☆LALHLIMPUIA☆ - 11- 18 By Dingdi Pachuau

 LALHLIMPUIA - 11 By Dingdi Pachuau

Ka mu tui thei lo ang, a lum si. Bâkah min kuah nghet bawk si. Hei ha, a va nuam lém lo tak èm!

"Hlauthâwng suh, hahdam takin awm rawh."

Ka thei lo, a lum lutuk. Tunah chuan ka buaina ber chu a lum lutuk hi a ni.

"Bathroom-ah kal lawk ka duh."

"Ka lak ațanga kal hranna zawng kher lo la."

"Chutiang a ni lo."

"Nih leh, eng nge ni? Min hrilh hma chu ka thlah dawn lo che."

A ti leh duh tak tak ang, tunah pawh lum ka ti tawh nasa mai si a, ka hrilh mai a țha ang.

"Ka intleuh lawk duh."

"Kalpui i ngai em?"

"Ngai lo." Ka chhâng rang mah mah a ni.

A nui kar kar a.

"A lum i ti chu a ni lo ti raw?"tiin min kuahna kut chu a la sawn a, ka tho rang kher mai.

Tui vawta ka intleuh chuan ka harh sawng sawng bâkah ka nuam suai suaiin ka hria. Kawr leh kekawr ka hâk kha chu ka ha leh tawh lovang, a hrehawm lutuk.

Thawmhnaw puan deh nuam ber nia ka hriat chu ka inbel a, ka mut chuan min lo kuah leh nghal vat a.

"Hm, rimtui hlé mai."

Min rawn kuahna kut chuan ka kut lehlam chu a rawn bawhthuahtìr a, chutah ka nghâwngah fáwp zohin," Mut tui sûk sûk le, Sarah darling,"a ti sap a.

"Nang pawh le."

Ka mu tui hlé tak tak a nih ka ring, ka harh leh meuh chuan khua a éng uar tawh a,mumang pawh ka nei lo. Keimah chauhin ka lo mu leh tawh, a hmèl hmuh tùr a awm lo.

Bathroom-ah lùtin ka intifai a. Choka lama ka lût phei chu a lo rimtui ram ram khawp mai, ril a tițâm nghal raih raih mai.

Min lo hmuh veleh,"Morning, in tùr i duh em?"a lo ti vat a.

"Duh lo mai. Puih i ngai em?"

"Ngai lo ve. Lo țhu mai mai rawh."

Hmeichhia zâwk tho tlâiah ka țang ziah mai, thatchhia leh tladah min ti ngawt ang chu. Kan inah leh hmun dangah chuan hetiang hi ka ni ngai bîk lo asin le. Mahlima bulah ber kher, thil nuam tak a ni hran lo.

"Tukin ka chawhmeh siam hi a 'cial' teh mai ania, tu tân mah ka la siamsak ngai lo, i vânnei hlé a ni."

"A ei theih meuh ang maw?"

"Ei theih e, a tui viau ang."

Choka vèla chêt rak rak chu a inhmeh fahran lo alawm. A tih duh loh hmèl lutuk a, ei tùr lah a siam tui thei phian bawk sì.

Chaw kan ei lai chuan,"Vawiin chu ka chhuak dâwn a, i lo kal ve duh em?"tiin min zâwt a.

Eng nge a tih dâwn le?

"Aih."

"Lo kal la,nangmah chauh chuan i khua a har dâwn asin."

"Ina awm ka duh zâwk."

"Hrehawm i ti lo vang maw?"

"Aw."

"I tih tlat chuan le, ka lo haw har lo vang."

Chaw ei khamah muang marin a insiam a, keiin in ka tifel thung. In ațanga a chhuah dâwn chuan," I khua a har lo tak tak ang maw?"a ti leh a.

"Aw, ka ngaihtuahawm lo vang."

"Lo haw thuai ka tum ang, gate thleng min thlah la?"

Hm, a nupui ang chiahin min cheibâwl țan a tum chiang, a naupang chhia ka ti bawk si, ka zak deuh hlek a.

"Va naupang chhia tak."

"Tunah chuan ka chhuah dâwn pawha min thlahtu tùr ka nei tawh tlat che alawm, ka lo haw huna min lo chhâwntu tùr nèn."

"Hah, i nupui hmasa pawh khán a ti țhìn reng ang chu?"

Țawng lo chuan min melh ta reng a, a ding tlat bawk. Ka tithinrim leh ta pek em ni?

"A ti țhìn lo em ni?"

"Ani kha chu sawi lan kher a ngai lo vang aw."

"Eng vângin maw?"

"A ngai lo a ni mai."

A thinrimna lah hi a ho thei sì.

"Lo kal ve mai la?"

"In ka lo tifái zâwk ang e."

"I hah lutuk ang e."

Pasal, min ngaihtuah tak taktu pawh a ang ve e.

Ka thlìr reng a,Motor-ah a lût a, a tlân chhuak țép tihah chuan rawn hawiin,"Ka lo haw thuai ang, bye,"a ti sap a, ka chhân ve hma chuan a tlân chhuak ta nghal a.

Ka en zui reng a, ka hmuh theih tâk loh hnu chuan muangchângin ka lût a, in chu a ruak deuh huaiin ka hre ve ringawt.

Ina ka tih țhin dàn ang chiahin TV ka on a, zâi ngaithla pahin hmun ka tifel a, chhuat ka nâwt bawk a. Darthlalang ka nâwt a, furniture ka hrufái bawk. Mahse, a bâl hran lo va, a hahthlák lém lo.

In chung chhohna step ka tihfâi laiin doorbell a rawn ri ta ral ral a. Hmm, he pa hi min tihder a peih khawp mai, mahse 'ka rei lo vang' a tih tak kha. A rawn lût thei reng, lo buaipui chûk ka duh teuh lo, lo lût ve mai mai teh se, ka buai ve tho.

A rawn ri nawn leh a, ka dawhtheihna fiah a tum a ni ang. Kawngkhâr hawnsak a phût ve pawh a ni thei tho, a pangchan ve theihna laiah chuan a pangchan thiam viau țhin kha maw.

TV ka off a,kawngkhâr hawn pahin," Lo lût ve mai la, ka hman lo ve tho asin,"ka ti chhuak a, pâwna lo ding ka hmuh erawh chuan ka ding chat mai.

Mahlima emaw ka ti a, chuvãnga khatia țawng kha ka ni, Mahlima a lo ni si lo va, ka zak lek lek, ka inthiam lo viau bawk a.

Nu pakhat, hmêlțha zet mai hian mipa naupang sam kir chiat mai hi a lo pawm a, a fa pawh a ni maithei. An hmelțha dùn hle mai a, an hmél erawh a inang lo kher mai.

"Lo lùt rawh u, eng nge in duh tâk?"

Ka inthiam lo viau, ka lo chhawn dan kha a máwi lo hle si. In chhûngah chuan ka hruai lût a, țhutna ka kawhhmuh a.

"Mahlima a awm em le?"

A hmèlțhat ang bawkin a aw pawh a máwi ka ti.

"Awm lo, a chhuak a."

"A lo haw har ang em le?"

"Ka hre lo le, haw thuai tùr ang chuan a insawi kha maw."

Ka thlan a tla nasa bawk sia, ka chhe ngawt ang, ani lah chu a chhe lo ropui sì. A vun leh a hmél chu a inhmeh ngawih ngawih, an awmtheih hmèl ka ti bawk.

Mipa naupang chuan,"Â-mâ, ka zun a chhuak,"a ti sap a, a țawng a fiah lo reuh sia, a lawmawm reuh tawp mai.

Toilet awmna ka hrilhah chuan a nu chuan a hruai a, keiin step ka tihfáina hmanrua chu ka lo dah fel zung zung bawk a.

"Kan tibuai che niin a lang, Mahlima chu hmu tùrin kan lo la kal leh zâwk ang e, kalna tùr dang kan nei bawk sia, a hmanhmawhthlâk lutuk chuang lo bawk nèn, kan kal mai ang."

"Aw, nghâk rih ula, a lo haw țép tawh ang chu."

Nui chungin," Kan tibuai rei lutuk palh ang che,"tiin min en vang vang a, ka lái lutuk nia. Ka chhe chip chep bawk nèn, tè rawih rawihin ka inhria. A chhe lo lutuk a, a țawngka chhuak a fel sì nèn, ka inhmuhniam ngawih ngawih.

"Bawihte, ka lo pawm leh mai dâwn che em ni?"

"Ka kal ve duh tawh, Â-mâ."

"Aw le, rei lo té chauh aw, i hah lutuk palh ang."

Pâwn thleng ka zui chhuak a.

"Mahlima bulah chuan in lo kal thu ka lo sawi dâwn nia."

"Aw le, engtikah emaw, hun remchâng hmasa berah hmu tùrin kan lo kal leh dâwn nia."

An nufa kal chu ka thlîr reng a, an hmélțha dùn tak tak a ni. Mipa naupang erawh a dawldâng a, a chér deuh bawk a, a hrisêl lutuk lo pawh a ni maithei. A nu ve thung kha chu hmêlah phei chuan sawisêlna tùr ka hre lo, a hmêlțha a ni tawp mai.

An hming ka lo zâwt miah lo nia, engtin nge Mahlima bulah chuan ka sawi tâk ang? A va mâwl theih tak, an hming chu lo zawh ve tùr asin.

In ka tihfel zawh hnu chuan ka inbual a, rei tâwk tak ka inbual hnu chuan chhûn ei tùr ka buatsaih ve chauh a, dár 1 a pèl âwrh chauh alawm.

Doorbell a rawn ri leh ta. Mahlima rawn hmuh tumte kha an lo kal leh a ni ang, tun țum chu polite takin ka lo chhâwn tawh tùr a ni.

Kawngkhâr ka va hawng a, ka nui pah sâng a. Mahse, Mahlima lo ding ka hmuh tâkah chuan ka nui hmél chu a reh riai riai ang chu. Min en reng a, ka lâi lehpek. Mahse, lâi lo thei ang bera awmin ka hamhaih tak tak hma chuan ka be ta zâwk a.

"Mi dang emaw ka ti che a."

"Uai, mi dang i lo beisei maw? A va mak dâwn ve!"

"Ka beisei lo."

"I chiang chiah maw?"

Chhâng tawh lo chuan ka lût ta daih, ei tùr ka siam kha, a lo ût hman ang em? Ût lo hrâm teh se.

Chokaah ka tlân lût vat a,a lo ût lek lek alawm, ka chawk thuai thuai a, tlêma tlêmah in ka tikâng țêp a nih hi. Mahlima vâng vek, pâwnah min be rei lutuk a.

"Mi dang i beisei ka tih pawh chu i va duh âwm lo ve?"

"Ka beisei lo ka tih kha."

"Nih leh, 'ngati nge mi dang emaw min tih a?"

"Ka ti ve mai mai."

Ka ei siam chu rawn en hnâiin,"A va tui dâwn ve, lunch ka la ei bîk lo ania,"a ti a, thâwk lain ei tùr rim chu a hnîm vang vang a.

"A tam alawm."

"A tui dâwn sì, ka ril a tițâm."

"I inthlâk phawt dâwn lo'm ni?"

"Ei zawh lamah zâwk le."

Ka rin aiin ka ei tui daih mai. Mahlima pawh chuan a ei țeuhin ka hria, tui a ti ve viau a nih dâwn hi.

"A tui hle mai."

"Ka lâwm e."

"Kei aiin ei tùr siam i thiam zâwk daih a nih hi."

"Hmeichhia ka nih hi."

"Hmeichhia nih vâng ringawtin maw?"

"Hmeichhia chuan kan thiam vek ang chu?"

"Teuh lo, thiam lo ka hre țeuh."

"Kan thiam vek tùrah ka lo ngai mai asin."

"A tui tak tak a ni. Ina hawa ei tùr tui tak nèn min lo hmuah hi ka ring pha miah lo."

"Vawiinah nangmah hmuh tum che an lo kal a."

"A ni maw? An chhe lo lehpek em?"

"Chhe lo tak an ni."

"Luck lutuk pawh hi a buaithlak. In lamah lehzèl min hmuh an tum țhin a."

"A lo nih tak chu."

"I lo thîk loh hrâm ka beisei."

"Thîk nâng. Thîkna chhan tùr ka hre lo."

"A lâwmawm nasa a nih chu. Ka phone-ah min rawn hrilh hmasa ziah țhin sia, a mak hle mai."

"An theihnghilh palh a ni ang."

"A ni ngei ang."

Kan thil eina ka seng fel a, ani pawh room lamah a lût ta nghal a. Eng nge pâwn lamah a tih a sawi lo va, kei pawhin ka hrilh chiang bîk lo tawp ang. Hrilh chiang tùr pawhin an hming ka hre lo bawk. Nép min ti viau ang chu.

A inbual zawhah sofa ka țhutna bula rawn țhuin,"Kha, i tâ tùr,"tiin paper bag a khâi chu ka kutah a rawn nghat a.

"Eng nge ni a?"

"En la."

Makti rilru deuh hian ka en a, paper bag chhûngah chuan eng tak awm ang maw?

Ka rei! Ka neih châk em èm țhin, mahse ka neih phâk ngai loh tùra ka rin iphone a lo ni!!!

"Hei hi ka tâ tùr a ni tak tak em?!!"

"Ni tak tak."

"Ka lâwm e, mahse ka la thei lo vang."

"Eng vângin maw?"

"A man zât tùr ka hisâp thiam ve tho."

"Chuan?"

"A to."

"Ka leisak che a."

"I thil phal vângin ka lâwm e, mahse, a man a sâng mah mah a ni."

"I hmang duh lo maw?"

"A to em mai."

"Ka nupui hian a pasal thilpék a dawng duh lo tihna em ni?"

"Chutiang zâwngin ka sawi lo tih i hria."

"Sawi kual duah lovin hmang duh mai la?"

Phone chu ka en vang vang a, ka duh chiang alawm. Kei ve hian engtikahmah ka neih phâk loh tùr thil a nih avângin ka hnial mai a ni zâwk, ka duh lutuk a, a man a sâng sì a, engmah thawk chhuak lo tâna hmanah chuan a sâng êm a ni.

"Ka duh alawm, mahse..."

"Mahse, mahse tih a ngai lo."

Ka țawng leh chuan inhnialna a tam leh mai mai dâwn, chuan, Mahlima a thinrim leh ngei bawk ang.

"Ina ka awm loh châng pawha ka biak theihna tùr che leh i khawhar hnemna tùr a nih kha."

"Ka lâwm e."

"Lâwmthu sawi kher a ngai lo."

Zanriah kan ei lai chuan," Vawiin chhûn khân nangmah hmuh tum an lo kal tak tak ania,"ka ti leh a.

"Tute nge ni a?"

"An hming ka zâwt lo."

A nui hak mai.

"An chhiat loh lutuk avângin an hming i zawh theihnghilh ta a?"

"Teuh lo mai, ka theihnghilh ve tawp a ni zâwk."

"Aw, an hming i zâwt lo va, chuan?"

"Nufa an nia, a fapa kha kum 4 mi vél a ni maithei. Sam kir chiat mai, hmélțha deuh reuh ania."

A ngâwi vang vang phawt a, chutah," Eng nge an duh an sawi em?"a ti a.

"Chutiang engmah an sawi lo, awm pawh an awm rei lo."

A puar a ni ang, a tho ta daih a. Mak ka ti rilru deuh a, ka thil sawi vâng kha chu a ni êm lo vang chu maw?

Ka phone thar chu hman dân ka zir a, ka phone lo neih ve tawhte nén a inan loh ém avângin ka bo leh deuh țhìn a, Mahlima zawh lah ka duh bîk si lo va, ka bo leh châk châk țhín.

Zân kan mutnaah chuan min rawn kuah miah lo. A zangthal zâwngin a mu a, thil ngaihtuah nei tih hriat zetin a melh ngai a melh char char a, vawiina a chhuahna lamah ngaihtuah tùr a rawn nei haw pawh a ni maithei a, zawh kher a țùl pawhin ka hre lo.

Phone chu ka khawih malh malh reng a, kan indek lo va, kan inbe bawk hek lo.

"I phone kha dah tawh teh, min ngaihtuah loh phah nân i hman dâwn chuan ka duh miah lo."

"Hman dân ka zir alawm."

"Hun i ngah lutuk."

Khum sìra dawhkán téah chuan ka dah a, sír lam hawi chuan ka mu țha nghal a.

"Lo tawlh teh."

Ka che sawn lo.

"Ka kuah duh che ania."

Min kuah duh chuan lo tawlh phei ve mai tùr ania, inla-ngêng leh inti-thú lutuk mai.

"Lo tawlh mai la."

A lamah min pawt ta dâwrh a, a âwmah ka lu ka tauh dat mai.

"Ka thu âwih ve mai la."

A âwm ruak kâng mai chu ka nghéng rân mai a, a thinphu dap dap pawh ka hre chiang thei khawp mai. Ka che ngam tawh lo, kan inhnaih lutuk a, a mal chuan min khan rùn bawk si.

"Min hnial hian min tiphûr tawlh tawlh țhîn."

A kut chuan ka hnung a chûl zai zai a, a zâ ka ti, ka mur chuai chuaiin ka hria. Tu mipa mahin hetiang hian min la khawih loh bâkah tumah ka la mutpui ngai lo bawk a, ka țang țûng maiin ka hria.

"Țang țûng lo khan hahdam teh."

Engtin nge ka hahdam theih tehlul ang? Eng nge thleng zèl dâwn pawh ka hre si lo.

"Ka thei lo."

A nui ri hak a, a thaw lum hiam chuan ka chhîp a ur lum ham ham maiin ka hria. A nuam phian lawi si, ka rilru hi a dik lo țan tlat.

"Kuah chung chea mut nawmzia hi ka hre har mah mah a ni."

