☆EARTH ANGEL☆ - 9 By Dingdi Pachuau

 ☆EARTH ANGEL☆ - 9 By Dingdi Pachuau

Remruati ka hmuh lohna pawh kâr hnih chuang zet a ni ta. Ka phone ngai lo va, ani pawhin min rawn be ngai lo, hei hi ka duh dàn chiah a ni. Kei ang fa lâk mai mai, chuta kâra la sual êm êm zui lehnghâl kawm atân chuan a fel mah mah a, hmingchhiatna ho tê pawh a tân chuan a ho dâwn miah si lo va, kei min kawm reng chuan chu chu a chan tùr a ni tlat si a ni. Ka harhfìm țhat lai chuan duh lo viau mah ila a chungchâng chu ka ngaihtuah ve fo mai, damdawi in ațang chuan a chhuak ve tawh ngei ang a, a natna a serious loh ka beisei. Mi hlim thei tak leh fel tak a ni si a, bâkah, min hlau lova min kàwm ngeihtu a ni bawk a, a tân ka duh chhe lo, hlim se, hrisêl takin awm se, keimah ang ni lo țhian țha tak tak nei se ka duhsak a ni.

Ka awm dàn hi ka ning ru ve viau tawh tho a nia. Nizàn hmasaa ka chhuahnaah ka ruih deuh avàngin mi pakhat nèn kan insual ringawt a, Muanate'n min pawh țhen hnuah Joseph-a nèn kan inngur leh a, vawi khat ve ve kan khabeah ve ve kan inhneksak bawk. Insual hi ka tih ngai loh thil chu a ni lêm lo, țhiante zînga intihbuaina a awm pawhin ka tlãnchhe ngai bîk lo; mahse, nizàn hmasa lawka kan intihbuaina kha chu ruih vàng liau liau a ni, ka țhian kawm ve ber zinga pakhat nèn kan la insual zui; mahse, ani ber kher hi chu kan țhianho zîngah pawh  ka kawm ngeih loh ber a nia, pawi tihna ka nei hran lo, ani pawhin min hnek ve tho alawm le.

Ka nu min zilh lai chuan ka ngawi kar a, ka pa a awm lêm lo bawk a, țum dang ai thlâwt chuan min zilhna thu pawh ka bengrawngah a lût ve deuh chuan ka hria, bâkah, ka harhfîm țha bawk a.

"I u a awm tawh lo va, nang chauh hi kan nei tawh che, chuvàng chuan, ngaihtuah ngai hian awm reng lo teh, i pa phei chu a thin a rim tawh a, eng mah pawh a sawi ve duh tawh loh hi. I u ang khân ka chàn ve leh mai ang che tih ka hlau, ka duh lo, chuvàng tak chuan, ka zilhin ka hau nasa țhin che; mahse, i tâna țha tùr ka ngaihtuah vàng leh ka ngaihtuah êm vàng che a nih hi," a ti malh malh a, țawng ve pawh tum lo chuan ka en ngai chu ka en reng a, chêt pawh ka che lo.

"Ka thiam loh chu a ni; mah se, ka duata ka hmangaih che u avàng hian in sual phah tùrah ka lo ngai miah lo va, i u pawh kha ka duat êm êm a; mahse, ka rin loh deuhin kawng dik lo a zawh ta tlat mai si a, zilhin han hau țhìn mah ila, kan fanu a nih miau avàngin rilru a nêm leh nge nge țhin. Chutiangin, nang pawh kan fapa, têt tê ațanga ka chàwi len i ni a, han sualin han rui viau țhin mah la, kan hmangaihna che hi chu a ngai reng, chuvàngin, hetianga awm reng lo hian inngaihtuah harh la, i thil chìn țha lo hi bànsan tawh teh, ka rilru hi tihah tawh lo hrâm  teh," a ti leh malh malh a, ka ngaithla țha bawk a, a țawngkam tinte chu ka hre vek.

