☆EARTH ANGEL☆ - 3 By Dingdi Pachuau

 ☆EARTH ANGEL☆ - 3 By Dingdi Pachuau

Chhùn chawlh a lo hun chuan min lo nghah ziahna thing buk hnuai chu ka pan nghâl a, a lo awm leh vàng tawh. Thil mak a ni lo, nghâktu ka ni ngai lo miau a, kan inhriat ațangin min la nghâk char char ziah a ni.

"Vawiina kan ei tùr hi ka siam ngei a nih hi aw, a tui danglam zak mai ang," nui sâng chunga a tih chuan," I thiam ve ngawt ngawt 'mi? I siam a nih chuan a tui vak pawhin ka ring lo," ka lo ti thung a.

"I ei hma chuan chutiangin sawi kher lo la," ner nângin a ti leh a, ka nui ringawt. Ei tùr hi a rawn pai ziah a, kan inhriat țantirh phei kha chuan mak ka ti viau nghe nghe a; mahse, țhian a neih loh avàngin hetia rawn pai țhìn hi a nih ka ring ta a, zawh pawh ka zâwt duh ta lo.  A ei tùra a rawn pai hi hmun hnihah țhenin lehlam hi hnar theih miah lohin min pe ziah bawk a, tunah hi chuan hnial pawh ka tum tawh lêm lo, zanriah ei loh phah nân ka hman theih phah a, ka chhûngte hmêl ka hmuh tlèm phah avàngin țha ka ti ta viau a ni.

Ei tùr kan ei lai chuan,"Sunday-ah i inkhâwm țhin ang chu tiraw?" tiin zawhna hmasa ber chu a rawn phuh chhuak ta a. He zawhna ber kher chu a, ka inkhâwm lohna a rei tawh asin, inkhâwm tùr ang chuan ka chhuak ve ngei a; mahse, biak in ka thleng khât viau a ni.

"Meuh lo," tiin dik takin ka chhâng a, nuam lo pawh ka tih phah chuang lo. Ani chu rawn hawi chhuakin," I lêng țhìn a ni maw? E, ni dâwn tak, ka spot-ah pawh ka hmuh tak che kha, a nuam reuh asin," tiin hnuai lam a bih ta daih a, chutah," I kal nawn leh tawh lo a ni maw?" a ti leh a.

"Min rawn tihbuai hnu kha chuan kal leh tinah pawh ka tin tawh lo," ka lo ti a, ani chuan," Engah ngawt maw? A nuam asin, ka kal fo mai," a ti ve thung a. Kei chuan,"Nuam pawh ka ti lo, ka țhiante nèna awmho a nuam daih zâwk," ka ti ve leh thung a.

Kan ngawi ta vang vang a. Hmeichhia hi ka titipui thiam ve vak lo va, ka bialnute pawh kha ka titipui chiam ngai lo, anmahni an țawng a, zawhna min zâwt a nih chuan chhàn leh tawp a ni deuh mai. 'Boring'pawh min lo ti viau maithei a ni; mahse, pawi lo, boring min titu nèn chuan kan inzui lo tawp ang chu. Remruati hi ka bialnu ni si lova hmeichhia ka kawm hmasak ber a ni a, zawhna min zâwt chhên lêm lo va, a titi barh barh a, țawngpui vak lo pawh hian amah hian a tlei viau niin ka hria; mahse, tunah hi chuan ka țawng tam ve tawh viau a ni.

Rawn hawi chhuakin,"I țhian ka ni ve tho tiraw?" tiin min zâwt a, ka va en lai chuan a lo nui tawi deuh tak a; mahse, a nuihzat vàng chu a ni miah lo, a hriat chian ngam loh vànga nui lui ni maiin ka hre zâwk.

"Ni lo la chuan i bulah ka awm hauh lo ang," tia ka chhàn chuan a mitmenga hlimna chu chhiar theiin ka inhria, nui sakin,"I fel ngawt mai," a ti teh daih a! Țawng ngaihna hre lovin ka en reng ringawt, a hmelah lah chuan tider hmel a lang hauh si lo.

