☆LAIRIL LUAHTU☆ - 29 By Dungdi Pachuau

 ☆LAIRIL LUAHTU☆ - 29 By Dingdi Pachuau

A mit tak pawha en ngam lo hian," Hetiang thu hi i sawi thei lo ang!" ka ti ta ringawt a. A dik chiah alawm, a zahthlâk, a țhianpa nupui ka nia, kei pawhin Zorina țhianpa a nihna angin ka ngaina, ka nau êm êm star(bialpa a ni tawh hial maithei) a la ni zui.

"Engah nge ka sawi theih loh ang? Tuin nge min khap thei?" a lo ti sup thung, luhlul hmel zet hian ka hmaah chuan a ding ngur mai a, a kut pahnih chu a kekawr ipteah a zen lût bawk a, kal pelh mai a harsa ngawt ang.

"Hetiang hian awm suh," ka ti leh sap a, sawi tùr a vâng si, a rûk tak chuan hrehawm ka ti tawh a nia aw. Chimchimtei khân min lo ko vak se ka ti kher mai, loh theih lohin ka kalsan thei ang a, mi bulah chuan hetiang thu hi a sawi ngam dâwn bîk lo bawk a.

"Engtin nge ka awm a?" a ti leh sup a, chhàn ngaihna ka hre leh dér lo. 'Chutin khatin i awm' ti tùrin han sawi dawt tùr ka hre bawk si lo, ka hmui chu ka pet ka pet ringawt mai.

"Mawh...engtin nge ka awm a?" a tih  leh lai tak chuan vànneihthlâk lutuk tak maiin Chimchimtei'n min rawn ko ta vak mai, ka làwmzia mai chuh, a thil sawi pawh ngaihsak ta lo chuan," Chu, min ko," tih leh rang zeta a taksa dek hauh lo tùra sîr hê deuh si, kûn deuh pah sî-a kal nghâl chu ka rual zat a, min en zui chu ka ring lêm lo nain ka tukkhum erawh a hit mam mam mai, min ko zui bîk lo bawk.

Min hmuh loh vànga min lo ko a lo ni, a lo men deuh pàr nghe nghe a; mahse, a hminga ka koha min hmuh chuan nui hmel a pu leh nghâl vat a, min rawn pan chuang lo chuan a thil tih lai chu a ti leh a, Sawmzuala nu chuan Teddy Bear lian vak lo hi a lo pe a ni ngei ang, chu chu a khàl leh a ni.

Sawmzuala pawh ka hnung lawkah a lo lang ve nghâl a, ka lo en duh lo, min en ngur leh àwm si a, a lung a àwi loh phei chuan hmuh a nuam àwm lo êm mai, Chimchimtei Teddy Bear khàl chu ka melh reng a, ka hawi sawn mang lo.

Haw thuai mai ka duh ta tut tut a, Siamtei pawh a khua a lo har tawh ang. Amah chauha ina awmtîr ka duh loh avàngin Tapuia rawn hruai mai tùrin ka ti kha a ni a; mahse, Siamtei'n," Nute, inah ka lo awm thei alawm, ka hreh lovin ka hlau hleinem, duh leh, pâwnlamah min kalh hnan mai la, a buaithlâk lo zâwk bawk ang," a tih avàngin nuam lo ti ru deuh takin pâwnlamah ka kalh hnan ta kha a ni a, Tapuia hnênah pawh lo kal leh lo mai tùrin ka hrilh a nih kha.

"Ka duat, kan haw tawh mai dâwn em niang? I u a khua a lo har tawh viauin ka ring a ni," ka tih chuan Sawmzuala pu chuan," A la hma êm mai, nuam a la tih êm hi," a lo ti vat a, dâwt chu a sawi hauh lo, Chimchimtei chuan a Teddy Bear chu pawmin a àwi ve lâwp lâwp a, ka biakna pawh chu a ngaihven lo hrim hrim.

