☆LAIRIL LUAHTU☆ - 38 + Bonus By Dingdi Pachuau

 ☆LAIRIL LUAHTU☆ - 38 By Dingdi Pachuau

"A zia lo takzet a ni, a dam lo tih ka lo hre miah lo va," ka ti leh niah niah a, ka inthiam lo tak tak a ni. Hria ila chuan biak pawh ka be ngei ang, Sawmzuala nèna kan inkâr dah țhain an inah pawh ka kan hial maithei a ni.

"Ka ngai che a nia aw..." 

Haha...min ngai tak tak teuh lo mai. Ni lo, min ngai ve tho maithei, khati chen kha kan inkawpin ni tin deuhthaw kan inhmu a nia, kei pawhin ka ngai alawm, ka mitthlaa thil rawn lang avàng chuan ka thil ngaihtuah chu duh lovin ka lu ka thing deuh nak a.

"I nu chu tunah inah a awm em?" tiin ka záwt ta daih a, kan inkâr hi chu sawi chhuah ka duh lo, kan pahnih hian hmalam hun kan nei thei tak tak lo ang, a tân ka tling lo, chu chu ka hre reng tùr a ni.

"Aw, lo kan ngei chu i bâ a nia," a tih chuan," Teh rêng mai, ka hman hmasak berah ka lo kan ngei ngei ang," ka lo ti vat a, ka pa dam loh laia min buaipui nasatzia kha, tûnah hian khâng kha ka rulh lêt ve ngei a ngai alawm, a bata ka bat a ni.

"Kan thleng ta," tia țawng rî ka hriat rual chuan ka hawi chhuak nghâl vat a, kawngkaa Tapuiate pathum rawn lût ka hmuh chuan ka thaw nghâl huai mai, Sawmzuala nèn chauha awm chu a nuam ka ti lo.

Tapuia leh Sawmzuala chu an inbe ve nghâl mai a, keiin ka fate pahnih chu an chanchin lo zâwtin an chaw ei an puar leh puar lohte chu ka lo zâwt thung a, Chimchimtei lah chuan," Puar lutuk! Àpuin artui tam tâwk min chhumsak a, chuan, naute angin chawte min barh a," a ti lar lar a, nuam a ti viau a ni tih a sawi dàn ațang chuan a hriat theih mai, a hmel en kher pawh a ngai lo.

"A nuam àwm bîk e, artui chu Lal-û i pe ve țeuh em?" ka tih leh chuan," Pe țeuh e, putea pawh ka pe a, Âtei(Tatei a kohna) leh Àpi leh Àpu pawh ka pe ve a," a ti leh a, a sawi dàn diat diat chuan ka nuih a tiza deuh a, zâwt zawm lehin," A nih, artui chu eng zâta tam nge Àpu chuan a chhumsak che?" ka ti leh a.

A kutțang tipharh țhà țhâ pah chuan a en a, a chhiar ve a niang," A vaiin pathum a nia, a tam lutuk!" a tih chuan ka nuih var var a, "Naupang rilru tak hi chu aw..." tia ka ngaihtuah lai chuan Sawmzuala thil sawi chuan ka beng a rawn verh ta zar a.

"...rei vak lo, kan chhuk thla vat a, vànneihthlâk takin a lo la nasa lo va, haw chhoh leh rih ai chuan tiin ka zu awmpui ta reng a, hmunpui lam nge nge chuan a ngaihna an hriat bâkah an thiam a, khâwl an nei țha bawk a, enkawlna pawh a lo țha nge nge e," a ti malh malh a.

Tapuia chuan," A lo nih tak chu, a bengvàr loh theih ngei mai, i nu chu țhain i rawn hawpui ang chu maw?" a ti leh a, ani pawh chuan," Aw, a zia chho zêl tùrah ka ngai, nakin deuhah checkup tùrin kalpui leh a ngai ang chu," a lo ti leh a.

Sawmzuala thil sawi chu ka âwihsak tho a, ka âwih vek kher lo. Chhani nèn ei tùr kan lam laia ka hmuh kha amah hi a ni tih ka hre chiang a, a nu chu a zu awmpui tho ang; mahse, a rawn lèn loh chhan leh a bula ka hmuh hmeichhia nèn an inkawp thup nân khuta zu awm reng angin a insawi mai a ni.

Kan pahnih chauha titina hun kan nei ta lo bawk a, a lêng rei lo. A haw hnu chuan ka thâwl deuh huaiin ka hria, a awm lai kha chuan awm nuam takin ka awm thei lo, amah ka duhna kha a la nêp ve si lo va; mahse, thil awm dàn leh thil țha ber tùr ka ngaihtuahin hetia tàwp mai hi țha ka ti a ni.

Tatei'n min rawn bia a, Sawmzuala chanchin ka hriat leh hriat loh min rawn zâwt a ni. Kei pawh chuan thu dik tak chu ka hrilh ve mai a, ani pawh chuan," A zia lo ngawt mai, kan te pawh kan kan ve ang chu tiraw?"a rawn ti a, kei chuan," A bata ka bat a nia, ngei ngei a ngai, i hman hmasak berah min rawn sâwm la?" ka ti nghâl zaih a.

