☆LALHLIMPUIA☆ - 19 - 24 By Dingdi Pachuau

 LALHLIMPUIA - 19 By Dingdi Pachuau

Ka kein Bathroom chhuat a deh chiah chuan a vawt ka ti deuh, tui lum ka duh ang.

"Tui lum záwk kha aw."

Ka thawmhnaw hâk lai chu ka phelh nghal a ni deuh mai; ka bulah Mahlima a awm ve reng tih pawh ka ngaihtuah tawh lo rĕng rĕng.

Ka kekawr chu ka hlíp tawh a, ka kawr hâk ka phelh leh tùr chiah chu Mahlima a awm ve reng tih ka hre chhuak ta phut a.

Țé chùl chungin," Min en miah suh, lehlam hawi rawh,"ka ti sawk sawk a; ka kekawr chhuata ka hlih tawh chu ka zu ban leh a.

"Het, bengchheng suh; ka hmuh hnu vek a nih kha."

"Chu pawh ni se?"

"Hlíp mai mai teh; kei pawh ka inhlih vek tawh hi."

A ni lah tak a, boxer nèn chauh a lo ding tawh.

"Min en lo ve mai la?"

Muangchângin a inher a; ka theih anga rangin ka kawr chu ka hlíp a, shower pindanah chuan ka luhsan ta nghal a.

Tui lum záwk chu ka'n herh a; a nuam kher mai.

"Min luhsan daih chu le! I va châk dáwn lo rua em!"a rawn ti lût nang nang a.

Nui har harin," Min lo zawm ve mai la,"ka lo ti a, tûnah tak hi chuan ka zak tawh lêm lo. Ka thil in khán hna a thawk a ni ngei ang chu.

"Loh theih náng."

Shower hnuaiah chuan kan inchhaih pah a; nuam tak a ni.

Kan chhuah hnuah chuan," I lu kha tihro vat a ngai ang; chuti lo zawng, i damlo leh palh ang," tiin drawer ațang chuan hair- dryer a la chhuak a, a fit mawlh mawlh a.

"Min tih-rosak la, John?"nui har har pah hian ka ti a, ka theih anga no chuan ka meng a, ka tlawn a ni.

"Min thlêm lo teh!"

"Ka thlêm che maw?"

Ka hre lo der tlat.

"Khati anga min melh chuan i sam chu kan tiro hman lo tawp ang."

Stool-ah min țhuttír sauh sauh a; ka sam, towel-a ka tuam chu min phelhsakin a chhêm ro țan ta a.

A va nuam tak! Ka mut a tichhuak selh selh mai ka ti.

"Ka mut a tichhuak."

"Muhìl miah suh; tih tùr kan la neih kha."

"Shower hnuaiah kan tih tawh reng kha."

"Tih tawh a awm thei lo."

"I la kham lo a ni maw? Zanin atân chuan duh tâwk tawh mai ila?" Ka nui kar kar a.

"A theih loh a ni tawp mai."

A hmanhmawh ta khawp mai; mahse, ka sam hi zawng a tam ve ém asin.

Intihharh ka tum ve hrâm hrâm a;mahse, ka mut chhuak chu dan rual a ni lo.

Bathroom-a a luh zawk hlànin ka lo muhìl hman tho. Min muthilhtír ta nge nge a ni ang; mahse, zîng lamah erawh min tiharh hma khawp mai.

Kan inkâr chu a tluang purh maiin ka hria. Ka mamawh engkim min pe a, min ngaihtuah ém ém reng mai. Ka rài leh rài loh min zâwt peih viau bawk a; fapa nei tawh mah se a dang a duh belh hle a ni ang.

Bobo-a pawh phai lama an zu kalpui khán a lung an lo zaisak kha a ni a; a zia viau zèl e. An zai hlawhtling ni tùrah ka ngai, an rawn lang khât ta ém mai.

Tunah chuan kan in pawh in tak tak a ang ve deuh ta, pangpâr a pâr ve nasa tawh a; hnah hring lam lah pot-ah ka dah nual bawk si, hawi vél a nuam tawh lutuk ringawt.

Tlai khat chu Mahlima rawn haw hma deuhin Christina-i'n min rawn phone a.

"En teh, U Zuala khán zû a in nasa tawh a ni àwm e."

"A ni maw!! " Mak ka ti lutuk; chutih rual chuan inthiam lohna ka nei nghal bawk a.

"Aw, an vénga ka cousin awmte sawi a nia, a inhmeh lo e ti raw?"

"Keimah vàng a ni ngei ang ti raw?"

"Engah ngawt maw?"

"Ka tibeidawng ém asin."

"Inneihna in puitlin tâk loh vàng maia zu in chu, ka ngaisâng lo ém mai a."

"Chuti ang a ni ngawt bîk lo, hrehawm a ti dáwn ém asin. A tlàwmthlák bawk si."

"A pà lo ka ti. Chuti ang vànga zu in chiam ringawt. I lo inthiam lo ringawt ang e."

"Ka inthiam lo sâ reng tawh."

"A ho ém mai. A inngaihtuah harh hunah chuan a la zak ve viau ang chu; a nuin nupui ţha tâwk neihtír a tum kha maw, nang aia țha záwk leh changkãng záwk."

A rawn nui pah awr awr a, U Zuala nu hi chu a ei lo ve thei a nia.

"U Zuala tak chu aw..."

"I pasal kha țha tak khán ngaihven mai rawh; rái thuai thuai la,fa nei thuai teh u."

"Duh hun hunah a rài theih ringawt hlei nem."

"Țan in la nasa lo a ni ang chu?"

He nu nghalzia hi chu aw...

"Eng mah i hre lo."

"Chu, țan chu in la ve nasa tihna a ni maw?"

"Ninawm lutuk suh, rawng ka bàwlsan dáwn che."

A rawn nui leh awr awr a.

Ka rài nghal mai ka inring ve tho ; mahse, thu kan neih lohzia leh tih theih kan neih tlèmzia ka hre telh telh. Mahlima'n fa neih thuai a duh vàngin rài thuai chu ka duh ve tho alawm, ka dul chu ka chûl ka chûl ringawt a.

"Honey, zanin chu ka rawn haw tlãi dáwn tlat."

"Ngati maw?" Ka lunghnûr nghal ém ém ringawt.

"Hna lamah hian chin fel tùr a tam deuh a."

"Inah i ti thei mai lo'm ni?"

"A pawi ka ti tak zet. Hotute nèn kan nia ; chaw ei ngei ngei rawh aw, nghei miah suh."

Ka va peih lo tak em!

"Aw le, dâr engzatah nge i lo haw theih ang?"

"Dâr 9-ah chuan ka lo haw theiin ka ring, ka ngai che a nia."

"Kei pawh."

"I thinrim lo ti raw?"

"Aw."

Thinrimna tùr awm nghal lo chuan maw le. Chaw eipui tùr ka neih dáwn si loh chuan chaw ei ka va huphurh ta ve! A duh zawng ka siam ve țeuh asin le.

Tlêm chu ka ei ve ; chaw nghei a phal miau si lo alawm. A tel lo chuan in chu a reh tlawk tlawk maiin ka hria.

In chung lamah chhoin, puan lum ka keng chho bawk a; veranda-a long chair-ah chuan țhuin pâwn lam thâwm leh boruak chu ka tem leh ta a.

Ka lung a lêng deuh ringawt mai. Ngaih ém ém phei chu ka nei lo. Ka phone-a hla chu ka play a; maimichhîng vang vang pahin ka ngaithla a.

Lalnunsanga'n 'Di hlui' tih hla kha a sa vang vang a. Ngun takin a hla thu chu ka ngaithla a,ngaithla pah chuan a phuahtu rilru tùr chu ka ngaihtuah kâi a.

A mipa hi ka khawngaih lutuk ringawt. A rilru a țha ka ti viau bawk a; mihring rilru inan loh theihzia a chiang viauin ka hria.

U Zuala tân ka ngaithla deuh tlat nia. A chan tùr angah ka dahsak a, a inhmeh riauin ka hria. Ngaithla ve tak ang maw? A chan nèn chuan a inang diak diak lo nain eng emaw chen chu a inang ve tlat.

Mipa hlã mah ni se, kei pawhin ka ngaihthlâk peih leh ka duh ém ém a ni țhìn. A satuin a sa lungrun thiam a, a phuahtu lahin a phuah thiam bawk si a, ka duh a ni tawp mai.

"Honey, ka zawng nasa che asin!"

Ka lo muhìl sek hman.A lo haw tawh a ni maw? Ka phone chu ka en a, dâr 9 chiah a ni!

"I lo thlenna a rei tawh em?"

Min rawn kuahin," Ka lo thleng deuh chiah. Ka ngai tawh lutuk che a; zanin chu ka ning tak tak a ni,"a ti sup sup a.

Ka hnâr lèn vat vat pahin," Tluk loh rim i nam chiang mai,"ka lo ti thung a.

"Um, tlêm ka in."

Kan inneih hnua zu rim a nam ka hriat leh hmasak ber a ni.

Min pawm nawlh a, in hnuai lamah min chhukthlâkpui nghal a.

"A hahthlâk viau em?"

"Eng chu?"

"I hna hi."

"I bula awm reng theih loh hi a buaithlâk ka ti, zanin ang te hi."

"Ka zawhna i chhâng lo."

"Ka hah lo, ka bula i awm chhûng chu."

Khumah chuan min nghat a, ka inrin hmain min rawn fâwp nghal a.

Zu rim chu ka ngai thei lo.

Nawr sawnin,"Tluk loh rim kha ka ti thei lo a nia,"ka ti chhuak țhat a.

"Ka nam viau em ni?"

"Aw, min fawh i duh chuan tlêm pawh in tawh suh aw."

"Ka in tam lo tak tak asin."

"Ka ring; mahse, i nam tho alawm."

Khumah chuan a țhu ta ngul a.

A kuta chelhin,"Hawh, inbual la,"tiin ka kài tho a, a kawrkilh phelhsakin," Vawiin chu i chàu dáwn si a; fãi taka i inbual hnuah ka massage dáwn che nia,"tiin ka tlawn a. Min ngai ve ém ém si a, a rim ka ngai thei lo nèn; a thin a rim ang tih ka hlau deuh a.

"Min bual la?"

"Hah, naupang i nih loh kha."

"Ni lul lo mai; nih pawh ka duh hek lo."

A intleuh chhûngin keiin ka há nâwtin ka hmai ka phih bawk a; a intleuh rei lo kher mai.

"I va hmanhmawh ve? I fai meuh ang maw?"

"Ka bàl hlei nem."

Ka nuih sak a; ka thu a awih ve hrim hrim pawh hi ka lãwm tâwk viau mai.

Khumah chuan bawkkhupin a mu a; keiin a dàr leh bân chu ka hmehsak a.

"Ka hmet ná em?"

"Na lo mah mah."

"Ka awih lo chiang, ka țanna lamah ka thlan a tla lek lek tawh asin."

"Chuti, duh tâwk tawh rawh."

"Ni lo, ka tih theih ve tâwk a nih hi."

"I bân kha ka lo hmehsak ve ang che; mahse, bân ai chuan mal hmeh hi ka thiam záwk."

Țûl ka ti lêm lo nain min hmehsak ve a, nuam ka ti phian mai.

"A nuam hle mai."

"Zan tin ka hmehsak ang che."

"I chauh dáwn nèn, mu tawh ang aw."

Min kuah chialin,"Ka bula i awm pawh hian ka ngai tho chein ka hria,"a ti sup a.

"Min kuah chung pawh hian maw?!"

"Aw; chuvàngin, ka lam hawiin mu ziah tawh rawh aw."

A lam hawi chuan ka inher nghal a.

"Ka lo hawi nghal a nia."

"Um, ka nupui thuawih thei tè hi, ka hnê thei si lo."

Dîm têin min fâwp phawt a, ka hnar loh avâng chuan a duhthawh ta tual tual a; kan ințhen meuh chuan thâwk kan la dùn hawk hawk mai.

