☆LAIRIL LUAHTU☆ - 31 By Dingdi Pachuau

 ☆LAIRIL LUAHTU☆ - 31 By Dingdi Pachuau

"Ka chhuah hunah kan inah min rawn kan leh ang  em?"

"Kan leh ang chu, kan nufa chunga i țhatna zawng zawngte kha ka theihnghilh bîk hleinem, ka rùl zo thei dâwn chuang miah-" ka tih lai chuan," Sawi duah kher a ngai lo," a lo ti hmuk a.

"Sawi duah a ngaih châng a awm ve țhin," ka ti ve thung a, min melh rùn rún a; mahse, melh mai maite chu ka hlau bîk lo êm mai, min tina thei teuh lo.

"Min chhâng la a tâwk mai," a ti leh hmuk a, kei lah chuan nui chung hian," Ka chhàn zêl che chu maw le, ka ngawih miah loh hi," ka ti leh kher a, chu chu a run viau a niang, a ngawih vang vang hnuah,"Kan inah pawh min rawn kan hauh suh," tiin khumah chuan muin lehlam a hawi ta hmak a.

A va puitlin loh thlâk tak! A upat ve tawh nèn, kum tam pawh hi eng ual a lo ni lo a nih hi,  a chêt dàn naupan chhiatzia chu hre ve tak ang maw? Vànneihthlâk takin Tatei a rawn lût ta hlauh e, a duh dànin awm se, kei chuan ka be hmasa tawh lo ang.

"A muhil elo?" tiin a rawn phun sap a, muhìl tak takah a ngai a ni chiang mai. Kei pawh chuan," Aw, a nih kha, a țawng mawlh mawlh emaw tih laiin a muhìl daih a, i rawn lût tawh tho bawk a, ka haw tawh mai dâwn em maw ni le?" ka ti ve nghâl zat a.

"Ka kal chhuah hlàn khân eng nge in lo sawi?" tiin ka bag-a tui bottle chu a rawn phawrh a, min rawn en pah bawk a, kei chuan," Eng mah kan sawi lo," ka lo ti mai a, ani lah chuan," Ka âwih lo, eng emaw tak chu in sawi ang, pâwnah khân ka awm rei ve ém asin," a ti leh țâlh a.

"A titi mawlh mawlh a, a bialnu hlui chanchin, mi dang nèn a kawp chhoh dàn leh a bialnuin a hriat chhuah hnua a bàn dànte a sawi nual a, a sawi lai laiin a muhìl ta a nih kha," ka ti duah a, a muhìl lo tih ka hrereng si a, a titàu kual vêl muhìl der anga ka chhuah avàng leh ka thil sawi avàng chuan a thin a rim khawp ang chu, engah nge a tihtauh  vêl ni?

Ka haw hma ta daih. A zia tawh bawk a, ka kan tawh lo ang. Amah pawhin kan tawh lo tùrin min hrilh kha, ka zawm theih pâwl tak a ni ang chu, mahni tâwkah ka buai ve êm asin, a thil sawi khân min tithinrim hauh lo; mahse, kan tawh lo tùra min hrilh kher kha chu zawm ka tum, ka zawm theih tùr ber a nih ka ring.

Ka kan ta lo rêng a, dàwrah ka kal ta tlut tlut zâwk a ni. Tatei'n min rawn sâwm zauh zauh nain chawlh dìl chu ka hreh tawh thuin ka lo chhâng a, a dik tho nain a dik vak chuang lo. Damdawi in ațanga an chhuah pawhin ka kal chuang lo, a thu ka âwih êm êm vàng pawh a ni chuang lo, ka kal lo ve tawp.

Ruah a sùr nasat deuh hi chuan ina lo awmte pahnih chu ka ngaihtuah țhìn, kan in luah min a hlauhawm ang tihna lam ni lovin nu ka nihna angin ka ngaihtuah ve tawp. Ka be ãwl lo a, ka ngaihtuah tih hriain Siamtei pawhin ngaihtuah lo tùra tiin țha takin a nau chu a lo enkawl țhin.

