☆EARTH ANGEL☆ - 2 By Dingdi Pachuau

 ☆EARTH ANGEL☆ - 2 By Dingdi Pachuau

Ka rui ve bawk a, Dusty  pawh ka khalh haw thei lo, C-a'n min phur haw a, a bulah ka riak ve ta ngawt a, ka muthilh hma zawng chuan ka nu leh ka u ka mawlh ka ngaihtuah a, thil dang ngaihtuah ka tum pawhin zu thei dêr lo chuan, ka va ning tak!

Exam zawh chawlh chhûng chu ni tin ka rui a ni mai, ina ka haw ve pawhin ka lût rù a ni ber ang chu, ka nuin min ngaihtuah ve deuh țhìn a niang, chanchin zâwtin min rawn be zauh zauh a, dâwt chu ka hrilh duh bîk lo, C-a bula ka riah thu ka hrilh mai țhìn.

Kha nu kha ka hmu! Engtin nge helai hmunah hian ka hmuh theih ni? Ka hmuh hmasak ber nia a thawmhnaw ngai chiah kha a ha leh, chuvànga hre leh thei ka ni, min lo la hre ve thei a ni chêk ang chu, min lo nuih sak a, ka hawi lêt nghâl hmak. Hmuh ka duh tawh lo, hmeichhe thinchhe deuh hrim hrim phei hi chu ka bula awm tamah pawh ka duh lo, ka nu leh ka u țawng pawh nin tawh nâklaiin.

"U, kan kal hman tawh dâwn em? Min thawn tùr chu siam thuai thuai la?" tiin Mapuia chuan kan kalna in neitunu, a u chu a han tur a, a u chuan," Aw, ka zo țêp, thingpui in in leh rih lawk ang chu? In rawn kal khàt nèn, hmanhmawh viau kher lo ula?" choka lam ațang chuan a u Biaki chuan a rawn ti vau vau a.  

Mapuia u Biaki hi pastor nupui a ni a, a felin a zaidam bawk a, pastor nupui ni awm hliah hliah a ni, fa an la nei lo va, Mapuia nèn hian an kum a inthlauh ve deuh avàngin keini pawh hian kan 'u Biaki' vek mai a ni. Pasal a neih hma pawh khân kan nunphung hi a hre ve vek tho a, thinrima min zilh lo hian țha tak leh zaidam takin zu ruih țhat lohna leh zahawm lohzia chu duhsak takin min hrilh țhìn; mahse, hei a thu kan âwih si lo chu a nih hi.

Thingpui in tùra min tih leh tlat avàngin kan țhu leh rih a, min rawn pe dan dan a, chutih pah chuan a nau tak tak anga min ngaiin an ina lêng ve zauh zauh tùr chuan min han hrilh hlawm a, keini pawh chu lu kan lo bu nghat nghat a, kan khawsak phung hi chu pastor ina lèn nèn a inmil lêm loh avàngin lèn chu ka duh lo vek ang tih ka ring, kei phei chuan ka duh lo zual, tunah pawh hian an pa a awm lo tih ka hriat vàng chauha kal ve ka ni, U Biaki hi chu a bula a awm pawh a nuam, fel pawh a fel, min duhsak hlawm ém êm bawk. Min zilh siam siam pawh hian tu mahin huat enah leh thinrimah kan la lo, a thu kan âwih lo mai chauh a ni. 

Zan khat chu ka room-a ka awm laiin ka nu a lo lût a," I u kha pawisa i pe ve nange?" a rawn ti nghâl tâwng a, kei erawh chuan lo en hauh lo hian," Ka hmu hleinem," ka lo ti mai a, ka hmuh loh miau chuan pêk ngaihna a awm lo miau si a.

"I hmang zo vek tawh em?" a rawn tih leh chuan ka lu na deuh tluk tluk mai chu dawm pahin," Ka lukham hnuaiah khân wallet a awm," ka ti a, dawhkàn bawh chuan ka mu leh ta a. Ka wallet chu a en a ni ngei ang," I va hmang tam ve..! I u nèna in hman tùr atân ka pêk che u a nih kha, ruih nân em ni i hman? A mak thei êm mai, rilru tihah zâwng mawlh hian khawsa lo teh u, hetiang chuan ka dam reipui lo ang che u," tiin a âng hmarh hmarh a, a chhuak leh nghâl daih a. Pawisa chu a la leh ta vek nge pawh ka hre lo; mahse, la vek pawh ni se, ka hman bàn kha a tam tawh lo hrim hrim bawk. A chhuak ta chu a reh huai mai, a nuam sawt bawk. Âng leh min hau ri hriat hi ka ning, hei vang hian a nia ina haw ka peih loh țhìn ni.