"Ka hnê thei lo che."

"Kei pawh ka ni ve tho."

Ka mutkawr min hlihsak pah chuan," Heti ang hi ha ve ziah tawh suh aw, a hnawk mai mai,"a ti khùr dar dar a.

"Ruakin ka awm ziah dáwn tihna em ni?"

"A pawi lo, mutnaah chuan."

Ka țawng peih ta lo.

In ka tihfel laiin ka nuin min rawn phone a.

"Bawihi, i nau i kan hman ang em? I buai viau em?"

"Eng nge thil awmzia?!"

"Tluanga kha a damlo a."

"Engtik ațangin maw? Min va hrilh har ve?"

"Hei, hostel ațangin a țhianpain min rawn phone a."

"A nih tak chu, a zia lo hle mai."

"Hman hrãm tum teh, Bawihi. I nau kha chuan eng mah a sawi ngai si lo va,i hriat kha. I kutah ka dah ang aw."

Tluanga tak hi chu aw...

Ka chungah a la lungawi lo reng ang em? Mahse, ka tih tùr a ni si, ka nu-in min ring tawh tlat, ka tlawh ngei a ngai.

Mahlima ka call a, a pick thei miah lo lehnghal a, message ka thawn ringawt.

Ka insiam chúk chúk a; an hostel awmna lai tak hre lo mah ila, a vêng hming tal ka hria alawm.

Taxi driver fel tak zârah an hostel chu ka thleng thei hrãm e.

Khumah a lo mu tlãn a, ka hmu chiah chu ka khawngaih lutuk ringawt. Ka nau neihchhun, ka unaupa neihchhun a ni a; hetia hmun dang leh mi dang kâra a damlo han hmuh chuan ka mittui a tling lo thei lo.

"Eng nge i lo tih dáwn a?"

"Ka lo kan che."

"Kan ka ngai lo; haw leh tawh rawh."

Ka chungah a la lungawi lo chiang alawm.

"Heti ang hian awm suh."

"Hãw rawh."

A thu sawi chu ka ngaihthlaksak lo tawp ang.

"Eng damdawi nge i ei?"

"Ka dam mai ang; hãw tawh rawh."

"Thisen i lâktír tawh em?"

"Ka zia mai ang ka tih chu."

"Ka nu-in a ngaihtuah lutuk che asin."

"Ka nu-in a hrilh vàng chauh chein min rawn kan a ni maw?"

Ka thil sawi a la kàwi duh zel mai.

"Min rawn phone mai tùr a nia."

"Ka thiam loh liau liau a nih chu."

Lehlam a hawi hmak mai.

LALHLIMPUIA - 20 By Dingdi Pachuau

He pa pawh hi luhlul tak chu a ni ve tho. Kan têt ve deuh lai pawhin a thin ka tihrim tawh chuan a lungawi mai mai ngai lo, lungawi leh tùr chuan hun a duh rei thei khawp.

A ei duh tùr nia ka hriat ka leisakte chu a khum bul dawhkàna dah chhuakin," Ei châk deuhte i nei em?" tiin ka zâwt a.

"Nei lo."

"I eng ber nge nâ?"

"Engmah."

"Doctor-ah kal ila?"

"A ngai lo."

"Tuar tlawk tlawk i tum em ni?"

"Hãw rawh."

Ka nau neihchhun; ka unaupa neihchhun ni bawk hi a lung a la awi thei thlâwt lo a nih àwm hi.

"Ka chunga i lungawi loh vàng maiin heti ang hian awm suh, ka nute'n an ngaihtuah si che a."

Min chhàn loh avàng chuan tlêmin ka ngaih a țha deuh ringawt a; mahse, ngaih țhat nân chuan a la hma mah mah ka ti tho bawk.

Ka phone a rawn ri nghawr dat dat a, a va hun lo țhìn tak ém!

"Hello?"

"Sarah? Khawiah nge i awm?"

"Tluanga ka kan a; ka message kha i hmu lo em ni?"

"Eng maw?! Tu chu maw i kan a?!!!"

Min rawn vìn țhawt mai!

Ka laka Tluanga lungawi lo nèn, Mahlima min rawn vìn nèn; ka ţah a chhuak țûn mai. Chhàn pawh ka chhâng thei lawk lo va, ka ngawi deuh reng a.

"Sarah? Min chhâng teh." A aw a dam ta deuh hlek.

"Tluangate hostel-ah ka kal."

"Chu chu tunge?"

"Ka nau mipa kha maw le." Ka phone ka hmet tàwp hmak. Mipa hming ka sawi rík hleka pàwr thei lutuk mai; duh leh buai ve rawh se. Min vìn chu ka la na viau mai, ka phone chu ka switch off nghal daih a. Nakin deuhah ka on chauh ang.

Ka thinlung tâwt zet tihthàwl tum chuan thâwk muangchângin ka la phawt a; vawi nga vel thâwk ka lâk hnu chuan tlêm chuan ka zia ta deuh.

"A rawn vìn ngam che a ni maw?!"

Tluanga chuan min lo en reng niin; ka nui lui sak a, a za lo kher mai.

"Ka awmna a hre lo va."

"Chu pawh ni se..."

"Hei, ka thil lo ken che hi ei rawh."

A rawn țhu chhuak a.

"U, he pa hian a vìn țhìn che em?"

"Vìn ngai lo; nichin kha chuan i hming ka sawi ri a, mipa hming ka sawi chhhuah chuan a thík țhìn a."

"Mahse, mipa dang ni lovin i nau alawm ka nih. A vìn tùr che a ni lo hrim hrim."

Mi hi chu a chhan leh viau si. Nichin lawkah kha chuan min be țha duh lo kha a ni a; tunah lêm, min chhan leh ém ém si.

"U, i duh viau em he pa hi?"

"Tluanga, ka pasal a ni alawm, khati ang khân sawi tawh suh. Duh lo ila, ka nei dáwn em ni?"

"A vau che a ni lo maw?"

"Tluanga!!"

"Ka thin a tirim alawm, a vìn che a nia."

Thil dang ka sawipui ta daih a, ani pawh chuan a sawi zawm ta lo. Thisen chu a lo exam-tír ve tawh ngei a; mahse, a țha vek a ni.

"Ei châk i nei em?"

"Nei lo ve, i rawn keng tam mah mah záwk a nih hi."

"Thawmhnaw sûk ngai i nei em? Ka lo sûksak ang che."

"A awm lo, ka țhiante an fel a; min tihsak vek alawm."

"A nih tak chu, an va fel hlawm tak ve! I lu kha ka lo hmehsak dáwn che em ni?"

Hostel-ah chuan ka awm ve ta reng a, a roommate pawh rei vak lo hnuah a rawn haw nghe nghe a. Lawmthu ka lo hrilh ve luam a; a la lài ém ém zui.

Mahlima a rawn lût ve hlawl mai!

"Ka rawn zawng nasa kher mai."

Kan lo en ţhap a, eng a lo ti ve dáwn chu ni maw?

Tluanga chu rawn pan ding nghalin," I damlo tih ka lo hre lo va, pawi ka ti khawp mai,"a ti phawt a; chutah, min rawn enin," Ka tihpalh,"a ti leh sup a.

Kan awm rei ta vak lo. Mahlima pawhin damlo tâna țha tùr thil hrang hrang a rawn kensak țeuh a, a duhnaah hi chuan a fel thei teh a nia.

Haw kawngah chuan ka țawng duh miah lo va; min melh leh zoh țhìn a, ka hmu ru reng nain ka hre lo der tlat.

"I nau hming kha ka lo hre ngai miah lo alawm; chubâkah, a damlo tih pawh ka hre lo va."

Ka țawng lo.

"Inah ka rawn haw a, i lo awm si lo va; ka mangang thut alawm. Message kha ka en mang bawk si lo va."

A lo nih tak chu.

"Sarah, eng emaw tal sawi teh."

"Ka thiam loh a ni e."

"Ni lo, keima thiam loh alawm, vìn tùr che kha ka ni lo asin; mahse, mipa hming i rawn sawi khán..."

A dik lohna hre chhuakin a rawn sawi chhuak ta alawm.

"A țha alawm."

"Engmah a țha lo, Sarah. I lung a awi miah lo, eng nge ka tih ang?"

" I nau min en dan pawh kha ka hai hlei nem."

Um, a dik ang. Tluanga khán phone-a min rawn vìn ri kha a hre ve reng si a, mi ang pangngai tân chuan a hriat loh theih loh ang.

"Ni dangah i lo hãw hma ngai si lo va, engtizia nge vawiin chu i lo haw theih a?"

"Nia, vawiin chu kan hna lam atân chuan kan vànnei a ni tawp mai; mahse, ina ka rawn haw-in ka hmu si lo che a, suangtuahna dik lo tak tak ka nei ta a..."

"Chuan...?"

"A vawi khatna atân ka tidik lo ka tih tawh kha."

Vawi khatna atân. Nupui min neihsan kha a vawi khatnaah a chhiar lo emaw ni.

In kan thlen hnuah chuan ka kalnaah min zui zel a tih theih ang chu, ka lung a awi vak lo tih a hre miau a. Vawi khat chu phone-ah mi a bia a, tunge a biak phei chu ka hre lo. Inbe hran lêm lo mah ila, ka bulah a awm reng peih nia.

Ka nuin min rawn phone hmain ka phone hmasa a, Tluanga ka tlawh dan chanchin ka hrilh chuan ka nu chuan,"Mahlima'n min lo hrilh tawh a," a lo ti daih a; makti deuh hian Mahlima chu ka en a.

Zawhna mitmeng deuh hian min lo en lêt thung a; mahse, ka ngawih reng avàng chuan a dàr a chhìn ãk ringawt a.

"Tluanga chu ka ngaihtuah lutuk tawh lo. In awm a, ka ngaih a ngam tawh."

"A dik alawm,Nu. Lo ngaihtuah miah suh u."

Ka nu nèn kan inbiak zawh chuan Mahlima lam hawiin," Ka nute i va phone tawh tih chu min hrilh a har viau em ni?" ka ti nghal ringawt a.

"Min zâwt si lo va."

"Zawh kher i ngai lo, nupa kan nih hi."

"Sarah, thinrimna zawng lo teh. I nu ka phone tih ka hrilh lo che pawh chu ngati nge i huat viau?"

Nia, a mak ka ti. Inhnial leh inhau peih ar-in ka awm tlat, min vin avàng khán a tidik lo tih a sawi tawh reng si a. Engtiziaa la vàwng viau nge ka nih le?

Thu ho tê-ah nupa pawh hi a lo inhau nasat theih dáwn a lo nih hi. Tlâwm záwk leh ngawi záwk an awm loh chuan ho tê ațangin buaina a lo chhuak thei dáwn nasa a ni tih ka hre țan.

Chokaa ei tùr ka siam chu min pui a, a phone-ah chuan Bryan Adams ' When you love someone' chu a play pah a, a zàwm rût rût a.

Soup siama telh tùr, Vaimîm a bung diat diat chu ka mit sìr pah reng a. "I hla play chu, a hla thu i ngaihtuah chiang lo mai mai a nih kha. Khati ang rilru i pu pha meuh maw?" ka rilru chuan ka ti mawlh mawlh a.

"He hla hi chu ka duh asin."

"Eng nge a chhan?"

"A chhan chu ka duh a ni mai. I tâna ka thil tih zozái hi en la, i hre thiam mai ang chu."

"Ka tân maw? I tân a nih kha i tih. Pasal ka neih dáwna min rûk chhuahte kha, ka tân maw?"

"Thil kal tawh sawiin hlâwkna a nei lo."

A tidik leh viau bawk si. Keimah hi ka dik lo a nih àwm hi; hun kal tawh ka sawi chhuak zut zut a, țangkaina a nei dèr si lo. Ngati nge ka lungawi theih miah loh ni?

"I lungawi thei ngang lo a nih kha,min chùm hrep mai rawh."

