☆LAIRIL LUAHTU☆ - 27 By Dingdi Pachuau

 ☆LAIRIL LUAHTU☆ - 27 By Dingdi Pachuau

A mak e! Khatiang rilru pu khân khâng kum chhûng khân min lo en țhin tihna em ni ang? Vawi khat tê pawh min beisei leh duh angin a lang ngai hauh si lo. Chumi ahnêkin min ngei hmel thei viau a nih kha, melh pawh min melh ngai lo, Sir Manuna car-a kan chuan tlàn pawhin mitsîr pawhin min melh ngai lo a nih kha, ka chiang a ni. Bâkah, Tatei nèn an inkârah eng emaw tak a awm lehnghâl, ani hian keini unau hi min intihtheih khum a tum rilru em ni?

A teuh lo mai! Nula ka ni tawh lo, fa ka nei tawh, ka fa ka enkawl a ngai, ka pasal boral tawh mah se ka pasal tho a la ni, mi dang hnênah beiseina ka pe thei lo bawk ang, chutianga ka tih chuan uirê nèn kan inang reng dâwn asin, Zorina thlarau chungah ka inthiam lo nghâl zat a, mi dang beisei theiha ka lo awm hi ka thiam loh a ni, eng angin nge min ngaih ang?

"Tihpalh aw, ka thiam loh liau liau a ni, ka uiresan duh miah lo che a nia. Ka fanu pa i ni a, ka pasal i ni reng bawk. Awm dàn ka lo theihnghilha mipa dang beisei theiha ka lo awm avàngin min ngaidam lul ang che," tiin ka pasal Zorina thlarau chu ka be mawlh mawlh a, tuna ka awm dàn hi min hmu ta se, a rilru a na dâwn êm asin, ka rilru ka siam sauh sauh a.

Kha thu a sawi ațang khân kâr khat a ral a, kan inhmu leh tawh lo. Inhmuh chu sawi loh, phone-ah pawh min rawn be lo va, message takngial pawh min rawn thawn hek lo. Ani pawh hian a thil sawi kha a hre chiang ang a, a ngaihtuah lêtin hrehawm a ti leh si a ni ngei ang, ani ang mi ang pângngai tân chuan a nuihzatthlâk êm asin, a fiamthu a nih ngei ka ring ta,a nih loh tal pawhin a sawi sual tal a niang.

Hun âwl ka neih khàt tâk avàngin thlàn pawh ka tlawh khât ta, Pathianni hmasa berah tlawh leh tùr a ni. Ka tlawh ngun chuan ka rilruah ka pasal chiah ka dah ang a, mipa dang min beisei theihin ka awm lo bawk ang, ka thiam loh liau liau a ni. Ka awm dànah pasal nei awmin ka lo awm tâwk lo a niang, ka lo meng lêrh deuh a ni ngei ang.

Pathianniah chuan taxi hire-in kan in hlui ni ta leh Zorinate pafa thlàn chu kan tlawh ta ngei a, Chimchimtei chuan nuam a ti khawp mai. A tlãn kual reng a, a nih loh leh, a pa leh a pu thlàn ka cheina pangpâr a lo la sawn thùl, kan in zâu vak loah a uin a awmpui chawt reng si a, pâwn boruak leh hmun thâwl, zau deuha awm chu nuam a ti lutuk a, awm ngaihna a hre lo ni berin ka hria, nuam a tih êm avàngin ka khap duh bîk lo, kan haw leh thuai dâwn si a.

Tapuia'n min rawn bia a, thlàn kan tlawh tih ka hrilh chuan lo la awm reng tùrin min rawn ti a, rawn kal ve a tum chiang. Kan kal tùr hi ka naute ka hrilh miah lo va, hrilh chuan inah min pèn kawipui an tum leh emaw a ni ang a, chu chu ka duh lo a ni.

