☆LAIRIL LUAHTU☆ - 33 By Dingdi Pachuau

 ☆LAIRIL LUAHTU☆ - 33 By Dingdi Pachuau

Ka fâwp lêt ve ta chiang mai, ani erawh a chàwl deuh dat thung a; mahse, a chàwl rei lo khawp mai. Thil dang ngaihtuah lo lêk chuan kan pahniha thil tih mêk boruakah chuan ka chêng a, khawiah nge ka awm tih leh he thil hi thil dik a ni em tih pawh ka ngaihtuah chhuak thei lo, min fawhna chuan ka thluak a fan chiai chiai ni ber maiin ka hria.

Kan tàwp hnuah erawh chuan ka rilru a rawn harh chiang ta tial tial a, kan thil tih zawh chiah tâk chu ka han ngaihtuah lêt a, ka zak ta tlat mai, awlsam lutukin engtin nge ka fawh lêt ve theih ni? Ani chuan min lo fâwp pawh ni se, lo danga lo țang tùr ka ni dâwn lo'm ni? Ani chu mipa a nia, ka thiam loh liau liau a ni, engah nge a room-ahte ka zui chhoh dâw dâw ni?

"Khati khân awm suh," tia phun supin ka khabeah chuan a rawn dawm kãng a, amah en thei tùr chuan min kuai dâk a,"Inthiam lo leh inchhîr hmel i put kha ka duh lo, thiam lohna i nei lo, i thinlung duh zâwng hre thiam tùra puih che ka tum mai chauh a ni. Nangmah mai chuan i hre thiam thei rih si lo va; mahse, lungngai suh, ka pui zêl dâwn che alawm," tiin min rawn en chhuk a, chutah, a âwm pharh dârhah chuan min beitîr ta nghâl a.

Ka maimichhîng a, mak tak maiin nuam ka ti veng veng mai a nih chu! Zorina boral ațang khân mipa hi ka hnaih tawh lo hrim hrim kha a ni a, a ângchhûng nawmzia kha ka lo theihnghilh lek lek tawh a lo ni, tunah chuan Sawmzuala âwmah ka bei ve ta thung a, rinchhan tùr, min hnèmtu tùr hmu leh ta angah ka inngai thei hmiah nia, a mak khawp mai. Tàl sawn pawh ka tum lo, nuam ka ti, hetiang hian awm reng thei ila...

"I muthlù chu a ni êm lo tiraw?" a rawn tih chuan ka meng zawk a; mahse, nuam ka tih êm avàng chuan chêt sawn ka tum chuang lo," Hetia awm rih hi ka duh," ka lo ti sap a, ani pawh chuan min lo hre thiam ve a niang, min kuah hlà hlá a.

Ka fanu țê deuh țhat ri ka hriat chuan min tiharh chhuak zawk mai, che sawn nghâl vatin," Chu...eng thil nge thleng!!" tih leh kawngka lam pana tlàn ka rual ta nghâl a, ani pawh chu a rawn tlãn chhuak ve nghâl vat a, ka thin a phu nasa kher mai.

An bul ka va thlen chuan thaw huam huam chuan ka hawi vat vat a, thil pawi thleng a lo awm lo. Mi ui kài a lo hmu a, chumi a hlim râk han țê țhat țhat ri kha a lo nia, min lo hmuh chuan min lo kawhhmuhin min lo hrilh ve nasa mai! Ka thin phu nasa lutuk tihreh tum chuan ka âwm chu ka dawm vang vang a, Sawmzuala pawh chuan ka hnung chu rawn chûlin zàwi tê tê chuan a rawn bêng pah a.

"A làwmawm e!" a ti chhuak sup a, ani pawh hi ka tlàn chhuah thut avànga rawn tlãn chhuak ve tho kha a ni a, ka tlàn chhuah chhan kha a hre kher lo maithei; mahse, a hre ve thei tho bawk. A hria a nih ka ring zâwk, hei, min hnèm alawm.

