☆EARTH ANGEL☆ - 21 By Dingdi Pachuau

 ☆EARTH ANGEL☆ - 21 By Dingdi Pachuau

Kan haw lam chuan ka țawng hauh lo va, ka rilru bîng mup mup, thinrimna avànga tâwt up up chu tihreh tumin thâwk ka la hawk hawk reng bawk. Kut thawh lovin ka insûm tlang thei hrâm a, ka vànnei nge a vànnei zâwk tih pawh ka hre lo. Engtin nge khatiang thil sual kha Mami chungah khân a tih theih ni? 

Kan thlenna hotel kan thlen hnu pawh chuan ka țawng chuang lo va, ngawi rengin room-ah chuan kan lût a, "I kut thawh lova i insûm tluan thei kha ka lâwm khawp mai, ka lo țang țùng reng a," a rawn tih chuan ka thaw hawk a.

"A vànnei khawp mai," ka ti ringawt a, khumah chuan ka țhu thla nghâl hnawk a, ani erawh chu ka hma zâwna plastic chair inhûngah chuan a țhu ve thung a, thâwk huai pah hian," Nia, a vànnei a, nang pawh i insùm theihnaah i fakawm. Insûm thei lovin kut thlâk ta la, an in chhûngah ngei kut i thlâk tihna a ni dâwn a, a fuh loh bâkah a mualphothlâk dâwn êm asin, i ti ve lo maw?" a rawn ti leh a.

"Mahse, a phû tâwk chu hmu ve tlâk a ni asin," ka lo ti thung a, ka ngaihtuah lêt a, Mami a star țhin a, Mami'n a lo star ve si lo. Phuba lâk nân Mami in tùrah damdawi telhin a mutpui ta a, Mami lehkha thiam vànga a bialnu, pahnihna dinhmun luah țhìntu țanchhana hmangin thil sual a ti bawk a, a tuartu tân a nat dàn tùr ngaihtuah miah lovin eng thil mah tisual lo ang maiin a nung chho zêl a ni si a.

Mutphah chu ka chùm pawp a, he thil hian min tihrehawm takzet a ni. Nikuma kan exam zawh ațang khân ni tin zan tin he thil ngaihtuahna hian min la chènchilh reng a, dârkâr tin ka tih chuan ka daw deuh maithei; mahse, ka thinlung chhûngril ber hi a luah tlat si a ni, mumang ram lam thlengin min ûm zui a, ka rilru a chàwl thei lo. Ka ngaihtuah ngut ngut țhin avàngin zànah ka mut tlèm phah a, jail-ah pawh kut ka tuar phah fo, ka ngaihtuah ngut ngut țhin vangin min biakna ka lo hre lo țhìn miau a.

"Roddick, engkim Pathianin a hria alawm, a hun kal tawhah pawh khân hrehawm takin a lo awm ve reng thei a nia," Remruati chuan a rawn ti sap a, kei erawh chuan," Hrehawm chu a ti hauh lo a nih kha, thu dikin a den pawhin a la zàm loh viau kha maw, Pathianin engkim hre mah se phubâ a la har thei si, dam chhûng ngeia an tihsual phû tâwk chiah ang natna pêk ve kha a țha, a taksaah nâ a tuar ve lo mah mah a, a vànnei phiangsen a ni," sehchilh nak hian ka ti a, ka thinrimna chu a la reh thei lo, ka thaw hawk hawk reng a.

Ka bulah rawn țhu hnaiin ka hnung chu a rawn bêng thep thep a, a rawn chûl bawk a, ka thinrimna chu tihreh a tum ve ni berin a lang, a hnuah phei chuan ka maimichhîng ta daih a. Ani bulah chauh hian thurûk ka hrilh a, ka thinrimna leh ka thinrim chhan zawng zawng pawh ani chauh hian a hria, min hriat thiampui deuh bawk; mahse, ani pawh hian ka rilru chanve ang pawh hi a hre thiam meuh lo ang, a tuartu nih loh chuan  hriat thiam a har bawk a.

