☆LAIRIL LUAHTU☆ - 28 By Dingdi Pachuau

 ☆LAIRIL LUAHTU☆ - 28  By Dingdi Pachuau

Ka thinrim lo. Ka pasal pawh a ni lo va, ka țhian ve mai a ni, a chunga thinrim ka tum lo, a pu dam loh vànga hrehawm a tih lai a ni ve a, ka thinrim khum lo ang.

"Thinrim khum chi pawh ka nih loh hi, ka chau ve a nia," tiin kan in awmna lamah chuan a motor chu a her kawi a, ka en deuh reng a, ani erawh chuan a motor khalh lai chauh chu ngaihtuah ni àwm takin kawng chauh chu a en ngar a.

"Lungngai duh suh, a dam chho thuai mai ang," tiin ka hnèm ve a,  tlangvâl țhalai leh hrisêl a ni a, a pu dam loh vànga rilru hahin a awm mêk a ni, zànah ni se a menpui ngei bawk ang a, a rilru leh a taksa a chau tawngkhawng ve tawh a nih hi.

Kan in pêng step bula a din chuan,"I lo pêng ve dâwn em?" tiin motor kawngkhàr chu ka hawng a, ani erawh chuan motor hmalam en vang vang pah chuan,"Pêng lo mai ang," a lo ti sup a. Chhuka kawngkhàr chu khãrin,"Hun ka neih veleh ka lo kan leh ang, nang pawh chawlh hahdam tum la, i rilru hmang nasa lutuk lo la," tiin ka chah ve a, a zàwm kher pawhin ka ring chuang lo.

"I lo kal leh hunah chuan Chimchimtei rawn hruai tel tawh la aw," a rawn tih leh chuan,"A harh ngawt ang," ka lo ti vat a, ani erawh chuan," Ka nu leh pite'n an làwm viau dâwn asin, an rilru pawh a tiharh deuh mahna!" a lo ti thung a.

Ka rilruah Sawmzuala pu chu a awm vang vang mai, ka hmuh khân ka pa nat lai kha ka hre chhuak zawk a nih kha, a upa ve tawh tho bawk si a, a khawngaihthlâk zual ka ti. Sawmzuala pawhin hrehawm a ti lo thei lo, a nu pa, a thisen zawmpui ngei a la ni zui. Ka pa nèn khân thisena inzawmna chu nei miah lo mah ila, min hringtu ka pa aia ka hmangaih loh chuan ka hre hauh lo. Hrehawm zawng zawng min tawrhpuitu, ka khawharna min țâwmpuitu leh hun harsaa min fuih kaltu a ni lehnghâl, min duata ka chunga a țhatziate kha...

A tûka dàwr kan nghah lai chuan Chhani chuan," Boss, i nau chu eng nge a chanchin zêl? Niminte khân rawn kan ve ka tum tehlul nèn, chhûngkaw lamah harsatna kan nei leh tlat a," tiin Robert-a chu a bia a, ani chuan,"A țha a ni mai, amah hi mi hlim thei chi hi a ni ve a, a natna hian a nui hmel a hliah zo meuh chuang lo, kei chu ni ila chuan hlim hmel ka pu thei tawh hauh lo ang," a lo ti duah a.

Ni ngawt mai, nimin kha hun remchâng tak chu a ni, kei pawhin ka hmang țangkai viau a nih kha, Robert-a nau chungchâng ka lo hre chhuak tawh hauh lo chu ka inthiam lo hnuhnawh kher mai, ngaihsak lo chan ka chang tlat.

"Vànduai vànnei a nih dâwn chu tiraw? A bula awma titipui a châkawm, a lak ațangin zir tùr ka hmu chhuak tam àwm mang e!" Chhani chuan a lo ti leh a, kei chuan lo zàwm vatin," Ni chiah mai, natna pawhin a tihhnual theih loh chu, mi tuarchhel leh a êng zâwnga thil thlîr țhin mi a ni tih a hriat reng a, a hlim theihna thurûk chu hriat ve a châkawm," ka lo ti ve vat a.

