☆LALHLIMPUIA☆ - 1 - 10 By Dingdi Pachuau

 LALHLIMPUIA - 1 By Dingdi Pachuau

(Ka lo lang leh ta e, story tel lo chuan ka khua a har țan tlat zu nia. Chuan,he story hi true story-based a ni e. Chhiar tui vek u le)

In chung zâwl ațang chuan Lunglei khawpui èng pe un mai chu ka thlir kual a. Thlápui lang chiang hle mahse street light leh high mast éng aváng chuan a ènna chu a langchiang lo kher mai. Pathian thilsiam mawi tak tak hi Mihring thilsiam mawina hian a hliahkhuh chho zel niin ka hria a, kan tèt laia thla èng nuam kan tih theihziate ngaihtuah káiin hun hlimawm tak kan hman țhinte ka ngaihtuah chhuak zel a.

"Va ngaihtuah nasa ve... pasal neih pawh chu i châk tawh áwm hle mai ka ti," ka best Christina(Thangi tiin ka ko daih!!) chuan a rawn ti a, ka inher vat a, a lo chhoh lai ka hre miah lo.

Nui chungin," Chák ve tawh bawk ang chu, nulat reng ka peih hleinem,"ka ti ve thung a.

"Hmmm, pasal i neih daih chuan kawm tur an váng tawh dawn e, chubâkah kan inhlat tawh dawn si."

"Lungngai mah ta che, ka lo léng zut ang, min ning viau țhin zawk in ka ring."

"Um, nia,U Zuala hi chu a fel a,lo lèn i duh phawt chuan i lo leng zut theiin ka ring, chuan, a duat viau che pawhin ka ring, pasal atán pawh a tlák avang tak hian ania ka duhpui em em che ni. Khati khawpa rilru na leh hrehawma i awm hnua nangmah hmangaih em emtu pasal i nei tur hi ka láwmpui em em che a nia."

"Nia, ka vannei asin, kohhranah ni se a inhmangin ruihtheih thil engmah a ti bawk si lova, mite pawh hian an fak reng a ni."

"Neih i duh ve mai hi ka lawm ania aw.. Rilru hlim takin i awm thei tawh ang a, mahse ka ngái dawn em che a ni."

Ei tur a rawn kenchhoh 'Lachu' chu ka ban ta vat a, thei zingah chuan tui ka tih ber pawl a ni a, ei pawh ka ei tam thei khawp.

"Lachu hi in ta rah em ni?"

"Lychee ti ta che."

"Mizo țawngin Lachu alawm."

"Lychee kung kan nei lo hrim hrim, i hriat reng kha."

"Ka theihnghilh palh."

"A áwm alawm. Pasal i nei dawn a, i phùr lutuk a nih kha."

"Tikhan min ti ve ziah teh suh."

"Nge, i phùr em alawm."

"Ka huphurh ve tho ania aw."

"Lungngai suh, U Zuala a fel em mai, huphurhna tur a awm lo."

Ka huphurh tho. Inneihna hi chu ka ngái ropuiin ka ngáizam thei lo. Mi, pasal neia țhen leh mai țhinte leh pasal thlák zung zungte ka hmuh hian mak ka ti țhin, eng angin nge inneihna hi an hmuh aw ka ti vawng vawng zel. Kei chuan inneihna hi vawikhat atán a táwk ka ti a, damchhung atána ka neih turah pawh ka duh uluk a, chuvanga pasal nei duh lawk lo ka ni nghe nghe.

Tuna ka pasal tur U Zuala hi ka hriatna chu kum li kalta tawh ațang khan a ni. Chutih lai chuan Aizawlah college kalin ka la zo chiah lo va, kan college-ah guest lecturer-in a rawn thawk a, a felin a aw a dam hle mai a, a nui duhin a subject chu nuam kan ti țheuh mai. A hma chuan ka subject nin ber a ni, mahse a hmel hmuh a nuamin mi zirtir dan a thiam a, a hnuah chuan mark ka score sán berna a ni ta daih. Kan class hmeichheho chuan an star thei hle, a fái vang reng váng hi a ni ang. Min duh thu min hrilh tirh chuan mak ka ti tawp, ka zak viau bawk. A hmel a chhe hran lova, mipa ka duhthusam ka lo suangtuah țhin ang kha chu a ni miah lo, mahse a felin min ngaihtuah em em a, min hmangaih bur a ni mai. Ka chháng duh lawk lo, a chhan chu college kal lai ka la nih bákah kan 'sir' a ni bawk sia, mahse chu chuan a tibeidawng duh miah lo, kan hostel-ah a lo léng a, min hmu tur liau liauin. A hnu ah chuan ka khawngaih ve ta deuh a, ka single lai a nih avang leh ka bialpa nen kan ințhen chhoh lái a nih avangin leh, innghahna tlák mipa ka duh tawh avangin min duh thu a sawi pawhin ka lo hnial lova, mahse college chhuah phawt ka duh tih ka hrilh thung.

College chu kum khat hnuah ka chhuak a, chuta țang chuan kan ni nghet chho a, ka duh lutuk chu ka ti lo. Mahse hmeichhe tán chuan innghahna tlák mipa hi an pawimawh em a, a chhan chu hmeichhia chu chan chhe zawk kan nih zel avangin. Min care em em a, min hmangaih a, kei pawhin ka duh ve tho bawk. Pasal atán duhthusám an tih ang hi ni berin ka hria. Pasal atán țha tak, fate tán pawha pa țha tak tur, innghahna tlák ngawih ngawih a nihna hian min duhtìr ni berin ka hria.

"Naktukah kan kawr tur kha en dun ila, kan la ha chhin lo hrim hrim bawk a."

"Nia, tiraw? U Zualate sawm bawk ila?"

"Nia, mahse a best tur hi lo melh tái lutuk lo la."

"Teuh lo lutuk, ka hùng țha tawh em...!!! midang melhna hun ka nei tawh lo,"nui kar kar hian a ti a, ka fiam châk mai mai. A nei țha hle tawh tihte chu ka hre reng, a bialpa 'cial' deuh mai Sawma hi chu a phatsan ka ring lo hrim hrim. Sawma pawhin a duh viau bawk, anni pawh hi an tihar lutuk tawh lovin ka ring.

"U Zuala nuin 'mo fel lutuk tur' a tih che kha, i vannei ngawt mai."

Kan inen a, kan nui ringawt. U Zuala nu hi a sual miah lo, mahse fel deuh kan tih ang chi hi a ni ve a, an ina ka kal hmasak ber nì ațangin a nungchang tur áwm hi chu rin dan ka thiam mai. A țawng duh hle a, a țawngkam pawh a țha, mahse a țha mah mah em aw ka ti.

"A fel leh lutuk țhin tiraw? Lo huatpui lo la, i nu tur hi maw, ka ngaina lo, a bulah pawh hian ka titi thiam ve lo."

Ka nui ringawt a, ka sawipui ve lo. Ka pasal tur nu a ni a, ka nu ni mai tur a ni. A chanchin țha lo lam ka sawi a nih chuan keimah pawh ka dik bìk lo tihna a ni ang, engamah hmaa lo ngei ringawt chu, keimah ka inti-hrehawm thláwn mai tihna a ni dawn.

"Zanin chu i in luaha riak lovin hetah riak mai la?"

"A pawi lo khawp ang, mahse U Zuala hrilh a ngai ang, naktukah min rawn sáwm anih chuan a kal thlâwn dawn tihna a ni dawn si a."

"Nupui tùr țha lutuk ang maiin i hrilh deuh thlap ang maw?"

"Ka tih loh dan a ni chuang hleinem."

"Nia, a țha. I phu loh em hi. Tuna mi nen hi chuan in tluanchhoh ngei ka beisei"

'Phu lo' tih țawngkam hi chu kan pahnih inkárah hi chuan kan hmang ngun lutuk a, engah vak kan ngai lo. 'Ka phu lo' kan tih hi chuan 'engah vak ka ngai lo ve' kan tihna ania, 'i phu lo' a tih pawh hian ' U Zuala i hrilh leh hrilh loh chu engah vak ka ngai lo ve, i thu thu' a tihna a ni.

Dik taka sawi chuan U Zuala hi ka phu lo. Kei chu thingtlang nula ka ni a, chutah hna thawh nghet nei ka ni lo bawk, sikulah a remchan ang angin ka inhlawh ve láwp láwp a, ka pa hi zirtirtu a ni a, chhungkaw rual tak kan nih loh avangin ka pa hlawh hi kan kham táwk em em a, ka nu lah a taimain huan a siam kumtin a, thlái ei khawp a tharchhuakin kan intodelh viau. ka hlawh tlèm tè hi chu ka thawn ngai lo. Keima mamawh leh in luah mana ka pék bák hi chu bank-ah ka dah ve hrám hrám a, kan vènga ka hawin ka chhungte thìl tur ka leisak ve țhin.

Nau mipa pakhat ka nei a, Aizawlah college a kal a, ani lah chu thil duh ngah lo tak, mamawh tak tak chauh lei chi a lo ni bawk nen, kan unau chu kan vannei tawp a ni mai. Kei lah incheina ngaina mi ka ni lo va, ka mamawh loh hi chu ka lei khát viau. Mahse perfume hi ka ngaina a, lehkhabu nen. Lehkhabu dáwr kal pelh hi harsa ka ti țhin. Pawisa ka neih loh viau pawh hian pakhat hi chu ka lei haw leh nge nge zel. U Zuala nen hian kan inang viau, kan duhzawng leh nuam tih zawngte leh kan ngainat zawng a inang hle. Ani pawh hian lehkhabu a ngaina a, ngah pawh a ngah. Ka hawhsak țhin a, ani zawng leina tur pawisa a nei bawk a, a thar hi a lei deuh reng mai.

Mut hmunah chuan kan titi sap sap reng a, khum pakhatah kan pahnihin kan mu a, Sawma'n a rawn phone a, kei pawh U Zuala'n min rawn phone bawk a.

A tuk chhunah chuan U Zuala, Christina leh U Zuala țhianpa Rina te nen chuan kan chhuak a, U Zuala cousin hian Aizawlah mo thuam a țhui țhin a, dawr pawh changkang ve táwk tak a nei nghe nghe. Chu chuan a rawn thawn phei a, an inah kan kalchilh a ni.

Kan ha chhin a, kan táwk chiah chiah lehnghal a. A țhui thiam ka ti kher mai, a simple hle a, mahse a nalh viau tho si. Hmuh a nuam a, hák pawh a nuam viau.

Thla kan la chiam nghe nghe. U Zuala pawh a nui var var reng a, a hlim ve thawkhat viau a ni ang, Rina'n a fiam zuk zuk reng a.

"Sarah, in pa tur hian a nghakhlel ber maiin ka hria, a inpuahchah dan zawng zawng hre vek phei la chuan.."

U Zuala chu lo inrawlh vatin," Ngawi mai mai teh,"a lo ti thuai a, kan nui dar dar a.

Christina chuan," Rina, sawi teh, ka hre chák lutuk, engtiang chiahin nge a inpuahchah a?"a lo ti ve a.

"A turu a ni tawp mai."

"In ril a țám tawh em? Kan cháwl dawn em ni ang?"

"U Zuala finzia hi chu aw. Rina sawichhuah i hlauh vangin chawlh i han rawt a, ka ei țeuh ang mawle."

Christina tak hi chu aw...

"I ei țeuh dawn nia, ei lamah hi chuan ù ber i ni alawm."

An inngam ve bawk a, an infiamna tawngkam pawh hi a na thei viau. Kei erawh țawng tam ka nih loh avangin ka lo ngawi leh kar țhin, an pahniha infiamnaah hian lo inrawlh ve lovin ka lo nui mai mai zel.

"Engtikah nge i chhungte an rawn kal ang?"

"Ka hre lo le, ka haw chho leh lawk zawk ang, man inhlan hunah awm kan ngaih kha."

"Ka awm ve kher a ngai maw?!"

"Aw, an awm ve țhin alawm."

"Ka lo hre miah lo, a zahthlák e."

"Thil nihphung hi hriat loh ve theih deuh mai ania, a zahthlák chuang hleinem."

"I zárah ka fing leh ta kuar mai."

Ka nui ringawt. Inneihna lam hi chu kei pawh ka hriat loh lam tak a ni a, ka ngaihven lam pawh a ni hek lo. Mahse, pasal han neih dawn meuh chuan chhùngte ka zawt chawp chùk chùk a, ka cousin pasal nei tawhte chenin. Anni lah an lo phùr em em a, a chhan chu pasal ka neih hi an ring lo hrim hrim, mipa ka ngaihsak lovin ngaihzawng ka neih an hre ngai bawk si lova, U Zuala'n palai a tìrh țantirhah pawh khan phone-in min rawn zawtchiang luai luai a, min rawn fiam a, an tán chuan a mak ve bawk em a ni.

"Ka nupui i ni mai tur hi a mak ka ti, ka la ring thei lo hial zawk."

"Kei pawh mak ka ti."

"Khawvela mipa vannei ber chu ka ni dawn chiang alawm."

"A zahthlak em mai a."

"Zahthlak nang, khawvela ka hmeichhe hmangaih ber mai nupuiah ka nei dawn ania, ka vannei em asin."

Hetianga tih ve theih hi ka va châk tehlul em!!!!

Kan chawlhna restaurant-ah chuan U Zuala hmelhriatte pawh an lo cháwl nual a, min fiam nak nak a, an la naupan ve deuh hlawm avangin ka zak lutuk hran lo. U Zuala'n kan ei man a pe leh vek a, pèk ka tum ve viau pawh hian min pèk khalh ziah.

"Ka va puar tak em!!!"

"Ka ring rèng ah!"

"Ei tam min va ti áwm ve?"

"I ei tam bawk lo'm ni?"

"Rina, engtin maw U Zuala inpuahchah dan vel chu?"

"I va sual tak em aw... ka phùr em em a,a ni mai. Rilru lamah ka inpuahchah ve nasa a, chu zawng chu a ni mai."

"Rina, tak tak a ni em? Chu zawng chu maw?"

"Rina'n ka rilru a hre lo. Keiman ka hrechiang ber alawm, máte."

"I hriat loh hunah Rina chu ka la záwt tho ang."

"Hrilh tur che a hre chuang lo vang, dáwt a phuahchawp te a nih ngawt loh chuan."

Rina nen chuan kan lo nui kan lo nui ringawt, infiam bawrh bawrh hi a nuam a, rilru a tithawveng ka ti țhin. Țawng vak lo hian anni pahnih infiam vel hi ka lo hlimpui tâwk viau.

"Țawng ve bawrh bawrh ta che, Sarah,"Rina chuan min rawn en a.

"An infiamna hi ngaihthlak nuam ka ti alawm, sawi tur pawh ka hre lo."

"Țhiana lah hian a nghákhlel tawh si a, in lama a chètdan leh a tihdan tur practice vel phei chu ka nuih nasa thei lutuk."

"I tifiam mai mai emaw ka ti a, Thangi lah chuan hriat a chák em em bawk si."

"Hria se chuan a fiam nasa ngawt ang."

U Zuala chuan min thlah diat diat a, ka in luah kan thleng țep tawh tihah chuan car pawl, ka hmuh leh hriat țhan em em mai chu ka hmu ta tlat mai!!! Ka mitvái a ni em lo maw? A driver ka hmu chiang thei lo nain a tukhum ka hmu thei a, kei hian ka hai miah lovang. Amah ngei kha a ni, ka hresual lo khawp ang.

Ka thin chu a phu leh ta dap dap mai. Eng nge a awmzia? Lungleiah a awm tihna em ni? Nge a rawn phei zawk? Nge an chhungkuain an rawn phei em ni zawk?

A ni thei lovang. Pasal ka nei dawn tawh a, ka ngaihtuah tur a ni lovang. Engkim, ka hnuchhawn rama mi a ni tawh, hmalam pana kal tur ka ni, hun kal tawh ka ngaihtuah tur a ni lovang.

"...nge ni ang?"

U Zuala chu ka en phei vat a, eng emaw chu min zawt ngei mai. Ka thil ngaihtuah atalangin engmah ka lo hre lo a nih hmel.

"Eng emaw min zawt em?"

"Eng thil nge i lo ngaihtuah vung vung a? Ka biakna che pawh i hre miah lo ania."

"A pawi hle mai, eng nge min zawh kha?"

"Engtikah nge ka lo chhoh ve ang tih ka zawt che a...."

"E, ka lo hrilh dawn che nia aw, vawiin friday ania, man inhlan kha karleh tuesday ania, monday-ah chhoh ka tum ang, nang pawh tuesday zîng-ah emaw lo chho la?"

"Um, i thu thu,"nui chung hian min chhang a.

Ka in luah kan thlen chuan a lo lut ve leh zawk a, rei a awm lo. A chhuah hnuah ei rawng ka báwl țan a, ka ei a tlèm avangin siam tam a ngái lèm lo. Rawng báwl pah chuan vawiina car pawl ka hmuh kha ka ngaihtuah lèt a, a khalhtu kha amah kha a ni chiang alawm,amah ngei kha.

Show post links

Top

ADVERTISEMENT (A hnuai a milem hi a nia hmeh zeuh tur chu)

NgaiaSite Admin

Quote

Unread post September 2nd, 2018, 1:42 pm

LALHLIMPUIA - 2 By Dingdi Pachuau

Engtin nge ka hriat loh theih tehlul ang? Ka rilru tina em emtu kha a ni a, khatih lai khan la naupang viau mah ila, rilru lo nat theihzia leh a nghawng natzia ka hrethiam pha tho. He pa, ka nuna rawn intátlùt hi theihnghilh daih ka tum lova, 'hriatreng loh' ka tum mai zawk a ni. Mahse...

Ka hriatrengnate hian an theihnghilh tawh ka ring asin le. Khang kum kalta chhung zawng khan hriatreng loh tumin nasa takin ka bei a, ka tum nasa, hlawhtlin pawh ka hlawhtling viauin ka hria asin, mahse vawiin tlaia ka hmuh zawk khan kháng ka lo beih tawhna zawng zawng kha paih bo ang duak a ni leh si, he pa hi chuan ka hriatreng loh hi a phu asin le aw...

Pasal ka nei dawn, chu chu ka rilruah a rawn lùt leh nghal a. Um, ni e, pasal ka nei tawh dawn. Ka rilruah hian mipa dang ka ngaihtuah tawh tur a ni lo, ani hlauh phei chu.

U Zuala chauh ka ngaihtuah ang, ani hi ka pasal tur a ni bawk. Min duh a, min hmangaih a, min care em em bawk. Ka tân a rinawm a, ka mamawh hunah ka tán a awm reng a, min zahthiamin a fel a, ka pasal tur atána ka duhthusám țhin a ni bawk. Ka tán chuan ani báka țha hi an awm tawh kher lovang.

Monday tláiah kan vèngah (Pángzáwlah) ka haw chho a, U Zuala erawh chu class thulhtìr tam ka duh loh avangin tuesday zînglama lo chho mai turin ka ti a. Kan in pawh an lo singsa fel ve nasa a, kan in hi a zìm lèm loh avangin tihfai a harsa țhin a, unau mipa pakhat chiah ka neih avangin ka nu ka khawngaih țhin. Ka pa lah hian in zìm chu a ngaina dèr lo lehnghal a, mahse chèng kan tlèm hrim hrim a, tihnawktu pawh kan tlèm a, a zia deuh.

Ka chhùngte chuan U Zuala chu fel an ti khawp mai, a hmain vawikhat a lo kal tawh bawk a, an nèl viau hlawm. An mákpa tur chuan an mit a tlung khawpin ka hria, U Zuala hi chu a fel ve em bawk a, ngainat loh theih pawh a ni lo.

Man hlan kan zo va, Lungleiah ka nau nen kan chhuk a,ani pawh pasal ka neih dawn vang liau liauin a rawn haw a, kar khat chawlh a rawn dìl tawp a ni.

Friday-ah kan innei dawn a, naktuk mai a ni ta. Ka nu leh pate pawh an rawn chhuk tawh a, ka in luah lian fahran lo-ah chuan kan inhnawh ve țán mai, mahse chhùngte nen chuan a nuam ka ti.

Engkim peihfel a ni ta. Naktuk maiah pasal ka nei tawh dawn, vawiin tlái leh zanin chiah nulátna hun ka nei tawh, engtin nge ka nulát hun táwi tè hi ka chen ang le aw?

Tláiah ka nau Tluanga nen Scooty-in kan léng a,min lénpui a ni ber. 'I nulát hun chhung a rei tawh dawn si lova, a tâwp nan lèng ang' a ti tlat a, ka pa pawhin a lo amen nasa.

Ka nuin ei rawng a lo báwl a, zanriah tui táwkin kan ei a, naktuk lamah Pángzáwla kan chhungte chu zìng kárah an rawn chhuk ang, inneih hunserh hmang hman turin. Bus-in an rawn chhuk dawn a, ka putea'n sumo a rawn thawh dawn bawk.

Kan lènna lamah ka phone camera ka hmang nasa deuh a,a low țhak thei nia. Haw veleh ka charge nghal a, thlalak chu ka pate pawh ka entir ve nghe nghe a.

Thleng ka sil laiin Christina'n min rawn phone a, mahse ka chhang lo. Ka nuin a chháng a, thleng ka sil zawh hnuah an ina léng phei zawk turin min rawn hrilh a lo ni a. He nu lah hi naktukah pasal ka nei tawh dawn tihte pawh min ngaihtuahpuia lo lèng tur a nih vei nen, ka phei hunah ka vui nasa ngawt ang.

Ka pa chuan," I nulát hun tawp thlahpui che a tum ve a ni ang chu, i nula rei tawh dawn si lova,"tiin min lo fiam a.

"Vawiinah kan thlah nasa tawh alawm, tiraw Tluang? E, Christina-te inah chuan min va hruai zawk la, chuan i haw leh nghal daih ang a,"tiin Tluanga chu ka sáwm nghal zaih a.

Ka nu chuan,"Ni e, va hruai rawh khai. A nulat i hruai táwp berna pawh a ni tawh maithei asin,"a lo ti ve bawk a, Tluanga chuan,"Ka va drop ang che a, lo awm ve reng chu ka peih miah lo. Nula dang rìm ka duh,"a lo ti ve thung a.

"Haha, nula inah i lèng ngam áwm lo em mai a."

"Ngahnge ka ngam loh ang? Hmelhriat ka nei ve tho."

"Ka awih chuang lo."

"I hre mai dawn alawm."

"I lerh em mai a. Aizawl lamah i neih reng kha, nang tè hi, i lo kawp reng tihna em ni?!"

