☆EARTH ANGEL☆ - 17 By Dingdi Pachuau

 ☆EARTH ANGEL☆ - 17 By Dingdi Pachuau

Class țan hma chiah zànah C-a room-ah ka țhianteho chu ka hmu leh a; mahse, Joseph-a a rawn tel lo, ani kha chu hmuh leh pawh ka duh tawh lo, ani pawhin a duh bîk tawh kher lo ang, zanin pawh hi min hmuh a duh loh vàngin a lo kal lo a ni ngei ang chu, rawn kal ta se kei pawh ka haw daih ang!

"Nangni pahnih hi, inrem tawh teh u, boruak a nuam lo êm mai," Muana'n a tih nuah nuah chuan," Nuam lo pawh ka lo ti hleinem, a fel thên ka lo ti mai asin," ka lo ti vat a. Mapuia chuan,"Țhianho tlèm tawh nâklaiin, atu emaw zâwk zâwk hi tlâwm teh u, a nih loh pawhin, nangmah tal hi tlâwm la?" a rawn ti ve a.

"Teuh lo mai! Țhian ațanga min bàn hmasatu a nia, min bàntu hmaah hian ka tlâwm ang maw? Teuh lo! A duh chuan min bàntu chuan kan inkâr chu siam țhat tum ang hmiang, kei chuan, ni lul lo mai!" ka ti tlat thung a, ka rilru dik tak ka sawi a ni.

"Eng nge in buaina bul kha? Duhlaii kha a ni lo'm ni? Duh hi chu i la duh a ni tiraw?" C-a chuan a rawn ti ta daih a, ka lam rawn hawiin a nui sûng a. Phûr zet hian Muana pawh chuan,"Nia, hmeichhe dang pawh a melh theih miah loh hi," a lo ti ve vat bawk a, kei ka lo nui hawk thung. An hre lo lutuk chuan ka nuih tiza miau hek le.

"Ka sawi lo mai ang e," ti ringawtin ka chhâng a, hmeichhia, chuta kâra ka bialnu hlui lehnghâl chanchin chu sawi ka peih lêm lo, rèl ka tum lo va, nih tawh loh hnua insawi zui chiam hi thil țha pawh a ni hek lo, țangkaina a nei lêm lo bawk.

"A nih chuan, i țhiannu Remruati ve thung kha?" Muana chuan a rawn ti leh a, rang zet hian,"Ka țhiannu chang a ni bîk lo, ani phei chuan a țhian tak tak angah a ngai vek che u asin," ka lo ti vat a, C-a chuan," Ani chanchin sawi chu i phûr zar thung a ni maw?" tiin min lo fiam leh zat a.

"A rilru a thianghlim a nia, a chungah rilru țha lo min puttîr tum lo teh," tiin a bân bulah chuan ka hnek fiam zauh a, tlêmin ka thil in chuan ka thisen a lo fan kual ve ta bawk nèn, nuam ka va ti si êm! Ka țhiante hi ka țhiante an ni lo ang tih ka hlau, Remruati tiamin, Joseph-a tel si lovin, ka chungah an fel hlawm viau mai si a.

"A tìrah khân i bialnu emaw ka ti a, in inhmeh lo ka ti a, i duh zâwng chi a ni lovin ka hre bawk si nèn, mak ka ti ru viau a; tunah erawh chuan in inhmeh ka ti tawh viau mai, a felin a țawng duh reuh bawk si a," Muana chuan intihre chiang àwm deuh hian a ti a, ka en deuh reng phawt a, chutah,"Ka bialnu a ni lo, kan inkârah chutiang a awm lo hrim hrim, hria maw? Eng mah a awm lo," ka ti charh charh a, maimichhîngin Remruati hmel chu ka mitthlà vang vang a, ani hi zawng, a pa nihna ațang ringawt pawh hian a bialpa nih pawh ka qualify lo hrim hrim, min duh dâwn loh mai bâkah ani nungchang 'inno' lutuk leh kei mi sual ve tak hi...thil theih a ni lo.

"Duhlaii nèn in ințhenna pawh a rei ve tawh alawm, nei ve tawh la? I neih loh reng chuan Duhlaii pawhin amah i duh lutuk vàngah a ngai mai dâwn asin, ni dâwn lo'm ni?" Mapuia'n a tih chuan dik thei dâwn riauin ka hria, ani chuan Joseph-a a kawp nghâl chat a, kei hian ka la nei ve lo, ka duh viau angah chuan a lo ngai tak tak ang em le? Hei vàng hi a ni mai lo'ng maw min la beisei deuh tlat reng ni? A ni hauh si lo, ani kher hi chu ka duh tawh lo hulhual, țapin min ngèn ngawih ngawih mah se ka duh tawh chuang lo ang.