"In buai tih ka hria a, hun in nei lo tih ka hre bawk a, lo kan tùrin ka phût ngam lo hrim hrim che u a ni, in lo kan a nih erawh chuan ka lo welcome țha khawp ang che u," nui deuh sâng hian Robert-a chuan a ti a, min dàwr tùr an rawn kal avàng chuan kan titi chhunzawm thei ta lo va.

Chhùn chawlh dâwn hnaihah chuan nula pahnih, khal dùn deuh mai hi an rawn kal a, pakhat chu a hmel pawh a țha kher mai, a mit a hnawih dumin a hmui a hnawih sen viau bawk a, a inhmeh ka ti kher mai. Mi pawhin an en duh tih a hria a ni ve ngei ang, a hawi sâng deuh vah mai a, duh pawh a induh tâwk hmel viau. 

Robert-a chuan a lo chhàwn a, an duh laa an chhuah hnu chuan Chhani chuan," Boss..." a ti sap a, ka en vat a, Robert-a chuan a lo thlêk zui ve nasa niin, kan lam hawiin a rawn nui sûng a," Khal dùn khawp mai!" a ti chhuak hluai a.

"I mit kha a tla ang e, bâkah, i chilthlì kha aw..." Chhani vêk chuan a ti leh a, chu kher chu a run deuh a niang,"Lalchhan," a ti ram hmak a, ka lo nui nasa. Chhani pawh chuan min rawn zawm vat a, nui uar uarah a rawn țang bawk.

"Hma pãwng tawh phawt ît tùrah min ngai ziah suh," Robert-a chuan a ti leh a, Chhani a lo nui uar sauh. Mittui tla pùrin leh dul dawm meuhin a nui char char a, Robert-a tihngaihna hre lo chuan," Ka vèl dâwn che em maw ni? Nang pawh hi ka ît miah lo che aw," a ti leh ringawt a, Chhani lah chuan," A làwmawm lutuk! Min ît ni ta la chuan ka ten ngawt ang che," a lo ti a, mittui tla phunga a nuih avàngin a mittui chu a hru hul a.

"Maria-i ang hian awm ve rawh, hmeichhia, nula ve si mipa chhâng zawt zawt hi an sexy thlãwt lo a nia, chu chu hre reng ang che," tiin Chhani chu a inti zilh mawlh mawlh a, ani lah chuan," Uai! Trick thar i hmang leh dáwn elo? Mi i fak hi chuan i hlauhawm sawt tihna. Maria, hlau viau rawh aw, a hnaihah awm tam suh, a beisei țan deuh che tihna a nih hi," a lo ti leh a, an inhre chiang dùn tawh bawk a niang, an inchhànna chu huat enah pawh an en lëm lo, an bula awm hi a hahdam ru riau, nuih an tiza thei si.

"A va mak tak aw! Ngawi rengin, nui ve mai mai rawh, i lang duhawm sawt mai ang, Maria-i awm dàn hi entawn la, a ngaihla tâwk chauha nuihte hi a hnên ațang hian zir chhuak rawh, bialpa țha deuh pawh i neih phah ve mahna!" Robert-a chuan a ti leh a, ka lo nui tãwi tak mai! Ka zak alawm,  fiamthu mah ni se ka zak tho, Chhani min ngaih dàn tùr chu ka lo ngaihtuah hman vek a ni.

"Tum tâwk lêng ka vài bîk lo'ng e," Chhani'n nui chunga a lo tih chuan Robert-a insûm zo lo pawh chu a nui ve hawk mai, nui sûng chung chuan," Țawngkam lah hi aw, i tlachham lo nasa mai si a..." a ti vang vang a.