Sawmzuala nu chu kan bulah a lo ding ve reng tawh a,"In rawn tlân thla dùn kha ka hmu che u a, eng thil nge ni a?" a rawn ti sar sar a, ka chhàn hma chuan Sawmzuala chuan," Eng mah a ni lo ve, thil hriat sual palh vàng a nia, Chimchimtei hlim țê rî kha kan lo hre sual palh a ni e," a lo ti vat a, ani pawh chuan," A nih tak chu, hei a hlim viau hi maw," a ti leh a, ui kàitu chuan ui chu a kal sawnpui ta a, anni unau hnih lah chuan ui hmel zet hian an en zui dùn țâwk țâwk a.

"Ui a ngaina ang tih ka lo ngaihtuah ngai miah lo," ka tih sap chu a lo hre pha a ni chiang,"Engkim hi a hriat vek theih hleinem," a lo ti vat a, chutah,"Thil pawi a thleng lo bawk a, lût ila, ei tùr pawh kan ei thei tawh ang chu, tiraw Nu?" tiin a nu chu a zâwt nghâl zat a, ani pawh chuan," Tehrêng mai, lût ila?" a lo ti ve vat a, kan zavai chuan kan lût ta an a nu chuan ei tùr a lo siam peih vek niin, ka inthiam lo ru ta khawp mai, keiin chutiang lam chu ka lo ngaihtuah hauh si lo.

A nu chuan zanriah ei ve nghâl tùrin min sâwm a; mahse, mawihnai takin ka lo hnial a, Sawmzuala erawh chuan eng mah lo sawi ve loin min lo en reng ringawt. A thurimin, ka zak thar ta deuh tlat a ni, nutling pui tawh e ti lo chuan nichîna a room-a kan awm dàn ka ngaihtuah lêt hian ka zah ru deuh ta tlat a ni, a nu pawh chuan kan chanchin hi a hriat rûk vek ka ring bawk a, eng angin nge min ngaih ang? Nuthlawi fa nei tawh, nu leh pate bul pawha awm tawh lo, hna thawh mumal nei bawk si lo chu a fapa tân hian min duh lo hrim hrim bawk ang. Ka ngaihtuah tlêm si, ei tùr siampui nachâng pawh ka hriat loh kha.

Ka lo ngaihtuah mûk deuh a niang," I va ngawichawi ta ve?" tih paha ka kut a rawn tawh chuan ka harh chhuak zawk a, kan in pëng kan lo thleng țêp tawh nghe nghe a lo ni.

"Ka ngaihtuahna ka lo kàwm nasa deuh a ni," ka ti ve mai a, a dik chiah bawk. Siamtei leh Chimchimtei chu a hnungah chuangin eng eng emaw sawiin an lo titi reng a, keini pahnih nèn chuan kan inang lo khawp mai.

"Rilru hahna emaw lungawi lohna emaw i nei chu a ni lo tiraw?" a rawn tih leh chuan a lam ka en ta vat a, min rawn en zawk nain kawng lam chu a en leh vat a.

"Nei lo ve," ka lo ti ve vat a, ka ngawih vung vung avàngin rilru hahna ka nei emaw a lo ti a ni ngei ang chu. Ani tân chuan a ni thei viau ang, ka ngawi kar mai si a.

"A țhat chu."

Zàn mutnaah chuan vawiina ka awm dàn chu ka ngaihtuah lêt a, thil țha tak leh  chhuanawm tak chu a ni lo alawm; mahse, nuam chu ka ti viau lawi a nih si kha, bâkah, a âwma ka bei khân ka thlâ a muang hliah hliah mai a, khatiang thlamuanna kha Zorina boral hnua ka neih lehna hmasa ber a ni. Zahthlâk viau mah se ka hnar phal lo a nih kha, tu mihringin nge a rilru nawmna leh thlamuanna a hmuh chu hnar phal tehlul ang? Mihringah pawh hmeichhe âwmnêm, mi chak lo ka ni a, a hlu vawng vawng asin.

A tûka Mami ka biakin,"Ngaihzâwng ka nei ta niin ka hria," ka ti ta ringawt a, ani lah chuan," Ka hriain ka hria, a hming bula S awm kha a ni tiraw?" nui ar ar pah hian a rawn ti a, makti rilru deuh hian," Engtin nge i hriat?" ka ti vat a, ani lah chuan," Dâwp chhuah awl viau suh," a la rawn ti zui a! A lo hre tak tak hauh lo, min rawn chhimbudàwi kual chho vêl a lo nih àwm chu!

