☆LALHLIMPUIA☆ - 25 - 30 By Dingdi Pachuau

 LALHLIMPUIA - 25 By Dingdi Pachuau

"Sarah, i țha em?"

A aw ațang chuan min ngaihtuah hle a ni tih ka hre thei; mahse, ka chhâng lo.

"Hlu-a, in nu chu a râi a ni lo maw?"

"Eng a!!! Sarah, i râi maw?!?"

Ka râi ang maw?!!! Ka râi dáwn em ni? A ni ang em? Ka period hun chu a ni deuh reng tawh mai; mahse, ni dik zat zatah ka period kher chuang hlei nem.

Inah Rohlua'n min hruai hãw a, pregnancy test kit erawh ka hàwn a, nakinah ka in-test ang.

Min ngaihtuah khawp mai. Chuan, a țhianpa chungah a thinrim hle bawk.

"Sarah, Țhiana lo haw hma chu ka awmpui ang che aw, i duh em?"

"A ngai lo ve, ka lãwm e."

"Mahse, engmah i ti thei chuang si lo, ka ngaihtuah che alawm."

"Ka zia lutuk tawh, rei lo te hnuah ka zia mai ang."

"Mai mai a, ka țhianpa nupui alawm i nih. Ngei viau mah ila, ka țhianpa a ni miau si. Sarah, thil awm dan ka lo zâwt chiang dáwn em ni ang?"

"A ngai lo mai, min puihna zawng zawngah làwmthu ka sawi leh e."

"Khati ang i sawi khán ka awm i tinuam lo a nia, Sarah. Puih i ngaih chuan min lo call mai rawh aw, i phone min lo pe la."

Ka phone chu ka pe ve mai a, a number chu hmetin a call chhin a, a ring hnuah chuan a save ta nghal a.

"Ka number i nei ta a, min lo call hreh miah suh aw, țhian dang i neih loh ém hi."

"Ka lãwm e."

A haw hnu chuan khumah chuan ka mu a, vawiina ka thil tawn chu ka ngaihtuah lêt vang vang a. Tunah zawng thu dik a lang ta si a, Lucy chu a râi ta ngei a, Mahlima fa a ni ang em? Mahlima fa ni lo se, a kalpui dáwn em ni? A ni ang, a ni ngei ang. Mahlima ka zâwt mai dáwn em ni ? Engkim a hre vek àwm si a. Fa a awt ém ém a, tunah zawng a nei dáwn ta ngei e; mahse, a nupui hnên ațangin a ni dáwn si lo.

Hria angin ka awm ang em? Ni lo, ka awm thei lo, ka zui ru tih a hre dáwn asin. Min hrilh hun ka nghâk ang, min hrilh kher lo thei bawk; mahse, zêp theih loh hun a thleng thuai ang. Chutih hunah chuan, a insawifiah ngei ang a, a insawifiahna ngaihthlâk ka duh, ka tihsual nawn leh tawh loh nân.

Ka tuar ang, ka tuar țang țang ang. Ka tuar theih loh tùr hi ka chungah a thleng bîk lo ang chu maw. Mahse, ka rilru nawm lohnate hrilha kan chanchin engkim hria titipui tùr ka duh ngawt mai, ka rilru tâwt leh nâ pawh a thâwlin a zãng deuh mahna. Christina ka hrilh duh ang em? Ka bul hnâia awm chu ni se, ka hrilh ngei ang. Kâr hla ațang chuan inngaihtuah a na si a, hrilh lo phawt ang.

A lo haw hunah pawh țha takin, engmah hre lo angin ka lo bia ang. Kan inkârah intihthiam lohna leh inhàuna kan nei pawh a ni lo va, rilru na tak pawhin ka tuar thei mai ang. Min hau se zawng, ka tuar thei kher lo ang.

Ka luhai a reh deuh hnuah ka inbual a, ka harh deuh huai mai. Eirawng ka bâwl a, ka intiharh lui hrâm hrâm a, a bulah phei chuan na nei anga lan ka duh lo hrim hrim.

A lo thlen chuan a hma ang chiahin ka lo làwm a, ani erawh chuan min en vang vang pahin," Sarah, thil dik lo a awm em?"a ti sup a, ka hmélah ka thil ngaihtuah ka lo tilang viau emaw ni le.

"Vawiin chhùn khán ka hmu tlat chein ka hria, i chhuak em?"

Ka thin a phu dup dup mai. Min man chhuak thei lo vang, tûn dinhmunah hi chuan inhau ka peih miah lo, ka taksa leh rilruin a tlin lo bawk ang.

"Chhuak nâng, inah ka awm reng alawm."

Aw Lalpa, min ngaidam ang che. Dâwt ka sawi ta ringawt mai.

Zîngah min thawh khalh a, ka thawh ve meuh chuan chaw ei a lo peih diam tawh. Ka nawmsam loh chhuanlamin dàwrah ka kal dáwn lo tih ka hrilh chuan,"Sarah, damdawi inah kan kal dáwn em ni ang?"a lo ti vat a.

"Eng nge kan tih ang?"

"I nuamsam lo a ni lo'm ni?"

"A ho lutuk. Ka mu vang vang ang a, a reh mai ang."

"Kei pawh ka kal peih bîk lo."

"Ngati maw?"

"Awmpui che ka duh alawm."

"A ngai lo, kal rawh. Hei, i tlai mai ang."

"Awmpui i duh lo tak tak maw?"

"Hna țha taka i thawh hi a țha ber."

Kâr khat chhûng chu zîng lamah hian nuam lo seng seng, khawsik deuh ser ser hian ka awm ziah a, luhai nèn, ka bp kha check leh ka duh a ni. Thil ka ei țha thei lo bawk nèn, dàwr ka kal loh ni a ni bawk a, clinic-ah ka kal ang.

Kalkawngah chuan muangchângin ka kal a. Ka duhthusàm ka chunga lo thleng ta hian hlimna min ve pe si lo ém! Ka dul chu ka chûl a, a la thêp then nain naute a lo awm ve reng tawh a ni si. Mahlima hrilh ila engtin nge a awm ang? A hlim viau ang em? Ti ila, Lucy a râi tawh tho si a.

Fa a awt a, ka pài har ém avàngin a beidawng ve tawh a ni mai a, a thiam lo lutuk bîk hlei nem; mahse, ka duh vàng reng a ni bîk chuang lo. Pathian hian min hrem tihna a ni thei ang em? U Zuala rilru na lutukin ka siam a, heti ang záwng hian ka chungah Pathianin min rùl tihna em ni ang? Mahse, naute min pe tho si.

Gate ka thlen hmain Rohlua'n min lo ko ding a.

"Engtin nge i awm zél? I țha em?"

"Aw, țha e, ka lâwm e."

"Rawn tlawh che ka duh țhin a; mahse, ka țhianpa nupui, pasal nei tawh i ni si a, a mâwi lutuk lo deuhin ka hria a."

"Ka țha alawm, lo lût la."

Rohlua hi ka rin ang kha a lo ni lo tih ka hre tawh. Tunah phei chuan ani bâk hi kan nupa chanchin, thil thleng hriaa titipui tùr ka nei miah lo. A hma kha chuan ka ngei deuh viau kha a ni a, tunah chuan a chunga ka rilru puthmang pawh a danglam ve deuh ta.

"Khawiah nge i kal a?"

"Ka bp ka check leh a."

"A zia tawh em?"

"Aw, tlêm tè-in."

"Sarah, Mahlima hi ka titipui ang chu, heti ringawt chuan a dik lo."

Tui vâwt chu ka in a, ka kawchhûng a vâwt thla raih raih mai.

"Ama sawi hun ka nghâk zâwk ang e."

"Mahse, rilru nâ leh hrehawma i awm hmuh hi hrehawm ka ti a ni. A fa pawh a lo ni lo thei tho asin, hriat chian i duh lo em ni?"

Ka hre chiang ngam lo a ni zâwk. A fa a lo nih hlauh chuan hrehawm ka ti lehzual dáwn asin.

Ka luhai chiai chiai chu ka dawm a, ka maimichhîng vang vang a.

"Engtin nge i awm? I țha em?"

"Ka țha alawm, ka lu a hai deuh mai a nia."

"Sarah, i awm dan hi a dik lo a ni. Damdawi inah ka kalpui mai ang che aw? Mahlima pawh a phone theih tho a nia."

"A ngai lo, ka bp hniam vàng mai mai alawm. Chuan, nau ka pài vàng pawh a ni tho bawk a."

"Sarah, naute i pài maw?!!! Țhiana i hrilh tawh em?"

"Vawiinah ka hre chauh a, hrilhna hun pawh a la awm lo. Bâkah, fa dang a nei dáwn tho a..."

"Fa i pâi ta chu a lãwm ngawt ang chu, Sarah. Kum khat hnua neih tum chauh ni mah ula, heti ang thu làwmawm hi chu zêp miah suh aw."

Ka rilru a nâ ngawih ngawih. Dâwt vawi khat sawi hian dâwt dang a hrin zel a ngai si a. A hmaa Rohlua bula dâwt kan sawi kha ka hre chhuak lo thei lo.

"Fa neih chu kan duh lutuk alawm, ka rài theih lawk loh avàngin a beidawngin Lucy pawh hi a pan a nih ka ring a."

"Sarah, rài lai chuan rilru hrehawm taka awm hi a țha lo a nia, naute a hrisêl thei lo. Țha taka naute nei tùr chuan i hlim a pawimawh asin."

Hlim chu ka duh asin; mahse, ka dinhmun ațang hi chuan hlim a har ém asin. Ka pasalin nula dang, chhe lo tak hnênah fa a nei dáwn a, kei aia thlan nahawm záwk lehnghal.

"Pathianin min hrem a ni ang,"zàwi tê hian ka ti sap a.

Min rawn hnaih nghal vat a.

"Sarah, chuti ang záwngin ngaihtuah suh. Pathianin min hrem dáwn ni se, tumah hrem loh tùr kan awm lo. Naute phei chu a malsàwmna liau liau a ni asin."

Ka țah a chhuak. Ni e, naute chu a malsàwmna a ni, Pathian hremna a ni lo, ka tân a lo piang ang, min tihlim tùrin.

Ka mittui a rawn far zãwih a, a hmuh ka hlau kher mai; mahse, a rawn hmu tho a nih hmel.

"Sarah, țap suh. Naute chuan hlimna a rawn thlen dáwn che alawm. Țhiana chu engkim ka sawipui vek ang, i lungngaih chuan naute pawh a lungngai ve mai ang,"tiin ka kut chu a rawn vuan a, min hnem tum tih hriat tak chuan a chûl hliau hliau a. Ani lo hi tunah kher hi chuan inhnemna dang ka nei lo. Ka u mipain duat takin min hnèm se, min tihhlim tum ta se, chuti angah chuan Rohlua hi ka chan tlat a ni.

"Mahse, a nu hi ka lungngai ém a ni, ka rilru a hah ém mai."

Ka mittui chu a rawn dîr ta zung zung a, ka inhnît nghal hlawp hlawp bawk a, a zia lo ka ti tak zet ; mahse, ka insûm thei lo.

"Engkim a țha leh vek mai ang, Sarah. Ka țanpui ang che, i țhian leh i u ang chiahin min ngai rawh aw, hrehawmna ațang hian hlimna a lo chhuak țhìn a nia."

A dàrah chuan ka lu chu min nghahtîr a, min kuah pahin ka hnung chu a chûl bawk a, ka țah chhuak chu insûm miah lo chuan ka țap ta tlawk tlawk a. Ka țah bàn thleng chuan dawhthei takin Rohlua chuan min kuah tlat a.

"Ka awm loh hun chu in lo hmang țangkai hle mai maw?"

Kawngka bulah chuan Mahlima chu a kekawr ipte-a a kut zen lûtin a lo ding reng a, engtia rei nge a lo din tawh ang le? A hmél chu a chang țha hle a, a mitmeng phei chu rei en pawh ka ngam lo.

"I rawn hmuh ang hi thil awm dan a ni lo."

"CHHUAK RAWH!"

Ka phu zawk mai, ka thin a phu nasa lutuk a, ka lu chu a rawn tihai leh mai dáwnin ka hria.

Min kuahna chu thlahin a ding chhuak a, Mahlima enin,"Țhiana, thil i hre sual ..."

A țawng lai chu Mahlima chuan lo pawt chatin," Ka mit hi a la chhe lo a nia. Chhuak la, ka in chhûngah hian i rawn pên lût leh a nih chuan ka that ang che!"zàwi angreng tak, fiah kelh kawlh si hian a ti leh a.

A țawngkam chhuak chu a ring miah lo; mahse, a hlauhawmzia ka hria, a tiduh tak tak ngei ang.

"I nupui hian duat a ngai..."