"I fel kha chu ka ring sa hrim hrim a," a la ti deuh deuh!  Min sawi el nia ringin a hmel chu ngun deuh hian ka en a, nuihzatna leh tider hmel a lang si lo, chutah, âwih loh lutuk avànga nui hawk chung hian ka ding thut a,"Kal tawh ang," ka ti nghâl bawk a.

Sunday-ah lêng turin ka chhuak a, vawiin chu khawia lèn nge an rawt dâwn ni, bialnu neihovin thutlûkna an siam ang chu. Muana tih loh chu kawp nei țhâmin an lo kal ngei ang chu, hmeichhia an tel ve hi chuan kei, thu a rual mawh ka ti a, mipa rorèlnaa an lo tel ve phei chuan ka ngaithei dêr lo, ngaihzâwng ka neih ve lai pawh khân a țûl fê a nih loh chuan ka țhiante bulah ka hruai ve ngai lo rêng a ni.

A ngai têin C-a room-ah kan kal khâwm hmasa leh phawt a, Mapuia'n a bialnu a rawn luhpui hmasa ber a, ka lo ûksàk tehchiam hlawm lo va, a tàwp bera Joseph-a rawn kalpui ka hmuh erawh chuan ka lo en deuh reng a niang, mak ka ti lo ka tih chuan ka daw ve ngei ang, Rinawmi, Duhlaii ngat mai kha ni miau hek le! 

"Wow.! Nangni pahnih chu.." C-a'n a tih chuan ka hawi sawn ta daih a, ani chuan," Boruak țha lo a awm lo ang chu maw, Roddick?" nui chung hian a rawn ti deuh kher a, en pawh en lo chuan," Teh rêng mai," ka lo ti a; mahse, a thil tih duh dàn, ka bialnu hlui kher a rawn hruai chuan min tihlim fahran lo, ka thîk hauh lo, he nu hi hmuh leh ka duh tawh lo mai zâwk a nia.

Kan lènna hmunah chuan mi dang lêng ve pawh an lo awm nual a, a kawp tê têin an ni tlângpui. Muana nèn chuan keini chu kan kal kual ve lo, awmhmunah kan pahnih chuan kan țhu a, mi min hmuh loh laiin kan in dùn leh țhìn, bialnute bula awm aiin nuam ka ti daih zâwk. Ngaihtuah leh rilru la pêng tùr an awm lo va, ka in ruih deuh hnâp phei hi chuan kan chhûngkaw boruak nuam lo zet pawh ka ngaihtuah lo thei ve ţhìn rêng a ni.

Mahse, vawiin chu ka rui chhe miah lo, Dusty pawh keimah ngeiin ka khalh haw thei a, tlàn erawh ka tlãn chak vak lo thung, mi dang phei chuan min tlàn pèl vek tawh. A la tlai chhe lêm lo bawk a, ina haw ringawt ai chuan tiin ka dinglama kawng pêngah chuan ka pêng ta daih a.

Helai hmun hi intihhlum ka tumna hmun kha a ni, kal an awm ve țhìn ngei a ni tih hriat tak hian ei tùr tuamna kâwr an paih pawh ka hmu nual, a hma khân ka lo hawi kual vak lo va, hmun nuam tak chu a lo nih ve reuh hi, tlai ni tla tùr lahin a chhun mawi viau bawk a, thlifîm lah a thaw har har bawk nèn, hahchawlhna hmun nuam tak a nih hi.  Hei vàng hi a ni ngei ang, Remruati pawhin 'Ka spot' a tih ni, hmeichhe lungno tân phei chuan a nuam zual ngawt ang chu. Vawiin hian a kal leh em le? Ka hawi kual a, mihring hmêl ka hmu lo, a hmun ngainat ni ve si, kal fo ang khân a insawi ve bawk sia, a ngaina lo tawp a nih dâwn hi, kei nuam ti lotu zâwk hian ka tlawh a nih zâwk àwm hi.