Ina ka haw chuan a la hma deuh bawk a, ka nu pawh a lo la meng reng. Ka rùi vak lo bawk a, ka nu pawh chuan min hau miah lo nia. Ka pa erawh a lêng chhuak leh a ni ngei ang, ka nu khawngaihna ka nei deuh thut a.

"Nu, mu tawh la, ka pa chu nghah kher a ngai nâng, a lo haw hunah a lo haw ve tawp mai dâwn alawm," ka ti a, hetia zàna a lêng a lo nghâk țhìn hi ka khawngaih tlat, amah chauhin a nghâk țhìn bawk si a, kei lah ka chhuah loh leh ka room lamah ka tawm bo ziah mai bawk a, amah tëa a nghâk kar reng țhìn hi ka lainat tlat a ni.

"A lo haw țêp tawh ang, bâkah, ka mut pawh a la chhuak lo," ka nu chuan a ti a, ka pa chanchin hi ka hrilh vek mai dâwn em ni ang? Rah țha a chhuah ang em? Nge, an inkâr a khîk phah ang? Thil țha lo zâwk hi a thleng thei mai lo'ng maw? A rilru a hrehawm nasa dâwn si, Mami vàngin a rilru a nâin a hrehawm êm êm tawh a, ka pa vànga a nat belh leh chuan a tuar zo lo mai ang.

Ka mu hlûn tawh tihah chuan Remruati'n min rawn bia a, meng mang hlei lo chuan,"I va meng rei ve! Nula tân zàn men rei a țha hleinem, i hmai a bawl țeuh mai ang," ka ti a, ani chuan," Ka meng rei vak lo, zanin chu ka helhawlh a ni ang, naktûk ațangin class kan kal țan leh tawh dâwn sia," a rawn ti a.

"Class kal i va phûr ve!!" ka tih leh chuan,"Ni tin ka hmu leh thei dáwn che alawm, chuan, kan tih tùr pawh kha kan ti pah ang a, hma kan sâwn chak viau dâwn asin," a rawn ti ve leh a, chutah,"Ka hmuh khàt che hi chuan ka ngai tlat che alawm, chuvàngin, class țan thuai thuai hi ka châk tawh a, thil țha deuh hmuh tùr che ka nei bawk a," a tih chhunzawm leh zat a.

"Hmeichhe lam thil em ni? A nih chuan, min hmuh lo mai rawh, ka hre lo," ka lo ti vat a, khua a vâwt a, phone chu ka bengah dahin ka kut chu rizai chhûngah ka kuangkuah thãn thung a, rawn nuiin," I hmuh leh hriat hma hauhin hre lo niin i inngai maw? Hmu ve phawt la maw le, naktûkah ka hmuh ang che, i pawimawh dâwn lutuk a nia," a rawn ti leh a.

A tûkah chuan hmeichhe pakhat thlalâk hi min hmuh a, korean lam hmêl pu deuh leh sam eng lam deuh a ni tih ka hria, a hmel pawh a țha, a áwmbâwr erawh ka duh ai chuan a té mah mah!

"Tu nge a?" tia ka zawh chuan," Ka hre bík lo," a lo ti mai a, a bag chu a zen ngar ngar a, a hmu chuang lo a ni ang, zu zenin a hai țha leh a. Eng thil nge maw a zawn ni?

"Eng atân nge thlalâk hi mi  pêk si? A âwmbâwr a tê si," ka ti sup a, ani chuan,"A sam kha, khatiang khân ka ti ve châk a, college ka chhuah veleh hian  tih ve ka duh a, eng nge ang i tih? I mawi tih zâwng a ni ve em? Ti ve ta ila, miin 'Pastor fanu ve si, a over e' min ti ang em?" yiin zawhna min zâwt duah a, a thil zawn chu a hmu ta a niang, a rawn phawrh chhuak a, samțawnna dum ni maiin ka hria.

Thlalâka hmeichhe sam rawng chu ka en leh ta rih a, a eng uk deuh kharh ni berin ka hria. A eng ti ringawta sawi chi pawh a ni lo, a hmelțha reuh bawk a, a inhmeh khawp mai.