"Lo sawi ve tùr i nei miah lo. I chhuah thuai loh chuan ka theh chhuak ang che!"

"Rohlu, chhuak mai rawh, khawngaihin,"ka lo ti khùr dat dat a. Taksa leh rilru chak loh lai a ni nèn, tlûk ka hlauh avàng chuan ka ding chhuak ngam lo va.

"I hria maw? A lo hlauhthàwnpui che a nih chu. Chhuak la, kan inkârah lo inrawlh tawh suh ang che. Ka țhian i lo nih tawhna vàng chauhin a chhanhim che tih hria ang che."

Rohlua chuan min en vang vang phawt a, Mahlima en lehin,"I inchhìr hmain harhfîmin inngaihtuah harh ang che,"a ti a, a chhuak ta nghal a.

Thinrim tih hriat zet hian min melh khui a, kut erawh min thlâk a tum lo a ni ang. A mitmeng a sen rûm bawk si a, a lang hlauhawm lutuk.

"Engtin nge i tih theih zâwk a?!!"

Min vìn chu a ni chiah lo, a țawng sehchilh dàn ațang chuan insùm a tumzia chu a hriat theih viau.

"Engmah a thleng.."

"ȚAWNG SUH!"

A vei tawn sek mai a; chutah, a ding thut a, ka lam rawn hawiin,"Ka nupui duhtak leh ka țhian nia ka lo chhàl ve chuan min lo bum chiang hle mai maw, min nuihzat àwm teh e. Eng thil nge pêk loh che ka neih? Fa maw? Ani chuan a pe che em ni? Nge ka lo hre ve lehpek lo zâwk? Ka fa pâi duh lo hian i lo indang țâng țâng em ni zâwk?"a ti tâwn tâwn a. A thil sawi chuan min tihhrehawm ém avàng chuan ka beng ka hup a, ka maimichhîng tlat bawk a, ka lu a hai chuai chuai mai.

"I beng hup mah la, ka sawi i hre thei tho tih ka hria. Kha, i bialpa kha ka hmu leh a nih chuan ka that hreh lo a nia,nang pawh hi hmeichhia i nih vàng chauhin i him tih hria ang che."

Ka men leh meuh chuan hmuh tùr a lo awm tawh lo. A thinrim ém a, insawifiah ngaihna pawh a awm lo. A thinrim a zia deuh hnuah thil awmzia chu ka sawifiah mai ang.

Eirawng bàwl a hun chuan peih lo zet chuan ka tho a, ka lu hai lutuk avàng chuan ka'n chhîng leh vang vang a. Choka-ah ka lût phei a, fridge ka hawng chiah chu ka pum a rawn inlet but but mai.

Toilet-ah chuan ka țhu reng a, ka luak chhuak a zia deuh hnuah chauh ka ding a, ka va chàu tehreng ém! Ka nu ka ngai hle mai.

Ka phone mai dáwn em ni ang? Rài țan tirh chuan heti ang hian an awm țhìn ngei chuan ka ring a; mahse, kei chu ka bp a lo hniam ém ém bawk nèn. Ka nu bula awm ka châk tak zet, min duat dáwn si.

Zàn dâr 7 pelh hnuah a lo haw a, chaw eiah ka lo la nghâk ve ràn mai. Ka phone a, ka phone a chhâng duh bawk si lo, ka mang a ang tak tak a ni.

"Chaw ka ei tawh."

Room-ah a lût nghal daih, min tihrilhhai khawp mai. Room-ah chuan zui luha thil awmzia hrilhfiah mai chu a țha lo'ng maw? Heti hrim chuan kan boruak a țha thei miah lo vang.

Khumah a lo țhu ngur mai a, zu a in maithei; mahse, a rim ka hre miah lo thung.

"Mahlim, thil awm dan sawi fiah ka duh a ni."

"Sawi fiah tùr a awm chuang em ni? Ka mit-in ka hmu a, a chiang vek alawm."

Um, a dik thei viau ang chu. Rohlua khán min kuah ve kher bawk si a, mita min hmutu tân chuan thil ni thei tùr chu a ni. Mahse, kei pawhin Lucy nèn ka hmu ve tho alawm.

"Mita hmuh nazawng hi a dik vek chuang lo asin."

A nui hawk a, a za lo tih erawh ka hre chiang kher mai.

"Ka mita ka hmuh kha kei chuan ka ring khawp mai. Beisei viau mah la, i nei thei chuang lo vang. Ka țhen dáwn lo che."

Kawngkhàr chu vuanin ka khùr dar dar a, a thil suangtuah dan chu ka ngaihtuah ngai loh thil a ni.

"I kham khawp ka pe lo che em ni? Nge ka zei lo viau em ni zâwk? Ka awm loh lai chuan nuam in lo chèn nasa àwm țhìn hle mai."

A thil sawi dan chuan min ngaihhniamzia a tilang chiangin ka thinlung a khei zar mai. Uiré-ah min puh tihna a ni!!! A țhianpa laka uiré-ah. Hei chu ka tuar thei lo.

"I țawngkam hman fîmkhur rawh!"

Țawngkam vîn hman ka duh loh tehlul nèn, ka thin a rim lutuk tlat, ka insûm thei lo.

A rawn tho zawt a, min rawn pan hnai a,"Min vîn suh,i pasal ka nih hi. Kha pa kha hmu tawh suh ang che, biak pawh be tawh suh. I biak leh chuan ka that ang,"a ti hmuk a,room ațang chuan a chhuak nghal a.

Peih lo chung chungin rawng ka bâwl ve a, ka ei lo chiang khawp mai. Ka thinlung na lutuk chu ka mittui a tla zawih zawih; mahse, ka țap lo ang, țah a phû lo.

Ka chàu a ni, ka thinlung nâ leh tâwt lutuk hian min tichàu zo ta. Ka tlûk hmain ka hnaih ber sofa chu ka thleng hman hrãm e.

LALHLIMPUIA - 26 By Dingdi Pachuau

[ #SURPRISE BONUS_CHAPTER In comments ka chhiar ațanga lo chhuak a ni e. 'A tãwi e' tih awih miah loh ]

Ka nu leh Tluanga'n min laitat a, insi rialin bazârah chuan zàwi muangin kan chhuk a. Ka pum chu a puar ve tawh avàngin ka kal chak thei tawh lo khawp mai, anni pahnih chuan dawhthei takin min dawm a. Ka bân pahnihah min chelh ve ve, ka tlu palh ang tih an hlau tawp.

Naute thawmhnaw hmuh tùr a vâng khawp mai. Tluanga chuan," Heti ang chuan kan zawng hmu thei pawhin ka ring lo, mî zâwt mai ang u,"a ti ringawt a. Ka nu ve thung chuan,"Kan la en tlêm alawm. Kal zêl ila, kan hmu mai ang,"a ti ve thung a. Kei chuan engmah ka sawi lo, ka hah ém ém ringawt.

"U, hmeichhia a ni dáwn ti raw?"

"Ka hre lo le."

Ka nu chuan,"Um, hmeichhia a ni ang, a hriat vek alawm. I huat loh ém ém dan ațang hian hmeichhia a ni sâ,"a lo ti thuai a.

"Damdawi a ei țha a, ei tùr lah a țha țha a ei bawk nèn, naute chu a hrisel țha ngawt ang chu."

"Hlim a pawimawh a, thinrim reng mai te hi rài lai chuan a tih chi miah loh. I hlim loh pawhin naute tân tiin hlim i tum hrãm hrãm tùr a ni."

Tluanga'n ka bân min dawmna chu a na ngut ngut mai. Ka tàl deuh hlek chuan a na zual sauh a, ka țhen tlawk tlawk mai. Nâ ka ti lutuk chu ka rûm kâwk a,ka harh zui ta nghal a.

Sofa-ah chuan ka lo muhìl niin. Muhìl pawh chu a ni lo thei tho bawk, ka thidang pawh a lo ni maithei.

Ka harh chian deuh hnu chuan sana ka'n en a, dâr 9:30 a ri chiah mai. Mahlima hi a awm lo em ni le? A reh ém mai, chuti a nih chuan room ațanga a chhuak kha a lo la haw lo tihna a ni ngei ang.

Phone ka tum deuh ut ut a; mahse, min chhâng leh duh dáwn chuang lo va, ka țhulh leh daih. Lo mutsan ka duh lo viau nain ka meng rei thei dáwn lo tih ka hria.

Zînga ka harh chuan ka bulah a mu lo tawp tih ka hre nghal. Inah a rawn haw lo tihna nge ni a, ka bula mu duh lovin sitting room-ah a riak zâwk ni ang? Amah a intihrehawm mai mai a ni.

Chokaa ka luh phei hmain toilet-ah rei tâwk ka awm leh phawt a, ka mit pawh a lang bui vek phah. Țap hrep pawh ka ang alawm le. Ka dul chûl pahin,"Naute, i nu hi ka chak loh pawhin nang tal chu chak țha hrãm hrãm rawh aw, ka hlim nân țha takin rawn țhang lian la, țha taka rawn pian tum ang che,"ka ti sap sap a.

Nizànah engmah ka ei loh avàngin ka pum a ri raih raih a, ka ril erawh a țâm dèr lo thung. Eng thil mah ei châkna pawh ka nei lo, ka luak a chhuak ém ém zâwk.

Chokaah pawh chuan ka ding deuh vang vang phawt a, ka pum no nghual mai chu a hrehawm ka ti. Eng thil mah ka ei châk bawk si lo, thil thûr ei ta ila, a zia deuh ang.

Fridge chu hawngin thei thûr ka zawng a,Nimbu pum khat ka hmu hlauh mai. Ka sil fai a, zai phel phawkin ka ei ta bawrh bawrh a, ka rin aiin ka ei thei daih mai. Tui erawh ka in tam a ngai viau ang.

Dàwrah pawh ka kal chhunzawm thei ta lo. Mahlima lah chu ka be thei țhak lo bawk, ka phone a chhâng duh lo va, inah lah a awm mang ngai lo. Zànah a lo hãw tlai thei hle a ni ang,a lo hàw lai ka hre ngai lo va, zîngah erawh ka hmu hman hrãm thung. Nupa ni ve si, khumah pawh a rawn mu ngai lo. Kan khum chu ka tân chuan a zâu ta mah mah a ni. Chubâkah, kan in pawh hi in a ang tawh lo. A reh ruai maiin ka hria a, a chungah thinur viau mah ila, hlim taka awm leh theih kha ka châk a ni.

We built a love so strong it couldn't break,

There was not a road we were afraid to take...

.....

But he don't feel the same...

But he don't lay his head down to love me like before...

...

If foundations made of stone can turn to dust,

Then, the hardest hearts of steel can turn to rust;

If he could only find that feeling once again,

If we could only change the way the story ends...

He hla zet hi zawng, ka tân an lo phuah chiang a ni. Ka hun tawn nèn hian inhmeh ka ti a, inang diak diak lo mah se, ka hla ka ti tho tho.

Kan nupa nun bul țanna chu a tân chuan hmangaihna a ni lo; mahse, ka tân chuan duhna mai a ni lo, ka hmangaih kha a ni tlat a ni. Hmangaihnain bul ka țan a, ani erawh chuan min duhna, hmasialnain a țan thung. Hmangaihna a bul țhut bera hman loh chuan a fuh thei lo. Lung chang țha ber pawh vaivuta a chan theih a, thîr chang țha ber ber pawh a tuiêk thei a nih ngai chuan duhna tih mai mai hi chuan rei lo tê bâk a daih mawlh lo ang. Taksa màwina hi zawngin rei lo tê bâk a daih si lo.

Hmeichhia chu a langah rilru khauh leh khawng viau angin lang mah ila, chhûng ril nun chu a no ém ém tho a ni. Thinrima ân bawrh bawrh ang chi hi ka mizia a ni lo va, ka theih chin chinah chuan ka insûmin thil țha lam ngaihtuah ve ngar ngar țhìn ka ni. Tùna kan inkâra thil thleng pawh hi ka hrilh fiah ang a, a hre thiam ve mai ang chu maw tiin a êng lam ka thlîr tlat a; mahse, ka biakna a ngaithla duh tlat lo hi a buaithlak.

Zîng khat erawh chu zàn ka mut ţhat loh zual avàngin ka tho hma hle a, ka thawh chuan sofa-ah a lo la mu a. A mutna bulah chuan kal hnaiin a muhìl hmél chu ka thlîr vang vang a. A sam kir deuh chu a buk lek lek tawh a,a khabe hmul pawh a lang buk ta; mahse, a chhiat loh ngaiin a la chhe lo reng.

