Direct Download copy code here: ☆EARTH ANGEL☆ - 14 By Dingdi Pachuau Skip to main content

☆MIN EN LA☆ - 27 By Dingdi Pachuau

 ☆MIN EN LA☆ - 27 By Dingdi Pachuau "Nu....!!" ka ti vak a, ka nu chuan," Eng i ti vak vak chu ni maw! Ka beng i tichhêt zo dâwn alawm!" a lo ti vat a, hmui petin ka han hawi kual a, ka nauteho chuan mak tih hmèl tak hian min lo en țhap mai. Mercy phei chu a lo meng phâwk zual a,"A ring sia, ka phu nasa lutuk a, ka thil ei lai pawh ka dawlh zawk alawm," a lo ti a, a âwm chu a'n chùm pah dat dat a, ka nu chuan," Hre thiam rawh, i u hi a phúr lutuk a nih àwm hi" tiin Mercy hnungah chuan a han zût thla  a, kei erawh chuan," A, hetiang thil hi, âwihawm loh lutuk!" tiin chaw pawh ei chhunzawm tawh lo chuan ka tho ta daih a. Zotei lah chuan," A phûr lutuk helhawlh vàng a nih kha," a lo ti zui a, ka va melh nghek ringawt. A mak êm alawm. Ka nu chuan a fiamthu niin a lang bawk si lo, eng atân nge min neih chu a duh ang? A ei siam reng tùrin maw?! Ka kal duh tâk si lohah chuan a ti a ni ngei ngei ang, chutiang ni lo se chuan eng at...

☆EARTH ANGEL☆ - 14 By Dingdi Pachuau


 ☆EARTH ANGEL☆ - 14 By Dingdi Pachuau



Ka tho peih hlawl lo, khumah chuan mu chungin ka meng reng thung a, nizàn lama thil thlengte kha ka han ngaihtuah lêt a, ka maimichhîng vang vang a. Ka thaw hawk a, thil dang ngaihtuah tumin ka rilru mitthla chuan Mami school luhna hlui chu ka fantîr zawr zawr a, a school luhna hluiah chuan kal ta ringawt ila khatih hunlaia mite kha ka va hre chhuak thei kher ang em? Mami chunga thil țha lo titu lah kha a hming chiang balin ka hre lo lehnghâl, ka hmaa tih tùr hi ka rin aiin a bang a la chhahin a huphurhawm chiang a ni, hmel hriat ka nei dâwn hauh si lo. Chubâkah, tûn hnaia thil thleng pawh a ni lo va, mihring hrim hrim pawh an rei ve tawh hlawm viau dâwn, a hmasa berin an class-a mite emaw, tu emaw a kawm ve deuhte emaw tal ka hriat phawt a ngai a ni, ka bo lutuk loh nân.




Peih lo zet chuan ka tho chhuak ta nge nge a, nizàna ka thil in vàng nge ka lu lah chu a rit deuh lúk mai lehnghâl a, ka thâ a za zar lo khawp mai. 




Ka nuin min lo hmuh chuan,"I rawn tho thei maw? Chaw ei tùr pawhin ka kai tho duh lo che a nih kha, i exam zo mu ãm duh i nih ka ring a," a lo ti vat a, kei pawh chuan," Nia..."tiin ka chhâng ve ta ringawt a, ka en deuh reng a, ka chanchin kha ka zâwt duh tawh ang em? Ka zâwt rau rau a nih chuan ka pa awm loh lai tak hi a remchâng bawk a, zâwt ta ila, chhàn pawh min chhâng țha deuh ang?




"Nu-"




"I ril a țâm tawh ngawt ang! Chaw ei ka lo siam nghâl ang che aw," tiin choka lam a pan ta nghâl a, ka thil sawi tùr chu a lo man thiamin a lo ngaihruat thiam em maw ni chu aw ka ti rilru hial mai.




Min duata duhsak taka min siam a nih miau avàngin rilțâm lêm lo mah ila ka ei ve ta hrâm, ka nu pawh chu ka bulah chuan a rawn țhu hnai a, ka chaw ei lai chu min rawn țhutchilh a.




