☆EATH ANGEL☆- 10 By Dingdi Pachuau

 ☆EARTH ANGEL☆ - 10 By Dingdi Pachuau

Ka en thuak a; mahse, ka chhiar tak tak hmain Mami Journal kha ka la leh rih a, khata mi pawhthlâk kha a ni ngei em tih ka chian leh rih a, a lo ni ngei e. Huphurh tak si, hre châk bawk si chuan ka han chhiar ta a.

'He hringnun hi chu ka tân chuan a hrâng lua a ni, ka nu leh pa leh chhûngte zahna thlentu ni tùrin ka lo piang a. Pâwngsual ka ni; mahse, ka sawi chhuak ngam teuh lo, an  râpthlâk chiang a ni! Engtin nge ka nun chhoh zêl ang? Mite hian ka tawrh ang hi tuar ve lo se ka duh tak zet a ni. Thih daih pawh ka châk țhìn; mahse, mahni intihhlum hi thil țha a ni lo tih ka hre ve kar bawk si a, hlim taka nuna chhûngte leh țhiante nèna nuih ve bâwk bâwk theihte hi ka va châk țhin tak! Mahse, chu thinlunga hlim theihna chu lâksak ka ni a, ka tân chuan he khawvêlah hian hlimna tak tak a awm ve tawh lo, lungngaihna ruamah hnuh luh ka ni a, keimah mai chuan ka chhuak thei tawh lo, min țanpuitu tùr hi awm se aw ...'

Lehkha phêk chu ka țhâm ngawt ngawt a, thu dik tak ka hriat chhuah chuan min va țhâwng nawn tehrêng êm! Ka rin sa tho chu ni mah se thu dik ngei a lo ni tih hriat chian zet chuan ami țhàm dàn a dang zar mai. Ka u chu pâwngsual ngei a lo ni a maw...a va râpthlâkin a lo va khawngaihthlâk ngai ém! 'Pâwngsual' tih thumal ka ngaihtuah záwng ringawt pawh chuan ka thinlung a na ngut ngut thei hial maw le! Chu thil țha lo zet, a chunga thleng chuan a nun a lo khawih danglam vek a, kan lo hriatpui miah si lo, hriatpui ahnêkin damdawi ruia hostel ațanga hnawh chhuah a nih vàng khân ka nu leh pa khân hauin an zilh nek a, room-ah hial an kalhhnan a nih kha, ka han ngaihtuah lêt a, ka  thin a na thar vawng vawng mai! Chhantu a ngaih êm êm lai khân tu mahin kan chhan lo va, chhan ahnêkin hauvin kan diriam a, hrehawm a tiin a mal a va lo inti dâwn êm!

Ka phone ah lai a rawn nghawr tâk datah chuan ka ngaihtuahna ata chu ka harh chhuak ve ta a, la chhuakin dâr zât chu ka han en vat a, a lo tlai chhe viau tawh mai. Remruati message chu hawngin ka han chhiar a.

*Zanin chu ka muhìl thei lawk lo va, mut hmunah mak deuh maiin i u kha ka ngaihtuah chhuak tlat mai a nih chu, eng vàng teh kher nge maw ni?*  tih hi a lo ni a.

*Hun kal tawh thil a nih chu, muthilh tum rawh*  tiin ka chhâng lêt a, kei erawh chu mut tumna pawh nei lo chuan Mami khumah chuan ka la țhu thla sauh sauh a. Lehkha phêk chu pharh dangin khumah chuan ka dah a, a note tê chu ka keu leh nghâl zat a.