A sam chu chùlsak ka châk, ani pawhin duat taka min kuahin min chûl leh se, hmãna min duat ang khân min duat leh se ka va duh ém! Ka thu sawi min ngaihthlâksak duh se chuan heti hian kan inhrem tawn lo mai tùr. Ka thu sawi reng reng a ngaithla duh tlat lo mai hi a buaithlâk. Mahse, tukinah chuan ngaihthlâktîr ngei ka tum tlat.

Ka țhu rei hle a ni. A rawn che talh talh a, a rawn țhu chhuak hlawl mai. Min hmu thut mai chu, a phu lo a nih pawhin mak chu a ti ve ngawt ang.

"Mahlim, khawngaihin, ka thu sawi ngaithla teh."

A puan sin chu a thlep mawlh mawlh a, a țawng lo. A țawng loh miau avàng chuan ka tuang ka tichhah hlak a, ka thu sawi hi a ngaithla ngei tùr a ni.

"Engkim hi a dik lo kual vek a ni. Rohlua nèn kan inkârah engmah a awm lo va, a țhianpa nupui ka nihna angin min țanpui mai a ni. Tihsual a nei lo, keimahah min bûrbun vek mai rawh, ka tuar mai ang; mahse,engmah kan tisual lo a ni. Kan inkârah pawh eng thil mah a thleng lo. Khawngaihin, heti ang hian awm tawh lo teh, a hrehawm ém mai."

A thawmhnaw a ha mawlh mawlh a, a țawng ve miah loh avàngin ka thu sawi chu a ngaithla ngei tih ka hria.

Engkim hi ka thiam loh vek a ni. Heti ang rilru hi a pu ang tih ka lo ngaihtuah pha lo reng reng a. Chubâkah, kei chu ka mãwl a, rual pâwl lo ka nih vàng pawh a ni ang. Mahse, min zahpui ngai bîk pawhin ka hre chuang lo, ka lãwm țhìn viau reng bawk a. A tân tling lo chung pawhin min duh a, nupuiah hial min nei a; mahse, mipa rilru hi hriat thiam a lo har bawk a ni.

Rohlua khán thiam lohna a nei lo va, ka inkuahtîr tih pawh ka lo ngaihtuah lo reng reng. Khatih lai khán ka rilru a na ém a, engmah chiangkuangin ka ngaihtuah thei lo a ni. A thiam lo ber chu keimah ka ni.

"Mahlim, keimah vàng chuan in ințhianțhatna tichhe suh aw. A chhan chu thiam lohna a nei lo a ni."

A kalsawn tùr chu a kutah manin," Mahlim, tunah hian ka râi mêk a ni, i lãwm ve lo em ni? Kei chu..."ka la țawng lai mêk chuan ka kut chu thing thlain,"Min khawih suh. Rohlua fa maw i pài a?! A hma zawng pawha râi duh lova tûn ataka rài leh si chu, in tițha e. Chuan, ka fa anga lantîr in tum ngei ang chu, ti raw? In fing hle mai,"ten hmèl zet hian a ti a.

A thil sawi chu mak ka tih ém avàngin sawi tùra ka lo inruahman ve zawng zawng pawh a bo vek mai. Tuna ka pài mêk hi Rohlua fa a ti maw?!! Min ngai tenawm lutuk chuan ka rilru a tina lutuk a, engmah ka sawi chhunzawm thei tawh lo, ka ding khùr ngar ngar ringawt.

"Ka hnê, min kalsan teh."

Ka mâwl muih mai. Ka chakna zawng zawng sâwmkhâwmin, muangchângin room lam pan chuan ka inher a, ka tlûk lohna tûrin ka kut ka hûm ruh tlat bawk a.

Mite chuan nupa inkâra harsatna lo thleng chu thu-in an sawi fel a, harsatna inang lo tak tak an tâwk țhìn. Kan pahnin inkâra harsatna hi chu inrintawn lohna a ni tlat. Nupa inkâra inrintawn lohna a thlen chuan thu-in sawi fel a har tawh țhìn a, kei phei chuan heti ang hi ka duh loh ber thil a nih vàngin hrehawm ka ti lehzual a, tihngaihna ka hre lo thlâwt a ni. Ka thu sawi a awih duh bawk si lo; chubâkah, min ngaithla țha duh bawk si lo. Rohlua'n a tuar tel kher hi hrehawm ka ti, keimah chauh chuan tuar chu ni ila, a zia deuh.

Thil ka ngaihtuah nasa lutuk a, ka phone ri pawh ka hre lo lek lek a ni. Ka hawi kual a, ni a lo sâng hle tawh mai. Rohlua phone call a lo ni a.

"Hello?"

"Eng nge i an?

"Ka țha e."

"I țha tak tak em? In pa ka hmu a, eng nge in inkâr boruak a an?"

"A ngai a la ni e."

"A pawi ka ti, keimah vàng vek a ni."

"Ni lo, thiam lohna i nei lo. I țhianpa hian thil a hre sual a, hre thiam hrãm rawh aw."

"Biaka thil awmzia hrilhfiah ka lo tum hrãm hrãm ang, chu chu ka puih theihna che awmchhun niin ka hria. Inenkawl țha la, nangmah chauh i nih tawh loh kha."

Ka dul chu ka chûl a. Mahlima nèna kan fa tùr chu a awm mêk a ni si a, engti angin nge a lo țhan len ang? Kan duh ém ém țhin chu a lo thleng ta a; mahse, țahna titamtu mai maw a nih le? A pain a faah a ngai si lo.

"Naute, ka fa i ni, keima fa chauh. I pa chuan a fa atân a pawm lo che a nih pawhin kei chuan ka phatsan dáwn lo che, țha takin ka enkawl ang che. I pa pawh thiam lo viau suh aw, thil a hriat sual vàng mai a ni,"tiin ka phun sep sep a.

Vawi khat tal hrilhfiah leh ka tum ang, min chhàn duh ring lo mah ila. Bei nge sei rûn dung an lo tih kha maw.

A number chu ka hmet chhuak a, a ring ral ral a, ka rin loh deuhin a lo chhâng e.

"Hello?"

Hmeichhe aw a ni tlat.

"Khawngaihin,Mahlima ka lo be lawk thei ang em? A nupui ka nia."

Inbe sar sar thâwm ka hria a, chutah, ka biak duh ngei chuan min rawn chhâng ta a.

"Hun ka nei lo a nia, sawi rawh."

Lunch ei hun an nei ve lo em ni le?

"Ka tibuai che a nih chuan a pawi ka ti, Mahlim. Khawngaihin, min ngaithla hrãm rawh."

"A ngai kha i sawi leh a nih chuan kha kha chu hrilh nawn ka ngai lo."

"Ni lo, naute hi i fa a ni."

A rûm nghut chu ka hre chiang ngang mai.

"Duh tâwk teh."

"Khawngaihin, heti ang hian awm suh."

"Bye, ka hman tawh tlat lo. Min lo biak tawh loh hrãm ka beisei."

Ka bei a va dawng tak ém! Ka hrilhfiahna a ngaithla țha duh si lo, a awih duh lo zui bawk si. Heti ang tak hian engtin nge ka chungah a nun a ràwn theih ém ém le? Min ring îk lo hi hrehawm ka ti.

Message tone a ri țang. Ka phone ka en vat a, ka rin phâk loh lutuk Mahlima hnên ațangin a ni.

'MIN KALSAN RAWH.'

A sawi tum ka hre nghal mai. 'Min chhuahsan rawh' a tihna. Tukin zîngah pawh khán he thu hi a sawi tawh kha, tunah phei chuan hawrawppui ngatin. Min lo ten tak zet a nih dáwn hi.

Ka mittui a tla zawih zawih. Khawiah nge ka kal ang? Pan tùr ka nei miah lo, ka hriat ve chhun lah chu Mahlima pute an ni. Tluanga lah hostel-ah a awm bawk si, ka chanchin chu ka hrilh duh teuh lo. Ka pan theih hnâivâi ber chu Rohlua a ni, ani lah hi tihbuai ka duh loh ber zînga mi a ni. A chhan chu keimah vàngin Mahlima'n a haw tawh a, an ințhianțhatna ka tichhe vek tawh tlat a ni.

Mahse, a tàwpah chuan ka va phone nge nge. A țanpuina hi ka mamawh a ni, keimah avànga a țhianpa huat hlawh tawh mah se, a tàwp nân, a tàwp nân tak tak ka bia ang. Mahlima khán biak a phal lo hle kha a ni a; mahse, a kaw tàwpah ka tâng tlat tawh a, tihngaihna dang ka hre lo.

Thil thleng engkim chu Rohlua chu ka hrilh a, a rilru a nâ tih ka hre thei. Sawi chhuak lo mah se min khawngaih hle tih ka hre bawk. A ngawi vang vang reng a, a rilru tùr erawh ka ngaihruat thiam tho e. Mahlima chu a vawi hnih nân theihnghilh ka tum leh ang. A vawi khatna nèn a inang lo bawk a, amah ngeiin kalsan tùrin min ti a, a thu ka awih vàngin ka kalsan ang. A lehkha tùr pawh ka ziak a, a hmuh theih ngeina tùrah ka dah. Thu tam ka ziak lo, demna thu pawh ka ziak chuang lo. 'I thu awihin ka kalsan che. Inchhîr lo la; mahse, hei hi ka chah ang che: Thu tlûkna i siam dáwnin fîm takin ngaihtuah hmasa phawt ang che' tih zawng hi.

Pângzâwla phei nghal ka duh avàngin motor min zawnpui nghal chûk chûk a. Vanneihthlâk takin Hnahthiala haw tùr car kan hmu a, ka va vànnei tehlul ém! Thawmhnaw min leisak pakhat tê pawh ka hàwn duh lo. Ka thawmhnaw a tam lo bawk a,ka buai lo. Chawhnu dâr 1:30-ah kan chhuak a, kan chhuah dáwn chuan Rohlua chuan Mahlima chu lo hrilhfiah a tum thu chu a sawi leh a; mahse, ngai ka ti tawh lo. Tunah chuan ka rilru a na lutuk tawh a, thui takin thil ka ngaihtuah peih tawh lo.

Car neitute chu an țawng duh phian a; mahse, min biak loh chuan ka be miah lo. Țawng miah loh pawi ka ti lo,tuna ka rilru put dànah phei chuan. Titi mood-ah ka awm lo, ka rilru a buai nuai nuai a ni ber.

Ka nute pawh ka phone lo, ka va țhâwng thut dáwn a nih ber hi. Engtin nge an hnênah chuan ka sawi tâk ang?

Ka va rùi nasa tak ém! Thil ka ei thei bawk si lo nèn, ka luakna lamah ka chàu lehzual. Ka chàu lutuk ringawt.

Zàn dâr 7:30-ah kan in ka thleng. Ka ding nghet hlei thei lo, kawngkhàr dawmin ka ding khùr dar dar a. Thâwk ka lâk hawk hawk hnuah ka kik chauh.

"Lo lût rawh."

Ka nu aw dam diai hriat chu a va nuam tehreng ém! Ka mittui a rawn parawl nghal țuam țuam a, duh lovin ka hru tãwk a. Kawngkhàr chu hawngin muangchângin ka lût ta a.

Ka nu leh pain min hmu thut mai chu, an meng kâwk kâwk mai.

"Bawihte!! Eng nge a awmzia?!!"

"Nu?" Ka țap chhuak nghal hawk mai.

Nu leh pa ângchhûng zet chu a lo nuam e. Thil awmzia min zâwt lo, ka nu chuan min kuah hle hle a, ka hah a dam sawng sawngin ka hria. Mahse, ka țahna lamah ka chàu a, motor ka rùi nasa nèn. Ka khaw hmuh a tàwi tial tial a, a thim ta vek mai.

LALHLIMPUIA - 27 By Dingdi Pachuau

Men ka tum a; mahse, ka thei miah lo. Țawng ka tum nain ka hmui ka chêt thei miah lo bawk. Engtizia nge ni le? Ka taksa, ka kut leh ka ke pawh, engmah ka chêt thei lo.

Ka tui a hãl lutuk. Ka in ngei a ngai, țawng chhuah ngei tumin ka țang nasa lutuk a, ka hmui ka chêt thei ta.

"Tui!!"

"Bawihte, i harh tawh maw!!Lalpa, ka lâwm e!!!"

Ka nu aw a ni tlat mai!!

Khawiah nge ka awm le? Aizawlah ka awm ngei ang a, ka nu a rawn zin phei tihna em ni? Ka va hre mai lo ve.

"Nu?"

"Aw, Bawihte?"

"Ka tui a hãl lutuk."

Ka meng thei ta. Êng lutuk avàng chuan ka maimichhîng leh phawt a, muangchângin ka meng leh a. Ka hmuh fiah theih loh avàngin ka khap deuh sak sak a, ka hmuh hmasak ber chu ka nu a ni.

"Nu, i lo kal elo?!!"