"Kawp ve bawk ang chu, damchhung rei lo tèah chuan nun chen ham ham tur alawm."

"A..he pa zah lohzia hi. Ka pa, Tluanga hian ngaihzawng a kawp vel ania aw..vaw hrep rawh."

Ka pa chuan," A țha ber a thlang nalh mai dawn alawm,"a lo ti awlsam èt a, rápthlák ti zet hian ka pa chu ka va melh a.

"Insiam la, kal thuai mai teh ang. Zán lèn rei awih loh, naktuk zánah i muhil thei dawn miah lo ania."

"Awii, i zah lohzia hi. Chutiang sawi reng reng suh, naupang tè tè lehnghal."

Ka nu leh pate chu an lo nui dun hawk hawk a, Tluanga pawh a nui vur vur mai a, lei sei fea chhuah khumin room-ah ka lut nghal a

Insiam tih lèmah ka puan ven lai chu dahin kekawr ka ha a, slipper ka bun chu hlìpin vans dum ka thawlh tawp a, ka hmai chu engmah ka hnawih lo,ka hmuiah erawh lipstick sen tlèm tèin ka hnawih hlek a.

Ka nute hnènah chuan," Nu, ka va kal lawk ang aw, ka rei pawhin ka ring lo," ka ti a, Tluanga chu ka mitmei zohva, pawnah chuan kan chhuak ta nghal a.

"Ka lèng dawn tak tak."

"Engtik laiin nge hmelhriat i lo neih hman a?"

"Ka thianpate inah mawle, college-a ka țhian kawmngeih deuh mai hi Lunglei ami ania."

"A zia hlauh chu, tlawh ve a țha alawm."

Ka in luahna hi Bazar vengah a ni a, Christina-te hi Venglaiah an awm thung. Kan inhlat lutuk lo nángin kea kal nan chuan a hla ve tho mai.

Kan thleng har lova, an kawtah chuan Tluanga chu a ding dat a.

"Ka lo lùt ve dawn lo aw, haw i duh hunah chuan min lo phone mai la."

"Um, mahse phone ka keng lo. Christina phone-in ka rawn call mai ang che."

"Nih, ka kal nghal mai ang e."

"Aw le, lén tui le."

A tlán chhuah hnu chuan Doorbell chu ka hmet ri ta nghal a.

In chhungah chuan an lo awm nual a, a nuin min lo chiauau vat a, Christina erawh ka hmu miah lo nia.

"I țhiannu chu in chungah a awm kha aw, chho ve nghal mai la?"

"Aw le, a nih, ka nu, ka chho ve nghal."

In chung hi kan inkawmna hmun pakhat a ni ve hrim hrim bawk. Boruak a nuam a,a thim lova, a èng uar hran chuang lo bawk. Long chair pakhat an hùng a, plastic chair pathum lái a awm bawk. Pangpar chi hrang hrang pot-a hùn dul mai chuan boruak a tinuam ka ti țhin.

"Engatán nge min tih reng reng le? Naktukah pasal ka nei dawn tawh a, ka buai ve ang tihte ring ve la."

"Buaina vak tuŕ a awm em ni le?"

"Lo lèng tur zawk hi i ni a.."

"Nia, ka hre ve reng tho."

"Ka thin a rim ania."

"Ngati maw?"

"Lèng tura min rawn sáwm vang hian mawle. Ka nute an rawn chhuk ve em em a, kan awmkháwmho khát tawh dawn asin, in luahtunu ber ka chhuak nulh a."

"A dik reng mai."

Long chair-a țhut thlák pahin," Lachu kha ei leh ila, in la nei em?"ka ti ta daih a.

"Aw, nei e. Ka zu la ang e,"tiin in hnuai lamah a tlánthla ta nghal a.

Lachu hi chu a tui ve alawm. Tlèm lái deuh khan keini pawhin a țiak, huanah kan phun ve a, a țhang chak lutuk lovin ka hria, kung khat phei chu a thi ta daih nghe nghe.

Pèn tháwm a rawn rìk tákah chuan ka ngaihtuahna ata harhchhuakin," Tui in tur i lo keng chho nghal lo a ni, ka tui a hál dawnin ka hria,"ka lo ti a, ka maimichhìng vang vang pah a, zan boruak thiang zet chu ám taka hìpin ka thaw huai huai a.

"I lo dam țha zel maw?"

Ka hma lawka mipa aw, ka hriat țhan em em mai ka hre chiah chu, ka meng nghàl káwk mai. Chu mai a ni lo, ka ding nghal zawt bawk. Hetia awm hi ka duh miah lo, mahse ka in-control thei lo. Mak ka ti lutuk tlat, Christina-te inah ber kher, chutah pawh pasal ka neih dawn zánah lehnghal.

Makti deuhin ka en reng ringawt.

"I dam țha tih ka hre thei mai, i lo nula tak tak tawh tih ka hmu thei bawk e."

Ka ngawi reng. A zak lo ka ti, nupui nei tawhin min han fiam kual vel a tum a nia.

"Eng nge i duh?" Biakna tur dang ka hre thlawt lo. Mak ka ti em em ringawt.

"Zawhna țha lutuk. Ka duh i hre duh tak tak em?"

Ni lo....ka zawh tum a ni lo. Ka inngaihtuah harh ta deuh, rilru fìm tak ka put a ngai tih ka hria, a chhan chu he pa bulah hian ka dik lo vek tlat zel țhin tlat a ni. Kan nunhlui ka chhuikir tur a ni lova, tuna kan hun hmanah hian ka fìmkhur em em tur a ni, rilru nei rána ka biak a ngai. Ka zawhna pawh kha ka hamhaih lutuk, biak dan tur hre lo sawichhuah ve mai mai a ni.

"Eng thil nge ni ta tihna a nih kha."

Kan inhnaih mah mah avangin amah din hlat thei deuh turin ka ding sawn a, ani erawh chu a dinna ngaiah dingin min en ngar thung.

A hmel chu èng lam chhawn a nih vangin ka hmu chiang thei viau a, kei erawh chu ka lang chiang vakin ka ring lo.

A la ngài reng, a hmel ania ka tih. A lang upa hran miah lo, mahse a chèr deuh ka ti a, nun a chèn nasa deuh pawh a ni maithei. Kum 4 lai ka hmu tawh lo nain a lo puitlin sawt chu ka ring chuang lo.

"Ka hmu chák che a."

A la káwlhráwng reng a nih hi. A duhnaah chuan zah leh țih pawh a nei lo reng a ni.

"Eng atán maw?"

"Ka hmu chák che mawle."

"Thil dik lo a nih chu."

"Eng nge a dik lohna?"

"Naktuk maia pasal nei tur ka nih hi, ho tè-ah a hmingchhiat theih, hmeichhe tán phei chuan."

"Fìmkhur leh hle mai."

"Ka nihdan ve reng alawm, kan pianpui nungchang kan thlák zung zung thei hleinem."

"Min sawichhan kher lo la?"

A lo inman ve khawp e.

"Pasal neih pawh i lo ngam ve tawh a, i lo puitling tak tak a nih hi."

A va ngeiawm tak.

"Nia, lèn tar bìk thu a awm lo alawm. Nangni, in tluang zèl em? Naute a tha zel maw?" Thudang sawipui a ngai tlat. Ka chanchin ringawt sawi chu ka duh bìk lo.

"Ka țhen tawh."

Maw?!!! A nupui a ţhen tawh maw? Engtikah? Engvang nge ni ang le?

"Engtizia nge?"

"Ka țhen a ni mai."

"Ințhen hi a țha lo asin."

"Sawi lo teh."

Makti rilru deuh hian ka en reng a, ka țawng duh ta lo. Nia, thil țha sawipui leh zilh dawn kha chuan min ngawihtìr hmak țhin reng a ni. Ka inrawlh lohna turah ka lo inrawlh leh palh a ni ang e.

"Pasal i neih tur pawh min hrilh lo."

A zah lohzia hi. Engtin nge ka bialpa hlui, chu pawh nupui nei tawh, kum 4 chuang inhmu tawh lo hian ka hrilh a rin theih zawk le?

"Ka lung a áwi lo hle mai."

Lehnghal chuan. Ka thin a rim țèp, he pa bulah hian ka insùm zo lo hi ka áng ang tih ka hláu. Chuvang chuan ka ngáwi reng ringawt a.

"I hmangaih em?"

"I tán țangkaina a nei lo ve."

"Nei tehreng mai, kei min hmangaih ang khan i hmangaih ve em?"

"Lo buai suh."

"Buai a ngai, ka buaina ber i ni."

"A pawi hle mai, lo buai tawh suh, ka'n haw tawh ang e."

Christina a rawn lang ve chiah e, tray-in no pathum leh bowl-tè ah kurtai a rawn cháwi a.

" Ka rawn chho har ta deuh a, hei thingpui háng leh kurtai, a tui dawn lutuk"a rawn ti ham ham a.

"Ka haw tawh ang e."

"Awihawm loh lutuk, thingpui hi in zo phawt la, i haw dawn nia."

Rilru bet lo deuhin ka táwi hrat hrat a, Christina hi ka ngei deuh tlat, he pa min hmuhtìr a duh vang hi a nih chiah hi, léngah min sáwm ni.

"Mahlim, engtikah nge i phei leh dawn?"tiin ka țhiani chuan a be nghal sawk sawk a.

"Ka awmdan tur ka la hre lo."

"In chhungkuain em ni in lo phei?"

"Ni lo,Keimahin."

"Inhmuh loh chhung a rei ta vang vang bawk a, i chèr ta deuh em áw ka ti."

"Chuti mi? Sarah, thingpui kha in rawh, i tui a hál kha," Leh daih chuan. Ani hian ka tuihál pawh a tireh vek alawm, min tilungawi lo lutuk a.

Christina chuan min rawn enin," In rawh, kurtai hi vawiina lo thleng ania, a tui asin,"a ti luam a.

Ka lung a áwi vak loh avangin ka țawng peih lo. Thingpui chu ka la a, Mahlima hnaih lo lamah, long chair-ah chuan ka țhu thla a.

"Mahlim, Sarah pasal neihnaah chuan i lo kal ve ang chu, dar 1 kha hunserh a ni ang a,hlim takin hun kan hmang ang chu tiraw?"

Ka melh duh lo, en duh lo mah ila min en reng tih ka hre tho.

"Pasal a neih ka phal dawn em ni le?"

"Nia, tiraw? A phùr tawh ropui ania aw."

"A ni maw?!!!"

LALHLIMPUIA - 3 By Dingdi Pachuau

Thingpui chu in thuai thuaia haw thuai ka duh. Mahse, a sa angreng a, sá lah ka ngam lo ropui si.

"Ka nupui ni tura ka sáwm lai khan a duh loh tehlul nen."

He pa hi, thil a va hre rei thei tak. Khatih laite kha chuan ka la naupang a, lehkha ka la zir bawk. Pasal neih ka la ngam lo hrim hrim.

"Engtik laiin nge i lo sáwm a?"

"Plus-two ka pass hnu khan."

Za tak hian a nui awr awr a, kei chu awm ve lo ang hmakin alawm an titi le.

"Chutih laite chuan nupui neih pawh i ngam tawh hrim hrim em ni le? Sarah pawh college a la rap lo aniah."

"Ngam lo ila ka sáwm dawn em ni?"

"In la naupang âwm èm a.."

"Inneihna hi upat hnuah kher a thleng tur tihna a ni lo."

"Ni chuang lo ve. Mahse, in la naupang dùn dawn em a, chhungkaw din tur chuan ngaihtuah tur a tam èm a ka ti mai mai mawle."

"Ngaihtuah tur chu inneih hma leh hnuah a tam dan a inang reng."

"Lo sawi zel ula, kei chu ka lo va haw ang e." Ka ding chhuak nghal a.

"A la hma alawm."

"Ka va thlah ang che."

"A ngai lo, ka lawm e. Thangi, i phone min lo hmantir teh."

"In hnuaiah ka charge daih asin, ka zu la ang e,"tih leh tlán thlak a rual ta nghal a.

"Ka phone pawh a hman theih reng sia?"

"Ka hmang tlukin ka lawm e."

"Ngatinge hetiang hian i awm tlat a?"

"Engtin nge ka awm?"

"Hmana mi kha i ang tawh lo."

"Ka puitling tawh alawm."

"Ka hria, pasal neih pawh i ngam tawh."

Ka ngawi ta daih. Engmah sawi duh hi a țul tawh lo ve.

"Hmána Sarah kha ka ngái."

"A awm tawh lo."

"Hmána Sarah kha chuan keimah lo midang pasala neih a tum lo țhin sia..."

Thil hriat rei theih lutuk pawh hi a lo țha lo tawp mai.

"Hmana mi kha chu naupang Sarah, duh duha bum theih a ni. Ani chu a awm tawh lo, tuna mi hi chu Sarah, mi puitling a ni tawh."

"Hmána Sarah kha ka duh hle a, tuna Sarah, nula puitling ni ta hi ka duh lehzualin ka hria."

Ka ngawi leh ta. Christina pawh hi rawn chho har reuh lutuk mai, hawsan daih ka duh.

"Ka thlah ang che."

"I hâwnna lam tur a ni hleinem, a buaithlak mai mai."

"Ka hruai haw ang che."

Ka duh vak lo nain a pawi ka ti lo mai ang. A laka nunrawn viau pawh hi awmzia a awm chuang hleinem le.

Christina nen chuan Step-ah kan intáwk a, phone chu a lo hùm ve rán a.

"A ngai tawh lo mai. Ka haw tawh ang e."

"Um, páwn thleng ka thlah ang che u."

Garage bulah a motor a lo park daih vangin ka lo hmu lo a nih hi. Hei chu car pawl kha ni lovin Bolero vár a ni thung, a number a la thar kher mai, an la thar a ni chiang.

"A hmaah khan aw."

A hnung ka hawng lui a, ka țhu lùt that a, ani pawh chu driver seat-ah chuan țhu lùtin motor chu a start chuang lo va.

"A hmaah hian,"tiin a bul chu a bèng thap thap a, he pa luhlulzia hi chu ka hre ve tawh khawp mai, chuan a thinchhe hle bawk.

"Christina hmuh láia inhnial chiam hi ka duh lo ania, rawn țhu rawh."

Christina chuan min lo la thlìr reng a, nia, inhnial buai rei ka duh loh chuan ka țhutchhoh mai a ngai.

A sir táwpah ka țhu a, ka țhutdan a hmuh chuan a nui sak a.

"Ka seh dawn lo che, min hláu suh."

"Ka hlau lo che."

"A țhat nasat chu."

Kan tlánchhuah chuan Christina chuan a kut a rawn vai lauh lauh a, kei pawhin ka vai lêt ve a.

"Ka ngaihzia che hi i hria em?"

Ka chháng duh lo, ho mai mai. Ani dáwtsawi leh țawngkam thiam hian ka tán awmzia a nei tawh lo ve. Maimichhìngin ka inkuangkuah thán a, ka lu chuan seat hnung chu ka nghèng dar dar a.

"Ka ngái takzet che a ni. Ka ngaihtuahnaah i awm reng a, thil dang ka ngaihtuah thei ngai lo."

Daw peih lutuk. Tihian ngaihthlaksak mai mai ila, a sawi peih chhung chu sawi mai mai teh se.

Kan thlen dawn tawh ringin ka han meng a, kan awmna lai chu ka hai țèp. Kan in awmna lam a ni miah lo.

"Hei, khawilai nge ni a?!!! Ding teh."

A ding miah lo, a tlân chak sauh mai.

"Khawngaihin, ding teh, ka chhuk duh."

Kan tlánna lai hi zán a nih avangin ka hrethiam lo țép a, mahse Lungláwn kan thleng ruai tawh tih ka hre leh chawpchilh a.

"Khawiah nge min kalpui i tum?"

"Keimah lo pasal i nei dawn lo."

Min rùkbo a tum chiang.

"Min tlánbopui thei lovang, naktuk lawkah pasal ka nei tawh dawn asin. Mahlim, khawngaihin, min hawpui hrám teh, ka ngèn che, tlân lét leh hrâm rawh." A luhlul em mai, a khawngaihna ka ngen a ngái a ni.

"A theih loh."

"Khawngaihin, ka chantur min ngaihtuahpui teh, naktukah keimah ber ka awm si loh chuan ka chhungte mangan turzia ngaihtuah la, khawngaihin min létpui hrám rawh."

Min en lo chuan a hma áia chakin a tlán leh ta záwk a, a rùk tak chuan ka hláu hle, hlâu anga lan erawh ka duh lo viau nain thup erawh a har.

"Mahlim, khawngaihin?"

"Kan haw dawn alawm, ka inah, ni lo, kan pahniha inah."

"Ramhuaipa, ding vat rawh, ka chhuk duh." Ka au ta ngheng mai, ka thin a rim bákah ka chhungte ka ngaihtuah lo thei lo.

A ding lo mai ni lovin a tlán muang chhin lo reng reng. Motor tawh tur a ván em avangin a tlán chak hle bawk.

He pa khawngaih dìl hian awmzia a nei lo ve.

Kan chuanna kawngkhar chu ka'n sáwi chhin a,a che eih lo.

"Ka lock vek, i hawng thei chuang lovang."

"I rápthlák hle mai."

"I duh duh i sawi thei ang."

"Hremhmunah kal rawh."

"Ka kal ngun tawh e."

Ka mit ka chhìng vang vang a. Ka nute chuan ka haw hun min lo ngaicháng reng awm si a. Tunah dar 10 a ri țép tawh ang chu. Tluanga khan min rawn sáwm haw maithei a, ni lo, ka call loh chuan min sáwm haw lovang. Ka phone ka keng lo kher kher chu ka inhaw thar lutuk, tihngaihna a awm tawh dèr si lo.

U Zuala ka ngaihtuah leh a,rilru hlim deuhin naktuka kan inneihna tur vel a ngaihtuah ngei ang chu. Mahse tuna ka awmdan nen chuan a va inpersan dawn em... kan inneihna chu a thleng thei dawn ta lo chu a nih hmel si. A rilru a na ngawt ang chu, a zak em em bawk ang a, ka chungchang Christina an záwt chiang ang a, a va zahthlák dawn tak em!

Min ring chhe ngawt ang chu. Mi rinawm lo leh leplerh hmuhin min hmu ngei dawn si a, min ten nhawt ang. A rilru na tur mawlh chu hrehawm ka ti, ka chhungte chunga a rilru put dan tur thlengte ka ngaihtuah kái zel a.

Ka pa a zak ngawt ang chu, a fanu rangkachak ka ni miau a. Inneih dawn zana a fanu, tlangval dang nena tlándun ta daih chu tu pa mah hian an duh lo tawp ang, ka pa phei chuan min ring si a, amah tizaktu ka nih a ring ngai lo. Mahse, tuna ka awmdan avanga a zah dan turzia hi...

Ka khawngaih lutuk chu ka mittui a hnái kuar mai. Keimah ka inkhawngaih bawk, a chhan chu ka nih loh dan deuhin miin min hmu tawh dawn a ni. Mi tenawm, rinawm lo, pasal neih dawn zána tlangval dang inrùkbo tir thei tiin min hre vek tawh dawn a ni, ka mizia leh ka nun dan lo ang deuha min hmu tawh tur chu ka rilru a ná, ka mittui a far záih a.

"Khawngaih takin min lètpui leh hrám rawh, Mahlim. Khawngaihin, ka ngèn ngawih ngawih a che." Ka țap țuau mai.

"Thutiam hlen lo chìng mi i nih ka duh lo."

"Thu ka tiam lo."

"I hre tawh nange? Ka la hrereng ania, i thutiam ka vawnhimpui dawn che a nih hi."

Ka thinrim ém avang chuan," Thutiam anchhedawng a nih chu," ka ti tuar a, ka tiam lái pawh ka hre lo ve. Dáwt bák va ni suh.

"I thinrim rih a nih kha, âng bawrh bawrh rawh, nakin deuhah i zia mai ang."

Ka inhnìt chhuak ta hlap hlap a, ka insùm thei thláwt lo. Ka thinrim bawk si, ka inkhawngaih bawk si, tihtheih ka nei lo bawk si nen, ka áwmchhung hi a táwt tlat a ni, ka țah chhuah hian ka thâwl deuh mahna.

Ka chhùngte mawlh chu..an zak dawn em asin. Ka nu phei chu a zak lutuk a țap hial ang, khawlaiah pawh a chhuak ngam lo ang, a rilru a na dawn lutuk. Ka pa pawh, a rin loh ang deuhin ka awm si a, a thin a rim ang a, a zak em em bawk ang a, min hmuh leh pawh a duh tawh lo hial ang. Tluanga lah class châwl meuh meuhin kâr khat a rawn cháwl phei ania, nghawng a va nei tam dawn em...

U Zuala mawlh chu...a nu chu a âng nasa ngawt ang. Ka chan a va chhe dawn tak em!..

Ka țah ka bân hnu chuan ka mut a chhuak selh selhin ka hria. A țawng lo va, ka țawng bík lo ang. Min be mahse ka chhâng hek lovang.

"Muthilh tum rawh."

A sawi a ngai lo chiang lutuk. Ka duh leh ka mu ang a, ka duh loh leh ka mu lovang, a thu lo lutuk.

A lam pawh ka hawi duh lo, motor kawngkhar darthlalang chu ka nghéng a, sir lam chu ka hawi tlat bawk a.

"Luhlul chhuah lo la, i inhrem mai mai a ni."

A thu angin ka awm lovang, nia, ka inhrem tih chu ka hria, mahse a hmel ka hmu peih lo.

"A nuam thei ang ber khan awm tum rawh, kan la tlán thui dawn si. I cháu lutuk palh ang."

Aizáwlah min pheipui a tum chiang mai. Kawng hnái lam a awm reng si a, tinge kawng kual lamah min tlânpui tlat le?

Ka maimichhìn reng avang chuan ka mut a chhuak telh telh mai, chubákah tape a play riai riai bawk a, chu chuan min áwi pah a, ka muthilh lai pawh ka hre ta lo.

*****************

"Ka lehkhabu hi tunge lei duh? Tlâwm tèin ka phal ania."

Chu thu sawitupa chu kan en țhap a, chu pa chuan kan hâk ang tho uniform kamis vár banbùl leh kekawr navy blue a ha a, khua a lum tehchiam loh avangin uniform sweater navy blue a ha bawk. A lu káwng mal, vun fai sar mai leh uniform chu a inhmeh ka ti kher mai.

Ka bula țhu Helen-i chuan,"Engzatin nge i phal?"a lo ti vat a.

"Tlâwm tèin, i ngam zát zátin a ni mai."