Kan han kan ta ngei a, ka rin aiin a lo țha daih mai. Khumah a mut reng ka rin tehlul nèn, a lo ni miah lo! Sitting room-ah a lo țhu a, a lo titi ve tho. Sawmzuala khân a țantìr chauh ni khân a sawi bawk a, a dam thuai dâwn hi, an hre chhuak hma hlauh a, a vànneihthlâk khawp mai. Lêng pawh an lo awm ve nual, in chhûnga chetu ber a ni a, tunah chuan a che thei ta rih si lo va, awmpui nula an neih phah a nih hmel, hmel thar ka hmu tlat.

Thupháte chu kan han chawi hmasa luam a, ani lah chuan nui sâng chung hian," Mai mai a, in lo lang a, a làwmawm lutuk! In buai àwm tehlul nèn," a lo ti a, a dam loh hmaa a awka dam diai ang tho khãn a aw chu a la dam; mahse, tlêm chuan a zàwi ta deuhin ka hria.

Kan haw dâwnah Sawmzuala a rawn thleng ve chiah a, ka lo en chiang bawk a, ka hmu chiang khawp mai, mi dang chu an țawng avàngin an lo hmu ve kher lo ang chu. An rawn chhuah hma chuan Sawmzuala chuan a bula țhu biangah chuan nui chung hian a piaisak a, car ațanga a rawn chhuah rual chuan passenger seat ațang chuan nula chhe lo deuh, a hmaa amah nèna ka hmuh dun tho kha biang tuai nauh nauh chungin a rawn chhuak ve zân zân a, lungawi loh hmel, titau hmel deuh hian Sawmzuala lam chu a melh bawk,  a chhiat lohzia roh chu, tunah phei chuan a hma ai khân a chhe lo zual, cotton kamis vâr leh jeans kekawr pawdal lam deuh hi a ha a, sandal bunin a kețhiah mawi leh no zet chu a lang chiang ngang mai, ka rin aiin ka lo chîk, ka duh lo ru kher mai.

"In lo lêng a ni maw? In va fel ve!" tia Sawmzuala a rawn țawng chuan ka chhâng lo va, Tatei chuan," Kan fel har deuh chu a ni tiraw?" tiin a nui deuh a, chutah," Kan lènna a rei deuh tawh a, kan haw tawh mai ang," a ti leh a, Sawmzuala chuan," A va mak dáwn ve! Kan rawn thleng ve chauh sia," a tih chuan," Ni dangah kan rawn kan leh zâwk dâwn nia, ka hmuh tum aiin ka hmu țha lehnghâl a, a tihzia khawp mai," ka lo ti vat a.

Haw kawngah chuan Tatei chuan," A rawn hawpui kha tu nge i hria em?" tiin min záwt a, kei chuan," Aih, hre miah lo," ka lo ti vat a, ani chuan," A chhe lo reuh khawp mai, a nu enkawl tùra nurse a chhawr a nih ka ring," a lo ti leh mai a. Kei erawh chuan ka ring lêm lo, nih pawh chu a lo ni thei tho a; mahse, nurse a nih pawhin a bialnu a nih tel ka ring tho. E, a ni thei khawp ang, a chhiat loh bâkah a nu enkawltu atân chuan a remchâng dâwn bawk a.

*******

"Thil dik lo a awm a ni tiraw? Eng thil nge thleng?"

Ni e, a sawi chhuak ta sa sa bawk a, zanin chu sawi fel teh ang, kan pahnih tân pawh a țha zâwk ang, a tân pawh min kawp chuan a buaithlâk mai mai, nge ka hriat ring lovin hetia min kawp mai mai hi a tum ni zâwk ang?

"Kan inkâr hi titàwp ang."

Min rawn melh nghâl hau a, a mitmeng ațang erawh chuan a ngaihtuahna tùr àwm ka chhiar ve thiam lo, makti hmel chu a pu ang ka ti deuh a; mahse, hei hi a lo rin lâwk sa a lo ni thei a, lemchanna a ni thei tho bawk.

"Eng vàngin maw?" a rawn ti ta chiah a, kei chuan,"Ka piangthar tawh a," tiin ka lo chhâng thung. A hre thiam chiah lo maithei; mahse, ka sawi nghâl dawt bîk rih lo ang.

"I pa nèn in inkâr i sawina a nih chuan ka lawmpui che; mahse, eng vànga kan inkâr tihtàwp rawt nge i nih? Ka awm loh chhûng khân eng thil nge thleng a? Mipa dang i lo hmu  tih chu min hrilh miah suh," a rawn tih chuan ka hawi sawn ta daih. Ka pa nèn kan inkâr fel ta chu tuin nge hrilh ang? E, hrilh ngai kher lovin Chimchimteite ațang khân a ngaihruat thiam ve mai ang chu maw le. Mipa dang hmua min ngai thei erawh chu mak ka ti hle mai, amah zâwk hian hmeichhe dang a hmu zâwk a ni reng si a.

