☆EARTH ANGEL☆ - 8 By Dingdi Pachuau

 ☆EARTH ANGEL☆ - 8 By Dingdi Pachuau

Mami hla thu rem khâwm chu ka en ngawt ngawt mai a, ka thinlung chhûngril chu a rûm takmeuh a ni. Thil thleng dik tak a ni thei lo ang, ka tisual a ni ang, hetiangte chu mi pawhin an ziak ve fo va, kha thu kha ka rem chhuak fuh ve mai mai a ni ang. A ni thei lo, a ni lul lo ang!

Mahse, a beiseina tihchhiatsak a nih thu a sawi kha, kha thil nèna ngaihtuah kawp kha chuan thil  ni thei tak a ni tlat si a ni. A ni ang em? Thil thleng tak tak a ni ang em? Ni lo se, a ziak dâwn em ni? Hostel-a a awm ațang khân a dik lo vek a nih kha, chuti a nih chuan a hostel awmnaah khân pâwngsual a tâwk a ni ngei ang, tuin nge lo khawih ang? 'Lalhriat' a tih khân em ni lo pâwngsual ang? Ka thinlung chu thinrimnain a sahãl a, ka tâwt mup mup mai a ni. A hnuah phei chuan a journal keng chuan a room hlui ni taah chuan ka va lût ta nghe nghe a, zanin ngei hian thu dik tak chu zawn chhuah ka duh a ni.

A lehkhabu tam tham zet mai, inrem dul mai chu a mal tê têa la chhuakin ka kêu zêl a, a zirlaibu chhûnga a ziah chu ka ring hran lo nain uluk takin ka kêu vek tho. Zàn a rei em tih ka ngaihtuah lo va, thil dang eng mah ka ngaihtuah thei hek lo, ka rilruah chuan thil pakhat chauh a awm, chu chu  thu dik tak hriat chhuah a ni, thu dik hriatchhuah duhna chuan min tur ut ut a ni ber.

Ka hmu mai lo; mahse, ka beidawng chuang hauh lo. Beidawnna rilru put ka tum lo bur a ni tawp mai, thil thleng tak tak a nih chuan a bul tumtu chu zawn chhuah ngei ka tum ruh tlat bawk, eng thil mahin min dãl lo bawk ang. Thinrim insehruh țûnin ka en kual zêl a, a chângin thâwk ka la leh rih bawk a, ka chàwl leh deuh vang vang țhin bawk. Chuti lo chu, rilru fîmin lehkhabu ka chhiar thei lo țhin a ni, rilru fîm tak put ka duh, thil thleng dik tak hre chhuak thei tùrin.

Ka en chhuah deuh vek tawh hnuah pawh chutiang lam hawi deuh tùr chu ka la hmu chhuak chuang lo, a journal phêk pawhthlâk zîngah khân a ziak tel a ni zâwk lo'ng maw? A duh leh lo ang a, mi hriat chhuah duh lovin a pawtthla daih a niang; mahse, chu pawh chu lo ni se, ka hmu chhuak tho tùr a ni, ka la chhiar chhuak vek hleinem.

Ka en zêl a; mahse, ka hmu chhuak ta mai lo, chiang taka ziah lanna a awm loh avàng chuan ka beidawng lek lek hial ta mai, engati nge chiang taka a ziah loh ni? Journal phêk a pawhthlâk kha khawiah nge a awm ang le? A journal chu ka han kêu țha leh a, ka chhiar chhuak leh dap chung pawhin chuti lam hawi chu chhiar tùr a awm tawh lo, pâwngsual chu a ni tak tak ang em? 

Ka tlaivâr chiang khawp mai. Ka nute rawn thawh pawhin Mami room-ah chuan ka la awm reng a, ka la dap kual reng tho, pâwngsual a nih a ziahna khawiah emaw tal hmuha chhiar ka la inring fan tho a ni.

Room ațanga ka chhuah chuan ka nu nèn kan intâwk chawt mai a, mak tih hmel zet hian min rawn en hâ a; mahse, kei erawh chuan ka kal pèl thuai thung. Min rawn en zui zél a ni ang chu,"Bawiha, eng nge i tih a?" a rawn ti a. Hawi lêt chuang lo hian," Thil ka en lawk a," ka ti mai a, ka room-ah chuan ka lût zui ta nghâl a.

