☆LAIRIL LUAHTU☆ - 37 By Dingdi Pachuau

 ☆LAIRIL LUAHTU☆ - 37 By Dingdi Pachuau

Ka hawi sawn ta daih. Ka rilru a nâ em chu ka hre lo; mahse, ka thin zâwn hi a na vawng vawngin ka hre thung. Ka mi hmuh vàng hi a lo nih chiah hi a reh êm êm, chhan dang a awm thei lo. A rawn kal hnuhnun ber zàna a chunga ka thil tih vàng kha emaw ka lo ti char char a, hei vàng hi a lo nih chiah hi. Ni e, kei ve hi chu min duh tak tak teuh lo êm mai, duh tlâk lah ka ni hek lo.

Kan haw lamah chuan Chhani chu a titi barh barh a, kei erawh chu ka ngawi reng thung. A thil sawi pawh chu ka ngaithla mumal chuang lo, a la naupan ve deuh vàng hian a thil sawi hi a ho ve thei a, ngaihthlâk liam mai mai châng pawh ka ngah rêng a ni.

Ngaihtuah loh ka tum a; mahse, ka mitthlaah a rawn lang zél. Zorina hnuah mipa min duh êm êmtu nia ka hriat, kei pawhin duh loh ka duh viau laia ka duh ve leh tâk sî chuan min thlauhthla țan chu a ni leh ta, hlimna ka tawng ve leh țan a, dam chhûnga hun hman dunte hial kan sawi dùn țan tawh a nih kha; mahse, heti mai hi ka chan chu a ni leh ta.

A dam zâwnga ngaihtuah ka duh, chuti lo chu keimah ka intina thlàwn mai mai ang, amah dem zâwng phei chuan ngaihtuah ka duh lo bur. Nat loh ka duh chuan inthiar fihlîm hmasa tùr chu keimah ka ni alawm, engah nge na leh tùrin inlaichìnna ka siampui ni? Sawmzuala dem thei ka ni lo, ka thinchhia a, ka luhlul a, a duh dàn ang ni lovin ka nung a ni, min hnê tawh a, hlimna a zawng ve tho bawk a, kei hian ka tihlim zo tawh lo a nih chiah hi. A țha e, a țha vek mai, ka thinchhiatna leh luhlulna chuan a hnar ta chiah a ni e. A nupui tùr atân chuan ani pawhin a duhthusàm ngei tùr hmeichhe khawsak țha leh nungchang mawi, nula hnahkhat  ngat, a thin pawh tirim ve ngai lo leh a chhûngte nèna inngeih, hmeichhe fel leh zaidam ka duhpui, kei hi hêngah hi chuan ka tla vang vang chiang mai si a. Ka ngaihtuah cheuh cheuh hian ka zak thar, ka rilru pawh a na ngam lo zâwk a ni.  

Tatei'n min rawn bia a, Rempuia nèn an chanchin chu min rawn hrilh nghâl mawlh mawlh a, an ni ve tawh a, zan tin khêl lovin a lêng ziah niin Tapuia'n a sawi, a dik ngei pawhin ka ring. Ka lawmpui khawp mai, pasal mai ni lo ngaihzâwng atân pawh hian mi fel lo ai chuan mi fel leh puitling hi an țha daih zâwk si a, bâkah, Rempuia chu mi puitling leh mi vàntlâng chung lam daih a ni bawk a, Tatei chu vànnei ka ti khawp mai.

Chhani'n chhùna Sawmzuala lo kal ngai tawh loh avàng chuan a chanchin chu min zâwt a, chhàn ngaihna ka hriat loh avàng chuan dàwr thar lama an buai thu chu ka hrilh tawp, dâwt a ni chuang hleinem. Ani pawh chuan a lo âwih ve mai bawk a, min fiam zuiin," In inneih hunah chuan i buai ve viau dâwn a nih chu; mahse, pawisa a awm hi chuan buai pawh hi a zia viau mai zêl bawk a," tiin a nui hak hak a. Ka nui ve ringawt tho, thil awmzia chu hria se chuan hetiang hian min fiam àwm tawp si lo va.

Zànah Tapuia chuan Sawmzuala nèn kan inkâr chu min zâwt ve khut roh a, ani tân pawh hian min zawh hi a àwm viau tawh a ni. A inrawlh lo êm zâwk a, min zawh huna chhàn dàn tùr ka lo ngaihtuah lâwk diam tawh zâwk nghe nghe a; mahse, hetia min han zawh tâkah chuan han sawi nghâl zat chu a har duh khawp mai.