"I thinrim hi ka hre thiam lutuk che a nia, a harin a hrehawm dâwn si a, ka dem miah lo che, i insûm thei ka ti a, ka fak êm êm zâwk che a ni," a ti sap sap a, ka hnung chu a bêng pah thep thep bawk a, kei chuan," Pathiana innghah hi ka thei ve lo, kum 10 chuang a ni tawh a, phubâ a la lâk miah loh hi, keiin hre chhuak ta hlauh lo ila chuan tunah pawh hian nuamti takin, thil țha lo tak a ti a ni tih pawh ngaihtuah miah lovin a la awm reng ang chu, tunah pawh hian inchhîr ve tawh ang em? A thil tih khân mi pakhat nun a tichhe vek a ni tih a ngaihtuah chhuak ve tawh ang em?" tiin ka ngaihtuahna bawk chu ka sawi chhuak leh a. 

"Hrehawm a ti ve tawh ngawt ang, a nupui U Pàpâri hrehawm tihzia kha, a nupui a hmangaih takzet a nih chuan hrehawm a ti ngei ngei ang, a inchhîr tawh viau pawhin ka ring," a lo ti ve leh a; mahse, a thil sawi chu ka ring ve lêm lo.

Room khat kan luah dùn mai a, room hran luah duh miau hek lo le, kei chu chhuatah ka mu mai a, khuma mu zâwk turin min ti nasa mai a; mahse, ka nuih liam mai maì, khum awm reng a hmeichhia zâwk chhuata muttîr te chu mipa tân chuan a zahthlâk si a.

Ka muhìl har viau a; mahse, ka maimichhîng reng a, muthilh ka tum tlat avàngin zînglam dâr 2 rîk hma deuh chuan ka lo chhîng ve sek a niang, ka mumangah Mami ka lo hmu a, mipa ka rualpui àwm vêl pahnih hian sual tumin an lo ûm a, chu chu vàn lam ațangin chiang takin ka lo hmu thei si a, ka àu vak vak a, ka țang lutuk chu ka hah kher mai, ka aw lah a la chhuak țha thei zui.

"Roddick.. Roddick..?"  Remruati aw a ni, min lo sâwi harh a ni ngei ang, ka han meng siar siar a, ngaihțhat loh hmel taka min lo en reng ka hmuh chuan," Eng nge ni ta?" ka ti sup a, men fiah deuh tumin ka khap sak sak a.

"I rûm nasa lutuk a, ka rawn kai harh tawp che a nih hi, mang țha lo i mang a nih ka ring a," a ti a, kei oawh chuan ka mumang chu ngaihtuah chhuakin,"Ka mumang vàng a lo nih chiah chu, ka harh tawh a, han mu leh tawh," ka ti a, Mami ûmtute kha Lalhriatate hi an ni ngei ang, man chhunzawm ka duh tawh loh avàng chuan ka lu chu ka chêt sawn a, ka lu pawh chu ka tuai nawk nawk bawk a.

Mahse, mumangah ka hmu leh tho, min rawn kai harh leh a, a ngaih a țhat theih loh avàng chuan khuma dunlop chu chhuatah rawn hnúk thlain," I bulah ka mu dâwn, i kut chelha ka mut chuan i zia deuhin ka ring," a ti tlat mai a, ka hnial zuau a; mahse, min ngaithla lo, ka bul sêtah rawn mu lo mah se ka kut a rawn vuan ta tlat a, kan puan sin a hrang tho a, a zia, a nu leh pate'n kan mut dàn hi hre ta se la, engtin nge an tih ang?

"Muhìl rawh, heti hian i kut hi ka vuan mai dâwn alawm," tiin ka lam hawi chuan a rawn inher a, "Muhìl hmasa phawt la, i muthilh hnuah ka muhìl ve chauh ang," a ti leh a, light êng chu ka melh a," Light khi?" ka tih chuan," Êngah i muhìl thei nange? Chuti ka'n off leh mai ang e," tia thawh a tum chuan a kutah chuan ka chelh bet ta tlat thung a.

"A ngai kher lo ve," ka ti a, ani pawh chu a rawn mu ve leh nghâl sat sat a, zangthala muin ka kut lehlam chuan ka mit ka hliah a, țawng tawh lo chuan  kan mu leh ta a, ka muhil har lo, mumang țha lo pawh ka nei tawh lo.

Rin loh deuhin a tûk zîngah chuan Pàpâri'n min rawn kalchilh ta tlat mai, nizàn lamah a mu țha lo tih a hmel ațangin a hriat viau a, thup tum viau mah se a thup bo thei tak tak lo. Remruati'n a lo chhàwn vat a; mahse, keimah min hmuh tuma rawn kal a nih thu a sawi chuan Remruati  chu a chhuak ta thuai a, a chhuah hnu chuan  kan pahnih chuan kan inmelh ta rân a; mahse, min en rei lo. 

