☆EARTH ANGEL☆ - 19 By Dingdi Pachuau

 ☆EARTH ANGEL☆ - 19 By Dingdi Pachuau

"I mitmu rawng hi a dum miah lo," ka tih chuan," Nia, ka pa ka chhùn a," a lo ti ve mai a, chutah, awm sawn deuhin," Keimah chauhin ka pa mitmeng ka chhùn a, chuvàng chuan ka pa pawhin min duat phah a," nui chung hian a tih chhunzawm leh zat a.

"A nih, ka mitmeng ve hi?" ka ti leh a, min rawn hnaih lehin ka mitah tak chuan min rawn en a, chiang zetin ka lo en ve kar a.

"Um, a dum țha kék káwk viau dàwn emaw ka tia, a lo dum țha viau tho chu a nih kha," thle sawn deuh pah chuan a ti a, a nui var var zui a, chutah, rawn thutak thutin," I bialnute lakah chuan i rinawm viau ţhìn dâwn a nih kha," a ti leh a.

"Eng maw?!!"

Ani chuan," I rinawm lo em ni?" a lo ti vat a, min rawn ena nui hmêl a put leh tâk avàng chuan a biangah chuan ka piaisak ta thut a. Thu dik tak min hrilh emaw ka lo ti hman tawh a! Dâwt min lo hrilh niin.

"A naaaaa..." tiin a țê chûl a, kei chuan," Engah nge dâwt min hrilh ve reuh ni?" ka lo ti thung a; mahse, ka thlah ta thuai tho a, a biang chu a tuai vat vat a.

Hun a kal zêl a, Class kal loh ni chuan Remruati thlim ru chungin Mami hostel awm laia an cook pasal leh an sir-te chu a rúkin ka zawng fo a, hun a liam tam ve tawh avàng erawh chuan zawn hmuh kim an har khawp mai a, an sir-te chu ka zawng hmu mai a, pakhat erawh chu a lo boral hman tawh thung a, ka hmuh chhuahte chu mi pângngai tak tak niin han rinhlelhawm àwm pawh an awmin ka hre lo; mahse, a langa țha tak; mahse, chhúnglam ngêt si hi kan tam tawh êm a, ka tân chuan hriat chhuah a har dáwn êm asin.

Inrinni zàn khat chu C-a room-a kan awm laiin Mapuia chuan," Vawiin chu kawmthlang țhenawmah buaina an nei a, an rîk tâk chùlah chuan tiin kan chhuk ve lo thei lo va, ka nuih a za deuh bawk si, ka thin a rim deuh bawk si, zahthlâk bawk si, awm pawh ka awm rei duh lo va," a ti nang nang a. Muana chuan," Eng buaina maw? Hriat a va châkawm ve, i sawi chhuak ve tingtang bawk sia," a lo ti vat a.

"A, an nu ber leh an pa ber bialnu an insual a," a tih chuan Mapuia chu kan en ta țhap a, Muana chuan rang zet hian," Tu nge chak zâwk?" a lo tu leh vat a, Mapuia chuan nui deuh chung hian," Chak zâwk pawh an awm lo, kan pawt țhen ringawt, an pà dùn a nia aw... Pa ber lah chu a lo ding ngawi reng ringawt a, a zak ve ngawt ang chu," a ti leh a.

"An pa ber bialnu a ni tih engtin nge i hriat ngawt a?" tiin ka lo záwt a, ani lah chuan,"An sawi dàn a ni si alawm, a bialnu chuan pa ber chu inah a rawn lènchilh rap mai a, an nu lahin a lo hre ru ve khiau a ni ngei ang, a lo àn khum a, an insual lai pawh chuan an inchhâng tawn nasa alawm, hriat chhuah loh theih pawh a ni lo," a ti leh a.

C-a chuan," A va mak bawk ve aw!" a lo ti vang vang a, kan ngawi deuh vang vang hlawm a, ka pa ka hre chhuak lo thei lo, ani pawh ka nu nei reng chungin(nupui nei reng chungin)  bialnu a nei a, a tàwpsan vat lo a nih chuan lan chhuaha mualpho hun chu a la awm ve ngei ang, chutih huna ka nu rilru tùr chu ka ngaihtuahpui a, a ringhlel ve chhin tawh rêng rêng ang em tihte chu ka ngaihtuah kal a.

