☆LALHLIMPUIA☆ -31 - 36(Last) By Dingdi Pachuau

 LALHLIMPUIA - 31 By Dingdi Pachuau

Ka rilru a buai nuai nuai a, eng mah chiangkuang takin ka ngaihtuah thei lo. Mahlima chu engti angin nge ka hmuh ang tih deuh chauh ka ngaihtuah ni berin ka hria.

Thisen nèna inchiahpiah nuaia awm tùrin ka mitthla lo thei lo. Chu chu ka duh lo ém ém si, ka maimichhìn apiangin chuti ang chuan ka hmu zel bawk si. Lalpa, a nunna i lâksak thei lo a nia, kan fa lo piang tùr nèn hian kan la mamawh dáwn chauh asin, khawngaihin a nunna vênghim hrãm ang che aw.

Ka pum ka chûl a, a la puar hran lo nain nunna nei naute chu a rawn insiam mêk a ni. Ka pasal nèna ka thisen ngei chu.

"Naute, i pa hmu tùrin kan kal mêk a, a nunna lo chelh hrãm hrãm rawh. Ka mamawh a, nang pawhin i la mamawh dáwn chauh. Lo țanpui hrãm rawh aw,"tiin ka pum chhûnga ka naute chu ka be mawlh mawlh a. Ani hian a pa a la hmél hriat loh bãkah kei hian ka la hriattîr lo hrim hrim a, tûn dinhmunah hian hre thei tùrin a pa nunna chu vàn angelte'n an lo chelh dinsak hrãm ka beisei tak zet a ni.

Lunglei kan thlen lai pawh ka hre chiang lo. Ka chiang lo riai ni berin ka hria, Mahlima pawh ka hmu hman lo. Ka nuin ( Mahlima nu) min lo hmuh veleh min țah khum avàngin ka țap leh lo thei lo va, ka chàu lutuk. Ka taksa leh rilru chauh avàng chuan ka hik mup mupin ka hria a, ka khawhmuh a tãwi zo va, ka nu chu ka nghèng ta rawk rawk a.

Ka harh chhuah chuan kei pawh damdawi in khumah chuan ka lo mu ve reng a lo ni!

Mahlima ka hmuh ve theih meuh chuan ni 3 lai a liam tawh, a accident ațangin. A lu chu bandage-in a intuam vâr lûk a, a bulah chuan khâwl eng eng emaw ni a inhûng nual mai. A hmai chu a vûng a, a duk chur bawk. A bân leh a ke ni se, an cher bur bawk. Ka hmuh dan hi ka hmuh duh dan a ni mawlh lo, ka lung a awi lo.

Ka țap miah lo ang tiin ka intiam na a, ka mittui a tla leh tho. Ka hnaih phei a, a hmai chùl theih lai chu ka chûl a, a vâwt thlar mai. Minung hmél a pu lo ka ti, ka va khawngaih tehlul em!

"Mahlim, min ngaidam rawh aw, ka thiam loh vek a ni."

A che lo va, a meng hek lo. Ka țawng chu a hre thei lo em ni le? Nge, ka chungah a thinrima min chhàwn duh lo zâwk?

"Mahlim, ka biak che hi, min chhâng teh. I thinrim lo ti raw? En teh, thinrim chhan tlâk pawh ka nih loh hi."

A biang chu ka chûl ka chûl a, ka mittui a tla zawih zawih bawk; mahse, ka țap lo ang.

"Ka pumte hi i chûl châk lo em ni? Kan naute, kan pahniha fa ngei ka pãi mêk asin. Naute i duh ém kha, lo meng tawh hrãm la. I hmu chãk ve tho ti raw? Ka pum hi chûl teh, naute ka pài hnuah i la chûl lo a nia, a pa chûl a châk a nia."

Ka naute, ka pum chhûnga ka pài ngei chuan ka mittui a ko chhuak leh zel bawk si, hrehawm ka va ti tak ém!

Ka pum chûl pah chuan,"Naute, hei hi âpa a nih hi. Tuna i hmuh dan hi mak i ti maithei a; mahse, thil țha lo deuh a chunga a thlen vàng a nia. Mahse maw, naute, âpa chu a chhel a, a tuar chhuak ngei ngei ang. Nakina i lo pian chhuah hunah chuan a mitte a lo meng thei tawh ang a, a duatin a duh dáwn teh che a nia."

Mahlima hmél chu ka en leh vang vang a,"Ih maw, kan inkâr thil sawi fel i tum kha. Lo tho la, min hrilh teh. Ka mita en chung ngei hian min hrilh rawh; chutichuan, ka awih ngei ang. Phone-a inhrilh ringawt chu thu dikah ka pawm thei lo a nia, tho teh. I tho peih lo a nih pawhin meng tal la, aw?"

Ramhluna leh Christina chuan min ngaihtuah hle a, Mahlima kanin an rawn kal reng mai; mahse, Mahlima chanchin chu a ngai reng a ni. Hma a sâwn àwm ka hre lo va, hniam lam a pan àwm pawh ka hre chuang lo.

Rohlua pawh a rawn phei zawk. Hmunpui lam zâwk panpui min sawi hmuh a; mahse, kei chuan thû ka nei lo. Ka pate tih dan dan a ni mai. Hma sâwn angin lang lo mah se, a bula awm reng ka duh a, hmun dang an panpui daih chuan ka hmu thei lo ang tih ka hlau zâwk. Mahse, a tâna țha zâwk tùr chu ka pate'n an hre lutuk ang, an thu thu a ni mai.

Motor a liampuina lai chu kawng ațangin a thui lo; mahse, a vànduai ve ém a ni. A motor a chhe hle a, a motor chhiat chu thuhran, a bân leh a chàwn ruh a tliak a, a lu a sawh bawk. Vun țhui tùr neuh neuh pawh a nei nual. A chal leh a biangah ringawt pawh hmun nga laiah an țhui a nia, a na dâwn si a, ka khawngaih tak zet a ni.

Aizawlah pawh entîr duh lovin Mumbai an pan nghal a, eng hospital nge an pan dáwn pawh ka hre lo. Eng mah ka ngaihtuah thui thei lo va, Christina-i'n min awmpui chawt mai a ni. Thil ka ei theih loh bãkah zàn ka mu thei bawk si lo, ka chàu ngawih ngawih. Muthilh ka tum ve pawhin chanchin țha lo-in min rawn dêng ang tih ka hlauh bâkah ka mit ka chhîn apiangin Mahlima hmél, thisenin a chiahpiah nuai mai ka hmu zel a, ka mit ka chhîng ngam lo a ni zâwk.

Inah ka nu nèn kan awm a; mahse, min hringtu ka nuin min awmpui ve bawk. An pahnih chuan min ngaihtuah ém ém reng a, ka ei tùr thil țha tinrêng min hlui chung pawhin ka bp a hniam ém avàngin vawi hnih damdawi inah ka lût. Ka ngaihtuahna a vâk nasa țhìn hle a, Mahlima hi dam hian a rawn haw tawh lo mai ang tih hlauhnain ka khat a, ka thil ngaihtuah avàng chuan ka lo țê chhuak leh vak țhìn. Mi â ka an lohna tùr àwm awm hian ka hre lo. Ka nute pahnih chuan naupai lai ka nih vàngin min ngaihtuah ém ém a, nia, ngaihtuah ka ngai ve bawk a ni.

Ka nuin min zilh a.

"I pasal heti anga a awm avàng hian nang chu intipachanga chak sauh tum zâwk tùr i ni asin. I pasal lo haw hunah enkawl a ngai ngei dáwn a, heti ang chuan engtin nge i enkawl theih tehlul ang? I enkawl ngei a duh ang a, nang pawhin enkawl i duh lo em ni? Nge, i pasal chu mi dangin enkawl se i ti? Intihchak i mamawh a, ei tùr pawh tui ti lo chung chung pawha i ei a ngai asin. A lo haw hunah chak tak leh hrisêl țha taka hmuh che a beisei ngei ang, naute hrisêl tak nèn. Tùna i dinhmunah chuan hmu ta che se la, amah pawh a nat phah sawt ang chu. Inngaihtuah harh la, nangma tân chauh ni lo, naute leh Mahlima tân chak tak leh huaisen takin awm teh khai."

Ka ngaihtuah a, a dik riauin ka hria. Thil țûl lo ka ngaihtuah a ni, Mahlima rawn haw chuan hrisêl tak leh chak taka min hmuh a duh ngei ang, ka naute nèn. Tunah hi chuan ka naute hi ka hmangaih lovin hrehawm rilțâmin ka dah reng tihna a ni. Ei tùr ka ei țhata ka mut țhat chuan naute tân hrisèlna a lo ni a, țha takin a lo piang thei ang. Chubâkah, Mahlima pawh ka enkawl thei ang a, duat takin a mamawh zawng zawng ka tihsak thei dáwn asin.

Ka nu min zilh ațang chuan ei tùr chu châk lo chung chung pawhin, naute tân tiin ka ei lui hrãm hrãm a, țap hmél reng pu lovin nuih luih ka zir bawk a. Kan in bula pangpâr chu zîng tin ka thlîr a, a hnah tla a awm chuan ka tifai țhìn. Ka nu ( Mahlima nu)chuan a phal lo hle țhìn a; mahse, ka tilui ve tlat. Exer ka lâk a ngai a. Bâkah, ka tân a țha hrim hrim. Ka awm mai mai chuan thil țha lo ka ngaihtuah zel a, chu chu ka naute tân leh ka tân a țha lo a ni. Tin, ka hman châng apiangin Mahlima tân liau liau ka țawngțai bawk. Ni khatah àwl hun ka ngah si a, ka àwl châng apiangin ka țawngțai a ni ber mai.

***************

Mahlima rawn lêt lehna pawh thla thum zet a liam leh tawh. Tunah chuan hma a sâwn ve tawh lutuk. A țawng țha thei lo nàngin a hriatna a hloh lo thung. Țawng a harsat chhan hi doctor-te pawhin a chhan an hre thei mai lo, a thluak lamah tlêm tê dik lo hlek a awm a nih an ring, biak peiha a êng zâwng leh a țha zâwnga fuih tùrin ka pate an rawn chah a ni.A bân leh a chàwn ruh tliak kha a la hmang ngam lo va, a kal thei rih lo bawk. A nerve a sawh chhe deuh a ni àwm e. Inthiar tùr pawhin a kal thei lo, naute ang maiin buaipui a ngai a; mahse, ka buaipui vek thei.

Ka pasal a ni a, ka enkawl tùr a ni alawm. Ka puar ve tawh a; mahse, ka la inzo rih khawp mai. Ei tùr ka ei țha bawk a, ka țha lutuk. Naute pawh a hrisêl țha a, ka pasalin min kalpui theih loh avàngin ka nuin check-up nei tùrin min hruai ziah.

Mahlima hmél dul raih mai hmuh hi hrehawm ka ti a, a bulah erawh khawngaih hmél ka tilang ngai lo. Ka bia a, ka fiam a, dam țha pângngai ang chiah chiahin ka en lui țhin. Zànah a lam hawiin ka mu ziah a, min kuah theih loh avàngin tihnat hlau tak chungin a kut chu ka chelhsak țhin. Zangthal zâwngin a mu char char mai țhìn a, a taksa a kham ka rin țhin avàngin leh ka va delh palh ang tih ka hlauh vàngin ka hnaih vak ngam lo.

A inthlahrung hle tih ka hria, a rilru a pângngai vek si a, a ni duh khawp ang. Hmel hlim takin ka be reng a, a chângin ka pum chu ka chûltîr a, naute chungchâng ka sawipui țhìn. Naute chanchin ka sawipui hi chuan hlim hmél a pu ve țhìn a; mahse, a rei lo thei țhìn viau.

"Naute hi mipa nge hmeichhia ni se i duh zâwk?"

A mitmeng nung sar țhin tuna dul ta raih mai chuan min en reng a, min chhâng dáwn ta lo emaw ka tih hnuah chuan,"Ka.. duh..ve ve,"a ti sup a.

Ka nuih sak a,"Nih leh, hmeichhia ni ta se, a hmingah eng nge kan phuah ang?"ka ti leh a.

"Sa..sa..sarah."

"Ka hming ang a pu ve ang maw? Miin an koh hunah kan hawi rual zel dáwn asin. Ka thinrim deuh huna ka hau hunah 'Sarah' ka ti vak duh àwm sia, keimah ka inko a ni zel dáwn asin."

Eng dang sawi lo chuan min en reng ringawt a.

"Tak tak chuan, ka hau phal dáwn si lo va, ka duat sual vekin ka ring. Nangin i duat dáwn bawk si a, ka nute'n an duat dáwn bawk si."

"Ka...duat...viau...ang."

"A nih, kei nge i duat ang naute?"

"In..pahnih..in."

"A fair lo e. Nih, mipa ni se, a hmingah hual lâwk i nei em?"

A mit a khap sak sak avàng chuan a nei lo a nih ka ring.

"Mipa a nih chuan ka pa phuahtîr mai ang aw. Mipa aiin hmeichhia ni se i ti chiang mai, ka hre thei a nia aw."

Nuihza mitmeng lek lek hian,"Eng...tin?"a ti sup a. A țawng tlêm tawh tih nâka laiin a țawng hi a zàwi bawk si a, ngaihthlâk ngun a ngai thei hle.

"Hmeichhia chu hming hual i nei a, mipa chu i nei lo tlat a. A dik ti raw?"

A nui ve suk suk mai.

"Kha, ka tidik chiah. Nupui fing deuh i nei hi chu maw, lãwm hle rawh. Min chang lo an tam teh a nia."

A nui hmél chu a reh nghal riai riai mai. Thil sawi dik loh ka nei em ni le? Khawi lai tak kha nge ni ang?

"Le, inbual a hun aw. Tui vawt nge i duh tui lum? Kan naute hi chuan tui lum a ngaina dáwn chiang a. Chuvàngin tui lumin ka inbual ziah. Nang pawhin tui lum i duh zâwk ka ring, a dik em?"

Min chhâng lo va, min en vang vang reng ringawt. A ngawih reng chhan hi nichina 'Min chang lo an tam' ka tih vàng kha a nih ka ring ta deuh. Ka țawngkam hi ka fîmkhur a ngai tak zet a ni. Tunah khumah awmin, eng mah tithei lovin a mu reng a, engkimah ka buaipui vek a ngai. A inthlahrun miah lohna tùrin a bula ka sawi tùr pawh ka ngaihtuah hmasak vek a ngai a ni, hrehawm a tih dan tùr hi ka ngaihtuah tel țhìn tùr a ni.