"Thil thleng kha pawi ka ti takzet a ni, pawi tihna hian siam țha leh vek thei se ka ti; mahse, thil râpthlâk lutuk a ni si a, hrehawm ka tiin ka rilru a tina, ka thin hi a na vawng vawng mai a ni. I u chunga a thil tihah khân ngaihdam dìl che ka tum lo, a râpthlâk êm a, i u tawrhna kha hre thiam lo mah ila a țhian ka lo nih ve tawhnaah  hrehawm ka ti takzet tih min lo hriatsak tal rawh aw, keimah vànga khatiang kha thleng a ni si a," a ti charh charh a, chutah, ka hmaah chuan rawn kalin a rawn țhingțhi ta rap mai!

"Roddick, i u chunga thil thleng kha a râpthlâk a, thiamthu sawi tùr pawh kan nei lo, thil thleng kha inngaihdamna pawhin a siam țha thei lo tih ka hria; mahse, chuti chung chung chuan i hnêna ngaihdam dìl ngei hi ka tih tùr niin ka hre bawk a ni, thiamthu sawi tùr rêng kan nei lo," a ti mawlh mawlh a.

"Thil thleng kha i hre ve lo tiraw?" A hriat ka ring lo va, ka zâwt a ni. A hria a nih chuan a lo zêppui reng dâwn tihna a ni a, a zêppui chuan thil sual titu nèn an inang reng, an lo țang dùnte a nih phei chuan...

"Hria ila chuan hmuh pawh ka hmu ngam lo ang che, tunah pawh hmuh che hi ka hreh lutuk, thih hrehin a nia ka hreh ni; mahse, eng mah sawi lo leh ngaihdamna țawngkam khat pawh chhâk chhuak lova awm kha chu ni thei ngang lovin ka hria a, zak leh hrehawm ti chung chungin ka rawn kal a ni, a pawi ka ti a, ka zak a, hrehawm ka ti êm êm bawk. Thil tisualtu hi ka pasal a ni si a, a thil tih hi ngaihdam theih loh, ngaihdam tlâk loh ni mah se a tâna thu sawi a hmuh che hi ka duh tlat si a ni, i rilru damna tùr a nih phawt chuan eng pawh a chungah ti rawh, ka pawmpui vek ang che; mahse, a nunna hi chu min zuahsak hrâm rawh aw, inchhìra inlamlêt hun a neih theih nân, khawngaihin ka ngèn che a ni," a ti ta tlawk tlawk a.

Hrehawm a tihzia chu a hmelah leh a awm dànah a lang vek si a, kei ngei pawh chu rilru nuamin ka awm thei miah lo. Ka thil tihin a nghawng chhuah chu hei, ka hmu ta chiah a, hlimna aiin rilru chhûngrilah hlim lohna ka nei lian daih zâwk chu a nih hi; mahse, phubâ ka la pawh a ni chuang hleinem, thu dikin a dêng ve a ni mai.

Ka rilru hi dam huai thei tùr chu ni se a chungah eng thil pawh ka ti ngei ang; mahse, Mami kha a rawn nung leh thei dâwn chuang lo va, awmzia a awm lêm lo. A bul tumtu pakhat zâwk lah Jail-ah a awm reng tawh a, a awm rei hmel bawk si a, a chungah ka tân phuba lâk kher a ngai lo, vànneihnain a khuh sêng ta bîk lo a ni ve mai, pakhat ve thung hi chu a la vànnei a, jail-ah êm lût lovin nun a la hmang a nia; mahse, hlim tak chuan a hmang tawh kher lo maithei.

*******

Thla hnih thla thum a liam hnu pawh chuan ka rilru chhûngril chu a la hlim thei tak tak lo ni berin ka hria, hlim taka hun hman theih ka châk ngawt mai. Remruati hi awm lo phei se engtin nge hun ka hman chhoh ang aw ka ti hial a ni, ani hian min kàwm reng a, kan ina a rawn kal loh leh lêng tùrin min sâwm a, min lèn chhuahpui thùl, ka țhian a lo ni lo ang tih ka hlau viau tawh a ni.

