☆EARTH ANGEL☆ 4 By Dingdi Pachuau

 ☆EARTH ANGEL☆ - 4 By Dingdi Pachuau

Phone-a hmeichhia ka biak hmasakna ber ni tùrin a number chu ka hmet chhuak a, ka en vang vang leh phawt a, chumi hnuah chuan ka bengah ka chuktuah ve chauh. Nia, phone-ah hian hmeichhia hi ka be hmasa ngai lo, ka bialnute, ka nu leh Mami pawh tiamin, ani hi a hmasa ber tùr a ni.

"Ka hrilh tawh ang che khân lo tlãn la, kawtah ka lo awm ang, i hriat chian loh chuan min rawn be hreh lo la," ka ti a, nimin piah lamah khân C-ate in kal dàn ka hrilh tawh a, a bo bîk êm lo ang chu maw.

Min rawn be buai lovin a rawn inkhalh thleng ve mai a, scooty a dahna tùr chu ka lo hrilh vat a, a dah fel hnu chuan C-a room-ah chuan ka chhukpui ta nghâl a, mi dang an la rawn thleng mang lo va, Mapuia leh a țhiannu an ni rih mai. 

Rei pawh kan țhut hma chuan mi dang pawh an rawn thleng zêl a, ka thiante'n Remruati an hmuha an mitmenga zawhna awm chu ka hmu reng; mahse," Ka țhiannu Remruati a nih hi," ti bâkin ka sawi lo, ka țhiante chu ka chibaitîr zêl a, an bialnute erawh ka sawi lang ve hauh lo nain a chibai tel zêl tho. A nui sâng reng a, a rilru a hlim viau a nih ka ring. Muana erawh a ngai têin amah chauhin a rawn kal a, kan bulah chuan ka lo țhuttîr vat a, vawiina kan bula tâp ber tùr a ni a, Remruati hi kàwm ngeih ve se ka ti a ni. Joseph-a leh Rinawmi an rawn luh hnu rei vak loah chuan huan lam pan tùr chuan kan chhuak ta țhâm țhâm a.

"Ka lo phur mai dâwn che em ni ang? Scooty kha chu hetah dah rih mai la?" ka tih chuan min en hâ a, mak chu a ti ve bawk ang chu. Kan inkawmna a rei ve deuh tawh nain Dusty-ah hian a la chuang hauh lo, ka la phur lo tihna a nih chu.

"Min phur ngam dâwn 'mi?" a tih chuan," Engah nge ka ngam loh ang?" ka lo ti vat a, ani chuan,"E, i bialnu emaw min ti palh ang tih i hlau lo 'mi?" a ti leh a. Ka nui hawk a," I nih loh ahnu, lo chuang rawh," tiin Dusty chu ka tinung a, țhiante an tlàn chhuah vek tawh avàng chuan a inngaihtuah buai rei ta bîk lo, a rawn lâwn ve ta thuai a. Chumi pah chuan," Ka mask ka'n vuah lawk aw," a ti leh a, ka tlan chhuah hma chuan mask chu a vuah leh rih a.

Ka tlàn chakpui vak lo va, a awm țha khawp mai, țawng pawh a țawng lo. Khawpui chhûng huam chin loah erawh ka tlân chak ta viau a, țhiante pawh ka hmu phâk ve țan ta, rei vak lo hnuah huan pêng chu kan thleng a, chuta țang chuan kawng chu a chhe ta deuh a, kan tlân chak thei ta lo; mahse, a lo hla tawh lo hlauh a, a tihzia khawp mai.

Inkawp deuh vek an nih avàng chuan kan bungraw dah khâwmna inah pawh chuan awm rei lovin a hrangin an awm deuh nghâl mai hlawm a, keini pahnih leh Muana erawh chu kan bungraw dah khâwmna in, thlâm ang deuha an sak, lian leh a hmel en aia nuam reuh phian si-ah chuan kan awm ve thung a, rin aiin boruak a lum lo, thlifîmin chhèm heuh heuh vàng pawh a ni mahna.