Muana leh bawk chuan,"A tu ber thiam loh chu ni ta ang? An insual thu kha chu lo dah țha ta ila," a lo ti leh a, Mapuia chuan," An pa ber chu ka puh, a chhan chu nupui fanau nei tawh reng chungin ngaihzâwng a nei a," a lo ti a, ka lo bu deuh nghat a. C-a ve thung chuan,"A nih, a bialnu chuan nupui fanau nei tawh tih a hria em?" tiin Mapuia chu a zâwt leh a, ani chuan,"An inchhàn dàn ațang kha chuan a hre vek a nih hmel," tiin a lo chhâng a.

"Chuti a nih chuan a bialnu pawh chu a thiam lo hulhual ka ti, mi pasal duhlai, pawmlai nei a ni tih hre reng chungin a ngaizâwng lui tlat a," C-a chuan a lo ti ve leh a, ka lo bu leh nghat a, chhàn ve pawh ka tum lo, an thil sawi chu ka lo ngaihtuah zãwk a ni.

Muana chuan," Ka hmuin ka hre ve miah lo nain inngaizâwngte pahnih chu ka thiam lo ve ve, an thil tih chu a dik loh miau avàngin. An pa chu nêp ka ti a, a bialnu chu ka ten bawk. A nupui fanaute nèna an inkâr chu a lo chhe viau tawhin a nupui lakah pawh chuan pasal a nihna angin a lo beidawng viau tawh pawh chu a ni thei tho bawk a," a lo ti ve  mual mual a, a sawi dik fuk fuk chu ka ti leh tho mai. Ni e, mi nupa inkâr a ni a, eng nge an nupa inkâra thil awm pawh kan hre lo va, lo sawi ve chiam pawh chu a țùlna ka hre lo; mahse, rilru erawh chuan àwn lam erawh chu a nei ve khawp tho mai.

"I la sawi ve lo a nia," Mapuia'n a rawn tih chuan," In sawi kha ka lo țâwm vek che u alawm," ka lo ti mai a, ani chuan," In hmu ve lo a nih kha, an nu chu a khawngaihthlâk reuh lutuk. A thinrimthlâk ve bawk a, a thin a rim takzet a ni tih hriat tak khân a țawng țha hlei thei lo va, a aw pawh kha a khùr nasa a ni. Lo sual kher kha chu țha chu ka ti miah lo; mahse, a rilru a na ve dâwn êm a, tlàwm leh zah pawh a dâwn zo tawh bîk lo a ni ngei ang," a ti leh barh barh a.

"A nih, tunah engtin nge an awm a? An nu ber chuan a chhuahsan ta em ni ?"Muana chuan a ti leh a, Mapuia chuan,"Chhuahsan nghet hmak tùr chuan a chhuak lo chuan ka hria, a thinrim ve êm a, a pate in lamah a kal ta rih chu a nih kha, fa pathum lai an nei ve bawk sia, naktûk zàn lamah ka pa leh Pa Siama'n an va lam ka ring," a lo ti a.

Ka rilru chu a vâk kual nasa takzet a ni. Kan chhûngkua ka ngaihtuah a, ka nu hian hre chhuak ve ta se, ka pa hi a țhen daih ang em? Ka nu hi kum lamah upa ve deuh tawh mah se, nu hmelțha tak a ni ve a, hna hrehawm a thawk ngai lo bawk nèn, a kum ngaihtuah aiin a lang naupang daih zâwk a, ka pa pawh hi upa ve deuh tawh mah se hmelchhe lo tak leh inkhaithli nalh thlarh mai a la ni a, kum 50 a la pèl tam lo va, nula tak tak chuan an la melh tai fo ang tih chu ka ring, hna thawh a lo nei bawk nèn; mahse, ka thiam thei chuang lo. Kawppui laka rinawm loh hi hrim hrim hi ka ngaina lo a ni tawp mai, an kawppuite nèn an inkârah eng thil nge thleng hre ve kêlh lo mah ila, kawppui neih tawh chuan mahni kawppuite lakah chuan rinawm tùr a ni tih hi ka ngaih dàn a ni bur mai.

Remruati bulah pawh chuan ka zâwt ve chhin a, ani pawh chuan ka ngaih dàn chu min lo țãwmpui khawp mai, a ngaih dànah chuan 'Inneihna chu mi pahnih chauh inkâr a ni a, mi pahnih inkâra mi dang an lo tlâkzeh ve tawh chuan inneihna hlimawm a ni thei lo, tlâkzehtîrtu leh tlazep chu an thiam lo a ni' tih a ni ve deuh tawp tho, a sawi zêl dàn chuan," Ni e, hmalam hun chu kan sawi thei miah lo; mahse, kawppuite laka rinawm hi tum tlat ila, insûm thei ila, thlèmna tawh theihna kawnga kan insûm thei dâwn lo a nih chuan chu kawng ațang chuan kal sawn hmiah tùr a ni, thlèm theih awlsamna kawng ațangin inthiar fihlìm thuai thuai zêl ila, min thlèmtu tùr pawh a beidawng mai ang," a ti, a dik ka ti lutuk, a tàwp lam phei hi chu min sawi chhan ni deuh tlatin ka hre nghe nghe a, ka inhre chhuak deuh ram ram a, ka zak ve deuh hlek bawk.