Tapuia rawn thlen hnu chuan Chimchimtei pawh a zia ta deuh, a putea chu a duhna hmunah inhruai kualtîrin thláte an la a, pangpâr a pàr mawi hlawm êm avàngin thlalãk pawh a mawi hlawm khawp ang. Kan aia awmte nupa pawhin thingpui leh a hmeh tui tak min pe a, thlàn chu rawn ngaihtuah miah lo tùrin min hrilh a, an lo tifai pah rêng bawk a, làwmthu pawh ka hrilh mawlh mawlh bawk a ni.

Tapuia hnênah chuan," Tatei a rawn kal ve ka ring deuh a nia," ka ti a, ani chuan," A, Sunday hi chuan a awmna chin hi ka hre vak ngai lo, a țhiante nen an inkàwm ve ţhin a," a lo ti a. Nia, nula nih hi chuan țhiante bula awmte hi a nuam ve a, sawi tùr lah a tam ve thei bawk, ni tin inhmu țhìn mah ila, kan inhmuh loh kâr hian sawi tùr hi a lo infâwk khâwm tam a, inhmuh leh meuh hi chuan kan lo ap thei tawh viau țhìn rêng a ni.

Ka hàwnna tùr taxi kan nghah lai chuan Tapuia chuan,"U, kan inah lo pêng ula?" a ti leh ta ngei a, kei erawh chuan," A tlai tawh êm mai," ka lo ti thung a, Chimchimtei leh a u, pangpâr lova buai dùn zak zak chu ka thlîr reng a.

"A fel ve tawh e, tunah chuan u a nei tawh bawk a, ngaih pawh hi min ngai vak tawh lo niin ka hria," Tapuia'n a tih chuan,"Ni ve deuh bawk ang chu, ni tin zan tina awmpuitu a nia; mahse, amah duattu chu a ngai êm êm reng tho ang che. A u kan awmpui hi chu kan tifuh ve viau a ni, tiraw?" ka ti leh a.

Ani pawh chuan,"Um, fuh khawp mai. A kum ngaihtuah aiin a fel reuh ka tia, nang lahin i duat bawk a, mi hrang tân chuan  Chimchimtei u tak tak a ni lo ang tih pawh hriat har deuh tùr a ni," a lo ti ve a, kan pahnih chuan ka fate pahnih chezia chu kan thlîr dùn reng a. Tapuia sawi hi a dik ang, Siamtei hi ka en hrang hran hauh lo. A fel reuh a, a nau a enkawl dànah hian puitling ang takin duhthu sãm zân lo mah se, a rilru a pe a ni tih ka hria a, ka ring tâwk a, ka zilhin a țha zâwk nia ka rin ka hrilh pah zêl bawk a, hma pawh a sâwn chak viau a ni.

Zànah Tatei chuan min rawn bia a," Engah nge vawiinah Chimchimtei pa leh pu thlàn in tlawh dâwn tih min hrilh loh? Ka kal ve duh asin," a rawn ti nghâl tâwng a. Kei chuan," Ka thiam loh a nih chu, kan kal leh dâwnah chuan ka lo hrilh zêl tawh ang che, Boss," ka ti a, 'Boss' ka ti kher chu a run khawp ang le; mahse, ka beisei loh deuhin a rawn nui nghâl hawk hawk mai!

"Chutin ti vêl suh aw, i thawhna dàwrah tlangvâl a awm tih ka hria a nia, Robert-a a ni tiraw?" a rawn ti teh ngawt a, kei chuan makti rilru deuh chung chuan," Nang hi, engtin nge i lo hriat a?" tiin ka zâwt lêt vat a, ani erawh chuan," A dik tak tak! Wow, țha dâwn lutuk!" a rawn ti chûl a.

"Ngawi mai mai teh, min dem i tum deuh a ni maw? Pasal nei tawh ka nih hi, nula ka ni hleinem," ka lo ti vat a, ani pawh hian tihian min dem thei mai a nia. Kei hi ka lo dik lo tawp a ni ngei ang, Zorina ka pasal a ni a, pasal nei ka ni tih hre lo lêk hian ka lo lêng a ni ngei mai, Sawmzuala thil sawi pawh kha, hei vàng chiah hi a lo ni.

