☆EARTH ANGEL☆ - 5 By Dingdi Pachuau

 ☆EARTH ANGEL☆ - 5 By Dingdi Pachuau

Ka nui hul hak a," Chutiang ka tum hauh lo aw," tiin thawh ka tum  chu min lo pui vat a," Tui i nei mial lo maw?" tiin ka zâwt zui zat a. Rang zet hian a scooty lam pan chuan a tlân vat a, tui bottle hi a chhìn hawn sain min rawn pe a, tui ti zet hian ka in ta khawlh khawlh a, ka in zawh chuan ka harh huai huaiin ka hria.

"Engati nge class i rawn kal loh a? Ka lo thlîr reng che a," min hmachhawn zawnga a țhut siah avàng chuan a hmel en loh a har khawp mai, min en reng tih lah chu ka hre reng bawk si; mahse, ka en duh lo lui tlat. Pastor fanu a ni a, ka nun dàn leh ka khawsak chhoh dàn hi a hre thiam ve hauh lo ang, ni lo, a hre thiam lo mai ni lovin mak min ti viau zâwk ang.

"Ka lo kal lo mai mai."

"Min hrilh duh loh chuan a pawi lo, ka zâwt lui bîk lo ang che; mahse,  hetah i awm a ni tih ka hriat khân ka ngaihtuah lutuk che a-" a tih lai chuan," Ka bialnu pawh i nih loh hi, engah nge min lo ngaihtuah ve chiam a?" ka ti nghat a.

A ngawih tâk daih avàng chuan ka en ve ta chauh a, hnuai lam a lo en daih tawh a, a zak a nih ka ring ta ringawt a; mahse,"Ka țhian i ni alawm, engah nge ka ngaihtuah loh ang che?" a rawn ti chhuak ta sap a, chutah rawn hawi chhuakin," I ril a țâm em? Chhùna kan ei tùr atâna ka pai pawh kha ei lohin a la awm asin," a ti leh daih a.

"A țâm lo, nangmah khân ei rawh," ka ti a, amah pawh en tawh lo chuan ràl hla taka tlâng chu ka thlîr a; mahse, ka hmu chuang hauh lo. Ka ril a țâm lo va, titi pawh ka châk chuang lo, eng mah ngaihtuah nei lova awm ka châk ber mai.

"I ei duh loh chuan ka ei duh bîk lo. Vawiina ei tùr hi uluk taka ka siam a nia, a tui viau dâwn asin. I ril a țàm hunah chuan sawi mai rawh aw," a ti leh sârh sârh a, lungawi lo awka ri ka hre lo. Ka ngawi reng a, ngaihtuah neih loh ka tum viau nain ka rilru chu a chàwl thei hauh lo, tukina ka nu țawngkam mawlh mai kha ka ngaihtuah lêt a, kei chu mi chuang, fa atân an lâk mai ka lo ni. Fahrah in ațangin min la nge ni ang a, min hringtu ka nuin min duh lo zâwk ang? Nge a thi tawh zâwk? A thih tawh phei chuan min hringtu ka pa chu kei hian engtin mah ka hre chhuak thei miah lo ang. Ka nu hi thu dik tak chu ka zâwt mai dâwn em ni ang? Ka hria tih hi a hre tawh ang em? Ka pain a hrilh tawh ngei ang, a țawng dàn ațang khân a hrilh tawh ngei a niang, ka thaw hawk a.

"Roddick, min hrilh duh i nei em?" Ka bulah a awm a ni tih ka lo theihnghilh hmin dèr tawh, ani hi hrilh ta ila, eng nge hnemhnànna tùr? Awmzia a awm lo, min khawngaih ka duh lo, ka chanchin hi hre tùrin ka duh hauh lo bawk, thil țha lam pawh a nih loh hi.

"Eng mah a awm lo."

Chutah, hre chhuak thutin," Min hawsan rawh, class kal pawh i la ngaih kha," ka ti leh a, a lam ka hawi pah bawk a, ani erawh chuan," Vawiin chu ka off ve mai ang, hetia awm hi nuam ka ti zâwk," tiin min lo chhâng a. En pawh min en lo chuan a hawi kual ta daih a, chuti a nih leh, a pawi lo, a duh chuan lo awm ve mai mai teh se, a țawng vak loh chuan a țha a ni mai.