"Ni e, nuam a la tih viau hi, a rawn lèn ve chhunah, in lêng reng rih ang chu," Sawmzuala nu pawh chuan a lo ti ve bawk a, ka rin loh deuhin Sawmzuala ve thung chuan," In lam a ngaihtuah tawh a nih hi. Maria, ka lo thlah ang che u," a lo ti vut a, a țhutna ațanga thoin motor chahbi a dahna ni ngei tùr drawer chu pawt hawngin eng emaw hi a la nghâl a.

Chutianga a chêt nghâl vut chu ka ring lo asin, bâkah, min thlah tùr pawhin ka duh hran lo, eng emaw min sawipui leh kha a tum leh ngei ang a, chhàn dàn tùr a vâng si, a fala a bula awm loh hrãm hi ka tân a him a ni.

"A ngai hleinem, taxi kan la leh mai ang, bâkah, pèn kawi duhnate ka nei bawk a," tiin chhuanlam chu ka siam ve nghâl a, pèn kàwi duhna chu ka nei hauh lo nain min thlah ai chuan dâwt telh hlek kha pawi ka ti lo a ni.

"A harsa lo," a lo ti leh mai a, min nghâk chuang lo chuan a chhuak ta daih a, motor a lo va khalh chhuak dáwn a ni ngei ang, haw ka lo sawi chhuak ta kher kher chu ka inchhìr ber țum a ni ngei ang.

"In haw dâwn chuan hei hi naute tân," tiin Sawmzuala nu chuan fridge chu a va hawng rawk rawk a, Apple pum 3 àwm vêl hi a rawn la chhuak a, chutah, choka lamah a phei leh rih a, a rawn chhuah leh meuh chuan polythene hian eng emaw ni a rawn khai chhuak hnawk mai.

"In rawn lèn leh vat kan lo beisei ang, Chimchimtei phei chuan a bula awm a nuam si, a fel si, lo lëng leh thuai r'u aw," tiin a polythene khai chu min pe a, a rit fahran lo nain a chhûngah chuan thil a tam hmel viau a ni.

Haw loh theih loh le, kan chhuak ta a, Chimchimtei chuan Teddy Bear chu a ngèn leh tlat pek a, a tizahthlâk tak tak a ni. Sawmzuala nu chuan," E, i tâ tùr liau liau alawm, naupang khalhtu tùr pawh kan neih loh hi," tiin nui sâng hian Teddy Bear chu Chimchimtei chu pein a kuahtîr nghâl a, ani pawh chuan lâwm takin a lo kuah nghâl chial a, ka kut lehlam chu rawn vuan leh nghâlin lãwm takin a zuang euh euh pah bawk a.

Sawmzuala chuan motor chu a la chhuak tawh a, a lo ti nung vat vat tawh bawk. Chuan ka va huphurh tak! Tuna ka rilru hi hria se chuan min thlah lo tawp ang, ka ngei pawh a ni lo; mahse, nuam lo ka ti, a rilru hi Tatei'n hria se a rilru a na ngawt ang, kei pawh min ngei daih thei, kan unau inkâr a chhiat phah hial thei bawk asin, a ni thei lul lo a ni.

"Min biak duh loh phah nân hmang kher lo la," kan tlàn chhuah ațanga a vawi khat nân a rawn ti chhuak a, kei erawh chuan chhâng lovin kan sîr lam chu ka en daih a. Ka chhàn loh vàng pawh chu a ni maithei a, a țawng chhunzawm ta bîk lo.

A hnu daihah chuan,"I pèn kàwi duhna chu sawi mai rawh," a rawn ti leh sup a, min rawn en lovin motor chu a khalh mawp mawp a, kei chuan," Ka duh lo mai ang," ka lo ti ve thung a.

"I chhuanlam tih ka hria alawm," a rawn tih leh chuan ka en zawk a, min lo man chiang hle mai maw. A bula awm ka hreh a ni tih pawh hi a hriat ngei dâwn chu, hre lul rawh se, chuan, hetiang zâwng hian min hnaih lo bawk ang a...

