☆EARTH ANGEL☆ - 18 By Dingdi Pachuau

 ☆EARTH ANGEL☆ - 18 By Dingdi Pachuau

Kan hmanhmawh lêm loh avàngin chawlh a duhna hmun apiangah ka chawlhpui a, thil ho tê tê a sawi peihin a hlimpui thei a, kawng bula pangpâr lo pâr mawi deuh a hmuhin ding meuhin thla a lâksak ziah a, a chângin amahin a lâkpui bawk a. Lo hmutu an awm phei chuan an en duh thei khawp mai, ani erawh chuan engah mah a ngai lo, pangpâr mai mai pawhin a tinuiin a tihlim thei chu a ni tak si a, a nun hi a awhawm ka ti ta phian mai.

"Kan kal leh theih hun tùr kan hre lo, chuvàng chuan chawlh lawk ka duh," Hmuifâng kan thlen chuan a ti leh mauh mai a, hnial ka tum lo. A duh duh dàn hian awm teh se, a hlim hmel hi a hmuhnawm ve alawm, a hlimna a ho si a, vawiin chu hlim êm êm phawt mai teh se.

"En teh, kan inkawm rei ve tawh nèn, thla hi kan la dùn khât tiraw? Vawiin chu hmet țeuh teh ang, țawng thu chhe lovah, khawhar puala tàr lan tùr thlalâk kan nei tam deuh dâwn tihna a ni mai a," tiin a nui hak hak a. Nuihzatthlâk pawh ka ti lo, tunah hi chuan thih hi ka duh tawh lo, hmalam hunah tih tùr ka la ngah lutuk. Mami lahin zir chhuaka hlawhtlinga mahni inchãwm thei ngei tùrin min duh bawk, chu thil chu tihpuitlin ngei ka tum a ni, a duh ka tihhlawhtlinsak theih awmchhun a ni tawh hial ang chu.

"Chutiang sawi suh, kum za dam thlen kan tum ang chu," ka lo ti a, ani chuan a bula thing hnah tliang deuh hlarh chûl hliau hliau chung chuan,"Țawng thu chhe lovah ka tih reng kha, nia, rei tak dam tùra hna thawh chu a ngai tho alawm; mahse, naktûka thi tùra kan inbuatsaih pawh a ngai tel tho bawk," a lo ti duah a.

A chângin a naupangchhia viau a, a chângin thu puitling leh dik deuh deuh hi a sawi  chhuak leh khauh țhìn bawk. A naupanchhiatna a lo lan châng hian ka làwm viau a, a puiltinna a lo lan châng erawh hi chuan ka zah thar thut țhìn thung. Kei aiin a naupang tih ka hria a; mahse, chuti chung chuan a châng chuan ka u en lek lek fo, a thil sawi hi a dik thei țhìn êm a, ka namnùl ngam bîk lo a ni.

Thla chu a la deuh reng a, a chângin," Lo hawi lawk teh," a ti a, a chângin,"Aw, tikhán, ding rih lawk teh," a ti leh bawk a, vawiin zet chu ka tih ngai miah loh, hmeichhe thu thuin ka'n awm tâk chu, ka țhiante phei chuan min hmu ang tih hlauhawm tak a ni, min fiam nasa viau ang chu; mahse, ka țhiani tê hian a hlim phah êm a, ka sawisèlsak duh lo a ni.

Kawnga kan muangchàn avàng chuan Aizawl kan luh meuh chuan a tlai ve tawh viau mai a; mahse, a chhûngte hnênah kan thlen chin a hrilh deuh reng avàngin an rawn ngaihtuah hran lo tùrah ka ngai. Kei chu mipa ka nia, bâkah, ka haw tlai hrât a, ka nuin engah vak a lo ngai lo tawp ang.

An in thleng ka thlah a, lût ve rih tùrin min ti a, rei lo tê chu ka țhu ve, a chhûngte chuan min lo be liam liam a, ţhu rei lo chuan ka haw ve ta thuai a. In ka thlen chuan ka nuin min lo chhàwn ve vat a, ka zin dâwn tih kha ka hrilh ve teh tlat si a, ka hun hman dàn, nuam ka tih leh tih loh min lo zâwtin  Pa Hmingate chhûngkaw dam leh dam lohte min lo zâwt ve vat a ni.

