☆EARTH ANGEL☆ - BONUS

 ☆EARTH ANGEL☆ - BONUS By Dingdi Pachuau

Zîngkára haw phei tum ka ni a; mahse, Pa Hminga'n," Ni lo ve, tûkțhuan i ei ve leh phawt ang chu, chuti rup rup tùr a ni ngai lo, kan inhmuh khàt êm hi," a ti tlat mai a, ka hnial ngam ta bík lo. An felin an țawngkam a dam bawk si a, an bula awm a hahdam ka ti, Pa Hminga ang hi pa nei ve ila...

Nu Dini eirawng bàwl chhûng chuan Pa Hminga chuan an in bula an huan chu min kawhhmuhin an in piaha in ding pawh chu an in tho a nih thu chu min hrilh pah bawk a; mahse, unau thumin an luah a, thingtlâng  lam mi, harsa ve tak, lehkha zir duh ve si an nih avàngin an khawngaih a, luah man pawh a chanve laia an hniam thute chu a sawi bawrh bawrh a, kumin Krismas leh Kumthar pawh kha an khuaa hmang lovin Lungleiah an awm tlang a, inhlawhna zawngin an inhlawh țhin thute chu a sawi malh malh a, mak ka ti ru angreng viau mai, an taimain an fakawm ka ti, zirlai ni chung phei chuan, kei ni ta ila hrehawm ka va ti dâwn tak! An inah chuan kan va lût chhin ta nghe nghe a, keimah ang rual tùr tlangvâl pakhat hian eirawng a lo bâwl suah suah a, a dang chu hmeichhia an lo ni hlawm, lehkha lo zir pawh an awm!

"Pa Hmingate teh tlat chu, lo kal r'u," tiin tlangvál chuan țawngkam zãngkhai zet hian min lo chhàwn vat a, Pa Hminga chuan," Lehkha in lo zir a ni maw? In va fel tak aw, in la hlawhtling ngei ngei ang maw le," ti chuan a fak luam a, hmeichhe tleirãwl pahnih chu an zak a niang, lài tih hriat zet hian an nui ringawt a, Pa Hminga vêk chuan," Eng nge mamawhte in nei em? Tui kha in hmu țha tawh maw?" tiin a han zâwt a, nula zînga upa ber ni ngei tùr chuan," Aw, hmu țha tawh e, kan duh tâwk hman tùr kan nei tawh e," a lo ti vat a.

"Pa Hming, thingpui ka lo thlit ang che u aw?" tlangvâlin a rawn tih chuan," A ngai lo ve, kan lâwm e, kan rawn tlawh ve hrim hrim che u a ni, tui in hmuh țhat tawh chuan a làwmawm lutuk e, in mamawh leh thil țûl hi chu min rawn hrilh hreh miah suh u. E, vawiin lamah eng nge i thawh dâwn?" tiin Pa Hminga chuan a zâwt leh a, ani chuan," Nimina ka kalna, in saknaah tho khân ka kal leh ang," tiin a lo chhâng a, Pa Hminga chuan," A hahthlâk viau lo maw?" a ti leh a, ani chuan nui deuh sak chung hian," Hahthlâk lo ve, a hahthlâk ber ban khur laih kan zo tawh a," a lo ti ve mai a, eng eng emaw sawi chuan an inbia an inbia a, kan awm rei lo, kan chhuak leh ta thuai a, tlangvâl pawh chuan min thlahin an kawt thleng min zui chhuak ve a.

Pa Hminga titi bawrh bawrh chu ka hria; mahse, ka ngaithla lêm lo, nichina kan kalna, unauzaa in luah kha ka ngaihtuah neuh neuh a, mipa nèn khân kan inrual vêl ngei ang a, tikhân, inhlawhin class a kal loh kârin a chhuak țhìn àwm si a, zahthlâk leh peih loh deuh pawh sawi thei lovin a naute chàwm nân a sûr a sa hnuaiah a chhuak ziah a ni ngei ang a, a dinhmun chu a duhawm viau lo a ni; mahse, a țawngkam leh chezia kha a zãngkhai viau bawk si, a dinhmunah khân ding ve ta ila, hrehawm ka va ti dâwn êm! Kei chu inhlawh ngai miah lovin, ka nu leh pa pawisa thawh chhuah hmangin ni tin ka duh tâwka tam pawisa ka hmang thei bawk a, chuti chung chuan ka nun chu hrehawm ka ti êm êm mai si a...