"I tân leh i chhûngte tân nula fel tak nei rawh, ka ngaihtuah-" ka tih lai mêk chuan,"Eng vànga hetia awm hi nge i nih? Hmun danga ka kal hma kha chuan hetiang hian i awm loh kha, eng thil nge thleng min hrilh rawh, engati nge i hel tâk tlat?" tiin min rawn țhut hnaih sauh a, kei erawh ka lo tawlh hla sauh thung.

"Ka piangthar tawh ka tih kha," ka tih chuan,"I pianthar avàng chuan min thlauhthlâk i tum tihna maw? Piantharna țha lo tak a nih chu," a lo ti hmuk a, sawi tùr a vâng leh ta ruih mai. "Hmeichhe dang nèn ka hmu che u," han tih teh ngawt lah chu ințhen phah nân chuan ho a lo tiin a lo la lâp viau ang tih ka hlau deuh bawk si.

"Hetia tàwp hi kan tâna țha ber tùr a nih ka ring," ka tih leh chuan," Chhan țha tak vàng chauhin min țhen rawh, mipa dang an awm a ni tiraw? An awm chuan ka inrawlh buai lo ang," a lo ti leh hmak mai. Dâwt sawiin," Aw, awm e," han tih ringawt lah chu a dik meuh si lo; mahse, tûn hi kan inkâr tihtàwpna hun țha ber niin ka hre bawk si. 

"Tu mah ka nei lo; mahse, ințhen ang," ka ti sap. Tu mah ka nei ve lo; mahse, amah hian a nei si a ni, a zêp theih chhûng chu duh leh zêp se, sawi chhuahsak kher ngai ka ti lêm lo ve.

"Mipa dang an awm loh chuan ka țhen dâwn lo che," a ti hmak a, chutah, min rawn hnaih thutin min rawn kuah bet a, ka lo inring lo nasa mai si a, na zeta min rawn fawh tâkah chuan a âwmah chuan ka nam vak a, ani pawh chuan ka chêt dàn chu a rin dàn a ni lo a ni ang, ka nam sawn ve dáwrh thei tlat nia.

"Hetiang hian awm suh, pakhat tân chauh rinawm ta che!" ka ti ta vak a, ka insûm hman lo, ka inseh ruh vak bawk a.

A tûk zànah chuan a rawn lêng ta miah lo, khatianga hmeichhia zâwkin ka han ti ta mai kha chu tlàwmthlâk a ti ve ngang a ni ang; mahse, ka thlah zalèn a ngai miau si alawm le. Ințhen vang vang tawh tùra ka han indah chuan hrehawm chu ka ti ve khawp mai, ka la inrin loh lai taka ka duh leh tâk si kha a ni si a, ka rin aia nasain ka la duh zui.

Tatei'n,"U, Sawmzuala nu kan kan dun țuma a rawn hawpuinu kha a nau alawm lo ni! A pa nupui thar lama a nau, vawiinah ka va hre chiah alawm, ka va kan leh a, a lo awm ve a, a fel reuhzia chu a," a rawn tih chuan sawi tùr ka hre miah lo, ka kuttin ka seh nauh nauh ringawt!  A nau a lo nih chu! A nau, a bialnu thar emaw ka lo tih chu a nau maw lo ni! 

A pawi lo, thil thleng tùr a thleng tawh a, hei hi kan pahnih tâna țha tùr a ni ang, ani tân chuan ka hniam êm mai, kan heti ta sa sa, nula class leh smart tak, a level-pui nei mawlh teh se, ka duhsak e. Kei chuan fanu ka nei a, ka dam chhûnga ka enkawl tùr leh min enkawltu tùr, thil dangah ka inham buai tawh lo ang.

Kâr khat zet a rawn lêng ta lo. A hma ai khân ka ngai daih nia, ka rilru nêpzia hi, ințhen tak tak chiah hian rilru hi a lo chhel lo a lo nih hi, ka tum ve viau a nia; mahse, zànah ka mut tlèm phah a, ka rilru a hlim loh phah viau bawk, a langah erawh hlim hmel puin ka rilru chhûngril hlim lohna chu ka thup hrâm hrâm.

Chhùn chawlh dâwnah dàwrah a rawn lang leh hlawl mai. Ka lo chîk ve deuh bawk a, a nu a enkawlna lamah a meng rim a niang, a mit pahnih hnuaiah val lian tak pahnih a phei ruih mai, a țha chho zêlin ka lo ring asin le.

"Vawiin chu in țhiannu hi ka lo hruai chhuak leh lawk ang e," tiin Robert-a leh Chhani chu a en tawn a, a nuih suk bawk a, Chhani chuan,"E, hruai mawlh teh, hruai harh a mamawh nasa a nia," nui chung hian a lo ti a, Robert-a pawh chuan,"Hruai bo erawh kan phal lo a nia, rawn thlen leh thlap la aw," tiin a lo chhâng ve a, kei erawh chuan hnial ka duh khawp mai; mahse, kan chanchin eng mah ka la la hrilh hauh si lo va, an hriat laia han inhnialpui lah chu ka duh hauh si lo.

