☆EARTH ANGEL☆ - 12 By Dingdi Pachuau

 ☆EARTH ANGEL☆ - 12 By Dingdi Pachuau

A scooty bulah chuan a lo ding ràn a, ka kal phei thãwm pawh chu a lo hre reng ang; mahse, a lo hawi duh hauh lo! A thin chu ka lo tirim nasa a nih àwm hi, dik tak chuan ka tum lâwk pawh kha a ni bîk lo, a hmuiah tak zu fawh kher tum pawh ka ni chuang lo,  kha nu hmuha fâwp anga ka lan duh vàng a nia, han tih der kual vël ai khân a taka han tih mai kha a lo awlsam zâwk daih a!

"Thinrim lo teh, làwmthu hrilh che ka duh a nia."

A la rawn hawi loh avàng chuan," I chungah ka lãwm takzet e, kei țhian atân pawha lâktlâk loh leh țàwmkâi lo zet min kawm duh ve tlat avàngin, chuan, zanin avàng khân ka lâwm nawn leh e; mahse, ka fawh avàng chea i thin a rim a nih chuan ngaihdam ka dîl nghâl e," ka ti leh a, hmeichhe thinrim hi ka thlêm ngai lo va, Rinawmi pawh kha ka duh ve hlarh hlarh viau țhin na khân a thin a rim ve pawhin ka thlêm ngai chuang lo; mahse, tunah hi chuan ka thiam loh liau liau niin ka hre ve tlat si a ni.

Dusty chu ka nawr sawn deuh a, ani pawh chu a rawn che ve nghâl zat bawk, a scooty leng lo tâwk vêl chiah chiah chuan Dusty chu ka dah leh rih a.

"I thin chu a la rim veng veng em ni?"

Ka en phei a, ani pawh chu a rawn hawi ve chiah. Chutah, ka rin loh deuh hian," Eka..." a rawn ti chhuak ta heu mai! Nui hmel pu chuang lo mah se, a rawn țawng chhuah avàng chuan a thinrimna a zuai deuh ta a nih ringin ka nuih sak a, ani pawh rawn nui ve nghâlin,"Ka țhianpa chu ni lo la chuan i biang kha a ri thlawrh ang maw le," a rawn ti leh ta a.

"Ka phû viauin ka ring!" ka tih chuan," Mak ka tihzia kha i hria em? Ka rin loh lutuk thil a nia, ka zak bawk! Tuna ka ngaihtuah lêt ringawt pawh hian..." tiin a biang chu a han dawm a, a tider miah lo tih hriat tak hian a sen țân reuh a.

"A thleng zauh zauh maithei a nia," ka tih chuan râpthlâk tih hmel deuh hian min rawn en a, ka lo nui tih a hmuh chuan," Eka, țawng fîmkhur rawh aw, ka hmui kha a la virgin asin, ka bialpa tân tiin ka la hum ve hrâm hrâm a," a ti nghat nghat a, kei erawh chuan," I bialpa ka ni dâwn lo tih i hre hauh lo aw," ka lo ti thung a.

"I bike bêr bûr kha la chhuak thuai mai teh!" a lo ti hlak a, thutak fê hian,"Hming a nei tih hria la aw, Dusty a nih hi. Dusty, engtik laiin nge 'Bêr bûr' i lo nih a?" tiin ka bike, 'Dusty' ti ngata a hming ka phuahsak chu biain ka nawr sawn ta nghâl a, ani chu a lo nui hawk hawk thung a.

Zàn a nih avàngin an in thleng ka thlah haw a, an ina lût tùra min sàwm chuan," I pa a lo awm palh ang," ka ti tlat a, ani pawh chuan lo hrethiam nghâlin min sâwm nawn tawh lo. Dik tak chuan a nute bulah a țhiante nèn chaw an ei khâwm dâwn tih hrilh sa vek mah se ka sàwm chhuah a ni ve si a, in chhûng thleng thlah thlap chu a mawi  tih ka hre reng; mahse, a pa a lo awm ngei àwm si a, hmuh ka hreh a ni, ka sual ve ropui mai si a.

Zan danga aia ka haw hma êm avàng chuan kawngkapui ațangin ka lût ve a, ka nu chauh a lo awm a, ka pa ka hmuh loh avàng chuan a lo la haw lo emaw a lêng chhuak leh emaw a ni ang, a bialnu a hmu leh rih pawh a ni thei tho bawk.