Tûkțhuan ei khamah chuan hmanhmawh lutuk lovin ka chhuak ta a, Pa Hmingate nupa chuan ka hman remchàn veleha an hnêna zin leh vat tùrin min chah ve a, an mi ngainat derna leh min duhsakna chu làwmawm ka tiin phû lo ka inti kher mai, inmangțhain la zin leh ngei tum chuan ka tlãn chhuak ta a. Kawngah ka tlãn chak hran lo va, chawlh pawh ka chàwl chuang lo, vawi khat erawh chu zunram thiar tùrin ka ding ve, chak lovin ka tlãn par par a nih ber chu.

Tluang takin in ka thleng a, ka thleng hma viau lo thung, ka nuin rawng a lo bâwl mêk a, ka lût min lo hmuh chuan,"I lo thleng tawh maw? Lungleiah i kal dâwn  tih min hrilh miah lo va, i nu Dini'n min rawn bia a, ka hre chauh alawm, i ril a țâm em?" a lo ti vat a.  Zêp lovah chuan a țâm ve reng mai, kawng lakah ka chàwl si lo va.

Ka room-ah thingpui chu ka in a, chair hnung nghèng ar ar pah ka phone, dawhkàna ka dah chu ka tuai nauh nauh a. Remruati biak ka châk tawh kher mai, ka thu hriat zawng zawng hi hrilh ve ta ila, eng angin nge a ngaih ang le? He thurûk hi ani bâk hrilh tùr ka nei lo, kan pahniha kan thurûk a ni tlat si a, hre tùr àwm ber ka nu lah hi a hrilh chi miah si loh, a fanu chunga thil thleng hian a rilru a tina hle dâwn si a.

Sana chu a kal muang ka ti kher mai.  Tuilumin ka intleuh zawk a, zanriah kan eina pawh a lo rei ve ta, dâr 8 a rîk har ber țum leh dâr 8 ri thuai thuai se tih ka nghahhlelh ber țum chu a nih ngei ka ring. Hun khawhral nân ka phone-a games chu ka khèl ve a, chuti chung pawh chuan dár 8 chu ri har ka ti takzet a ni.

A tàwp a tàwpah chuan ka room banga sana chuan dâr 8 a kâwk ta vah mai, dâr 8 chiah chiaha biak chu ka inthlahrung leh deuh si, minute 5 ka nghâk leh rih a, ka nghah chhûng chuan ka room chhuatah chuan ka vei tawn chhên ringawt a, exer țha tak a ni leh mai.

Dâr 8:05 a ni ta, dawhkàna ka phone  chu ka ban ta vat a, a number hmet chhuakin ka phone leh ka beng chu ka chuktuah ta nghâl a. A ring reitîr phian mai, ani hi, a phone a mute a ni mai lo maw? Ka beidawng țêp tawh tihah chuan min rawn chhâng ta hrãm a.

"Min va chhâng har ve!" ka ti nghâl táwng a, zàwi deuh tak, awka dam diai hian," Chuti em ni? Min lo ngai tawh a ni maw?" a rawn ti a, rang fê hian," Ngai ang chu, nang pawhin min ngai ve lo'm ni?" ka ti nghâl vat a, chutah," I dam țha em? I aw kha dam țha lo aw a ang," ka ti leh a, a aw chhuak chu dam țha lo awka zaidam deuh leh țawng ring peih lo a ang ber.

"Dam țha e, vawiina kan vah vêlna avàngin tlêmin ka chàu deuh hlek mai a nia, eng nge vawiinah i tih a?" a rawn ti a, chu zawhna chuh, dâwt vâr ka sawi mai a ngai ta.

"Ka Dusty hian hla deuh hlek tlàn a châk avàngin ka tlàn chhuahpui mai mai a," ka ti ta ringawt a, a rawn nui hak a,"' Hla deuh hlekah ka tlân chhuak châk,' tiin Dusty chu a rawn țawng chhuak tihna a ni ang maw?" a rawn ti a, zàwi tê tê hian a nui kar kar a.

"I chiang meuh maw? I dam țha lo a ni tiraw?" ka ti leh a, a țawng dàn chu ka ringhlel lo thei lo. Tûn hi mut hun pawh a la ni lo va, a u leh a nu a zah vàng a niang ti dâwn ila a sawi duh a sawi ngam tho bawk si a, ka hre thiam lo a ni.