A nui sâng mai. Tui bottle ni àwm tak lek chhuakin,"Tui in rawh aw,"a ti dam diai a, no-ah thli chhuakin min rawn tulh a.

"Nu, ka damlo em ni?"

"Dam e, Bawihte. I chàu satliah mai a nih kha."

Hei chu ka pa aw a ni thung!

Ka theih angin ka bul chu ka melh kual a. Ka pa bâkah ka pi leh ka pu ka hmu! Engtizia nge le? Khawiah nge ka awm?

"Pa, khawiah nge ka awm?"

Ka nu chuan,"Bawihte, kan inah i awm alawm, ngaihtuah buai duh suh. I ril a țâm em?"a lo ti thuai a.

Kan inah ka awm maw?! Lungleiah ka awm lo maw? A nih chuan, engtizia nge ka mut tlat le? Ka damlo a ni ngei mai.

Ka taksa a va chàu tak ém! Chêt pawh ka che țha thei hlei nem le. Ka taksa a na vek mai.

"Nu, ka va chàu tak. Engtizia nge hetia ka awm a?"

"I țha leh vat dáwn alawm. Thil i ei lo lutuk a nih hi."

Ka thawh harh peih deuh tak tak chuan ni hnih a liam tawh. Ka nu sawi dan chuan in ka thlen zànah ka chàu lutuk kha ka thidang a, zankhuain min buaipuiin an meng a, tuihâla ka harh kha chuan zîng dâr 7 a ni tawh. Hnahthiala doctor, ka pa țhian chu ka pain a phone a, ei tùr min pêk tùr a lo hrilh. Vànneihthlâk deuhin râi tân huat tùr a lo awm lo hlauh, ka va lãwm tak ém! Ka naute hi chu chàn ka duh lo, a pain duh lo mah se kei chuan ka duh asin, ka hmangaih dáwn lutuk.

In chhûngah chuan ka kal kual ka kal kual ve thei ta. Ka nute chuan ka râi tih an hre tawh a, an hlim hle a ni. Ka pa phei chu a phûr hle mai a, min duat lehzualin ka hria. Ka taksa a chak lo hle a, ei tùr țha nia an hriat apiang min leisak a, min tihhlim pawh an tum hlein ka hria.

Ka chanchin chu min la zâwt miah lo. Ka taksain a tawrh leh phah an hlau pawh a ni mahna, kei pawhin ka ngaihtuah lêt duh lo. Mahlima lam hawi reng reng chu ngaihtuah ka duh lo viau nain ka puma naute hi chu ka ngaihtuah a ngai. Ka naute tân ka intihchak sauh sauh a ngai, ka thisen ringa nung a ni si a.

Zànah keimahin min muttìr miah lo va, ka nuin min mutpui a, ka pa chu kan mutna room chhuatah a mu ve mai bawk a. Min ngaihtuahzia ka hriat hian ka lãwm a, ka inthlahrung lek lek zâwk.

Ka nuin ni tin min awmpui a, ka pite chhûng an rawn kal ziah bawk. Mal taka ka awm an hlau ni berin ka hria, ka chhûngte'n min lo hmangaih hle a ni tih ka hriat thar phah.

Mahlima phone call ka chhâng ngai lo. Ka awmna chu a hre tawh ang, a chhan chu nikhua ka hriat tak tak hma khán ka phone-ah a rawn call a ni àwm e. Rohlua pawhin a rawn call, chu pawh ka nuin a lo chhâng. Kei chuan phone call hrim hrim ka chhâng lo tawp a ni mai.

Kâr khat ka awm tling ta. Ka zia tawh viau; mahse, pâwnah ka la chhuak lo. Inah ka tawm ngawt ngawt mai, tuna ina ka haw dan hi a mawi lutuk lo nèn, pâwn chhuah ka châk lo hrim hrim.

Ka chêr a, ka rihna a tla hniam bawk. Ei tùr ka ei thei lo lutuk hi a buaithlâk, ei luih ka tum ve nasa. Ka ei ve pawhin a hnuah ka luak leh țhin a, chu chuan min tichàu leh țhìn. Thil ei hi ka huphurh ém ém mai a ni.

Zànah Mahlima pa(ka pa a nih tho chu)leh a driver an rawn thleng nawlh mai. Mak ka ti khawp mai a, lo biak dan tùr pawh ka hre lo.

Ka nute chuan an lo welcome țha hle a, an lo kal tùr hi an hre lâwk bîkin ka ring lo, eng mah an sawi lo ém mai.

Eng nge an lo tih dáwn ni? Mahlima'n a rawn tîr tihna em ni le? Ni lo ang, min rawn tlawh ve hrim hrim a ni ang, an zin haw pawh a ni thei tho. Rei țhu lo chuan room lam ka pan deuh nghal mai, ka țhut rei chuan ka taksain a tlin lo mai ang.

Room ațang chuan an țawng chu ka hre thei vuai vuai, an titi dan ațang chuan ina ka haw hi ka pa chuan a hria a ni chiang. Chuan, an zin haw a ni lo bawk, min tlawh tùr liau liauin Lunglei ațangin tlaiah an rawn chhuak bawk a nih chu.

Tûkțhuan chu a hmingin ka kîl ve a, ka ei mang lo. Ka pa (Mahlima pa) chuan,"Sarah, i lo damlo tih kan lo hre miah lo va, i nu pawhin min rawn zui a duh viau nain in lamah Bawihtei chauh a awm si a. I hre thiam hrãm dáwn nia,"a ti a.

Ka nui lui hrãm a.

"Ka pa, ngaihtuah ka ngai hlei nem . Hei, min hmuh ang hian ka dam țha tawh lutuk alawm. I buai àwm tehlul nèn."

"Ka fanu i ni alawm, buai chung chung pawhin rawn kal hi kan tih tùr a ni. Ka duh dan takah phei chuan Lungleiah kan rualin rawn chhuk ve la, doctor enkawlna hnuaiah awm la ka duh tak tak a ni."

"Ka țha alawm, ka pa. Nia, rawn chhuk chu a țha khawp mai; mahse, motor chuan hi ka huphurh ém a ni. Ka țha zêl mai ang, min ngaihtuah reng reng suh u."

Dâr 10 vêlah an hãw leh daih. Min rawn tlawh tur liau liauin an rawn kal tak tak!! Ka pa hi ka la hre chiang lo hle a; mahse, pa fel tak a nih ka ring. Mahlima'n a rawn tîr a nih ka ring deuh a, a rawn tirhna chhan tùr ka hre bawk si lo. Kalsan tùra min tih hnua rawn tirh leh chu ka ring leh lo.

"Bawihte, eng mah kan la zâwt duh lo che a, tunah chuan i zia deuh tawh bawk a, thil awm dan hi sawi a hun tawh viau lo maw?"

Thil awm dan chu ka sawi ve ta a, ka insawi thiam hran chuang lo. Thil nih dan ka sawi mai. Thil kal tawh ka ngaihtuah lêt leh chuan ka rilru a na thar leh ram ram mai.

"A lo nih tak chu. Mihring chu thil tisual thei vek kan ni a,fel famkim hi kan awm miah lo a nia. Ngaihdam ngai, hriat thiam ngai vek hi kan lo ni a, tlin lohna leh tihsualte inhriatsak rûn tùr a ni miah lo."

Ka nu hi chuan thil reng reng hi a dam zâwng leh a țha zâwngin a thlîr ziah, min zirtîr fo țhìn bawk. Mahse, tunah hi chuan ka rilruah ka naute tih loh, thil dang reng reng ngaihtuah ka duh lo. Mahlima hlauh phei chu ka rilruah hian ngaihtuah chhuah pawh ka duh lo. A chanchin, a lam hawi hrim hrim hi ngaihtuah loh ka duh a ni tawp.

Ka nuin thingpui a siam rak rak a, a phone chu a ri ral ral a. Ka bul lawka awm a nih vàngin ka en a, nutei a lo ni a.

"Aw, nute?"

"Awh, Bawihi, nang i ni maw? I nu khán chawhmeh min chah a, hei..." a tâwp daih mai. A lo tinawn leh ém ang chu maw.

A lo tinawn leh tak tak.

"Aw, chawhmeh chu engtin maw?"

"Lalpa leh!! Sarah, ka zawn nasatzia che i hria em?"

Mahlima aw a ni!!!

"Min zawng tawh suh!"

"I țha em?"

"Buai suh,"tih leh phone hmeh hlum chu ka rual nghal a, phone chu ka hmer ngawt ngawt a.

Ka nu chuan thingpui rawn châwiin,"Mahlima a ni em? A ni tih ka hre mai,"tiin thingpui chu min pe a, ka bula rawn țhuin,"Khâkna thinlung i put reng chuan i naute tân a țha dáwn lo a nia. I rilru tùr chu ka hriat thiampui vuai vuai che a; mahse, ka la tawn ve miau loh avàngin hnem dan tùr che ka hre lo. Amaherawhchu, țhil țha lam ngaihtuah la chu țha ka ti khawp mai,huatna hian țhatna a nei miah si lo,"a ti leh dap dap a.

"Mahse, Nu, tunah hi chuan a chanchin reng reng hriat loh a, ngaihtuah loh tawp hi ka duh ber."

"A dik alawm, i rilru nat vànglai a nih vàng a nih kha. Thingpui hmeh atân eng ber nge i duh?"a ti ta daih a.

Zànah ka mu thei ve deuh ta. Ka nu hnênah chuan mutpui ka ngai tawh lo tih ka hrilh a; mahse, ka pa chuan a phal tlat lo.

Chhûnah mu mai mai pah chuan ka phone chu ka check mai mai a, Christina message ka hmu chiah chu nimin kha a birthday a ni tih ka hre chhuak chiah. Ka va text ta a.

*Ka tihpalh. Tlãi tawh viau mah se, Happy Birthday aw.*

Ka inthiam lo viau mai, ka țhiannu ber birthday ka theihnghilh thei chu. Mahse, ka hun tawnin a zir lo ve ém a ni, a àwm ka ti tho.

Min rawn reply rang khawp mai.

*Ka rawn call dawn che.*

Video call ngatin. Ka duh lo asin, ka hmél a chhe si, ka chhiat vànglai tak a ni lehnghal.

"Hey, ka thinrim viau a ni. Engtin nge i theihnghilh theih? E khai!!! I hmél chu leh... I dam țha em?"

Kha kha a ni ka duh loh chu, min hre chhuak rang dáwn tih ka hriat vàng a nia.

"Um, țha a ni mai. Eng nge i tih a?"

Thu dang sawipui a ngai, chuti lo chu min zâwt leh sek mai ang.

"Khawi maw, in pa ka lo be teh ang?"

"Inah a awm lo."

"Dâwt sawi suh. Engtizia nge eng mah min hrilh loh? I țhian țha ka ni emaw ka ti a?"

Ka inthiam lo telh telh mai.

"Min ngaidam rawh, engkim ka hrilh ang che; mahse, tunah ni lo aw."

Engtin nge a hriat theih ka hre châk. Ka zâwt ngam lo, engmah ka hrilh si lo va.

"Um, nakin zànah aw, engkim ka hre duh."

Ka online lohna a rei ta hle mai. Message a tam lutuk tlat, a pawimawh nia ka rin chu ka open ve bawk. Mahlima message pawh a awm, missed call lah a tam. Ka clear pawp ang. Clear tùr pawhin ka open tho a ngai si, pakhat chu ka chhiar hman hrãm.

*Sarah, min chhâng teh*

Ka chhâng lo chiang ang chu.

Min lo la call zui. Ka pick up duh chuang lo. Message-in a rawn zui, ka open lo nain a chhiar theih tho.

*Ka lo kal*

A va han ngam zâwk ve! A lo kal leh tak tak ang chu, a zak lo ve chiang a ni. Lo kal pawh ni se, eng nge lêm chuang ang ? Lo kal rawh se, nuam a ti ngût ang emaw chu. Hm, zahna a nei lo tih ka lo theihnghilh leh tawh a ni. A zak leh dáwn miah lo, engtin nge ka tih ang? Phuba lâk chu ka duh pawh a ni lo; mahse, lo kal rawh se, a hre ve khawp ang.

Ka nute pawh ka hrilh lo hrim hrim, hrilh ngai pawh ka ti lo. A duh leh a lo thleng tawp ang a, ka ngaihven lo ve.

Ka mut hnu rei vak lovah a rawn thleng a ni tih a țawng deuh bul bul ațang chuan ka hre thei mai. Zahna hi chu a tlachham ve a ni, tlêm tê pawhin a zak lo ve lo emaw ni le.

Ka nu hi chuan a biak dan ngai rengin a lo be dáwn tih ka hria, ka pa pawh hian a be chhe chuang lo ang; mahse, kei erawh chuan...