"Mi sawiah buai suh, i duh leh châk zâwng tak i tih khân i hlim a, chu chu a tâwk chiah. Ti ngei ngei rawh, i inhmeh ang."

A sam țâwn mawlh mawlh chung chuan," Ka inhmeh tak takin i ring chiah maw? A mawi a ni tiraw? Hmân ațanga ka tih ve châk tawh a nia," a ti leh bawrh bawrh a, a sam țâwn chu ka lo en reng a, tûn ang huna sam han țàwn tâk tlat mai chuh, ni lang mah se, khua a lum hran lo va, ni sa hnuaia awm loh phei chuan thlasik hun lai a la ni bawk nèn, a la vâwt ve riau asin.

"Ka thil ei vàng khãn lum ka ti up up mai, i ni ve tho em?" tiin min rawn en a, chutah,"I ti ve vak lo a nih kha, a lum lutuk êm mai!" tiin a notebook la chhuakin a inzâp hauh hauh a. Ei tùr a rawn pài kha a thak deuh sek a, kei phei chuan kha ai khân thak deuh țhak se ka ti. 

"Ti lêm lo."

Thil dang sawiin Mami chanchinah kan lût a, chutah, hre chhuak thut ni àwm tak hian," Ka tel lovin, ka awm loh remchàn lai takin Lungleiah i va zin a,"a ti ta nghâl a, kei chuan,"Nia; mahse, i chhûngte bulah chhuanlam siam tùr a vâng dâwn êm asin," ka lo ti thung a, ani lah chuan," Chhuanlam siam kher a ngai lo, thu dik kan hrilh mai dâwn alawm, dâwt sawia chhuanlam siam kher zël a ngai hleinem," a ti leh zêl a.

Class kan kal țha bawk a, Mami chanchin pawh kan chhui hman leh ta rih lo; mahse, ka theih ang tâwkin a lehkhabu hlui ka hai kual leh a, Remruati tibuai tel kher lova chhui bek bek ka duh, thu dik chu laihlan lohin a bo mai ka hlau a ni, bâkah, ka beidawn loh nân intuai thar zauh  zauh ka mamawh a ni.

Mahse, chuti chung pawh chuan thil pawimawh tùr nia ka rin ka hmu chhuak chuang lo, Pathian lam hi hawi lo viau mah ila ka chhui chhuah a phal lo a niang tih ngaihtuahna ka nei fo mai. A chhan chu chhui dàn tùr a tàwp deuh tawh ni maiin ka hre deuh tlat a, ka hmuh duh tak takte ka hmu chhuak vek tawh a, Pápâri pasal Lalhriata lah a rinhlelhawm vak chuangin ka hre lo; mahse, vawi khat tal chu a awm lai ngeia va tlawh leh ka duh a ni. Remruati pawh a tel ve thei tawh ang a, thlim angah a inngai tawh lo ang chu.

5th sem result chhuakah pawh chuan ka rin aiin ka tițha ve chuan ka hria. Remruati pawh lehkha a zir nasa thei bawk a, a tițha, kei ai mahin a tițha zãwk. Zir nasa na nâ nâ chu a hriat deuh e .

Zan khat chu ka nu leh pa inhau rî ka hre tlat mai, inhau lo se ka ti asin. Kan in chhûng hi nuam êm êm lo mah se a reh raih khân a râlmuang ve ka ti a, induatna țawngkam pawh ni lo, inhau ri kher hi chu hriat tam loh ka duh tawh, ka ning ve tawh a... Keimah vàng a ni leh pek ang em?  Mahse, tûnlai tak hi chu ka fel ve lai tak a ni sia, ka hre thiam lo kher mai. 

Mahse, an inhau rei vak lo a niang, țawng thâwm ka hre rei lo. Chhûngkaw fel, inpawh tak leh  inhmangaih tak ni lo mah ila, inhau ri hriat ai chuan hriat loh ka duh. Ka nu phei hi chu hetiang dinhmunah hian ding lo se ka ti, a rilru ka vènthàwnpui avàng liau liauin ka pa ngaihzâwng neih pawh ka zêppui ni hran lovin ka sawi chhuak duh lo a ni si a.

*******

"Hawh, kan hma lawka Republic day lo thleng tùrah hian zin tawh ang, Republic day-ah Lungleiah kan phei ang a, a tûk Inrinniah kan haw phei leh mai ang a," tiin min sâwm a.