"A tlãngpui thuin Biak ina kan inkhâwm lai hian thlêmtu hian min thlêm khat khawp, chuvàng chuan lo inkhâwm ve tawh la?" a ti zui zat a, kei chuan,"Ka inkhâwm ziah alawm," ka lo ti vat a, ani chuan," A ni maw? Khawiah?" a lo ti leh vat a, mak ti hmel zet hian min rawn en hau bawk a.

"Aw, ka rilruin ka inkhâwm ziah alawm."

Ka hnungah min rawn chum ak a,"Țha deuhin min chhâng dâwn emaw tih laiin," a ti a, kei chuan," Țha deuhin ka chhàn che kha maw," ka lo ti ve bawk a. Amah vêk chuan," Vawi khat tal chu kan biak inah lo inkhâwm ve teh, i bula inkhâwm ve ka châk e," a ti leh a.

"I châk te chuan kan biak inah lo inkhâwm mai la?" ka ti a, ani chuan," Châk e, min inkhâwmpui peih meuh ang maw?" chîk zeta min rawn en chung hian a ti a, kei chuan," Nang berin i tih phawt chuan," nui chungin ka ti a. A lo inkhâwm dâwn chuang lo va, dâwt tlêm sawi chu a pawi lo ang chu maw.

"Ka chhinchhiah thlap, sût âwih tawh loh, sût leh chuan vàn Pathian ngam i ni mai."

Ka nuih za lutuk chu ka insûm thei ngang lo, ka nui chhuak ta hawk hawk a, min rawn en hâ a, ka nui chu mak a tih hmelin a hriat thiam loh hmel khawpin ka hria.

"Nula ve pui si, khatianga han sawi chhuah kher," la nui reng chung chuan ka ti a, ani erawh chuan," kan têt laia ka ute tih dàn a nia, khatianga an tih tawh kha chuan dâwt an sawi ngam ngai lo, nang pawhin dâwt i sawi thei lo aw," a ti leh barh barh a.

A hmel pawisawi lo tak chu ka en vang vang a, he nu hi ka țhiannu mah ni se amah ka en dàn leh a laka ka rilru put dàn hi ka tibo thei miah lo. Ni tin deuhthaw kan inhmu a, hmu miah lo ila chuan a zia maithei; mahse, hmuh loh tih lam chu ka ngaihtuah duh lo, ni tina ka hmu chung pawh hian ka ngai ru vawng vawng tho a ni si a, ka awm dàn leh ka mitmeng, chêtzia ațang hian min man chhuah loh hrâm ka beisei a ni; mahse, ka thup reng theih loh hun a la awm ang, bialpate a la nei ang a, mipa dangin an biain an han kuah ang a...

Ka duh thu hi ka hrilh mai dâwn em niang? Hrilh ta ila engtin nge a lo ngaih ang?  Min huain min biak duh loh phah ang em? Nge min lo duh ve zâwk ang? Mahse, țhian kan ni a, kan ințhian țhatna hi ka thil sawi chuan a tichhe vek thei ang em? Chhe thei chiang ang, min duh loha a thin a rim chuan kan inkára ințhian țhatna chu a tàwp nghâl vek dáwn tihna a ni.

Pathianni zîng khat chu min rawn biain,"Tukin chu ka rawn inkhâwm tak tak dâwn a nia, lo insiam diam rawh aw; mahse, min lo nghâk la," a rawn ti ta mai a, a fiamthu a nih ringin ka nui hak a,"Ka la tho lo," ka ti phawt a, a rawn chek tlak tlak a," Nizànah inkhèl ka en a, ka meng rei alawm," ka tih leh chuan," Tho nghâl rawh, chaw ei a hun tawh a nia," a rawn ti ve thung a.

Khua a lum ve tawh a, ka thawh chhuah chuan ka pain  chaw ei a lo rawt mêk a, ka ei ve nghâl chu a ni mai. Chaw ei lai chuan ka nu chuan,"  Vawiin chu inkhâwm bànah lèn kual lawk ka duh dáwn a, tih tùr i nei hran lo tiraw?" tiin ka pa chu a bia a, ani chuan," Nei lêm lo," a lo ti ve mai a, a bialnu a awm loh lai a ni ngei ang, a hman ve tlat mai!

