☆LAIRIL LUAHTU☆ - 30 By Dingdi Pachuau

 ☆LAIRIL LUAHTU☆ - 30 By Dingdi Pachuau

"Engtin nge i bulah chuan a rawn sawi rêng rêng a?" tiin ka zâwt a, mipa ve si, chutianga mi bula lungawi lohna va sawi daihte chu, a mipa lo hnì hnè êm mai.

A rawn nui leh phawt a, chutah," Min hau miah suh aw," a rawn ti leh rih a, kei chuan,"Hauhna tùr i awm a nih chuan hau ang," ka lo ti vat thung a, ani chuan," A, min hau miah suh ang che, i tân vek a nia ka tih ni," a rawn ti leh a, chutah," Ih, Sawmzuala kha ngaizâwng angin ka awm der a nih kha, i tân ka duhpui che a, a awm dàn ațangin a duh che tih lah ka hre ve vek tho nèn, a mitmei ka hriat duh țhin vàngin ka ngaizâwng der a ni, i lo âwih ve tho bawk sia, a nuihzatthlâk e," tiin a rawn nui leh a.

"Màwli leh!" ka ti hluai phawt a, chutah,"Chu pawh ni se...a nih,  i ngaizâwng der tih chu a hria em? In pahniha ruahmanna em ni?" ka ti leh a, ani erawh chuan,"Teuh lo mai! Nizàn khân lungawi lo aw deuhin min rawn bia a,'I u hian eng thil nge ni a sawi hi?' a rawn ti ringawt a, ka hre thiam lo nasa, ka zawh lahin a sawi duh si lo,' Zâwt mai rawh,' a ti leh ringawt a, chutiangah chuan in lo buai tih ka lo hre miah lo va," a rawn ti leh a.

"Ka zilh hrep alawm, 'Țhen turin inbuatsaih nghâl rawh,' te pawh ka ti ta nghe nghein ka hria. Sawi chian ve mai tùr che a nia," tiin ka han mawhpuh titih deuh ringawt a, ani chuan,"Khaw dang i hawi loh lutuk vàng a nih kha, nangma khawvêlah chèngin U Zorina thihna avàngin i nun i inkhàrkhip tlat a, khawvêl dang nun tem ve tawh miah lo tùrin i thinlung kawngka i khãr a, chu chu hawng ve deuh tùra ka sawipui che pawh khân i ngaihven duh tlat lo va," a rawn ti ta daih a.

"Chu lam chu min lo ngaihtuahpui duh suh, ka nun a ni alawm," ka ti ta phawng a, ani chuan," Kha, i rawn tih leh chiah kha, i la naupang a, hlimna thar chhar leh tùrin kan duhsak che a," a rawn ti leh a, "Chuti lamah chuan min duhsak rih lo mai rawh u, enkawl tùr fanu ka nei a, ka hma ringawt ka ngaihtuah thei tawh lo a ni, ka hlimna ringawt chu ka ûm thei tawh lo," ram deuh hmak hian ka ti leh a, ani erawh chuan," Chimchimtei chu kan fanu ang ve tho a nia, kan hmangaihin kan ngaihtuahpui che alawm, i hlim lehna tùr dãltu atân hmang suh," a rawn ti leh a.

"Duh tâwk ang, ka nun chu ka nun a nia, rawn inrawlh lo mai teh u, hetiang lam min sawipui dâwn chuan inbe tawh lo zâwk-" ka la tih lai mêk chuan," Engtin nge chutiang chuan i sawi theih?" min lo tih khalh a, thinrim vanga thaw hawk chung hian," A tâwk! Sawi tawh lo ang, i buai lohna tùrah lo buai tawh lo mai rawh," ti hmakin  phone chu ka off zui ta daih a.

Ka chhàn dàn avàng chuan nilêngin ka awm a nuam lo, khatiang lo deuh, hriat nuam deuh hlekin lo chhâng tùr hi ka nia, ka thin a lo ram deuh chu a ni. Ka hlim min duhpui ve a ni mai a, a ngaih dànin țan a lo la ve a ni mai, ka tân, ka hlimna a nih ringin, kei hian tlang taka lo sawi mai tùr ka ni asin, ka ngaihtuah lét cheuh cheuh chuan Tatei ka țawng khum dàn kha a dik chiah lo tih ka hria; mahse, inchhìrin awmzia a nei tawh lo, ka sawi vek tawh.