Ka chhuahnaah ka u hmuh tumin ka mit chu ka lèn ve fo a; mahse, pitar zînga pathlawi zawn ang vêla vâng niin ka hria. Ka nu thu min chah pawh kha ka hre ve reng; mahse, hmuh loh chuan pêk ngaihna a awm mawlh si lo a ni.

*******

"Hi..."

Ka bula rawn țhu thla ka hmuh rual chuan ka rilruah thinrimna a rawn awm nghâl teh ngawt a! Eng vànga ka bula rawn țhu ngam nge a nih? Țhutna ruak a tam hle si, hmeichhe eng emaw ve tak chu a nih àwm hi, hmel hriat ngai loh, tlangvâl fel lêm lo pawh min rawn țhut hnaih duh nghâl mai a nia.

"A ruak tho sia, mahnia țhut ai chuan a nuam zâwkin ka ring a," nui chunga a rawn tih leh chuan melh rulhin chhàn loh tawp ai chuan tiin ka lu ka bûk khum nghat a, ka phone chu ka melh leh nghâl zat bawk a.

"Remruati ka nia, nang, țhianpa, tu nge i hming?" He nu hi, a chiang chiah lo deuh a nih ka ring ta zâwk, hetiang khawpa mitmei leh chezia ațanga mi chinchâng thliar thiam lo tawp mai hi chu, nge hmeichhe easy tak a lo ni zâwk? Chu pawh chu lo ni se, heti khawpa min rawn ngam mai hi mak ka ti, amah hi ka lo hîp viau zâwk em ni? Ani lah hian min tiphûr êih lo thung a.

"Roddick," ti ringawtin ka chhâng, 'Zomuanpuia' tih sawi tel kher ngai ka ti lo, ka melh zawk tak tak a, ka phone ka en leh nghâl daih. Hmeichhe lam hi chu ngaihven ka tum tawh rih lo, ani hlauh phei hi chu, hlatsan vang vang ka duh chi a nia, ka hmuh hmasak ber ațang khân min hnar nghâl a ni tawp.

Ka ei tùr chah a lo thlen chuan phone chu dahin ka ei nghâl mawlh mawlh a, ani erawh chuan a la chah ve chauh a ni a, ka ei zawh veleh ka chhuahsan nghâl ang, kalna tùr ka la nei tlat. Ka sàwm ni lova ka bula a lo țhuta a hmingte min hrilh avàng ringawt hian a laka polite-a ngaihsak viau tùr ka ni chuang hleinem.

"Roddick, College kal lai i ni ve tho tiraw?"

A va mak aw, he nu hi, ngawih a thiam lo a niang, thil ka ei a ka titipui thei lo tih a hmu ve reng àwm si a, ka thil ei lai chu dah rihin ka thaw hawk a, ka en ve ta chauh.

"Aw." Bung țha ve ngawt ang chu, engah nge ka țawng châk lo pui min țawngtîr phêt a tum ni? Tikhân, a inhre chhuak ve mai ang chu, ka melh rum lo zâwk a, lãwm hlë tùr a ni.

"Khawi college-ah? PUC-ah a ni ve tho em?"

"Aw." A hma ang chiaha bung chuan ka ti leh a.

"A, kan college kalna a lo thuhmun chiah a nih chu, a va làwmawm tak! Chuan, eng nge i major?"

Ka thil ei pawh a tui tawh lo, ei châkna a bo vek tawh. Hmeichhia chu ni lo se chuan ka chhâng tawh pawhin ka ring lo, ka ei zawh veleh chuan ka tho ta nghâl vat rêng a. A ninawm êm asin! Zei inti takin min rawn titipui a tum chu a ni ve àwm si a, ka țhiante'n min rawn hmu phei se chuan min nuihzat ngawt ang chu! Ani ang hmeichhia bulah khân ka awm ngai si lo va.