Zan khat chu țhianteho chu an rawn lêng a, Remruati pawh a nu leh pa remtihna thlapin a rawn lêng bawk a, hun danga a inthuam dàn țhin ang lo deuhin a rawn inthuam a, a sam pawh a țâwn sâng vah vah khawp mai, a inhmeh ka lo ti pek hle a; mahse, ka țhiantehovin a ngháwng ngo zet mai an han hmu ve chu țha ka lo ti lo viau a; mahse, han khap ngawt chi niin ka hre bawk si lo, hmuhnawm ka ti  ru khawp mai. Ka room-ah kan ri laih laih a, ka nute erawh chu TV an la en rih a, an bula awm nuam lo an ti ang tih ka hlauh vàngin ka room-ah ka hruai lût dial a ni.

"Joseph-a ka khawngaih ruk ruk khawp mai a, zanin ka rawn kal dâwn pawh khân kan inhmu zawk a, lo kal ve tùrin ka tia; mahse, a hreh ve deuh a nih ka ring , hmãn ang khân awmho leh thei ila ka ti ngawt mai," Muana chuan a ti dam duam a.

"Amah huatna pawh ka nei tawh lo, huatna thinlung neih hi ka kham takzet tawh a ni, hlim thei lova min siamtu ni ta berin ka hria," ka lo tih chuan Remruati chuan," A dik chiah alawm, huata nih ai hian hawtu nih hian rilru a hrehawm duh daih zâwk, mi huat kan neih tlat chuan anmahni kan hmuh phei chuan eng mah sawi lo mah se kan thin a rim tet tet a, chu chuan kan rilru nasa takin a lo ei chhe hman a, a hrisêl miah lo," a lo ti vat a.

"A bialnu lah kha, hmeichhe dangin an chhuhsak daih a," Mapuia'n a lo ti thung a, makti leh âwih lo deuh hlek hian ka en phei a, mi dang pawhin an lo en ve vek tho niin," Min en vek kher s'u, hmeichhia inti-mipain a chhuhsak daih ka tihna a nih chu, Roddick, mak i ti zual bîkin ka ring, âwih harsa ka ti a nia aw," a ti leh vang vang a.

"A bialpa chu Tluangi tih hming pu a ni em?" ka tih chuan," Niin ka hria, a hmel pawh a țha lo, ka hriat tirh chuan mak ka ti tak tak a ni, hmeichheho hi chu hriat thiam in har ngawt mai," tiin Mapuia chuan Remruati chu a en a. Ani lah chuan," Mak bïk chuang lo, mipa pawhin in anpui mipa tih in hriat reng pawh in ngaizâwng ve țhìn tho a, mipa tih hre reng chungin in kawp duh ve tho a ni,hriat thiam in har ve tho," tiin a nui pah sâng a, chutah, min rawn enin," Tluangi chu engtin nge i hriat a?" a ti leh a.

"Ka hmu dùn tawh alawm," ka lo ti ve mai a, C-a chuan," A hmel țha bîk lo; mahse, an inkawp tlat si, he khawvêl hi chu a mak tawh teh e," a lo ti ve a, Muana chuan," Tu mawng an bêng har àwm e," a lo ti pek a, kan nui chhuak ta vek.

"Joseph-a chuan tlàwmthlâk a ti ngawt ang chu, nang chuan i ti ve lêm lo tiraw?" tiin Muana chuan min rawn melh a, kei chuan," Engah nge maw min rawn melh ngawt le? Kan ințhenna a rei tawh êm mai, sawi chhuah pawh ka duh tawh lo," ka lo ti vat a, nui vur vur chungin Muana chuan,"Hmeichhe pakhat, inla 'man' takin tlangvâl pahnihte a tlàwm che u a nia, naktûk ațang chuan lèn pawh lêng chhuak ve tawh lo ula a țha ang, mipa min tithangtlâwm," a ti leh a, za vak lo chuan ka nui ka nui a.

Remruati pawh chuan," Mipa pahnih ai pawhin a zei zâwk tihna a ni ngei mai, ka va khawngaih tak che u em!" a lo ti ve a, kei chuan," Zei leh zei loh thil vàng pawh a ni lo, thil mak tak hi a awm ve hrim hrim a," ka lo ti ve leh a.

An haw dâwn chuan pâwnah ka thlah a, mipa chuan bike an neih vàngin an tlân chhuak ta thuai a, Remruati scooty chu bike la awm lai kha chuan lâk chhuah a har a, an haw hmasa dial pawh chu a zia khawp mai ka ti.

