ngai a ni àwm e, chuti chung chung pawha hlim hmel taka min dàwrtute a lo chhàwn thei țhìn chu ka fak ru ta phian mai, kei ni ila ka thei dâwn lo chiang, thihna lah ka lo tawn tawh a ni bawk si, hlim hmel ka pu thei hauh lo ang.

"Boss, a va khawngaihthlâk ve! Nula țhalai chutianga han awm chu hrehawm a va ti dâwn tak!" Chhani chuan a lo ti vang vang a, kei erawh chu ka ngawi reng a, Robert-a mitmenga hlim lohna awm chu ka chhiar ve thiam a, han hnem dàn ka thiam loh avàngin ka ngawi tawp a ni.

"Neih zawng zawnga hmunpui lam panpui tùr lahin amah hian a zuam meuh si lo va, pakhatin enkawl chawt a ngaih vàng hian a inthlahrung êm êm bawk a, han hnèmin han thlamuan ve țhin mah ila a natna zawng zawng a hre ve si a, hlim hmêl puttîr a har êm a ni," a ti a.

"A ni thei khawp ang, mahni chanah han dah ila, a harsat dàn tùr chu a hriat theih zual ngei ang," ka lo ti sap a, Chhani chuan," Ka ngaihtuah ngam lo zãwk, a hrehawm dâwn êm asin," a lo ti ve bawk a, kan pathum chuan kan ngawi leh vang vang a.

"A, kan chanchin ngaihnawm lo deuh ka sawi avàng khân in mood ka tichhe vekin ka hria. Han insangmar ula, hlim hmêl put hi a țha a nia, kan tih tùr pawh a ni," tiin min nuih dùn a, chutah, a kut bêng thakin," Le, min dàwr tùr an rawn kal dáwn e, ka thil sawi kha theihnghilh vek r'u le," tiin kan mood on theih dàn tùr chu a ngaihtuah nghâl a.

Mite pawh hian hrehawm tam tak an lo tuar ve tho a lo ni. Keimah chauh hian ka lo tuar bîk hauh lo, kei pawh vànduai inti viau mah ila min ngaihsak êm êmtu, min hmangaihtu țhiante leh chhûngte min pe a, tu mahin min hawisan hauh lo. Ka vànduai viau laiin ka vànnei viau bawk a, tunah phei chuan sum hlawh chhuak theiin ka awm ve tawh bawk nèn, ka vànnei tak zet a ni.

*******

Tatei pawh tunah chuan MZU lamah ni tin a inkhalh chhuak ve ta, Tapuia pawhin college a chhuak ve țêp tawh a, kei aiin zir sâng ve ve se ka ti. Kei kha chuan ka bànsan ta tawp lo thei lo kha a nia, anni hi chu hlawhtling se, anmahniin intungnung thei se, ngaihtuah ngai lovin awm se ka ti. Chutih rual chuan anmahni hian min ngaihtuah ve thung a, dàwra ka thawh chu an duh lo pawh a ni lo, hlawh a tlêm an tia, ni tin in ka chhuahsan ve tho bawk si a, hlâwk lo an ti a ni.

Birthday zàn ațang khân Sawmzuala ka be țha vak lo, a thua ka nu leh pa a rawn hruai ve ngawt kha ka ngei deuh hlek a ni, a lo inrawlh lohna tùrah a inrawlh niin ka hre tlat. Zorina țhianpa emaw,  Tatei bialpa emaw pawh ni se, kaduh lohnaah chuan inrawlh lo se ka duh a ni mai.

Chimchimtei pawh dàwrah ka hruai ve tawh a, Chhani pek chuan a chhaih thiam khawp mai a, a duh duh a tih tîr thei ni maiin ka hria. A lipstick leh nail polish chu hmathehah a hmang a, Chimchimtei lawm chi tak a lo ni nèn, a chhaih kual hneh lutuk ringawt. Robert-a pawhin a chhaih thiam viau tho, ka fanu an làwm dun viau mai hmuh chuan ka nui var var mai.

"I va hmelțha reuh tak aw!" Chhani chuan a bianga piaisak pah chuan a ti a,"A fanu ai chuan a nu hi kei chuan hmelțha ka ti zâwk mah," Robert-a chuan a lo ti thung a, Chhani chuan," A mak thei! I lo hmu tài leh tawh a ni maw?" nui chung hian a ti a, kei pawh chu ka nui ve ringawt, fiamthu mah ni se ka zak ru deuh tho.

