☆EARTH ANGEL☆ - 13 By Dingdi Pachuau

 ☆EARTH ANGEL☆ - 13 By Dingdi Pachuau

"A, ka in zawngchhang dâwn tihna pawh a ni hleinem, vawi khat han in ve chhin kha ka duh chu a ni mai. Mi hian eng vàngin nge an in țhin, a tui viau vàng a ni em tih a taste ațangin ka hre duh a ni," ani chuan a lo ti thung a. Kei erawh chuan,"A, in chhin kher lo pawhin a tui lêm lo tih ka hrilh nghâl ang che, tui ti taka in hi chu tlêm an awm ve mahna! Ruih duh vàng a ni tlângpui ang, kei pawhin ruih ka duh vàng a nia ka in țhin," ka ti leh a, chutah," Mi dang bulah phei chuan sawi miah suh, an pe che ang a, i ruih hlauh chuan e, thil țha lo tak a thleng a ni mai," tiin ka sawi țhaih nghâl zat a.

"I bulah bâk ka la sawi lo aw, duh pawh ka duh lo, nang chu ka ring che a, chuvàng chauhin i bulah pawh ka sawi chhuak a nih hi, ka nu leh pate bulah ka sawi duh i ring rêng rêng em ni a?" a lo ti leh a," Bâkah, in tih lêmah 'one sip' kha a ni mai a, " a ti zui leh sap a.

Ka sawi zui ta lo; mahse, chuti na nâ nâ chu ka la kensak khawp ang, a taste hriat kha a duh chu a ni mai a, a pawi thui tawp nâng. Bâkah, min ring ve a, khatia han hrilh teh hrep pawh kha, a hriat hnu vek tho a ni ngei ang. A duh leh a châk a ni ve mai a, tihtîr hmiah mai ang, pastor fanu a ni a, a la tem leh dai ngai loh nun, pâwnlam mi, keini ang nun a hre ve châk a nih hi.

Kan haw dâwn chuan inau rinsiakah min cho leh ta tlat mai a, ho ka ti viau nain a hlimna a nih chuan tiin kan han inel leh rih a, mi dang an awm tawh lo bawk a, ka hming dik lo baksaka lamin min ko tuar tuar a, a theihtâwpa ringin a han au tuar tuar a, chumi hnu chuan nui var var chung hian min rawn en a, tunah chuan ka au ve hun a ni ta.

"Remruat, infawh zei lo nu," tiin ka hau au ve ta vak a, ka au zo a, ka han melh a, huat hmel deuha min lo melh râm râm ka rin tehlul nèn, a ni miah lo, nui var var chunga mit lo siai sakin a kungzungpui chu a lo tipir vâ a, a au chhunzawm ve nghâl zat a.

A hnu deuhah chuan kan chàwl leh ta rih a, thaw ham ham pah hian," A nuam e tiraw? I bulah hi chuan nuam ka tih leh ka châk zâwngte ka ti thei a, hetiang hian ka chhûngte bulah han awm vaih ila chuan, mak an ti lutuk hian țawng nachâng pawh an hre lo hial ang! Ka duh min tihpui țhin avàngin ka lâwm e," a ti a.

"Țhian kârah làwmthu sawi a ngai lo, kan haw tawh dâwn em niang?" ka lo ti daih a, ani erawh chuan," Ngawi lawk, kan lêng chhuak thei lawk tawh dâwn si lo va, ka la ui rih,"a ti leh tlat a, kan țhu leh rih a.

"Thil min hrilh duh i la nei em? Entîr nân, Rinawmi nèna in chanchin te?" tiin min rawn en a, kei erawh chuan,"Sawi tùr a awm lo, ka ex a ni tlawng mai," ka lo ti tawp thung a, ani pawh chuan sawi ka duh lo tih a hre thiam ve nghâl a niang, min zâwt chhunzawm ta bîk lo. Hre tam lo se a țha, ka chanchinah hian thil țha lo leh hlimawm lo lam a hre nasa tawh a, hriat belhtîr ka duh tawh lo.

