☆EARTH ANGEL☆ - 20 By Dingdi Pachuau

 ☆EARTH ANGEL☆ - 20 By Dingdi Pachuau

Kum 1 hnuah chuan

~~~~~~~~~~~~~~~

Jail ațanga ka chhuahna pawh kâr khat zet a ni ta, pâwnah ka chhuak ngai lo. Ka nuin a phal tlat lo va, ka room-ah ka tawm deuh chawrh chawrh a ni mai. Ka pain țawngkam  khat mahin min la be lo va, ka nu erawh chu ka room-ah rawn kalin min rawn zilh a, min rin êm êm laia jail tàn ngai hial khawpa thil sual ka ti leh ta mai chu a hre thiam thei lo a ni, a chângin ngawi rengin min en tlawk tlawk a, eng mah sawi lovin a chhuak leh mai a, a chângin rilru nâ tih hriat tak hian," Ka fapa, nang chauh hi ka neihchhun i ni tawh asin, ka rilru i tinâin min tizak hle a ni," a ti leh ringawt țhin. Ka nu dinhmun hi ka hre thiam khawp mai. Nia, min hre thiam lo ang, ani kher lo mi dang zawng zawng pawhin, hriat thiam ka har ve dâwn êm asin, ka u Mami chauh khân min hriat thiam ka ring.

Jail ka tàn laiin Remruati'n min rawn tlawhin min rawn hmuh a tum fo a; mahse, ka hmu duh ngai lo. Ka țhiante pawh an bãng chuang lo; mahse, hmuh loh kha ka tân a țha tih ka hria a, an lakah ka inkhàrkhip a nih ber chu. Ka chhuah nîa an rawn kal tel ve vek erawh kha chu ka zak; mahse, ka tân tihngaihna a awm lo, hmuh ka duh loh avànga jail-a luh leh thu lah a awm si lo, ka nuin min kuah a, ngawi rengin min kuah ang angin ka awm tawp a, ka țawng hauh lo. C-a'n kan motor a rawn khalh a, ka lût ve mai a, kawngah ni se min be țawng zo chuang lo, țawng ka châk lo a ni tawp mai, ka rilruah erawh thil tam tak a awm thung.

Thil ka tisual miau a, ka nu lakah ka inthlahrung ve êm êm tho, chhuak lo tùra min tihna pawh ka hnial duh lo rêng a ni, a rilru ka tinâin hrehawm a ti êm a, a duh loh zâwnga awm ka ngam tawh rih lo.

Ka room kawngkhàr chu a rawn ri koh koh a, ka pa a rawn lût lo ang tih ka hre chiang, ka nu rawn lût dâwn ni se a rawn kik kher lo ang tih ka hria, chuti a nih chuan pâwn lam mi, tu emaw ka țhiante zînga mi pawh a ni maithei. Kawng ka kalh loh avàng chuan tho lovin lo lût tùr chu ka lo en reng ringawt a.

Remruati a rawn luh tâkah chuan ka hawi sawn ta daih a, ka hmu ngam lo, ka hmu duh lo, a țhianpa hi mi sual, jail  hiala tâng, huatna tinrénga khat thinlung pu mi ka ni si a. Ka laka a hun hlu tak sêng ral lo tùr hian ka duh a ni, ani chuan hmalam hun duhawm tak a nei a, he khawvêl sual pawh dâi ve lo  leh mi fel tak a ni a, a țhian ka nih vànga miin an hmu khawlo tùr chu ka duh lo a ni.

"I hmêl hmua i bula ka awm leh thei hi ka hlim takzet a ni," tiin a thil rawn khai chu ka dawhkànah chuan a dah a, amah en lo mah ila a chêt dàn tùr chu ka mitthlà thiam alawm, hlim hmel tak a pu leh ngei bawk ang, a aw pawh a zãngkhai leh viau bawk.

"Ka rawn kal har deuh hlek a, i lo vui tawh viau maithei a ni; mahse, hun pêk che ka duh vàng a nia, hun thâwl nei tùrin ka duh che a, kâr khat zet chu a nih tâk hi," tiin a thaw deuh hak a, chutah,"Ei tur tui tâwk tâwk ka rawn ken bawk che a, i ei țeuh dâwn nia aw. I lo haw tawh bawk nèn, i duh ang apiang i ei thei tawh ang a, i thau thûr thûr mai ang," a tih zawm leh zat a.