"Khawiah nge min hruai dâwn?" motor-a kan țhut luh hnu chuan ka ti ta chauh a, ani lah chu a ngawi ngur a, a hmel ka en chuan hmânlai kha ka hre chhuak, nger ngur hianin, a ngêng leh tawh!

"Mawh, khawnge kan kal dâwn?" Min la chhâng chuang lo.

Insomnia lamah pawh min hruai lo, an in lam panin min tlànpui a, biak awmzia a awm loh avàng chuan be tawh lovin sîr lam chu ka hawi a, nakina min biak hunah ka țawng duh bîk hauh lo ang tiin ka ngaihtuah nap nap a. Motor a din tâkah chuan ka hawi chhuak a, an inah min hruai niin, an kawtah kan lo ding tawh!

"Lo chhuak rawh." Ka chhuak duh lawk bîk lo va; mahse, kawngka hawnga ka kut a rawn chelh tâkah chuan ka chhuak ve ta chauh a, ka tãl deuh nain min chelh nghet lutuk a, mi dang hmuh laia hmuhnawm siam ka duh loh avàngin ka tâl chhunzawm ta lo mai a ni, kawngka a inhawng reng a, min rawn hmu thei tlat si a.

"Min lo hre thiam ula, thil pawimawh sawipui lawk tùr ka nei a, ka room lamah ka chhohpui lawk ang e," tiin a pi chu a hrilh zauh a, mi dang lo țhu vete pawh chu a bûk khum zauh zauh a, kei pawh chuan zah avànga bîng deuh mum mum chung chuan ka zui chho ve zél a, ka biang sat hat hat dànah chuan a sen nasa ang tih ka hre thiam mai bawk a.

Room kan luh veleh kawng khãrin a kalh nghâl rak mai a, min tihlauthâwng viau nain hlau ang chuan ka awm duh bîk lo. Bang bula ka ding chu min rawn hmachhawnin kan indinchilh ràn mai.

"Mipa dang i nei lo va, hmeichhe dang ka nei lo va, eng nge kan inkâr tihtàwp i duh chhan dik tak hi min hrilh rawh le?" tia min zâwtin ngun zet hian min rawn melh chhuk ngur a. 

"Sawi kher a ngai tawh hleinem," ka lo ti sap a, ka zàm avàng chuan ka kut a thlan dep dep nghâlin ka hria. Ka rinhlelhna chhan ber, ka țhen chhan ber kha a nau a ni tih ka hre chhuak leh ta bawk si a; mahse, sawi lan erawh ka tum hauh lo.

"Ka nu vànga ka lo lèn theih loh vàng leh ka lo biak loh che vàng kha a nih chuan, min ngaidam rawh, ka reh ta thut kha, chanchin ngaihvena min rawn biak ve ka ring a, ka phût ve bawk che a, i lakah ka pangchang a nih ber chu, hetiang thil hi a her chhuahpui ang tih chu hria ila chuan ka rawn be chiang khawp ang che."

Pangchang maw? Ka lakah a pangchang ve maw?! Engtin nge kei hian ka lo hriat ve si loh?  Ka la ringhlel záwk zui lehnghâl.

"Ka lo hre miah lo," ka ti chhuak sap a, amah ka hrilh pawh a ni chiah lo, ka phun chhuak mai mai ni berin ka hria. Ani chuan a lo hre nasa," Ka hrilh lo che a, i hre miah lo ang, ka thiam loh a ni, a thleng nawn tawh miah lo ang," ti lehin min rawn din hnaih a," Kan inkâr hi kei chuan ka titàwp ve thei lo, ka phal lo, nang chauh hi ka hmeichhe duh chhun leh ka hmangaih neihchhun i ni si a," ti supin ka dàr tawn tawnah chuan a rawn chelh a, kei erawh chuan a thil sawi ring lo deuh, ring duh deuh tho bawk si hian ka lo melh chho ve hau a.

"Ka hmangaih che, Maria, chuvàng tak chuan kaltîr che hi ka thei ve lo, ka tih theih ngai loh tùr a ni, kaltîr tùr chein min ti thei bîk lo ang," ati leh sup sup a, ka thinlung làwmna avànga su dup sup mai chu dawmin țawng ve zai rêng ka rêl lo, a thil sawi chuan min hneh lutuk si a.

"Kan inkâr tihtàwp i duh loh thu han sawi ve teh," a tih leh chuan muangchâng hian," Ka duh lo, ințhen ka duh lo," ka lo ti ve mai bawk a, a mitmenga min hmangaihna lang chhuak chuan min hneh lutuk a, min thunun vek ni berin ka hria.

Rawn kûn hniamin min fâwp zui zat a, kei pawhin ka lo hnial lo chiang, kan inhmuh loh chhûng leh ka țhen tum vena boruak paih bo țhak thei tùr khawpa duhãm chuan kan infâwp mawlh mawlh a.