Ka pa pawh a lo țhu ve reng tawh teh  khiah a! Min lo be ve hran lo, melh erawh min lo melh ve zawk.

Zànah Remruati'n vawiin lama kan thlalãk dunte chu min rawn thawn a, làwmthu rawn sawiin," Vawiin khán i tân ka lo ninawm viau ang tih nichín deuh khân ka ngaihtuah chhuak a, eng mah sawisêl lovin ka duh ang ang khân i awm ve mai a, kha vàng khân ka láwm hle a ni. Vawiin khân ka hlim viau bawk aw, i zârah liau liau kan lo chèn tawh țhinnate ka hmuh leh theih phah a, i țhian atân khân min lo pawm duh lo ang tih hi ka hlau hnuhnawh tak tak a ni," a rawn ti duah a.

"Sawi duah țhin lo teh! I chau em?" tiin thil dang ka sawipui ta nghâl daih a. Kawng a thui tham a, two-wheeler chungah lehnghâl, kan inphur zui a nia, a chàuvin a rawl ve viau maithei a ni.

"Ka mal hi tlêm tê chuan a kham ve deuhin ka hria, ka hlim êm kha, ka hlim chuan ka chàu ve ngai hleinem," a rawn ti leh mai a, nia, a hlim a, chauh pawh sawi lovin, titiin a zuang a, a chângin a tlãn titih pah bawk a, kham ve deuh leh rawl deuh lai chu a nei ngei ang. Amah vêk chuan," Tuilumin ka inbual a, tunah phei chuan ka mu diai tawh nghe nghe, ka nuin mu hma tùrin min tia; mahse, kan thlalâk kha i duh ve ka ring deuh a, ka rawn thawn leh rih che a nih hi," a rawn ti leh a.

"A mawi hlawm viauin ka hria," ka ti ve a, chutah," Nia, mut hma hi a țha, naktûkah chuan i rawl țhûm maithei a nia," ka ti leh a, rei pawh kan inbe ta lo, kei pawh zan dang ang lo takin ka meng rei bîk lo, Mami dam lai mitthlà rauh rauh pah chuan ka muhìl ve ta thuai a. Ka mumang lamah Mami ka lo la hmu zui a, ka biak mawlh mawlh pawhin min lo chhâng duh miah lo lehnghâl a, ka lo ko nasa kher asin. A hminga ka ko ka lo țang nasa bawk si chu ka țhangharh phah a, ka muhìl chhunzawm thei mai tawh lo lehnghâl a, khumah mu chungin ka meng kar reng ringawt.

'*******

"Roddick, i dam maw? Inhmuh a va khât ve le...!?"

A aw ațang chuan tu nge a nih ka hriat nghâl avàng chuan ka ner deuh sak a, inhmuh hi ka duh tawh lo asin. A bialpa nèn kan la inhmu thiam lo zui a, chu chu ani pawh hian a hre chiang khawp ang chu, Joseph-a'n hrilh nuam a ti dâwn êm asin.

"Khàt loh hi," ka lo ti mai a, duh aiin kan inhmu zing mah mah zâwk. Kawp ka ni tih ka inhriat ațang khân hmuh tawh miah loh hi ka duh zâwk a! Ka tlâwm hliah hliahin ka inhre tlat a ni. Mipa dang nèn min han kawp duh a nia...ngaihtuah thui lo teh zâwk ang. Mipa țha leh fel ka ni hauh lo mai; mahse, bialnu ka neihin ka kawp ve ngai hauh lo.

"Khawnge i mei hi, ka va hmu ve lo ve..!" a han hawi kual vêl a, Remruati a sawina a ni tih ka hre chiang a, chhàn pawh ka tum lo, ani lo hriat ve zêl pawh a ngai lo.

Vawiin chu Remruati class a rawn kal lo, an chhûng hnai takah innei an awm a, a hmain min hrilh daih tawh a, class țhulh a hreh viau nain a țhulh ta tho a ni. Chawhnu class ka awm tluan peih ta bîk lo va, tunah tak hi chuan ka lo awm tluan lo kha ka inchhîr ta deuh tlat, Rinawmi ka la hmuh phah zui, ka luck lo takzet.