"Eksek...!!" ka ti vak ringawt a, a la nui awr awr zui a. Ka tûm vuau dâwn a, a hriat duha hrilh ka ni ve bawk si a, han tùmsan daih pawh chu a dik leh meuh si lo. A hnu deuhah chuan amah chuan," Ka rinna a rei tawh alawm, a ngaihsak chein a awm dàn aţang hian mi a nilêng lo tân chuan a hriat theih reng, mi ã lah ka ni si lo va," thutak deuh zâwk hian a rawn ti leh a.

"Ã lo tawp mai," ka lo ti vat a, ani chuan,"A nih, engtin nge in bul in han țan chhoh dàn tak min han hrilh vek teh, detail tâwkin aw, ka hre châk over a nia!" a rawn ti sar sar a, a phùrzia chu a awah chuan a lang chhuak thei hial a ni.

"Min duh tih min hrilhna hi chu a rei ve leh deuh tawh a; mahse, keimah lam hi ka la inpeih chhuak thei meuh lo va, a chhan chu i hriat tho ka ring. Fa ka nei tawh a, chutah, ka pasal leh ka pain min boralsan tawh avàngin ani hi ka kut a ni a, mi dang han kawp leh tùrin ka rilru lah ka la inbuatsaih hek lo; mahse, a mak a ni tawp mai, hmâna Sir Manuna car-a kan chuanho țhin ațang daih tawh khân a lo ințan tawh a!" ka tih lai chuan lo chek hlakin," Khata țang tawh khân a lo duh tawh che maw!!! Lalpa leh, a lo va inzêp thei si ve!! A ngèn theihzia kha..." a ti vang vang a.

"A âwihawm loh zâwk tiraw?  Ngêng over kha a nungchang a rawn thlâk thut a, a puitlin tawh vàng pawh a niang chu; mahse, tlêm lai deuh, dàwr ka nghah chhoh hnu vêl ațang vêl khân a mize ngai kha a rawn chhuah leh a, ngêng leh tak a ni. Robert-a a thîk ţhin vàng a nia; mahse, tunah erawh a zia leh tawh," ka ti malh malh a.

"Awiii, nuam e...!! Ka lawmpui lutuk che aw, Eksek, i thinlung kawngkhàr i  hawng leh țan tawh a, i hlim hmel nung ser sawr pawh kan hmu leh thei  tawh ang chu," a ti zat zat a, chutah," A nih, a zei em? A zei viau chu ka ring tho a," a rawn ti leh a.

"I tizahthlâk e a!" ka lo ti hlak a, nutling tawh pui e ti lo chuan  zah avàngin ka sen leh awp awo tawhin ka ring, kan infawh lai kha ka ngaihtuah chhuak tlat a. Ani lah chuan," Zahthlâk lo ve, mi zînga tih chi chu a ni miah lo va; mahse, inngaizâwngte inkâra thil thleng tùr a nia, a zahthlâk hleinem. Keini pawh kan pahniha kan awm dun tawhte chuan kan ti ve fo, kan induhna kan tihlanna hmanrua a ni ve alawm. Bâkah, nang phei chu tleirãwl pawh ni lo, a vawi khatna pawh ni tawh lo lehnghâl!"a rawn ti deuh bawrh bawrh a.

"Ani nèn chuan ka vawi khatna a ni tho," ka lo ti thung a, ani chuan," A nih, a zei bawk em? Hetiang hi an zei duh phian a nia, a zei chiang mai," a rawn ti leh zat zat a, eng eng emaw min zâwt nual a, ho deuh deuh a nih avàng chuan thu dik pawhin  ka chhâng duh lêm lo, fiamthuin ka chhâng vêl mai mai a ni.