"I lo haw hma ve tlat mai!" a lo ti hluai a, engtin mah ka chhâng lêm lo, chhàn chi a ni em pawh ka hre lo. Amah vêk chuan,"Chaw i ei duh em?" a ti leh a, kei chuan," Țhiante nèn kan ei khâwm a," tiin ka chhâng ve ta a, ani pawh chuan," A nih tak chu. I u thlàn mawi taka i siamtîr vàng pawh khân làwmthu ka la hrilh lo tak che , a làwmawm lutuk aw, i u pawh a hlim tawh khawp ang chu," a ti leh a.

Ka u chunga thil thleng kha ka hrilh ve dâwn em maw ni le ka ti hman deuh tawh a; mahse, ka phone ah lai a rawn nghawr tâk datah chuan ka țhulh chawpchilh ta nghâl a, chhàn ka tum lém lo a nia; mahse, ka nuin,"I phone chu, chhâng ta che," a rawn tih tâkah chuan ka phawrh  ve ta nghâl a, Rinawmi a lo ni nghe nghe a, chhâng tùr àwm tak chuan ka kal sawn a; mahse, ka chhâng lo.

A hnuah pawh Rinawmi chuan min rawn call ta fo a; mahse, ka chhâng ngai lo. Min kalsan huamin mi dang nèn min kawp a, kawp nih keiin ka duh țhak si lo, tlàwmah ka la ve tlat, ka țhen ta hmak a, a kawppa lah a kawp zui rei lo tih a hriat, Joseph-a, kan țhianzaho zînga mi pakhat a han kawp leh ta chat a, min han tih dàn salh salh hi chu, ka pai dam thei lo a ni. Text pawhin min rawn úm zui ve nasa; mahse, kawp leh ka tum tawh lo bur, Mami pawhin a duh loh êm kha. 

Ka theih ang tâwk chuan Mami chanchin hlui chu ka chhui ve a, Remruati pawhin min zâwt ziah; mahse, hma sâwn a har khawp mai. Hun a liam tam ve tawh a, hriat chhuah vut vut theih pawh a ni rih lo, class kal bâkah eng eng emaw tih tùr a lo awm ve reng bawk si nèn, a hnu deuhah phei chuan hun thâwl neih hun ka nghâk ta deuh tawp. Mami khân țha taka lehkha zira mahni inchãwm thei turin min chah a nih kha, ni e, chu chu a thu min chah hnuhnung ber a ni, college chhuak tùrin exam vawi hnih bâk ka nei tawh lo, ka theihtâwp ka chhuah ve tawh ang chu. Exam zawh hnu lamah te chuan hun thâwl ka nei ve thei tawh ang a, Mami chanchin hlui pawh chu ka duh ang zânin ka chhui thei tawh ang chu.

Zànah ka chhuak ngai ta lo, zu pawh ka in tlêm sâwt ta viau mai. Zàna chhuah loh chuan a lo insùm theih khawp mai a, ka room-ah ka kawl tawh bawk si lo nèn, thlèmna a hla ta viau rih e. A kal thei zâwk keimahin ka pan loh miau chuan zu bûr chuan min rawn pan lo khawp mai, ka pan ût ût țhin vàngin thlèmna ka lo do zo lo mai mai a lo ni tih ka hre chhuak uar uar mai. Zu in loh chu ka taksa pawhin a lo ngeih deuh a ni chêk ang chu, Remruati'n," Tûnlai chho hian ka hmu țha tlat che a nih chu, eng emaw damdawi ei i nei em ni?" tiin min zâwt hial a, kei ve thung chuan," Min ngaizâwng țan viau suh, vawi khat fawh chauh a nih kha," tiin ka fiam hlak thung a, a sen leh nghâl awp awp mai.

"Eka," pàwr zet hian a ti a, a țawng ring ve deuh bawk nèn, kan piaha țhute pawh an rawn hawi hial mai. A zak leh si a,"Nangmah vàng vek a nih kha, vawi khat mah sawi chhuak tawh suh, i bialnu hlui laka phuba i lâk ve dàn kha, a țhing si," a ti hlak hlak a, țawng pawh a țawng ring ngam tawh lo.

