☆EARTH ANGEL☆ - 11 By Dingdi Pachuau

 ☆EARTH ANGEL☆ - 11 By Dingdi Pachuau

Zànah chuan khuma țhu chungin Mami journal leh note tê-a a thil ziah chu ka chhiar leh a, ka chhiar nawn ka chhiar nawn mai. Ka chhiar nawn ngun poh leh ka u chunga thil thleng chuan min delh rit deuh deuh ni maiin ka hria. Hmeichhe thudàwn takin, he thil hi, a thih hma khân lo hre chhuak hman ila aw, khatiang thil kha a thleng kher àwm si lo va tiin thil țûl hlei lo chu ka ngaihtuah kual a, thlàna ka hmuh a țhiannu sawi dàn kha chuan beiseina kha a la nei ve ţàng țáng a nih kha, kan inhmuh hnuhnun ber țum pawh khân he room-ah ngei hian țha taka lehkha zira mahni inchãwm thei dinhmuna ka din hunah ka bula awm ve a tum thu a sawi a nih kha. Kha thil a sawi hnu lawkah khân a nih kha a thih tâk mai, a thil sawi ațanga a thih hun inkârah khân hun rei a tla lo, ka chunga beiseina nei ve si kha eng thilin nge a beiseina chu lo hlohtîr leh ta? Ka fel chhoh a ring leh lo tihna em ni? Min lo enthla ru reng em niang? 

Mahni iñthiam lohna ka nei thar deuh thut a, zu in kha lo insûm ve deuh ila...a nih loh pawhin a awm chhûng tal khân lo be țhain lo kàwm ve seuh seuh ila, lêng chhuak lo bawk ila...ka thaw hawk a, ngaihtuah ngaihtuah mah ila awmzia a awm tawh si lo, awmze awm tawh lo ngaihtuahna hmang chuan ka insawh ka insawh a, chutih lai chuan ka phone chu a rawn nghawr ta dar dar a, phûr lo zeta ka han en chuan Remruati bawk a lo ni a, he nu hi chu aw... Ka han chhàn chuan," Naktûka i thil min hrilh tùr chu aw, lo ngaihtuah char char rawh," a rawn ti ringawt a, kan inbe tàwp a ni nghál dèr mai. Ka nui hawk a, ka lu ka thing nghâl nak nak bawk; mahse, maimichhîng vang vangin vawiina a thil sawi kha ngun takin ka han ngaihtuah lët a, ka lakah hian a inhawngin mi fel tak a ni reuh si a, keimah chauha ka u chanchin hriaa zêpa ngaihtuah leh vak vak ngai lo hian ani hi hrilh vek ta mai ila, ka thâwl ve hawk mai lo ang maw; mahse, kawng lehlama ngaihtuah chuan mahni hma a sial thlâk ka ti leh deuh a, ani pawh hian chutiang chuan a lo ngai mai thei ang em?

A tûk chhùn chawlha ei tùr kan ei fel hnu chuan a kut bêng thakin,"Le..." tiin beisei nei tak hian nui pah hian min en a, ka hre thiam lo der thung a," Eng nge?" ka ti hlak a, ani erawh chuan a kut kuangkuah thãn pah hian," Mipa i nih kha, i thu tiamah ding la," a lo ti leh a, nui duh hauh lo hian min en ràn a.

Ka țhutna bula ka bag ațang chuan ka u Note chu la chhuakin ka han pe phawt a," Chhiar rawh," ka ti a, ani chuan nui var var chung hian,"Eng thil i ziahna nge ni a? Sawi ve mai la, ziah chhuah kher a ngai hleinem, i zak ve deuh a ni maw," tiin min la fiam lêt zârh zârh a, kei chuan," I chhiar dâwn em?" ka lo ti thung a.

A chhiar chhûng chuan a ngawi ta reng a, zawhna pawh min zâwt lo, a chângin a thil chhiar chu a chàwl a, min rawn en leh vang vang a, a chhiar leh țhìn, kei pawhin a hmel leh a mitmeng ațang chuan a ngaihtuahna hriat ka lo tum ve bawk a; mahse, ka hre thiam chiah lo a nih hi.