"A la hma êm mai a," ka lo ti hmuk a, ani lah chuan," Hma viau emaw kan tih chhûngin hun a ral leh duak mai ang, class țhulh ngai miah lova Lunglei kan kal thei tùr chu ka phûr viau asin, kan tân a zia ve ve zui, ruahmanna chu kan siam thei a, a hlawhtlinna lam erawh chu Pathian thu thu ni se," a lo ti duah thung a.

Kan pahniha kan awm dun tawh phawt chuan Mami chanchin kan sawi loh leh Lungleia kan phei hun tùr chu a sawi chàmchî a, a phùrzia chu a titi ațangin a hriat theih viau a ni. Keiin Pàpâri hnên ațanga Mami chanchin ka hriat zawng zawng chu ka hrilh ve thung a, ngun takin, maimichhîng chungin  a lo ngaithla a, zawhna min zâwt zauh zauh bawk a.

Lalhriata kan tih leh Lungleia Lalhriata hi mi thuhmun lo ni ta se, Pàpâri hian a nei duh kher ang em? Mami sawi Lalhriata kha tuna kan hriat ve Lalhriata hi lo ni ta se, eng vàngin nge a huat viau? Kan huat nazawng hi 'Thisâwn rawh' kan ti ngai miah lo, a eng pawi nge a sawi ang le? Lo ni lo hlauh se ka ti kher mai. Buaina eng emaw tak a chhuak ngei àwm si a, mi nupa kâr tihbuai chu a malsâwm  lo viau a ni.

"Kan phei hunah Pàpãri chu zawhna tam tak zawh tùr ka nei a, min chhàn dàn azirin thu dik leh thil țha lo titu chu a hriat theih maiin ka ring, ka zâwt uluk nasa dâwn si a," nui duh miah lo chuan a ti a, kei erawh chuan a zawhna ațang ringawta chu mihring thil sual titu chu kan hriat chhuah theih ka ring lêm lo, tûn hnaiah chuan.

Zàna min rawn biak chuan," En teh, ka ngaihtuah ka ngaihtuah a, Lalhriata hian a sawi chhuak duha amah hian inrawlhna a neih chuan mantîr ngei i tum ang em?" a rawn ti a. Chu chu ka lo ngaihtuah ngai miah lo, Mami chungah khân thil a tisual ve ngei a nih chuan dànin a hrem ngei ang chu, a bul tumtu ber ka hre chhuak thei ang em? Lalhriata hi Mami huat Lalhriata kha a nih ngei chuan Mami chungah khân eng emaw tak chu a ti ve ngei tih a hriat mai, a țawng duh chuan kan hriat duh tam tak a hre ngei ang.

Mahse, thil rêng rêng hi kan ngaih anga awlsam hi a lo ni vek bîk lo va, Remruati nèn chuan kan va kal ta ngei a, Pa Hmingate inah kan va thleng leh a, an lo fel leh khawp mai. A tìrah chuan kan inru emaw an lo ti a, an sawi chhuah hnuah Remruati chu sen țân chungin a nui hawk hawk a.

Pàpárite inah pawh chuan kan lêng leh ta ngei a; mahse, vanduaithlâk takin an pa chu a lo zin chhuak leh tawh. Driver a ni a, inah a awm tam hman bîk lo a lo ni, keini aiin Pàpâri chu a upa daih zâwk si a, kei phei chuan zawh tùr ka hre tawh lo, amah nèn lama ringhlel hmel pua thil zawh kual chiam chu nuam ka ti lêm lo a ni; mahse, Remruati'n a kàwm thiam a, zawhna pawh a záwt ngun; mahse, ani hi chuan eng mah a hre ve lo tak tak a niang, a hmaa ka zawhna a chhàn ang tho khân a chhâng ve tho. A hnu deuhah phei chuan a ringhlel deuh nge ni," Mami chanchin hi chîk zet zetin min zâwt a, ani lah a boral daih tawh si a, eng vàng nge tih ka zâwt thei che u ang em?" a ti ta hial nghe nghe a.

