☆LAIRIL LUAHTU☆ - 32 By Dingdi Pachuau

 ☆LAIRIL LUAHTU☆ - 32  By Dingdi Pachuau

Hre thiam lo tak hian," Eng thutiam maw?" ka ti hâ a, a mitah tak ka en kar tawh, ka mit pawh ka khap lo.

"Zorina dawmhlumtu ka nia," a tih sup tâkah chuan ka kut chuan ka âwm ka dawm a, ka thaw chiah em ka hre lo! Ka thu hriat chu mak ka ti lutuk! Chutah, rawn sawi zawm lehin,"Ka hma chiaha tlãn a ni a, Zorina a ni tih pawh ka hre lo. Ka bâwihsâwm vat a, na vak ang pawhin a lang lo. A  rilru a fîm a, a buai miah lo, min lo hre chat thei nghe nghe! Rilru buai chîâi miah lovin,' Sawmzual, nang i lo ni hlauh chu ka va lâwm êm! Țhian hlui kan nih angin khawngaih takin ka nupui lo enkawl rawh aw, damdawi inah naute neiin a awm a, min mamawh dâwn tehlul nèn!' a ti sap a, kei chuan a kuta dawmsakin,' E, lungngai miah suh, damdawi in kan pan mêk a, i țha vat mai ang,' tiin ka hnèm a, Zorina kha a ni tih pawh ka lo hre miah lo va. Ani chuan,' Zorina kha ka nia, ka nupui mawlh chu aw, lo thlahthlam lo hrâm rawh aw,' a ti leh a, țawng a harsat deuh avàngin kei chuan țawng tam lo tùra tiin a nupui chu min ngen angin ka lo ngaihven ang tih chu ka tiam a, a kawchhûng lam a lo insawh na deuh a ni ngei ang, damdawi in kan thlen hnu lawkah chuan a kal ta mai a," a ti leh duah a, kei chuan ka lo en reng ringawt a, min rawn en ve hnuah erawh chuan Zorina thlànlung chu ka en chhuk ve ta chauh a.

"A thlàn chungah ngei hian dâwt ka sawi lo ang, engtikah mah ka thlahthlam ngai lo ang che, ka lo tiam tawh a ni miau a. Bâkah, a hnênah hian ka duh thu che ka lo hrilh tawh bawk a, a phalna pawh ka dîl thlap a ni," a ti leh sup sup a, a thil sawi mak tak tak avàng chuan sawi ve tùr pawh ka hre lo va, Zorina thlànlung chu ka en ngar ringawt a.

*******

Zorinate pafa thlàn kan tlawh ațang chuan thla a liam leh tawh a,  Sawmzuala pawh a lo lêng zauh zauh nain kan inkârah chuan eng boruak mah a awm rih chuang lo, chu lam hawi thei thil chu a sawi chhuak ngai lo bawk. Min be hmasa ngai miah lo va, Chimchimtei leh Siamtei erawh chu a biain a thiam ang tâwk chuan a chhaih hlim țhìn a, Chimchimtei pawhin a hmu ngun ve ta a, a nél viau tawh mai, a mal chungah erawh a la țhu ngam lo! Dik taka sawi chuan ngaihzâwng han neia bul han țan leh chu ka hreh a ni, ka bialpa chu tu pawh lo ni ta se Zorina nèn ka tehkhin lo thei dâwn si lo va, chu tak chu ka duh lo a ni. Tuin nge mitthi tawh nèna khaikhin zêl chu duh tehlul ang? Rei kan inkawp thei chuang lo ang.

Zan khat chu anțam chhum tùr ka buaipui mawlh mawlh laiin a lo lût niin, ka lo hmu miah lo va, Chimchimtei'n a lo hmu hmasa ve ngei a," Yes, Âpa Mala a lo kal, thawnthu min hrilh tùrin," phûr zet hian a ti a, a lo pan vat bawk a. Chu chu ka hmuh chuan,"I lo luh lai ka lo hre miah lo," ka lo ti vat a, ani chuan," Ka lo vui hman țêp a," nui duh miah lo hian a ti a, Chimchimtei chu a ngaihsak zui nghâl daih bawk a, min tihrilhhai lek lek mai.