"Mami thlànlung hi engtikah nge kan phun dâwn?"  Chu zawhna ka zawh avàng chuan min rawn en a, kei pawhin ka lo en ve a, ngawi renga rei fê kan inen hnuah chuan,"Kan phun har lo ang, i pa ka lo sawipui ang e," a ti ta sap a, kei erawh chuan,"Keimahin ka lo buaipui zâwk ang e, hmel hriat ka nei alawm," ka lo ti vat thung a, Mami tâna ka tih theih ve tâwk hnuhnung ber a nih tawh dâwn avàngin buaipui ka duh a ni, a unaupa ni ve si hian ka lo ngaihven tâwk lo ka ti a, a thlànlung tal țha tak  leh mawi taka tihsak hi a phû a ni. A dam laiin a tân eng mah ka tihsak lo va, ka pianpui u dik tak pawh ni lo mah se, ka u a nihna anga ka hmangaih thu pawh ka hrilh hek lo, ani chuan a unaupa neih chhun, a thisen zawm ang chiaha min enin min hmangaih a nih kha.

"I buaipui theih chuan a zia khawp ang chu, i pa chu a buai thei si a," a ti leh sap sap a. Ka nu chu ka en vang vang a, ka u thihna kha a tuar viau a ni tih chu a mit khur tla deuh dâk leh a hmel hlim lo zetah hian a lang chiang viau a ni. Ni e, a fanu, a rîla rah dik tak a ni a, a tuar viau ang chu, kei hi thi ve ta ang ila, tûn ang tho hian a tuar ve ang em? Ti ila, kei chu a hrin pawh ka ni lo va, a thu ka âwih lovin ka sual bawk si nèn, a tuar lutuk lo ang, kawng lehlam takah phei chuan a thaw pawh a veng huai maithei asin.

Zawhna tam tak zawh ka duh a; mahse, ka zawhna tùrho hi thil hlimawm lam a nih dâwn loh avàngin ka insûm zâwk a ni. Khawi ațangin nge min lâk, unau ka nei em, min hringtunu min duh loh vàngin em ni min lâk, nge ka khawngaihthlâk êm vàng zâwk, fapa an awh êm avàngin em ni min lâk...A, zawh tùr a tam lutuk, a indawt chho zut mai; mahse, ka nu tân hian thil hlimawm lam a ni dâwn tlat lo, a fapa tak tak ka ni lo tih ka hria tih a hriat chhuah phei chuan kan inkâr hi a chhe vek zâwk palh ang, a rilru a hrehawm dâwn asin, chu chu thlentîr ka duh lo. Ka pain ngaihzâwng a nei reng a ni tihte hi hre phei se...Ni lo, ka kâ ațang chuan a hre ngai lo ang, a rilru a na lutuk ang a, a tuar zo lo palh ang, Mami thihna pawh hian a hliam nasat tawh êm hi.

Muana'n min rawn phone a, Joseph-a min hnekna ka khabe chu eng nge a an tawh tih min rawn zâwt a, a dam tawh thu ka hrilh chuan," A zia hlauh chu, vawiin chu class kal ni a ni lo bawk a, chhuak ila?" a rawn ti nghâl zat a.

"Chhuah pawh ka lo tum hleinem, khawiah maw?" ka tih chuan," A nih, Remruati kha i kan tawh em?" a rawn ti leh daih a. Kan ngai lovin a chhuak daih tawh ang chu, eng atân nge a rawn sawi chhuah ve ziah ni? Vawi thum a chanchin a rawn sawi chhuahna a ni tawh, ani hian a lo ngaizâwng ru reng zâwk em ni?

"A chhuak tawh lo'm ni?" ka ti thla rawk a, dam lo serious tak a nih loh chuan a chhuah a hun tawh miau a ni. Ani erawh chuan," Nimina ka patea ka han tlawh pawhin ka la hmu reng alawm, a hmel a dâng reuh si a, a na ru viau a nih ka ring. Han tlawh ve rêng rêng la, in inkàwm tawh lo a nih pawhin a dam lo tal chu han kan ve tho la?" a rawn ti leh a.