Ka thaw țha ngam hleinem. Mipa hnaih over-in ka awm ngai si lo va, ka thâwk a dik thei lo. Kan inngaihzâwn lai kha chuan kan inkuahin kan infâwp ve ngei mai. Mahse, tunah chuan kan puitling ve ve tawh a, kan ni lo rei tawh a, kan infawh leh inkuahna pawh a rei tawh e. Chuvâng chuan, awmdan tùr pawh ka hrethiam tawh lo, a dik lo vek tawh.

"Zanin chu fawh ngei che ka duh, ka tum tlat bawk."

A thusawiin min tihhlauhthâwnzia chu a hre tawp nâng. Min tiphûr lo, ka hlautháwng a ni. Chu aia thui chu kal a duh hlauh chuan...

"Țang țûng suh ka tih che kha. Lo dawh tawp rawh, a aia thui ka kalpui dâwn lo che."

LALHLIMPUIA - 12 By Dingdi Pachuau

A kut, ka hnung a chûlna ngei chuan ka khabe a rawn dawm ta, záwimuangin min kuai dâk, ka dâk zél a,ani rawn kûn hniam ve thung nèn chuan kan hmui chu a insi ta chat mai.

'Dawh tawp rawh' a tih vang khan ka dawh tawp a,chhân lêt pawh ka tum chuang lo. Min fâwp rei peih ngût dâwn lo sa.

Muangchângin min fâwp a,a chîn țhan chu a lo la sim lo a nih hi.

Muangchâng dam takin, fawh lêt phût zetin min fâwp a,hetiangah tak hian chhân lêt loh har ka ti.

Fáwp lêt lo tùrin ka inthunun ve ngar ngar. Mahse,a va har sì èm! Min fáwp paha ka nghâwnga a kuta rawn chûl thla riak riakin, a lei chu zei zet mai hian thûk zâwkin ka kaah chuan a rawn luhtìr a, ka fâwp lêt lo thei lo.

Ka chhân lêt avângin a duhthawh ta sawt mai. Dam takin kan infâwp tawh lo, kan infâwp bawrh bawrh a ni zawk.

Engmah mumalin ka hre lo, duhthawh takin kan infâwp mawlh mawlh tih bâk, a boruakah chuan ka tuiral hneh lutuk tlat. Hetiang rêng hian infawh hi a lo nuam thei a ni tih ka lo theihnghilh lek lek tawh a ni.

Chutah, a tâwp ta thut a, kei chuan ka la fâwp tâwn tâwn nia.

"Duhtâwk ang."

Ka zak lutuk chu ka tâl ta phat a, he pa lak ațang hian hla takah, a hmuh phâk lohah awm ka duh.

Min kuahbet hneh kher asin.

Ka zak, ka zak takzet. A insûm theih hlé laiin kei ve kha, a zahthlak lutuk.

"Hun kan la nei dâwn chauh, Sarah."

Chu pawh ni ta se, ka zak tho tho.

A âwm nghênga min kuahbeh tlat avângin a hmel ka hmu thei lo chu ka lâwm záwk. Ka chhîp fawh zoh pahin,"Muhil tawh rawh le, sleeping beauty,"a ti sap a, ka muhíl thei ngût ang em le?

Ka zun chhuakin min tiharh a, khua a lo êng tawh. Mahlima chu mak tak maiin a lo la tho bîk lo, ka kâwngah min lo la kuah chial a.

Tihharh hlau takin a kut chu ka la sawn de de a, a la mut tui hmel khawp mai, a harh miah lo. Tukin chu ka ei siam a ei ve ngei dâwn e.

Khum ka thawhsan dâwn chuan a hmel chu ka en vang vang a,a mithmul dum hlap, chhah zet chuan a hmel chu a tichiang hlèin ka hria, a khabeah pawh hmul tam vak lo a lo zuah reng a nih hi. Ka lo en chiang ngai miah lo,tûn hi kan ințhen hnua chiang taka ka en lehna hmasa ber a ni.

Nizan khan 'duhtãwk ang' ti lo ta se, eng nge thleng ang le? Ka zak thar leh thut a, hmanhmawh zetin room chu ka chhuahsan ta nghal a.

Ka nute biak hi chu ka duh țhin, mahse, ka hreh ém ém sì. Mahlima lah hian an chungchâng pakhatmah min sawipui ngai si lo. Haw lehna hun remchâng chu ka hmu, mahse, haw leh hi ka tân thil țha ber a ni ang em? Mahlima'n engtin nge a ngaih ang? Ka chhùngte leh mi dang ngaihdánah chuan pasal neih dâwn zâna tlangvál dang ùma tlân ka ni tho tho a, insawifiah dáwn sa teh mah ila, ka nihna tho tho a ni si. Nuam ka ti dáwn chuang lo. Mahlima bulah lah hian nuamti takin ka awm chuang bawk si lo, ka awmdán hi a khirh vél vek.

Mahlima bulah hian nuamti takin awm mai ila, a nih loh pawhin innei țha mai ila, mi ngaihdánah chuan inru, tlándûn kan ni a, khum khata mu kan ni. A la dik zèl bawk si, mahse, nupa nun kan la hmang miah lo tih hi an hre lo vang a, hria pawh ni se, an awih kher lo vang. Mahlima phei chu mipa hrisél tak a ni a, hmeichhia nèn in khata chèn dun reng chuan insùm theih loh hun a la nei ngei ang, kei ngei pawh hi ka ngaihtuahawm viau. A insùm theih láia la duhtâwk ve thei lotu kha keimah zâwk ka la ni zui.

Mi chuan min dem viau ang chu. Ka awmdan laklawhzia min hriatthiampui dáwn dèr si lo. Mahlima hi ka duh leh hmangaih țhin kha a ni a, tunah pawh hian 'ka duh lo, ka hmangaih lo' ka la ti miah lo. A rilru dik tak hi ka hre châk, hmâna min duh ang tho khan min la duh ang em? Nupui atân hian min duh tak tak nge, pasal ka neihsan tùr ngáingam lo hian min hruai záwk? Ka záwt ngam teuh si lo.

Tih tak takah chuan kawppui dang min neihsan zâwktu kha amah hi a ni a, amah ka tân beisei tùr a awm tâk lohah khan pasal neih tum ve mai ka ni. Nupui min neihsan tâk avâng khan ka duhna leh hmangaihna kha a reh reng reng lo. Amaherawhchu, hriat reng loh kha ka tân a țha a, ka tân a rem ve tawh miau loh avângin. Mahse, hei tunah ka chunga thil lo thleng hi ka ngaihtuah phâk bâk, thleng tùra ka la mitthla chhin loh leh suangtuah chhin miah loh a nih sì hi.

A nupui neih kha Zemabâwk nula,a nupui hual, Christina cousin sawi țhin kha a ni tak tak a!! Mahlima ka lo rin ém țhin avâng khan ka lo awihsak duh lo vèl a, thu dik tih ka hriat meuh chuan an innei dér tawh.

***************

"Vawiin hian an innei dawn asin."

Thawhlehni a ni a,room-ah ka awm a, class pawh ka kal lo. Ka hmangaih ber nupui neih ni chu kei chuan lungngaihna nì-ah ka hmang ve thung. Christina erawh class a kal a, chawhnu a off a, min awmpui. Ka țap deuh reng mai.

Delhi-a college kal ve tho a ni. Mahlima call reng reng ka chhâng ngai lo va, a number ka delete bawk. Phone number ka hriat loh ka chháng duh lo va, Christina phone leh hostel phone-a a rawn phone pawhin ka chhâng duh ngai lo. A chanchin hriat ka duh lo, min be tùrin ka duh lo bawk.

A chanchin ka ngaihtuah duh tâk lohah chuan a hriat loh theih khawp mai. Christina bâk ka kâwm ngai lo va, Mahlima ngaihtuah loh tumin lehkha ka zir tluk tluk țhìn. Ka rilru na taka min hliam avângin leh hrilhhai taka min siam avângin a hming pawh hi hriat reng loh ka tum nasa a, a har viau a ni. U Zuala ka tawng leh ta a,mahse, mipa ka rinna a derthâwn tawh avângin ka ngaihsak duh lo, bákah ngaihzáwng nei leh tùrin ka rilru a la inpeih lo bawk. Mahse, a beidawng duh lo. A beidawn duh loh avânga pasala nei tùr pawh ka ni ta rèng a, mahse...

**************

"I nuin in chanchin min zâwt a."

"Chuan?"

"In dam țhat thu ka hrilh tawp."

"Engtikah nge a lo biak che a?"

"Chawhnu lam dár 1 vèl khan. I number min dìl a."

"I pe em?"

"I phalna ka neih hmasak loh chuan ka ngam hleinem."

A rawn nui awr awr a, țhiani hi chu aw...

"En teh, thil țha deuh ka hrilh ang che. E, chumi hmain, Mahlima khan i thu hmu sain em ni a rùkbo che a?"

"I tirápthlak e a. A nupui neih hnuah i bulah a chanchin ka sawi ngai em?"

"Ngai lo ve. A mak èm a."

"Ka awmdán laklawhzia hi..."

"Tikhan, nupa in ni mai alawm, eng nge laklawhna tùr? A fel thén ka lo ti mai asin."

"Teuh lo, ka awmdan hi a lâi vèl vek."

"A pâ rem rem êm kha." A nui uar uar a, ka ngei lek lek.

"Thil țha deuh min hrilh tùr chu?"

"E, ni dâwn tak. Mahlima'n i chhùngte hnénah palai a tìr a."

Hei zet chu, mak ka ti kher mai!!!

Engmah ka bulah a sawi ngai si lo. Ngaihdam dìl chu a tih tùr chu a ni ngei mai a, ngaihdam dil tùrin a ni ngei ang.

"Ngaihdam dìl chu a tih tùr alawm."

"Ni lo, ngaihdam dìl kha chuan a tìr tho bawk. Chumi hnuah palai pángngai a tìr leh alawm."

A va mak! Ka hriat miah lovin a tìr a nih chu. Engtin tak lo chháng ang maw?

"A ni maw? Ka nuin a hrilh che em ni? An thin a lo rim áwm mang e."

"Aw, i nu chuan Mahlima chanchin min zâwt a, an thin chu a rim ve bawk ang chu, a âwm bawk alawm."

Nia, a dik chiah. Tu nu leh pa pawh ni se, an thin a rim vek ang chu. Ka nu leh pa an nih avânga thinrim lo tùr an ni bìk lo.

"A zahthlak e ti raw?"

"A sárhù lai a nih vângin mi hian an sawi duh a, nakinah chuan an theihnghilh vek mai ang. In induha in inhmangaih chuan a țha ber alawm."

"Ka nu chuan an lo chhán dan a hrilh che em?"

"Chèk chûk a che. Hre châk viau suh, nuam i ti èm mai."

Leh ringawt chuan. Nuam ka ti èm lo asin, ka awmdàn laklawhzia hi min hriatthiampui tawp si lo.

"Ka sawi peih lo."

"Zei viau em?"

"Rápthlak suh, ka nu chu a thinrim hmèl em?"

"Kan inbiak laiin ka hmu thei hleinem."

A chimawm tel tho bawk.

"I chimawm lutuk. Chanchin min lo hrilh zèl rawh aw."

Aizáwl kan awmna pawh kár hnih lai a lo tling ve ta. Pâwn ka chhuak khát hle a, ka khawvèl a zìm khawp mai. Mahlima erawh a chhuak zing, chhuak ve tùrin min sáwm ve ziah, 'aw' ka pawh ngai lem hlei lo va.

Zirtâwp chawhnuah inléng ka nei leh ta. A hmaa Mahlima hmuh tum nufa bawk kha an ni a, an va chhe lo lehpek tak. Mipa naupang tè chu ka hmu dawldáng zualin ka hria. A hmelțha reuh sia, ka khawngaih reuh. Nu záwk erawh chu ka hmuh dan a dik, a hma aiin a țha lehzualin ka hria.

"Kan lo lèng leh dáwn a, kan tihbuai loh hrám che ka beisei."

"Tibuai lo ve, Mahlima tak hi a lo la haw lo va."

"Aw, ka bia a, a lo thleng țép tawh ang."

A ni maw?! Mahlima nèn chuan an innèl viau a nih dáwn chu. An inhre țha ngawt ang. Nge a bialnu hlui záwk le?

Mahlima reng reng pawh min lo biak ve áwm. Inlèng kan nei dáwn tih tal pawh min hrilh ve tùr ania.

Mahlima chu rei lo tèah a rawn thleng ta tak tak. Min phone ve tal ka phùt asin, a lo haw hun a la ni miah si lo va.

In chhùng a rawn lùt chiah chu mipa naupang tè chuan a lo hmuh veleh,"Papa?" tiin a pan vat a, Mahlima pawhin a lo pawmkáng vat a. Chu thil zet chuan min khawih takzet. Mahlima nupui hlui leh a fapa maw ni a?!!! Țawng tùr reng reng ka hre lo, makti zetin ka en reng ringawt.

"In lo thlenna a rei tawh em?"

"Rei lo ve, Bawihte hian hmuh che a nghákhlel tawh lutuk a."

"A ni maw? Min lo ngai viau tawh maw, Bobo? I lo tlangval em? Damdawi i ei țha em?"

An inbiakna chu ka lo ngaithla ngawt ngawt ringawt. A nupui hlui leh a fapa an lo lèng a, kei chu a ngaihtuahnaah ka leng lo hle mai.

Inthiarfihlimsan a máwi ang em? Ngáwi renga kalsan chu a tihchi loh ang. Mahse, awm ve reng ka duh lo, thil pawimawh sawi tùr an nei thei a, ka hriata sawi chi loh thlengin.

"In tùr in duh ang em?"

"Bawihtea tán tui min láksak theih chuan a láwmawm viau ang,"nui sángin Mahlima nupui hlui chuan a ti a.

"Sarah, hei hi Mapuii leh ka fapa Bobo-a an nih hi."

Mapuii lam hawi chuan nui sàngin ka bu nghat a,tui la tùr chuan fridge awmna choka lam ka pan ta nghal a.

Min hmuh phâk lohna chinah chuan ka thaw hawk hawk a. Ka thin a rim em ka hre lo, mahse ka rilru a tâwt țùn mai.

Tui bottle leh no la-in an bulah chuan ka va kal leh a, side-table-ah chuan ka thil ken lai chu dahin," Hei le, tui chu. In inkawm chhùngin in ei tùr ka lo siam dáwn nia,"tiin ka kalsawn leh nghal a.

Mahlima chuan,"Bobo-a tán thil tui táwk lo siam rawh aw, thil thak leh thlum lutuk a ei thei lo ania,"tiin min rawn hrilh zui a.

Hm, tùnah tak chuan a ina eisiamtu ang chiah ka ni. Ni lo, tirhchhiah záwk mawle. 'Lo țhu ve rih rawh' emaw ' Hei hi ka nupui Sarah a nih hi' tih emaw ka beisei pha lo hle mai, ka chan a va hniam tak èm!

A nupui hlui mawlh mai, Mapuii maw kha a hming kha? A ko duat hle mai, a hmelțha bawk si. Ka tla vang vangin ka hria.

A hmelțha takzet a ni. A hmai fang a dik a, a vun a dik bawk si, a rilru pawh a chhe miah lo ang, 'hmelțha deuh chu an rilru pawh a țha nge nge' an tih țhin kha.

Phùr lo zetin ei tùr chu ka siam a, eng tak sawi ang maw? Ka chanchin an sawi ang em le? Hmelchhia min ti ngawt ang, ani a hmelțha si a.

Ni leh lo, ka chanchin chu an sawi lo tawp ang. Mahlima'n a fapa a chhaih ang a, a nuin a lo nuihpui ang a, kei ve té hi min hrechang tawp náng.

Ka ngaihtuahna kual vèl vángin ei tùr ka siam rei phah a,an bula ei tùr ka chhawp pawh ka huphurh ta kher mai, ka va nui chiam dáwn nge, ka va ngáwi reng ang? Ka țawng bawrh bawrh thei lo chiang a,mahse ngawih reng chu a máwi bìk lo ang. Hmel hlim put a ngai, an bulah hlim lo hmel ka tilang tùr a ni lo, a nupui hlui leh a fapa bulah phei chuan. Duh leh, an haw hnuah Mahlima bulah chuan hlim hmel pu kher lo pawhin ka awm leh mai ang a...

Ei tùr chu dining table-ah chuan ka va dah a,Mapuii chuan min lo hmuh chuan,"Sarah, puih i ngai em?"a lo ti vat a.

"Ngai lo ve, in ei thei țép e."

Ka buatsaih fel hnu chuan," A ei theih e,"ka ti a, kei erawh chu chokaah ka lùt leh daih a.

Mahlima chuan min rawn ko ve maiin ka ring deuh ania, min rawn ko lo reng reng. Nui ri ka hriat phei chuan ka thin a rim ta deuh țùng mai, nuam a ti hle mai. Kei ve hi, chhiahhlawh ang mai, ka va khawngaihthlak tak èm!

An ei zawh tawh ringin ka va chhuak phei a, anni pahnih chuan an lo ei zo tawh ngei a,mipa naupang 'Bobo' chuan a la ei zo lo, chu chu Mahlima chuan a lo buaipui niin. Ei tùr chu a lo barh a, a lo be barh barh bawk a. Mapuii chuan an pahnih chuan a lo en reng a.

Mapuii chuan min lo hmuh veleh chuan,"Khawiah nge i awm daih a? I ei ve dáwn emaw ka ti a?"a lo ti vat a.

"Ka ril a țâm lo va, bâkah choka lamah chèt tùr ka nei a,"ka ti ve zaih a.

"I siam tui hle mai, ka duh aiin ka puar dáwn alawm le."

"A lâwmawm a nih chu. Tui in ti lovang tih ka lo hlau lutuk a."

"Tui lutuk, Bawihtea pawhin a ei țeuh mai. I siam dán ka hre chák ngawt mai."