A chhiar zawh pawh chuan min rawn en lovin note chu a la en vang vang reng a, a keu țha leh a, a chhiar nawn leh niin ka hria; mahse, a hre chiang ve thawkhatin a hre ta a niang, khup thakin min rawn en ta vang vang a, kan inmelh dùn ta rân mai.

"A khawngaihthlãk takzet a ni, țawngthuchhe lovah, a chunga thleng ang hi ka chungah thleng ve ta se...A, ngaihtuah pawh ka ngaihtuah duh lo, a rãpthlâk ka ti ngawih ngawih, hrehawm a tih dàn tùrzia hi ka ngaihtuah thiam lo zâwk, a thinrimthlâk ngawih ngawih," a ti chhuak ta sap sap a.

"Tu chunga thleng nge i hria em?" ka tih chuan," Aw, i u chunga thleng a ni lo'm ni?" a lo ti a, ka lu ka bu nghat a, amah vêk chuan," A nih, a boral hma khân i hre chhuak em?" a ti leh a, hreh zet hian ka lu chu ka thing ta thung a. Thaw hak pah hian,"A sawi chhuah loh chuan hriat harsa deuh tùr chu a ni, ka hre thiam che," tiin min rawn en vang vang a, a hnuah chuan note chu a bih leh ta daih a.

In ka thlen chuan dâr 9 a ri tawh a, ka tih dàn ngai têin bangah lâwn chhovin ka room tukverh ațang chuan ka lût leh a, zanin chu ka rui lo bawk a, ka lâwn awlsam lutuk. Ka inbual nghâl a, ka inbual zo deuh chiah tihah chuan dawhkàna ka phone chu a rawn nghawr dar dar a. En mang hlei lo chuan ka chhâng nghâl vat a.

"Rod, i tel lo hian ka hlim viau emaw ka ti a; mahse, a ni miah lo, ka ngai ngawih ngawih tawh che a ni. Thil tisual hmasatu a ni tih ka hria, a pawi ka ti takzet a ni, ka thil tih kha ka tidik lo hulhual a ni, khawngaihin, min ngaidam hrâm la, awm dùn leh ang," tiin Rinawmi aw ngei mai chuan țap deuh țuau chung hian a rawn ti a!

"Min va rawn be ngam zâwk ve a!" han  tih vak ka duh viau laiin ka ti ta lo, ka insûm thei hrâm. "Ka țhianpa Joseph-a nèn in inzui tawh kha, kan inkâr tihchhiat i tum em ni?" ka ti ta zâwk a, ani erawh chuan," Joseph-a hi ka duh tak tak teuh lo, min duh êm a, nangin i thîk theih beiseiin ka kawp ve mai mai a ni.  Ka duh chu nangmah chauh hi i ni, i ni reng bawk ang," a rawn ti leh a, ka nui suk mai. Ka nuih chhan hi chu ani min duh vàng hi chu a ni lo chiang phawt mai ah!

"Min duh suh, hmeichhia min kalsantu hi bul țan țhatpui leh ka tum ngai lo, ka mizia a ni lo bawk-" ka tih lai chuan,"I nun a râwng lo tih hre chiang tùrin ka kawp rei che, ka hmangaih che, nang pawhin min hmangaih țhin kha. I chunga ka thil tihsual ang kha ka tinawn tawh ngai lo ang, mawh, Roddick, khawngaihin, i hmaah bawkkhupa ka dìl kher i duh a nih pawhin, i duh ang chu engtiang pawhin ni se ka ti vek ang,"a rawn ti leh a, a insût deuh hraih hraih bawk a.

"Duh lo ve, inbiak tawh loha inhmuh tawh miah loh hi ka duh ber chu a ni," ka ti hmak a, Mami pawh khân ani hi kawp leh tawh miah lo tùrin min duh a nih kha, kawp leh tumna ka nei lo. 

"Bialnu i nei lo tih ka hria-" a rawn tih chuan,"Ka nei tawh, amah pawh i hmu tawh bawk," ka ti leh a, ani lah chuan," Remruati kha maw? Dâwt sawi mah ta che, in inkârah chutiang a awm lo tih ka hria, i hmeichhe duh chi lah a ni hek lo," a rawn ti leh a, a thil sawi a dik êm avàng chuan ka ngawi ta rih a; mahse, ka ngawi rei chuang lo.

