☆LAIRIL LUAHTU☆ - 35 By Dingdi Pachuau

 ☆LAIRIL LUAHTU☆ - 35 By Dingdi Pachuau

Mahse, a riak lui ta tho. Riah tuma rawn kal a ni a, han hnial viau angin lang mah ila ka rilru chhûngrila riak se ka tihna chu min hmuhpui thiam a ni ang chu ka ti mai,"Min hnar haw tum tak tak la?" tia cho zeta min rawn en chuan ka mit ka la zàl zál mai.

Zàn mut a tui siai siai khawp mai, rilruah thlamuanna a awm tlat a, thãwm kan hre chhunzawm ta lo bawk nèn, mi dangte pawh chu mu tui tùrah ka ngai ve ngawt a; mahse, zîng thawh lamah erawh Sawmzuala kan thawh khalh leh chuang lo.

Ka nuin min rawn be fo a, lêng turin min rawn be țhìn a ni, Chimchimtei lah chuan khawhar a ngaithei lo nasa a, kan pahniha kan awm chuan lèn chhuah a ngèn ziah. Ka nuin min rawn video-call apiangin a pite ina lèn chu a ngèn ziah a, a nutei lah a lo hman ve thei bawk si a, chhuanlam siamin,"Lam a hla êm mai, lìrthei kan nei si lo," ka tih pawhin ani a rawn tlãn vat țhìn a, chhuanlam pawhin awmzia a nei thei meuh lo. A tam zâwkah chuan amah chauhin ka kaltîr țhìn; mahse, ka ngaihtuah viau țhìn tho. Mahni chauha han awm chuan khua a har, a lo haw har deuh phei chuan ka va be fo, a nutei lah chuan,"I ninawm der dur, a ngai lo che, nuam a tiin a ngaihtuahawm loh," tiin min rawn khak ziah a; mahse, ka bula a awm loh chuan a chanchin ngaihvena han biak loh hi ka thiam tawh lo ni berin ka hria.

31 nia a lêng phei chu rawn haw a duh ta miah lo va, ka biak chuan zànah chaw a ei nghâl dâwn tiin a nutei sawi ang chuan fiah vak lo chuan a rawn sawi chhãwng a, ka remti vak lo nain ka sawi chhuak chuang lo va, amahin a duh miau chuan tihngaihna awm hek lo le, keimah chauhin chaw ka ei ta ringawt, chaw ei a tui duh fahran lo khawp mai.

Sawmzuala'n min rawn bia a,"Zanin chu aw, ka pute lahin Chimchimtei an hmu châk leh tawh bawk nèn, ka rawn remind leh che a nih hi," a rawn tih chuan ka hre chhuak leh chiah. Ni dâwn tak e, kum hlui thlah zàn kha an in lama hman a rawt ve tak e, ka lo mangnghilh dêr tawh!

Mahse, la hre reng ni awm tak hian," Aw, ka hria e; mahse, a pite inah chaw min eisan daih a, kan tlãi duh àwm mang e," ka lo ti vat a, ani erawh chuan," A pawi lo, kan tlãn kual mai dâwn nia," a ti mai a, ka chaw eina ka seng fel hnu chuan Tatei biain Chimchimtei rawn thlah haw a ngaih loh thu chu ka hrilh nghál a, țhu muang suar suar lovin min rawn lam veleha kal mai thei turin ka lo insiam sa thlap bawk a.

Chimchimtei kan va lam chuan a puin a lo la pawm a, thawnthu an lo la inhrilh a, rei țhu muang thei kan nih loh avàngin kan kal ta thuai a, a pu chuan car thlengin a pawm a, ka nuin min zui chhuak bawk a.

"Lo lêng leh thuai rawh aw, kan ngai si che a," a puin a tih chuan a lu a bu nghat a, a pi chuan,"Engtin nge tih dàn tùr ka hrilh che kha?" a lo ti a, ani chuan a kut pahnih a lu chunga la chhovin," Àpi, I love you, Àpu, I love you," a ti ta reuh a, a pu chuan," Keini pawhin We love you aw, hlim deuhin in hmang dâwn nia," a ti a, kan tlãn chhuak ta nghãl a.