Ka rin loh deuhin room-ah chuan min rawn luh chilh ta tlat mai a, Mami thih ațang khân a nungchang hi a thlâk ta viau a, a țawng tlèm bâkah min hau ngai tawh lo. Nuam ti viau tùr ka ni a; mahse, nuam ka ti chuang miah lo, tunah phei hi chuan kan inkâr hi a hla zualin ka hria a, mal ngawih ngawih zualin ka inhre tawh a ni.

"I u room ațang chuan eng thil nge hmuh i inrin a?" a rawn tih chuan en duh lo hian chair-ah ka țhu a, ka bek lam deuh na deuh tluk tluk chu ka hmet nauh nauh a. Ka ngawih tlat avàng chuan,"Ka rilru tihah zual tùr chuan nang chu awm suh aw, nangmah chauh kan neih tawh che hi," amah vêk chuan a ti leh a, min rawn en vang vang tih ka mitsîrin ka hmu, chumi hnuah chuan muangchângin ka room ațang chuan a chhuak ta hnà hná a.

Rei zet ka țhut leh hnu chuan ka tho thut a, nimin lama ka bag ah chu ak chhuakin in ațang chuan ka chhuak a, chak zeta tlãn chhuakin Mami thlàn lam chu ka pan ta nghâl a, vawiin chu a bula awm reng ka duh. Zawhna zawh tur ka nei țeuh si a, min chhâng vek tùrin ka duh a ni.

Nimin lama pangpár kan dah pawh a ngai têin a lo la awm a, thlàn lung remah chuan țhuin," Mami, thu dik tak min hrilh teh, kum eng emaw zât kal ta khân eng thil nge i chungah thleng? Ka rem khâwm thiam lo va, ka man thiam chiah lo bawk, min han hrilh teh, ka thil ngaihtuah hi thil dik a ni em? Min chhâng hrâm teh," tiin ka be ta mawlh mawlh a.

Thil ri ka hriat avàng chuan ka hawi vat a, phone ri a ni tlat mai, kei hian ka lo ak tel reng a lo ni maw? Engah nge ka lo mute loh ni? A nih loh pawhin, lo switch-off daih tùr hi a nia. Phûr lo zet chuan ka han la chhuak a, ka han en chuan Remruati a lo ni a, ka han chhâng hrâm a.

"In chhuak tawh em? Hlim deuhin hman tum la aw," a rawn ti a, hre thiam lo deuh hian ka nûr deuh nâng a, eng thil ti turin nge kan chhuah dâwn a?  Tih tùr ka nei maw? Ka neih chhun nia ka hriat chu hei, thlànah ka kal a nih hi.

"I buai deuh a ni maw? Ka be rei lo ang che. E, leh lawk, thil ka lo hawn che kha, eng nge ang i tih? Thil man to ve deuh tak rawn hawnsak che ka duh ve tehlul nèn, pawisa ka nei tam lo va, ka zin leh hunah țha deuh zâwk ka rawn hawn leh dâwn che nia," a rawn ti leh barh barh a.

A thil min lo hawn maw!? E, ni dâwn tak e, ka la hawng miah lo! Nizàn ina ka haw khân ka lo theihnghilh daih tawh, tunah lah inah ka awm leh tawh si lo. Ka bag-ah ka ak a nih kha.

"Inah ka dah, ka la hawng miah lo," tia ka chhàn chuan," Tunah khawiah nge i awm tawh a? I va chhuak hma ve...!! Phûr lutuk-" a  tih lai mêk chuan kei chuan," Thlànah," ti ringawtin ka chhâng sup a.

"Eng maw?!! Thlànah...I u thlànah maw?!" a rawn ti ta hluai a, mak a ti tih a aw ațang chuan ka hre thei mai. Ni e, mak a ti ang, ka tlawh ngai  lo tih kha a hre miau alawm, ani tân chuan thil mak tak tùr a ni rêng a ni.