"Ka hmeichhe duh zâwng hi a ngai reng lo tih i hriat ka ring, a hma chuan nang ngei pawh hi ka duh țhìn che kha a nia; mahse, tunah chuan..." tiin ka sawi zawm duh lo va, ani erawh chuan," Chuti'n i rilru kha i lamlêt nghâl vat thei lo, min duh theih êm kha, min hmangaih kha," a rawn ti leh a, thaw huai chung hian,"Hmangaihna pawh hi huatnaah a inlet ve thei tho tih i hre hmaih a nih ka ring," ka ti ve thung a.

Biak rengin awmzia a nei thui lo tih hriain kan inbiakna chu ka titàwp a, rei lo tê hnuah a rawn ri leh zat a, ka en tawh lo, a ring ral țhak a, a tàwp hnuah a rawn ri zui leh zat tho.

Ning zet hian,"Ka block mai dàwn em ni?" ti rilru chung chuan ka phone chu ka en a, Rinawmi ni lovin  Remruati a lo ni tawh a, thaw hakin ka chhâng ta nghâl a.

"Ka rilruah ka thil chhiar kha a awm reng a, thil dang pawh ka ngaihtuah thei lo, râpthlâk ka ti lutuk a," a rawn ti sap sap a, a dikin ka ring. Ani ang rilru thianghlim leh țha angah phei hi chuan hetiang thil râpthlâk han hriat ringawt pawh hian a rilru a luah khat dâwn nasa a ni.

"Ngaihtuah duh suh, nakinah ka la zawng chhuak ang a, a phû tâwk hremna hi ka la pe ve dâwn alawm," ka lo ti thung a, ani pawh chuan," Thil tisualtu hi rilru hahdam takin a awm miah lo ang, rilru hrehawm takin a awm ve thoin ka ring, a chhan chu hlim viau angin lang mah se, a thil sual tih chu ngaihtuah chhuah hun a nei țhìn àwm si a, a la pianthar loh phei chuan..." a rawn ti leh sap sap a.

"Ka zawn hmuh hma chu lo la damin lo piangthar hman ngei teh se!" ka ti sup thung a. A lo la piangthar lo a nih chuan a ngaihtuahawm lutuk palh ang, phubâ hi chu lâk ngei ka tum ruh tlat, eng mahin min dãl thei lo ang. Hmeichhe âwmnêm zâwk leh kum tling pawh la ni lo, pâwl sàwm zirlai chauh lehnghâl chunga khatiang a ti duh kha, a hur man têl ngei se ka duh a ni tawp mai.

Kan inhmuh leh hmasak berah chuan,"A chunga khatiang thil tenawm tiduhtute kha an râpthlâk ka ti a, kawng lehlam takah chuan khatiang an ti kha an khawngaihthlâk ka ti bawk, an thil tih pawizia kha an ngaihtuah chhuak ve țhìn ang em le?" a ti chhuak niah niah a, a ngaihtuahna a luah ve ngang a nih ka ring.

"Mi pakhat aia tam an nih i ring tihna em ni?"

Min rawn enin,"Ni lo thei nâng, a journal pawhthlâkah khân 'An râpthlâk chiang a ni' a tih kha, 'An' a hman chuan pakhat aiin an tam tihna a ni dàwn lo'm ni?" a lo ti mai a, ka en hû ringawt! Chutiang inziak chu a lo awm tih pawh ka lo hre pek tawh lo, 'Sihal tar' a tih kha Lalhriata ni tùrah ka ngai a, chu pawh chu hostel warden emaw tu emaw berah ka lo ngai ve tawp mai asin!