"Welcome, i nih ka lo ring pha miah lo  a nih chu!"

Ka inher vat a, ka piah deuh lawk thing buk țâwi lii luai hliahah chuan a lo awm a ni ngei ang, hlim hmel taka nuiin  ka lam chu a rawn pan phei nghâl a, a spot-ah ka kal ve sia, vawiin chu thinrimin min vìn miah lo tlat mai!

"Min vìn leh chiah la?" tiin ka lo fiam a, kan inhmuh hmasak berna hmun kha a ni bawk a, rilruah a rawn thar zut zut lo thei lo, ani lah chuan,"Vawiin chu i dinna hmunin ka pawi a sawi lo tlat a," nui chung vêk hian a rawn ti leh a, ka dinna bulah chuan a rawn ding ve nghâl a, chutah," Ka vìn der mai mai che a nih kha. In lêng a ni maw?" a rawn ti leh a.

"Aw, țhianten an rawt a." Ka rim chu hre lo se ka tih avàngin ka hawi sawn a; mahse, a hre hman tawh tho maithei, thlîin a beng fuh phei chuan...

"I țhian ka ni ve tho sia, ka kal ve châk asin le!"

"Hmeichhe kalna chi a ni hleinem, mipa bulah chuan nuam i ti lo ang," tia ka chhàn chuan," I țhiante pawh kha nangmah ang thoa fel vek an nih ka ring, i țhiante an nih chuan ka țhiante an ni ve tho a, nuam ka ti ve tho ang," a ti ve thung a.

Ka en vang vang a, fel tih chungchâng hi chu sawi tawh lo hrâm se ka ti. Ka fel lo tih ka hre ve kur si a, ngaihthlâk nuam ka ti miah lo, fel ni ila tunah pawh hian rim dang ka nam nâng.

"Min la hmel hriattîr ve hlawm rawh aw, chuan, in lèn leh hunah chuan min sâwm ve tawh la ka ti bawk, a nawm hmèl ka ti alawm," a ti leh bawrh bawrh a, chhâng lovin ka en reng ringawt. He hmeichhia hi ka țhian chu a ni ngei tak si a, engtin nge hetiang țhian ngènngawl tak leh luhlul ru tak reuh si hi ka lo neih theih ni? Ka bialnute min ngen ngam loh leh an sawi chhuah ngai loh thil sawiin min nêl êm êm chu a ni si a, thil mak tak chu a ni!

"Ka châk deuh i hre duh em? In țhianho zînga awm ve kha a nia, in titite, in fiamthute ka ngaithlain ka hre ve châk tak tak a ni," a tih leh chuan," Ni lo, mipa titi chu i ngaithla ngam lo ang, a pàwhràw thei viau asin," tiin ka lo pawt chat vat a. Ani erawh chuan," Chu pawh chu ni se ka châk tho," a lo ti leh tlat a.

Cigarette phawrh chhuakin ka han țan a, ka han sì deuh vang vang hian ka ngaihtuahna ka sâwr bing thei deuh tlat țhìn a, he hmeichhia thil sawi mak tak takte hian min tihbuai mai loh nân rilru fîm deuh ka mamawh a ni.

Pak hnih vêl chauh ka la pak ang tihah chuan min rawn chhuhsak a, a hmuiah a chuktuah ve nghâl ta mai! Makti deuhin ka en reng ringawt a, a han pak a, a khu a hîp lût a ni ngei ang chu, a khuh ta bawrh bawrh mai a, cigarette chu chhuhsakin a hnungah ka chumsak ta vat a.

"Engah nge i zûk ve ringawt ni?" tiin na lo tê chuan a hnung chu ka la chumsak dat dat a, a khuh nasa ve deuh bawk a, a hmai pawh a sen vek mai, a mittui pawh a tling kiau tawh a, ka khawngaih reuh khawp mai, a vawi khat zûk a a ni ngei ang chu.

