☆LAIRIL LUAHTU☆ - 36 By Dingdi Pachuau

 ☆LAIRIL LUAHTU☆ - 36 By Dingdi Pachuau

Sawmzuala hi țawngkam thiam tak chu a ni hauh lo, mi rilru hneh nâna țawngkam thlum tak hmang thiam a ni pawhin ka hre lo; mahse, a thil sawi hi a thinlung chhûngril ațanga chhuak sawi a ni tih hi ka hre ve tlat. Ka làwm nân min fak ve mai mai ngai lo va, țawngkam ai chuan a chêtziain a lantîr mai țhìn. Duh lo teh mah ila, Zorina ka hriat chhuah phah fo. Ka khaikhin deuh țhìn a ni ang chu, Zorina kha chu a nui peihin a hlim thei viau a, a țawng duhin mi fak a peih a, țawngkam țha pawh a ui ngai lo; Sawmzuala erawh hi chu a nui ve mai mai lo nain tûn hnuah hi chuan a nui lai hi ka hmu zing ve ta zâwk a, hre chiang lotu tân phei chuan a nèlawm lo ngawih ngawih, a țawng tam lo bawk si. Mipa pahnih, nungchang inpèrsan zet si hi ka nuna mi pawimawh ber ber chu an ni lawi a.

Ni khat chu zîngah ka nuin min rawn phone a," Vawiin chu Chimchimteite unau kha rawn lèntîr teh, inah i awm dâwn chuang lo va, ka ngai tawh êm mai," a rawn ti a, kei pawh chuan," Ina i awm dâwnte chuan a pawi hleinem," ka lo ti ve mai a, chaw ei kham hma deuhah Tapuia'n a rawn hruai a, an kal hnu chuan kei pawh in ațang chuan ka chhuak ve ta nghâl a.

Vawiin chu Chhani'n chhùna ei tùr a rawn pãi a, Robert-a'n thingpui a tum bawk a, Sawmzuala rawn kal hman lo pawh chu a tihzia viau a ni. Làwmthu ka sawi mawlh mawlh a, Chhani erawh chuan," I zârah ei tùr tuihnai tak tak kan ei tam tawh êm mai a," a lo ti sap a, Robert-a ve thung chuan,"Ho viau lo teh, thawkho vek kan nia, làwmthu sawi kher a ngai lo," a lo ti hluk thung a.

"Làwmthute hi inhrilh ve zauh zauh a ngai alawm, làwmthu inhrilh loh ai chuan a țha daih zâwk bawk. Kan dam chhûng ngeia infaka làwmthu kan inhrilh loh chuan kan thih hnuah chuan awmzia a awm tawh țhìn lo," ka lo ti a, Chhani chuan," Awi, țawngkam i va thiam, i sawi dik vek tho bawk sia," a lo ti var a, chu a thil sawi chu kan nuih leh rih a.

Chhùn chawlh lai chuan ka nu chu ka phone a, naupang chungchâng chu ka zâwt leh tho. An hlim thu leh ngaihtuah an ngaih loh thu chu min hrilh a, chhùna an chanchin zawh loh hi ka thiam tawh lo a ni ber mai. Ka nute bula an awm pawh hian ka va ngaihtuah vàng êm êm pawh ni chuang lo hian, ka va phone hian ka awm a nuam tlat ţhin a ni.

Chawhnu lama min dàwrtu an awm lai takin ka phone chu a rawn nghawr dar dar a, ka buai lai a nih avàngin ka chhâng duh lo, nakinah keiman ka call-back leh mai ang chu ka ti a; mahse, a tàwp hnuah pawh a rawn ri zui dar dar reng mai. Kan buai a reh deuh hnuah chauh chuan ka phone chu ka han en a, ka nu number ațang vekin a lo ni, vawi 6 missed calls a lo awm hman. Ka ngaih a țha lo thut a, ka call lêt ve ta nghâl a.

"Nute, Chimchimtei motor-in a sû a..." Siamtei aw khùr dat dat leh hlauthãwng tih hriat zet awka ka hriat chuan ka khawng nghâl awtin ka hria!