"I fing e, ka lo ngaihtuah chhuak hleinem, Lalhriata kha a bul tumtu ber a ni ang ka lo ti mai asin," ka ti a, ani chuan hriat thiam loh hmel zet hian," Tu nge Lalhriata chu?" a lo ti ve thung a, thil awmzia ka hrilh chuan," Chuti a nih chuan, Lalhriata chu warden emaw eng emaw ber lo ni ta se, hostel-ah chuan a tlángnêl thawkhat a ni tih a hriat theih mai a, a țhian tu emawte nèn inthuruala thil ti pawh an ni thei tho bawk; mahse, 'a' tih kha a hman tam leh tâk avàngin Lalhriata kha kan bûrbun ber lo thei lo ang," a ti leh malh malh a. A thil sawi lai chu ka lo en reng ringawt, ka lo ngaihtuah ve țhin ni tho mah se chutiang teh kêlh chuan ka lo ngaihtuah chhuak hauh lo thung. Thil ni thei tak vek a ni, rilru sèn a ngai khawp mai.

Mami thlànlung kan phun nî chuan Remruati a rawn lang ve leh tlat a, kan phun dâwn tih kha chu ka hrilh ve ngei mai a; mahse, a rawn tel ve ka lo ring miah lo, chhûngte hnai tak lo chu an rawn kal lêm lo va, a țhen lahin chhuanlam an rawn siam bawk a, mi 20 vêlin kan phun a nih chu. Ka duh ang thâla ka siamtîr a ni bawk a, nalh an ti ve khawp hlawmin ka hria. A țhiannu ve deuh, thlàna ka hmuhnu pawh kha a thuphungin ka hrilh ve a nia; mahse, a zin lai a lo ni a, thuphâ a rawn chawi nghe nghe.

Mi dang haw hnuah pawh chuan keini pahnih chu kan la haw ve lo va, Remruati chuan," Tunah chuan thlamuang takin a chàwl ve thei tawh ang chu, i hmangaihna i lan chhuahtirin theihtâwpa mawi leh țhain a thlàn i siamsak si a, mawi a ti ve ngawt ang," a ti sap a, thlànlung chu kan thlîr dùn vang vang a.

"Phubâ ka lâk hma chu a thlarau a thlâ a muang theiin ka ring lo, hrehawm ti takin a vah kual vêl țhin ka ring," ka tih chuan," Ni lo, i hmangaihzia hi a hmu chiang ang a, a hlimin a nui var var thei tawh ngei ang, tunah pawh hian hlim takin a thlìr reng che ka ring asin," a lo ti thung a. Ka chhâng tawh rih lo, a ngaih dàn hi ka ngaih dàn a ni ve si lo va, sawi buaisak erawh țûl ka ti lêm lo.

'Țhianzaho kan inhmu khâwm khât êm mai' tih vàngin chaw ei khâwm kan rawt a, kan rawt han ti ila kei chuan eng mah ka sawi ve lo, Mapuia leh Muana rawt chhuah a ni, pawi erawh ka ti vak bîk chuang lo. Mami chunga thil thleng khân ka rilru a uai rit lutuk a, thâwk lâkna hun a awm ve rihah ka ngai mai, thil ngaihtuah ngut ngut zawng, ka thluak a chau zo mai dâwnin ka hria.

Bâkah, nakin lawkah kan exam leh mai ang a, hun thâwl kan nei har leh tawh ang.

Muanate in a remchàn ber avàngin Zirtawpni chawhnuah chawhmeh tùr kan bazâr a, kan tam lêm lo bawk a, a hautak lêm lo. Hmeichhia hruai theih an tih vàngin Remruati chu ka hruai a, ani hian ka țhianteho bula awm nuam a tih vàng leh țhian ang thoa a en vàng hian hruai pawh ka inthlahrung hran lo. Mi dang erawh chuan an bialnute an rawn hruai vek a, Muana pawhin a hûng ve ràn ta e, a lawmpuiawm khawp mai, a mal rei ve tawh si a, rei tak inkawp teh se. Rinawmi pawh Joseph-a'n a rawn hruai leh tâk hi, melh pawh ka melh peih lo. Hmeichhe rinawm lo leh lêlo  lutuk hi chu ka hua a ni tawp mai.

Muana nu zin bo lai a ni bawk a, kan free angreng khawp mai. In tùr lam erawh chu ka in ve duh rih lo, Remruati hmuh lai leh a bula ka awm  hnaih lai hi chuan insùm hrâm hrâm ka duh, ka mizia ka thup vàng pawh ni lovin amah tê hi ka zah ve deuh tlat a, ka chanchin engkim hretu a ni nachung hian min kalsan ahnêkin min fuih a, a êng zâwnga thui tak min thlìrpuiin ka nun hrehawm leh ipik tak pawh min chhâwk țhìn rêng a ni.