"In kal hrang ve dâwn lo 'mi?" kuhva țhial nuau nuau chunga Muana'n a tih chuan," Dâwn lo," ka lo ti a, Remruati pawh chuan," Kan inkàwm ang chu," a lo ti ve vat bawk a. Min rawn en tawn chunga," Min vêngthâwng duh suh u, mahnia awm hi chu ka tih țhan a nia," Muana'n a tih leh chuan,"Tawia, card kha i rawn keng ta em?" tiin ka zâwt daih a.

"Keng turin min ti a ni lo'm ni, Eka?" tiin a kekawr ipté ațang chuan playing card chu a rawn phawrh a, Remruati phûr hmel ka hmuh chuan," I thiam ve em?" tiin ka záwt nghâl a. Rang zet hian," Thiam lo ve, min zirtîr chuan ka thiam thuai ang," a lo ti vat a. 

"I thiam lo maw?!" tia Muana'n a zawh chuan nui sak chung hian," Aw, a har viau loh chuan, min hrilh fiah chuan ka tihna, ka thiam ve mai ang chu maw," a ti a, Muana chu a en ràn a, ani pawh chuan," Har lo ve, ka hrilh ang che," a ti ve ta a.

In-bonus dàn chu a hrilh fiah ve nuap nuap a, a hnu deuhah kan pathum chuan kan han ti lâuh lâuh a, thil har a ni lêm lo bawk a, a man thuai mai. Nuam a han ti khawp a, a hnu deuhah Muana chuan inhrem dàn a zirtîr leh bawk a, chu phei chu nuam a tizual a, a dinglama țhu ka ni bawk a, min hremna a neih țhat chuan," Insangphek nasa rawh aw, ka hrem nasa dâwn che a nia," tiin ka bân a rawn bêng thep thep ziah a,  Muana nuih a tiza thei khawp mai.

Mi dang rawn lût pawh chu kan lo ngaihven lêm lo va, kan mamawh lêm lo a ni ber. Kan pathum chuan kan tlei tâwk viau a ni, Mapuia'n,"Muantawi, chance nei thei lêk lovin i lo chelh a ni maw?" ring lèng làwnga a rawn tih chuan kan hawi chhuak ve ta hlawm a.

"Lo ngawi mai teh, ka țang a nia," Muana'n a tih chuan Remruati pawh chuan," Min dìm ve deuh tawh rawh aw, min hrem nasa lutuk a, ka rawl vek tawh a nia," nui chung hian a lo ti a, mi dang pawh chu an lo nui ve a. 

Joseph-a pawh rawn inrawlhin,"Dik chiah, Eksek, dìm rawh, a lêt i tuar mai tùr a nia," a lo ti ve a, a sawi awmzia chu hre chiang  viau mah ila chhâng lêm lo chuan ka nui mai a.

"Engah nge maw in lo inrawlh phêt le, hmelchheho? Ka sa pawh a țhat theih tâk miah loh hi," tiin Muana chuan card chu a han phawk a  a phawk chhe deuh a niang, nûr nung chuna," A va hmelchhiat theih ve le! Zâwng-hmelchheho," tih pahin țial zât hnih hi a paih thla nghâl a, Remruati chuan," E, lungngai mah ta che, a zia chho leh mai ang. Tin, nang pawhin hre thiamin lo dìm ve deuh la aw?" tiin min rawn melh zauh a. 

Hmeichhiain ei tùr an siam a, an siam lai chuan mipaho chu zawi têin kan lo titi a, 'in tùr' inin an infiam pah bawk a. Kei chu Remruati ka phurh haw dáwn avàngin ka lem ve duh rih lo, zàn lam atán ka inkhêk rih. Mapuia'n zawi deuh sapa," Chance neih a khât deuh bawk a, duhthawh a na duh ngei mai," a tih chuan hre thiam tak hian ka lo nui a, a bialnu chhûngte hi an strict ve deuh bawk a,  a fál phei chuan an inhmu khât ve khawpin ka ring, zàn lamah ni se a hmeichhe chhûngte'n inléng neih an la phal si lo va, a la nau ve deuh bawk a, a àwm ve tho mai. Vawiin pawh hi engtin nge chhuanlam an siama an rawn inphurh chhuah theih aw tih ka lo ngaihtuah a ni.