Robert-a nau pawh ka tlawh leh hman tawh bïk lo. Pathianni hi ka hman ve ber ni a ni a; mahse, khua a chhiat hlauh chuan ka tân chuan a ngaihna a awm hlawl lo, bâkah, ka fate ka awm ve theih ni a ni a, han chhuahsan daih ziah pawh chu a fuh ber lo ka ti a ni. Bâkah, ka țhiante rawn lèn ve theih ni a ni bawk a, an rawn lêng dâwn tih hriat renga lo chhuah bosan daih chu a dik lo.

Tapuia pawhin a thil sawi kha a lo ti mai mai hauh lo niin, message min rawn thawn dul a, car chi hrang hrang thlalâk, man tlâwm ber ațang a to ber thlengin min rawn thawn ta ziah mai. A rawng ka duh zâwngte leh hmeichhe inhmeh ber tùr nia a hriat rawng chi hrang lah a rawn ti tam, ka lo fiamthu kha ka tisual let dêr a ni. Ani chuan fiamthu-ah a ngai ve hauh lo, hre tùra a ngaihte a lo záwt kual nasa a lo ni. Min sawipui min sawipui hnuah phei chuan kei pawhin  nakinah kan tân a la țangkai dâwn tih chu ka hre ve ruau ruau tawh a; mahse, tûn hnai maiah chuan ka tum hran lo.

"I kan lo rei tawh e, i tân pawh a zahthlâk zo dâwn, vawiin chu kan ve ngei ngei tawh rawh, a pute pawhin an lo beisei reng țhìn che tih an sawi a nia aw, ka rawn sâwm dâwn che, lo insiam rawh," Tatei chuan phone-ah chuan a rawn ti hmak hmak a, kei ve thung chuan," Naupang ka chhuahsan ni tin a, vawiin angah hi chuan chhuah bosan loha uap ve ka duh tawh asin," ka lo ti thung a.

"A dik reng tho mai; mahse, vawiin chauh a niang, in nufa chunga a lo țhat tawhna zawng zawng kha han ngaihtuah chhuak thar leh la, nakinah chuan kan pawh tum tum mah la, a ngai tawh dâwn lo. A hun lai hian han ti leh hrâm mai rawh," tiin a țawngkam thiam theih tàwp chuan min rawn kar ve a, a tawpah chuan ka 'aw' ve ta hrâm. Țhiante lo lêng tùr an awm lêm bawk si lo va, han chhuanlam mai tùr an awm rih tlat lo a ni.

Naupang pahniha chauha dah chu min ngaihtuahpui ve deuh a niang, ka nu a rawn phur a, kan kal chhuah hlànin ka nuin Siamteite chu a lo awmpui dáwn a ni, a ti țha angreng khawp mai, rilru ngaihngam takin ka awm theih phah dâwn a.

Kan inphur chhuak ve leh a, ka phûr tehchiam lo nain ka hmelah erawh ka tilang duh bîk lo. Sawmzuala tihtauhna țawngkam zàwm țha lutuk anga awm viau pawh kha ka duh vak lo, ka titau ve anga a ngaih phei chuan hlawhtling a inti lutuk palh ang, chu chu ka duh hauh si lo.

Lêng ve dang pawh an lo awm nial a, anmahni hi an awmthei ve deuh bawk a, țhenrual an ngah tho chu ka rin bâkah inlêng nei thei ve deuh chi an nih ka ring, awmpui ka hmu ngai miah lo erawh mak ka ti, chhûngkhur chêt engkim a nu hian a ti vek tihna a ni ngei ang chu, a upa ve deuh tawh tho sia, a khawngaihthlâk ka ti.

Sawmzuala nu chuan," In fel mang tak e aw, Tate, room lamah han chho nghâl mai r'u, a muhìl lo ang, nakin deuhah ei tùr ka rawn dah dâwn nia," a lo ti vat a, ka han tàwi deuh hrat hrat a; mahse, Tatei'n," Chho ang," tia step-a a pên chhoh tâkah chuan ka zui lo thei ta bîk lo.