Ka haw thei  țêp tawh tihah chuan Tapuia a rawn lang hlawl mai a, eng nge a lo tih dâwn tih ka zawh chuan," In inah ka lo kal lawk dáwn, Chimchimtei ka hmu khât tawh deuh a, ka ngai tlat," tiin min chhâng a, Robert-a leh Chhani bulah chuan ka nau a nih thu chu hrilhin ka hmel hriattîr ta nghâl a.

"In inang ka lo ti ru rêng a ni," Chhani'n a lo tih chuan," I lo melh nasat viau chhan tùr àwm kha ka lo ngaihtuah mêk a," Robert-a chuan a lo ti zauh a, Chhani chuan run hmel zet hian,"Nang ang tùrah hian mi hi ngai vek suh," a lo ti ve vat thung a.

Tapuia chu min nghâk ve rih tùrin ka ti a, ani pawh chuan a lo remti ve mai a, rei awm lovin ka haw theih hun chu a lo thleng thuai a, Chhani leh Robert-a ka mangțha hnu chuan Tapuia bike hnungah chuan ka chuang thla ve ta vau vau a. Zorina bike kha a ni si a, Tapuia hnunga chuang pah chuan Zorina ka hre chhuak vawng vawng mai. 

Ngaih kawih theiha awm ka duh loh avàngin Sawmzuala pu chu ngaihtuah ru reng mah ila, a chanchin Sawmzuala ka zâwt duh lo, ka biak hmasak chuan boruak eng emaw awm angin a ngai palh ang tih ka hlau, chuvàngin, beisei theih miah loha awm hi a țha ber. Beisei tùr ka ni lo va, beisei theih pawh ka ni lo, pasal nei ka ni. Hman hmasak leh berah chuan a pu kan leh ngei chu ka tum, kan nufa chunga a țhatna zozai ngaihtuahin hei hi chu ka tih ngei ngei tùr a ni tlat.

Mahnia kal duh lovin Tatei ka sâwm ve a, Pathianni chawhnu lam a ni bawk a, ani pawh a lo hman ve mai. Chimchimtei hruai ka duh viau nain a u amah chauha awmtîr ka duh meuh si lo va, a tàwpah erawh Tapuia ka pun leh ta ringawt a, a lo hman remchâng a, ngaihngam takin ka kalsan thei ang.

Kawnga kan tlàn lai chuan," Zàn hmasa khân rei vak lo chu ka va kan ve a; mahse, a lo zia angreng viau a, ka haw har lutuk lo," Tatei chuan a ti a," I va fel ve!" ka lo ti mai a, chutiang bâka han fak dàn tùr ka hre lo a ni. Ani lah chuan,"Mark han tih țhat ve deuh pawh hi a ngai ve a, a nu phei chuan min nêl ve tawh lutuk," a ti leh a, kei pawh chuan," A țhat hlauh chu," ka lo ti leh a.

Ka ngaihtuahna a vâk kual nasa. Tatei leh Sawmzuala hi an inzui ve deuh tihna a nih hmel a, Tatei hian sawi chhuak dawt lo mah se a duh tih a chiang a, Sawmzuala hian a kawp mai mai tihna em niang? A hmaa ka bula a thil sawite kha...an chanchin hi ka nauin min hrilh ve ngei a ring lo zâwk em maw ni? Kan unau inkâr hi tihchhiat a tum nge, min kawp ve ve a tum zâwk? Ka ngaihtuahna a tibuai, kei chu ka indah țha hmak, a duh theih ka ni tùr a ni lo tiin, Tatei a kawp lai renga min beisei a tum hi ka tih dik loh nge a tih dik loh? A thil tih hi Tatei hian hre chhuak ta se, engtin nge a awm ang? Sawmzuala chu a ngeiin a țhen hmak ang nge, kei hi min dem zâwk ang? Unau naua mipa pakhat vànga inhmuh thiam loh chu, ka duh ngai hauh lo ang.   Ka thil ngaihtuah avàng chuan ka thaw chhuak halh a.

