☆EARTH ANGEL☆ - 15 By Dingdi Pachuau

 ☆EARTH ANGEL☆ - 15 By Dingdi Pachuau

A tûka kan chhuah pawh chuan eng kan ang chuang lo, zawn chhuah tùr hming pathum kan chhawp chhuak kha a ni a, pahnih chu kan han hmu  chu a ni ve mai a; mahse, hma kan sáwn lo khawp mai.  Vawiina kan mi zawn phei chu vànduaithlâk takin a lo boral tawh a, a boralna pawh a lo rei ve deuh tawh nghe nghe. A chhûngte lah chu an lo dîlchhûtin  kan zawn chhan leh zawhna eng eng emaw min zâwt țeuh mai lehnghâl a, fuh lo tak a ni, chawhma chhûng zawn chhuah nân hun kan hmang a, chawhnu hun ve thung chu kan mi zawn, lo boral tawh si chhûngte zawhna chhàn nân  hun kan hmang a ni hawt mai.

"I rilru kha i lo ti-down mai mai ang e, kan la hre chhuak ve zël a, hma kan sâwn chak lutuk a nia," tiin kan haw lam chuan min hnèm malh malh a, a scooty kan garage-a a dah daih avàngin kan inphur a, a zia ka ti zâwk, a petrol pawh a hek lo zâwk ang chu.

"Down nâng, kan la ti țan chauh alawm," ka lo ti a, rawn kûn hnâi deuhin,"Vawiin chawhnu zet chuh, awm lo ta ila chuan an zawhna kha engtin tak chhâng hlawm ang che maw tih ka lo ngaihtuah, i ning hmêl pawh kha ka lo hmu reng a nia aw," tiin zat hmel deuh hian a nui hak hak a, kei chuan," An dîlchhût êm a nih kha, kan hmuh duh ber lah a boral tawh a, anni nèna eng eng emaw sawi duah khân kan thil tih laiah hian awmzia a nei tam lo ve êm alawm," ka lo ti leh a.

"Mahse, khatiang kha tawn a ngaih châng a awm ve ang chu, i ngaih dàn anga ni nghâl purh tùr chuan beisei tam lo ila, a țha ang. A chhan chu kum 10 chuanga mi a ni tawh a, an lo dîlchhût ve pawh kha a àwm ve viau tho asin, bâkah, a lo boral ve tawh bawk nèn, an ngaih kha a zualin a damlaite kha an han suangtuah lêt leh ngei ang a, an lunghlui a lêng ngawt ta ve ang," a tih leh duah chuan dik chu ka lo ti ve reng mai; mahse, a ninawm  tho tho.

Kan in kan thlen chuan,"Naktûk chu kan chàwl rih dâwn nia, tha tharin hun dangah kan la chhuak leh dâwn zâwk nia aw," ka ti a, ani chuan," Min thlauhthlâk i tum vàng chu a ni lo tiraw?" a rawn ti ta hâ a, min en kal bawk a.

"A nih loh chu, chawlh rih ka duh mai a nia," ka ti leh a; mahse, rilru dang chu ka nei, hrilh kher erawh ngai ka ti lo, ka chanchin leh tih tùr zawng zawng hi hrilh vek a țha lêm lo, amah pawh hian in lamah tih tùr pawh a nei ve thei a, ni tin maia min zui chhuah ringawt chu a fuh ber lo ang, a chhûngte lakah pawh a inthlahrunawm, kan chhuak dùn tih an hre ngèi àwm si a.

"I damdawite i ei țha tiraw? Chuan, badam pawh kha?" a rawn ti ta thung a, kei chuan," Um, min ngaihtuah suh, ka ei țha lutuk," ka lo ti vat a, min ngaihtuah tih hriat hi nuam ti tho mah ila, min ngaihtuah viau tùrin ka duh lo, tûnlai phei chu a rilru a hmang ve nasa si, ka hnâr a la thî fo tihte hi han hrilh ila chuan... Hmeichhia a ni a, a țhian ka ni bawk a, min ngaihtuahna hi a tilang hreh ngai lo, hmeichhia hi chu mipa nèn chuan kan lo inang lo chiang chu a lo ni.