"In inkâr boruak hi ka hre thiam vek, nula angin i en lo tih ka hmu thiam ve vek a nia aw," nui deuh, ding bu deuh lãk lãk hian a ti a, a țawng dàn aţang chuan a ruih hmel viau; mahse, a mitmeng ațang chuan a in tam hran lo tih erawh ka hre thei thung, a la fiah êm mai a, a inla rùi der mai mai a nih hi, ding bu lãk lãk tùr khawpa tam a in lo chiang êm mai.

Muanate veranda-ah hian an inthiarna a awm a, inthiarna ațanga ka chhuak chiah chu Rinawmi hi ka hmachhawn ta nghâl a ni. Min hmuh fàl tum hrim hrima hetianga lo ding hi a nih ka ring, a chhiat loh theih tehlul nèn(tunah pawh a chhe chuang lo; mahse, a dik lo vek tawh si a)a sam a thlah hnawk nuai a, chu chuan a tilang bawrchhawr tlat a ni, a mit a hnawih dumin a lo rui ve bawk nèn, mi hur awm țha duh lo a ang tlat.

"Min la ngaihtuah tih ka hria, min han en la, hmâna i tã reng kha alawm ka la nih, tunah phei chuan  a hma aiin ka puitling sawt lehnghâl, i tã kha ka la ni reng a ni," a ti leh sep sep a, a kut chu rawn pharin min rawn ban a.

"Harhfîm teh, hetiang hian awm suh," tiin a kutah chuan ka lo mansak a," Kawng min kian rawh, ka lût duh a nia," ka ti zui zat a, kan intawhna lai tak kawng hi a té a, a sîrah thil eng eng emaw an dah thûr a, kalna tùr takah a ding ve tlat bawk si nèn, hêl mai theih a ni lo a ni. Ani lah chu a lo țang ve tlat a, a kut ka man avàng chuan remchângah lain min rawn bawh phei titih nghâl ta mai a. Lo invêng viau lo ila chuan kan tlu ri rum rum hial ang chu; mahse, kan tlu êm lo ve.

"Roddick, ka hmangaih che ka tih kha, ka hmangaih che, nang chauh hi ka duh chu i ni, ka lungawina ber pawh i ni," a tih leh chuan ka ner nak a, ka nih lohzia ka hre chiang tawh a, a thu sawi hi pakhat tê mahin ka ring lo. A bán tawn tawnah chuan chelhin ka nawr phei a, kawng zau lai ka thlen pheipui lai tak chuan Remruati a rawn kal chhuak ve leh tlat mai, min rawn hmu nghâl bawk tih a hmel ațang chuan ka hria; mahse, a ding ta chat mai.

"Roddick, ka duhlai, ka hmangaih, 'Duhlai' tiin min han ko leh teh, ka hre ning lo a nia, mawh, vawi khat  leh chiahin," tiin a rawn thle phei a, kei erawh chuan engah mah ka ngai lo, ka țhiante zinga pakhat Joseph-a bialnuin hetia min ti ta mai hi Remruati hian a hre thiam lo viau ang em? Chu chu ka lo ngaihtuah daih.

"Oh, tihpalh lutuk!" tiin Remruati chu a inher ta chiah rêng a, kei chuan Rinawmi thlah nghâl dáwrh pah chuan," Remruat..?" tia ko nghâl vatin ka tlân a, a kutah ka va man chawt a, ka țhianpa bialnu lo duh ve tùr êma hniama min ngaih ka duh lo, ka duh lo rêng bawk a.

"Remruat, Roddick-a kha hnaih hauh suh, ka tâ a nih kha, a tâ pawh ka ni țhìn bawk, in inngaizâwng lo, a ngaizâwng ngai lo ang che tih pawh ka hria a ni," tiin Rinawmi chu a rawn țawng chhuak a, rui aw kha a awm tawh lo.