Ngawi rengin, ka ngaihtuahna sâwm khâwma Mami chanchin ka chhui lai chuan Scooty a rawn ri dat dat a, lo kal an awm ve chiang a ni, ka bulah hi chuan rawn kal hnai lo se ka ti kher mai, tunah hi chuan mi biak mood-ah ka awm lo, mi ka mamawh lo a nih ber chu.

Rei fê chu che chàng lo chuan țhuin ka maimichhîng vang vang a, ka mut a chhuak thei mai dâwnin ka hria, ka mit a kham bâkah ka bek tawn tawnin a na deuh ngut ngut bawk a, ka mi biak ber  Mami lah a reh vung vung reng mai si a, ka thil hriat duh hi min hrilh a tum miah lo a niang.

"I muthlu lo tiraw? I ril a țâm em?" tia țawng ri ka hriat chuan ka meng chhuak ta nghâl a, ka hma chiahah chuan chiang lo deuh ruai hian Remruati lo țhu chu ka hmu vuai a, ka mit ka han khap sak sak a, amah a ni chiang e, min lo en ve reng niin, engtik laiin nge a lo kal? Engti tùrin nge a lo kal?

"Eng nge i lo tih?" 

"I awm tih ka hria a, i lo țap kûrh kûrh ang tih ka hlau alawm," nui deuh chunga a tih chuan," Haw leh nghâl rawh, tih tùr i nei lo," ka ti nghat a. Țah lam hi chu ka ti ngai lo, Mami a thi tih ka hriat tirh pawh khân ka țap lo, tunah pawh ka țap chuang lo, ka țap lo ang.

"Thil thleng a awm tiraw?" a rawn tih leh chuan chhâng lovin ka en ringawt a, ani lah chuan," Kha, nimin lama i thawmhnaw nèn i la inthuam alawm, ka chhui chhuah dàn a fing tehchiam lo, khatin ngaihsàn hmel deuh khân min en suh," a rawn ti leh a, he nu tak hi chuh! Țawng ka peih lo, a țawng peih si, țawng mood-ah ka awm lo.

"Ka țawng peih fahran lo a nia," tiin ka țhut dàn chu ka siam rem a, ka ke kham lutuk chu ka thluang leh rih bawk a, tunah tak hi chuan mut deng deng ka châk a ni.

"Aw le, ka be tawh lo ang che, sorry," ti sapin ka bulah chuan a rawn țhu hnai a,"Min nghèng rawh, nizànah i mu țha lo tih ka hria e," a rawn ti leh a, min nghèng chêt chuan a rawn țhu a, kei erawh chuan ka lo nghèng lêt ve chuang lo, maimichhìn vang vanga muthilh erawh ka châk khawp a ni. 

He nu tê a fing reuh a, ka thil hriat duh kha a hre chhuak thei ang em? Mami chungah thil thleng a awm tih chu ka hre chiang ngei a; mahse, eng thil tak nge thleng chiah tih chu rin dàn chauhin a ni ka hriat ni, ka rin dàn hi dik lo se, thu dik ni lo se ka ti, ka thil hriat duh hian keimah hi min tihrehawm zâwk mai mai lo maw? Ani, thu dik hre ber tùr lah a awm tawh lo va, kan hriat chhuah a duh a nih chuan a dam lai pawh khân sawi ve mai àwm, eng mah a sawi duh lo va, thu mu tawh hnu kei hian thar thawh ka tum mai mai a ni zâwk lo ang maw? 

"I tleiràwl chhoh lai khân vànduaithlâk takin pâwngsual lo tâwk ta la, i sawi chhuak ngam ang em? I chhûngte emaw i țhiante bulah emaw pawh, i sawi chhuak ang em?"

"Eng thil nge i sawi hi?!! I sawi râpthlâk e...!!" a lo ti hluai phawt a, a ngawi deuh vang vang a, chutah," Min vaubet a nih chuan ka sawi chhuak ngam kher lo ang, bâkah, kei aia a len viau phei chuan ka hlau lutuk ang, sawi chhuah duh si, hlau bawk siin, hrehawm ka ti lutuk ang a, thih hial pawh ka châkin ka ring, khawvêl hi hrehawm ka ti ngawih ngawih mai dâwn si a, " a lo ti leh a.