"Vawiina kan chhuahna lamah ka chau deuh mai mai alawm, ni a sa ve êm a," a rawn tih leh chuan," I lo haw veleh doctor kan râwn dâwn nia," ka ti ve nghâl a, nui kar kar chung chuan," A, min ngaihtuah ve tak tak pawh i ang e a," a rawn ti hlak a," Ka ngaihtuah che alawm, ka țhiannu neih chhun kha i ni miau a, i dam loh ka duh miah lo, tunah khân damdawi ei la, mu nghâl ang che," ka ti leh a.

A reh deuh vang vang phawt a, chutah, "Kan inbiak rih hi, biak che ka la duh rih alawm, min nin chuan sawi mai rawh," a rawn tih tâk țiau chuan  țawng tuma ka âng zuau chu ka tàwp chiang khawp mai, engati nge hetiang hian a awm ni? Sawi sual ka nei em ni? Ka hau pawh a ni si lo, a taksa chàu hian a rilru thlengin  a nghawng a nih àwm hi maw.

"Ning lo ve, a, lo haw thuai thuai zâwk  mai teh, phone-ah mai ni lo, hmaichhana hmuh chea titi dun ka duh a ni. Naktûkah chuan chhuak tawh miah suh aw, i dam loh phah tak tak mai ang, hmun danga dam loh zawng a hrehawm duh si," ka ti ta duah a, a huat zâwng ka sawi loh hrâm ka beisei, sawi sual ka nei lovin ka hre bawk.

"Lo haw daih ka châk a, ka thei rih si lo a nih hi," tiin a insût hraih a, he nu hi a țap a ni chiang mai. Nichina ka thil sawi a huat vàng khân a rilru a nâ em niang? Kha vàng mai khân a țap ang maw? A rilru hi a lo no viau a nih dâwn hi. A pâwnlam lan dànah hi chuan a luhlul hmelin rilru no tak pu hmel a pu hran miah si lo, zanin zet chu a rilru nona min hmuhtîr ve ta tlat mai, kâwlhrâwng hmel zet siin hmeichhe derdêp ber rilru chu a lo pu ve tho si a.

"I nute thu kha âwih phawt la, chuan, dam takin in lo haw thuai dâwn nia, in lo haw zànah ka rawn lêng vat bawk ang" tiin ka thiam ang tâwk chuan ka han hnèm ve a, hnèm han ti ila a lungawi dàn tùr ka zawnpui a ni ber zâwk ang chu. A țah chhan tak hre lo mah ila ka ti țap ni miaua ka hriat avàngin ka inthiam zân lo.

"I lo lèn loh vaih!" a rawn tih chuan a țawngkam chuan ka nuih a tiza ru viau mai; mahse, nuih chi a ni miah si lo. A rilru 'inno'-zia ka hre ta bawk a, dukdak lo taka chhàn mai mai ka duh tawh lo, ngaihtuah rân chunga țawng chhuah a ngai tawh.

"Lêng dâwn. Engtikah nge in lo haw theih ang?" ka ti leh a," Naktûkah khi chuan kan lo haw thei lo phawt  ang, naktipah pawh; mahse, ni thum hnuah chuan kan lo haw thei tawh ngei ang," a ti phawt a, chutah," A la rei dâwn tiraw?" a ti leh a.

"Rei lo ve, a rei tùr ang zâwngin ngaihtuah duh lo la, zin i ni tih kha inhria la, hlim takin i awm chhûng kha chuan hun hman tum zâwk rawh, hlâwk pawh i hlâwk zâwk ang," ka ti leh duah a, zanin zet chu ka kâ ațanga chhuak ngai lo, ka sawi ngai loh ka sawi ta țeuh mai.