A dam deuh tawh bawk a, zaka tiang hawlin inchhûng dungah chuan a kal ve thei tawh niin Tatei'n a sawi a, a zia sâwt viau a ni. A room-a kan han luh chuan khumah țhuin phone a lo khàl mual mual a, Tatei a luh hmasak zâwk avàngin,"Lo kal rawh," tiin a lo be vat a, a hnunga kal kei min hmuh ve tâkah chuan,"...u," a tih belh leh sup a.

Pângngai takin ka bia a, ani pawhin ka zawhna ang chiah chiahin min chhâng a, ka biak loh chuan min be hmasa lo, Tatei erawh a be deuh reng a, ka kan loh avàngin a lungawi lo lehpek a ni maithei, engah nge ama'n kan lo tura min tih vei? Ka kan ta hrâm zâwk a, lãwm hle tùr a ni.

"Ei tur siamin ka nu a buai ngeiin ka ring, Tate, i zuk pui lawk mai dâwn em ni ang?" Tatei en chung chuan Sawmzuala chuan a ti a, ani chuan rang zeta din chhuah pah hian," Ni dâwn tak! A buai leh viau ang chu, ka kal nghâl e, lo inmuthilhsan tawh lo ula aw," tia nui hak hak chungin room ațang chuan a chhuak ta nghâl a.

"I nu hi inah hian a buai theih hmel si a, engati nge awmpui in lâk mai loh a? A hna lamah pawh a buai thei viau ang chu," ka ti chhuak a; mahse, ka sawi zo chiah chu ka inchhîr nghâl zat. Mi chhûngkuaah inrawlh theihna ka nei hauh lo, an la duh lo a ni mai a, kei aiin an mamawhzia chu an inhre daih ngei bawk ang chu; mahse, ka sawi zo vek tawh si.

"Engati nge i thil sawiah i din ngheh loh?" a rawn ti ta daih mai! Ka en há a, zawhna ka zâwt a, ani'n min chhâng lovin ka zawhna kaihhnawih baksak lo zawhna min zâwt lêt a! Tu nge inchhâng hmasa zâwk ang?

"Min rawn kan tùr thu i sawi kha," a rawn tih leh hmuk chuan a zawhna awmzia ka hre thiam ta chiah. Ni e, ka sawi ngei alawm; mahse, amahin kan lo tùrin min ti a nih kha.

"Ngaihtuah chiang rawh, tuin nge 'Kan inah pawh min rawn kan hauh suh' ti kha? I thluak i sawh tel ve te hi a ni lo maw? I chiang lo riai mai," ka ti a, a rûk chuan ka nuih a za ngang mai; mahse, a langah erawh ka thutak viau thung.

"Min tithinrim a nih kha," a rawn tih tâkah chuan ka nui chhuak hak a, a zêp zo bîk lo. Chutah," Ka thluak ka sawh tel lo bawk aw," a rawn ti leh sup a, chu chuan ka nuih a tiza telh telh mai a, ka nui hak hak a.

"Ka thu sawi i âwiha i zawm ber țum a ni ngei ang chu," a rawn tih tâkah chuan ka nui tàwp ta chat, hetianga a a ngaih hi ka duh miah lo. A thu ka âwih a ni hran lo, ka buai ve êm a nih kha.

"Țhiante an rawn lêng ve reng reng a, ka chhuahsan thei bîk lo alawm," ka ti ta ringawt, amah pawh ka en duh lo, chhuanlam ka siam ve deuh reuh si a, amah ka en chuan min hre chhuak palh ang. A âwih kher chu ka ring hran lo; mahse, a pawi chuang lo, chhàn loh ngawt ai chuan a țha hrim hrim.

"Khawngaihin, min lo pui lawk mai," a tih chuan ka en ta vat a, thawh a lo tum niin, ka pan ta thuai a. Țhu reng ni se chuan puih a ngai hauh lo tùr, a lo țhu mu titih tawh a, a tân chuan thawh a har deuh hret maithei rêng a ni.