"Ka hlatsan che chu ring lo la," a rawn ti ta chiah mai. Ka lo thaw hak a, heti zàwnga min ena min hnaih tlat chuan engtin nge Tatei bulah ka zêp theih ang? Min man chhuak rang dâwn lutuk, keiin ngaizâwng lo mah ila, a mipa duhin hmeichhia anga min hnaih tlat si chuan...

"Ti suh, khawngaihin, hetiang hian awm suh, ka awm ve thei ngai lo ang tih i hriat kha," ka ti ve tawp. Țawngkam dêngkhãwng leh chhe tak hman a ngai lo, ka duh hek lo. Ka nau nèn kan inkâr tihchhiat ka duh loh bâkah ka lakah beisei nei tùrin ka duh lo, pasal nei niin fa nei tawh ka nih hi.

"Engati nge i theih loh ang? Pasal nei lai i ni tawh lo, zalèn i ni tawh," a rawn ti leh ta. A va buaithlâk tak êm! Țawng ka tum deuh ûk a; mahse, ka țhulh leh, ka sawi fiah thei lo ang, buaina a tam mai mai, chuvàng chuan ngawih mai hi a țha záwk.

Ina rawn pêng ve tùr chuan ka sâwm lêm lo bawk a, rawn pèn a tum bîk lo a niang, kan in pêng kan thlena motor ațanga kan chhuk chuan,"Ka beidawng dâwn lo a nia," a rawn ti leh sup a, chutah, chak zet hian hmalamah chuan a tlân zui ta nghâl a.

Ka rilru a tihah. Engtin nge a thil sawi kha ka pawm ve tehlul ang? Dik tak chuan Zorina boral hnu hian mipa dang hi ka la melh loh mai bâkah Zorina ka phatsan thei lo. Ka fanu-ah hian ka rilru ka sâwrbing a, ani țha taka enkawl chauh hi Zorina ka hmangaihna ka lantîr chhuahna niah ka ngai. Mipa dang lo melh duh ve dâwn ta pawh ni ila, ani kher hi chu ka melh lo ang, Tatei star a nia, an inkawp ve tawh ngei bawk ang. A thuhrimin, Sawmzuala rêng rêng pawh Tatei lakah chuan a va rinawm lo rêng rêng ve maw le! A duh ve tak tak lo a nih dâwn hi, Tatei pawh hrilh thuai tùr a ni, țhen vat tùrin ti ta ila, nakinah hmeichhe dang a duh deuh a hmuh leh hunah, a kalsan daih mai dâwn asin, rilru na taka a siam hma hian hrilh thuai a ngai.

Mahse, engtin nge ka hrilh ang le? A rilru a pêk ka ring a, la rei vak lo mah se, a rilru chu a na hman viau tho ang. Ka khawngaih ve tho dâwn si a, ţhen tùra han hrilh ringawt pawh chu; mahse, ka hmangaih ka nau a nih vàngin a tân a țha zâwk dâwn si a, ka hrilh thuai loh chuan a ne rei mai mai ang, nakinah a la țhen tho tho a ngai dâwn, a hriat hma a țha zàwk ang.

Mahse, kava huphurh si êm!

Zan khat chu Robert-a a rawn lêng ve teh khiah a! Hlim takin ka lo chhàwn a, Chimchimtei a chhawnchhaih nghâl vat a, a chhaih thiam bawk a, a lo thlen ațanga minute 10 vêl hnuah chuan a mal chungah a pawm thei mai nia!

Thingpui a in lai chuan a nau chanchin chu ka zâwt pah a, ani chuan a zia thu sawiin,"Rawn kan leh tawh ula, a sawi a sawi che u asin," a ti zat a, kei pawh chuan," Ni e; mahse, kan awm dàn chu i hriat hi, ka tân hian chhuah hi a har ve êm a ni. Hun ãwl kan neih leh veleh ka la rawn kal leh khawp ang, a bula awm kha a nuam tlat," ka lo ti ve duah a.

