☆EARTH ANGEL☆ - 7 By Dingdi Pachuau

 

☆EARTH ANGEL☆ - 7 By Dingdi Pachuau

Journal chu ka han chhiar chhunzawm leh dâwn a, a phêk lehlamah chuan eng mah a inziah loh avàng chuan ka keu leh a, a phêk dawt chiah erawh chu a phêk pumpui deuhthawa pawhthlâk a ni thung, a phêk pawhthlâk tel loh, tlêm têah chuan Mami hawrawp dik tak chu ka hmu leh a; mahse, a thil ziak chuan awmzia a nei tam lo khawp mai, tuin nge maw pawtthla ni? A pawhthlâka chu khawiah nge a awm ang? 

'He hringnun hi chu' tih ka chhiar thei a, a hnuaiah chuan 'ka nu leh' tih ka chhiar leh thei a, chumi hnuai lehah chuan 'pâwn' tih ka chhiar leh thei a, 'an' tih leh 'm' tih a lang leh a, chu zawng chu chumi phêkah chuan hmuh theihin a awm, hêng thu chhum bung tê tê zawmna chhiar hi ka va châk tehlul êm! 

Ka chhiar chhunzawm tawh rih lo, zanin atân chuan ka thil hriat hi tâwk ka ti rih, dik tak chuan thil țha lo dang ka hre chhuak leh ang tih ka hlau tawh a ni. Muhìl thei lo chuan ka mu meng kar a, pahrawn tih mawlh mai chuan ka ngaihtuahna a luah a, Mami hi ka pa fa a nih loh chuan ka nu fa bîk a ni tihna em ni? Chu chu lo ni ta pawh ni se, ka chanchin, ka nu leh pa fa ka ni lo tih chu a lo hre ve chiang mai a; mahse, khâng hun chhûng zawng khân vawi khat tê mah a thisen zawmpui ni lo angin min en hauh loh bâkah țawngkam khat pawhin a sawi chhuak lo a nih kha. Muhìl thei lo chuan ka let ka let a, zînglam dâr 3 pelh hnuah erawh ka maimichhîng lui ta tlat a, a hnuah chuan ka lo muhìl ve sek a lo ni.

Țhiante bula ka awm ve pawhin a hma ang khân ka hlim thei tawh meuh lo va, chuvàng chuan zu in tam lamah ka țuan a, ka ruih theih țhin loh avàngin ka in nghek mai țhìn, ina ka haw theih loh leh C-a bulah ka riak tawp mai a, țhiante ina riak chhuak ni mah ila, exam chawlh lai ngang a nih vàngin ka nu pawhin min hau ngai lo. Remruati a zin daih a, min rawn biain min rawn text fo mah se a châng chuan ka chhâng peih lo fo, țawng peih miah loh zàn ka nei țhin a, chutiang hunah chuan Mami journal chu melh rengin ka hmu ngai lo thung. Ka ngaihtuahna a kual nasat avàngin phone ri pawh ka lo hre lo țhìn bawk.

Ka țhiante bula eng thil mah ka sawi chhuah ngai loh avàng erawh chuan Rinawm vànga ka rilru nâah ngaiin Joseph-a hriat loh chuan min hnèm țhin a, chu chuan min nuihtîr fo zâwk a, a zia phian. Joseph-a pawhin Rinawmi vàng niin a ngai deuh tho chuan ka hria; mahse, țawngkam khat té pawhin a sawi chhuak ve lo thung. Ka rilru chhûngril an hre lo lutuk leh an mi hnemna chuan ka nuih a tiza lo thei lo; mahse, thu dik hrilh tumna ka nei chuang lo, an ngaih ngaihin ngai mai mai teh se.

*******

"Ka lo haw tawh a, thil țha deuh ka lo hawn che aw, naktûk chu chhuak ila, khua a țhat chuan?"

Phone-call ni lovin message chu ni se chuan ka chhâng miah lo ang; mahse, amah zâwkin min rawn call-in min rawn zâwt miau mai si a, han hnial dawt chu, a rilru a nâ ang tih ka hlau ve deuh a, bâkah, thil min lo la hawn zui a, lãwm viau tùr zâwk niin ka inhria, hnial chu thil mawi pawh a ni lo.