Zànah Tapuia a rawn riak leh a, Siamteite pahnih an muthilh tawh hnu chuan Tapuia chuan," Engtin nge Tatei nèn in inbiak a? A țap pùr mai a, engtin chiah nge i lo tih a?" tiin min zâwt ta a, makti deuh hian ka en hâ a.

A țap maw?  Ka țawngkam kha a dik lo rêng a ni, nâ chu a ti ngawt ang, khatiang khân ka țawng khum ngai si lo va, kei pawh vawiin nilëngin ka awm a nawm theih loh phah a nih hial kha.

"A, hlimna min duhpui vàng a nia, chu chu hre thiam duh lovin keiin ka lo țawng khum deuh a, nilêngin ka rilru a nuam bîk hleinem," ka tih chuan Tapuia chuan," A chhan a sawi duh si lo va, ka khawngaih reuh khawp a. A thuhrimah, U, i hlimna chu kan duh vek alawm, chutia lo țawng khum kher chu a ngai hleinem, kei pawhin i hlim chu ka duh a. Heti tawp hi chuan i awm reng thei lo ang, i la țhalai a, U Zorina i sùnna pawh hi a tâwk ve tawh alawm, kum thum chuang a ni tawh. Hlimna dang neih hi i phû ve tawh,  Chimchimtei chu kan ngaihtuahpui thei vek che, kan dam phawt chuan a hrehawm ngai bík lo tawp ang. Ani chauh ngaihtuah lo hian hlim tumin ke pên leh rawh," a lo ti duah a.

"Hlimna in tih chu eng ber hi nge? Ngaihzâwng neih leh tihna em ni?" ka ti ta bàwng a, zêp nei hlek lovin zanin chu sawi chhuak mai teh ang.

"A, chu pawh chu a ni thei tho ang chu, i nei em ni?" tia min rawn zawh lêt chuan ka nui chhuak hawk mai. A lawmawm ve thei êm asin, ka naua hi chu. 

"Nei lo ve, țûl ka ti lêm lo va," ka ti țha ve mai a, ani chuan," Kha chiah kha, inhawng ve deuh la, nangmah duhtu che pawh an awm nual àwm si a, U Robert-a angte hi, a fel viau lo'm ni?" a rawn ti leh a, ka nui sak a.

"Tapui, i u hi eng angin nge min hmuh a? Luck viau tùrah min ngai em ni? Nula ka nih loh hi," ka tih chuan," Kha, i ti leh ta, U Zorina a awm tawh lo, i pawm emaw pawm lo emaw mitthi a ni tawh a, a thihsan che chuan nula i ni leh tawh mai. Ka sawi thiam chiah lo, zalèn i ni tawh tihna a nih chu, ngaihzâwng pawh i nei thei, pasal pawh i nei leh thei tawh, pi leh pu dànah pawh uiresan i ni thei tawh lo, a lung i phun vek tawh tlat a," intihre tak chuan a ti leh duah a.

"Ngaihzâwng nei leh tùr chuan min duh ta a?" ka ti leh a, ani pawh chuan," A, hlim la kan ti mai a nia. U Zorina chu engtikah mah i theihnghilh thei dâwn chuang lo; amaherawhchu, amah avàng chuan hlim lo rengin awm reng suh ka ti a ni, ani pawhin hlim leh la, a hma ang khân hlim takin nun hmang leh la a ti ve ngei ngei ang," a ti leh a.

Ka chhûngte hian min lo hre chiang nasa a lo nih hi. Ni e, ka hlim lo alawm, ka hlim miah lo. Hlim lo takin hun ka hmang chho ve zêl a, ka fanu tâna inhman ral țhak mai hi ka tum chu a ni, ka hlimna tùr ka ngaihtuah ve lêm lo, Chimchimtei a hlim phawt chuan ka hlim ve a ni mai ka ti ţhin. Ka chhûngte hian min hmangaih avàngin ka hlim an duh a, kei lahin min hmangaiha min duhsakna chu hnâwlin Tatei phei chu rilru na takin ka siam phah a, ka lo che over lam deuh chu a ni.