'Zanin hi he khawvêl ka pian chhuah hnua ka tân lungngaihna leh zahna, hrehawmna ruama min hnûk lûttu min hnuh luh zàn a ni, ka hlimna, ka hmalam hûn êng leh beiseina min tihchhiatsak vektu hi ka va haw tak êm! Min vau a, a palianin a nun a rãwng si a, ka hlauh lutuk avàngin a hnuah phei chuan nikhaw hre lovin ka lo awm ta hial a. Ka harh chhuah chuan a khumah saruak vekin ka lo awm reng tawh a, ka chunga a thil tih chu ka sawi chhuak a nih hlauh chuan thahah min vau a ni. Ka rilru a nat êm avàng leh ka hlauh lutuk avàng chuan ka mittui a tla zawih zawih a, ka taksa leh ka rilru a nat êm avàngin kal pawh ka kal țha thei lo, naktûk hian class-ah pawh ka kal thei kher ang em?'

A mittui farna vàng a nih ngei ka ring, a thil ziah chu a pherh deuh niai nghe nghe a; mahse, a chhiar theih vek tho. Maimichhîng vang vangin a thil tawn hun laia a hmel leh a awm dàn tùr chu ka mitthlà a,  ka khawngaihna avàng chuan ka insehruh ngawt ngawt mai a ni. Khatih hun laite khân lo sawi chhuak ngam ni se aw... A thil ziah hun leh ni ațang hi chuan  hostel-a luh hlim deuh chauh ni tùrah ka ngai, ka ngaihtuah lêt thiam vak tawh lo nain ka han chhût ka han chhût a, hostel a awm ațanga rei lo têah tak tak a nih kha a damdawi rui an man chhuaha an rawn hnawh chhuah kha, a hmain a ti ngai lo, an rawn hnawh chhuah ațang khân tûkțha kan nei ngai ta mang lo va, Mami hlim hmël pawh ka hmu ngai ta lo rêng a ni. Ka thaw hawk a, ka chhiar chhunzawm leh a.

'Ka rilru a va hah tak êm! Tu ma hnênah ka sawi chhuak ngam si lo. Ka hmaah, ka hmuh theihin a awm reng țhìn bawk si a, he sihal tar hian  thil sual ti hmêl rêng a pu ngai lo. Hmuh ka hlau a, ka inthiar fihlîm hrâm hrâm țhin; mahse, min rawn hmu thei ziah. Ka mangan theihzia chuh...! Hostel ațangin tlãn chhuak ta ila, min rawn vau zui tho ang em? Mi sual a nih hi, mi sual turu lutuk... Thi daih se ka va ti tak êm! Min vau a, hostel ațanga ka chhuak a nih chuan min pâwngsual lai video-a a lo cover chu thawn darhah min vau a, a darh vaih chuan engtin nge ka awm ang? Keimah bâkah ka chhûngte, ka țhiante an zak ang, ka zak dâwn lutuk, ka thi thei hialin ka ring, mualpho taka awm chu ka hlau ve tho bawk si a, ka chan hi a hrehawm takzet a ni.'

Ka chhiar zo ta vek. He thil hi lo hre hma ila ka va ti tehlul êm! Țûl miah lo thil ngaihtuahin ka tlaivâr deuhthaw a, khawvàr dâwnah ka room ka pan ve chiah. Ka thil hriat thar hian min tihchauh hluah hluah bâkah inchhîr ngawih ngawihna min neihtîr lo thei lo. Ka ngaihtuah ngun poh leh inchhìrna hlîr a ni mai. Khatianga a sual ta thut kha chhan neia lo ngaih tùr hi a nia, tleirawl hlim thei leh fel ve tak a nih țhin nèn, eng emaw tak thil thleng chu a awm a niang tih ngaihtuah chhuah nachâng ka lo hre lo kha ngaihtuah tlêm ka inti a ni, a hun lai khân ka lo hre thiam rih lo a nih pawhin ka puitlin ve tawh hnu hian ngaihtuah tùr hi ka ni a, ka u ka lo ngaihven lo lutuk kha ka inchhîr lo thei lo a ni.