Ka thil ngaihtuah avàng chuan ka chhâng har a ti a niang," I peih lo deuh a nih chuan a pawi-" a tih lai mêk chuan," Peih e, eng thil nge min lo hawnsak chu ni ang aw tih ka lo ngaihtuah vang vang a," ka ti ve ta zaih a, ka chhuanlam chu dik zaih angin lang mah se tlêm chuan ka inthlahrung ve det.

"Thil ho tê mai a nia, i beiseina kha lo tisâng lutuk lo la," tiin a rawn nui hak hak a, chutah,"Sawi tùr ka ngah teh mai a nia, hmanhmawh lovin inhnawh puar tùrin Insomnia-ah khân kal leh phawt ila, chuta țang chuan kan lêng chhuak dâwn nia," a rawn ti leh barh barh a, a phùr hmel êm avàng chuan phûr lo deuha chhàn chu ka duh bîk lo," Aw le, aw le, hmeichhe țhian ka nei tih ka lo theihnghilh leh țêp țhìn, hmeichhia hi chuan inhmuh loh hlek chhûng hian sawi tùr hi in ngah ve thei a," tiin ka nui ve hawk a.

"Ni ang chu, nang pawhin min hrilh tùr i lo khâwl ve țeuh tawh ang chu," tiin a nui leh hak hak a, a hlim hmel tùr chu ka mitthlain ka hmu thiam, a hlim reng thei hi a mak ve ngawt mai, mi mak tak chu a ni vein ka hria.

Kan inbiak zawh hnu chuan C-a'n min rawn be ve leh zat a,"Eka, i rawn kal dâwn nange? Kan nghâk reng che a nia," a rawn ti nghâl a, dâr zât ka han en a, dâr 8 a ri țêp tawh a, lèn chhuah nân chuan a tlai deuh tawh chu ka ti; mahse, min lo nghah reng si chuan han kal loh ringawt pawh chu, zan dangah chuan tûn ang hunah hian inah ka awm tawh ngai lo, min rawn bia pawh chu a àwm lo lêm lo ve.

Ka chhuak tùr chu ka pa rawn haw ve chiah nèn chuan kan intâwk a," Riak chhuak tawh suh ang che, i nu i tikhawngaihthlâk, nangmah chauh inngaihtuah suh, nangmah bâk innghahna a neih loh hi," a lo ti nghut a, chhàn pawh chhâng lo chuan ka chhuak zui nghâl a. A ti mak chu ka ti, kei hi a fapa dik tak ka ni lo va, ani hi ka nu pasal a ni a, a innghahna ber tùr a ni zâwk ang chu, innghahna tlâka awm tùr a ni zâwk alawm, kei ni lovin. A bialnu hmu tùra chhuak chhuak lo hian zàn lamah tal hi chuan a nupui bulah awm tam ve se, a hnèm ve viau ang chu. Ka nu lah Mami thihna avàngin a ngawichawiin a hlim hmel hmuh tùr a awm si lo, kan in chhûng hi a reh ngawih ngawih tawh, a hmaa ka nuin  min àn khum bawrh bawrh țhìnte kha hriat leh tùr awm leh ta zâwk se...Ngaihtuah chhunzawm duh tawh lo chuan ka lu ka thing nawk a, helmet chu ka khum zui nghâl a.

Ka va thlen chuan an lo kim țhap a, picnic an lo rêl a ni maithei, Muana chuan," Naktûk chu i hman ang tiraw? Hei, chhuah kan lo rêl a, class țan a ni leh țêp tawh si a," a ti a, a kuhva ei chu a țhial nuau nuau a. C-a pawh chuan," Nia, kan chhuakho khât leh tawh dâwn si a,bâkah, khaw țhat laite hi chàn ve a ngai a, " a lo ti ve a.

Naktûk, eng nge tih tur ka neih ka han ngaihtuah phawt a, Remruati chhuahpui ka lo tiam tawh tak, ani tê hi hruai ve ta zâwk ila, nuam a ti zâwk ang em? Ka țhiante chu a țhiante tho a ni si a; mahse, a rem leh si lo ang, a tûkleh lamah ni ta záwk se...