"Keimah vàng chuan class i țhulh ringawt thei lo ang," ka ti leh nuah nuah a, thing buk hlimah țhu mah ila ni sa vàng chuan men a har khawp mai. Ani lah chuan," Nangmah vàng pawh ni chuang lovin nuam ka ti ve hrim hrim alawm," a lo ti ve leh bawk a, eng mah ka sawi ta lo.

Rei zet chu țawng miah lovin kan awm, ka phone a rawn ri a, peih lo zet hian ka phawrh a, ka nu a ni tih ka hriat chuan ka en vang vang a, a thil rawn sawi tùr ka rin lâwk thiam avàng chuan chhâng duh lovin ka hmet tàwp ta daih a; mahse, a rawn ti nawn leh tho. Chhâng duh lovin ka hmet tàwp leh a, ka tún boruakah hi chuan biak ka duh lêm lo.

"A pawimawh a niang, chhâng la, ka kal sawn thei alawm," Remruati'n a lo tih chuan," Company a nih kha," ka ti vat a, ka nu chu Company-ah ka chhuah ta dèr a nih chu.

Nilêngin chu hmunah chuan kan awm a, ka biak loh chuan min be bîk lo, hmeichhe țawng duh zet ni siin ka boruak min hriat thiampuia a țawng țeuh lo chu ka lâwm khawp mai. Class bàn hun a lo nih chuan kei pawh ka inngaihtuah harh viau tawh a, ka ril a țâm ve ta viau nghe nghe bawk a, ani pawh hian eng mah a ei hauh si lo va, a ril a țâm ngawtin ka ring.

"Haw tawh rawh, class bàn hun a nih tawh hi," ka tih chuan," I la haw bîk si lo va," a lo ti a, "Ka duh hunah ka haw ve mai ang," ka ti leh a," Aih, kei pawh ka duh hunah ka haw ve mai ang, a nih loh chuan i haw hun hunah a ni mai," a ti leh zêl a. Kei chu haw ka tum rih lo, inah phei chuan zàn reiah chauh lo chuan ka haw lo ang; mahse, he nu tê hi a luhlul ve hmel tlat, hetiang a nih chuan a thim thei mai ang, a chhûngte'n an lo ngaihtuah lutuk dâwn asin.

Ka hawpui ta nge nge a, an in bul thlenga tlànpui ka tum chuan a duh lo va," Inah i thleng tlai lutuk palh ang, eng thil emaw sawipui tùr i duh chuan min rawn be rawh aw," tiin nui sêngin min chah thlap reuh a, a nui hmel nain min ngaihtuah tih chu ka hre thei chiang. Kan ințhen hnu chuan ka tlãn kual mai mai a, ina haw ka duh loh avàngin inhnawh puarna tùr ka zawng phawt a, ka lêng kual leh. Ina ka haw chuan zàn dâr 11 a ri thuak tawh, ka kawng 'bangah' chuan lâwn lehin ka kawngkapui 'tukverh' ațang chuan ka lût leh țham țham a.

A tûkah chuan ka zia ta viau. Vawiin phei chu ka pa chhuah hmà ni a ni lehnghâl a, a zin dâwn a ni, zin vang vang teh se. Pawisa ka hman zawh tawh avàngin ka nu 'ipte' ațangin lâk rúk ka ngai leh tawh, amah nèn kan inhmu fuh hlauh a nih erawh chuan petrol man tùr ka dîl mai ang.

Ka phone-a dâr zât ka en chuan ka tho chhuak nghâl vat a, sual viau mah ila class kal hi chu ka pianthar vena lam a nih vàngin țhulh mai mai hi ka duh ngai bîk lo, țhiante rin tùr ka nei ve bawk si lo va, kei leh kei lo ang takin ka regu ve êm asin. Whatsapp message lo awm vàng chu ka han en a, Remruati a lo ni a. Nizàn lama chhiar daih tawh tùr a lo ni nghe nghe; mahse, eng nge, ka hmu ve chauh a ni mai a, nizàna min mangțhana zíngah ka chhiar ve chauh. Nimin lam khân keimah vàngin class kal lovin rilțâm takin a awm si a, vawiin chu thuphâ chawi a ngai.

Pawisa dìl ngai lovin ka nuin pawisa min pe ta hlauh mai. A vawi khat nân ka ti mai, min àn khum miah lo bawk, mak ka ti hial zâwk; mahse, a chhan ka zâwt chuang lo. 

