☆EARTH ANGEL☆ - 16 By Dingdi Pachuau

 ☆EARTH ANGEL☆ - 16 By Dingdi Pachuau

Class kal hma ngeia va tlawh chhuah chu țha ka ti khawp mai. Ni 12-ah class kan țan dâwn a, a remchâng hmasa berah Remruati hi Pàpârite address chu zawhtîr ila, ani tel kher lo pawh hian va kal ta mai ila tihte chu ka ngaihtuah kual a, ani hi chu a hman tawh kher lo ang, bâkah, zàn riah a ngai àwm si a, a chhûngte an zahawm, hmeichhia a ni a, phal pawh an phal kher lo ang, pastor fanu a la ni zui, kei ang mipa, țhatna lai sawi tùr nei lo ve tak bulah phei chuan...ngaihtuah pawh ka ngaihtuah zawm duh tawh lo.

Remruati chuan ka ngaihtuahna a lo hre vek a ni ang tih tùrin Pàpârite awmna vêng chu a lo zâwt fiah vek a, a u Tebawihi chuan a lo hre chiang viau bawk a, a tihzia ka ti kher asin.

"Chuan, engtikah nge Lungleiah chuan kan phei ang? Class țan hmaa zin phei chu a châkawm ka ti viau a; mahse, hmun dangah zin ka ngai leh thut a," a ti barh barh a, ka en  vat a, ani erawh chuan hmun dang daih a lo en a.

"Khawiah nge i zin dâwn a?" tiin ka zâwt ta vat a, a zin tùr chu a rûk takin ka lâwm viau mai, a zin hlànin Lungleiah chuan va phei lawk ka duh dâwn si a; mahse, ka kal tih chu ka hrilh lo thung ang.

"A, hla deuhah maw le, i hriat chuan lo kal ve i tum palh ang," nui chung hian a ti a, min rawn en ta bawk a, chutah," Ka zin hlànin Lungleiah chuan va kal bîk miah suh aw, ka kal ve châk a nia, hmânah vawi khat kan awm tawh a, kan awmna laite kha ka tlawh leh châk a," a tihzawm leh barh barh a.

"Hun remchângah kan la kal dùn ang chu," ti ringawtin ka chhâng a, a zin hlàna kal zawk erawh chu ka tum ruh khawp mai thung a, a tel ve a nih chuan eng emaw chenah chuan nuam chu ka ti ang, titi nuam a ti a, Pàpâri pawh chu awlsam takin a titipui leh thei mai dâwn a; mahse, hmeichhia a ni a, mipa angin awlsam takin thil a tihpui ve mai mai theih loh ang, hmeichhia a nih angin ngaihtuah a ngai bawk ang a, ka huphurh chu a ni miah lo; mahse, a...a chhûngte'n an ngaihtuah lutuk palh ang.

"Aw le, nangmahin a rûkin va kal bîk miah suh aw, min thlim i tum hlauh ang e, min thlim miah suh, pahnih akâra pakhat zâwk inthlim chu, a fuh hauh lo ang," a ti a, chîk zet hian min rawn melh kar a.

"Khua a vawt si a, tûn anga zin chu ka peih lohpui hle mai che," ka lo ti daih thung a, mit khap sak sak chung hian min en a,"Zin loh theih a ni lo, bâkah, khua a vâwt emaw a lum emaw pawh ni se, zin hi chu nuam ka ti ve hrim hrim a," a lo ti a. A tihzia hlauh chu, a zin hlànin keimahin va phei mah ila, a lo haw hunah pawh hun remchângah kan zin leh thei tho alawm, zin nuamti hrim hrim a nih chuan.

"Engtikah nge zin tùr chuan i chhuah dâwn? I thang rei ang em?" ka ti leh a, ani chuan," Rei vak dâwn nâng, naktip khian kan chhuak ang a, kan lo lêt thuai ang," a lo ti a.

"'Kan' i ti a, tute nèn nge in zin dâwn a?" ka ti leh a, ani pawh chuan," Ka nu leh kan upa ber nèn, kan pathumin a nia, eng nge ka lo hawn ang che?"tiin min rawn en a.