Kan inbiak zawh hnu chuan rei fê chu ka țhut ngai rengin ka țhu a, ka en ngai ka en reng bawk. Kan inbiakna chu ka ngaihtuah lêt a, mak tak maiin Remruati chu ka ngai deuh veng veng ta ringawtin ka hria! Kan inkàwmin kan inzui ngun ve bawk a, a àwm lo miah lo. A tel lovin ka zin a, ka mal viau a, ka inhnemna ka khulh ta rih lo bawk nèn, min ngaihsaka ka chanchin engkim mai hre vektu ka ngai hi a àwm lo viau lo. A țawng duh a, a titi siam siam reng peih a, ka ţawng peih loh châng leh ka rilru a down êm êm lai pawhin ka bula awm a ning chuang lo, țawng lo pawhin min țhutpui reng peih a nih kha. Țhian nih chu a tling ve chiang ngawtin ka hria, amah vàng hian ka țhian, ka kawm chawtte pawh ka ngai lovin ka thlah deuhthaw thei a nia, ka tân chuan a hlûin ka lei vàntirhkoh a ni ka ti lo thei lo, hmeichhia a ni a, a inhmeh hliah hliahin ka hria. Vàntirhkoh chu la hmu miah lo mah ila, ka tân a țhain a hlu êm a, hetiang tho hi vàntirhkohte pawh an nih ka ring, ani ang țhian hi ka hmu leh tawh pawhin ka ring lo, engkim tak tak ka hrilh vek ngam si a.

*******

An lo haw zànah chuan ka sawi láwk angin ka lêng ta ngei a, a dam lo deuh tak tak a nih ka ring, a hmel chu a tla deuhin ka hre tlat mai, motor a rawn chuan chauh vàng pawh a ni maithei, ka hmu thû tlat bawk. An chhûngkua an lo awm kim țhap mai si a, nuam lo chu ka ti ru khawp mai. A nuin nêl takin min be sârh sârh reng a, a pa pawh a nèlawm reng; mahse, ka nël chuang lo. A nihna chu ka hmu lian rùn tlat a, a bulah ka thlâ a muang thei lo. 

Remruati hnênah chuan,"Tluang taka in rawn haw thei chu a làwmawm khawp mai tiraw? I rui em?" tiin ka zâwt a, min chhàn hma chuan a nu chuan,"A motor chuang a fuh chiah lo deuh a, a rawn luak haw bârh bârh a, motor ațang pawhin amahin a chhuak thei hleinem," a lo ti vat a, Remruati erawh chuan," Ka zia vek tawh e, ka kua kha a lo ruak lutuk a, motor han insawh kual vêl khân ka pum a rawn tilet but but a, ka insûm hlei thei lo a ni," a lo ti a.

A hma ang chu ni se chuan," Motor ruih zawng, a changkàn loh thlâk e," ka ti ngei ang; mahse, tunah chuan a rilru nozia ka hriat tawh miau avàngin,"A ni duh alawm, kaw ruak chuan motor-a chuan hi a hrehawm ve êm asin," ka lo ti ve a, Remruati chhangtu chiahin  thingpui min rawn pe a, làwmthu sawiin ka lo phun sap a.

"Doctor phal lo chungin kan rawn haw a, thlawhnaa kan chuan dáwn thlengin min rawn bia maw le, kha doctor kha chu a fel ve chiang a ni, Mizoram-a awm niin Mizo ni ve phei se chuan aw..." Remruati nu chuan a ti vang vang a.

Thlawhna. Khawiah nge an zin? Doctor lah kha hnam dang a ni ngei ang chu, chuti a nih chuan Mizoram chhûngah chuan an zin lo tawp tihna a ni. Khawiah nge an zin? Engati nge Remruati pawh khân min hrilh ve nghâl mai loh le?

Remruati chu ka en a, ani pawh chuan min lo en ve reng a, kan inen deuh vang vang hnuah chuan,"Kan zin khawthawng mai mai a, chumi pah chuan ka awm nuam lo ka inentîr a," a ti ta sap a. Țawng ve lo chuan ka en ringawt, sawi tùr ber pawh ka hre lo. Champhaiah emaw Lawngtlaiah emaw Mamitah emaw an zin kual mai mai a nih ka lo ring ve a nia, a lo ni lo lutuk chuan ka nuih a tiza lek lek, engati nge min hrilh miah loh le?

"Thingpui kha in rawh, a dai tawh ang," a rawn tih leh tâkah chuan thingpui ka nei a ni tih ka hre chhuak leh chiah, ka han in hlak a, in nuam tâwk a lo ni tawh a. Ka in zawh chuan," In zinna chu a nuam bawk em? Ram pâwn lama i zin chhuah daih ka lo ngaihtuah miah lo va," ka ti ve ta a, ka awa lungawi lohna ni àwm tak chu hre thiam ve tak ang maw?