Rei lo tê emaw kan tih chhûngin exam hun pawh a lo inher chhuak ve leh ta, tûn țum zet chu lehkha ka zir ve nasaa, exam pawh ka cho ve ta zak zak khawp mai. Lehkha ka zir nasa ve a ni tih ka nu pawhin a lo hria a ni ngei ang, ei tùr țha min leisakin ka room-ah chuan min rawn pe țhìn. A ni ve lah tak a, ka chhuak ngai lo va, room-ah inkhungin lehkha ka zir a, zànah ni se ka chhuak ngai lo bawk nèn, ka room kawngkhàr a rawn kik apiangin ka lo chhàwn ve thei ziah si a, a rilru tak chu sawi chhuak duh se chuan mak a tih thu a sawi ngei ngei ang; mahse, sawi lovin," I rilțàm laia i ei tùr," tiin ei tùr leh in tùr a rawn dah a, a chhuak leh mai țhìn.

Ka zir ve nasa bawk a, ka chhâng țha ve viau chuan ka hria. Phone ka khawih khât a; mahse, exam ka neih zàn apiangin Remruati'n min rawn biain ka tih țhat leh țhat loh min rawn zâwt ziah thung. Ani hi chu a ngaihtuahawm lo tih ka hria a, min rawn zawh azârah hian kei pawh chuan a tih țhat leh țhat loh chu ka lo zâwt ve chauh țhìn, min țawngțaipui ziah thu min rawn hrilh ve ziah bawk a, a làwmawm ka ti viau nain a zahthlâk ka tih zâwng tak a nia; mahse, ka sawisèlsak chuang lo.

Inah awm tam viau mah ila ka room-a ka tawm chawt avàng erawh chuan ka pa nèn kan inhmu zen zen chuang lo, ni tina chhuak a ni bawk a, tûkțhuan kan ei tlâng zauh zauh a, zanriah pawh chutiangin; mahse, kan inbe khât êm êm tho. Kei hian min biak hmasak loh chuan biak hi ka duh bîk si lo va, ani lahin min be hmasa duh mang si lo, inmelh pawh hi kan inmelh khât khawp mai; mahse, ka chaw ei a tihtui loh phah chuang lo va, ka ngai pawimawh tehchiam lo. Ka nu erawh hi chuan min be fo a, ka chhâng țha reng, ka pa awm loh châng phei hi chuan kan chaw eina pawh ka tihfelpui ve zauh zauh, fel tawh tak ka ni.

Kan exam zawh zànah chuan kan țhianho chu C-a room-ah kan inhmu khâwm leh ta țhâm a, kan thaw a veng tlâng khawp mai. Muana'n in tùr a rawn phawrh chhuah chuan ka in lohna rei tawh reuhzia chu ka hre chhuak a, ka lung a tilêng vang vang reuh thei nia. Zanin chu exam zawh zàn a ni bawk a, làwm leh hep hep ila a ni mai. Ka hmalam huna ka tih tùr vàngin inngaihtuah buai ka phal rih lo, zanin chauh chu ngaihtuahna ațangin paih chhuak vek teh ang.

Mi dang an titi lai chuan kei chuan ka in mial mial a, ka lo in lo rei ve tawh deuh bawk nèn, ka lo duhthawh deuh a niang, mi dang zawng aiin ka in tam a; mahse, "I va in tam bîk ve," an ti ringawt a, thinrimah an la bîk chuang lo. 

Țawng nuam an ti tlâng sar sar bawk bawk a, kan rùi ta deuh bawk nèn, titi thlâkin hmeichhe chungchâng an rawn sawi chhuak ta a, bul rawn țantu chu Muana a ni. A țantìrah chuan ho tê tê sawiin an sawi tui chho tial tial a, an țawngkam pawh a pàwhràw chho ta viau mai.

"Duati ka fawh hmasak ber zàn chuan mipa mah ni ila ka zãm angreng khawp mai a, an in chhúngah pawh fâwp ngam lovin an kawta saron buk phènah ngei khân a nia ka fawh ni, khatianga infawh kha a lo nuam ber a ni tih tunah hian ka hre chhuak ve chiah," a ti vei sup sup a, a meng sî deuh sup bawk si a, kan țhianpa mah ni se vawk ang hi ka lo ti ru khawp mai a.