"Bawiha, kan fapa neihchhun liau liau i ni tawh a, nang chauh hi kan innghahna chu i ni tawh a ni. Nang leh i u bâk fa kan nei lo va, hei i u lah chuan min awm lohsan ta bawk nèn, nang hi chu ka innghahna tlâk ni hrâm rawh aw. A hma kha chuan ka hau nasa chein ka àn khum nasa țhìn che tih ka hria; mahse, ka hmangaih vàng che leh i țhat ka duh vàngin a ni aw, i u kha khati kha a ni zo tawh a, 'Nang tal hi chu' tiin  i lakah beiseina ka nei țhìn, tun hnaia i awm dàn hian chu ka beiseina êng neih chu a tiêng zual sauh a, min tihlim a, i u vànga ka rilru hrehawmnate pawh a chhâwk zãng huai tawh a ni," a ti malh malh a.




Ka thil zawh tum ve ràn rán pawh chu ka sawi chhuak duh ta lo. Ka lakah beiseina neiin ani hi chuan a fahrin tluk zetin min enin min hmangaih a ni si a, chulai kâra a rilru natna leh hrehawm tihna tùr lo sawi chhuah ve leh chu ka duh ta lo a ni. Ka pa nèn kan inkâr hi 'ni deuh rùn' mah se ka nuin min hmangaih chuan  hêng te mai mai chu mênah ka thlâk thei mai ang, ka u vàngin a rilru a hrehawm a, a rilru tina zâwnga han awm tlat pawh chu tunah hi chuan kei pawhin ka duh bîk lo.




Chaw ka ei zawh chuan Mami room-ah chuan ka lût a, a lehkhabu dahna chu ka en vang vang phawt a, chutah, thil ka ngaihtuah chhuak ta phut mai! Ka phone chu phawrhin Remruati chu ka phone ta nghâl a, ani tê hi, a hman a nih chuan Mami lehkhabu hlui hi min hai lêtpui se, thluak pakhat ai chuan thluak pahnih chu a chhawrnahawm deuh ang chu maw. Bâkah, ka tih tùr a hria a, kei aiin thil pawh a chîk daih zâwk kha.




A rawn thleng rang khawp mai. Pâwnah ka lo nghâk a, a helmet pawh phelh lawk lo chuan min thlêk vang vang phawt a, chutah," Nizànah i mu țha lo a ni maw?" a rawn ti chhuak ta chiah a, kei pawh chuan," Exam zawh zàn a ni ve alawm," ka lo ti ve mai a, thil dang sawi tawh lo chuan inah chuan kan lût dùn ta nghâl a, ka nuin min lo hmuh chuan makti tih hriat tak hian min lo en a,"Bawiha, tu nge ni?!! Ka va hmu ngai lo ve!" a lo ti vat a. Ni e, a hmu ngai lo ang, a mak ti hmel pawh chu a àwm lo chuang lo, kan inah hian hmeichhia hi ka hruai lût ngai lo va, bialnu ka neih vete pawh, vawi khat erawh kha chu Rinawmi kha a rawn kal ve ngei, chu pawh min hrilh hmasa lovin ama thuin a rawn lêng ve hmiah a nih kha.




"Remruati. Remruat, hei hi ka nu a nih hi," tiin. An inchibai ve ngei a, ka nuin,"A bialnu i ni em?" a tih chuan nui hak hak chung hian  Remruati pek chuan,"Aw, ni e; mahse, amah hi chuan a hre kher lo ang," a lo ti a, sawi tùr hre lovin ka en reng ringawt! A phawk a chhuak a ni ngei ang, ka nu hian a thu sawi hi a lo rin loh ngei ka beisei.




"A ni maw? Khawi vêngah nge in awm a?" tia ka nuin a zawh chuan lo inrawlh ta vatin," Nu, ka bialnu a ni lo, ka țhiannu a nih hi, thil lo zâwt duah lo teh," ka lo ti ta vat a,  kan thil tih tùr chu tih vat vata ka pa lo haw hma ngeia Remruati hawtîr vat ka duh, eng eng emaw sawi a awm hmain.




"I bialnu a ni lo emaw i țhiannu a ni emaw pawh ni se, ka fapa rawn hruai luh hmeichhia a nih chuan han titipui ve pawh ka duh ang chu maw le, lo hauh hlur lo la?" ka nu chuan a ti leh a, run zet hian Remruati chu ka melh a, ani lah chuan nui var var chung hian min lo en thung a, chutah, ka nu en lehin," Nakinah, a hriat loh laiin kan titi dâwn nia," nèlawm taka nui chung hian a ti a.