"Nang hi, a thar i nei tih sawi lang miah lovin i rawn hruai a, khawi lam mi nge ni rêng rêng a?" tiin C-a chuan min rawn nék deuh salh a, min rawn en hlawm a ni tih hre mah ila en duh lovin Remruatite lam zâwk chu ka va en a, an lo la buai ve laih laih a, Rinawmi thil sawi an lo ngaithla a nih hmel.

"Ka bialnu a ni lo, ka țhiante in nia, in bula awm ve a châk êm avàngin ka rawn hruai a nih hi, țha taka in kawma in biak ve bawrh bawrh ka beisei a ni," ka tih chuan Muana chuan," A dik chiahin ka ring, a țawng duh reuhin a bula awm pawh a nuam khawp mai, kan lo innêl hman dêr tawh bîk asin," lu bu nghat nghat chung hian a lo ti nuah nuah a.

Ei tùr kan ei lai chuan C-a chuan," Remruat, in chhuak khawthawng ve mang si lo va, ninawm in ti àwm mang e! Khulai deuhah khuan lui tê a awm a, ei tùr ei zawhah zu kal ve rêng rêng rawh u, luiah i kal ngai àwm bîk si lo va," tiin Remruati chu a en a, chutah min rawn en leh a," Chhuahpui ang che, huan kal man a awm dâwn hleinem," a ti leh zat a.

Remruati chuan,"A nuam ngawt ang chu! Lui luang rî àwm ka hre si lo va, a awm lo a nih ka lo ring ve ngawt asin," a lo ti ve mai a, kei chuan," Tûn ang huna lui luang ri hre thei meuh tùr chuan lui lian ve tak a nih a ngai ngei ang, i kal duh chuan kan kal dáwn nia," ka lo ti a. Muana chuan," Zu kalpui ngei ngei rawh, nuam a ti ngawt ang," a lo ti ve a, Remruati chuan," Nang pawh i lo kal ve ang chu, i kal ve miah loh kha. Chuan, mi dangte pawh, in kal leh duh lo'm ni? Kan zu kal leh vek ang chu," nui sâng chung hian a ti leh a.

Nuam a ti ngei mai! Pheikhawk phelh meuhin lui tui chu a dai a, naupang chhe chêt tak hian tui chu a țum per chhak chhak a, a nui pah bawk a. Ka lo en reng thung, thil ho tê nuam a ti thei viau chu ka awt lehling zâwk! Nuam tih ka neih khàt nèn, kan inang lo ve thlâwt a ni.

"Lo dai ve la, a nuam asin! E, taka, hawh thla la ang, selfie ringawt hi chuan kan lang tlêm thei lutuk a, min lo click-sak nghe nghe teh," a ti sauh sauh a, a phone min rawn pék a tum chuan," Ka nei ve, ka lo thawn mai ang che," tiin ka phone chu ka phawrh nghâl a. Ani chuan," Mahse, ka in-pose zei ve vak lo a nia, i duh duh hunah hmet tawp mai rawh aw," a ti leh a, min rawn en lêm lo chuan lung chungah țhuin tui chu a tiper leh chiam a.

Ka hmehsak nual mai," Vawi khat tal chu rawn hawi la," ka tih rual chiah chuan a rawn hawi a, ka hmet leh nghâl mawlh mawlh a, ner nûng hian," Mawi deuha min hmehsak loh vaih," a ti nang nang a, kei chuan," I hmuh hunah ka thiamzia i hre mai ang," ka lo ti thung a.