Anțam chu cooker-ah ka chhùm a, Sawmzuala thingpui tùr chu flask ațangin ka thli chhuak nghâl a, ka va pêk chuan,"Ka lâwm e," a lo ti sup a, zan dangah chutiangin a ti ngai si lo va, ka en hâ ringawt a.

Chutih lai chuan kawngka a rawn rì a," Lo lût r 'u," tiin ka lo chhâng vat a, Robert-a nui sûng chungin a rawn lût a, Chimchimtei'n a lo hmuh chuan rang zet hian," Âpa a lo lêng e,"a lo ti vat a,"Lo kal rawh," tiin țhutna ãwl chu ka melh pah zoh a.

Thingpui ka va pêk chuan," Ka lo kal khât ta deuh a, Chimchimtei'n min lo theihnghilh tawh ka rin nèn, a thluak a țha dâwn khawp mai," a lo ti a, kei chuan,"A nu aiin a țha ang i tihna em ni?" nui chung hian ka lo ti lêt a, Sawmzuala ka va en chuan a lo nui ve hauh lo tih ka va hmu a, min lo la melh kul zui, ka nui hmel pawh chu a reh nghâl riai riai ang chu.

"Ni mai ang chu, ka nau rawn kan leh i tum pawh kha i theihnghil tawh a nih ka ring," ani chuan a lo ti a, kei pawh chuan," A, theihnghilh lo ve, ka buai ve thei êm a ni, ka la rawn kan leh dâwn alawm," ka la ti ve fan a, ni tin chhuak țhìn lo ila chuan kanin ka kal ve daih tawh ang.

An lêng ve reng a, eng eng emaw kan sawi a, Sawmzuala pawh țha takin a titi a, tlêm chuan ka awm a tinuam deuh, a hma daih ațanga a lo thîk tawh a ni si a, min melh rim reng mai ang tih ka lo hlau hman a nia; mahse, mi pângngai a ni a, mi mãwl tih tâwk ang lek chu a ti duh hauh lo ang tih ka hre chhuak leh a. Dâr 8: 30 a lo rîk chuan Siamteite pahnih chu mu tùrin mutna lam an pan a, Robert-a pawh chuan,"Kei pawh ka'n haw tawh ang e, naktûk zînga ka buaina tùr thil țhenkhat en fel ka duh si a," tiin a tho a, kei erawh chuan," A la hma alawm," ka lo ti ve a; mahse, a haw ta tho a.

Kan pahnih chauha kan awm tâk hnu chuan țawng tùr a vâng ta kher mai, ani lah chu țawng hmasak tum hmel pu lovin a hmui a chîp hmak mai si a, han biak țan dàn tùr pawh ka hre lo, kan ngawi deuh reng a, ka nauvite pahnih thawnthu hrilh thâwm chu thãwm awmchhun a ni mai.

"Thingpui i duh leh em?" ka ti ta ringawt a, ani chuan," Duh lo," a lo ti hmuk a, ka sawi tùr hriat ber lah chu a lo hnial fithla hmak mai si a, sawi leh tùr a tivâng zual, ka kutțang ka elh ka elh ringawt.

Minute hnih hnu vêlah chuan,"Vawiinah in buai em? I restaurant lamah a nia ka tih," tiin ka zâwt leh a, ani chuan,"Engah nge kan buai ngawt ang?" tiin min lo zâwt lêt ta daih a! Ka dang chiang kher mai, Robert-a  lo lèn vàng khân a lung a áwi lo tih chu ka hria; mahse, tlangvâl a ni a, ka thawhpui a ni bawk a, a lo lêng ve ang chu, a duh phawt chuan, ka khap thei hleinem.

"Engvàngin nge kha pa kha 'Âpa' tiin Chimchimtei khân a koh a? In lo inpawh thûk tawh àwm hle mai," kan ngawih leh vang vang hnuah chuan a rawn ti chhuak sup a, a aw chhuak ațang chuan a lungawi lohzia chu a hriat theih khawp mai.

"Dàwra ka thawhpui a nia, a fel a, kan innêl viau bawk," tia ka chhàn chuan," Chuvàng chuan Chimchimtei chuan a lo 'pa' ta a," a lo ti hmuk a, Robert-a a thîk vàng tih hre mah ila ka rilru a nuam miah lo, a lungawi lo hmel chu hmuh nuam mawlh hek lo le.