Min fak der niin ka hre lo, tui a ti ve tak tak a nih dáwn hi.

"Ka siam thiam ve tâwk ania, a har lo,"tiin a siam dán chu kan inhrilh tak ang láwp láwp a.

An awm rei lutuk tawh lo. An awm chhùng chu Mahlima chuan Bobo chu a pawm reng a, a duat takzet a nih hi. Pafa inang tak chu an ni lo nain an inngaina hlè a nih áwm hi.

An haw hnuah chuan room-ah a tawm deuh reng a, eng nge a tih ka hre lo. Ka ngaihven hran lo. A nupui hlui leh a fapa khan eng vánga rawn hmu nge an nih ang? An inkár hi a la țha viau a nih dáwn hi, hetiangte chu ințhen miah loh tùr ania. Mapuii lahin a duh hmèl tho bawk si, an pafaa ei tùr an inbarh lai pawh a lo en vawng vawng kha.

Ei rawng ka báwl malh malh a, dik tak chuan ka phùr miah lo, ka hlim lo viau bawk. Tu chungah nge ka thinrim ták ber le? Tuin nge ka thin tirim ta ber ang? Mapuiite nufa lo lèn váng ringawta thinur tâk tehngawt pawh chu.

Mahse, Mahlima chungah ka lung a awi lo ve deuh. A nupui hluite chu min hrilh ve tùr ania, chawpchilh deuhin ka hria a, awmdán tùr pawh min tihre hleinem.

Chaw ei lai chuan ka țawng miah lo va, melh pawh ka melh lo. Ka lung a awi lo tih a hre ngei ang chu. Ani pawh a țawng chuang lo, ngawi rengin kan ei mawp mawp a ni mai.

Ka ei kham tho chhuak chu,"Lungáwi lohna i neih chuan sawi la?"a ti ta a.

"Lungawi lohna tùr chhan ka nei em ni?"

"Nei a ni ang chu, i lung a áwi lo miau si a."

Chháng lovin ka kalsan daih. Nia,ka lung a áwi lo ve hlek. Vawiina min treat dan leh engmah min hrilh ve duh lo hian ka lung a tiáwi lo a ni.

Ka inbual a, tih tùr dang ka neih loh avángin ka phone chu ka khawih leh malh malh a, hun khawhral nán games ka khèl a, ka rilru erawh ka pe thláwt lo, ka khèl vèl mai mai a ni ber.

Zán mut ka va peih lo tak.

Ka meng rei phian, Mahlima pawh chuan laptop a khawih a, a serious dán ațang hian hna pawimawh tak a thawk a nih ka ring. Kei pawhin games ka khelh chu ka khelh tâk rengah chuan ka khèl tui laklawh a, ka khèl reng mai.

"Lo mu tawh la?"

"Games ka khèl laklawh."

"Zán a rei tawh."

Peih lo hle mah ila mu tùr chuan ka inbuatsaih a, bathroom-ah lùtin ka ha ka nâwt a, muangchânga hmai ka phih leh hnuah ka chhuak ta chauh a.

"Sawi mai la?"

Ka ngawi tlat.

"I lungawi lohna chu sawi rawh."

"Chutiang ka hre lo."

"Ka hriatchian khawp che hi maw."

"I tán hian eng nge ka nih chiah?"

Min en reng tih ka hria, ka en duh lo tlat.

"Hrilh che ila i lung a awi dáwn tihna em ni?"

Ka ngawi leh ta daih. Nia, ka lungawi lohna hi ho a ti viau maithei. Mahse, ka tán chuan a ho lo, rilru kam țùnin ka awm a, ka laka a rilru put dán hi chu chhuanlam mai mai, a nupui fanau chungcháng min hrilh lo hian ka lung a tiawi lo ber. Ho viauin lang mah se, ho ka ti lo miau si.

"Mi dang tána ka phal loh, chân ka duh loh, ka nupui tùr i ni."

Mahni hmasial tak a nih hi.

LALHLIMPUIA - 13 By Dingdi Pachuau

"Mahni hmasial tak i ni." Duh leh haw rawh se, a nihna ni miau hek.

"A dik. Mihring, mi ang pángngai zìngah tunge mahni hmasial lo awm ang? Mahni hma kan sial vek."

A huat ka ring ania, a thusawi lah chu a dik fuk fuk riau lehnghal a.

"Mu teh ang, i lungawi lohna chu chiang takin sawi bawk la?"

Khum sìr tâwp rétah ka mú. Zanin chu ka lung a awi lo ta sa sa, awi lo tlang teh se.

"Luhlul reuh siah, min tiphûr sauh ka tih tawh kha."

Hnung lam ațangin nghet zetin min rawn kuah a, a lamah erawh min pawt phei miah lo. A lo tawlh ve thung záwk.

"I tlâk vaih."

Nia, ka mu sìr khawp mai, tlák mai pawh awlzatè. Ka titâu, lungawi lo tawh a, ka lungawi mai rih dáwn lo.

"Bobo-ate nufa vâng kha em ni i thinrim a?"

"Aw, nangmah pawh tiamin," tih vak mai ka duh a, mahse, ka ti ngam teuh lo, ka thìk ang-ah a ngai mai dawn asin.

"Ka thin a rim lo."

"Mahse, i lung a awi lo ti raw?"

"Awmzia a awm lo ve."

Ka áwmbáwr a rawn țhám thut a, ka phu zawk nghal. Ka tâl vat a, ka tla teuh kher mai.

"I kut hi lasawn vat rawh."

"Hetia tih hi i cho tlat."

A kut chu lâksawn ahnèkin a hma aiin a țhâm na sauh a, ka period hnaih tawh avângin a lo na țhúm sá nèn, ka țap lo chauh.

Ngawi rengin kan kut chu a insual mial mial a,ka theih anga nâin ka sik a,na ti ang pawhin a awm lo. A țhâm chu a thlah chuang lo, ka țan nasat poh leh a țhâm na ting a ni mai.

"A ná ania." Ka țap-aw țuau tawh.

"Ka lam hawiin lo mu phawt la."

Ka inher nge nge.

Ka chalah a fáwp vang vang phawt a,ka mitah fáwp lehin,"A na viau em ni?"a ti sap a.

"Aw."

"Ka lo enchhin ang chu?"

Teuh lo lutuk. Min fiamna mah ni se, a en dáwn lul lo.

"Ka phone password pawh thlák a ngai ta."

Ka hre thiam lo kher mai. Eng vánga a phone password rawn sawi chhuak daih nge a nih le?

"27 lai tak kha ania ka tih chu, 33 tih a ngai tawh ang chu."

Ka hre thiam chiah e. Ka áwmbáwr lenzawng a sawina. A hre tak tak teuh lo, a risk mai mai a nih hi.

"A la na viau em? Ka lo chûl dam dáwn em ni?"

"A ngai bawk lo."

A nui hak hak a, ka haw lutuk chuan a hnungah chuan ka sik leh vak a.

"Min sik leh a nih chuan ka ţhâm leh ang."

Ka sik duh tawh lo, a ti leh duh tak tak dáwn tih ka hre ve tlat.

"I lungawi loh chhan chu, Bobo-ate lo kal vâng kha ti raw? A damloh chungchângah a nuin min titipui a duh vâng a nih kha."

Bobo-a kha a damlo maw?! Nia, a dik ang, a dawldáng reuh alawm, a chêr bawk. Eng natna tak ni ang maw?

"Engtia damlo nge a nih?"

"Test an nei mêk, kârleh lamah a result a hriat chauh ang."

A khawngaihthlâk reuh e a, a la naupang sì. A hmelțha reuh sia, a lainatawm ka ti.

"Fa hial in nei tawh a, engtin nge in ințhen theih zâwk?"

"Duhtâwk phawt ang, muhìl tawh rawh, mangțha le,"tiin ka chalah a fâwp leh zoh a, a kut erawh chuan ka hnung a chûl hliau hliau thung.

Um, zanin atân chuan tâwk phawt se, naktuk lamah ka zâwt leh ang chu.

Tùkțhuan kan kìl laiin an ințhen chhan chu ka záwt leh a, a thil ei lai châwl meuhin min en vang vang a.

"I hre duh tak tak maw?"

"Aw."

"Ka tâna ruat a ni lo."

Awihawm loh, engtin nge a tâna ruat a ni lo tih a hriat le? Ka awih thlâwt lo.

"Engtin nge i hriat?"

"Ka hre ve tawp."

"In pahniha duhzawng ringawt ngaihtuah thei in nih tawh loh tehlul nèn."

"Eng nge kan ngaihtuah a?"

"E, ințhen chu."

"Ka thutlûkna a ni."

"I fapa hrechang lo lékin."

Min en vang vang hnuah a tho ta daih. Thudikin mi a den hi chuan dáwt phuahchawp hi a lo har țhin a, a rang thei ang bera inthiafihlima tlânsan hi a tih tùr a ni rèng a ni.

"Hriat chian loh chuan rin thuin sawi mai mai loh tùr."

"Min hrilh chiang ta rèng che."

Min hrilh leh ta chuang lo. Min hrilh lo mah se ka la hre tho ang, min chhân loh theih loh hun a la awm ve chêk ang chu.

Pangpár chì pawh a țiak țan ta. Ka en deuh reng mai, han țiak deuh țeuh phawt se, pot hranah ka phun sawn thei ang chu, pangpár hian nun a tihlim ve tlat.

Ni tin a chhuah avângin inah ka awm tlawk tlawk a, tih tùr ka nei lo takzet a ni.

Zan khat chu Christina chuan min rawn phone leh a. TV-ah news ka en lai tak a ni nghe nghe.

"Eng nge ni leh ta?"

"Ka hrilh lo dâwn che maw ni le?"

"Nih leh, eng thil nge ni ta, Bawih?"

"Lo haw tawh rawh."

"Ka nute'n an ti em ni?"

"Innei tak tak chuang si lo va khata awm reng ringawt chu, thil dik niin i hria em ni?"

Dik ka ti, hetia awm reng ringawt chu thil dik a ni lo hrim hrim.

"A dik alawm."

"Sawipui chhin la."

"Engatinge engmah min sawipui ngai loh le?"

"Nangmah khan zâwt hmiah hmiah mai rawh, ani zawngin i haw leh a phal lo zâwk daih ang, khatia awmdun reng kha a duh daih záwk dáwn tih hriat reng reng."

"Leh ringawt."

"A ni reng alawm, a han rubo hmiah mai che ania, pâ ve chiang alawm."

"Ve ziah a che!"

"Min rubo duh awm ve se, eh..."

"I ninawm lutuk. Ka nute chuan lo haw tùrin min duh maw?"

"Awm hlen duh viau mah la, a máwi lo."

He nu hi chu aw...

"I fate chu ka fate chuan an ngam dáwn lo phawt mai a..."

"Ka ning, a țùlah chauh min rawn be tawh ang che."

"Thil țùl lutuk, pawimawh bawk sì a nih chu ka sawi. Lo haw tumna rilru nei ve la,rawn sawi lan kher ngaiah pawh ka ruat hlei nem."

Fiamthu mah ni se, a zahthlák lek lek tho ka ti.

"E, chuan, i nute bulah Mahlima kha ka fak teh mai ania."

"A lo nih tak chu."

"In inneih hunah i hre reng dáwn nia, thil țha deuh hlek ka phût ve ang."

Inneih chungchâng a rawn sawi ania, chutin ka nute'n an lo remti nghàl lo tawp ang, ka haw phawt ang a, chumi hnuah chuan thuhran. Hmingchhiat zual laia inneih phei chu...

Mahlima hi thil zawh tùr ka va ngah tak èm! Min hrilh leh duh ngùt pawhin ka ring lo. Mahse, ka zâwt tho ang, chhân chu hná pakhat a tling ve khawp ang.

Chaw ei lai ațangin ka zâwt țan.

"Eng vânga min ru nge i nih?"

Chiang zetin min en a, kei pawhin ka en ve rân mai.

"I thutiam ka tihhlawhtlintìr che."

"Kha kha sawi ve ziah suh, 'min phatsan loh chuan' ka ti a nih kha."

"Ka phatsan lo che."

Ka nuihza lo lutuk chu ka nuih a za záwk. Ka nui lui hak nghe nghe.

"A ni maw? A va ropui ve!"

"Next question?"

Ka va ngei tak. A la lâp ropui sì, khawn fawk ka chák.

"Eng vãnga i fapa nu néna ințhen nge in nih?"

"Kha chu a hmain ka chhâng tawh che. Next?"

Zawh tawh loh mai ka duh, ka induhtâwkna hi a tiche pha tlat a ni. Mahse, a inhawn hun lai a ni ve bawk si.

"Engtikah nge ka haw dáwn?"

A ngawi vang vang phawt a, chutah," Ka la ngaihtuah lo,"a ti ta daih a.

"Ka awm reng thei lo vang."

A thawh ták daih avángin ka záwt zui thei ta rih lo, mutnaah ka záwt leh tho ang.

Sitting room-ah țhuin games ka khèl a, room ațangin a rawn chhuak a.

"Apple kha min lo zai teh."

Zan dangah min tìr ngai miah lo. Eng a hria chu ni maw?

Ka zaisak ve mai. Room-a ka va pèk chuan," Ka lâwm e,"polite zetin a lo ti a.

"Welcome."

Eng thil nge laptop nèn hian a tih ve ziah le? A buai ve thei èm èm bawk sì.

"Eng thil nge i tih a?"

"Hna ka thawk mawle."

Dik tak chuan hawihháwm lo lutuka mi biak hi ka tih ngai loh a nih vâng hian bung vut maia Mahlima han biaka han chhân pawh hi harsa ka ti țhìn. Tùm khuma thinrim khum pawh hi ka duh a, ka tum ve viau bawk. Chapo ár maia han biak pawh ka tum ve nasa, mahse mahni mizia lo lutuka lan hi a harsa ka ti.

Sitting room lamah ka pheisan leh nghal daih. A la hma tho bawk a, in chung lamah chhoin veranda ațang chuan pâwn lam chu ka thlìr a, motor tlân ri leh horn ri chi hrang hrang leh hmun hrang hrang ațang țawng thâwm, ri leh mam mam țhìn chu ka thâwm hriat theih a ni.

Kan vèngah chuan ni se, in chungah țhuin, vána arsi èng tuar mai chu ka thlìr leh ang a, motor tlán rì chu a khát táwk chauhin ka hria ang. Zán lama rannung hrâm rì ka ngâithla leh emaw a ni ang a, Aizawl khawpuiah hi zawng, chutiang tháwm hriat tùr chu a váng. Boruak thiang reih rawih hnuaia ván lam thlìr paha mut leh deng deng a châkawm.

"Hetah i lo awm reng a ni maw?"

Tháwm neih hmasak ve țhin tùr ania, min tiphu nasa lo deuh a, vìn lo mai ang.

"I lung a lèng em ni?"

Chhán ngaiah pawh ka dah lo.

"Ka zawng che a, light i on mang bawk si lo va, min hawsan ta emaw ka ti alawm."

Ka dinna bulah chuan a rawn ding ve a, a rimtui hlè mai. A intleuh zo chiah a ni ang.

"Hawsan khawp ang che."

"I haw ka phal lo maithei asin."

"Thil nihdán phung pawh va ni suh."

"Thil nihdán phung tih lam hi ka thlùk ve tehchiam lo."

A va dik tak. Mi tih loh dán deuhin pasal neih dáwn zánah min rubo duh ania.

Ka hnial dáwn chuan hnialna tùr a tam lutuk, sawipui tùr pawh a tam ang. Mahse, ka peih lo,ka taimák lam a ni vak lo.

"I hna zu thawk leh tawh rawh."

"Ka zo tawh."

Um, a nih chiah chu. Zo lo se chuan a rawn chho teuh lo ang, a hna hi a dah pawimawh ém! Kei ve hi chu...

"Zawhna kha min záwt leh tawh la?"

"Eng hna nge i thawh chiah hi?"

"Company-ah, detail deuhin ka hrilh lo mai ang che."

Hun kal tawh ni mahse, ka hriat châk èm èm țhin, a nupui râi țan dán kha zawh ka duh. Ka chunga a rinawm lo leh khatiang thil a tithei kha ka la hre thiam thei lo a ni.

"Mi dang nei reng siin engtin nge min kawp theih?"

A thaw hawk mai, light chhi lo mah ila, páwn lam ațanga éng lo lut avángin a hmèl chu chiang takin ka hmu thei a.

"Mi dang ka neihsan ngai lo che."

Hmm, a la țang ve țâng țâng mai.

"A țha e, thil kal tawh sawi hian sâwtna a nei tam tehchiam lo ve. Tùn hnái lam záwk, i fapa chu eng nge a chanchin ni ta zèl?"

A hma zàwn melh vang vangin,"Hmunpui lam záwk panpui a ngai maithei,"a ti sap a.

"A nih chu, a zia lo hlè mai."

A ngawih reng avângin," A la naupang hlè si a, a khawngaihthlák tak tak a ni,"ka ti leh a. A khawngaihthlák alawm, a dawldáng si a, la naupang hlè sìin natna a nei a ni sì a.

"Mahse, hmunpui lam in panpui chuan a damțha vat ang chu, doctor thiam tak takin an lo en ang a."

"Haw i chák tawh em?"

Leh daih mai a. Makti deuhin ka en hâ a, min en chuang lo, a melh ngai a melh reng ringawt.

"Châk tho, châk lo tho."

Kan ina haw chu ka chák tho a, chhùngte bula awm ka châk rualin ka hreh bawk. Chhùngte hmèl hmuh ka huphurh hlè bawk a, țhenawm khawvêng leh hmelhriat thlengin. Haw ka châk leh châk lohna a inzât vél ang.

"Ka bula awm hi a hrehawm em?"

Zanina a awmdán hi a mak tlat.