Kan chhûngkua pawh kan boruak chu tlêm chuan a zia lam deuh chuan ka hria. Zia tih lêmah ka nuin min hau tam tawh lo va, tlaiah hawin zànah ka chhuak ngai ta rih lo bawk nèn, a hma ang ngawt chuan min en ta bîk lo; mahse, ka pa erawh hi chu ka hmuh dàn a danglam zo tawh a, ka hmu dik thei tawh lo. Bâkah, kan inkâr hi a dik thei tawh lo ang, thinrim zeta a fapa a rîla rah ka nih loh thu min sawi khum ațang khân kan inkâr hi, ka sawi thiam chiah lo, a danglam dâwrh a ni ber mai.

Zan khat chu lehkha ka zir laiin ka hnâr a rawn thî ringawt a, ka hnâr chu hup pingin bathroom-ah ka tlãn lût nghâl a, ka chal leh ka bek chu tuiin ka tihuh nghâl a, ka lu ka tihuh hluam a ni ber. Ka hnâr hi ka têt deuh laia a thì bâk kha, ka len hnu hian a thî leh ta miah lo va, tuna a rawn thî ringawt mai pawh hi a mak viau a ni, lehkha ka zir nasat ve vàng hi a ni ngei ang. Bâkah, ei tùr ka ei țha lêm lo bawk nèn, chu chu ka taksain a tuar a nih ka ring ta deuh ngawt.

A tûkah chuan Remruati chu hnâr thî țhìn tâna damdawi țha leh ei tùr țha ka zâwt a, ani chuan," Tu tân? Nangmah maw?! I hnâr a thî maw?" tiin zawhna hlîr mai chuan min chhâng lêt ta nghâl a, ka lo zâwt ta kher kher chu ka inchhîr ru angreng.

Tlaiah Badam ka lei haw ta țeuh a, hnâr thî tân a țha niin min hrilh ve miau si a. Zanriah ka ei ve hlek a; mahse, ka pa rawn kîl ve hmain ka kham leh nghâl daih. Badam ei tùr ka ngah bawk a, chaw ei tam kher kha ngai ka ti lêm lo, duh leh an mut hunah thingpui ka in leh mai ang.

*I hnâr chu a thî leh tawh em? Badam kha ei lui țeuh țeuh rawh*  tiin Remruati'n message min rawn thawn a, ka nui sak a, fiamthuin *I hmui virgin hawngtu chu min ngaihtuah deuh tihna a ni maw?* tiin ka han chhâng lêt hrâm a, a haw leh ang chu aw...

Ka ring dik. Min rawn text tawh lo, a hmel chu ka han mitthla a, ka nui lo thei lo. Nù deuh reuh si hian a chezia hi a nù zâm hran lo va, a thinur ve deuh han kal phei hi chu a mak ve thei a nia, a inthuam dàn zawng zawng nen Chinese film-ah a chan ve duh hmèl thei viau a ni, ka thil ngaihtuah chhuah hi hria se a haw leh àwm mang e!

Ka hnâr chu a thî ta zauh zauh mai, lehkha ka zir țhat ngai loh avàngin chutia lehkha ka han zir ve ta vak chu ka ngeih lo a nih ka ring ta ber. Badam pawh chu ka ei lui ve țàng țáng zêl a, ka ngeih em tih pawh ka hre chuang lo; mahse, a hrisêl ve hrim hrim a, thlah ka tum chuang lo. Nakinah kan exam zawh lamah ka hnâr thî hi chu a reh chhawm ve mai ang chu maw, tlêm lai khân Mapuia pawh a thî ve a nih kha, ani  pawh exam hma thoin; mahse, exam zawhah a reh zui ve ta mai a nih kha, kei pawh exam zawhah a reh ve mai tùrah ngai ang.

*******

"Nizàna ka pa thu sawi chu a ropui a nia aw, ka rawn hre chhuak vawng vawng che a," tiin min en vang vang a, kei erawh chuan,"Ka nun nèna inhmeh thil sawiin keimahah i lo hmehbel a ni maw?" ka lo ti thung a, ani chuan a kut rawn phar chhuak thuaiin," Ni lo, chutiang a ni lo, phuba lâk chungchâng a sawi a, ka rawn hre chhuak mai che a nia," a lo ti vat a.

"Chu, ka inhmeh chiah a nih chu," ka lo ti a. Thawhțanni a ni a, tún kâr chiah class kalna hun kan nei tawh, ani pawhin lehkha a zir nasa a nih ka ring, zànah a zir rei a niang, a hmai bawl ka hmu tlat.