A hmél fai veng vawng țhìn kha tunah chuan a dum nuau tawh a, a hmai an chilhna phei kha chu a ser nasa bawk a, hre sa tân lo phei chuan hai a awl ngawt ang. A țhiante Ramhluna leh Rohlua pawhin an rawn tlawh ãwl lo va; mahse, a mitmeng ațang hian an rawn lêng țhin chu nuam a ti miah lo tih ka hre thei. Buaipui reng a ngai hi nuam lo a ti tih ka hria a, nuam lo ti ringawt mah se, eng mah a ti thei chuang si lo.

Ni khat chu a bân leh a ke, a sawh nat loh lam ve ve kha ka malis a, a hlim theihna tùr fiamthu ka sawi lai chuan harsa tih hmel zet hian,"Sarah...min...kal...san..mai..rawh,"a ti chhuak hlawl mai a.

Ka țawng tàwp chawt a, makti zet hian ka en a, ani erawh chu a maimichhîng tlat thung.

"Mahlim, ka pasal i nih hi."

Heti ang rilru hi a put ka ring ngai miah lo. Engtin nge ka kalsan theih ang? Ka pasal a ni alawm, kan fa lo piang tùr pa a ni bawk. Pathian hmaa ka pasal ni tùra ka tiam kha a ni alawm. Ka kalsan thei teuh lo mai.

"Ka kalsan dáwn lo che, khati ang kha chu sawi tawh miah loh tùr aw. Hma i sáwn chakzia hi i hria em? I kut leh kete i hmang thei thuai ang a, naute pawh i pawm thei thuai ang. Chhûngkaw hlim tak kan ni ang a, a nawm tùrzia mai chuh!"

A la ngawi reng tho.

"Min nin vàng a ni lo ti raw? Min nin chuan sawi mai la?"

A rawn meng a, a mitah chuan lungngaihna thûk tak ka hmu thei hialin ka hria.

"Kei...chu...he..ti...mai..hi..ka...ni...a..."

Mittui tling pam hian,"Mahlim,heti mai hian ka duh tho che a ni. Kan inneih thutiamte kha ngaihtuah lêt leh la, bawhchhe leh mai mai tùr chuan ka tiam lo asin. Harsatna kan tawh lai tak hian inpui tùr kan ni zâwk alawm, pumkhat kan ni tawh a, kan ințhen thei lo ang,"ka ti mawlh mawlh a.

"Ka...khaw...ngaih...che...a..."

"Khawngaih ka ngai miah lo, ka chak alawm. Naute tân leh nangma tân nî tinin ka chak sauh sauh tih hria la, hetia ka enkawl thei che pawh hi ka lãwm ém ém zâwk asin."

"Ka ..tih...palh."

"Um, ka ngaidam ang che; mahse, kalsan tùr chein min ti tawh suh aw. Kalsan che ka duh lo ang bawkin min kalsan tùrin ka duh lo bawk che."

Zanriah kan kîl laiin ka nu chuan,"Sarah, i hah ngawt lo maw? Bawiha enkawl tùr hian mi dang kan ruai tel tawh dáwn em ni? I puar tawh si a, i hah lutuk ang,"a ti sap sap a.

"Ka nu, nakinah naute ka neih tak tak dáwn hunah aw. Tunah chuan ka la inzo a, enkawl ka duh rih bawk. Nakinah enkawl duh viau mah ila, ka theih loh hun a la thleng dáwn tho bawk a, nakin deuhah ti zâwk ang aw."

Ka pa pawh chuan,"Ni e, i hah lutuk ang tih a hlauhawm. Chuan, Sarah, thil tam tak ka ngaihtuah thìn. Bawiha chu heti mai hi a ni tawh a, nang chu i la țhalai a..."a chàwl dat a, thinphu dèp dêpin ka lo ngaithla a.

"I hmalam hun atân chuan Bawiha hi kalsan ta la, a țha berin ka ring. Naute chu i nei ang a, enkawlna zawng zawng pawh i buaina tùr a awm miah lo, engkim a țha ber ber a nei ang. I hmalam huna Bawiha enkawl ringawt tùr hi chuan i khawngaihthlâk ém mai."

LALHLIMPUIA - 32 By Dingdi Pachuau

Ka chaw ei lai chu ka chàwl dat a, ka pa hian ka pasal enkawl hi ka ning angah a ngaih loh hrãm ka beisei. Ka ning lo bawk, a bula awm reng hi nuam ka ti zâwk. Dam tùr chuan ka duhsak lutuk; mahse, hetia a awm ta rau rau a nih chuan nilêng zankhuain a bulah awmin ka enkawl thei a, a nunna lâksaka a awm lo hi ka lãwm ém ém zâwk a ni.

"Ka pa, min ngaihtuah vàngin ka lãwm e; mahse, Mahlima kalsan tur kher hi chuan min duhsak lo hrãm rawh. Ka pasal a ni a,inneih thutiam kan chhamte bawhchhe tùr chuan ka chham lo asin. Ka pasal hi ka hmangaih a, heti ang vàng hi chuan ka kalsan dàwn lo, min mamawh ém ém asin."

Kan ngawi ta ràn hlawm a.

Inrinni-ah kan chhûngkuain kan awm kim țhap a. Christina leh Ramhluna an rawn lêng rual tlat mai, intiam rual ang maiin,mak ka ti zâwk. Kan room-ah chuan fiamthu thawhin kan nui dar dar a. Mahlima pawh za vak lo hian a lo nui ve suk suk a.

Christina chuan,"Kan naute lian chu kan bual tawh dáwn em ni ang?"a ti a, a nui pah a.

"Nakin deuhah ti ang u. In lo lèn lai hian ka inbual lawk ang a, a khua a lo har hman chuang lo vang, ka'n inbual lawk ang e aw,"tiin Mahlima chu ka melh a, min en vang vang phawt a, chutah,"Aw,"a ti sup a.

Mahlima bula awm a ngaih țhin avàngin ka inbual rei ngai lo. Mahse, vawiin chu țhiante an awm bawk a, rei ve deuh tak ka inbual thei ang chu. Hmanhmawh rêng rêngin ka inbual țhìn a, lungmuang siaiin ka inbual thei ta.

Ka inbual rei rêng a, ka fãi viauin ka hria. Bathroom ațanga ka chhuah chuan Christina chuan min lo en vang vang a, a mit khap sak sak pah chuan,"I fãi ngawt ang chu,"a lo ti a. Nui chungin,"Engvàng kherin maw?"ka ti ve thung a.

"E, i rei vang vang ém alawm. Kan awm tih i hre tawh lo emaw ka ti hial a, i tlu sual a ni ang ka ti deuh bawk. Kawngkhàr tihchhiat kan lo rêl tawh asin."

"A, chuti ang ém émin ka rei hran lo aw."

Ramhluna chuan,"I riak nghal dáwn emaw ka ti a,"a lo ti ve bawk a, an inen a, an nui chuang miah lo va.

"Min lo ngai tawh tihna a nih chu."

Mahlima chu Christina-i nèn chuan tui lumin kan hru fai a, ka nuin thingpui tui tak min lo pe bawk a, kan hlim dar dar viau.

Kan room-ah hian Mahlima en ve theih tùrin TV lian țha tak a awm a, chu chu ka inbual chhûngin a lo en ve țhìn. Zànah pawh mu chung hian a thlîr peih viau a, a châng chuan a en peih miah lo thung.

TV en pah chuan a kut chu ka hmehsak mai mai a, ka rilruin ka țawngțai mawlh mawlh bawk. Kal thei leh tùrin ka dil ngar ngar, hun duh rei dáwn pawh ni se, a kal thei tùr a ni ka ti tlat. Ka beidawng thiang lo, a rilru a down țhìn tih ka hriat avàngin a êng zâwngin ka thlîr tlat a ngai. Fuih phûrtu leh a beidawnna lak kiansaktu ni thei tùrin ka țang sauh sauh a ni.

"..........ngaih..tuah a?"

Mahlima chu ka en vat a, ani chuan TV en lo hian min lo en char char tawh a ni ngei ang.

"Ka tihpalh aw. Ka țawngțai a."

"Ka....bia..che..a...min...chhâng....thei ...lo...a..."

"Ka tihpalh liau liau a ni. Eng nge duh i nei em?"

Min en vang vang reng a, ka lài țhelh a ni. Eng mah tithei lo mah se, a mitmeng ringawt pawhin min la tilài thei tho.

"Ka...kuah...châk...che."

Ka mittui a rawn parawl nghal kuang kuang mai. Ni e, a bân na lo lam pawh hi a chêt thei lo tluk a ni a, min kuah lohna a rei ta hle a ni.

"Ka...kuah...loh...na...che...a...rei...tawh...e."

Kei pawh hian ka kuah ngam lo țhìn, ka tina ang tih ka hlauh țhìn avàngin. Mahse, zanin chu ka kuah ngei a ngai a ni.

"Ka kuah ang che aw." Ka mittui chu a hmu ang tih ka hlau lutuk, a bulah hian ka țap thei lo ang. Mittui hian chak lohna a entîr si a, ka pasal bulah hian chak lo zâwkah ka țang thei lo ang.

Rem lo zet chuan ka kuah a, a bân na lo lam chuan ka nghâwngah ka kuahtîr a, ka țah chhuah lohna tùrin ka insehruh țeuh a.

"I...rim...a...la...tui...reng...a...nih...hi." Ka nghawngah chuan a fâwp pah a. Ka nghâwng fawh kha a chîng a, khuavàng awmna lai kher kha a fâwp țhìn a nih kha. Tunah hi chuan...

"Ka...fâwp...thei...ang...che...ti...raw?"

Harsa ka va ti tehlul ém! Ka mittui lah chuan a rawn tling tam tial tial bawk si, a far mai dáwn.

"Tihian awm rih ang."

Chuti lo chu, ka mittui tlà a hmu dáwn a ni. Ka hmuhtîr duh lo, ka chak lohna hi hmuhtîr ka duh lo.

Rei vak lo hnuah chuan,"Sa..rah...i..țap..em..ni?"a ti ta sup a. He pa hi bum a har ém a ni, ka bum thei thlâwt lo.

"Țap lo, țahna chhan tùr a awm hlei nem. Kuah che hi ka la duh vàng alawm."

"Dâwt...sawi...i...in...hmeh..ve..lo."

"Ka kuah theih che avàng hian ka hlim alawm,"ka ti țâlh a,țap angin min hre lo se ka duh tho tho.

"Min..fâwp..tawh..la?"

"Aw le, ka thil châk ber alawm."

Muangchangin ka kûn hnai a, ka dulin min kam tawh avàngin a harsa ka ti. Tûn lawka ka kuahna avàng khan ka ke a mu churh churh bawk si a, ka ding char leh rih a.

"Ka kè a mu lutuk a."

Kan nui ve ve.

Muangchângin ka fâwp a, ani pawhin muangchâng tho-in min lo fâwp lêt a. Ka duhthawh viau nain ka tilang ngam lo, a nat phah ang tih ka hlau. Mahse, amah zâwk chuan a duhthawh tial tial a, kan ințhen meuh chuan thâwk kan la hap hap mai.

"Dam...țhat...ka...châk..."

Kei pawhin ka duhpui alawm. Khawvela ka thil duh ber chu Mahlima hi dam țha se tih hi a ni, ka țawngțaina hlã a ni bawk.

"I dam dáwn alawm, kan pahnihin kan bei ang a, i dam ngei ngei ang."

Min en reng a, a mittui rawn tling chu ka hmu. Ni lo, ani teh lul hi a mittui a tla thei lo ang. Chutah, a maimichhîng ta daih a; mahse, ka en reng avàngin a bek lama a mittui luang thla chu ka hmu.

"Mahlim.." Kei pawh eng ka ang bîk lo, țah chhuak sa țûn ka nih avàngin ka mittui a rawn tling leh kawl kawl tho.

A rawn meng a,a mit hmul sei sang chu a mittui avàng chuan a huh pherh deuh niai a.

"Mi..dang..tân..ka..phal..lo..che."

Ka mittui chu a tla lo thei ta lo. Ka pasal hi ka khawngaihin ka hmangaih a, ani pawhin min duh ém ém si. A taksa a che thei lo hi chu ka la hre thiam deuh, a rilru thlenga a tihrehawm lutuk hian ka țah a tichhuak a, a tawrh ai hi tuar ţhen thei ila ka ti hial.

"Nangma ta chauh ka ni alawm. Ka pasal ta chauh ka ni."

Kûn hniamin a mittui chu ka hrûksak a, thei se chuan ka mittui hi min hrûksak ve ngei àwm si a. Dik tak chuan ka pum chhûnga naute rawn che țhìn pawh a kut chuan a hre țha thei tlat lo, a beidawnna tizual tùrin ka khawihtìr phal lo țhìn. A chhan chu a kutphahte hi malis pah hian ka sik țhìn a, nâ a hre lo tlat țhìn a ni, eng emaw châng zeuhin a hre deuh ringawt.

"I..mit..tui..pawh..ka..hrûk..sak...thei..lo..che."

"A pawi lo, ka hru thei alawm. Kei chu ka chak țha a."

"Chak..tak..a..awm..reng..tùr..in..ka..duh..che."

"Um, ka bula i awm chhûng chu ka chak ang."

"Eng..kim..hi..kei..mah..vàng..a..ni..ti..raw?"

Ka lu ka thing nasa mai.

"Ni lo, nangmah vàng a ni lo. Pathian hian kan chungah eng pawh a thlentîr thei alawm, inmawhpuh tùr kan awm lo. Kan awm a nih ngai chuan keimah ka ni ngei ang."

"Ka..rin..hlelh..vàng..che..a..thil..thleng..vek..a..ni..a..lawm."

"Ni lo, Pângzâwlah hãw lo ila chuan, a thleng lo ang."

"Hàw..tîr..tu..che..kha..kei..mah..ka..ni..a..lawm."

"Sawi tawh lo ang aw, thil kal tawhte chu sawiin awmzia a nei lo. I dam chhoh zel theihna tùrin kan bei zâwk dáwn nia. Exer ka lâkpui ang che a, ka malis zel bawk ang che. Tichuan, i kal leh thei hrim hrim ang."