"Aw, a chângin,"tiin ka chhâng ringawt. A dik ve tho alawm.

"Háw lova hetia awmdun mai hi i duh thei mai lo'm ni?"

"Ni lo ve, thil dik lo a ni."

"Mi pawh an awmdun fo alawm."

"Mi tihdán țha lo hi tih ve ringawt loh tùr."

"Nih leh, i haw phal ta tlat lo ila?"

"Ni lo, i phal ang, i phal tùr a ni."

A ngawi reng a, kei pawh ka țawng leh ta lo. Ka melh zoh zoh a,a awmdàn hi a mak ka ti ém a ni.

Kan ngawih rèn ráwn hnuah chuan," Kan chhuk tawh dáwn em ni? A tlái tawh lo maw?"ka ti ta ringawt a.

Engmah sawi lo chuan a inher vut a, min nghák chuang lovin a chhuk ta daih a, makti deuhin ka en zui vung vung a.

Mutnaah chuan a lo mu thân a,mahse a muhìl lo. In chung lam a melh rán a,eng tak ngaihtuah ang maw?

Ka mut ve theih meuh chuan a tlái ve ta deuh duai mai. Khum sìr lamah bawk chuan ka mu leh a, biak pawh ka tum hran lo.

"Min hlau em ni?"

Hlau lo, ka hlau lo.

"Aih."

"Lo tawlh ta che."

"Ka mu leng tho alawm."

"I lo tawlh dáwn nge ka tawlhtìr dáwn che?"

A tâwpah hi chuan hnehna a chang leh nge nge țhin.

Light kan off tawh avângin chiang takin ka hmu thei tawh lo va,parda chhana èng lo lùt ațangin ka hmu ruai thei chauh.

Min kuah leh nghal a, kei pawhin ka hnial hran tawh lo, kuah mai mai chu a hek lo em mai.

"Háw tawh lo mai rawh."

Ni lo ve, nupa pawh kan ni lova, chèn dun ringawt pawh hi thìl țha lo a ni. A duh angin ka awm ringawt thei lo.

"Nupa pawh kan ni lo va, ka háw ngei a ngai."

"Nupa chu kan ni thei reng, tunah pawh hian."

Ni lo, chutiang a ti thei lo.

"Ni lo, ti miah suh."

Ka hlauthâwng rilru khawp mai.

"Eng thilin nge min dâl chuang?" Ka bengkáwm a rawn nùl zai zai a, ka mùr ar ar mai. Hetia awm tùr hi kan ni lo. Ka dan a ngai, nupa nih hma chu nupa nun chèn tùr kan ni lo. Innei pawh kan la ni lo, thinrimna tùr ka ngaihtuah a ngai.

"Sarah, min dang suh, ka dawhin ka nghâk hrám hrám rei tawh." A aw thâm deuh sap chu a sexy lutuk tlat.

A thâwk dán a pángngai tawh miah lo, engtin nge ka tih ang? Ka dan a ngai, chuti lo chu...

"Sarah.....ka nghâk rei tawh che....khawngaihin?"

A kut chu ka kawr chhùngah a rawn zen lùt tawh, a ke lah chuan min kherhbet vek tawh bawk sì. Tâl pawh ka tâk thei lo.

"Mahlim, khawngaihin hetiang hi ti suh."

A táwp duh dèr lo. Ka tihtáwp ngei ngei a ngai, eng hmanrua pawh ka hman a ngai a ni.

A thaw huam huam tawh, a chak si a, ka hneh dáwn lo sa. Ka kawr a hlìm chho vek tawh, ka kut pahnih chu ka lu chung lamah a hmerbet tlat a, a kut lehlam chuan ka taksa a chùl dan dan a, kei pawh ka tháwk a dik tawh lo.

"Mahlim, min duh tak tak em?"

"Ka duh che, Sarah. Ka duhzia che ka lantìr mèk a nih hi."

Ráwp zetin min fâwp bawrh bawrh a, rilru fìm put hrám hrâm ka duh. Ka ngaihtuah lo der tlat a, mahse, a hre rang khawp.

"Sarah, min chhâng lèt rawh."

"Hetiang hian awm lo ang."

"Sarah?"

Nia, ka chhâng lèt ve lo thei lo, ka duh ve tho alawm. Mipa ka duh leh hmangaih chhun kha a ni miau, a la danglam lo.

"Sarah, ka duh che tih i hria ti raw?"

Ka thluak a buai țan tawh, ka rilru pawh a fìm lo țan. Thiam takin, hmangaihna chén tùrin zâwimuangin min hruai a, min dáwi â takngial dáwn.

"Mahlim....?" Ka aw chhuak chu ka hai țèp, ka va duh lo tehlul èm!

"Sarah, i va rimtui èm! I vun silk ang maia nál han chùl hi nuam ka ti."

Kan tâwp a ngai, kan tâwp loh chuan...

Ka rilru tifìm hrâm hrâmin," Mahlim, min duh tak tak em?"tiin ka záwt nawn leh a.

"Sarah, țawng tawh lovang, chezia záwkin aw."

"Min duh tak tak chuan kan inneih hunah chauh nupa nun chu chèn ang."

Eng hmanrua pawh ka hman a ngai a ni, inneih thleng pawhin.

"Min nei dâwn tihna em ni?"

"Aw." Hetia ka chhán mai loh chuan, ka thianghlimna vawnhim ngei ka duh sì, a kawng ka hriat awmchhun a ni.

"Min tiam rawh, sawi rawh, Sarah?"

"Aw, ka tiam a che, ka nei ang che."

Che lovin kan inkuah a, ka thilsawi chu ka inchhìr maithei, mahse tùn atán chuan ka hmanraw hriat chhun a ni tlat si.

Ka chalah a fáwp vang vang a,min thlahin a tho thut a, bathroom-ah a lùt ta nghal a.

Ka kawr chu ka siamțha a, ka thaw huai mai. Ka hmaa thil lo thleng tùr ka ngaihtuah duh rih lo, tun lawka ka thianghlimna ka hloh teuhzia kha, ka thil sawiin min chhanhim ta hlauh a, lâwm hlè tùr ka ni. Ka chesual tùr a ni lo.

Tui vâwtah a va inchiahdái a ni maithei, a rawn mut chuan a vâwt thlar mai.

Ka kâwnga a kut rawn rawlh lùtin," Ka nghák rei dáwn tawh lo che, inneih thuai ka duh ang,"a ti sap a.

Chhân pawh ka tum lo.

"Muhìl tawh rawh, mut tui sùk sùk le."

A muthilh hnuah pawh ka muhìl thei lo. Ka thusawi, a hnèna ka tiam chu ka tihhlawhtlin ngei a ngai ang. Ka neih ngei a ngai dáwn tihna.

Ka nu leh pate'n rem an ti kher dáwn em ni? Mahse, Mahlima hi chu beidawng mai mai chi a ni lo, luhlul tak mai a ni a,tlâwm a tum ngai lo. Tùn lawka a hnèna ka sawi, ka tiam pawh hi tihlawhtlin tum lo ta ila, a tâwp thlengin beidawng duh miah lovin min nawr mai ang.

Ka inchhìr maithei, ka inchhìr ngei ang. Min hmangaih em ka hre lo va, min duh tih chu ka hria. Min duhna chhan nia ka rin chu min la khuaikhem thei lo hi ni berin ka hria. Ka tán rinawm angin a insawi ve a, a nuihzatthlak. Delhi-a a awm lai khan engmah ka zuk hriatpui tak tak lo. A nupui hual kha a râi thei a nih chuan an chéngdun pawh a ni maithei asin. Dáwt hi chu min hrilh tam tawh teh e, nupui hual a neih chu keimah chauh ni angin a la sawi zui.

Kei lah chu a tân ka rinawm tùk a, mipa dang pawh ka be ngai lo a nih kha. Mipa mizia ka lo la hre lo lutuk kha ka lo khawngaihthlák ngawt mai, ka lo hre tlêm èm a ni.

 LALHLIMPUIA - 14 By Dingdi Pachuau

Bobo-a chu hmunpui lama entìr a ngai ta ngei e. Mahlima'n a kalpui ngèi a ngai ang, chuti a nih chuan ka haw thuai thei dáwn tihna.

Bobo-a chu ka khawngaih reuh mang e, a la naupang si. A natna chu ho tè ni hrâm se, mahse...

An rawn kal leh ta rih lo, an inthlahrung ve a ni ang. Mahse, páwn lamah pawh an inhmu țhìn a ni maithei a, engmah ka hre hlei nem.

Tluanga pawh tlawh a țhat tehlul nèn, ka hmu hreh. Pawisa ka neih loh bâkah ka chungah a thinrim dáwn si, min hmuh pawh a duh kher lo ang.

"Naktûkah ka thlah haw ang che."

Zanriah kan ei laiin min hrilh. Engtizia teh thut nge ni le? E, Bobo-a entìr tùra an kal a hun tawh a ni chiang.

"Min thlah kher a ngai hlei nem. Keimahin ka haw thei tho alawm."

Ka chhûngte'n min rawn hruai chhuah ve tùr a nia, ti ila, kan awmna an hre leh si lo vang. An thin a rim dáwn si a, min rawn hruai duh lo pawh a ni thei tho.

"Keimah ngeiin thlah che ka duh alawm, sawisèl lo teh."

Ka hman veleh Christina ka phone a.

"Naktukah ka rawn haw dáwn."

"Nangmahin maw?!"

"Ni lo, min rawn thlah dáwn a. Ka chhûngte hian min rawn hruai chhuah ve ka ring asin le."

"Amahin a rawn thlah dáwn che chu. I chhûngte an buai àwm nèn, nanga pasal ûm an rawn hruai hman pît lo'ng che."

"I țawngkam hman fîmkhur la."

"Ka sawi kha dik lo a awm em ni?"

"Pasal ûm min ti a nih kha."

"A ni lo'm ni? Mi zawng zawng ngaihdan a ni ang chu."

"Ka awm i tinuam lo zo vek."

A rawn nui rawi rawi a.

"Ka hria che alawm, lungngai suh. Hnãi a la ang a, a dam vek mai ang."

Mahlima nén chuan kan inbe lo khawp mai, a ngawi rân reng a; kei lahin biak ka tum hran lo.

Insiam tehchiam tùr ka neih loh vângin ka buai hran lo. Airbag pakhatah ka thawmhnaw tlêm chu ka dah ve a, ka insiam zo dèr.

"I haw dáwn a, i phûr hle mai."

Ka insiam lai chu min lo en reng niin.

"Phûr ve bawk ang chu."

"Hrehawm i lo ti àwm kher mai."

"Ti èm èm hran lo."

"Nuam ka ti."

"I fapa leh in nu hlui i hmuh reng theih vâng a nih chu,"ka rilruin ka ti țhuai țhuai a, a rî chuan ka sawi chhuak lo thung.

Ka mu meng kar a. In ka thlen huna ka awmdan tùr ka ngaihtuah a, thil thleng ka sawi dan tùr leh ka chhûngte thinrim ka hmachhawn dan tùr ka ngaihtuah lo thei lo.

"Sarah?"

"Um..."

"Ka muhìl thei lo."

Kan inang a nih chu. Phone ka hmet éng a, dár 12 a ri țêp, minute 5 a la awm.

"Eng vângin maw?"

"Naktûk zân ațang chuan keimah chauhin ka mu tawh dáwn asin."

"A ho èm mai."

"Min khawngaih miah nange?"

A ho e, patling thil sawi atân chuan.

"Khawngaih e."

A lâwm nán mai a ni ka sawi ni.

"I ti tak tak lo."

"Nia."

Nghet zetin min rawn kuah a, ka thaw thei lo țép a ni.

"Ka ngai ngawt ang che."

Awihawm loh lutuk. A fapa leh a nu kiangah a awm dáwn, min hre chang lo tawp ang chu.

"Min neih i remti tawh a, i chhûngte'n an remti emaw remti lo emaw beidawn ka tum miah lo."

Nia, a tum lo tawp ang. A duhna leh tumnaah chuan a hlawhtlin hma chu táwpsan a tum ngai lo rêng a ni.

"Zanin thlenga ka bula him taka i la awm thei hi a mak hle bawk."

Ka ngháwng a thâwkkhum lum ham ham a, ka mûr chiai chiai. Dik taka sawi chuan a nuam ka ti.

"I duhna ka zahsak váng che a la him hrâm i ni."

"Ka lâwm e."

Ka lâwm tak tak. Pasal neih hmaa thianghlimna hloh hi ka hlau èm asin. 'Ka pasal hnènah chauh ka thianghlimna ka hlân ang' tiin ka lo țang ve țâng țâng ţhìn a, mite'n engah vak ngai lo mah se, ka thuvawn pawimawh ber a ni ve tlat.

"Min ngai ve ang em?"

Ka hre lo le. Ngai ve maithei, kár thum deuhthaw kan awmdun ta a, ka ngai ve maithei tak tak.

"Ka hre lo."

"I luhlul ve siah!"

"Muthilh tum ang, naktûkah kan tlân thui dáwn si."

Zîngah chaw kan ei hma deuh a, kan chhuah dáwnah chuan pangpár tui ka pe leh phawt a; Mahlima hian a zinsan daih dáwn si a, an lo thih loh hrâm ka beisei.

"Ngaihtuah miah suh, tui pék an ni ang."

Kan tlán chhuak chu kan inbe vak lo. Ka ngaihtuahna a kal thui viau mai a, kan in kan thlen hun tùr mawlh chu ka ngaihtuah. Engtin nge ka awm ang? Ka nu leh pate chu an lo thinrim viau dáwn sì, Mahlima tel kher hian boruak a tisosáng ang em? Nge, an lo ném deuh ang? Mahlima hi a haw nghal ang em le? A riak ve mai lo'ng maw? Kan thlen meuh chuan a tlâi ve tawh ang a; tlân lét leh nghal tùr chuan a hahthlâk lutuk ang.

Ka pa thinrim tùr mawlh chu... Ka huphurh lutuk chuan thâwk ka la huai a, ka va huphurh tak èm!

"Huphurh duh miah suh, i thiam loh a awm hlei nem."

"Sawi chu a awl alawm."

"Min ring vek mai rawh."

Engtin nge ka rin vek ang? Ka huphurhna zawng zawng chu ka pe thei em ni? Teuh lo, hetiang thilah hi zawng mawhphurna kan nei vek; ani phei chu a kal leh thuai ang a, kei ve chu...

"Min ring vek rawh ka tih chu, i huphurh viau khan i intihrehawm mai mai a ni."

"Thil dang ngaihtuah a har alawm."

"Kan inneih hun tùr ngaihtuah mai rawh."

Chu phei chu ka ngaihtuah duh loh ber a ni.

Kan tlân muang lo. Kan thleng har lo tùrah ka ngai. Ka nute chu kan thlen laiin an lo awm ang em le? Ka haw phei tùr hi an lo hria ang em? E, Christina khan a hrilh tak ang, an in-phone țhin kha.

Ka rin aiin kan thleng har, mahse kan thleng tlai lutuk pawh a ni chuang lo.

Kan in kawtah chuan a bolero vár, la thar zet chu rem deuhin a hûng a; ka chhuah hma chuan thâwk ka la hmasa té tè a, ka chhuak ta chauh a.

Ka nute pawh chuan kan thâwm an hria a ni ngei ang, an lo chhuak a, veranda-ah kan intáwk a.

"In lo thlen har loh hi, kan lo ngaichâng reng che u a."

Ka nu thusawi chu mak ka ti lo. Christina khán a lo hrilh chiang a nih hi.

Ka pa erawh chuan ngawi rengin Mahlima chu a lo en thung. A hmél ațang chuan a thinrim nge thinrim lo hriat a har, mahse, a lungawi fahran lo tawp ang.

"In chau em, Mahlim?"

Ka nu hi chu a fel ka ti țhìn. A thinrim a nih pawhin a țawngka chhuakah a tilang khât khawp. Mahlima pawh a inthlahrung ang tih a hlau a ni chiang mai, a inthlahrun loh dáwn tehréng nèn.

"Chau lo ve,"a ti phawt a, in chhûnga kan luh chuan," In in nei nuam hle mai, ka pi,"a ti leh a.

"A va lâwmawm ve! Thingtlángah hi chuan in zau hi kan duh țhin a, hmun kan la neih ţhat vâng pawh hi a ni mahna."

"In zau chu a nuam ber alawm."

Ka airbag chu ka room-ah ka khai lùt a, ka chhuah chuan ka nuin thingpui a lo siam mék a. Ka pa leh Mahlima erawh sitting room-ah an lo țhu a; boruak uap ru zet chu hrehawm ka ti, ka pa phei chu a la țawng miah lo lehnghal.

"Thingpui in phawt u la, in inbual dáwn nia."

Sawi tùr a va vâng tak! Mahlima ka melh a, min lo en reng. Ka zak leh deuh si, ka pa ka melh leh a; ani erawh chuan ka nu thingpui lo cháwi phei chu a lo en thung.

Thingpui chu ka lo ban vat a, ka sempui nghal.

Long chair-a țhut pahin ka nu chuan,"Mahlim, i riak ang ti raw? Chaw pawh ka chhum kêp dáwn che, hàw leh ringawt chu a hahthlak dáwn em mai," a ti barh barh a, ka nu hi chu a va fel țhìn tak èm! Kan boruak hi a hre thiam tlat.

"Háw lah love, zanin chu a riak ang chu."

Ka pa a lo țawng ve ta. Ka thaw huai mai.

"Nia, a țha alawm."

Ani pawh hian sawi tùr chu a haihchham ve chiang, a inhmeh hlawl lo.

"Bawihi, thingpui in thuai thuai la, inbual hmasa la, i inbual chhûngin Mahlima nèn kan lo titi ang."

Ka pa thupèk hi chu hnial ngam pawh a ni lo, ka hnial khât viau bawk.