"Palai ka rawn tîr nghâl dâwn, min dang thei lo ang," a ti leh sup a, chutah, thaw hawkin," Tunah la la hian neih nghâl mai che ka duh hial a ni, haw tawh lo mai ta che, ka bulah awm tawh mai rawh," a ti ta ruai mai!

Min fawh kârlakah chuan ka nui hak a, chutah, nam sawn deuhin," A tihchi loh ang, inah ka fate an la awm ve alawm," ka ti a, ani pawh chuan,"Kan inneih thuai a ngai, a rang thei ang berin. Zaninah palai chu ka rawn tîr ang aw," a lo ti ve leh a.

"Ka hnênah maw?" ka tih chuan," Ni lo, i pate hnênah maw le," nui suk chung hian a ti a, a khumah kan țhu dùn tawh a, a kut chuan min chelh reng chungin a hmui pawhin min hlat lo.

"I nau kha i nau tih ka lo hre miah lo va," ka ti ta sap a, engkim a fel tawh bawk a, sawi chhuah ka hreh ta bîk lo.

"I lo thîk chiang mai!" meng sawr sawr chunga a tih chuan chhâng duh lo chuan ka lo nui ringawt a, chhâng kher lo mah ila a hre thiam dâwn tho tho.

"Tatei'n a sawi a, ka hre chhuak thiam chiah a ni, kei lahin in bulah 'ka nau' tiin ka lo sawi bawk si lo va," a ti leh a, chutah, min rawn fâwp leh zauhin," Ka lâwm e, mipa hlim taka min siam avàngin," tiin khumah chuan min bawhthlu ta nghâl a.

Ka bâna eng emaw ka delh avàng chuan," Ngawi lawk," tiin ka tâl a, ani pawh chuan min thlah ve mai bawk a, ka phone a lo ni a, a lo êng nghe nghe a, chuta dár zât lo lang ka hmuh chuan ka harh chhuak ta zawk mai.

"Dàwr lama ka lêt leh a hun daih tawh a nia! Hawh, min thlah tawh rawh," ka ti ta chùl a, khum ațang chuan ka tho chhuak nghâl bawk a. Ani chu eng emaw sawi hian a phun sup a; mahse, a rawn tho ve tho.

"I tih tlat si chuan le."

Kan tlàn lai chuan Spi hla sak 'Lairil Luahtu' tih kha a play a, ka rilru chuan lo zàwm vein,"Keini chu rûnhmun lèn dun kan rêl mêk asin," ti rilru nauh nauhin ka zàwm ve zél tho a, rilru hlim tak leh hmalam hun suangtuahna hlimawm nei chung chuan a kut min hmerna chu kahmer lêt ve a, kan inen a, kan rilrua kan ngaihtuah chu a inang khawpin ka ring.

*SIMNA TEL LO INCHHÌRNA HIAN RAH ȚHA A CHHUAH MAWH VIAU*

(CHHIARTU ZAWNG ZAWNGTE, KUM THAR CHIBAI KA BÛK VEK A CHE U)

☆LAIRIL LUAHTU☆ - BONUS

Zàn dâr 8 a pèl hret tihah chuan Tatei'n min rawn phone a," I palaite an rawn kal a nia aw! Engati nge eng mah min rawn hrilh lâwk loh?" a rawn ti nghâl tâwng a.

A thil sawi chu a lo ti tak tak a nih chu! Vawiin chawhnu lamah kan 'insawi fiah' dùn chauh a, a zànah la la palai a han tîr ta nghâl chu a nia!

"An rawn kal maw?! Zanin la laah chuan a rawn tirh ka ring bík hleinem," tiin ka chhâng a, a ni rêng lah tak a, a hlim avàngin hetia a tih chûk chûk hi ka ring pha bîk lo a ni. Chu thu chuan min tihlim khawp, min nghâk rei tawh a, nghah tlâk ka nih loh tehlul nèn hian, min duh phawt chuan hnial ka tum tawh lo.

"Rempuia a lungawi lo dâwn chiang a nih hi, nangni aia tih hma a tum nèn," a tih nang nang lai chuan," Hre thiam rawh, min nghâk rei tawh êm mai a, hetia palai a rawn tîr chûk chûk pawh hi hriat thiamna nasa tak ka nei a ni, an chhûngkaw dinhmun thlìrpui la, hmeichhia an mamawh tawh lutuk a ni," tiin a dam thei ang ber tùr chuan ka sawipui a, ani erawh chuan,"'Kan inmamawh tawh lutuk a' ti mai ta che; mahse, ka pate bulah inneih hun a tlai thei ang bera rawt tùrin ka hrilh dâwn, lo hria ang che," a rawn ti leh a.

"Sawi ve tùr pawh ka nei lo, Sawmzuala tih dàn dán a ni mai a, i hnial theih a thu le," nui chung hian ka ti a, Tatei hian Sawmzuala duh dàn a hnial theih ka ring lo, ani lah hi a hmanhmawh tawh ropui mai si a, kei chuan engkim a kutah ka dah hmiah, a thu thu a ni mai.