"Chuti chu, min hruai kual lawk mai rawh aw, dam lo kan pah a ni mai a, kan la kan miah lo va," ka nu chuan a ti leh a, ka pa chuan," Tu nge a?" a lo ti ve vat a, Pa Sanga, a kal lam chiangkuan loh avànga a dam loh thu a sawi chuan ka pa chuan," A va zia lo ve, a dam țha emaw ka lo ti mai asin," a ti a, ka nu chuan," Nia, kan tlawh khât ta deuh a, kei pawhin ka hriatna a la rei lo," a lo ti ve mai a, an thil sawi chu ngun takin ka lo ngaithla a, Pa Sanga chu ka pa lama kan chhûng a ni a, ka pa zâwkin a dam loh thu a hre lo chu mak ka ti deuh hlek a, kan chhûngkhat hnaite nèna kan inpawh lo viau mai hi tu thiam loh nge ni ang aw tih ka ngaihtuah kai daih bawk a.

Ka nute inkhâwm tùrin an liam chiah tihah chuan Remruati a rawn thleng ve ta nghâl a, makti takin ka lo en reng ringawt a! Ka thil sawi kha a lo ngai thutak tak tak si a, inkhâwm tùrin a rawn inchei ap mai a, kei lah kekawrbùl leh Tshirt lian zet hain slipper pawh ka bun lo a nia! Min rawn hmuh chuan,"A, i la insiam nange?!!!  Muangchâng lovin insiam vat teh," a rawn ti nghâl a.

A chhiat lohzia chu! A hmaiah makeup tlêm a hmang tih ka hre ve thei mai a, a kawr hâk sen lãr zet chu a inhmeh leh kher mai, a sen lãr hi a inhmeh viau a nih hi, puan a bih zán a, a pheikhawk sâng bun nèn, a mawng arh laih leh a kâwng fêk tak chu a inhmeh, a mawi ka ti. A puan bih vàng chuan a mawng bial mãt chu a lang chiangin țhiannu mawng nalh zet ka lo nei reng a lo nih hi!

"Ka inkhâwm ngai lo ka tih kha," ka ti thla rawk a, a hmaa a thil sawiho kha fiamthua ka chhàn vek avàngin min rawn sàwm lah ka ring hek lo, ka inkhâwm ngai lo tih pawh ka hrilh tawh tho bawk.

"Vawiin chauh chu, hei ka lo sàwm tawh che hi, a la tlai chhe lo a nia, han insiam rawh le," tiin min tur leh a, a buaithlák ka ti ta riau mai, kan biak ina inkhâwmpui ka duh teuh lo mai, ka inkhâwm ngai si lo, min lo en duh lutuk palh ang.

"In biak inah inkhâwm zâwk ang," ka ti leh ringawt a, ani chuan," I tih dàn dán, han insiam phawt la," a lo ti leh a, hnial hleih theih pawh a ni tawh lo, min rawn sâwm miau si a. A inkhâwm tùr ka khaihlaktîr chuan ka inthiam thei dâwn si lo, țhulhtîr ringawt lah a tihchi miah si loh.

Ka insiam ve ta poh a, inkhâwmna thawmhnaw lah chu ka nei lo kher mai a, ka zawng kual a, a tàwpah phei chuan ka room-ah ka ko lût ta ringawt, ka thlantîr loh chuan biak ina hâk atâna mawihnai lo deuh ka lo ha fuh palh ang.

"I mawi lutuk! Tleirâwlho chuan an lo melh nasa ngawt ang che; mahse, lêrh âwih loh aw," a ti a, nui sâng hian ka kawr dik lo deuh lai nia a hriat chu a siam țha mawlh mawlh a.

"Ka duh rêng vàng ni lovin i rawn kal vàng chauhin a nih hi ka inkhâwm dáwn, a chìn tam chi loh ang," ka tih chuan," Ok, Boss, ka lo hre reng ang e. I fel ka ti teh a nia, min lo hnial fithla țhak ang tih ka hlauhzia chu a," a ti malh malh a.

An biak inah chuan a vawi khatna atân leh a tàwpna(?) atân ka inkhâwm ve ta poh a, biak in pawh an lo nei zauin a ropui e, kan biak in ai chuan a zauin member pawh an tam zâwkin ka ring.  Kan inkhâwm chhûng zawngin ka hawi chhuak lo, ka hmel hriat ka hmu ang tih pawh ka hlau hnuhnawh.