"Naktûk chu ka hman loh hmel riau, a tûkleh lamah te hian ti ta zâwk ila?" ka ti a, min lo en țhap mai tih ka hmuh chuan za lo fêa nui sak chung hian," Ka hman lo ve thei tho tih hria ula?" ka ti leh a, a ni ve lah tak a, hman loh tih hi ka nei khât ve êm a, mak tia min en pawh hi thil àwm lo a ni miah lo, dik tak chuan Remruati vàng vek a nia, ka lo 'aw' ve tawh vàng a ni.

"Naktûk țhulha a tûkleha chhuah chu a pawi viau dâwn em ni? Hman lo tùr kan awm em?" tiin C-a chu a han hawi kual a, țhian tlêm tê akâra pakhat chauh pawh kim lova chhuah chu kan duh lo țhìn rêng a ni. Mi dang pawh chuan an hman loh tùr thu an lo sawi hran lo, kan thutlûkna chu a tûkleha chhuah chu a ni ta a, khua a țhat phawt chuan. Joseph-a thil rawn ken chu kan in thliah thliah a, ruihna tham pawh a ni lo, ka duh khawp lo kher mai; mahse, a pawi lutuk loah ngai mai ang, naktûka ka rim chhiat vung vung chuan a fuh ber dâwn si lo va.

Remruati nèna inhmu tùr chuan ka chhuak ta a, khua a țha a, a làwmawm khawp mai. Ka phûr fahran lo va; mahse, ka lo 'aw' tawh avàng khân țhulh leh ka tum bík hauh lo, a phùrna tihchhiatsak ka duh lo a ni.

Kan inhmuh chuan ka nuih sak a, ani pawh a nui ve sak a, țawng lova min en vang vang phawt hnuah chuan,"I hmel hmuh a nuam lo viau dâwn emaw ka ti a," a ti sap a, kei chuan," Engah ngawt maw? Ka ngaih viau che avànga chaw pawh ei țha thei lo leh lo tla kuam tùrah min ngai em ni?" nui chung hian ka ti a.

"Chutiang deuh tùrah chuan ngai e," nui chung vêk hian a lo ti ve mai a, chutah, a hnunga a bag ah chu bêng thap thapin," Khawiah nge lèn i duh? Insomnia-a kal ringawt lah chu, ril a la țâm rih si lo va," a ti leh a, kei chuan," I tihna hmun apiangah a ni mai, nang, zin bo daih i ni bawk a, han thlang zâwk rawh khai," ka ti a.

A duhna hmun a sawiah chuan kan kal a, hmeichhia tih takah thil ei pah chuan a zinna hmuna a thil tawn chi hrang hrang leh a chêt chhiatna a sawi a, amah chu a nui hak hak reng bawk a, ka țawng ve mang lo. A titiah erawh ka lo nui ka lo nui ve thung, a chêt chhiatna a sawi chu a inhmeh lo ka ti, amah pawh chuan," Ka tlâw leh tlat zêl a, bâkah, ka ril kha a țâm lutuk tawh a," tiin an chaw eina hmuna a chêt chhiatna chu min hrilh malh malh a.

A hnuah chuan," Thil min hrilh tùr i nei ve ang chu tiraw? Ka țawng char char a, i țawng ve hun a ni tawh," tiin min rawn en phei a, kei erawh chuan," Nei hran lo, hmeichhia ka ni ve lo va," ka lo ti thung a. Ani lah chuan," Hmeichhia nih vàng ringawtin sawi tùr kan ngah bîk tihna pawh a ni hran lo, sawi ve rêng rêng teh, i duh duh sawi rawh," a ti leh tlat a.

Insomnia-a kan luh dâwn lai chuan Joseph-ate pahnih rawn chhuak nèn kan intâwk ta chat mai, dingin kan inen dùn rân a, chutah," Tu emaw hman lo ve bawk chuh!" a rawn ti chhuak ta sup a, Remruati chuan a ngaihna hriat loh hmel deuh hian min en a, chutah, Joseph-ate lam chu nui sânga en lehin,"In chàwl tawh bîk elo?" a ti ta vat a.