Ka rilru a tâwt a, inchhìrna nèn, ka inthiam thei lo. Ka thin a rim bawk si,   Lalhriata hi a la dam ang em? A dam ngei chuan ka ring, ka la zawng chhuak khawp ang. Hmanhmawh erawh ka hmanhmawh chûk thei lo maithei a, a chhan chu Lalhriata tih ringawtin ka hre tlat si a, zawh kual ve fê chu a ngai ang, kum 10 deuhthaw kal taa thil thleng daih tawh lehnghâl, hmuh thuai chu a awlâi bîk hauh lo ang le, eng pawh chu ni se, hun a duh rei emaw, rei lo emaw zawh chhuah hun chu ka la nei khawp ang. Ka nu hi ka hrilh duh ve ang em? Ni lo, hrilh ta ila eng nge sâwt ang? Tunah pawh hian Mami thi hi a la tuar êm êm a ni a, thil thleng dik tak hre ve ta ngat se, engtin nge a awm ang? Ka rilruah chuan zawhna chi hrang hrang a lo lût zut zut mai, he thil hi ka pai dài mai mai thei lo vang, ka ngaihtuah chian poh leh ka thin a rim tulh tulh a, puak keh thei mai dâwnin ka inhre hial mai ka ti.

Tûkțhuan pawh ei lovin ka bag-ah chuan Mami note leh tui in tùr ka ak a, ka chhuak ta ringawt. Ina ka awm reng chuan ka ipik lutuk a, ka nu bula ka sawi chhuah mai ka hlau a ni, sawi chhuah ka duh lo, a inchhîr nasa ber a ni àwm si a, hre lo hian awm hlen se ka duhpui zâwk.

Mami thlànah chuan ka țhu a, ngaihdam ka dîl mawlh mawlh phawt. A nau, a nau neih chhun hi ka lâk tlâk loh êm êm mai si a, a chanchin pawh ngaihven miah lovin kum khati chen kha ka lo nung ve mãwlh mãwlh mai a, kei hi chu ka sual vàng liau liaua nu leh pa hauh rawn țhin ka ni a, chutiang chu ani zawng a ni ve hauh si lo. A thil tawn râpthlâk tak avàng chauha khatianga nung chho ta kha a ni si a,  kan va inang lo tak êm!

"Mami, i nau hi ka nêp êm mai tiraw? I nau ni tlâk pawh ka ni lo, ka laka rinna i lo nghahzia ka hriat hian ka tlin lohzia hriain ka zak a ni. Engkim mai kha i thih hma khãn lo sawi chhuak vek la ni tùr tiraw? A pawi ka ti, i tawrh kha tu mahin kan lo hre miah si lo, nangmah chauhin i lo tuar a, sawi chhiat leh diriam i ni zui a; mahse, Mami, tunah chuan engkim mai ka hre tawh a, lo lungngai miah suh aw, i tawrhna thlentu hi a la dam a nih phawt chuan ka rawn zawng chhuak ang a, a phû tâwk hremna a hmu ve khawp ang, chu chu i hmaah hian ka tiam a ni," ka kuta ka âwm dawm pah chuan  ka ti sap sap a, ka thil sawia ka tih tak ber țum a la ni hial ang, ka rilru tak tak ka sawi a ni.

Chawhma chhûng zawng thlànah chuan ka awm a, ka tui ken ka in zawh tawh avàngin haw thuai ka tum tawh a, chutih lai chuan motor ri ka hria a, thlàn danga rawn kal tùr an ni ve ngei ang chu; mahse, thlàna tlangvâl lo awm lan ve rùn ka duh loh avàng chuan thing kûng phèn lam chu ka pan ta vat a, Dusty erawh   chu a dinna hmun ka sawnsak lo thung.