Inkhâwm bànah chuan an in lama pèn a rawt a, ka hnial lo, biak in hi kalsan thuai thui ka duh ber, ka thlâ a muang lo a niang, ka hre chiah lo, biak in ka kal khàt lutuk vàng pawh a ni maithei.

Inah tu mah an lo la awm lo va, ka lãwm kher mai. Ani pawh chuan," I lo inkhâwm chu ka lãwm takzet a ni, i inchhìr loh ka beisei, inkhâwm leh inbual hi chu a inchhìrawm loh a nia," a ti barh barh a, hlim hmel tak pu chunga țawng barh barh hi chu a inhmeh ve thlâwt a ni, țawng hi a inhmeh, a tã liau liay ni àwma mawi a ni.

"Ka inchhîrin ka ring zâwk, min hretute'n min lo hmuh fuh phei chuan," ka lo ti sap a. Ani chuan," Mai mai a, hei kan haw nghâl daih a, tu mahin an rawn focus lo ang che, hmeichhe tleirâwl lam erawh chu ka hriatpui lo va," nui chung hian a ti leh a.

*******

Exam pawh kan lo hnaih chho leh ta viau mai. Semester hnuhnung ber a nih tawh avàngin ka țang ve khawp mai a, Mami chunga thil țha lo thlentîrtu zawn pawh ka hlamchhiah ta rih, ka zirlaiah hian ka insâwrbing duh rih, hlawhtlin ngei ka duh si a. Ka zir ngawrh chho ve ta deuh a, class kal tih lohah chuan chhuah pawh ka chhuak khât; mahse, kâr tàwpah zan khat erawh chu ka la chhuak ve hrâm, chhuah loh zauh pawh ka nei tho.

"En teh, exam zawh velehah thil thar țha deuh  ka hrilh ang che," a rawn ti a, "Hmeichheho tak hi chu aw..." ti rilru vang vangin," Min hrilh nghâl mai la," ka ti a, ani erawh chuan," Aih, lehkha i zir țha thei lo ang," a ti leh tlat a.

"I sawi tê tê a, min hrilh leh duh mang si lo. Ho e," ka tih chuan," A ho lo a nia aw," a rawn ti leh lawi a, ka nuihza thup hrâm hrâmin," Min duh thu kha em ni min hrilh i tum? Ka hre sa tawh tho a," ka ti leh a, a reh ta daih mai!

Ka fiam na mah mah em ni?  A reh ta daih sia, ka fiamthu tih hre lovin a lo thinrim em ni ang?

*Ka fiamthu mai mai a nih kha*  tiin message-in ka ûm zui vat a, ka țhiannu tê hi hloh ka duh hauh lo, ka hloh dâwn ai chuan ka duhna pawh ka tilang lo zêl ang a, ka duh thu pawh ka hrilh chhin miah lo ang.

*Ka hria alawm, ka tihder ve che a nih kha, engah nge i ngaih réng rêng tiin ka reh ta daih a nih kha*  tiin min rawn chhâng a, nui lai lem a rawn dah țeuh bawk a.

Kan exam hma ni chiah chuan Mami hostel awm laia an cook pasal chu jail-ah a tâng tih min hrilh ta nge nge a, a tàn chhan chu hmeichhe naupang kum tling lo a khawih vàng niin a sawi. A sawi zêl dàn chuan a nupui nèn an ințhen chhan tak chu zu a duh lutuk a, a nupuiin a tuar thei tawh lo ni àwm tak a ni, engtin nge maw a lo hriat reuh ni? A zâwt kual nasa àwm reuh mang e, exam zawhah làwmthu chiangkuang takin ka la hrilh ang.

Lehkha zir zawha ka mutnaah Chu pa chanchin chu ka ngaihtuah nasa a, Mami khawihtu a nih ngei ka ringhlel ta hauh lo mai, a jail tàn chhan pawh a hmeichhe khawih vàng tho a ni a, thil sual a ti a, laihlanin a awm ta tihnaah ka ngai, exam zawh lamah hmuh ngei ka tum ang. Hmuh dàn tùr tak chu ngaihtuah ngai ta ber chu a ni, Remruati sawi dàn chuan amah hmuh tumte tu mah a hmu duh ngai lo va, jail-ah pawh a țawng ngai mang lo a ni àwm e, a khirh țalh ang; mahse, hmuh ngei ka tum tlat thung.

*MI AWM DÀN, NUNGCHANG LEH CHÊT DÀN ENG EMAW HLEK SAWISÊLA LO JUDGE CHIAM ȚHINTE HI BIAK INA INKHÂWM ZING BER BERTE ZÎNGA MI AN NI FO NIA*