Zîngah chuan ka tho tlãi lehpek a, nizànah ka duh aia ka mut țhat loh vàngin zîng lamah ka mu ãm deuh a ni.

A lo awm a nih chuan melh pawh ka melh lo ang, biak phei chu khawilam. Min bia pawh ni se, a rùl tâwk chauhin, a mâwiah ka chhâng ang, chu pawh ka chhûngte bulah chauh.

A lo awm lo ve. Ka thaw huai mai.

Ka nu chuan,"Tukin chu i tho har deuh. Mahlima pawh nizànah a lo thleng a, i pa nèn khawiah emaw an kal ta a nih kha,"a lo ti a.

Zaklova chu, ka pa a lo zui leh tawh maw? Amah ka ngaihtuah hrim hrim pawh hian ka damlo mai dáwnin ka hria. A hmuh theih loha awm ka duh, heta a awm chuan ka pite inah ka insawn daih ang.

Tûkțhuan ei hunah an rawn haw ta a,Mawimawia pawh a lo tel ve leh ta, a rawn țawng leh lang lang tawh.

"Apa Mahlim, motor kha ka khalh leh châk e."

Motor an lo inkhaltîr lehpek a ni maw? Țûl lo chiang a ni.

Ka awm dan ngai rengin ka awm, ka lo melh lo va, ka lo be hek lo. Biakna chhan tùr ka nei hlei nem.

Mawimawia chuan min hmuh veleh chuan,"Au Vèn,motor ka khalh leh dáwn asin,"a ti vawr vawr a, Mahlima chuan pawm mah se ka en kân thiam khawp mai.

Ka nuih sak a.

"A ni maw? Chaw i lo ei dáwn em?"

"Aw, chaw ka ei thuai thuai ang a, apa Mahlima motor-ah ka chuang leh dáwn."

Apa Mahlima tih reng mai, ka ning. A hming hre lo leh a hming lam lova an awmna ramah kal daih ka duh.

Chaw ka ei kham ka kut sil lai chuan a rawn kham ve a ni ngei ang, ka kut sil chu a kut chuan a rawn tawk a, ka la sawn chiang kher mai. Rum zetin ka melh a, tah chuan a hmui kak, vûng deuh leh a mitko, band-aid bel chu ka hmu chiah.

"Sorry?"

Eng nge sorry a tih chhan pawh ka hre nek lo ve. A hmui te hi nulain an sehsak a ni ang, duh leh seh se, seh vûng bûr se, engatân mah ka ti hlawl lo.

LALHLIMPUIA - 28 By Dingdi Pachuau

Hnaah kal a țûl a ti lo em ni le? He ta țang chuan hnaa kal chu a buaithlak duh khawp ang chu, kâr chu a hla deuh hlek maithei a ni.

Thinrim zetin ka lu ka thing nar nar a. Hla mah se eng nge pawi? Ka lo buaina tùr a awm lo ém mai. Thil țûl lo a ni ka ngaihtuah hi.

Chhûnah ka nute nèn kan awm a, ka pî leh pute an lo lêng hlauh mai a, ka lãwm tak tak. Titipui se, an inkawm laiin ka chhuahsan thei ang.

Ka phone a rawn ri țang țang a. TV bul drawer-a ka dah avàngin ka nu chuan la chhuakin min rawn pe a.

"Rohlua,"a ti sap a.

"Hello?"

"Hey, i reh hle mai. I dam țha tawh em?"

"Aw, țha e, ka lãwm e. Nang?"

A nui hak a,"I țhat chuan a țha e. Kei pawh ka țha a ni mai. In pa a lo phei em?"a ti leh a.

"Ka sawi peih lo."

"Ka hrilh fiah tawh kha, awih tak ang maw? Buai chu a buai ve nasat hmel khawp chuan ka hria. A rawn phone tawh che em?"

Ka tho a, room-ah ka lût ta daih a.

"Ka ngaihtuah lo, ka buaipui peih lo ve."

"Chuti ang ringawt chu a dik ber lo, kârah naute a awm tawh a; chubâkah, inneih tawh chuan ințhen leh ringawt hi a țha lo. Han inhauh leh thinrimte chu a awm ve ngei ang, chu chu ințhenna phah nân hman miah loh tùr. Nang pawh tunah chuan i thin a la rim rih pawh a ni ang, ngaihdam a rawn dîl che a nih chuan rilru dang lo pu hrãm ang che."

"Min zilh tihna em ni?"

"A, zilh i ngai hlei nem. Thil nih dan phung ka sawi ve hrim hrim a nih chu."

"Ka lo hre reng ang e, ka pu."

Rohlua hi zawng, a fel ka ti ta thlâwt. A tìra ka ngei tehlul nèn khán, tunah chuan min țanpuitu ber a ni ta si. Min ngaizawng ang dáwn dáwn te khán ka hria a; mahse, a lo ni teuh si lo. Ka u mipa, kawng engkima min puitu-ah ka ngai hmiah tawh.

Message a lo thleng reng tawh.

*Kha pa kha ka thîk lo.*

A la thîk reng tihna. Nuam e, ka ti 'parât' zél ang.

Message dang a lo thleng zui leh.

*Min be ve tawh la.*

A thû lo ve chiang. Ani pawhin min be hlei nem, ka va be àwm bîk lo tak. Ka duh chen chen ka be lo ang, nuam chu a ti lo ve khawp ang.

*Ka rawn lût ve dáwn.*

Zahna a va nei lo tak ém! A rawn lût leh duh tak tak ang, ka chhuak lo a nih chuan. He pa hi chu aw, zahna pêk țhen hlek hi chu ka va duh tak.

*I rawn chhuah loh chuan ka rawn lût ang.*

A thu ka awih vàng ni miah lovin a rawn luh ka duh loh vàngin ka chhuak. Ka ngei lutuk, melh pawh ka melh duh lo. Melh hian nat vawng vawng theih se chuan, ka melh rum reng ang a, nâ tia a rùm tlawk tlawk thlengin ka melh rum ang.

"Pî, inah Nutei a awm em?"

"Aw, va lêng harh ve la?"

"Nia."

"Ka lo hruai ang che."

He pa hi chuh, chhûngte hmuh laia mawi lo taka chhàn chu ka duh chiah lo deuh si, nui lui sak chungin,"Ka lãwm e, a ngai lo mai,"ka ti sap a. Ka thinlung chhûngril chu a tâwt țûn mai. Rum deuhin ka melh a; ani lah chuan ding zet hian min lo melh ràn thung a.

Kal ka tum asin le, he pa hian lo kal ve a tum si chuan ka peih leh lo. Ina awm ka peih bawk si lo, a hriat loh laiin ka kal ang, ka riak nghal daih bawk ang.

Christina ka text ta mai mai a, ani lah chuan min rawn reply har ém ém zui. Games ka khèl leh a, tui fahran lo chuan an titi ngaithla pah deuh chuan ka khèl a.

Message a lo thleng leh ta.

*Ka rûk chhuah che kha i la hria em?*

Ngahnge ka hriat loh ringawt ang? Alzheimer natna nei ka ni hlei nem, hre mah ila, ka reply àwm lo chiang ém mai.

*I thinrim mitmeng hi a sexy ka ti.*

Zahna hi chu a va tlachham tak. Zahna hi hlàwm theih ni se, hlàwm tawp tawpa vawm chawrh a nia ka châk ni.

*Tihthinrim che hi a nuam e.*

La ta deuh deuh chuan. Nuam i ti maw? Ngawi tak rawh, nuam i tih tak tak leh tak tak loh chu kan hre khawp ang chu. Ka thinrimna chu chhûngril lamah chuan a inlet tup tup ni maiin ka hria.

Toilet-a a luh hlànin ka chhuak ta vat a, ka theih anga chakin ka kal ve a, ka lu a hai chuai chuaiin ka hria. Ni a sa bawk si a; mahse, luhlul ka chhuah ve hrãm hrãm a, nihliap la-in ka kîr lo ang.

Ka pîte in hi a hla lêm lo; mahse, keimah hi ka chak lo ém a, ka kal chak thei lo a ni. Chubâkah, ka hah ém ém zui.

"Min hlau a ni maw?"

Ka hawi lêt lo, ka ding bawk hek lo. Tlàn chhiatsan ka tum asin le, ka rilru a lo man thiam ve a ni ang.

"I hah a nih kha. Tuma'n min ûm hlei nem, chàwl rih rawh."

Hah tak ka ni, ka kaihza thâte chu a khùr dar dar mai. Ka thaw huam huam bawk a, chawlh lawk chu ka mamawh tak zet a ni.

Ka kutah a rawn man chat mai. Thinrim zet hian thinthlâk ka tum a; mahse, min chelh nghet lutuk.

Ka ding lo thei lo.

"Min thlah rawh."

Ka țawng ring lo, kan dinna hi kawng a ni a, kawng sîrah in a awm phei ve vek si a, mi hmuha inhau ka duh bîk lo.

"I tlu palh ang."

Thâwk ka la phawt a; chutah, amah hmachhawn zâwnga inherin,"Min chelh a ngai lo. Mi hmuh leh hriata inhau kher ka duh lo a nia,"ka ti leh hmak a.

"Ka pawisa lo; mahse, ka thlah dáwn lo che."

Min chelh nghet tak sauh sauh a. Ani'n pawisa lo mah se, kei chuan ka duh lo.

"Mi hmuha inkaih kher ka duh lo."

"Keiin ka duh thung alawm."

A thinrim ve miah si lo. A buaithlâk ka ti.

Kal pahin,"Naktukah hãw ang che,"ka ti ta ringawt a. Hãw thuai thuai teh se, a hmél hmuh reng hi a ninawm, zak lo bawk si.

"I tel lo chuan..."

"I zak lo'm ni?"

"Zak lo."

"Zak ve deuh rawh."

"I tel venaah chuan ni lo ve."

Min hmutute chuan nupa inngeih tak emaw min ti ngei ngei ang, kan inhnial char char tih pawh an hre tawp nâng.

"Min kalsan rawh."

Min chhàn ang chiah khán ka chhâng lêt ve ta. Vawi hnih lai kalsan tùr khán min ti a nih kha, a duh dan ka zàwm a...

"Kha thû kha sawi ngai suh."

"Engvàngin nge ka sawi loh bîk ang? Nang pawhin i sawi thei..."

A din chut avàngin ka ding lo thei lo, min chelh tlat si a.

"Kha kha ka sawi fiah thei."

"Sawi fiah a ngai lo."

"Heti ang hian awm suh.."

"Awm lo thei lova min siamtu hi tunge?"

"I inhmeh ve lo a nia."

Ka inhmeh zâwng kherin ka awm tùr tihna a ni bîk lo. Ka duh duh danin ka awm ang, ka duh duh ka sawi bawk ang.

"Sarah, min en teh."

A thu thuin ka awm tawh dáwn lo, tunah lek phei chuan ka chungah thû a nei lo.

"Mawh?"

"Ka en dáwn lo che."

"Ka tihpalh."

A tihpalh maw? Teuh lo, hre reng chunga tilui hi tipalh a ni thei ngai lo.

"Hre reng chunga tilui hi tipalh an ni ngai lo. Hre reng chunga tisual lui an ni."

A thaw hawk chu ka hria; mahse, ka en chuang lo ang. Ka luhlulna a kài tho laklawh tlat.

"Ka thiam loh a ni."

I sawi har, thil pawi a thlen tawh hnuah hlauh phei chuan 'Tihpalh' tih leh 'Ka thiam loh' tih hian eng mah a siam țha lo.

"Min thlah rawh, ka kal duh."

Min thlah chuang lo chuan min kalpui ta a, inbe lo chuan ngawi rengin kan kal a, rilru erawh a nuam ém ém chuang lo.

Veranda ațangin ka nutei chuan min lo hmu a, min lo àu chûl a.

"E, nangni pahnih chu, eng nge in lo tih dáwn?! Teh tlat che u chuan, in piang thar thut a ni lo maw?"

A lo nui sâng bawk a, ani hi zawng a fel ve a. Tuna ka hàw chhan pawh hi a hre ve vek tawh a, Mahlima chu dik lo ti viau mah se, ințhen a phal miah lo. Chance vawi khat tal pe leh tùrin min ti a ni.

"Nute, hei Sarah-i hian rawn lèn a duh a, ka lo hruai a nih hi."

A daw peih tak tak. Min zui a ni reng sia.

"A nih chu, i va fel ve! Lo kal r'u. Mahlima chu, Mawimawia'n a sawi nasa khawp mai che a, i lo lêng tih chu hria se chuan aw..."

"Khawiah nge a awm a?"

"A pa kha a zui chhuak a nih àwm kha. An lo hãw ve țêp tawh ang chu maw."

He pa hi heta a awm ve a nih chuan ka riak thei lo tawp ang. Riah chu tum phawt ang, a bulah ka awm peih lo.