A ngawi deuh vang vang a, chutah,"U, huatah lo chãng lo la, U Zorina boralna pawh a rei ve tawh a, a lung pawh i phun vek tawh, hlimna neih leh i phû," thutak zet hian a rawn ti ta a, ka chil ka lem khalh a, a thil sawi 'hlimna neih leh' a tih chu ngaihzáwng neih leh a tihna a ni ngei ang chu; mahse, engtin nge kei tehlul hian ngaihzâwng ka neih leh ang? Pasal neia fa pawh nei tawh ka nih hi, ka pasalin min thihsan khân ka hmangaihna kha a bo nghâl hleinem, min boralsan avang khân a nupui ka nihna a bo ngawt lo bawk.

"A thih avàngin a nupui ka ni lo ta tihna a ni lo, ka hmangaih reng a, ka hmangaihna lah a chuai hek lo. Ani theihnghilha mi dang ka hlimpui chuan ka inthiam thei ngai lo ang, keimah vànga nun tawi ta a nihna lai pawh a awm asin, min tawng lo ta se hlim takin tunah pawh hian a la dam ve reng thei, eng mah kan hre hauh lo," ka ti duah a, ka sawi dik chiah a ni.

Tatei pawh chuan," U, chutiangin 'ta se' tih zêl chuan hringnun hi a dik thei nâng, a thihnaah khân tu mahin thiam lohna an nei lo, nangmah avànga nun tãwi lah a ni hek lo. Pathianin a hmangaih êm a, a hnênah a hruai hmasa a ni mai. A nupui chu i ni ngei alawm, a dik chiah; mahse, thihnain a țhen tawh che u a, inneihnaa thutiamah pawh 'Thihnain min țhen hma loh zawng' tih a ni țhìn, thihnain a țhen tawh che u a, lungngai leh amah sûna awm reng lovin hlimna neih leh hi i phû a ni. Amah U Zorina ngei pawhin hlim leh la a ti khawp ang, a duh dàn pawh a ni ngei bawk ang," a rawn ti leh duah a.

Ka ngawih vang vang avàngin amah bawk chuan,"Kan sawi thui ta duah a, ka sawi tum ber pawh ka lo theihnghilh țêp a ni. Sawmzuala pu kha a dam lo va, a na viau nghe nghe a, vawiin chawhnu pawh khân a vawi hnih nân ka va kan ve leh a, i hre tawh rêng rêng em? I hre lo a nih ka ring," a rawn ti leh a.

"Hre nâng, engah nge min hrilh ve loh? Eng natna nge ni?" ka lo ti vat a, ka lo hre miah lo tak tak. A reh êm êm chhan pawh hi a ni ngei ang chu, bengvâr lo min ti ngawt ang, a pi leh pu enkawltu tùr ber a ni a, țûl fêah lo chuan a chhuahsan lo tawp ang.

"A, a upa ve tawh a, hmunpui lama kalpui a duh viau laiin a pu chuan a duh tlat lo va, a piin a awmpui kerh kerh reuh a, a khawngaihthlâk reuh tak tak. An inhmangaihin an inngainat dun hmel sia, pakhat zâwk zâwk boral hmasa ta se, a la dam zâwka chu a lung a lêng khawp ang," a ti leh a, chutah,"In chungah Sawmzuala a țhat êm kha, remchângah kan ve ngei rawh aw, i ba hrim hrim. A chhúngte an fel lutuk a nia, a zahthlâk loh," a ti leh zat a.