"Nuam lo, ka nin mahnaklaia.Rawn hawsan daih kha ka duh a," a ti leh sap sap a, chutah,"I hmel hmuh a nuam khawp mai, thil țha eng emaw tak hriat i nei a ni lo maw?" a ti leh a, kei chuan,"Hre ve bawk ang chu," ka lo ti mai a, min rawn enin," Hmel thar min hmel hriattîr tùr i nei hnai a nih ka ring, nula inah i lêng tak alawm, lèn chhuah i nei ngeiin ka ring a ni," nui hmel pu deuh chuan a ti a.

Kan bulah chuan mi dang an awm lo deuh bawk a," Nula inah chuan hei, tunah pawh ka lêng reng alawm. Ka țhian mah ni la, nula i ni ve tho a, chutin i ute pawh," ka lo ti ve thung a, ani pawh chuan,"Ni ve tho mai, lêng reng rawh aw," a lo ti ve mai bawk a.

Ka lèn chhûng chuan hlim hmel takin a titi siam siam reng a, a nu an bazàrpui  dàn chu kimchang takin min hrilh a, a nuihzatthlâk bawk a, kan nui nasa viau mai. A nu awm dàn a sawi leh a nu hmel chu ka'n mitthla tawn țhin a, inhmeh lo ka ti bawk si a, Remruati'n a sawi thiam bawk a, amah a nuih a za ve bawk si a, a hmuhnawm khawp mai.

"Ka zin chhûng khân thil thar eng emaw hriat chhuah i nei em? Hma i lo sáwn nasa tawh viau ang chu," a ti leh a, hei chu chhàn dàn thiam a har ka ti khawp mai.

"Hre chhuak nual chuan ka hria," ka ti ta ringawt a, hma erawh ka sâwn viau lo tih chu ka hre reng; mahse, Mami chanchin ka hriat loh ka hriat tam phah a, a zia ka ti. Ka lama rawn thle hnaiin,"Ka hre châk tawh teh a nia," a rawn ti sar sar a.

"Ni dangah, hun thâwlah ka hrilh záwk ang che," ka tih chuan ner nâng hian min melh a, a ngawi ta hmak mai. A țawng barh barh loh hi chuan a reh ka tia, a inhmeh lo ka ti țhìn bawk. Tui taka a țawng barh barh hi a hmuhnawm.

"I zinna tùr min hrilh lo va."

"Hrilh tùr chein min zawh loh kha." Kan inchhâng tâwk viau mai ka ti.

"Mahse, ka vui lo aw, kei pawh ka zin ve zawk tho a," ka tih chuan min rawn en nghâl vat a, chutah," Lungleiah maw?  I va hmu chhuak ta em? A lo hria em? I titipui thei em?" tiin zawhna hlîr mai chu a rawn phuh chhuak ta a. A thin a rim ka rin tehlul nèn, ka thaw a veng huaiin ka hria.

"Hun thâwl kan neih hunah ka tih chu, bâkah, sawi tùr tam tak a awm a, ka sawi zo hman àwm si lo va," ka ti leh a, ani erawh chuan," Nia; mahse, ka hre châk tawh e, a țhen a zâr tal chu min hrilh tho la?" a ti leh thung a.

A tih angin, a țhen chauh ka hrilh, haw thuai ka duh, mut hna an duh àwm si a, anni zin chàu an ni a, duat an ngai viau mai.

"A nih, nang pawhin in zin chhan chu min hrilh la?" ka tih chuan zêp nei chuang lo  ni àwm tak hian," Kan zin deuh mai mai, chumi pah chuan doctor kan hmel hriat kha kan hmu pah a," a lo ti ve mai a.

"I bialpa hlui maw?" nui chunga ka tih  chuan,"Ka bialpa a ni lo, bâkah, hnam dang a nia, doctor thiam tak erawh chu a ni," a lo ti a.

Ina ka haw hnu chuan ka rilruah Remruati hnêna ka hrilh chhàwn chu ka ngaihtuah lêt a, hrilh kim lo viau mah ila zaninah a lo ngaihtuah chhunzawm ve ang a, eng eng emaw ngaihtuah chhuah a nei leh ngei sng chu.

*A PHÛ TÂWK ANGA NAWR LÊT A NIH LOH CHUAN SUALNA HI A BO RINGAWT THEI BÎK LO, SUAL I DUH LOH CHUAN I LO NAWR LÉT VE A NGAI TIHNA A NIH CHU*