"Phuba lâk țhat lohna chungchâng a nia a sawi ni, kan pahnihin phuba lâk kan tum bawk sia," a leh ta nge nge a, a rilru hi a thianghlim êm a, dâwt sawia han tihkual vêl chiam hi a thiam ve lo ni berin ka hria.

"Lo intelh ve suh, i tel ve lo aw."

"Ni lo ve, min telh loh tum mah la, ka zui zêl tho ang che," te chu a ti leh lawi a, a pa hian kei mi sual hi min kàwm țhìn tih hria se engtin tak ngai ang maw? Phuba lâk ka tumna kawngah a fanu hian tel ve a tum a ni tih hre phei se, a rilru a nâin a țhâwng ngawt ang chu.

"Kan exam zawh hma zawng chu kan lêng chhuak thei tawh àwm si lo va, Inrinni chu ka spot-ah khân lêng leh ila, kan tlawh khât tawh e," a rawn ti leh daih a. Ni e, kan lêng chhuak khât tawh ang, lehkha a zir ngawrh thei si a, han lèn khawthawnpui pawh chu a țha viau tak ang, kei pawh ka kal châk ve leh tawh tho bawk a.

"Pawi hleinem, bialnu bialpa hruai âwih ti ila?" ka tih chuan min rawn en vat a, ka lo thutak viau a ni tih a hmuh chuan," Aw le, bialpa lo deuh hruai âwih tho la?" a ti ve thung a, kei chuan," I hruai tùr ka hriat phawt a ngai ang, chuti lo chu a theih loh ang," ka ti ve tlat a.

"Intithu viau suh aw, ka pa ka rawn hruai mai dâwn a," a tih chuan," I pa i rawn hruai dâwn chuan ka fawh leh che i duh tihnaah ka ngai ang," ka lo ti thung a. A run khawp mai, min melh rân râm a, kei erawh ka lo nui suk thung.

"I va sual tak! Eka, ka thlep mai ang che aw," a ti ngal ngal a, ka nuih a tiza sauh mai. Fiam lêt lehin," Engah nge i hmui fawh pawh chu i ui viau mai le? Tu mah fâwptu tùr che pawh i hmuh loh kha, i zei loh loh nèn," ka ti leh a, chu zet chu a tuar thei tawh lo a niang, ka dàrah chuan a rawn chùm ta zawt zawt a, a kutthlâk a na reuh phian lehnghâl a.

"Min chum vàngin ka hnâr a rawn thî a nia," ka tih chuan," Daw peih suh, dâwt  i sawi peihzia hi," tiin min chùm leh a, vawi nga vêl zet min chum leh hnu chuan ka hnár chu a rawn thî ta tak tak a! Ka insawi chhiat ni maiin ka hria.

"I hnâr a thî tak tak! Ka tihpalh, ka tihpalh lutuk!" ti mawlh mawlhin a bag ațang chuan a tui bottle a rawn phawrh a, a rawmawl chu tihuhin ka sam chu a rawn tihuh tel nghâl bawk a, ka chal leh ka chhîp pawh a rawn tihuh nghâl bawk a, chutah," Mu rih rawh aw, fartîr ringawt zawng a țha lo," tiin a thaw pah hap hap a, kan țhutnaah chuan rem lo zet hian min kuai mû a, ka chalah chuan a rawmawl huh chu a rawn dah leh nghâl zat a.

"Fartîr ka duh zâwk, a thï a tàwp hunah ka mu zâwk ang," tiin ka tho leh a, ani pawh chuan min puiin min dawm reng a, tui a neih tawh loh avàngin a tlãn sawn leh rih bawk a, tute emaw tui a va dîl a ni ngei ang, a lo lêt hma êm mai. Hah thaw hlap hlap chuan a rawn țhu hnai a," Ka chum vàng che khân min ngaidam rawh, ka chùm tawh miah lo ang che," a ti halh halh a, kei chuan," Min chùm na êm alawm, ka thluak a han nghawr daih a nia," ka lo ti thung a. Ka chala rawmawl awm chu lain a tihuh leh rih a, chu chuan ka nghâwng leh ka tukkhum a dep leh zawi zawi phawt a, chumi hnuah chuan ka chalah chuan rawn hmehbel lehin," Tàwp thuai thuai se ka va ti tak! Exam zawhah inentîr ngei ngei rawh aw," a ti leh a.