"A nih tak chu, nia, hman remchàn hunah kan ve ngei tùr a nih chu," ka ti a, kan inbiak zawh chuan ka ngaihtuah lêt nauh nauh a. Ka pa dam loh lai vêl leh Zorina boral chungchângah khân Sawmzuala kha a buaiin min ngaihtuah viau a nih kha, a hman êm vàng a ni bîk hauh lo ang. A hnaah a buai ve viau ang tih hriat reng, khati khawp khân min ngaihtuahin ka pa dam lo pawh rawn kanin zànah pawh min rawn menpui nasa a nih kha, kan chunga a țhatna zawng zawng kha ka rùl lêt vek sêng lo ang, a pu dam lo kan chu ka tih ve ngei ngei tùr a ni.

Mahse, a thil sawi erawh kha chu ka ngaihtuah tùr a ni lo, ka awm a tinuam lo. A, ani pawhin a theihnghilh tawh ang, a sawi tùr hre lovin a sawi mai mai a nih kha, theihnghilh ve daih ang, ka hriat renga ka ngaihtuah reng chuan ka rilru a nuam thei dâwn tlat lo.

Ka phone chu ka tuai neuh neuh a, ka va text dâwn em niang? A pu dam lo chu zia lo ka tih thu leh pawi ka tih thu va hrilh ta ila, a pawi ang em? Nichinah ka hre ve chauh a ni tih thu pawh hrilh tel ta ila...

Mahse, ka ti ta êm lo. Va text pawh ka inthlahrung ru deuh tlat, a thil sawi vàng vek kha."A ti tak tak lo, nangma dik loh a nih kha, nangmah hian i beisei deuh zâwk a ni lo maw? Nu i nih kha, pasal nei i ni, nula rilru pu suh, fa nei tawh i ni, i nun dàn tùr dik takin nung rawh," tiin keimah leh keimah chu ka inhau a, ka inzilh mawlh mawlh bawk a.

Vànneihthlâk takin ka ti dâwn nge, kan dàwr nghahna bul lawkah chuan pitar kum 89 mi, Nilaini zànah a thi hlauh mai a, Sawmzuala pu kanna hun ka nei thei dáwn e. An in awmna erawh Tatei zawh a ngai ang, ka hre hauh hleinem.

Tatei'n min kalpui se ka tih nèn, a lo hman bîk si lo va, keimaha kal chu ka hreh ru khawp mai; mahse, hun remchâng ka neih hun a ni si, vawiina ka kal loh chuan engtikah nge hun remchâng ka neih leh ang? Ka kal ngei a ngai, a pu kan chu a bata ka bat a ni.

An in chu zawn hmuh a harsa lo khawp mai, pâwnlam ațanga a lan dàn a nawm hmel ang bawkin chhûnglamah pawh a nuam e, a lian khawp lehnghâl a, fan tham fê tùr chu a ni,  building thar var ni lo mah se tuai hnùm țhat a ni tih a hriat ngawih ngawih.

Sawmzuala  ka hmuh loh avàngin a nu ni àwm tak lo awm hnënah chuan ka hming sawiin Sawmzuala țhian ka nih thu leh a pu kan tùra kal ka nih thu chu ka sawi a, chiang zeta min enin a nui sak a, a hmel fel leh zahawm tak chu hlim lohnain tuam lo se chuan hmuh a nuam ngawt ang.

Sawmzuala nu a nih thu sawiin a pa kan tùra ka kal avàng chuan làwmthu min hrilh phawt a, chutah," I fel hle mai, i hman àwm loh tehlul nèn! Bawiha pawh a lo lêt thuai ang, dàwr lamah a kal lawk a nih kha, hawh, ka pa mutnaah chuan kal nghâl  mai ang hmiang?" nèlawm tak chuan a ti a, ka lu ka lo bu nghat a, kan țhutna thlanglama a kal chu ka zui nghâl a.

Room zau nuam taka khum zau duaiah hian Sawmzuala pu chu a lo mu a, a bulah Sawmzuala pi ngei tùr hi a lo țhu ve bawk a, putar drip khai lo buaipuiin nula pakhat hi a lo awm ve bawk a, nurse an chhawr a ni ngei ang chu. Țhuthmun kan rem hnu rei vak loah chuan Sawmzuala pawh a rawn lût ve ta mai, a pu bul hnaiha ka țhu min rawn hmuh chuan mak a tih hmel deuh chuan ka hria, a meng rim a ni ngei ang, a mit a sen deuh râm a, a meng phelh deuh lek lek bawk.

