☆EARTH ANGEL☆ - 6 By Dingdi Pachuau

 ☆EARTH ANGEL☆ - 6 By Dingdi Pachuau

Mami thih dàn chu thih dàn pângngai lo a nih avàngin mi ngaihven a hlawh a, thih dàn pângngai lo tihah natna neia thi ni lovin 'mahni intihlum a ni' an ti. Âwih tùr nge âwih loh tùr tih pawh ka hre lo, a bula awm țhìn nia an sawi a țhiannu sawi dàn chuan," Damdawi a ei pawlh nasa thei lutuk a, a inhal hlawm a niang," a ti a, chu chu an  ring deuh ber ni maiin ka hria; mahse, kei chuan damdawi vàng ni mah se a bulpui berah ka ngai ve thei lo, a nun a hlim bîk hauh lo tih chu ka hre ve tho a; mahse, ka inchàwm theih hun pawh nghâk chhuak thei êm lova mahni nunna la êm tùr chuan ka ring thei lo, ka ring phal lo a ni ber ang chu. 

Vuiniah chuan ka țhiante an rawn lang ve vek a, ka rin loh deuhin Remruati pawh a lo tel ve lehnghâl a, ka u ruang chungah pawh pangpâr a dah ve nghe nghe. Nizàn kha chuan an rawn kal lo a ni maithei, ka hmu lo hlawm pawh a ni thei tho.  Ka u chanchin an sawi ațang chuan kan chhûngkaw nun dàn chu an hre thiam ve kuar kuar ang chu maw, a thih dàn lah thih dàn pângngai lo a la ni zui a, ka mipa țhiante hi chuan min hriatna a rei ve tawh a, engah vak ka ngai lo; mahse, Remruati ber hi, ani chu pastor fanu niin an chhûngkua an felin an inngeih àwm hlawm si a, an chhûngkaw nun leh kan chhûngkaw nun a han khaikhin ang a, inang lo a ti nasa dâwn a ni. 

Ka nuin a tuar thiam thei lo va, a țap bâng hlei thei lo. Hnem dàn ka thiam hauuh lo lehnghâl a, chu achhapah, ka nu dik tak a nih lohna hian a lakah min ti-inthlahrung ru tawh, ka pa erawh chu mipa a ni bawk a, tuar viau ang pawhin a lang lêm lo; mahse, a fanu a ni a, a thih dàn mualphothlâk ti viau mah se, a rûk chuan a tuar ve tho ang. Kei pawhin ka u thi chu hrehawm ka ti, ka unau neih chhun a ni si a, tûn hnuah inpawh tehchiam tawh lo mah ila thi mai atân chuan ka la phal bîk lo. Ka ngaihtuahna a kal thui deuh phei chuan ani chuan rilru hrehawmna a nei tawh miah lo ang a, tui taka muhìl ang maiin a mu a ni, a nuam ngawr tawh zâwk ang chu.  Kei chuan hrehawm ka la tuar chho dâwn chauh a, lehlam takah chuan a thi ta daih pawh hi a awhawm phian zâwk a ni tiin ka ngaihtuah a. Mi sawi, nun hrehawm, hauh leh àn khum, he khawvêla nun hrehawmna zawng zawng hi a tuar tawh dâwn lo va, ngaihtuah a ngai tawh lo, a damlaiate hi ngaihtuah ngai zâwk chu kan ni.

Chhûngkhat laina nei ve nual mah ila kan inpawh lo hlawm lutuk a, a thih sárhù lai vêlah rawn lang ve țuam țuam mah se an daih rei lo, kan in chhûng chu a reh leh ta tlawk tlawk mai a ni. Kan chhûngkua chu ka u thih hma ai khân tunah phei chuan kan inbe tlêm leh sawt a, a chhan chu ka nu a țawng tam ta tlat lo va, ka pa lah ni tina chhuah ngai a ni bawk nèn, kei lehkha zir tùrin room-ah ka tawm reng a, rilru erawhin lehkha lam a ngaihtuah hauh lo, a châng phei chuan khumah muin ka meng reng a, ka nin hnuah ka tlân chhuak a, ruih hnâpna tùr ka zawng leh țhìn. Mami ka ngaihtuah chhuah apiangin chutiang chuan ka awm ziah, hun kal zêl hian a thih thut hriat thiam lohna min pe lian zêl a, ka zir chhuah huna ka bula awm duh khawpa rilru pu si, hma taka a thi leh thut si kha ka hre thiam lo a ni ber mai.