Ka țhutna khum che deuh datah chuan ka khumah a rawn țhu thla ve a ni tih ka hre thei mai a; mahse, ka che sawn lo va, a hmel pawh chu ka en duh lo," Khawngaihin, ka kuah thei che ang em? Min awm lohsan chhûng khân ka ngaihtuah thei lutuk che a," a ti leh sap a.

Ka chhàn loh avàng chuan dìm tê hian sîr zâwng chuan min rawn kuah dà dá phawt a, engtin mah ka lo tih loh vàng nge ni, a ngaih a ngam ta deuh a niang, nghet deuh zâwk hian min rawn kuah leh ta a, kei chu min kuah ang ang chuan ka lo awm tawp a.

A  hnu deuha a taksa khùr deuh dat dat chu eng vàng nge tih ka hre chiang khawp mai, a țap a ni, kei hian a rilru ka tinâ a ni, ka nu ang tho khân ani pawh hi a rilru a hrehawm a, a țhian ni tlâk pawh ka ni lo, a lakah hian ka inthiam lo, hei vàng tak hian hmuh pawh ka duh lo țhin rêng a ni.

"Țap suh," ka ti chhuak ve ta nge nge a, ani erawh chuan," Ka insûm thei hleinem, i chèrzia hi, ka rilru a na ém mai," a ti țuau a. Ni e, jail-ah khân chaw ka ei thei lo, ka hnár lah kha a thî fo a; mahse, ka inthup hrâm hrâm țhìn thung. Thil ei thei lo leh hnâr thî fo ta chu, ka taksa chuan a lo ngeih fahran lo a niang, ka chêr a, ka dâng viau bawk; mahse, ka cheziaah erawh danglamna a thlen tam viau lo, chu chu ka tum dàn pawh a ni.

"Hetianga thil pawi thui tak ti lo hian i hmuh duhpa chu hmuh dàn kawng a awm thei ngei àwm si a, hrehawm tuar hrep ngai lovin, engah nge i thil tumte chu min hrilh ve mai loh? Hetiang kher lo pawh hian kawng kan dap dùn tùr hi a nia," a ti sap sap a. 

He nu hi chu aw... ka thil ruahman hi a lo hre pha ve ruau ruau tihna a ni a, a fing reuh ka ti lo thei lo. Nia, jail-a luh hi chu ka ruahmanna a ni ngei mai, ka hlawhtling ta bawk. Ani hi ka thil ruahmanah khân telh ve ka duh lo va, a tel ve ta lo rêng bawk a, ka duh chu tihlawhtling mah ila ka hlim phah viau em le? Ka nu rilru ka tihrehawm a, ka tizak a, a rilru ka tina bawk. Hlâwk ka inti em? Huatna tam takin ka thinlungah hian bû an khuar phah bawk si a, ka ti fuh ber em tih ka hre lo; mahse, ka thil tihah khân inchhìr ka tum lo. Thu dik hriat chhuah ka tum a, ka bei a ni ve mai.

"He thil buarchuar takah hian tel ve lo tùrin ka duh che."

Min kuahna thlah chuang miah lo hian," Min thlauh thlâk tum kher lo la, kan pahnihin kan hriat vek tawh tho kha, tihbahlahtír che ka tum hauh lo, țanpui che ka tum tihte chu i hriat vek kha," a ti leh a, tunah chuan a lungchhe aw pawh kha a bo ve ta deuh, chutah," I dawldâng êm mai a, naktûk lam chu inentîr rawh aw, ka kalpui ang che," a ti leh daih a.

"A ngai lo, ka țha alawm," ka tih pawh chuan," Eng thil pawh ti dâwn la, i hrisèlna a pawimawh hmasa ber a ni," a ti leh a, a ti dik ka ti tho bawk si a, a hnial zâwngin âwkâ ka chhuah duh bîk lo.

"Class kal i ngai lo em ni?" ka tih chuan," I chàwl sia, ka chàwl ve ta mai," tiin min kuahna chu a thlah a, thovin dawhkàna a thil dah chu la chhuakin," I nuin eng vak mah i ei ngai lo tih a sawi a," a ti leh siam siam a, a ei tùr min siamsak chu min rawn pe ta nghâl a. Kei pawh chuan ka lo hnial lo, khati chen kha ka hmu tawh lo va, a ei tùr siam tui tak tak pawh jail-ah khân ka ngaihtuah nasat theih êm kha.

"Ei zo vek rawh, a dang pawh a la awm a nia," a lo ti a, a siam tui bawk a, ka ei nual mai. Ei țeuh ka duh nain ka pumin a tuar ka duh lo, chaw kawpuara ka ei lohna a rei tawh si a.