Ka inngaihtuah fê hnuah chuan phûr lo zetin ka insiam a, khati khawpa nâa ka țawng khum hnu kha chuan hmuh leh pawh ka inring tawh lo asin, ani pawhin min hmuh a duh lo ang, han kan pawh ni ila sawi tùr a vâng duh àwm êm mai, a chhûngte zînga tu emaw berin an lo awmpui phei chuan... Țhulh ka tum leh thut thut a; mahse, eng emaw hleka min ngaihtuah theihzia leh ka chunga a țhat theihzia kha ka ngaihtuah chhuak a, han kal ngei chu ka tihmâkmawh niin ka hre bawk si, ka rilru a insual nasa. A tàwpah erawh damdawi in lam pan chuan ka inkhalh chhuak ta hrâm a, kanna tùr ei tur eng emaw tak pawh ka lei ve ngei a ngai ang chu.

Muana khân a awmna chipchiar taka min hrilh vek avàngin ka zawng buai hauh lo; mahse, va pawh dâwn meuh chuan mipa hian tìmna ka nei ve tho, a lo na viau ang em? Nge min hmu chu a lo thinrim ang a, min lo be duh lo ang? Nge ka hmuh hmasak ber  ni ang khân min lo àn khum hrep ang? Mahse, chu kher chu ka ring chiah lo deuh, dam lo chàu chuan min lo àn khum peih lo tawp ang. Thâwk la hawk hawkin a khum lam pan chuan ka pên phei ta chhat chhat a.

Thawmhnaw lian pui pui kha a lo ha tawh miah lo, puan a sin a, a bân pahnih dah chhuakin a kutah chuan drip an lo khai a, T-shirt bân bùl a hâk avàng chuan a bân chêr riak chu ka hmu chiang kher mai! Hetiang hian a lo chêr tih ka lo hre ngai hauh lo, a hmel erawh ka hmu chiang thei lo, puanin a inkhuh țhen tlat a.

Ei tùr ka kensak chu a mutna bula tui bottle leh damdawi ilo an dahnaah chuan ka dah ve a, țhutna awmah chuan ka țhu thla nghâl bawk a, a muthilh miau avàngin mi dang biak tùr awm hek lo, ngawi reng chuan a mutna bul vêl chu ka melh kual a. A awmna ward-ah hian lane hnihin khum a inhûng tlar a, a khum awmna lane-ah hian mi pathum chauhin khum an luah, lane khat zâwk erawh chu an luah khat vek thung. Dam lo tlawha kante pawh an lo awm ve ngei a; mahse, anmahni chauh an inngaihtuah hlawm a ni ang, min biak tum pawh an awm lo, kei pawhin hmel hriat ka hmu lêm lo bawk a, biak ka tum chuang lo.

"A la muhìl bawrh bawrh a ni maw?" tia rawn țawng ri ka hriat chuan ka ding zawt a, a thãwm ka lo hre miah lo niin, ka inthiam lo khawp mai. A nu a nih ngei ka ring nghâl, an hmel a inang tlat, min lo nuih sâng a.

"Aw... ka pi," ka ti ban chat a, chutah," Roddick-a ka nia, Remruati hi a dam lo tih ka lo hre-" ka tih lai mêk chuan a kut rawn phar chhuakin," Lo inchibai ang hmiang, Remruati nu hi ka nia. I hming hi chu kan hre fo tawh a ni, Bawihtei hian a sawi nasa ţhin che alawm, I hming hi zawng, kan in chhûngah hian a mikhual lo viau a ni," a ti nghâl bawrh bawrh a, ka țhen ve sak ringawt. Kan inchibai hnu chuan," I fel hle mai; mahse, i lo kal lai taka a lo muhìl chu a zia lo viau nain i hriat thiam a ngai a ni, nizàn lamah a mu țha lo deuh a," nèlawm tak hian a ti leh sar sar a.