Ka inbual chhûng zawng chuan eng nge an sawi ang tih mawlh ka ngaihtuah a, thinrima an inkhak loh hrâm ka beisei. Ka pa hian kan zahna tùr eng thil mah a ti lo tùrah ngai ang.

Ka chhuah hnuah chuan ka nu eirawng bâwl chu ka pui a, ka pate pawh an thil sawi tùr an sawi zo tawh a ni ang, Mahlima chu inbual tùrin bathroom-ah a lùt ve nghal a.

Chaw ei khamah ka pìte chhûng an lo lêng a, ka pute(ka nu u)nupa an lo lêng bawk a, kan ri chûl mai.

Ka nutei fate pahnih chu a harh rual an ni a, a tê záwk Mawimawia phei chu a lawmawm tawp.

"Au Vèn, saw saw tunge?"

Mahlima chu a kâwk vá a, a țawng ri a rawn hre pha lo chu ka lâwm. Thingpui lumin choka lamah ka țhu a, Mawimawia hi a lo kal ve a ni.

"Ihh, ka ţhianpa a nih saw."

"Min kâwm duh ang em?"

"Ka hre lo le, zâwt la?"

"Ka zak alawm."

A naupan ai hian a țawngkam a puitling a, a țawng fiah kim lo țhìn hian nuih a tiza viau bawk.

"A motor-ah ka chuang châk e."

"Díl la, a phal hrim hrim ang."

"Min hau ang?"

"A fel alawm, a motor chu maw, chuan a nuam lutuk."

"Au Vèn, min dìlpui la, khawngaihin?"

Ka nuih a za kher mai. Lìrthei hi a lâwm ve a, scooty pawhin ka phur fo rèng a ni.

Mahlima pawh chu a tlângnêl ve tawh a ni ang, a titi bawrh bawrh mai. An țawng nak nak reng a, ka nutei râwl a ring thei khawp mai.

Mawimawia pawh an bulah a va tei phei tawh a, kei chuan Mahlima mutna tùr, Tluanga room ka en fel thung.

An haw har vak lo. An hàw dáwn chuan ka nutei chuan,"Hei, kan nautè hian motor-a chuan a châk a nih chu. 'Pa Mahlima min dìlpui rawh' a ti a,"nui ar ar pah chuan a ti a.

"A ni maw? Ka va thlah dáwn che u em ni? Nautè chu ka phur châk ve tho a nia."

Ka pìteho chu an lo nui sâng hlawm a. Ka pu chuan," A ngai lo ve, hnái tèah alawm kan awm, naktuk lamah Mawimawia chu chuang mai rawh se,"a lo ti boh boh a.

"Yes, naktûkah motor-ah ka chuang dáwn."

Kan nui dar dar a, ani hi chuan nuih hi a tiza thei teh a nia.

Ka muhìl țêp tawh, ka lukham hnuaia ka phone chu a rawn nghawr dat a. Peih lo zet hian ka en a, whatsapp message niin Mahlima a lo ni a.

"Ka mutna hi a nuam ka ti lo."

Zak lo mai mai e a. Ani khum anga khum dûp nuam kan nei pha ve lo a ni mai, zan khat chauh chu tuar ve rawh se.

"Ka muhìl thei lo."

"Ka bulah i mu si lo."

Hm, a in emaw a ti a nih dáwn hi. Hei hi chu kan in a nia, kan khumah a mu mêk a ni.

"Room kawngkhàr lo hawng teh."

A zah lohzia hi.

"I in a ni lo tih hria la."

Ka nute nèn kan room a inhlat lo va, Tluanga room erawh a hrang deuh nalh thung. Ka room-a rawn mut ve a tum a nih teh chuan, teuh lo mai, a rawn mu dáwn lo.

"Rawn hawng la?"

"No way, ka pate'n i thâwm kha an hria ang e."

"I room kawngkhàr bulah ka ding reng."

He pa tak hi chu aw. Ka pate hian an hmu palh ang tih ka hlau zek zek.

"I mutnaah lêt rawh, min tizak lo hrâm teh, khawngaihin."

A reh ta vang vang a, ka thin a phu dap dap mai. A luhlul ve sì a, a tilui tlat ang tih ka hlau deuh.

"Kan inneih zânah i hre ve khawp ang."

Min tihțhaihna ve hi, ka nuih a tiza lutuk. Inneih zân. Ho lutuk, a la rei dáwn èm mai.

"Mut tui le."

"Ka mu tui thei dáwn lo tih i hre reng sia, i sual hle mai."

Zínga ka thawh ve meuh chuan an lo tho vek tawh niin. Mahlima phei chu Mawimawia phurin a lo tlân chhuak daih tawh a, mu rei chu min ti lehpek ang chu.

Ka nu chuan thingpui min lo thlit pahin,"Mawimawia motor chuang châk a rawn kal hma lutuk a, Mahlima kha a rawn kàitho lo chauh a ni,"a ti lar lar a.

"A va zia lo ve, in țawng thâwm ka hre miah lo nia, ka mu tui hle a nih dáwn hi."

"Nang hi chu, i mu tui èm èm ziah alawm."

Ka pa a lo lût a, broiler-ár chaw a pe zo chiah a ni ang, a kut a rawn sil nghal a.

"Vawksa rép kha chhûm rawh u, chawhmeh a vâng ém mai."

Ka pate sikul hi kan in ațangin a hla hran lo va, minute 5 kal pawh a ni lovang. Mahse, ka pa hi chuan hun a vawng dik thei hle a, a tlai ngai lo.

Mahlimate rawn tlân haw hnu rei lo téah chaw kan ei a; a chhan chu ka pa sikul kâi a ngai a, Mawimawia pawhin a ei ve nghal a.

"Mawimawi, motor chuan chu a nuam em?"

"Aw, nuam lutuk. Keimahin ka khalh ve asin."

Ka pa chuan,"A ni maw?! I khalh thiam tawh maw?!"a lo ti ve a.

"Aw, chak deuhin ka khalh a, nakinah ka phur ve ang che u."

Ka nu chuan," Ka chuang châk tawh e, kan chuan hunah chuan chak deuhin khalh suh aw, chak deuha i khalh chuan kan accident mai ang," a ti a.

"Aw, Pa Mahlima'n min khalhpui dáwn alawm, a khalh thiam lutuk."

Chawhma dár 10 vélah haw tùrin a chhuak a, ka nu leh Mawimawia nèn kan thlah a.

"Pa Mahlim, lo zin leh thuai la, motor-ah min phur leh ang a?"

A rawn nuih var var a, a hmelțha sawtin ka hria.

"Tehrêng mai. Ka lo zin leh hunah chuan i khalh leh ang a, Lungleiahte kan zin ang a ti raw?"

"A, haw lo mai la?"

"Ka haw ngei ngei a ngai alawm, ka lo zin leh vat ang; lo dam țha la, thil țha deuh ka lo hawn ang che."

"Aw le, tûna i motor ang hi min lo hawn rawh aw."

A ngên mak thei a nia.

An in-bye bye a, kei erawh chu ka lo lài tawp, thlah dan tùr ka hre lo.

"Tluang deuhin i tlân dáwn nia."

"Tlân chak lutuk lo la."

A lan chhûng chu kan thlír a, a lan theih tâk lohah chuan Mawimawia chuan," Pa Mahlima chu ka ngai dáwn e,Au Vèn, i ngai ve ang em?"a ti siam siam a.

"Ngai lo ang."

"I țhianpa a ni sia, i ngai ang. Kei pawhin Siamtea a zin khan ka ngai alawm."

A fing ve phian mai. Nia, ka ngai ve ang, tùnah pawh hian kim lo riauin ka inhre țan tawh a ni.

LALHLIMPUIA - 15 By Dingdi Pachuau

Chhûnah ka nu nên inah kan awm a, in ka tifai a; ani erawh chuan thawmhnaw sûk tùr a la khâwm thung.

"Thingpui ka'n lum tawh ang e."

"Dâr engzât nge ni tawh a?"

"Dâr khat a pèl tawh."

Hun a va kal chak ve. Mahlima chuan khawi hmun tak thleng tawh ang maw? A tlân chak dâwn sì a, a thleng thui tawh ngawt ang chu.

Thingpui kan in lai chuan,"I țhianpa kha nupui nei lai a ni lo ti raw?"tiin min zâwt a.

"An ințhen tawh."

"A nih tak chu. Christina-i khan min hrilh a. An ințhenna a la rei lo em ni?"

"Aw," tiin ka chhâng ringawt. Mahlima kha ka zâwt miah lo, a la rei vak lo tùrah ka ngai ve tawp.

"Chuvàng chiah chu a nih dáwn chu."

"Eng chu maw?"

"A, engmah a ni lo ve. E taka, i phone kha i wardrobe-ah khan ka dah kha. Zuala'n a lo phone țhín a, sawi tùr a vâng thei khawp mai. I phone chu charger ka hmu mai si lo va, a thi daih tawhin ka ring."

U Zuala ka lo hre chang tawh miah lo tih ka hre chhuak chiah. A tuartu ber a ni bawk si a, ka inthiam lo leh hnuhnawh.

"U Zuala tak chu aw..."

"A khawngaihthlâk lutuk."

"Ka thiam loh vek a ni."

"Awmzia a awm tawh lo. Thil kal tawh a siam țhat theih tawh lo va, i siam țhat theih teuhna ber tùr chu i hun hman mêk țha taka i hman chhoh zel kha a ni mai."

"A pawi ka ti tak tak a ni."

"Bawihte, Zuala kha i duh tak tak lo ti raw?"

Ka ngawi ta vang vang a, chhân ngaihna hre hek lo i. Ka duh ve deuh tho chuan ka hre deuh, duh lo ni ila pasal atân neih ka tum dáwn em ni?

"I țhianpa kha a fel hmel riau kha."

"Ka tum lâwk réng a ni miah lo."

"Um, Mahlima khán a sawi a."

"Kan chesual miah lo."

"Bawihte?!"

"Nu, ka ti tak tak."

"Lalpa, ka lâwm e."

Nia, mi zawng zawng ngaih dan chuan chesual tùr kan ni ngei ang, kei ngei pawh hian chutiang chu ka rin dan tùr tho a ni. Mahse, ka la invawng thei tlat, nula thianghlim ka la ni tlat.

Tlai lamah chuan min rawn phone ka ring ve asin le. A reh hmak mai; a thlen chin tal pawh min rawn hrilh ve âwm, a thleng tawhin ka ring.

Zânah ka pîte an lo lêng leh a, ka nutei chuan,"Mawimawia'n a pa Mahlima kha a ngai sia, kan lo lêng leh tawp mai,"nui ar ar chungin a rawn ti lùt bawrh bawrh a. Ka nutei hi chu țawng bawrh bawrh chi, fiamthu duh tak leh mi nèl loh pawh nei lo, rilru zau tak pu mi a ni a, ka pì leh pute pawh hi a tihlim viau țhìn rêng a ni.

"A motor kha i khalh leh châk a ni maw?"ka nu chuan a lo ti vat a.

"Aw, a lo kal leh hunah motor min lo hawn dáwn sia, lo kal tawh se ka ti e."

Ka nutei leh Mawimawia nèn thingpui kan lum a, ka pateho erawh chu sitting room-ah an țhu a, TV thlír pahin an titi a.

Ka nutei chuan,"I țhianpa Mahlima kha nupui nei lai a ni tak tak em?"a ti a, makti deuhin ka en há a, chhûn thingpui in laiin ka nuin min zâwt tawh bawk.

"Ni lo ve, an ințhen tawh a."

"'Nupui nei lai' tiin an sawi bawk si a?"

Mi min sawi dan tùr ka hre thiam leh ta deuh uar uar, pasal neih dáwnah pawmlai nei nèn tlândun angin min sawi ngei tih ka hre ta.

"Chuan, i rai lo ang ti raw?"

Ka nutei țhìn hi chu aw... Zép leh zawh hreh lah hi a nei si lo.

"Rai lo, kan mu dûn lo."

"Mi hian thil hi intihre deuh deuh hian an sawi a, a dik miah si lo va."

"Nute, engtin nge min sawi a?"

"A, dâwt mai mai a nih chu. Dâwt i sawi ka ring lo. Chuvãng chuan, dâwt an sawi tihna a ni mai."

Ka pate chu thingpui ka va pe a, ka lêt leh chuan," I rai tawh angin an sawi a, pawmlai nei nèn inru angin an sawi bawk che u. Engmah kan hre chiang ve bawk si lo va, i nu leh pa rilru natzia chu, i nu rilru na lutuk phei chuan engmah a ei thei hlei nem. Mahse, chutiang ém ti duh tùr chuan kan ngai phal lo che a,"a ti leh sap sap a.

Hm, kan tâna țúl miah lo leh țangkaina nei lo sawi hi kan peih alawm. Mihring nihphung ni maiin ka hria, mi chanchin a chhe lai sawi peih viau, a țha lai sawi leh duh si lo kan ni nuk hlawm a, hlâwkna hmuh kan inbeisei tehréng hlawm a ni ang.

"Thu dik lo a nih chuan a țha a ni mai. Mi sawi theih tùrin in khawsa miau mai a; mi va dem viau tùr pawh a ni chuang lo, thu dik hi chu a lo lang leh zel tho a nia."

A thusawi chu a dik thlâwt. Kan ti dik lo hmasa tlat mai a, mi sawi theih tùrin kan awm miau si a ni. Mi chanchin chhe lai phei chu a hre hmasa nih kan duh a; hre chiang úk lovin, miin an hre lo palh ang tih hlauin kan sawi peih viau țhìn. Kan dik lohna leh tlin lohna hmuh hmaihin mi tlin lohna leh dik lohna kan sawi char char mai zawng a nih hi, mahni nun inen hmasa țhin ila chuan a zia deuhin ka ring; sawi thei dinhmunah kan ding chiah em tihte infiah hmasa țhìn ila.

"Chuan, in innei dáwn em? Palai a lo tír ti raw?"

Ka hre lo, ka hre lo tak tak. Neih kha chu ka tiam ngei, ka nu leh pate thu thu a ni mai.

"Ka chhûngte thu thu a ni ang chu."

"A fel hmel riau kha. In hmingchhe tawh a, inneih mai a țha ka ti."

"Ka pa hian engtin nge a ngaih ve ang le?"

"I pa hi chuan eng vak a sawi lo nain a rilru a na tak zet tih a hriat a. A chhan chu a fanu rangkachak kha i ni miau mai a, hetiang ti duh tùr hian a ngai lo hrim hrim che a ni. Keini pawhin mak kan ti a,mumang a ang rum rum thei alawm."

A dik. Ka pa thu hi ka awih hle țhìn, a duh loh zawnga awm ka tum ngai lo, amah tihmingchhe zawng phei chuan; mahse, ka thil tawn hian ka pa mai ni lo, kan chhûngkaw hming a tichhe vek chu a nih tâk hi.

Zân ka mutnaah chuan ka ngaihtuahna a vâk kual nasa. Ka nutei thil sawi chu ka ngaihtuah lêt a, U Zualate pawhin an hre ngei tawh ang chu. A rilru a nat belh sauh ang a, mak min tiin min ring chhe sauh bawk ang. A nu phei chuan...

Ka phone a rawn nghawr dar dar a, a ri chhuak miah lo. Ka lo silent leh tawh em ni? A nih chiah hi, ka silent lai ka hre miah lo.

"Hello?"

"Engtizia nge ka phone i pick theih loh a?"

"Engtikah maw?!"

"Tlaiah khán, vawi 5 ka lo call che, phone check ve țhìn ta che."

"E, a nih chu, ka lo hre miah lo. Ka silent vâng a nih hi."

"Chanchin zâwta min rawn call ka ring ve a nia?"

Ka inthiam lo țêp.

"Nia, i thleng tluang em?"

A thaw hawk ri chu ka hre thei.

"Aw, ka buai nghal char char a, ka hman ve deuh chiah."

A chau ve ngawt ang, engah tak buai ang maw? Tunah dâr 10 a ri thuak tawh a, a chauh lutuk loh hrâm ka beisei.

"A nih chu, i chau ngawt ang a?"

"Chau, ka chau lutuk. Ka ngai vawng vawng che."

Um, kei pawhin ka ngai ve tho.

"Chuan, engtikah nge Bobo-a chu in kalpui dáwn?"

"Naktûk chawhnu dâr 3-ah."

A va hma teh thut ve.

"A ni maw?! A va hma teh thut ve?!"

"Kalpui thuai a ngai."

A dinhmun a chhiat loh hrâm ka beisei.

"Tunah hian ka bulah awm la ka ti hle mai."

Kei pawh... chau lutuka a awm tùr chu ka khawngaih ve tho asin.

"Mu hma la, naktûkah in buai leh dáwn si."

"Ka bula awmin kuah che ka duh."

"A hla vawng vawng ém mai."

"I țawng ri tal hriat ka duh."

"Hei, ka țawng reng hi."

"Ka bulah awm la ka ti tak zet a ni."

Min ngai ve tak tak pawh a ang e.

Naktúk lamah chuan Bobo-ate nufa nèn an ni tawh ang a, min hre chang tawh lo vang.

"Muhîl rawh, mut i kham lo lutuk palh ang. Naktûkah chuan i tho harh vák mai ang."

A ngawi vang vang a, a muhîl ta emaw ka ti hial.

Zâwi zet hian,"Ka ngai èm èm che a,"a ti sup a, chutah,"Chau chung chung pawhin ka rawn call hrâm hrâm che a, tlém tè pawhin min ngai ve miah nange?"vui tih hriat zet hian a ti nang nang a.

"Inngaihna hman pawh a la awm hlei nem le."

"Sarah?!"

Phone chu a tâwp hmak mai. A thinrim leh tawh a ni chiang mai; a hahthlak țhìn mang tak e.