Khumah, a sír tàwpah ka mu a; chutah pawh, amah en lo záwngin ka mu tlat bawk. Ka inngaihtuah lungpuam a, ka țah a chhuak tlat nia. Ka awm dan hi a dik lo tawp tih ka hria, tlàwm ka hreh ém a ni. Ani lahin a tisual tih sawiin a thiam loh a nih thu a sawi mawlh mawlh a, kei lahin a mi vin vawi khat ka la na viau si.

"Nge, room ațang hian ka riak chhuak dáwn?"

Ka ngawi reng a, ka rilru erawh chuan a riak chhuak ang tih ka hlau lutuk. Min kuah leh se, duat takin min chûl leh se ka ti; mahse, bul țan ka hreh. Ka lungawi lo laklawh tawh bawk si a, bul țantu nih chu tlàwmah ka la tlat.

"Sarah?"

"Um."

"Lo hawi teh."

"Aih." Ka mittui tling a hmu dáwn asin.

"Kuah che ka duh a nia, heti ang hian awm lo teh."

Kei pawhin ka duh alawm. Zànah mutnaah min kuah țhang lutuk tawh a, min kuah loh chuan awm dan thiam a har tawh tlat záwk.

"Kei pawhin ka duh." A hre pha kher lo maithei, ka sawi zàwi ém mai.

Mahse, a hre pha a ni chêk ang chu, ka kâwngah min rawn kuah chat a, a lamah min pawt nghal salh bawk a.

"Ka vin vàng che khán ngaihdam ka díl e. Ka sual i ti em?"

"Aih."

A lam hawiin min kuai her a, kan in-en ta rân mai.

"I țap em ni?"

"Aih."

"Engtia min tih nge i duh?"

"Min kuah rawh."

Duat takin min kuah a, ka pasal hi ka va tluk lo tehlul ém! Ani chuan tlàwm a hreh lo va; kei ve erawh chuan kan inkâr siam țhat tum aiin a țhat lohna lam ka àwn záwk si.

"Ka tihpalh."

Ka chhîp fâwp vang vangin," Honey, a tàwp vek tawh alawm. A thiam lo záwk chu keimah ka ni a, vîn tùr che kha ka ni lo va," a ti sup sup a.

"Kei pawhin ka la vàwng ém a nih kha, ména thlâk mai mai tùr a nih tehlul nen."

"Mahse, tunah chuan kan sawi fel tawh alawm."

"Nia, țha deuhin ka awm tawh ang."

"Ka vìn tawh miah lo vang che."

Tunah chuan ka awm a nuam ta huai huai mai. Thinrim țûn leh lungawi lova awm kha chu mahni leh kawppuite inkâr a nawm loh bâkah rilru a hrisêl lo duh ém mai. Mipa-ah pawh pâ ve tak mahin a thil tihsual a pawm ngam chuan kei hmeichhia záwk hi chuan pawm vawng vawng tùr ka ni. Mahni thil tihsual pawm ngamte hi mi huaisen ber an ni fo asin, kei ve hi ka va dawihzep tehlul ém!

Kan boruak a dik leh ta. Tluanga pawh kan pahnihin, hun remchâng kan neih hmasak berah kan kan leh a, ani pawh a zia chho ve zel e. A dam țhat veleh chaw eia sàwm kan rilrûk a, Mahlima phei chuan hostel-a awm lova kan hnêna awm ve mai tùrin a duh a; mahse, chu kher chu ka duh lo, Tluanga pawhin a duh dáwn teuh lo.

Bobo-a pawh a rawn lang leh țan ta. A pa hi a ngai ve thei ém a, a khawngaihthlâk zawk. A dam chho ve zel niin a lang a; mahse, a la chêr reng tho.

An pafaa an in-awm dûn țhìn chu hmuhnawm ti zetin ka en reng țhìn. Mahlima hian fa dang a awt ém ém tih ka hria, pài thuai pawh ka duh; mahse, thu ka nei lo ém mai. Pathian thu thu a ni.

A châng chuan hrehawm ka ti lek lek. Fa a awt ém ém a, kei ka râi thei mai bawk si lo. Bobo-a a en leh vawng vawng țhìn ka hmuh phei hi chuan nuam lo ka ti hle țhìn.

"Mahlim, thil pakhat ka zâwt ang che a, dik takin min chhâng rawh aw."

Min en vang vang phawt a, a hnuah a lu a bu chauh a.

"Fa ka pâi lawk lo hi i thin a rim țhìn em?"

"Sarah, chuti ang sawi suh."

"A châng chuan hrehawm ka ti a."

Ka țhutna bulah rawn kalin ka kut chu a rawn vuan a.

"Honey, khawngaihin, chuti ang chuan awm suh aw. A hun takah chuan i pãi mai ang, kan thuneihna a nih loh hi."

"Mahse, fa i awt ém ém si a."

"Nakinah kan la nei mai dáwn alawm. Fa chu hei, Bobo-a ka nei tawh reng a, mahse; nangmah nèna kan fa ngei pawm chu ka châk alawm, ka duh tak zet bawk."

"Kan la nei ngei ngei ang, Sarah. I rilru tihrehawm tawh suh aw, fa nei rih lo mah ila, kan pahnihin hun âwl kan nei a. Hun hlimawm tak kan hmang dûn thei zawk alawm. Fa chu nei ila chuan, zânah pawh i hun min pe thei tawh nâng."

A meng sawr sawr a, a mitmeng tawrh harzia hi a inhre ve ang em le?

"Ka nupui khal zet hi a hun pum pui hi chan ka duh asin."

Ka hmuiah râwp zetin a rawn fâwp a, kei pawhin ka chhâng lêt ve tàwn tâwn mai.

LALHLIMPUIA - 21 By Dingdi Pachuau

Tluanga chaw rawn ei zàn chuan Bobo-a pawhin a rawn ei ve a, Bobo-a chu Tluanga chuan a làwm khawp mai a; Bobo-a erawh chuan a la nèl fahran loh avàngin a pa mal chungah a awm deuh reng thung a.

"Tluang, zanin chu riak ve mai la?"

Mahlima pawh chuan,"A dik chiah, naktúk zíng kârah ka thlah mai dáwn che alawm. A nih loh pawhin, tûkțhuan ei khamah pawh a theih tho a," a lo ti ve a.

"Ka roommate kha ka hrilh miah lo va."

"A harsa lo e, phone mai la."

"Ka tibuai záwk ang che u."

"A harsa hlei nem."

Tluanga ka chunga a lungawi ta hi nuam ka ti a; chubâkah, Mahlima pawh a nél ve ta viau bawk. Mahlima hian a ngaihsak angreng a, nél loh theih pawh a ni lo. Nau mipa a awt țhìn a, Tluanga hi a nau mipa ang tak takin a en ni berin ka hria.

TV-ah cartoon enin, sitting room-ah kan țhu thap a. Bobo-a chuan ka mal chunga pawm a ngèn ve tlat mai. Ka han pawm a, a chêr viau nain a zia ve tawh khawp mai. Mahlima pek chuan Tluanga damloh lai a sawi chhuak a.

"I u-in a rawn kan ni che khán, ina ka haw khàn ka hmu si lo va, thil dik lo tak tak ka suangtuah ta a. Min tlàn bosan a nih ka ring ta ber a, a message kha en ila chuan buaina a awm miah lo tùr a nia. I hming a sawi khán ka ngaihtuah chhuak pha miah lo che a, ka suangtuahna lo dik lo sá nèn, ka rawn vìn tuar a. Kha kha i u hian a la na teh asin, zàn mutnaah thleng thleng min tawrhtír a."

"A nih loh kha."

"I lung a awi theih miah loh kha."

Tluanga chu lo inrawlhin,"Ka u hi chu a naupang chhia ve țhìn teh asin, naupang chhe thlèma thlèm a ngai țhìn a,"a lo ti ve a.

"Mahse, thlèm dan ka hre hlauh a."

"Engtin?"

"Nupa tân chauh hriat chi."

Rum deuhin ka va melh a; ani lah chuan," Tluanga, nupui i neih hunah ka hrilh ve ang che, i apply phawt chuan a fel vek mai ang,"a la ti deuh deuh a.

"Sawi tawh suh."

Tluanga chu a lo nui kur kur a, an pahnih hian ka ngei dùn lutuk.

Dâr 8-ah Bobo-a chu Mapuii'n a rawn lam a, tûn țum chu hmeichhe tleirãwl lek lek tawh a rawn hruai tel tlat.

"A lo muhìl leh tawh a ni maw? Sarah, a lo tibuai che em?"

He nu hi chu a fel ve chiang a ni.

"Buai lo ve, zanin chu ka pawm a ngèn ve tlat a."

"A ni maw? A lian ve tawh a, i taksa a kham țhûm dáwn a nih chu."

"Tihian, nu nih a zir pah a, a țha alawm."

"Nu nihte chu zir vak a ngai hlei nem, fa in neih hunah a thiam chho vek mai ang. Ka lo pawm dáwn em ni ang?"

"La lêng ve rih u la?"

Nui sakin," Hei, a u ka rawn hruai bawk sia, a mut a chhuak ve palh ang; zanin chu kan hãw nghal záwk ang e," a ti a, Bobo-a pawh chu kan inhlàn a.

An chhuah fel hnu chuan Tluanga chuan," A va hmelțha ve!"a ti chhuak hluai a. Ka melh vat a, Mahlima erawh a lo la luh loh avàngin Tluanga thu sawi chu a hre kher lo ang.

"A fel bawk,"ka lo ti ve a.

"An nu hlui a ni ti raw? A chhiat loh tehlul nèn, engvànga țhen nge maw a nih le?"

"Nang aiin chhe lo ka ti hmasa daih tawh."

Sofa chu mutna atân a nawm loh avàngin in chung lamah Tluanga mutna tùr chu ka siamsak a.

Tûkțhuan kan ei hma deuh a,Mahlima chuan Tluanga chu a thlah a.

In ka tihfel laiin Mahlima'n min rawn phone a. A thawhpui, a ţhian ni bawkin lehkha pawimawh a rawn lam dáwn niin a rawn sawi a, a awmna min hrilh nghal bawk a.

Rei vak lo hnuah chuan Mahlima țhianpa chu a lo kal a, ka la hmuh ngai loh a nih vàngin lo biak dan ka hre lo khawp mai; mahse, ani a fel thung a, a zia viau. Awm pawh a awm rei lo, ka țawp hnik hnek si a, nuam ka ti lo khawp.

****************

Kan inneihna pawh thla riat lai a lo tling ve ta. Kan hlim dùn viau mai. Nupa nih chuan inhau leh han inhnial deuh hun chu a awm lo thei lo va; mahse, Mahlima hi ka rin ai daihin a lo puitling a. Ngawih hun leh mi bengdaih dan a hre phian a, a nun ațang hian zir tùr tam tak ka nei a ni.

Ka la râi thei lo mawlh hian ka rilru a tihah thìn. Mahlima lakah ka inthlahrung deuh țhìn a, ani chuan fa a nei thei tih a chiang tawh a, kei hian dik lohna ka nei a ni ang ka ti țhìn.

Zan khat chu thuphungin a bulah ka sawi mai mai a. Keima lama ka inrinhlelhna chu ka hrilh a.

"Sarah, chuti ang a ni lo tawp ang. Kum khat ém pawh a la ral lo va, kan hmanhmawh mai mai a ni."

"Nia, râi har chi ka ni pawh a ni maithei; mahse, inentír a sualna a awm chuang hlei nem. Nang chu i fel sâ tawh a, keima lam hi a ni ang tih a rinawm tlat a ni."

"Inentír chu i duh si maw?"

"Aw, pawi i tih loh chuan."

"I duh phawt chuan."

"Min hruai kher a ngai lo a nia."

"Ni lo, kei pawhin ka duh ve alawm."

Makti deuh hian ka en há a, ani erawh chuan min en miah lo.

"Nang chu a ngai ve hlei nem. Hna-ah kalna tùr i neih kha, min hruai kher a ngai lo ka tih tawh kha."

"Mahse, ka kal ve duh alawm."