"Dam takin lo haw leh la, chu chu a țha ber mai," tia ka chhàn chuan a nui sak a, ka lama rawn thle hnai deuh pah hian," Min lo ngai lutuk lo la,"a ti sap a, chutah, awm pângngaia awm lehin,"Class țan hi duh ai chuan a hma hlek a ni tiraw?  Zin kual mai mai a châkawm nèn," a ti leh a. Kei erawh chuan," Chu, i zin dâwn reng chu," ka lo ti thung a.

"Thil pawimawha zin chu a nuam lo alawm, zin khawthawn mai mai alawm nuam ka tih chu," a tih leh chuan," Lungleia kan va kal pawhin thil pawimawh ti tùrin alawm kan va kal dâwn," ka lo ti ve leh a, ner nângin min rawn en phawt a, chutah,"A pawimawh tho a; mahse, a nuam dâwn thung alawm," a ti leh a, ka chhâng zawm duh ta lo va.

Ka nu hnênah Lungleia chhûngte kan neih leh neih loh chu ka zâwt a, neih chu kan lo nei a; mahse, kan lam a hla deuh hlek tawh a, kan inpawh tehchiam lo a lo ni àwm e. A pawi lo, zan khat chauh chu a hrehawm hman chuang nâng, va zawn chhuah pah a ni ve mai a, nuam pawh ka lo ti phian thei asin.

Ka zin lawk tùr thu chu ka nu leh pa ka hrilh hauh lo, hrilh ngai pawh ka ti lêm lo. Zànah pawh ka riak chhuak fo a, zan hnih khat mai maite chu, ka tih ngai loh dàn pawh a ni lo va, mipa tân chuan hrilh ngaiah pawh ka dah lo.

Ka nu sawi kan chhûngte chu zawn hmuh an har lo khawp mai, a chhan chu an pa ber kha Gov't Serkàwn Middle School-ah Headmaster a ni miau a, a hming 'Pu Hminga' ti ringawt chuan zawng ila chuan ka hmu har ve khawpin ka ring, a hming leh a nihna chuan ka zawng a, ka hmu ta vat rêng a ni.

Nu ber 'Nu Dini' hnênah chuan ka han insawi ve a, mi fel tak a nih ka ring nghâl, a chhan chu ka han insawi ațang chuan min hre sa ang maiin min be nghâl bawrh bawrh a, ka chhûngte chanchinte chu min zâwt nghâl seuh seuh bawk a, țawng tam loh viau tum pawhin a țawng loh theih loh. 

"Aizawlah thil pawimawh ti tùrin kan rawn kal ve zauh zauh a, in in awmna lai tak saw office kan dàwr tùr nèn a inhlat lutuk a, bâkah, i pa Hminga chhang chiah hi Secretariat building bul lawkah sâwn an awm ve a, han innghah mai hi a remchâng ve țhìn si nèn, rawn kal ve chhunah pawh kan rawn tlawh hman lo țhìn che u a ni. Hei, nangin min rawn tlawh chhuak hlawl mai a, i fel khawp mai, i insawi loh phei chuan hriat pawh ka lo hriat tawh miah loh che kha, kan inhmu khât deuh bawk a ni," a ti barh barh a, a nèlawm ka ti.

Ka zin chhan chu min zawh ka ring deuh a nia, hriat ngai a ti lêm lo a niang, ka têt lai chanchin chu sawiin kum 10 chuang liam ta daiha min hmuh tawh kha tunah min hmu leh ta chauh a ni a, min lo hre tawh lo pawh chu mak a tih loh thu a sawi leh siam siam a, kei pawhin a àwm ka ti viau mai, kei phei chuan ka hmuh vawi khatna ni maiin ka hre nghe nghe asin!