Ka exam ve ta ngei a; mahse, ka ti țha lêm lo. Țhianteho pawh an exam ve tho avàngin inhmuh khâwmna hun  kan nei thei lo, inhmu lo mah ila Remruati erawh chuan thil ho mai mai sawi pawhin min rawn be fo va, min be rei ngai lo thung. A peih reuh khawp mai, ka țawng peih lohzia a man thiam a ni mahna, min biak rei duh loh ni, eng emaw kawngah chuan a fel reuh chu ka ti, ka hriat tirh laia a thinchhiat tehrêng nèn.

Exam zo ka chhuak chu min lo ko a, a zo hma àwm bîk hle mai ka ti.

"I ti țha thawkhat ang chu maw... Vawiin chu exam zawh ní a ni bawk sia, lêng ila?" a lo ti vat a, dik tak chuan kan rilru ipik churh mai hi tihharh chu ka duh ve khawp mai; mahse, lêng ila, a reh kher ang em? A reh kher loh pawhin ina awm mai mai ai chuan ka zia deuh maithei asin.

"A pawi lo," ka tih chuan hlim hmel deuh hian,"Min hnial loh avàngin ka làwm e, Chuan, ka duhna hmunah  aw ni ang?" a ti sauh sauh a, kal châkna leh kal duhna hmun ka neih chuan loh avàngin ka lu ka bu ringawt a, țawng tam tawh lo chuan kan lìrtheiah chuan chuangin kan tlân chhuak deuh nghâl mai a.

Inah pawh pêng lo chuan a scooty khalh chu ka zui a ni mai, a kalna tùr a sawi chuang lo va, ka zui mawp mawp a ni ber. A tàwpah a spot ngainat ber hmun chu kan tlãn thleng tawp ringawt a, eng vànga min hruai nge tih pawh ka hre lo, ka zâwt lo bawk, vawiin chawhnu chu a thu thuin ka awm rih a ngai tlat.

"Lungngai suh, ka pâwngsual dâwn miah lo che a ni," tiin a nui a, a scooty seat hnuai ațang chuan eng eng emaw hi a rawn la chhuak a, ka lâkpui chuang lo. Țhutnaa phah tur puan chu thing buk hnuaiah chuan a phah a, bêng thap thap chuan min rawn en a, țhu tùrin min ti a ni tih hriain ka țhu ve ringawt a, ani erawh chuan a scooty lam a va pan leh rih a. A rawn phei leh chuan bag lian ve deuh lek hi a rawn khai phei leh a, ka țhutna bulah chuan a rawn țhu ve nghâl a.

"I ril a țâm tawh em? Ei tùr ei nghâl mai i duh em?" tiin a bag rawn khai phei chu a hawng nghâl a, chhâng lo chuan ka en ringawt a, ani chuan," A la lum thar tharin ka ring, thil i ei țha si lo va, ka ngaihtuah deuh che a," tiin a nui leh sak a, bag ațang chuan ei tùr dahna bâwm chi hrang hrang a rawn phawrh chhuak ta nghâl a. Hawngin a chhìnah chuan ei tùr chu tlêm tlêmin a suak chhuak den den a, min rawn pe nghâl a, a rim a tui hlawm khawp mai. Chubâkah, a la sat țhat hmel hlawm khawp mai.

"Ei rawh, a tui i tih ve tho chu ka ring, hei a tam hi aw, kan ei zo vek dâwn nia," a ti sauh sauh a, a ei tùr a suak ve leh nghâl a. Ka han ei chhin den den a, a tui dàn a inang lo vek. Ei tùr hming  hi ka hre lo khawp mai a, tuna ka ei pawh hi ka hre chuang lo, a tui hlawm viau a ni tih chiah ka hria.

"A tui hlawm hle mai," ka ti a, ani chuan," Insuah mai rawh aw, ei țeuh rawh, ei zawh ngei ngei tùr a nih kha, a daih hunah chuan a tui tawh miah lo ang," a lo ti leh a, tlêm tê têin ka ei a, ka insuah ka insuah a, ka ei ta țeuh mai. Ani pawh chuan a ei ve țeuh ang, a insuah a insuah ve tho.