Kei pawhin ka tidik lo ve bawk. Min ngaih thu a sawi a, kei lahin dâwt tlêm ka hrilh a; ka ngai ve tho tih kha hrilh ve mai záwk ila chuan...

Rei a rial lo, whatsapp message a lo thleng leh nghal.

"Ka ngai che ka tih kha dâwt."

Ka nuih a za reuh lutuk, naupang ang mai.

Ka reply duh lo.

A rawn ri leh a, ka nuih a za tawh miah lo.

"Mapuii chuan min ngaihtuah ngawt ang."

Engvângin nge a nupui hlui hming hi a rawn sawi lan kher? Ka thîk atân a rawn sawi a ni thei ang em?

He pa hi chuan ka ngaihtuahna min sèn kualtír dan hi a hre ve chiang a nia. A nupui hlui tawh mah ni se, ka thík tho. Naktûkah an la zinho dáwn zui.

"Eng nge ka lo hawn ang che?"

"Engmah."

Ka thinrim lêt ve thung. Phone chu ka switch off hmak a, thinrim țúnin ka mu tâu ve ta. Ka chét dan chu a naupang chhia tih ka hria, hei pawh keima insiamchawp thinurna.

Túkțhuan ei laiin ka pa chuan,"In hmingchhe ta sa sa, innei thuai ang che u,"a ti ringawt a, a ngaihna hre lo zetin ka nu ka en a, ani pawh chuan maktih hmel deuhin ka pa chu a en ve tho a.

"Bawihi pa, kan fanu neihchhun a ni a, pasal a neih dáwn chuan Dân Thianghlim ngeiin kan ti dáwn lo'm ni? An chesual pawh a ni chuang lo

va?"

"Mi zawng zawng ngaihah chuan a thianghlim tawh chuang lo. Nakína pasal nei tùr tho tho chuan a sárhù lai hian nei rawh se."

Engmah ka sawi ve ngam lo. Ngawi rengin, hrehawm ti zetin an thil sawi chu ka ngaithla a.

"Mahlima pawhin a rang thei ang bera inneih a duh tho a, Dàn Thianghlim chu sawi lo mai ang. Anmahniin tlin mahse, kohhran ngaihin an tlin tawh lo."

"Kum chanve hnu lamahte innei zâwk se?"

"A rei mai mai. Kârah sawi neuh neuh a awm thìn, Dân Thianghlim kher lo pawhin tluang tak leh inhmangaih takin a inneih theih tho."

"A hautak lo thei ang berin kan ti ang. Mi sawiah buai loh tùr, Pathianin engkim a hre vek; mihring hmaa thil tihsual aiin Pathian hmaa tihsual a hlauhawm zâwk, chu chu kan hre reng tùr a ni."

"Bawihi, Mahlima hnén ațangin engkim ka hre vek a ni. I duh réng vâng ni lovin a ru chhuak che a,hrehawm ti takin i awm tihte thlengin ka hria a ni. Neih che a duh a; a nunhlui chu eng pawh lo ni se, thil kal tawh a ni a, theihnghilh i tum mai tùr a ni. Ka fanu neihchhun i ni a, Dân Thianghlim ngei chuan pasal țha tak nei la ka duh. Mahse, dinhmunin a zir tawh loh miau chuan thianghlim tak thoin pasal i nei mai a ni ang chu. I ngaihtuahawm lo ang tih ka ring."

Ka pa thusawi chuan min țhâwng kher mai. Mahlima chuan engkim a hrilh vek maw?!!!

Ka nu chuan,"Bawihte, a va mak ve! I duh réng vânga zui i ni emaw ka ti asin. Mahlima chuan a vau che tihna em ni?"a lo ti thung a.

"Bawihi nu, chutiangin ngai suh, induh ve ve an ni alawm. Hmangaihna hi chuan engkim tuar a huam a,a hneh vek thei alawm."

Ka pa thusawi hian min tibuai tlat. Mahlima lamah a țang nge ni a ka lamah? Ka va hre thiam ta lo ve. A thinrim viau emaw ka ti a, Mahlima hian a lo hneh vek zâwk em ni?

A rang thei ang berin inneih kan buatsaih dáwn maw? An thu thua ka awm a ngai, an hming ka tichhe tawh a, an thu tlùkna hnial thei dinhmunah ka ding thei lo. Ka nu leh pa an ni a, ka tâna țha lo tùr chu an ti lo tawp ang.

"A fapa an entír zawh hnuah a rang thei ang berin inneih a duh a, kei pawhin ka hnial lo. I tân pasal țha tak a nih ka ring tlat a ni."

(Zanin chu ka duhthu a sâm lo tak zet. Ka phone a dik lo, type a dik thei lo, min hre thiam hrâm r'u. Sat zânah thui tâwkin ka lo dah mai ang, mut tui vek u le)

LALHLIMPUIA - 16 By Dingdi Pachuau

Ni lêngin ka pa thil sawi chu ka ngaihtuah a, ka rilru a nuam lo tlat nia.

Mahlima bulah khán inneih kha ka tiam ngei mai, khatih hun lai kha chuan eng pawh ka tiam ngam ang chu; ka thianghlimna kha ka hloh ang tih a hlauhawm ém asin. Ka pa hian inneih a phal ka ring hran miah lo va, tùn hnàiah hlauh phei chuan. Mahse, Mahlima khán engtin nge a thluak a lo súksak hman ni?

Ka pa thu chu ka hnial thei lo ang, hnial thei dinhmunah pawh ka ding lo bawk. Ka tihmingchhe ém ém tawh a, a thu ka awih mai a ngai ang.

Mahlima chuan ka pa chu a chanchin a lo hrilh nual tih a hriat mai a,fapa a nei a, entír a ngai tih thlengin. An nu hlui a la hmuin an la inbe reng țhin tih a hrilh tel ang em le? Hrilh hauh lo ang, an rinhlelh leh rin lohna lam tùr engmah a hrilh lo tawp ang.

Kan khuaah hian țhian ka kâwm lo khawp mai a, pâwnah pawh ka chhuak khât. A zia phian, hetia ka hmingchhiat tâkah phei hi chuan ka chhuak lo lehzual a; kan in bul huan tê-ah ka lût deuh reng mai.

Mahlima'n min rawn phone lo va, kei pawhin an chanchin chu hriat duh viau mah ila, ka phone duh bík lo. Palai an lo kal leh tawh a, kan inneih ní tùr an ruat fel ta thlap e. Kár khat chiah hun kan nei, inbuatsaih nân!

Ka pa bulah chuan sawisèl ka duh viau nain engmah ka sawi ngam lo, ka pi leh pute nèn an lo ruahman sa thlap tawh a, sawisél pawh ni ila, awmzia a awm pawhin ka ring lo.

Ka hun hman réng réng hi mumang ang ruai ni vek maiin ka hria. Ka hma lam hun tùr nia ka lo suangtuah ve țhin zawng zawng chu a bo vek tawh a, ka mumang ni tak tak se; harh rualin bo vek se ka ti tak zet.

Hun a kal chak hle. Biak Inah, Dân Thianghlima kan inneih theih tâk loh avângin a hautak lo thei ang berin, zíng kârah kan invuan a, hei hi ka duh dan a ni thung. Mahlima'n a sawisél lo va, ka duh dan chu a zah tih a sawi.Sum sèn țeuh a ngai lo va, a hautak lo bawk.

Inneih thutiam kan chham a, a chham ring lém lo nain a chiang fak mai. Min melh rân reng a, a hmel chu a thutak viau a ni. Christina ka dinpui a, ani chuan cl- xii a zirlaia a țhianpa, Ramhluna a dinpui thung. Programme a rei lo va, chhûng leh khat erawh kan kim viau thung.

Pasal ka nei ta chu a ni a, mi min lo ngaihdan tùr chuan hlim viau tùr ka ni; mahse, ka va hlim tehchiam sí lo ém! Ka chhûngte leh mi dang hmuhah chuan ka nui sâng nain ka thinlung chhûngril chu a rûm vawng vawng thung. A chhan ka hre lo, pasal nei han nih ringawt mai chu nuam ka ti miah lo nia. Zân ka huphurh ém ém bawk, Mahlima thusawi 'Kan inneih zânah i hre ve khawp ang' a tih kha; eng nge ka hriat ve khawp tùr chu ka hre si lo va, ka huphurh a ni tawp mai.

Mahlima țhiante an fel a, a zia viau. Min fiam bawrh bawrh a,an pawisa thawhkhâwmin zânah party min buatsaihsak a; ka tel châkna záwng a ni miah lo. Mahse, bíkbosan chi a ni bawk si lo.

An thu thuin ka awm tawp, hnial pawh ni ila, awmzia a awm pawhin ka ring lo. Ka chau hluah hluah maiin ka hria, mut ka châk tawh lutuk. Pheikhawk sâng ka bunna lamah ka ke a na țhûm tawh bawk a, kan hun hman mêk hi ka ning ngawih ngawih.

"I chau tawh em?"

"Aw."

A țhiante melh pahin," Room-ah han chho la, han châwl rawh,"a ti sup a, mi chu a ngaihtuah ve a nih hmel.

"I țhiante'n kan tân liau liau an buatsaih a ni ve sia?"

"Chau deuha i awm ka duh lo, ka lo hrilhfiah hlawm ang."

Thaw huai chungin in chung lamah, Mahlima room-ah ka chho ta chhat chhat a, Christina kha haw thut kher lo se chuan ka la tuar ve țâng țâng tùr a ni a; mi dang hmeichheho lah Mahlima țhiante vek an ni zâwk si a, ka peih tawh ngang lo a ni.

Ka thawmhnaw ka thlâk a, ka chau hluah hluah. Intleuh pawh chu ka peih lo viau, ka ban deuh chuap bawk si a; peih lo chung chungin bathroom-ah ka lût a, ka chhuah meuh chuan ka harh deuh huaiin ka hria.

Ka luin lukham a dek chiah chu ka muhìl nghal ni maiin ka hria, Mahlima lo chhoh lai pawh ka hre tawh lo. Rilru leh taksa a chau tlat a, a âwm ve tho.

Ka mumangah Mahlima nèn zin tùrin kan lo chhuak a, kan hlim dùn viau mai lehnghal a. Hlim taka kan inena kan innuih var var lai chuan kan chuanna motor chu a accident ta hlauh mai a. Kan lum thui viau nain kei chuan na pakhatmah ka nei lo. Mahlima erawh chu thisenin a bual khat tlat a, a thaw hrâwk hrâwk mai a. Ka mangang lutuk chuan țap țuau chungin ka lo ko mawlh mawlh a, a thih phal lo chuan ka kuahbet tlat bawk a.

"Thi suh, i thi thei lo, meng hrâm teh!"

Ka thusawi a ngaithla miah lo.

"Mahlim, meng teh. Min en teh, i thih ka phal lo, i thih daih chuan engtin nge ka awm ang?"

Ka țap hlawp hlawp mai.

"Sarah! harh teh, harh vat teh."

Inhnît hlawp hlawp chungin ka han meng a, Mahlima chu ka lo kuah reng niin; ani pawh chuan min sâwi harh pah si hian min kuah bawk a.

Ka mumang a lo ni chu ka lâwm lutuk.

Nghet lehzuala kuah pahin," I thi alawm,"ka ti țuau a, ka la inhnît zui tho.

"Ka thi dáwn lo, mangchhia a nih kha. Țap tawh suh."

Duat deuhin ka hnung chu a chûl hliau hliau a, tunah chuan ka harh chiang ta deuh bawk a; ka țap pawh chu ka insûm ta deuh, a tak tak a ni chuang lo bawk a.

"I taksa chauh lutuk vâng a nih kha. I chauh deuh hi chuan mangchhia hi i mang tlângpui a nih dáwn hi."

A hmui chuan ka nghâwng a rawn nawr châk châk a,"Inneih zâna inmuthilhsan daih chu,"a ti leh sup a.

Ni dáwn tak. Kan inneih zân a ni a, party kalsanin ka mutsan daih tak.

Ka kuahna chu ka thlah riai riai nain ani erawh chuan min kuah nghet sauh thung.

"Ka nupui i ni tawh a, tûnah chuan ka ta i ni."

Ani pawh ka ta a ni ve tawh tho.

"Zanin hian muthilhtír che ka tum miah lo asin le."

Ka muhîl tawh tho si a, ka nuih a tiza záwk.

"Ka nghahhlelh ém ém zân, ka ta chiah i nihna tùr zân hi ho mai maia liamtír ka tum miah lo a nia."

A dik alawm. Inneih zânah chuan nupa nun an chên țhin, hei hi ka tawn tùr a ni tlat.

Min rawn fâwp ta chat mai.

Râwp ém émin min fâwp bawrh bawrh a, min chûl ruai bawk. A thaw huam huam bawk si a, ka hlau lek lek.

"Min tihlau a nia."

A tâwp chut a. Chutah, thâwk a la hawk hawk a, "Min hlau maw? I pasal ka nih hi. Sarah, i pasal ka nih hi, inneih zânah ém ém chuan min hnial lo teh,"a ti sup a, a aw chu a khûr lek lekin ka hria.

Ka vawi khatna tùr a ni a, tawn hriat ka neih loh avângin ka hlau alawm. Chubâkah, lehkhabuahte ka lo chhiar ve fo tawh a; 'hmeichhe thianghlim tân chuan a vawikhatna chu a hrehawm țhìn' tih vek a ni si a, ka huphurh ém a ni.

"Ka vawi khatna tùr a nia, ka hlau alawm."

A hre thei chè chè chauhin ka ring.

"Sarah, i la thianghlim tih ka hria asin. Zanin hi i theihnghilh ka phal miah lovang, i theihnghilh theih tawh miah loh tùr nawmna pék che ka duh a ni."

Ka țawng leh hmain min rawn fâwp leh a, tûn țum chu muangchângin a ni thung. Ril zetin min rawn fâwp a, ka la hlauthâwng deuh nain ka fâwp lêt ve tho.

"Min hlau miah suh aw, i hlauh tùrin ka che dáwn miah lo. Nawmna hlír ka pe dáwn che."

Nia, ka pasal a ni a, a duhdan ka zawm a ngai. A zei hle si a, a hrehawm lutuk loh hrâm ka beisei.

Zîng ka harh chuan min lo la kuah chial a, kei pawhin ka kuah ve tho. Maimichhîng vang vangin nizâna kan chétdan ka ngaihtuah lêt a, ka nui sak ringawt a.

Kan chétdan kha ka rin loh dan daih a nia, ka huphurh viau a nia; mahse, a thil tum leh sawi a hre chiang a, ka huphurh tawh miah lo ang.

Ka biangah a rawn fâwp a.

"Morning, Beautiful."

A lo harh reng a nih dáwn hi.

"Kan tho dáwn em ni ang?"

"A la hma lutuk!"

"Thawh tlai a chi loh ang."

"Thawh hmain tih châk ka nei."

Ka zak chu ka sen awp awp ang chu, a tih châk lah ka hre chiang bawk si. Ka pasal a ni tawh a, zak lo ang taka ka lan a ngai tawh ang. A chhan chu hetiang hi chu ka tawn fo tùr a ni tlat, nupa kâra thil thleng țhìn a nih miau avângin.

Nupa nun hlimawm tak kan chen hnuah chuan a hmuh laia thawh ka hreh avângin," Bathroom-ah lût hmasa la?"ka ti thung a.

"Lût rual ila?"

"Ni lo, lût hmasa rawh."

A lût fel ta maw tihah chuan ka tho vat a, thawmhnaw ka inbel a; kan mutna siam fel ka tum chuan bedsheet thianghlim taka ka thil hmuh chuan min tiphu zawk mai.

Thisen a ni!

Bedsheet chu ka hlîp nghal vat. Mahlima'n a rawn hmu hman ang tih ka hlau lutuk, a zahthlak dáwn ém asin.

A dang ka phah vat a, ka phah zawh hmain a lo chhuak a.

"Le, lût ve tawh rawh le."

Ka phah zo phawt a, bedsheet chu ka pawm a,ka lût tùr chu," Kha kha engtia tih nge i tum a?"a ti lehnghal a.

"Ka su dáwn."

"A țûl lo, dah tawp rawh."

A tihchi loh. Mi dang sûktír chi a ni hlei nem.

Ka insil thuak thuak, ka hmanhmawh loh chuan Mahlima'n min nghãk, keimaha a chhûngte zuk fin ka duh teuh lo.

Mahlima remruatnain chawhnu dâr hnihah Aizawl panin kan chhuak. A nu leh pate chuan an phal lo viau nain a thu chu an hnial bík lo va, ka chhûngte nèn pawh kan inhmu hman tawh lo.

Tluanga pawh a lo haw zawk a, kan inbe tam hman lo khawp mai. A lung a la awi lo tih ka hre thei a, a âwm ve tho mai. Aizawl lamah hman hunah ka la tlawh ve ang chu.

Zânah kan thleng a, a la tlai chhe lutuk lo ve. Nizân lama kan chêtna avângin ka rawl a, motor ka chuan leh avângin ka rawl a zual a;ka damlo mai ang tih ka hlau, ka chau si a.

Damdawi awmna ka hriat tawh avângin ka hmawm a, inbual lo chuan ka muhìl thei lo tawp ang. Mahlima'n geyser a on nghal avângin tui lumin nuam takin ka inbual a, ka nuam hawk mai.

Ei tùr a lo buatsaih thung a, a awlsam thei ang ber chi a siam a, a siam tui phian lehnghal a.

"A tui hle mai."

"I awm a nuam nange?"

Chîk zetin min rawn en a.

"Motor ka chuanna vângin ka rawl lutuk a."

"Damdawi i ei em?"

"Aw."

"I mu nghal dáwn nia, kei pawh thil check lawk tùr ka nei a, ka tih zawhah ka lo mu ve nghal ang."

Engmah ka tihpui ve pawh a phal lo. Kan ei zawh chuan mu tùrin room lamah min nawr lût nghal bawk a.