Dàn ngai têin Remruati chuan Dusty ka hûng fel chiah tihah chuan hlim hmel tak pu chung hian min lo be leh ngei a, kei pawhin nimin lam boruak dah țhain ka lo chhâng ve a, chhùn chawlh hun laia hruai chhuah ka tum thu erawh ka hrilh duh hauh lo, a hunah chauh mak ti ve rawh se.

Ka rin ang ngei chuan mak a ti ta ngei a; mahse, a hlim hle tih ka hria. Ka phurh duh lovin a scooty a khalh chhuak tlat thung a, restaurant-ah luhpuiin a ei châk zâwng, a duh duh lam tùr chuan ka ti a. Nui var var hian min en ang hê hâw a," Vawiin chu i piangthar țha tlat, i phal bawk a, ka ei țeuh dâwn a nia," a ti sauh sauh a, menu chu lain a thlêk nghâl vat vat a.

Thil ei lai chuan a naupan lai hun hlimawm deuh deuh a sawi chhuak a, a pa pastor a nih avànga hmun hrang hranga an awm țhin thute chu sawiin thingtlâng hmun kilkhâwr ber bera an khawsak dànte chu min hrilh siam siam a, ngun takin ka lo ngaihthlâksak ve bawk, țawng hi chu nuam a ti ve ngawt mai; mahse, a inhmeh ka ti ve tlat, a țawng barh barh loh hi chuan amah a ang lo tlat a ni.

"Roddick, class i kal nange a?"

Kan bul maiah chuan a lo ding tawh niin, ka lo hmu miah lo, a lo chàwl ve reng a nih dâwn hi, engah nge maw min rawn biak kher ni? Ka biak peih loh bâkah a hmel hmuh pawh hi ka peih lo.

"Kal." A tãwi tek tawk viau a ni, a phû tâwk chiah bawk.

"Ka lo țhu ve lawk mai aw, Joseph-a rawn thlen hma chu," tiin ka bula țhutna âwlah chuan a rawn țhu thla ve nghâl zat a, Remruati chuan nui sâng chung hian," Lo țhu rawh, i rawn lût chauh a ni maw?" a lo ti vat a, kei erawh chuan biak chhunzawm ka tum hauh lo.

"Aw, ka rawn hmu vat che u a," tiin ka lam a rawn hawi a,"Nichîn khân i u ka rawn hmu a, inah a rawn haw hnai êm? Ka ko va, a hre lo a nih ka ring, min chhâng si lo va," a ti leh  nghâl bawrh bawrh a. Chháng lovin ka en ràn ringawt. Remruati bula hetiang sawi chhuah hi ka duh lo, ka chhûngte chanchin ka la hrilh hauh si lo va. Ani nèn pawh hian ka duh aiin kan lo inhre chiang mah mah a ni, kan lo inkawp rei ve deuh bawk nèn, duh aiin kan chhûngkaw chanchin a hre deuh mah mah, tunah phei chuan lo inrawlhna tùr a nei tawh hauh lo.

"I buainaah chauh buai rawh," ka ti nghut a, Remruati chuan mak tih hmel deuh hian min lo en a, Rinawmi erawh chuan," A nih tak chu, ka tihpalh dêr a ni," tiin a nui pah hak a, a țhutna ațanga tho nghâlin," Tui deuhin ei rawh u, Remruat, i țhianpa hi chu i dawh hrâm hrâm a ngai ang, a thin hi a chhe ve deuh a," a ti a, ani chuan,"'Ngah nge i thawh ngawt? Joseph-a pawh a lo la kal loh hi?" a lo ti a, Rinawmi erawh chuan," Dawhkàn hran ațangin ka lo nghâk zâwk ang e," a ti a, a kal sawn ta nghâl a.

"Engati nge khatia i tih? I țhianpa țhiannu a nih kha," Remruati chuan rawn kûn hnai deuh hian a ti sar sar a, kei erawh chuan ka chhâng lo. Kan boruak zângkhãi tak a rawn tichhe vek chu ka run khawp mai, rawn tihchhiat tum hrim hrim a nih ka ring bawk. Remruati hi ka bialnu a ni lo tih a hre hauh lo va, hrilh pawh ka tum hek lo. A hmun ruak rawn luahtu nia ngaiin țha àwm takin be mah se a thîkin a er a ni tih a message ațang khân ka hre ve bawk e. Remruati hi chuan kan nunhlui kha a hre ve lo, ka țhiante lahin an hrilh hauh lo bawk ang.