"I tih ang kha ka ti ve châk alawm," tiin a la khuh khak khak a, a mittui chu a hru pah mawlh mawlh bawk a, țap te pawh a ang thei hial alawm le!

"I vawi khat zûkna a ni maw?" ka tih chuan a lo bu nghat a, he hmeichhia hi, a bulah chuan ka chêt fîmkhur deuh a ngai tawh ang, tunah paeh hian tlêma tlêmah a khuh luak lo chauh a nih hi.

"Hmeichhe meizial zù chu a mawi hleinem, bâkah, a țha lo," ka ti thla rawk a, ani lah chuan,"A țha lo tiin i zûk tho si, nichin kha chu ka tifuh lo ve bawk a nih kha, nang pawh i khuh miah loh kha tiraw?" a ti leh a, min en reng avàng chuan cigarette zûk pawh chu nuam ka ti tawh lo, ka inthlahrung deuh tlat, a rûkin ka paih ta daih nghe nghe a.

"E, thil pakhat țha deuh ka tihpui ang che, lo kal rawh," tiin ka kutah chuan a rawn chelh a, min kai nghâl ta dàwr dáwr a, intihhlum ka tumna lung tohlâwt bulah chuan min hruaiin a ding ta dat a. Ka kut chu thlahin a kut pahnih a hmui bula la chhovin," Roddick..." tiin a au ta vak  a, ka phu zawk lo chauh a ni!

Ka lam rawn hawiin," Han au ve chhin teh, a nuam asin, i rilrua thil țha lo a rawn luh châng chuan hetiang hian au vak țhin rawh," nui sâng hian a ti a, thlang lam hawi lehin nichina a au ang dàn ang bawk khân ring takin a au leh vak a, a thangkhãwk ram ram bawk a.

"Han ti ve teh, mawh, han au teh, i nuam sawng sawng mai ang," tiin ka jacket bân tlâng chu a rawn pawt dar dar a, kei chuan," Mahni hming lama au vak vakte zawng, a mi an loh thlâk  êm mai a," ka lo ti hlak a. Ani thung chuan,"I hming kher lo, ka hming pawh, a, i duh duh a ni mai, au ve hrim hrim teh, a result i hre mai ang," a ti leh tlat a, min tur dàn lah chu a thiam reuh nasa mai si a,"Hmeichhe lakah chuan i tlâwm duh hauh lo ang tih ka hria a ni, kei chu ka au tawh a,"tiin, a sawi ang chiahin hmeichhe laka tlàwm chu ka duh hauh lo, thlanglam chu ka hawi ve ta nghâl a.

"En teh, ka kut tih ang khân ti la, a ring duh bîk a nia," tiin tih dàn chu min hrilh a, a test nân amah chu a han au leh vak a, chumi hnuah chuan a tih dàn ang chuan ka kut chu ti vein ka au ve ta vak a. Ka au zo chu kut lo bêngin," Țha lutuk! Ka tih țhin dàn a nia, thil țha chu ka hrilh ve zêl ang che," a lo ti sauh sauh a. Vawi nga vêl min autîr leh hnu chuan ka rui deuh pawh chu ka harh chiang ta khawp mai, rilru lam pawh mak tak maiin a ruak huaiin ka hria, thil ho tak angin lang mah se, a hlimawm ru riau mai ka ti!

A tûka class ka kal dâwn chuan ei tùr eng eng emaw ka lei ve ta nual a, hmeichhia hian ei rek rek hi an làwm ve si a, amah hlîrin ei tùr a rawn pai ziah a, vawiin chu tlêmin ka'n chhâwk  ve tawh ang e. In ațanga ka chhuak tùr chu ka nuin min lo hmu a, min rawn zuiin," Chaw ei ve țhin ta che, engah nge i nghei ziah? Thil țha a ni lo, hmanhmawh chûk ziah suh, mahni in ngaina lo lutuk mai!" a ti leh barh barh a, ka chhâng peih lo. A hriat loh laiin chaw chu ka ei daih tawh, chokaa a awm loh lai ka chãng ru ve alawm le, min hmuh chuan aâng leh dâwn tih ka hre sa a, hmuh loh hrâm hrâm ka tum rêng a ni.