Pastor nupui ni àwm rêng a ni. A chezia, a țawngkam leh a hmel chuan a tlin hliah hliah, a fanu dam lohna vàng chuan a rilru pawh a hrehawmin a lungngai ve ngei ang a; mahse, chûng chu hmuh tùr a awm lo, a hmel hlim sângah chuan Remruati hmel ka hmu tel zêl, nu a lo nei țhain a lo chhùn fuh nasa a nih hi. 

A nat dàn min hrilh malh malh lai chuan Remruati chu a rawn che ta țial țial a, a nu pawh chu a țawng lai chu tàwpin a ngaihven vat a, kei pawh ka ding hluai ringawt. A rawn meng a, a mitmeng dava riai mai chu a han khap deuh sak sak a, a mit khur pawh a lo tla viau a nih hi, ani tê hi a lo dam lo na viau mai ka ti, a hmel pawh a dângin a hmai pawh a lang thãwp tlat a ni.

"Bawihte, i lo harh tawh maw? I mu tui em?" tiin hlim hmel sâng hian a nu chuan a be sar sar a, chutah," I țhianpa Roddick-a pawh hei, a lo kal a, fel i ti em? I muthilh lai takin a lo kal a, titipui tùr i awm si lo va, a khua pawh a har ngawt ang chu," a ti leh a. Remruati chuan min rawn en a, a mitmeng dul raih kâra mak tihna chu ka hmu thiam ve reng, ka tlawh hi a ring lo tawp tihna a ni ngei mai.

"Engati nge i lo dam loh a? Damdawi in hi chu ka hua asin, a nuam lo bawk si," ka ti duah a, ka nuih lui sak bawk. A nu kan bula a awm ve si avàngin țawng dàn tùr ka hre lo va, ka țawng ta duah a nih hi.

"Nia tiraw? Dam ka tum ve ngar ngar tawh ang," zàwi sap, nui chung chuan a lo ti ve a, a nui hmel hmuh hi ka inbeisei pha hauh lo asin! A natna tùra țawngkam ka cheh hnuah, chutah pawh natna khumah lehnghâl, nui hmela min la chhàwn thei chu mak ka ti takzet a ni!

"I ril a țâm em? In tùrte i duh em?" tia a nuin a rawn zawh chuan," Aw, Roddick-a pawh hi a tui a hãl ve ang, khawngaihin, kan pahniha in tùr min lo lâksak la?" tiin a nu chu a en a, ani pawh chuan,"Tehrêng mai, Roddick, lo țhu rawh aw, ka va chhuak leh lawk ang e," a ti a, a tho ta nghâl a.

Kan pahnih chauha kan awm hnu chuan a nu awm ve lai ai khân sawi tùr ka hre lo zual, ka inthiam loh bâkah han sawi mai tùr a vâng, han titipui chiam lah a fuh ber bawk si lo, ani dam lo chau chuan țawng pawh a peih vak bîk lo ang; mahse, a lo ni hauh lo tih ka hre nghâl ta chiah.

"I fel hle mai, i buai àwm tehlul nen, min rawn tlawh hrâm hrâm a," a rawn ti chhuak ta zâwk a. Ka fel vàng a ni lo tih ka inhre chiang si a, chhàn dàn tùr pawh ka hre lo, ani pawh hian ka tlawh avàng hian fel min tih tak tak pawh ka ring hran chuang lo, ka fel lohzia hretu a ni miau alawm le.

"I eng lai ber nge nâ a?"A bân chêr țhiak en ràn chung chuan ka ti a, a nu khân min hrilh nual tho tak nain sawi tùr a vâng si a, ka zâwt ta tho. Ani pawh chuan,"Ka chau satliah a ni deuh mai, ngaihtuahawm pawh ka ni lo, engati nge doctor hian ka chhuah a la phal loh tlat ni? Fit táwk lo min la ti deuh a ni mahna" a lo ti ve mai a, a țawng zàwi reuh sip sep si a, a viak a țhat theih nèn, a inhmeh lo ka ti thlâwt a ni, natna khuma a mu hi a inhmeh lo hrim hrim.