**************

Christina a rawn zin phei a, kan ina innghat tùrin ka tih nasat ém avàngin a rawn innghat hrãm.

"Eng nge min hmehpui dáwn?"

"I duh duh."

"Min chàwm țhat hle loh chuan hmun dangah ka insawn ang."

Mahlima pawhin a ngaihsak khawp mai. Ka țhian neihchhun tak tak a ni ve a, a àwm ve tho. Hun remchâng a neih veleh kan pahnihin min chhuahpui a, kan duh ang apiang min eipui bawk a, a nuam lutuk ringawt.

Kawtah pangpâr ka phun sawn a, a pâr hluite ka thian fai bawk a. Lei țha ka dah belh a, lungawi zet hian ka thlîr vang vang a.

"A va hmuhnawm àwm vang vang ve!"

Ka en vat a, Mahlima țhianpa kha a lo ni a.

"Lo kal rawh, eng nge ni ta?"nui sângin ka lo chhàwn a.

"A, eng vak ni lo ve. In in bul lawkah hian thil pawimawh tiin ka rawn kal a, rawn pèn a rem ém a."

"A nih tak chu."

A țawng duh a, a hmél a chhe lo hle bawk. Mipa fel tak a ni ngei ang, a nui tam lo nain fiamthu erawh a duh phian.

Zanriah kan kîl lai chuan," Vawiinah i țhianpa kha a lo lêng a, a hming kha ka hre ta miah lo a nia,"ka ti a.

"Rohlua kha maw?"

"Aw, a hma pawhin lehkha pawimawh i rawn lamtír tawh kha."

"A nih chu. Eng nge a lo tih a?"

"Kan in bul lawka kal angin a insawi a, a fel hmèl reuh khawp kha."

A nui huk a.

"'Reuh' ni lovin 'roh' ti ta che. Rohlua chu a tê hlei nem."

"Tê ka ti hlei nem. A țawng duh phian a."

"Um, a fel alawm. Bialnu pawh a nei ngai lo, hna hi a thawk mawp mawp a ni ber; mahse, a bâng tawh a, zirtîrtu a ni ta daih a."

"A țha reng alawm, zirtîrtu hna hi a zahawm alawm."

"Rinawm taka mahni hna thawh hi alawm zahawm ber."

"I va fing tak!"

"I hre ve chauh elo?!"

Kan inen a, kan nui dùn hawk hawk a.

*****************

Inah chuan Mahlima'n Study room a siamtír a, online-in lehkhabu țha tak tak a chah nghal țeuh bawk a, ka lãwm tak tak. Heti a nih chuan ina ka awm pawhin hun khawhralna țha tak ka nei tawh dáwn a ni.

A rawn hàw apiangin lehkhabu a rawn hàwn ziah a, ka lehkhabu chhiar châk min zâwt ziah bawk.

Zan khat chu Mahlima intleuh hlàn chuan a phone a rawn ri a. Amah a hman rih loh avàngin ka lo lâksak duh lo va,a pawimawh a nih chuan an rawn tinawm leh mai tùrah ka ngai a. A rawn ri nawn leh ta chiah a, ka la ta vat a.

"Hello?"

"Oh, Mahlima a awm na nge? Ka va be duh ve aw..."

"A intleuh lawk a."

"A nih chu, nakinah ka lo ti leh mai ang. Party kan kal dan tùr chungchângah biak chian ka duh deuh a."

An party țhìn tihna em ni? A nih loh pawhin, tùna a rawn sawi ang kha a nih chuan an party dáwn tihna a ni a; chutah, hmeichhiain a rawn be bawk si.

A hna lam hi ka zâwt ngai lo, ani pawhin min sawipui ngai lo bawk. Party chu lo nei țhìn ni ta se, hmeichhiate nèn an awmho vek țhìn tihna a ni dáwn a, party-a an awm dan lah chu a rin hriat theih ruak bawk si.

Bathroom ațanga a lo chhuah chuan phone call chungchâng chu ka lo hrilh nghal a.

"Lucy, kan thawhpui a nih dáwn chu, keima'n ka phone mai ang."

Thawmhnaw a hâk hnu chuan phone chu lain room ațang chuan a chhuak ta nghal a.

Ka ngaih a țha lo deuh tlat. Room-ah pawh hian a be thei reng si a, ka hriat loh tùra a han be kher chu, ka hriat a duh lo tihna. Chuti a nih chuan, thil eng emaw a awm tihna a ni ang.

Heti ang lam ngaihtuah hi khawvela ka duh loh ber thil a ni. Min rinawm lohsan phei chu ka ngaihtuah duh lo, ka suangtuahna kual vel chu a hrisel loh ém avàngin ka phone-a games chu ka khèl ta daih a. Khelh tui erawh a har khawp mai.

A awm dan phung chu a danglam chuang lo; kei erawh chu ka danglam thung. Mahse, ka chîk hle nain amahah engmah dik lo tùr ka hmu chuang lo. Kha phone call ka lâksak ațang khan rinhlelhna rilru ka pu țan chu a ni dèr mai.

Mapuiite nufa an rawn kal pawhin rinhlelhna mitin ka lo thlîr ta fo mai a,rinhlelh kâi tùr erawh ka hmu chuang hauh lo, keimah ka intihrehawm mai mai a ni. Lucy pawh kha Company-a an thawhpui a ni ve mai a, eng nge rinhlelhna tùr awm tehchiam le? A rawn phone a ni ve mai a, a thawhpui a nih chuan a rawn be ve bawk ang chu.

*****************

"Company ațang khán ngati nge i bàn daih a? A nuam viau tùrah ka lo ngai asin."

Rohlua a lo pêng leh a, ka titipui a ni.

"Nuam ve tho mai; mahse, zirtîrtu nih hi a hahthlâk lo záwk ka ti a."

"Nia, ti raw? A hna hi a zahawm ka ti bawk a."

"A dik alawm."

Thingpui pêk pahin," Mahse, company-a i thawh khán experience i neih phah tho a, a zia tho alawm. Thawk in tam ve ngawt lo maw?"

"Tam ve e."

"Hmeichhia pawh an thawk ve em?"

"Thawk e, an awm nual asin."

Nui chung hian," An chhe lo hlawm viau lo maw?"ka ti leh a.

"A entu azir a ni ang chu. Goldie kha a pian a nalh hle a; Lucy ve thung kha chu a khal hle thung. Inanna lai riau in nei nghe nghein ka hria asin."

Lucy a sawi chu Mahlima rawn phone-tu kha a ni ngei ang.

"Engah chuan maw kan in-an a?"

A nui sak a.

"In khal ve ve."

Ka rin loh lam daih a ni!

"Mak i va ti àwm ve a!"

"Nia, ka rin loh lam daih a nia."

Ka pasal ni lo, mi dangin 'khal' min tih hian nuam ka ti miah lo. Hmeichhe lamin 'khal' min tih chuan a zia deuh hlek ka ti a, mipa lam, tlangvâl lehnghalin 'khal' min ti hi chu ka duh fahran lo.

"Hmeichhe khal chu an sexy duh alawm."

Ta deuh deuh chuan.

He pa titi dan hi ka duh miah lo. A fel a, a țawng duh a; mahse, min fak dan hi ka duh záwng a ni lo.

"Nang pawh hi sexy ka tih záwng tak i ni."

Ka duh lo, ka duh miah lo. Tlangval a ni a, kei hi a țhianpa nupui ka ni, pasal nei lai ka ni bawk. Hei hi mi pângngai infaknaah ka ngai thei lo vang.

"Ka lâwm e; mahse, kha lam kha chu sawi tawh lo teh ang."

"Fak chu i duh vak na nge? Hmeichhia hian fak hi nuam an ti vek emaw ka lo ti a; mahse, nang chu ka fak che pawh a ni chuang lo, i nihna a ni ve sa reng alawm."

Ka țhen sak ringawt a, ka awm a nuam thei ta mang lo.

"Ti leh ta daih ila, Company-a kan thawh lai chuan hmeichhiate chuan mipa hi an râwp thei khawp a, party kan neih lahin lu leh mawng lam hre lo lékin an rûi thei nia maw le. Chu hun tak chu mipa lam lah hian nuam an lo ti ve bawk a, kei chu ka haw hma daih țhìn. A nih loh pawhin, ka inthiarfihlim daih zel. Nuam ka ti ve ngai lo."

Ka thaw huai mai.

"A va mak dáwn ve!"

"I rin phâk bâk aiin an che nasa thei ang. Nang chuan heti ang lam boruak hi i la tem ve ngai loh hmèl ém mai."

LALHLIMPUIA - 22 By Dingdi Pachuau

Nia, kei chu party tih vél hian ka lung min lèn lo khawp a, ka kal ngai lo. Class picnic-ah pawh ka kal ngai chuang lo, Christina hi ka kawp chawt a; ani lah heti ang kal thatchhe chi a lo ni bawk nèn, kan hawi zâu lo khawp mai.

Rohlua haw hnu chuan Lucy mawlh mai chu ka ngaihtuah leh ta a. Mahlima hian hmeichhe dang min kawpsan dáwn em ni? A ni thei lo tawp ang. Lucy chu a thawhpui a ni a, hmeichhia a nih vàng ringawtin ka thîk thei lo vang.

Pângngai takin ka bia a, ka rinhlelhna hi a hre tùr a ni lo. Ka tisual a nih vaih chuan a thinrim dáwn ém asin, kei pawh ka inchhîr bawk ang. Rohlua pawh khan Lucy khal thu a sawi lang ringawt a ni a, rinhlelhna tùr pawh a sawi loh kha; mahse, Company a chhuahsan tawh a, Lucy leh Mahlima chungchâng chu engtin nge a hriat theih tawh tehlul ang?

Zànah ka muhìl thei lo va, thil ni lo lo ka ngaihtuah nasat vàng a ni pakhat a. Thil țangkai lo a ni tih ka hria; mahse, ka ngaihtuah lo thei lo. Râi tawh ila ka ti. Mahlima pawhin fa neih a duh ém ém a, fa hi nei ta chiah ila, tùn ai hian ka hlim dáwn asin.

"I muhìl thei na nge?"

Ka che sek chuan a tiharh a ni ngei ang, ka mut theih loh chuan ka che sek lo thei lo.

"Aw."

"Eng thil nge ni a?"

"Thil ka ngaihtuah kual mai mai a."

"A țha lo asin, muthilh tum rawh."

Kei pawhin ka hria asin; mahse, engtin nge ka tih chuan ang?

"Lo hnãi teh, ka lo kuah muhìl ang che."

Min kuah a, ka hnung a chûl hliau hliau a, ka pasal thlazàr hnuaiah hi chuan him bîk riauin ka inhre țhìn a, nuam pawh ka ti țhìn. Mi dangin min țâwmpui ang tih ka hlau, ka duh lo bawk.

"Party kan neihna tùrah lo kal ve ta che, kawppuite hruai theih an ti a."

"A zahthlâk àwm ém mai a, kawppui hruai theih pawh lo ti ta tehreng se, tuma'n an hruai tak tak lo vang."

"Hruai che ka duh asin."

"Mahse, nuam ka ti ve lo vang."

"Nia, chuvàng chuan ka tilui ngam lo che."

Ka kal ve thei lo vang. Hnathawkte tâna party buatsaih ni na na na, an kawppui hruai phal mah se, tumah an kal duh bîkin ka ring lo.

"Engtikah nge party chu in neih dáwn a?"

"Naktûk zànah. Zanriah eiin ka lo hãw lo leh dáwn tihna a nih chu."

"Tluanga chaw eiah ka sâwm thei ang em?"

"I duh phawt chuan. Mahnia ei ai chuan a zia ngawt ang. Chuan,ka ngaihtuah lo sawt bawk ang che."

Tluanga pawh chu a lo phûr khawp mai. Hostel-a awm a ni a, a ei duhzáwngte a ei khât avàngin chaw ei chhuah chu a lo châk chiang khawp mai.

"U, i la râi lo ti raw?"