Rinawmi chuan,"Remruat, vawiina picnic an tum hi nangmah vàngin an țhulh phah tih i hria em?" Remruati melh rân pah chuan a ti ta a, kei chu lo inrawlh vatin," I țawng kha fîmkhur rawh aw, ani vàng hi hi a ni lo, keimah vàng a nih kha," ka lo ti vat a. Hriat thiam loh hmel tak hian Remruati chuan min rawn en leh a, a ngaihțhat nân ka lo nuih sak a.

"Sawi dik loh ka nei lo," a lo la ti țâlh a, kei chuan,"I inrawlh lohna tùrah lo inrawlh suh," ka ti leh a, Joseph-a chu enin,"'Ka hman lo' ka tih chuan ka hman lo a ni mai, sawi tùr vak a awm lo," ka ti leh a, chutah, Remruati chu kàiin ka kal sawnpui ta nghâl a.

Ei tùr kan order hnu chuan min en zak zak pah chuan," Ih, Rinawmi thil sawi kha, eng nge a awmzia?" a ti chhuak ta nge nge a, kei erawh chuan," Eng mah a ni lo, engah mah ngai suh," ka lo ti vat a, a ngawi ve mai nain a ngaih erawh a țha zân lo tih a hmel ațang chuan a hriat theih hial a, chu chu ka hmuh chuan," Vawinna chhuahho hi an rawt a; mahse, ka hman loh tùr thu ka sawi a, chu chu maw le, i thiam loh a awm miah lo, nangmah vàng pawh a ni lo," a ngaihţhat nân chuan ka ti ta nge nge a.

"A nih chuan, chhuahpuia ka sàwm vàng che kha em ni i hman loh chhan chu?" tiin min zâwt lêt ta khauh a, rang zet hian," Ni lo, kan inhmuh hma khân ka nu thil țûlah ka chhuahpui a, ka rawn thlen har phah țhelh nghe nghe a nih kha," âwihawm thei ang ber tùr chuan ka ti  vat a, chutah,"I thil min lo hawn chu, engtikah nge min hmuhtîr dâwn? Ka hmu châk tawh a nia," ka ti ta daih a. Ani pawh chuan hre chhuak zawk ni àwm tak hian," Ni dâwn tak e! Mahse, a ropui tehchiam lo a nia aw," nui séih chung hian a ti a, a bag ațang chuan bâwm lian lutuk lo, phék lam deuh hi a rawn phawrh chhuak a, dawhkànah chuan dahin,"Mahse, ka rawn hawnsakna che thinlung lam hi min hriatsak la aw," a ti leh a, lu lo bu nghatin," Tehrêng , tehrêng, ka lâwm viau rêng a ni, thilthlàwnpêk hi ka dawng khât ve a," ka lo ti vat a.

"In i thlen hunah chauh i hawng dâwn nia, chuti lo chu i thin a rim palh ang," a tih deuh tlat avàng chu eng nge a nih hre châk ru viau mah ila ka en bîk lo, ka bag-ah ka khung ta hmak a. Ei tùr pawh a lo thleng chhawm ve nghâl a, ani pek chuan," A neitupa siam a ni ang em aw..." ti vang vang pah chuan a maimichhîng a, ei tur rim chu a hnâra hîp lûtin," Um, a nih chiah hi, a va tui dâwn tak! Kaei châk tawh lutuk!" tiin a rawn meng chhuak leh nghâl zat a. A thil sawi leh a chêt dàn avàng chuan ka lo nuih a, ei tùr chu ei châkna pakhat mah ka nei ve lo thung.

Ei tùr kan ei lai chuan,"I u thlàn i tlawh leh tawh em? Pangpâr dah tùr ka rawn lei a, kan ei zawh hian thlànah chuan kal ang aw," a ti țãlh țãlh a, kei erawh chuan chhàn ngaihna hre lovin ka lo en tawp thung a. Engtin nge chu thil chu  ngaihtuah chhuah nachâng a hriat le? He nu tê hi, a mak ka ti, ka u thlàn tlawh lam hi ka ngaihtuah ngai lo, pangpâr phei chu...ka la ngaihtuah chhin lo rêng rêng!