"Roddick, keimah vàngin Joseph-a nèn in inhmuh thiam loh phah a, pawi ka tih rualin i nunah awmzia ka lo la nei tih ka hria a, ka hlim zâwk phian asin. Joseph-a hi chu nangmah runluih nâna ka kawp mai mai a nia, ka duh tak tak teuh lo, ka duh ber chu nangmah hi i la ni reng asin," a tih chuan ka en reng ringawt! Ka nuih pawh a za zâwk hial, a lo inngaihlu lutuk chuan ka nuih a tiza lo thei lo. Tuna a thil sawi kha Joseph-a bulah a sawi ve tho ang em? A mipa duh deuh apiang bulah chuan khatiang khân a sawi ve ziah tihna em ni? 

"Ka lawmpui che!" Ka ti-el a ni tih a hriat loh chuan hmeichhe mãwl tak a ni ngei ang! 

"Remruati kha i ngaizâwng lo tih ka hria, ka thîk theih nân ka hmuh laiin i fâwp lui mai mai a nih kha, chuti khawp chuan i lakah hian awmzia ka nei a ni," a lo ti ve thung. Sawi tùr hre lo chuan ka en reng ringawt a, a sawi zahve zet hi thu dik a ni tlat a, Remruati hi ka bialnu a ni lo miau alawm le! Mahse, ka laka awmze nei anga a insawi erawh hi chu dâwt chiangbal a ni thung.

"I sawi zo tawh ang chu maw?" tiin ka ding ta nghâl a, ani pawh rawn ding chhuak ve nghâlin," Vawiin chu min thlah rawh aw, thlah tùr i neih chuan loh hi," a rawn ti ve zat a, ka lu ka thing nar nar ringawt. He nu hian zahna a pianpui ve miah lo tih tunah hian ka hre ve chiah, min duh vàng pawh ni lovin zahna a neih loh vàng mai mai a nih hi.

"Kalna tùr dang ka la nei," tiin ka kal sawn ta nghâl a, ka thil ei man ka pêk lai chuan ka bulah chuan a rawn ding ve a, min zui a tum loh ka beisei. Hmeichhe âwmnêm zâwkte bula țawngkam mawi lo hman hi chu ka duh lêm lo; mahse, a awm dànin ka ngaih dàn a pèl a nih vaih chuan ka duh loh thil pawh ka ti mai a ni ang chu.

Mahse, chu êm chu a thleng ta bîk lo ve. Pâwna kan chhuak chiah tihah chuan hmeichhe pakhat, mahse, a inchei dàn leh chezia hrim hrimah pawh hmeichhia nihna lang tam lo tak mai hian a rawn ko ta a, a aw pawh a pà miah lo! 

"Tluang, scooty i rawn keng chhuak em?" tiin Rinawmi chuan a be vat a, engtin nge an inchhàn zui zêl ka ngaihtuah tawh lo, Dusty ka dahna hmun chu pan vatin ka tlãn chhuak ta nghâl a. 

Zànah Remruati chuan min rawn bia a, vawiin lamah ka khua a har em tihte min rawn zâwt chûl a, nui chung hian," Ngai viau turah che min ngai ziah suh, ni khat chauh lehnghâl," ka ti fiamthu a, ani chuan," Ni khat chauh pawh ni se, kei chu ka khua a har thei lutuk! Vawiin phei chu mi an tam sia, ka lu te hi a na lûk mai, boruak kha ka zo lo a nih ka ring," a rawn ti leh a, chutah," E, vawiin chu maw, ka cousin make-up artist thiam ve tak maiin ka hmai a chei a, min chei zawh hnua dârthlalanga ka inen chuan keimah kha ka ni ta lo emaw ka tia, ka inhai țêp a ni," a rawn tih chhunzawm nghâl a.

"Chu, i nalh lutuk a, i inhai tihna a ni maw?" ka lo ti vat a, a thil sawi hi a rûk tak chuan ho ka ti; mahse, a thil sawi rëng rêng hi ka sawisêl ngai lo, dawhthei takin ka lo ngaihthlâksak ve mai țhin, hei vàng pawh hi a ni mahna min ngainat ve êm êm ni.