Pa Hminga lo haw hma chuan ka chhuak leh rih a, nakin zàna ka lènna tùr lam ka buai loh nân ka inzawng lâwk ve duh a ni. Ka kal kual ve nasa khawp mai a, hun ka neih tam loh avàngin beidawn erawh ka tum lo va, Pàpâri hmu lova haw phei chu ka tum lo bur a ni ber, ka zawn kual hrep hnuah a tàwpah chuan an chènna chu ka hmu chhuak ve ta hrãm a. Ka lût chuang lo, zàna lèn erawh ka tum, ka kal chhan ber pawh a ni bawk a.

Inah chuan Pa Hminga a lo awm tawh a, an fate tleirâwl hmeichhe pahnih inang zet nèn, Pa Hminga pawh chu ka hmuh hnu a niin ka hre chuang lo, ani erawh chuan min lo hre chat mai, Nu Dini'n ka chanchin chu a lo hrilh  tawh chu ka ring tho a; mahse, min lo koh chat dàn ațangin min lo la hria tih a hriat ve tlat.

"I lo tlangvâl ve tak tak ta a nih hi. Ka hmuh hnuhnun ber che kha chuan i la nau ve deuh hlek a, chèr pawh i la chêr reuh khawp mai, tunah chuan i lo puitling ta, i hmel erawh i la paih lo hlê  a nih hi, ka la hre chat thei che a nia," nui  var var chung chuan a lo ti a, chutah," Eng maw i rawn tih dâwn a? Ranngo lamte hi i rawn zawng dâwn a ni lo maw?" a ti leh zat a, a nuih dàn ațang chuan a fiamthu a ni tih ka hre ve thei mai a.

"Zawng pah maithei a ni," nui chung hian ka ti ve a, a hnuah erawh thutak zâwk hian," Class țan a la ni lo va, rawn zin ve pahin mi rawn hmuh tùr ka nei a," ka ti leh a, ani chuan bu nghat nghat pah hian," A nih tak chu, hmeichhia a nih ngei ka ring bawk e," nui chung vêk hian a lo ti leh a, kei pawh chuan,"Ni lo thei nâng," ka lo ti ve leh a.

A fate pahnih chu an zakzum reuh khawp mai a, zakzum rual an la ni ve miau a, ka hre thiam reng mai. Biak pawh min be țha ngam lo, ka be lui ve ta zâwk a, zak nui sen sen chungin min chhâng ve tho bawk. Phìr an lo ni nghe nghe a, an nulât hunah chuan an hmelțha dùn reuh khawp ang,

Ka inbual hnuah chaw kan ei a, chaw ei kham veleh chuan ka chhuak leh nghâl deuh mai. Pàpârite chu an nupain lo awm ngei se ka ti kher mai; mahse, a pasal hi Mami sawi Lalhriata kha a lo nih ngai chuan ka insûm zo kher ang em? 

Doorbell chu ka han hmet a, min rawn chhawn loh avàng chuan vawi khat ka hmet leh a, thãwm ka hre ta chiah e, kawngka chu a rawn ri rak a, nula pakhat hian a rawn hawng a.

"Eng nge ni ta?" a rawn tih chuan pâwna la ding chung chuan," Pàpârite in a ni tiraw? Khawngaihin, ka hmu lawk thei ang em?" tiin ka zâwt nghâl a, ani chuan chiang zeta min rawn en pah hian," Aw, ni e, lo lût rawh," a ti a, kawngkhàr chu a hawng zau ta nghâl a.

In chhûngah chuan tu mah ka hmu lo, țhutna min kawhhmuh pah chuan," Țhu la, inthlahrung suh. Keimah hi Pàpâri chu ka nia, eng kawngah nge min hmuh i duh a? Ka hriat mi i ni bawk si lo," tih pah chuan ka hmaa sofa-ah chuan a țhu ta nghâl a. Kei pawh chu hrilh nawn ngai lovin ka țhu thla ve ta nghâl bawk a, chutah, amah chu enin," Roddick-a ka nia, Aizawl ațangin chawhma khân ka rawn phei a, in pa hi a awm nange?" ka ti khawmawi a.