A rawn hnai zêl a, a rawn ding ta dat a, ka lo en hran lo, an chhûngte thlànah an rawn kal a an rawn tlawh a ni ve mai, kei pawh ka u thlànah ka kal ve tho alawm le. Kea rawn kal chu a thâwm a rawn hnai zêl a, ka u thlàn zâwn àwm vêlah chuan a rawn ding ve ta dat a, ka nu a ni thei mai lo mawtia ngaihtuahin ka han bih dêk dêk chhin a, ka nu chu a ni lo; mahse, hmeichhia erawh a ni thung. Ka u thlànah chuan pangpâr dahin a kûn a, a țap a ni maithei; mahse, tu nge ni ta ang? Ka hmel hriat ngai chu a ni lo tawp mai a, ka u țhian emaw lainattu tu emaw a ni mahna!

"Lalțhian, a pawi vawng vawng êm mai tiraw? Ka awm loh lai takin i lo kal thut a, hetiang tùr hi chuan ka ring pha hauh lo che asin, kan inbiak hnuhnun berah pawh khân beiseina i la neih ve țàng țáng thu i sawi kha, i beiseina kha engin nge lo tichhe zo leh ta? Ka hre thiam lo êm mai che," a ti mawlh mawlh a, ka u thlàn leh ka bihrûkna a inhnaih êm avàng chuan a thu sawi chu ka hre pha thei a ni, ka u țhian a nih ngei ka ring ta.

Eng eng emaw sawiin a phun leh sap sap a, ka ngaihven tawh lêm lo. Ka inlan ve mai dâwn em niang tih ka lo ngaihtuah tawh zâwk; mahse, min lo hlau deuh mai ang em tihte chu ka ngaihtuah tel bawk a, Mami țhian, a kawm hnai ve deuh a lo nih chuan a chanchin tam tak ka hriat thar phah thei si a tiin, a hnu deuhah chuan ka inlan ta nge nge a.

Min hlauh hma chuan ka insawi ta nghâl vat a, ani erawh chuan min lo en duh khawp mai a,"I u sawi dàn che chu i ang lo deuh chu ka ti, i thlalâk pawh ka la nei ve nghe nghe ang, tlêmin i lo dang ta a nih dâwn hi," a lo tih chuan," Ka u nèn chuan in inkàwm țhin tihna a ni ang maw?" tiin zawhna chu ka zâwt țan ta nghâl a.

Ka zâwt țeuh mai, ani pawhin țha takin min chhâng ve zêl a. Mami boral chu rin har a tih thu leh mak a tih thu chu a sawi sap sap a, a chhan ka zawh chuan," A boral hma thla hnih thla thum vêlah khân a niang chu, kan inbiak laiin i chunga beiseina thar a neih thu a sawi a, nangmah bâk innghahna a neih loh thu a sawi bawk a. I hriat angin i u chu khati maia khawsa kha a ni a, kan ina awmah pawh hian ka thlêm fo țhin; mahse, ka thlêmthlu thei lo. Amah kha ka khawngaih chi tak kha a ni ve a, khatiang khân awm kual mai mai mah se mi awmherh leh sual a ni lo tih kha ka hre ve tlat a ni," a ti duah a.

Kan titi ta reng a, ka rilru tâwt leh ipik pawh a zia huaiin ka hria, hetianga titipui nrih hi ka lo mamawh a nih dâwn hi ka ti rilru a, a number pawh ka dîl ta nghe nghe, a chhan chu nakinah biak duhna pawh ka nei thut thei si a tiin, ani pawh a lo inhawng khawp mai. Nula fel tak a nih ka ring, hetiang nula felin ka u a hmel hriat ve tlat mai chu mak ka ti lo thei lo, mi naràn mai mai ni lovin Higher zirtîrtu a lo la ni zui, a inhmeh khawp mai, car rawn kengin amah ngeiin a rawn khalh rap mai bawk a, a chezia leh țawngkam ațang  pawh hian hmeichhe ngaihtuahawm loh tak chu a ni ngei mai.