Cl-xi commerce GHSS Lungleiah ka zir țan chiah a, vawiin hi class țan ni a ni. Sikul naupang kan tam hle mai a, building thlang lamah high school section awmin keini lam chu building chhak lamah kan awm a,commerce zirlai hi sec C-ah kan awm a, kan zavaiin 50 kan ni.

Lehkhabu an inleitìr hnuah chuan chu pa chu kan classroom ațang chuan a chhuak ta nghal a. Helen-i chuan," A chhe lo hle mai a... students mipa zingah chuan a chhe lo berin ka ring,"a ti sap sap a. Kei chu ka lo nui ringawt a, a hmel chu a chhe lo alawm.

Thian ka la nei lo va, hmelhriat pawh ka nei lo. Helen-i chu ka bula a țhut avang chuan kan inbe ta deuh a, lunch break a lo nih chuan," Hawh, ka nute canteen-ah châwl ang," tiin min sáwm a, țhian ka neih loh avangin țhian ka neih a ngái a, ka bula a țhut avang leh a fel seuh seuh reuh em avangin leh kan in a hlat deuh avang chuan 'aw' ka pawh ve ta ringawt a.

A nu chu police a lo ni a, police canteen-ah chuan kan cháwl ve ta ringawt a, ka inthlahrung khawp mai. Helen-i chuan min be seuh seuh reng a, a nu pawh a fel khawp mai.

Ka ni khatna chu hrehawm ti lo deuhin ka hmang ral ve ta phawt a, ina ka haw thleng chu ka cousin Mawii chuan min lo ko chùl a.

Ka pite inah ka awm a, thingtlang àțanga khawpuia zirna chhunzawm ka duh miau avangin ka pite hi bél chawt ka ni. Ka pi ka tih hian ka pa nu emaw ka nu nu emaw ni lovin ka pi (ka nu nu)pa farnu fa a ni. Kan inchhùnna a hla deuh tawh náin kan in-close phian a, kan inhlat vak ang pawhin a lang lo.

Sarah Lalvènhimi ka ni a, ka țhiante chuan 'Sarah' tiin min ko țhin a, ka chhùngte erawh chuan 'Vèni' min ti thung. Lehkhathiam thei tak ka ni lo va, tunah kum 16-na ka hmang mék a, thingtlang lama ka awm chawt avangin khawpui nun ka hre lo hle a, ka zakzumin ka inthlahrung thei hle bawk a, ka pite pawh hian min hrethiam tawp mai. Mawii hi awm lo se chuan nuam lo ka ti viauin ka ring. Mawii hian u mipa a nei a, mahse ani chu tlangval a ni tawh a, college a kal mek. Ka awmna a la rei loh avangin ka la nèl lo khawp mai.

Room hran ka nei ve a, ka room hi a zím reuh nain ka duhtawk khawp mai. Ka pite hi an fel hrim hrim bawk a, engmah ka tih an phal lo, 'lehkha zir turin alawm i lo awm' an ti a, mahse ka tlângnél theihna tur erawh chuan min be peih viau a, chhuat nawh leh hmunphiah, insùk erawh ka tihpui tho.

Ka pi leh pu, Mawii u leh Mawii nu nén chauh kan chéng a, ka pi leh pu hi an la tar lo hle a, engkim an la thawk vek thei a ni. Ka pu hi zirtirtu pension a ni a, Mawii nu Nu Maengi ve thung hi chu a pasal a boral avangin pasal dang a ngaihven lo va, Mawii leh a u Rina hi a țùlpui a ni deuh mai. Dâwr lian vak lo a nei ve a, rin aiin a hlâwk phian mai. Pawisa pawh an ngah phianin ka ring, an chhungkua an inngeih si a, an bula awm a nuam ka ti.

Ka pite hian fa 3 chiah an nei a, a upa ber mipa chu Bangalore-ah hnathawkin an chhungin an awm a, Nu Maengi u hmeichhia hi pasal neiin Ramthar-ah tho an awm a, kan inhnaih tehchiam lo. Ramthar mawng lamah an awm a, keini hi chu kawngpui bul chétah kan awm thung.

Phone ka nei lo va, neih ngai pawh ka ti lêm lo. Zirlai ka la ni a, nakinah chuan loh theih lohin ka neih chu a la țùl ngei ang. Ka pite hian home phone an nei a, chutah chuan ka chhungte'n min rawn phone mai, ka pain phone neih a la phal loh bâkah a țùlna ka hre bawk lo.

Zan khat chu U Rina nen chauh kan awm a,midang chu Nu Maengi u hmeichhia Nu Saiite inah an léng a, an fapa birthday an lâwm dawnin ka hria. Assignment ka ngah avangin kei chu ka kal thei lo hrim hrim a, U Rina hian min awmpui ni berin ka hria.

Phone a rawn ri val val a, U Rina chu a room-a a awm daih avangin phone chu ka chhâng a.

"Hello?"

"U Vèn, Mahlima i hria em?" Mawii a lo ni a.

"Ka va hre lo ve?"

"Ani chuan a hria che a, hei lo lén an tum a, kan in awmna an hre lo va, ka hrilh dawn em?"

Ka thin a phu hlawp hlawp mai. Tunge chu pa chu ka hre bawk si lo, chubákah tlangval ka hmelhriat loh inléng neih ka duh teuh lo.

Hláuthawng deuh hian,"Mawii, hrilh miah suh aw, ka hre miah lo. I hrilh vaih aw,"ka ti thuai thuai a.

A nui hak hak a," Aw le, ka hrilh lovang, a chhe lo lutuk," a nui leh ar ar a, ka thin phun nasa lutuk chu ka dawm vang vang a.

U Rina, a room ațanga lo chhuk chu ," U Rin, mi an lokal a nih chuan 'a awm lo' lo ti rawh aw,"ka ti sawk sawk a, ka tha a la khùr dar dar thei nia.

"Aw le, tunge lo kal tum reng reng a?"

"Ka hre bìk lo, kawngka hi ka'n kalh daih ang e."

LALHLIMPUIA - 4 By Dingdi Pachuau

A tuk zìngah Mawii chu ka room-ah rawn lùtin a rawn nui pút pút a.

"U Vên, a hmél chhe lo lutuk."

"Tu chu maw?!" Ka hre lo der tlat a.

"Mahlima mawle, nizânah ka rawn phone che kha."

"Sawi tawh suh, a zahthlak."

"A rûi deuhin ka hria, a țhiante pathum nen an niin ka hria, kawta Apuiate nen kan awm lai ania, 'Sarah Lalvénhimi' tiin a rawn zawng che a."

A va zahthlak tak em! Midangin an hria ang tih ka hlau, kawta Mawiite lo awm lai a ni hlauh chu tihzia ka ti hnuhnawh kher mai.

"Mahlima chu maw, in sikulah a kal ve tho, cl - xii a zir mek, commerce tho a la, a sawi danin."

Hm, Helen-i zawt ila, a hriat dawn chu. Ani chu Lungleia lo chèng reng tawh ania, a hre deuhin ka ring.

"Kan in awmna i hrilh lo chu ka lawm hle a ni."

"'Hrilh suh' i tih kha. Mahse, a hmelțha ka ti e,"a ti țalh a.

Classroom chu ka thlen tlái deuh hret avangin Helen-i bulah chuan midang an lo țhu tawh a, țhutna áwl awmah chuan ka țhu ve tawp a, ka bula rawn țhu chu spec vuah, sam kir lam deuh, ngo zet mai a ni a, a hmel a ţha lém lo nain a țawng duhin a fel kher mai. A hming chu Christina a ni.

Short break kan neih laiin kan class- a mite chu Mahlima, kan senior ami an hriat leh hriat loh thuphungin ka zâwt mai mai a, Helen-i bula țhu Mami chuan,"Ka hria, tinge i star a ni maw?"a lo ti var a.

"Aih, ka hre duh deuh mai mai a."

"Saw, sawlaia saw a awm reng saw, he's a friend of mine."

Ka hawi phei vat a, kan class-a lehkhabu rawn zuar kha a lo ni!!!

Min lo en reng tih ka hmuh chuan ka hawisawn nghal vat a, ka thin chu a rawn phu rang kher mai.

Tleirawl hmelțha ka ni lova, ka vun a ngo hran hek lo. Ka sam ka zuah lova, ka pian pawh a nalh hek lo. Mipa lam hi ka ngaihtuah ngai loh hrim hrim bákah ngaihzawng phei chu ka la nei lo hrim hrim. Star pawh ka nei hek lo, a chhan chu lehkha ka la zir bâkah mipa reng reng hian min duh ve theih ka ring ngai lo. Ka inchei ve pawhin mipa mit la turin ka inchei ngai lo, hák nuam ka tih leh nalh ka tih zawngin ka inchei mai țhin.

Story chhiar erawh ka hrát khawp. Lehkhabu chhiar ka peih hle bawk. Ka pa nen lehkha chhiar kan peih em avangin ka pa hian lehkhabu țha a lei nasa țhin a, ka chhiarchhuak parh țhin.

Hemi ni ațang hian Helen-i bulah chuan ka țhu tawh lo, Christina bulah ka țhu char char, kan inmil hle a, kan duhzawng leh kan sawi duhzawng, music kan ngainat zawng, lehkhabu kan chhiar duhzawng leh kan ei duhzawng thlengin a inang tawp. Kan inkáwmngeih viau pawh hi a mak love.

Kan classroom-ah chuan Mahlima chu a rawn kal zing ta viau mai. A țantìrah chuan Helen-ite bulah a rawn țhu phawt a, Helen-i țhiannu Mami chu a țhian a nih vang a ni mahna, ka ngaihven duh lo.

Classroom ka pan chho tur step-a ka kal hi min chhaih an chìng chho țan phawt a, veranda ațangin min rawn thlìrthla țhin a, ka va lâi thei tak. A țhiante lah chu fiamthu duh leh mi zahpah nei tehchiam lo an ni bawk si a, a rùkin ka zak țhin lutuk.

"Eu, Mahlim, khu, Sarah a lo chho mék ania, i sawi ngun em kha. A chhe vak lo ka ti."

"Ka lo sawipui dawn che mi?"

"In inhmeh dawn e..."

"Ani pawh khu a lâi ve tho a nih khu."

"Sarah, Mahlima'n a star che."

Hetiang hi min chhaih țhin dan chu a ni, kan in awmna bul velah class kal rualpui tur an awm si lova, keimaha kal hi ka hreh em em țhin, keimaha ka kal chuan min chhaih ngei ngei. School an thleng hma thei si a, min fiamna thu hriat ka hreh lutuk hi school thlen dawnah kan section ami kher lo pawh building chhak lama kal chho tur ka nghák hram hram țhin. Christina lah hi a lo kal tlái thei si a, nghah ka duh viau pawh hian keimahin ka chho leh nge nge țhin.

Mahlima hi an chhungkua an awmthei viau a nih ka ring. Car páwl, thar ver vawrin class a rawn kal ziah a, a țhian kawmte reng reng pawh an chezia leh nunphung hrim hrim mi naran chunga léng an ni. A țhiante'n an boss en deuh berin ka hria, a kilkáwitu ber a ni tlat.

Farm vengah an awm a,keini Ramtharah. Kawng bul maia awm kan nih avangin a car páwl ngei hmanga kawnga a tlán hi ka hmu zoh zoh.

Tlai khat chu Mawii chuan pangpar tui kan pék lai chuan," U Vèn, Mahlimate chhungkua hi an hausa lutuk an ti asin. Kan class-ah an veng ami a awm a, chu chuan a sawi. Nau hmeichhe pakhat a nei a, dawr lian deuh deuh pahnih Aizawlah an nei a, Lungleiah hian pakhat an nei bawk. A pa hi maw, hna sáng deuh chelh ania, chuan, a pa unaute zinga pakhat hi Minister a ni mék bawk. I vânnei dawn e,"a ti sar sar a.

"I tizahthlak , sawi tawh suh."

"A, a hmêlțhat em hi, inngaizawng ru."

"Zirlai kan nih hi. Chubakah kan la naupang bawk."

"Kei ang rual pawh ngaihzawng nei ka hre țeuh, nang phei chu kei aiin i upa lehnghal a, nei daih rawh."

Kan pahniha kan awm tawh hlek chuan Mahlima chungcháng chu min sawipui ziah. Room-a lehkha ka zir laiin a lo lut thùl, a room aiin ka room-a awm a tam zawkin ka ring, ka khum erawh a tèt em avangin min riahpui lo mai mai niin ka hria.

Zingah ni chhuak a lang vah a, fùr hunpui a nih tawh avangin ruah a sur duh hle a, school kal pawhin nihliap pai ziah a ngai tawh.

Rin láwk ang ngeiin chawhnu lamah a rawn sùr leh buan buan a, last period zawh hnuah chuan a hán ve deuh tawh ang chu maw. Ryah sùr tam deuh laia haw chu nihliap khum chung pawhin kan thawmhnaw a hnawm chup duh a, pheikhawk phei chu a huh vek țhin avangin ruah chu hân deuh hman se ka ti.

Ka duhthusám erawh a thleng dik lo a nih hmel. Last period zawh hnuah pawh ruah chu a baw tlawrh tlawrh mai, midang pawhin ruah hãn hun chu an nghâk ve țhap tho. Class-ah kan la awm khawm a, Nihliap keng hmanhmawh deuhho chu an haw lui tho.

Christina chu a haw, a chhan chu eirawng báwl a ngai a, haw hmâ a ngai a ni.

Ka țhu ngar mai a, midang chu ninhleiin an inchhaih zawr zawr a, an tlân kual zawr zawr bawk.

"Sarah?"

Ka hawichhuak chiah chu Mahlima, hnâi tâwka min lo en rengtu chu ka hmu chiang kher mai.

"Mahlima ka nia,I bulah ka lo țhu ve thei ang em?" Polite deuhin min zawt a.

"Lo țhu rawh." Ka tawlhsawn pah bawk a.

"Tawlhsawn kher lo la?"

A țhutna tur a zìm em avanga tawlhsawn ka ni pakhat a, chubâkah ka zak bawk.

"Nihliap i keng lo mi?"

"Keng e."

"Thlah i duh em?"

"Ka lawm e, ngai lo ni mai rawh se."

Biak dan tur ka hre bawk si lova, nuam lo ka ti asin. Min hnaih hle bawk si a, ka thinphu dup dup chu a hre pha ang tih ka hlau, mahse midang an bengchheng a, a zia phian.

"Zana lo lén i phal em?"

Makti deuh hian ka melh nghal vat a.

"Aih."

A nui ta sak mai. A hmélțhatzia mai chuh..a biang dinglamah biangsum a la nei zui, Lalpa, he pa zûnah hian min uaitir lul suh.

"Ngati? Lo lén ka châk asin."

"Aih, léng lovang."

Ka chhãnna chuan a nuih a la tizá a ni ang, a la nui deuh.

"In in awmna ka hre tawh."

"Ni lo, lo lêng miah suh."

"Chuti, ka bialnu ni rawh."

Ka sen țawn țawn ang chu. En pawh ka en ngam tawh lo, hetiang teh tawp hi chu ka beisei lo khawp mai.

"I hmélțha ka ti e."

Leh ta nghal nghal chuan. Ka zak lutuk chu khùk chem chema khùk ral daih ka chák, a lawmawm lamah pawh a kal lo, ka zak a ni tawp, ka hmèlțha bawk si lo.

"I tizahthlak em mai."

Ka malchunga ka kut chu a rawn vuan chat a, midangin min hmuh ka hlauh em avang chuan ka kut chu lâksawn ka tum nghal a, mahse a hùm nghet tlat.

"Tál suh, ka vuan ringawt ang."

"Midangin min hmu ang e."

"Min hmu se, eng nge pawi?"

Midangin min hmuh loh hrâm ka beisei takzet.

"Lo lén i phal loh chuan hetia i kut ka vawn tal hi chu phal mai la."

Nia, a lo lén ái chuan kut vawn mai mai chu phal ang, midang pawhin min rawn hmu kher nang.

"Sarah, naktuk lunch break-ah dawrah châwl ila?"

A zahthlak. Miin kan inzui an hmuh phei chuan min fiam nasa dawn lutuk. Chubâkah vawikhat min sáwmnaa kal nghal ruak ruakte chu...

"Christina nen tiffin kan pái țhin a."

"Tiffin pâi chung pawhin a chawlh theih tho."

Țha tak taka ka biak loh chuan zànah lo lén a tum ang tih ka hlau bawk si a, a buaithlak tawp.

"Ka lo be chhin phawt ang e."

Ka kut chu a hmer neuh neuh reng a, a kut ném leh lum vang vang chu ka feel vang vang thei.

"I nghâwnga khuavang awm hi i inhmeh lutuk, ka fáwp châk."

Ka harh kâwk mai, ka kut a chelh loh lam chuan ka nghawng khuavang awmna lai chu ka hup vat a.

"Hup mah la, ka mitthla thiam tho."

He pa hi a hlauhawm tlat. Mipa ka belhbul ngai loh vang nge, mipa ka kawm ngai loh vang nge, hetiang ţawngkam hriat hi nuam ka ti miah lo, zahthlak ka ti.

"Vawiin ațang hian ka bialnu i ni tih official-in ka puang e."

Ka duh ve leh duh ve loh pawh min zawt lo reng reng. Chhiat chu a chhe lo alawm, ka duh leh duh loh pawh ka hre lo, ka hmuh leh a bula ka awm apianga ka lungphu rang țhin lutuk erawh ka thunun thei lo fo.

"Phone i nei em?"

"Aih."

A ngâwi vang vang a, chutah,"Ka thlah chu i duh lo tak tak maw?"a ti leh a.

"Aw, duh lo."

"Ruahsur hnuaia kea i kal ka phal hleinem."

A zak miah si lova, kei lah ka zak si.

Ruah a hán țan deuh a ni ang, midang pawh haw an tum țan ta.

"Ruah a hân țan, a haw theih tawh a ni ang."

Ka kut hùm nghet sauhin," I kut ka thlah phal loh chuan i haw thei lo,"a ti sap a.

"Hetiang hian awm suh,"tih pahin ka kut chu tâlchhuah ka tum a.

"Thil pakhat sawi phawt la?"

"A ho em mai."

"I kut thlah i duh lo tihna a nih chu."

"Khawngaihin, ka haw duh ania."

"Sawi mai la?"

"Eng?"

"Ka bialnu i nih tur thu mawle."

"A naupanchhiatthlak em mai."

Ka kut chu a hùm nghet leh ta sauh. He pa hian eng nge a hriat ni, a hùm rei peih áwm lo em mai.

Midang an haw țan ta, ka rilru a hmanhmawh ve țan ta deuh, ka kut lah thlah a tum hmel bawk si lohva.

"Min thlah teh, ka haw duh ania."

Nui var var pah hian," A tâwpah chuan ka thlah i duh ta mai alawm, kal nghal ila?"a ti nghal a.

"Ni lo, i hresual a ni ang, ka kut hi ania thlah la ka tih chu."

Rùm nghat pah hian,"Sawi phawt rawh,"a ti leh tlat a.

"I va ho tak, ka haw duh."

"Chuti, sawi mai la?"

A va luhlul tak em!! A hmél en aiin a luhlul daih mai. Chhuanlam siam tur ka va duh tak em!

"In ina ka rawn lén i duh lo tiraw?"

"Aw, duh lo."

"I sawi duh loh chuan zanah ka lo léng a ni mai."

He pa hian mi dan chèp dan a va thiam tak em..

"Aih, léng lovang, hun min pe phawt rawh." Tihngaihna ka hre lo, inngaihtuahna hun min pe turin ka dìl ringawt.

"Um, naktuk lunch break-ah aw."

Ka kut chu thlahin Classroom ațang chuan a chhuak nghal nal nal mai. Midang an awm tam tawh lo va, a awm chhunte pawhin min ngaihsak vak lova, ka lâwm hle a ni.

A tùk ațang chuan a bialnu cheiin min chei țan ringawt, lunch break-ah chuan ngaihzawng neih nan a la hma ka tih thu leh lehkha zir laia ngaihzawng neih a țhat lohzia chu ka hrilh a, a bengrawngah a thun lo nge, engahmah min ngai lo zawk pawh ka hre lo, class âwlah leh short break, lunch break-ahte ka bulah hlìr a awm. Mipa dang tân hun a siam lo reng reng, Christina lah chu a kâwm ngeih phian a, lunch break-ah ni se, chhuahpui loh theih lohin min kar dan a thiam a, min care a, kei pawhin ka tum loh deuhin rilru ka pe tial tial a, ngaihzawng neih tum lo deuh khan thla hnih thum hnuah chuan duh tak téin ka duh tawh a,kan ina lo lén erawh ka phal lo. Chu chu min awihsak ve tlat a, Christina-te inah kan inhmu mai țhin.

Zirlai ni chungin zu a in zauh zauh tih ka hria. Ka thil duh loh ber a ni a, ka sawisèl fak lo nain ka duh vak lo tih a hre ve tho. A lo tih țhan tawh a nih vangin sim harsa a tih thu a sawi a, pawisaah an harsa lém lo bawk sia, ka bialpa mah ni se ka thu ang anga kaltir theih a ni bík lova, thil țha lo erawh ka duhpui lo tih ka hrilh thin thung. Ani pawhin thil țha lote chu a duh bík lo tih a sawi ve tho.

A thawmhnaw leh incheina reng reng branded vek a nih avangin an rethei zawk zawk lo tih a hriat a, ka phù lo tih ka hria. Kei incheina ngaihtuah ngai lo leh make up pawh hmang ngai lo nen hian kan inhmeh hlawl lo tih ka hria a, min duh leh min ngaizawnga min zui tlat mai hi mak ka ti.

******************

Ka taksa kham lutuk avang chuan ka harh zawk a, ka chesawn thei lawk lo lehnghal. Ka harhchian hma deuh chuan ka awmna ka hre lawk lo va, ka inngaihtuah chian deuh hnuah chuan ka hre ta, bolero chhungah ka lo muhil a lo ni, a thim lutuk lo va, ka'n hawi sawn a, driver seat-ah Mahlima muhìl chu ka hmu ta bawk a. Ka thil tawn chu ka ngaihtuah chhuak leh a, tunah hian khawilaiah nge kan awm le? Motor ațang hian tlânchhuak ta ila, motor dang hawnna tur ka hmu mai lo'ng maw?

Motor kawngkhar a la lock tlat. Ka zun pawh a chhuak, Ramhuaipa lah chu a mut tui hmel ropui, engtin nge lungmuang deuha a muthilh theih ni?