*******

Lungawi lo taka Sawmzuala ka siam zàn aţang khân kan inah a hmel a rawn lan tawh lo, kâr thum zet a ral tawh. Tatei hnênah erawh chuan ka țawng khum dànah ngaihdam dîlin kan inkâr a țha tawh a, kan inbia kan inbe leh tawh. Sawmzuala chu a lungawi lo ngang a niang, vawi khat tê pawh phone-ah min rawn be lo, biak chu sawi loh message takngial pawh min rawn thawn lo. Ka hriat sualah khân ngaihdam ka dîl dáwn em maw ni chu aw ka ti rauh rauh ţhin a, phone ka tuai nauh nauh țhìn; mahse, ka țhulh leh ziah. A pawi tawh lo mai, tikhân, ka nihna dik tak a hre tawh tho a, inthiar fihlîm vang vang mai rawh se. Ka tân lah buaina a tlêm deuh ang a, rilru hman vak a ngai lo deuh bawk ang. Kan nufa chunga a țhatna zawng zawngte erawh ka theihnghilh thei ngai lo ang, rùl thei lo mah ila Pathianin ka țawngțaina a chhâng ang a, malsàwmna tam takin a vûr belh ngei ang.

Robert-a pawh vawi hnih lai a lo lêng ve leh tawh, naupang chhaih a thiam êm avàngin Chimchimtei chuan a nêl khawp mai a, Robert-a lah chuan min mitmei zuk zuk pah hian," Chimchimte, tu nge ka nih le?" tiin a han zâwt ngei a, ani lah chuan," Âpa," tiin a lo chhâng rang thei khawp. Ka hriat țantirh phei chuan mak ka ti khawp mai a, sawi tùr hre lovin ka en tawn sek ringawt! Robert-a hrilh tih hriat reng, he pa tak hi chu aw...! Engtik laiin nge maw chutianga ko tùr chuan a lo hrilh rêng rêng ni? A fiamthu a ni tih hre mah ila ka ngei țhelh a ni.

Zan khat chu ka thil dahna ka singsa kual a, Tapuia leh Tatei rawn lèn zàn a ni bawk a, Tatei chuan min en felpui ve bawk a, Zorina lehkhabu leh ka pa thil hluihote kha an ni ber a, tihriral ka phal loh avàng chuan țha takin ka rem diat diat a, hmun khatah dah vek tum chuan ka rem țha a.

"E he! Pawisa i va ngah!" a rawn ti chhuak hluai a, ka va en chuan Pass Book a lo en niin, a lo meng phâwk nasa mai! 

"Dah mai mai teh, ka pawisa a ni lo, ka pa leh Zorina pawisa an nih kha," ka tih chuan," I pawisa vek a ni tawh alawm le aw! Nuthlawi hausa tak i lo nih reng hi, hna pawh thawh ngai lova awm der der thei tùr i ni," a ti leh a.

"Țawng ring lo deuh teh, a zahthlâk! Dam chuan hna te chu thawh tùr alawm, dam chhûngin hna te chu kan thawk ang chu, pawisa hi amahin a rawn kal tawp thei hleinem, thawh chhuah a ngai alawm," lehkhabu rem țhat mawlh mawlh pah chuan ka ti a, ani erawh chuan," A, hei leh pawh! I va'n ngah êm êm!" tiin room ațang chuan a tlân chhuak ta daih a.

Tapuia a va hrilh ve a niang chu, an rawn luh chuan Tapuia chuan," U, hetiang a nih chuan Scooty emaw tal lei ve teh," a rawn ti lût nghâl thâwng a, chutah, sawi zawm leh zatin," Ka lo ngaihtuahpui nasa țhìn che alawm, ke i neih ngei a ngai tiin, nakkum lawkah Chimchimtei school a kal ve duh ang a, i hruai i hruai a la ngai dâwn a," a ti leh a, a thutak ngang mai, kei erawh ka nuih a lo za deuh tlat thung a.

"Fùr hunah Scooty chu a buaithlâk duh àwm e, kan huh reng dâwn tho asin," fiamthua ka lo tih chuan phâwk zet hian an pahnih chuan an inen a, Tapuia chuan min rawn en lehin," Ke pali nei chi i lo hual deuh elo?! Țha lutuk! Yes, ka khalh ve ang!" tiin a kut chu a hûm ruh vêl a, ka nui chhuak ta hawk hawk mai.

"Khawi ațangin hetiang zât zât hi pawisa in lo neih theih le?" Tatei chuan a lo ti thung a, kei chuan thil awm dan chu sawi fiahin lehkhabu chu ka rem țha pah mawlh mawlh bawk a, ka rem zawh chuan Tapuia chuan," Zanin chu i inrem țha lo ang tih a hlauhawm hle mai, U hausa deuh kan lo nei reng tih kan hriat chhuah phah a. Motor chu aw, motor chinchâng hre deuh ka lo zâwt chiang ang e," tiin nui sak chung hian room ațang chuan a chhuak ta nghâl a.