Robert-a leh Chhani pawhin min fiam reng mai, ni tin deuhthawa min rawn lam țhìn ta chu zêp zawh rual ni hek lo le; mahse, Chhani'n dîlchhût taka min zawh chian pawhin ka chhâng hran lo, ka nui liam mai mai. Sawmzuala lah hian Robert-a hi a thîk ve deuh tumhrang bawk nèn, sawi chhuak tawh ngai miah lo mah se a awm dàn ațang hian ka hre thiam mai. Dàwra a rawn kal azât hian kan chhuah dâwn apiangin ka kutah a chelh deuh kher țhin, Robert-a'n hmu ngei se a ti a ni mahna.

Vawi khat phei chu motor-a kan luh hnu chuan ka sawi chhuak a, Robert-a leh Chhani hmuh lai chuan ti tawh lo tùrin ka ti a, a chhan chu kan chàwl zo dàwra min dah lêt leh hnu hian min fiam rawn ta țhìn a, Chhani'n nuam a ti thei bawk si a, za lo deuh deuhin ka nui fo a ni. Ani lah chuan engah mah ngai lo tih hriat tak hian," E, engtiklai pawha chelh reng mai che hi ka duh asin," te chu a lo la ti tak tak deuh deuh a! Âwiha zawm chu a tum loh hmel khawp mai.

Tapuia pawh a rawn riah zauh zauh avàngin Sawmzuala nèn kan inkâr chu a man ve thuai a, man chhuah ka awl ve êm mai bawk a ni, min zawh miau chuan ka nau a nih avàngin zêp ka tum lo. Ani pawh chuan," U, a țha lutuk alawm, hlim takin i awm leh theih phah ngeiin ka ring. A fel tih ka hria, a mai maiin a ngaizâwng lo tawp ang che, innghahna tlâk deuh tùr a ni asin," a ti ve ngei a, fakna lam a nih zël avàng hian ka ngaih a țha sawt țhin.

Siamtei pawh a duh dàn zahsakin a haw pheina tùr ticket ka lâksak diam tawh a, an chhûngkaw thawmhnaw tùr ka nute lamin min ngaihtuahpui bawk a, a bâwr haw ve viau ang. A phei dâwn zànah Tapuia a lo riak leh a, zànah chuan Siamtei phei tùr chu kan huphurh nufa a niang, kan muhil thei lawk lo va. Zîngah  kan tho a, kan nufa chuan kan thlah ve theih loh avàngin Tapuia'n  Tatei scooty-in sumo counter thleng a han thlah a, pawisa ka theih anga tam ka pe ve bawk a, kum thar lama a lo pheina tùr ticket man nèn, thawmhnaw ka hawn pheitîr nual bawk a, a chhúngte chu an lo lãwm ve ngawtin ka ring.

A tûkah Siamtei chu ka va bia a, inah a lo thleng tawh a, a chhûngte pawh an lo dam țha a, thawmhnaw a hawnsakte chu an lãwm lutuk a, a nu phei chu a mittui a tla hial tih min hrilh chuan kei pawh ka lãwm kher mai. 

"Nute, pawisate kha min hawn tamtîr sia, Ânu chuan,' I nutei chuan a neih zawng zawng a pe che a ni ngei ang, a zahthlâk êm mai,' a ti a, tlaia chaw ei dâwn țawngțainaah pawh a țap a, Pathian hnênah i hming lam meuhin làwmthu a sawi mawlh mawlh asin, kan lâwm lutuk," a rawn tih chuan an làwmna thu chuan kei pawh ka mittui a titling ve thei hial a.

Dàwr ka nghâk ve tawh lo, Dec 15 ațanga nakkum Jan 15 thleng chu ka chàwl dâwn a ni. Chimchimtei ka awm a ngai tawh a, ka nuin a hnêna dah mai tùrin min ti țhìn taknain kei erawh chuan fuh ka ti lêm lo a ni. A u rawn phei hunah ka hna chu ka chhunzawm leh mai ang a, ka fanu nèn inawmna hun kan ngah a ni mai; mahse, Tapuia hian,"I uikawm lutuk!" tia phurh chhuah daih hi a chîng a, a pi hnênah a lo va dah țhìn. Ka nu chuan min rawn video-call ta țhin a, a pi leh pute nèn an inchhaih nui nasa thei viau a ni, a pu pawh chu a nêl nghâl viau a ni tih a hriat mai.