"Ka...lawm..e...eng..kim..ka..tih..sual..zawng..zawng..ah..min..ngai..dam..dáwn..nia.." A chàwl leh rih a, chutah, sawi zawm lehin," Min..haw..lo..hrãm..rawh..aw..eng..pawh..kan..chung..ah..lo..thleng..se."

Thâwk a la hap hap a, ka duh aiin zanin hi a țawng tam tlat. A mut pawh a hun tawh , a men rei chuan a tân a țha lo ang.

"Tihsual i nei lo va, ngaihdamna tùr i awm lo bawk. Chuan, kan chungah thil țha lo lo thleng lo hrãm rawh se. Ka hmangaih che a, ka haw thei lo che. Naute tluang takin ka nei ang a, chhûngkaw hlim tak kan ni dáwn alawm."

"Nau..te..chu..ka..hmu..châk."

"Ani pawhin a hmu châk tawh ngawt ang che. Lo chhuah pawh a châk tawh viau ang; mahse, ka la phal lo. I dam țha ver vawr hmuh a duh dáwn si a, a lo chhuah hmaa damtîr vat vat che ka tum a ni. A lo chhuah hunah i pawm a duh dáwn si a."

A mit meng dul riai maiah chuan a beidawng hmél hi ka hmu tlat a nih chu. Beidawng lo tùrin ka duh, a beidawn chuan chakna a nei thei lo ang

"Kei..pawh..in..ka..duh..a."

"Beidawng miah suh. Zàn a rei tawh sia, mu tawh ila?"

"Aw..le..min..fâwp..leh..phawt..la..kei..in..ka..duh..hun..ah..pawh..ka..fâwp..thei..si..lo..che..a."

"I dam țhat hunah ning hlûiin min la fâwp dáwn nia aw."

Ka nuih a; mahse, ani chu a nui ve lo.

"Ka...ning..thei..lo...che."

"A țha lutuk."

Ka fâwp leh vang vang a, ani pawh chuan min chhâng lêt lungrun khawp mai. He pa hi ka hnê thei ngai lo ang tih ka hria.

Zînga ka thawh chuan a lo meng reng tawh a, in chung lam hi ding zet hian a lo en char char a, a ngaihtuah mûk hmel viau.

"I harhna a rei tawh em? I mu țha thei nange?"

Muangchângin min rawn en a.

"I..mut..tui... hmèl.. sia..ka.. ti..harh..duh.. lo.. che.. a."

"I khua a lo har hman em?"

"Hman...lo.. ve...va..in..phih..harh..rawh."

Ka fâwp zauh phawt a, bathroom-ah ka lût ta nghal a. Ka chhuah leh chuan min lo en vang vang a,chutah, ka pum chu a melh ta daih a.

"Vawiinah ka nu nèn doctor-ah kan kal leh ang, ka kal hlànin lo khawhar lo la aw. Eng nge ka lo hawn ang che?"

"Nau..te...hri..sêl..tak."

Ka nui sak a, ka pum chu a rawn che dat dat mai. Ka kawr chu ka hlîm a, ka pum puar ve tawh deuh maia rawn che kal ralh ralh chu kâwkin," I țawng ri kha a hria a ni chiang mai, naute hrisêl tak i duh vàngin a lãwm ve a ni ngei ang,"ka ti a. A ni lah tak a, a che dat dat reng mai a, lãm te pawh a ang hialin ka hria.

"A lâm a ni ang."

"Ka..khawih..châk."

Ka hnaih phei a, a kut na lo lam chu lâksakin ka puma naute chêtna lai chu ka hmeh bel a, a chê a tàwp rih tlat.

"A táwp daih mai, a fiam che a ni ang."

A hmaa a chêt lohna lamah a che ta daih mai.

"E,a fiam che a nih chiah hi. A pa chu fiam che a châk ve a ni ang."

A hre thei em ka hre lo nain hre thei se ka ti tak zet.

"A...a..chê..ka..hre..thei."

A hre tak tak a ni ang, a mit menga hlimna awm chu ka hmu tlat.

"A rawn pêt em?"

"A..lâm..tak..tak..a..ni..ang."

Kan nui ve ve, ka lãwm a ni. A chhan chu chiang takin ka puma naute chê chu a hre ve thei tlat.

"Ka..khawih..reng..duh."

Chhûnah ka nu nèn chuan kan chhuak a, doctor lãr Pi Chhani kan pan leh a, ka rin ang ngeiin naute pawh chu a lo hrisêl khawp mai. Chuan, ka neih hun tûr nia rin chu thla leh thla tâwp lam a nih loh chuan a leh pek tla tîr tê ve thung a ni ang.

Mahlima ei duh tùr nia ka rin ka lei pah a, dâwrah chuan U Zuala ang deuh hmuin ka inhre tlat nia. Min hnungchhawn zâwnga a țhut vàng leh dàwr thilin a hliah deuh avàng chuan ka chiang ngam lo.

Ka lei zawha ka chhuak tùr chu ka hming ngeiin min rawn ko ta!

"Sarah, i ni ti raw?"

Ka hawi lêt vat lo. Kan inneih dáwn hma ni chiaha ka hmuh kha tunah hian ka hmu leh dáwn chiah a, ka inthiam lohna a rawn lêt leh nghal vat a, ka la zah ém tho asin.

Muangchângin ka inher a, kan inhmachhawn ta ràn mai.

"I dam em?"

Ka chhàn hmain a hmél chu chiang takin ka en phawt a, a lo danglam ta hle mai. A hmai chu a lo thau ta deuh a, a thû ta bawk. A hmaa fai ser sawr ang kha a ni tawh lo.

"Aw, dam e. Nang i dam em?"

A nui lui sak a, a za lo tih ka hre chiang.

"Aw, hei ka la dam zel chu a nih hi. In chanchin kha ka lo hria a, a pawi ka tihpui tak zet che a ni."

Chhàn ngaihna ka va hre lo tak ém! 'Nia' ti ringawt ila, a dikin ka hre bawk si lo.

"Um, nia, kan chunga lo thleng a ni miau a."

"Engtikah nge naute chu i neih dáwn?"

"Thla leh tâwp lamah a ni ang."

"Țha deuhin i nei dáwn nia. In pa pawh chu a țhat chhoh zel ka beisei."

"Aw le, ka lãwm e."

Pâwna ka chhuah hnu chuan ka thlan dep depin ka hria. Ka lo țang nasa àwm hle mai.

Naute an ngaihtuah țhin avàngin Auto-rickshaw chuan an phal ngai lo va, ka pa driver-in kan inentîr ni hi chuan min hruai thlap țhìn.

In kan thlen chuan ka nu chuan damdawi leh thil dang chu a dah țha a, kei erawh chu Mahlima thil ei tùr ka lei nèn chuan kan room-ah chuan muangchângin ka chho a. Kawngkhàr pawt hawngin ka nui sak a.

"Hiii, ka lo hãw......."

Ka thil hmuh avàng chuan ka thil sawi chu ka tàwp chiang lutuk! Ka thil lei ka khài pawh chu ka thlauh nghal daih bawk.

LALHLIMPUIA - 33 By Dingdi Pachuau

"Mama, tui."

Ka lo chhawp theihnghilh leh tawh a nih hi. Tho vatin, a no duh ém ém Minions lem chuanna ngat chuan filter-a tui chu ka lâksak a, a thlêng bulah chuan ka dahsak a.

A thil ei chu a tep chap chap a, tui chu a in ta nghal a.

"Thil eiin engtia ei tùr nge kha?"

"Mui tîpin ( hmùi chîpin)."

"Dik chiah. A nih leh, eng nge tih loh tùr kha?"

"Tawng tawng loh tùi (țawng țawng loh tùr)."

"Aw, a dik chiah. Ka naute hi chuan a va hre thei tak! Vawiinah tuin nge awm leh dáwn che kha?"

"À û-in."

Ka thawhna sikul bul lawkah Anganwadi a awm avàngin chutah chuan nî tin a u Mawii'n a hruai țhìn. Mawii hi ka thawhna khuaa ka belh ber, kan in luah neitupa Pa Finga fanu a ni. Sikul a kal tawh lo va, a kal loh chhan erawh ka hre miah lo. A fel ve tawh a, tleirawl kum 15 niin, a len lêm loh avàngin a lang naupang lehnghal. A bulah chuan Nonoi pawh hi ngaihtuah miah lovin ka kalsan thei a ni.

Kan in luah hi Pa Fingate in hnuai a ni a, kan nufa tân chuan a tâwk reuh tawp. Kan mamawh engkim a awm ve biai tho, a zau hran lo nain. Nonoi tân hlauhawm deuh lai tùr, hmun awih deuh a awm bawk si lo va, luah man lah a to hran si lo.

Chaw ei kham sikul kai tùra ka insiam lai chuan Mawii chuan Nonoi chu a rawn ko lang lang a, ani lah chuan phûr fahran hian a lo chhàwn vat bawk a. Sikul kan hlat hran lo va, ka hmanhmawh vak ngai lo. Mawii pawh chu a rawn chhuk a, ka hman hnuah chuan kan pathum chuan kan chhuak a.

Râlvàwng P/S-ah kum hnih ka thawhna a ni ve ta. Nuam ka ti ve tawh hle a, a khua hi in tam lêm lo mah se, Lunglei khawpui ațangin a hla lo va, dârkâr hnih khat lek tlân a nih vàng hian thingtlâng khaw changkãng tak a niin ka hria. A mi chêngte an taima a, kut hnathawh an uar viau.

Sikul bul lawkah Anganwadi a awm avàngin Nonoi chu kan office-ah ka hruai rih phawt a, a chhan chu keini chu dâr 8:30-ah sikul kan țan a, Nonoi erawh chu dâr 9:30 daihah an țan avàngin ka bulah awm rih se ka duh a ni.

Office chu chowkidar-in a lo hawng tawh a, tukverh ațanga thli lo thaw lût heuh heuh chu a nuam kher mai. Nonoi chu ka chair-ah chuan ka țhuttîr a, chowkidar chuan an thil zir țhin a lo zâwt a.

Thawhpuite an rawn thleng ve țak țak a, Nonoi chu an rawn be nghal zel mai. A țawng a fiah loh avàng hian biak hi nuam an ti a; ani lah hian chhàn a lo phûr thei si a, kan nui nasa țhìn hle a ni.

Ka thawhpuite zîngah hian tlangvâl pakhat, senior lam deuh,fiamthu duh deuh mai Siama hi a awm a, chu pa chuan a chhaih peih lehzual a, thil eng eng emaw a zâwt kual vak zel a, nuih loh pawh tum mah ila a nuih loh theih loh țhìn. He sikulah hian ka thawk lo ang tih ka hlau țhìn, a chhan chu ka nuih tam phah a, ka rilru a hrisèl phah ka ti tlat. Siama ka hmuh apiang hian tu emaw ang tih ka nei a, ka hre chhuak zo chuang miah lo.

"Nono, Màmâ hming kha ka hre leh tawh lo, eng nge ni kha?"

"Talah."

"Nih leh, Pàpâ hming ve thung?"

"Âpa Tâma." A pa Siama hming hi a lam fiah thiam si lo va, hei hi an làwm ém ém a ni.

"Zànah tunge lo lêng țhìn kha?"

"À u."

"Tlangvâl lo lêng țhìn kha?"

"Âpa Tâma."

Mi dang chu an lo nui char char a, kei ve thung chuan Siama chu rum fê-in ka lo melh thung a. Kan innêl tawh a, min fiam nasa thei hle. Siama phei chu tlangvâl a nih vàng hian fiam chîkah an neih a, ani lah hian huat a tum lo. Thil ni baksak lo pawhin fiam țhìn mah se, chu aia nasa fê chuan a phuah belh țhìn a, a hlimawm thei tawp.

Mathematics ka zirtir țhìn a, ka subject nuam tih ber a nih vàng hian zirtîr pawh nuam ka ti. Naupangin an lo man thiam phei chuan nuam ka ti a, naupang pawh an phûr thei viauin ka hria.

Noon break-ah chuan kan Head chuan,"Sarah, zawh àwm che a nih lohna lai ka hre lo bawk a, Nonoi pa chanchin hi ka hre chiang châk a ni. Mi sawi hriat ai chuan nangmah ngei zawh che hi a țhain ka hre bawk a. Siama erawh chuan a beng lo ch$ ngawng mai se, ani lakah hi chuan nula virgin ngat i la ni tho thoin ka ring,"a ti charh charh a.

Siama chuan,"A, sir, keima lam chauh hi min ti bîk țhìn lo ula, ani lamah pawh engti angin nge ka tlâk nat in hre ngawt lo a nia,"nui chung hian a lo ti a, kan nui leh vek mai.

Madam Nuni chuan,"A dik thei ang. Zan tin a birh tlut tlut a,a birha tân pawh rilru danglamna hun chu a ni ve tawh. Eng mah hi kan hre chiang miah lo,"a lo ti ve a. Siama lah chuan,"Hre nâng aw. Engtia thui nge kan kal tawh tih pawh in hre teuh lo,"tiin a lo belh a, dâwt chiang bal ni mah se a tizahthlâk thei a nia. Za lo zetin ka nui ka nui ringawt mai.

Sir Làwma chuan,"A puan hmâwr i deh pawh ka la ring lo ve,"a lo ti vat a, ani lah chuan,"Amah kha zâwt mai ula ti nia; mahse, hmeichheho hi chu an fing a, an zêp leh țêt zel. Ani pawhin a zêp tho ang,"a lo ti leh zung zung a.

"Puan hmâwr chu sawi loh, an parda pawh a la dek lovin ka ring,"Madam Nuni chuan a lo ti leh a, Siama chu za zet hian a nui chhuak ta hawk hawk a, a nui chu keini chuan kan lo nuih ve leh chhâwng a.

"Nui tawh s'u, tunah chuan a changtunuin a changtupa lo deuh zâwk chanchin a lo sawi tawh ang. One, two, three, start!"

Eng mah ka sawi thei lo, ka nuih a za lutuk a, mi dang pawh chu an nui nasa lutuk.

"Sawi thuai teh. Hei, chawhnu țan a hun leh mai dâwn, nge ka lo sawisak mai dâwn che em ni? Min hrilh vek tawh tho kha, ka hre ve vek tawh tho alawm."