"Hun thâwl tak neiin ei tùr eipui che hi ka duh a, titi i duh emaw eng eng emaw sawi i duh emaw a nih pawhin ka awm reng a nia, ina awm chuan i rilru a ipik țûn ang a, hetia hmun thengthaw leh mi chîm buai lohna hmuna i awm hian i thâwl ve hawk thei a, chu chu ka duhpui vàng che a ni bawk a," a ti leh malh malh a.

"Ka lâwm e," ka ti sap a, thil han sawipui tùr ka neih pawh ka hre chuang lo. Ei tùr tui tak min rawn kensak a, min lèn chhuahpui bawk a, mi dang chîm buai lohna hmun thengthaw nuamah. Ka tâna a thil tih hi min ngaihtuah vàng a ni a, a ropui ka ti a, làwmthu ka sawi lo thei lo. Țhian rau rauah pawh hmeichhe țhian neih hi a lo hlûin a vànneihthlâk a lo nih hi, ka mipa țhiante ngawt ai chuan min duatin min ngaihtuah deuh chu a ni.

Zan khat chu engtizia tehrêng nge ni, Mami room-a luh châkna ka nei tlat mai a. A room hi ka têt deuh lai, kan inkawm ve laia ka luh bâk kha ka lût tawh miah lo. Pasal neia a chhuah hnuah phei chuan a room lam hawi hian ka pên chhin tawh lo hrim hrim. Ka room hi chhak lamah a awm a, ani room hi chu hmàr thlang lamah a awm a nih chu, kan room panna a inan loh vàng pawh hi a ni mahna le.

Ka nute an mu tawh a, a tlai ve tawh bawk a ni. Ka tho chhuak leh a, Mami room lam pan chuan ka chhuak phei zàl zál a, ka nu leh pate an rawn thawh palh thut pawha min hmuh ka duh loh avàngin light pawh ka on duh lo, ka phone light chu ka hmang mai a, room chhûng chu ka hmuh lohna a rei tawh bawk a, a lo tidanglam vek tawh a lo ni. Room chhûnga thil awm chu ka en kual dan dan a, ka tân chuan thil thar a ni deuh vek mai. Kan la têt deuh laia kan chhûngkaw thlalâk hi a chhuarah chuan a lo let bal a, ka han en chiang a, hetih lai hi chuan kan la hlim ve viau a nih kha, hemi ni phei hi chuan thla kan la tùr kha ka phûr khawp mai a, ka tlàn kualna lamah filter no pawh ka titla keh nghe nghe a nih kha.

Ka en kual zêl a, a lehkhabu dahte chu ka en kual zêl a, a zirlaibu hluite pawh fel takin a lo la inrem țhap mai, kum eng emaw zât liam taa a zirlaibute an ni a, a la dah țha thlap vek mai, mi chêkngèi tak a ni țhìn rêng a ni. A thawmhnaw dahnaah pawh a kawr hlui țhenkhat chu a lo la inkhai a, a rimte pawh a lo la nam deuhin ka hria!

Ka en zawh hnu chuan ka en lêt leh a, a lehkhabu dahna chu hawngin ka en thuak thuak a, a note hlui ni àwm tak chu ka han kéu thuak thuak a, a hawrawp ka hmuh chuan ka nui deuh sak a, a kut ziak ngîl seng sawng hi mawi ka ti viau țhìn a nih kha, min zirtîr ve tùrin ka ngèn țhìn nghe nghe. Songbook ni àwm tak ka hmuh chuan ka la chhuak a, a lehkhabu dahna chu khãr țhain Mami room chu thãwm dìm takin ka chhuahsan ta nghâl a.

Ka room light êng hnuaiah chuan mu pahin a songbook chu ka bih a, sâp hla chi hrang hrang hi a lo ziak țeuh mai a, a satute thlalâk a lo bel tel zêl bawk a, thil hlui han hmuh chhuah leh chu a lunglènthlâk ka ti viau mai, kei pawhin hetianga ziah hun lai kha ka nei ve tho; mahse, ka buaipui rei ve lo zâwk a. Ka en zêl a, phêk hnung bera hawrawppui ngata maia 'MI SUALPA, THISÂWN RAWH, LALHRIAT' tih ziak ka hmuh chuan mak ka ti ru deuh khawp mai a, a hawrawp ngei ni chuan ka hre si a, hetiang țawngkam hi a hmang ngai pawhin ka hre lo, sawi pawh a sawi chhuak ngai hauh lo a nih kha. Phêk dang ka keu a, chutiang inziak dang a awm tawh lo, a dang chu uluk tih hriat taka hlathu a ziak chu a ni mai. Tu nge Lalhriat a tih chu ni ang? A țhianpa nge a țhiannu? Chu mi chuan a thin a tirim ve hle a ni ngei ang chu, thi tùra kan duh meuh hi chuan kan thin an tirim duh viau asin.