Tapuia a rawn lût ve a, tlaia min rawn biak tawh avàngin mak ka ti lêm lo, a lo riak dáwn miau a. Chimchimtei'n a lo hmuh chuan," Pute... pute..." tiin a lo pan vat a, ani pawh chuan a lo pawm kãng vat a, Tapuia hi chuan a pa Zorina ai hi a awhsak ka ti mai, Chimchimtei lahin a duh êm êm bawk a.

"Chhûngkaw pa ber i nia, rawn chhuak tawp la, i rawn hman a ni mai," nui chung hian Robert-a chuan a ti leh a, kei pawh chu ka lo nui ve a," Rawn chhuak tawp ila, chaw ei hunah haw leh mai ta ila tiraw?" ka ti ve a, kan nui dùn hawk hawk a.

Rei tak a lêng lo, tlangvâl fel tak chu a ni ngei mai. A polite a, nuih hun a hria a, fiamthu hun a hre bawk. Dàwra Chhani nèn an infiam nasat theih êm avàng leh Chhani'n lêrh tak anga a fiam țhin avàng mai khân ka hmu lêrh lua chuang lo. Mipa hi chu a tlângpuiin hmeichhia ai chuan an lêrh deuhin ka ring a, khal leh chhe lo an lawm dànah. Robert-a pawh hi mipa a ni ve tho a, eng emaw chenah chuan a lêrh ve tho ang chu; mahse, Sawmzuala ang hi chu a nih ka ring lo.

A haw hnuah chuan Tapuia chuan," U, i inlêngpa khân a hope ve deuh hlek che chu a ni tiraw?" a rawn ti chhuak a, Siamteite pahnih room lamah an awm tawh a, a thil sawi an hre lo hlauh e.

"Hope lo ve, a fel ve a, a rawn lêng ve a nih kha, a vawi khatna chauh," ka lo ti a, hmun chu ka phiat pah a. Ani erawh chuan," Zàna rawn lèn kher a ngai chuang hleinem, chhùnah a hmu thei reng tho che a, a over e," a ti leh thung a.

"Tapui, chutiang lam ngaihtuah thei ka nih loh hi i hria ang tiraw? I u Zorina lo hi chu mipa dang ka la melh lo asin, duh pawh ka duh lo, ka pasal a la ni reng a, uirê nih ka duh hauh lo bawk," thutak zet hian ka ti a, ka ti mai mai lo tih hria se ka duh a ni.

"U, kum pawh a  ral tam ve tawh alawm, kum 3 chuang a ni tawh a nia, a lung pawh i phun vek tawh a, duh i neih phawt chuan thiam lohna i nei tawh lo, uirê lah i ni hek lo ang. Hlimna zawn leh hi i hun viau tawh asin, hlim leh tùrin ka duh che a ni, ka tilui hauh lo che; mahse, hlimna chu nei leh rawh, kum naupang têin vànduaina i tâwk a, chumi avàng chuan heti ringawta awm tùr hi i ni miah lo, i la naupang lutuk," Tapuia chuan a ti leh duah a.

Tapuia thil sawi chu ka ngaihtuah a, Sawmzuala thil sawi pawh ka ngaihtuah chhuak leh bawk; mahse, amah ka duh vànga ngaihtuah chhuak ka ni lo, Zorina hnua min duh thu min hrilh lehtu a nia, ngaihtuah chhuah loh duh viau mah ila ka thei ringawt bîk lo. Chumi vàng erawh chuan ka va duh ta e tihna a ni chuang lo, ani phei chu kan nufa chunga fel lutuk a nia, a tih dàn hi dik lo viau mah se huat ka duh lo.