"Thil engkim hriaah inngai suh," tiin ka rilru chuan ka chhâng lêt a; mahse, ka țawng chhuak lo thung.  Remruati rawn hawi chho mitmeng hriat thiam har zet chu ka melh chhuk a, kan inen a, țawng tumin a kâ a âng zuau hman tawh tihah chuan kûn hniam thutin a hmuiah chian ka zu fawhsak ta ringawt a, heti hi chuan Rinawmi pawhin ngaihzâwng ena enin, hmeichhe enin mi dang hi ka en thei a ni tih a hmu chiangin a hre chiang tawh ang chu!

Remruati ding khawng at mai chu ka hre thiam nasa, hei hi thil thleng theiah a ngai lo chiang ang, kei pawh chutiang chu ka ngaih dàn ve tho a ni; mahse, he mihringnu Rinawmlovi hi ka ning a, ka nuna lo inrawlh tawh lo tùra ka hnar dàn tùr țha ber leh a thil sawi dik lohzia proof-na țha bera ka ngaih vàng a ni pah bawk.

Ka rin loh deuhin a hmui lah chu a lo nêl thep a, mipain an tawk tawh ang em aw tih ka ngaihtuah phah. Min fâwp lêt lova, kei pawhin ka zu fâwp a ni mai a, chêt lâk chhunzawm pawh ka tum chuang lo. Ka zu fâwp a, min lo chhâng lêt lovin a lo ding khawng awt a, chu zawng chu a ni mai.

"Roddick, engtin nge ka hmuh laiin hmeichhe dang i fawh theih?!! I hmangaih leh duh ber ka nih țhin kha, a ni lo, ka thil hmuh hi ka hmuh sual a ni ngei ang, ka rui lutuk a nih ka ring," Rinawmi chuan a ti nuah nuah a, hawi chhuakin,"I rùi der a nih kha, mahni inbum duh suh," ka lo ti thung a, chutah, Remruati chu enin," Lût tawh ang hmiang, helai hmun hi chu a hrisêl lo êm mai," ka ti sap a, ani erawh chuan min chhâng lo, chêt sawn pawh a tum chuan loh avàngin in chhûngah chuan ka kai lût ta ringawt a.

In chhûnga kan luh leh hnu chuan Remruati chu a țawng tawh mang lo, a kun deuh tlat a, an biak chuan 'aw' leh 'aih' tiin a chhâng a ni mai. Ka bulah ţhu mah se, a inkuangkuah tlat a, țhutna tlâng sî têah ațhu tlat bawk. Ka fawh vàng kha a ni thei mai ang em? A ni ngei ngei ang.  Nia, kha kha ka tum lâwk bîk miah lo; mahse, Rinawmi țawng dàn kha ka ngei lutuk a, ka che thut a ni ber mai, insawi fiah ka ngai ngei ang. Min kàwm ngeih ve si a, a țhian kawm berin ka han fâwp ta thut si a, a tân chuan hriat thiam ka har ngawt ang chu, chubâkah, min hlau tawh maithei a ni, a nih loh pawhin, min haw ngawt ang! 

Rinawmi rawn luh hnu deuhah phei chuan chhuanlam siamin haw a duh thu a sawi niah niah a, Muana chuan," Khai, a la hma alawm, haw rih bîk lo ve," a lo ti a, C-a pawh chuan," Kan la infiam hlim dâwn chauh alawm," a lo ti ve a, kei erawh chuan a chhuanlam siam chu hre thiamin," Kan haw tawh mai ang, in lamah tih tùr a ngah a," ka lo ti ve a,  ka din rual chiah chuan a helmetchu lain mi dang chu a mangțha ta nghâl a, min nghâk lo chuan a chhuak ta nghâl bawk a. A thin a rim a ni chiang mai; mahse, a scooty kha Dusty ka lâk chhuah phawt loh chuan a la chhuak thei dâwn lo tih ka hria, hmanhmawh viau mah se min lo nghah a ngai tho tho dâwn.

*MAHNI DUH DÀN TÊA KAN KHAWSAKNA HIAN MI DANGTE NÈN KAN INKÂRAH HARSATNA LEH INREM LOHNA A THLEN ȚHÌN*