Dusty ka dahna ka pan mêk lai chuan Mami chu hmeichhe pakhat nèn ka hmu dùn ta hlauh a, ani pawh chuan min rawn hmu ve nghâl mai bawk a, a nui deuh sak nain a tàwp leh rang khawp mai.

"Mami...?" min biak tum lova min kal pelh a tum chuan ka ko ta a, a ding ve ta nge nge, a kalpuinu chu eng emaw hi a hrilh zauh a, chu nu chuan a kalsan ta nghâl bawk a. Ka pan phei a, ani pawh rawn inherin min rawn hmachhawn ve chiah a.

"Khawiah nge i awm? Hmun danga riak chhuak reng lovin inah rawn haw rawh, ka nu pawhin a ngaihtuah che," ka ti nghâl a, ani erawh chuan hnuai lam bih deuh ràn pah chuan," Ka dam alawm, min lo ngaihtuah suh se," a ti mai a, min en lo chuan sîr lam chu a hawi kual leh rih a. A inthuamna chu a pângngai viau, a dàn ngai têin a mit pawh a hnawih leh nasa; mahse, a inhmeh êm êm tho, nalh hre ngang hi a ni bawk a, a țhing ngai lo. Tuna a inthuamna pawh hi thawmhnaw pângngai tak a ni, pâwnlam lan dànah na nâ nâ hi chuan a mawi thei viau a ni.

"Pawisa i nei em?" tia min zawh chuan," Eng zât nge i duh?" ka lo ti vat a, ka nei tam hauh lo; mahse, ka hmu khât ve deuh tawh bawk nèn, ka ui lo ve tlat. Bâkah, zanin chu Mapuia theh chhuah zàn a nia, neih loh deuh pawhin a pawi lo ang chu.

Ka wallet-a pawisa awm zawng zawng chu ka pe vek a, tam tak phei chu a ni lo, a kal dâwn chuan,"Min lo ngaihtuah suh u, ngaihtuah tlâk pawh ka ni lo," a ti sap a, ka en zui vung vung mai. He khawvêla u ka neih chhun a ni a, ngaihtuah loh ringawt theih a ni bîk lo alawm, ani pawhin min ngaihtuah chhuah châng a nei ve tho ang chu.

Ka kekawr ipte ka zen rak rak a, Pathian hian min lo la hawisan bîk lo a lo nih dâwn hi, pawisa note ka phawrh chhuak nawlh mai a, ka han chhiar a, zanin chu min daih chiang, a làwmawm lutuk, ka nu pawisa dah lâk rûk a ngai dâwn lo tihna.

Zànah chuan C-a room-ah kan awm khâwm leh țhap tawh a, mi dang chu titiin College zawm leh hun an peih lohzia sawi nak nakin tuna hun kan hman dàn hi nuam an tihzia thu chu an sawi nak nak a, kei chuan ngawi rengin an titi ka lo ngaithla a, an thil sawi chu ka lo zàwm khawp mai. Ka tân phei chuan a phùrawm loh lehzual, a chhan chu ka țhiante hi PUC-a kal an awm ve tlat lo va, ka kal țantirh lam pawh khân ka tui lo lutuk a, ka nu hnênah pawh ka sawi nghe nghe; mahse, ka putea a thawk ve si a, bâkah, kan hlat lêm lo bawk nèn, ka thil sawi chuan kori a tu ta lêm lo a ni.

Dam chuan hun a kal ve zêl bawk nèn, Krismas hmang zovin Kum thar kan chuang kai a, college zawm hun pawh a lo her chhuak leh ta; mahse, 4th sem zirlai ka ni ve tawh dâwn a, tlêm chuan a zia ve deuh tawh ang chu. Țhian kawm nei lêm lo mah ila, mamawh ka inti chuang lo, keimahin ka tlei tâwk ve viau. 

Nilaini a ni a, College ka thleng a, Dusty hûng fel lehin ka helmet ka phelh chiah tihah chuan," Roddick...?" tia min kotu hmeichhe aw chu ka hre nghâl chat a, college-ah hian tu hmeichhia mah hian min ko mai mai ngai si lo va, mak ka ti ţêp a nia; mahse, min kotu lam ka hawia a hmel ka hmuh chuan mak ka ti leh lo!