Ka harhchian tâk em avang chuan ka muhìl thei tawh si lova, tihtur a va váng tak em... inngaihtuah kual vak vak kha chu awmzia a nei tam lo nain ngaihtuah loh theih a ni lo. Zanin a ral ang a, zìng lama ka chhungte awmdan tur chu..ka ngaihtuah chhunzawm duh tawh lo. Ka rilru hah lutuk chu ka thaw hawk hawk a.

"I lo harh tawh maw?"

Ka phu zawk lehnghal. Biak ka duh lo viau nain kan awmna chin hi hriat ka duh ve tlat.

"Khawi lai hmunah nge kan awm?"

Zìk mar pahin," E.Lungdar kan hnaih tawh"a ti bohva, chutah," Ka mut a chhuak lutuk a, ka han chhìng ve hlek alawm le, i mu țha thei em?"a ti leh a.

Ka chháng tawh lo. Champhaiah min hruai dawn tihna a ni maw?

"I mu theiah ka ngai mai ang, tunah zing dar 3:45 a ni a,ka tlân chak lo ang, mut i tum leh dawn nia."

A hmái chu a tuai thuak thuak a,a mit a sen râm mai. Ka khawngaih thut, motor a khalh a, zanah lehnghal, a nuam lo ngawt ang, kawng a țha tehchiam si lova, chubâkah kei, a chuanpui ber lahin ka muthilhsan daih bawk si.

"I châu a nih kha."

Nui sak chung hian min rawn en a.

"Min ngaihtuah tih hriat chu a lawmawm e, ka chauhna zawng zawng a reh vekin ka hria."

Teuh lo, ka ngaihtuah reng reng lo, min rubotu chungah hian khawngaihna țawngkam ka lantìr thei lo ang, khawngaihna rilru ka neih chu ka paihbo vat a.

"Kan accident ang tih ka hlauh vang a nih kha, ka ngaihtuah reng reng lo che."

"Nang nen chuan eng pawh tawh ka inhuam, accident thlengin."

A â tawh a nih hi,accident thleng thlengte chuan, ni lul lo ve, inhuam lul suh se.

"I â tawh a nih kha."

"Ka âtchilh che tih i hriat kha."

He pa nena titi âi chuan kan hun kal tawh mitthla/ ngaihtuaha suangtuahnaa chén veng veng pawh ka thlang zâwk e.

(Nizanah current a awm lo a, min lo hrethiam hram mai teh u)

LALHLIMPUIA - 5 By Dingdi Pachuau

School sport kan nei a, sikul naupang kan tam tham ve a, commerce zirlai zawng chu house khatah kan awm a, white house kan ni.

Christina nen chuan sport-a kal loha lehkha zir kan tum deuh a,mahse Mahlima chuan a lo phal lo nasa mai. Ka phal loh 'kan ina lén' bawk chu a sawichhuak leh ta a, ka kal lo thei lo. Min vau chu ka ti phal chiah lova, min kar nan erawh a hmang ngun khawp mai.

Ani, sport a lo tithei phian niin, house leader a ni a, a buai zak zak khawp mai. Christina nen chuan engahmah kan chhuak ve lo, keini aia tithei an tam lutuk a.

A tel tawhnaah chuan gold a la deuh zel mai, mak ka ti. Zu a in ve hlek hlek bawk sia, chubakah cigarette a la heh phian zui bawk si a, mahse a la naupan bákah a la ţhalai a, chuvang chu a nih ka ring deuh teh ngawt a.

Dream boy hi chu ka nei ve țhin chiang. Mipa ngo lam hlek, sáng tak, chèr lam deuh, mitmeng mawi tak nei hi pawnlam lan danah chuan ka duhthusam a ni a,a chhan chu ka sáng lo va, ka ngo hran lo va,ka chèr hran lo bawk. Fate neih hunah pianphung hrim hrimah an ngaihtuahawm loh nan, hetiang hi ka nih avangin ka nihna lo ang vek hi ka duh. Chuan,zu in lo, lehkhathiam, fel leh rinawm tak ka duh bawk. Ka țawng tam lutuk loh avangin țawng duh lam deuh leh fel fai tak, mipa pangngai ka duh țhin.

Mahlima thung hi a ngo lutuk hran lo,zu a in zauh zauh, a sáng lutuk lo bawk; mahse, a hniam chuang hauh lo. Chubakah, a bânah tattoo a nei lehnghal, ka ngaihdan țhinah chuan tattoo nei chu awm țha duh vak lovah ka ngâi țhin, chu achhapah, a beng a la verh zui. Ka dream boy hi chu a ni lo chiang palawm, a tattoo leh a beng verh phei hi chu ka ngei lutuk, a pangngai loh thlak ka ti, a bulah erawh ka la sawi miah lo. Mahse, a ha var rual țhat leh a hnár ngùl sáng vah erawh a inhmeh ka ti, chuan a mithmul dum hlap, chhah angreng deuh leh a mitmeng nung ser sawr hian min hìp hle bawk.

Ka classmate-te chuan kan inngaizawng tih an hre vek tawh a, hriat loh theih pawh a ni lo, a lo lùt zing ve em bawk a ni,min fiam zauh an hrát. Chutah lunch break-ah min chhuahpui ziah bawk si, a nuteite restaurant-ah kan kal ziah a,ei man kan châwi ngai lo. Pèk kan tum chhin pawhin a thinrim lek lek țhin, a hnua ka hriat danin a hming chauhin a nutei'n a enkawl a, pawisa tumtu bul ber chu anmahni (Mahlimate) vek an lo ni, nuam ka ti miah lo.

"Vawiin chawhnu chu léng ila?"

"A tihchi loh."

"Ngati maw?"

"Class kal a ngai alawm."

"Vawiin chawhnu chauh chu..."

"Tlánbo ka duh hleinem."

"Kan tlânbo dawn lo, kan léng ringawt dawn."

"Class kal lova lên chu tlanbo nen thuhmun reng alawm."

"A fálin kan inhmuh khát em hi."

"Hmun fál ngainat chu sualna bul."

"Ka bula awm i duh lo tihna mi?"

"Hei, ka awm reng hi."

"Hetiang lo hian ...kuaha fawh che ka duh alawm."

A thusawi chu midangin an hria ang tih ka hlau lutuk. Ka zak bawk si, ka sen țùn țùn ang chu.

"Sawi tawh suh."

"Nge, inngaizawngte inkára thil thleng țhin a ni alawm."

A tidik viau bawk si, mahse ka zak alawm, kut inchelh leh inkuah hi chu ka phalsak mai a, mahse min la fáwp miah lo, hun ka pe lo hrim hrim. Ka zak tlat a, tumahin min la fáwh loh bâkah ka zei lo dawn bawk sia,ka ngaihtuah ringawt pawhin ka zak sa.

"Ka nghák rei tawh che e..."

"Engti turin maw?"

"Fawp tur chein mawle. Bialnu midang ka neihte reng reng hun ka pe ngai miah lo."

Awi, va zahthlak tak.

Ka ngawi reng. Bialpa ka la nei ngai lova, tumah ka la fawp lova, miin min la fawp bìk lo bawk. TV-ahte chuan mi infawp lai chu ka hmu ve fo tawh alawm, thiam lohna tur phei chu ka hre lo, mahse ka zei lo ngawt ang.

"Chawhnu lén i duh si loh chuan tun saturday chu Christina-te inah léng la, inhmu tal ang."

"Nang chu..." Chhuanlam siam tur a vâng dawn si, ka pite ka puih theih ni a ni ve si a, va buaithlak țhin tak.

"Eng nge? Chhuanlam siam i tum leh chiang mai."

A lungawi lo tih a țawng dan ațang chuan a lang chiang hle.

"Ka chhungte ka puih theih ni a ni ve a, min hrethiam hram la?"

A ngawi ta ngar mai.

Thlém dan ka hre lo. A hmain ngaihzawng ka la neih ngai loh mai bakah mipa lungawi lo ka la thlém ngai lo.

"Thinrim lo la, aw... "

A la ngawi tlat, engtin nge ka tih ang?

Saturday-a chhuah âi chuan chawhnu class off hi a fuh zawk mai lo ang maw? Subject hnih chauh niin, Accounting Sir phei chu a zin lehnghal, a vawikhat nán class tlán bo chu ka rilrùk ta a. Mahse nidangah chuan min sawm chhuak thei tawh tur a ni lo, class attendance a pawimawh mai bâkah teaching ngaihthlak a pawimawh hle si a.

"Chawhnu chu léng zawk mai ang, class ka off mai ang e."

Ka lam hawiin a nui nghal var var a, a mit a siai sak bawk a.

"Chuti, kal nghal mai ang hmiang,"phùr zetin a ding chhuak a,min pawt tho ve nghal a.

"Ka bag ka'n la ang e."

A lâk hlanin kei pawhin ka bag chu ka la ve a,uniform haa léng tur kan nih dawn avangin chhinchhiah kan awl hle dawn a, chuvangin mi min hmuh tam lohna lama kal ka duh.

Kan lén lawk tur thu Christina ka hrilh chuan a mitko a sán ák âk a.

"Fìmkhur rawh aw, mahse nuam deuhin hmang la."

"Aw le, ka fìmkhur ang, min ngaihtuah suh."

A car pâwl park-na hi kan building veranda ațangin hawi chhuk ila, a lang thei nghal vek si a, min lo chhaih leh ang tih ka hláu lutuk.

Car-a kan lùt tur chu an lo ehem tliar tliar a, ka zak viau nain ka hawichho duh miah lo va. Mahlima țhiante an nih leh ngei ka ring.

"I țhiante hi an tawrhhlelhawm ve ngawt mai."

"Ka lo hau dawn mi?"

A ngai pawh ka ti chuang lo, mahse a zahthlak ve det.

"Ka zak alawm,"ka ti sap a.

"Engah mah ngai duh suh, an lo léng ve châk a nih kha."

"Khawiah nge kan lén dawn a? Uniform nen kan ni bawk sia?"

"Kan inah i duh em?"

"Maw?!!!"

"Tumah an awm lovang."

An in ka hmu châk viau. Eng ang taka hausa leh awmthei nge an nih pawh hriat a châkawm. Mahse, Mahlima ka duh chhan hi chu an hausak váng a ni lo, amah hi ka duh ve tawp a ni mai.

"Hmun dang ai chuan a țha alawm."

Farm veng panin kan tlán thla ta vang vang a, an in awmna chu ka rin aiin a thlang angreng.

An in hmun erawh a nuam tawp. A záwl zau si, hmun zawl zau deuhah building lian angreng deuh, chháwng hnih a sak hi a lo ding ran a. A zawl chin hual chuan thingkung, mawi deuh deuh a tlár pát a, kawtah chuan pangpar, mawi deuh deuh a lo pár vul chùk a, enkawl ngun an ni tih a hriat hle.

"A mawi hle mai."

"I mawi fé zawk."

Ka va lái lehpek tak.

A va nawm hmel tak em! An in leh compound hmuh ringawt pawhin mi rethei tak chu an ni lo chiang.

"I lo lùt dawn em?"

Ka hawikual nasa lutuk a, zui nacháng pawh ka hre hleinem. Kawngkaah min lo nghák reng tawh niin.

An in chu nuam tak a ni ringawt. A room-ah kan awm a, a uniform chu a thlák nghal daih a. Táwnzau dum leh kekawr bùl dum a ha a, a inthlák chhung chuan a room chu ka lo thlìthlái kual nasa. A room set dan chu a fuh reuh tawp.

"Room i nei nuam hle mai."

"A lawmawm. Lum i ti em?"

"Ti lutuk love."

Room AC a on nghal a.

"Pheikhawk kha hlip la?"

"A ngai hran lo."

"Ei tur ka'n la ang e. Computer-te kha lo on la, music play tur a tam ang."

A kal tawh emaw tiin a room-a darthlalangah chuan ka inen a, ka hmái chu ka thlék hnái khawp mai. Chutah, ka hnung lawk ațang chuan," I hmèlțha lutuk,"a rawn ti thut a, ka hnungah a lo ding reng niin, ka phu zawk alawm.

"Min tiphu."

Hnung lam ațang chuan min rawn kuah a,darthlalangah chuan ka en rán a, ani chuan ka nghawng fáwp zohin," I khuavang hi a mawi e,"a ti sap a.

"Ka awih lo."

"Nang pawh i mawi bawk."

Ka khabe chu sir lama kuaiherin a rawn kùn hniam ve bawk a, zei zetin ka hmui chu a rawn fáwp ta a.

Engtin nge ka tih ve ang? Fawh lét dan tur ka thiam si lo, lo dawh tawp mai ang.

"Min fawp lèt ve rawh."

Ka zak deuh bawk si, chhán dan tur ka hre lo.

"Ka thiam lo,"a hnu deuhah chuan ka ti ta ringawt a.

"Um, ka zirtir châk zawng tak."

Min fawh rei deuh hnuah chuan ka thiam ve ta riauin ka hria. Mahse ka zei lo chu min ti ve ngawt ang.

"I man chak lutuk. Kei tih loh mi dang inzirtir ve miah suh."

"Miin min la fáwp ngai lo tlat a, ka thiam lo alawm."

"A țha, ka zirtir zel ang che."

Rei fe hnuah in hnuai lamah ei tur la turin a chhuk ve țáwk a, a kal hlan chuan ka sam chu ka tuaifel mawlh mawlh a, ka hmui chu a thìp deuh hlarin ka hria.

Chawhnu pumhlum chu a room-ah kan awmdun char char a, hla ngaithla pahin khumah chuan ka țhu a, ani ka malchungah a lu nghatin a mu thung a.

"I hmel hmuh reng hi ka duh a ni."

"Ka hmelchhe si, a zahthlak."

"Hmelțha bawk."

"Min tih-laih i tum a ni maw?"

"Thil nihna dik tak alawm ka sawi."

"Dàwtsawi i thiam lo em mai."

"Eng chu nge dáwt ni a?"

"I thilsawi kha."

"Dáwt ka sawi lo, i nihna chu pawm ve mai la?"

"Ka hmelțha lo alawm."

"Kei chuan țha ka ti che."

"I țha daih zawk."

A biangsum lang chuan a nui var var a.

"Eng nge i nuih? Fiamthu ka sawi hleinem."

"I thusawi khan min tilâwm em a."

"Mi dang sawi pawh i hre țeuh tawh ang chu?"

"Nangma ka ațang ngeia hriat chu a lawmawm bìk alawm."

"Hmmm..."

"E, ka hrechhuak e, i hmel hmuh reng theih dan tur chu..."

"Engtin?"

"Haw tawh lo mai la?"

"Eng à??!!!"

"Kan inah i awm ve reng tawh ang a, nitin zantin ka hmu thei mai dawn che a ni."

A thilsawi chuan ka nuih a tiza. Thil áwm ang lo lutuk a nih vang a ni pakhat a, college pawh rah hmaa nupui pasal inneihte chu a.

"Ka ti tak tak."

"Nakînah kan la ngaihtuah dawn nia,"nui chungin ka ti a.

A phone la chhuakin," Thla la dun ang aw, kan pahnih chauha, tuma chìm buai loha lâk pawh kan neiin ka hre lo,"a ti a, rawn țhu chhuakin a camera chu a hmetchhuak a.

A ni lah tak a, kan pahniha lâk dun chu kan nei lo khawp ang. Sikulah lah kan pahnih chauha lákna hun kan nei ngai lo bawk.

Ka inrin loh lai takin min rawn fawp thut a, a camera a de nghal zar bawk a.

"Het, a fair lo, delete teh, a zahthlak."

"Delete love, ka duh dawn lutuk."

"Khawi, delete teh,"tiin a phone chu chhuhsak ka tum a.

"Style dang deuhin i duh leh zawk ami? Kan tițha leh dawn em ni ang?"

Kei aia a ban a sei zawk miau avangin ka chhuhsak thei lo.

"Nih, tumah hmuh suh aw."

"Ka phal teuh lo."

"Nih, ka lo en ve tal ang?"

"Aih, nang pawh i en ka phal chuang lo."

*************

Ka suangtuahna ațanga a tak rama ka harh hnu chuan ka hawi vel a, khua chu a vár chiang tawh hle mai. Ka chhungte ka rilruah an rawn lang leh nghal zat a, an buaiin an rilru a hah dawn si a.

"Khawngaihin, Lunglei lamah min lètpui leh hrám rawh, ka chhungte ka ngaihtuah em mai."

Min chháng lo. Ka biakna chu hre áwm pawhin a lang lo.

"Mahlim, khawngaihin?"

Min chháng chuang lo, motor chu a khalh mawp mawp reng a.

"Hetiang hi ka chungah engtin nge i tih theih? Min hmangaih tak tak ni la chuan hetiang hi ka chungah thlentìr i phal miah lovang."

"Miin a chhe thei ang berin min sawi tawh ang a, min hmu tuitang tawh dawn lo bawk asin. Min hmangaih tak taktu chuan chutiang chu ka chunga a thlen a phal miah lovang."

"Engmah i hrethiam lo a nih hi."

A motor khalh lai chu a tiding chawt a, kei phei chu ka intauh bawp lo chauh.

"Lèt leh turin ka hruai chhuak lo che,"a vìn thawt mai a, ka phu zawk mai, a thinchhiatzia ka lo theihnghilh țèp alawm le.

"Accident i duh loh chuan lèt leh lam kha chu sawi tawh suh ang che."

A thaw sawk sawk mai a, ka hlau lek lek mai. Motor ațanga chhuah daih ka duh, mahse a lock tlat si.

"Min chhuktìr mai rawh."

"I chhuk dawn lo, hun ka tih hunah chauh i chhuk thei ang."

Ramhuaiin a luhchilh chiang a nih hi.

"Min duh lova, min kalsan tawh a nih kha. Min thlah zalèn law law mai ta che." Kei pawh ka thin chu a chhe ve tho alawm.

A steering chum pawp pahin," Ka thlah zalèn rei lutuk mah mah che a ni, a theih tawh loh,"tiin a au tuarh a, ka hláu lutuk chu ka ìp chawih chawih mai, heti lutuka thinchhiatte chu hrehawm a ti ve lo em ni le?

LALHLIMPUIA - 6 By Dingdi Pachuau

Thinchhe si, ka be tawh dawn lo. Min biak pawhin ka chháng tawh miah lovang.

Ka pasal neih ni tur a ni a, min han hruaibo ringawt mai pawh hi a tihsual a ni tawh a, chuta kárah min la vìn zui, pá lo em mai.

Heng lai ram lam hi ka la kal ngai lohna a ni a, ka dinhmun chuan zir se chuan nuam ka ti viau ang, ka la zin lohna ram a nih avangin hriatchian tumin ka hawikual nasa viau ang, mahse he pa bulah hi chuan engmah ka sawi dawn lo. Khawngaih ka dìlin awmzia a nei lo va, vin lèt ka hlawh thung. Min rukbo man hi a la hre ve khawp ang, a duh ang chuan min kái phar lo tawp ang.

Kan inbe lo char char, a reh khawp mai. A lam hawi pawhin ka țhu duh lo, sir lam ka hawi deuh tlat a, melh pawh ka melh lo.

Phone tal kha lo keng ila chuan aw, he pa hi chuan min hmantir phal dawn der si lo, thil awmzia an hre vek tawh ang a, thudik tak erawh hi chu an hre dawn si lo. U Zuala leh ka chhungte mawlh mai a ni ka khawngaih, an zak lutuk tur leh an hawihái lutuk tur mawlh chu.

A bul ber chu keimah ka ni, a motor-ah khan lo chuang duh miah lo ta ila chuan hetiang hian ka awm lo tur. Chuan, Christina khan min rawn phone lo se, ka lèng áwm tawp si lo, a nih loh pawhin phone kha lo keng ta ila, emaw Christina phone khan Tluanga kha lo phone hle hle ila...

Hmm, a nih dan tur a ni zo tawh. Police-ah Ramhuaipa hi ka report mai dawn em ni? Nge hun remcháng ka hmuh veleh ka tlánbosan ang? Haw lehna tur pawisa lah chu dere pawh ka nei der si lo.

Lo report ta ila, ka haw leh thei a nih pawhin mi min lo hmuh dan tur chu a mak viau tawh lo'ng maw? Min melh hrek hrek ang a, thudik tak an hriat dawn loh avangin. Nuam pawh chu ka va ti âwm lo em!

Ni lo, ngaihtuah tawh lo teh ang, khua a vár lo em mai. A tha lo leh hrehawm lam hlìr ngaihtuah chu

rilru a hrisèl mawh em mai.

Ka maimichhìng vang vang a, ka pa hmèl mawlh a ni ka mitthlaa ka hmuh zel ni. A thinrim dawn em mai a, a rin loh dan lutukin, zahthlak thei ang berin pasal neih dawn zana tlangval dang ùm hmuhin min hmu dawn si, ka rilru chu a tâwt leh up up mai, ka tawn ang tawng ve lo tân chuan hriatthiam ngaihna a awm lo ang.

"I ngaihtuahna kha chawlhtìr teh."

Hmuk hmuk mai a.

A thu lo chiang em mai, ka duh chen chen ka kal kualtìr ang, duh leh ka tlântìr ang a, duh leh ka thlawhtìr ang, a lo sawi tur a awm lo reng reng, ka ngaihtuahna a nih hi.

"I hah thlâwn mai mai a ni."

A țawng peih tak tak, ngaihtuahna mai maiah pawh min thunun a tum a nia, a hlawhtling lo ve khawp ang.

"Ka chunga lâwm hle tur i ni zawk."

Ka insùm ve țâng țâng ania, mahse, he thu zet hi chuan ka thinlung a ti-ter at mai.

"Engvangin nge i chungah ka lâwm ang, misualpa?"

"Misualpa maw ka lo nih ták?!! Ka phù loh hming a nih chu."

Ka ngawi leh daih. Ka chhân leh chuan duh aiiin ka țawng tam palh ang, ngawih renga min biak pawha chhân loh ka tum kha, ka hrereng tur a ni.

Ka ril a țâm, ka pum chu a ri raih raih a, motor ri avangin a hre thei lovang. Ka tui pawh a hâl, a bulah bottle khatin a awm, mahse ka in dawn lo, a hmuh lai phei chuan ka in dawn lo hrim hrim.

Khua kan lùt a, eng khua nge pawh ka hre lo, ka zawt lo hrim hrim bawk a, zawh pawh ka tum lo.

"I ril a țâm em?"

Ka chhâng lo vang.

"Luhlul chhuah kher a ngai lo ania."

Ka chháng dawn chuang lo, melh pawh ka melh lo ang.

Motor chu tidingin a chhuk a,a kal lawk lo a ni ang," Tlânbo tum suh ang che,"a rawn ti leh hmuk a.