Dìm takin a bânah ka chelh a, a țhut theih hnu, kan la inhnaihchilh viau lai chuan,"Min chhâng tawh rawh le, ka dam țha tawh bawk a,"tiin hnai zetah chuan min en ta rùn mai. Ka chhâng mai lo, kan inhnaihchilh êm avàng chuan ka thin a tiphû nasa a, thâwk pawh ka thaw țha ngam mang lo, min en rùn bawk si.

"I nute an rawn lût țêp tawh ang," ka ti sap ringawt a, ani lah chuan ka chhànna chu a duh khawp lo nasa a niang, a bân na lo lam chuan ka kâwngah a rawn kuah thut a, ka tîm nghâl chãwih mai, ka thâwk a titàwp mai dâwnin ka hria, kan taksa a insi ta ràn mai si a, ka thin phû rinzia leh a phut nasatzia mai chuh!

Kawngka a rawn ri ta koh koh a, hlauthâwng zetin ka hawi sawn a, ka tawlh sawn nghâl bawk. Ka tawlh sawnna lamah chuan a bân na lam ka la tauhsak zui a, na tia a țhen sak chu ka hmu nghâl zat bawk, ka inthiam lo hnuhnawh leh si," A nâ em?" tiin ka ban zuau a; mahse, ka tàwp leh chat, kawngka lam chu chak zetin ka va pan ta zâwk a.

Pâwnah chuan ei tùr leh in tùr chawiin Tatei chu a lo ding a, min lo nuihin," Ka hawng thei lo va," a ti a, lût tlangin," In lo inmuthilhsan tawh lo mial e, chhang hi maw i nuin a duh uluk sia, ka rei phah ta vek alawm, in lo țàmchhàwl hman lo ang chu maw?" a ti leh bawrh bawrh a, a tray chawi chu khum bula dawhkàn têah chuan a nghat a.

Ka lài ta deuh tlat. Nichina kan awm dàn vàng kha a ni ka ti duh lo, ka zãm deuh thut ni berin ka hre zâwk. Ka thin phu nasa deuh kha chu tlêmin a zia tawh a, ka thâ erawh a khùr ru dar dar, ka kut hmâwr pawh a vawt vek, ka biang erawh a sa hum hum thung.

"A, ruah a la tla zui, kan haw hnuah chauh tlà se ka tih nèn,"Tatei vêk chuan a ti leh a, ruah a tla a ni tih pawh kan hre bîk hauh lo. Ni lo, ani chuan a hre maithei, kei erawh chuan ka hre hauh lo, kan boruak tawn vàng kha a ni mahna le.

Ka ngawi ta ràn a, Tatei chuan thil ei pah chuan Sawmzuala chu a biain a țawngpui bawrh bawrh reng thung a, an sawi pawh ka lo ngaihven chuang lo, nichin lawka thil thleng kha a ni ka ngaihtuah ni. Khati taka ka thin a tiphu nasa mai kha a mak ka ti, ka duh lêt ve tihna a ni mai lo maw? Ka ner deuh nâng a, ka lu ka thing nar nar bawk a.

"Eng thil nge i ngaihtuah?" Sawmzuala'n a rawn tih tâkah chuan ka hawi chhuak nghâl vat a, ka ngaihtuahna ka lo kàwm nasa a lo ni, en pawh en duh lo chuan,"Naktûk lam daih ka lo ngaihtuah a," tiin ka chhâng ta ringawt a, chawplehchilhin dáwt ka han sawi thei zat mai a nia! Ka mak sâwt viauin ka hria.

"Ani hi zawng, nu tihtakah, ngaihtuah tùr apui hi a ngah a, hriat thiam a ngai," Tatei chuan a lo ti vat a, chhang chu a țhial pah a.

"I ei tùrte kha ei zo ve phawt rawh, in lamah chûng chu i ngaihtuah dáwn nia," a rawn tih leh chuan ka melh rawlh a, eng mah phei chu ka sawi lo, vawi khat chauh ka la keih chhang, ka ken reng chu ka ei zawm ve ta nghâl a, a tui viau a ni. Ka boruak tawnin zir phei se chuan a tui ka ti lehzual ngei ang.