"Rilru hahna i nei em ni?" a rawn ti ta chiah mai; mahse, kei erawh chuan," A, dàwra kan thawhpui Robert-a nau pawh kan ka la ngai a, ka rilru a tibuai deuh maw le," ka lo ti daih thung, min ringhlel êm lo ang chu maw?

Tatei'n a lo hrilh lâwk vêk tawh a niang, kan thlen veleh chuan Sawmzuala chuan," Ka lo thlîr reng tawh che u a," a lo ti vat a, ka nui sak ringawt. Páwnah chuan Tatei nèn chuan an ding dùn leh rih a, kei erawh chu in chhûngah lûtin a nu chuan min lo chiau-au vat a.

"Naute i lo hruai tel tawh dáwn emaw ka lo ti a," a lo ti var a, nui sâng chung hian," A ninhlei thei reuh lutuk a, ka rawn kal dàn boruak nèn a inhmeh lo dâwn riauin ka hria a, ka rawn hruai duh ta lo a ni," tiin ka chhâng duah a. Ani erawh chuan," Hmuh a châkawm vei nèn, Bawiha lah hian a sawi ve ziah a, ka pa pawh a zia chho ve hret hret tawh a, a dam chian deuh hnuah i la rawn lènpui ang a, tiraw?" nèlawm tak hian a ti leh siam siam a.

Sawmzuala pu room-ah chuan mi dang dang pawh an lo awm ve tal tal a, upa lam deuh zél an ni, țhutna pawh an lo hùn belh tawh a, ka beisei phâk hauh lohin Sawmzuala pu pawh a lo țha, țhu-mu titih hian a lo awm a, min lo hmuh chuan a hmel chu hmuh theih khawpin a lo hlim nia!

"Naute i rawn hruai tel ta em?" a lo ti vat a, ka hnung lam chu beisei nei tih hriat tak hian a melh zui a, a rûk tak chuan hrehawm ka ti khawp mai. Lo hruai ve ta mai mai ila aw ka ti ru vawng vawng, ani dam țha lo ber pawhin min lo zâwt a nia.

"A pawi khawp mai, ka rawn hruai tel ta lo va," ka ti phawt a, chutah," I va tlangvâl tawh ve! Ka hmu changkãng khawp mai che," ka ti leh a, ani pawh chuan," Ka țha lutuk tawh a nia, kohhrante leh mimal țawngțaipuina hi ka dawng țha a, a chhànna ka hmu chho zêl a nih hi," a lo ti ve chuar chuar a.

Mi dang awm veho an lo țawng ve tâkah chuan ka ngawi ta a, an thu sawi chu ka lo ngaithla ve a, pitar putar bula awma an titi ngaihthlâk hi a eng-emaw-ti nawm riau ka ti pek a, thil hi an hre rei thei si a, an titi hi a ngaihnawm ka ti țhin.

Tatei leh Sawmzuala an rawn luh lai chuan kan lo nui dar dar a, Tatei chuan,"In va hlim àwm dar dar ve? Kan nui ve duh a nia," a rawn ti phar phar a, a awm dàn ațang chuan a tlângnèl ve thawkhat tawh tih a hriat theih mai, nia, a kan ve nasa tawh a, a àwm ve tawh tho alawm. 

"Ei tùr lamte hi rawn ngaihtuah ula? Bawiha, nang han bengvár la?" a pi chuan a lo ti a, Sawmzuala leh Tatei pawh chu an inzui chhuak leh nghâl vat a, awmpui an nei lo niin a lang, an awmpui hmêl àwm ka hmu tlat lo, a hmaa ka kal pawh khân ka hmu chuang lo a nih kha, Sawmzuala nuin a nih kha ei leh in tùr pawh min rawn pe ni.