Haw kawngah chuan nuam a tih thu leh vànnei a intihzia, ka țhiante bula ka hruai a làwmzia thu chu a sawi barh barh a, hmeichheho bula awm pawh chu nuam a tih thu sawiin," I țhiante chu an fel hlawm bawk a, bialnu pawh an nei fel khawp mai. Min hruai tùra ka tih vàng chein i bialnu i hruai lo niin ka hria, a dik tiraw? Ka inthiam lo deuh hlek a," a tih leh chuan,"Engah mah ngai duh suh, chuan, 'i țhiante' ti tawh suh, i țhiante an ni ve vek tawh alawm," ka lo ti a.

"Ni dâwn tak e, an țawng dàn, in inkoh dànte khân ka ko ve châk hlawm khawp mai che u, khatianga inko pha chin kha chu in inpawh takzet bîk tih a hriat a," a ti leh barh barh a,"Engtin nge kan inkoh a?" ka tih chuan," Eka, Eksek, Muantawi, Tawia, hmelchheho," tiin a nui hak hak a, kei pawh chu ka nui ve a. Chutiangin kan inko tih pawh ka lo hre pek lo va, kan inkoh ngun deuh vàng a ni maithei; mahse, ani tân hi chuan thil thar a ni ngei ang chu, a lo chhinchhiah theih dànah mak a ti a ni chiang.

Kan inkàwm rei telh telh a, ka ngaina tawlh tawlh mai. Mi fel lo ka ni a, chuti chung chuan ka fel lohna hmuh kânin țhian fel leh ngainat ber angin min kàwm thei a, hlim lo hmel a pu ngai lo. Mihring ve bawk a ni a, chutah, hmeichhia a la ni zui, rilru hahna eng emaw pawh a neih ve zauh zauh tho ka ring; mahse, a tilang ngai lo. Kei chu kan inah ka hlim lo va, ka mood pawh off châng a tam; mahse, a bula ka awm hi chuan mod off ka hrechang ngai lo.

Rinawmi'n min rawn text a, a tìrah chuan tu tih ka hre lo, a number ka delete vek tawh a; mahse, a thil rawn ziah dàn ațangin ka hre leh nghâl. Chhàn pawh ka chhâng lo, a hnuah phei chuan a message pawh ka chhiar duh ta lo, rinawm lo hmasa kha amah hi a ni, Rinawmi kha a rinawm lo a nih kha. Tunah phei chuan Joseph-a nèn an inkawp lehnghâl a, nunhlui nei dùn kan nih avàngin eng emaw hlek awm thei a ni a, ka fïmkhur a ngai. 

Ka pa nèn kan inkâr chu a pângngai chho zêl. In khata chêng dùn siin kan inhmu khât khawp mai a, Mami ai chuan ka hmu zing deuh ang tih chauh a ni, pawi ka ti lêm lo. Ka nu hi âng peih viau lo se chuan ka khawngaih ngawt ang, a chunga ka pa chêt duh dàn hi mak ka ti a, ka dem viau bawk. A thurûk kha hre chhuak lo ta ila tuna kan inkâra 'inhlatna' ang hi a thleng kher ang em tiin ka inzâwt fo, ka nu ka hrilh lo va, tu mah ka hrilh lo, ka hriĺh a nih chuan buaina tam zâwk a chhuah ka hlau a ni, engtin nge ka awm ang? Ka chhûngkaw neih ve chhun, nuam lo zet hi a keh darh vek mai dâwn asin.

"En teh, i hming hi ka lo ngaihtuah mai mai a, R-o-d lai tak hi paih ta ila, i hming hi a mawi miah lo asin," a tih chuan ka en a, a lo nui sûng a," I ngaihtuah ho a nih chu," tiin a lu-ah chuan ka nem a, ani chuan,"Ka ngaihtuah chhuak țha i tih êm kha aw, i ngaihtuah ngai miah lo ang," a ti leh a. 

"Chutiang mai maiah i thluak kha hmang duh suh, i zirlai kha țha takin zir zâwk ang che," ka ti a, chutah," Zanin chu Záwng-hmelchheho nèn kan inhmu kháwm dáwn asin, i lo kal ve hman ang em?" ka ti leh zat a.