"Joseph-a rawn thlen hma chu lo țhu ve se, kan hriat ngai loh mi pawh a ni chuang lo va," a tih leh sap sap  chuan," Buaipui duh suh, i ei tùr kha ei leh tawh rawh," ka lo ti thung a. Min rawn en vang vangin," Engati nge hetiang hian i awm thut a?" a ti leh sap a. Kei erawh chuan chhâng lovin ka nuih lui sak ringawt a, sawi duah ai chuan ngawih hi ka thlang mai.

Mami number hi nei mah ila ka be ngai lo. Rinawmi khân dâwt a sawi ka ring hran lo, inah a rawn haw ngai lo va, a lo haw zauh a nih pawhin ka awm loh lai talin a niang, ka hmu khât khawp. Hetia ka chhuah hian ka mit ka lèn ve pah reng a, ka u a nih miau avàngin hmeichhe dang angin ka thlauhthla ringawt thei bîk lo.

Mahse, mak tak maiin Inrinni zînga ka thawh chuan Mami chu kan inah a lo awm reng tawh a, ka nu nèn sitting room-a an lo titi ka hmuh chuan," A rawn haw tak tak tawh tihna em ni le?" ka ti rilru a, ka nu chuan," I pa zin chhûng tal hi chu awm ve rih tawh ang che, i nau lah inah hmuh tùr a vâng si, ka fate hmun danga in awm daih hian ka rilru a hahdam thei lo," a lo ti bawrh bawrh a, Mami erawh a lo ngawi reng thung a. Ka awmna ațanga ka kal sawn tùr chu ka nu chuan min rawn hmuin," Lo kal teh, i u pawh a rawn haw hi, chhuak bo nghâl daih lovin tukin chu tûkthuan kan kîl tlâng ang, kan kîlho lohna pawh a rei tawh lutuk," a ti leh a, hnial ka tum hran lo. Kum eng emaw chhûnga ka u ve ngawih ngawih țhìn kha a rawn haw a, tunah inpawh tawh lêm lo mah ila vawi khat chawhlui kîlho na nâ nâ chu ka hreh lo ve.

"Engtikin nge i lo haw a?" tiin Mami chu ka bia a, ani chuan,"Nizàn khân, i la rawn haw lo ang," a lo ti ve mai a, nia, nizàn khân ka lêng rei leh deuh a, ka haw chuan kan in chu a reh țhap tawh a ni.

Kum eng emaw zah hnuah kan nufa thum chuan chaw kan eiho leh ta a; mahse, nuam tihna ka nei chuang lo. A chhan chu he chhúngkaw thisen zawm hi ka ni ve tlat si lo va, ka taksaah hian thisen dang a luang bîk tlat si a ni, ka hriat hma kha chuan kan in nuam ti lo viau mah ila ka nu leh pa min hauhna kha engah vak ka ngai ngai lo  a nih kha; mahse, tunah chuan mikhual, pâwnlam mi angah ka inchan deuh tlat tawh a, an hmel hi hmuh tam loh ka tum a ni ber mai.

Room-a ka insiam lai chuan Mami a rawn lût ve leh tlat a, ka lo en reng ringawt. Ani hian a nau dik tak ka ni lo tih hi a hre ve ang em? Nge chu chu min hrilh tùrin a rawn lút zâwk? Khumah chuan a țhu thãn a, tukin pawh hian a mit a hnawih dum leh tawh khawp mai.

"Rinawmi khân a phatsan che a ni maw?" a rawn tih chuan ka en hau ringawt! Engtin nge a lo hriat ve ni? Kan inzui tih kha chu a hre ve ngei alawm, kan inzui rei ve thawkhat bawk a, ka nute erawh hi chuan an hre kher lo maithei.

"A chanchin sawi lo teh ang, ka pa zin chhûng chu awm ve tak tak rawh aw," ka ti ta zâwk a, a țhiante in emaw khawi lai hotel tih vél emawa awm kual mai mai ai chuan awm se țha ka ti, hmeichhe tân phei chuan awm kual dun dun a mawi lo. 