"Aw, hna thilah a zin a, a lo haw har deuh maithei. Eng thilah nge min hmuh chu i duh a? E, ngawi rawh lawk, chumi hma chuan thingpui ka'n thli lawk ang e," tiin a tho leh ta a, an choka lamah chuan pheiin flask ațang chuan thingpui no hnih hi a thli chhuak a, a rawn phei leh nghâl vat a.

A ţawng duh khawp mai. Kei pawh chuan ka thil zawh tùr han zawh dawt aiah chuan tiin ka han sawi kual vêl rih a, ka u Mami'n a țhian kawm ngeihte a sawi țhin zînga mi a nih vàng leh Lungleia ka zin remchàn lai a nih vànga tlawh chhuak ka nih thu chu ka sawi ve a. Ani chuan," A nih tak chu, Mami boral thu kha ka lo hre ve tak asin, ka khawngaih reuh khawp mai a, rawn phei ve pawh ka duh viau a; mahse, vànduaithlâk takin, kan pa dam loh lai tak kha a lo ni a, ka rawn kal thei ta lo va, rawn ràla a thlàn pawh rawn tlawh ve hrim hrim hi chu ka la ba ta tho chu a nih hi," a ti bawrh bawrh a.

"Pasal i neih hnu hian Aizawlah i rawn zin phei khât ta a niang maw?" nui deuh chung hian ka ti a, ani chuan,"Ni chiah e, pasal neih tawh chuan duh ang angin thên a lo rem tawh bîk lo va, awmna ngaiah kan awm tlawk tlawk a nih tâk ber hi," a lo ti ve mai bawk a. Chutah," I u chu sawi leh ta ila, kan inkàwm tam ve a, lehkha thiam thei tak a nih nghe nghe kha, term exam-ahte khân pakhatna kan innih chhâwk zak zak țhin nghe nghe a, kan ţhianho khân kan inel ve nasa țhin; mahse, i u kha chu kan tluk chiah lo deuh zël chu a ni, a tàwpah a tițha ber ziah," a ti leh bawrh bawrh a.

"A nih, damdawi kha a ti țhìn niin i hria em?"

A ngawi ta vang vang a, en pawh min en lo chuan a hmaa dawhkàn chu a melh ta vang vang a, thingpui chu ka tem hla a, a hnu deuhah chuan," Kha thil kha tûn thleng hian rin a har ka la ti khawp mai, kan inkàwm vek țhìn a ni si a, a tih àwm kha ka hre ngai miah lo, hostel-a kan awm hnu khân a mizia kha a thlâk ta tlat a, ni khat thil thu-ah, ni lo, zan khat thil thu-ah a ni zâwk ang chu, a nungchang kha a thlâk vek a, kawm pawh kan inkàwm ngai ta lo va," a rawn ti chhuak ta a, chutah,"Amah ngaizâwngtu Lalrina vàng kha a niang ti ila, i u kha chuan a duh ve ngai mang bawk si lo va, ka  hre thiam lo, a mak a ni tawp mai, mak kan ti vek ti ila a dikin ka ring," a tihchhunzawm leh zat a.

"Lalrina chu in school kalpui ve a niang maw?" ka tih chuan," Aw, ni e, section B-a mi a nia, fel deuh mai hi a ni nghe nghe a; mahse, i u khân a mitmei pawh a hmuh ngai lo; mahse, chuti chung chuan kan dem fiam țhìn tho," a lo ti leh a.

Lalrina chu a ni thei lo ang. 'Pa lian, Sihal tar' han tih atân chuan anni ang rual chu chutiangin a ko lo ang, bâkah, amah vaubet theitu chu amah ang rual lek chu a ni thei lo, mi puitling, lian leh pumruaah pawh lian lam a ni tùr a ni.

"I uin a duh theih loh chhan pawh kha a têt vàng kha a ni pakhat a, i u nèn khân an inchen reng si a, a sàn loh bâkah a la chêr ve zui a," nui hak hak chung chuan a ti leh a, nui chung hian ka lo bu ve nghat nghat a,  Lalrina chu a ni thei lo phawt, mi dang ngaihtuah a ngai ta a ni.