Mi dang an titi kârah chuan Sawmzuala pi chuan," Bawiha kâ ațangin i pasal leh i pain an boralsan tawh che tih ka lo hria a, i la naupan hmel tehlul nèn, i tuar nasa ka lo ti khawp che a," a rawn ti sar sar a, kei chuan," Aw, a dik alawm; mahse, fanu ka nei a, ani chu awm lo se chuan tûn dinhmun hi ka thleng phâk kher lo maithei a ni, bâkah, min ngaihtuaha min ngaihsak êm êmtu țhiante leh chhûngte ka nei țha êm bawk a," ka lo ti ve a.

"La naupang tê si-ah chuan hringnunin a sâwi chêt nasat ber páwl chu i nih ka ring; mahse, i chhel phahin i chak phah ngawt ang, kan vànduainate hi chhelna min siamtu leh kan nun min chher hriamtu an lo ni țhìn a, harsatna tawh a khirh poh leh kan taksa leh rilruin tuar deuh mah se, chu harsatna kan paltlang hnuah chuan kan nun chu a hriam hraih tawh mai a ni," a ti leh sar sar a, a thil sawi dik ti zet chuan ka lo bu nghat a.

Ei tùr kenga an rawn luh tâk avàngin kan titi chhunzawm ta lo va, chhang tui cial zet  chu eiin eh thei tui chu kan in a, ei a manhla thei khawp mai, a tui kher bawk si a, lei ka lem tel lo chauh a ni! 

"Maria, rawn chhuak ve la?" tia Sawmzuala'n a mitmeia bathlàr lam a melh zauh chuan lo hnialin," Va chhuak r'u, nakinah ka lo chhuak ve zâwk ang," ka lo ti a, an pahniha bula awm tam loh ka duh, a theih hrâm chuan Sawmzuala bula awm loh hi a țha ber, a tân ni lovin ka tân a nia ka tih ni.

A hnuah pawh chuan ka chhuak ta chuang lo, kan haw dâwn thlengin. Kan haw dâwn chuan a nu nèn scooty awmna thleng min thlah a, a nu chuan lêng leh tùrin min sâwm a, Chimchimtei hruai tel ngei tawh tùrin min chah lawm lawm bawk a, ka lo hruai tel lo chu ka inchhîr khawp mai, lo hruai tel ni ila chuan lèn leh har deuh pawhin a zia thei ang a, tunah erawh chuan bat nei rùn angin ka inhre deuh tlat.

Hun thâwl kan neih veleh Robert-a nau chu Chhani nèn chuan kan kan ve bawk a, Robert-a sawi kha a lo dik chiah a, min lo hmuh chuan hlim hmel taka min lo chhàwnin a hmel ringawt hmuh chuan natna a nei ang tih ngaihtuah pawh har tak a ni, a mak ka tiin tluk lo ka inti nghâl êm êm bawk a. Kan awm chhûng chuan amah ber chu kan kàwm a ni ringawt mai, dam lo kan e ti lo chuan kan han nui tlâng leh rih bawk a, a bula awm a hahdam khawp mai.

Robert-a lah chuan hahîpin làwmthu a lo sawi ve chhên a, a nau kan kan chu a lo ring ngam chiah lo a ni maithei, rei mawi tâwk tak kan lèn hnuah chuan haw kan tum ta a, Chhani chu ke a neih avàngin awlsam takin a haw thei mai a, min lo lam tura Tapuia biak ka tum chu Robert-a chuan," Ka thlah ang che, in in awmna pawh ka hre ve duh hrim hrim," a ti tlat a, ka remti vak lo chung chu min thlah haw ta a.

Kan inah chuan rei vak lo chu a lêng țhu ve leh rih bawk a, Chimchimtei chuan țawng fiah vak lo hian a lo ko ve chhên bawk a, an han infiam leh rih a. Sawmzuala a nèl loh nèn, Robert-a a nêl mai chu mak ka ti khawp mai, naupang chhawnchhaih dàn an inthiam hleih deuh a ni ngei ang.