"Siamte...engtin maw!!"

"Nute... Nute..a thî nasa lutuk a..." Ka taksa a khùr nghâl vek a, ka thâ pawh a rawn zawi nghâl rawih rawih mai; mahse, phone erawh chu nghet zetin ka hûm a, Siamtei rawn țap rî chuan min tibîng mup mup nain rilru fîm put tumin ka inngaihtuah harh lui hrâm hrâm a.

"Engtin nge...i nau chu a awm? Khawnge i pi?" Ka rilru buai nuai nuai leh hlauhthàwnna avànga chiai buai nuai chu tihharh tumin ka lu ka thing nak nak a, ka meng lui tlat bawk a.

"Nute, damdawi in lamah an kal chiah, Api chuan chanchin hrilh tùr chein min ti a, inah ka awm," a rawn ti leh țiau a, ka rin ai chuan a fel e, a hlauhthàwn dàn tùrzia chu...

"Ka rawn kal ve nghâl e, lo hlauthãwng miah suh," tiin ka hnèm ve a, kan inbiakna chu ka titàwp nghâl a, Chhani, ngaihțhat loh hmel taka min lo en rengtu hnênah chuan," Ka fanu motor-in a su tlat mai," tiin, Robert-a lam chu ka pan a, ka kut chu hûm ruhin," Boss, ka fanu motor-in a sû a, hmu tùrin ka kal nghâl thei ang em?" ka ti sap a, ka țah chhuah hawk mai ka hlauh avàngin ka hmui chu ka pet fan fan a.

"Chimchimtei maw?!! Khawiah? A va zia lo ve...A nat loh hrâm ka beisei, ka lo hruai ang che aw," a lo ti zung zung a, ani pawh chu ka thil hrilh chuan a țhâwng ve viau a ni chiang mai.

"Ka hre lo," ka ti sap ringawt. A nat dàn, khawiah nge a sut tih lam eng mah ka hre lo miau a ni, min rawn hrilhtunu lah hian a hriat chian ka ring miah lo bawk, keimah ang chiah hian hlauhthàwnna hlîrin a khat ve ngei dâwn si a. A na lo ang, a na thei lo, chu chu ka beiseina neihchhun a ni.

A scooty-a ka țhu pawh chu ka thâ a khùr nasa lutuk a, ka tlâk a hlau a ni ang," Ka kâwngah nghet thei ang berin min kuah tlat rawh aw," a ti a, tlàn pawh a tlãn chak lovin ka hria, khawi lai damdawi inah nge an kal tih pawh kha ka zâwt miah lo va, an hnaih ber tùra ka rin Civil lam kan pan risk tawp mai.

*******

"Engtin nge ani nèn chuan i chhuah duntîr theih a? Ka fanu chauh hi ka neihchhun a ni tawh asin," tiin ka nu chu ka àn khum tuar tuar a, khawiah nge kan awm tih lam ka ngaihtuah tawh lo, ka fanu chêtsualna avànga ka hlauhthàwnna kha thinrimnain a rawn thlâk a, ka nu thil sawi chuan min tithinrim lutuk a, khua ka hmu zo tawh lo a ni.

"Bawihi, ka thiam loh vek a ni, i pa chuan thiam lohna a nei hleinem," ka nu chuan a ti ve thung a, inthiam loh hmel tak hian a kawr thisen kai hniang chu a chelh khãwr țãt țãt a, kei erawh chuan thinrim zet hian," A tunu pawh a ni lo, ka fanu chauh a nih hi, kei pawh hi a fanu ka ni tawh lo, in ka chhuahsan ațang khân a fanu ka nihna a bo vek tawh!"ka ti leh tuar tuar a, ka țap lo, ka mittui erawh a tla, chu pawh chu thinrimna avàngin a ni.