Tatei nèn kan inhmuh remchàn theih rih loh avàngin eng mah ka la sawipui thei lo, a zirlaiah a buai deuh avàngin kan inah pawh a rawn lêng hman lo, phone-a inhrilh chi ni lo deuha ka hriat avàngin hun remchâng ka la nghâk a ni. Sawmzuala a rawn lêng zauh zauh a, a nungchang a thlâk leh daih tawh bawk! Hmâna cl xii kan zirlaia Sir Manuna car-a kan chuan lai vêla a awm dàn ang chiah kha a ni leh tawh! Biak hmasak loh chuan a țawng duh miah lo va, rawn lêng a nihna laiah lo biak hmasak ngei ngei a ngai a, hrehawm ti chung chungin ka lo be țhìn, a rùl tâwk chauhin min chhâng a, sawi zawm leh tùr hi vâng duh tak a ni.

*Min biak i hreh hi chuan min be lo mai la*  A haw hnuah hetiang message hi ka dawng ve ziah a, ka chhâng lêt ngai lêm hlei lo va. A inla ngêng chho leh vêl hian ka nuih a tiza deuh tlat nain ka nui ngai lo, hetiang hian Tatei bulah awm ve țhin ang maw? Engtiziaa kan unaua min kawp hi tum tlat nge maw a nih ni? A pawi kan sawi em ni le? Phubâ lâk a tumna em niang? Ka ngaihtuah nasa viau țhìn, a hmâwr erawh ka bàwk mumal thei lo. 

Zirtàwpni a ni a, Chhani a damsam loh avàngin Robert-a nèn kan pahnihin dàwrah chuan kan awm a, Chhani lo kal thei lo chu pawi kan tih thu kan sawi a, hah pawh kan hah phah ve deuh. Ani kha a mawng a zãng a, naupang ber a lo ni bawk nèn, tirh deuh kha a nia, a awm lo zet chu ka tlãn ve nasa e. Nula khal deuh pahnih an rawn kal leh chuan Robert-a nèn chuan kan inen a, kan nui ringawt.

An chhuah hnu chuan Robert-a chuan," Chhani awm se sawi tùr a hre leh nasa àwm mang e!" a ti chhuak a, a nui pah sûng a, kei pawh chuan," Ni e, a han kâp leh che ang a, nang lahin chhàn dàn tùr i vàn leh àwm si a," fiamthu hian ka lo ti ve a, ani lah chuan," Dik chiah, min han kah tak tak hi chuan sawi tùr hi a vâng thei ém a ni, a sawi dik fuk fuk thei riau a," a lo ti leh a, ka nui hak hak a.

Zànah Sawmzuala a rawn lêng a, kan chaw eina dawhkàn chu kîlin a țhu a, Siamteite pahnihin TV-ah Tom & Jerry an en bawk a, kei erawh chu nuam ti lo tak hian amah hlat lutuk si lo, hnaih chuang bawk si lo hian ka țhu a, hlat deuh taka țhut ka duh viau laiin kan inlêng a ni ve bawk sia, ngaihtuah lo deuha han țhut hlatsan chu a tihchi meuh si lo.

"Vawiin khân nuam i ti hle mai." Mak tak maiin a rawn țawng chhuak hmasa ve ta tlat, a piangthar ta emaw ni ka ti hial a ni.

"Khawiah?" ka lo ti ve mai a, dàwrah bâk khawiah mah ka kal lo va, nuam han tih deuh tùr lah ka hre chuang lo, a hre sual a niang.

"Dàwrah khân. Engati nge ka duhna che chhâng lova kha pa kha i duh zâwk tlat a?" a ti a, a zawhna frank lutuk avàng chuan nuam lo ka ti kher mai, a thil sawi chu Siamtei chuan a hriat phâk loh hrâm ka beisei bawk. An hriat laia hetiang lam sawipui phei hi chu ka duh miah lo asin, duh lo tak ka ni.