An sawi chu a dik ka ti reng. Pawisa chu min hnutchhiah tam alawm, Lungleia in luah man rêng rêng kha hman a ni ngai lo va, thla tina lût ve reng a nia, tam lua lo mah se thla tin lût a ni a, kum a ral meuh chuan a lo tam tham ve tawh țhìn. Bâkah, Zorinate pafa kha an intodelh ëm a ni, pawisa kha an mamawh lutuk lêm lo a tih theih, mamawh leina tùr lah Picnic spot an enkawlna làwmman khân a daih êm êm si a, ka awm ve tâk achinah khân ka mamawh kha min leisak tam ta ém zâwk a, ei tùr leh silh tùr ka phàn kha an hlau viau a ni; mahse, an pahniha an boral hnua in kan chhuahsan hnu ațang kha chuan loh theih lohin in luah man pêk  leh chhûngkaw mamawh lei a ngai a, pawisa thawh chhuah ka neih hma kha chuan neihsa kha ka hmang lo thei lo, tunah pawh Siamtei hlawh tùr a lo ngai ve tawh a, dàwra ka hlawh chuan cover thei mai mah se kan ni tin mamawh leh in luah man a cover zo thei tawh bîk lo.

Siamtei hlawh chu thla tin ka thawn thei ve zat zat a, Pa Dika hnênah ka transfer mai țhìn, ani'n a haw remchàn veleh Siamtei nu leh pate a hlàn ve mai bawk a. Hun remchângah Siamtei chu a chhûngte ka biaktîr zauh zauh a, a hlawh chu tam bîk lua lo mah se an hmang țangkai viau tih ka hria a, ka lãwm viau a ni.

*****

"U, Sawmzuala a accident an ti a nia!" Tatei'n hlauhthàwn hmel taka a rawn tih chuan ka phu ve deuh zawk mai! He thumal hi ka hua a ni tawp mai, bo vang vang se ka ti, tûnlaiah he thumal hian pawisawi lo nunna a seng tam tawh êm asin, ka thin a tirim ngawih ngawih.

"A na viau an ti em?" hlauhthãwng ru ve tho chuan ka zâwt a, ani chuan," Ka hre chiang bîk lo, biak ka tum a, a phone an chhâng thei tlat lo, an inah ka va kalchilh tawp mai ang. E, kal dùn ila? Min lo beisei ve ngawt ang chu?" a lo ti a, a aw ațang chuan a hmanhmawh hmel viauin ka hria, a hlauthãwng ve bawk ang chu, kei pawh ka lo hlauthãwng ve tho a nia. Na viau lo se ka ti, a nu leh a pi leh pu ka ngaihtuah chhuak a, an innghahna liau liau a ni tawh si a, a nat vak loh hrãm a ngai a ni.

Inrinni tlai a ni a, dàwr ațanga hawin in ka thlenna pawh a la rei chiah lo. Siamtei'n rawng a lo bâwl deuh vek tawh a, chaw erawh a la chhuang mêk thung. Vawiin lama ruah sùr avàng chuan tlêmin boruak a vâwt deuhin ka hria a, inbual tum ka ni a, Tatei'n min rawn be ta a ni.

"Naupang han kalsan ringawt chu... nangmahin han kal phawt la, ka remchàn veleh kan kal leh ang a...Chuan, chanchin pawh min rawn hrilh ve la aw?" ka tih chuan a 'aw' ve nghâl mai bawk a. Tlawh ve ngei chu ka duh alawm, a lo na viau te a nih phei chuan...mahse, chu êm chu thleng lul suh se.

Ka rilru a nuam thei bîk lo. Ka inbual zawh veleh chaw kan ei a, anni pahnih chu ţawng barh barh chung hian chaw an ei a, kei erawh ka ngaihtuahna avàngin ka ngawi reng thung a, Tatei chuan min rawn be har tawh ka ti kher mai, a theihnghilh tawh a ni ngei ang chu.