"I tlawh lo a ni maw? A pawi lo, nangmah chauha tlawh tùr chuan ka duh lo che, kal pawh ni la, pangpâr dah ve nachâng pawh i hre kher lo ang, mipa i ni tlat a," a ti leh mai a, chhàn ngaihna pawh ka hre lo. Mami thlàn ka tlawh lo chu mak ti hmel pawh a pu chuang lo, ka u a ni ve si a, a rûk tak chuan mak pawh chu a lo ti tho maithei a.

"En miah suh aw, a neitupa a lo phei,  a chhiat lohzia saw, nupui nei tawh hmel pawh a la pu lo nia," hmalama rawn âwn phei chuan a ti sar sar a,'En miah suh' a tih vàng chuan en ka châk kher mai! A sawi ve ziah a, 'nupui nei tawh hmel pawh la pu lo' pawh chu ka hmu ve châk hrim hrim, engtin nge nupui nei hmel chu a awma, engtin nge nupui nei lo hmel a awm pawh ka hre si lo va. Mipa mah ni ila, hmeichheho 'Chhe lo' tih chu ka hmu ve châk rêng rêng! A lo kal phei chu ka lo mitsìr ralh tho.

Chhia chu ka ti bîk miah lo a; mahse, a sawi ang chuan ka hmu ve lo, mipa a nia, mipa hmuhin ka hmu mai, pa tê chu a ni lo tawp tih ka hre leh a, bâkah, mi sual hmel a pu lo bawkin ka hria.

"Ani ai chuan ka țha zâwk tih ka pawm e," a kal liam hnua ka tih chuan a nui hak hak a,"Chhe chuang nâng, in țhat dàn erawh a inang lo va," a lo ti ve mai  bawk a, a bula awm hi a nuam ve țhìn a nia, a chhe lam hi min bûrbun ngai lo va, min fak(der) ve ziah, a làwmawm em tih phei chu ka hre hran lo; mahse, sèlna ai chuan ngaihthlâk a hrehawm lo chu ka ti.

Mami thlàn kan thlen chuan phùm nîa pangpâr kan dahte chu a ngai a ngaiin a lo la awm a, a lo hnawk hran lo. A thlalâk lian angreng taka intâr pawh chu a lo la țha viau a, he a thlalâkah hi chuan hlim lo hmel leh he khawvêl hrehawm ti hmel pawh a put loh tehlul nèn, tunah chuan mitthi, lei hnuaia phùm bo mai a ni tawh si a.

"I khua a lo har em? Hei, i nau Roddick-a nèn kan lo kal a, pangpâr kan rawn dah dâwn a, a mawi i ti em?" tiin  pangpâr têl chu a lek kâng a, chutah, ka kuta rawn hmeh belin,"Dah rawh le, i u chu a lãwm ngawt ang chu! A tân liau liau pangpâr i pe dâwn si a," a ti leh nghâl zat a. Pangpâr min pêk chu ka en vung vung a, a thil sawi zawng zawngte kha mak ka ti, ka u thlàna pangpár dah hi ka la ngaihtuah ngai lo va, tunah, ka lei pawh ni lo, ama lei liau liau chu min pein dahtîr min tum chu a ni si a.

Mami thlàna thing kawkalh an phun nghèng chuan pangpâr chu ka dah a, chumi rual chuan ani chuan,"A mawi i lo ti em? I tân liau liaua a pêk che a nih kha, a tițha asin, i lo hmu tiraw?" tiin a țawng sap sap reng a.

A hnu deuha thing nghènga kan țhut hnu chuan,"A khawngaihthlâk reuh ngawt mai," a ti chhuak sep a, Mami a sawina a nih ka ring nghâl a, kei pawh chuan,"A dik alawm, hetiang hi a ni dâwn tih hria ila chuan..." ka ti vang vang ringawt a.