Hlim takin hun chu kan hmang ho a, zàn rei tak thleng erawh kan meng lo, kan haw dâwn chuan dâr 9:45 chauh a la ni nghe nghe a; mahse, a lâm chau deuh nge ni, haw kawngah chuan Chimchimtei a muhìl ta bâm mai, zanin chu a hlim bawk a, lâm chau viau mah se a mu tui khawpin ka ring.

Sawmzualachu lo riak tawh lo tùrin ka hrilh a, ani erawh chuan," Min hlau deuh zâwk a ni lo maw?" a lo ti thung a.

"Teuh lo mai! Thãwm ka hriat zàn bâk kha kan hre chhunzawm tawh chuang lo va, bâkah, vawiin tlai news-ah khân ka chhiar tlatin ka hria, an man thu kha," ka ti a.

A ngawih deuh vang vang hnuah chuan," Mahse, keiman riah ka la duh alawm," a ti ta sup a, ka en phei vat a, a kutzungchala a hmui tuai nauh nauh chung chuan min lo en reng a, ka nuih sak a.

"Naupang chhia viau lo mai teh," ka ti a, ani lah chuan,"Naupang chhia viau ila ka ti zâwk ngawt mai, thil mawi leh mawi lo kha ka ngaihtuah thiam dâwn si lo va," a lo ti thung a.

Riah ka phal tawh loh avàng chuan rei fê chu kan inhnial deuh bap bap a; mahse, min hnial hneh ta bîk lo. A haw dâwnah erawh chuan ãm zet, duhthawh tih hriat zet hian min han fâwp vawng vawng a, a tàwp thei ta lo hial a niang tih tùr khawpa rei mawi tâwk min fawh hnuah chuan a haw ve ta țâwk a, a haw hnuah chuan ka hmui ka tuai ka tuai ringawt mai!

Zàn ka mumangah chuan a vawi khatna atân Zorina ka hmu ve tlat mai! Min lo en duh miah lo va, keiin a hmel tak en tumin ka lo hawi kual ka lo hawi kual a, ani lah chu ka hmuh loh dàn tùr zêl ni àwm tak hian a hmel chu a thukru zêl a, a hnuah erawh chuan a hmingin ka ko ta a, chutah chuan a rawn hawi ve ta chiah a. A mitmeng zaidam hmel zet chuan min rawn en a, a nui pah deuh bawk a; mahse, a țawng miah lo. Kei erawh chuan eng eng emaw ni hi ka lo zâwt a, min chhâng lo chuan nui hmel pu hian min en reng ringawt a, ka pan hnai a, a hmaia khawihsak ka tum chuan ka lo khawih fuh thei miah lo, boruak khawih ang mai hi a ni. Ka mangang a, ka ko vak vak a, chutah chuan a aw ngei mai hian,"Maria, kei chu min ngaihtuah tawh suh, ngaihtuah ka ngai tawh lo, in nufa hma hun chauh ngaihtuah la, hlim takin awm in lo tum zêl dáwn nia, ka lo thlîr reng țhin ang che u," a ti a, a hmel hmuh tuma vàn lama ka hawi vak vak lai chuan ka harh ta hlawl a, ka mumang mai lo niin. Che lovin ka mu reng a, ka mumang chu ka ngaihtuah zui nep nep reng a. Ka mumanga ka hmuh vawi khatna a ni bawk a, ka ngai thar vawng vawng mai.

Kum a lo thar a, Tapuiate pawh ni 5-ah an rawn thlâwk chho a, a rawn haw zànah chuan a rawn riak nghâl bawk a, kan nufa thawmhnaw tùr min rawn hawnsak chu lãwm zet hian kan ha chhin a, ka inhmeh reuh khawp mai, Chimchimtei pawhin nalh a inti ve ngang mai a, hlih pawh a phal tawh lo.