Krismas tree siam ka châk tlat avàngin Sawmzuala chuan min enpui a, lian vak lo leh man to lêm lo chu kan lei a, a cheina pawh kan lei nghâl vek a, zànah min cheipui a, light kan dah tel bawk si a, Chimchimtei'n hmuhnawm a tiin nuam a ti khawp mai, enin a lâm a, a țê teng tung mai a, ka fanu hlim hmel chuan thil ka tihsual lohzia chu min hriattîr a, kei pawhin ka hlim phah khawp mai.

Zan khat chu Sawmzuala chuan,"Kumin Krismas chu i nute hnênah hmang daih ula, in nufa chauh chuan in khua a har àwm êm mai," a ti a, ka piaha Tapuia lo țhu ve reng chuan," A țha ngawt ang! In pahnih teh tlawng ai chuan Chimchimtei pawhin nuam a ti daih zâwk ang," phûr zet hian a lo ti a.

"I lo riak leh tho dâwn a, kan khua a har dâwn hleinem," tiin Tapuia chu ka en a, ani lah chuan," Krismas leh kum thar inkârah khian kan zin daih dáwn, ka riahpui reng thei dâwn lo che u,"Calendar melh vang vang pah chuan a lo ti leh a, kei erawh chuan," Kan hlau chuang hleinem," ka lo ti leh mai a.

"I inla hrang lutuk rêng rêng, Chimchimtei pawhin kan in nuam ati êm êm a, nangmah ber hi..." tiin sawi zawm duh lo chuan a ngawi ta daih a, min en vang vang tih ka hria; mahse, kei erawh chuan ka en duh lo lui tlat  thung. Ka ngawih tlat avàng chuan Sawmzuala chuan kan boruak tihdanglam nân," Tapui, Urlâwk zànte chu in inah ngei kan hmangho ang chu, Krismas zawh hnua i zin daih dâwn bawk si chuan  Chimchimtei'n a ngai ngawt ang che, a u a awm rih si lo va," a lo ti a, ani pawh chuan," Tehrêng mai, han zin loh theih ringawt lah a ni mang si lo va," a lo ti ve mai a.

"Khawiah nge in zin dâwn a?" ka tih chuan," South India lamah, kan fang dâwn a," a lo ti a, a zin rei hmel sia, ka lo huphurh lâwk tawp. Siamtei a haw rih si a, Tapuia a awm loh leh zêl chuan Chimchimtei a khua a har dâwn lutuk.

Sawmzuala haw hnu, mu tùra kan insingsak lai chuan Tapuia chuan," U, i rilru hi tisak viau tawh lo la, ka pa pawhin zu in tawh lovin a sim ve tawh a, a awm dàn zawng zawng kha a inchhîrin hrehawm a ti țhìn tih kahria, kan ina a awm laia lo kal i duh miah lote hi a hre ve vek a, a inthiam bîk lo a ni, Chimchimtei lah a ngaiin a làwm êm êm a, a duatin ani pawhin a ngaina viau bawk. In pahnih inkâr hi siam țha thuai teh u, inngeih leh nuam taka hun hman dial dial pawh a châkawm ve tawh alawm, a siam țha theitu chu nangmah hi i ni, harsa i ti viau maithei; mahse, i tum chuan i ti thei ang tih ka hria a ni," a ti sap sap a.

"Tapui, thil pawi thleng tùr chu a thleng vek tawh asin, ka pa nèn kan inkâr hi siam țhat tumna rilru pawh ka nei hleinem. Bâkah, ina rawn lêt ka tum tawh lo hrim hrim," ka lo ti a, ani chuan,"U, lo lêt tùrin ka ti hran lo che, i duhna awm thei i ni bawk, tu mahin an tilui thei lo che; mahse, kei erawh chuan awm tlâng kher lo mah ila kan chhûngkua hi rilru tak takin inngeih leh ila, inpawh tlâng takin awm leh ila tih hi ka duh chu a ni," a ti leh charh charh a.