"Bawihi, insûm teh, miin an hria ang e," ka nuin zawi sapa a tih leh chuan,"Ka insùm avàngin ka fanu chëtsualna chuan a țhat phah dâwn em ni? Mi zawng zawng hian hre vek rawh se, ka hua, ka hua a ni tawp mai," ka ti leh tàwn tâwn a, ka âng nasa bawk a, ka thaw kâwk kâwk mai. Ka thinrim bawk si, ka âng nasa bawk si a, ka lû pawh a hai vekin ka hria. Engtin nge ka fanu chu motor sut theih tùrin a chhuahpui theih? A pu nia a inngaih si chuan a tunu chu engtin nge amah maiin a kaltîr theih?

"Maria..?"

Ka hawi vat a, Sawmzuala, min ngaihtuah hmel taka min rawn pan ka hmuh chuan ka thinrimna chu lungchhiatnain a rawn thlâk a, min ngaihsakna mitmeng chuan ka rilru a rawn tino thar a, ka mittui a rawn tling nghâl kuang kuang bawk.

"Ka ngaihtuah lutuk che a," ti supin min rawn kuah nghâl vat a, kei pawhin nghet zetin ka lo kuah lêt ve bawk a, a âwm nghèng chuan insùmna nei lêk lo chuan chhuak zet hian țapin ka inhnît ta hlawp hlawp a, hei hi ka lo mamawh ber pawh a ni ngei ang. Ani lah chuan min kuah reng a, eng mah sawi lovin ka țah chhûng chu min kuah a, min hnem tum ve ang maiin ka hnung chu a kut chuan min chùlsak ve hlau hliau bawk a.

*******

Vànneihthlâk takin motor chuan a lo su na vak lo va, kâr hnih dâwn damdawi ina kan awm hnuah kan chhuak ve thei ta mai a, damdawi ina kan awm chhûngin ka unaute, ka țhiante leh thawhpuite pahnih leh Sawmzuala'n min ngaihvenin min awmpui reng a, kan chhuah hnuah pawh chuan in lamah min rawn tlawh ãwl lo mai, heti zât mai min lainata min ngaihtuahtu țhian țha leh laina ka nei hi ka lâwm hle a ni.

Ka pa chunga ka thinrimna chu nasa tak a ni, mi dangin engtin pawh min sawipui tum mah se ka ngaithla duh lo, Chimchimtei chu naupang chumchiap mai a la ni a, puitlingin a chhuahpui a nih chuan puitling chuan kawng tinrêngah a ngaihtuah tùr a ni tih chu ka thupui a ni tawp, insawi fiah tumna lam ka ngaithla peih lo. Chimchimtei an zai laia ka nuin ka pa nèn an chhuak dùn a ni tih a sawi khân ka ngaih dàn a dang nghâl vek, U Tluanga min neihtîr a tuma ka duh lohzia a hria a, Zorina a duh loh avànga amah ka ngainat lohzia leh ka huatzia kha ani pawhin a hre chiang ngei a, in ka chhuahsan hnuah tihian ka chunga phubâ a lâk theih nân ka fanu chu a chhuahpui a, a ngaihtuah lo lui ngat a ni tih a hriat reng, phubâ a la a nih hi.

Chutiang rilru ka put tlat avàng chuan damdawi ina rawn kan ve a tum pawh khân ka phal miah lo, a duh ang chiaha ka fanu chunga natna a thlentîr avàng hian ngaihdam ka tum lo, a hmel phei chu hmuhtîr ka tum tawh hauh lo. Kei min sawisak țhin kha a tâwk viau tawh, ka fanu hi chu naupang chunchiap, mi pawi pawh la sawi tham lo a nia, ka chunga a thinrimna ka fanu chunga a lantîr hi ka phal tawh ngai lo ang.

A nutei leh a putea'n an rawn ngaihven bawk a, an rawn tlawh fo mai. Tapuia phei chu Chimchimtei'n a ngaih zual avàngin a rawn riak leh reng tawh a, hun remchâng aawm hi chuan Tapuia pawh hian min titipui chu a duh țhìn tih ka hria; mahse, ka ngaihthlâksak duh ngai lo, thil dang ka sawi hnan daih zêl. A hnu deuhah phei chuan a beidawng ve pawh a ni maithei, chutiang lam hawi chu a sawi chhuak ta lo.