Ruah a sùr avàngin kan duh hunah pawh kan haw mai thei lo va, a room-a awm reng chu nuam pawh ka ti lo, a hnu deuhah phei chuan mi dang mitmei vèn chhuanlamin in hnuaiah ka chhuk ta daih a, puitling bulah ka zu țhu ve a ni. Sawmzuala pi leh pu lah chuan ka lèn leh hunah chuan Chimchimtei hruai tel tùrin min lo ti leh a, a der tal pawha an lo làwm ve chu ka lãwm khawp mai.

Ruah a hàn ta maw tih veleh kan haw nghâl. Duh aiin a tlai tawh tlat a, in lamah ka nuin rawng a lo bâwl ngeiin ka ring a, an in lamah pawh Tapuia'n a lo bâwl a ni àwm e, tihngaihna dang awm hek lo le, ruah a sùr tlat avàngin kan duh hunah kan haw thei bîk tlat lo a ni.

Zànah ka muhìl țêp tawh ang tihah chuan ka phone a rawn èn avangin ka han la a, phone call niin Sawmzuala a lo ni. Tûn ang huna rawn call rêng rêng, a mu thei lo min rawn tihharh tum a ni ngei ang chu.

A lo ni tak tak! 

"Ka muhìl thei lo va, vawiin khân Tatei kha rawn lût lo ta se, engtin nge kan awm zêl ang tih ka ngaihtuah a," a rawn tih sup sup chuan ka maimichhîng vang vang a, ka hmui ka pet pah bawk. Ka ngaihtuah chhunzawm duh miah loh chi a lo ngaihtuah ve a nih chu, hei hi thil țha lo tak a ni.

"I thil ngaihtuah a ho êm mai, ngaihtuah lovin muthilh tum rawh," ka ti ringawt a, ka țawng ring ngam chiah bawk si lo va, ka hrawk a tiza deuh tlat. Hetianga phun deuh ser ser phei hi chu a tleirâwl hnà ka ti, ka tleiráwl tawh lo nasa mai si a, ka inhmeh tawh lo; mahse, țawng ring dáwn ila, ka bula mûte pahnih ka tihharh ka hlau bawk si, chubâkah, a tlai ve viau tawh bawk.

"I aw chu a sexy hle mai!"

Kan inbiak avàng chuan ka harh leh ta vek mai. Kan inbiak zawh hnuah pawh chuan ka muhìl mai thei tawh lo, ka meng kar a, a muthilh theih loh chhan a rawn sawi chu ka ngaihtuah ve ta thung, a fuh lo tak tak a ni. Khatianga hnai khân a bulah ka awm tawh miah lo ang, a bulah mi dang tel lo phei chuan ka awm tawh lo bawk ang, chhuanlam siama țanpui a ngaih thu a sawi pawhin ka hnaih chuang lo ang. A hlauhawm tlat, ka tân a nia ka tih ni. 

Sawmzuala hi ka duh lêt ve thei lo ang, Zorina thlarau a zahawm lutuk dâwn asin, kum 5 emaw tal te chu liam tawh se chuan tlêm chuan a zia deuh mahna, amah ngei pawh hian min hmuh dàn a dik lo ang. 

Chumi hnu ațang chuan ka hmu ta lo vang vang a, phone-ah pawh min rawn be chuang lo. Min biak loh phei chuan kei chuan biak tumna ka nei hauh lo, a chanchin zâwta biak pawh ka inthlahrung zo tawh, a hma ang kha ka ni thei tawh tlat lo. A hma kha chuan țhian angin ka en char char a, Zorina țhianpa, min duhsak êm êmtu angin. Tunah erawh chuan mipa puitling angin ka ngai ta deuh tlat mai a, duh lo viau mah ila chu chu ka hmuh dàn a ni tlat tawh a ni, chuvàng chuan hmuh ka hreh, hmuh loh hrâm dàn ka zawng.