Ina lo lût ve tawh kher lo chuan a haw ve ta nghâl a, a lan theih chhûng chu ka thlîr a, țhian nih a tlin reuhzia mawlh hi, vawiina kan hun hman dànte kha, awm lo ta se chuan ka buai ngawt ang chu. Amah zâwkin kan mi zawn chhûngte zawhna kha țha tak leh zaidam takin a chhâng zêl a, mi biangbiak pawh kha a fel takzet a ni. Pastor fanu ni àwm hliah hliah a ni; mahse, ka bula a awma nungchang thup miah lova a duh dàn ang taka a han che vêl leh a han țawng vêl hi a lawmawm ka ti zâwk.

Krismas hma lawk ni 20-ah chuan kan mi zawn tùr pathumna Sangkimi chu kan zawng hmu leh ta; mahse, ani erawh chuan a tìrah chuan min lo be țha vak lêm lo, kan biak pawh chuan min en țha duh lêm lo, dàwra kal a hmanhmawh thu leh hun a neih loh thu lah chu a sawi chhên lehnghâl  a, țûl lovah a phone a rawn ri ve sek bawk. Ka u  chanchin hriat chian kan duh vàng  chauha biaa hmu kan ni tih han hrilh deuh khawl khawl chu ka châk khawp mai; mahse, be duhtu zâwk kan ni si a, ka insûm hrâm hrâm a ni. Dàwr lian ve angreng tak an nei a ni awm e, a pasal pawh SDO a nih thu uar takin an ina kan awm chhûng chuan vawi 10 vêl zet a sawi hmanin ka hria! 

A hnên ațanga kan hriat zawng chu Mami kha lehkha thiam thei tak a ni a, fel pawh a fel viau a, zirtîrtute leh school naupang  hriat pawh a hlawh viau a ni tih chu a ni. Mami sawi lan Papâri, Rody(boral tawh) leh Sangkimite chu amah Sangkimi sawi dàn chuan Mami tiamin, an class-a a thiam thei ber ber an ni hlawm a, thianghlim takin el pawh an inel ve țhìn viau a, high school ațanga inhre chho, school khata lût tlâng an nih avàngin  hriat pawh an inhre ve viau ni àwm a ni.

"Kan hlâwk khawp alawm tiraw? I u mai bâkah kan mi zawnte chanchin pawh kan hriat belh nual a, hmanhmawh deuh lo phei se chuan sawi tùr a nei țeuhin ka ring," Remruati chuan a ti malh malh a, ka  lo rûm nghut ringawt thung. A hmanhmawh chêk chûk lutuk kha ka haw deuh tlat, dàwrah mi chhawr a ngah àwm nèn, amah kher kal a ngaih pawh ka ring hrep lo ve! A pasal lah SDO a nia, SDO nupuiah chuan a la polite lo berin ka hria, khati chêk chûka a hmanhmawh chhan pawh kha a tân kan pawimawh loh lutuk vàng a ni ngei ang.

"Hostel-ah an awm tlâng vek a, anni kha chuan eng mah an tâwk ve lo a ni ngei ang chu, an warden hming kha la hre chhuak thei se chuan țha tùr hi a nia; mahse, an warden kha 'hmeichhia a ni' a ti tlat mai a, warden kha chu pawimawh lo turah ngai ang," tiin ngaihtuah mûk hmel zet hian a en ngai chu enin a khap fak fak a.

"Ngawi rih rawh, tikhân lo ngaihtuah char char tho la, hmun fâl leh nuam deuh rilru hman theih deuhna tùr hmunah kal teh ang, chumi hma chuan inhnawh puar phawt ila aw," ka ti a, a restaurant duh ber Insomnia lam chu ka panpui leh ta nghâl a.

An lo tidanglam nual niin, dawhkàn an lo dah belh tawh a, hmun fâl deuh duh tân pawha țhutna a lo awm nual tawh, a tihchi viau e, tuna kan boruak nèn phei hi chuan a hmun hi duhthusàm a ni ringawt.

Ka duh lai hmun chu ka panpui ta chat a, a duh zâwng ka hriat tawh avàngin ka ei tùr nèn order ka siam nghâl vat a, ani erawh chu amah ang lo takin ngawi rengin mit khap mang lo chuan dawhkàn chu a en deuh reng a, a ngaihtuahna a hmang a nih ringin ka be buai duh lo va.