"I hriat châk ém kha aw, Siama. Lo inrawlh ve ziah lo teh, ka hre châk tawh a nia."

A ni lah tak a, kan nuih nasat avàngin hun chu a kal duak duak a lo ni. Țan nân minit 10 chiah a awm tawh.

"Um, sawi dan tùr ka hre thiam chiah lo va, Nonoi pa hi chu Lalhlimpuia a nia, kum 4 kal ta khán a boral tawh a."

"A nih chu, a va zia lo ve aw. A pawi ka ti hle mai, ka zâwt kher bawk si che a."

"A pawi lo, sawi chhuah chângte chu a awm ve bawk ang chu." A rilru nawm nân ka sawi mai mai, he thu hi ka sawi ngai lo. Min zâwt miau si a, thu dik chu ka sawi mai a ni.

"Engtia boral nge a nih le, ka hre châk zel a nia, pawi i tih loh chuan?"

"Kha, kum 4 kal taa AMRI Hospital, Kolkata-a kângmei chhuak thut kha in hria em? Khatah khân kâng hlum an awm nual kha, vànduaithlâk deuhin chûng zîngah chuan a tel palh hlauh mai a."

Ka vawi khat sawi chhuahna a ni a, ka inhûm ruh nasa ngawt ang, ka thlan a sa hat hatin ka hria. Mahse, ka tân pawh a țha zâwk ang, ka lo up rei ve tawh ém mai a. Ka thâwl ve hawk maithei zâwk asin.

Ka thu sawi chu an ngaithla kar hlawm a ni ang, a reh dak mai a. Head chuan,"News-ah ka en tak asin, a zia lo tak tak a ni. Mahse, thil țha kher hi kan tawng vek thei bîk lo a nia, thil țha kan tawng ang a; thil țha lo pawh kan tawng bawk ang. Pathian hian a phal vek a ni, a chhan chu buaina khawvêlah kan la chêng miau si a. Thihnate hi kan la tawh vek tùr a ni a, a hun laiin harsain hrehawm ti hle țhìn mah ila, Pathianin min awmpui a, kan tawrh theih bâk hi min tuartîr phal bîk miah lo a nia. Vànduaina ringawt ngaihtuah lova a êng lam thlîr țhìnte hi khawvêla mi awhawm ber an ni. Nang pawh i chhel ka ti khawp mai che, naute lawmawm lutuk i nei bawk a. A tihlim thei viau chein ka ring a ni,"a ti dap dap a.

"Nia, enkawl tùr naute ka nei a. Thil dang hi chu ka mamawh tawh tehchiam pawhin ka hre lo."

"A theih loh!"

"Siama, i va vànduai tak ém! Ka tawrhpui che."

Kan nui zo leh vek. Ka thawhpuite bulah hi chuan thutak rùnin a awm theih loh, thu rêng rêng tak deuhin a sawi rei theih loh, fiamthuin a zui nghal zel a ni.

Dâr a ri zui ta bawk a, class la tùr chuan kan inbuatsaih ta nghal a.

In ka luh hmain in chungah ka lût leh phawt a, Nonoi pawh a lo țawng leh lar lar tawh. A țawng fiah lo hi an làwm a, an chhawnchhaih reng mai a ni.

"Nono, haw tawh ila?"

"Mama..." a rawn tlãn vat a, ka lo pawm vat a. Ka biangah a fâwp zoh a, min duat a ni tih a tih-lan ve dàn a nia.

"Aw, thingpui in rih la, Sarah?"

"Ka lãwm e; mahse, kan haw thla zâwk mai ang. Nonoi hi bual thuak thuak ka la duh dâwn si a."

Kan inah chuan kan nufa chuan kan lût thla a, khua a lum ém avàngin Nonoi biang chu a tài têk a, a hrisêl lo viau nain a biang hi a tài leh tlat zel.

"A lum i ti em?"

"Aw."

"Inbual rawh aw. Chuan, i muhìl ang a, kei pawh ka inbual ve thei ang."

A hrisèl loh reuh ém avàng hian a chêr mah mah a, tlâng hrilêng a man hma ém ém bawk. Ka neih ni tùr aia hmaa ka neih vàng kha a ni ngei ang, doctor kan panpui ngun viau bawk. Tunah hi chuan a zia ve ta deuh a, damdawi erawh ka inchhawp tam khawp mai.

A muhìl chu ka thlîr reng a, ka fanu hi chuan min chhùn ve thlâwt a ni. Hmêlah kher kher chuan min chhùn fuh ve a, a ke leh a kutah erawh min chhùn lo khawp thung.

"I pa chuan hmuh che a châk ve ngawt ang. Fanu kha a duh a, i hming tùr nèn lam a hual sa vek tawh a nia; mahse, kan hma lam hun tùr hi kan va hre lo ém! A thlarau chuan a awmna ațangin a rawn thlîr ve țhìn ngei chein ka ring. I pa i hmu hman lo erawh a pawi ka ti, i tân pa țha theihtàwp tùr a ni asin."

Zànah chuan Siama a rawn lêng a, an inchhaih nui leh nasa khawp mai. Siama hi min beiseia lo lêng a ni hran lo va, dik tak chuan lênna tùr a hre bîk lo a ni. An khaw nula hi an chhe hran lo tih ka hre ve tho va; mahse, ngaihzâwng a neih hran loh avàng hian nula inah a lêng ngai lo ni berin ka hria. Ka awm hma pawhin in chungte in hi a lènna ber a ni hrim hrim a, Nonoi hi a làwm ve a, chubãkah, a thawhpui ka lo ni bawk nèn, a rawn lêng ve țhìn a ni.

"Sarah, in pa kha Pângzâwl khua a ni ve tho em?"

"Ni lo ve, Lunglei lam mi a nia."

"Lunglei eng vêng maw?"

"Farm vêng."

"A ni maw?! Chuti, ka hria a nih chu."

"Engtin maw?!"

"Ka cousin Ramhluna țhianpa a nih kha."

Ramhluna kha a cousin maw?!! A sawi tâkah chuan an inang deuh tak alawm. Tu emaw ang ka tih ka hriat chhuah theih si loh kha Ramhluna chu a lo nih ngei dâwn hi.

"A țhianpa chu Ramhluna a ni ngei mai."

"Mahse, kan inbe ngai lutuk tawh lo. Aizâwl lamah an awm daih tawh a, an rawn phei khât sia, keiniin kan va tlawh thei bîk si lo va."

"A nih tak chu. Nia, hna han neih chuan duh duhna lamah a thên theih tawh loh chu a nih hi."

"Thingtlânga awm phei chuan maw, khawpui kalna hun hi kan nei lo lehzual. Hun ãwlah lah huan lamah hna kan lo thawk duh ve bawk sia, hun kan nei thei lo rêng rêng."

"Ramhluna chuan hmân deuh khân a sawi tawh tak alawm, in pa boral dan chu. A sawi lai khân ka lo ngaihven lutuk lo nàngin i sawi khân ka hre chhuak leh a."

"A țhian țha ber a ni alawm."

A haw har lo. Kan nufa khua a tihar lo va, a lo lêng hi ka lãwm țhìn khawp mai. Tlangvâl țawng duh tak ni mah se, mi a rêl ngai lo va. Thil țûl lo a sawi mai mai lo, fiamthu atân a sawi a nih ngawt loh chuan. A nungchang hi a ngainatawm riau, țhenrual kawm a thiam tlat.

Ka muhìl țêp tawh tihah chuan ka phone a rawn ri ve tlat mai! Ka nu a ni maithei, ka pick vat loh chuan Nonoi a harh mai ang.

Hei chu, number ringawt a nih hi!

"Hello?!"

"Sarah? I ni ti raw?!"

Rohlua aw a ni tlat mai! Kan inbiak lohna rei tawhzia leh kan inhmuhna rei tawhzia ka hre chhuak uar uar mai.

"Rohlu, teh tlat che chuan!"

"Sarah, i number neih tuma ka zawn nasatzia i hria em? A hmaa i number-ah khân ka rawn try nasa thei lutuk. Ngati nge i biak theih miah loh a?"

"Engtin nge ka number chu i neih a?"

"Ka sawi peih lo. Tunah khawiah nge i awm a?"

"Ka sawi chuan i hre dáwn asin."

"Sarah, i țhian ka ni lo em ni a?"

"Ni e, min țanpuitu i ni alawm. Ka la theihnghilh lo ve."

"Chuti, i awmna min hrilh teh."

"Ni lo ve, khawvêl tharah nun thar nèn bul ka țan mêk, ka naute nèn."

"Naute chu a țha em? Ka hmu châk hle mai."

"Aw, țha e. A nula ve tawh lutuk."

"Sarah, ngun deuhin min lo ngaithla teh. I hmelma ka nih loh hi, engkim min hrilh ve mai la, Mahlima nèn khàn a boral hma khân in ințhen em ni? Engkim ka hre duh a nia."

Ni lo, he pa hian eng thil nge a rawn sawi chhuah hi? Rilru natna tam tak ka lo pal tlang tawh, hriat chhuah leh ka duh tawh lo asin. Tunah nun tharin bul ka țan chho mêk a, chu pawh hmel hriat miah loh awmnaah. Nuam ka ti ve țan dáwn chiah a, nunhlui, theihnghilh ka duh ém ém, ngaihtuah chhuah pawh ka duh tawh loh rilru natna, hrehawm tinrêng ai pawha hrehawm zâwk chu ka hmaah a rawn lang leh ta.

"Sarah?"

Ka mitthlaah chuan kan nunhlui liam tawh hnu chu nimin ang maiin a rawn inlâr zut zut a, kan room kawngkhàr ka hawn lai ațang chuan a rawn ințan leh riai riai a.

LALHLIMPUIA - 34 By Dingdi Pachuau

Hlim takin, ka pasal hmuh châk tak leh rilrua nui var var chungin kawngkhàr ka hawng kha a ni a, ka thil hmuh erawh chuan ka hlimna leh ka rilrua ka nuih var varna chu a rawn paih bo hneh khawp mai!

Ka pasal leh Lucy an lo infâwp ngàwng ngâwng a ni!!

Ka thâwm hriain Lucy chu a rawn hawi vat a; Mahlima erawh chuan Lucy chauh a en thung. Kei lah mak ka ti lutuk chu che lovin ka ding khawng reng ringawt! Ka khawvêl hi a tàwp vek maiin ka hria.

"I lo hãw tawh maw? Naute hi a pa hian a ngai tawh lutuk a, ka rawn pheipui tawp mai. I dam țha em?"

Ka chhâng lo, chhàn tum pawh ni ila ka țawng chhuak theiin ka ring lo.

"I țha a nih ka ring. Ka hman loh chhûng zawnga i lo enkawlnaah làwmthu ka hrilh che a, làwmman lam i duh a nih pawhin i duh leh i phût zât zât a ni mai. Pawisa lamah chuan buaina tùr a awm lo aw."

Ka thu hriat hi a râpthlâk lutuk a, a dik nge dik lo pawh ka ngaihtuah thei lo.

"Ah, naute a chê! I khawih leh duh em? I khawih khân nuam a ti viauin ka hria, khawih leh rawh aw."

A kawr chu a hlîm sat sat a, rei ka en ngam lo, engtin nge heti ang hi a thlen theih? Lucy hi a lo la kawp reng em ni? Ka thâ a khûr dar dar a; mahse, hmeichhe chak lo ber angin ka țap dáwn lo, ka tlu bawk lo ang. Mahlima pawhin eng mah a la sawi ve lo va, eng emaw tal a sawi ve tùrah ka ngai. Lucy hi chuan min ințhentîr a hreh tawp nâng.

"A ngai hle che a ni ang ti raw? En teh, min rawn phone lai khân a che nasa lutuk bawk. I țawng ri a hriat khân a lâm ta emaw tih tùrin a chê a. Han țawng leh chhin teh."

"Nau..te..ka.. hma..ngaih.. che."

"Ah, a che leh tak tak! Ka pum chhûnga a la awm chung pawhin a hre thei che a nia, a va nuam tak!"

"Nau..te..lo..chhuak..vat..vat..rawh..ka...hmu...châk..tawh..che."

Mahlima chuan min rawn en lo va, Lucy dul chauh a ni a melh ni. Heti ang thil vàng bawk hian ka na leh ang maw? A ni ém ém tawh lo ve. Mihring heti ang ém éma inzahloh mai chuh, ka tuar thei lo. Ka chhuak ang, ka chhuak vang vang ang.

Ka maimichhîng a, ka chhuak a nih chuan ka lêt tawh ngai lo ang tih ka hria. Rilru fîm takin engkim ka ngaihtuah tùr a ni, ka inchhìr leh loh nân. Ka nu, ka pa, Tluanga leh kan inneihna thutiam zozaite. Ni lo, kan inneih thutiam kha ka bawh chhe thei lo ang.

"Sarah, engtikah maw naute chu i neih dáwn? Rohlua fa ti raw? A ni ti raw, darling?"tiin Mahlima chu a en a, kûn hniamin a hmuiah chuan a fâwp leh zauh a.

"Inneih kan tum lai takin accident a tâwk ta hlauh mai a, a rawn phei chhan pawh kha kan inkâr zawng zawng hrilh che a țhen che a tum vàng a ni. Mahse, hetia a awm hnu pawh hian țhen ka tum lo hrim hrim a, Mahlima nu leh pate pawhin an remti thlap tawh a, tuna kan hmabâk chu he in i chhuahsan veleh a inneih a ni tawh mai. Mi ang pângngai i nih chuan i tih tùr chu i hriat mai ka ring, hrilh chawp kher i ngaiin ka ring lo."

Min tham lo sak sak hle mai. Heti khawpa zahna nei lo hi ka la hmu ngai lo, chubâkah, heti ang éma zahna hi ka la tawng lo bawk. Min hmuhsit dan ém ém hi, ka hlau zâwk!

"Ka thutiam ka bawh chhe thei lo ang,"ka ti sap a, an hriat phâk phei chu ka ring hlei law.

"Thutiam anchhedawng a nih chu. Mahlima'n a țhen miau che chuan engtin nge i tih vak chuan ang? Nge, a hmei angin i awm mai dáwn zâwk? Ka phalin i ring em? Teuh lo mai, chhuak nghal tùrin ka duh che, tunah ngei hian."