A haw dâwn chuan," In awmna ka hre ta bawk a, ka lo lawr chhên maithei a ni," nui chung hian a ti a, kei erawh chuan," I lo lawr chhên hman lo tih ka hre ve kar a nia," nui chung vêk hian ka lo ti lêt a, kan in kawt ațangin step-a a chho chu kan nufa chuan kan thlîr zui a, Robert-a'n a kut a rawn vai chuan phûr zet hian Chimchimtei pawh chuan a kut chu a vai lêt ve vat a.

Hun a ral ve zêl a, Chimchimtei hruaiin Sawmzualate inah pawh ka lêng leh tawh. A pu chu a lo changkâng leh tawh khawp mai a, amah pawhin a lo kal kual thei tawh a, Chimchimtei chu an han làwm thiamin an han chhaih thiam khawp mai a, ani lahin nuam a ti, an tih dàn ang angin a awm zêl a, a chângin a zai a, a chângin a lâm bawk a, Sawmzuala pi leh pu leh mi dang lêng vete pawh an nui dar dar reng mai a ni.

Ka bula Sawmzuala țhu chuan," Kan dàwrah lo thawk tawh rawh," a rawn ti chhuak sup a, ka en vat a, ani erawh chuan Chimchimtei chetla vêl chu a lo thlîr daih thung a.

"Tihchi nâng," ka lo ti ve a, ka hna neih mêk hi ka hmuh pawh a ni lo va, țhiante min hmuhsak niin bànsan leh mai tùr chuan min hmuhsaktu a zahawm lutuk tlat, bànsan pawh ka tum chuang lo.

"I buai lo zâwk ang a, hlawh pawh i hmu țha zâwk ang," a ti leh a, min thlèm dàn chuan ka nuih a tiza țêp, tuna ka hna hi hrehawm ka ti lêm lo asin, hlawh sâng lo mah se ka thawh dàn nèn a inphû tâwk viau ka ti bawk.

"Nuam ka ti viau asin, kan innêlin kan inpawh tawh hlawm bawk a," ka lo ti a, kan thawkho rei ve deuh tawh bawk a, dáwt ka sawi hauh lo.

"Engati nge nuam i tih? Tih chhan riau i nei a ni maw?" a rawn tih leh chuan ka ngawi ta daih. Hetiang lam hi sawipui ka duh lo, ngaihtuah pawh ka duh lo, inthiarfihlìm daih a țha.

Toilet awmna zâwtin ka kal ta daih rêng a, mi dang awm vete kha chuan kan țawng kha an rawn hre ve kher lo ang chu maw. Hre suh se; mahse, an lo hria a nih pawhin an hre thiam kher lo ang.

"Ka zawhna che kha tlànsan tum duh suh."

Ka va phu nasa tak! Toilet ațangin ka chhuak chiah a ni a, min lo chãng nge, a lo awm ve remchâng záwk? Min lo chãng a nih ka ring zâwk mah.

"Eng nge i lo tih?" tiin ka zâwt ve thung a, toilet awmna hi a kual deuh hlek a, a kual lam kher min hrilh a nih êm chu ka ring lo deuh ringawt a; mahse, min hrilh lui pawh a ni thei tho.

"Kha pa vàng kha a ni tiraw? 'I duh thei lo ang' tiin ka hrilh tawh che kha," a rawn tih chuan," Tu chungchâng nge i sawi?" ka lo ti thung a, ka hre reng; mahse, ka hre lo der a ni, hetia min lo chàn avàng pawh hian hriat loh der chu a phû.

"I hre reng," a ti phawt a, chutah, min rawn hnaih sauhin," Maria, ka hrilh tawh che kha, ka hun țha neih hi bawhpelh ka tum tawh lo, ka duh che," a rawn ti chhuak ta chiah mai le!

* A AWLSAM LAM RINGAWT TIH TUM LOVIN A DIK LAM CHAUH TIH TUM ZÁWK ANG CHE*