"A nih, in dorm-ah khân mipa an rawn lût ve thei em? Hostel khatah in awm vek sia, in inhmu vek thei tho ang chu tiraw?" tiin ka zâwt leh a, thingpui chu ka dût pah hlak a, ani chuan meng deuh ser ser chung hian,"Luh phal a ni lo, mipa lo lût thei kha chu Sir-te kha an ni mai a, kan light a chhiat chânga min rawn thlâksaktu kha a ni leh mai. Bâkah chuan, mipa lo luh phal a ni lo, class-ah chauh kan inhmu thei tihna a nih ber chu," a ti leh mawlh mawlh a.

"An strict ve hle mai maw?" ka tih leh chuan," Aw, strict ve e; mahse, inhmuh rûk duh chuan a inhmuh rûk theih tho, inngaizáwng inhmu ru pawh an awm fo tho," nui chung hian a ti leh a, chutah, zàwi deuh hlek hian," Kan pa nèn pawh hian vawi khat chu kan inhmu ru ve a," nui chung hian a ti sar sar a, he nu hi a zei reuh ngawt ang ka ti! A chezia leh a mitmeng hrim hrim pawh hi zei chi a ni tlat!

"In pa hi a hming kha Lalhriata tiraw? Lunglei mi hrim hrim a ni maw?" tiin ka zâwt leh a.

"Aw, 'Lalhriata Sailo' a inti deuh kher țhìn a; mahse, tu pawh mai hian 'Lalhriat' tiin kan ko vek maiin ka hria, a pite bula rawn awm țhìn a nia, a khawchhuahna tak chu Lunglei hi a ni," a tih chuan," In inhmangaih àwm hle mai, high school kal lai ațang tawha inngaizâwng  in han innei thei a nia, in inzui rei àwm hle mai," ka lo ti leh a.

"Aw, zui rei ve tho mai; mahse, kan ni reng bîk lo, on/off ang deuhin kan kal ve deuh reng. En teh, a tìrah tak chuan i u kha a star țhìn a, chutih lai chuan class ix kan zir lai a ni nghe nghe, keiin amah ka lo star ve thung a," nui deuh sak hian a ti leh barh barh a.

"Chu, a va buaithlâk duh dâwn ve?" ka lo ti vat a, ani lah chuan," Buaithlâk ve deuh det e, i u lah khân ngaihzâwng a ngaihsak vak bawk si lo va; mahse, star rûk ve deuh pakhat kha chu a nei, higher lama mi a nia; mahse, a hmu ngai chuang lo, a zak tlat zêl a ni, Lalhriata nèn kan nih tâk hnu khân i u hi ka chhaih fo țhìn nghe nghe asin, a lo rei ve ta hle mai," a ti leh vang vang a.

"Hostel hi ka la awm ve ngai lo va, hostel life pawh hi ka hre ve miah lo va, chuvàng chuan ka zâwt chîk deuh che a ni, a hrehawm i ti ve em? Mami khân hrehawm a ti viau a nih ka ring a," ka ti leh a, ani chuan," A hrehawm pawh ka ti vak lo, kan cook-te lah khân an thil siam kha an siam tui thei si a, lehkha lam lah a tithei pâwl kan nih avàng khân nuam lo tih nachâng pawh ka lo hre lêm lo," a lo ti mai a, chîk deuh záwk hian,"Cook eng zât nge in neih a?" ka lo ti ta vat a.

"Pahnih an nia, pakhat chu nula naupang ve deuh niin pakhat chu pasal fanau nei tawh a nia, a pasal pawhin a rawn pui ve fo mai. Kan hostel-ah chuan an rawn awmchilh ve a, an fate pawh kha kan school-ah an lût ve nghe nghe; mahse, tûn hnu hian an pa nèn khân an ințhen tiin ka hria, pa țha tak a nih tehlul nèn khân," a ti leh barh barh a.