"Aw, tinge min zawh a?"

"I la râi duh rih lo tihna a ni maw?"

"Teuh lo mai, ka indang lo hrim hrim alawm."

"E, fa neih in la duh lo emaw ka ti alawm. Chuan, i chawhmeh siam hi a tui lutuk ringawt, ka lei ka lem tel țêp a ni."

"Ei țeuh rawh, in ei khàt ém kha."

Riak ve nghal tùrin ka ti leh tawp, Mahlima ngaih dan a nih loh hrãm ka beisei.

Mahlima lo nghah pahin tiin khumah ka mu mai mai a, ka lo muhìl sek a ni ang, țawng bul bul riin min tiharh a.

Dâr zât ka en a, dar 10 a pèl chauh. Țawng ri ka hriatna chu sitting room lam a nih ka ring, zàwi muangin kawngkhàr chu ka hnaih phei a, kawngkhàr chu a inkhãr phui lo a lo ni a.

Ka'n ngaithla a, mi pahnih an ni tlat. Tluanga a la mu lo tihna em ni? Mu tùr khán a chho daih tawh kha a ni si a.

"Zanin kha chu a nuam angreng ka ti."

Rohlua țawng ri a ni tlat!

"Ni dangah i tel ngai loh vàng mai mai a nih kha."

"Zanin kha chu an ngam huai ka ti khawp mai. Mipa ngam chu an ngam ve zêl a nia."

"Tùnlai hmeichhiate chu maw, mipa aiin an huai záwk."

"Min sâwm leh a nih chuan rawn kal leh pawh ka hnial miah lo vang."

An nui hawk hawk a.

"Mahse, hriat loh ka nei nual tawh a, mikhual chan ka chang deuh tlat tawh."

"Inhriat vek a ngai chuang hlei nem."

"Lucy tluka khal hi chu an awm thei tak tak lo a nih dáwn hi. Zaninah pawh khan a'n khal lehpekzia kha."

"I duh em? Ka lo sawi dáwn em ni ang?"

"Khai, a tihchi loh viau ang. Lucy chuan nangmah chauh alawm a ngaihven le. Zanin pawh kha..."

Hm, Lucy chuan a lo ngaizawng chiang a ni maw? Ka rinhlelhna kha a dik chiah a nih hi. A lo bia pawh kha a àwm reng a lo ni; mahse, Mahlima hian a ngaizawng lêt ve kher lo thei tho bawk.

Ngaithla duh tawh lo chuan bathroom-ah ka lût ta daih a, zanin an party chu nuam an ti dùn hle mai. Ka kal ang tih ka hlau ta hnuhnawh, ka zak hrim hrim ang.

Khumah chuan muhìl thei tawh lo chuan ka let tawn sek a, Rohlua haw hnuah chuan thãwm dìm takin a rawn mu ve a, min rawn kuah sat sat a.

"Hm, min lo muthilhsan daih a, mut hi chu i duh ve a ni ti raw?"

Zanin chu tluk loh rim a nam miah lo nia.

"I lo thlenna a rei tawh em?"tho phang aw ang thei ber tùrin ka aw chu ka'n tiphak vel a.

"Um, rei ve deuh. Rohlua a lo pêng lawk a. E,zanin chu engmah ka in miah lo a nia. A chhan chu a rim kha i ti thei si lo va."

"Ka lãwm e aw; mahse, ka tihpalh, ka lo muthilhsan che avàngin. Muthilh kha ka tum bîk miah lo a nia."

"Pawi lo,mut i duhzia ka hria alawm."

"Chuan, Tluanga kha ka riahtír leh mai asin."

"A țha, nangmah chauha i awm hi chu ka ngaihtuah viau țhìn che a, ani a awm hlauh chu a tihzia ka ti khawp mai."

"A nuam bawk em?"

"Nuam a ni ve mai. Awm ve la, a nuam lehzual ang."

Rinhlelhna rilru ka put chuan keimah ka intihrehawm mai mai, ka man chiang fak te a nih ngawt loh chuan.

"Aw, a nuam a nih chuan a țha a nih chu. Muhìl tawh rawh, a tlãi tawh."

"Ka fâwp phawt ang che."

Nula dang a fawhna hmui ni lo hrãm rawh se.

Tûkțhuan kan ei laiin,"Rohlua hi i kàwmngeih viau em?"tiin, a thuphungin ka zâwt a.

"Ramhluna tih lohah chuan ka kawm ber a ni alawm, engtizia nge ni a?"

"Ka zâwt mai mai che maw le."

"Ani pawh hi nupui neih a hun ve tawh, zawnpui loh chuan tlangvâl senior a ni mai dáwn."

"A hmu zo àwm hle si a?"

"Ka hre tawh bîk lo, ka hriatah chuan han biak ve deuh pawh hi a la nei lo."

"A duh tak a la hmu lo te pawh a ni ang chu."

"Chu pawh chu a ni thei tho."

Room-a a insiam laiin,"E, ka theihnghilh țêp, naktuk khi Bobo-a birthday a nia,"a ti phawt a, ka chhàn loh avàngin," Zànah lawm an tum a, i peih chuan kal ve ila,"a ti leh a.

"A țha alawm."

"I duh loh chuan kan kal lo thei tho alawm; mahse, kal ta la, nuam i ti lo miah lo vang."

"Engvàng tehngawt chuan maw?"

"A nuam dáwn a. Chubâkah, Bobo-a chu i ngainat ve tho kha."

A dik reng. Bobo-a hi ka pasal fapa a nih vàng pawhin ka ngaina a, fa kan la neih loh vàng leh a ngainatawm bâkah, a lainatawm vàng pawhin ka ngaina a ni. Chuan, a fapa birthday-ah chuan a pa hi a tel ngei a ngai bawk ang chu. Ka tel lo chuan a sawi dan hmangah hi chuan kal a tum loh hmèl si a, a kal loh chuan ka tân a nuam dáwn miah lo, min dem palh ang.

"Kan tum dáwn nia, i kal ngei ngei a ngai alawm. Gift tùr erawh i ngaihtuah mai loh chuan."

"Ngaihtuah buai a ngai lo ve."

*****************

Zemabawk lamah daih an awm emaw ka ti a, a lo ni miah lo. Chhinga veng lamah a ni, kan tlàn daih ni.

"Zemabawkah an awm tawh na nge?"

"Awm tawh nâng."

An in chu a țha kher asin. A hmun a rem fahran lo nain an sa rem thiam khawp mai. Páwn lam aiin chhûng lam a nuam zui, an hausa a nih dáwn hi.

An chhûngte leh țhenrualte an lo awm nual tawh a, Bobo-a pawh a lo nalh kher mai. A pa a rawn hmuh veleh chuan," Papa!"tiin a rawn tlãn a, a rawn pawm chat mai. A lo ngai leh viau hman tawh a ni ngei ang.

Ka rin aiin nuam ka ti daih mai. Bobo-a hlim hmél mawlh chu hmuh a nuam, a hmelțha reuh bawk si a, a pa mal chungah hlír mai a ni, a tâp ni.

"Bawihtea hi chuan a pa hi a ngai thei a nia, a pa hi a rawn tel thei lo vang tih a hlau lutuk a."

Ka bulah a rawn țhu a, a chhiat loh ngaiin a la chhe lo reng. A hmél hi a fuh ve thlâwt, a ngo ém ém zui. A piang vànnei bîk teh e.

"Bobo-a hlim hmél hi hmuh a nuam khawp mai."

"A pa bula a awm tawh hi chuan nuam a ti ém ém mai a ni, min hre chang tawh ngai lo."

Sawi ve tùr pawh ka hre lo.

"Mahlima chungah hian ka lãwm tak tak a ni. Heti khawp hian a duat a, kan ințhen hnuah pawh a la ngaihsak ém ém reng a."

"A fa a nihna a bo chuang hlei nem."

Inthlahrung hmél a pu deuh tlatin ka hria.

"Mahlima pawhin a ngai thei alawm, a fa hmasa ber a nih bâkah mipa a la ni zui a, a làwmawm dan tùrzia chu. Bobo-a lah a lo fel reuh bawk si, a ngaihawm ém asin."

"Thu dik tak chu,"tiin a hawi kual phawt a, chutah, zàwi sap hian,"Bobo-a hi a fa a ni hlei nem,"a ti ta a.

Ka thil hriat zet chuh!!!

Ka hriat sual emaw tiin Mapuii chu ka en vat a, ani chuan," A dik alawm. Kan hriat tirha min țhàwnzia chu, a thinrim lutuk a, kâr khat chhûng chu min be duh lo alawm,"a ti sap sap a.

Mak ka ti lutuk ringawt. Mahlimate pahnih inchhaih chu ka en phei a, tumahin pafa tak tak an ni lo tih réng an hre lo ang.

"A fapa a nih reng hi."

"Um, a fapa a ni; mahse, thisenah inzawmna an nei lo thung."

Sawi tùr ka hre lo, ka thu hriat chuan min shock tak zet a ni. A fa ni si, a fa ni bawk si lo. Engtin nge a fa a nih loh theih?! Kha leh chen fapa angin a en ngei ang a, tunah pawh a fa a ni lo tih a la sawi réng réng lo.

"Ka thu hriat hi awih a har ka ti hle mai!."

Thâwk a la huai a.

"He thu hi i lakah ka zêp thei lo. Ka hrilh loh che chuan ka inthiam thei dáwn lo tlatin ka hria a, i lakah hian ka inthlahrun ém ém rualin Mahlima lakah pawh ka inthlahrung tho. A fapa ni miah lo mah se, a fapa a ni lo tih hi a sawi lang ngai lo. Chubâkah, a fapa dik tak angin a duat a, a hmangaih ém ém reng bawk. Hei vàng tak hian Mahlima hi ka ngaisâng a, pasal țha tàwp a ni ang tih ka ring tlat a, ka làwmpui ém ém che a ni."

He tiang hi thil awm dan a nih chuan Mahlima hian engatinge engmah min hrilh ve miah loh le? He pa hi chu thil réng réng, zawh loh chuan engmah min hrilh ngai lo, thurûk a lo ni a nih pawhin min hrilh ve mai àwm. Ka sawi chhuak bîk àwm tawp si lo.

"Mi fel famkim chu a ni bîk lo tawp ang; mahse, i tân hian a rinawm tih ka hria a ni. Inhual hming kha kan pu ve ngei a, a tân chuan engtihna mah a ni lo."

Haw kawngah chuan zawhna hlîrin ka khat țûn a, zawh țan dan tùr erawh ka hre lo.

"Nuam i ti em?"

"Ti tho, ti lo tho."

"Eng nge a awmzia?"

"Ka rilru a buai."

"Eng thil nge thleng ?!"

"Thil tam tak."

"Min hrilh duh ang em?"

"Min hrilh duh záwk ang em?"

"Eng thil maw?"

"In thlen hunah aw."

Ka za zek zek maiin ka hria. A bul tê ațangin, a tàwp rãt thleng chipchiar takin ka hre duh, ka zâwt vek ang.

Zàn mutnaah ka zâwt ang ka ti nain ka nghâk thei lo. In kan luh veleh chuan,"Thil awm dan dik tak min han hrilh teh,"ka ti tâwng ringawt a.

"Eng thil nge maw ni le?"

"Mapuii kha engvànga nei nge i nih?"

"Ka fa a pãi miau a."

He pa hian engtik thleng nge dâwt hi a la sawi zel dáwn?

"Thu dik takin min chhâng rawh."

"Thu dik a ni, a rài vàngin ka nei."

"Mahse, i fa a pãi si lo va?"

"Eng thu nge sawi i tum? Bobo-a hi ka fapa a ni."

"I fapa a ni; mahse, thisenah in inzawm si lo."

Min en vang vang phawt a, chutah, a maimichhîng leh vang vang a.

"Engtin nge i hriat?"

"Mapuii'n min hrilh a ni."

A țhutna ațangin a tho chhuak a, a vei chhên a, a ngawi reng bawk si nèn, a thin ka tirim ta emaw ka ti hial.