"Luhkhung mai ka duh, an nufa chauhin an awm tho a, hmelțha chhúngkua kan ni mai dâwn asin," Robert-a chuan a ti leh a, Chhani nèn chuan kan nui hawk hawk a. Kei pawh chuan fiamthu hian," A tihchi viau maithei a ni, palai tirh buai a ngai lo ang a," ka lo ti ve a, Chhani lah chuan," Ti tak tak teh u, awi, ka lo phûr tawp," a lo ti tak sauh sauh a.

"In hman tawh em?" tia Sawmzuala a rawn luh chuan makti deuh hian kan lo en a, eng nge a rawn tih dâwn ni? Keini nufa lahin kan ko dèr si lo, tu nge a rawn biak ni?

"Tatei'n i nu in tlawh lawk dâwn tih a sawi a," a tih chuan keimahni min bia a ni tih ka hre chauh. Robert-a leh Chhani chu ka melh zauh a, Chhani lah chuan Sawmzuala hlîr a lo en char char a, a hmel ațang pawh chuan a rilru a hriat theih vek hialin ka hria. Tatei mai mai chuh, chûng thleng thleng a bialpa hi hrilh vek kher a ngai hleinem, taxi kan la ang a, kan kal ve thei tho alawm.

"Siamtei chu i nute inah a awm sa tawh tiraw?" a ti leh a, chûngte thleng thleng chuan a lo hria! 

"Aw, awm tawh," tiin Chimchimtei chu ka en a," Ka duat, kan kal tawh mai dâwn em niang?" tiin ka kut chu ka pe a, a lo vuan vat a, Robert-a chu en lehin," Boss, kan kal tawh mai ang aw, in lo buai lutuk loh hrâm ka beisei," tiin ka nuih sak a, ani pawh chuan," E, kan lo awi thei che alawm, rawn ngaihtuah miah suh," tiin min lo chhâng vat a.

A motor-a kan luh hnu chuan kan ngawi dùn reng a, Chimchimtei tțawng leh nak nak ţhin tih loh chu motor chhûngah chuan țawng hriat tùr a awm lo. Min biak loh chuan ka be lo ang, ka lung a la tiawi mai rih lo tlat.

Ka nuin a kâwng a tinâ a, a mu deuh reng sia, chu chu kan ve kan tum a ni. Chhùnah lo chuan hun kan nei lo mai ni lovin chhuahna tùr lìrthei kan nei ve lo va, Robert-a hnênah chawhnu dâr 2 hnulam hun ka dîl a, min phalsak a ni.

Ka nu chu ka rin aiin a lo nula viau a, kan thlen chuan țhutthlènga a mu chu a lo tho thuai a, kal erawh a harsat deuh a ni maithei, a kal sàwi nasa êm mai. Chimchimtei a hmuh vàng pawh chu a ni maithei, a lo țhut chhuah ve ni. A làwm chûl nghe nghe a, ani pawh chuan a pi chu a pan ve vat a. Tatei erawh class a kal avàngin a lo awm lo va, Siamtei'n chêt ngai a lo chêtsak avàng chuan eng mah tih tùr a lo awm tawh lo.

"In ril a țâm tawh ang, thingpui han siam la?" mi tih chuan Siamtei chuan," Nute, keiman ka lo siam ang," tiin a tho nghâl that a, choka lamah a kal ta nghâl bawk a, a mei Chimchimtei a zui leh zat bawk.

Kan awm ta reng a, Sawmzuala pawh a awm ve reng bawk. Eirèl a lo hun chuan haw mai kan duh thu ka sawi a, ka nu chuan," Hetah ei ve mai rawh u, a buaithlâk mai mai," a lo ti vat a; mahse, ei ka tum chuang lo.

"A buaithlâk, zànah chuan motor hman tùr a buaithlâk. Bâkah, motor kal theih loh chinah inpuak a ngai emaw kha a niang a, tlûk palh s hlauhawm," ka lo ti tlat a, ka chhuanlam siam chu dawrâwm viau mah se pawi ka ti lo, ani pawhin a lo hre thiam tho tho dâwn tih ka hria.