Chimchimtei vàng chuan dàwr pawh nghâk lovin thla khat zet chawlh ka lâk phah a, a inthlahrunawm viau nain tih vak ngaihna a awm chuang si lo. Ka thawhpuite pawhin ka dinhmun min hre thiam a, ka kal loh chhúng chu ka aiah Chhani nau tleirâwl tê chu awm mai mai ai tiin an lo chhawr a ni àwm e, a țha e, an tîr dàwr dáwr thei zâwk ang chu.

Sawmzuala'n min ngaihtuah êm êm a, ka rilru hahzia leh damdawi in chhûnga ka ànhlâ zawng zawng kha a hre bawk si a, a hman hrâm chuan rei lo tê pawh ni se min rawn tlawh țâwk țâwk ziah. Min ngaihtuahzia leh a buaizia ka hria, dàwr an hawn belh  avàngin a buai hlê a ni tih ka hria a; mahse, chuti chung pawh chuan buai a sawi ngai lo, a chungah hian ka lãwm takzet a ni, ni tinin ka duhna a zual zêl niin ka hria.

Zan khat a rawn lêng chu thla a êng nuam viau mai a, khua pawh a nuam tâwk chiah a ni. Tapuiate pathum chu pâwnah thla êng hnuaiah an țhu a, phone-ah hla play-in an lâm a, Chimchimtei pawh a phûr ber berah a țang leh tawh. Thlanglam bathlàr chhuahna kawngkapui, ka hawn zen zen loh chu hawngin zàn thla êng chu thlîrin kan ding dùn vang vang a.

"Engtikah nge kan inah in rawn insawn luh theih ang?" a tih chuan ka nui sak a, a kuta va vawnsak pah chuan,"I hmanhmawh thei vut vut êm mai a, kum a la țantìr êm hi maw," tiin ka nuih sak a, ani erawh chuan," Ka dinhmun hi min ngaihtuahpui ve la," a lo ti boh thung a.

"Ka ngaihtuahpui che alawm, kei pawh min ngaihtuahpui ve tho la," ka tih chuan," In khatah awm thuai ila, a fel vek mai ang, in hrana awm chuan tihtak zeta inngaihtuah a har bâkah eng emaw vènthàwn tùr a awm țhìn," a lo ti leh a.

Nupui atâna min duh thei hi a mak ka ti ngawt mai. Nuthlawi fa nei tawh lehnghâl, chutah, ka nungchang leh ka awm dàn, ka luhlulzia leh ka rilru chhûngril khâkzia pawh hre vektu a ni a, nuthlawi fa keng hi a chhûngte hian an duhpui theih ka ring lo, ani chu tlangvâl hnahkhat ngat a ni a, nula virgin ngat chhe lo tak tak a hmuh tam dâwn nèn...

"I chhûngte an zahawm e, keima lam ka inen lêt a, i tân ka tlin lohzia hlîr mai-" ka hmui a rawn hup vat a," Khatiang kha i rilru ațangin paih bo vat rawh, ka hriatah sawi lang tawh miah suh," a ti hmuk a, chutah, chiang fêa min rawn melhin,"I sawi lan leh vaih chuan..." a ti leh sup a, a sawi chhunzawm duh miah lo.

Inmelh reng chung chuan kan ngawi dùn vang vang a, chutah, amah vêk chuan," Chimchimtei chêtsual dàn tak kha vawiin chu i pa hnên ațangin ka hria a, a dik ngei pawh ka ring," a rawn ti chhuak ta daih a!

"Ka pa a ni lo!" ti hmakin ka hawi sawn ta nghâl a, ka taksa a insang mar nghâl at mai. Ani chuan min rawn hnaih nghâl zatin nghet zet hian min rawn kuah bet a, ka awm dàn chu a hria a nih ka ring, tàl chhuah ka tum pawh chuan a che sawn miah lo, a hma aia nghetin min kuah bet zui a.