Zak lo ve bawk si a,ka insawh tâu sawk sawk mai. Tlânbo tum ta ila, zak takin min siam emaw a ni ang a, ani a zak leh dawn der si lo.

A kalsawn tih ka hriatchian hnuah chauh chuan tui bottle chu ka la ta vat a, ka in ta khawlh khawlh a, a chanve dawn ka in hnuah chuan a dahna ngaiah ka dah leh thlap a,ka rilțâm pawh a ziaawm sawtin ka hria, ka hmai erawh ka phih châk hle a ni.

Rei pawh a châwl lo, a rawn lét thuai a, motor chhunga rawn lùtin," Kha, ei rawh,"tiin ka thutnaah chuan polythene hi a rawn dah a, ka lo melh duh miah lo va.

Polythene chhunga ei tur rim chuan ka hnâr a verh zar mai. A tui dawn chiang lutuk, mahse ka thin a rim laklawh tawh si, ka tuarchhuak thei ang em? Luhlul ka chhuah rei leh ka inhrem rei dawn tihna.

Ka pum a ri ruk ruk mai, a hre maithei, ka ìp vak ringawt.

"Luhlul chhuah lo khan ei rawh."

Ka ei dawn lo.

"Kawng lakah kan cháwl dawn tawh miah lo ania, ei rawh."

Hm, ka ril chu a țam alawm, țâm tak a ni. Ka ei mai loh chuan min barh lui dawn lova, min eisaka a ei zawh daih phei chuan...

Ka ban ta nge nge a, ka duh chi fried momo ngei mai kha a lo ni. Pakhat chu lain ka hmawm a, a dang ka hmawm leh zat a.

"Khati mai tur kha alawm."

Ka ei zo vek. Ei tura min pek a nia, ka khék âwm hlei lo.

"Min ei bân ve nange? Ka la ei ve hleinem.."

Tlém tèin nuam tih lohna ka nei, tlém tè tak takin. A ei tawh emaw ka ti char char a.

Tihngaihna awm hek lo, a va lei leh a, chhang dang lei a nei tho sia, ei ve mai âwm. Inthiamlohna min neihtìr a tum ve hrim hrim a niang.

A sawi ang tak tak chuan kan châwl tawh lo, kan tlân char char. Ka inbual châk tawh takzet a ni, khua a țha hle si a, ka ban chuapin ka hria.

Champhai ka la kal ngai lova, rin aiin kan thleng har ka ti. Mahse, a kawng a thui ve ém a, a âwm tho.

Lodge ni ngei turah kan lùt a, ka muthilh sek avangin kan thlen lai pawh ka lo hre pek lo.

Chhuah pahin," Lo chhuk rawh,"a ti sap a, hetah hian kan awm rih dawn tihna a ni maw?!!!

Ka țhu lui tlat a, a thu thuin ka awm dawn lo, a buai ve khawp ang.

"Lo chhuk rawh, pawm chhuk kher i duh em ni?"

Min pawm chhuk duh leh tak tak mai ang, a thu awih ka duh lo asin le, a sawi hma khan lo chhuak hman tawh ila.

"A țha e, ka châk zawng tak alawm,"tiin motor chu a rawn hél a, kawngkhar chu a rawn hawng a.

"Ka chhuk ve thei."

"I tlâi tawh."

Min pawm kâng nawlh mai, ka lo tâl ve nain," Mi min en luih luih i duh loh chuan tál tawh suh,"a ti leh sup a.

A ni lah tak a, kawt bul maiah chuan hnathawk an lo awm a, eng nge an thawh chiah phei chu ka hre lo, kawng chu an siamțha pawh a ni maithei. Min lo en deuh vek hlawm tih ka hmuh chuan ka zak ta deuh a.

"Bialnu pangchang deuh nei angah min ngai ngei ang chu."

Lodge nghâktu (enkawltu) chuan," In lo thleng tluang thei maw? Kha, a ke a tina em ni?"a lo ti vat a.

"A châu deuh a,Motor ațanga pawm chhuah kher a phùt a."

Daw peih lutuk, zet zut mai. Rum zetin ka melh a.

"Room nuam ber chu i lo dah ngei ka ring."

"Tehreng mai, mate. Hei, chahbi pawh aw, thawmhnaw in nei em?"

"Nei hran love, kan inbuaipui thei ang."

Step-ah min pawmchho a, Lodge ngháktuin min hmuh theih loh hnu chuan,"Min thlah rawh, ka kal ve thei,"chang zet, zâwi fiah deuh siin ka ti sap a.

"Room thleng le. I cho chhuah a nih hi."

Pawi tawp lo, a hah ve ngawt ang chu. Min pawm tura ka tih pawh ni hlei lo.

"Room khat kan luah dun thei lovang."

"I tlái, kan luah dun dawn."

Room khat chauh han hauh reng reng. A bulah ka mu turah a ngai a ni ang e, ka mu dawn teuh lo. A bula mut ai chuan chhuatah ka mu mai ang.

Room chu ka rin aiin a nuam daih mai. A zâu lutuk lo nângin khum pahnih a awm lehnghal, țha reuh lutuk.

"Țhu hahdam la, i inbual dâwn nia, tui lum leh tui vâwt a awm bawk ang. I hák tur chu drawer-ah khan a awm vek ang."

Mi thawmhnaw min hâktìr a tum maw?!! Teuh lo, tu thawmhnaw mah ka ha dawn lo.

"I mamawh tur țhenkhat chu bathroom-ah i hmu thei bawk ang."

Motor chuan chu a hahthlâk chiang alawm, ka cháu ve nghulh nia, inbual ila, inbual zawh veleh mu ila, a zia deuh mahna.

Khua a tlâi tawh avangin tui lum ka hmang zawk a, sa ver vawrin ka intleuh a, a nuam phian. Ka mamawh tur thil, toothbrush, sahbawn, shampoo, slipper, towel, panty leh kawrhnuai thar hlak leh hmeichhe hman tur thil eng eng emaw a lo awm nual tak tak a, dâwt a sawi bìk lo chu a nih hi.

Rei angreng deuh ka inbual a, tui luma inbual chu a nuam em a ni.

Ka chhuah chuan room-ah a lo awm miah lo. Ka thawmhnaw ngai hâk chu ka hreh viau nain mi thawmhnaw hâk ringawt chu ka duh bìk lo.

Ka ke ka hrùk laiin a lo lùt a, a hnungah Lodge nghâktu khan a rawn zui a.

"Thawmhnaw chu drawer-ah khan a awm, a thar mah nise ka sùkfáitir vek ania."

"A lawmawm e, mate."

An inkoh dan ațang hian inhre sa chu an ni chiang alawm. An inclose hmel riau bawk, college an kaltlâng pawh a ni maithei asin.

"Mamawh in neih chuan sawi hreh lo ula."

"Tehreng mai."

Chu pa chhuah hnu chuan," I thawmhnaw kha thlâk rawh," a ti sup a, drawer chu hawngin t-shirt leh kekawr pár chiai mai a rawn thehchhuak a. Towel dang la chhuakin bathroom-ah chuan a lùt ve ta nghal a.

Ka ha âwm kher lo, mut ka duh, a lo chhuah hma ngeiin muthilh tum teh ang.

Ka cháu deuh bawk a, ka muhil thuai mai. A lo chhuah lai pawh ka hre tawh lo.

Ka harh chuan ka awmna chu ka hre lo dawn dawn a, mahse ka hrechhuak leh vat a. Room chu a lo éng deuh pup tawh a, zán a ni tawh tihna a ni maw?!!

Dar zat ka en vat a, ka rei, ka va mu rei ve, dar 8 a ri dawn tawh nia!!! Khawnge Mahlima reng reng pawh hi? Keimah chauhin min hnutchhiah tihna em ni?

Khum ațanga tho chhuakin bathroom-ah ka hmái ka va phih leh a, ka mit a kham urh mai.

Room-ah chuan a lo țhu reng tawh a.

"I tho thei maw? Chaw ei tawh ila?"

Chaw eiah min lo nghâk reng tihna maw?!! A ei daih tawh ka ring asin le. Ka ril a țâm ve tawh tho avángin in hnuai lamah ka zuithla a.

Dining Hall-ah chuan nula pakhat tih loh chu tumah an lo awm lo, nula chuan kan chaw ei tur a lo buatsaih mék a. A chhe lo phian lehnghal a, champhai nula ni âwm reng a ni, a vun a no nalh em mai.

"Le, chaw ei ka peih ta e."

"Kan lawm e, Darling."

Chu nula chu a nui sak a, a kalsawn ta nghal a.

A koh dan kher kher kha, ka ngei lutuk. An lo inhmelhriat sa tih hriat reng reng, a bialnu hlui pawh a ni maithei asin, a hlui kher lo pawh a ni thei tho. Ka ngaihtuah peih vèl lo ve.

Ka ril a țâm bawk a, ka ei hnem khawp mai. Chawhmeh an siam lah chu ka duhthusám a ni vek hlawm, an bai siam lah chu a tui khawp mai a,ka ei nasa. A thak bawk sia, ka hnâr a sen nasa ngawt ang.

"Thak i ti a nih kha, kha bawnghnute hi in rawh."

Ka lo ban vat, ka hnial peih lo, a thak lutuk a, ka bengte hi a ling vekin ka hre mai.

"Naupang chhia ang mai, thak ngam lo lutuk."

Anite chuan a ei ve mang pawhin ka hre lo ve. A ei ngam lo a ni ang chu, nép thlerh thlerh em mai, pâ lo e.

Bawnghnute chu a țha khawp mai, ka lei thak vìn ngut ngut chu a reh suai suai mai, khati lutuk kha chuan ka ei tawh lovang, a thak em mai.

Chaw kan ei kham meuh chuan dar 9 a lo ni ruai tawh a, ka mu nasa bawk sia, ka meng rei ngawt ang chu.

"Phone ka lo hmang."

"A theih loh. Christina ka phone vek tawh, engmah ngaihtuah buai a ngai lo."

"Ka chhungte pawh ka be duh alawm."

"I biak loh a țha zawk, tun atân chuan."

Ka thil dìl a hnial zèl avâng chuan thinrim zetin room-ah ka chhohsan nghal a, he pa hi chu a ngeiawm a ni, ka haw hluah hluah.

Tihtur a vâng si, khumah chuan ka'n țhu rèn ráwn a, lehkhabu chhiar tur tal awm se.

Christina kha a phone a nih chuan engtin nge a hrilh ang le? Ka chhungte a hrilh tawh ngei ang a, an thinrim viau ang em? Nge, a hrilh rih lo zawk ang? Ni lo, a hrilh ngei ang, amah min hmu hnuhnung bertu a ni a, thil an zawh ber tur a ni tlat.

Hrehawm a ti ve ngawt ang. A thiam loh ni hran lovah an han thiam lo ang a, miin an sawi sep sep ang a, keimah vanga hrehawm a tuar tur chu hrehawm ka ti.

Nichin khan phone hman kha ka dìl ania, lo phal ta pawh ni se, chhungte call kha ka ngam tak tak dawn em ni? Eng nge ka sawi ang? 'Min lo hruai r'u' ka ti dawn em ni? Nge 'ka duh lo chung min rubo' ka ti dawn? An awih kher ang em?

Ka muhil leh hma tho nia. Tlâia ka mut khân awmzia a lo nei vak chuang lo a nih âwm hi.

Ka mumangah U Zuala nen kan lo innei leh dawn a, Biak Inah kan lùt vek tawh a, pastor-in min invawntìr dáwn tih-ah chuan U Zuala nu hian," An innei thei lovang, kha nu bawlhhlawh tân khan ka fapa hi ka phal lo,"a lo ti tuarh a.

Ka zak leh hrilhhai lutuk chu ka mittui a lo luang zawih zawih a, U Zuala nu lah chuan," I zak lo'm ni? Ngaihzawng dang nei reng chungin pasal neih i tum ania, ka mo-ah ka duh lo che, mi tenawm i nih kha,"tiin a au tuar tuar reng a, hrehawm ka ti lutuk chu ka inhnìt hlawp hlawp a.

"Sarah, harh teh."

Ka harh hnuah pawh chuan ka la inhnìt zui tho, ka mumang kha a hrehawm em a ni.

"Mang țha lo i mang a ni ngei ang."

Min kuahna ațangin ka tâl chhuak ta vat a, ka mittui tla chu ka hrufâi a, bathroom-ah ka lut nghal daih a.

Ka hmai ka phih a, ka mit chu a sen râm mai. Ka mumang kha, U Zuala nu rapthlakzia kha, tunah pawh hian engtiangin nge ka chungah rilru a put ang le?

Ka khumah chuan a lo la țhu reng a.

"I mumang chu min hrilh i duh em?"

Ka hrilh duh teuh lo, ka ngawi reng ringawt a.

"Mutpui i duh em?"

"Aih." záwi tèin ka ti sap a.

"Tak tak maw?"

A kalsawn hma chu ka ding reng ringawt.

"Mu rawh, i chauh kha."

Khumah chuan ka mu meng kar mai. Ani pawh a châu ve ngawt ang chu, zanah leh niléng deuhthawin motor a khalh a, kawng lah a țha tehchiam lo nen, mumang țha lo avangin ka tiharh zui.

Mahse, chùngte lek lek. Min hruaibo man atân chuan a nép lutuk, ani tân phei chuan heng laia kal pawh bial hlui fan pah a ni ang a, bial thar pawh a ni maithei tho. A tân chuan hrehawm a awm ve tawp nang, nuam a ti zawk ngawt ang chu.

Zìnga ka harh chuan a lo awm leh tawh lo. He pa hi a harhvâng khawpin ka hria, ka tho chhuak peih lawk lo va, tihtur a awm bawk si lo. Hmelhriat ka nei bawk si lova, chaw ei dawnah chauh tho teh ang.

"Mut duhnu, chaw ei a hun tawh ania."

Ka lo muhìl leh a ni chiang mai.

Banga sanapui intâr chu ka en a, a lo tlâi lehpek tawh kher mai.

Hmanhmawh deuhin ka tho a, ka hmâi chu a mawm ngawt ang chu.

"Zìngah chuan eirawng ka bâwl a ngai țhin dawn a ni maw?"

Min fiam tih ka hria. A mak e, nimin tlâi leh zanah ka mut tam nen, zìngah ka tho tlâi leh tho si.

Ka inphihfái chhung chu min lo nghák reng a, ka tho tlái lutuk chu nuam lo ka ti ve reng.

Nizâna chaw ei min siamtu nula bawk khan min lo siam leh a, a hmel hmuh a nuam ka ti, a chhe lo bawk si.

"Tui deuhin in ei dawn nia."

"Kan lawm e, darling."

A ti leh ta. He pa hian ka thìk theih tur atân a tilui kher tihna em ni? Ka thìk teuh lo, duh leh nei se, haw daih ka duh asin, he pa min hmuh theih tawh miah lohna hmuna awm ka duh, a chanchin leh a hmel pawh suangtuah thiam lohna hmunah.

"A fel asin aw..."

Fel a tih chuan neih daih áwm. Kei pawh U Zuala fel ka tih em avangin neih ka tum alawm le, min hmangaih bawk a.

"Bai kha ei țeuh tawh suh."

Ka hre ve reng, ani sawichhuah leh kher pawh a ngai lo, a inrawlh lohna turah duh aiin a inrawlh tam ta mah mah.

"Mahse, bai i ei thak ti hmél kha, i hmuhnawm khawp."

Ka ei lui leh țalh dawn em ni ang? Ei leh ila, a tuartu chu keimah bawk ka ni leh dawn si, chuti chu ni lo se chuan, a thu hnial kalh tur hrim hrimin ka ei țeuh ngei ang.

Chhùnah bazarah kan kal kual a, a bula awm chu peih lo viau mah ila, ka la zin ngâi lohna a nih vángin ka kal ve hrâm hrâm, chubâkah room-a lo tawm tlawk tlawk kha chu a khawharthlâk áwm em mai.

LALHLIMPUIA - 7 By Dingdi Pachuau

(Ka edit hman lo, ka lo vawm lut tawp)

Dâwr pakhat kan luhna chu insakna bungraw zawrhna ni maiin ka hria,an lun hmèl riau lehnghal a, engti tiha he dâwra min hruai nge a nih reng reng ni? Ka chhuak ta daih a.

Ka rin aiin a rei daih mai.

Dâwr kawtah chuan ka tei ka tei a, dâwrnghaktu nen chuan an la titi tui hle si.

"Hiii..?"

Ka phu deuh zawk mai. Aw lo chhuahna lam chu ka hawi vat a.

"E, nangmah i ni elo?!!"

"Ni ang chu, eng nge heng laiah i lo tih ve daih a?"

Alex Paul a ni a, cl - xii GHSS, Aizawlah kan zirho. Lehkha thiam thei tak a ni a,college erawh Mumbai-ah a zawm ta daih. Min lo la hre ve reng chu mak ka ti zâwk.

"Nia, ka lo zin ve châk a,"nui chungin ka chhâng a.

"Hei hi kan dâwr ania, lo lût ve la. Nge mi nghah i nei em ni?"

Mahlima awmna dâwr bul chiah chu a kâwk a. Inchhungkhur bungrua lam a awm țeuh mai, an dâwr chu a muk viau bawk.

"Um, hei, a bul chiah dâwrah hian ka țhianpa nen kan lo kal a, an titi tui lutuk a, pâwnah ka lo nghâk a nih hi."

"A nih tak chu, Cl xii kan zir lai kha a ngaihawm ti raw? Re-union neihte hi rawt ta ila, a zia phian ang a?"

"Nia, ti raw? Zia ngawt ang, inhmuhkhawm pawh a châkawm khawp mai,a lo rei ve tawh bawk sia. Ti ta daih ila, eng nge i thawh tâk? Hna țha deuh i thawk tawh ang chu, nang zawng lehkha i thiam thei a, kan tluk loh theihzia che kha."

A nui var var a.

Alex Paul hian min star țhin. Mahse, kei chuan ka mitmei ka hmuh ngai lo, a chhan chu Mahlima nen kan inngaizawng a, midang kawp kha ka duh lo hrim hrim. A chhe lo va, chuan, a luck bawk. Kan section hmeichhia ni kher lo, section dang pawhin an star țhin khawp, mahse , a lerh lêm lo a nih ka ring, bialnu a nei miah lo.

"SBI-ah ka thawk ve hlauh a."

"A va lâwmawm ve! Ka lawmpui lutuk che."

"Sarah darling, kan kal tawh dawn em ni ang? Oh, in titi ka rawn tihbuai loh ka beisei."

He pa tak hi chuh... Dâwr chhung ațang pawhin titipui ka nei tih a rawn hmu thei ngei ang tih ka hria, a ngeiawm thei ania,mipa ka bia hi a hmu thei thlâwt lo.

"Alex, kan la inhmu leh dawn nia aw."

"Aw le, in hmanhmawh hmèl sia, kan la inhmuh leh beisei phawt ila."

Motor-ah kan lût a, Alex Paul chuan min lo thlìr reng a.

Kan tlân hnu chuan," I ex a ni maw? Nuam i ti âwm hle mai,"a ti vat a.

"Ti ve bawk ang chu."

"In inhmuh leh theih tawh loh ka hlauhpui hle mai che, naktukah Aizawlah kan haw ang."

A sualthiamzia hi chu aw...

Thawmhnaw hâk tur min leisak. Ka duh lo hle a, mahse dâwrnghaktute ka zah èm avangin ka la hrâm, ani lah a zak ve tawh dèr si lo va,mi tâna hmuhnawm siam leh an beng tihtlai ka duh lo. Ka hnial pawhin a lei dawn tho si a.

Lodge kan thlen veleh ka inbual nghal a, a thawmhnaw min leisak chu a nalh ka ti reng, mahse ka fak duh lo. Lâwm hmèl pawh ka pu lo lui tlat a, a rúk tak chuan ka inhmeh ka ti ve reng.

Alex paul kha, ka hmu thut kha mak ka ti. Ani pawh khan a rin loh deuhnaah min hmu sia, mak a ti ve ngawt ang.

**************

Cl-xi chu first division-ah ka pass a, Christina pawh chuti tho. Cl-xii chu Aizawlah kal ka châk viau a, Christina ka sawipui a, ani pawhin a lo duh nasa. Ka chhungte ka sawipui a, ka pa chuan a lo phal mai a, ka nu erawh chuan hla a ti deuh a, intlawh zung zung theihna ni lova awm hi a remti vak lo. Mahse, hostel-ah a awm theih dawn tho avangin leh mi dang hrawn buai a ngaih dawn loh avangin a phal ve deuh.

Mahlima pawh țha taka a pass ka ring, college erawh Mizoramah a zawm dawn lo chiang, a pain phâi lamah zir zawm turin a duh.

Christina-te inchung zâwlah kan inhmu leh a,kár leh maiah GHSS,Aizawlah cl-xii zawm turin kan phei tawh dawn, ka lung a léng lâwk kher mai, mahse ka tilang duh lo. Tuarchhel lo nih ka duh lo va, over deuha chét ka duh lo bawk.

"Innei tawh mai ang."

Ka nuih a tiza lutuk, mahse a thutak ve si a, ka nuih hlauh chuan a titau ngei ang, a thinrim hle bawk ang.

"A la hma i ti lo em ni?"

"Ka bulah awm reng la ka duh alawm."

"Lehkha țha takin zir ila, kan hlawhtlin hnuah innei zawk ila? Tunah chuan kan la naupang em mai."

"Ka hmu lo rei dawn em che a ni. A thuhrimin,fapa mal ka nia, ka nupui i nih phawt chuan harsain kan awm dawn chuang hleinem. Ka pa ro zawng zawng ka chan tur a ni thova."

Ka nuih a tiza tho. Kei ái hian a rilru hi a naupangchhia zawkin ka hria, tùna kan inneih chuan kan hmalam hun a êng dawn lo lutuk. Pasal neih pawh ka la ngam lo hrim hrim bawk a, a bulah erawh sawi kher ka tum lo,a chhan chu a thinrimna a belhchhah palh ang.

"Phone nei ve rawh."

Leh ringawt țhin hian. Ani angin duh duh ka lei thei si lova, kan dinhmun hi a rawn hrethiam pha ve dér si lo.

"I number ka nei a,chuan, ka rawn phone ang che. Hostel-ah ka awmin ka ring a,tunah chuan hostel phone number ka hre rih si lo."

"Ngei ngeiin aw."

Min kuah deuh reng a, ka hâu bìk lo. Kan inhmu thla zen thei tawh dawn si lova, ka khawngaih ve alawm. Kei pawhin ka ngai ve dawn ém asin, ka khua a har lâwk ve tho.

"Ka rawn phone ngun ngawt ang."