A tàwp ta. Engkim a tàwp vek tawh, ka khawvêl chu țhiah sawmin a awm, țhiah sawm vek a ni.

Room ațanga ka chhuah dan tak pawh ka hre tawh lo. Ka mittui a tla lo va, ka kut erawh ka hûm nghet hle. Ka hmaah eng nge awm a tunge awm ka hre lo, ka kal mawp mawp ringawt mai. Ri ka hre lo va, ka lu-in bang a tauh rîk bawp tâkah chuan ka harh ta deuh chauh. Ka awmna chu hriat tumin ka hawi kual a, kan in ațang chuan ka la kal thui lutuk lo ve.

Sling bag ațang chuan ka phone ka phawrh a, Christina ka phone vat a. A ring rei lo hle mai, min rawn chhâng vat a. Min rawn lam tùrin ka ti ringawt.

Christina chuan eng mah min zâwt lo, min hmuh veleh min kuah a, a mittui a tla zawih zawih. Ka awm dan ațangin rin a nei sa nghal a nih ka ring.

Christina-ite inah ka awm deuh reng a, thil awmzia ka sawi hran lo. Christina chuan eng kimah min buaipui a, ka nute pawh a phone vek. Mumal takin ka awm dan ka hre lo va, Pângzâwla ka hàw hmain zànah ka pum a na deuh a, ka tuibâwm a rawn keh ta mai. Christina-ite chhûng ka tihbuaizia chu, țhian țha neih man a lo awm kher mai. Ka țhian a ni lo ang tih ka hlau ngawih ngawih.

Naute chu thla kim lova piang a nih vàngin up a ni a, ka nu leh Christina an buai char char. Kei lah chu buaipui hrep ngaiin ka awm bawk nèn, thih ve daih ka duh rum rum mai.

Ka rilru a hlim lo va, ka nun a pângngai thei hek lo. He khawvêlah hian dam chhan neiin ka inhre tawh lo. Ka naute țap riin min tiharh chhuak zo hek lo, ka nung ve mai mai a ni ber.

Ka pângngai deuh hnuah chuan naute chu ka ngaihven thei ta chauh. Min chhùn ém ém lehnghal a; mahse, a sam erawh a kir chiai a, a buang thâng thung. A tê reuh si a,a hrisêl lo reuh bawk nèn, min mamawhzia ka hre chhuak thar zél a. Ka naute ngei hi he khawvêla ka dam chhan chu a lo nih dáwn hi. Naute bâk hi ka ngaihtuah lo ang, ka enkawl ang a, pa a mamawh miah lo ang. Pa tel lo hian tha takin ka enkawl thei àwm e, a tân ka nun pum ka hmang ral ang.

Naute thla hnih a tling ta maw tihah chuan thu làwmawm lo dang ka hriat belh leh ta. Ka nun ațanga paih bo ka tum ém ém, rilru natna namên lo min tawrhtîrtu chu AMRI Hospital, Kolkata kàngmei chhuakah a boral tih thu ka hre leh chu, min țhâwng viau nain ka thinlung a keh chhe hneh lutuk tawh a, keh chhe leh chuang tùr a awm tawh lo a ni. Ka nautein a pa dam lai a hmu lo tùr erawh pawi ka tihpui mai chauh a ni. Ka thinlung hian nat ngaihna a hre tawh lo, Mahlima leh Lucy khân an tikeh sawm hneh lutuk a, na leh chuang tùr a awm thei tawh lo a ni.

Christina-i'n țap țeuh chungin min rawn phone a.

"Min ngaidam thei ngai lo ang tih ka hria; mahse, ka hrilh ngei ngei che a ngai si a, a pawi ka ti lutuk."

Ka țah a chhuak lo va, țahna chhan tùr ka neih pawh ka hre hek lo.

"Sarah, pawi ka ti lutuk. Pawi ka ti tih hian eng mah a siam țha thei tawh lo tih ka hre tho nain thil awmzia hre tùrin ka duh che a ni."

Eng thil nge hriat tùr awm? Eng mah hriat châk pawh ka nei lo.

"Sawi la?" A mawiah ka zâwt ve mai mai.

"Kan ruahmanna vek a ni."

Eng chu nge maw a sawi le? Eng chungchâng tak ni ang maw?

"Eng chu maw?"

"Mahlima leh Lucy kha. Mahlima remruatna vek a nia, sawi chhuak miah lo tùra intiamtîr vek kan ni."

Ka la man lo, ka bo tulh tulh mai.

"Lucy kha a chah phei a nia, amah pui tùrin. A chhan chu doctor-te'n an hrilh danin hun kha a nei rei lo a ni àwm e."

Engtin maw? Hun a nei rei lo maw? Chuti, a thi thuai dáwn tih a inhria tihna maw? Ni lo, ni lul lo mai.

"A hma lam hun kha beiseiawm a awm lo a ni. A thih hunah i tuar na lutuk dáwn si a, chuvàng chuan, rem a ruat ta a. Rilru na deuha i chhuahsan chuan a thih thu i hriat hunah pawh i tuar na tawh dáwn lo deuhin a ring a ni. Ramhluna nèn, a chhûngte nèn min ko khâwm ta a, inrinni-a kan lo lèn khân kan sawiho ta a. Kan țap vek asin, ani thi mai tùr duhthusâm a nih miau avàngin remti lo rilru chung pawhin tu mahin kan hnial duh lo a ni."

Eng nge ka thil hriat hi ni ta! Eng mah ka hre ve lo maw!!

"Eng..engtin nge...ni lo, engtin nge chuti ang..thil lian tham lutuk ka lakah in zêp theih?"

Ka au tuar tuar mai.

"Sarah, ka thiam loh a ni ti raw? Ka inthiam thei thlâwt lo, hrehawm ka ti lutuk. Min ngei viau ang ti raw?"

"Ka haw vek che u."

Ka phone ka off nghal. Awrâwl chhuah meuhin ka țap leh ta râwih râwih mai. Ka nu leh pain min buaipui vat a, naute mu pawh a rawn harh a, kan buai nuai mai.

Heta țang hian Christina leh Mahlima chhûngte hrim hrim pawh ka be ngai ta lo. Min biak an tum pawhin ka chhâng ngai lo. An chungah ka thin a rim tlat, hrilh hmaih, ni leh lo, hrilh duh loh ka ni bîk chu nâ ka ti. Mahlima kha ka hmangaih ém ém asin. A hun tàwp a ni tih an hria a, keiin ka hre ve tlat lo chu min en hrang bîk ka ti a, duat taka enkawl pawh ka la duh asin. Mahlima erawh boral tawh mah se, ka khawngaih tho; mahse, ka rilru natna kha a thûk ém a, a dam harsa khawp ang.

"A nih tak chu, Sarah. A pawi ka tihpui hle mai che. A chanchin ka hriat veleh khân ka rawn phei a; mahse, ka hmu si lo che a, mak ka ti angreng nain tu mah ka zâwt lo."

Ka mittui luang chu ka hru zoh a, ka mittui hi a tlâk lohna a rei tawh asin. Nunhlui hi hriat chhuah ka duh tawh lo va, theihnghilh hmin hmak ka duh.

"Engkim min hrilh avàngin ka làwm e, ka tawrhpui hle che a ni."

"Nunhlui zawng zawng chu Mahlima boral rual khân ka paih bo vek tawh. Nun tharin ka nung tawh a, fanu enkawl tùr Pathianin min pe a, hei chauh hi ka dam chhan a ni tawh bawk a ni."

"Sarah, hmuh ka châk hle mai che u."

"Nia, khawvêl hi chu a ngai rengin a kal lo va, inhmuh hunte pawh a la her chhuak ve leh maithei a ni. Min hmu a nih pawhin Sarah, mi dang daih i hmu tawh ang."

Kan inbiak zawh meuh chuan dâr 12 a ri thuak tawh. Țhian hlui ka han be leh ta chu a ni a, ka rilru pawh a thâwl deuh ta huaiin ka hria. Nonoi chu ka'n en a, a mut tui hmel kher mai. Ka neihchhun takmeuh a ni tawh a, ka duat a, nun pângngaia min nuntîr theitu chu amah chauh hi a ni.

"I pa chuan hmu che se chuan a chhuang ve ngawt ang che,"tiin a chalah chuan ka fâwp zauh a,a mut dan chu ka siam rem a. A rawn che țalh țalh a, min rawn dap dan dan a, hetah chiah hian a pa ka hre chhuak ziah. Ka âwm a rawn zen rak rak a, hnute hi a ngheina rei viau tawh mah se, zàna rawn dap rak rak hi chu a sim thei lo.

Zîngah ka nuin Nonoi a rawn bia a, a pi nèn an inbe tak tak mai chu, ka nui ka nui ringawt.

Ka nuin,"Mama ka lo bia ang chu," a tih chuan phone chu min rawn pe a, loudspeaker-ah ka dah tho bawk a, ka thil tih lai chu ka ti pah tho.

"Aw, Nu?"

"Nizànah i țhianpa Rohlua'n a rawn bia che em?"

"Aw, 'tinge a?"

"I number min rawn dîl a, min dìl ngawrh ém avàngin ka pe ta mai a nih kha, i lungawi lo viau em?"

"A pawi lo, Nu. Engah mah ka ngai hlei nem."

"A țhat hlauh chu. Hei, Tluanga'n nupui neih a ngèn ve deuh a."

"A ni maw!!! Ka va lãwm. Tunge a bialnu chu? Hmana mi kha em ni?"

"Ni lo, Aizâwl lam mi a nia."

"A nih tak chu. Neih a hun ve tawh reng alawm; mahse, Aizâwl lam mi a nih chuan thingtlângah a rawn mo peih dáwn em ni? Khawpui mi tân chuan thingtlâng nun hi hriat thiam a har si a."

"A fel viau a ni àwm e; mahse, ani pawh nangmah ang tho a nia."

"Nuthlawi maw?"

"Aw, a hmel a țha viau asin. A thlalâk ka hmu tawh a."

"Ka va hmu ve châk! Nu, nuthlawi pawh ni se, an induh a an inhmangaihtawn chuan a țha reng alawm."

"Nia, an induh phawt chuan eng mah sawi buai kan tum lo. An rilru hi țha se, kan fapa hi lo hmangaih ve bawk se."

"Mahse, Nu, thingtlâng tlangvâl tâna khawpui nula rîm chu a huphurhawm viau lo ang maw?"

"Ka hre lo le, kan han bei ve chhin phawt ang chu."

"Engtikah nge palai chu in tirh ang?"

"Aizâwlah chhûngte kan nei mang si lo va, a buaithlâk khawp mai. Mahse, Tluanga hian tirh tùr a hria a, naktûk zàn lamah an lêng ang chu."

"Tluanga chu, min hrilh ve àwm a nia, ka vui hle mai."

"Aw, phone mai la."

"Ka hau hrep ang."

Tluanga number ka hmet chhuak a.

"Hello, Nonoi nu, eng nge ni ta?"

"Hre lo der vel teh suh."

"Eng maw? Nonoi a awm em?"

"Thil dang sawi tum suh, kan mo tùr chu tunge ni a?"

"I hre lo ang."

"Sawi la, ka hre mai dáwn alawm."

"Mapuii a nia."

"Tu Mapuii maw?"

"Mapuii kha a ni tawp mai."

"Kan Mapuii kha maw!!!!"

"Aw."

A va mak dáwn ve!!!

LALHLIMPUIA - 35 By Dingdi Pachuau

"A va mak ve!"

"Eng nge a makna?"

Mak ka ti tho. Hun kal chakzia ka hre thar uar uar mai. Bobo-a kha a lian ve tawh ngawt ang chu, hm,nunhlui liam tawh chu nghilh tum mah ila, min rawn nanchìn hun chu a lo awm zel a nih dáwn hi.

Mahlima tel lo khawvêl thar ka hman mêknaah pawh hian amah theihnghilh tumin bei nasa mah ila, ka tum nasat poh leh ka hriat rengna hian a theihnghilh lo chiang ting ni maiin ka hria. Sawi chhuah erawh ka sawi chhuak khât; rilru lamah erawh... Nonoi ka hmuh apiangin ka hre chhuak lo thei lo bawk si.

Nilaini chawhnu a ni a, naupangin football khelh an châk tlat mai a, Siama nèn games-in-charge kan nih vàngin football khèl tùr chuan kan inbuatsaih a. Sikul bul chiahah field a awm avàngin Nonoi ka hruai ve a, nuam a la ti ém ém zui. Ni a sat vàngin a biang a tài têk a, ka khawngaih reuh viau nain hmuhnawm ka ti tlat. Naupang inkhèl chu a lo au nasa mai a, ka phone video-in a che vêl zawng zawng chu ka lo record char char a.

Laptop ka nei ve a, hetia a che vêl ka record zawng zawng hi pendrive-ah ka dah lût leh vek țhìn. Nakinah en lêt leh duh hun ka la nei ve ngei ang a, amah pawhin a têt laia a chêt dan zawng zawng a hmu ve thei dáwn bawk a ni.

Tlaiah chuan ei rawng ka bàwl laiin Nonoi a muhìl a, ka phone chu ka khawih mai mai pah a. Siama status chu ka ensak ve dêk dêk chhin a, kan nufa thlalâk a lo hmang niin. Vawiin chawhnua field-a Nonoi che vêl phone-a ka lâksak lai khan a phone-in min lo lâksak ve a ni chêk ang chu. Caption-ah ' Nufa inchhùn fuh no.1' a la ti deuh kher zui. Mahse, a mawi reuh lutuk, kan nufa kawr hâk rawng a lo la inang zui.

Ka va text a.

*I status-a i hman kan nufa pic hi min lo thawn ve teh.*

A phone a khawih lo a ni ang, min reply lo tlat. Naktûkah pawh a dìl theih tho tak alawm le,ka ho chêk chûk em mai.

Ka nu ka va phone a, Tluanga palaite chanchin chu ka va zâwt a ni deuh ber; mahse, Mizo dàn pângngai 'kan lo inrâwn ang e' tih chu an thu hawn a ni rih, ka rin sâ tho a ni.

"Bawihte, i țhiannu hi be ve tawh la, hetia biak duh loh ringawt hi thil țha ber a ni lo a nia."

Christina-i chuan a lo va be leh a ni ngei ang.