"Min ngaihtuah suh u ka tih kha, kei chu mi sual ka nia," a tih lai chuan," Kei pawh ka sual ve tho," ka lo ti vat a, min rawn enin a nui sak a,"Mi sual i ni hleinem, zu in hi i bànsan theih phei chuan..." tiin a ngawi ta daih a, tlêmin ka zak deuh.

"Rinawmi chu, in inkawp tawh loh chuan a țha e, kawp tawh miah suh, a lêrh êm mai," tiin a nui leh hak a," Mi țha ni miah lo pawh hian mi țha lêm lo hi chu kan hre ve thei tho chu a nia, sawi thei dinhmunah ka ding miah lo nain ka sawi tho si, he khawvêl tak hi chuh!" a ti leh vang vang ringawt a, chutah," I la naupang a, khawvêl thil hian intibuai ve miah suh, hlimna tak tak a awm miah lo, hlima i inhriat poh leh i hlim lohzia i hre chiang telh telh mai ang," a ti leh a.

"Kan bulah awm ve tawh la?" ka tih chuan," Țha takin lehkha hi zir la, nangmahin inchàwm theih i tum dâwn nia, chutih hunah chuan i bulah ka rawn awm ve ang, ka thil hrilh hi hre reng ang che," tiin a tho tharh a, ka room ațang chuan a chhuak ta nghâl a. A chhuah hnu pawh chuan che lovin ka awm ngaiin ka awm reng a, Mami thil sawi chu ka ngaihtuah rauh rauh a ni. Kan inhmu khât a, kan inhmuh chhunah min han zilh ve a ni a, țha taka lehkha ka zira mahni incháwm thei khawpa ka hlawhtlin hnuah ka bulah a rawn awm ve dáwn a ti a nih kha, a ti tak tak ang em? A nau tak tak angin min la en reng tihna a ni ngei ang.

Ka nu hmel hmuh pawh a nuam ta deuh. Min àn khuma min hau reng țhin kha a ni a, ka pa a àn khum ațang kha chuan rilru hrehawm khawpin min àn khum tawh lo, ka hmu tam duh lo hrim hrim zâwk a, ka hêl hrâm hrâm tho. Min hmangaih ve chuan ka hre deuh, min hmangaih lo se kum heti chen min enkawl peih lo tawp ang.

*******

Exam kan hnaih leh ta, kâr khat chauhin min dang rawh, tlêm chuan ka țang ve ta deuh a, zànah pawh chhuak lovin ka inkhung ve ta deuh, lehkha thiam tak ni lo mah ila exam hi chu ka huphurh ngai bîk lo.

*Zanin chu i chhiar ring àwm hle mai, i lehkha chhiar ri kan in ațangin ka rawn hre thei a nia*  tia Remruati message ka chhiar chuan ka nui sak a, thil âwihawm loh leh nuihzatthlâk lam hi a uar ve viau a ni.

*Ka chhiar ring lui a nih kha, țha tak khân zir rawh, phone khawih suh* tiin ka chhâng lêt ve a, a hmuh hunah chuan a duh lo ngawt ang chu.

Chutih lai chuan ka room kawngkhàr chu a rawn ri dawt dawt a, ka kalh avàng chuan hawng tùrin ka va tho chhuak a, rin loh deuhin ka pa a lo ni a.

"I u a chatthla chiah an ti, ngaihven tùrin ka chhuak nghâl dâwn a nia, i nu lo ngaihven rawh," a ti ram hmak a, a kal sawn leh ta nghâl daih a, ka ding khawng reng ringawt, ka thu hriat chuan min țhâwng kher asin, engtin nge Mami chu a thih ringawt?  A ni lo ang, a sawi sual a niang, thil awm dàn zawh fiah theih pawh a ni lo, a bo leh nghâl daih si a. Chutah, ka nute room ațanga țap ri rawn chhuak chuan nichina ka thu hriat kha a dik ngei a ni tih a rawn nem nghet ta ngei mai. Mipa mah ni ila Mami thih thu chuan min țhâwng viau mai, ka rilru a timang chhuih mai a, ka dinna ngaiah rei fé chu ka din phah a ni.

*MAHNI INTHIAR FIHLÌM TUM CHUANG LOVA THLÈMNA EMAW THLÈMTU EMAW KAN CHÂKNA EMAW LA KIANG TÙRA KAN DÌL FO CHUAN HLAWHTLINNI HMÊL KAN HMU THEI NGAI LO ANG*