"Ni ang chu. Makeup-in hmel a tihdanglam theihzia ka hre chiang lehzual a ni, ngawi lawk aw, ka thlalâk ka lo thawn mah ang che, nang pawhin min hai ve tho ang," a rawn ti leh mawlh mawlh a, chutah, rawn nui ar arin," Lo ngaizâwng miah suh aw, a chhe lo si a, Whatsapp  message  kha en rawh le," a rawn ti leh a.

A sawi dik khawp mai! A sam ka en hmasa ber a, a cousin chuan a sam inhmeh dàn tùr chu a hria ka ti, a siam rei ve viauin ka ring. A hmel ka en thuak a, a hmui ka en thla leh nghâl, a sen mawi tâwk viau, chutah, en chho lehin a mitah chuan ka tàwp ta chat mai! A mit a cheisak dàn chu a inhmeh thlâwt ka ti! Hetiang hian engati nge a inchei ngai miah loh ni! Ka hmu ngun ve viau tawh a, makeup hi a hmang a nih pawhin a hmuiah lip gloss a hnawih chauhin ka ring, makeup hman a inhmeh hle si, hmang ziah tawh teh se! A nghâwng chin ang deuh chauh thlalâk a nih avàng chuan,"Thlalâk dang lo thawn teh, mo i lâkpuinate pawh, hmuh ve pawh an châkawm alawm," ka ti ve zaih, a inchei dàn, a thawmhnaw hâk ka hmuh duh vàng a ni, formal taka a inthuam ka la hmu tlat lo, thawmhnaw lian hliap hluap nèn ni lo, mawi taka a inthuam lai ka hmu châk.

Min rawn thawn ve mai bawk a, ngun zet hian ka en vang vang a, a thawmhnaw hâk rawng chu a inhmeh kher mai. A sen lãr țha hle mai a, a kawrbân chu a tawngchham reuh viau a; mahse, a bân ngo zet chu a tilangsàr khawp mai thung. Hetiang tak hian a lo ngo reuh a ni tih ka lo hre miah lo nia! A thawmhnaw chu a taksa rem zaiha țhui niin a khûp hnuai deuh chiah thlenga fual a ni a, pheikhawk sâng mawi tak a bun bawk a, a pheikhawk ai mah chuan a chàwn lang chuan ka mit a la leh bawk!

Mak ka ti a ni! Engtin nge heti taka nalh thei si hi, a inchei ngai loh ni? Thawmhnaw lian pui pui hain, a sam a thlah tawp a, a hmai a bawl deuh ţhin avàngin ka thlêk ngun ngai lo a nih ka ring ta, dik taka sawi chuan a vun a ngo a ni tih pawh hi ka lo hre miah lo! Mahse, hei, a lo ngo hle si, a hmai hi langsàr lai ber a ni a, a bawl țhin avàngin a lang ngo lêm lo bawk nèn, a awm ve tho mai. A hmaia makeup hnawih a nih meuh chuan a hmai bawl pawh a lang miah lo a nia. He nu hi a lo hmelchhe miah lo, a kawr nghâwng chu a zau lêm lo nain a kawrin a khuh loh china a vun nozia mawlh chu...

*Ka kawr hâk kha a bân a tãwi lutuk a, ka ha duh lo va, min hâk luihtîr a nih kha*  tih message a rawn thawn a. Engah nge maw a hâk duh loh mai mai ni? A inhmeh hlê si, a inhmeh takzet, a hâk atân liau liaua țhui ni tùra mawi a ni. A țhuitu pawh hi a inchhuang ve ngawtin ka ring tlat, a hatuin a ha mawi êm mai.

*I inhmeh, i cousin chuan a chei mawi hle mai che*  tiin ka fak a, ka rilru tak tak ka sawi a ni. A makeup chu thuhran, a pian rêng rêng pawh chu a lo nalh hi ka tia, a kâwng a fêk reuh si, a mawngbâwr a lian leh laih bawk si a, dik tak chuan zanina a thlalâk ka en ațang chiah hian a pian dik tak ka hre chhuak ve chauh a ni.

*Mo kha ka nutei fanu a nia, kan inang i ti ve em?* a rawn tih leh chuan thlâ a lâkpuite, mo leh a țhiannu chu ka lo la en ve hauh lo tih ka hre chiah! Amah hlîr ka lo la thlêk char char niin.