"Pângzâwl hi a nuam ka ti reuh khawp mai. A mi chêngte in fel vâkah a khaw awm dan hrim hrim hi ka ngainat zâwng tak a ni."

"Nuam ve reuh asin. In hi a tam lêm lo nain nuam kan ti tâwk ve viau."

"A tâwk chiah alawm. Duhberte tual lènna a nih vàng pawh a ni ang, nuam ka ti khawp mai."

Kher kher a.

"In lo lêng khât sia, thingpui cial deuh leh a vei lam tui deuhin kan ti dáwn nia."

"Kan va lãwm dáwn ve aw."

Ka bul chêtah a țhu a, ka kut lah chu a thlah duh țhak lo. Nutei hmuh loh lai chuan phelhsak ka tum viau a; mahse, ka tum thlàwn a ni.

"Min thlah teh, a na a nia."

"Tãl tawh lo mai la."

"A lum si."

"Ka lo zâp dáwn che em ni?"

A țûl lo lutuk ringawt, over thei si.

"Nute, fan hi a on theih em? Sarah-i hian lum a ti deuh a."

"Theih tehreng mai. On ru, ka on lo mai mai a nih kha."

A thawh avàngin min thlah lo thei lo. Ka kut chu ka tuai vat vat a, a sen țân thei.

Ka țawng ve vak lo. An pahnih chuan an titi a, ka ngaithla a ni deuh mai.

Mawimawiate pawh an rawn haw har lo. Mahlima a hmuh veleh chuan,"Apa Mahlim, motor-ah min phur leh la,"a rawn ti nghal var a, a rawn pan nghal chat mai.

"Aw le, khawiah nge i lèn daih a?"

"Sawtah, mi inah kan lêng a."

Ka patea chuan,"Sarah, i țha tawh maw? I rawn lêng peih ve teh tlat a,"a ti ve a.

"Um, țha tawh e, ka țha lutuk."

Zanriah ei tùrin min sâwm ve nghal a, ka duh reng; mahse, he pa hi a ei ve bawk si chuan ka riak thei lo ang tih ka hlau. Ani lah chuan 'Sarah-i thû thû' a ti tlat bawk si, kan ei ta nge nge a.

Zànah pawh ka riak ta lo.

Hàw kawngah chuan,"Zanin chu keimahin ka mu duh tawh lo a nia,"a ti ringawt a.

Zak lo ve tak chu a ni.

"Ka bulah chuan i mu dáwn lo."

"Sarah..."

"A theih loh."

"Ngati maw?"

"I bulah ka mu peih lo."

"Mahse, kei chuan i bula mut ka duh alawm."

"Duh kha a tâwk."

Ka nuih a za deuh tlat a nih chu. Mahse, ka nui lo ang. Ka nui a nih chuan a huangtâu sawt mai ang.

"Sarah, khawngaihin?"

"Ni lo ve."

"Eng pawh ka ti ang."

"Hãw rawh."

"I tel lo chuan ka hãw dáwn lo ka tih kha."

"Eng pawh tih i huam a ni lo'm ni?"

"Nangmah kalsan zâwng chuan ni lul lo mai."

"Kalsan tùr chein min tih kha."

"Sawi tawh suh, Sarah."

Ka room-ah chuan ka luh hmain a lût daih mai. Ka nute lahin an lo ngaihtuah lo bawk si, he pa awm dan hi chu aw, ka va sâwi nawk nawk châk tak em!

Room-ah chuan lûtin,"Chhuak rawh, ka room a nih hi,"ka ti sap a, ka țawng ring ngam bawk si lo.

"Ka riak ve tawh dáwn."

"Ka room a nih hi."

"Ka nupui room chu ka room a ni ve tho."

Khumah chuan a vãng tan zâwngin a mu leh ta tlat mai.

"Nih leh, mu ang che."

Ka chhuak a, Tluanga room-ah ka kal ta daih a. Kawng chu ka kalh nghal rap a, a duh angin, ka bulah a mu àwm lo ém mai.

Ka phone a ri ral ral a, ka'n en chuan Mahlima leh bawk a lo ni. Ka chhâng duh teuh lo, ka hrem ve thei tih ka hre ve chiang ém.

Message a lo thleng leh zui.

*Zanin chu hnehna i chang chiang e.*

Ka nui sak mai. Ka nuih lohna rei tawhzia ka hre chhuak bawk. Mahlima lo kal pawh hi a zia riau hi, engkimah hnehtu a ni vek bîk lo tih a inhre chhuak ta tal alawm.

Thlalâk min rawn thawn leh a, hei zet chuh, ka la hmu ngai lo.

Cl- xi ka zirlaia an ina ka kal hmasak ber nia kan lâk kha a ni. Ka en ve pawh a phal loh nghe nghe kha.

*Sarah, ka ngai che. Ngai ém ém chung che hian engtin nge min kalsan tùrin ka tih theih che a i rin theih zâwk?*

LALHLIMPUIA - 29 By Dingdi Pachuau

Ngaih pawh min ngai ve ang chu. A nupui ka ni a; in khata a chènpui leh a chaw eipui țhìn ka ni alawm.

Mahse, min hnê ni khán ka hre sia. A nupui, 'Ka ngai che' tia min hrilh ngei hi ' Ka hnê' min tih kha.

Ka reply dáwn thut thut a; mahse, ka ti leh ta lo va, ka reply teuh lutuk tlat.

*I bula muta kuah che ka châk a ni.*

Tunah hi chuan ka chêr tawh a, ka thin a chhe bawk. Ka bula awm a nuam lo dáwn tih ka hria; chuan,kuah pawh ka nuam lo ang, châk suh se.

*Sarah, min reply teh.*

Ply dáwn nâng. Ka thinrim kha nuam a ti a ni lo'm ni kha? A thû anga ka awm chuan a țha nâng.

Ka mitthlaah a hmui vûng deuh leh a mit ko kak chu a lo lang a, kha kha engvàng nge ni ang? A hmui chu rin dan ka thiam mai a, a mit ko tak kha, an insual em ni le? Zu a in ang a, mi dang nén an intibuai a ni ngei ang. Mahse, engtin nge, engvàngin nge an insual ang le? Nula vàng em ni? Nge, thil dang vàng zawk?

Ka muthilh lai pawh ka hre lo, ka harh chuan khua a lo êng uau tawh a, ka nu pawh a tho tawh. Phone ka'n en a, dâr 5 chauh a la ni. Message a lo awm leh tawh; mahse, nizàn leh zîng lam biahthu a ni.

*Ka muhìl thei lo.*

*I muhìl tawh bîk elo?*

*Muttui le.*

*I hnâr ring si, min timuhìl thei lo.*

Hei kher hi chu ka awih lo. Ka hnâr ngai lo ve tlat.

*I lukham chu i sam rim chiah chiah a nam, ka chûl a, ka hnìm leh bawk a. Heti ang hi chuan min hrem tawh lo teh.*

Hei hi a duh dan chiah a ni alawm. Aizawlah pawh ka bulah a mut duh miah loh kha, tûn ataka mut a châk viau thu va awm suh.

Ka thawh chuan ka nu chuan,"I muhìl thei nange? Nge, i nuamsam lo em ni?"a lo ti vat a.

A ni lah tak a. Ka tho hma khât ve a, mak ti tùr chu a ni reng a ni.

"Ka harh laklawh a, ka mu peih tawh lo teh tlat a nih hi."

Mahlima pawh a rawn tho har lo. Ka nu eirawng bâwl chu a rawn pui ve a, he pa hi chu aw, a duhnaah hi chuan a fel thei a nia. Mâkpa sawisèlbo ang maiin a chêt leh tâk hi.

A phone a rawn ri ta ral ral a, TV bula a dah vàngin leh ani chu ei siama a buai daih avàngin ka han ban a, rawn call- tu ka'n en chu ka țim sak mai. Lucy a ni!

An la inbe reng a ni maw? E, la bia ang chu, a fa pawh a pãi alawm le, ka rilru natnate kha a rawn thar leh ta uai uai mai.Ka theihnghilh reng reng lo. Ka la sawi chhuak lo mai mai a ni, min ngaih thu a sawi leh hunah leh eng eng emaw a sawi chhuah leh hunah chuan ka puak țhak tawh ang.

Phone chu kengin ka va pe a, ka pasal lo ngaizawng duhtu hi eng ang mi nge a nih ang? Mi pasal a ni tih hre reng chunga lo zar tlat duhtu hi mi ang pângngai tak a ni thei dáwn em ni? Ka pasal pawh hian lo zir viau pawh ni se, pawmlai nei a nih chuan lo ngaihtuah loh ve mai àwm. Nupui pasal pawmlai nei, lo ngaizawng duhtute hian an kawppuite rilru na takin an siam tih an hre lo em ni le? Pathian pawh an hlau miah lo tihna a ni a, nakinah fanu fapate an la nei ang a, heti ang hi an chungah lo thleng ta se, an duh bîk dáwn em ni? An chi tuh ngei mai kha a sengtu tùr an ni dáwn asin. Hei hi an ngaihtuah ngai lo nge ni a, an ngaihtuah duh lo zâwk?

Ti ila, kei pawh Rohlua nèn khán inngaizawng kan ang viau pawh a lo ni maithei a ni. Ka pasal, thîkthu chhe zet hian mipa reng reng, an hming ka sawi hlek pawha thîk zel mai tân chuan a awm loh laia min lo kuahtu chu ka ngaihzawng anga a treat mai loh nâkah. Kei pawh hian ka tidik famkim vek bîk lo a ni. Keimah lamah 'Ka ngaizawng lo, kan inkârah engmah a awm lo' ti mah ila, mita lo hmutu tân chuan 'Thil awm a awm ngei a ni' tih chu rin loh theih loh a ni ang. Mahlima pawh hi ka thiam lo viau tùr a ni lo, hemi chungchângah kher kher hi chuan.

Mahse, ka insawifiahnate kha ngaithla ve se, thudik hriat tum ve se, thinrim leh inbiak duh loh ringawt kha zawngin eng mah a siam țha lo. A siam țhat loh mai piah lamah, thil pawi zâwk a thlen thei chu a nih hi. Mahse, min zâwt fiah lo a nih chuan ka zâwt bîk lo ang a, ka insawifiah tawh lo ang. Naute pawh a fa ni lo angah a ngai tlat a, a duh loh chuan ka fa a nihna angin ka enkawl ve thei tho ang.

Min biak loh hi chuan biak ka tum lo hrim hrim, melh pawh ka melh ngai lo. Mahlima a lo thlen aţang hian ka țawng tlêm hle a, țûl fêah lo chuan ka țawng mai mai lo, a hriatah chuan.

Hàw a tum lo em ni le? Hnaah a kal dáwn miah lo tihna a ni a, heta a awm reng hian țangkaina a nei tam lo khawp ang.

"...Ka phei ngei ngei a ngai a."

Pâwn ațangin ka nu nèn an rawn inzui lût a, kei chuan phone-ah games ka khèl a.

Ka nu chuan,"A nih tak chu, a zia lo tak tak a ni. I va phei chuan a fel duak mai ang ti raw?"a ti a.

"Aw, hun a duh rei lo tùrah ngai ang, ka lo phei leh vat ang."

Aizawlah a phei dáwn a ni maw? Lucy khan a rawn phone tak kha. Inentîr pawh a ngai leh tawh a ni mahna, a nih loh pawhin a hmu châk leh tawh pawh a ni thei a. Tenawm lutuk. Ka ngaihtuah peih lo ve, he pa hi chu ka haw tak zet a ni.

"Sarah, Aizawla ka phei lawk a ngai a."

"Aw."

Ka nu chu awm lo se chuan chhàn pawh ka chhâng lo ang.

"Ka lo lêt leh vat ang."

"Lo lêt tawh suh, i duh duh danin awm rawh. I duh leh Lucy pawh chu hruai lût nghal la, engatan mah ka ti lo ve,"tih vak vak ka châk a; mahse, eng mah ka sawi chhuak lo.

"Dàwrah buaina a awm deuh a, ka chinfel veleh ka lo lêt ang."

Dâwt pawh chu a va sawi thiam ve! Ka nute chu a bum a ni thei, kei chu min bum lul lo ang, ka fing ve tawh lutuk tlat.

Tluanga room-ah chuan a lût a, a va insiam a ni ang. A rawn chhuah chuan,"Ka thawmhnaw ka hàwn dáwn lo a, room-ah ka dah mai. A hnawk a nih chuan lo dah sawn mai rawh aw, Sarah,"a rawn ti leh kher a.

Rawn lêt leh chu a tum ve hle mai maw? Min chhaih kual chu a la duh tâwk lo ve hle mai.

"Motor thleng chu min thlah la, Sarah? Khawngaihin?"