"I va fel ve! Engtin nge i lo kal theih zâwk?" awka zângkhai angreng tak chuan a ti a, a pu khumah chuan a țhu thla nghâl a, kei chuan,"Ka lo kal har, ka lo hre pek lo va. Vawiin chu dàwr kan khãr a," ka lo ti a, ka țawng ring vak lo, a pu chuan bengchheng a ti ang tih ka hlau, mi dang an ţawng ve mang si lo va.

Sawmzuala pu chu ka pa kha ka tehkhin, ka pa kha chu a la țhalai daih zâwk tho nain natna khuma an na tuar chu hmuh hrehawm ka tih dàn leh ka khawngaih dàn a inang ngawt ang, an tân tih theih kan nei si lo, an bula awma lo awmpui chiah a ni deuh mai, an thil sawi lo tihsak nèn.

Rei vak loah chuan a pu chu a muhìl a, Sawmzuala nu chuan," Tikhân lo awm ula, in tùr ka lo la ang e," tiin a ding chhuak hluai a, a kal sawn dâwn tihah chuan room-ah chuan pitar pahnih hi an rawn inzui lût a, Sawmzuala pi țhiante an nih ka ring, an rawn pan hnai ve chat rêng a.

"Lo kal rawh, thlanglamah khuan țhu ang," tiin Sawmzuala chuan min rawn en a, a țhutna ațang chuan a tho nghâl a, ka pite pahnih lo kalin țhutna an neih dâwn loh avàngin Sawmzuala min sàwmna pawh chu hnial lo chuan ka zui ve nghâl a. A pute room ațang chuan kawngkapuiah kan chhuak a, veilamah chuan bathlàr zau zet hi a lo awm niin, pangpâr nalh tak tak pot-ah a lo inhûng fur a, țhutthlèngsei leh dawhkàn pawh a lo awm thlap. Khaw hawi a nuamin boruak a thiang var mai a, hmun nuam tak a nih chiah hi.

Țhutnaa ka țhut hnuah pawh ani chu a la ding a, a rilru a hah ve ang a, a țhu duh rih lo a ni ang ka ti rilru a, ka țawng hmasak ngei a ngai a ni, a rilru ka hnem ve pawh a ngai ang a...

"I pu chu engtik ațangin a dam loh a?" tiin ka zâwt țan a, min rawn en lovin kâwlkil lam a thlîr reng a, min chhâng dâwn lo emaw ka tih hnuah chuan,"Kâr hmasa Thawhțanni ațang khân," a ti ta sup a, a kut pahnih chu a kekawr ipteah a zen lût ve ve a, ka țhutna ep bang nghèng chuan a ding nghâl bawk a.

"Chuan...?"

Min rawn enin,"Chuan...a dam lo chho ta zêl a, i rawn kan ve ta a..." a ti a, a ngawi ta daih a, sawi zawm tum ang pawhin a lang lo. A ngawih tâk daih avàng chuan nuam lo ti rilru tak chuan,"A pawi ka ti, ka lo hre lawk lo va, ka tluk lo khawp mai che," ka ti ta ringawt a, sawi zawm lehin," I pu dam lo ka hmuh khân ka pa dam lo kha ka hre chhuak a, tih theih nei si lovin kan awm tlawk tlawk a, chutiang rilru chu i pu ve chiah niin ka hre bawk," ka ti leh a.

Min rawn en a,"A dik alawm, theih ni se a natna hi chhâwk țhen theih se ka ti asin, ka pi leh pu hi ka la chènpui rei lo êm êm a, min kalsan mai ang tih ka hlau, ka pi hi ka khawngaih dâwn êm asin," a ti leh sup a, a kut dinglam chuan a sam chu a tuai puat bawk a.