"Fiamthuin a lo in'pa'tîr a nih kha," ka ti sap a, kan țawng chu room-a awmte chuan an rawn hriat loh ka beisei, an thãwm ka hre tawh mang si lo va, Chimchimtei chu a muhìl tawh a nih pawhin Siamtei chu a muthilh ka la ring lo.

"Maria, dik taka sawi chuan i rilru i siam fel theih nân hun ka pe che a, tûn thlengin khami chungchâng pawh kha ka sawi chhuak lo rêng a ni. Ka duh thu che pawh ka hrilh tawh che kha, i hria; mahse, nawr luih che hi ka duh lo, innawr luihna avànga inkawp chu tluan pawh a tluang lo ang tih ka hria a ni. Mi dang duh i neih chuan sawi hreh suh, i chhànna chu ka pawm vek ang; mahse, Zorina hnêna ka thutiam erawh kha chu hlen ka tum reng tho ang, nangin i duh lova min hnial a nih erawh chuan..." a ti a, sawi zawm lo chuan a ngawi ta daih a.

Min duh thu a sawi, ka hria e. Min puih nasatzia leh ka nufa tân a țangkaizia ka hria, kan chunga a țhatna hi kan rùl lêt zo sêng lo ang; mahse, ka han ngaihtuah a, bialpa anga han en dâwn tâk chu, dik tak chuan ka la inpeih lo deuh tlat a ni. Mi dang duh lah ka nei hek lo, dik tak chuan ka huphurh a ni, ka zak pah deuh tawh bawk; mahse, Sawmzuala awm dàn hi chu ka khawngaih ve reng.

"Tu mah duh ka nei lo, dik tak chuan ka rilru hi a la inpeih chhuak meuh lo  a ni, khawngaihin, min hre thiam la, tûn hnaiah hi chuan ngaihzâwng han neih leh hi ka huphurh rih a ni, min dawh peih lo ang. A chângin Zorina ka ngaihtuah chhuak ang a, ka khaikhin ngei che u ang a, chu chuan i rilru a tina leh si ang a, i tuar thei lo ang," tiin ka rilru dik tak chu ka hrilh ve ta a, ka țawng ring lêm lo; mahse, ka thinlung ațangin chu thil chu ka sawi chhuak a ni.

"Ka pui thei ang che, min phalsak la, aw?" a lo tih chuan ka en vat a, a lungawi lo hmel kha a lo bo daih tawh, tunah chuan khawngaih min ngèn hmel a lo pu tawh!

"Engtin nge min puih theih ang? Inpuihna chi a ni em ni?" ka tih chuan," Ka thei ang, i phal phawt chuan. I phal ang tiraw?" a rawn ti leh a, min ngen dàn ngawih ngawih chu mak ka ti! 

A tûk chhùna thingpui in chawlh kan neih dâwn lai chuan kan dàwrah chuan a rawn pên lût ta thauh thauh mai, mak ti takin ka lo en ringawt a, min rawn pan hmasa lovin Robert-a chu a pan a, eng emaw hi a hrilh a, rei lo te hnuah chuan min rawn enin," Lo kal rawh le, hruai chhuah lawk che ka duh a," a rawn ti ta mai! Ka hau hian ka lo en ringawt a! Chhani chuan min rawn nawrin," Kal thuai rawh, vatin!" a rawn ti sap a, Sawmzuala bul min nawr thleng chu a ni mai.

"Khawiah?" ka ti ringawt a, mak ka tih avàngin ka chët a la pângngai lo, ani lah chuan Chhani rawn pêk ka bag lâksak pah chuan," Rei lo tê maw le, i hre mai ang,"tiin ka bânah chuan kaiin a motor lam chu min panpui ta nghâl a.

Kan țawng miah lo, amah pawh en lo chuan kawng lam chu ka melh ngar a; mahse, ka hmu miah lo! Khawiah nge min hruai ang tih leh eng nge kan tih dâwn tih chauh chu ka ngaihtuah a, chhùn chawlh a hun tawh vàngin ka ril pawh a țâm ve țan tawh asin, ka in hman lo chiah chiah lehnghâl.