Siamtei rawn phei hnuah erawh chuan Tapuia pawh a rawn riak vak tawh lo, ni tin dàwrah ka kal leh tawh a, thawhpuite nèn pawh kan infiam nasa leh tawh viau a ni. Mak deuh mai chu, Robert-a leh Chhani chu an lo inngaizâwng  tawh a! An awm dàn ka chîk hran miah lo a nia; mahse, tlêm chuan ang ka ti ve deuh tho a, Chhani chu Robert-a hriat loh tùr chuan ka chhaih fiam chhin mai mai a, ani Chhani lah chuan a lo zêp zo thei bîk lo, hmeichhia hi chuan țhian, thurûk hrilh tùr leh thu chhia a ţha sawipui tùr hi kan lo mamawh êm a lo ni. 

Min rawn dàwrtu an awm loh lai tak chuan," Engtikah nge kan tih huk ang?" tiin Robert-a chu ka fiam a, ani lah chuan," In remchàn hun a ni mai alawm, ka ha ka tât hriam nasa tawh a nia," a lo ti a, a nui sûng bawk a. Chhani chuan," Ni e, ti thuai thuai rawh u; mahse, in tih hunah chuan heta thawh hi a phal tawh àwm si lo va, kan ngai àwm che," a lo ti ve daih a, keimah zâwk min chhaih lêt daih a lo ni!

"Țang tlâng kher lo ula?" ka tih chuan Chhani chuan sen deuh ap ap chung hian,"In pa hi a va lo lang har tawh, vawiin hi, a rawn lam dâwn lo teh tlat che em ni a?" a ti a, kei lah chuan," I danglam zo tawh, chhùn chawlh hun pawh a la nih loh hi maw," tiin ka fiam lët a, Robert-a melh deuh zak zak pah chuan a nui tãwi tak ringawt a. A hmaa țawng duh deuh leh Robert-a pawh fiam bawrh bawrh țhìn kha a ni si a, hetia an inzui tâk hnu hian ka hriatah chuan a fiam bawrh bawrh tawh miah lo, bâkah, ngam deuha a tih bawrh bawrh ang pawh khân a ti tawh miah lo.

Zàna Tapuia a rawn kal chuan Chimchimteite unau chu khum lamah an awm tawh a, Sawmzuala lahin zàna a rawn lèn hman loh tùr thu chhùna min rawn hruai chhuahin min hrilh tawh bawk a, TV ka en ve mai mai rih a, Tapuia hi ka lo nghâk pah ve bawk a ni.

"U, Tatei phone chhin la, tu nge lo lêng tih han zâwt chhin teh," tiin TV remote chu a la a, sport channel a hmet zui nghâl zat a. Melh hrãwkin," Engah nge ka en lai chu i hmeh sawn ngawt a? A hmuhnawm asin," ka lo ti thung a, ani lah chuan," Phone mai teh," a ti hluk thung a.

Tatei number chu ka hmet chhuak a, zàn zàna han biak taimai pawh chu, tu nge maw lêng rêng rêng ni, thil ho tak a nih vaih chuan aw...

A rawn țawng dàn ațang chuan a phùr hmel tawp, a aw a zãng vah mai a, a rawn țawng nghâl zat zat bawk a.

"Zanin chu i va phûr ve a..? Thil țha deuh thleng a awm chu a ni êm lo maw?" ka ti a, ani chu hlim tih hriat tak hian a nui hak hak a,"Phûr ve bawk ang chu, han phùr ve deuh châng te  hi awm ve zauh zauh se a țha alawm," a rawn ti leh ham ham a.

"Tapuia'n tu nge lêng záwt tur chein min ti sia, tu nge phùrna pe tùr che a rawn lêng rêng rêng a?" ka tih leh chuan," Chu pa mai mai chuh!" a ti hlak phawt a, chutah, aw zàwi deuh hian,"En teh, kan college hluia kan sir ka star țhin Sir Rempuiate an rawn lêng a, Sawmzuala'n a rawn lènpui a, ka thi lo chauh a ni! A chhiat lohzia mai chu a," a rawn ti sar sar a, a phùrzia chu a aw ațang pawh chuan hriat hmaih theih a ni lo.