Mut hmunah chuan Tapuia thil sawi chu ngaihtuahin nunhlui ka hre chhuak thar uar uar a, nunhlui hriat reng atána ka duh lohte pawh ka hre chhuak a, ka rilru a rawn na thar leh bawk. Tapuia rilru chu ka hria, Tatei leh ka nu rilru pawh ani rilru ang tho hi a ni ngei ang, anni pahnih erawh chuan an sawi chhuak ngam lo mai zàwkah ka ngai. Ka pa rilru erawh ka hre lo, Chimchimtei erawh a tunu a ni miau a, a làwmin a duat ve ang chu. 

Sawmzuala'n tihtak zeta min kar tlat avàngin kan 'in hluiah' chuan Urlâwk zàn hmang tùr chuan kan chhuak a, Tapuia leh Tatei an phûr over bawk si a, ka hnial duh ta bîk lo a ni. Chimchimtei pawh a phûr, ama phùl phùlin a phûl hlut a, kei erawh ka ngawi deuh reng a.

"Zanin chu hlim deuhin aw ni ang, hlim i phû a nia," ka kut rawn dawm paha a rawn tih chuan ka en phei vat a, min lo nuih suk a. Ni e, ka hlimna hi ka kutah a awm chiang alawm, kum thum chhûng kha hrehawm, mahni pawh inngaihsak thei lo leh hlimni nei mumal lovin hun ka hmang a, tunah Sawmzuala bulah hlimni hmel ka hmu ve leh țan a, ka hlimna kâwl rawn êng ve țan dêk dêk hi ka paih bo leh mai ang nge, ka um zui zêl zâwk ang le?

In bul kan thlena motor a tihdin lai chuan," Hlim takin aw," a rawn ti țha leh a, kei erawh chuan ka nuih sak ringawt, ka pa a awm ve reng chuan ka hlim thei ngût lo maithei si a, ka sawi lâwk thei lo a ni. Ina kan luh chuan Tapuia'n Chimchimtei a lo pawm vat a, ka nu leh pate bulah a nghat nghâl a, Tatei țhian ni àwm tak nula pahnih an lo awm ve bawk a, ka nu chuan Sawmzuala chu a lo be vat a. Ka pa erawh chu en duh miah lo mah ila Chimchimtei nèn an inchhaih nghâl tih ka hria, an aw ațangin ka hria.

Hlim tum tak chuan nui hmel chu ka pu ve reng a; mahse, a harsa khawp mai. Rilru chhûngril lama hlim hi a lo harsa a nih hi, ka sual vàng pawh a ni mahna, kan hun kal tawh kha ka mitthlaah a lo lang zêl. Dawhkàn ka kîlin min vuak lai kha ka hre chhuak zël a, khatih laia min vuak chhan ka hriat thiam lohzia leh nâ ka tihzia kha... ka room hlui lam ka en lah chuan min kalh khum lai kha ka hre chhuak nghâl zêl bawk a, ngaihtuah loh tumin ka han maimichhîng a; mahse, a țawng ka hre reng thei tho si a, awmzia a awm hlei thei lo.

Tatei chuan,"Sawmzual, in pahnih khân khulai dàwrtêah khân ei rek rek tùr in zu lei mai dâwn em ni ang?   Nangni pahnih in hman deuh a,"a ti a, Sawmzuala'n," Tehrêng mai, zu kal ila?" a tih chuan ka meng chhuak ve ta nghâl a, inchhûnga ka boruak ipik churh chu pâwna ka chhuah chuan a zia deuh mahna!

Pâwn boruak vâwt zetin min han man chuan ka harh sawng sawngin ka hria, ka thaw pah hawk hawk bawk a, ani pawh chuan min rawn din hnaihin min si chét chuan a rawn kal a.

"Ka thiam loh vek a ni, i hmel kha ka hmu thiam asin," a rawn tih sup chuan," A, ni lo ve, ka rilru dik loh vàng a nia," ka lo ti thung a, a thiam loh nihtîr chu ka duh bîk lo. Ka nunhlui kha hrilh nual mah ila ka pain min vuak țhin dàn zawng zawng kha ka hrilh lo va, a hre lo ang.

*HARSATNA RUAMAH I NIHNA DIK TAK A LO LANG ANG*