A lo nui sak a," Hi..." a lo ti țha leh a,  ka ninzia thup thei lo chuan ka ner sak a, ka chhâng lo, tukin phei chu ka mood a fuh lo zual lehnghâl a, ka bulah tu mah awm lo se ka ti.

"First i nei ve a ni maw?" a rawn ti leh a, he nu hian min biak mai duh tâwk lovin min la rawn zui zêl nia! Ka ding chawt a, ka hnunga kal a nih vàngin min rawn su deuh dat a.

"Min zui lo thei ang em?"

Mak tih hmel tak hian min rawn melh chho a, a zak ve deuh pawh a ni maithei, a biang a sen deuh tàn bawk a, ka mood fuh loh țum tak chu ni lo se chuan 'sexy' ka ti leh viau tawh ang chu; mahse, tûn țum zawng, sakei hmuam ang vêl ka ni!

"Chhùnah chàwl tlâng ila?"

A la ti! He nu hi a ã a nih loh vêk pawhin a mãwl lutuk a niang, lu thing nar nar chungin ka inher a, chak zetin ka kalsan ta nghâl a, a bula ka awm rei chuan ka ã ve thei takngial ang!

Vànneihna pawh hi ka lamah a țang zo lo takzet tawh a nih hi, class room ațanga ka chhuak chu min lo ko leh a, mi dang min en dàn ngaihsak hauh lo chuan en pawh en lovin ka kal pèl a; mahse, min rawn zui zêl tho chu niin!

"Roddick, hawh, țhian ni ang?"

Ka nui hawk mai. Ka nuih a za tak tak alawm. Ka pian ahnu lamah hmeichhe țhian ka nei ngai lo va, ka duh bawk hek lo, ka têt deuh laia u Mami ka kawm bâk hmeichhia ka la kàwm ngai lo bawk.

"Hmeichhia ka kàwm ngai lo."

Chawhnu class kal ka tum ve reng a nia, he nu hian ka mood a tichhe zual a, haw daih mai teh ang, min tihât tak tak hma hian.

"Roddick, haw i tum 'mi?"

Tum. Tum. Tum. Ka ning zozai lutuk! Chhàn pawh chhâng lo leh melh tawh hlek lo chuan helmet chu khumin Dusty chu chak thei ang berin ka vung chhuahpui ta nghâl a. 

Țhian. Huh, hmeichhe țhian lehnghâl, ka mamawh lo, ani phei kha chu ka mamawh loh ber pâwl a ni. He khawvêl hi a lo mak thei viau a lo nih àwm hi, kan inhmuh hmasak berah, a ruih vàngin min vìn 

tuar tuar a, tunah țhian atân min sâwm leh a... ani tê hian min hmusit țha duh lo khawp mai. Mihring pãngngai chu a ni ve ngei sia, a mak ka ti lehling ta viau zâwk a.

Chu aia mak leh zual chu, a tûkah, a ngaiah chiah min lo ko leh! Min lo chãng ru reng a niang, Dusty ka hûng fel chiah tiha min rawn koh chuan," Hmeichhia ka kàwm ngai lo ka tih kha, min kalsan rawh," ka ti hmak a, ka vìn lo hi a vànnei viau a ni.

"Țhian ka nei lo va, kawm che ka duh alawm," luhlul hmel fê hian a lo ti thung a, min en kal mai a, zãm hmel leh tlâwm hmel hmuh tùr a awm lo. A incheina thawmhnaw mak hliap hluap zet chu ka en kual a, nula ve si, engati nge hetianga a inthuam rêng rêng ni? A inlâk 'style' ve dàn a ni mahna, mawi ka ti lo khawp mai. Khua a vawh vàng pawh hi a ni mahna le, hmm...a duh dànin inthuam ang hmiang, ka lo buaina tùr a ni lo ve.

"Vawiin chu min tlàn hawsan tawh lo ang chu tiraw?" A luhlul kâwlhràwn dàn hi a mak ka ti ta hial zâwk! Ka en ràn reng a, ani erawh chuan nui hmel rawn pu deuh tawhin,"Ţhian chu kan ni thei ang tiraw?" a ti leh a.