Ka nu hnênah chuan Mami room-ah kan awm dâwn tih hrilhin Remruati chu ka kalpui ta nghâl a, ka nu pawh chuan," Ei tùr ka lo siam ang che u," tiin min rawn au zui a, ka nui hawk ringawt, Remruati'n min rawn en hâ chu ka hmu lo der hmiah. Ka nu awm dàn danglam ta lutuk hi a mak a ni, min ngaihsak ve ta viau bawk si; mahse, hei hian kan in chhûng pawh tlêm tlêmin nuam min tihtîr ve deuh tawh thung, a hma kha chuan ina awm emaw haw emaw pawh kha ka huphurh ngawih ngawih țhìn a nih kha. 




"En teh, i nu kha, dâwt vâr hrilh a nawm hmel tawp, ka thil sawi lah kha a âwih hmel bawk si a," Mami room-a kan luh hnu chuan a ti ham ham a, kei chuan,"Dâwt vâr hrilh kher a ngai hleinem," ka lo ti thung a, ani lah chuan," A, a nuam ve alawm, i bulah tho ka sawi a, mi bula awma sawi sual hlau leh mi pawisawi hlau, an rilru vensak reng chunga țawng hi ka ning, i bulah hi chuan ka duh duha awmin ka duh duh ka sawi thei bawk a, ka zalèn bawk si nèn, nuam ka ti thlâwt a ni," a lo ti daih thung a, chutah," I u room chuh, lehkhabu a va ngah ve le!" a ti leh nghâl daih a.




"Khâng kha, vawiina kan en chhuah tùr chu a nih kha."




Thaw hak pah hian min rawn en a, lehkhabu dahna lam en leh nghâl vatin," Chuti, kan ţan nghâl dáwn em niang? Ka phûr tawh teh a nia," a ti leh nghâl mai a, hmeichhe naupang phûr taka thil ti tùr pawh a ang zâwkin ka hria.




Lehkhabu kan keu mawlh mawlh lai chuan ka nu chu ei tùr kengin a rawn lût a, kan thil tih lai a rawn hmuh chuan," Eng atân nge lehkhabu chu in chap darh nuai a?" a rawn ti a, kei chuan rang zet hian," Remruati hian hawh tùr a zawng a, Mami hian a neiin ka hria a," ka lo ti vat a, Remruati chu ka melh vat bawk. Dâwt ka sawi awlsam lutuk chu mak ka inti angreng viau nain Remruati'n thu dik a lo sawi chhuak khut ang tih ka hlauh vàng a ni pakhat.




"A nih tak chu, i u khân a ulukin a chhiar peih hlawm viau asin," a lo ti sap a, a țap leh ringawt mai ang tih ka hlauh avàng chuan thoin ei tùr a rawn chawi luh chu ka lo bansak ta vat a, Remruati pawh chu ka hlàn chhâwng ve ta nghâl a, làwmthu a lo sawi sap a.




Nilênga kan han keu kual meuh chuan pawimawh tùra ngaih hming pathum zet chu kan hmu chhuak ta mai rêng a, mit pahnih ngawt ai chuan mit pali chuan a lo hmu chak deuh chu a ni, thluak pakhat aiin thluak pahnihin thil kal dàn a chhui nasa thei zâwk bawk.




A haw dâwn chuan ka nu chuan veranda thlengin a lo thlah ve a, a hman remchàn huna lo lêng leh ngei tùrin a chah bawk," Thil pawimawh ti tùr ni lovin lêng tùr ngawtin lo kal tawh ang che, titipui che pawh ka duh ve a," a ti a. Remruati pawh chuan nui var var chung chuan,"Tehrêng mai, ka lo lëng leh ngei ngei dâwn nia," a ti ve a, a tlàn liam hnu chuan ka nu chuan," A nèlawm reuh khawp mai, a nui duh bawk si, lo lêng leh ngei teh se," a ti zui a, kei erawh chu ka ngawi tlat thung a.




A tûkah erawh ka peih lo chung chu Dr. Zonuna clinic-ah min kalpui lui tlat a, rei tak kan awm lo erawh a zia hlauh e. Test tùr eng eng emaw a sawi a, kan test zo hman vek lo, ka hmanhmawh deuh tlat avàngin atûk lama kal țha leh mai tùrin min ti a, ka hnial lo khawp mai. Kan chhuah hnuah chuan,"Ka țha lutuk ka ti a, i âwih tlat lo va," ka ti ringawt a, ani chuan," Tikhân rilru a nuam ve deuh alawm, hnár thî leh ringawt țhìn kha chu a ngaihțhatthlâk loh ve a, thisen cancer pawh a lo ni thut thei asin," zêp pawh nei chuang lo chuan a lo ti a.