"Ka ngaihruat dàn chuan an Sir tu emaw ber, zàna riahchilhtu a nih ka ring a; mahse, chutiang chu lo ni dâwn ta se, mipa dorm lama a riah ngei a ngai àwm sia, i ute dorm lama riak kha chu hmeichhia ngei a ni bawk si. Ngaihtuah thui ta zêl ila, an cook pawh a lo ni maithei tho bawk a; mahse, an cook pawh chu hmeichhia a lo nih chuan... Kha lam kha kan zawh theihnghilh daih bawk si, 'Lalhriat' a tih tak kha chu a rualpui deuh tu emaw a nih hmel ka ti deuh ringawt a," a rawn ti chhuak ta rêng a, a lu a thing pah deuh nak bawk, a lo ngaihtuah ve nasa ngang chu a ni, kei ai pawhin a lo ngaihtuah thui zâwk a nih hmel.

"An cook chu hmeichhia a nih pawhin a pasal chu mipa a ni ngei ang chu," ka lo ti ve a, ani chuan min rawn enin," A dik chiah; mahse, nula senior lam pawh a ni thei tho bawk a," a ti leh thung a, kei chuan," An class chauh kha hostel-a awm an nih avàngin hostel-ah khân mi 60 vêl chauh an awm a ni, cook hmeichhia pakhat ringawt chuan a vil hneh kher lo maithei, pahnih an lo nih pawhin cook pakhat zâwk chu pasal fanau nei tawh a nih kan ring phawt tùr a ni,"ka ti leh a. Ka ring khawp mai, cook pakhat chauh chu an neih ka ring lo bur.

Ei tùr a rawn thlen hnu chuan kan țawng ta lo, muangchânga eiin kan inbe tawh lo va; mahse, kan thil ngaihtuah erawh a inhlat lo khawpin ka ring, kei chuan amah chu ka en zauh zauh a, ani erawh chuan a en ngai enin a mit a khap fak fak reng a, eng tak rawn ngaihtuah chhuak leh ang maw?

"An Sir tu emaw ber a nih ka la ring fan tho, ni tin a hmaah hmuh loh theih loh ang khân a sawi miau si a," a rawn ti chhuak leh ta rëng a, a ngaihtuahna hi chu a sêng ve chiang a ni. A thil sawi hi a ni thei viau ang, a rinawm lo miah lo. Pa lian, sihal tar a ti em ni kha? Chuti a nih chuan kum lama naupang tak chu a ni thei lo ang, an Sir-te zînga mi tu emaw ber a nih pawhin upa tawh lam chu a ni ngei tùr a ni, nupui pawh a nei hial tawh ang chu. Vaubet theitu a ni bawk, hostel pâwnlama mi chu a nih ka ring thei lo bur, ni tina a hmuh, mahnia room nei hrang ngat a ni bawk tùr a ni.

"E, chuan, U Sangkimi khân lehkha thiam, thianghlim taka inel țhìn an nih thu a sawi bawk a, i u khân eltu ni lovin ertu pawh a lo nei a ni maithei a ni, eltu ni lova ertu a nei a nih chuan amah ertu rilru kha a thianghlim dâwn miah lo a nia," a rawn ti leh a, chu kher chu ka lo ngaihtuah loh lam tak a ni!

Ertu nei ta se, a er avàngin chu nu chuan an sir a pâwngsualtír ang maw? A va mak àwm ve! An sir chuan chu nu thu chu a lo âwih mai dâwn em ni? Ka ngaihtuah thui zêl a, an sir leh chu nu chu an inthurual tihna em niang? An pahnihin a rûkin an lo inngaizâwng ang a, Mami a er vàngin amah tihchhiat nân a bialpa, an sir ni bawk chu Mami sual turin a thlêmthlu tihna maw?  A ni lo ang, hei hi chu a ni thei lo ang. 

A ngaihtuahna hrang hrang chu a rawn sawi chhuak leh țhìn a, ngun takin ka lo ngaihthlâksak zêl bawk. Sangkimi thu sawi ațanga thil ni thei tùr chi hrang hrang thur chhuakin ' Chutiang chu a ni thei ang em' tiin a rawn phuh chhuak nawlh nawlh a, kan hriat loh miau avàngin 'A ni thei lo' emaw ' A ni ngei ang' emaw kan ti thei lo, kil tin kiltang ațanga ngaihtuahna hrang hrang chher chhuah kha a țha a ni mai.