Chutiang chuan kâr khat chhûng chu min ûm zui kual a, nin lam aiin mak ka tihna a nasa tawh zâwk! Class kal loh phah ringawt theih bîk hek suh, ka hmu ni tin chu a ni ta mai, ka biak țhat miah loh pawha ka bula ka mei ang chiaha min zui ve zêl ta chu biak chin ka nei ve ta a, mihring pãngngai ka ni ve miau mai si a. Thawhțanni ațanga Zirtàwpni thlenga mahni chauha țhua chàwl țhìn kha țhutpui neiin chawlhpui ka nei ve ta, ka biak ngai lêm loh pawh hian amah hian sawi tùr a hria a, a țawng malh malh reng mai, rilru hlim loh pawh hi a nei ve ngai lo em maw ni tih tùr a ni.

Zàn lamah țhianteho nèn kan inhmu zauh zauh a, riah erawh ka riak chhuak ngai ta bík lo. Class kal tawh hi chuan eng eng emaw tih tùr hi a lo awm ve tawh țhìn a, chawlh lai angin kan inhmu khâwm thei tawh bîk lo. Sunday-ah erawh kan inhmu khâwm ngei ngei thung, kan rui ziah bawk. Kan in lam boruak a ngai reng a, kei chu awm ve lo ang hmiah ka ni. Chaw kan ei tlâng ngai lo va, ka chhuak lo a nih chuan ka room-ah ka tawm tlat țhìn, ka nu a rawn lût zeuh zeuh, chu pawh âng pahin, min zilh pah bawk a, ka hre hnê hlûi tawh!

*******

"Naktûk chu class ka rawn kal hman lo maithei a ni," a tih chuan en mang hlei lo chuan," A nuam viau dáwn a nih chu," ka lo ti hmanhmawh a.

"Engati maw? I bula ka awm dâwn loh vàngin maw?" a lo ti vat a, a aw chhuak ațang chuan lungawi lohna  tlêm a tel hlekin ka hria. Class chawlh chu a nei zauh zauh tho a, naktûka a lo kal theih loh dâwn avàngin engah vak ka ngai lêm lo, a hma zawng pawhin keimah chauhin alawm ka awm țhin.

"Reh reih rawihah zai ka ngaithla thei dâwn a," tiin ka chhâng a, hun ãwl ka neih ka hman ve dàn a nia, ani a awm hi chuan a titi zél a, a ngaihthlâk loh theih bawk si lo va, music ngaihthlâkna hun ka nei thei lo a ni; mahse, ka sawisêl ngai chuang lo.

"I khua a lo har ang tih ka hlau ngawt mai," a tih chuan enin ka nui hawk a, thla hnih chuang chu college campus-ah kan lo inzui ve ta a, a bulah hian ka khua a har lo em tih ka la ngaihtuah ngai lo, keimsh chauha ka awm țhin lai pawh khân ka khua a har ngai pawhin ka hre chuang lo.

"Ka khua a har niin i hria em?"

"Zêp duh suh, i khua har lo se ka rawn kàwm miah lo ang che, i khawhar ka rawn hnèm che alawm," a ti ve leh thung a, ka chhâng tawh lêm lo, min hnial thla zêl dâwn tih ka hre ve tawh tlat, a țawng duh êm avàng hian ka chhâng peih ve tawh țhìn lo a ni.

A tûkah chuan a sawi lâwk ang chuan a hmêl hmuh tùr a awm lo va, a țawng ri leh min ko ri pawh hriat tùr a awm lo, ni tin deuhthawa a hmel hmua a țawng ri hriat chuan vawiin chu a reh deuh rawihin a hriat ve deuh tlat  nia! Classroom chu a pângngai thlap, chhùna pâwna ka chhuak chu min zui det dettu awm leh dâwn tlatin ka hria a, ka hawi lêt a, a awm lo. Thing buk hnuaiah țhuin ka phone ka phawrh a, zai ngaithlain ka maimichhîng vang vang a.