"Ani dâwt thu sawi chu engah nge i lo lâk thutak viau?" tiin a bân chu ka sik vak a, a thaw hawk ringawt. Ani rilru țha tluangtlam lutuk hi chuan mi tu pawhin âwihawm takin thil thleng chu hrilh ta se a âwih vek ngei ang chu.

"Ni lo, Maria. Hetiang hian awm lo la ka duh a ni, i inhmeh lo bawk. Hmeichhe hmangaihna nasa tak nei leh nunnêm tak i ni a, khâkna thinlung put i tum tlat hi paih chhuahsak vek che ka duh ka tih tawh kha," tiin  ka dàr tawn tawnah chuan vuànin a lam hawiin min kuai her a, ka en duh lo lui tlat thung a.

"Min en teh," a tih pawh chuan ka en duh chuang lo, hnuailam ka bih ngar mai a, chutianga min țan lo zâwnga a țawng chuan ka rilru a tina tak zet a ni.

"Min en teh, Maria, khawngaihin, i fel kha," a ti leh a, kei chuan,"Ka fel lo, fel min ti suh," ka lo ti țhat a, ka en duh chuang lo, a lo nui hawk a, chu a nui hawk ri chuan ka thin a tirim thar leh ta tlat mai.

"Min nuihzat a ni maw? I duh tâwkin min nuihzat rawh! Min thlah nghe nghe teh," tiin ka tãl vak a; mahse, ka tâl chhuak thei chuang lo, ka thinrimna chuan ka mittui a rawn tihnai leh a, min duha min hmangaihtu nia ka hriat ve pawh hian min lo nuihzat mai mai a lo nih hi, kei aiin min hringtupa a la țan zui.

"Naupang chhe awmin awm i tum dâwn em ni?" a rawn tih leh chuan," I duh leh naupang chhia min ti rawh, pawi pawh ka ti lo, min kalsan nghe nghe teh," thinrim sehchilh nak chuan ka ti a, ka thin a rim alawm, rim tak a ni, tunah tak hi chuan min kalsan mah se pawh tihna ka nei lo, ka thu sawi aia min hringtupa thu sawi a âwih zâwk hian ka rilru a tina êm asin.

"Chutiang sawi suh, ka kalsan dâwn lo che," tiin a kut pakhat chuan ka khabeah rawn manin amah en thei tùr chuan min kuai dâk ta a, ka lo țang ve nasa mai; mahse, mipa thâ chu ka hneh teuh bîk lo. A rawn kûn hniam zui zat a, min rawn fawh a tum pawh chuan thlêk sawn ka tum a, mahse, a kut pahnih thâ a hmang leh tawh a, ka hneh lo, hneh lo angin ka awm na a; mahse, phubâ chu ka la ve ta tho, a leia ka sehsak hnuah a hmuiah ka sehsak leh, a khawi emaw zâwk zâwk chu a thî chiang tih pawh ka hria.

Chumi zàn ațang chuan ka hmu ta lo vang vang a, kâr khat deuhthaw hial a rawn lang ta lo. A ngai haw ve hle a nih dâwn hi, engah nge min tihthinrim teh ei ni? Ka ngai ru viau nain chhe tê pawhin tihlan ka tum lo, min rawn text lo va, min be lo bawk. Ani pawhin a thei a nih chuan ka thei ve lutuk, mut erawh a har deuh tih mai a ni. A peih chen chu han titauin han thinrim ve rawh se, kei pawh ka thin a rim ve tho. Tapuia lah chuan min zâwt ngam chiah si lo hian min melh ralh ralh a, ka hre lo der tlat. Min zâwt pawh ni se a chhan sawi dàn tùr ka hre teuh lo mai.

Zan khat erawh chu min zâwt ta hlawl mai a, ka hriat loh thuin ka chhâng ve mai a, chutah, titi zui zêlin Chimchimtei chêtsual dàn leh a pu inthiam lohzia leh hrehawm a tihzia chu muang ban deuh charh hian a sawi chho leh a, kei erawh ka lo ngawi hmak thung. Ka sawi ve duh lo, hei hi Sawmziala nèna kan buai chhohna bul ber kha a ni a, ka chhàn lêt ve leh hlauh chuan ka buai leh ang tih ka hlau a ni.