A lo la theihnghilh bîk lo a ni chêk ang chu, chaw ei kham dâwnah min rawn be ve ta hrâm e. A na viau a ni awm e, doctor sawi dàn chuan. Ruh tliak pawh a nuam nual a, a taksa pawh hmun hrang hrangah an țhui a ni àwm e, tunah tak chuan nikhaw hre lovin a awm a, a nu phei chu a țap a ţap a ni àwm e.

Zàn mut dâwnah chuan tihtak zetin ka ţawngțai a, Sawmzuala chu a nunna lâksak lo tùr leh țha taka dam chhuahtîr leh tùrin ka ngèn a ni. A chhûngte, a nu leh a pi leh pu rilru hah tùrzia leh mangan tùrziate chu ka ngaihtuah a, hrehawm ka lo tihpui lêm êm a ni. Zorina ka hre chhuak lo thei lo bawk, ani erawh a hliam tuar lovin a boral ta kha a ni a, ka dawm miah loh leh țawngkam khat pawha thlah miah lovin a liam ta a nih kha, khatiang kha Sawmzuala hian tâwk ve lo se ka ti, a chhûngte an hrilhhai dâwn êm asin.

A tûkah damdawi inah chuan ka kan ve a, Siamteite chu ka nute inah ka dah rih tawp, ka en chuang miah lo nain ka pa pawh a lo awm ve reng a, biak erawh ka be lo.

A lo muhìl a, a lu chu an tuam nasain a hmél pawh hriat thiam a har. A duk chur mai bâkah a lo vûng ve nasa deuh nèn, hre sa awm lo phei se chuan tu tih ka hre miah lo ang. A nuin a awmpui a, min hmuh chuan nui lui tih hriat tak hian min lo nuih a, nuih luih pawh chu harsa a tih hmel, a mit phei chu a bui lâk nghe nghe.

Tih theih nei hek lo le, kan țhu tlawk tlawk a, Tatei'n a accident dàn kimchang nia an sawi chu min hrilh malh malh a, min hrilh mah se, ka lo ngaithla miah lo, ka rilru chu hmun dangah daih a awm. A nu pawh chuan a riahpui dànte chu a sawi ve a, a țhianpa pakhatin a rawn riahpui ve bawk a ni àwm e.

Ka ngaihtuah a, ka chunga a țhatna zawng zawngte chu mitthlaah a rawn lang chuai chuai mai. Kei pawh hian zan khat na na na chu riahpui ve àwm tak ka ni, kan chunga a țhatna a lantîr nasatzia kha, vawi khat chauh ni lo, vawi tam tak a phû a ni; mahse, ka dinhmun hi a khirh ve êm a, Siamteite pahnih hnutchhiah zut lah chu a fuh ber si lo.

A rawn harh chhuaha kan țawng a hriat theih hnuah chuan ani chu a la țawng chhuak thei mang lo, a kut veilam leh a ke dinglam phei chu a la chêt thei lo hrim hrim; mahse, a dam chhuak tal a, a țha,  dam chhuak țha tùr chuan amah hian a beih ve pawh a ngai ang chu.

Ka riahpui ve ta lo. Sawmzuala nu chuan a remti ngang lo va, in lama ka fa u leh a u  kalsan chu a ngai ngam thei lo a ni ber. "Chhùn lamah i duh phawt chuan i rawn kan thei a, zàn lam chu ka phût hauh lo che," a ti ve tlat a, kei pawh chuan ka tilui bîk lo. Mi hrang ang ka ni a, eng emaw han buaipui țûlah pawh kei ai chuan a nu a thlang daih zâwk ang chu, hrehawm pawh a ti lo zâwk bawk ang.

Chhùn chawlh laiin Robert-a hnênah chuan damdawi ina kal lawk ka dîl a, ani pawh hian Sawmzuala aacident thu chu a lo hre ve daih tawh a, eng dang min zâwt lo chuan a lo phal ve mai a.

Damdawi ina ka han luh chuan Sir Manuna ka hmu ve hlawl mai a, kan han inchibai leh rih a, ka chanchinte chu min záwt ve luam a. Chutih lai chuan Sawmzuala chuan eng emaw ni hi a rawn sawi a, Sir Manuna chuan a beng a lo dawh vat a, a sawi chu ka hre lo nain a hnua Sir Manuna hnung nghènga a țhu mu deuh ka hmuh tâkah chuan hei hi a sawi a nih ka ring ta.

"I khawilai nge la na ber?" tiin ka be  ve ta a, min biak hmasak a tum loh hmel si a, kei a kantu zâwk hian ka biak hmasak loh chuan a fuh lo ang.