A awm ve reng a; mahse, zawhna a siam vak lo. Hei tak hi a finna chu a ni ka ti, țawng duh viau mah se mi awm dàn leh chezia ațangin an rilru a zir peih hi ka tia, ka mood a man thiam ka ti khawp mai, tunah hian titi chiama țawng vak kha ka peih lo,ka țawng peih lo chung thil min záwt țeuh țeuh ta se chuan ka ning ve viau maithei a ni.

A tûkah chuan Dr Zonuna clinic min panpui leh a, țhianteho a lo be kual a ni chêk ang chu, clinic ațanga kan chhuah hnuah min rawn fin hlawm a, an lakah ka inthlahrung ru kher mai, anni hi chuan eng mah an hre ve si lo va. Min ngaihtuah a, Jail-a min rawn hmuh an tum țhin pawh khân eng mah an hriat ve loh avàng khân ka hmu duh lo va, Remruati erawh kha chu ka u chanchin engkim ka hrilh a nih vàng khân ka hmu duh lo zâwk a ni, hmu duh dâwn ta ila ka țhian dangte ka hmu duh lo țhìn si nèn, pakhat hmuh duha a dang hmuh duh leh si loh kha țha ka ti bîk lo a ni.

Dàwrah min chawlhpui a, min duat liam liam khawp mai. Jail lam chanchin rêng rêng an sawi chhuak lo va, hlim taka min titipui chu an tum ni berin ka hria, țhiante nge nge, an fel e; mahse, min hretute hmuh erawh ka hlau ve tho, a hmingchhiatthlâk ve si a, min sawi sep sep ngei àwm si a.

Remruati chuan min thlahthlam lo khawp mai. Ka duh dàn chuan Lunglei lam pan thuai thuai mai ka duh a; mahse, Remruati chuan," Inenkawl dam țha phawt rawh," a ti tlat a, ka nu lahin zin chhuah a lo phal rih lo bawk nèn, thinlung tâwt țûnin ka awm leh ta a nih ber chu.

"Ka zâwt lo ang che tiin ka insûm hrâm hrâm a; mahse, a lo rei ve deuh ta bawk nèn, i duh ber chu i puitlin ang chu a nia, kha pa kha a lo ni chiah em?" tiin room-a kan awm lai chuan min zâwt ta nge nge a, ni tin deuhthaw a lo kal a, ei tùr neuh neuh a rawn keng ziah a, ka nuin chhuah min la phalsak vak loh vàng leh kei ngei pawhin chhuah chu nuam ka tih lêm loh vàngin ka room-ah ka tawm nasa a, Lunglei phei huna ka awm dàn tùrte ka ngaihtuah lâwk mai mai țhìn.

"Chu chu, Lungleia phei hunah a hriat chian chauh ang," ti chauhin ka chhâng a, a lo chek hlak thung a," Awmzia a va nei tlêm ve ...kum khat tawp ang i tàn phah a nia," a ti nang nang a. Nia, kum khat vêl chiah chiah jail-ah ka awm a, Mami hostel awm laia an cook ni țhìn pasal tàn vàng liau liau  leh ka hmuh duh vàng chiaha lût ve ka ni, ka hmu ta rêng a,  hmuh erawh a har reuh zêk thung a; mahse, ka tum êm a, ka hmu ta hrâm a ni.  A țawng ngai lo tluk a ni a, a rilru a dik zân lo a nih ka ring nghe nghe, mi dang phei chu a bulah pawh an kal ngai lo, a hrisêl hran lo bawk nèn; mahse, kei erawh chu tum neia lût ka ni bawk a, biak loha chhuah ka tum teuh lo.

"A hrisêlna a pan khawp mai a, zu a lo in nasa țhìn bawk nèn, damdawi in leh jail hi a kàr tawn ni berin ka hria," ka tih chuan," A nih tak chu, sual viau mah se a khawngaihthlâk tho a nih chu tiraw?" a lo ti a, ani hi chuan khawngaihna hi a ngah ve a, mi khawngaih loh pawh hi a nei lo ni àwma mawi a ni.

"Kei chuan ka khawngaih lo," ti ringawtin ka chhâng a, ka khawngaih ve lêm lo tlat si a ni. A thil sual lo tih tawhin a vaw lêt niah ka ngai mai a, hmeichhe kum tling lo han khuaikhem kher hi zawng, a râpthlâk mah mah ka ti. Chutah, nupui fanau pawh nei vek tawh a ni lehnghâl a, a thil tih ang kha a fanu chungah thleng dâwn ta se, eng angin nge a ngaih ve ang? Chu chu a ngaihtuah pha ve tùrah ka ngai.