Nia, ka nu sawi chu a dik alawm. Kum heti chen a ral tawh a, an thiam lohna ni miah lovah thiam lovah ka puh tlat a, a tuartu ber chu keimah ka ni. Ka țhian țha ber, kawng engkima min buaipui țhìntu ka chân a, chutah, ka fanu chhûngte ka chân bawk. Nakinah lo țhang lianin, a pa chungchâng min la zâwt ngei ang, engtin nge ka hrilh ang? A dem tùr ber chu keimah hi ka la ni dáwn a ni, a pi leh pu leh nîte hnèn ațanga pawt țhentu chu keimah ka ni miau si a.

"Nia, a dik alawm,Nu. Nunhlui hi theihnghilh tum mah ila, a rawn sawhkhãwk hun hi a awm tho tho a ni. Christina-i number chu min lo pe ve hrim hrim la, nakinah biak ka lo tum ang e."

Ka sim card ka thlâk daih avàng khân tu number mah ka nei tawh lo hrim hrim.

Motor chhia a awm avàngin Pa Fingate chhûng chu an buai nak nak hle, an ri nak nak reng a. Pa Fingate hi khawtlâng hruaitu pawh lo ni fo tawh a ni a, tunah erawh a upa ve ta deuh a, a chàwl ta a ni àwm e.

Chaw ei kham lamah, an reh deuh hnuah chuan Nonoi nèn kan han chho ve chhin a, Mawii leh Pa Finga nupui Nu Kimi an lo awm a, Mawii'n thlèng a lo sil mêk a.

"Zanin chu in va buai àwm nak nak ve?"

Nu Kimi chuan,"Buai ém ém hran lo ve, lo lêng r'u. Chaw kan ei kham ve deuh chiah a,"a lo ti vat a.

"Motor chu an siam țha thei dáwn em?"

"Ka hre lo le, an tum leh phawt dáwn chu a nih kha."

Țhutthlèngah chuan kan nufa chuan kan țhu a, Mawii chuan," Nono, thlêng ka sil zo țêp tawh aw, lo nghâk fan fan rawh,"a lo ti ve a.

"Aw le."

"Sarah?!!!"

Rohlua aw a ni chiang mai!

Ka hawi chhuak vat a, bathroom ațanga Rohlua lo chhuak hlim hlawl nèn chuan kan inmelh ta reng mai.

"Rohlu, eng nge i lo tih?!!!"

"Motor chhia-ah khan ka chuang ve alawm."

"I ni tak tak ti raw?!"

Ani chu a lo nui var var a, kan bulah rawn pheiin min rawn chibai a, Nonoi pawh chu a chibai nghal a.

"Hei chu Sarah-i fanu tih a hai theih loh chiang mai. Bawihte, tunge i hming le?"

Ani zak chu ka phènah a biru chaih chaih a, nui chung hian,"Min chhùn a, a zakzum ve a,"ka ti a. Nonoi hnênah chuan,"Nono, Âpa Rohlua a nih hi. I papa ţhian țha deuh a nih hi, i hming chu hrilh la, i fel ém kha,"ka ti a.

"Nono-i."

"I va fel ém ém !! Sikul i kal tawh em? Pâwl eng zât nge i nih tawh le?"

"Pawi tum."(Pâwl thum)

"E, i va pâwl sâng tawh ve aw! Nih leh, ânu hming i hria em?"

"Ni lo, mama hming maw le,"zàwi deuh hlek hian Rohlua bulah chuan ka ti a.

"E, i mama hming i hria em? A hre leh hrim hrim ang."

"Talah."

Rohlua nuih chu a za lutuk tlat.

"I va lawmawm reuh tak, i hmêl a țha si a, i pa chuan hmu ve che se aw,"a ti vang vang a.

Mawii'n room lama Nonoi a hruai luh hnuah Nu Kimi nèn kan pathum chuan kan titi a, thingpui sen hâng kan in pah bawk a.

"In khua hi a nawm hmel reuh ka ti. A lum ve deuh nain thing a tam a."

Nu Kimi chuan,"Nuam ve reuh a ni ang, mikhual lo kal hian nuam an ti ve țhìn. Nia, a lum khawp mai, a awmna hi a hniam ém a,"a lo ti a.

"Sarah, sikula i thawhna chu a rei tawh em?"

"Kum hnih a ni ve tawh."

"A rawn thawk lo ang tih a hlauhawm asin. Naupangho Chhiarkawp thiam lo lutuk pawhin an thiam phah tawh lutuk, zirtîr dan a thiam a ni ang."

"A nih ka ring, ani hi chu naupang ngainat zâwng a awm pawh a thiam ngawt ang."

Rei vak lo hnuah chuan,"I in luah pawh hmuh a châkawm ve rêng rêng alawm. Motor kha an siam țhat theih hlauh chuan zànah hian kan tlãn leh nghal dáwn si a, zu hmu ve rêng rêng ila,"a ti a.

Kan in luaha kan luh chuan,"A nawm hmel reuh hi, in nufa tân chuan a tâwk khawp alawm ti raw?"a ti a, a hawi kual vat vat a.

"Nia, a tâwk khawp mai."

"Țhiana chuan han hmu ve se..."

A țhianpa ve ber a hre chhuak nghal zel chu thil àwm lo pawh a ni lo ve.

"A thih tak tak hi a châng chuan ka ring lo țhìn."

A sawi lo thei lo a nih hi. Kei chuan tu mah ka sawipui ngai lo va; mahse, Rohlua bulah hian thil zawh tùr ka la nei ve tho a, a sawi chhuah tâkah hi chuan sawipui pawh a pawi ka ti lo, ka sawi khât tawh ém mai.

"Kan inang a nih chu. Han thihpui thut tùr atân chuan a natna kha a ho ka ti a, a kawchhûng lamah nghawng țha lo deuh a lo nei a nih ngawt loh chuan. Mahse, ani ang che thei lo, damdawi in kàng ațanga dam chhuak tùr ém chuan a harsa deuh a ni."

"Keimahah hian a thawh dan hi a mak ém a, chuvàng chuan ka ring thei lo mai mai maw le. A thî tih ka hriat tirha min shock lo lutuk ber kha a mak ka ti a, chuvàng chuan a thih tak tak hi ka ring thei lo ni berin ka hria."

"Ti ta daih ila, hun kal tawh mah ni se, Pângzâwla ka haw phei hnu khân engtin nge min puhna kha i hrilhfiah rêng rêng?"

"Eng puhna maw?"

"Aizawl ațanga ka haw phei chhan kha."

A ngaihtuah lêt vang vang hnuah chuan,"E, kha kha maw, phone-in ka bia a, min chhâng duh lo va, inah khân ka kalchilh hmiah mai. Ka hnâr ruh hi a hnek tliak emaw ka ti hial a ni,"nui chung hian a ti a.

"In insual maw?!!!"

"Sual ang chu. Ina ka lût chiah kha eng mah sawi lovin min lo hnek nghal ringawt a, kei pawhin ka hnek ve bawk. A mit ko-ah leh a hmuiah ka hnek a, thisen lah chu a chhuak duh em em zui lehnghal a. Kan chauh deuh hnuah chauh kan titi ta alawm, ka kut leh ka hnâr hi a na ém ém mai a, damdawi ina kal chu kan duh lo ve ve bawk sia, nurse hmél hriat ka neih kan pan ta ringawt alawm."

Chu chu a lo nih dáwn chiah chu, a mit ko leh hmui vûng bâr kha.

"Ih, thil nih dan dik tak ka sawi ang, i lo ngaihthlâk peih phawt chuan."

"Sawi la."

"Bialnu ka neihchhun hian inneih kan tum laiin motor accident-ah min boralsan ta daih mai a, ka tuar lutuk avàngin Mizoramah pawh awm duh lovin Delhi-ah ka awm char char a, zû-a ka inhnem theih beiseiin ka in nasa țhìn; mahse, eng mah a ni lo. Lehkha zir inti siin class pawh ka kal ngai lo, ka awm dan chu ka pate'n hriain min hruai haw an tum a; mahse, ka hãw duh miau lo va, tihngaihna an hriat loh avàngin ka cousin, ka nau hmeichhia ka bula lehkha zir tùrin an rawn tîr thla ta ringawt a."

"Mahse, ka awm dan a ngai reng. Ka cousin chuan Mahlima hi Mizo inhmuhkhawmna lamah a lo hmu țhìn a ni àwm e, a ngaizawng khawp mai a, ka bulah pawh a sawi fo. Kei chu ka Mizopuite bulah ka awm ve ngai lo, vai ţhian ka kawm loh chuan mahniin inah ka awm mai."

"Zan khat chu ka cousin chu a rawn țap hãw ta tlat a, a chhan ka zâwt nghal a, Mahlima chuan bialnu nghet a neih thu a lo hrilh niin. Ho ka ti khawp mai a;mahse, Mahlima chu ka hmuh châk phah ta tlat. Inanna kan nei ka ti tlat a, hmeichhe pakhat hmangaih tlat ang chi kha. Ka cousin țap chuan ngaihtuahna țha lo min neihtîr ta tlat a,' he pa hi ka zawng chhuak ang a, a bialnu nèn an inkâr hi ka tibuai ngei ang' tiin. Hun a lo kal zel a, kan inkàwm ta ngei a, kan inkàwmngeih ta phian mai. Ka inrin loh kârin nupuiah a lo nei hman bawk che; mahse, ka hmuh hmasak ber khân ka bialnu boral ta nèn khân inang ka ti ta tlat mai che a, in inkâr tihbuai ka tum thut thut pawh chu ka țhulh ta daih a."

"Hmeichhia hi ka care khât viau; mahse, care ém ém pahnih chu ka nei: ka bialnu boral ta leh nangmah. Ka ngainat dan che chu ka sawi fiah thiam chiah lo, ka nau hmeichhia ka care ém ém ang chiah i ni, nang erawh chuan min ngei deuh țhìn a nih kha. Mahse, i awm dan kha ka hre fiah lutuk, ngaihsak i ngai tih kha ka hre ve tlat."

"Chuan, Lucy kha ka hmu a, pasal a lo nei ve tawh a, a fa neihna pa ngei kha. Ani pawh thil awmzia ka va zawh chuan mittui tla zawih zawihin, pawi a tih thu a sawi ve kuang kuang a, ka khawngaih ang reng khawp mai a, tih vak ngaihna a awm chuang bawk si lo va."

Lucy fa chu Mahlima fa a ni lo va, a pasal ni ta fa a ni. A hun lai khân engtin nge ka hriat loh le? Enggin nge ka rinhlelh thar leh thut theih le? Rilru na ém ém a awm lo thei tùr kha, ka pasal ka rinhlelhna avàngin ani, thihna kut vâwtin a man mêk kha ka chhuahsan a, kan rilru ka lo tihrehawm ve ve si a. Mihring hi a lo va màwl theih tak ém! Rinhlelhna mita ka en tlat avàngin thil ni lo pui kha ni tlat angin ka hmu tlat si a nih kha.

Rohlua-te motor chu an siam țha thei ta hlauh mai a, dâr 10 velah an haw thei ta. A kal dáwn chuan Nonoi tân, a pocket money tùr chêng zanga lai min pe lui a, ka hnial tak nain a ti lui tho dáwn tih ka hriat avàngin ka la ta. Mut hmunah Rohlua thu min hrilh chu ka ngaihtuah char char a, Rohlua cousin hmeichhe bulah pawh Mahlima chuan min phatsan duh lovin a bialnu nghet angin min sawi a, keimah vàngin hmeichhe dang a hnar a ni. Chuti ang bawkin, Lucy pawh. Doctor-a an kal dùn ka hmuh kha chu Lucy'n a sàwm vàng liau liau leh naute pain a rai tih a la hriat loh vàng a ni bawk. Naute pa khân naute kha a duh a ring bawk si lo nèn, a hrilh ngam lo va, Mahlima hnênah hrilhsak tùrin a țahawh ta ringawt a ni àwm e.

Ka pasal chu a thi tawh. Engati nge a thih hnu hian a chanchin, ka lo rinhlelhna dik lohzia hi ka hriat chhuah thar zel ni? Ka dik loh vek a ni, ringhlel lo ila, heti ang dinhmun hi kan thleng lo tawp ang.

Ka muthilh theih ngang loh avàngin ka tho leh a, inchhîrin ka țawngtai tawp. A sâwt tawh lo tih chu ka hria; mahse, eng nge tih theih ka neih chuan le? Ka țawngtai khàt tâkzia ka hre chhuak uar uar a, eng mah ni si lo hi ka lo chapo ve ém ém ringawt a ni tih ka hmu chhuak tel bawk.

Ka chapona vàngin ka țhian țha ber ka chân a, ka fanu chu a chhûngte lak ațangin ka la hrang bawk. Eng nge nia ka inhriat le?

Khaw lum a kiang a, ruah a rawn sûr țan ta a. Tlawng lam kawng a chhiat avàngin Haulawng to Dawn kawngah motor tê chu an rawn tlãn țan a, fùr ruahtui chuan Râlvàwng chu malsàwmna a rawn thlensak a ni ringawt. An thlai tharte Lunglei lama thawn ngai lovin an khaw 'Bazâr In' an sakah chuan an zuar dul mai a,a thar lâm thei bawk a, an hralh thei khawp mai.

Tlaiah chuan chawhmeh bazâr tùrin ka va kal ve a, Nonoi erawh Mawii bulah ka dah leh rih. A chhan chu fùr a nih tawh avàngin thosi a tam tawh a, ka hruai tel a nih chuan kan hãw leh lawk thei lo emaw a ni ang a, chu chu ka duh lo a ni.

Sumo leh car eng eng emaw an lo ding țhup a, nuam lo ka ti ang reng khawp mai. Bazâra țhute chuan min lo ko sap sap a, Nonoi hian maian bai a ngainat ém avàngin maian lei ka tum a ni.

Ka pelh tâk chiah car vâra ka mi hmuh vuai avàng chuan ka ding chawt mai!!! Ka hawi lêt ngam lo va, ka che sawn ngam lo bawk. Ka thin a rawn phu nghal dut dut mai, ka mit vài a ni ang em? A kun deuh hlek avàngin ka hmu chiang lo mai mai a ni ang. Ka mit vài mai a lo nih hlauh si chuan... Ni lo, thil ni thei a ni lo! Mahse...

"Sarah?"