*******

"I va cool ve!  I tûk chhuak a fuh chiah lo deuh a nih hmel," nui deuh chunga a rawn tih chuan lo en ve vatin," I dam chiang takzet tawh maw? Class i rawn kal peih pawh ka la ring chiah lo asin," ka ti ve thung a, tukin chu ni e, tûk dang ang lo takin Dusty ka khalh muang ve tlat a, rilrua ngaihtuah ngut ngut ka neih vàng pawh a ni mahna le.

"Dam tawh, min en la, ka pângngai vek tawh. Nizàn khân ka hrilh duh lo che a nih kha, surprise che ka duh vàngin; mahse, mak chu i tih hmel vak loh a nih awm hi maw," nui chung vêk hian a ti leh a. A nui hmel hmuh hi a nuam, class a kal loh chhûng khân ka hlim hmel tu mahin an hmu lo ang, Mami thurûk ka hriat chhuah ațang phei kha chuan hlim chu sawi loh, nui hmêl ka pu chhin tawh lo hrim hrim; mahse, Remruati ka bulah a awm leh thei dâwn tawh a, ka mood chhe lutuk pawh a tizia chho leh mai ang chu.

"Welcome back aw, i kal theih loh chhûng a rei si a, i țan deuh chu a ngai dâwn a nih hi," tiin a chhîp samah chuan ka chùlsak a, ani chuan,"Naaa..min ngai naupang chhia viau ziah suh," a ti chûl phawt a, chutah," Ka kal loh chhûng pawh khân lehkha chu ka zir ziah alawm, ka thiam ve vek, vawiinah pawh kan test dâwn," a lo ti leh a. Kei chuan," I hahchawlh laite chuan engah nge i zir rêng rêng a? I hrisèlna kha ngai pawimawh ber ta che," ka lo ti thung a. He nu bulah hi chuan ka duh aia tam ka țawng ziah, țawng lo thei lo hian min siam ni berin ka hria.

"Kan inhmu lo rei tawh si a, thil min hrilh tùr i nei țeuh tawhin ka ring a ni," classroom pana kan kal lai chuan a ti a, țhen sak chung hian," Engah ngawt maw?" ka lo ti a, ani chuan," A, i neih ka ring, kei pawhin ka nei tho a; mahse, ka la sawi duh rih lo, hun thâwl kan neih hunah chauh,"nui chung vëk hian a ti leh  a, he nu nui hmêl pu reng thei hi a awhawm ngawt mai, mi vànnei tak a ni.

"Hmeichhia ka nih loh hi," ka tih chuan ding deuh dat hian min rawn en a, a nui hmel tàwp hmakin min melh rum a,"I ni ka ti em ni? Hmeichhe treat pawhin ka treat ngai tawp si lo che a, i va sual tak! Tun ațang chuan Roddick-i i ni tawh ang che, i hria maw, Roddick-i?" tiin a hawi sawn nghauh a, chak zetin a kal ta nghat nghat bawk a, kei erawh chuan ka en tawp, ka zui chuang lo, a awm dàn leh a thil sawi chuan ka nuih a tihzat tlat avàngin a rûkin ka nui char char a, a inlâk thinrim dàn chu ka sawi fiah thiam chiah lo, 'a sweet' ka ti ni berin ka hria. Thui fè a kal hnu chuan a rawn hawi lêt a, a kuttum min rawn hmuhin a kut chuan a nghâwng chu a rêk a, a inher leh nghauh mai. A inher rual chuan a kawr chung hâk chu a lêng deuh duai bawk si a, ka nui ri chhuak ta nge nge a. 

Chhùn chawlh hunah erawh min rawn pan hmasa leh tho, ka thinrim der duh chuang lo. Ka lo be vat a, a tiffin rawn phawrhin a hawng ta nghâl a," A tui dâwn teh mai a nia, ka siam chu a ni miah lo nain ka hmuh chhuah a nia," a ti sar sar a, kei erawh chuan,"A va hlauhawm duh àwm ve, ei pawh ka ei ngam nâng. Ei hmasa phawt ang che," a run deuh tùr chuan ka ti a; mahse, engah mah a lo ngai lo," Tukinah pawh ka ei daih tawh," tiin a fian chuan a ei tùr ken chu suakin a ei ta nghâl a. 