"Ka tel lo chuan i khua a har ang tih ka hlau réng a, kha, i khua a har tak tak kha," Remruati awin a rawn tih chuan ka meng nghâl vat a, ka hmu mai lo, ka hawi kual a, ka hmu chuang lo. He nu hi, a biru reuh em ni le? Vawiina class a kal loh tùr thu niminah a sawi kha, min tihder em ni?

Ka maimichhîng leh ta zâwk a, ka ngaihtuahna, ka beng chhe ri mai a ni ngei ang, kei hi a bulah ka awm tam ta lutuk a, ngaihtuah tum miah loh pawhin ka lo ngaihtuah chhuak tawh a lo nih chiah hi. Ka bula a awm miah loh pawhin ka bengah a aw ri a châm zo tawh a, min chènchilh tawh a niang, music ka ngaihthlâk pawh a tui lo, ka off ta daih a, a reh vawng vawng maiin ka hria.

A tûka min lo koh chuan," Niminah i thlâ ka hmu asin," ka ti nghâl a, meng phâwk zet hian," Thlâ ka nei ngawt ngawt lo!" a lo ti vat  a, chutah," E, min lo ngaih vàng a nih chiah chu, i khua a lo har viau a ni maw? A reh viau dâwn si a," nui sen sen chung chuan a ti leh nghâl zat a.

"Reh nâng, nuam ka lo ti khawp mai." Dâwt tlêm chu a tel chiang, a reh alawm, a reh vawng vawng a nih kha.

"Min lo ngai tih chu i sawi hreh ve hle mai maw, a pawi lo, ka hre thiam rih ang che, ka chawlsan zeuh zeuh che hunah chuan i sawi hreh vak tawh lo ang," a ti leh a, nui sâng chung hian a ner pah deuh bawk a.

"Ka ngai lo che, engah nge ka ngaih ngawt ang che?" ka lo ti thung a, ani chuan," Kei chuan ka ngai che asin, class rawn kal leh vat hi ka châk ber a," a ti leh mai a, dâwt a sawi nge thu dik a sawi pawh ka hre lo. Țhian a ngai ngawih ngawih a nih ka ring, kei kawm nuam lo leh țawng duh lo, sual ve tak mai min han kàwm duh tlat a, eng emaw felhlelhna a nei a ni hial lo maw le?

"Eng nge nimin chuan i tih a?" tiin a thuphung chuan ka zâwt ve a, ani lah chuan rang zet hian,"Damdawi inah maw le," a lo ti vat a, chutah," Vawiin chu chhùn chawlh laiin thil zawh che ka duh a, kan chawlhna țhinah khân ka lo nghâk ang che aw. Hei, khati khân min en suh, ngaihzâwng lam thil a ni lo," tiin a nui sak a, back zâwnga kal a ni a; mahse, inherin ka kal dàn zâwng chuan a kal ve leh ta a.

"I kawr kha, thlâwk tùr i ang ngawt mai, phêngphehlep thlâwk tùra thla zâp hi, hnawk i ti lo em ni?" tiin a kawr leh kekawr hâk chu ka kâwk a, a ni lah tak a, kawrfual khûp chen a ha a, chumi chungah chuan puan pan deuh chi kawrfual bawk, a bân tlâwn, a hma kilhna awm lova inhawng thla vek, khûp chen bawka fual hi ha lehin kekawr parallel ang chi a ha leh a, chutiang style hlîr chuan a inthuam ziah a ni. Hmeichhe dangin kekawr tight tak tak an hâk lai leh T-shirt mai mai an hâk lai pawhin ani chuan a ha ve ngai lo. Tunah pawh hian khua a lum ve țan tawh a nia, khawlum hian a tibuai ve lo a niang.

"Thlâwk thei ila ka ti asin, hetiang kawr ka hâk vàng hian ka thlâwk thei chuang bawk si lo," a ti phawt a, chutah," Phêngphehlepte hi an vànnei ngawt mai tiraw? An thlâwk thei bîk a," a ti leh a, kei chuan," Nang pawh i vànnei ve tho alawm, i kal thei a,"ka lo ti a, ani pawh chuan," Nia..." chu a ti leh lawi a, a ngaihtuahna naupan chhiatzia chu ka ngaihtuah a, ka nui chhuak hawk a.

*HAWIHHÀWMNA HI HMANGAIHNA TENAU LANTÎRNA A NI*