"Dàwr thar lamah an buai deuh a nih àwm hi, tûnlai tak phei hi chuan biak pawh kan inbe vak lo, a buai hlé a ni, a buai lai laia lo inrawlh ve chhên lah a ni mang si lo va," ka ti duah a, Tapuia mitah tak pawh ka en duh lo; mahse, a âwih ve mai bawk a niang, a sawi zawm ta bîk lo; mahse, a hnu deuhah erawh chuan," U, Chimchimtei tawhsual tawh palhna kha ka pa vàngah i la ngai reng em?" a rawn ti leh a, a thil min zawh avàng chuan ka che lai ka tàwp chat a, a lam ka en ta vat bawk a.

"I ngai tak tak lo tiraw? Chutiang khawpa sual chuan ka pa hi i puh thei lo ang tih ka hria a ni. Ka u i nia, ka hre chiang che a, chutiangin ka pa pawh ka hre chiang. A tunu neihchhun a duat êm êm chu engtin nge a tihnat duh tehlul ang? A zu ruih țhin lai kha chuan a rui sual nasa țhìn tih chu ka hre ve tho a; mahse, a ruih loh hnu hian khatiang kha a ni tawh lo. U, ka sawi hi a dik asin, i chunga a thil lo tih tawhah khân a inchhîr a, ngaihdam dìl che pawh a duh; mahse, hun i pe duh tlat lo va, hlim ang takin lang ve țhìn mah se a rilru chhûngril a inthiam thei lo tih ka hria a ni, khawngaihin, ka pa nèn in inkâr hi siam țha hrâm rawh aw, a ti theitu chu nangmah chauh i ni si a," a ti leh malh malh a.

He thu bawk hi, hei hi Sawmzuala pawhin a sawi chhuah avànga thinrim kha ka ni a, chumi rah kal zêl chu ka ti mai, hei tûn thlengin min la be lovin kan inah pawh a rawn lang lo ta a ni a, a chhuanlam tùr țha tak pawh chu a lo ni maithei tho a; mahse, min lo demin chhuanlam atân pawh hmang mah se a tidik miau dâwn a ni. 'Mahni hringtupa pawh ngaidam thei lo, be duh lo leh tlawh pawh tlawh duh lo' min ti ngei ang, chutiang chuan min sawi mah se  a dik alawm, ka tûn dinhmun dik tak a ni si a, insawi thiamna tùr ka nei lo.

Ka ngaihtuah zui zêl a, mut hmunah pawh muhìl thei lovin ka ngaihtuah a. Dik tak chuan he thil hi ngaihtuah ka duh lo asin, thil pawi tùr leh thleng tùr a thleng vek tawh, inchhìr avàngin koh kìr leh theih a ni tawh lo, ni e, ka hua alawm, ka be peih lo, a hmel pawh hmuh ka duh lo, thil hlui kha ka hre chhuak zêl tlat a ni.

Zîng khat chu eirawng ka bàwl laiin dawhkàna ka phone dah chu a rawn ri a, ka nu number a ni tih ka hriat chuan a rawn sawi tur chu rin dàn ka nei thiam nghâl mai a, ka han chhâng a; mahse, ka nu ni lovin ka pa zâwk a lo ni a!

"Bawihi, khawngaihin, vawiin chu Chimchimteite unau kha rawn lèntîr leh mai teh, i nu nèn kan ngai leh tawh êm mai, eng thil mah a thleng tawh lo ang, " a rawn ti dãt dãt a.

Ka pa a nih avàng chuan han sawi mai tùr ka hre tlat lo, bâkah, biak chu ka hreh ngawih ngawih si a, ka ngawi ta reng a, chutia ka ngawih tâk rengah chuan amah vêk chuan ban deuh charh hian,"I remti lo a nih chuan a pawi chuang lo ve, i nu nèn hian kan hmu châk leh tawh êm a ka han ti a nia," a ti leh dat a, chutah, sawi zawm lehin,"Hun kal tawh avàng khân min hua tih ka hria alawm, ka dem miah lo che, huat àwm ngawih ngawih ka ni; mahse, a pawi ka ti a, nangmah hringtupa ngèi che ni siin, i huat tùra ka lo awm kha pawi ka ti ngawih ngawih a ni tih tal hi chu i lo hre dâwn nia. Keimah avàng mai chuan i nu leh i unaute hi chu rawn tlawh hreh suh aw, an hmangaih êm êm che a, i tân thil țha ber ber duhin hlimna tinrêng nei tùrin an duhsak êm êm reng che a nia," a rawn ti leh a, a țawng thui ve bawk a, a hah deuh a niang, a ngawi ta rih a.