Mut hmunah pawh chuan ka ngaihtuah zêl a, 'Lalhriat' a tih leh amah sualtu nia a sawi pa lian, sihal tar a tih kha chu mi hranah ka dah hmiah. Anni pahnih hi an inthurual a nih loh vêk pawhin eng thil sual tak emaw chu he mihring 'Lalhriat' a tih hian Mami chungah hian a ti a ni ngei ang, 'Thisâwn rawh' ti hiala anchhia a lawh kha a ni tlat si a.

*******

Krismas leh Kum thar inkârah erawh chuan kan thil tih chu kan tàwp ve ta rih, Remruati pawh a khawngaihthlâk ve alawm, hunpui a ni ve a, rilru hlim taka hunpui hmang thei lo lêka siam ka duh bîk lo. Kei hi chu ka hman dàn a ngai reng, ka tét lai kha chuan Krismas hi ka nghâkhlel thei viau a nih kha, ngaihtuahnaah thil dang a awm ve ngai tlat si lo va, khami hun kha a ngaihawm ka ti, tunah chuan ngaihtuah tùr a tam ve tawh bâkah puitling ka ni ve tawh a, naupan laia Krismas nghahhlelhna ang kha a awm thei tawh lo. Țhiante'n zàna 

chhuahpuiah min rawn sâwm țhin a; mahse, Joseph-a thil sawi kha ka hre reng a, keimah vànga boruak duhawm lo a thlen ka duh loh avàngin ka kal ngai lo; mahniin ka chhuah duh chuan ka chhuak mai a, Remruati chu an kohhran lama a buai ve rih avàngin hmuh pawh ka hmu ngai lo, phone-ah erawh kan in-text ziah tho.

Kum tàwpni tak Dec ni 31 chuan Mami thlàn ka tlawh a, Krismas hma lawka ka nuin a thlàn a cheisak ve pawh chu a ngai ngaiin a lo la awm a, pangpâr pawha lo la mawi khawp mai. Mami thlàn bul vêla thlàn pawh chu an cheimawi khawp mai, thlàn chei lêm loh pawh a awm nual a, chei ni ve tho si, mawi lêm lo tak tak pawh ka hmu nual tho.

"Mami, i laka ka thutiam kha ka la hre reng a nia, hma pawh tlêm tlêm chuan ka rawn sâwn ve zêl bawk; mahse, bangbo lutuk lo tùrin a hming emaw tal kha chiang takin lo ziak la a țha mai tùr; mahse maw, i ziah loh avàngin ka beidawnsan dáwn tihna a ni chuang lo a nia, hunpui lai ngang a nih avàngin ka chàwl rih a nih hi, kum thar hnuah tha tharin ka rawn chhui chho leh ang a, ka rawn rêk chhuak nalh ang," ka ti leh sap sap a.

Thlàn ațanga ka haw hnu chuan ka tih dàn ngai tein Mami lehkhabuho chu ka en nawn chhuak leh vek a, hming inziak emaw ka hriat duh tùr chi emaw ka hmu chhuak chuang lo. Hming tal chu ziak se aw, hei ai hian ka chhui chhuak rang daih zâwk àwm si a.

Mami'n a thih hma vêla a kawm  ve deuh țhin, a țhian ve deuh nia insawi, higher zirtîrtu kha, kha nu kha a hrilh mial ang em? Ni leh lo, a mualphona chu a hrilh duh hauh lo ang, hrilh ahnêkin theihnghilh daih a duh êm êm ang a, a chunga a thil tih râpthlâkzia pawh kha sawi chhuah chu sawi loh, ngaihtuah chhuah miah loh a duh zâwk ngei ang, theihnghilh tum ve si a han sawi chhuah leh daih pawh chu mil pawh a inmil thei lo.

*******

"Kum thar chibai! I la tho nange? Tho teh, kum thar a nih angin nang pawh zîng dang ai chuan i tho hma thar deuh dâwn lo'm ni? Tukina i thawh hma viau chuan tûk dangah pawh i tho hma viau zêl tawh dâwn asin," a rawn ti chûl a.