*Ang ve deuh a nih hi*  ka ti ve ringawt, mo chu ka han en chiang a, inang pawh ka ti hran lo, Remruati a tluk lo êm mai. Ani phei chu mo a nia, an chei nasat dâwn tehrêng nèn, chuti chung pawh chuan a tluk ka ti chuang lo.

*Inchhangbung emaw min ti fo asin*  a rawn tih chuan *A tluk lo êm mai che*  tiin ka chhâng hmiah. A tluk lo alawm, hmaifangah pawh a tluk chuang lo, ngo lamah pawh Remruati a ngo zâwk.

Mut hmunah pawh chuan Remruati thlalâk mawlh chu ka thlêk reng mai. Engtin nge heti tak hian a lo inthup theih ni ka ti lo thei lo, makeup artist thiam takin chei pawh ni se, a hmaifang chhe lo tak hi engtin nge ka lo hmuh hmaih theih, nge Rinawmi vàng khân hmeichhia hi ka lo phêk ena hmeichhia an nihna angin ka lo en ngai ta lo em ni zâwk? Naktûk ni thuai thuai se ka ti ta khawp mai.

A tûkah chuan dàn pângngai têin College ka thleng chiah chu min rawn pan leh nghâl zat a, nui sen sen chung hian,"Vawiin chu i mal ta lo ve," a rawn ti a, chhâng lovin ka lo en ringawt. A hlim nui hmel hi chu ka hmu fo; mahse, tunah tak hi chuan ka țhian kawm țhin nui hmêl ang ni lovin mipain hmeichhe nui hmêl a en angin ka en ta tlat!

"Kha, min lo ngai hman chiang viau a nih kha, min ngai lo ni la khati vung vung khân min en lo ang. Lungngai suh, ka chàwl tawh dâwn hleinem," nui chung bawk hian a ti leh a, ka hmai bulah chuan a kut chu a rawn vai a.

A kut chu mansakin,"Ka chawlhsan ve hunah che i hre ve mai ang," ka ti a, a kut chu thlah duh lovin ka vuan ta reng a, class lam panpuiin," Niminah i kal si lo va, note i copy nual a ngai dâwn a nih kha," ka ti a, ani chuan," A, nizànah ka copy vek tawh, ka rang i ti viau lo maw?" intihtheih hmel deuha sîr zâwnga min rawn en pah chuan a ti leh zârh zârh a.

"A ni maw? Tu hnên ațangin?" ka tih chuan," Sir hnên ațangin maw le, min duhsak ve a, a fel ka ti teh a nia; mahse, tlangvâl a la nia," nui hak chung hian a ti a, ka en vat a, ani erawh chuan hmalam enin," Upat pawh a la upa lo, kan semester hmeichheho chuan chhe lo an ti thei râp maw le, kei pawh ka bãng bîk chuang lo va," nui chung vêk hian a ti leh sar sar a, a țawng a tihzawih deuh avàng chuan a thil sawi chu mi dangin an hriat palh a hlau a nih ka'n ring ve ringawt a.

"Chhe lo hi i hre thei ngawt mai," tiin a kut ka vawnna chu ka thlah a, ka thinlunga eng emawin hna a rawn thawh chu ka duh lo kher mai, eng nge a nih lah ka hre chiang khawp lehnghâl a, duh lovin ka âwm zâwn chu ka nem deuh nawk nawk a.

"He khawvêl, ni leh lo, Mizoram a ni zãwk ang chu, he kan Mizoram zïm têah pawh hian chhe lo hi an lo tam êm a lo nih hi." 

Ka bânah chuan rawn vuanin," Mahse, i țha ber aw, nang hi chu ka țhian kawm ngeih êm êm kha i ni tlat a, ni khat lek i bula ka awm loh pawhin ka ngai che a nia; mahse, hmêlah erawh Insomnia-a i tluk lo deuh hlek thung a," a ti a, rawn hawi chhoin a nui leh sen sen a. Ka en zawk a, ka hmalam ka en leh ta vat zâwk!  Vawiin chu ka dik tlat lo, ka țhiannu hi mipain hmeichhia a en angin ka en tlat, ka bân min vawnsakna pawh chu ka taksa hian a hre khawp mai, ka thinphu lah chu a lo su dup dup bawk a, nuam a tih vàng nge phei chu ka hre lo, a phûr ru viau a ni tih erawh ka hre thung.

"Ka țha daih zâwk!"