Nilêngin dàwr nghâk pah chuan ka pa min biakna chu ka ngaihtuah a, Tapuia pawh khân a inchhìr thu a sawi a nih kha, a aeka dam deuh thlap mai khân kan têt deuh laia min zilh țhin laia a țawng dàn kha min tihre chhuak a, kan têt deuh laia min duat theih țhin tehlul nèn khân, zu a in țhin ațang khân a dang ta vek a, kei pawhin ka hlauin ka ngei ta viau a nih kha; mahse, tunah chuan zu a in tawh lo va, a țawngka pawh a dang leh ta, bâkah, a inchhír a, ka chunga a chêt dànah a inchhîrin pawi a tih thu a sawi ve ta.

Ka ngaihtuah chhunzawm zêl a, kei pawh hi eng nge ka nih teh chiam le? Mahni pate haw êm êm mai, biak pawh be duh lo, biak chu sawi loh tlawh pawh tlawh duh lo ka ni a, eng ang fakauva mi țhaah nge ka lo inngaih a? Mahni hringtupa pawh ngaidam thei lo khawpa sâng maw? Ngaihdamna thinlung nei thei hauh lo hian Pathian hnênah țawngțaiin ka duh ka dîl a, țha ka inti ve êm êm a, ka nun hi țha tâwk intiin hun ka hmang a, kei ang mi hi an awm ve ang em? Hringtupa ngaidam thei lo, be duh lo, taksaa harsatna a tawh pawha kan duh miah lo ang hi, heti chung hian mamawh dîla țawngțai chu ka inthlahrung miah si lo chu a ni tak si a, eng angin nge Pathian pawh hian min ngaih ang le?

Tlaia ka haw chuan chutiang hlîr mai chu ka ngaihtuah a, chhûngrila țhatna nei miah lova a langa țha der mai ka lo ni tih ka inhre chhuak uar uar a ni. Sawmzuala pawhin min hre chiang lutuk a, min kalsan tâk hi, he rilru ka put chhûng hi chuan hetiang hi ka chan tùr chu a lo ni, engah nge thil țha chu ka chàn loh bîk ang, ka thinlung dik mawlh hek lo le, rilru ngaihtuahna zawng zawng hre vektu Pathianin min hmuh hmaih lo nasa mai si.

Tapuia lo riak pawh chu zîngkâra haw phal lovin tûkțhuan ei ve nghâl tùrin ka ti a, hmâ takah eirawng bâwlin kan ei a, Chimchimtei leh Siamtei chu insiamtîrin Tapuia ruala an ina lêng ve nghâl tùr chuan ka ti a, an han lãwm êm êm khawp lehnghâl a, an lèn lohna a rei tawh nèn, a àwm viau e.

Ka rilru ka siam fel tawh, ka tih tùr chu ka huphurh ru ve tho; mahse, ka ti ang, ka tih loh chuan engtikah nge hun țha ka neih tawh ang? Kan hmaa thil lo thleng tùr kan hre lâwk lo va, naktûkah, ni lo, vawiinah, tûn dârkârah pawh hian kan thi thut thei, kan chhûngkaw inkâr, kan pafa inkâr siam țha theitu chu keimah chauh hi ka ni.

Tlaia ka bàn chuan kan in lama haw lovin ka nute in lam panin ka kal ta nghâl a, kawng lakah chuan ka thil sawi dàn tùrte chu ka ngaihtuah a, ka huphurh lutuk chu ka han thaw leh hawk hawk a; mahse, dâwihzep hun a ni lo tih hriain ka infuih thar sauh sauh a, thu sawi tùr erawh ka ngaihtuah lâwk thiam lo, a tlachawpin sawi dàn tùr chu a lo awm ve mai ang chu maw.