"Min rawn ngai viau suh aw, khutah chuan țhiante kâwm la. Mahse,sual lo la."

"Ka ngai dawn lutuk che."

"I țap vel ang a..."

"Pâ lo e, țah chu. Ih maw, mipa dang lo be miah suh."

"A va buaithlak tak. Min be ta se, ka ngawi reng dawn tihna em ni?"

"Ngaihzawng biakin ania ka tih."

"Ka luck hmèl em mai a."

"Lo be miah suh ang che, nang chu ka nupui hual i ni tawh ania."

"Aw le, ka hria e. Țha deuha lehkha i zir loh chuan pasalah ka nei duh dawn miah lo che ania, țha deuhin zir ve ve ang aw."

"College ka zawh veleh min nei duh ang em?"

"College ka zawh hnuah tal ti zawk ila?"

"A rei dawn e."

"Naupangchhia ang mai. Dam chuan hun a kal chak alawm, kan dam ang a, i rin aia hmain kan zo thuai mai ang."

"Min tiam rawh."

"Eng maw ka tiam ang che?"

"Pasalah min nei ang tih min tiam rawh."

"Min phatsan loh phawt chuan."

"Um, kan innei ang."

Kan veng ka haw dawn zánah Christina-te inah kan inhmu leh a, rei kan inhmu thei lo. Chhungte an zahawm a, chubâkah zán a ni lehnghal a, a mawi tehchiam lo. Bákah, insiam ka la ngai tho. Kan vengah ka haw phawt ang a, ka pain min hruai a tum. Țúl ka ti tehchiam lo nain min ngaihtuah miau si a,ka sawisèl lo, min ngaihtuah a ni ve mai.

Min chelh reng a, min thlah hlei thei lo. Kei pawhin ka ngai a, ka thlahlel ém ém.

"Haw tawh lo mai rawh."

A ngái tè bawk. Min thlakhlelh vâng a ni a, ka lawm viau. Mahse, pasal neih a la hun lo, zirchhuah tur kan la ngah dun lutuk.

"Ka haw loh zawngin i buai hle mai tur asin."

"Problem solve a ni mai."

"Tak takin, ka haw ang a, nang pawh tluang takin i kal ang a, țha deuhin i zu zir dawn nia. Ka ngaihtuah turin awm lo la aw."

"Aih, min ngaihtuah rawh, min ngaihtuah tih hriat chu a nuam dawn ém asin."

"Ngaihtuahawmin awm suh ka tihna ania."

"Sual min ti tihna em ni?"

"Aih,...ih, zû in nasa suh ka tihna."

"Ka in nasa ngai hleinem."

"Ka awih lo chiang."

"Tak tak, tlêm tê chauh alawm ka in țhin."

Kan in bul thleng min thlah, car ațanga ka chhuah a phal lawk lo lehnghal. Minit 10 chuang kan țhu leh phawt a, ngen tak téa ka ngen hnuah chuan min chhuah phal ve țâwk.

A tukah sumo counter-ah min thlah a, Christina pawh a lo kal ve. Kan tlân chhuah hma zawng min awmpui a, kan chhuah dawn tak tak chuan ka mittui a hnâi ve hle. Mahlima lahin tu mitmei mah véng lovin min kuah rân reng mai a, ka khawngaih. Kei pawhin ka ngai dawn lutuk, ka hmu lo rei dawn si.

Kan tlân ta, an lan theih chhung ka thlìr. Ka va ngai dawn tak, a bulah ka sawi duh lo mai mai a, ka ngai dawn takzet a ni, ka mittui tla tur chu ka khap lét sak sak a.

Kan vengah chuan ni khat chauh ka awm, ka pa nen Aizawl lamah kan phei nghal. Hostel kan buaipui nghal a, kan indahlùt nghal mai. Christina tân ka hauh nghal bawk a, kan in-roommate dawn.

Cl-xii commerce zirlai chu kan tam angreng. 75 lai kan ni a, Christina nen chauh chuan Lunglei lam ațanga zir kan ni. Champhai lam ațangin 3 an awm bawk a, a dang chu Aizawl khawchhung vek. Mikhual ang kan nih avangin kan langsár angreng a, kan zirtirtute pawhin min hre thei khawp mai.

Kan class chu a nuam phian, an nélawmin an fel a, khawpui nge nge, a mi chêngte pawh an felin an polite.

Sport kan nei a, sport kan theih loh ém avangin Christina nen chuan parade-ah kan tel. Alex Paul hian parade min zirtir a, heta țang hian kan inhrechiang țan.

Mahlima pawhin Delhi-a a chhuk dawnin min rawn tlawh, hostel-ah min rawn tlawh rap mai. Țhiante'n min fiam sup sup lehnghal a, ka zak ve det.

Kan hostel phone number ka hrilh a, nui chungin,"Ka rawn phone zing âwm che,"a ti a, phone number ka pék chu a en vang vang a.

"Pawi lo. I chinchâng min lo hrilh dawn nia."

"Lutuk, ka rawn hrilh zing mah mah maithei che a ni."

"Mahse, i pawisa a hek duh ngawt ang chu?"

"No problem, ka pain a ngah lutuk."

Kan nui dun leh rih a. Nia, a chhungte chuan an ngah alawm, an thawkchhuak miau a. Ani pawh hian thawkchhuak ve se, chhungkaw châwm thei turin leh intodelh thei turin, hei aia duh ka nei âwm lo ve.

"I pa thawh chhuah ring lova nangma thawh chhuah ngei i hman theih hun a nghahhlelhawm ka ti."

"Chutih hunah chuan min nei duh tawh ang ti raw?"

"Maithei."

"Bialpa nei miah suh ang che."

"Nang pawh."

"Innghâk ve ve ang."

Thla khat lâi a lo liam ve leh ta. Min rawn phone zing khawp mai, kan inbe rei thei angreng bawk sia, ka inthlahrung lek lek zél. Thingtlâng ațanga awm kan ni deuh vek si a, chhungte phone call châng an ni ve țhin bawk si nen, a phal lo chung hi ka dah țhin.

Class pawh kan kal țha. Christina nen engkimah kan inthurual a, hetiang țhianțha ka nei hi ka lâwm țhin.

Alex Paul hian min ngaihven tih ka hria. A nungchang a țha a, mawi zet hian a nui var var țhin, mahse a țawng tam lo va, țhian kawmbík pawh a nei lo. Lehkha a thiam èm avangin kan thiam loh laite kan zâwt sup sup thin.

Accounting subject-ah phei chuan a cial tawp a ni mai. Ka hriatthiam loh ka zawh peih èm avangin kan innél ta hle a, break laiin dáwrah kan châwlho ta zauh zauh. A fel a, ei man pawh kan pe hman lo, a lo pe hman ziah.

Min duh thu min hrilh chuan mak ka ti lêm lo. Mahse, Mahlima ka nei tawh a, duh ila chuan ka kawp ngei ang. Mi rinawm lo nih ka tum ngai lo va, mi rinawm lo ka ngáinèp hle bawk. Ngaihzawngah kher kher chuan ka duh fair ve a,ka bialpa tân rinawm ka duh a, ka bialpain mi dang nen min kawp ka duh bawk hek lo.

Mahlima pawh a tlângnêl ve tawh a ni ang, min rawn be zut ta lo deuh. A țha, tlângnêl se, min ngaihtuah rùn lovin lehkha țha takin zir se ka duh. Ka theihnghilh miah lova, zânah ka țawngțaipui ngei ngei țhin.

Min rawn phone apiangin zû in lo turin ka chah ziah. A chhan chu khùngah chuan zù man a tlâwm a, hmuh theihin a tam dawn si. Amah zú-a fihlim țhak a ni si lo nen, ka ngaihtuah lo thei lo.

Dam țhat chuan hun chu a kal duak duak mai. Cl-xii chu second-ah ka pass a, first ka pha țép. Mark 3-in ka tlin lo, ka ui lutuk ringawt.

College pawh HBC-ah kan zawm leh a, Christina nen bawk. Ani nen hi chuan kan ințhen thei lo chu a ni.

Mahlima a rawn haw a, kâr hnih vél chawlh a nei thei. Lungleiah a phei lawk a, a rawn phei lehnghal. Aizawlah a pite an awm a, chutah chuan awmin class bânah kan inhmu a, a nuam tawp. Tunah chuan phone ka nei ve tawh lehnghal a,engtik hunah pawh kan in-text theiin kan inbe thei tawh a, Mahlima pawhin nuam a ti khawpin ka hria.

Delhi-a a awm chu tlêmin a chér deuh a, a thù deuh bawk. Khawlum lutuk a ngeih lo a ni ngei ang, ka theih ang angin ka duat ve a, heta a awm chhung chu ka duat theihtáwpin ka duat ang.

Aizawla an dâwrah min kalpui a, an dâwr chu a lian khawp mai. Pi leh pute ațanga khawsa thei an ni a, an changkâng viau bawk.

"Ka chhuk hunah lo chhuk ve daih la."

"Min buaipui lutuk ang a, lehkha i zir thei lo palh ang."

"Nia, ti raw? Ka buaipui lutuk che hi ka fail phah dér mai ang a.."

"Fail awih loh."

"Fail ka tum teuh lo."

"Chutiang tur chu a ni, mipa tihdan tur dik tak."

"Pass thuai thuai a inneih ka duh alawm."

"Țha lutuk."

Inneih mawlh mai hi a buaipui a, mahse ka sawisél lo. Hei hian a zirlaiah a tițang a, pass ngei a tum phah a, a țha ka ti. Zilh vak dan ka hre bawk si lova, zilh pangngai hi chu a ngaithla țha peih si lo nen.

A chhukna pawh a rei ve leh deuh ta. Christina nen exer kan la țhin a, zìng takah thovin lehkha kan zir a, exer chu kan la dun ta țhin. Kan lâk tirh chuan kan rawl dun khawp mai a, mahse kâr khat hnuah a reh ve mai. Mahlima'n min hmuh leh hunah nalh ve deuh hlekin min hmu se ka duh, ka tiphu zawk dawn.

Nitin kea college kal kan ni bawk a, kan infit viau tawh bawkin ka hria. Aizawl boruak ka ngeih bawk a, ka vun pawh a êng sâwt viau bawk e. Christina hian ka hmai min cheisak țhin a, ka inchei ngai loh ém avangin țhian dangte pawhin hmâi lam tal chu chei ve turin min ti țhin. Zanah leh hun âwl kan neih veleh facial min tihsak thùl, kei lahin nuam ka lo ti nasa. Hmái tán a lo țha bawk si a, a zia tawp.

Zan khat chu Mahlima ka call a, a pick miah lo, a ring ral țhak. Engtizia nge ni ang? A chhuak em ni ang?

Hostel-a awm ve tho a ni a, mizo pakhat a awm ve bawk a ni awm e. Northeast lam an tam lo va, south-indian lam an tam.

Ka text a, chu pawh min reply lo. A muhil tawh pawh a ni thei tho, a phone a silent tal a ni ang, naktukah min reply mai ang.

"Mahlima chuan a pick thei nange?"

"Um, a muhil tawh a ni ang."

"A lêng a ni ang a?"

"A phone a silent a nih ka ring, a nih loh pawhin a buai a ni ang. Assignment an nei pawh a ni thei a, naktukah a lo call mai ang."

"Nula inah a lêng a ni ang?"

"Haha, ka ngaihțhatlohna tur mawlh zawng lo la."

"Nang ve hi, i ring bur alawm. I ngaih a țha lo ve thei em ni?"

"Ka ring alawm."

"Mipate hi rin bur duh tur a ni lo asin, khua hmunah in awm lo lehnghal."

"Chuti, ka ringhlel dawn tihna em ni?"

"Ni chuang lo ve."

"A nih a hnu, engah nge ka rin loh lém ang?"

"Ka ti ve mai mai a nih kha, a țha alawm."

LALHLIMPUIA - 8 By Dingdi Pachuau

A tûkah chuan min rawn call ngèi a, a țhiante nen an lêngchhuak a, room-ah a phone a charge daih tih a sawi. Ka áwihsak hmiah, rin lohna chhan tur ka nei lo.

Zãnah chhuah a hrât sâwt riau. Zirlai nih chuan a fuh vak lo, a tlângnêl tawh a, țhian pawh a ngah tawh. Pawisa a nei bawk si a, eng ilo min lo thawn zut, ka ei châk zàwng min zâwt ziah bawk.

Mipa dang ka melh ngai lova, Mahlima tân hian ka rinawm bur a ni mai. Christina thusawi erawh ka ngaihtuah leh rauh rauh țhin.

"Kan Department-ah lecturer rawn thawk thar tur a awm an tih kha i hre tawh em?"

"Hre miah lo. Tunge a?"

"Lunglei lam mi tho a ni âwm e."

"A ni maw?! A va tihzia teh hlauh ve...kan zâwt ngam deuh tawh ang chu."

"Tlangval a la ni an tia."

"Haha, en zâm ang u."

Kan ti ve mai mai, a tak takah chuan kan ngam teuh lo.

**************

Aizawl thlen chu ka huphurh ru angreng. Hmelhriat ka hmu nawlh nawlh ang a, ka chanchin an lo hriat phei chuan a zia lo dawn asin. Tluanga pawh a awm leh tawh maithei a, min ngei dawn si, biak pawh min be duh ngût lo ang.

Tukin chu a zia a dang tawp. A țawng bawrh bawrh a, hmél hlim tak a pu a, eng nge a ngaihtuah ang aw ka ti. A rilru hi hriatthiam a har thei si a, buaithlak ka ti.

A mood a fuh tlat, kei erawh chu ka mood a fuh hran lo. Min hruaibo chhan hi ka hre duh, zawh chhuah ngei ka tum. Tunah a sawi duh lo a nih pawhin, ka zawh ka zawh chuan min chhân hun a la nei ve chêk ang.

Zai kan ngaithla a, Kimkima hla' Sarah i zùnzâm' tih hla kher kha a la play zui, ka ngei lutuk.

"Chu, i hla a nih chu. Ngun deuhin ngaithla teh ang."

"Engvanga min hruaibo nge i nih?"

Ka zawhna chuan chhán a hlawh lo chiang kher mai. Zai chu a zâwm a, a kutțang phût dat dat pahin kawng chu a melh ngar a.

"Hrilh chu ka phû ve a ni."

"A țúl ka tih hunah ka hrilh mai ang che."

Nia, țùl a tih hun té-ah lo chuan min hrilh lehpek lovang. He pa hi zawng, a thu hi a duh ve ngâk ngâk ania, a duh hunah chauh min hrilh ang, mahni thuduha a nih hi.

"Nimina dâwr chhúnga ka awm laia páwna i biak kha i ex a ni tak tak em?"

"Țúl ka tih hunah ka hrilh ang che." Min chhânna ang chiahin ka chhâng ve.

A nui var var mai. A thin a rim ka ring ania, a mood a fuh ve hrim hrim a nih âwm hi.

"Ka sawi ang kherin sawi ve suh."

"Min hrilh mai la?"

"Ka sawi tawh kha."

"I la sawi lo."

"Dáwr páwna i biak kha nge i duh keimah? Min chhâng phawt la?"

Ka ngawi ta hlauh.

Ka ngawih reng avangin a hla play chu a tinawn leh a, a va buaithlak țhin tak êm!

Mahlima hi chu ka duh țhin alawm, ka duh ngawih ngawih țhin. Nupui a nei dawn tih ka hriat tirha hrehawm ka tihzia kha, ka nunah khatiang kha thleng nawn leh turin ka duh tawh lo, tumahin tuar ve lo se ka duh bawk.

"Alex chu ka țhian a ni a, mi fel tak a ni bawk. Mi rinawm tak a ni bawk. Chuan, nang chuan ka duh hi i phù tawh lo."

A huat theih tura sawi ka ni bawk a, a thawk țha khawpin ka hria.Motor chu kawng sìrah a dintìr dawt a,chutiang kher chu ka rin loh lam a nih avangin ka bu lâwp a, ka intauh teuh kher mai.

"Tunge i duh? Kha pa kha em ni? I hmu tawh dawn lo. I hmu leh a nih chuan a chunga thleng tur chu i hriat tawh kha."

Steering a chùm dawt dawt mai. Ka hlau leh deuh si, mipa dang hming leh chanchin reng reng sawi a huat theihzia kha, min chùm nawk nawk ang tih pawh ka hlauthâwng ta deuh.

"Ka bulah mipa dang hming sawi tawh suh ang che."

"Min zâwt miau alawm," ka ti sap a, thudik ni miau hek.

"Min chhâng lét tawh suh."

Ka thin a rim ve ta. Kawngka ka hawng vat a, chhuah pahin," Zawhna min zawh pawh ka chhâng lét thei lovang che maw??! Eng mihring nge i nih? Mi zawng zawng chunga léng emaw i inti a ni maw? Ka lo duh țhin che kha ka lo â takzet a ni, ka duh phâk miah loh tur ka lo duh țhin che avangin mi máwl ka nih hi,"tiin ka au tãwn tâwn a, kan tlân pelh tawh ram lamah chuan ka theih anga chakin ka lêt a, ka pên hlawk hlawk a. Ka tlân a ni ber zawk.

Ka thinrim bawk si chu ka țap pûr bawk a, ka thaw hlawp hlawp mai, ka hah bawk nen, ka lungchhiat a zual a, hetiang teh hrep ka tawng hi vanduai ka inti a, he pa hi chu lo lang lo se, hmingchhiatna leh zah phur miah lovin pasal țha tak ka nei ngei ang.

Ka tlân thui em pawh ka hre lo, ka hah lutuk. Ka luin eng emawni ka su dawt a, bân pahnihin min kuahbet nghal bawk. Ka tâl laih laih a, mahse min kuah nghet lutuk. Ka tlânna lamah ka chau sa bawk nen, ka tâl rei thei lo, ka chau lutuk. Insùm tum viau mah ila, ka thil tawn hian min tilungchhe bawk si a, ka țap lo thei lo.

Ka hnung a chùl hliau hliau dan ațang chuan Mahlima a ni tih ka hria, chau viauin hah viau lo ila chuan ka chûm pawp pawp ang, mahse thâ ka nei tawh lo, chutiang ti turin, ka țap hlawp hlawp a ni ber.

Motor min tlân péltute chuan mak min ti ngawt ang chu,kawng sìra hmeichhia leh mipa inkuah ta reng chu. Tâlchhuak theia thâ ka neih veleh chuan tâlchhuah tumin a taksa rem lai laiah ka nam a, mahse min thlah duh miah lo.

"Min thlah rawh."

"I thin a la rim em?" A aw chu a zâwi deuh, a thin a rim tawh lo a ni maithei, a la rim a nih pawhin tilang lo turin a insùm hle a ni ang.

"Aw."

"Min hua em?"

"Haw lutuk che,"rang fahranin ka chhâng vat.

"I va duhawm reuh tak... I chau tawh âwm si a, motor-ah chuang tawh ang. Vawiin atân chuan exer kan la tam tawh e."

Ka tui a hâl huam huam, ka dang a ro vek. A bula chuan ka peih tawh loh thu sawi ka tum ania, ka dang a ro lutuk a, ka țawng chhuak tur chu ka khuh ta bawrh bawrh mai.

Ka hnungah a rawn chùm dat dat a, chutah tho lawkin min pawm kâng lawp a, motor awmna lamah chuan min tlânpui ta nghal a.

Motor awmna chu kan thleng hma viau, ka lo tlân thui lo tawp a nih âwm hi.

Tui bottle, a chhín hawn sain min pe nghal a. Nidang chu ni se, ka la duh miah lovang. Mahse, ka hrawk a ro lutuk a, ka in ngei ngei a ngai.

Darthlalangah ka hmel ka hmu a, ka hmai chu a sen vek niin, ka hah lutuk leh ka khuh nasat lutuk vang kha a ni ngei ang.

"I zia tawh em?"

Tui ti takin tui chu ka lem khawlh khawlh a, ka hâk țép zui, ka va che khir thei tak.

Ka hnunga rawn chum dat datin,"Tlém tlêmin in țhin ta che, ka in zawhsak lo ang che,"a ti sap a.

Kan tlân rei hnuah ka muhìl ta daih, mut hi ka awlsam a,hmun chép leh rem lo deuhah pawh hian ka muhìl thei mai zél. 'Mut duh' tia min sawi pawh hian huat ka tum lo, ka nihna dik tak a ni miau a.

"Tho tawh rawh le, mut duhnu. Châwl ang, i ril a țãm tawh ang?"tiin min lo sâwi a, chiang lo deuhin ka harh a, mut ka la duh asin, ka la kham lo.

"Hmm, ka'n mu leh lawk, khawngaihin?"tiin ka țhut dan chu siam remin muthilh leh chu ka tum a, a nui kar kar ri chu ka hria.

Ka kut kham ngawih ngawih avangin ka harh hlawl mai, ka kut ka delh lam chu a mu churh churh mai a, a vùng hialin ka ring.

"I lo harh thei maw?"

Ka â hù mai. Khaw êng lutuk avangin ka meng țha lawk thei lo lehnghal, chubâkah ka mit a phé ruai bawk.

Ka hawi kual a, kan thlen chin pawh ka hre tawh lo.

"Khawi lai nge kan thlen tawh?"

"Kan thleng țêp tawh."

"Ka ril a țâm." Sawi chhuah ka tum miah lo asin le, mahse ka ka ka thunun hman lo, a lo ri chhuak ve tawp.

"I hnung seat-ah khan ei tur leh in tur a awm ang."

Kawng sìrah a ding a, ka chét buai ngai lovin ama'n a rawn la. Min pe a, ka ril a țâm bawk a, engmah sawi lovin min pêk ang ang chu ka ei hmiah hmiah mai.

"Tui i tih hmel kher mai."

"Ka ril a țâm tawh alawm."

Nui var var chungin," Ei tur chu pe lo ta che ila chuan, min ei duh hialin ka ring,"a ti a, a fiamthu ve mah ni se ka haw țhelh.

"Nang kher kher hi chu ka ei lo ang che."

"I chiang maw?"

"Christina ka lo be teh ang."

"Eng nge i sawi ang?"

"I hriat ve loh tur thil mawle."

A huat ka ring ania, mahse a haw lo a ni ang, a phone chu min pe ve mai bawk a.

A phone chu a lock tlat alawm le.

"I lock tlat hi?"

"Lock e."

A ngeiawm thiamzia hi aw.

"I password min hrilh loh chuan ka hmang thei hleinem."

"Sarah27 a ni mai."

Awih lo fahran hian ka melh a,a password min hrilh hmang chuan lock chu hawn pawh ka tum chhin peih lo.

"Hman i phal lo a nih chuan sawi mai rawh."