Mapuia chuan,"Nuam ber ti tùrin i neihna a la rei lo e, vawi eng zâta tam nge in infawh tawh a? A nih, i fawh lai chuan i meng țhìn nge i maimichhîng țhìn?" tiin a lo zâwt a, Joseph-a chuan," Kan fawh ang zâta tam hi fâwp ve ta la, nuam pawh i ti tawh lo ang, a hnèawm i ti tawn ngawt ang chu!" a lo ti ve thung a.

"I bialnu fawh a hnèawm i tih chuan in induh tawn tak tak tawh lo tihna a nih chu!" Muana chuan a lo ti thung a, chutah, mamichhîng vang vangin," Keini chu kan inhnê ve hleinem, kan inngai a, zanin pawh hi an ina lêng tùrin min duh a; mahse, kan țhianho inhmuh khâwm hi ka ngai pawimawh ve bawk si a, ka lêng ta lo ringawt a nih hi, tunah pawh hian ka ngai veng vengin ka hria," a ti leh a, a thil sawi leh a hmel chu a inhmeh êm avàng chuan kan lo nui dar dar a, Mapuia'n a làwm fâl bîk a, a nui dîr tlak tlak a.

"Min nuih mah ula, pawi pawh ka ti lo, ka duh taka ka neih a nia, kan induh ve tlar tlar êm asin," a ti leh a, kan nui leh a, C-a chuan," Tlar tlar tak chuan aw... A țha, induh tlar tlar hi a țha ber a ni, kan induh miau chuan kan ințhen lo nge nge a nia,"nui chung hian a lo ti a, keini pawh chu kan lo bu nghat nghat a.

Rin loh deuha Joseph-a'n,"Roddick, Rinawmi nèn khân in ni tawh lo ni khân i sawi a, dâwt i sawi mai mai nge  ni a tunah hian in inzui leh tawh zâwk?" a rawn tih chuan min rawn en ta țhap mai, kei chuan,"Dáwt ka sawi mai mai lo, kan ințhen avàngin nang pawhin i pawm chat rêng a ni lo'm ni?" ka lo ti ve thung a.

"I la duh reng a nih chuan sawi mai ta che, țhian țha kârah chuan sawi buai hi ka duh miah lo va; mahse-" a la tih lai mêk chuan,"Duh ni ila ka țhen nâng, lungmuang takin i pawm thei ang," ka lo ti leh a. A thil sawi dàn chu ka rilrem záwng a ni tlat lo, min puh chhiat a tum a ni.

"Muanate ina chaw kan ei khâwm zàn khân i fâwp a ni lo'm ni? Nge ka hmu dik lo che u?" a rawn tih leh tâkah chuan mi dang pathum pawh chuan min rawn en leh ta țhap mai. 

"I hmusual a nih chu!" ka lo ti mai a, sawi fiah pawh ka tum chuang lo. A țûl lêm lo, Rinawmi zâwk hian eng thil nge a lo fah ni? 'Min fâwp' te hi a lo ti a ni pek ang e! Teuh lo mai! Remruati a thîk vàng vek a ni ang chu.

"Eka, chutiang chuan i țhen tawh hnu, i țhianpa kawp lai chu i lo fâwp leh si a maw? I va che khir ve a...!" tiin Mapuia chuan ten hmel zet hian min rawn en a, C-a leh Muana erawh an la ngawi reng rih, sawichhuak lo mah se , Mapuia rilru ang tho chu an put ve ka ring.

"Ka țhen tawh hnu lam ka hawi leh tawh ngai lo, la duh ni ila ka țhen lo tawp bawk ang chu, chutiang rilru lêlo ka pu hek lo," thinrim zet chuan ka ti a, thisen a lumin ka thin a sa ve phat bawk nèn, ka aw pawh a ring țha khawp e.

"Roddick, a tâwk! Bengchheng s'u, Joseph, nang pawh, chiang takin i hmua i hria a nih loh chuan khatiangin sawi ringawt suh," C-a chuan a lo ti ta vat a, Joseph-a nèn chuan kan inmelh rum khawp mai.

"A hmeichhiain țap chungin i fâwp lui tih a sawi alawm, a dik pawh ka ring, pâwnah khân an awm rei dùn bawk. Remruati ngaih țha lo pawh a rawn chhuah ve tâk nghe nghe kha, ka sawi dik em?" tifuh intih hmel zet hian Joseph-a chuan a ti leh a, min ten hmel zet hian a ner nâng bawk a.