Ngai lo ka ti chung chu Sawmzuala chuan min thlah leh tlat. Kawngah chuan a țawng leh miah lo, Siamtei leh Chimchimtei an ţawng nasa êm zâwk a, keini pahnih inbe lo chu a langsàr ta lo a ni.

Inah pawh a rawn lût ve zêl a, tukverh ka hawng zung zung a, Siamteite pahnih chu room-ah lûtin an thawmhnaw an va thlâk thung a, an lo chhuah leh chuan Chimchimtei chuan dàwra kal a ngèn ta tlat mai, a chhan pawh a biscuit ei a ngèn a, a lo awm tawh si loh vàng a ni.

An unaua an chhuah hnu chuan," Ka chungah lungawi lohna i nei a nih chuan han sawi teh," a rawn ti chhuak ta a, ka en zawk a, ka hawi sawn leh nghâl. Ani pawh a hmel ațang hian a lungawi loh hmel ve tho, kei chauh hi lungawi lo chu ka nih hmel loh.

"Chutiang a awm lo," ka ti a, tuilum ka chhuang nghâl a, ani chuan," Sawi rawh, i lungawi lo tih hre tùrin ka hriat chian ve tawh êm che hi," a lo ti leh a.

"I hre sual a nih chu," ka la ti fan. Hrilh kher loh pawhin a hre dâwn lutuk, min sawi chhuahtîr a tum ve hrim hrim a nih hi, ka sawi rih bîk lo ang, a hriat vek kher a ngai lo, chhûngkaw thil a nia.

"Dàwra i thawhnapa nèn khân in inkârah eng nge awm?"

Ka en ta hâ mai! Robert-a nèn kan inkâra thil awm min zâwt a, eng nge a hriat tùr awm? Kan Boss a nia, eng thil nge awm se a tih?

"Boss a ni alawm," ka tih chuan chîk zet hian min rawn en a, a awm dàn hi mak ka ti deuh tlat. Motor-a kan chuan chhûng zawngin a țawng lo va, ka nute ina kan awm chhûng pawh khân a țawng mang lo a nih kha.

"Chubâk...?" a ti leh a.

"Eng nge awm se i tih?" ka ti ve ta thung. 

"Kha pa kha i duh thei lo ang."

Ka nui ta hawk mai! Thil àwm ang lo lutuk a rawn sawi chhuak miau si a, Robert-a hi tlangvâl enin ka en lo hrim hrim, bâkah, nuthlawi ka ni tawh a, fanu neiin ka enkawl mêk bawk, ngaihzâwng neih lam ka la ngaihtuah chhin hauh lo!

"In thil sawi kha ka rawn hre hman," a tih leh chuan,"Chu, min lo ngaithla ru a ni maw?" ka lo ti vat a. Ner deuh nak hian," Ngaithla ru lo, hriat duh lo viau mah ila ka beng a ngawng bîk lo va," a rawn ti leh a.

"Fiamthu a nih kha, Robert-a zawng fiamthu a duh a, kan nuihpui fo a ni," ka ti a, eng vanga Robert-a fiamthu a rawn ngaih thutak viau chhan pawh chu ka hre lo, ka hma a ngaih ve avàngin ka tân min rawn inti-duhpui lo ve a niang.

"Ka nghâk rei tawh che, class xii i zir lai ațang tawhin. Hun ka neih hi bawhpelh ka tum tawh lo."

Ka ding khawng reng ringawt!  A thil sawi zet chuh, a sawi awmzia a hria em? Class xii ka zir lai ațang tawhin. Khatih hunlai khân...ni lo, a ni thei lo, thil theih a ni lo. Siamteite unau rawn țawng lût barh barh ri-ah chuan ka inthing harh ta vat a.

A thuhrimin, Tatei bialpa a ni lo em ni? An ni emaw ka ti, an ni lo em ni? Tatei'n a duh êm kha...A, ngaihtuah rih lo teh ang, paih bo vek ang, a sawi awmzia kha a hre lo a nih kha, a sawi ve mai mai a ni. Kei pawhin Zorina țhianpa angin alawm ka en.

*I LAKAH CHALTLÂIIN HAWIHHÂWM  LO VIAU MAH SE, CHUTIANG MI CHU CHHÂNG LÊT VE MIAH SUH, I NIHNA NI LOVIN AN NIHNA AN RAWN LANTÎR A NI, NGAWIHSAN HMIAH RAWH*