"A, kei chu hmeichhia ka nia, zàna chhuah a mawi ve nâng, mipa hi chu ka ni ve châk ngawt mai! Hawh, innih thleng lawk mai ang hmiang,"a ti a, ka en chuan a lo ner nâng a.

"Eng nge mipa nih i châk chhan?" tia ka zawh chuan," A tam mai, a nih, nang, hmeichhia nih i châk ve ngai em?" a lo ti vat a, kei chuan rang zet hian," Teuh lo mai!" ka ti vat a, ka chhànna avàng chuan a nui nghâl hak hak a.

"Ka zawhna che hi ho i ti thei àwm mang e," a tih leh chuan," Ho lo ve, tûnlaiah khâwvêlah an buaipui luih luih alawm, hmeichhiain mipa nih an duh a, mipain hmeichhia, nang pawhin mipa nih i châk a," ka lo ti duah a, ani chuan rang zet hian," Mahse, ka nih châk ve dàn te chu a dang daih alawm," a lo ti vat a.

"Eng nge a danna chu?"

Ani chuan,"A, a dang a ni tawp mai, min telh ve miah suh," a lo ti ringawt a, a lu tuaisak pah chuan,"Bialnu neih ve i châk 'mi?" tiin ka han fiam zui kher a, a lo duh lo ngang mai, rum zeta min melhin," Teuh lo!" a lo ti vak a, chutah," I țhiante koh dàn khân ka ko ve mai tùr che a nia aw," a ti leh khar khar a. Ami han tih dàn kher chu ka nuih a za ngang mai, nui hawk hawk chung hian," Min han ko chiah la, ka țhian i ni ve tho a ni lo'm ni?" ka ti lêt a, ani chuan min rawn en ràn rán phawt a, chutah," Eka," a ti sap a, a nui chhuak nghâl hak a. Mi dang hriat phâk loh tùr si, kan pahniha hriat nuam tâwk tùr hian," Eka, Eksek," a ti leh țhin a, min ko pah chuan a nui hak hak reng a.

A thil lawm hohzia tak chu! A la hlimpui hlê zui a. A làwmawm, hetiang mai mai hlimpui ve hi ka châk ve zâwk! 

Nilaini zînga ka harh chuan ka rin aiin a lo tlai tawh a, ka tho vat a, ka inphih harh hnu chuan thãwm ka ngaichang phawt a, ka room ațang chuan ka chhuak țham țham a; mahse, ka ding ta chawt a. Inhau thãwm ka hriat vàng a ni, Mami a lo haw em ni? Ka va ring chiah lo êm! Ka han ngaithla chiang a, ka nuin ka pa a lo àn khum zâwk a ni. Eng thuah nge an lo inhau le? Ka nu hian ka pa thurûk kha a lo hre chhuak ve em ni záwk? Ka beng ka han dawh hnai a.

"Engtin nge i tih theih? Nang bâk pa a nei lo, kan thlauhthla ringawt thei hleinem, a têt tê ațanga ka enkawl chhoh a nia, Mami nèn ka en hrang lo..."

Ka chanchin an sawi a ni chiang, ka tawlh lêt zàl zál a, hriat tam ka mamawh lêm lo, room-ah lûtin ka thawmhnaw ka thlâk sawk sawk a, vawiin chu tûkțhuan nghei leh mai ang, ni dangah pawh ka nghei fo alawm. Ka wallet ka en a, vawiin min daih tùr chu ka la nei e, min rawn hmuh hmain hmanhmawh zetin ka chhuak a, Dusty nèn chuan chak zetin kan phit chhuak ta nghâl a.

Hei hi ka chan tùr dik tak chu a ni alawm. Eng nge beisei tùr dang ka neih? Ka nu maw? Mami maw? Ka thisena ka zawm miah lohte hian kei mi sual hi min hmangaih lo ang tih chu hmânah khân lo hriat tawh tùr a nia; mahse, hmânah khân thisenah kan inzawm lo a ni tih ka la hre tlat si lo. 