"A dâw a nih chu!" tih bâk ka sawi lo. Ka fawh luih thu a lo sawi tak tak a nih chuan, ka hmuh hunah ben hlak ka châk khawp ang! Dâwt sawi hrât hi ka hua, dâwta mi hèk chîng phei chu haw tak ka ni.

"Remruati i nei reng a, ani awm reng laia engah nge ka kawp lai kher chu i lo melh taih leh a? Nge, kei pawh hian Remruati chu ka'n tawk chhin dâwn em ni ang? Zei loh hmel viau mah se hmeichhe neih ang chu a nei kim ve-" sawi pawh a sawi zawh hma chuan va hnaih dâwrhin a âwmah chuan ka va țhâm a, ka phih dâwrh bawk a, dawhkàn tê rawn bawhin a tlu a, kei pawh chu ka tlu tel ve nghâl  bawk.

"Khatiang țawngkam bawlhhlawh khân a chanchin sawi hauh suh ang che, ngawi chîpcham tawh rawh!" tlu chung chuan ka la ti hrâm hrâm. Ka thinrim lutuk chuan ka hachang ka țhial rap rap hial a ni, Rinawmi dâwt sawi a sawi laia Remruati a rawn zep tel ve kha thil țûl lo tàwpkhâwk niin a chanchin a sawi duh dàn pawh kha ka pai dai thei miah lo.

Țhiante chuan min rawn kai thovin min chelh bet a, ka lung a awi lo ngang mai, Joseph-a pawh mit sen râm, thinrim tih hriat tak chuan dingin," Zanin hian nang nèna kan ințhianna hi tàwp rawh se! Ka țhian i ni tawh lo," a ti ta hmak mai a, kei pawh chuan," I duh dàn angin le! I țhian nih hi ka thlahlel viauah i ngai a ni ang e," ka lo ti lêt ve salh a, a la duh tâwk lo a ni ngei ang chu," Nang, tu fa lu bâwk nge tih pawh hriat loh kan kàwm duh che hi lâwm viau ta che, i nu leh i pa tak tak pawh i hriat loh kha, tu mahin an hre lo," a rawn ti leh a, a thu sawi chu ka lo hriat tawh hnu mah ni se ka țhiante ká ațanga han hriat zet chuan ami deh dàn  a dang khawp mai! Ka rui pawh chu ka harh kâwkin ka hria! Muana chuan," Joseph, a tâwk!" tiin a hmui chu a lo hupsak vat a, a chezia ațang chuan Muana pawh hian ka nu leh pa fa ka ni lo tih chu a lo hre ve a ni chiang mai, ka țhiante chu ka en kual a, Joseph-a, chapo hmel taka a hawi valh valh te, C-a leh Mapuia, hrehawm ti hmel taka an meng hnuai raih te leh Muana, min rawn en țha ngam lo hmel te chu, chûng chuan ka nihna dik tak an hriatzia a tichiang khawpin ka hria.

"Ka'n haw hmasa ber ang e," tiin ka hemet ka dahna lam pan chuan ka kal ta nghâl a, mi dang chu an che sawn miah lo, țawng pawh an țawng lo. Chutia ka nihna dik tak an hre chhuak chu hrehawm ka ti a, ka nu bul pawha ka zawh ngam loh kha ka țhian kawmte chuan an lo hre ru vek a, Joseph-a nèn hian intithinrim lo ila chuan an hria tih ka hre àwm tawp si lo va. Rilru mang chhuihin Dusty chu khalh chhuakin chak zet chuan ka tlãn vâwk vâwk a, he thil hi ka nu ka zawh chhuah ngei a ngai a ni, mi zawng zawngin ka nu leh pa fa ka ni lo tih hi an hre vek a nih ka ring ta, ka țhiante pawhin an hriat viau si chuan hre vek tùra ngaih an ni.