"A dam chhuah leh i ring lo tihna em ni? Upa ve viau tawh mah se, damdawi țha tinrêngin i enkawl ngei ang a, a dam leh ngei ang, ka ring asin," ka tih chuan min rawn en leh a, ka tider nge tider lo min rawn fiah a tum ni berin ka hria; mahse, ka hnemna mai a ni lo, a thih chu ka ring hran lo miau a ni.

"Beiseina neih ka duh a; mahse, a har ka ti. Tuna i thil sawi kha i ti tak tak a nih chuan a dam ngei ka ring ang, i tider lo tiraw?" a ti a, mit khap hauh lo chuan min rawn en ngar a. Kei chuan," Ka tider lo, ka hnemna che pawh a ni chuang lo, upa ve viau tawh mah se ani chu i enkawl țha ang tih ka hria alawm," ka ti leh a, min chhàn hma chuan a nu chu tray chawi hian kan awmna lam panin a rawn kal a.

"In lo chhuak daih a, hei, in r'u, Maria, ei țeuh rawh aw, i rawn kalna a hla vang vang si a," tiin ka țhutna bula dawhkànah chuan tray chu a rawn nghat a, tlêmin ka lo zak deuh. A țhalai zâwkin ka pui miah lo va, a upa zâwk leh chak lo zâwkin kan ei tùr a siamin a rawn keng a nia.

Nuih sakin," Ka lâwm e, ka ei țeuh ang," ka lo ti a, a kal sawn hnu chuan," I nu chu a la nulain a la hmelțha hle mai; mahse, i pa i chhùn zâwk a nih hmel," ka ti a, in tùr leh ei tùr tray-a a rawn chhawp chu ka dah chhuak a.

"Nge, ka hmêl a chhia i tihna maw?" a rawn tih chuan ka lo en vat a, fiamthu thawh hmel pawh a pu hran lo, rang fahran hian,"Ni lo ve, i nu nen khân in inang lo ka ti mai a nia, Sir Manuna nèn khân in inang deuh zâwk ka ti, i pa nau a nia, i pa i chhùn zâwk tihna a nih ber chu," ka lo ti duah a.

In tùr a rawn ban chuan," Chimchimtei rawn hruai ve tùr a nia, nuam a tih dáwn nèn," a ti sap a, no tung êt âwta thei tui chu a in zui nghâl a, kei chuan,"Dam lo kannaa hruai chi a ni lo, a bengchheng mah mah ang, bâkah, ani nèn chuan thil a tih zung zung theih loh a," tiin ka lo chhâng a.

Room-a kan luh leh chuan a pu pawh chu a lo harh chiang tawh a, a aw thâm zet chuan Sawmzuala hnênah chuan tu nge ka nih a lo zâwt a, a hrilh hnu chuan a mit meng lian kul maia min rawn enin," Ka hria che alawm, min rawn kan tawh kha," a lo ti sap a, phâwk zet hian Sawmzuala chu ka en hau ta mai!

Ani erawh chuan,"Pu, Tatei nèn khân i hriat pawlh a niang, Tatei kha a nau a nia," a lo ti vat a, a pu pawh chuan," A nih tak chu, i hming hi chu ka hre tawh viau asin, i fel hle mai," thâm deuh chhàl hian a ti leh a, chutah, a kut rawn phar chhuakin," Ka lo chibai ang che, i fel êm mai," a ti leh a, ka kut chu ka pe ve nghâl vat a, a kut chêr leh vuai deuh nan mai han ka han vawn chuan khawngaihna ka nei thar leh a. A pi pawh chuan," Ka lo chibai ve ang che," a lo ti ve bawk a, a țhian pahnih lo awm ve bawkte nèn chuan ka chibai ta vek mai.

"I haw nghâl dâwn a nih chuan ka lo thlah ang che," a pu room ațanga kan chhuaha Sawmzuala'n a tih chuan," A ngai lo, i chauh êm kha, awm hahdam rawh," ka lo ti vat thung a, ani erawh chuan ka thu sawi chu engah vak a ngaih hmel loh, motor chahbi chu drawer ațangin a la chhuak nghâl a.