Insomnia chhûnga kan luh chuan ka hre thiam ve ta deuh ruai ruai chuan ka hria, min treat dâwn a ni ngei ang. Nge ni, thil siam thar a neia min test hmasaktîr a duh ang? Mi pahnih chauh țhutna awmah chuan min țhuttîrin ka bag chu dawhkànah chuan a dah a,"Lo țhu lawk rawh aw," tiin ani chu țhu lo chuan a kal sawn leh rih a.

Ka hawi kual a, chàwl an lo awm nual a, min lo en deuh hrek hrek ka hmuh chuan ka hmaa dawhkàn chu ka en ta ngar a. Hetah min hruai tê tê a, min kalsan leh daih bawk sia, eng nge maw a tih ni? Dawhkàna ei tùr tui hmel tak rawn inchhawp ka hmuh chuan a rawn chhawptupa lam chu ka en chho vat a, a lo nui ve suk mai.

"In chawlh hun a nih kha ka ring rêng a," tiin ka ep chiahah chuan a rawn țhu ve nghâl a," Ei ang le, kan pahnih tâna ka siam a nih hi, menu-ah hian a tel miah lo a nia," a ti leh a, ei tùr chu ka en a, eng nge a hming ni ang tih pawh ka hre lo, ka la ei ngai loh bâkah ka hmuh vawi khatna a ni hial ang chu, a la tui hmèl êm êm zui.

"A tui ngawt ang!" ka ti sap a, tray ațang chuan ka ei tùr bowl chu chawi chhuakin ka hmaah chuan arawn dah a, a ei tùr pawh chu a hmaah chuan a dah ve leh a, a rim a tui êm avàngin ka ril a tițâm nghâl raih raih mai. Ka han hâwp a, a rim tui ang chiahin tui pawh a tui, a taste chu ka sawi thiam chiah lo, a tui lutuk a ni tawp mai.

"A tui tawp, eng nge ni a hming ni rêng rêng a? Ka hmuh vawi khatna a nih bâkah ka ei vawi khatna a ni bawk," tih pah chuan ka hâwp leh a, ani chuan,"Ka siam thar a nia, hming pawh a la nei lo, temtîr hmasak ber che kha ka duh si a," a lo ti a, tlêm tê chu a hâwp ve a.

"A tui lutuk ringawt! Lei ka lem tel țêp a ni," tiin ka nui a, ani pawh a țhen ve sak a,"A țha a nih chu," tiin min en a," Ei zo vek rawh aw," a ti leh a, kei pawh chuan," Dâwn lutuk! A tui êm asin," tiin ka hâwp leh nghâl zat a.

Kan ei zawh veleh chuan dàwr lam min panpui leh a, kan thang rei lo bawk a, Chhanite pahnih pawh chu an lo inpeih ve chauh a lo ni, kan thleng hma chu ka lãwm khawp mai, thleng tlãi ila chuan inthlahrun a na duh dâwn êm asin.

A kal liam chiah tihah chuan Chhani chuan min fiam ta nghâl a, Robert-a pawh chuan,"A nula zâwk aiin nula 2 a luck zâwk tlat mai!" a lo ti ve a, chu kher chu Chhani chuan a lo haw lehpek!

"Ngawi tak rawh! Ka la bosan hmak ang che maw le! Maria-i nèna kan awm lohsan hnuah che chuan nangmah chauhin a nia i la awm ruk ruk dâwn ni," tiin a chhãng tàn tán a, Robert-a lah chuan a lo nuih mai mai a, kei pawh ka lo nui ve tho.

"I bialnuin mi dang a kawpsan chea ka lo hnemna che zawng zawng kha ka la lêt leh vek! I bulah pawh hian ka awm peih thlâwt lo," a tih phei chuan ka nui bâwk bâwk a, Robert-a chuan," Aw le, ka pe lêt leh vek che aw, bialpa rawn hruai chhuak ve tùr che i hmuh hma chuan ka bula i awm tho tho a ngaih hmel sia, hmu thuai ang che," a lo tihsak mai mai a, a thinrim rei theih mawlh loh. Kan infiam a, an infiam na thei si a, a naupang ber na nâ nâ chu, Chhani a han titau leh rih țhìn a; mahse, Robert-a'n nui huah huah chunga a han thlèm a han thlèm hi chuan a titau rei thei bîk lo, a tàwpah kan nui ho leh vek țhìn.