Chhùn chawlh laia ka ei tùr lei phawrh chu a hmuh chuan,"A ngai lo asin, ka rawn pai țeuh alawm," a lo ti vat a, kei chuan," I rawn pai hlîr ka ei ziah a-" ka tih lai chuan,"I ho thei êm mai, a nih, kan ei tùrah hian lo pawlh ang hmiang," tiin a tiffin box lian angreng takah chuan ka thil lei leh a ei tùr siam rawn ken chu a chawhpawlh ta nghâl a.

Ka rin aiin ka la ei tui phian zui, ka ei tùr lei chu a lo thak deuh a, thak a ti ve deuh a niang, a sî pah hlap hlap  a, tui a in deuh chhên bawk a. A hnâr a sen deuh hlar bawk si nèn, ka nuih a za ru khawp mai.

"A tui khawp mai tiraw?" a ti a, 'A thak lam deuh chu a ni' a ti duh bîk miah lo, kei chuan," A thak mah mah in i hria em?" tiin ka záwt lêt ta a, ani lah chuan," Thak lo ve, a tui tâwk chiah a ni," a ti leh a, tui chu a in leh  nghâl zat a. Kan ei zawh chuan kan la țhu rih a, kan piah lama awm vete pawh chuan an ei zo tawh a niang, a țhen an tho tawh a, a țhen țhu an la awm ve bawk a, a țhen an kal sawn tawh bawk a.

"A sam rawng chu a mawi hle mai," a tih sap chuan ka en vat a, min en loh avàngin a enna lam chu ka en leh a, hmeichhe pakhat, sam eng lek lek kal mêk chu a lo en niin,"Mawi i tih chuan ti ve la?" ka lo ti a.

"A, a tihchi ve nâng," min en chuang lo chuan a ti leh a, Sam-engi chu a en zui zêl a ni tih ka hmuh chuan," Engah maw? I inhmeh ngawt ang chu," tiin ka fiam pah zauh a.

"Ka inhmeh ve loh bâkah an phal lo ang," a ti leh sap a, a thil sawi dàn chu a tih tak êm avàng leh min rawn en miah loh avàng chuan han fiam zui zêl pawh chu châk viau mah ila ka fiam zui duh ta lo va.

An phal loh chhan tùr leh tute'n nge phal lo ang tih ka zawh leh chuan min rawn enin," Ka chhûngte'n maw le," a ti a, kei chuan,"I samah thu an nei em ni?" ka lo ti vat a.

"I hre thiam lo a nih kha," thaw hak paha a tih chuan he nu tê hian rilru hahna a nei ve em maw ni chu aw ka tih phah. Nia, ka hre thiam lo, kei chu ka duh duh dànin ka sam hi chu ka siam danglam mai, ka sam a nia, thu ka nei alawm, Mami pawh a ni tho, chutin ka nu leh pa pawh. An sam a nia, mawi an tih dànin an ti ve mai ang chu.

Kâr khat a ral leh hnu chuan pastor fanu a ni tih ka hre ve ta chauh! A tìrah chuan mak ka ti a, a hnuah erawh chuan mak ka ti leh lo. 

"Pastor fanu nih hi ka duhthlanna ni lo mah se ka pa pastor a ni miau a, chu chuan duhthlang thei lovin min siam a ni. Pastor chu mihring ve tho ni mah se mimir tehna a sâng a, a nupui leh fanau chenin. Dik pawh a dik chiah, kohhran enkawltu a ni a, a nun dàn khawsak dàn zawng zawng pawh a fîmkhur a ngai a ni, chutiangin keini a chhûngte pawh. Mite mitmei vèn a ngai a, miin min en bîkin sawisep kai a awl bîk a, fîmkhur a ngaiin páwnlam lan dàn a pawimawh êm êm bawk a. Chuvàng chuan, ka duh dàn leh châk zâwng tam tak pawh ka tih theih loh phah rêng a ni, chu chu a nia 'I hre thiam lo' ka tih che kha," a ti duah a.