A nu chu choka lam ațangin a rawn chhuak phei a, min rawn hmuh chuan," Haw i tum tawh mai elo? A la hma alawm," a rawn ti a, kei chuan," Naupang ka ngaihtuah deuh tawh a," tiin chhuanlam ka lo siam a, ka awm rei ve tawh bawk alawm le.

"Tapuia'n a awmpui a, an ngaihtuahawm loh," Sawmzuala chuan a lo ti sup a, ka en vat a, min lo en ve nain a nu lam chu a en leh nghâl daih a," Nu, khawngaihin, Apple leh Balhla kha lo la chhuak teh, Maria-i hi in ka'n fanpui lawk ang e," a ti zat a, a nu pawh chu a fapa tirhna avàng chuan a kal sawn ta vat a.

"In kan fang dáwn maw?" ka lo ti vat a, ani chu lo bu nghatin," Min lo zui rawh," a ti nghâl a, phûr ru angreng tak chuan ka zui nghâl a, an in min fanpui duh mah chuan ka châk alawm, a zau nasa mai si a.

A pu study room chu in chung lamah a awm a, mikhual room nèn, a room leh a nu room pawh in chung lama awm mah ni se, a pu dam loh deuh ațangin a nu chu in hnuai lamah a insawn ta rih a ni awm e. Amahin ei siamna bîk choka a nei hran a, a zau fahran lo nain ei siamna thil engkim a awm vek maiin ka hria, in hnuai lama awm a ni thung, Tv room, sitting room, dining room, choka leh a pi leh pute room chu in hnuaiah vek a awm.

"I choka tê kha hmuh a nuam ka ti, engkim mai kha a awm reuh a," ka tih chuan," Ei i siam ve chhin châk em? Engtikah emaw ka pu dam veleh a ei tùr i la siam ve dâwn nia," a ti zat a, chûng thleng thleng chu ka ngaihtuah pha lo, ei siam lah ka thiam fahran lo lehnghâl.

"Ka thil siam a ei duh lo tawp ang, fapa ei siam thiam lutuk a neih laia ei siam thiam ve mang hlei lo ei siam chu a ei duh lo tawp ang le," ka lo ti a, ani chuan," Thinlung lam hi alawm pawimawh," a lo ti thung a.

Ka remti lo chung chu min thlah lui tlat a, kawnga kan tlàn lai chuan," Engtin nge Tapuia kan inah a awm tih i hriat?" tiin ka záwt ta nge nge a, mak ka ti êm alawm, Tapuia'n a hrilh a niang ti ila ka âwih chiah bawk si lo va.

"Rilru hahdam deuhin i awm phah tho a, kan in ka fanpui theih phah bawk che a," a rawn tih tâkah chuan," I va phakar tak!" ka ti chhuak ta hrãwk a. Ka fate ka ngaihtuah loh nân dâwt min lo hrilh chiang, kei lah khân ka lo âwih ve hmiah bawk a, a va mak chiang tak!

"Ngaihtuah an ngai lo ka tihna a nih kha, ni dangah pawh i chhuahsan țhìn tho a, tunah pawh ni danga i haw aia hma daihah a nia i haw dáwn ni," a tih leh chuan ka ngawi reng a, a dâwt sawi ka lo âwih ve hmak kha mak ka inti lo thei lo, engtin nge ka lo âwih theih mai ni?

"Thinrim kher lo la? Engtin mah an lo awm chuang lo ang."

*MI ZAWNG ZAWNG HI UPA DEUH TAK THLENGA DAM TÙRIN HUN PÊK KAN NI VEK KHER LO, CHUVÀNGIN, I NI TIN HUN HMAN KHA LÂWM TAKIN, A ȚHA ZÂWNGIN HMAN TUM HRÂM ANG CHE*