"Dam thuai tum la, i dam loh reng chuan i chhuak vat thei dáwn si lo va," ka ti leh a, a bân ka en reng tih chu a hmu ve a niang, a puan sin lai chuan a khuh ve sat sat a, nuam lo ti hmel takin a nui deuh bawk a.

"Class i kal țha em?" A thil min zawh teh daih chu! A hma pawhin class hi chu ka kal țha viau ziah tih a hre ve reng àwm si a, amah zâwk hi class kal țha lo záwk a ni a, class kal thei lovin damdawi inah hial a awm a ni si a.

"Aw..."

"A țhat chu," a lo ti sap a, a mitmeng dãvã zet chu khapin," I ril a țâm tawh em?" tiin min zâwt leh a, a dam lo zâwk hian a dam záwk hi min ngaihtuah zâwk a nih àwm hi maw, ka zawh tùr ni àwm záwk tak a ni.

"Țâm lo ve, nangmah kha a țâm a ni maw? I ei theih zâwng leh duh zâwng tùr ka hre thiam lo ve, hei hi ka lo lei ve ngawt a," tiin ka thil leisak chu ka  melh zoh a, ani chuan," A ngai lo asin, kha, i rawn lei hnem si, i insêng țeuh dâwn a nih kha," a ti leh sep sep a, a hah a niang, thâwk lain a chàwl leh rih a, a chauh hmel  reuh si a, țawngpui chiam loh hi a țha ang. Thil țûl lo ka sawipui chiam ringawt a, a țawng ve zêl bawk sia, a tuar belh phah palh hlauh ang e, ngawi ve tawh teh ang.

"Tui kha khawngaihin, ka lo in thei ang em?" a rawn tih leh sep chuan ka tho vat a. A țawngkam polite ta lutuk erawh chuan nuam lo min tihtîr khawp thung, kan inkawm ngeih tâk hnu, min nèl viau tawh hnuah kha chuan nuihzatthlâk leh a nuihpui bâwk bâwk theih tùr țawngkama min biain min ko va, kan inkârah khân polite taka inbiaknain hmun a chang lêm lo a nih kha, kha kha nuam ka ti daih zâwk.

Zei lo zeta tui ka intîr hnu chuan a drip khai tui chu a lo far zo ve tawh bawk a, ka phawisak a, drip khaina tùra hriaua an vihna ni àwm tak chu a kutah chuan hmuh tùr a awm nual, ka hmu tih hriain a kut chu a la sawn ta vat bawk a. 

A nu rawn lêt leh hnuah erawh chuan a nu nèn chuan kan titi ta zâwk a, titi ti mai ila kei chu kațawng ve mang lo, amah zâwk chu a țawng siam siam reng a, nêl takin min ko nghâl bawrh bawrh bawk a, mi țha tak a ni ngei mai, a bula awm pawh a nuam tlat, mi fel tak bula awm aiin a bula awm hi nuam ka ti zâwk.

 

Ka awm chhûng chuan ei tùr tlêm a ei ve a, a nu làwm tâwk a tling viau a ni," I ei țha lutuk, khatiang hlîra i ei chuan i chhuak thei vat ang," tiin a fuih sauh sauh a. Ei tùr a ei theih loh vàng a lo nih chiah hi a chak chhuah theih loh ni, a thil ei tlêm tê kha chuan chakna a pe tam àwm lo mai bawk si a, a ei buan buan theih hunah chauh a chak chhuak thei ang.