"Duh tâwk teh, sawi ka duh lo a nia," ka ti ta chat a, kan pahnih chauha awm laiin sawi ka duh lo va, ka fate pahnih hriat lai phei chuan ka duh lo zual, hre thiam hrâm se ka ti hle mai.

A phone phawrhin a kheuh nuap nuap a, țhutthlenga phone ka dah chu a ri ta keuh bawk, message thar a awm tihna.

"I phone en rawh," a ti sup a, a thil tih vêl dàn hi a va naupang chhia tak! 'Sawi ka duh lo' ka tih kha a man thiam ve ngei chu a nia; mahse, phone hmangin a ti leh hrãm a nih hmel. A pawi lo mai e, ka fate pahnihin an hre lo thei  zâwk ang chu.

*Kha pa kha duh suh* tih ringawt hi a lo ni a, tu nge 'kha pa' a tih chu ka hre chiang khawp mai a; mahse, mi ka duh leh duh loh tùrah thu a nei lo, ka thu thu tùr a ni zâwk.

Min rawn en reng tih ka hria; mahse, chhàn ka tum lo, zawhna pawh a ni  lo va, chhàn tùr a awm lo,  ka chhàn loh avàngin a phone chu a kheuh leh nuap nuap a, message a rawn thleng leh nghâl.

*Ka bànsan dâwn lo che ka tih kha, min chhàn hma chu ka beidawng dáwn lo, min ngei em?* tih hi a ni a, ka rilru lo deuh taka *Ngei lutuk* tia chhàn mai ka châk ut ut; mahse, 'êm a' ka ti leh a, țha takin ka chhâng ta zâwk a.

*Ngei lo ve, i fel alawm* tiin. Ka rilru tak tak chu a ni; mahse, 'I fel alawm' tih lai tak khi a ngei ngawt ang chu. 

*Chuti si?*  A tâwi tek tawk viau; mahse, zawhna thui tak a ni. Zanin hi sawi felna hun țha tak niin ka hre ta thut, Tatei ka la hmu fâk thei si lo va, a hnêna sawi fiah mai hi a țha ang, a inthiar fihlìmsan hma leh a țha hma tihna a ni mai.

*Engtin nge hetiang rilru hi i put theih? I țhianpa nupui ka nih hi, bâkah, Tatei u ka ni bawk, i rilru siam fel rawh, thil a pawi hmain*  tiin ka chhâng ve ta a, ziah dik lo lai a awmin ka hre lo. Tatei u ka ni tih leh a țhianpa nia a chhàl Zorina nupui ka ni tih hi hre chiang lul teh se.

*Engvàngin nge Tatei hi i rawn sawi chhuah a? Tel vena a nei lo*  tia min rawn chhàn chuan ka thin a sa ta deuh phat a, a la zêp ve țàng țáng duh a nia, engtin nge hetiang hian a tih theih? A ti mah mah a ni, ka nau a ni tih a hre reng si a. In ațangin ka chhuak a ni maithei; mahse, Tatei hi ka nau, ka thisen zawmpui a nihna a bo chuang lo, ka hmangaih sawt zàwkin ka hre nghe nghe asin.

*Engkim hi Tatei ka hrilh vek dâwn, min tih dàn zawng zawng pawh hi, țhen tùrin inbuatsaih nghâl ang che, rilru tak takin i duh lo a nih chuan tu mah kawp tawh hek suh, mi rilru i tihnat tam poh leh i thla a muang lo ting dâwn tihna a ni asin, hlimna tak tak i chhar thei ngai lo ang*  tiin ka chhâng ta piap mai. Thu dik chuan dêng ve rawh se, nâ a ti khawp ang chu, ti rawh se, a phú tâwk a ni mai. Engah nge kan unaua min kawp te a tum vei?  Rilru na takin Tatei a siam dâwn zui.

Min rawn chhâng mai dâwn emaw tiin cho zet hian ka en phei a, min rawn chhâng miah lo, min rawn phei a, mit khap lo lêk chuan kan inmelh dùn ràn ta mai.