Hm, ka va ning tak ém! Mahse,a thu awih rih ang, a kal thuai dáwn tho e.

Ka nu a awm ve reng avàngin ka hnial lo. Ka nu nèn chuan kan zui chhuak a, ani chu veranda-ah a ding ta daih a; kei erawh chuan motor a hùnna thleng ka zui a.

Motor bulah chuan a ding deuh dat a, ka kutah a rawn vuan nghal bawk a.

"Ka ngai leh sauh dáwn che a nih hi."

Min bum tawh àwm lo chiang.

"Ka rawn phone ang che. Chuan, a theih anga rangin ka lo phei vat ang."

"A țha alawm."

A langah țha ka ti mai mai, chhûngrilah chuan ka thinrim ùl mai.

Min en vang vang tih ka hria; mahse, kei chuan ka en duh lo tlat a, min en loh hnuah chauh ka en ang. Chu pawh, hla deuh hlek a tlàn hnuah chauh.

"I ei duhzâwng ka lo hawn țeuh ang che."

A tlãn ta. Thinrim ùl mah ila, a tlàn tâkah chuan ka bulah a awm dáwn rih lo tih ka hriat avàngin ka ruak deuh huai mai. Ka en zui vang vang a, tunah tak hi chuan ka thinrimna rilru kha khawiah nge a bo tâk thut ni? Ka ngai vawng vawng mai. Ka va duh lo tehlul ém!

"I mittui kha a tla ang e."

Ka nu min fiamna chu a thleng țêp tak takin ka hria.

In chhûnga kan luh hnu chuan," Bawihte, a tâwk tawhin ka hria. A lo phei leh hunah chuan hãw phei rual tawh ula a țha ang,"a ti a.

"Nu, tuna a haw phei chhan pawh hi i hria em ni?"

"Aw, dàwrah buaina a awm a ni lo'm ni?"

"A thu sawi engkim hi awih mah ta che."

"Dâwt a sawi i tihna maw?"

"Zîngah Lucy'n a rawn biak kha i hre nange? Lucy chu i hriat kha."

"A la hrilh lo che em ni?"

"Eng?"

"Lucy chungchâng chu."

"A insawi thiamna ka ngaithla peih lo."

"Chuti ang ringawt chu a dik thei hlei nem. A lo phei leh hunah țha takin sawi dùn ula a țha. In inngaihthlaksak tawn a ngai alawm."

"Ani pawhin ka thu sawi a ngaithla duh hlei nem. Ka dawh hrãm hrãm a, ka tuar țàng tâng bawk. Mahse, min ring hlawl lo a nih kha. Ka naute pawh a fa a nih a ring hlei nem. Nu, a hrehawm asin, ka pasalin ka naupai a fa a nih a ring duh lo tlat chu na tak a ni."

Ka rilru natna a lo thar leh a, ka mittui pawh a lo hnãi leh ta.

"Hrilh fiah nawn i tum leh hrim hrim em?"

"Tum lo, ka tum tawh dáwn lo. Ka rawn phei hma khán ka tum nasa tawh a, min ngaithla duh lo va, ka tum peih tawh lo."

"Tunah chuan a rilru pawh a dang tawh ang chu?"

"Ka hre lo le; mahse, kei chu ka tlâwm tawh dáwn lo."

Ka nu chuan min en rán a, ka zak lek lek. Ka rilru chapozia chu mak a ti a ni ang.

"Tlàwmna nun neih loh chuan inrem taka nun a har asin, Bawihte. Pakhat zâwk tlàwm a ngai țhìn alawm."

"A dik ka ti reng; mahse, tunah chuan ka tlâwm thei rih lo a ni."

Ka nu ka chhùn lo hle a ni. Ka nu hi chu a luhlul lo va, a rilru a nêm hle a ni. Kei ve thung hi chu ka tih loh lamah chuan ka luhlul khawp a, ka chapona rilru hi a tèr at țhin a ni.

Ngaihtuah ka duh lo hle nain nilêngin ka ngaihtuah si a ni. A thleng tawh ang em? Dàwra buaina chu tak tak em ni? Nge, chhuanlamah a hmang zâwk? Lucy hmuh a duh vànga chhuanlam mau mai a nih ka ring mah zâwk. Rinhlelhna chuan ka ngaihtuahna a hruai a, thil ni lo lo ka zêldin chho a. Heti ang hi Rohlua nèna kan lo awm dùn a hmuh khán a ngaihtuah ve tho ang em? Thil ni thei tak tùr chu a ni.

Zànah ka mu hma hle a; mahse, ka muhìl thei lo. Min rawn phone ka ring a, min la phone si lo. Kawng lakah tawhsual a tâwk em ni ang? Nge, min theihnghilh leh tawh? A hmasa zâwk ai chuan a hnuhnung zâwk hi ka ring. Mipate hi chu, an rintlâk mawlh loh.

Ka muhìl dáwn siar siar tihah a rawn phone ve ta. A va hun lo tak, ka chhâng lo dáwn zâwk em ni le.

"Hallo?"

"Hey, i muhìl tawh elo?! In ka thleng ve chiah a."

A ni maw!!! Lucy a pan nghal tihna em ni? Nge a thlen veleh dàwrah a kal nghal tihna ni ang? Chuti a nih chuan a va chauhthlâk dáwn ve.

"I chàu em?" Ka sawi tum a ni miah lo, a lo chhuak ve tawp a ni zâwk.

"Chàu viau nain min ngaihtuah tih ka hre thei a, ka hahdam huai mai."

Kha kha alawm ka duh loh chu.

"Ka ngaihtuah lo che."

Leh hrãm hrãm chuan.

A nui hak chu ka hria a, ka beng bul mai a nih vàngin ka mûr chiai chiai thei nia. Ka va duh lo tak ém!

"Min ngaihtuah lo tih i sawi hriat pawh chu a nuam tho."

"Ka mut a chhuak a nia, i sawi tùr chu sawi vat vat teh."

Ka va sual kher kher tak ém!

"I mut chhuak aw chu a sexy hle mai. Tunah tak hian ka bulah awm la chuan aw..."

"Dàwrah chuan buaina a awm tak tak em?"

"Min ringhlel tihna a ni maw?"

"Sawi mai la."

"Awm tak tak e, a la fel thei lo."

"Ka hriat ve chi a ni em?"

"Hahdam takin awm zâwk rawh, naute tân leh nangma tân a țha ber."

"Ka fa tùr chauh a nih hi."

"Ka ngai hle mai che."

"Nula tla hlang an tam ang chu."

"I bulah lungmuang taka mut ka châk a ni."

Thil dang chu a sawi duh bîk lo ve hle mai maw. Min ngai ve tak tak pawh a ni maithei a ni, dâwt a sawi a nih loh chuan.

"Mut ka châk viau nain ka bulah i mu dáwn si lo nèn, ka peih lo hle mai."

Ka khawngaih ve det.

"Intleuh la, damdawi eiin mu rawh."

"Ka bulah awm la ka ti a ni, Sarah. Ka bulah, ka kuah theih tùrin."

Ni lo e, kan inkâr a hla lutuk.

"I chàu a nih kha. Min be tawh lovin inbual la, mu rawh."

"Mahse, ka be duh si che a..."

A aw ațang chuan a chàu hluah hluah tih ka hria, mu hahdam se ka duh, haw viau mah ila ka khawngaih ve tho. Ka fa lo piang tùr pa a ni miau a.

"Inbual phawt teh."

A muhìl ringawt ang tih ka hlau.

"Ka chàu tak zet a ni."

"Um, ka hria e. I awmna ațang khán tho la, bathroom pan rawh le. I inbual loh chuan i mut a tui dáwn chuang lo a nia."

"Ka va peih lo tak!"

"Tui taka mut i duh chuan i inbual a ngai tih i hriat kha."

Ka pasal a ni a, a chìn țhan hi chu ka hre ve tawh alawm.

"Aw, ka kal dàwn e."

Kan inbiak zawh hnu chuan muthilh leh ka tum a; mahse, ka mut chhuak kha a bo vek. Khumah chuan ka muthilh theih loh avàng chuan ka che sek a, thawh leh ém chu ka peih lo si a.

Min rawn tiharh tê tê a, min muthilhsan leh daih si. A nih loh tal pawhin min rawn mangțha ve tal àwm a nia.

Beep beep.

Ka phone chu ka en vat a.

*Ka mu dáwn chiah e, Sarah. Damdawi pawh ka ei tawh aw. Tui deuhin i mu dáwn nia. Biak leh che pawh ka duh viau nain i mut kha a chhuak tawh si a.*

Ka va reply teuh tak.

A hnu deuhah a rawn ri leh.

*Mangțha muttui sûk sûk.*

Min tiharh a, ka muhìl thei tawh țhak si lo. 'Muttui' te chu min ti ve tak a, ka muhìl thei ngût ang em?

Min bia a, ka rilru a tino vek mai. Heti ang chuan ka tlâwm hneh leh dáwn lutuk. Rilru khawng taka ka awm a ngai. Eng nge ka ngaihtuah tâk ang? Rilru sak taka ka put theihna tùr, Mahlima min chhànna țawngkam ' Ka ning, min kalsan rawh'. Hei hi ka ngaihtuah ngat ngat a ngai.

LALHLIMPUIA - 30 By Dingdi Pachuau

Zàn ka mut țhat loh avàngin ka zîng tho chu ka mit a thial ûrh mai. Mut ka duh tehlul nèn, nizàn ka muhìl thei tlat lo kha mak ka ti. Ka nu pawh ka pui peih lo, ka nguai bûr mai, ka lu a la na fek fek zui.

Chaw ei dáwnah min rawn phone leh tlat. Amah vàng vekin nizànah ka muhìl thei lo va, ka thin a tirim a nia. Ka chhâng lo dáwn em ni zâwk?

Ka nu chuan,"Chhâng ta che,"a lo ti thuai a, phûr lo zet chuan ka chhâng a.

"Eng nge ni ta?"

"I tûkchhuak a fuh vak nange?"

"Nizànah min tiharh tê tê a, ka muhìl thei tawh hlei nem."

"A va pawi ve, tiharhtu che chu a mãwl hle mai."

"Mãwl, dâwt sawi hrât..."

"A hrât vak lo."

Dâwt sawi hrât tih chu a duh vak bîk lo a ni maw.

"Ka kal dáwn chiah a, vawiina ka tifel thei a nih chuan ka rawn phei nghal ang."

"A awlsam ngawt dáwn em ni?"

"Tihfel ka tum dáwn alawm. I bula awm leh thuai ka duh si chuan tihfel thuai a ngai si a ni."

"A țha alawm."

"Tifel thei tùrah ngai ang. Ka tihfel zawh veleh i ei tùr ka lei ang a, ka rawn tlãn nghal ang."

"Lucy i tlawh dáwn lo maw?"

Ka rilrua thil awm ka lo sawi chhuak palh! Ka thîk angah a ngai ngei ang chu.

"Tlawhna chhan tùr ka nei em ni?"

"Ka hre lo." Ka hre reng sia; mahse, tuna sawi chhuah hi ka duh vak lo. Hmaichhanah ngei, amah hmu thei ngeia sawi chhuahtîr ka duh zâwk.

"Lucy chu ka thawhpui hlui a nia."

"Nia."

"Sarah, Lucy nèn hian min ringhlel a ni maw?"

"Thil awm awm lo se, rinhlelhna tùr i awm lo ang."

"Eng mah a awm lo."

"A țha a nih chu."

"Sarah, kan inhmuh thuai a ngai a ni. Engkim sawi fel tùrin."

"Sawi fel tùr a awm em ni?"

"Awm chiang e, a bul ațangin engkim kan sawi ang. Sarah, Lucy hi ka ngaizawng lo asin. Tùn atân chuan hei chauh hi ka sawi rih ang, keimahah chuan ani hian awmzia a nei lo, nupui ka nei tawh reng che alawm. Kan inneih thutiamte kha ka hre ve reng asin, hmeichhe dang ka mamawh lo."

"A nih, a naupai chungchâng kha?"

"Ka fa a ni lo."

"Tak tak maw?"

"Aw, a rài thu kha naute pa hriat kha a duh lo va, tihtlâk a duh a."

A va râpthlâk ém!!!

"Nakinah, ka lo phei hunah ka hrilh chiang vek ang che."

Mak ka ti kher mai. A fa ni bawk si lo chu, doctor kha a hmuhpui bawk sia; chubâkah, ka hriat a hlauh hmèl viau bawk si. A nupui ka nih chuan min hrilh ve mai àwm.

"Sarah, a thurûk chu ka zêppui a ni. Kei lo chu rin ngam a nei lo va."

"In va inkàwmngeih àwm ve?" Ka ti-el lek lek tih a man thiam khawp ang chu.