"I dam veleh Insomnia-ah ka chawlhpui che ang a, i duh duh kan ei dâwn nia, a neitupa pawh ka biaksak duh maithei che a ni," ka tih chuan hlim hmel takin a nui sak a, ka thil sawi avànga chutianga a hlim hmel han hmuh chu mak ka ti, a neitupa biaksak chu engtianga ropui hlimawm viauah nge maw a ngaih le? Naupan chhiatthlâk lutuk mai!

A chau ngang a niang, ka haw dâwn hnaih lamah chuan a muhìl leh ta a, min muthilhsan daih chu a duh dàn a nih ka ring miah lo; mahse, dam lohna avàngin a taksa a chàu tih a hriat a, a meng hlei thei lo tih a hriat mai a ni, ka dem miah lo, ka khawngaih viau zâwk.

*******

Mami thlànlung tùr chu ka buaipui ta vek a, thlànlunga ziah dàn tùr chu a duh dàn zâwtin ka nu chu ka râwn ve a, ka pa hnéna a hrilh tho ka rin avàngin ka nu duh dàn chuan ka ziahtîr a, hawrawp tam tak ngai kan ti lo va; mahse, a thlànlung chu granite hlang, chhah țha ve tak a nih avàng erawh chuan a tlâwm tak tak thei hauh lo thung. Pawi lo, a tân tih theih kan nei tawh dâwn hleinem le.

Remruati pawh damdawi in aţangin a chhuak ve tawh a, a chhuah hmain vawi hnih lai ka han kan leh hman a ni. A la chau tho nain a rilruin chhuah a cho tawh a, damdawi ina awm chu 'dam theih lohna' a tih tlat avàngin a nuin doctor hnênah chhuah a dìlsak ringawt a, ani pawh chuan  a lo phalsak ve mai a; mahse, in lama inenkawl uluk tùrin a chah nasa thung a ni.

Mami thlàn pawh chu ka nuin hlawhfa chhawrin a siamtîr a, thlànlung peih hun huna phun theih tùrin an tifel vek tawh. Ka zu en ve nghe nghe a, an rem nalh khawp mai, sawisèlna tùr pawh ka hre lo. Remruati nèn kan inbiak leh tawh avàngin Mami thlàn thlalâkte chu ka thawn ve a, ani pawh chuan mawi a lo ti ve khawp mai.

Zan khat chu room-ah awmin Mami journal leh note țhenkhat chu ka en mai mai a, chutih lai chuan ka pa a rawn lût thut a, thil pawimawh tak sawi tùr a ni ngei ang chu, ka room-ah hian a lo lût zen zen lo va, a hmel pawh hi ka hmu khât viau bawk a ni.

Thlanlung leh a ziahna man sèn zât tùr min zawh chuan ka hrilh ve vat a, to a ti deuh nge ni,"Chutiang zât lawih chu maw lo ni a?! A thu i ziahtîr tam lutuk a ni ang chu, ziah tam leh chawi a tam ngai, pawisa i thawh chhuah loh hi, hmang raltu i ni char char bawk," a ti nghut nghut a, ţawng châk viau mah ila ka ngawi rih mai. Kan inkâr chhe sa hi tihchhiat belh tawh rih lo teh ang, ka nuin a tuar phah palh ang.

"I u kha mualpho takin a thi a, thil zahthlâk tak a ni. Kan zahna thlentu ni lova nun dàn tùr i zir chho zêl dâwn nia, mi awm țha duh lo tàwpna chu khatiang kha a ni mai, ka in chhûnga chêngte chunga thil thleng atân ka duh hauh lo a nia, fîmkhur viau ang che, mi bula zak taka awm hi ka peih tawh lo, hre reng ang che."

A chhuah hnuah pawh chuan chechàng lo chuan ka țhut dàn ngai rengin ka țhu a, hmu miah lovin ka hmaa journal chu ka en tlawk tlawk bawk. Mami thihna kha a ropui lo tih chu ka hre ve tho; mahse, a chunga thil thleng, a tawn hriatpui miah lova diriam chiam a țûl ber lo, a fanu dik tak a nih loh pawhin a nupui faa ni a, an inneih miaua an chèn tlàn chuan a fanu a ni ve mai, a fanu chunga țawngkam mawi lo a cheh chuan ama mawng pawh a hlîm ve tho tih a hre lo em maw ni?