"Sawmzuala nèn a?!!" ka tih chuan," Aw, an rawn inzui lût ka lo hmuh chuan mak ka ti râp maw le," a ti leh a. A lènpui dâwn vàngin zaninah a rawn lêng hman lo a, a lo nih chiah chu, min hrilh duh lo vei a, ka zâwt miah lo ang.

"Rempuia chu tlangvâl a la ni ang maw?" tia ka zawh chuan ani chuan rang zet hian,"Mãwl suh! Engtin nge pa ni tawh chu ka star tehlul ang? Tlangvâl ngat maw le, tlangvâl hnahkhat ngat, hmeichhia zawng zawng chuan kan star vek nghe nghe asin, a rawn lêng tlat mai a nia, ka âwih thei lo hial zâwk a ni," a ti leh sar sar a.

"Chu, mâkpa atân college lecturer kan nei dâwn a ni maw? A va tihzia dâwn ve," tiin Tapuia chu ka va en a, ani chuan a hmui a lo tipawrh tûrh thung a, ka nuih a za lutuk.

"Ni hlauh se ka ti khawp mai. Tak tak chuan, min duh ve teuh lo êm mai, hetia sawi pawh hi a zahthlâk zâwk, ani chuan a duh duh a hmu àwm si a, Sawmzuala'n a rawn lènpui ve mai mai a nih ka ring," beidawn hmel deuh chuan a ti leh daih a, kei erawh chuan,"A rawn lêng a, step khatin hmasâwnna chu a awm tawh a nih chu, duh lo hlãwm tawp che chu a nih loh chu a hriat reng alawm," tiin ka lo hnèm a.

Kan inbiak zawh chuan Tapuia hnênah chuan," Mâkpa atân chuan a hualawm àwm em?" nui chung hian ka ti a, ani chuan,"A beng a parh țha khawp mai," a lo ti duh chauh a.

"Vêng khat pa ràwn a ni dâwn tihna a nih chu," ka tih leh chuan ani chuan," U Sawmzuala a țha zâwk," a lo ti leh daih a! Chhàn zuia thil dang han zawh leh dâwn pawhin a thil sawi avàng chuan ka dang deuh tlat, zawh tùr lah a hnawt bo vek, ka ngawi ta reng ringawt a.

A tûk chhùna kan chawlh dun lai chuan nizàn lam chungchâng chu a sawi chhuah ka ring a nia, a sawi chhuak miah lo, kei lahin ka zâwt duh miah lo va, záwt duh lo pawh ni lo, hria ang pawhin ka awm lo, min hrilh loh chuan ka zâwt lo ang. Zàna a rawn lèn pawhin a sawi chhuak chuang lo, ani hi zawng mipa ve ngang hi a nia, sawi kher țûl a ti lêm lo a ni ang e.

Zan khat chu Tapuia chuan motor lei chungchâng kha a rawn sawi chhuak leh a, kei chuan,"Tapui, engtin nge kei hian ka kawl theih ang? Garage pawh kan nei lo va, in ni se miin mai kan luah a ni si a,"ka ti ta a, ani chuan," Ni viau tho mai; mahse, lei la chu ka la ti tho, kan garage-ah pawh i lo dah hawh ve rih mai ang a," a ti leh a, chutah," In luah hi sawn daih mai la, helai hi chu nakinah Chimchimtei school kal duh hunah pawh a hla deuh mah mahin ka ring," a ti zawm zat a. Hei hi chu tûn rup rupa sawi fel theih ni pawhin ka hre lo, la ngaihtuah țhat ve deuh chu a ngai ang.

Chhùna kan chawlh lai chuan," Nawr viau che anga lan chu ka hreh viau nain i rilru erawh inneih lamah lo sêng ve țan la ţha ka ti khawp mai," a rawn tih chuan a fiamthu a nih ringin ka en vat a; mahse, fiamthu hmel rêng ka hmu lo.