"Mihring ve tho alawm i nih, engah nge i duh zâwng leh châk zâwng chu i tih mai loh ang? Mai mai a, engah mah ngai suh, ka bulah chuan i duh leh châk zâwng apiang chu ti ang che," ka lo ti sauh sauh thung a, pastor fanu a nih avànga a sam rawng mawi tih zâwng pawh ti thei lo leh a thawmhnaw hâk duh zâwng pawh ha thei lova a awm chu ka ngaih dàn a ni miah lo. Mihring mi ang pângngai a ni ve tho a, mawi tih zâwng nei leh tih châk nei, duh zâwng nei a ni, pastor fanu a nih avànga chûng zawng zawng chu a paih bo vek a nih chuan a tân hringnun hi a nunrâwng lutuk dâwn asin, hringnun nawmna a tem lo tihna a ni dâwn bawk.

"I tih châk apiang min hrilh rawh, ka bulah chuan mitmei vèn a ngai lo ang," ka tih leh chuan," A hmasa berah chuan i țhiante bulah khân min hruai ve phawt rawh, mi chi hrang hrang hi ka kàwm ve châk a, ka pa avànga min kàwmtuho hi chu kan chungah chuan an țha vek mai si a, ka pa nihna hre miah lotute bula tàl ve hi ka châk a ni," a lo ti var a.

A har tawp nâng. A thil châk chu ho ka ti angreng khawp mai a, keia țhiante akâra kawm a châk chuan ka hruai ve mawlh ang, hun remchâng hmasa berah.

"Chuan, pastor fanu ka ni tih sawi lang miah lo tùrin ka ngèn che aw, ka duh min tihsak dâwn nachungin ka duh ka han ngèn leh che chu a nia, ngèn tam lua min ti lo ang chu maw?" inthiam lo deuh hmela atih chuan," Mai mai a, lungngai mah ta che, an hre miah lo ang," ka ti a, làwm hmel deuh hian a nui sak a.

"Țhian fel tak ka tawng che hi chu ka lãwm ngawt mai, a țantìr lam harsa deuh mah se ka inchhîr lo telh telh, a tìrah kha chuan bànsan che kha ka duh rum rum a; mahse, 'tûn țum chauh' tiin ka inla luhlul lui a, tunah hi chuan khatih lai khân ka lo bànsan ang che tih ka hlau tawh viau a ni," a ti leh barh barh a, a hlim hmel leh nui hmel chu hmuh a nuam ka ti, bâkah, ka țhian a nih vànga a làwm chu mak ka ti viay bawk, ka țhian nih vànga lãwm ka tawn vawi khatna a ni miau si a, a mak ka ti lo thei lo a ni.

A tih châk zînga mi pakhat chu a hlawhtling dâwn ta. Sunday lo thleng tùr khi C-a birthday a ni hlauh mai a, làwm pawh ni chiah lovin a pute huana lèn a rawt a, partner a hruai theih dâwn bawk. Mi dangin an partner an rawn hruai leh ngei ang a, Remruati hi ka partner angin ka hruai ve mai ang, ka hrilh fiah ang a, a hre thiam ve mai ang chu. Hmeichheho awm loh hnuah ka țhianteho chu ka hrilh fiah leh ang a, țhian atân an lo pawm ve ngei ka beisei bawk.

*I HUN KAL TAWH  KHA KO KÎRIN HUN BUL ROPUI TAKIN I ȚAN THEI TAWH LO A NI MAITHEI; MAHSE, TUNAH HIAN BUL ȚAN ȚHAIN ROPUI TAKIN A TÀWP I KHÃR THEI THUNG A NI*