"U, thil kal tawh hi khawngaihin theihnghilh hrâm tawh teh, hun kal tawh hian a tihrehawm chein natna a pe reng zâwk che a ni, a hun lai khân hrehawm kan ti vek, tu mahin ka pa kha kan thiam lo, amah ngei pawh tún hnuah hian a inthiam lo rêng a ni; mahse, thil kal tawh a ni a, inchhìrin inthiam lo mah se a siam țha thei tawh lo, a siam țhat theih dàn bera a hriat angin, țha takin a nupui fanaute tân a nun a hmang chho ve mêk tawh a, a tunu chunga hetiang khawpa chhiaa awm duh tùr hian i ngai reng thei dâwn em ni? U, han ngaihtuah thui deuh teh, Chimchimtei hi a hmangaih ve êm zâwk asin, a tunu neihchhun a ni bawk a, khami ni pawh khân ka pa kha awm lo se chuan engtiang chiaha chêtsualna nasa nge thleng ang hriat a ni lo, tunah hian khami nîa thil thleng vang khân ka pa pawh natna khumah a awm mêk a ni. I huat tlatna hian ka pa rilru a tihrehawm êm êm a, kan chhûngkua pawh hlim kim thei lovin, rilru hrehawm takin kan awm mêk a nih hi tiraw?"a ti malh malh a.

"Eng nge natna khumah a awm ve ngawt a?" ngaihnêp hmel zet hian ka lo ti a, ani chuan a lu dawm vang vang pah hian,"Motor khân a lo su tel ve tho a; mahse, pâwn lamah eng mah a lang chhuak ve lo, nâ nei ang pawhin a insawi ve lo rêng a, Chimchimtei bâwihsâwmtuah a țang ta zâwk a ni; mahse, tûn hnu hian a ruh lamah dik tâwk lo a lo awm a, amah upa lam a ni ve tawh bawk nèn, a bawksawp ve ta chu a nih hi," a ti leh dap dap a. A thil sawi chu han âwih lo ringawt dáwn ila thil awm dàn dik tak ka hre hauh si lo, ni lo, ka ngaithla duh ngai lo a ni, vawi eng emaw zât min hrilh fiah an tum pawhin ka bengkhawn duh ngai lo a nih kha, thu dik tak chu eng nge ni ta ang? Ka ngaih dàna thu dik hi nge, Tapuia sawi zâwk hi?

Chhani'n chhùn chawlh dâwn laiin," Thil tui deuha an siamna ka hre thar a, ei tùr kan lam dâwn nia," a ti a, dàwrah ka kal ve leh thei tawh a, ka rilru tihharh nân dàwr nghah theih thuai kha ka nghâkhlel hlê a nih kha.

Kan tlân chhuak a, kan tlãn thui hrep lehnghâl a, Insomnia kan va thleng lo chauh a ni, a ho reuh tak tak!Hetianga thui kan tlãn dâwn tih chu hria ila chuan ka zui hauh lo ang maw le.

Scooty bulah chuan ka lo nghâk a, mi chàwl an awm ve nual avàngin ka lût ve duh lo a ni. Chutia ka din lai chuan ka tukkhum hi a za mar marin ka hria a, ka hawi lêt ta vat rêng a, ka mi va hmuh avàng erawh chuan ka hawi lêt leh rang khawp mai! Ka thin a rawn phu nghâl dawt dawt a, chutah, zawi muang chuan ka va en țha leh ngat a. Anni chuan min rawn hmu ve miah lo, Sawmzuala lah chuan a la nuih suk zui, min nuih suk țhin ang ngei khân, a nuihnu lah chu a chhe lo takzet, nuih lêt vein abeng bulah hian eng emaw hi a hrilh a, an inhnìm hnai khawp mai!

*A RAH I SENG NGAM LOH TÙR CHU NUAM TAK LEH HLIMAWM TAKIN LANG MAH SE, I INCHHÌRNA HUN A THLEN HMAIN  KALSAN NGAM RAWH*