Ani chuan mut tawh hnuah min rawn be thung," Zanin rawn kal pawh ka duh tehlul nèn, ka buai reuh phian a! Palai kha ka tîr a nia, i rilru pawh lo buatsaih sauh sauh rawh," a rawn ti sar sar a, a ka ngei ațanga chutiang thu ka han hre phei chu nuam ka tiin ka hlim zual sauhin ka hria.

"I nute rilru ka hre châk, 'I ti rum rum lutuk deuh lo maw?' an tih che ka ring tlat," ka tih chuan," Ka duh dàn takah phei chuan vawiin khân haw tawh miah lo la ka ti asin," a lo ti daih thung a, chutah,"Rem an tih loh bur chu ka ring hran lo va; mahse, a hun tùr mawlh hi, min nghah reitír ang tih ka hlau a ni. I nute bulah ka duh dàn hi engtin emaw tak lo sawi chhuak ve tho la aw, thil àwm lo pawh a ni chuang lo va," a ti leh sup sup a.

Engkim chu a fel thlup mai. Sawmzuala duh dàn zahsakin a hma thei ang berin kan inneihni tùr chu an ruat a, hun ka nei tam lo kher mai; mahse, pawi ka ti chuang lo. A bîk taka sàwmna ka țhiante ka thawn vek a, min lawmpui hlawm kher mai. Ka chanchin zawng zawng hre vektu an ni bawk a, lawmpuina thu min rawn thawn tliar tliar pawh chuan min tihlim bîk rêng a ni. 

Kan buai ngai lovin Sawmzuala'n a kutah engkim a dah a; mahse, ka nu duh dàn a ni bîk lo va, hmeichhe lam buaipui ngai ang chi chu kan buaipui ta tho. Dàwrah pawh ka kal chhunzawm ta lo, Chhani leh Robert-a pawhin min lawmpuiin ka awm ve tawh lo tùr erawh an huphurh thu an sawi ve sap sap reng a, dàwra ka kal tàwp ni phei chuan min fiam nilêng ti ila a dik ang, min phùrpui ve êm êm mai a ni.

Kan inneih hmain Zorina leh ka pa thlàn kan tlawh a, hun rei angreng tak kan awm nghe nghe. Sawmzuala chuan," Țhianpa, i laka ka thutiam chu hlenin taksa leh thinlung leh tihtak zeta ka enkawl theih nân nupuiah ka nei dâwn asin, min lawmpui ve ngei ang tih ka hria a ni, min rawn ngaihtuah miah suh, hlimna zawng zawng ka lo pe ngei ang," tiin Zorina thla chu a be malh malh a, kei pawh chuan," Nangmah ang chiaha min hmangaihtu min pêk avàngin ka lâwm e, ka hlim asin, ka hlim chuan nang pawh i hlim ngei ang tih ka hria a ni," ka ti ve sap sap a.

Kan inneihna min lawmpuitu an tam khawp mai, ka țhiante, Aizawla awmho pawh an rawn kal kim deuh vek a, an tilàwmawm khawp mai. Thilpêk lah kan dawng nasa, ka duh tak mai leh min duha min nghâk ngar ngartu pasala ka han nei ta chu ka rilru pawh a hlim a, ka hlim vàng chu a nih ka ring, mite pawh chuan hlim hmel an pu vekin ka hria. Sir Manunate chhûng an rawn kim vek a, ani phei chuan min lawmpui zual bîk a, min rawn kuah hial nghe nghe. Sawmzuala pate nupa pawh an rawn kal, an fate nèn, an nula tlangvâl ve vek tawh a, an hmel pawh a țha hlawm khawp; mahse, Sawmzuala tluk chu an awm lo.

"I chàu em?"

Zàn dâr 9 a pèl tawh a, kan inneihna min lawmpuitute haw fel hnuah room-ah kan chho a, ka chàu ve hnawk chuan ka hria. Inneih boruak kha hlimawm viau mah se nilênga inchei at reng mai kha a chauhthlâk ka ti lutuk, rilru hman a lo ngai nasa bawk nèn.

"Aw, mut ka châk, nang?" tiin ka zâwt a, zàn mutnaa ka hâk tùr ka dahna bag zawngin ka hawi a, ka va hma mai bawk. Ka thawmhnaw țhenkhat chu Mami'n min khai felsak tawh mah se  bag-a awm a la awm nual tho a, naktûk lama tih felah kan ti tawp tawh a ni.

"Châk tawh nasa!"

Inphih fai tur leh inthlâk tùrin bathroom-ah ka lût a, ka hnungah min lo zui ve nghâl niin," Ka nupui i ni tawh a, tunah chuan khawiah pawh kan inzui a thiang tawh, ha pawh kan nâwt dùn thei tawh," a ti deuh tlat a, ka nui sak a.