"A va mak àwm ve...kan inzui țanna pawh a la rei loh êm hi," fiamthu ti tak deuh si hian ka lo ti a. A ni lah tak a, induha kan inzuina a larei lo ve êm asin, bâkah, hetiang teh vut hian a sawi chhuah pawh ka ring miah lo.

"Inzui rei kher a ngai hleinem, ka hre rei tâwk tawh viau che a ni. Nawr che chu kaduh miah lova; mahse, ka sawi chhuah si loh chuan nang hian engtikah mah i sawi chhuak dâwn si lo va," a ti leh a, a tidik chiah, kei chuan ka sawi chhuak hmasa lo tawp ang.

"Nupui neih hun lo pawh ka ni tawh lo va, bâkah, Chimchimtei pawhin pa a mamawh alawm, a mamawh chhoh hun lai taka a tâna awm hi ka duh a ni,"a ti leh charh charh a, a sawi thutak si a, fiamthuah ka lâksak ngam tawh bîk lo.

"Tûn vut vutah hian ka ti lo, nawr luih che pawh ka duh lo, i rilrua i inpeih zân thleng pawh nghah i ngaih chuan ka nghâk thei tho che; mahse, tlêm tê chuan min ngaihtuah ve tho la aw," a tih leh chuan," Tlêm tê chauha ngaihtuah maw i duh a?" nui chung hian ka lo ti a.

Ka kut chu a kut lum thar thar chuan rawn vuanin,"Ka sawi dàn chu i hre thiam tih ka hria alawm, chuan, i rilrua khâkna la châmbâng tlat kha  paih bosak che ka duh bawk a," a tih leh chuan hre thiam lo zet hian ka lo melh a.

"I pa nèn in inkâr a nia ka tih," a tih tâkah chuan ka hawi sawn ta daih a, ka mitmenga thinrimna leh lungngaihna inpawlh chu hmu lo se ka duh, ka nunhluiah inrawlh lo se, ka bialpa a nih avàng mai hian ka nun engkimah inrawlh lo se ka duh bawk.  

"Chu lam chu sawi lo teh ang," ka ti ta hmak a, nunhlui mitthlaah a rawn lang zut zut a, theihnghilh tawha ka inhriat ka thinrimna, zahna leh hrehawm ka tihna zawng zawng kha a rawn tho thar leh țual țualin ka hre bawk.

"Maria, i dam chhûnga he i rilru hrehawmna, natna leh thinrimna kha pai tùrin ka duh lo che. Țanpui dàn che ka zawng dâwn alawm, i duh chuan engkim min hrilh thei ang," a ti leh a, kei erawh chu ka ngawi reng a, tûn atân chuan eng mah sawi ka duh lo, ka hlimna hi tihchhiat ka duh lo asin.

Min thlah haw lam chuan,"I luhlul ve ngawt mai tiraw? Mahse, i luhlul poh leh hian ka duhna che hi a zual sauh mai si a," a ti leh a, chu chuan tlêmin ka rilru a tihlim deuh sawt a, chutah, amah vêk chuan,"Luhlul hi i inhmeh ka ti bawk; mahse, hmeichhe luhlul deuh ang hian eng emaw kawng zâwng tak hi chuan ka hmu thiam lo tlat țhin che, nunnêm leh zaidam tak, hmangaihna nasa tak nei angin ka hmu che a ni," a tih zawm leh zat a.

"Min hmuh dàn chu a dik lo nasa a nih chu, i mit kha entîr la a țha ang," ka lo ti hlak a, a nui nghâl hawk mai.

"Min kalpui la?" a tih chuan," Ka hman lo, dàwr nghah ka ngai," ka lo ti vat a, min rawn en chuan kei pawh ka insûm zo bîk lo, ka nui ve ta nge nge a.