"Min thihtîr i tum hnai êm mai a," ka lo ti hlak a, ani chuan," Chutiang lam pawh a ni lo, hrisèl lohna hi chu hre chhuak thuai thuai ila, tihdam theih a nih lai hian, a nasat tawh hnuah chuan a buaithlãk tawh țhìn," a ti leh mai a, a sawi dik ka tih avàng chuan," I ti dik e, ka pi," ka lo ti sap a.




"Chuan, khawi lam nge kan pan tâk ang le, ka pu?" Țawngkamah hi chuan tlàwm hi chu a tum lo ve chiang a nia, ka nuih a tiza tlat țhìn.




"Nang thluak țhaah, Pàpâri kha khawi vêngah nge a awm kha?" tiin ka zâwt a, ani chuan," E, Chhînga vêngah a nih kha, e, taka, chhûngte pawh kan nei tak asin, an lo hre maithei a ni," a lo ti vat a, phùr hmel zet hian a bu nghat nghat a.




"I ril a țâm em? Chàwl phawt ila?" 




A zêp bîk lo bawk a, Insomnia-ah ka chawlhpui a, ka tiam kha a ni ve hrim hrim bawk a, min pui nasa tawh bawk a, ei țeuh teh se, a phû bawk alawm.




"Eng nge i ngaihtuah vung vung? Mi â emaw an ti ang che, bâkah, thil ei lai chuan ei mai tùr, ngaihtuahna sèn a țùl hunah ngaihtuah leh vang vang mai tùr a nia, ei rawh, a dai mai ang," ka kea min rawn tlawh zoh pah chuan a ti sap a. 




Kan ei zawh hnu chuan Chhînga véng lam chu kan pan a, a chhûngte chu a han be chhin phawt a, inah a pi nèn  an awm tih a rawn hrilh chuan Remruati chuan," En teh, Mawite, Pàpâri tih hming pu i hria em?" tiin a zâwt zui a, ani chuan a lo hre mai lo a niang," Aw, a pawi lo, inah chuan kan lo kal ve hrim hrim phawt ang e," a ti leh a, Mawitei a tihte in lam chu kan pan ta nghâl a. Kan zu thlen chuan a pi nèn chuan páwn nilum a lo ai a,  an inhmuh chuan inhre țhang tih hriat tak hian an inbe nghâl bawrh bawrh a, kan kal chhan ber Pàpâri erawh a theihnghilh bîk lo, a zâwt nawn leh rêng a.




"Ka hre lo ka tih tawh kha. Pi, Pàpâri tih hming pu i hria em? Nula kum 28 tih vêl a niang, kan kohhranah chuan an awm àwm ka va'n hre lo," Mawitei chuan a ti zui sap sap a, a pi chuan," A hming pum in hre lo'm ni? A nu emaw a pa emaw hming tal pawh?" a lo ti charh charh thung a. Keini pahnih chu kan inen ringawt a, Mami lehkhabuah khân Pàpâri, Chhînga vêng tih ringawt khân a inziak si a, chutiang bâk chuan sawi ngaihna kan hre tlat  lo.




'Pâri' tih tel hming an hriat ve lah chu nutling kum 50 bàwr vêl daih a lo ni a, naupangah an hre leh bawk. Chuti a nih chuan a ni thei lo, thingtlâng ațanga school rawn kal pawh a ni thei a, hmun dangah pasal pawh a lo nei thei tawh tho bawk, ngaihtuah chuan  thil ni thei a tam dâwn lutuk.




A nikhatna atân chuan kan duh tâwk ta rih a, hmuin hre rih lo mah ila beidawnsan kan tum chuang lo. Vawilehkhata hmuh chhuah nghâl rum rum kha chu kan inbeisei sa lêm lo bawk, hming dang zawn chhuah tùr kan la nei alawm, bâkah, Pàpâri pawh hi kan la thlauhthla rih chuang lo ang.




"I lunghnûr em?" tia min zawh chuan," Engah maw? Pàpâri tih hming pu kan hriat chhuah rih loh vàng chuan maw? Teuh lo mai, kan la zawng țan chauh alawm le," ka lo ti vat a, ani pawh chuan," A țha, vawiin atân chuan duh tâwk ila, i chauh hmel deuh bawk nèn, haw tawh rih mai ila tiraw?"a ti leh a.