Ka rui a reh ta rih bawk si a, ka tlân kual leh rih tawp a, ina haw nân a la hma ka ti deuh bawk si nèn, bâkah, ina haw chuan ka nu zawh chhuah phêt ka tum ang tih ka hlau, zu rim nam lo, harhfîm kara zawh ka duh zâwk si a. Vawi thum vêl zet ka tlàn kual hnu chuan kan in lam chu ka pan țâwk a, boruak pawh a vawt ve ta var mai. Dusty ka hûng fel chiah tihah chuan ka hnar chu rawn za mer merin a rawn lum pup pup a, ka hmui leh ka khabeah chuan a rawn luang lum thla ta pap pap nghâl bawk a, ka hnâr a thî leh ta tih hrilh hranpa kher ka ngai tawh lo.

Ka hnâr thî a reh thleng chuan ka țhu ta rih a, a reh zawh hnua ka din meuh chuan ka lu a hai deuh chhalhin ka hria, ka hnâr thì vànga lu hai ka nih chu ka ring chuang lo, thawh thut lu hai hi ka nei ve hrim hrim a, ka naupan deuh lai ațang tawhin, eng emaw tlâkchham ka nei a ni ngei ang.

Mu chung chuan ka chunga thil thleng chu ka ngaihtuah a, thinrim viau pawh ni se Joseph-a khân khatiang thil kha a sawi duh ka ring miah lo a nia, Rinawmi dâwt sawi a âwih avàngin hei kan buai ta hrep chu a nih àwm hi. A țhian ka nihna ațangin min bàn a...Ka nui hul hak a, ințhian țhatna hi thinrim vànga inbàn mai mai theih thilah ka lo ngai ngai miah lo; mahse, a lo ni lo a nih hmel, min bàn miau si a. Ni e, min bàn chuan kei hian min bàn lo hrâm tùra ngen ka tum teuh lo! Ka ti ngai lo ang, ani tel lo pawhin ka nungin ka hlim ve thei lutuk ang chu. Kei ang nu tak leh pa tak pawh hre lo țhian nih kha hrehawm a lo tiin a lo zak viau țhìnin ka ring ta, anni chu chhûngkaw hung leh awmthei tak an ni si a.

Zîngah ka phone riin min tiharh a, ka phone ka han en chuan dâr 9 a lo hnai tawh khawp mai. Ni chhuak a lang lo a niang, ka room chu a la thim deuh mupin ka hria, chhûm a zïng a niang.

"Vawiin chu?" a rawn tih chuan," Eng nge?" tiin ka chhâng hû a, ani chuan," Inentïrnaah ka kalpui ang che ka lo ti a, khua hi nuam fahran lo angin lang mah se ni a lang țêp tawhin ka ring a, i khum ațang khân tho la, han intifai tawh la?" a rawn ti leh zat zat a.

"A, ka peih rih lo, ka lû a nâ rih," tiin ka rizai chuan ka inkhuh țha sauh sauh a, ani chuan,"Nizànah i meng rei a niang chu. Eng pawh ni se, vawiina i inentîr duh loh pawhin naktûk lamah pawh a tih theih tho a; mahse, i inentîr ngei a ni tih hriat nân kalpui che ka duh tlat a ni," a rawn tih leh chuan ka thaw huai ringawt a. Ani tê hian min ngaihtuah thei reuh a, nizàna ka thil tawn leh ka hnâr thì chungchângte kha hrephei se chuan a ngaih a țha lovin hrehawm a ti ngawt ang chu; mahse, hrilh tumna ka nei lo.

Ni a rawn lan ve meuh chuan dâr 11 a ri vang tawh. Ka thawh chhuah peih loh avàngin Remruati pawhin min rawn tur lui ta bîk lo va, *Naktûkah kan ti mai dâwn nia, țhulh tawh miah lovin aw*  tiin message-in min rawn ûm zui a, ka chhâng lêt lo, ka zawiin ka chau ngawih ngawih maiin ka hria, ka rilru erawh ka tiharh lui a. Exam kan zo ta bawk nèn, tunah chuan hun thâwl pawh ka nei țan ta a, ka thil tih tum pawh ka ti thei țan e. Mamite school hlui kha a hming ka la hria a, ka pan chilh tawp mai ang chu, a awmna lah ka bona chhan tùr ka hre lo, a hmun chat hre lo mah ila mi a zawh zêl theih tho a, harsatna a awm lo ang.

*THIL ȚHA HI KAN SAWI TAMIN KAN HRE TAM TAWH A, A TAKA NUNPUI LAM I UAR VE TAWH ZÂWK ANG U*