Ka pa nèna kan inkára thil thleng zawng zawng kha hrilh loh ka tum zet a nia; mahse, a lamah hian ka rilru a lo inhawng nasa tawh a lo ni, min zawh loh chuan ka hrilh hmasa lo ang tih a hria pawh a ni maithei, a ruh lang râwta min zâwt dawt si lo hian pehhél deuh si hian min zawh a chîng a, tlêm tlêmin ka hrilh chho ve zêl a, kâr khat hnuah chuan ka hrilh fai ta vek mai a ni.

"Ka thiam loh pawh a awm ngei ang; mahse, a thisen pu ngei a fanu ngei mai khatianga kut min thlâk duh kha tûn thleng hian mak ka la ti, tu fanu mah hian duh ber bialpa neih laiin duh miah loh leh ngaihzàwn miah loh mipa chu pasalah an nei duh hauh lo ang. Zalènna kan nei vek, ka zalènna khân a huam zîm bîk tihna em ni?" ka tih charh charh lai chuan ka hnungah a kut lianpui  chuan zawi tê hian min lo bêng thap thap a.

"Nula ka ni tawh a, a duh zâwng ang mi chauh pasala nei tùra piang ka ni bîk em ni? A lakah chuan hmangaih leh duh zâwng nei ka ni ve thei lo tihna em ni? Kut min thlâk laite khân nâ ka ti ve thei lo anga, ka rilru leh thinlung pawh a na ve thei lo ang tih a ring tihna em ni?..." ka ngawi ta rih, hmâna ka rilru natna khân min rawn tuam thar leh a, ka rilru nat avànga ka mittui tla tùr chu duh lovin dan lêt tumin ka khap sak sak a.

"Lo hnai teh," ti supin, ka hnaih hma chuan amah zâwk chuan min rawn hnaihin a bân pahnih chuan nghet zet hian  a taksa nghèng chuan min kuah bet a, a nghet țha viau a ni.

Ngawi rengin min kuah a, khatih hun lai khân tuna min kuah anga min kuah tùr hian awm ta se, ka rilrua khâkna, thinrimna leh rilru natna hi ka nei miah lo ang, min țanpuitu leh min chhantu tùr kha ka mamawh êm asin.

"A thleng tawh ngai hauh lo ang," ka chhîpa a khabe nghat chuan a ti sup a, a țawng zâwng chuan a khabe chu a che zauh zauh a, ka chhîp chu a rawn tauh dat dat a.

"Mite anga mawihnai taka pasal neih ve pawh ka ngaihtuah ve țhin a; mahse, chu chu ka tân chuan mumang ang chauh a ni, paih bosak ka ni. Hmalam hun hlimawm leh nuam tak pawh ka suangtuah ve fo; mahse, ka tân chuan chu chu a thiang ve lo, hringtupa duh loh zâwnga nun ka hman chhoh tâk vàng pawh chu a niang, ka tâna mi pawimawh êm êmte pahnih nunna chuan a tuar ta rêng a, a tuar ber tùr lah chu himin ka chhuak ta lel a," ka ti leh a.

"Chutiangin ngaihtuah suh, in chunga thil thlengah phei chuan mahniah inthiam lohna nei miah suh, ruahmanna kan duang ve thei; mahse, a hlawhtlinna lam hi kan chan a ni lo, kan ruahmanna angin kan thawk chhuak ve mai ţhin," a ti sup sup a, chutah," Thih leh dam chungchângah pawh mihringin thu kan nei lo, inmawhchhiat tùr lah i ni hek lo, i pa i enkawl nasatzia pawh ka hmu vek a, a hun a tih hunah Pathianin a nunna a lâksak a ni mai, inthiam lo miah suh, i tih theih tâwk i ti a ni," a ti leh sup sup a.

*I THIL LO TIH TAWH SUAL CHU I PHUR TIRITTUAH HMANG DUH SUH, CHU AI CHUAN I KE HNUAIAH DAHIN, RAB BET LA, KAILÀWNAH HMANG DAIH ANG CHE*