Ka ding dawt a, ka han hawi vêl chuan Remruati nèn kan inhmuhna hmasa ber hmun kha a ni tih ka hre chiah, engtin nge helai hmun hi ka tlàn thlen ringawt theih a? Class kal tùr khân ka chhuak a ni lo'm ni?  Ka kekawr iptea ka phone chuan ka mal a rawn nghawr dar dar a, la chhuakin ka han en a, Remruati  message a lo ni a.

*Eka, vawiin chu ei tùr ka rawn keng 'cial' tawp aw, a chhan i hria em?* tiin, nui lem tam tâwk a rawn dah tel bawk a. A chhan ka hre hauh lo, vawiin chu amah chauhin a ei a ngai dâwn a ni, kei ka kal dáwn si lo va. Ka thaw hawk a, a hrilh a hai ngawt ang chu, min lo chãng leh ngei ang a, min hmu dáwn hauh si lo.

Thing buk hnuaiah chuan țhuin ka lem mial mial a, eng dang mah ngaihtuah ka duh lo, ka thil in lai chauh lo chu. Ka tih ngai loh thil pawh a ni lo va, ani hi tûn atân chuan ka chaw niin ka rilru min hriat thiampuitu a ni rih, ani chauh hian hlimna min pe a ni, ani chauh hi ka bula awm a ni bawk.

Ka phone riin min tiharh a, engtik laiin nge ka lo mutthlûk ni, ka lu a na tluk tluk maiin ka hre lehnghâl, ka tui pawh a hâl khawp mai, meng țha thei mang lo chuan ka phone chu ka chhâng a.

"Roddick, khawnge i awm daih a? Ka lo nghâk reng che a, class rawn kal i tum lo em ni, Eksek? " Remruati'n a rawn tih chuan ka nui hawk a.

"Vawiin chu ka off ta mai," sehchilh deuh nak hian ka ti a, chutah," Khawiah nge ka awm?" tiin ka han meng chhuak hrâm hrâm a, chutah, hre chhuakin," E, min vin vak kha i la hria em? Khalai hmunah khân ka awm mai mai a nih hi," ka ti leh nawk nawk a.  

"Eng nge chutah chuan i tih a?" a rawn tih leh chuan," Ka awm mai mai ka tih chu, class ka rawn kal dâwn lo, min lo nghâk tawh suh," ti leh nawk nawkin phone chu ka dah ta daih a, ka tep chap chap a, ka tui a hãl tak zet a ni, niin min lo chhun fuh bawk nèn, ka thlan ban chup mai. Intiharh luiin thing buk hlim lam pan chuan ka tawlh a, ka lu hai chhawlh lah chu a na deuh tluk tluk bawk a.

"Roddick, harh teh?"

Chu aw ri chuh! Ka han meng diar diar a, fiah lo ruaiin Remruati hmel ka hmu, ka mumang a nih hi.

"I  ni tak tak teuh lo!" tiin ka han ban deuh zuau zuau a; mahse, a reh leh daih a, chutah, ka hminga min ko ri ka hre leh ta.

"Harh teh, min tihlauthãwng a nia."

Ka han meng kâwk a, ka hmuh fiah theih nân ka han khap leh fak fak a, Remruati hmel chu ka hmu thei ta, a hlauthâwng hmêl a ni ka hmuh ni, eng nge a hlauh ni? A hlim hmel chauh a nih kha ka hmuh țhin.

"Eng nge i hlauh a?"

"Nangmah hian min tihlauthãwng maw le! Eka, engati nge hetia i awm? Ka hlauhthàwnzia chu, College ațangin ka rawn tlân char char a nih hi aw, kawng tluanin  i tân ka rawn țawngțai char char, khàmah zuanthlâk i tum a niang ka ti a," țap aw deuh pàra a tih tâkah chuan ka harh chiang sawt sawtin ka hria!

*I SAWI CHHUAH HMAIN 'THU DIK A NI EM', 'A PAWIMAWH EM' TIH LEH 'CHIA AL HMASAK A NI EM' TIH NGAIHTUAH HMASA PHAWT ȚHIN RAWH*