"Bobo-a hi ka thisen zawmpui ni lo mah se ka fapa a ni."

Hm, a dik ang. A fapa ni lo anga sawi chu a duh miah lo ang.

"Delhi-a lehkha zira ka awm lai khán zan khat chu kan party a, ka thil in tùrah khán eng emaw an lo pawlh a ni ngei ang, engmah ka hre lo. Ka harh meuh chuan room pakhatah Mapuii nèn, khum pakhatah kan lo mu dùn reng mai a, ruak ve vein kan lo mu bawk. Ka harh hmasa záwk a, ka kalsan chuan a mualpho lutuk dáwn si. A harh thleng ka awm a, a lo harh chuan a buai kher asin, ka khawngaih hle bawk. Kan chesual nge chesual lo kan hre chhuak thei lo ve ve. Thla khat hnuah min rawn phone a, a rãi tih min rawn hrilh laia ka rilru buaizia kha. Ka fa a ni lo ang ti dáwn ila, engmah ka hre chhuak thei bawk si lo, ani lahin mi dang rinhlelh leh puh tùr a hre miah bawk si lo va. Ka rilru buaizia leh hahzia kha, i hnéna rawn insawifiah tuma ka rawn phone che lahin ka phone i chhâng duh si lo. Khatih lai kha chuan thi daih ila ka ti țhin tak tak a ni."

Ka khawngaih lutuk a, ka en ngawih ngawih ringawt.

LALHLIMPUIA - 23 By Dingdi Pachuau

"Mahse, ka dem miah lo che. I tân hriat thiam a har tùrzia kha ka hria a, min be duh lo leh min haw ém ém mai kha ka hre thiam che a ni."

"Mahse, vawi khat tal ka insawifiahna kha chu min ngaihthlâksak ve ka ring țhìn asin. Ka tihdik loh a ni tih chu ka hria, party-a kal lo khán lo awm mai mai záwk ila tih pawh ka ngaihtuah; mahse, engkim a thleng vek tawh. Mipa dik tak anga ka mawhphurhna chu ka hlen ngei a ngai ta a ni."

"Nupuia neih ka tum ràn rân lai chea mi dang ka nei daih mai chu mang chhia dik tak a ni ringawt. Mapuii hi a fel ém záwk a; mahse, chuti chung pawh chuan ka tân chuan a harsa ém ém a ni."

"Ni tin, nangmah ngaihtuah reng chung chein hun ka hmang ral a, i laka ka thu tiam ka hlen thei lo kha hrehawm ka ti ber țhìn. Kan inneih ațanga thla hnih thum chhûng kha chu mi ã ang maiin ka tãlin ka ring."

A thu sawi chu ngun takin ka lo ngaithla kar a, dâwt a sawi ka ring lo réng réng.

"Mi ngaihah chuan Mapuii nèn chuan nupa kan ni; mahse, vawi khatmah nupa nun ka chènpui lo."

"Mahlim..."

"Ka'n sawi zo phawt ang e. Ka theih ang angin ei tùr țha leh damdawi, a mamawh réng réng erawh ka pe vek. Ka rilru erawh a nei thei ngang lo a ni, ka rilru hian a phatsan thei lo che."

"Bobo-a kum 4 a tlin dáwnah a damlo ta a, damdawi ina kan awm laiin ka thisen zawmpui a ni lo tih ka hre chiah. Mapuii kha ka dem viau a; mahse, dem viau ringawt theih a ni bîk lo tih ka hre chhuak a. Țha deuhin kan ințhen ta a ni. Bobo-a hi fahrah leh sâwn nihtír erawh ka phal miah lo, a pa ka ni reng tho. A țha thei ang bera enkawl hi ka duh a ni."

Ka ding chhuak a, ka hma lawka mipa, ka hmangaih leh duh ém ém ding reng chu hnung lam ațangin ka kuah a, a taksa insangmar tlat chu ka hre thei nghal a.

"Honey, ka hmangaih che."

Min koh țhin dan angin ka ko ve a ni.

Ka kut chu a lo chelh ve a, zàwi sup hian,"Ka hria asin, chuvàng chuan alawm ka rûk bo daih che ni. Hmangaih miah loh neih râpthlâkzia ka hre chiang si a, chuti ang paltlang ve lo tùr chuan ka duh che a."

Ka pasal hi ka va duh chiang tak vawng vawng ém!

"Min rûk bo avàng khán ka lãwm e." A vawi khat nân làwmthu ka hrilh ve ta. Min rûk bo vàng khán làwmthu hi ka hrilh ang tih ka ring pha lo reng reng.

"Min ngeizia kha i la hria em?"

"Ka ngei tawh lo che."

Ka lam hawia rawn inherin,"Ka hria asin, min ngei reng dáwn lo tih ka hre sà a ni,"a ti sar sar a.

"Engtin?"

"Ka hria a ni tawp mai."

A biang sum lang leh kalh țhìn chu khawihsakin,"Hei hi ka duh thei ngawt mai,"tiin ka dingdihlîp ãk ãk a, a lu kuai kûn pahin a biang sumah chuan ka fâwp a.

"Fapa nangmah ang hi neih ka duh."

"Kan nei mawlh ang."

Min pawm kãng nawlh a, room lamah min luhpui ta nghal a. Khumah chuan dìm têa min nghahthlâk pah chuan,"Zanin chu hlawhtling ngei tùrin aw ni ang,"a ti thâm sup a, ka nuih a za kher mai.

"Haha, ti chiah ila?"

"Nui mai suh, lo chhinchhiah tlat ang che."

Kûn hniamin râwp zetin min rawn fâwp a, kei pawhin ka lo duhthawh kher mai. Infâwp pah chuan kan thawmhnaw chu kan inphelhsak nghal mawlh mawlh a.

Nupa nun hlimawm leh dangdãi tak kan chen zawh hnu chuan chàu zet hian ka bawk thlar a, ka thahrui zawng zawng hian min chhuahsan vek ni maiin ka hria.

"I chàu viau a ni maw?" Ka bân chu a chûl hauh hauh a, ka lam hawiin saisîr záwngin a mu thung a.

"I chàu ve lo em ni?"

"Naktûk ațangin ei tùr țha ber ber kan lei ang."

"Ka thau over mai ang."

"I khal belh sauh dáwn tihna."

"Nau ka pãi dáwn tawh si a,nau pài leh khal belh sauh chu a va inrem dáwn lo ve..."

"Rem dáwn lutuk. Ka fa ngei i han pãi a i dul puar tùr chu ka va hmu châk tawh che."

"Ka chhe ngawt ang chu."

"Ka mitah chuan ni lul lo ve."

Kan ngawi deuh vang vang a. A kut chuan ka hnung a rawn chûl leh riak riak tawh a, ka mûr leh ar ar ta mai.

"Ti ta daih ila, Mapuii nèna in thurûk hi mi dangin an hre ve em?"

"Hre lo. Mapuii, nang leh kei kan nih tâk chu."

"I fel ve ngawt mai."

"Ka hawisan ringawt thei bîk lo a ni."

"I fel ka tih rêng chu."

"I lãwm em?"

"Engah maw?"

"E, pasala min nei hi maw le."

"Lãwm lutuk ringawt."

"I làwmzia chu chêtziain han tilang la?"

**************

Tunah chuan ka pasal thuin dàwrah ka kal ve țhìn ta. Ka dìl tirh chuan a phal lo nasa a, ina lo awm mai mai tùrin min ti a; mahse, khawhar ka chhuanlam ve tlat a, a phal ta hrãm a ni. Ina awm tlawk tlawk kha chu a nuam ka ti vak lo va, mi chinchâng hriat ve pawh ka duh a ni. Tuna ka kalna dàwr hi Mahlimate tã tho a ni a, thawh tùr a awm phei chu a ni lo; mahse, kal hi a nuam ve hrim hrim. Ni tin ka kal dáwn lo va, kár khatah ni thum kal min phalsak a ni.

Tûkțhuan ei khamah Mahlima rualin ka chhuak a, chawhnu lamah erawh ka hãw hma thung. Ani ka nghah chuan ka hãw tlãi dáwn riau a; chubâkah, a lo hàw laia ina lo awm hman tawh ka duh hrim hrim bawk.

Ni khatnaah chuan a hminga dàwr neitu nupui ka nih vàngin min zah a, nuam an ti vak lo nia ka hriat avàngin ka țawng bawrh bawrh a,tlêm chuan an zia deuh. Ni hnihnaah chuan an zum lo ta deuh a, upa lutuk an awm lo bawk nèn, an thothãng a țha hlawm khawp mai.

Dàwra Rohlua rawn lût ka hmuh chuan mak ka ti kher mai. He pa hi ka ngaina tehchiam lo ta tlat nia, min fakna țawngkamte hi ka làwm miah lo. Ka rilru dik tâwk loh vàng pawh a ni ang, bihrûksan tak ka nâp chu le.

Dàwra thawkte'n an lo biak tâk liam liamah leh a hminga an lo ko thei tih ka hriat chuan tlêm chuan ka ngaih a ngam deuh. A bula awm tam loh hi ka duh a, Mahlima țhianpa ni lo phei se chuan biak loh vang vang ka duh; mahse, thil mawi tak chu a ni lêm lo.

Min biak loh chuan ka be lo ang ka ti nain min rawn biak tâk miau avàngin ka be lo thei lo, ka va phûr fahran lo tak ém!

"Sarah, eng nge i tih ve a? Ni dangah ka hmu ngai si lo che a."

Za lo deuha nui chungin," Kan dàwr a ni alawm, ka kal ve ang chu,"ka ti a.

"Ka nupui chu ni la, ka kaltír phal miah lo ang che maw le. Țhiana hi chu aw..."

"Kal ka duh vàngin min phalsak chauh alawm."

Ka ngei reuh kher kher mang e.

A ãwl ber ka nih vàngin ka kàwm lo thei lo. Mahlima ţhianpa ve ber a ni a, ka ngei ringawt tùr a ni lo ang. Ngei loh ka tum tùr a ni, thil harsa deuh pawh a ni chuang nâng. Amahin min ngei ve loh phei chuan mahni ka intihrehawm thlàwn mai mai a ni.

Dàwrah chuan a lo kal ve reng reng țhìn a lo ni. Dàwra thawkte chuan an nêl viau a, pu ber țhianpa a ni tih an hriat hma ațang tawhin an lo hre tawh hlawm a ni àwm e. A fel an ti a, a châng phei chuan lunch a treat hlawm țhìn a ni àwm e. A ti țha phian ka ti a, ka lo ngei ve ringawt pawh chu ka inthiam lo lek lek záwk hial. Dàwra ka awm laia a lo kal pawhin ngei loh tumin ka be hrãm hrãm a, ka duh loh záwnga min fak tawh lêm loh avàngin ka be thei ve ta tial tial mai. Ngei loh ka tum be tlat a, ka tum chuan ka tithei ngei ang tih ka hria a ni. Mahlima țhianpa ber a ni a, ka ngei tlat chuan Mahlima tân pawh a nuam dáwn lo va; chubâkah, ka chungah a sual pawh a ni chuang si lo. Ka nuin min hrilh fo țhin 'Mi ngei neih chu mahni intihhrehawmna' a tih kha, ka rilruah ka vawng reng tùr a ni.

Tlai khat chu Mahlima rawn thlen hmain a rawn kal leh tlat pek a. Amah lah chuan," In pa a lo la thleng na nge? Ka be zo deuh chiah a, ina thleng tawh biakin min rawn be sia,"te chu a la ti záwk a, ka hre thiam lo ve.

"Thil pawimawh sawi dun tùr kan nei a."

"Lo nghâk rawh, a lo thleng țêp ang."

"Thingpui hâng ka in thei ang em? I buai viau loh chuan."

Ka lumsak a, Mahlima rawn haw pawhin a duh tho ka rin vàngin ka lum deuh nual a.

Ka rin aiin a lo thleng har tlat. Ni dang chu ni se, a lo thleng daih tawh ang. A lo thlen a hun tawh si a.