LALHLIMPUIA - 36 By Dingdi Pachuau

Ka phu zawk mai!!!

Min kotu chu muangchângin ka en a, Siama lek lo niin. Ka thaw huai a,tlêma tlêmah min tiphu hlum lo chauh alawm le! Siama chu a bazâr ve a ni ang, chawhmeh a khâi nual mai.

"Chawhmeh i lei ve elo?"

"Lei lo ve; zawrh tùr ka dah zâwk a."

"Sikul bànah i feh leh hman a ni maw?!!" Mak hi ka ti a ni, sikul kha a rawn kal a, kan haw hun pawh a inang reng si a, hna a lo thawk leh hman tawh bîk a! He khuaa mite hna thawh nasatzia hi mak ka ti, hlawhtlin hi an phû a ni.

"Kan kawmthlang lawka mi a nia, eng nge lei i tum a?"

"Maian maw le, Nonoi hian bai hian a tui a ti tlat a."

"A nih tak chu, kan neih zâwng a ni lo tlat a nih chu maw le. Samțawk leh bawkbàwn hi kan ngah a, ankasa leh changkha nèn. I duh ve em?"

"A ngai lo, ka lãwm lutuk. A hmaa min pêk pawh kha kan la nei alawm."

Tîm deuh dai hian ka hawi kual a, car vâr awmna ka va en chuan a tlãn tawh a ni chiang, a lo awm tawh hauh lo. Ka âwm chu ka dawm a, ka hmuh sual mai mai a ni, amah ang deuh pawh an awm ve thei tho alawm. Bâkah, ani te chu a thi daih tawh alawm. Rohlua thu sawi vàng vek, beiseina dik lo ka neih phah lehnghal, tih chi lo lutuk.

Maian leh vaimîm chu ka lei a, muangchângin ka hãw a. Ka hàw kawngah chuan car-a chuang ka hmuh pa kha ka ngaihtuah lêt a,a kûn deuh hlek a, ka hmu chiang fahran lo nain Mahlima chu a ang chiang alawm. He khawvêlah hian mi inang deuh deuh chu an tam ang chu, kei ngei pawhin inang tih deuh deuh, hai ka nei fo. Car-a ka hmuh pawh kha Mahlima ang tak a ni chiang alawm.

Maian thar lâm ser sawr chu ka bai a,artui ka kang leh bawk a. Nonoi ei duh lam hlîr ka siam țhìn. Kan nufa ei a tlêm si a, ei duh zâwng inang lo siam phei chuan 'chhe rawh se' tihna nèn a inang chiah. Khua a lum țhin ém avàngin ei tùr leh chawhmeh dah țhatna neih a țûl hle a,mini fridge leh table fan ka lei a, a țangkai tak zet.

Chaw kan ei chuan Nonoi chuan a ei tam lo kher mai. Maian bai ka siam chuan a ei tam ve theih țhin teh lul nèn, zanin tlai chu a ei tlêm tlat, dik lo a awm a ni.

A ei belh duh tawh loh avàng chuan a kut leh a hmui ka tihfaisak a, a nghâwng leh a pang chu ka dehsak a, a lo lum deuh hlek a, a damlo deuh a nih àwm hi.

Damdawi ka kawl sâ avàngin ka pe nghal a,puak a duh leh duh loh chu ka zâwt pah bawk a. A lo duh teh mial a, paw pah chuan chaw eina chu ka seng fel nghal a.

A hrisèlna hi a pan ém avàng hian thingtlâng kil khãwr deuha awm ka hlau țhìn rêng a; mahse, Râlvàwng chu Lunglei a hnaih a, lehlângin a kal zung zung theih a, a zia viau.

Nachhâwkna chuan a chhâwk ve leh mai bawk a, zàn dâr 12 vêlah a rawn lum leh a, a tãl sat sat reng bawk nèn. Ka tho a, damdawi ka pe leh a, mutpui duh lovin ka paw ta zâwk a.

Ka mu ta miah lo. Ka fanu hi a damloh chuan ka muhìl thei tawh ngai lo. Ani muhìl thei pawh ni se, kei chu ka muhìl ve ngam ngai lo. A pang a sa hluah reng a, khua vâr phawt se, Lungleia kal a ngai a ni.

A pian chhuah dan rêng a dik tâwk loh avàngin natna a kai hma bîk a, ngaihtuah pawh a ngai. Dam țha viaha a awm hnu lawkah a na leh a, a dam leh a, doctor pawh ka panpui tam. A thawhah a chhuah châng phei chuan ka mang a ang thei lutuk, ka țawngțai ringawt zêl.

Khua a vâr a, a khawsik a reh theih loh avàng chuan kan Head-te inah Nonoi paw chung chuan ka kal a, chawlh ka dîl ta ringawt. Lunglei kal a entîr ka duh thu ka sawi chuan min lo hre thiam khawp mai a, min lo phalsak nghal.

Ka tum loh dàn deuhin min lo admit tlat mai. Doctor chuan min lo ngaihven khawp mai a, min tihlauthâwng zo vek. Nonoi chu a khua a sik reng mai a, eng mah a ei duh si lo, hrehawm ka va ti tak ém!

Ka nu ka phone a, thil awm dan chu ka hrilh a, Tluanga nèn an rawn tlãn nghal dáwn tih a sawi a. Chuti ang vut vut chu ngai ka ti lêm lo nain pawi ka ti lo, mahni chauh chuan kei hmeichhe derdêp tak hi a rûkin ka thlâ a phãng a ni.

Chhùn leh zàn zawm zata mu lo leh rilru hah rêng rênga ka awm avàng chuan ka taksa a chàu hle mai a; mahse, ka fanu chu ka muthilhsan ngam lo. Doctor-te'n a natna an hre chhuak thei si lo, a châng chuan kaih tùr ang deuhte hian a awm a, ka mangang lutuk chu ka țawngțai hlei thei tawh lo.

Ka thawhpuite pawhin an rawn kan liam liam a, an ti țha ka ti khawp mai. Chàu chung chung chuan hmêl hlim thei ang berin ka lo chhàwn a, dam leh thuai tùrin duhsaknate min hlàn tliar tliar a.

Kâr khat deuhthàw kan awm ta, eng mah ka ei thei bîk lo. A bulah ka awm reng a, khawiah mah ka kalsan ngam lo. Heti ang ém ém hian a nâ ang tih chu hre lâwk thei ila chuan...Ka chàu lutuk chu nikhaw hre lovin ka tlu ang tih ka hlau, ei tùr ei lo mah ila, tui erawh chu ka in hrãm hrãm a ni. A rûkin ka țap reng a, Nonoi hian min kalsan ang tih hlauhnain ka khat. Doctor-te pawhin min vil ngun deuh bîk em aw ka ti hial, a natna an hre thei tlat bawk si lo.

Christina a rawn kal hlawl a, kan inhmu chu kan țap ve ve. Eng mah pawh kan sawi thei lo, Nonoi chu kan en tlawk tlawk mai a ni.

Ka inthiar hlànin ICU-ah an lo dah lût a, inthiar tùr takngial pawh hian ka kalsan hreh asin. Ka rilru nâ leh hlauthãwng bawk si chu ka țap lo thei lo, ka khùr zawih zawih bawk a.

Ka vài riai mai, ka chàu lutuk ringawt. Ka chhûngte hian rei lo tê tal mu tùr leh thil eng emaw tal ei tùrin min ti ziah; mahse, ka thei lo. Ka fanu pawhin eng mah a ei theih loh bâkah na tuarin a mu reng a, keiin ka lo ei bîk thei lo. Ka muthilh hlànin min kalsan ta se, ka inchhîr tàwp thei lo ang. Chuvàngin, ka intiharh hrãm hrãm a ni.

Dârthlalang chhan ațang chuan ka fanu, natna khuma mu mêk, khâwl eng eng emaw nèna thlun zawm țuk chu ka en reng a, a bula țhuta a kut vawnsak ka duh asin. Ka tel lo chuan a khua a har ang a, min hmuh loh chuan a țap mai ang, a țah ka phal lo. A nih loh pawhin, a bulah tal mut ve ka duh, keimah zâwk tak pawh hi a tel lo chuan ka kim thei lo. He khawvêlah hian ka fanu damna aia duh hi ka nei lo. A pa ka chân tawh a, ani hi chu ka chân thei tawh lo ang, ka dam chhan takmeuh a ni tawh asin. Min kalsan dáwn a nih pawhin a rualin kal ve ka duh, min kalsan thei lo ang. Chuti ang bawkin ka kal dáwn a nih chuan, a tel lo chuan...ka tel lovin a awm thei bîk dáwn lo asin.

Ka mit selh selhin ka hria. Kei pawh hi ka thi ve ngei dáwn a nih hi, Nonoi bân chelh chunga kal ka duh asin. Dârthlalang chhanah chuan a bân awmna chu ka chûl a, ka aw chhuak țha thei lo chuan ka ko a.

"Min kalsan suh, i ruala kal ve ka duh a, ka kaih loh che chuan i tlu mai ang. I ril a lo țâm ang a, tuin nge chaw pe ang che? Nangmah maia i kal ka remti lo, min hruai ve mai teh. Kal hmasak i duh a nih pawhin min lo hmuak rawh aw, Nono. Ni lo, nangmah chuan kawng i bo mai ang."

"Nono, kal rual mai ang aw. I bânah ka chelh tlat a nia, i pa kan han hmu ang a, ka hmêl hriattîr ang che. Pa azawnga pa țha ber tùr a ni asin, a hmuh hunah chuan a chhuang ngawt ang che."

Ka mit ka chhîng ta riai riai a.

Ka hawi kual a, tu mah ka hmu lo. Nonoi bân kha ka chelh ngei asin le, khawnge a awm ang? Ka theihtàwpa ring chuan ka ko a, ka hah lutuk chu ka thaw hlawp hlawp mai.

"Sarah, Sarah.....!!!"

Hei chu Mahlima aw a ni tlat!!! Ka thi ve ta ngei e. Mahse, Mahlima chu ka va hmu chuang si lo ve?

"Mahlim?!"

"Sarah, i țha em?"

"Mahlim, khawngaih takin, Nonoi hi chu damtîr hrãm rawh aw. Nang i awm tawh lo va, ka neihchhun liau liau a ni tawh. A natna hi lák kiansak teh, ani ang la naupang tân chuan a na ém mai."

"Sarah, lungngai suh aw, a dam leh vat mai ang."

"Ka lãwm e aw. Ka bulah chuan awm ve se chuan ka hmêl hriattîr pah tùr che a nia."

"Ka hmu alawm."

"Ni e, engkim i hmu thei tak ang chu. Nonoi hi zawng, a la naupang a, a nunah hma chhawp tihpuitlin tùr a la nei țeuh dáwn a, thi hman a la ni lo. Keinite chu kan upa ve tawh alawm, ti raw?"

Min kuah a, ka thla a muang huai huai maiin ka hria. Min kuah lohna a rei ve tawh ém bawk a, a kuah nawmzia ka lo theihnghilh lek lek tawh alawm le.

"Nonoi chu damtîr thuai teh, a harh huna min hmu lo tùr erawh ka khawngaih khawp mai."

"A hmu dáwn che alawm. Țawng tawh suh, a lo harh veleha a hmuh theih nân che maimichhîng tawh rawh le."

Mahlima bula awm chu nuam ka ti, hei hi vàn ram a nih loh pawhin an sawi 'Paradis' chu a nih ngei dáwn hi.

Ka meng siar siar a, vâr pup bâk ka hmu lo. Hremhmun a nih chu ka ring lo ve ringawt, a vâr ém mai. Ka hawi kual deuh a, kawngkhàr niàwm tak ka hmu. Chuan, khumah ka mu a nih hi. Khawiah nge ka awm le?

"Bawihte?"

Ka nu pawh a lo kal ve reng a nih hi!!!

"Bawihte, i țha maw?"

"Nu, i lo kal ve a ni maw? Paradis-ah ti raw kan awm? Khawiah nge Mahlima pawh kha?"

"A lo kal thuai ang."

"Tuna ka awmna hi a nuam ka ti, Mahlima pawh a țawng theih tawh bâkah min kuah thei tawh a, ka thlâ a muang tawh khawp mai. Mahse, ka mut chhuak a rawn kal leh tlat tawh, ka harh hunah Nonoi ka hmu thei ang em le?"

Ka muhìl ni maiin ka hria.

Mahlima hmêl chiang takin ka hmu leh ta. A chal leh a biang erawh a ser deuh a nih hi, min nuih var var a, kei pawhin ka nuih lêt ve tho.

"I muhìl rei tawh mah mah a ni, tho tawh la?"

"I hmai kha ka lo chûl teh ang."

Min chùltîr ve mai a, nuam ka va ti tak ém! Khawiah mah kal sawn loh ka duh, Mahlima bula awm reng mai hi ka duh a ni.

"Paradis hi a nuam ka ti. I țawng thei a, ka khawih thei che a, i kal thei bawk si. Thih pawh hi a lo hrehawm lêm loh hi, ti raw?"

"I thih ka phal teuh lo mai!"

"Kei pawh i thih ka phal bîk loh laiin min thihsan tho kha."

Min en vang vang a, hmangaihna mitmenga min en vàng nge, a mitte chu a mawiin a nung sar maiin ka hria.

"Ka hmangaih che,Sarah."

Ka nui var var a, he thu hre tùr hian thih kher a lo ngai a nih dáwn hi.

"Kan thih hmate khân lo sawi tawh ni la..."

"Sarah, min chûlin min dek teh."

A rawn kùn hniam avàng chuan a hmai chu ka chûl kual ruai a, thihnain min pawt țhen tawh a, tunah hi chuan eng mahin min pawt țhen thei tawh lovang, ka kaltîr tawh dáwn lo.

"Min kalsan tawh suh aw. Chuan, kal tùrin min ti tawh bawk suh, thih nawn leh ka duh tawh lo a nia."

"A thleng tawh lo ang, ka tiam a che."

Khumah hian ka mu reng mai a, eng vàng nge ni ang le? Paradis-ah chuan damlohna leh natna a awm tawh lovin ka ring bawk si.

"Khumah ka mu reng maiin ka hria. Paradis hi fan ka châk asin, ka damlo a ni lo ti raw?"

"I dam alawm, i chak tâwk lo deuh mai a ni."