"Min chhànna avàngin ka lãwm e," ka ti sap a, a ni lah tak a, min chhànna chuan ngaihtuahna thar min neihtîr tlat. Mami khân sawi chhuah chu duh viau mah se vaubeh a nih tlat chuan a sawi chhuak ngam hauh lo ang, a sawi chhuak thei lo rilru hrehawm khân damdawi kha a ei țhin ta a ni ngei ang chu. Chuti a nih chuan, step khatin hma ka sâwn phawt e. A dawtah chuan, vaubettu chu tu nge ni ta ang? Hostel-a a awm ațangin a nungchang a thlâk a, chuti a nih chuan, hostel warden a ni thei mai ang em? Mahse, hmeichheho chu hmeichhia vêkin an enkawl ang chu, mipa pawhin an enkawl ve thei tho mai. 'Lalhriat' a tih kha tu nge ni ta ang? An hostel warden hming a ni thei mai lo maw?

Hun a kal zêl a, thil thleng tùr àwm chu ka ngaihtuah kual a, ka zawng a, eng mah ka hmuh chhuah belh lo. Hriat belh theih beiseiin a photo album ka en a, ka hre chuang lo. Kei hi buai lohna tùrah ka buai a ni thei ang em? Ka mumanga Mami ka hmuh lah hian ka lo be buai nasa thei lutuk a, hrehawm tih hmèl zet hian min en a, min chhâng ngai lo. Kei hian a thlarau tizalèn thei lêk lo hian a chanchin ka chhui a ni thei mai ang em? Hmuh chhunah lah hlim hmelin ka la hmu miah si lo, thil hlui ka chhui hian a thlarau a zalentîr thei lo a ni ngei ngei ang.

Class kan țanna pawh kâr khat chuang a ni leh tawh, class kal tùrin ni tin ka chhuak a, ka nungchang erawh ka thlâk ta viau a niang, ka țhianteho pawh ka kàwm ngai ta lo va, C-ate inah pawh ka kal ngai tawh lo, zànah ka room-ah zu inin keimahin ka ngaihtuahna ka kàwm mai țhìn. Chhùn lamah ni se, Remruati'n inthlahrun ve hmel deuh hian min en vawng vawng țhìn a, ka biak țhat tâwk loh vàng pawh a ni maithei; mahse, min be hmasatuah erawh a la țang ziah. Ka țhian ni mah se, min biak lai reng reng pawh hian thil dang daih ka lo ngaihtuahsan țhìn a, ka hriat chhuah hnuah erawh ka inthiam lo ve det țhìn, ani erawh chuan eng mah a sawi ngai chuang lo, min biak a țhulh phah hek lo. A fel êm avàng hian min kàwm tawh lo se ka ti a, ani ang țhian neih hi ka phû lo ka ti a ni. A titi lai reng pawhin ka ngaihthlâksak ngai mang lo a nia, bâkah, ei tùr ni se, min rawn ken ziah a, a insêng nasa lutuk tawh bawk e, hetiang tùr hi a ni lo.

Mami chungchâng ngaihtuah loh ka tum avàngin zu ka in nasa a, chaw ka ei țha leh si lo va, ka taksain a chhiat phah khawp mai. Ka nu pawhin min hau leh țan tawh a, ka pa ni se, hmuh chhunah hlim hmel  hmuh tùr a awm lo; mahse, ka hre thiam vek tho. Ka sual a, fapa tak tak ni bawk si lo chu hmangaih tlâkin ka khawsa lo ve bawk a ni. Zàna ka mut theih țhin loh avàngin ka mit pahnih hnuai a val phei ruih a, Remruati'n chanchin min zâwt țhìn mah se ka hrilh ngai lo, phone-a min rawn biak pawhin a châng chuan ka chhâng duh lo, min buaipui tawh lo se ka ti, kei ang tu fa nge tih pawh hriat loh, hringtu nu leh pa pawh hre lo, a nu hauh reng ngai khawpa mi sual leh lâk tlâk loh hi ani ang mi fel, pastor fanu ni bawk țhian nih leh buaipui tlâk ka ni lo. Bâkah, keimah avànga miin an sawi ka duh lo, a hma kha chuan mi min ngaih dàn hi engah mah ka ngai ngai lo; mahse, tunah chuan ani hi a lo tel ve tawh a,  min en hrek hrek leh an phun sep sep te, nuihza hmel an pute hi ka hmu ta fo, pastor fanu a ni tih an hre ve àwm tho si a, keimah avànga sawi sep a kai ka duh lo.