Ka nuin min lo hmu hmasa ber a, min  lo en hâin," Rawn lam kher a ngai hleinem, Tapuia'n a rawn dah mai dâwn alawm," a lo ti a, kei chuan," A, rawn tlawh che u ka duh ve hrim hrim a," ka ti thung a, ani chuan," A țhat hlauh chu, chuti, dàwr ațangin i rawn tlang nghâl a ni àwm si a, i ril a țâm em?" a ti leh nghâl zat a.

Hawi kualin," Aw, thingpui a awm chuan," ka ti ve mai a, chutah," Khawnge an awm a?" ka ti leh zat a, ani chuan," A pu room-ah an awmpui a nih kha," a lo ti mai a.

Thingpui a siam lai chuan," Ka pa chu eng nge a an rêng rêng ? A eng lai nge nâ a?" tiin ka zâwt a, min rawn en deuh hâ a ni tih ka hre reng; mahse, ka en duh lo ve tlat thung a, mak a ti dâwn tih ka hre sa ve tlat a ni.

"A kâwng lam ni berin ka hria; mahse, a na lutuk lo nain sciatica-in a chhunzawm nghâl ni berin ka hria," a tih chuan," A nih chu," ka lo ti sap a, thingpui min rawn pêk chuan tho vatin," Ka'n lût ve chhin ang e," tiin thingpui no chawi chung chuan ka nute room lam chu ka pan ve ta nghâl a.

*******

Tunah chuan ka rilru pawh a zãng ta hawk mai. Hetiang hi a ni dáwn tih chu hria ila chuan a hma thei ang ber khân ka pa bulah khân ka kal tawh tùr hi a ni a... Mahse, ka tlãi chhe chuang hleinem, hlimna tak tak kan nei leh tawh tho a, a țha vek tawh e. 

Hlim takin ka chhûngte nèn  hun hmang mah ila, Sawmzuala ka theihnghilh ngai lo. Ka ngai viau nain ka sawi chhuak ngai lo thung. A chanchin hre ngai lo mah ila an tân ka țawngțaisak ve țhin, a pi leh pute pawh kha an tar ve tawh sia, a ngaihtuah thei hle si a, damna țha tak an neih ka duhsakpui a ni. Nupui țha tak nei se, a pi leh pu leh a nu ngei pawh hmangaih taka enkawlpui tùr leh fa duhawm tak tak hrinsaktu tùr hmeichhe fel tak leh a hmangaih êm êm, ani'n a hmangaih tluk zeta hmangaih lêttu nupui nei se ka duh. Kei chu tihian ka fanu tân ka nung chho tawh ang a, amah bâk hi enkawl tùr ka nei tawh chuang lo a, ka chan tâwkah hian lungâwi taka awm mai ka tum tawh ang.

Ni tin deuhthawa ka nute in lama tãl an ni bawk a, an inngaina tawhin ka nu leh pate'n Chimchimtei an duatzia chu ka hmu chiang sâwt ta khawp mai, ka pa pawh chu ziaawm lam pan êm êm rih lo mah se a rilru hlimna chuan tam takin a natna chu a chhâwk tih ka hria a, chuvàng chuan ni tin deuhthaw Chimchimteite unau lèn pawh chu ka remtihsak a, Chimchimtei phei chuan nuam hi a ti zual khawp mai a, zàna riah hial a ngèn țhìn, chu êm zawng ka phalsak lo.

"Ka zâwt ngai miah lo che a, Sawmzuala nèn in la tluang zêl em? A buai ve hmel nasa mai si a, a rawn lêng meuh thei rih lo ang a?" Tatei'n a tih chuan," Um..lêng meuh lo," ti ringawtin ka lo chhâng a, en pawh en duh lo chuan ka chawhmeh siam tùr chu ka khawih daih a.

Chutah," Rempuia chu a lo la lêng ngun em?" tiin ka zawh chhunzawm ta daih a, ani pawh chuan zêp lêm lo chuan," Aw, lêng ngun e, inneih lamte a sawi ri vuai vuai tawh maw le! Hahthlâk hian a," a lo ti ve mai a.

"In va inzui rei àwm lo ve..." ka tih chuan," Ni e, ka hnial a, ani lah chuan,' Innei tùr hian inzui rei kher a ngai hleinem,' a ti tlat a," a lo ti leh a, chutah, min rawn enin," Sawmzuala'n kan tihkhalh a hlau si a, a hun  leh nî tùr a sawipui tawh che em ni?" tiin min rawn zâwt ta khauh mai!  Hei zet chuh, namnùl mai mai a har hmel, kan chanchin engkim ka hrilh mai a ngaih hmel ta.