Remruati'n min rawn phone a," Ka dam țha ve viau tawh nain kan inah te hian min rawn tlawh ve dâwn lo em ni? Pastor fanu ni mah ila min tlawh ka phût ru ve deuh tho a nia, i reh vang vang ringawt a," a rawn ti a, a sawi ang tak hian a dam țha ve viau tawh a, class erawh a la kal rih chuang lo.

"Pastor lam hnaih ka ngaina lo ka tih kha," ka tih chuan a rawn nui hak hak a," Sual lo mai teh, ka nu pawhin hmuh leh che a châk a, a sawi ve ziah che a nia aw, ka pa dihmun i tiderthãwng tlat erawh a țha lo khawp mai," te chu a la rawn ti tak deuh deuh a, a rawn nui hak hak zui bawk a.

Fiamthu a rawn sawi avàng chuan ka rilrua eng emaw awm pawh chu a zia ve ta deuh a, Remruati hi chu a hlim thei a, mamawh lo leh ngai lo viau anga ka awm luih pawh hian a bula awm a nawmzia leh a bula ka awm chuan mi pãngngai tak anga ka inngaih theih ve zia chu ka hre chhuak uar uar a ni. Nia, ka tlawh a phût chuan ka tlawh ngei ang, a pa erawh lo awm miah lo se, pastor hi chu ka ngaina lo ka tih tawh kha.

An inah chuan ka lêng ta ngei a, quarter-ah an lo awm a, a zau nuam kher mai. Vànneihthlâk takin a pa a lo awm lo, ka làwmzia chuh! A nuin min lo làwm thiam hle a, Remruati erawh chuan ka thawmhnaw hâk a lo en chîk khawp mai a, a chhan chu kawr min hawnsak kha ka ha miau mai a, ka vawi khat hâkna a ni nghe nghe. 

Ka tum loh deuhin nilêngin ka lêng ta a, a ute hnathawh nei an nih ve ve avàngin inah an awm bawk si lo va, ka rin ai daihin ka thla pawh a ngam ve mai. Chaw eiah min sâwm nasa a; mahse, ka hnial ve tlat thung, 'Ni dangah' ka ti ve tlat a, min sâwm lui ta bîk lo.

Zàna ka lèn chhuah loh avàngin Mami room-ah chuan ka lût leh mai mai a, journal leh note ka lâkho chu țha takin ka dah leh a, kal kual zêlin a thawmhnaw dahna chu ka en kual leh a, almira chunga trolley ni àwm tak chuan ka mit a lâk deuh avàngin harsa tak chuan ka chawi thla a, a rit lêm lo, thawmhnaw tlêm azâwng a dah a ni ang. Ka han hawng a, a khawih lohna a rei ve tawh bawk a ni ang, a zipper pawh pawh a harsa deuh.

Thawmhnaw chu a lo ni ngei a, ka han hai deuh a, notebook te reuh te hi a thawmhnaw kârah chuan a lo awm a, ka han keu thuak thuak a, lehkhapuan pawhthlâk hi inthlepin notebook tê kârah chuan a lo inzep țât bawk a, a lehkhabu hlui rêng rêng chuan ka mit a lâk vek tawh vàng kha a ni mahna, thinphu dap dap chuan lehkhapuan inthlep chu lain ka han tipharh ta nghâl a.

*TIH TÙR ȚHA TAK SAWIA  A SAWI ANGA CHE CHHUAK BAWK ȚHÌN MI CHUAN NGAIHSÀN A HLAWH ȚHIN, A THU SAWI LEH A NUN DÀN A INMIL MIAU AVÀNGIN*