"Thil i hriat chian loh chuan hriat chian tumin min zâwt mai rawh," țawngka chuan a rawn ti ta a, naupang hriata sawi ka duh lo tih a hre ve reng si a, ka thinrim chu ka insehruh țeuh a.

"Zawh tùr che ka nei lo," a dam thei ang ber chuan ka ti sap a, kan boruak chu naupangte chuan hre lo hrâm teh se, inhniala inhauh phei chu ka duh hauh lo.

A tho thut a, a chhuak ta daih a. Pawi dèr lo, duh leh thinrim rawh se, ani nèna intihthinrim mai mai, Tatei ka ngaihtuah fê záwk. A thiltih dik loh ka hre reng si a, a thuhrimah, Tatei chuan eng eng emaw min hrilh ve pawh a ring lo rêng rêng em maw ni? A huaisen deuh mah mah chu a ni.

*******

"U, Sawmzuala nèn in inhmu thiam lo deuh em ni? A sawi deuh nuah nuah a,"Tatei'n a rawn tih chuan ka rilru chuan," Chu pa mai mai chuh!" ka ti a, a hriatah erawh chuan," Ka hre nâng, e taka, thil hrilh duh che ka nei a nia, hman viau la, inhmu thei ila ka ti hle mai," ka ti a, thu dik tak hi ani pawh hian a hriat ve a hun tawh a ni. Zîngkâr a ni a, nizàn khân Sawnzuala kha a rawn lêng a nih kha, lungawi lo deuhin, mangțha pawh inmangțha lovin a haw zui ta nghe nghe a nih kha.

"Phone-ah hian sawi mai la? Eng chungchâng nge ni a?" a rawn tih chuan," A, thil hriat nuam vak lo a ni dáwn a, hmaichhana hrilh che ka duh viau a ni," ka ti leh a.

"Eng chungchâng?" a rawn tih leh chuan zêp duh ta bîk lo chuan," Sawmzuala nèn in chungchâng hi maw le, i tân mipa țha a ni lovin ka ring a, bâkah, a duh tak tak lo bawk che tih ka hria a ni," ka ti leh a.

A rawn nui ta hawk hawk mai!

"Sawmzuala nèn kan pahnih inkãr maw? Ani chu țhian angin alawm ka en, engtin nge a tih a?" nui ar ar chung hian a rawn ti ta mai!

"Eng maw?! In inkawp a ni lo'm ni?!" ka tih chuan a rawn nui leh ta vak vak a,"A teuh lo e, a teuh lo lutuk! Ani pawhin ngaihzâwng enin min en lo hrim hrim, engtin nge chutiang ngaih dàn chu i lo neih theih a?" a rawn ti a, a sawi pah chuan a nui leh rih bawk a.

A thu sawiin min țhàwn ém avàng chuan han sawi leh tùr mau ka hre lo va,"I star theih êm kha," ka ti ta ringawt a.

"A, ka nui nasa lutuk a, ka pum a na zo vek mai!" tiin a rawn nui leh uar uar a, kei erawhin ka kuttin ka seh ka seh ringawt! An inkawp si loh chuan engtin nge inkawp angin ka ngaih theih si le?  Sawmzuala bulah pawh ka lo sawi nual tawh kha, nizàn phei kha chuan ka thin a tirim viau a nih kha, a dik si loh chuan a va zahthlâk dâwn tak!

"Engah nge a ţantìrah engkim min hrilh ve mai loh?" tiin ka hau lêt ta ringawt a, nizàna ka tih vêl dàn ațang kha chuan Sawmzuala hmuh leh pawh chu thil huphurhawm tak tùr a ni, eng angin nge min ngaih ang? Sual min ti àwm mang e, ka kawlh a ti ang chu aw...A zahthlâk e...

*TUM MUMAL TAK NEI LOVA HRINGNUN HMAN HI COMPASS TEL LOVA LAWNG KHALH ANG VÉL A NI*