Chhùna kan chawlh dun lai chuan ka beer ken chu a hmuh lai ngei chuan ka in lui ta sak a, a hmuh laia in hi ka duh ngai hauh lo; mahse, vawiin chu thu tàwp sawi ka tum a ni, kei hi min kàwm tawh suh se, min ngaihven lo bawk se, nu leh pa hmangaihna nei lo leh mi sual, rui reng mai hi min thlauhthla tawh rawh se, kei hian a hlimna ka thlen lo, tunah phei hi chuan a zahna thlentu mai ka ni tawh.

"Eng nge i in a? Ka lo in ve chhin," tia a rawn ban chuan ka lek kãng daih a,"Pastor fanu in ve chi a ni lo," ka ti a, ka han in leh a, ani erawh chuan," Ka in ve châk alawm le," a lo ti leh a, kei chuan,"Beer a nih hi, in ve rêng rêng suh," ka ti a, ka in bâng zawng chu vawi khatah ka in zo ta vek a, a bûr ruak chu ka hmet khâwr nghâl bawk a, chutah, a lam hawiin,"Nang chu mi fel i nia, in ve miah suh, pastor fanu tân phei chuan a mawi lo," ka ti leh a.

"Khatiang 'mi fel' tih thu kha sawi tawh miah suh aw," a lo ti vat a, ka nui hawk a,"Mi fel i nih loh chuan tu nge mi fel chu ni ta ang? Kei hi chu ka ni miah si lo va, beer ka in a, zu chi hrang hrang ka in bawk a, unau pianpui nei lovin ka unau neih chhun nia ka hriat lah chu mahni intihluma ngaih a ni bawk," ka ti duah a, ani leh ni lo angin a lo ngawi kar mai, a inhmeh lo takzet!

"Kei ang mi sual hi min kàwm tawh suh, min kalsan rawh. Kawm tlâk ka ni lo va, ngaihven tlâk pawh ka ni lo, min ngaihtuaha min kawm ngeih ang hian ka kàwm ve thei lo bawk che, i hria tiraw? Vawiin hi kan inkawm tàwpna ni nghe nghe se a țha ang, ka chunga i țhatna zawng zawngah làwmthu ka sawi e," ka ti leh a.

"Min ning a ni maw? Ka țawng peih ém vàng hi a ni em? I nin chuan ngawi tùrin min hrilh mai la," nui deuh sâng hian a ti a, ka thil sawi kha ka tifiamah a ngai a niang, engah vak a ngai tlat lo.

"Aw, ka ning, țawng reng bula awm hi ka ning takzet! Bâkah, pastor fanu i nia, ka kàwm ngeih thei lo che," thutak zet hian ka ti leh a, min rawn en a, a nui hmel pawh a reh chiang ta khawp mai. Hrehawm chu ka ti ve tho nain ka hmelah leh țawngkamah chuan ka tilang duh hauh lo thung, hei hi ka tih a ngai miau alawm.

"Pastor fanu ka nih vàng chuan maw min kawm ngeih theih loh?"a hnu deuha a rawn tih tâk khauhah chuan nui lui hawk pah hian," A ni mahna! Pastor lam rim nam hrim hrim hi ka ngaina thei lo va," a rilru tihnat awlsamna lai ber tùr nia ka hriat chuan ka ti ta sak a.