"Ka bulah lo mu ve rawh. Tichuan, ka harh leh hunah ka chak thei tawh ang, min awmpui bawk la."

"Teh rêng mai."

Ka bula muin min kuah a, rei lo te hnuah ka muhìl leh mai. Mumang ka nei pawhin ka hre lo.

Ka mit ka han meng siar siar a, in chung vâr pup ka hmu hmasa ber. Ka mit ka khap sak sak a, thãwm ka hria, țawng thãwm a ni. Ka hawi kual a, hmeichhe pakhat a vâr veka inthuam ka hmu. Hei chu angel a ni chiang ang.

Chu angel chu mihring țawngin a țawng ve tlat mai!!

"A bp pawh a dik vek tawh e, a țha tawh lutuk."

"A lãwmawm lutuk e, kan lãwm e."

Lo țawng ve chu angel dang tho em ni le? Ka hawi kual leh deuh a, hmeichhe kawr sen ha ka hmu ve thung, angel kawr sen ha maw?

Christina a ang deuhin ka hria. Ani pawh hi paradis-ah a lo kal ve tihna em ni? Bia ila, min chhâng duh ang em aw?

"Hei, angelte u, ka pasal kha in lo hmu em?"

An rawn hawi rual țhawt mai. Angel kawr sen ha chu Christina a nih chiah hi.

"I lo harh tawh maw? I ril a țâm em?"

"Thangi, ka damlo em ni?!!

A nui var var a.

"Dam e, i dam țha lutuk ringawt."

"Nih leh, ka kalnaah i lo kal ve tihna em ni?"

"Aw, kan lo kal vek. Mahlima pawh a awm ve reng kha."

"Ani chu ka hmu ziah, ka nu nèn."

Ka hawi kual zau deuh a, tukverh leh kawngkhàr, ceiling fan, parda, tui bottle ka hmu zel a, hei hi paradis kha a ni ta lo em ni le?

"Paradis-ah ka la awm em?"

"Sarah, damdawi inah kan awm zâwk. I chiang tawh em?"

"Eng vàngin nge kan awm a? Ka thi lo em ni? Ka thî khân ka hre si a?"

"Thi mai mai lo, i thih kan phal hlei nem."

Ka thi lo maw?!! Paradis-ah chuan ka awm ngei si kha. Chuti, khawiah nge Mahlima kha? Ka hmuh ngei kha, ka bulah pawh a mut chian khawp kha maw.

Ka inbeng tho a, khumah chuan ka țhu ta. Ka pum a ri ta raih raih mai, ka ril a țâm a nih dáwn hi.

"Ka ril a țâm."

Kawngkhàr a rawn inhawng a, Mahlima a rawn lût a, a la nui suk zui a, a chhe lo teh e.

"I lo harh tawh maw?"

"Aw, khawnge i kal daih a? Hei Thangi hian ka thih loh thu a lo sawi a, a dik em?"

Ka khum bula rawn țhuin," I thih ka phal lo ka tih tawh kha. I ril a țâm em?"a ti a.

Ka rilru a la buai tlat.

"Ka thih loh chuan nang i thi bawk si a? Engtin nge ...ka hmu thei bawk si che a...thlarau i ni em?"

"Sarah, i thi lo. Tu mah thi an awm lo bawk. I mumang ata kha lo harh chhuak tawh teh."

Christina chu ka en a, a thil sawi chu a tak a ni em? Ka thi lo tak tak tihna a ni em?

"Mahse, i thi sia?"

"Ka thi lo, hriat sual palh a nih kha. Min khawih mah la, hmâna Mahlima taksa tho kha ka la pu reng. Nakinah, kan la sawi fiah dáwn nia aw, thil ei phawt la?"

"I thi lo maw!!! Ni lo, i thi an ti tlat a ni."

A kut chu ka chelhsak a, ka chûl a, a bân leh a hmai, a hmui, a sam zawng zawng ka chûl vek. Ka khawih thei ngei si, kha leh chen thi tawh anga ka ngaih kha a thi lo tihna maw?!

"I thi lo tak tak, ka khawih thei che, i lung phu dat dat pawh ka hre thei. A dik a ni, i thi lo."

Ka kuah a, ka țap zawih zawih mai. Kuah reng ka duh, thlah tawh miah lo tùrin leh min kalsan tawh miah lo tùra kuah ka duh.

"Lalpa, ka lãwm e. I thi lo, i thi miah lo. Thangi'n i thi a ti a, dâwt vek. I kut kha a la nâ em? I ke pawh. Ni lo, i kal thei tawh! Ka țawngțaina chhànin a awm a nih hi."

"Nonoi leh ka tân i lo la thi lo. Nonoi i hmu em? Khawiahnge a awm? Hmuhtír che ka duh asin."

Ka țawng tàwp thei lo. Ka țap a, ka nui bawk a. A hnên ațang hian engkim ka hre duh, engkim, ka kalsan ațang khân engkim ka hre duh a ni tawp.

"Fanu hmelțha tak min pêk avàngin ka lâwm e. I muthilh laiin ka lo hmu tawh a, ka chhuang tak zet a ni. Țha taka i lo enkawl avàngin lâwmthu ka hrilh bawk che."

Ka hnung chu duat zetin a chûl hliau hliau a,hei hi mumang a ni ang tih ka hlau tak zet.

"Ka mumang a ni lo ti raw?"

"Sarah, i mumang mai min nihtîr suh."

Ka kuahna chu thlahin ka kut pahnih chuan a biangah ka vuan a, kûn hnaiin a chalah ka fâwp a, chutah, a biangah ka fâwp leh ve ve bawk a.

"A tak tak i ni hi awih a har ka la ti cheu."

"Sarah, ka hmangaih che. Nonoi nèn ka hmangaih che u."

******************

Kâr hnih hnuah chuan

~~~~~~~~~~~~~~~~~

"Honey, i zo dáwn tawh em?"

"Aw, zo a ni mai."

Nichîn ațangin min ko chhên tawh. Ka hmanhmawh lo lui ve tlat. Dârthlalangah chuan ka taksa chêr kiam mai chu ka en reng a, heti khawp maia ka lo chêr thei hi mak ka ti a ni.

"Nonoi a inthiar duh tawh a nia."

Towel-a intuamin ka chhuak ta vat. Râlvàwngah kan awm leh tawh a, vawiinah class ka kal ang a, naktûkah Aizawl lamah kan phei ang. Mahlima in-checkup tùra a kal a hun tawh a, kan nufain min hruai a duh bawk si a, kan tel lo chuan kal a tum dèr lo. Chu chu ka duh lo va, kan kalpui dáwn a ni, Nonoi entîr pah a remchâng dáwn bawk si a. Duh lo hle mah ila, ka kal loh chhûnga ka ai lo awh tùr khaw chhûng mi aikal ka la rih dáwn a ni.

Sikulah chuan Siama chu an fiam nasa thei hle a, fiamthu thawhin' Ka râl ang che' an ti a, pawisa thîr an pe khâwm a, kei pawh ka nui ve var var reng mai.

Kan nufa damdawi in awm chhûng khân min rawn kan nasa a, thawhpuite an felin Râlvàwng khua a chêngte pawh a mimirin an bengvâr ka ti, ka ngaina hlawm khawp mai.

Tlai lamah Pa Finga'n an ina chaw ei khâwm a rawt a, an broiler âr vulh, thau zet mai chu an talh a. Keini pawhin bawng sa, fridge-a kan dah chu kan keng chho a, Mahlima'n a siam thiam riau a, a siam thianghlim thei bawk a, a tu thei tawp.

Chaw ei dáwnah Pa Finga'n làwmthu sawi țawngtaina hun rei vak lovin a hmang a, Nonoi pawh a awm țha reuh ngei mai.

Chaw kan ei lai chuan Nu Zuali chuan,"Sarah, ei țeuh rawh. I chêr mah mah tawh a, i mawi lo lek lek tawh a nia,"a ti a.

Pa Finga thung chuan,"Hmangaihtu mitah chuan a mawi tho,"Mahlima ena nui chung hian a ti a, mi dang pawh chu an lo nui ve țhâ hlawm a.

"Ka mitah pawh a chêr ve tho."

Ka rin loh dàn daihin a lo chhâng. Ka melh ralh a, ka ner nâwng bawk. 'Ni e, ka hmangaih a, ka hmu mawi ém ém tho' tia a chhân ka rin teh lul nèn. Hm, zanin chu phubâ ka la ang, a hre viau ang.

Chawhmeh an siam tui bawk a, kan puar tlângin ka hria. Kei ngei pawh ka puar lutuk, Nonoi lahin a ei țeuh bawk si.

Naktûk lama zin chhuak tùr kan nih avàngin kan meng rei lo, kan chhuk thuai a. Nonoi chu a muthilh tawh avàngin khumah chuan a pa chuan a mut nghal a, kei chuan Nonoi thawmhnaw ken tùr chu ka dah belh thung a, ka be duh miah lo va, ka titau tlat dáwn, zanin chu.

"Honey, lo mu mai mai teh."

Ka chhâng duh lo lui tlat. Ka thil tih lai chu ka tilui ngar ngar a.

"Thawmhnaw ken tùr siam vak a ngai lo, kan lei hãw țeuh zâwk ang chu."

Ka chhâng lo va, ka tilui tho.

A rawn tho chu ka mitsîr reng a, ka bulah rawn kalin ka kutah a rawn man chat mai.

"I lungawi lo lo ti raw?"

Ka en duh lo lui tlat, lehpek hian!

"Honey, i kal peih lo em ni? I peih loh chuan kan kal lo thei tho a nia."

"Kan kal dáwn alawm."

"Tinge i țawng duh tlat loh? I nuam lo chu a ni lo ti raw?"

Ka khawngaih ve tho bawk si. Thu dang sawipui daih ang.

"I thih leh si loh dan kha min hrilh i la bâk a nia."

"Aw le; mahse, kha kha dah la,mut hmunah ka hrilh dáwn che nia."

Kan khum chu a zau fahran lo va, saisîra muin min rawn kuah a, ka nghâwng chu a rawn nawr châk châk a.

"Het, a hun lo, min hrilh phawt rawh."

A sawi ve mai bawk a.

"Damdawi in a kan țantirh khân a chhûngah ka la awm a, min awmpui tùra nurse kan rawih erawh a awmna lam a dik tâwk loh avàngin a nunnain a tuar ta a ni. 'Ka thi ngei dáwn a nih hi' ka tih laiin doctor chuan engtin nge min rawn pawh chhuah pawh ka hre thiam ta chiah lo, nikhua ka hre lo zui a. Ka harh leh meuh chuan hmun dang daihah ka lo awm tawh a, ka thi lo chu a ni ta phawt a, mak ka ti kher asin. Ka rilrua lang hmasa ber chu min ţawngțaisak țhin kha, kha ngei kha 'Pathianin a chhâng ta a nih hi' ka ti a."

"Ka bungrua zawng zawng erawh a kàng ral vek. Kha doctor kha Pathian tirh a nih ngei ka ring bawk, min zai a, min enkawl vek. Ka dam theihna tùrin min buaipui vek a ni. Hmuh theiha ka dam chho chu mak a ti viau bawk a, a mak rêng bawk a. Ka chhûngte ka phone lo va, damdawi in kàngah khân ka thih an rin tawh ka rin vàng chuan dam taka ka hàw theihna tùr zawk chuan țan ka la a, ka mitthlaah nang leh ka fanu ka hmu zel che u a..."

"Engtin nge i fanu chu i hmuh theih a? Ka chhuahsan che khân ka la nei si lo va?"

"Christina-i'n a thlalak min lo thawn alawm. Ka en ning lo va; mahse, damdawi inah khân a kàng tel ta si a, mitthlaah chauh ka hmu thei ta a ni. Kum a ral meuh chuan ka kal thei ta sawih sawih a, Doctor lah chuan min phùrpui a, ka inthlahrung viau nain a enkawlna hnuaiah chuan ka awm leh ta char char rih a."

"Chuan, ka ngai ém ém che a; mahse, dam țha pângngai lo chuan hmuh leh che hi ka tum lo a ni tawp. Ka thawhrim phah viau bawk, ka rawn haw theih hnuah chuan biak pawh theih i lo ni ta si lo va, ka hriat chhuah theih dan che i hria em?"

"Hre lo, engtin?"

"Ramhluna hnên ațangin. A cousin Siama, in thawhpui khân status-ah in nufa kha a hmang a, chuta țang chuan. A kual dûm mai."

"Kalsan tùr chea min duhzia kha..."

"Beisei tùr awm miah lo i beisei kha ka khawngaih ém ém che a, kei lah enkawl ngai reng ka ni si. Dam kha a hrehawm ka ti lek lek zâwk a ni."

"I sual si."

Min kuah nghet sauh sauh a.

"Thil kal tawh chu kal liamtîr ang, tûn hnuah hi chuan ka bulah i awm ang a, i bulah ka awm zel tawh dáwn. Eng mahin min ințhentîr tawh lo vang."

A kut a hlei țan riau, ka âwm a rawn zen leh rak rak tawh. Ka kawrhnuai hãk chu a ţhâm a.

"Honey, heti ang hi chu...a hnawk mah mah..i ti lo maw?"

Zanin chu ka hrem ang ka ti rilru asin le. Pa Finga a chhàn dan kha ka la theihnghilh lo a nia.

"Ka chêr tawh lutuk asin, mutpuia kuah pawh ka nuam tawh lo vang."

"Honey, ka tân chuan i mawi vek."

"Chêr min tih kha."

"Ka ti mai mai alawm. Chêr mah la, ruhkawl anga chêr pawh ni la, ka duh tho tho ang che."

"Chu kher chu.."

"Honey, titi tawh lo vang, chezia zawkin aw ni ang."

Kan duhâm dùn bawk a, ka thahrui zawng zawng ka hmang ral vekin ka hria.

"Ka hmangaih che, ka engkim zawng zawng hian an hmangaih vek che."

"Kei pawhin chu aia nasa chuan ka hmangaih che."

Muthilh hmain kan infâwp leh vang vang phawt a, rilru hlim sârhin inkuah rial chungin kan mu ta a.

A TÀWP TA

[Chhiartute chungah làwmthu ka sawi e, in fel. Nangmahni vàng liau liaua ziak thei zel ka ni e. Damte'n kan awm ang a,kan inhmuh leh thuai ka beisei. Love you all]

☆MariaBLeee☆