A hmain kan inbual fai tawh a, mut dâwna inphih fai leh ha nawh mai kha a ni tawh bawk a, pawi ka ti chuang lo, chutiang tih dun mai maite chu  a zahthlâk hleinem.

Ka nute in lamah Chimchimtei leh a u an awm a, mut tak tak hmain ka va phone leh rih a, Chimchimtei chu a lo muhìl tawh a, ka nu chuan lo ngaihtuah lo tùrin min lo ti vat a; mahse, ka ngaihtuah lo thei lo, ka tel lovin zàn a la mu ngai tlat si lo va.

"Ngaihtuah suh, a pite bulah a awm alawm. A muthilh tawh nghe nghe chu, bâkah, naktûkahte chuan kan hruai leh mai dâwn a, a ngaiin zanin chauh chu i țah loh hrâm ka beisei," a tih chuan a bânah chuan ka chumsak taih a.

"Ka țap maithei a ni," tiin ka nuih a, ani lah chuan,"Ka thlêm thiam viau chein ka ring," a lo ti vat a, enin ka mitko ka sàn ãk a.

"Nge, min ring lo 'mi? Han țap chhin chiah la?" 

Ka țhutna ațanga ka tho tùr chu hnunglam ațangin min rawn kuah thut a, dârthlalanga a hmel lang chiang zet chu ka en a, ani pawh chuan min rawn en lêt sak bawk a.

"Ka duh tak ka nupui, kha leh chen ka lo nghah tawh hi zanin hian awmtîr mai mai ka tum hauh lo a nia," ti supin ka biangah chuan a rawn fâwp zoh phawt a, chutah, min pawm kãng leh ta nghãl zat a, nui chung hian a nghâwngah ka bân pahnihin ka lo kuah vat a. Khumah dìm têa min nghat thlain ani pawh chu a rawn kûn hniam ve zui bawk a, kan hmui intawngin làwițhat zàn țan nân duhthawh takin kan infâwp ta vawng vawng a, a hnulam zêla kan chêt dàn pawh duhthusàm a ni e. Ka pasal hmaah chuan ka zak duh bîk lo, thil sual kan ti lah ni hek lo le.

Kan innei rei telh telh a, min hmangaihzia leh min duatzia ka hre chiang telh telh a, chutih rualin ka laka a pangchan thiamzia a tilang telh telh bawk.  Pangchang thiam tak a ni, naupang pangchang aiin puitling, engkim hre thiam chin tawh pangchang enkawl chu a eng emawti hahthlâk a; mahse, a nuam ka ti ru riau thung. Thîkthu a pe chhe thiamin mipa dang lakah min hauhin a tâ ka nihzia a lantîr hreh hauh lo va, zahthlâk hauh si lo hian zahawm takin min hauh a, a rûkin nuam ka lo ti hliah hliah țhin.

Zan khat chu Chimchimtei leh Siamtei a thlah haw a, ei rek rek tùr lo lei haw tùr leh hmanhmawh deuh hlek tùrin ka chah a, ka period a hnaih leh tawh avàngin ei tùr ka râwp leh tawh a ni. Fridge leh chhuar vêla ei tùr awmho chu ka ei châk dêr si lo va, ka period dâwn hi chuan dàwra thil zawrh hrisêl lêm loho hi ka ei châk ziah a ni.

A rawn thleng har phian mai a, ka ei châk tawh lutuk chu ka inngaihtuah  chilpút a, room-ah chuan ka vei sek mai. Rawn haw har lo tùr khân ka chah ve reng sia, a ti mak ngawt mai, lo haw teh se, ka be țha vak lo ang maw le, ka thu sawi a ngai pawimawh lo tawp a nih hi. Kan in bul hnãiah dàwr tê, ka ei duh ang chi zawrhna a awmin ka hre si lo, awm pawh ni se, chutiang lei tùra tûn ang huna chhuah chu a mawi chiah lo bawk ang.

Ka vei ngat ngat lai chuan motor rawn tlãn lût thãwm ka hre ta, phûr zetin, ka tihtauhna hre chang lo chuan in hnuaiah lamah ka tlãn thla a, kawngkaah kan intâwk ta chiah.

"Khawi, ka thil chah che chu?"

"A, ka theihnghilh daih mai!" A thil sawi chu âwih lovin a kut ka en a, eng mah a keng lo. A kekawrah a ak a nih ringin ka en thla leh a, ei tùr akin a lang lo, a thêp zaih. A rawn lei lo tak tak em maw ni.

"I rawn lei lo tak tak maw?! Ka chah ve țâwk țâwk che kha, a mak, i ngai pawimawh lo a nih kha." Ka ei châk tawh êm asin, period dâwn rilru no thinchhiat lai ni bawk nèn, ka thil chah min rawn leisak lo bawk si chu ka thin a rim a, in chung lamah chuan ka tlân chho hmawk hmawk a.

Room-a a rawn luh pawh chuan ka lo en duh lo, ka mutna lam sîr têah chuan muin ka maimichhîng tlat a.