"Țhiana mai mai chuh, a phone a pick thei bawk si lo. Lucy'n a ko leh tlat a ni pek ang."

Țhian an ni a, an inhre chiang viau ang chu.

"Ka nghâk tih a hre reng àwm si a, he pa hi chuh, nula țawngkam țha a hnial phal lo a nih chiah hi. Ka hawsan mai ang, tih tùr dang ka la nei bawk si a,"tiin a tho a,"A lo thlen hunah min lo phone teh se aw, a pawimawh si a,"a ti leh a.

"Aw, la nghâk rih la, a lo thleng țêp ang chu?"

"Ka hmanhmawh tawh tlat, kalna tùr dang ka la nei bawk sia."

A lo thleng tlai viau a ni.

"Vawiin chu i rawn tlãi riau mai, phone i pick thei si lo."

"Ka phone a thi daih alawm."

"Rohlua'n a nghâk reng che a."

"A ni maw? A va zia lo ve aw."

"I phone nghal thei ang em? A sawi pawimawh viau si a."

"Aw le."

Room-ah a lût ta nghal a.

A rawn tlài chhan a sawi miah lo. Rohlua sawi kha a dik tihna em ni? Lucy-te inah pêng kãwi ni ta se, sawi hrehna viau tùr a awm em ni? Eng emaw thil a awm a nih ngawt loh chuan.

Ni lo, ka pasal hi ka ringhlel tùr a ni lo. Ka tân a inserhhranna zozáite kha, ka theihnghilh tùr a ni lo. Lucy chu a thawhpui a nia, lo thlah ta tehreng pawh ni se, a remchâng ve a ni mai a. Mahlima hian min phatsan lo tawp ang, min phatsan dáwn ni se, hun a ngah lutuk tawh.

Ngaih țhat lohna rilru pu duh lovin pângngai takin ka bia a, ani pawh a awm danah danglam a awm chuang lo.

Zànah kan mu hma deuh a, chhùn lama dàwra ka kal ve hian a boruak hi ka zo lo deuh țhìn em aw ka ti, ka lu a na deuh bûr ziah. Zanin pawh kan mu deuh chiah chu mit ka chhîng vang vang phawt a.

"I nuam chiah lo em ni?"

"Aih, ka țha e."

"Dàwr i kal ve hi a boruak i zo lo a ni lo maw?"

"Ni lo ang, nuam ka ti alawm."

"I tuar phah dáwn chuan ka phal miah lo a nia."

Kan in boruak leh dàwr boruak chu a dang ve ém a ni. Inah chuan tumahin min chîm buai lo va, a boruak a zãngkhãi a, dàwr ve thung chu... Mahse,ina awm tlawk tlawk chu ka țangkai tlêm ém mai.

Sunday tlaiah ka pite inah chaw kan ei a, an chhûngkua an lo kim țhap mai. An puitling tlâng a, an zahawm khup maiin ka hria. Min lo làwm thiam a, ka pi leh pute phei chuan min lo ko chûl mai.

"Chanchin thar, a țha lam hriat tùr a awm tawh em?" Ka pi chuan nui sâng hian min zâwt a.

"La awm lo deuh, ka pi."

"Ka pi, i hmanhmawh a nih kha. Kan pahniha hun thâwl neih kan la kham hlei nem maw le," Mahlima chuan a lo ti vat a.

"A, tu hmél hmuh a châkawm tawh alawm. Hei, i unaute lah hian neih an la tum hmel loh si a, nangni tal hian kan dam lai hian neih tum ngei ngei r'u."

Baby-i chuan," Bobo-a a awm reng tawh alawm,"a lo ti zauh a. Rang deuh hian,"Ni e, Bobo-a a awm tak alawm le, a hmelțha reuh bawk si,"ka lo ti ve vat a.

"Niminah U Mapuiite chu ka hmu zawk a, ka be hman lo va."

Mahlima chuan ka kuta chelh pahin,"Baby-i idol chu U Mapuii a nia, in hmél pawh a inang deuhin ka hria,"a ti a, a nui pah deuh a.

Baby-i lah chuan,"U Mapuii chu a hmelțha ém asin, ka ang teuh lo ém mai,"a lo ti leh zãrh zãrh a. A sawi dik chiah, Mapuii chu a hmelțha chiang alawm, hmelchhia ti an awmin ka ring lo.

"U Mapuii kha chu ka ui ngawt mai."

Kan hàw kawngah chuan Mahlima chuan,"Baby-i thu sawi kha chu la thu tak viau suh aw, nuam tih loh nân i lo hmang mai mai ang e,"a ti a.

"Mai mai a,naupang mai a la ni a; chubâkah, Mapuii a ui ve a ni mai a, thil dik lo a sawi hlei nem."

"I fel e."

***************

"Honey, ka lo hãw tlai deuh dáwn a nia, meeting pawimawhah ka kal dáwn a. Zanriah min lo eisan mai rawh aw."

"Aw le, dâr engzâtah nge i lo hàw theih ang?"

"Dâr 8 vêlah a nih ka ring."

A tel lo va chaw ei hi ka ning ngawih ngawih, nghei a phal bawk si lo.

Chaw ei khamah chuan Mahlima nghah pahin TV ka en a, news ka thlîr mai mai a.

Rohlua a rawn lang leh hlawl mai.

"Țhiana a awm ang ti raw?"

"Meeting an nei a, a awm lo."

"Eng meeting nge ni ngai?!! Kan thawhpui țhìn Mickey-a ka rawn hmu zo chiah sia, meeting nei ni se, tel ve àwm tak a ni sia?"a ti nang nang a.

"Ka hre lo le."

Ka piah sofa-a țhut pah chuan,"Nula nèn meeting an nei a ni lo maw?"nui chung hian a ti a. He pa hian fiamthu a duh a, a thil sawi tam tak hi fiamthu ni mah se, thil ni thei àwm deuh deuh hi sawi a hrât viau tho.

"A ni maithei a ni."

Thil ho mai mai a sawi a, fiamthu a thawh bawk a. A zia phian, Mahlima lo nghah chhûng pawh a rei lo sawtin ka hria.

"Hei nèn hian alawm inang ka tih țhin che. Mahse, he nu hi chu a lian deuh hlek."

A phone chu min rawn pe a, nula chhe lo zet thlalak ka hmuh chuan mak ka ti angreng. Kan sam chu a inchen khawp ang, kan pian pawh a inang; mahse, thlalak ami hi chu a khal mah mah, a sâng záwk bawk. Tin, a hmel a chhe lo hle bawk.

"Tunge ni a?"

"Lucy, company-a ka thawhpui țhin. A chhe lo thei teh a nia."

Hei ngei hi a nih hi, Mahlima lo phone-tu kha. A chhe lo hle si a, Mahlima duh chi takin a khal ém ém bawk. Kei pawh hi khal min ti hle țhìn a; mahse, Lucy zet zawng, ka tluk lo hle mai. Lucy chu kei aiin a chhe lo fê a, a khal ém ém a, hna thawh nei, mahni inchãwmzo a ni bawk. Mipa duh tinrêng a ni kim vek a nih ber chu.

"A va chhe lo ém ém!"

"Chuvàngin alawm in pa hi vêng țha rawh ka tih. A hmeichhia záwkte'n min beisei phei chuan maw, mipate hi chu kan ãwn ruai ruai mai zêl asin."

"Mipa in inang vek kher nâng."

"I hre tlêm ém mai. Nia, Mahlima chu a insûm thei alawm; mahse, mipa a ni ve tho."

LALHLIMPUIA - 24 By Dingdi Pachuau

A țhianpa, ka pasal hi ringhlel se min ti tihna em ni ang?

"Ka pasal chu ka ringhlel dáwn tihna em ni?"

"Ni nâng. Thil awm thei ka sawi a nih chu, tùnlaiah hi chuan fîmkhur a ngai tawh ém a."

"Eng lakah maw?"

"A, eng khawvelah nge maw i lo chèn bîk le?! Nang hi chu khawvel sualna hian a chîm phâk ve lo che a nih àwm hi. Tùnlai khawvelah chuan tu nula tlangvâl mai pawh hian nupui pasal nei tawh pawh 'Pawmlai nei a nih hi' tiin an kiansan duh tawh hlei nem, an duhzáwng a nih phawt chuan engmah an pawisa lo."

"Chûng zîngah chuan i tel ve loh hrãm ka beisei."

"Huh, kei chu ngaihzáwng ka nei ngai hlei nem."

"A țhat chu, nang chu i fihlîm tihna a ni mai alawm."A phone chu ka pe lêt nghal a.

"Hmeichhe rinawm ka hmuh hunah chauh ngaihzáwng ka nei ang."

"An tam ang chu."

"Ka la tawng lo a nih ka ring."

"I la tawng mai ang."

"Nang anga khawvel sualnain a tihnghìn loh, mi rinhlelhna châng pawh hre lo ang hi ka tawng ve ang em le?"nui chungin a ti a.

"Min faknaah ka ngai mai ang e."

Mahlima pawh a rawn thleng ve ta. Rohlua a hmuha a makti hmeźl chu ka hmu zawk a, rei erawh a ni lo.

"I lo hãw har lutuk a, Sarah-i pawh a awm a nuam thei hlei nem, police kan phone hman țêp a ni."

"Fiamthu a nih pawh ka ring lo e."

Ka lo inrawlh ve vat a.

"I chàu em? I țhu rih dáwn nge i inbual nghal dáwn?"

Min en vang vangin,"Rei lo tê chu ka'n țhu rih ang e,"a ti phawt a, Rohlua lam hawiin,"Nula ina i lèn ka ring a,"a ti leh ta a.

"Ka lêng ngai lo tih chu i hriat ve reng kha."

Room-a ka luh daih avàngin an țawng chu ka hre chhunzawm thei ta lo va. Zanin chu a thuphungin Lucy chanchin ka zâwt ve hrim hrim ang.

Rohlua chu dâr 9-ah a haw a, a haw hnuah chuan Mahlima chu bathroom-ah a lût ta nghal a. Kei erawh chu choka lamah, fridge-a ei tùr dapin ka zâi pah rât rât a.

Lachu chu bowl-ah dahin sitting room-ah ka phei leh ta a, Mahlima lo chhuak nghâk pahin TV ka thlîr bawk a.

A lo chhuak har hle mai. Ani hi a chàu viau em ni le?

Room-ah chuan ka lût a, ani chu zan dang ang lo takin, khumah chuan a vãng tan záwngin a lo mu zuah a, mak ka ti viau mai.

"I chàu hle a ni maw?"

"Sarah, Rohlua khán eng nge a lo tih?"

"A lo lêng ve a ni ang chu."

"Nula i ni tawh lo tih hre tùr a ni asin."

Mahlima ngaih dan chu ka hre thiam lo lek lek mai. A țhianpa a ni a, a rawn lêng ve a ni mai a, huat tùr a awm lo. Nula ka ni tawh lo tih chu ka hria asin; chubâkah, Rohlua hi Mahlima țhianpa a ni a, engtin nge ka tih chuan ang? Nula rìm pawhin min rawn rîm lo tawp ang, pasal nei lai ka ni tih a hre ve bawk ang chu. Mahlima hi zawng hriat thiam a ngai, mipa ka biak hlek chuan a thîk ziah. Hei, a țhianpa pawh a thîk mai a nia. Vawiin a hun hman a fuh vak lo pawh a ni maithei a ni, zãwldawh taka ka biak a ngai a ni. Lucy chanchin phei chu sawipui chi miah loh, naktûk lamah ka sawipui záwk ang chu.

"Vawiin lam i chàu a nih ka ring, mu țha la?"

"Nang pawh lo mu ve nghal la."

************

Lucy chanchin chu ka zâwt ta rih lo. A thawhpui a ni a, a phur hàwin a motor-ah chuan a chuang ve fo tho ang chu. Ka ringhlel duh lo, ka pasal hian min duh tih ka hria a, mi dang lakah a inhambuai duh lo tawp ang.