A țawng duh bawk a, ka hriat duh ang chin chu ka hre ta vek maiin ka hria, kan titi zawh meuh chuan a lo tlai ve tawh khawp mai, nula in pawh ni si lova ka la lèn rei ber țum a la ni ngei ang.

Mutnaa ka phone ka en chuan miss call a lo awm reng tawh a, Remruati a lo ni lehnghâl, ka lèn dâwn vàng khân ka lo mute daih a, a titau nasa ang chu aw...

Ka han text ta tho a, a tlai ve tawh angreng si a, a lo mut tawh palh tâkin, naktûkah pawh hmu mah se a pawi lo, a zin hnuah ka la be lo hrim hrim a.

Min rawn chhâng rang khawp mai.

*Eka, engah nge ka phone-call pawh i lâk duh loh a?* a rawn ti ta ngei a! Ka nuih a za khawp mai a, a titau rei theiin ka ring lo rêng a ni. Mi fel tak a ni reuh a, titau ve deuh angin lang mah se a titau rei ngai lo, bâkah, min pawh hmasatu a ni a, ka lakah hi chuan a thinrim tak tak ngai teuh lo.

*Nula inah ka lêng ve alawm le*  tiin ka chhâng a, a chhiar lai chuan a hmui a tipawrh nasa ang chu aw...

*A nih tak chu, nula ina i lêng ve ngam chu, ka lawmpui che👏👏👏*  a rawn ti, a che ngeiawm thiam reuh a nia, nula inah ka lêng ngam lovin a lo ring a ni chêk ang chu, nula mai ni lo pasal nei lai inah pawh ka lêng ngam tih a la hre lo a nih chiah hi.

*In zinna chu a nuam bawk em? A vâwt ve tho em?* tiin ka zâwt a, min rawn chhâng zêl. A thin a rim tak tak teuh lo ka tih tawh kha, mi fel tak a ni a, ka hre chiang ve riau tawh a ni. 

*Naktûkah ka rawn be dâwn che nia aw, zanin chu a tlai tawh sia, i zinpuite lakah ka inthlahrung, ka tiharh palh ang*  tiin ka text leh a. Ani pawh chuan  *Nia, an muhìl tawh a, kei chu ka muhìl ve thei rih lo a nih hi, rawn biak che ka duh laiin nula inah min lo lènsan daih bawk sia, ka riang tawp maw le*  tiin min rawn chhâng a.

*Naktûkah chuan ka rawn be ngei ngei ang che, i hman ang tiraw?*   ka tih chuan  *Zàn dâr 8 hnu lamah chauh ka hman ang, naktûk chu nilêngin ka buai dâwn a, min rawn be ngei ngei rawh aw*  tiin min rawn chhâng leh a, eng a ti dâwn chu ni maw? A va buai rei dâwn ve le! A pawi lo ve, a buai dáwn miau si chuan le, naktûk zànah chuan kan inah ka awm dar dar thei tawh ang a, zalèn takin ka be thei ang chu; mahse, a tel lovin Lungleiah ka kal a ni tih hria se chuan min thinrim khum ngeiin ka ring.

Muhìl thei lovin  zanina ka lènnaa kan thil sawi hrang hrangte chu ka ngaihtuah lêt a, Mami pâwngsualtu tak pawh chu ka hre chhuak thei ta chuang lo chu a ni a; mahse, ka la beidawng chuang lo. Ngaihtuahna hun ka la ngah tihnaah ka ngai mai, duh leh Remruati nèn hun remchângah Pàpâri pasal Lalhriata awm hunah kan va zin phei leh mai a niang chu, ani pawh hian thil hriat chu a nei nualin ka ring ve tlat, kan hriat tam poh leh chhui zêl a awlsam thei zâwk ang chu maw...

*MITTHI TAWH HIAN A HMALAM HUN ATÂN BEISEINA A NEI THEI TAWH LO, NUNGDAMA KAN LA AWM MÊK AVÀNG HIAN HMALAM HUN BEISEINA KAN LA NEI THEI A, BUL ŢAN ȚHA LEH THEI TÙRIN HUN PÊK KAN LA NI BAWK*