"A reh thuai mai ang, engah mah ngai mah ta che, mi hrisêl țha pângngai ka ni alawm," ka lo ti ve thung a, ani erawh chuan," Hnâr thî leh ringawt țhìn chu eng emaw tak hnathawh a ni ngei ang, inentîr a țha, nangmaha i hreh a nih pawhin ka hruai mai ang che," a ti leh malh malh a, min ngaihtuah a ni tih hriat chu eng emaw ti tak chuan nuam ka ti ru tlat pek a nih chu! Ka puitlin hnu hian ngaihsakna/ngaihtuahna ka dawng ngai ta lo viau a, a thil sawi hriat nuam ka ti viau pawh chu a mawh lo ve.

Thî a reh hma zawng chu rawmawl chu tuia tihuh leh țhìnin ka chal chu a rawn dep leh țhìn a, a rilru a nuam lo ve ngang a niang, a țhu hlê hlê thei miah lo lehnghâl a, chu chu ka hmuh chuan," A reh thuai dâwn alawm," ka ti a, chutah, hre chhuak zawkin,"A tlai tawh viau em? Chawhnuah first period i neih chuan min kalsan thei bawk ang," ka ti leh zat a, ani erawh chuan," Nei emaw nei lo emaw ka kalsan dâwn lo che," a lo ti thung a, ka tîr lui lo. Hetia ka bula min ngaihsak taka a awm hi nuam ka ti a, hlu ve ta riauah ka inngaih phah bawk a ni.

Vànneihthlâk takin class kan kal chhûng zawng chuan ka hnâr a thî lo; mahse, zàn lamah hian a thi zauh zauh thung. Remruati'n min ngaihtuah țhin êm avàng erawh chuan ani chu ka hrilh duh lo, a buai leh chûk palh ang. Duh leh exam zawh hnuah ka inentîr mai ang, hetia fartîr leh ringawt țhin zawng, thisen a uiawm alawm.

Inrinniah chuan kan kal ta ngei a, lêng pawh an lo awm ve ngei a; mahse, kutțang thliah tham lek an ni. Keini pahnih pawh chu  thingbuk  hnuaiah chuan puan phahin kan țhu a, boruak a nuam a, a hrehawm lêm lo.

"In chi i lo keng em?" a tih chuan ka melh hâ a, ani pawh chuan min rawn en a," Eng nge, ka in ve duh a ni mai a, ka test ve duh alawm, vawi khat na reng reng chu," a lo ti leh mai a.

"Mi sual tih chi chauh alawm, keini ang mi sual, nu leh pa thu âwih lo-" ka tih lai chuan," Test ringawt te chu, a sual nâng," tiin a lo inrawlh vat a, chutah,"In in hian a tui hmel thei si a, ka in ve chhin châk alawm," a ti leh a.

"Test-in vawi khat dang a hring a, vawi hnihin vawi thum, vawi thum phei chuan vawi tam tak. Thil țha lo hi chu tihchhin loh a him ber," ka lo ti a, ani chuan," I hlimpui hi ka test ve châk êm a ni, ka lo hlimpui ve maithei asin," te chu a lo la ti tak deuh deuh a!

"Ka in lohna a rei ve deuh tawh aw, ka in reng bîk lo a nia, bâkah, ka hlimpui hran lo bawk aw."

"Chuti, engati nge i in si? Rinawmi pawh khân a in țhìn tiraw?" a rawn tih leh chuan a zawhna chu uluk taka chhàn ngai chi niin ka hria a, ngaihtuah hmasa lo chuan chhàn pawh ka chhâng duh lo, ka ngawi ta rih a.

A hnuah chuan," Hmeichhe zu in chu a mawi lo a nia, in pawh in chhin miah suh, i pain a hriat chhuah phei chuan a rilru a na dâwn asin, fanu rangkachak i ni bawk si a," ka ti phawt a, chutah, sawi zawm lehin," Ka in  chhan chu ka duh rêng vàng a nih ka ring, a chhan chu tu mahin min tulh lui lo miau mai a bi, keimah ngeiin a no la kângin ka ka chhûngah ka leih lût si a," ka ti leh a.

*MAHNI INSITNA, ȚHA TÂWK LOVA INNGAIHNA HI HMASÂWNNA DÃLTU LIAN TAK A NI, KAN NIH TÙR ANG KAN NIH THEIH LOH PHAH BAWK*

Dik ka va ti tak êm! Ka nihna hi a ni roh a🙈