Chuta țang chuan chhùn thingpui in hun angah hian a rawn lang ta ziah a, duh lo viau mah ila thawhpuite hmaa han hnial chu ka duh si lo va, kan chhuak dùn ta ziah mai. A thil siam chi hrang hrang min eipui a, a hnuah phei chuan ka thawhpui pahnihte ei ve tùrin min hawntîr ta zauh zauh a, anni pahnih lah chu an lo lãwm thei nasa, min hruai chhuah azâtin làwmthu an lo hrilh ta ziah a.

Kei pawhin tlêm tlêmin ka rilru ka pe telh telh tih ka hria, kan inhmu ngun a, a theihtâwpin min care tih ka hria, kei mai bâkah, ka fate pahnih chungah pawh chutiang tho chu a ni. Pathianniah ni se inkhâwm bànah, inlêng kan nei dâwn lo a nih chuan kan nufazain min hruai chhuak a, khawi khawiah emaw min kalpui a, Siamteite pahnih phei chuan nuam an ti thei lutuk a, Pathiannia inlêng kan neih hi an hlau hlur tawh mai a ni, chu êm êm chu țha ka ti hran lo; mahse, ka sawi chhuak chuang lo.

Pathianni vawi khat erawh an inah min hruai a, lêng pawh an lo awm ve a, a nu chuan," Awi, in lo lêng duh lo lutuk a, Nautei pawh hmuh kan châk a," a lo ti chûl a, Chimchimtei lah chu in chhûng a luh veleh a'n tlãn kual leh phawt a, a harh reuh lutuk hi ka lo îp țhìn; mahse, ka hau vak ngai lo, a la reh ve mai tùrah ka ngai.

"E heu! Tute nge lo lêng hi?" Sawmzuala pu, an room ațanga lo chhuak chiah chuan a rawn ti ve a, Chimchimtei chuan lo pan vatin," Àpu, i dam em?" tiin a malah chuan a kuah a! Ka lo zak, a țawng dàn leh a chêtzia chuan min ţhâwng, chutiangin a awm ngai si lo!

"Dam e, i va fel tak aw...! I lo va nula tawh rêng rêng ve! I lo lêng khât lutuk tawh a, kan lo sawi kan lo sawi che a," a pu pawh chuan a lo ti ve a, kûn hniamin a kuah ve a.

Kan lêng ta reng a, in chhûnga an awm peih loh hnuah Siamtei leh a nau chu pâwnah an infiam a, a zau nuamin  motor a hlauhawm bawk si loh a, an duh tâwkin an ninhlei thei a, a zia viau e.

"Kumin Krismas hian a haw dâwn em?" Sawmzuala'n a rawn tih chuan ka hawi sawn chauh, an pahniha an infiam leh ninhlei kual chu ka lo en uluk deuh a ni.

"Ka lo la ngaihtuah miah lo, a haw ve duh tak ang a...A chhûngte a hmuh lohna pawh a rei ve tawh bawk a, sawipui va tùr a nih chu," ka ti nauh nauh a, chutah," A haw chuan kan khua a har ngawt ang chu, an inawm ngunin Chimchimtei hian a ngaina nasa tawh mai si a," ka ti leh a.

"Tapuia leh Tatei an awm alawm, chuan... kei pawh," a tih sup chuan ka en zawk a, a nuih ka ring a nia, a nui miah lo.

"Siamtei hi chuan a kàwm thiam ve êm alawm, puitling țhuau bula awm ai chuan naupang deuh bula awm hi nuam a ti zâwk a," ka ti a, Chimchimtei au râih râih paha a tlân kual chu ka en leh a. Siamtei hi a haw a nih chuan a khua a har dâwn lutuk a, ka lo huphurhpui lâwk zâwk.

"Hawh, ka room-ah chho lawk ang," a tih leh chuan en vatin," A tihchi loh, mi dang hmuhah pawh a mawi lo," ka ti vat a, a room-ah tih tùr ka neih àwm ka hre lo, bâkah, inlêng dang an awm ve a, kan pahnih chauha kan chhoh chuan ngaih dàn dik lo an pu palh ang.