Fùr a zo a, Favàng boruak a rawn tháwt meuh chuan boruak ipik churh pawh a zia ta viau e. Ruah a han sùra chhùm a zìn phei hi chuan lung hi a zîng ngawih ngawih a, awm a tinuam lo țhìn viau a ni.

Eirawng ka bàwl rak rak lai chuan ka phone a rawn ri ral ral a, ka la vat a, Mami a lo ni a, engtizia teh hlawl nge maw ni dáwn ni ti rilru nauh nauh chung chuan ka han chhâng a.

"Nizàn ka mumangah Zorina nèn ka lo hmu nasa lutuk che u a, ka harh veleh ka rawn hre chhuak che a, ka rawn hrilh che," a rawn ti a.

"A ni maw? Kei chu ka la hmu ve miah lo, tlêm lai deuh khân a hnunglam hi ka hmu deuh zuai a; mahse, chu pawh chu, a chiang lo lutuk a, chiang taka hmuh ve hi ka châk ngawt mai," tiin ka chhâng a.

"I hmuh chuan i thinlunga thar leh a hlau a niang, amah ngaihtuah rùn lova hlim taka hun hmang tùrin a duh che a nih ka ring," a rawn tih chuan," A, chu pawh ni se, vawi khat chauh pawh hmaichhanah, chiang taka hmuh ka duh tho, a tel lova nun hman a harsatziate hrilh ve ka duh a, hrilh tùr ka ngah lutuk!" ka ti a.

"Rawn inlàr kher țûl a ti lo a niang," tiin a rawn nui a, mumang mai mai kan han sawi a nia, keini țhian dùn thil sawi hi chu a ropui lo ve thei ém asin. 

Khua a tui hul ta bawk a, Zorinate pafa thlàn pawh ka tlawhna a rei tawh avàngin tlawh leh tawh țha ka ti a, Pathianni chawhnuah Tatei leh Tapuia sâwm vein kan kalho ta dial a, thlàn hmun chu a lo la fai reng, enkawl ngun a ni tih a hriat khawp mai.

Tatei nèn chuan thlàn lung bulah chuan kan țhu dùn reng a, Tapuia'n Siamtei pahnih chu a kal kualpui a, Chimchimtei hlim thãwm pawh a hriat leh rai rai e. Rei pawh kan la țhu lo ang tihah chuan Sawmzuala a rawn lang ve hlawl mai, zakdawh tiang nèn ngat maw le. Ka hmuh lohna a rei ve ta deuh a, a lu pawh tlêmin a lo buk deuh tawhin ka hria, a chêtsualna avànga a hmai duk deuh chu kutchuk pawh a ang deuh e a.

"Lo kal rawh," tiin Tatei chusn a lo ko vat a, Tatei țawng ri chuan min tiharh chhuak zawk mai, ka lo en vang vang reng chu lo niin, ka hawi sawn ta nghâl vat a, ka hmai sat ham ham dànah a sen nasa a nih ka ring.

"Zorina hi thil hrilh duh ka nei a, khawngaihin, ka hrilh chhúngin in lo kal sawn thei ang em?" 

Hla deuh hlek ațangin kan thlîr a, Tatei chuan," Eng nge a hrilh ang le?" a ti sap a, kei chuan," Thurûk a niang," ka lo ti mai a, ani lah chuan," Eng thurûk maw?" a ti leh a, kei chuan," E, kan hriat ve loh thurûk maw le," ka ti leh a.

A hnuah min rawn ko ta a, Tatei'n phone call a dawn vàngin keimah chauh chuan ka pan phei a, ka kal phei min lo en vang vang a, a bul hnai ka thlen chuan,"Zorina hnênah khân thutiam ka nei a," a lo ti sap a.

*TUM MUMAL LEH NGHET TAK I NEI LO A NIH CHUAN TUM MUMAL LEH NGHET TAK NEI HNUAIAH A KÛL ATÂIIN I THAWK THO THO ANG*