A tûkah chuan lêng chhuak lovin Mami room-ah chuan lût lehin, uluk zâwk hian a note chu ka en kual leh dan dan a; mahse, chutianga thu ziak dang chu hmuh tùr a awm lo. Ka hai kual zêl a, ka hmu chuang lo. Mami kha hmeichhe fel ve tak chu a ni ve țhìn chiang a, a school lam chanchin kha a sawi ngai lo nain lehkha thiam ve tak chu a ni a, țhian sual a kawp lah kan hre ngai lo. Ka nu leh pa thu pawh a âwihin naupang fel tak a ni a, duat pawh an duat rêng a ni, school hostel-a a awm ațanga a nungchang a rawn thlâk dâwrh mai kha thil mak tak a ni, damdawi a rui an man chhuak a nih kha. In khata chêng tlâng reng pawh hi a lo inhriat chian loh theih khawp mai, khatih lai kha chuan ka la naupang ve deuh bawk a, ka lo hre lo pawh kha a àwm viau tho mai.

Remruati'n min rawn bia a,"Vawiin chu exam zawh làwm ila?" a rawn tih chuan ka bo deuh hû mai. Kan zo daih tawh si a, vawiin ataka exam zawh han lawm leh taimai chu, a naupang chhia e.

"Kan zawhna a rei tawh ém mai, tuna han lawm leh chiam pawh chu a," ka ti hlak rêng a, Mami room-ah ka laawm a, thil chi hrang hrang ka lo ngaihtuah lai a ni bawk nèn, ka țawng chu a ngaihnawm lo maithei.

"Vawiinah ka zo ve chauh alawm," a rawn ti leh a. He nu hi, ka zawh ni khân a lo zo ve miah lo tihna em ni? Ka ring chiah lo deuh a," Khawi maw, i exam routine min lo thawn teh," ka ti ta chiah a, ani lah chuan," Min ring mang nange? Aw, ka lo thawn nghâl che, Boss," tiin a rawn nui hak hak a.

Message chu ka han en a, vawiin chawhma - a exam zawh ni, a dik reng sî! Ka en chho zêl a, ka exam zawh ni, ni 19 ka han en a, ani chuan subject a lo nei ve miah lo! A nih, khami ni khân eng nge college-ah khân a lo tih ve? Min nghâk a, min hmu tùr ngatin a lo kal tihna em ni?

"Min ring tawh em, Boss?" nui hak chunga a rawn tih chuan,"Ni 19 khân eng nge college-ah khân i lo tih? Exam tùr paper i nei ve miah si lo," tiin, a zawhna pawh chhâng lo chuan ka zâwt nghâl vat a, ani lah chuan," Ka lo kal thei lo em ni? Ka college a ni ve tho alawm," a lo ti mai a, chutah," Vawiin chu aw, ka rawn sâwm dâwn che em niang?" a tih zawm nghâl zat a.

Ka chhuak ta nge nge. Ka exam zo kha min chhuahpui si a, a exam zo chhuahpui chu ka tih ve ngei tùr a ni, a exam zawh ni pawh ka hriatpui ve hauh lo a nia, a țhian nih pawh ka tlin ve lo a nih àwm hi.

Chawlh a duhna ber restaurant 'Insomnia'-ah ka chawlhpui a, vawiin chu keimah ngeiin ka treat ve ang chu, a bata ka bat liau liau a ni. Kei chuan a tân ei ka siam thiam ve lo va, ka thiam ve tâwk dàwra chawlhpui mai hi ka tih theih tâwk a ni, a duh duh ei teh se.

"En teh, he restaurant neitupa hi a chhe lo asin aw..." a tih chuan,"Chhe lo i lo hre ve elo?!" ka lo ti vat a, chhe lo tih angreng hi a sawi khât ve si a, hmeichhe lêr lo zet  niin ka hre bawk nèn, chutiang țawngkam a rawn hmang ve chu a mak ka ti lo thei lo.