"Kan inbe tawh ngai lo, a lo lêng ngai tawh lo bawk," ka ti ta nge nge a, țawng lo chuan min rawn en  reng a, kei erawh chu nui sakin,"Hmeichhe dang a hmu a nih ka ring, bâkah, kei chu tih tak tak tlâk ka ni hleinem, ka nihna zawng zawng i hre ve vek bawk a. Ka hre thiam lutuk, demna pakhat mah ka nei lo. A, sawi lo teh ang," tiin Alu chu sil tumin tui awmna lam chu ka pan ta nghâl a.

"Eng maw?! Hmeichhe dang a!!" tiin, rawn tho ve nghâlin ka bulah chuan a rawn kal hnai a, kei erawh chuan,"Duh tâwk ang, awmzia a awm chuang lo, hetia awm hi a țha. In bulah ka hlim êm êm tawh a, pasal țha tak i nei ang a, Tapuia'n nupui țha tak a nei bawk ang a, keiin fanu enkawla ngaihtuah tùr ka nei tawh bawk a, eng dang mah ka mamawh tawh lo ve," ka lo ti duah a. Ka rilru tak tak a ni ka sawi ni, ka pa nèn kan inkâr a țha tawh bawk a, enghelh ka nei tawh lo. Mipa avànga hlimna neih leh kher kha țûl ka ti tawh lo, ka chhûngte leh ka fanute hian min kalsan ve ngai lo ang, hei hi ka hlimna tak tak tùr chu a ni.

"A awmzia hre tùrin i be chhin rêng rêng em? Sawmzuala chu a reh vang vang chhan zâwtin i be miah lo em ni?" a ti leh a, lu thing deuh nar nar pah hian," Zâwt lo, a țûl lêm lo bawk. Min kalsan tùrin zalènna a nei a, min ning tawh a nih loh pawhin min duh tawh lo tihna a ni mai a, han biak a țùlna chhan ka hre lo," ka lo ti leh a.

"Eng emaw harsatna a nei pawh a ni thei a, be chhin hrim hrim la?" a ti leh țâlh a, kei erawh chuan," A dik tho mai, harsatna a neih chuan phone pawhin thil awmzia min hrilh ve mai tùrah ka ngai, tunah chuan hun a lo liam tam ve ta deuh bawk nèn, a rei ve tawh êm mai, hmeichhe dang a neih vànga harsatna a neih phei chuan, a tihchi loh tawp ang," ka ti leh tlat thung a.

"A awmzia ka va hre thiam lo tak! Ka lo zâwt chhin-" a sawi lai mêk chuan," Ni lo ve, zawh chhin a ngai miah lo, a tlàwmthlâk lutuk dâwn asin, zâwt miah suh," ka lo ti vat a.

Inrinni tlãia Mami'n a birthday chawhlui a buatsaih chu ei ve ngei tùra min tih avàng chuan dàwr ațangin ka tlang nghâl a, ka fate pahnih chu ka nute in lamah an awm leh tawh a, zanriah ei khamah Tapuia'n a rawn dah leh mai dâwn a ni.

Mami chuan ţhiante a lo lam kim ve khawp mai a, a nulât tàwp berna hun a nih a rin tawh vàngin a lo làwm  hi a lo ni a, kan nuihpui tak vak vak a, ani lah chuan," Ka ti tak tak nge ti tak tak lo chu in hre mai ang, nakkum lamah chuan ka puar luah tawh maithei a ni," tiin a nui tak ang awr awr a, mi dang chuan," A nih loh vaih, kan lo chhinchhiah kar dâwn a nia," an lo ti a, kei chuan,"A nih loh pawhin tlangvâl senior kan neih luihtîr tho ang,"ka lo ti ve a, Mami chuan," I neih tawh bîk vàng maiin min hmusit miah suh, ka nei ve dâwn tho, in tawn ang chu ka tawngin ka hre ve vek dâwn," tiin min fiam lêt a. Mi dang pawh chu an lo inrawlh ve leh nghâl vat a, kan nui leh uar uar mai, keini țhianzaho hi chu kan bengchheng ve thei êm asin, tunah phei hi chuan nula senior lam deuh hlawm niin, mahni tâwka inchãwm thei/hlawh nei an ni fur tawh lehnghâl a, an tawrhhlelhawm a nia.