"Company ka thawh tirh ațanga ka hriat a ni alawm."

An inhriatna a rei ve thawkhat tawh a nih chu.

"Kal tawh rawh."

"Sarah, ka lo phei hunah chiang lehzualin ka hrilh fiah ang che. Kan inkâra eng emaw awm tlat hi ka siam țha vek ang."

Ka rilru chu a nuam deuh hlekin ka hria. Lucy naupai chu a fa a nih loh chuan tu fa tak ni ang maw? Nge min tihder mai mai zâwk? Kei hian awlsam tèin ka lo awih leh mai dáwn tihna em ni? Ka rilru a tibuai leh țan ta. Rilru nawm chhûng a va rei lo ve.

Chaw ei laiin ka pa chuan,"In awm dan hi ngaihtuah țhat a ngai, Mahlima lo phei hunah sawi fel ang che u. Keini lo sawipui che u in ngai lo, puitling leh nupa in ni a, hetia awm reng hi a țha ngai lo,"a ti charh charh a.

Ka nu pawh chuan,"Ni e, i pa sawi chu a dik a ni. I lo phei hi a àwm lo ka ti lo; mahse, ințhen phah nân hman miah loh tùr. Mahlima pawh a inthiam lo viau chuan ka hria. I pasal a ni a, i ngaidam thei tùr a ni. Nang pawh thiam lohna tam tak i nei tho ang, inngaihdam tawn hi a hlû. Chapo viau tùr a ni lo a nia, nupa chu han inhnial leh inkalh rap rap châng a awm lo thei lo,"a lo ti ve bawk a.

Ka ngawi reng a, heti ang lam hian min la zilh ngai si lo va, nuam ka ti hran lo khawp mai.

Ka pa vêk chuan,"In inneihna thutiamte kha i vawng reng tùr a ni. Bawhchhiat mai mai tùrin i chham lo va, Pathian leh mi dang hmaah thu i tiam a ni tih hre reng ang che. Pathian hmaa thu tiam kher zawng i bawhchhe tùr a ni lo ang. Ka fanu neihchhun i ni a, ka chhuang ém ém țhìn che. Thil kal tawh chu kal liamtîr la, i hma lam hunah ka chhuan lehzel theihna tùr chein i nun zel ka beisei tlat a ni,"a ti leh dap dap a.

Pasal ka neih danah ka chhûngte lung ka dum tawh lo tih ka hria. Ka pa beiseina pawh ka tihchhiatsak viau tawh bawk a ni. Ni e, ka hma lam hunah hi chuan min beiseina hi chu tihchhiatsak loh hrãm ka duh ve tho, tum pawh ka tum viau. Mahse, kan hma lam hun hi tumahin kan hre lo chu a nih hi.

Chhûnah chuan ka inngaihtuah ve nasa mai a. Ka rilru tihkhauh ka tum ve tehlul nèn, ka pa thu ka hnial ngam dèr lo. Mahlima zui haw leh tùrin min duh tih a hriat a, ka nu lah chuti bawk. Nia, kan inneih thutiam chu ka theihnghilh bîk lo; mahse, han tihtauh khum leh deuh sak chu ka la tum tho tho. Lo thleng leh pawh ni se, nuamsa tak chuan ka zui haw lo khawp ang.

Tluanga room-ah chuan ka lût a, Mahlima chuan a bag chu a lo dah fel roh phian. A T-shirt pakhat chu ka phawrh a, ka'n hnìm chhin chu a rim a nam vang vang mai. A cologne ngainat ém ém rim pawh a nam tel tho nia, a bâl tawh a nih dáwn hi.

Christina-i'n min rawn video-call.

"Hey, i la haw phei nange?"

"Phei mai mai lo."

"Phei tawh ta che, i hrem rei tawh ém mai."

"Tu lamah nge i țan a? Keimah nge amah?"

"Khai, Bawihi, ka țan daih zâwk che tih i hriat reng kha." Ei tùr a siam pah mawlh mawlh a.

"A nih a hnu, ka la hrem leh rih dáwn a ni mai."

"Nula dang a hawi daih mai ang?"

"A thû alawm."

A rawn nui kar kar a.

"Ka ti ve mai mai a nih kha, a duh hleuh hleuh ém che kha maw. Naute nei thuai la, a fel vek mai ang."

"Duh hunah a neih theih ringawt loh aw."

"In ţang nasa lo a ni ang chu."

"I ho ém mai."

"Style hran hran in hmang lo a ni ang?"

"Ka ning, ka be peih lo che."

A la nui tak awr awr a.

"Intithei viau țhìn suh, ka la be duh che alawm."

"Khati ang lam kha sawi tawh suh ang che."

"Eng lam maw?"

A'n hre lo der vêl.

"Lo zin la?"

"Haw phei i tum lo tak tak em ni a?!"

"La haw ang chu."

"Ințhen ringawt loh tùr. In thil lo paltlang tawh zawng zawng ngaihtuah la, lêt leh hrãm ang che. In ințhen hi ka remti thei lo."

Nia, ințhen tak tak chu ka tum a ni bîk hlei nem. Ka thinrimna hre ve se ka ti mai chauh alawm.

"Ka lo ngaihtuah ang e."

"Ngaihtuah hrãm ang che, ka ti tak tak a nia. Luhlul chhuah lo hrãm rawh aw."

Ka pîteho duh dan pawh a nih vek ka ring. Hãw leh tùrin min duh vek ang, ințhen ringawt chu an phal dáwn lo sa. Kei pawh ka duh dan tak a ni bîk hran lo, ka thinrim rih mai chauh alawm.

A thawmhnaw chu ka hnìm vang vang a, ka maimichhîng pah bawk. Tunah hian ka ngai ve tho, ngaih ka duh lo viau nain. Duat deuha min kuah angte khan min kuah leh se, keimah chauh min hmangaiha min duh a ni tih min hrilh se; mahse, chu chu ka duhthusàm mai a ni.

Tlai dâr 3 pelh hretah min rawn phone leh a.

"Sarah, ka rawn phei dáwn chiah. Lunglei lam ațangin ka rawn kual ang, ka pa ka hmuh a ngai a. Ka hmu zawk ang a; chuan, ka rawn tlang ang."

"I tifel thei ta em ni?"

"Aw, tifel zo chiah."

"Hmanhmawh vut vut lo la."

"I bula awm vat vat tawh ka châk a ni."

"Ka la ringhlel reng maithei che asin."

He ka lei zet hi chu aw. Sawi chhuah kher a ngai lo asin le. Engatinge ngaihtuah chiang lova ka țawng chhuah ve ziah le? Ka va inhaw tak.

"Sarah, ka insawi fiah thei alawm. Ka lo thlen hunah a fel vek mai ang. I rilru tùr chu ka hriat thiampui lutuk che. A, ka lo thlen nghâk phawt mai ang."

"A țha alawm."

"I ei tùr pawh ka lei vek tawh. Ei châk bîk riau i nei em?"

"Ka lãwm e,nei lo ni mai rawh se."

"Chuan, Mawimawia motor tùr pawh ka rawn keng phei nghal a."

"A va lãwm dáwn tak. A hlim ngawt ang chu."

"Kei deuh, ka hmu thuai thei dáwn che a..."

"Lo tlãn fîmkhur la."

Ka chah lo thei lo. Kârkawng a hlâ a, chêtsual theihna a awm alawm, kawng a țha lo si. Chubâkah, mi chêtsual zâr a zo theih tho bawk.

"Aw le, naute lo enkawl țha la."

"Ka naute bîk a nih hi."

"Ka tel lovin a lo awm thei bîk lo."

"Mi dang faah i puh kha."

"Ka fa, kan fa a nih kha."

"Mahse,a pãitu ka nih hi, ka thû zâwk."

A nui hawk a.

"Ka duat dùn dáwn lutuk che u."

"Min duat loh ém kha."

"Ka duat tawh dáwn che u alawm. Ka duat dáwn lutuk tlat."

Nuam ka ti veng veng nia. Ka va inngei reuh tak. Heti ang ém éma thlahlel si chuan a lo kal laite khán țha taka lo biak mai tùr a nia.

"I lo thlen chin min rawn hrilh zel la."

"Ok, min lo ngaihtuah reng reng suh."

Zàna rawn tlãn tùr a nih avàngin a ngaihtuah loh theih loh. Chhùn chu ni se a zia deuh ang.

Ka nute pawh ka hrilh chuang lo. Dâr 3 : 15 velah lo chhuak phei thei ta se, zàn dâr 8 /9 velah Lunglei a lo thleng thei ang a, hetah chuan dâr 12/1 velah a lo thleng hman maiin ka ring. Min rawn phone zel dáwn thova, a rawn thlen chin chu hre zel tùrah ka inngai. Tluang taka lo thleng thei tùrah ngai ang.

A rawn thlen chin chu min rawn hrilh zel a, a rawn tlãn chak phian mai. Mahni chauhin a ni bawk a, a àwm ve tho. Zànah phei chuan motor vei vâk a tlêm a, a tlãn chak thei viau ang chu.

Dar 8 rîk hma hretin Lunglei a lût. A rawn tlãn tluang chu ka lãwm hle mai, a pa a hmu zawk ang a, a rawn tlãn leh char char ang. A chàu duh ngawt ang.

Ka nute hnênah chuan Mahlima a rawn phei mêk tih chu ka hrilh ta a, ka nu chuan," Zànah chuan inngaihtuah a na duh si a, a țha ka ti lo ém mai a,"a lo ti a.

Ka pa chuan,"Eng ém a ti nâng, a lo thleng thuai mai ang,"a ti thung a. Ka pa hi chuan thil hi a țha lam hian a thlîr țhìn a, a châng chuan țha ka ti a, a châng erawh chuan thil țha vek hi kan chungah a thlen loh avàngin ka pawm lo țhìn.

Min rawn phone tawh lêm loh avàngin ka mu a, min rawn phone țûl a ti tawh lêm lo a ni ang. Ni e, Aizawl ațanga a rawn phei kha chuan ka ngaihtuah ém a, tunah pawh ka ngaihtuah tho nain ka ngaihtuah nêp ve deuh ringawt.

Ka lo muhìl sek a ni ang, ka phone riin min tiharh a, a lo thleng hnai tawh a ni ang.

"Hello?" Ka aw chu a phak teh ang chu. Mahse, Mahlima chuan sexy a ti leh viau ang chu.

"Ka pi, he phone neitu hian accident a tâwk hlauh mai a..."

Ka thin a va phu nasa tehreng ém!

"Engtin ...maw??!! Accident maw? Ni lo..."

Ka au ring deuh a ni ang, ka nu a lo tlãn lût vat a, ka khûr dawt dawt mai.

Ka phone chu min lâksak vat a, a be chhunzawm nain an țawng mumalin ka hre lo. Ka pa pawh a rawn lût nghal a, ka nu hmél ațang chuan chanchin țha a ni lo tih ka hre thei nghal mai a; mahse, rin loh hrãm hrãm ka la duh tho.

A accident thei lo tawp ang. A fîmkhur ve thei ém asin. A motor chuan chian lohna emaw a nei tal a ni ang, ka pasal hi a accident thei lo ang.

"Nu, ka... hre sual... ti raw?"

Ka nu chuan ka taksa khûr dawt dawt min kuah a, min hnem tum tak hian min chûl a.

"Bawihte, tunah Serkawn damdawi in an panpui mêk a ni. Zobawk bulah Truck pakhat nèn an insû a, ani zâwk chu vànduaiah țangin a motor nèn kawng thlangah an liam a ni àwm e."

Ni lo, a theih loh. Min hmuh a châk a, zàn pawh Lungleia riak duh lovin a rawn tlân ve țâwk țâwk a ni a, heti ang thil țha lo hi chu a chungah a thlêng thei lo ang, ka phal lo, ka phal lo reng reng.

"A theih loh!"

Ka mittui a luang zung zung a, ka inhnît hlawp hlawp bawk. A chungah thil ţha lo a thleng thei lo, naute nèn min duat a tum asin. Ei tùr tam tak min rawn lei țeuh bawk, chuti maiin boruakah a thâm ral thei lo.

"Bawihte, kal nghal i duh em?"

A ngaihtuahawm hle tihna a ni ngei ang. Tunah zàn dâr 11 vel a ni tawh a, ka pa sawi chu zawm ka duh. Kal nghal ka duh. Ka kal loh chuan ka muhìl thei dáwn chuang lo, ka thlen hma leh a țha a ni mai.

Ka pate (Mahlima pa) pawhin min rawn phone. Ka nu țap ri ka hre thei. A thî em ni?!! Ka nu hian eng mah min hrilh țha duh lo tihna em ni zawk? Ni lo, a thleng thei lo. Lalpa, thil țha lo ber thlentîr lul suh.

(Sunday Bonus)