"Mihring nunna hi chu hlu tak ni mah se ho têin a nia a ral țhin ni, kan hmalam hun hmu lâwka hre lâwk  thei chu ni ila chuan, hringnun  hi a ho vek ang a, hlim thei pawh kan awm lo ang, kan hriat lâwk theih lohna tak hi kan vànneihna chu a ni ve leh tlat asin," a ti leh barh barh a.

A sawi dik ka ti angreng khawp mai. Hmalam hun hre lâwkin kan thih hun tùrte hi hre sa ta vek ila chuan a buaithlâk ve ngawt ang chu.

"Mami nèn khân unau piang hmun kan ni lo asin," ka tih chuan mak ti deuh taka min rawn en ka ring a nia; mahse, chutiang ni lovin," Unau ni tùr hian piang hmun nih kher a ngai hleinem," a lo ti daih thung a, keimah zâwkin a ngaihna ka hriat loh phah!

"In inhmangaih chuan a tâwk mai alawm, thisen inzawma inhmangaih miah loh ai chuan piang hmun ni miah lova inhmangaiha inngaihsak kha a țha daih zâwk," a ti leh a. He nu hian, a thil sawi tin mai hian min barakhaih mai chu a nih àwm hi, ka dang hlauh zêl mai a!

Zànah chuan Remruati thil sawi chu ka ngaihtuah a, a fingin a ngaihtuah thui ka ti tlat mai a nih chu! Hmeichhe zak thei lo leh thinchhe zet niin ka hmuh hmasak ber ni khân ka hria a; mahse, tunah chuan hmeichhe hlim thei, fing leh ngaihtuahna thui tak nei leh awmze nei leh ril taka thil sawi țhìn niin ka ngaihtuah ta tlat, ani tê hi, ka ngaizawng  chu a ni lo tiraw? Ka thil ngaihtuah vàng chuan ka nui chhuak hawk nghe nghe a, thil âwihawm loh lutuk a ni si a, chuvàng chuan, ka nuih a zâ a ni.

Ka ngaihtuahna dah bovin Mami Journal chu ka keu leh chhin a, phêk kân duai duaiin a lo ziak a nih hi, ka han chhiar leh a.

'Damdawi ruiah min puhin min hnawt chhuak maw? Ni e, ka rui a ni mahna! Mahse, ka va khawngaihthlâk tak em! Ka duh dàn a ni em ka chunga thil thleng hi? Hmeichhia, kum 14 mi tawrh atân chuan a râpthlâk asin, hmalam hun beiseina êng taka thlîr ve țhìn beiseina chu tihchhiatsak a ni si a...'

Eng thil nge a tuar le? Hostel-a a awm kum kha kum 14 a nih kum chu a ni chiang mai a, cl-x a zir kum a nih nghe nghe kha, a birthday pawh kan làwm nasa a nih kha, ka mitthla lêt zut zut a. Eng thil nge a lo tawrh?  Engtin nge ka hriat loh le?  A journal chu ka keu ka keu a, chumi zawm tùr chu ka hmu bawk si lo va, thil râpthlâk tak a tih chu eng thil nge ni ang?

A journal phêk hnung ber dawttu chiahah chuan hla thu ni awm tak hi a ziak thla diat reuh a, eng hla nge tih ka hre hauh lo, love song a ni pawhin ka hre chuang lo va, Pathian hla pawh a ni chuang lo, ka thlêk ka thlêk ringawt a, hla awmze nei a ni pawhin ka hre lo, a inlehluh kual vêl a, hriat thiam a har khawp mai. Ka en ka en a, ka thlêk kual ka thlêk kual a, chutah, ka tàwp ta chat mai! Hei hi hlâ a ni lo, hla thu anga ziah mai mai a ni. A tlar hmasa ber zél ka la chhuak diat diat a, ka han rem khâwm a, ka ïp châwih mai!

'PÂWNGSUAL KA NI' tih a lo ni!

*A TÀWPNA TÛR THLÎR TEL LO CHUAN ENG MAH HI BAWH RUAK RUAK SUH, TUNA NAWMNA HI NAKINA ȚAHNA ZAKHUA  THLENTU A NI THEI*