"A nih, i zâwt hrim hrim tiraw? A lo la hre vek em?" tiin min zâwt leh a, kei chuan," Thil a zawh tlâk vak loh, ka zawh ve theih chhunah pawh khân a sawi pawlh nawk mai a, chu tak chu, Lungleia phei hunah a chiang chauh ang," ka ti leh a, a zavaiin ka hrilh duh lêm lo, thu dik pawh ka hre chhuak vek tawh tih leh ka tàn hun chhûng a rei chhan pawh jail chhûnga buaina ka siam vàng chauh a ni tih phei chu ka hrilh duh lo hrim hrim, hunin a la rawn hril zàwk mahna.

*******

Lungleia kan zin phei chuan Pa Hmingate inah kan innghat duh ta lo va, a chhan chu ka chanchin kha an hre ve vek àwm si a, pan ka hreh a ni. Hotel-ah kan thleng dùn tawp a, nula tlangvãl inngaizâwngah min ngai hmiah maiin ka hria. Pawi lo, a ho e, min hre rei chuang lo ang, mi pawh an thleng reng reng fo tho alawm le.

Kan vànneih asiamin Pàpâri pasal chu a lo awm remchàn lai a lo ni ve hlauh thung a, ka hmu chiah chu a âwma han țhàm lawp mai chu ka duh thut thut mai a; mahse, ka insûm hrâm hrâm a ni, he pa vàng hian ka u kha che thei lovin a awm a, pâwngsual a tawh phah ta nghe nghe a nih kha.

Pàpâri chu kan hriat sa tawh a nih vàng leh ani pawhin min hriat tawh avàngin hlim takin a titi a, hun nei tam lo ka intih avàng chuan,"U Pàpár, khawngaihin, i pasal hi a fálin ka be thei ang em? Eng emaw sawipui lawk ka duh a," ka ti a, a pasal Lalhriata chuan min rawn en a, a țawng lêm lo, a mitmengah erawh eng emaw ka hmu thei, Mami nau ka ni tih Pàpári khân a sawi lang ngei mai a, kha vàng pawh kha a ni maithei a ni.

Pàpâri chuan," E, be rawh khai, hmeichhe pahnih chu veranda lamah kan lo titi dâwn nia," a ti a, ngaihțhat lohna pawh a nei chuang lo a niang, Ŕemruati nèn pâwn lamah chuan an inzui chhuak ta a, ruah a sûr lo va, zàn boruak nawm hun lai tak a ni.

Min en rûn rûn hnuah chuan," Eng thil nge ni ta?" a ti dût a, chiang zeta en chung leh zàmna nei hauh lo hian," Kum 10 chuang kal taa ka u chunga i thil tih kha han ngaihtuah lêt teh," thinrim sehchilh deuh nak hian ka ti chhuak ta chiah a, kei aia kum 5 chuanga upa mah ni se ka zah duh bík lo.

"Eng thil nge ka tih a? Chhe lo ka tih țhin thu kha chu ka hria," zàm loh hmel tak hian a lo ti a, chutah," Eng thil nge i hriat a?" a tih zawm leh zat a.

"I hre zâwk ang chu, țha tê têin sawi rawh, hun kal tawh mah ni se evidence ka nei țha a nia, inpuang mai la, nge ka sawi vek law law dâwn em ni? In nu kha ko lûtin i thil tih tenawm tak hi ka hrilh ve vek zâwk dâwn em niang?" ka tih chuan inthup tum viau mah se dik lo a awm a ni tih a awm dàn ațangin a hriat theih vek a, a mitmeng pawh a buai țan ta hlek bawk.

"Min vau i tum em ni a? Naupang tê tê lehnghâl, hei hi kan in a nih hi, chhuak rang mai rawh," a rawn ti ta țhak mai! 

Kei erawh chuan,"Ka la chhuak khawp ang; mahse, i inpuan vek hnuah chauh, ka u kha eng vànga hua nge i nih? A chungah eng vàngin nge kha thil kha i tih?" ka ti ve ta khawl khawl a.

A ngawih reng hnu chuan," Police ka koh hma hian chhuak mai rawh," awki hniam deuh hian a rawn ti a, a inngaihtuah nasa hle tih a mit chusr dàn ațang chuan a hriat theih a, chutah,"Eng thil nge ti nia min hriat a?" zàm loh hmel tak hian a ti leh a.