"Ka sawi tawh chu."

Hmm, tum chhin poh ila.

A lo sawi dik tak tak a nih hi.

"27 chu eng tihna nge?"

"I âwmbâwr len zâwng."

Ka kut pahnih chuan ka âwm chu ka hup chat mai. Ani chu a lo nui char char thung.

"Teuh lo lutuk."

"Chu ai chuan a lo lian tawh tihna em ni?"

Ka nui ve țêp a ni. A âwm ang lo lutuk a, ka âwmbâwr hi ka duhtâwk ve viau asin.

Christina number chu ka hre ve alawm, teh tlatin. Phone number hi thil ka chhinchhiah theih loh zawng tak a ni a, kka number leh Christina number hi chu ka hre ve.

A ring ral ral e. Ka thin a phu dup dup mai.

"Hallo?"

"Hey, Thangi, Sarah ka nia..."

A bul vélah mi dang an awm a nih duh hmel, an ri nuai nuai maiin ka hria.

"Tu...tu maw??!!! Hallo? Váinu a ni lehpek tawh. Ka ning tak tak. Lo call tawh suh, ka buai, zânah i lo call leh mai dawn nia. I buai ve lo em ni? Hman leh lutuk bìk mai. Balance inla nei lutuk, a pawimawh chuan zânah min lo be leh mai rawh. Ka țhiante i be ve duh em?"

Hmm, ka hrethiam e. A buai rih, chuan a bulah mi dang,ka inbiakna hre ve lo tura a duhte an awm ve tihna. A fing phakar thiam thei ania aw.

"Nakin zânah le."

"Hallo??wrong number, wrong number, lo call tawh suh."

Ka nuih a zá. A fing thiam reuh lutuk a.

"A bulah mi dang an awm."

"Um, nakin zãnah i call mai dawn nia."

Aizawl kan thleng ta. Ka lung a tiléng reuh mai mai, college ka kal lai min tihrechhuak, traffic lo tâwt lehpek chuan ka lung erawh a tizíng viau.

A motor min hruaina apiangah kan kal zél mai. Engmah ka záwt lo va, ani pawhin min hrilh a tum bìk lo.

High field lamah kan tlân chho a, high field thleng si lovin Teacher's Inn lamah kan phei leh a, kawngthlang lama building nalh angreng tak, chhâwng hnih nei kawtah chuan kan ding ta a. Hei hi a in chu em ni le?

Gate a hawng phawt a, kan tlân lùt a, tumah an awm lo a nih hmel, in enkawltu takngial pawh. A nei lo pawh a ni maithei a.

A chhuah hnuah chauh ka chhuak. Kawngkapui ber chu hawngin," Kan in kan thleng ta e,"a ti hluai a, light a on kual pah a.

Pâwn lam ațanga en aiin a chhùng lamah a zau tlat. Architect thiam tak an ruai a ni phawt mai, in chhùng an chei dan leh set dan hrim hrim pawh chu a nuam khawp mai.

"Tui lumin i inbual dawn nia, nghah rei a ngai lovang."

Choka, sitting room, dining room a awm ve thlap, zau tak erawh a ni hran lo. Choka phei chu ka ngainat chi tak, a zau lova, mahse a awmdan chu ka duh chi.

Kawngkapui luh chiahin sitting room cm TV room a ni a, chuta țangin chhuat a sâng a, dining room niin in chung chhohna step a awm zui mai a,dining room ațang chuan kawngkhâr hran neiin choka a awm leh a. Kitchen cabinet máwi zet chuan ka mit a la hle a, bungbél hmuh mai tur a awm miah lo. Choka chu pindan hnihah țhen a ni a, ka hrethiam chiah lo, engvanga țhen hrang kher nge a nih le?

Fridge lian leh sâng tak chuan ka mit a la hlé bawk. Ka sán fahran loh avangin kei aiin a sâng a, a man a to viau ang chu.

"Inbual tawh la?"

Ka sìr lawkah a lo ding reng niin. Choka hi a zau loh avangin kan inhnaih khawp mai.

"Inbual hmasa la?"

"Nangmah le. I inbual chhùngin ei tur ka lo buatsaih ang."

Hah, ei tur a buatsaih dawn. Eng tak min hmehpui ang maw? Eirawng a bâwl a thiam maw? Awihawm loh lutuk. Ani ang, inla pâ ve lutuk hian eirawng a bâwl lul lovang.

Min kawhhmuh lêm lova, ka inzawn ve hmiah. Bathroom pawh chu a zau fahran lo, mahse a nuam. Bath tub leh shower a awm a. Chuan, darthlalang lian deuh,fiah zetah ka inhmu nghal bawk.

Shower-ah chuan tui lum lam zawk chu on-in ka inphutìr a, ka harh sawng sawngin ka hria. Towel leh bathrobe a inkhâi sa thlap bawk nen, shampoo leh sahbawn lah chu a inrem tlar țhât bawk a, a ngaihtuah kim hle a nih hi.

Khawi laiah nge ka room a awm ve ang aw? Room khatah chuan kan riahdun loh hrám ka beisei e. Chuti lo chu, zânah engtin nge ni ang?

Bathrobe nen chuan choka lam chu ka pan a,ka sam towel-in ka tuam bùr bawk a.

"Thawmhnaw hâk tur ka duh, chuan, khawnge ka room ve tùr hi a awm?"

A eisiam ka hmu miah lo, apron chu a lo ha ve ngèi mai, inhmeh lo lutuk.

Ka ke lér ațangin ngun zetin ka chhìp thleng min en chhuak phawt a,a apron hâk phelh pah chuan," Lo kal rawh,"tiin min rawn kal pél a, ka zui ve nghal mai bawk a.

Bathroom ka luhna bul lawkah chuan kawngkhâr dang a lo awm reng niin, ka lo hmu miah lo.

Kawngkhâr hawn pah chuan,"Hei hi kan room tùr chu a nih hi,"tiin a lùt nghal a.

"Room kan luahdùn thei lovang."

"Ngahnge kan theih loh ang?"

"A theih loh a ni tawp mai."

"Mahse, kan luahdùn dawn si a..."

"Room dang ka duh."

"Nupa chu room khatah an awmdùn țhin."

"Nupa kan ni lo."

"Kan hria ang chu."

LALHLIMPUIA - 9 By Dingdi Pachuau

A tih tak tak ka ring, ka hlauthâwng deuh bawk, mahse ka hlauthâwng tih ka tilang tur a ni lovang.

"Sitting room-ah ka mu mai ang."

"Min hlau a ni maw? Nge i insûm theih loh i hlau zâwk?"

"Ka hlau lo che. Ka thawmhnaw hâk tùr chu?"

Min en vang vang pahin,"Ha lo hian i máwi zâwkin ka ring,"a ti sap a, ka ngei kher mai.

"Thawmhnaw dahna zawng ve mai rawh,"tiin min chhuahsan ta daih a, min tihrilhhai lek lek alawm.

Drawer ka hawng a, ka thawmhnaw hâk tùr chu ka hmu lo chiang. A boxer dahna drawer ber kher lo niin, ka nam khâr rang khawp mai.

Tîm angreng deuhin thawmhnaw awm theihna lai tùr zawng zawng ka en vek a, a tâwpah chuan ka hmu ta.

Airbag-ah Champhaia kan lei ngei kha ka hmu a, ka inthawlh nghal sawk sawk a,ka sam pawh chu a ro thuai theihna tùrin ka tuamna chu ka pawt phelh ta bawk a.

Zânah kan mu dùn thei lovang. Nupa kan ni lova, a duh ang angin ka awm bawk hek lovang. Ka rilru ka tihuaisen ang, ka intihpaukhauh a ngai.

Room ațanga ka chhuah chuan choka ka pan nghal a,a lo inbual zo diam tawh. Room-ah ka awm rei tehchiamin ka hre bawk si lova, a inbual rei lo ve hrim hrim a nih dawn hi.

"I ril a țâm tawh em? Kan ei nghal mai dawn em ni?"

"Aw."

"Dining room-a chair-ah khan lo va țhu rawh, zanin chu keimân ka buaipui vek ang."

A țha alawm, a peih phawt ahnu.

Mizo chaw pângngai kan ei dawn emaw ka ti a, a ni miah lo. A siam hman kha ka ring lo rêng a ni. Mahse, eitur a chhawpchhuah chu a tui hlawm khawp, a bîk takin soup chu.

"A tui i ti em?"

"I siam chu ni se, a tui hlawmin ka ring lo."

"Engvânga ka siam a nih ring lo nge i nih?"

"I siam ni lo miau hek."

"Min hrechiang lo hle mai."

A siam a ni thei lovang,ei siam tùrin a inhmeh lo. Choka véla a chetla hrut hrut tùr chu ka mitthla chhin a, a inhmeh hlawl lo, ka ngaihtuah záwng chuan ka lo nui deuh a ni mahna.

"Eng nge nuih tùr a awm em ni?"

Ka nui hmel a lo hmu chu ka duh lo kher mai. He pa hian ka nui hmel a hmu tùr a ni lo, ka fìmkhur tawh ang.

"Ka nui palh mai mai."

"Min nuihzat a ni maw?"

"Chutiang ka hre lo."

Țawng lo chuan kan ei chhunzawm a, ka duh aiin ka puar dawn tlat.

Thawhsan ka tum chu,"Ei zo ang, la țhu rih rawh,"a ti leh ta tlat a.

"Ka puar."

"Ei zawh tùr."

***************

"Ei zawh tùr."

Ka thlênga beef rice chu ka melh a, a tlêm tawh tho sia, eng nge pawi viau le? Ka ei peih tawh lo a ni mai a.

"Ka puar tawh."

"Ei tùr réng réng, a man i pék tawh chu i ei zo vek tùr a ni. Ei tùr nei lo tam tak awm laia ei tùr ei zo lova thawhsan daih chu a malsâwm ngai lo."

A thù awihin ka ei zo ta hrâm e.

Mahlima nén kan inzui hma hian hetiang hi ka hre ngai lo. Kan inzuia restaurant-a min chawlhpui rèng rèngin ei tùr ka ei zawh loh dawn chuan 'Ei zawh tùr' tih hi a sawi ziah a, ka ei zo leh nge nge țhin.

Ka sawi hmaih țêp. A thinchhiatzia leh a thîkthu chhiatzia hi, a châng chuan ka hlau lek lek fo.

Cl-xi ka zir kum, kum tâwp lamah khan cl-xi sec B ami, Benji, pâ lutuk lo hian english note ka neih țhat leh țhat loh min záwt a, english period-ah kan section nèn kan in-combine țhin a, class khatah kan țhuho vek țhin. Benji hi ka hma chiahah a țhu țhin a, kawm a nuam phian a,a inthuam dan chu mipa pângngai ang thlap, a țawng erawh a nêm. Hriatchian hma chuan star mai a awl, a țawng hriat ri hriat leh kawm chian chuan star chu khawilam, kan nuihpui bâwk bâwk țhin rêng a ni.

Kan inbe lai chu Mahlima chuan min lo hmu a ni chêk ang, short break laiin thinrim deuhin a lo kal a.

"Tunge kha pa kha? Sawi rawh, ka hnek dawn. Ka hmuh laiin mipa be suh ka tih kha."

A va buaithlak țhin tak èm!

Mi dangin min hmuh theih lohna lai tùrah ka hruai vat a,a thinrim chu a mit a sen rûm bawk si a, thil țha lo a ti palh ang tih ka hlau.

"Benji a nih kha. Note ka neih țhat leh țhat loh min zâwt a, engmah thinrimna tùr a awm lo,"ka theih ang tâwka zaidamin ka hrilhfiah a.

"In indin hnaih êm kha."

"A,nia, thîk duh teh suh, mipa ang pawhin ka en hleinem,"ka ti ta ringawt a, a dik rêng bawk a. Benji zawng, bialnu a nei thei lo ang e.

"Mahse, hmeichhia a ni hleinem."

"Thinrim hluai țhin teh suh."

"Mipa dang i biak chuan ka thinrim zèl ang. Kha pa pawh kha, vawiin atân chauh ka ngaidam ang. A be leh che a nih chuan ka hnek khawp ang."

"I hlauhawm thei sia aw.."

"Ka tâ, mi dangin min lo țâwm ve hi ka phal lo a ni mai."

A thîkthu chhe lutuk hi min duh lutuk vângah ka ngaihsak mai loh chuan buaina a tam mai mai ang, kei lahin ka lo duh ve hlé tawh bawk si.

"Um, ka be tawh lovang. Mahse, min lo biak tlat si chuan?"

"Ka tâ i ni tih inhre reng la."

"Nih, nangmah ve thung?"

"Nang ka neih hnu che hian hmeichhe dang ka be tawh ngai lo."

"Tûnah ka hre ve chiah."

"Min ring lo em ni?"

"Ka hre lo le." Thudik tak ka sawi, ka ring chiah em ka hre lo a ni.

"Min ring rawh."

**************

"Zânin chu ka âwl ang che, engmah lo tih ve a ngai lo ang."

Mak e, in chhûng chét phei chu a tih ka ring ngai lo. Min tiphu zawk zawk mai chu a nih hi.

Ngaihven lo ang deuhin ka awm nâ a, ka mitsîr reng. An inah khan a chêt țhin ka ring miah lo, a che vèl lah chu a khawr hran bawk si lova, a mak viau a ni.

Sitting room-ah chuan ka țhu a, magazine ka en mai mai. A tihfel zawh chuan ka awmnaa lo kalin,"Christina chu i phone dawn em?"tiin min zâwt a, ka lo theihnghilh dèr tawh.

"Aw."

"Kha,phone chu."

Lâwmthu sawi ka duh viau náin ka sawi lo. Phone chu ka la vat a.

"Password chu 'Sarah27' a nih kha, 27 chu a awmzia i hriat tawh kha."

"A ni bawk lo."

"A dik tak ka hre châk tawh hle mai."

"Kal mai teh."

"33 nge 34 ? Nge 36 zâwk?"

Rum deuh hian ka melh kâwk a, engah vak a ngai lo khawp mai.

"Hmang thuai mai teh, ka hmang ve duh ania."

Christina nen chuan minute 15 vél zet kan inbia. Ka țawng ve mang lo, a thil sawi ka ngaithla a ni ber.

"Tv kha on la, phone ka'n hmang ve lawk ang e."

Ka en peih hleinem. Mahse, tih tùr a vâng em mai a, ka on ta ngè ngè a.

Zai ngaihthlak a nuam alawm le.

Zai chuan min âwi lehpek a, ka mut a chhuak leh ringawt mai. Mut ka duh lutuk hi a buaithlak.

"I lo muhìl leh tawh elo? Mut duh lutuk mai."

Mahlima țawng chu ka hre ruai ruai a, min pawm a ni ang, ka kãng deuhin ka hria.

Ka meng chhuak hlawl mai a, ka zun chhuakun min tiharh a ni ber. Light on a nih loh avángin a thim angreng a, khawiah nge ka awm pawh ka hrethiam lo.

"A va thim tak!"

A ri khap a, room chu êng ta uar a. Ka mit a tivâi leh si, ka mit ka hup vat a.

"I muhíl thei lo em ni?"

Mahlima a ni. A room-ah ka mu ve tihna em ni? Ni lo, thil pawi a thleng em? Ka meng ta vat a, ka thawmhnaw ka la ha reng e, thil thleng a awm lo tihna.

"Toilet-ah ka kal duh a."

Ka tho nghal a, kawngkhár lam chu ka pan vat a.

"Khawiah nge kal i tum?"

Hawi lét lovin,"Toilet-ah ka tih chu mawle,"ka ti hlar a, a bulah ka riak duh lo tih a hre ve reng si a, a bula mut chu ka duh lo a ni, sitting room-ah khan min muttìr mai tùr ania.

"Chhuak kher lovin room ațang hian a luh theih. Helamah hian kawngkhâr chu."

Min kawhhmuhna lamah chuan ka tlân ta vat a, min nuih hawk hawk zui.

Toilet ațanga ka chhuah hnu chuan," Sin tùr puan dang ka duh, sitting room-ah ka mu dawn," ka ti a.

"Hei, engvângin nge i mut sawn kher ang?"

"I bulah ka mu duh lo."

"I harh hma pawhin i mu reng alawm. Engtin nge ka khawih che? Tlangvâl thianghlim ang maiin ka dek lo che."

"Riah dun ka duh lo."

"Inrintâwkna nei teh."

Pawi lo, sin tùr min pe lo mahse ka mu thei tho ang, khua a vâwt tehchiam hleinem. Ka mu thei âwm em mai, bathrobe pawh ka sin mai ang, towel pawh.

Ka chhuak ta tho a, a vâwt lo hlauh chu ka vânnei ka ti khawp mai.

Rei pawh ka la mut hmain blanket kengin a rawn chhuak a, boxer chauh a inbel avâng chuan ka lo en țha duh lova.

"Keimah ka lo mu ang, khumah sawn va mu rawh."

"Ka mu thei e."

"Luhlul chhuah suh, ka châu ania."

Ka mutna opposite chiaha sofa-ah chuan a rawn mu nghal a, sofa chu a sei lêm loh avângin a ke chu a lawr zuah a. Kei ve thung chu thâwl hanin ka mu thei thung a.

"Khumah chuan va mu rawh, i chauh phei chuan."

"Thù awih mai rawh."

A awki ațang chuan ka hnial leh a nih chuan a thinrim tawh ngei ang tih ka hria. Khuma mut ka duh vánga hetia hnial hi ka ni miah lo. Ka ti tak tak. A bula mut ka duh lo mai a ni, a thù anga awm ka duh lo chauh a ni.

Nia, a cháu ngei ang chu. Kei lahin ka hnial char char bawk a, a rilru leh taksa a cháu ang.

Ni leh lo, a cháu lovang. Ani khawngaiha ngaihtuah hi ka tih tùr a ni mawlh lo ve. Amah vângin tùnah pawh ka hmingchhiain ka mualpho èm èm a ni.

Room-a luh pah chuan Christina nèn kan inbiakna kha ka ngaihtuah lét a, U Zuala chu a rilru a na takzet tih min hrilh a nih kha.

Ka rindan sá a ni tho nain a taka hriat meuh chuan a nuam lo duh takzet. Chutah, U Zuala nu ánhlá Christina min hrilh phei kha chu ngaihtuah lét leh pawh ka duh lo, theihnghilha hriat chhuah tawh miah loh ka duh.

Ka chhùngte chu an rilru a ná,an zak hle bawk. Mahse, eng nge tih theih ka neih tawh chuan le? Hmingchhiatna leh mualphona tinrèng chu ka chungah, keimah mai ni lo, ka chhùngte pawhin an tuar lo thei si lo.

Mahlima thiam loh vekah ka puh thei lovang, keimah pawh ka dik bîk tlat lo. Heiha, thil a buai zo vek tawh, huaisen taka hmalam pan a ngai tawh a ni ber. Miin min hmu tuitang lo a nih pawhin engah mah ngai duh lo ila, engkim hretu Pathian a awm alawm, Mahlima nèn pawh kan la chesual èm hleinem. Mahse, kan hming a chhe tawh tho tho a, U Zuala lakah erawh ka inthiam thei tawh ngai dawn lo a nih hi. Hei hi hrehawm ka ti ber, hmangaih úk si lo khan lo duh der lo tawp ila, a țha tùr. Hmm, hmeichhe thudâwn leh bawk.

A dik sì a ni. U Zuala hi ka hmangaih miah lo alawm, Mahlima'n nupui min neihsan hnu khan ani anga hmangaih ka neih theih tawh ka ring lo. Mahse, hmangaih ber neih theih loh hnuah pawh min hmangaih èm èmtu U Zuala ka tawng a, ka hmangaih lo tih ka hrilh rèng bawk a. Mahse, amahin min hmangaih a, min hêl reng bawk si nèn. Pasal neih hun ka ni ve tawh bawk a, hmeichhia phei chu kan vánglaini a rei si lo. Amahin min neih a huam ém aváng leh min hmangaihtu Pathian min pêk ngei a nih kha ka rin bawk avângin neih tum kha ka ni a, ka duh lo hran lo bawk. Hmangaih mai theih kha ka inring pah bawk a, mi fel leh rintlâk a lo ni zèl nèn. Mahse, a nun tichhetu mai ka ni ta si.

Pathianin ka chungah zahngai hrâm teh se. Mi sawisèlna leh diriamna chu phur tùr ka ni, thil tidik lo ka ni miau si a, ka phurh ngei a ngai.

Ka muhìl thei lo, khumah chuan ka let tawn sek mai a. Thil țùl lo leh sâwt lo ka ngaihtuah kual a, mahse thil dang ka ngaihtuah thei miah lo.

Ka muthilh ve meuh chuan zìng lam dâr thum vèl a ni tawh hial ang chu.

Ka harh meuh chuan ni zungin room chu a lo káp èng sût tawh mai a, kei hi, thawh ka hai lehpek. Ka tlâi leh khawp ang chu.

Ka hmaite phihin há ka nâwt a, ka intihfai hnu chuan room ațang chuan ka chhuak a, banga sanapui, máwi zet chu ka en hmasa ber a. Ka rei, dâr 8:30 a ni tawh!!!

Chokaah a lo ri rak rak a, ka rilru tak chuan ka inthlahrung ve reng, mi ang pángngai ka ni ve tlat alawm le.

"Tihpui i ngai em?"

"Oh, i lo tho tawh maw, sleeping beauty?"

"Puih i ngai em?"

"Inthlahrun a ngai lo, in tùr i duh em?"

"Tui ka in mai ang."

Fridge tui hi ka ngaina lèm lova, filter awmna chu ka pan phei a.

"Ka lo thlit mai dawn che alawm."

"Ka ti ve thei e."

Dik tak chuan mi polite lo tak ka ni ngai lo. Mahse, engtizia nge he pa bulah hian ka polite theih miah loh le?

"Chaw kan ei har lovang."

"Puih i ngai lo maw?"

"Inthlahrung suh ka tih kha. In chung lamahte khian han chho la, han fang kual la, intiharh rawh."

A fel leh ta riau mai. Nizân lamah a mu țha thei em le? Keimah vângin sofa tawngchham zetah khan a mu si a.

"Nizán khan i mu țha thei em?"

"Min ngaihtuah ve elo?"

Chháng lovin ka kalsan daih.

In chung lamah chuan ka chho a, room nuam tak tho a lo ni a, mahse a chhùng chei chu an la ti zo chiah lo a nih hmel. Siam zawh a nih hunah chuan a nuam khawp ang le.

Bathroom an siam dante chu a fel fai thlap, zau deuh ni si lovin a tâwk tiu teu khawp. A nuam reuh khawp mai,in hnuaiah room a nei si a,hei hi tu room tùr tak ni ang maw?