"Nâ ka nei lo," ti ngawtin min chhâng a, a țawng lah chu a la zàwi êm êm zui, ani hi ka lakah a thin a la rim reng em maw ni? A rei tawh e, theihnghilh ve tawh mai àwm, ka hriat sual palh ve a ni mai a.

"A țhat hlauh chu," ka ti ve sap a, min en rùn reng avàng chuan nuam ka ti miah lo. Kan ngawih vang vang kai chuan Sir Manuna chuan," Engtin nge in lo innèl tãk êm êm  le? In la naupan deuh lai kha chuan melh pawh in inmelh ngai lo kha a nia, hun danglam chakzia hi aw...!!" a ti leh a.

Ka biakna a rùl tâwk chauha min chhàn zël avàng chuan ka be duh ta bîk lo; mahse, tlawh loh phah nân erawh hman ka tum lo. Ka theih tâwpa zingin damdawi ina a awm chhûng hi chuan ka tlawh ang, a chunga ka țhatna lantïr ve a ngai tlat.

Kantu neuh neuh a nei thei ngang mai. E taka, a lár ve phian tih ka lo mangnghilh dáwn alawm, nia, a chanchin eng emaw deuh hlek hi chanchinbuah chhiar tùr a awm ve, a accident pawh hi whatsApp news-ah ka hmu chuai chuai, a țangkai tawh loh hnuah.

A dam ve viau tawh hnu chuan Tatei nèn kan kan a, kan awmpui rei theih dàwn avàngin a nu chu kan hawtîr a, kei chu ka haw tlai lutuk thei dâwn lo va, Tatei erawhin a nu rawn kal leh hma a awmpui thei thung  ang.

"Ngawi lawk, phone call a lo kal tlat mai, ka'n chhâng ang e," tiin pâwnlamahchuan a chhuak ta nghâl a, kan pahnih chauhin kan awm ta. A zia ve tawh êm avàngin ka lâwm viau a ni, a hmai vûng a reh tawh nain ser awm tùr erawh a tam lo tùrah ngai ang, a belkàng deuh țhat erawh chuan hmuh a tinuam fahran lo.

"Ka accident avàng hian i thin a rim ngawt lo maw?" tia min zawh chuan," Engati maw?" ka lo ti vat a.

"E, min hmuh leh i duh loh awm tehlul nèn, min rawn kan lo thei si lo va."

Thaw deuh halh hian," Chutiang rilru ka pu lo," ka ti ta ringawt a, kan țawng hre tùr mi dang an awm si lo va, awm ve se ka ti viau mai, mimal chungchâng min sawipui ngam lo ang a...

"Tatei bialpa chu ka lo ni tehrêng em?" ka hlauhthàwn ang chiahin mimal zawhna min rawn zâwt ta; mahse," Ka hrilh thei rih lo che, i dam vat hunah chauh ka hrilh ang che," ka ti ta thung a.

"Ka dam tawh, min hrilh rawh le," a ti ve thung a, kei chuan," Dam vat vat la, a țha a ni mai. I hriat châk leh i dam thuai a ngai a nih ber chu," nui chung hian ka ti a, a inhmuam ûp reng peih si, a nâ a dam har duh àwm ém mai.

"Engati nge min rawn biak ngai loh?"

Chhàn dàn tùr fîmkhur taka ka ngaihtuah hnuah chuan," Ka hriat sual palh vàng a nia, ka an khum che avang khân ka inthiam thei miah lo, min ngaidam hrâm dáwn nia," ka ti chhuak ta a.

"A nih, tûnah?" a tih chuan hre thiam lo tak hian," Eng maw?" ka ti hû a, ka en pah a. Ani erawh chuan mit khap miah lova min rawn en chung hian," I chhànna ka hre duh," a lo ti tâwi tak a.

"Dam țha thuai vat mai rawh,"chhàn ngaihna ka hre lo lutuk chuan ka ti ta ringawt a.

*INRINTÂWKNA HIAN MI DANG AIA ȚHA ZÂWK LEH TLING TÂWK ZÂWK TIA NGAIHTUAHNA LAM A KÂWK LO VA, MI DANG NÈNA INKHAIKHINNA THINLUNG NEI MIAH LOVA NANGMAHA NANGMAH KHA I ȚHA TÂWK A NI TIH HRIAT CHHUAHNA HI A NI ZÂWK.