Hun a kal chak viau mai. Tunah chuan dàwrah pawh min nêl tawh khawp mai a, ka bulah pawh an țawng bawrh bawrh ve ta hlawm. Kei pawhin nuam ka ti ve tawh hle a; Rohlua lo kal erawh biak dan tâwk ka thiam a ngai, Mahlima'n a thîk deuh tlat si a, ka invèn thiam a ngai.

Ani lah hian engmah a hre lo a ni chêk ang, lo kal pawh a țhulh chuang lo. Mahlima awm laiin lo kal se ka ti țhìn; mahse, a lo kal zut pawh a ni chuang lo. A school bâng a lo pêng hi a ni deuh mai a, min rawn tlawh ve hrim hrim a ni mai.

Mahlima lakah hian a châng chuan ka inthlahrung lek lek, fa a duh ém ém laiin kei lah hi ka la puar thei si lo. Dik lohna kan nei a ni ang tia kan in-check lah khan dik lohna kan nei lo ve ve si. Kum khat dáwn kan lo innei ve ta a, a rûk chuan ka mang a ang țan tawh a ni. Nula dang a melh daih ang tih ka hlau.

Tlai khat chu Bobo-a a rawn hruai hãw leh a, a birthday zàna ka hmuh bâk kha ka hmu leh tawh miah lo va, tlêm chuan a lang thau ve ta deuhin ka hria.

"Bobo, i dam em?"

"Sarah, sikul ka kal ve asin."

"A ni maw? Pâwl engzât nge i nih a?"

"Pâwl thum."

"E, i va pâwl sâng tawh ve! Sikul chu a nuam em?"

"Nuam lutuk, lo kal ve la?"

"Dàwr nghah ka ngai a."

Ka ngaihbel vàng nge, zanin chu Mahlima hian a duat zualin ka hria. A rila rah fa ni lo mah se, a fa ang chiahin a en tih chu ka hria. Kei hian fa ka la hrinsak si lo, fa chu nei ta ngat ila chuan...

Rohlua a rawn lang leh hlawl mai. Mahlima a awm a, ka rilru a nuam huai. A chhan chu a awm loh laia a lo lên chuan Mahlima'n a hre thiam lo ang tih ka hlau tawh a ni.'Lo leng tawh suh' tih ringawt chi a ni bawk si lo, awm dan thiam a har.

"I fapa hi chuan a chhùn lo ve ngawt mai che."

"A nu a chhùn záwk miau a."

Bobo-a chu Mahlima chuan a pawm a, ani lah chuan a pa khabe hmul chu a zût a zût a.

"Sarah, news a awm tawh em?"

"Eng news maw?!"

"Bobo-a chhang tùr chungchâng maw le, i la thêp zaih reng mai a."

Mahlima chu lo inrawlh vatin,"Kan hmanhmawh lêm lo, kumte han vei phawt se,"a lo ti vat a, ka thaw huai mai.

"Fa neih thuai thuai hi a țha asin, nupa nun a tinghet bîk alawm. Fa han nei chiah mah teh u, tùn ai hian in hlim sawt mai ang."

"Thil hre ber leh paltlang tawh àwm ang berin sawi teh suh."

Ani chu a nui var var a,"Paltlangin tawng lo mah ila, thil nih dan phung alawm,"a ti thung a.

"Nupui zawng ve tawh rawh,"tiin ka lo inrawlh ve a.

"Ka duh uluk ém alawm."

"I tlai mai ang."

Mahlima phone chu a rawn ri a, ka bula țhu a nih vàngin a phone screen-a hming inziak chu ka hmu hman, Lucy a ni.

"Bobo, lo țhu lawk rawh aw, phone-ah mi ka'n be lawk ang e,"tiin a tho a, choka lamah a lût ta nghal a.

"A va pawimawh dáwn ve! E, thuràwn pêk che ka duh. Țhiana hian i bulah fa neih thuai ngai ti lo mah se neih thuai a țha. Mipa chuan fa neih thuai thuai kan duh tlângpui."

**************

Zînga ka tho chu ka dik lo deuh tlat, ka khua a sik dáwn a ni ang. Tùnlai chu ka rilru ka hman nasat avàngin ka taksain a tuar ve deuh a ni ang.

Ka pasal hi rinhlelh ka duh miah lo; mahse, khami zàn ațang khan Lucy chu ka rilruah a awm ta reng mai. Eng thurûk nge an neih ang? Mahlima zâwt ila, min hrilh duh ang em? Keimaha ka awm tawh chuan ka ngaihtuah ngut ngut zel mai. Amahah lah hian danglamna hmuh tùr a awm si lo, kei chuan ka ringhlel chu a ni ta dêr si.

A phone hi a rûkin ka check-sak dáwn em ni ang? Hre chhuak se min haw viau ang. Ka ngaingam meuh si lo, kei pawh rinhlelh vàngin ka phone min check-sak se, ka ngei ngawt ang, rinhlelhna tùr awm lo mah ila.

A inbual hlànin hlauthâwng rilru deuhin, khûr dar darin a phone chu ka la kãng ta a, password a ngai. Sarah27 ka hmet a, a dik miah lo, ka tinawn leh a, a dik chuang lo.

A hma khán engzât nge ni kha? Sarah33 nge 34 kha aw? 34 niin ka hria, a dik loh chuan ka ti tawh lo ang.

A dik ta hrãm e. Ka thin a phu nasa lutuk.

Whatsapp message ka en nghal a, Lucy nèna inbiakna a awm miah lo. A va mak dáwn ve! Message pangngaiah ka lût leh a,Lucy hming chu ka hmu ta chiah e.

'Naktuk chu dâr 11-ah min kalpui a ngaih kha aw, kan inhmuhna tur chu...

A hmun tùr chu ka phone-ah ka save nghal.Vawiin tlai dâr 5:25-a a rawn thawn a ni.

Chaw ei khamah a chhuak a, kei erawh chu dàwr ka kal loh ni a nih avàngin ka awm thung. Mahse, engin nge min mawlh tehreng ni, an inhmu tùr chu zui rûk ka tum tlat a nih chu. An inhmuhna tùr ka hre sâ bawk si a, a dâr zât nèn lam. A harsa lo tawp ang.

Ka inthiam lo angreng; mahse, rilru hah deuha awm reng ai chuan finfiah ka duh. Mahlima chuan hria se chuan min haw ngawt ang chu.

Dâr 11 rîk hmain ka duhna hmunah chuan ka awm vang tawh. Thawmhnaw lãr lo deuh ka ha a, shade ka vuah a, ka lu chu puan pan tê-in ka khuh bawk. Min en thuak chuan min hre lo tùrah ka ngai.

Ka rilru chu a va hmanhmawh em! Motor tlãn zut zutte chuan ka lu an tihai lek lek mai, ka țhutna lah chu vai restaurant niin an thil siam rim chûk mai leh ni sa vul chu a inhmeh lutuk a, ka lu a tina bûr mai.

Ka hmu ta e, an pahnih ngeiin!! Chu nu chhiat loh zia mai chu, Rohlua phone-a a thlalak aiin a takah chuan a lian záwkin ka hria, Mahlima a chen thuak mai, a inkamsàn vàng pawh a ni mahna.

An inhmuhna chu damdawi dàwrah a ni a, dawrnghâktu nèn chuan an inbia ni ngei tùr a ni, rei lo te hnuah chuan in chung lamah an chho dun ta a.

Eng nge an tih ang le? In chung chu in luah lai a ni em? Hotel em ni zawk? Mahse, signboard tal hmuh tùr awm ve àwm tak.

Vaipa, ei tùr kenga lo kal chu ka zâwt ta ringawt a, ani pawh chuan țha te chuan min hrilh ve mai bawk a. In hnuai chu damdawi dàwr niin in chung chu doctor lãr tak pakhat clinic a ni àwm e. Chuti a nih chuan eng nge an tih ang le?

Lucy chu a râi a ni mai lo maw? Ni lo, a ni lul lo ang. Chu zet chu ka ngaihtuah duh lo, thil țha lo tak a ni.

Ei tùr ka lam ve tak nain ka ei lo reng reng. Mahlimate pahnih lo chhuk hun chu ka chãng reng a, an rei phian mai. Ka chawlhna vai dàwr lah hi rin aiin a lùn phian lehnghal a, mi an rawn lût ve zut zut mai. Mahlimate nghah ka duh avàngin ei tùr dang ka order leh a.

An rawn chhuak ta e. Lucy chuan a kut pakhat chuan Mahlima bânah chuan a chelh a,a kut pakhat thung chuan a dul a chûl a, a la nui var var zui.

Ka ngaihtuahna țha lo zet chu a dik a nih ka ring ta; mahse, 'mahse' a la awm. Mahlima fa a ni lo thei tho alawm, a dul a chùl vàng ringawtin a râi tihna a ni kher lo thei bawk.

Ka tho dáwn a, ka tho thei lo. Ka lu a rawn hai chiai chiai a, ka luak a chhuak lutuk bawk. Ka hmui chu ka hup a, ka hnar nèn. Ka chhuah vat loh chuan ka insûm thei lo mai ang.

Kea kal chu ka va huphurh tak ém! Tuna ka awm dan ang phei hi chuan kan in ka kal thleng thei lul lo ang.

Tu emaw ka su nawk mai. Ka mi sut pawh chu en lo chuan ka maimichhîng vang vang phawt a.

"Sarah?!!! I țha em?"

Rohlua a ni hlauh mai. Rohlua ka hmuh tawh azawnga ka làwm ber țum a ni hial ang.

"Rohlu, khawngaihin, kan inah min hruai hãw teh. Ka lu a hai lutuk."

"Lawk aw, taxi ka'n ko ang e."

Rohlua nghêng lo chuan ka ding thei lo, ka awmna chu a vir muai muai ni maiin ka hria.

"Sarah, ka cousin doctor hnênah ka hruai mai ang che aw, a hla chuang lo va."

"Mut theihna ka duh a ni mai."

Ka meng ngam tawh lo, min pawm ni maiin ka hria. Tûnah tak hi chuan Mahlima'n min lo hmu pawh ni se, min ngaih dan tùr ka ngaihtuah peih lo.

Doctor awmna kan thlen hnuah pawh ka meng chuang lo, Rohlua chu a țawng zat zat a; mahse, ka ngaihven tehchiam lo.

"I bp check lawk ang aw."

A check hnu chuan,"Um, a hniam mah mah a nih hi, i lu a hai viau pawh kha a àwm viau a ni,"a ti charh charh a.

Rohlua chuan,"Sarah, eng ti tùrin nge maw i chhuah reng reng le? Kei khán hmu lo phei che ila chuan...,"a ti vang vang a.

Ka chhâng peih lo.

"I bialnu em ni? In inhmeh ka ti hle mai."

"Ngawi mai mai teh!"

"Mahni bialnu pawh chãwm țha thei lo nih chuh, a zahthlâk hret lo maw?"

"A va mak e aw! Ngawi mai mai teh, Sarah-i kha check țha la a nih chu."

Doctor chu a nui kar kar a. "I țhianpa kha tunge kha? Mahlima ti raw? Ani pawh nichinah khán an nu nèn an lo kal a,"a tih chuan ka meng nghal zawk mai.

"An lo kal maw?!!"

"Aw, kal e. An nu kha a râi a."

Tuna ka awmna hi Mahlima leh Lucy kalna damdawi dàwr chung kha a ni maw!!! A va mak ve, engtin nge Rohlua hian min hruai theih? A cousin doctor chu he pa hi maw lo ni a? Chuan, Lucy chu a lo râi chiang a ni maw?! Ka pasal fa a pâi maw?!!!!

A chiang ta e.

Luak chhuak chuan min rawn hnawh up up a, ka inbeng tho a.

"Sarah?"

"Ka luak a chhuak..."

Sink-ah chuan ka luak a, tui rîl chauh a ni. Rohlua'n ka lu a rawn dawm vat a,a va tihchi loh tak!!