Veranda zau vak lovah chuan ka dâk a, hmm, a thawveng reuh khawp mai. Hmuh theih chin chu zau lém lo mah se, a nuam reuh tho.

"A nuam i tihzáwng a ni em?"

Ka bul maiah a lo ding reng tawh niin. Mak hle mai, a thâwm ka hre lova, amah lah ka lo hmu hek lo.

"Um, a zau huau lo nain a nuam reuh."

"A lâwmawm e, ka duh khirh deuh si a, luah theih hunah chuan kan room atân kan hmang daih dawn nia, in hnuai khu chu duh aiin a chêp ka ti a."

'Kan room'. Hm, min kaltìr chu a tum lo khawp mai, chubákah, 'kan' a hmang bawk. Room hran chu min luahtìr a tum lo chiang bawk e.

"Hei hi in in em ni?"

Leh ta pek a, mâwl leh ta. An in ni lo se, a chèng dawn em ni? Ka va mâwl țhin tak em!!

"Kan in mawle, nangmah nèn, kan fa lo la piang tùrte nèna kan in a nih hi. Ka pu min rochuntìr ania, ka siamțhattìr vek a."

Hetiang lam chu sawi rih lo teh ang.

"Chaw kan ei thei tawh ang em?"

"Tehreng mai."

Tukin chu ka chêtpui ve ta. Ei tùr a siam vek si a, nizán lamah lah engmah ka tihpui tawh si lova, nuam lo ka ti ve tawh a ni.

A ei tùr siam chu a tui phian mai.

"I siam tui hle mai."

A nui var var a, fakna chuan a tihlim hle tih a hriat mai.

"Ka láwm e."

Chhùnah chuan hnathawh tùr a awm si lo, hetiang hi a hrehawm ka ti. Ka be bawrh bawrh duh si lo,ka la induhtâwk ve tlat rih. Ani lahin laptop a khawih a, biakpawh ngam pawh a ni lo hrim hrim, hna a thawk a lo nih phei chuan...

Eng nge ka tih ang aw? Ka va ning tak èm! TV lah ka en peih si lo. In chung lamah ka chho a, veranda-ah ka dâk thùl. Ka ngaihtuah chhuah tâk ber chu pangpár awm se, a tinuam viau ang tih tè mai hi. Pangpár lah chu khawi ami nge ka neih tehlul ang?

Mahlima bulah lah ka sawi lang duh dawn dèr si lo. Ani lah pangpár máwi tia ngaina chi a ni dawn lo sa. Ka awm ta sa sa a nih chuan ka ngaihtuah ve ngei chu a ngai a ni.

"I ning em?"

Ka phu zawk, he pa hi, thâwm neih hmasak țhin tùr a nia, min tiphu zawk zawk reng dawn chu a nih hi.

"Aw."

"Lèn chhuah i duh em?"

"Khawiah?"

"Bazârah te, i duh duhnaah."

"Pangpár lei ila?"

"Engtin a?!!!"

"Pangpàr lei ang."

"Ok, a țha alawm. I thawmhnaw tùr pawh lei a ngai ang chu."

Ni dawn tak, Champhaia kan lei bák kha ka nei hleinem. Kei ai chuan a lo ngaihtuah thui deuh a nih hmel.

Kan chhuahnaah chuan hmelhriat kan hmu ang tih ka hlau tawp. College ka kalpuite ka hmu ang tih ka hlau ber, chanchin min zâwt ta se, chhán dan tùr ka hre dawn si lo, dáwt hrilh ringawt lah a hrehawm dawn si.

Thawmhnaw chu kan lei țeuh mai, ka duh loh thleng thlengin min lei a, amahin keng zèlin motor-ah a dah zèl a, dáwrngháktute lahin min en duh thei nasa.

Pangpár chu a leina tùr hmun ka hre miah lo. Ani lah chuan a hre dawn lo chiang a, engtin nge ka tih ang?

"Pangpár chu kan lei dawn em?"

"A zawrhna ka hre lo."

"A va mak âwm ve! Bazarah, motor-a tlân chung pawhin i hmu țeuh lo em ni? Dáwr chhùngah a lo pár chuai lo em ni?"

"Artificial ka sawi lo. A tak tak, a fresh ang chi hi, pot-a lei nèn an phun ang chi hi."

"Ka hre hauh lo mai. Inrinni bazárah an zuar ang chu."

Va buaithlak tak. Chhuah lai hian lei fel vek ka duh asin le.

"Online-ah a chî chah mai la?"

"A theih maw?!!"

"Theih e, ka nau pawhin a chah țhin."

"A țha ve maw? A lo țiak thei em?"

"Ka hre lo, ka ngaihtuahpui ngai lo."

Nia, a ngaihtuahpui lo tawp ang. Pangpár hi máwi a ti ve ngùt pawhin ka ring lo.

"Kan háw dawn nge lèn kual i la duh?"

Lèn kual chu a châkawm rualin hmelhriat hmuh ka hlau.

"Háw záwk ang."

"Nia, ina inawm pawh a châkawm alawm."

"Țawng fìmkhur deuh teh."

"Eng nge ka sawi dik lo em ni? Kan pahnih chauha inawm tluka châk ka nei hleinem."

"Ka châk ve lo ve."

"Insùm theih loh i hlau ti raw?"

"Teuh lo,"rang zetin ka lo ti vat a.

"Min chhân ran dán ațangin a ni chiang."

"I ngaihtuahna a nih chu."

"Háw hunah test ila?"

Rápthlak ti zet hian ka melh a, ani lah chuan nuam a lo ti zâwk a ni ang.

"Tikhan meng der vèl teh suh,haw i duhna chhan pawh a nih chiah kha."

"I titi rápawm zet kha duhtâwk teh."

"Rápawm nang, phùrawm tak a ni záwk."

Ka chhâng peih tawh lo, ka chhânin a phùr telh telh zawk tlat si.

"I ngaihtuah zui chiang. A phùrawm bâkah a nuam a.."

La ta deuh deuh chuan. A rilruah hian hetiang hlìr hi a ngaihtuah a nih âwm hi.

"Duhtâwk teh."

"I bula awm hi chuan hetiang hi a ngaihtuah loh theih loh. Min tiphùr èm alawm."

Zèp hi a nei thei lo. Zahpah a nei ve bawk si lo va, keimah hi ka zak reuh reuh fo rèng a ni.

"Háw ang."

"I châk tawh chiang."

LALHLIMPUIA - 10 By Dingdi Pachuau

A ngaihtuahna hi a bawlhhlawh a ni.

Ei tùr kan lei haw nual. Pawisa chu a nei lehpek khawp mai. Eng nge a thawh chiah ka hre lo nain thawh chu a nei chiang alawm.

"Ei châk deuhte i nei em?"

"Nei hran lo."

"Sawi hreh suh."

Ka sawi hreh lo chiang, ei chãk ka nei lo a ni mai.

"I chak țhat a ngai ania."

"Eng vângin maw?"

"Thil phûrawm deuh kan tihna tùrah khan chakna i mamawh alawm."

A ti leh ta. A rilru hi a dik mawlh lo ve. Mipa hi an lo heti rèng em ni?

"Ka tel châk lo ve."

"I tel lo chuan a tih theih loh."

"In nu hlui sâwm mai rawh."

Ka va tifuh tehlul èm!

Min rawn en vang vang phawt a.

"I thîk leh si ang e?"

"Ka thîk tawh ngai em? Ka thîk phâk pawh a ni hek lo."

Ka rilru chhùngrilah chuan thîkna a rawn lùt vat a. Ka sawi hi a dik, ka thîk phâk chu a ni mawlh lo. A hmél ka hmuh hma hauh ațang pawhin ka thîk tawh a, mahse, ka thîk phâk lohzia ka hria a,hrehawm ti zeta tuarchhuah tum kha ka ni ve hrim hrim bawk.

"Hmeichhe dang chungchâng chu sawi lo teh ang."

"I duh duh i sawi thei, ka control lo che."

"A dik."

Ka rilru hi chu a va tina sam em! A thil sawi tam takte hian ka rilru a tina tih a hre dèr âwm si lova.

"Mahse, kawng tam takah chuan min control bawk si."

Ka control maw?!!!

In kan thlen chuan kan thil lei chu motor ațang chuan ka pawmchhuak a, ani lah chuan min rawn puih pawh tum chuang lo chuan min en vung vung ringawt a.

Ei tùr chu fridge-ah dahin thawmhnaw chu kan pahniha room ințawmah chuan ka keng lùt a, mahse, dahna tur ka hre chuang lo. Champhai ațanga ka thawmhnaw kenthlakna bag-ah khan ka dah ve tawp a.

"Wardrobe kha hmang ta che."

Ka phu zawk, min lo zui lùt ve zèl lo niin.

"Min tiphù alawm,"ti pahin ka áwm chu ka dawm vang vang a.

"Tihpalh. Chuan, nangmah chauhin i chèng lo tih hria la?"

"Min zui anih pawhin thâwm nei hmasa țhin la."

"Thil tisual lai phâwk fuh ang mai hian phu zuk zél suh, i bula awm nuam ka tihzia chu i hriat reng kha. Mahnia tlat fâltìr che hi ka duh loh bâkah ka hmuh phâkah awm reng tùrin ka duh che."

Leh duah mai a.

"Ka kalna apiangah min zui zèl dawn tihna em ni?"

"Ka theih chhùng chu."

"Bathroom-ah te, toilet-ah te pawh maw?!!"

"Bathroom phei phei, nuam viau ang chu."

"I rilru hian âwn lam lo nei ziah suh."

"Min tiphùr thei èm alawm. Min tidanglam ziah lehnghal."

Hetiang lam bawk.

"Khatiang lam bawk kha sawi ziah lo teh."

"Sawi ringawt. Heti chen ka awmpui tawh che a, tlangval thianghlim ang maiin,tawh pawh tawk lo chein fawh khat pawh ka la fawh loh che hi maw."

A dik ve reng. Nia, a mak zawk. Min la fâwp miah lo.

"Tlangval thianghlim chu intehkhin lo mai teh a."

"Ka ni duh bawk lo."

"I tling lo."

"Min hnialin min cho âr reng mai a, min cho chhuak khawp ang. Ka insûm theihna hian a tlin lo țêp tawh a ni."

A thusawi chu ka ngaihtuah chhunzawm duh lo. A tih tak tak chuan ... Ka kalsan nghal daih a, zanriah ei tùr buatsaih daih teh ang.

Min rawn pui ve leh mai bawk a. Ei siam chu a zei thlap mai, ka mitsìr reng bawk a, min pui ka ti nain ka pui a ni zawkin ka hria.

Chaw ei khamah min tihfelpui leh thlap bawk a, nuam lo ka ti lek lek. Thil min tihpui miah lo se, inhnaih lém lo ila, inbe lutuk lo bawk ila ka duh asin. Tichuan, kawng tinrêngin hnial a awlsam ang.

Ka hmangaihna kha a lo thar leh ang a, tunah hnialin țang viau mah ila,hnial hneh loh hun ka la nei mai ang. A chunga ka thinrimna leh lungawi lohna hi a ni tèlin a reh tial tial si.

"Keimahin ka ti thei alawm, puih ka ngai lo."

"Nupa kan nih hi, bâkah hun hman dun hi a nuam ve hranpa ka ti bawk."

"Nupa kan ni lo ka tih tawh kha."

"Kan ni thuai dawn, min hnial lo bawk ang. I pasal tûr dik tak ka nih hi."

A kalsawn nghal daih.

Eng tak a rilruah awm ang maw? Kei chuan pasal ka nei dawn a nih chuan thianghlim takin, Pathian hmaah kohhran hriatpuina thlapa neih ka duh. A la hre ve rengin ka ring, ka duh dan pawh a bulah ka sawi thlap tawh si a.

**************

"Naktûkah ka rawn haw dawn a, kan chawlh chhùngin innei tawh mai ang. I tel lova hun hman ka peih tawh lo."

A awm rei lo lehpek ngawt ang, pawisa an nei èm zawk a, a rawn haw zauh zauh thei a ni.

"Tluang takin rawn thleng phawt rawh, kan la ngaihtuah dawn nia."

"Yes, ngaihtuah ngei ngei rawh aw."

College èm pawh a la chhuak lova, kei phei chu a la hla lutuk. Ani chuan a zo țép tawh zawk, inneih mai hi chu a sawi zing, min ngaih vângah ka ngaihsak a, kei ve mai nupuia min duh hi mak ka ti a, ka láwm viau a ni.

Nizán hmasa khan chanchin țha lo deuh ka hria a, ka hriat tirh phei chuan ka tâwt up up a, bathroom-ah a rùkin ka țap char char.

A hnuah Mizo hian hetiang lam kan ti ngai hran lo tih ka ngaihtuah a, ka rilru tlèmin a nuam deuh. Zu phone-a zawhfiah nghal ka duh èm èm rualin thudik lo a lo nih palh tákin ka ti leh deuh a, eng emaw hleka mangang phí chúk ang chi kha nih ka duh lo a ni.

Christina cousin, Zemabáwka awm chuan Mahlimate nena kan thlalâk chu Christina phone ațangin a hmu a, chu chu záwtfiahin Mahlima chanchin chu a sawi ta a ni.

A țhiannu, Zemabawka awm ve tho chu Mahlima nupui hual a nih thu a lo hrilh a ni âwm e. Christina erawh chuan a lo hnial ve nasa, Mizote'n nupui pasal hual kan neih ngai loh thuin a hnial a. A cousin erawh chuan hrechiang a lo inti viau mai a, college an zawh hnuah inneih an tum tih a hrilh bawk a. Chu chuan ka ngaihtuahna a hruai nasa khawp mai a, ka ngaih a țha lo deuh a,inneih mai a sawi chhénte hi chuváng chu a ni thei ang em? Mahlima hian a duh ve rèng em? Nge dâwt hrilhin min kawp? Mahse, ka ring chhe phal lo, min kawp lovang, chutiang ti duh hmela a pu lo. Thil dik lo ni tùrah ngai phawt ang, mahse zawh ve pawh chu a sualna a awm lovang chu maw.

A rawn thleng chho chu Lungleiah pawh a phei lo. A pìte inah a innghat leh a, nitin kan inhmu leh thei ta, hlim taka hun hman ka duh avângin a nupui hual chanchin(?) chu ka záwt duh lova.

Kár khat vèl chiah a awm hman ang. Friday-ah chhuk a tum leh tawh a, Thursday chawhnu chu class ka off leh tawp mai, kan inhmu har leh tawh dawn si a, a phú ve alawm.

A pîte car la chhuakin kan lèng a, hun remcháng ka hmuh veleh a chanchin chu ka záwt tawh ang.

Ka huphurh ve deuh khawp mai a. Mahse, hriat chian thuai a țha ka ti bawk si.

"I inngaihtuah tawh em?"

"Engah maw?!!"

"A mak thei. Inneih chungchâng kha, 'kan la ngaihtuah dawn nia' i tih kha. Kei chu ka rilru ka siam fel tawh."

"Mahlim, nupui hual i nei em?"

Thinphu dèp dèpin ka sawi chhuak, amah pawh ka en ngam lo.

"Aw, nei e."

Min chhânna chuan min déng dawt mai. Ka kut ka húm ruh a,"Engvângin nge min hrilh loh?"tiin pángngai thei ang berin ka zâwt a, ka aw erawh a khùr tho nia.

"Hrilh kher i ngai lo, i inhre sa reng alawm."

"Min fiam suh, ka fiamthu lo ania."

"Kei pawhin fiamthu ka sawi lo."

"Nupui hual chu i nei tak tak em?"

"Nei chiang e. Ka nupui hual i ni, a chiang em?"

"Miin 'nupui hual a nei' an ti che a?"

"Nei e, an sawi dik alawm. Nangmah hi ka nupui hual dik tak i ni."

"Zemabawk nula, college kal lai, hmelțha deuh, hausa deuh..." ka la sawi zawh hma chuan," Pângzâwl nula, college kal lai, hmelțha deuh, ka duh deuh zawk alawm,"a lo ti hmanhmawh a.

"A dik em?"

"Mi thusawi nge i rin ka sawi?"

"Ka ring che tih i hria, mahse..."

"Min rin chuan a tâwk. Chuan, zanin hian hruai haw mai che ka duh, ka nupui ni tùrin."

Chiang zetin min en a, kei pawhin ka en lét ve kar a.

"Ka hruai haw dawn che."

"Mahlim, nupui atân min duh tak tak em?"

"Duh tak tak e, nghah che hi ka peih tawh lo, innei tawh mai ang."

Kei pawhin ka duh.

Mahse, thil thui taka ka ngaihtuah a ngai. Tùnah hian kan duhna hi tipuitling ta ila, nakìna inchhìra pawiti tùr chu keimahni. Ngun taka ngaihtuah a ngai.

"Min zui haw mai rawh, aw?"

"College zawhah kan ti emaw ka ti? Chuan, inru lova dân thianghlim ngeia inneih ka duh asin. Nang pawhin i duh lo em ni?"

"Duh e, mahse,kan hmaah eng thil nge lo thleng tùr kan hre lo. Ka chân ang che tih ka hlau alawm, chubâkah, innei chung pawhin college chu a kal chhunzawm theih thova."

"Ka chan tùr ngaihtuah ve la, college zirlai ni chunga pasal neihte chu, i chhùngte lakah a inthlahrunawm lutuk dawn asin."

"Chuti a nih leh, ka pìte hnènah hian kan awm daih ang a."

"Thawhchhuah kan nei lo ve ve dawn bawk si, chutah, zirlai kan la ni dawn zui, châwmhláwm dik tak kan ni dawn asin."

"Kan zir zawh hunah thawhchhuah chu kan nei ve mai ang chu. College kal chhunzawm kher lo pawhin pawisa chu ka thawkchhuak thei èm èm ang."

A thei ang, a thei lutuk ang. Mahse, keimah avânga zirna a tâwpsan tùr chu ka duh miah lo. Thiam taka ka thlèm char char a ngai.

A nupui hual nia an sawi chu ka zâwt chhuak miah lo. Thu dangah kan pèngkáwi ta daih sia, thutak a ni lo a ni ang.

A chhuk thlãk hnuah chuan kan inbe chhunzawm zél a, ka ngai thei khawp mai. Ka lung a lèng zual a, phone-a ka hla neihho chu ka play tlut tlut țhin. Phone-a inbiak hi chu hmaichhana inbiak nèn a inang lo va, kan inbe zo chiah hi ka lung a lèng thar zél.

Hun chu a kal ve bek bek a, kan inkár chu a zia reng, Christina thusawi pawh kha ka lo theihnghilh ti tih tawh a. Mahse, tlai khat chu Christina cousin chuan Christina a rawn phone a, a thiannuin Mahlima fa a pâi thu a rawn sawi ta tlat mai. Chuan, an innei dawn tih a rawn sawi bawk.

Mahlima kan sawi hi a inang lo a nih ka ring tlat a nih chu. Thil awm thei ve tho a ni.

Ka zu phone a, nupui a nei dawn em tih ka zawh chuan a neih dawn thu leh keimah min neih a tum thu chu a la sawi fan a, ka ngaih a țha leh sawt a.

"Zemabawk nula an sawi ka tih kha i bialnu a ni tak tak em?"

"Ni lo, ka bialnu chu nangmah chauh."

"In innei dawn lo maw?"

"A va mak tak, nangmah kha ka nupui tùr chu i ni."

***************

"Zanin chu khumah kan mu ve ve tawh ang."

Hlauthâwng deuhin ka en phei vat a, chiang deuhin min lo en rân bawk a, hawi sawn vatin," A nih leh, min dek miah suh ang che,"ka ti ve thung a.

"Ka thu thu."

"Ka au vak a ni mai."

"Min tihlau dawn alawm le."

A hlauh lohzia ka hria. Keimah hi hlauthâwng zawk chu ka ni.

"Eng nge sofa-a ka mut kha a pawina?"

"Kan mu dawn lo ve ve."

A lung a àwi lo tih ka hria. Hnial vak a sâwt lo. Nia, khumah pawh mu mah ila, min khawih kher ang tihna a ni chuang hleinem.

Mutnaah chuan kekawr chhah deuh leh kawr bantlawn chhah lam deuh bawk ka ha a, min rawn hnaih theih lohna turin kan inkârah chuan blanket ka dah bawk a.

Chu chu a hmuhin,"A hnawk, la sawn rawh, a lum si,"a ti hmuk a, a lung a la awi lo tluang zèl a nih hi.

"Lum ka ti ve lo."

"Ka kuah lum mai ang che."

"Min dek suh ang che."

"Dek lovin engtin nge ka kuah lum theih ang che?"

"Kuah lum ka ngai lo."

"Ka kuah dawn che."

Tho thutin," Chhuatah ka mu mai ang,"ka ti a, blanket chu ka pawt nghal bawk a.

"Ni lo ve, khumah kan mu ang."

"Min rawn hnaih suh."

"Engtizia nge hetia i awm a?"

"Min khawih tùrin ka duh lo che."

"Mahse, keiin ka duh si alawm."

"Thianghlim taka pasal neih ka duh ka tih kha."

Nui sak chungin," I ngaihtuah nasa lutuk a nih kha. Ka kuah ringawt dawn che alawm,"a ti sap a, ka zak țép alawm.

"Chutiang rilru i put loh kha."

"I duh lo chung ka tihluih che i ring maw? Hmeichhia an duh lo chung ka la khawih ngai lo."

Râpthlak ti zet hian ka en rãn a.

"Khatiang khan min en suh, kuah chung chea muthilh ka duh mai a ni."

"Min khawih lo chiah ang maw?"

"I duh lo chung chu khawih lo ve."

"Ka ring chiah lo."

"Inrintawkna nei ta che, a tlai tawh ania."

Ți deuh chungin khum chu ka pan leh a, a sîr tê-ah chuan ka mu a.

"Lo tawlh rawh, i tla mai ang."

"Ti hian a pawi lo."

Ka kâwngah min rawn kuah thut a, a lamah min pawt phei nghal. Ka râk țhawt a.

"Hetia mut hi a har viau em ni?"

Ka țang țùng mai. Ka tâl deuh laih laih tak nain min kuah ngheh sauh zèl avângin ka tâl duh ta lo, ka țanna lamah lum ka ti țan lehnghal.

"I kawr hâkte hi, mutpui a hrehawm lo'm ni?"

"Aih."

"A lum i ti lo tak tak ang maw?"

A lum chu ka ti țan chiang alawm. Mahse, sawi lan chi ni nâng.

"Aw."

"A nih leh le, i muttui ka beisei e."