Ni chhuak a țha a niang, ka tukverhah chuan nizung a rawn lût sung a, a la tlai chhe lo tih ka hre ve thei mai bawk. Khap sak sakin Phone-a dâr zât chu ka han en a, a la hma lutuk tlat! Tûn ang hunah ka la tho ngai lo, min rawn kai tho hma rêng rêng ka ti!

"Ka la mu duh asin," ka tih chuan," Ni lo ve, tukin tal chu tho hma teh, i rilru pawh a fîm kar mai ang, thil țha tâwk ngaihtuah chhuah nân rilru fîm hi a pawimawh a nia," a rawn ti sauh sauh a, min muttîr leh chu a tum loh hmel khawp mai.

"A thuhrimah, Kum thar chibai pawh min la bûk ve lo a nia, ngai pawimawh chein ka rawn bûk ve che a nia, " a rawn tih nang nang chuan ka nuih a za angreng viau mai, a pangchanna ka ti ve mai, ho ka ti lutuk nain amahin a ngaih pawimawh tlat chuan han bûk ve poh ila.

"Kum thar chibai, a 'cial' ngatin a nih kha," ka ti a, a rawn nuih hak hak chuan,"A 'cial' chuan i nuih a tiza a ni maw? Zu chungchâng ka sawina a ni lo a nia," ka ti leh a, chu chuan a nuih a tiza sauh a ni ngei ang, a rawn nui ta kar kar a.

"I va lawmawm tak! Vawiin chu inkhâwm ve la?" a rawn ti teh daih a! Kei lah chuan," Engah maw ka inkhâwm daih ang?" ka lo ti thung a, ani chuan," E, Kum thar a ni alawm, vawi khat talte chu inkhâwm ve la, thil sual a ni hleinem," a rawn ti leh a.

"Ka pension tawh!" 

Ka chhànna chu a run viau a niang, a rawn chek tlak tlak a," I uar a nih chu a, inkhâwm pension tawh an awm ngai lo, inkhâwm ve la, i pension lo a ni mai. I inkhâwm phawt chuan thil thar țha deuh ka hrilh ang che, ka thûlkhung ngat a nia," a rawn ti leh a.

"Thil țha deuh a zêp theih loh, a țha tâwk lo a nih chu."

Ka chhànna chu a ngei tâwk a tling leh khawp a niang," Roddick Eksek..." a rawn ti vak a, a phone chu a dah ta nghâl a, kei pawh mu chungin ka nui var var mai.

Ka inkhâwm chuang lo. Inah awmin ka room-ah ka inkhung a, music ngaithlain lehkhabu mawlh chu ka keu leh a, thurûk eng emaw tak ka hriat belh maithei asin. Ka keu ka keu a, ka hmu chhuak chuang lo, thil tisualtupa hming hi a ziak mai mai lo a nih dâwn hi, a hlau viau a ni ngei ang. A tleiràwl chhoh laia thil thleng a ni a, a thih hma kum hnih khat kalta khân a chunga vauna hmangtu chu a hmu leh ang em? A hmuh ngei ka ring, Aizawl hi chu a zîm êm mai. Chutia a hmuh leh phei chuan...a hlau zual ngawt ang,  Mami chu a va khawngaihthlâk tak? chu pa chuan a lo la hre ve ang em? Hre ta se, a lo tilui ngam leh tho ang em?

Tlaia Remruati message ka hmuh chuan ka țhutna ațangin ka tho zawt mai!

*Pàpâri, Lungleia pasal nei kha, a pasal hming chu Lalhriata  a ni àwm e, Sailo a ni nghe nghe. U Tebawihi min hrilh a nia, ka va zâwt nawn leh alawm, kan thil chhui hi a hmâwr kan bâwk teuh tawh a nia aw...*

A riin ka chhiar nawn leh ngat a, he nu Pàpâri hian thil hriat a neih nual ka ring ta deuh tlat mai. A pasal hming chu eng pawh lo ni se, amah hi va biaka va hmuh ve hrim hrim a ngai a ni, Remruati u Tebawihi hnên aťangin an addres pawh ka hriat theih ngei ka ring bawk.

Step tharah kan chuang leh ta phawt e.

*BIAK IN LEH A CHHEH VÊLA RINGTU ȚHA TAK ANGA LANG MAI LO HIAN FIANRIAL LEH TUMA MIN HMUH LOHNAAH ZÂWK HIAN RINGTU ȚHA NIH I TUM ZÂWK ANG U*