"Naaa...engah nge chhe lo ka hriat loh bîk ang? Ka mit a del lo va, mi ang pângngai ve tho ka nia," a ti nang nang a, chutah," Mahse, nupui a nei tawh a, awmzia a awm lo, chhe lo ka ti thlàwn mai a ni," nui sâng chung hian a ti leh zat a.

"A va pawi ve...! La nei lo se ka tihpui hle mai che," ka ti ve a, ei tùr kan order nual a, exam a zawh ni a ni ve si a, a duh tâwk ei se ka duh a ni. Ani lah chuan," Ka ei zo thei lo ang, order țeuh suh," a lo ti chùl a; mahse, vawiin na nâ nâ chu kan ei țeuh ang tih chu ka thupui a ni.

Ei tur kan nghah lai chuan," I ngaih dàn ka zâwt mai mai ang che aw," ka  ti a, ani chuan thutak hmel zet hian," Eng chu?" a rawn ti nghâl vat  a, kei chuan," Ka zâwt dâwn che alawm," tiin ka han chàwl vang vang phawt a, chutah," Mihring nungchang danglam thut țhìn hi eng vàng nge nia i rin?" ka ti ta a.

Ngawi rengin min en ràn rán phawt a, chutah," Thil 'eng emaw' kan chunga a thlen thut vàngte pawh a ni thei ang chu," a lo ti a, kei chuan," Thil 'eng emaw' i tih chu a țha lo lam tihna a ni ang chu tiraw?" ka tih chuan a lu a lo bu nghat a," A țha lo lam hian a țha lo zâwng vêkin nghawng a nei thei a, i zawhna kha nungchang danglam thut  tih a nih vàngin a țha lo lama danglam thut i tihnaah ka lo ngai mai a," a ti leh a.

"A nih chuan, entîr nán, nang hi hostel-ah i awm a, i luh hnu rei lo teah a hmaa i tih ngai miah lohin i nungchang i rawn thlâk ta thut a, ruihtheih thilte i lo tih phah a, in ațanga school i kal lai chuan i ti ngai miah lo va,"ka tih lai chuan," Hostel-a ka țhian kawmte vàng pawh a ni thei tho ang; mahse, chutiang ti tùr pawh chuan hmeichhe  kâwlhrâwng ve deuh chu ka nih a ngai ang chu, a chhan chu duh inang lo chu inkawm ngeih hi a harsa ve a maw," a lo ti a. Chutih lai chuan kan ei tùr order chu a lo thleng a, kan thil sawi lai pawh chu kan tàwpsan ta rih a.

"Ei țeuh rawh, kan ei zo vek tùr a ni," ka tih chuan a chek tlak a," Ka puar over dâwn tihna a ni," a lo ti a, kei chuan," A pawi lo, i exam zawh kan làwm a ni mai a, i phú alawm," ka ti ve tlat thung a, eng mah a sawi chhunzawm ta bîk lo.

Ei tùr kan ei mawlh mawlh lai chuan,"Hostel nuam tih loh vàng leh rilru hrehawm vàng pawh a ni thei tho. Hostel luh ațanga rei lo te hnuah a nih phei chuan thil eng emaw tak thleng awm vàng pawh a ni thei ang, rilru lam vàng a ni mah ang chu," a ti chhuak phawng a, ei tùr ei lo chuan ka en ta reng a. Mami khân rilru hahna eng emaw a lo nei em ni 

ang? Eng thil nge a chungah thleng ang? Naupang fel tak a nih țhin kha, a nungchang danglam ta thut mai kha chhan a awm ngei ang, hostel kha hrehawm a lo ti viau em ni? A luh dâwn hnaih lai vêlte pawh khân a hlim viau a nih kha, ka ngaihtuah chian hian a mak ka ti ta tulh tulh mai.

"Eng nge i ngaihtuah? Ei teh," tiin ka hmai zâwnah a kut chu a rawn vai a, ka thil ngaihtuah lai ata harh chhuakin ka nuih lui sak a, ka thil ei chu ka ei chhunzawm ve leh ta nghâl a.