"A ho êm mai, rei lo tê chauh a ni ang," tiin ka kawr tlângah chuan a pawt zauh a, chhuanlam dang siam lehin," Min hmuh loh chuan Chimchimtei saw a lo au leh vak mai ang," ka ti leh a, ani chuan," A u a awm a, a au lo ang," a ti leh mai a, chutah," Khawngaihin..?" a ti leh ta sup a, min en chhuk rùn bawk a.

"Eng nge kan tih dâwn?" Ka va zâwt chîk tak! 

"Kal lawk a ni mai," tiin min rawn hél a, ka kokiah chuan a kut pahnih rawn nghatin min nawr kal ta nghâl a. Kei chuan," Hei, min thlah teh, ka kal thei alawm," ka ti a, kawngka bul thleng min nawr kal hnu chuan min thlah ve ta mai a; mahse, ka kutah a rawn vuan ta thung.

"Eng mah vènthàwn tùr a awm lo, min hmu tùr pawh an awm lo ang," tiin min kai lût leh ta a, ka kut chu lâk chhuah tumin ka tãl ve ngei; mahse, a chelh nghet sauh sauh thung a.

A sawi ang deuhin hmuh tùr an lo awm mai miah lo, an room lamah an inkàwm a ni maithei, a nih loh pawhin an room thlanglam veranda nuam zetah khân a ni ngei ang, a nu erawh choka lamah a awm a niang, a ri rak rak chu ka hria. A room kan han luh chuan kawngka khãr nghâlin ka kâwngah chuan a kuah nghâl zat a, ka phu zawk mai. Makti zeta melh chhoin ani pawh chuan min rawn melh chhuk rân a.

"Eng thil nge tih-" ka sawi zawh hma chuan," Țawng rih lo phawt teh," ti supin a kut lehlam chuan ka hmui chu a rawn hup ta daih a, hlauhthàwn vàngin ka meng bial kâwk kâwk ngei ang chu!

"Hlauhthàwn a ngai lo a nia," ti leh supin chiang zet leh hnai zeta min enin a rawn kûn hniam pah zat a, thâwk pawh ka thaw țha ngam tawh lo, chêt pawh ka che lo rêng rêng, min kuah ang ang chuan ka ding tawp mai a ni.

"Helai khuavàng tê hi a mawi reuh ka ti," tih pahin ka hmui a hupna kut chu la sawnin ka hnâr hmâwra khuavàng awmna lai chu a rawn tawk zeuh a, ka bekah a dawm nghâl zat a, engtin emaw ni ka hnâr chu a awm chem chemin ka hria!

"I hmel țhatzia hi i inhria em?"

He pa hi, awm ngaihna min tihre lo, min tilai zo vek. A thil sawi chuan min tilãwm em pawh ka hre lo, a ti tak tak ang em tih lam pawh ka ngaihtuah lo, ka en chho reng ringawt.

"Ka nghâk rei tawh a," tia phun leh supin a rawn kûn hniam zual a, kan hmai a insi lo chauh tawh! Ka awm dan dik lo chu ka hria; mahse, ka che sawn ngam tawh dér lo, ka maimichhîng ngam bawk si lo, ka kut ka hûm ruh tlawk tlawk ringawt.

"Țang țùng kher lo la," tiin a nui suk a, chutih rual chiah chuan a rawn kûn hniam leh chiah a, min rawn fâwp ta chiah e, ka meng bial pawp pawpin ka ring! 

Dam takin min fâwp a, ka chhâng lêt ve miah lo, ka lo awm tawp mai. Ani pawh chuan a hre thiam nasa," Inthlahdul rawh," ti leh supin min fawh dàn a thlâk ta nghâl a, a dam dap tho nain thlâkhlelhna a tilang ta thung. Hei zet chu ka taksaa a thawh dàn a dang ta daih mai, chhàn lêt loh theih loh thil a ni ta.

*I RILRU CHHÛNGRIL LAMA INTHLÂK DANGLAM A AWM CHUAN I BUL VÊLA THIL AWMTE PAWH  A LO INTHLÂK DANGLAM VEK ȚHIN*