Kei chu ka dinhmun hre thiamin ka haw hma min phalsak a, ka rilru a hmanhmawh ru riau tawh, Tapuia'n a lo thlah haw hman tawh ang tih ka hlau khawp mai, min hmuh loh chuan an lo hre thiam lo palh ang. Step ațanga kan in lam ka hawi thlâk chuan kan in kawt chu a lo la êng lo tih ka zu hmu a, an lo la haw bîk lo a ni ngei ang, ka thaw huai a, a zia e.

Ka thleng thla, in hawnna tùr chabi dapa ka bag ka dap rak rak lai chuan," Khawiah nge i kal daih a?" tih ri ka hriat avàng chuan ka phu zawk a, ka âwm dawm vatin ka maimichhîng vang vang a.

Chutah," Eng nge hetah i tih a?" tiin ka bag chu ka zen țha leh a, chabi chu la chhuakin kawngkachu ka hawng a, chutih chhûng zawng chuan ka en duh miah lo va. In chhûnga ka luh chuan min rawn zui lût ve nghâl a, light chu ka on ta vek a, tunah chuan hmuh loh pawh tum mah ila a theih tawh loh. Țha takin ka bia ang, inlêng pângngai ang chiahin, ka rilru ka tilang miah tùr a ni lo.

"Lo țhu la? I lo awmna a rei tawh em? Thingpui ka'n chhuang nghâl ang e," ka ti nghâl sawk sawk a, ka bag pawh dah lo chuan gas chu on-in  thingpui no khat chu ka chhuang ta nghâl a.

"I lo dam țha maw? Khawiah maw i kal a?" a ti leh a, ka va en zawk lai chuan țhu chung chuan min lo en reng a, nui deuh sak chung chuan," Mami birthday lawmnaah ka kal ve lawk maw le. I chhûngte an dam zâwk em?" tiin hawihhâwm thei ang berin ka zâwt lêt ve a.

"Ka nu a dam țha meuh lo; mahse, a zia chho zêl tùrah ka ngai, engati nge min rawn biak ngai loh?" a rawn tih chuan ka en leh a, mit khap lo hian min lo la en ngur reng a.

"A pawi ka ti hle mai, i nu dam lo chu, eng nâ nge ni?" ka ti a, a nu dam lo ka lo hre hauh lo chu tlêm chuan nuam ka ti lo, a dam lo viau pawh a ni thei si a; mahse, nia, ka thiam loh a nia, a bulpui ber chu keimah ka ni, be ngam lova ka awm chhan pawh a bul tumtu ber chu keimah tho.

"Cancer a nia."

"Oh...!!!A ni maw? A zia lo hle mai," ka tih lai chuan ani chuan," A țan tìr chauh a la nia, a țha leh mai ang," a lo ti sup a, kei pawh chuan," Ka beisei," ka lo ti ve leh sap a.

Țawng tawh rih lo chuan thingpui ka lum chu siamin ka va pe a, ka pe zo chiah chu," Engati nge chanchin hre tùr pawhin min rawn biak ngai loh?" a lo ti leh a, ka ding lài hû mai. Chhàn dàn tùr lah chu ka hre lo nasa, ka ngaihtuah leh rih a.

"I buai a nih ka ring a," ka ti thla rawk mai, "Kan inhmuh hnuhnun ber zàna i chunga ka thil tih avàng khân i thinrim a nih ka ring a," ka ti ngam dèr lo. Teuh lo mai! Ka zak.

"Buai mah ila..."

"I buai laiin biak buai che ka duh lo alawm," ka ti ve thung a, thinrim ka tum lo, thinrimna chhan tùr lah ka nei hek lo, ka thiam loh a ni ka tih tawh kha.

"Ka buai lai pawhin, ka nu entîra hmun hla taka ka awm lai pawhin min rawn biak hun ka chãng țhìn a, chàn chhuah i har khawp mai."

A nu chungchâng a rawn sawi chhuah chuan ka inthiam lo leh nghâl zat.

*"A SMART" HAN TIH HIAN PÂWNLAM INTHUAMNA FEL FAI RINGAWT SAWINA NI LOVIN MAHNI THAWH CHHUAH LEH FINNA MILA  ZAHAWM TAKA KHAWSA SAWINA A KÂWK ZÂWK E*