Inah pawh chuan ka ngaihtuahna a chàwl thei lo, kan hming neihho putu kan hmu chhuak lo a nih pawhin ka beidawng chuang lo ang, Mami hnêna ka lo tiam tawh a nih avàng chuan tàwpsan a thiang lo ang.




C-a'n min rawn bia a, a tìrah chuan Remruati emaw ka ti a, min ngai leh tawh a nih ka ring a! Mahse, C-a aw ka hriat chuan ka ngaihtuahna ațangin ka dah bo ta nghâl a.




"Țhiana, i țha maw? Ka ngaihtuah reng che a," a rawn tih chuan," Țha e, min ngaihtuah suh, ka țha teh a nia," tiin ka chhâng a, ani chuan," Thil thleng kha chu theihnghilh vek rawh aw, a pawi kan ti lutuk a nia, Țhianpa Joseph-a pawh khân a sawi tum miah loh a rawn sawi chhuak palh a nih kha, khatiang boruak chhia kha chu paih bo vek a țha. Țhian țha tak tak kârah pawh eng emaw han inhmuh thiam lohnate  pawh hi a awm ve zeuh thei tho a, rilrua hre rùn lovin theihnghilh ila, kan hlim tlâng a ni mai," a rawn ti duah a.




"A dik alawm," ka ti tak nain Joseph-a thil sawi erawh kha chu ka theihnghilh thei lawk lo ang, ka țhian kawm ngeih ve êm êm khân hmusit takin khatiang thu kha min han sawi khum duh a nia, a thin ka lo tirim over a ni mahna le! Ka hriatpui hauh lo; mahse, ka rilru chhûngril ber thlengin a a thil sawi khân a chhun nâ a ni, a tuar ve lo va, a hre ve lo ang, fahrah a ni ve tlat lo.




"Duhlaii kha i lo fâwp leh rêng rêng em ni a?" a rawn tih chuan,"Teuh lo, ka bialnu a ni tawh hleinem," ka lo ti mai a, sawi duah ka tum lêm lo. Chutia ka tih chuan," A nih, Joseph-a khân a rinthu em ni a sawi a?" a rawn ti leh a, kei erawh chuan," Amahin a hre ber ang chu, ka fâwp hauh lo tih erawh ka hre chiang thung e," ka ti nghat a.




Ka bialnu pawh ni tawh mang hlei lo kha ka buaipui peih lo tih leh Rinawmi ka țhen chhan dik tak hi an hre kher lo maithei. Rilru hi ni e, kan inhmuhsakin kan inchhiarsak thei si lo va, min rinhlelh miau chuan min ringhlel a ni ve mai. Keima lama a fel hi chuan mi dang bula sawi fel chiam a țûl ka ti ber lêm lo.




"A nih, Remruati kha?"




"Ka țhiannu, in țhiannu ni bawk a ni. Kan inkârah ințhianna bâk a awm lo," tia ka chhàn chuan," Nia, i duh zâwng chi lah a ni miah bawk si lo va. E, taka, vawiinah Muana'n a hmu dùn che u a ni àwm e, zêp hi i nei deuh chu a ni lo maw?" a rawn ti ve leh a.




"Muan-vawka thil sawi mai mai, min hmuh dun avàngin kan inngaizâwng tihna a ni lo, nang pawh hmeichhia nèn hmuh dun in ni fo ang chu, in inngaizâwng chuang hleinem," ka ti leh a, ani chuan," Hmu dùn vak lo ang, ka Juliet-i nèn tih loh chuan," nui hak chung chuan a rawn ti a.




Thil ho mai mai kan sawi a, zan dâr 10 vêlah chuan Remruati message ka dawng leh a, ka han chhiar nghâl a.




*Pàpâri tih pakhat chu Mawitei u chiah U Tebawihi'n a lo hria a; mahse, Lunglei lamah pasal a nei daih tawh a ni àwm e. Mi dangho hi kan zawng phawt ang a, a result azirin Lunglei lamah pawh chuan kan va kalchilh dàwr dàwr mai ang chu tiraw? Lunglei zin pawh a khât alawm*  tiin.




A tihzia hlauh e. Ni e, kan mi zawn tùr mi dang hi kan zawng leh phawt ang a, kan hmuh chhuah theih ngang loh chuan zin pahin kan va kal mai ta lâwng, ani tel kher pawh a ngai tawh nâng.