A tui ka ti khawp mai. Ei tùr mumal takin ka ei ngai lo bawk a, ka ei ve țeuh mai. Ani pawh chuan chu chu a hmuh chuan,"Tui i tih chuan ka rawn keng zêl ang, dam lo zâwk ang maiin i chêr a, ei tùr i ei țha lo tih ka hre reng a ni," a ti ta mai rêng a, kei pawh chuan zêp lêm lo chuan," Ei țha lo," ka lo ti ve mai bawk a. A tiffin a dah fel hnu chuan a hawi kual vat vat a, chutah, ka lama rawn thle hnaiin,"Joseph-a nèn in ințhêțhù tih ka hria a nia aw," a rawn ti ta sap a, a nui nghâl sak bawk a.

Engtin nge maw a lo hriat ni? Tuin nge hrilh rêng rêng a? Lalmuan-vawka a ni pek ang, ani nèn khân damdawi inah khân an inhmu tak alawm. Chu pa mai mai chuh, a châk lo viau ang!

"Lalmuan-Vawka'n a hrilh che a ni maw? Țawng thei leh lutuk mai," ka ti sap a, khatiang thil chhuanawm lêm lo lo hrilh khân țangkaina leh sâwtna a nei em maw ni? Țûl lo lutuk! Ka hmuh hunah chuan aw...

"Ani min hrilh a ni teuh lo mai! Ka hre ve tawp mai a ni, sava te reuh têin min hrilh țhìn a, min hrilh ru keuh keuh zêl," a lo ti thung a, a lo la nui sâng zui, Joseph-a nèn kan insual chu a lãwm ta zâwk em maw ni  tih mai tùr a ni.

"Nui kher suh," ka tih chuan a nui tàwp ta hmak a," Ka ruih deuh vàng a nih kha, mipate chu kan insual ve fo alawm, kan inngeih leh daih tawh," ka ti leh a. Dâwt tlêm chu ka sawi deuh, Joseph-a nèn kan la inbe țha hran lo, hmuh chu kan inhmu, kan inbe lo, kan peih lo dùn a niang.

"Mipa nih avàngin insual tùr tihna maw?!" thu tak fêa a lo tih chuan," A, ni chuang lo ve, mipa chu tleiràwl chhuah deuh phat hian hetiang lam boruak hi kan tawng chho deuh vek alawm, thisen lum chhoh lai niin pà kan inti ve a," ka ti ta duah a.

Kan ngawih dun deuh vang vang hnuah chuan,"A nih leh, kan inhmuh hmasakna ber hmunah khân engti tùra rawn kal nge i nih? Ka rin dàn hi a dik ka ring a," nui hmel pu hauh lo leh mit pawh khap miah lova min rawn en ràn chuan a ti ta khauh a. A zawhna mak ka tih êm avàng chuan kei pawh chuan ka lo en lêt ve deuh reng a, a hnuah erawh ka dâwih ta zâwk a nih hmel.

"Khalai hmunah khân rawn kal an awm ve nual asin; mahse, khatiang khân ka lo tàwng ziah hlawm a, a țhente phei chuan min rawn khawih lêt an tum țhìn; mahse, chu chu ka duh dàn tak a ni țhin. A chhan chu an nunna an chàn ai chuan min rawn hnek thî hneng hnung mah se pawi ka ti lo a ni. Khàm ko ațang khân ka thâ chuan ka pawt lêt thei hlawm lo ang tih ka hre si a, chu ai chuan khatia lo țawng khum chiam kha a hlâwk zâwkin ka hre tlat a, nunna panga ka chhan lêt tawh asin," a ti dap dap a. A hmêl ka en ngam tawh rih lo, ka ngaihtuah lêt a, khatih laia thih ka duhzia kha, ani hmuh laia zuanthlâk ka duh loh vàng chauha intihlum ta lo kha ka ni si a. 