"Ko chhuakin a in tùrah damdawi i telhsak a nih kha, chuan, in hostel cook pahnih zînga pakhat zâwk, pasal fanu nei tawhte inah khân i pawm lût a, che thei miah lo chungah khân eng thil nge i tih ka sawi kher dâwn em?" ka thinrim aw pawh chu a khùr dar dar thei hial, ka kut pawh ka hûm nghet viau mai.

"Thu dik lo, i phuahchawp a nih chu. Min puh hmingchhiat tum suh, khawi laiah mah evidence pawh i nei lo ang, khatiang hun rei tawha mi lehnghãl," a ti churh churh a, a hmel chu thinrim hmelin thlâkin zãm chuang hauh lo hian min melh kul a.

"Ka nei, in nu khân a hre ve châk ang, ka'n ko lût ang e," tiin ka phone chu phawrhin Remruati ka call a, a lo chhãng vat bawk a, an rawn lût nghâl a ni mai.

"Thu dik chu hei hi a ni, Mami che thei lo kha i sual hnuah in cook pasal hnênah khân i hlàn a, ani pawhin Mami chunga i tih ang bawk khân a ti ve nghãl a nih kha, engtin nge a țhiannu, a kawm ngeih ber bialpa hian khatiang kha a bialnu țhiannu chungah a tih theih? Mihring pângngaiah i inngai em?" ka ti ta phiar phiar a, ka thin a rim êm avàg chuan ka țhu thei lo, chhuatah ka vei thuak thuak tawh.

"Eng thil nge in sawi hi?!!! Hriat, eng thil nge ni?!!" Pàpâri chuan țap aw deuh, hriat thiam loh hmel leh buai tih hriat tak hian a lo ti vat a, Remruati chuan," Kum 10 kal ta a Mami chunga thil thleng a nia an sawi ni," a lo ti vâwt raih a.

"I u khân min duh lo vei a nih kha, a in tùrah damdawi ka telh hlek a, min duh loh man phuba ka la a ni," a tih chuan Pàpâri chuan," Lalpa leh, eng thil nge thleng ngai hi!!! A va râpthlâk êm!! I sual ta tihna maw? Ni lo, ani damdawi vanga che thei lo chu i mutpui ta a maw?!! Lalpa, engtin nge ka tih tâk ang le? A va râpthlâk tehlul êm!" a ti ta ngawih ngawih mai a, chhuatah chuan a țhingțhi thla hnawk mai a, Remruati chuan a lo chelh ve vat a.

"Bawihi, i tân vek alawm, ani kha in țhianhoah pawh a tițha ber țhìn, in tluk theih ngai loh a nia, i tân leh ka duhna a hnâwl avàngin phuba ka la a nih kha," Lalhriata'n a tih chuan Papâri chuan," Ka thil hriat hi hriat miah loh ka va duh tehlul êm! Lalpa, ka nunna hi la mai teh, Aw, Mami, a va râpthlâk êm! I thil lo pal tlang chu kan hriatpui miah si lo che a, i lo va tuar nasa tak èm, i țhiannu min ngaidam mawlh mawlh teh, hrehawm ka va ti tehlul em!!" a ti ngawih ngawih a.

"Ka u khân vau a tâwk chhunzawmin  a duh lo chung pâwngsual niin, hostel ațanga hnawh chhuah a nih theih nân damdawi kha a hmang  tih i hria em? Kha thil zawng zawng kha i thil tih rah chhuah vek a ni, ka u nun tihrehawm vektu leh nun nuam ti miah lova siamtu chu, mi tenwm tak i ni," ka ti leh bâwih bâwih a.

"A va pawiin hrehawm ka va ti vawng vawng tak!" tiin Pàpâri chu a mittui a tla zung zung a, a pasal a rin êm êm thiltihin a nghawng pawizia chu, mihring nunnain a tuar a ni si a.

"Bawihi, i tân ka tih chu, ani ber a awm loh chuan exam-naah pakhatna i ni thei dâwn a, i ni ta réng bawk a, a dik em? I pasal hian ka hmangaih lutuk che, ka thil tih kha a dik lo a nih pawhin i tân vek a ni ka tih ni. Tlai khat bâk ka inrawlh lo, a hnu lam chu ka hre tawh lo," tiin Lalhriata chuan a nupui chu a rawn pan a, ani erawh chu a ťap tlawk tlawk mai thung a.

*MAHNI SUALNA HMU SI LOVIN MI DANG SUALNA KAN HMU LIAN A, MAHNI INVEI DUH SI LOVIN MI DANG KAN VEI BAWK,  MI DANG HNEK LOVIN MAHNI INHNEK ZÂWK ANG U*