A nui ta hawk hawk a,"A țha! Mipa confi hi ka ngaisâng teh a nia," a ti leh a, nghet zet hian ka bân chu a vuan pah bawk a. Ni dangah pawh min vuan fo a, engah vak ka ngai ngai lo; mahse, vawiin zet hi zawng, ka taksa hian min deh hlekna lai pawh a hre chiangin a lo welcome phûr hûrh hûrh viau a ni.

Class kan kal chhûng pawh chuan lecture ka ngaithla thei rêng rêng lo! Ngaithla ang deuhin ka awm a, sir pawh ka en reng; mahse, ka ngaihtuahna chu hmun dang daihah a awm, ka mitthlaah lah chuan Remruati hlîr mai chu a lang zut mai a, he nu hi ka ngaizâwng ta thut tihna em ni ka ti hial! A ni lo ang, a theih loh. Ka ţhiannu a nia, a țhianpa ka ni bawk. Chutiang chuan ka en thei lo ang, amah pawhin a duh hek lo ang, vawiina ka en dànte kha hre ve thei ta se, min hlau viau maithei a ni.

Chhùn chawlh hunah pawh chuan ka lo en leh vung vung țhìn, ani erawh a  titi leh siam siam tawh a, a țawng zâwnga a hmui a tisàwi țhinte chu hmuhnawm ti takin ka lo en doh doh a, min rawn en apiangin ka lo harh chhuak ve chiah, ka mit ka la sawn vat ţhin. Ka en dàn danglam ta thut hi mak ka inti ve tho, nimin lama a thlalâk ka hmuh vàng mai khân heti khawp hian ka danglam thei tihna em ni?

"Engah nge i ngawih vung vung a? Ka zawhna che chu min chhâng vat la?" a rawn tih chuan," Ka hre chiang lo, han sawi țha leh teh," ka ti ve hmiah, a thil min zawh ka hre miah lo; mahse, hre lo anga awm chu ka tum miah lo thung.

"Hei, kan chhuak ve țêp tawh a ni sia, khawiah nge i zawm ang ka ti," a tih chuan," Ka lo la ngaihtuah ngai miah lo," tiin ka chhâng ta thuai a. Ka lo la ngaihtuah ngai loh thil ni miau hek le.

"Kei pawh; mahse, kei chu MZU lamah hian ka zawm theih chuan ka zawm ka ring deuh ngawt a," a ti a, kei erawh chuan," A hunte lo thleng ve phawt rawh se, lo ngaihtuah chiam a ngai hleinem," ka lo ti thung a, ani pawh chuan," Ni tho mai, ngaihtuah tùr kan la ngah bawk sia tiraw? Mi zawn chhuah tùr pawh kan la neih kha," mitko sàn ãk paha min rawn en chung hian a ti ve leh a.

"I mithmul pawh chu i inhmeh a nih kha," ka tih chuan a mithmul chu a han khawih vat a, chutah, nui sen senin,"Nimin piah tlaia ka cousin min pawhsak a nia, a na râp maw le, ka mittui pawh a tla thei hial a ni, ka inhmeh tak tak maw? A sîn hran lo tiraw?" a ti leh a.

"A mawi tâwk chiah!" 

"Ka lâwm e," tiin tui bottle chu a ban nghâl zat a, a chhìn hawngin a in a, a hâk deuh zui a, a tui in pawh a khabeah a rawn luang liam ta nghe nghe a, a khuh deuh khak khak a. A hnungah zàwi deuh takin ka lo chumsak a, a khuh a reh hnu chuan,"Naupangchhia tak hi chu aw..!" tiin a khabe huh hliam chu ka kut chuan ka tuai hulsak ta nghâl a, kan inen hnai khawp mai. A mitmu rawng a dum nia ka lo ngaih char char pawh a uk kharh zâwk a lo ni tih ka hmu chiah!

*MI DANGTE, AN HARSATNA AȚANGA KAN CHHANCHHUAK  THEI LO EMAW KAN ȚANPUI THEI LO EMAW A NIH PAWHIN ANMAHNI DIRIAM ZÂWNG LEH AN TÂNA ZAHTHLÂK ZÂWNGA ȚAWNGKAM NEIH LOH LEH CHÊT CHHUAH LOH HRÂM HI A ȚHA*