"I thin a rim 'mi?"  Chhàn pawh ka chhâng lo, eng nge chu chen chena rei a va tih? Ka thil chah a la rawn lei lo zui.

"Ka hre ve reng a, kawng lakah accident na vak lo a thleng a, chu chuan min theihnghilhtîr ta daih a ni," a tih pawh chuan ka ngaihsak lo. A insawi thiamna mai a ni, a theihnghilh chuan a ngai pawimawh lo tihna a ni mai.

"Tikhân awm suh."  Ka che sawn chuang lo va, ka țawng loh bâkah men pawh ka meng duh lo.

"Khatiang khân awm lo teh, i ei châk viau chuan lei tùrin ka chhuak leh mai ang, a nih loh pawhin lo kal ve la? I ei duh zâwng chu i hre daih zâwk bawk ang a."

Ka zui ve ta. Dàwr rêa zawrh rek rek chi a ni si a, zawngin kan tlãn kual hrep zui, amah chhukin a zâwt zêl a, a tàwp atàwpah chuan ka duhthusàm lei tùr ka hmu ta. In thlen hun pawh nghâk thei lo chuan motor chhûngah chuan khehin ka ei mial mial a.

"Thinrim tawh âwih loh!"

A hnulamah erawh chuan ka ei tùr hrim hrim atân tiin Champhai lama mi a chah ta țeuh a, ei tùr chi hrang hrang ka period dáwna ei tùr ka duh ang tùr chiho nia a hriat chu kan room-ah a stock ta țeuh mai.

"I period tùr ințham chhoh laia ei tùr i neih loh hlauh chuan zanlaia chhuah dàwr dáwr a ngai palh ang," tiin min fiam zuk zuk a, kei chuan," I uar a nih kha, kan chhuah dun khân zanlai a la ni lo aw," ka lo ti ve thung a.  

Kan inneih cham thla ngana zànah ka ruak lo tih kan hria a, kan chhûngkaw tân chuan hei bãka thu làwmawm a awm àwm lo ve. Ka pi leh pu an hlim a, ka nu a hlim bawk, Sawmzuala lah chu hlim ber berah țangin," Fapa ka nei dâwn e," a ti a, a enga mah hmain mipa tùrah a han dah tawp a, a duhthusàm a thlen dik loh palh hlauh teh chuan...

Kan inah chaw kan ei khâwm a, kan hlim dar dar khawp mai. Ka pum puar pawh a lang lian ve tawh khawp mai a, Chimchimtei chuan a chûl hoh hoh reng a," Lo chhuak thuai se ka hmu châk tawh," a ti deuh sek reng bawk a, kan nuihpui nasa. Ka rai hnuah Sawmzuala'n ka chêt nasat a phal loh avàngin Siamtei kan awmpui a, min chhâwk khawp mai. Awmpui pakhat chu kan nei tho a; mahse, ani chuan eirawng bàwl lam leh in chhûng chêt lam chauh a buaipui a,  Siamtei nèn chuan ka nu leh ka pi leh pute kan buaipui thung.

Tûn kâr Zirtàwpni hian ka nu checkup tùrin an kal thla dâwn a, hun teptèr taka chaw ei khâwm ai chuan tiin kârtìr lamah kan ei khâwm ta a ni. Ka pa pawh a zia tawh khawp mai, tiang hawl lo pawhin a kal thei tawh a, Chimchimtei pawh a paw leh ût ût tawh a ni àwm e.

Mutnaa ka dul chûl hoh hoh pah chuan," Ka awm loh laiin zànah hrehawm i lo ti ang em? Duat taka kuahtu tùr che ka awm dâwn rih si lo va," a ti sup sup a, kei chuan," Mipa dang hire tùr ka lo zawng mai ang," tiin fiamthu hian ka lo chhâng a.

"Phal loh bur! Hria maw? Mipa dang hming phei chu naute hriat laiin sawi chhuak miah suh, a pa hming chauh hi hria se a tâwk," a ti deuh bur a, a thil sawiin ka nuih a tihzat êm avàng chuan ka nui hak hak a.

"Naute puh daih suh, a lo pian hunah pawh 'Thîkthuchheliana' kan ti nghe nghe ang," ka tih chuan," Ka thîkthu a chhe miah lo, ka tâ i nih avàngin ka tâ chu ka hauh na mai a ni zâwk," a lo ti deuh tlat thung a, chutah," Min lo ngai viau ang em?" a tih chhunzawm leh zat a.

"Ngai ang em aw...?" 

Min rawn hnaih sauhin min kuah chial a," Zànah ka bula i mut loh chuan ka muhìl thei pawhin ka ring lo, kan la chèn dun rei loh nèn, ka taksa hian a hre chiang nghâl viau che a ni," ti sup supin a kut chuan ka âwm lam a rawn dap chho rak rak a.

*REI LO TÊ ATÂNA NAWMNA KAN ÛM LUATAH, KAN ÛM LOH ZÂWK HREHAWMNA HIAN MIN ÛM LÊTIN MIN ȚAHTÎR FO ȚHIN A LO NI*