"Zanin chu ka insûm hrâm ang, i damloh belh ang tih a hlauhawm tlat."

Ka mutna bulah chuan laptop nèn a lo țhu ve a, ka lu a na ngut ngut mai. Light éng chuan ka mitte chu a tikham țhûm maiin ka hria, ka taksa lah a rawl na țhûm bawk si.

"Mahlim, khawngaihin light kha i off thei ang em?"

"Sarah, i țha em? Engtin nge i awm?" A che nghal sat sat a, light chu off-in ka bulah chuan a rawn bawk nghal a.

"Ka mit a tikham lutuk a."

"I lu ka lo hmehsak dáwn che em ni?"

Ka pang a rawn dek a, a kut chu a vâwt thlar maiin ka hria.

"Sarah, i khua a sik a nih hi."

A che nghal vat a, room ațanga chhuakin phone-a mi a be lâwng lâwng chu ka hria; ka lu a nat ngut ngut avângin ka maimichhîng a, zia lo ka ti hle mai.

A rawn lût leh a, ka bulah rawn țhuin," Sarah, hei hi ei teh, ka lo kai tho ang che aw?"tiin min rawn pawm tho nghal a.

Damdawi mûm leh tui chuan ka hmui a rawn si nghal deuh mai. Eng damdawi nge tih pawh ka zâwt lo; ka ei tawp a, ka mu leh nghal a.

"I lu kha ka lo hmehsak dáwn che nia."

Ka țawng peih tawh lo.

Duat zetin ka lu chu a rawn hmet a, ka dam sawng sawng mai. Ka damdawi ei kha a chak hle a nih ka ring bawk. Rei vak lo hnuah chuan ka lu, na ngut ngut chu a reh ta deuh mai a.

"Eng damdawi nge min pêk kha?"

"A chhâwk tawh che em?"

"Um, a reh hmak rih lo nain a țhat hmel khawp mai."

"Ka va lâwm tak ém!"tiin min rawn fâwp zoh a, a kut chuan ka hmai chu a chûl riak riak a.

"I na tawrh hi keimah vâng vek a ni."

A inthiam lo chu ka khawngaih ve tho.

"I thiam loh a ni lo."

"Ni lo, nizânah pawh i chau tih ka hre reng a, ka nawr lui che a ni."

"Thil thleng ve tùr pangngai a ni alawm, innei tharte chuan an paltlang vek ang chu."

"Mahse, i chau tih ka hre reng a?"

Min rawn fâwp leh phawt a, chutah,"Muhîl rawh, naktúkah chuan i harh var tawh mai ang. I damloh hi ka phal réng réng lo a nia,"a ti sap sap a. Dîm deuhin min siamrem a, min mut țhattír a.

"Mangțha le, Sleeping Beauty. Tui deuhin i mu dáwn nia."

Ka mut a chhuak selh selh a, men luih hrâm ka tum pawhin ka mitvun chu a chhah vek ni maiin ka hria. Ka zâng hiai hiaiin ka hria a, tui zetin ka muhîl ta nghal a.

Zínga ka harh chuan ka meng thei lawk lo. Ka meng dáwn uau uau a, ka meng hlei thei lo.

"Hi, Morning, Beautiful. Han meng teh le?"

Ka meng zawk a, ka chhîng leh nghal zel.

"Ka meng thei lo."

"Um, i harh tawh tho a, ka lâwm e. I ril a țâm em?"

Ka ril a țâm pawhin ka hre lo.

"Dár engzât nge ni tawh?"

"Dár 10 a pèl tawh."

E he! Ka va mu rei ve! Ka lu chu ka han dek a, na ngut ngut kha a lo awm tawh lo va,a lo dâi raih tawh mai.

"Ka dam tawh e."

"Nia, i damloh ka phal lo ka tih kha. Ka kai tho ang che aw?"

Ka meng thei ta e. Duat hmel zeta min melh reng chu hmuh a nuam khawp mai.

"Damlo tawh suh aw, hlautháwng réng rengin ka awm a, a hrehawm em mai."

"Aw le, a pawi ka ti hle mai."

Duat zeta min kuah pahin,"Damlo tawh lo la, a țha vek mai ang. I damlo tawh tùr a ni lo,"a ti sap a.

Teh tlat chuan, damloh chu tumahin an duh hlei nem.

LALHLIMPUIA - 17 By Dingdi Pachuau

"Aw le, ka dam var reng tawh ang."

Tûnah tak hi chuan a chungah rilru chhia emaw han tihtauh châkna emaw ka nei hauh lo. Min ngaihtuah ém ém si a; nuam ka tiin ka khawngaih viau zâwk.

Dîm têin min kai tho a, ka rawl țhûm pawh a zia tawh lutuk; mahse, ka lu erawh a hai deuh chiai chiai thung.

"I kal thei ang maw? Ka pawm i duh em?"

"Ka kal thei ang, ka dam tawh alawm."

Min chelh reng tho. Ka lu a hai deuh avângin kei pawhin nghet takin ka chelh a, dining room panin muangchângin kan chhuak a.

Dining chair-ah chuan min țhuttír a, ka maimichhîng leh vang vang phawt a; ani erawh chuan dawhkâna ei tùr inkhuh diam chu hawngin," Lo nghâk lawk rawh aw, ka'n tilum leh deuh ang e,"a ti a, bowl chu kengin choka lam a pan ta nghal a.

A rei ka rin avângin dawhkânah chuan ka kiu nghatin ka lu ka dawm a; mahse, a rei miah lo.

"I lu a zia thei nange? Damdawi kha țha hle khán a sawi si a?"

Țhu țhain," Ka zia lutuk, tlêm têin ka lu hi a la hai deuh a,"ka ti ve mai a.

"Chuti, mu leh rih mai rawh aw; ei tùr chu nakinah pawh a ei theih tho alawm. Damdawi vâng pawh kha a ni maithei a ni, ka zâwt chhin ang e."

Ka hnial viau nain min pawm tho a, bedroom-ah chuan min luhpui leh ta a; pasal neih hlima damloh chu a nuam fahran lo.

Room ațang chuan a chhuak leh a; mahse, a lo lût leh nghal. Ka bulah chuan rawn muin dîm tê hian min rawn kuah a.

"A pawi ngawt mai."

"Ka țawp ti raw?"

"Ni lo, ka thiam loh liau liau a ni."

"I thiam loh a ni miah lo."

"Lungleiah khán la awm rih tùr kan ni a; mahse, pumbilh che ka duh lutuk vângin ka chhûngte remti vak lo chungin ka pheipui che a."

"I thiam loh a ni chuang lo; ka țawp reuh ém vâng a ni zâwk."

"Lungngai suh aw, țha deuhin ka enkawl ang che. Nakinah doctor ka phone leh ang a; i zia sawt sawt mai ang."

Ka lo muhìl leh sek a ni ang, ka mit ka men leh meuh chuan a lo awm tawh miah lo.

Muangchângin ka tho chhuak a, ka lu pawh chu a zia ta; na a awm tawh loh bâkah hai chiai chiai pawh kha a awm tawh lo.

Bathroom-ah ka lût phawt a, ka hmai ka phih hnuah room ka chhuahsan ve chauh.

Phone a lo hmang a, hindi-in a lo dak zat zat mai; makti zet hian ka en reng a.

Min rawn hmuh veleh chuan a țawng tâwp chat. Chutah, a phun leh sup a; phone chu dahin min rawn pan nghal a.

"Ngati nge i lo thawh? I zia tawh em ni? I ril a țâm em?"

Min ngaihtuah tih hriat hi a nuam ve hranpa rêng rêng e.

"Um, ka dam var tawh e."

"I lu kha a la hai em?"

"Hai tawh lo ve, a dam vek tawh."

"Ei tùr ka'n siam ang che; lo țhu la."

A che rang khawp mai.

Ni lêngin khawiah mah a chhuak bík lo; kan inawm heuh heuh a ni ber mai.

Kâr khat hnuah chuan ka dam chiang ta khawp mai. Ka dam chu an lâwm ve a ni mahna; pangpâr pawh an lo nung țha sawtin ka hria. Ka phun sawn a, an pâr lek lek tawh a ni.

Mahlima pawh a chhuak leh țan tawh a, ka ngaihtuahawm tawh loh vâng a ni mahna; a lo haw tlai thei phian.

Tlai khat chu Bobo-a a rawn hruai haw tel tlat mai!

A hma aiin a dawldâng zualin ka hria, a chêr bawk. Mahlima'n a rawn pawm lût a, min hmuh veleh chuan,"Hi, Sarah?"a ti reuh a, mak ka ti lutuk chu ka meng phar âwk âwk a.

"Engtin nge ka hming i hriat a?!"

"Papa hian min hrilh a,"tiin a pa chu a en chho a; ani pawh chuan Bobo-a chu duat hmèl zet hian a lo en lêt ve a.

"Mahse, engtin nge koh tùr ka tih kha? 'Sarah' ti ringawt lo khán engtin nge kha?"

"Papa, ka theihnghilh daih. Sarah tih chiah ka hre tawh a."

Ka lo inrawlh vat a.

"Sarah chu ka hming a ni miau alawm, ti raw Bobo? Pawi ka ti miah lo."

Sofa-ah chuan an țhu a, Bobo-a chu a mal chungah a pawm zui a.

"Sarah, eng nge chawhmeh atân i siam? Bobo-a ei theih zâwng a awm hrâm ka beisei."

"Um, thil thak lam ka siam lo; a ei thei vek ang. Chubâkah, a siam belh leh theih tho bawk a."

An pafaa an inpawm chu ka en reng a; Bobo-a chuan a pa khabe hmul tam vak lo chu zûtsak hoh hoh pahin," Papa, nang pawhin 'Sarah' i tih tho kha,"a ti leh a.

Mahlima chuan min rawn en phei a, ka lo nui ringawt.

"Kei chu puitling ka ni tawh a, kei aia naupang chu an hmingin ka ko thei alawm. Chuan, Sarah hi ka nupui a ni bawk a; ka duh danin ka ko thei a."

"Kei pawhin 'Sarah' tiin ka ko duh."

"A nih leh, 'Honey' tiin ka ko daih mai ang."

"Chu chu eng tihna nge?"

Min en reng pah chuan,"'Ka duat; ka duhtak leh hmangaih; hmelțhatê' tihna maw le, chuti ang chuan koh i duh ve em?"a ti a.

"Aw, Â-mâ chuan 'Bawihte' min ti țhìn a."

Choka lam ka pansan ta daih a.

Bobo-a ei theih tùr chawhmeh dang ka en kual a, siam belh chu a ngai hran lo nain artui hi naupangin an lâwm avângin ka chhumsak a.

Chaw kan ei lai chuan ," Bobo, ei țeuh rawh aw, chawhmeh chu tui i ti em?"ka ti ve luam a.

"Aw, tui lutuk."

"Zânah kan bulah riak ve la?"

"Â-mâ ka ngai țhìn a."

"A ni maw?! I papa pawh i ngai tho em?"

"Aw, ka ngai ve ve."

A khawngaihthlâk reuh mang tak e. A nu leh pa an ințhen tawh si a, pa bula awm nuamti rual lek a la ni si nèn ; ințhen lo awm kher kher hi chu ka haw ngawt mai.

Chaw ei khamah chuan sitting room-ah țhuin, Bobo-a en duh chi tak 'Ice age' kan en a; kei pawhin hmuhnawm ka tih țhin avângin ngunthlûk tak chuan ka en a, hmun dang ka hawi lo rêng rêng.

"I mit kha a tla ang e."

Mahlima chu ka melh zawk a; min lo en char char tawh a ni ngei ang, khabe dawm meuhin min lo en rân a.

"Eng nge ni a?"

"Bobo-a ai paw'n hmuhnawm i ti záwkin ka hria."

Bobo-a chu ka'n en a; a lo muhìl daih tawh niin. Hmuhnawm ka tih ém avângin ka lo hre lo mai mai a lo ni a.

"Hetah a riak dáwn em?"

"Dáwn lo, a nuin a lo lam țêp."

An lo inbe leh hman tawh a ni maw?! Ka hriat loh hian an lo inbe fo a nih dáwn hi; mahse, engmah min hrilh ngai lo. Țûl lo a ti pawh a ni mahna; ka hriatpui nek lo ve.

Rei vak lo hnuah Mapuii chu a rawn thleng ta rêng a, a chhiat loh ngai rengin a la chhe lo. Fa a nei tawh tih hi rin a har ka ti, engtin nge Mahlima hian a țhen phal záwk ni?

A hmél hi a nui sãng reng mai a, hei hian a tihmélțha zualin ka hria. A țawng siam siam bawk a, nèl loh chu har tak tùr a ni. Kei hi chu ka chhûngte leh ka thiante pawh hian min hau fo, ka hmél hi a tûm țhìn a ni chék ang; nèlawm loh min ti fo.

"A muthilhna a rei tawh em? Sarah, a rawn tibuai hrep lo che maw?"

Nui sak chungin," Tibuai nâng,a fel lutuk; a țawng duh bawk si. TV kan enpui a, a pa nghèngin a muhìl ta thuai a nih kha,"ka ti ve a.

"TV a en hi chuan a meng rei thei hlawl lo."

Haw a tum deuh nghal nain thingpui in tùrin ka sâwm ve ngial a; ani pawh chuan a lo hnial lutuk hran lo.

A awm chhûng chuan Bobo-a chanchin hlír chu an sawi a, kei pawhin zawhna ka lo zâwt pah bawk a; a fapa chanchin sawi chu nuam a ti viau. A âwm ve tho, kei pawh ni ila nuam ka ti ve tho ang.

A hmélțhat bâkah a fel ka ti lo thei lo ; a châng chuan ka ngaihbel deuh nge ka hre lo, Mahlima țawng lai chu duh hmèl deuh deuhin a en țhinin ka hria. Mahlima erawh chu a awmdan ațangin eng mah ka hre thei lo thung; keima chîk chîkin ka lo chîk ve viau nain, a fing deuh bîk a ni mahna.

Pâwn thleng ka va thlah ve a, Mahlima chuan car chhûngah Bobo-a chu a va mut thlap a.

An lan theih chhûng chu kan thlír reng a, an liam hnu chuan,"I lung hlui a lêng em?"tiin ka fiam ta zoh a.

"Lènna chhan tùr a awm lo."

"A awm deuh tihna a nih chu."

"I awm reng alawm; mi dang ka ngaihna chhan tùr a awm lo."

In chhûnga kan luh hnu chuan," Bobo-a hian tu záwk nge a chhun le? Nangmah nge a nu kha?"tiin ka zâwt a.

"A entu azir a ni ang chu."

"A chhûn lo che ka ti."

"Chuti maw?"

"A nu pawh a chhûn lutuk lo; ngo chu a ngo reuh khawp mai."

Eng mah a sawi chhunzawm lo.

Mut nân a la hma deuh ka tih avângin phone-ah chuan games ka khèl leh rih a; Mahlima erawh chu choka lamah pheiin fridge a va hawng ruk ruk a, eng tak va ti dáwn ni maw?

Rei vak lo hnuah chuan bowl lian angreng deuh kengin ka bulah a rawn țhu a, bowl chu dawhkâna dahin a hnûk hnai deuh a.

"Ei rawh, tui i tih ém kha."

En hlei lo chuan,"Ka duh lo,"ka ti ve ringawt a,games ka khelh chu a laklawh lutuk vâng a ni záwk.

"Ei mai rawh, i duh tih ka hria."

"Ngawi lawk aw, Oh! ka thi ta! Ka va ui ém! Nangmah vâng vek, min lo be buai a."

Rum zet hian ka melh a; ani lah chuan ka phone min lâksak daih pah chuan," Ho lutuk. Mi â ang mai; duh aiin i tui dáwn tlat,"a ti a, ka lâk phâk lohnaah a dah ta daih a.

"Min pe rawh."

"Ei phawt rawh."

Min pe dáwn lo tih ka hriat avângin bowl lam chu ka melh a.

"Eng nge ni a?"

"Ei mai rawh."

Uai! Lachu a ni reng mai!

"Lachu maw!!! I lo lei haw elo?!"

Min chhân hun pawh nghâk lo chuan bowl chu ka mal chungah dahin ka ei ta mial mial a.

Lachu hi chu a tui ve chiang alawm!

"I lem sual ang e, muangchângin ei rawh."

"I ei ve duh lo em ni?"

"A bowl chawpin i keng daih a; engtin nge ka ei ve theih ang?"

Ni dáwn tak. Bowl chu dawhkâna dah pahin," I duh lo emaw ka ti alawm," ka ti ringawt a, ka ei zo țêp tawh lehnghal.

"Ei zo rawh, i duh tih ka hriat vâng alawm ka lo lei."

"Ei ve phawt rawh."

"Nih leh, pakhat chu min han pe la?"

Bowl chu la kángin a hmaah ka va keng phei a.

"Min pe rawh."

"Kha, la mai la?"

"Ni lo, min barh rawh."

Hm, pangchang ve siah.

Ka barh hnuah chuan," A tui tak tak a ni,"ka ti a, tui ka ti ve ém asin!

"A nih kha. Kei pawh Lachu ka ei tawh zîngah chuan a la tui berin ka hria; mahse, min barhtu vâng pawh a ni thei tho."

"Ka phone kha min pe tawh la?"

"Pe lo tawp ang; min ngaihsak nêp tlat."

Zân mutnaah pawh min pe duh chuang lo.

"Fa neih thuai thuai dan hi awm se ka ti."

Fapa a nei reng tawh si a.

"I nei reng tawh alawm."

"Nangmah nèn alawm ka tih."

"Bobo-a hi chu i duat ve ngawt mai."

"Ka fapa a ni miau alawm."

"Ka khawngaih reuh e."

"A hrisél lo hi a pawi ngawt mai."

"A hrisèl loh chu thuhran; nu leh pa kâr lo-ah a awm bawk sia."