A thawk țha ngang mai bawk a, a mitmenga natna lo lang pawh ka hmu chiang khawp mai, chuvàng tak chuan, ka en rei duh ta bîk lo va, hetia tihnat viau hi ka duh vàng a ni bîk miah lo; mahse, hetia ka tih loh chuan min thlah a tum lo ang a, a hmabâk chu hmingchhiat,  hmingchhe tùr chu amah a ni, kei chuan hmingchhiat hi engah mah ka ti lo; mahse, keimah avànga a tuar tel ve tùr chu ka duh lo a ni.  A chhûngte tihmingchhetu leh a pa ngei pawh tihmingchhe theitu ka ni tel tlat a, ka thlah vat hi a ngai a ni.

A tûkah chuan class ka chawl ta phawt a, amah vàng êm êm pawh ni chuang lovin ka pum a nuam chiah lo deuh a, ka kal peih ta lo a ni. Nilêng deuhthawin ka room-ah awmin ka mu a, tlai lamah in tùr leiin ka chhuak zawk a, zànah ka tlàn leh melh melh mai, pum nuam lo lam kha chu ka theihnghilh hmin hmak.

Chuta țang chuan ka hmu ngai ta lo, kan dept an inang lo bawk a, class chu a kal ve tho ka ring. Min en hrek hrek țhinte pawh chuan min la en hrek hrek tho; mahse, ka thêngthãwngah a thawk tawh lo, ka bulah hmingchhe tel ve tùr a awm tawh lo miau mai a, ka thaw a veng tawh a ni ; mahse, ka rin ai chuan ka khua a har ve reuh. Khati khawp khãn kan inzuiin kan inkàwm nasa a ni bawk a, ni tina inzui ta reng chu, han inzui tâk lohah chuan a ni ve deuh hûih mai.

Ka țhiante'n min rawn biak an tum fo a; mahse, ka chhâng zen zen lo. Keimah tawpin ka khawsa a, mi dang ka ngai lêm lo a nih hmèl; mahse, ka thinlung chhûngril erawh a khua a har vawng vawng thung. Chu tak chu hnem tumin zu-ah ka țuan a, class kal loh ni phei chuan nilêng deuhthawin ka rui mai țhìn.

*******

"Roddick, engati nge biak tlang i har êm êm a? I dam țha maw?"

Hei chu Muan-vawka aw a ni, min rawn be ve teh tlat a, a lo la dam ve reng a nih hi, ka hmuh lohna a rei ta viau mai a...

"E khai, Eka, i la dam ve maw? Min rawn be teh tlat a? I va fel ve, khawiah nge i awm?" ka ti nawk nawk a, ka lo rui deuh bawk nèn, men pawh ka meng țha thei lo.

"Chhùn chhùnah i do zo leh pek lo a ni maw? A va hahthlâk thei tak aw... Engati nge hetianga i awm vak a? I bialnu nèn khân in ințhen em ni?" a rawn tih chuan ka nui hawk a.

"Bialnu a?!! Ka nei.. hauh lo aw, hmeichhia hi ka..mamawh hleinem, zu ..chauh ka duh," sehchilh zet hian ka ti leh nawk nawk a. Ani thung chu a rawn nui ve hawk a," Ni dàwn tak e, i țhiannu a ni tak alawm. E taka, i țhiannu Remruati kha nichîn khân ka hmu asin, damdawi inah a awm ve a, i hria em?" a rawn ti leh a.

"Tu chu maw?!"

"Remruati kha, i hre pek nange, Eka? Damdawi in khuma ka hmu thut chu mak ka ti khawp mai, a lo chêr reuh sia, ka khawngaih reuh lutuk a, ka be rei hman ta lo va, i țhiannu a nih kha, han kan ngei ngei rawh, ka hrilh che chu aw," a rawn ti leh bawrh bawrh a. 

"Țhian ka nei lo," ka ti hmak a; mahse, chu thu chuan tlêmin min tiharh deuh chuan ka hria.

"I harh chiang lo a nih kha, i harh hunah ka rawn hrilh chiang leh ang che, in lo inkàwm tawh lo a nih pawhin i hmel hriat hlui a nihna laiah i han kan ngei chu a ngai ang, kei chuan ka han hmuh tawh chu aw," a ti leh a.

*THU DIK CHU I TIDANGLAM THEI LO; MAHSE, THU DIK CHUAN A TIDANGLAM THEI THUNG CHE*