Ka chhàn hma chuan Remruati chuan,"Eng vànga khatianga awm chho nge a nih kha kan hre duh deuh a; mahse, kan hre chhuak chuang lo a nih hmel, nang, rin dàn i nei em? "tiin zawhna chu zawhna vêkin a chhâng lêt a, Pàpâri chuan," Damdawi chungchâng kha maw? Kei pawhin mak ka ti tàwp thei lo alawm," a lo ti leh mai a, zawhna a chhàn dàn ațang hi chuan eng mah hre lo tak tak a ang, a pasal lo awm lo erawh pawi ka ti.

A tûkah chuan Lungleia an in luah țhinna hmunte chu ka fanpui a, ti ila min fanpui a ni mah ang chu, a titi barh barh reng a, Lungleia an awm țhin laia a hlim țhinzia leh țhian pawh a ngah theihziate chu a sawi barh barh a, kei pawhin ngun takin ka lo ngaihthlâksak a, titi hi chu nuam a ti ve barh barh ngawt mai, hmeh pawh a inhmeh thlâwt. Ngawih reng hi chu a zia a ni tlat lo, a ngawih ve chuan boruak a dang vek, nawm pawh a nuam lo.

"An cook pasal fanau nei tawh zawk, kha mi pasal kha a rinhlelhawm ta ber ka ti, Lalhriata hi chu lo inrawlh ve pawh ni se, sihal tar a ni thei lo. Eng emawah a lo inrawlh ve zauh pawh chu a ni thei tho; mahse, a bul ber a ni thei lo. Mi puitling tawh, mi pawh vaubet thei a nih a ngai, chutiang chu khatih lai khân Lalhriata hi a la ni lo, chuvàngin mipa dang, pa lian leh puiltling tawh kan dap a ngai," a rawn ti leh daih a, nichin lawk khân an in luah țhin hmun hlui chanchin kha a sawi mawlh mawlh sia, tunah lah thil dang daih a rawn sawi leh tawh a!

"An nu nèn an ințhen tawh kha a ti sia, zawn hmuh a har tawh àwm e, a hming lah kan hre si lo," ka lo tih chuan," Maithei; mahse, hun kan la ngah e, dam hi han hauh phawt ila," a lo ti leh a, a thil thlìr dàn chu tluk lo ka inti ru kher mai. Hmeichhe âwmnêm ve mai ngaihtuahna pawh ka phâk lo chu a ni si a, nêp ka inti lo thei lo, ka beidawn deuh lek lek hnuah pawh  ani lah chu a la beidawng ve hauh bawk si lo.

"Mizoram hi a zïm alawm, kan tum phawt chuan kan hmu thei êm êm ang, an nu hming kha ka hria a, zawn zawn chuan kan hmuh hun a awm ngei ngei ang," a ti leh a, zawng hmu ta pawh ni ila engtin nge zawhna kan zawh ang? Engtin nge, engtin...chutiang hlîr mai chuan ka ngaihtuahna a luah khat a, tuna lo ngaihtuah buai chiam hi a sâwt miah lo tih lam ka ngaihtuahnaah a lang miah lo lehnghâl.

"Cook pasal chu thil sual titu a nih phawt chuan a hmel leh mitmeng ațangin a hriat theih ngei ngei ang, țawngkam chuan dâwt sawi thei mah se a mitmeng a daw ve thei dâwn hleinem, kan zawn hmuh hunah kan hre mai ang," a ti leh a, kan innghahna tê chu a va derthãwng si êm!  Thil dang han ngaihtuah chhuah tùr  lah chu a vâng hrep lehnghâl a.

Pa Hmingate in lam pana kan haw dâwn chuan," Saw nu saw i hmu em? A en duh nasa che a nia, a star chiang mai che," a ti sar sar a, ka nuih a tiza  reuh khawp mai. A mitin a melh ralh lam chu ka en ve a, hmeichhe tleirâwl pahnih hian min lo en reng niin, pakhat chu Pa Hminga fanu a lo ni nghe nghe a, ka nuih sak a.

"Eng nge i tih ve a?" tiin ka au a, ani chuan zak deuh tih hriat tak hian," Hei, ka țhiannute inah hian ka kal lawk a, in haw dâwn tawh em?" a lo ti a, kei pawh chuan," Aw, haw dâwn e, kan insiam ang a, kan haw nghâl mai ang," ka ti a.

*MAHNI LAM INENFIAH TUM HAUH LOVA MI DANG THIAM LOHNA KAN HMUH LENA KAN SAWI CHHUAH FO CHUAN KAN BULA MITE TÂN CHÈNPUI NUAM TAK KAN NI THEI NGAI LO ANG*