"Mi rilru hah, nun beidawng ngawih ngawih leh, a... 'thih châk' ti mai ang, hetiang  ka hmuh hian hrehawm ka tiin an tân tih theih ka nei em tih ka inzâwt țhin. Khalai hmunah khân mi pakhat a thi tawh a, chu chuan ka thinlung a tina êm êm a, mi beidawng tân thihna hmun ni lova beiseina thar an chhar chhuah theihna hmun atân ka duh avàngin hun ka neih chuan ka kal ziah țhin rêng a ni, nang nèna kan intawnna hmun a ni ta bawk a, kha lai hmuna ka lo awm kha ka la inchhîr ngai miah lo," a ti leh malh malh a.

He nu tê hi, ka rin a ang miah lo. Khatih lai khân a rùi emaw ka ti a nih kha, plan fel tak neiin khatiang khân mi pawh a lo hmachhawn fo tawh tih a hriat reng mai. A hun lai khân thinrim viau mah ila amah avàng chauh tak takin tûn thlengin ka la dam a, thih pawh ka tum leh chhin ta miah lo chu a nih hi. 

"Min ngei em? I thil tum tihlawhchhamtu kha ka ni si a," tia min zawh chuan,"A tìrah kha chuan ka thin a rim ve khawp, hmeichhia i nih vàng chauha him i ni nghe nghe," ka ti ve ta nge nge a, ka zêp duh bîk lo, min hre chiang lulai êm mai.

"Vawi khat chu pakhat chuan min rawn hnek tawh asin, ka thãwmah mi dangin min rawn țhelh ta hlauh a, chuti chu ni lo se chuan a nuihzatthlâk loh ngawt ang, a hnek lah kha ka dàwl fahran lo bawk sia," a ti a, nui pah chuan a khabe chu a dawm a, a hnek fuhsakna lai a nih ka ring ringawt a. Chutah," Mahse, a hnu lamah erawh kan inkàwm ngeih a, tûn thleng pawh hian kan la inbe zauh zauh, nikum khân nupui pawh a nei tawh nghe nghe a," a ti zui leh zat a.

"I hlau miah lo em ni?" tia ka zawh chuan," Hlau ve tho e, ka derdêp ve bawk si a; mahse, nunna an chàn ai chuan pawi ka ti lo va," a lo ti leh a, min rawn enin," Mahse, en teh, nang ang êma kawm ngeih hi ka la nei miah lo, Pathian hian ka kawm tùr atân liau liau hian min pe che a nih ka ring," a ti leh siam siam a.

"I ngaihruatna a nih chu, thil thleng palh a ni ve mai," ka lo tihsak a, ani lah chuan," Kha, khatianga min chhàn te khân ka thin a rim miah lo, min chhàn dànte kha a cute ka ti daih a nih chu," nui sâng chung hian a ti pek a, a lamah ka bân ka phar hluai ringawt.

"Min bêng phal dâwn lo tih ka hria a,  ka hlau miah lo che aw," a lo ti a, chutah," Ka thil sawi tùr ka sawi zo tawh a, naktûkah i sawi ve tawh ang, zaninah lo ngaihtuah char char ang che, i sawi loh pawhin ka zâwt lui zêl tho ang che, eng pawh i sawi thei ang, i bialnu chanchin thleng pawhin aw," mit siai sak chung chuan a ti leh a, a țhutna ațang chuan a tho ta nghâl a.

*THIL DANGAH RINAWM VIAUIN LANG MAH LA, SUM LEH PAIA I RINAWM CHUAN LOH CHUAN RIN I HLAWH NGAI CHUANG LO ANG, FÎMKHUR ANG CHE*

Ka sawi na mah mah em aw...🤔🤔🤔