*RAWNGBÀWLNA HMASA BER CHU THU ÂWIHNA HI A NI*

Comments

Popular posts from this blog

☆LUHLULPA☆ - 1 & 2 By Dingdi Pachuau

☆LUHLULPA☆ - 1 By Dingdi Pachuau Ka fanu tui taka a muhìl sâk sâk chu ka thlîr reng a, ani lah chuan hmangaih takin ka thlîr a ni tih hre hauh lo hian kàwi sàwi zeta a teddy bear kuaha mu hian a thaw sâk sâk a, a biang tài deuh têkin a hmêl a han tihțhatzia chuh..ka thlîr ning thei mawlh lo. Mahni rîla rah fate hi chu mi fâte ai chuan kan duatin kan lo hmangaih deuh chu a ni, hmangaihna mita kan thlìr vàng pawh a ni ang chu, mi fate aia an chhiatna kan hriat theih miah loh ni. Rei tâwk fang ka thlìr hnuah chuan kûn hniamin a biang tài têkah chuan ka fawhsak zauh a, thàwm dìm takin room ațang chuan ka chhuak ta țhem țhem a, kawng erawh ka khâr lo. A lo harh veleh min ko leh vak emaw a ni ang a, ka hriat thuai loh chuan a lo țap leh palh thei si a, chuvàngin ka khâr duh lo. Choka zîm zetah chuan lût pheiin kan nufa ei tùr chu siam tùrin ka buatsaih țan ta nghâl a. Kan in chhûngah hian bungraw changkâng tak tak awm lêm lo mah se kan mamawh hi chu a awm kim ve viau, mamawh ...

☆MIN EN LA☆ - 27 By Dingdi Pachuau

 ☆MIN EN LA☆ - 27 By Dingdi Pachuau "Nu....!!" ka ti vak a, ka nu chuan," Eng i ti vak vak chu ni maw! Ka beng i tichhêt zo dâwn alawm!" a lo ti vat a, hmui petin ka han hawi kual a, ka nauteho chuan mak tih hmèl tak hian min lo en țhap mai. Mercy phei chu a lo meng phâwk zual a,"A ring sia, ka phu nasa lutuk a, ka thil ei lai pawh ka dawlh zawk alawm," a lo ti a, a âwm chu a'n chùm pah dat dat a, ka nu chuan," Hre thiam rawh, i u hi a phúr lutuk a nih àwm hi" tiin Mercy hnungah chuan a han zût thla  a, kei erawh chuan," A, hetiang thil hi, âwihawm loh lutuk!" tiin chaw pawh ei chhunzawm tawh lo chuan ka tho ta daih a. Zotei lah chuan," A phûr lutuk helhawlh vàng a nih kha," a lo ti zui a, ka va melh nghek ringawt. A mak êm alawm. Ka nu chuan a fiamthu niin a lang bawk si lo, eng atân nge min neih chu a duh ang? A ei siam reng tùrin maw?! Ka kal duh tâk si lohah chuan a ti a ni ngei ngei ang, chutiang ni lo se chuan eng at...

RUATSANGA - 13

RUATSANGA - 13 By Dingdi Pachuau Min fawh kârlakah chuan min duh thu leh duhawm min tih thu a sawi sap sap tih ka hre ruai ruai. Ka thluak a buai a, ka chhia leh țha hriatna a buai vek tawh tlat a ni. Engtin pawh min ti se, hnial thei dinhmunah ka ding tawh lo hrim hrim. Tunah chuan a kuta min chúl mai duhtâwk lovin a hmui,zei zeta min fawhna ngei chuan a kut hnu a chhui ta zai zai mai. Ka nghawngah fâwpin,ka âwmbâwrah a tâwp chat a, ka hnute khuhtu awm tawh hauh lo chu a fawp ta chat mai. Kei lah nuamtiin ka lo er, ka la tawn ngai loh a ni bawk si a,lo dawnsawn dan pawh ka hre chiah lo. A nuam ka tih em avang chuan awmngaihna hre lovin ka lo tâl ve sek a. Fawh mai duhtâwk lo chuan a hmúr chu a'n seh pah nar nar a,a kut lehlamin a fawh loh lam chu a khâl pah bawk a. Awm ngaihna reng ka hre lo, ka lu ka thle tawn chhén mai. Chutah, tâwp thutin, châknaa khat mitmeng sexy zet chuan min melh ta rún a. Hrethiam lo zetin meng dâ vâ riaiin ka melh chho vat bawk a. "D, i d...