A ngawi ta vang vang mai.

"A nu kha engtin nge i țhen theih záwk le? A chhe lo ka ti tak tak."

Min chhàn loh avângin ka ngampa sawt.

"Fa nei tawh hmél pawh a pu lo ka ti."

"I chhe lo daih záwk."

Ka ngawi ta hlauh thung.

Ka sam rawn nawr châk châk pahin," Ka nupui hi khawvél hmeichhe zîngah a chhe lo ber,"a ti sup a. A thil sawi chuan min tih-lâwm viau rualin a ti tak tak ang em tih ka ngaihtuah nghal bawk a.

"Dâwt min hrilh kher suh."

"I chhe lo, i khal bawk."

Ka mal a rawn zût zai zai a; min fak deuh hlek hi chuan eng emaw tih duh a nei tihna. Ka man ve ém!

"Zanin chu ka chau riau mai."

"Sarah!" Ka âwmbâwr a rawn țhâm leh chat mai.

"Sarah, min hrem lul suh!"

Hrem ka tum pawh a ni lo, han hnial ve hrim hrim ka châk vâng mai a nia.

"Sarah honey, please?"

A lam hawiin ka inlet a, meng sí sap sapin min lo en a.

A rin loh deuh tùrin a hmuiah ka han fâwp zoh a; min chhâng lét lo rêng bawk.

"Min chhâng lét duh lo a ni maw?"

A rawn che rang kher mai.

Min fâwp nghal chat a, a duhthawh khawp mai; a kut pawh a awmtír mai mai lo, min chûl kual ruai mai.

Ka pasal a ni a, a duh chu ka pe tùr alawm. Nupa kan ni a, nupa chuan nupa nun an chên thei alawm; intihlàwm tawn hi a țha.

Engkim kalsana pasal atân ka vawn tawh a ni a, ka tihlungawi thiam leh ka tân a țha; kan nupa kâr a nghet ting a ni mai.

"Sarah, min hmangaih rawh."

LALHLIMPUIA - 18 By Dingdi Pachuau

A thu sawi awmzia hi chiang takin hria se ka va ti tehlul ém! Keima lamah chuan ka chiang, ka chiang khawp mai ; mahse, ani ve thung hi?

Nupa nun kan chen lai chauh lo pawhin ka hmangaih alawm. Ka hmangaih ém avângin ka haw thei lo rêng a ni; nupui min neihsan lai pawhin ka hmangaih ém avângin ka rilru a na ém ém a, huat ka tum pawhin ka rilru chhûngrilah chuan ka haw thei tak tak lo.

"Sarah?"

Ka ngaihtuahna ata harh chhuakin ka lu kàn ár ár chuan a hmuiah chuan ka fawhsak vang vang a; țawngka kher lo pawh hian hmangaihna chu a lantír theih alawm.

"Honey, i duhawmzia hi i inhria em?"

Min fâwp lêt vawng vawng a, chu chuan ka thluak a fan a; thil dang ka ngaihtuah thei tawh lo. Kan inpawm chial a, kan inchûl tawn ruai bawk a.

"Tunah tak hian ka mamawh tak zet che a ni."

A thu sawi chuan min tiphûr kher mai. Min mamawh tih hriat chu nuam ka ti; min mamawh ngawih ngawih se ka duh rêng a ni.

"I ta ka ni alawm."

"Ka lâwm hle rêng a ni."

Nupa nun hlimawm tak kan chèn a; a lungawi hmél mawlh chu hmuh nuam ka ti, ka en ning thei lo.

"Min en reng khán nuam ka ti."

Ka hawi sawn rang kher mai, ka en reng tih pawh ka lo inhre pek hlei nem le.

"I duh phawt chuan min en rawh; nuam ka ti ka tih kha."

"Ka duh lo."

"I zak leh si a ni maw?"

"Teuh lo."

"A nih reng kha."

"Ka en che khán ka hmu miah lo che."

Ka bân zût zai zai pahin,"Ka nupui khal zet hian dâwt sawi a thiam lo tih ka hria; țha min tih chuan min en thei, i duh chuan min chûl thei bawk. I tân chuan ka inpeih reng alawm, Honey,"a ti sar sar a, a aw ki hniam ruih mai chu a sexy ka ti, ka mûr chiai chiai mai.

Zah loh chhuahin," I țha alawm; mahse, mi dangin min țâwmpui che ka duh miah lo,"a hriat thiam ngei beisei chuan ka ti a.

"Mi dang an awm lo."

"I chiang maw?"

"Chiang khawp mai; nangmah chiah i ni."

Lâwmman atân ka fâwp vang vang a,min chhâng lêt rang khawp mai.

Zînga ka harh chuan a la harh lo va, nghet vak lo hian min kuah a; min khan chial thung. A hmél chiang taka ka hmuh theihna tùrin ka lu chu ka her a.

A hmél hi chu a chhe lo alawm. Tui taka a mu hmél chu hmuh nuam ka ti; heti ang tho hian Mapuii bulah khán a mu ve țhìn ang em? Tuna min kuah ang leh min khan ang hian a khan ve țhìn ang em? Chuan, nupa nun kan chen țhin ang pawhin? Ni lo, hei chu ngaihtuah ka duh lo, hmeichhe dang bula mu tùra ka mitthla ringawt pawhin nuam ka ti lo; ka ţang țùng mai.

Țûl fé-ah lo chuan ka chhuak khât khawp. Mahlima hian min sâwm ve ziah a; mahse, ka kal ngai lo. A hna a thawk a ni mai a; keiin ka zui zél a țûl lo, ka tikhaihlak mai mai.

Chawhmeh bazâr tùr erawh chuan ka chhuak thìn; min kalpui ziah bawk. Pasal fel tak a ni, sawisèlna tùr ka hre lo. Chhûn lamah a hna avângin chhuak ziah ang a ni a; mahse, a awmna chin min rawn hrilh ziah thung. Zânah nupa nun min chenpui ziah a, a duhthawhin min ngaihtuah ém ém tho. Zei pawh a zei narawh e; mi tihphùr dan lah a thiam bawk si.

Sunday chawhnuah kan chhuak a, a pite inah kan léng a ni. College ka kal laia a rawn innghahna ber kha an ni a, ka rin aiin an lo rual a; ka zak lek lek mai.

A pi leh pute chu an tar ve tawh a, kan inneihnaah pawh khán an lo kal lo. An chak lo ve tawh a, a âwm viau tho.

Mahlima cousin-te leh an țhiante an lo awm bawk a, min lo hmuh chuan a cousin-te chu an lo ri chûl mai.

Min lo welcome țha a, nuam lo ka ti hran lo; mahse, ka zak deuh tho. Min chibai liam liam a, a pi leh pu phei chuan an bulah min țhuttír chawt mai.

An in chu a lianin a zau hle a; room pawh a tam ngawtin ka ring. An hausa tih a hriat a, in leh a chhûng chei dan pawh chu changkâng tak a ni.

Mahlima chu a cousin-te'n an pawt hrang ta daih a; mahse, pawi ka ri hran lo. A pi leh pute chu an țawng duh a, an titi siam siam a. Thil min zawh apiang chu țha takin ka chhâng ve zél bawk a.

"Aizawla college rawn kal țhìn, hostel-a awm kha i ni ti raw?"

Mahlima pi (Ka pi) lam chu enin," Aw,ka pi,"ka ti sap a.

"John-a'n a rawn kan ziah tak che alawm, i hmél hmu lo hian kan zîngah chuan i lâr khawp mai."

John-a chu tunge le? Mahlima hi em ni le?

"Ka pi, tunge John-a chu?"

An nupa chuan an nui a; ka pi vêk chuan," Mahlima hi keini pahnih chuan 'John-a' tiin kan ko țhìn alawm, a têt laiin a hming atân 'Johnson-a' tiin kan phuah a; mahse, koh nân an hmang lo a nih hi,"a ti leh a, ka nuih a za reuh khawp mai.

"Neih che kha a'n tum khawp a; mahse, a chesual ta si a. Hun kal tawh mah ni se, hrehawm ka tihpui țhìn a nia," a pu chuan a ti chuar chuar a.

"A pa kha alawm ka huat țhin chu."

"A tih tùr kha a ni ve miau si alawm."

"A ni ve tho mai."

"Mahse, tunah chuan a tum a hlen ta alawm."

An thu sawi chu ka ngaithla tak nain ka hre thiam vek lo, ka ngaithla liam vél mai mai a ni.

Kan titi lai chuan room pakhat kawngkhàr rawn inhawngin,"Pi, khawiah nge Ânute hi an lèn a?"a rawn ti chhuak lar lar a, kan pathuma min rawn hmuh chuan a ding chawt a.

"Nimin lama mitthi-ah khán an kal a nih kha."

Chu nu chuan kekawr mar zet leh t-shirt mar deuh tho a ha a, a sam chu a buang thâng mai. A hmél chu a chhe lo viau nain make up erawh a hmang nasa mah mah ka ti; a la naupan hmèl si a.

Min rawn en vang vang a.

"Baby, i u John-a nupui Sarah-i a nih hi, lo chibai la?"

Mahlima cousin tho a nih dáwn hi.

Ka nui sâng a, a lama kut phar chhuakin,"Hi, ka hmu che chu ka lâwm e,"ka zah lohna zawng zawng sâwm khâwmin ka ti zâng vah a.

Eng mah sawi lo chuan min chibai zawk a, a kal sawn nghal a; ka hrilhhai ru viau mai. Min ngei em ni le? A pawi ka sawi záwk em ni? Ni lo, a lung a awi lo sa a ni ang.

Room-a a luh hnu chuan ka pi chuan,"Baby-i tak hi chu aw.."a ti vang vang a.

Ka pu chuan,"A la naupang ve a; i hre thiam hrâm dáwn nia. Mapuii kha a ngaina viau mai a, John-a nèn an ințhen ta thut kha a hre thiam thei lo a ni,"a lo ti ve a.

Um, chuvâng chu a lo nih dáwn chiah chu. Mapuii ngaina tak a nih chuan kei chu min ngaina lo ngawt ang chu; kan inang lo hle si a.

Haw kawngah chuan," Ka pite kha an țawng duh hle mai, mi an ngaina der ve a; ka lâwm khawp mai. Lo awm lo ta se, ka hawihài ngawtin ka ring. Nang i bo daih si a,"ka ti a.

"An ngaina der lo ang che, an ngaina tak tak ang che."

"Ina chêng kha an tam hmèl ka ti."

"Aw,an rual phian. An vaiin 10 an ni."

An tam hle mai. Ka hmuh hnu an awm pawhin ka hre lo ; an țhiante lah ka hriat ngai loh vek.

"Ka pite kha kum engzât nge an nih tawh ang?"

"Kum 80 an pèl ve ve tawh."

"An upat tawh nèn, an beng a la țha dùn hle mai; chuan, an țawng a fiah hle bawk si."

A nui suk a.

"Eng nge nuih tùr ka sawi em ni?"

"Kan pahnih hian ka pute dam ang chen hi dam ta ila, zânah ka la dap ruk ruk tho che ang em le?"

"I ho mai mai, John."

"Eng maw?!!!"

Motor chu tidingin ka lam a rawn hawi a.

"Han sawi leh lawk teh."

"Eng chu?"

"I sawi zawh chiah kha."

"I ho mai mai."

"Mawh?"

"A ho em mai, John; kal thuai ang."

"Ka hming i lam dan kha a sexy ka ti."

A va ho mai mai tak!

"Ka pi leh pu hian 'John-a' tiin min ko țhìn a, mi dang chuan an hre lo. Nang erawh chuan ka hming pum i hre ta a, i duh chuan min ko thei ang ; mahse, khumah chauh aw."

"Motor kan chuan lai pawhin ka ko thei tho che, John." Ka aw chu a sexy thei ang berin ka'n ti vél a, a no thei ang berin ka melh bawk a.

"Motor chhûnga hmangaihna chen hi ka hnial miah lo a nia."

A ti leh duh tak tak mai ang.

"Ka ti mai mai a nih kha,"ka ti chûl a.

"Kei chuan ka ti mai mai lo."

Khawlaiah chuan ni lul lo mai.

"Min thlêm chhin teh?"

"Ka tifiam a nih kha; kal tawh ang."

"Ka zak ve hlei nem."

Nia, a zak ve hauh lo ang.

"Kei ka zak alawm." Ka pasal mah ni se, min en reng pawh hian ka la zak tho. Ka ti tawh miah lo ang.

"Min tiphûr tlat."

A rawn âwn phei ta mai.

Ni lo, ni lul lo. Khawlaiah motor chhûngah; chubâkah,kan dinna hi motor tlân a lùn phian bawk si.

"Inah ti záwk ila?"

Ka hmai bul chêtah chuan min enin,"Eng maw inah chuan kan tih záwk ang?"a ti sup a, a thaw ham ham bawk a.

A ngeiawm thiamzia hi!

"Eng chu maw inah kan tih záwk dáwn?" Min zâwt sek sek mai a.

"I va sual tak!"

"Sawi mai la?"

"I hre reng!"

"Ka hre miah lo."

Ka ngawi ta reng mai.

Ani lah chuan," I sawi hma chu kan tlân lo ang,"a ti bur mai a.

A tâwpah chuan," Ih, infawh vél kha maw le,"ka ti ta sap a, ka sen leh țûn țûn ang chu.

A nui ta suk a.

"Ka phûr záwng tak."

Motor chu tinungin kan tlân leh ta a. Ka thil sawi kha ka ngaihtuah lêt a, ka zak cheuh cheuh mai.

Zanriah ei laiin a cousin-te chanchin chu ka zâwt a.

"Kan inneihnaah khán an lo kal ve hlawm em?"

"Kal vek lo. Mipa 2 an lo kal a; hmeichhe lam chu zirna avângin an lo kal hman lo."

"Baby-i kha an tê ber a ni em?"

"In lo inhmu tawh maw?! Um, a nih kha. A la naupang ve deuh a, pangchang ve thei deuh mai a nia."

"A nih tak chu; a chhe lo reuh ka tia."

"I chhe lo záwk."

"Ti ve ziah suh."

"A ni miau sia."

"Chaw i duh belh em?"

"Thil dang sawi tum lo la."

"Bobo-a hi eng nge a an zél a?"

"I va khal tak!"tiin dawhkân hnuai ațang chuan a ke chuan ka mal chu a rawn tawk a, ka phu zawk mai.

"Harh suh aw."

"I khal ém a ni."

"Chuti ang sawi hun pawh a nih loh hi."

"Sawi hun a awm hran chuang em ni?"

Rum deuhin ka melh a; ani lah chu a lo nui sûng a.

"Mi dang an awm chuang hlei nem."

"Ei mai mai teh."

"Zanin chu mut thuai thuai ka châk a ni."

"Chaw ei kham veleh hian i mu nghál dáwn nia."

"Nangmah nèn le."

"Ka hman lo, ka inbual dáwn."

"Țha lutuk!"

Phûr deuh hian hmun min tihfelpui a. Eng nge a hriat le? Ni dangah pawh min pui țhìn tho nain zanin hi chu a phûr deuh mah mah.

"Zanin hi i phûr mah mah lo maw?"

"Phûr ang chu ; kan tih tùr kha ngaihtuah ve la."

Phûr tharna viau tùr a awm chuang em ni le?

"Lo țhu rawh; in tùr ka rawn la ang."

Ka țhu ve mai. Inbual nghál chu ka duh chiah lo, a țha lo an tih țhin kha.

No pahnih a rawn keng phei a; makti angreng deuh hian ka lo en a, ni dangah heti ang hian a ti ngai si lo.

"Eng nge ni a?"

"Grape-tui maw le."

No chu ka lo ban ve mai a, in ta mai lo chuan ka hnîm phawt a.

"Zu rim a namin ka hria."

"Hnahlân grape-tui a nih kha, in chhin teh."

"Zû a ni lo maw?"

"Ni nâng aw ; tui i ti ngawt ang."

Ka tem hlak a, a lo tui phian mai.

"Zû a ni lo tak tak maw?"

"Ni lo ka tih chu, a 'cial' a nih kha."

A tui khawp mai.

"A ruih theih em?"

A nui suk a.

"Ka hre lo le, kei chuan ka rui dáwn lo chiang a."

"A nih, keiin?"

"Rui lo tawp ang."

"Ka ruih vaih..."

"I lawmawm reuh lutuk."

A tui ka ti lutuk a, ka in zo vek. A tam lém lo bawk a, ka khék reng peih lo.

"I duh belh em?"

"Aw."

"I rui palh ang."

"A ruih theih loh i tih kha."

"Chuti angin ka sawi loh kha."

"Tlém têin aw, John, please?"

Ka rui deuh a nih ka ring tlat, ka awmdan a pángngai lo tlat a ni.

"Ka ruiin ka hria."

"I lan dan kha i sexy hle mai."

"Sexy..."

A lum deuhin ka hria. E, ka inbual dáwn tak alawm.

"Ka'n inbual tawh ang e."

"Ka lo lût ve nghál ang."

Ka ke pênte chu zâng deuh hiaia ka hriat chu le.

"Inbual rual ang."

Ka nuih var var a.

"I zak ang e?"

"Ka zak ngai lo."

"Tak tak maw?"

"Tak tak."

"A nih leh, John, min pawm lût la?"

"Tehrêng mai."

Ka kãng nghál nawlh mai.

Hm, ka pasal hi a lo rimtui a nih hi. A nghâwnga nawr châk châkin," I rim chu a tui hle mai,"ka ti sap a, tunah tak hi chuan hetia awm reng hi ka châk.

"Eng rim nge ka nam a?"

"Mipa hmélțha, ka duh chi rim maw le."

"Nang tê hi, i rui deuh em ni?"

"Teuh lo, ka rui miah lo."

Țawng tùr hi a lo inchhawp chhuak nghál zél mai.