Ka khumah țhuin vawiina Remruati thil sawi kha ka ngaihtuah a, Mami chungah chuan eng thil chiah nge thleng ang le? 'Thisâwn rawh' a tih kha 'Lalhriata/i' a ni ngei mai a, kha nèn khân inkungkaihna a nei thei ang em? Lalhriata/i nèn chuan an inhau tihna em ni ang? Hostel-a a awmpui chu a ni ngei ang a, an inhau thinrim ang a, chu vàng chuan a rilru hrehawm khân damdawi a lo ei țhin tihna em niang? Hmm, ka thil ngaihtuah hi, a va țûl lo tak! Thil hlui lutuk tawh a nih hi, amah Mami thil hre tùr ber lah a awm tawh lo lehnghâl a, thil țûl lo lutuk a ni; mahse, ka ngaihtuah lo thei mai bîk lo, ka rilru a luah ngut ngut mai si a.

Ka muthilh theih ngang loh avàngin ka tho leh țhem țhem a, Mami room-ah bawk chuan ka va lût leh a,  a lehkhabu zawng zawng chu ka va keu chhuak deuh vek a, awm pawh ka awm rei hle a ni; mahse, ka thil ngaihtuah kaihhnawih thil chu pakhat mah ka hmu lo. Kha maw, thil țûl lo lutuk a ni ka tih tawh kha. 

Ka chhuak tùr chuan a lehkhabu dahna sîr kila eng emaw tla hi ka va hmu zauh pek a, lehkhabu a nih ringin ka va chhar leh ngat a, journal a lo ni a, a kâwm chu bêng fai thuak thuakin room light ka off a, ka room lama chhiar atân ka keng chhuak ta nghâl a.

A phêk hmasa berah chuan a hming hi nalh takin a lo inziak a, a hawrawp ngei a ni, kum 2017 tih a ziak kalh bawk a, a la rei vak lo chu a nih hi, a hunlai kha chuan a uluk lehpek ngawt ang chu.Phêk dang ka han keu leh a, ni tin ni lêm lova a hun hman dàn chu chipchiar lo tê hian a lo ziak thla ve a, ka chhiar zêl a, kan têt deuh lai chanchin a ngaihtuah lêta a ngaih țhinzia thu a ziahna ka han chhiar chu ka lung a tileng deuh ngawt mai a nih chu.

Chutah, he thu hi ka chhiar fuh ta.

'Kha hostel kha awm lo se he khawvêlah hian nuam ti takin hun ka la hmang ve ang em...?!!'  Hei hian eng nge a sawi tum chiah ni ang? Kha hostel-ah khân thil thleng chu a lo awm chiang a ni, eng thil nge niang le? Kha hostel-a a awm ațang khân a nungchang a thlâk vek a, damdawi hial ruih phahin hnawh chhuah a ni bawk, khatih lai khân ka la naupang ve deuh bawk a, ngaihtuahna ka la hmang lo bawk nèn, hostel ațanga hnawh chhuah ngai khawp leh nu leh pate hialin an hauh hrep ngai ta chu kei pawh khân sual ta viauah ka ngai a nih kha.

Ka chhiar chhunzawm leh a.

'Bawiha(min koh dàn) nèn khân kan hlim viau țhìn a nih kha, pianpui unau ang chiahin ka en a, ka thisen zawm ni lo mah se, ani chauh hi ka unau neih chhun a ni, ka hmangaih êm êm a, keimah avànga zahna chi hrang hrang a tâwk țhìn leh hauh a tuar țhìn hi hrehawm ka ti țhìn. Ka nau ni mah se a tân tih theih ka nei chuang miah lo, unau pianpui a nei lo an tih ka hria; mahse, kei min nei thung alawm, kei pawh hi, eng nge lêm chuang? Ka pahrawn fa ka nih loh vàng em ni hetiang hi ka chungah a thlentîr ni?-'

Hei chu ka hre thiam ta hauh lo mai! Ka pahrawn a tih hi tu nge ni ta? Tuna ka pa hi em ni a pahrawn chu? Ani pawh hi ka pa fa a lo ni miah lo tihna em ni? 

Ka ngaihtuahna a buai zo vek, intih harh nân ka lu chu ka thing nawk nawk a; mahse, 'pahrawn' tih mawlh mai chuan ka ngaihtuahna a luah khat mup mup thung.

*HREHAWM PAWISA LOVA TUAR CHHUAK TÂN HLAWHTLINNA KAWNG A INHAWNG ȚHIN, CHUTIANG MI CHUAN HREHAWM A PAWISAK LOH MIAU AVÀNGIN A TÂN HREHAWM A AWM LO ȚHÌN*