"I rilru a na àwm?" a tih chuan,"Eng aiah nge a nat ang a?" ka ti vat a, a scooty chu ka hùn remsak bawk a, ani chuan,"Ka lâwm e," a ti phawt a, chutah," Ka haw tawh ang e, hei a lo tlai ve ta ruih mai, chhûngte'n min lo ngaihtuah tawh ang," a ti leh a.

"Ka thinlung a nat chhan tùr chu eng vàng maw?" ka ti leh țâlh a, ani chuan min en chuang hlei lo hian," I țhiante'n an sawi vek kha, a la rawn be fo che a ni lo'm ni?" a ti leh a.

"Be tawh nâng, min rawn text chhunah pawh ka chhâng lét ngai lo," ka ti a, âwih loh hmel deuha a tlak deuh karh chuan," Nâ ni se chuan kan ințhen tawp nâng, kan ințhen tawh chuan ngaihtuah leh ka tum tawh lo, bâkah, kan la naupan deuh lai ngang kha a nia, chutih lai chuan kei bâk melh a nei bîk lo," ka ti leh a.

"I rilru nâ hi i lo țap kûrh kûrh ang tih ka hlau mai a nia, a țha e, ka'n chhuak tawh tak tak ang e, lo țap lo la," tiin nui deuh hak hak chung hian min rawn en a, a scooty-ah chuan a țhu ta nghâl bawk a.

A banrêka hmer chat pah chuan," Min duh lotu ngaia țah chu tum bîk nâng, bâkah, ka bulah nula i awm ve reng a, ani aia hmelțha leh fel zâwk daih lehnghâl, nula dang melh ka tum teuh lo mai," ka ti a, ka fiam pah chu a ni nain dâwt a ni hran lo.

"I sawi hlauhawm e, tlân chhuak daih teh ang," a ti a; a scooty chu a tinung ta dat dat a; mahse, a banrêk ka hmerna chu ka la thlah chuang lo, zanin chu a thil sawiin ka thinlung a dek fuh tlat a, thîkna ang deuhah ka ngai tlat a ni, min duh ve deuha ngaihna pawh ka nei tlat bawk.

"Tlân chhuak ta si che," ka tih chuan," Ka bânah chelh tlat lo la?" a lo ti a, kei chuan,"Chelh mah ila i tlãn chhuak thei tho ang chu," ka ti leh a, min rawn enin," Uang uang teh suh, a tlai tawh a nia, nang pawh i mut hma țum a ni mai. Mutnaah lo inngaihtuah lungpuam lo la, țah âwih loh a nih kha," a ti leh kher a.

A banrêk ka hmerna chu thlahin a hnungah ka țhu kai tharh a, a kâwngah kuah thutin,"Hetia awm hi a nuam zâwk a nih hi," ka ti sap a, a kâwnga ka kuah thut rual khân a îp châwih a ni tih ka hre chiang ngang mai, a taksa a țang khawng nghâl at bawk.

"Ninhlei suh!  A zâ ka ti a nia."

A thil sawi vêl dàn leh a țawngkam chuan min tiphûr tlat tawh! Ka khabe a kokia nghat pah chuan," Heti hian awm lawk teh ang, zanin chu kan nu hlui ka hre chhuak a, ka ngai deuh tlat mai," ka ti a, chek hlak pah chuan," In nu hlui ai min awhtîr lo teh," tiin tàl chhuah a tum a; mahse, ka kuah nghet lui tlat a, a tãl chhuak thei bîk lo.

"Duh tâwk teh, i bialnu ka ni lo a nia aw."

A helmet phelhsak pah chuan," I la haw thei rih lo, zanin chu min cho tlat," ka ti a, ka phûr tulh tulh mai. Ding chhuakin a scooty chahbi ka phawisak zat bawk a, che lovin, a ngaihna hriat loh hmel zet hian min en zui zél ringawt a!

"Lo chhuk rawh le."

"Roddick, eng thil nge i hriat?  A tlai tawh a nia," a ti nang nang a, chhuk pawh a tum chuang lo, a țhut ngaiin a la țhu reng a.

"Lo chhuk phawt la, chahbi i duh chuan kha, lo la rawh, helmet pawh," tiin a pahnih chuan ka lek lang ve ve a, min en vang vang phawt a, chutah, thâwk la hakin scooty ațanga rawn chhuk chuan min rawn pan a.

"Zanin hi eng thil nge i hriat a?" tiin a chahbi chu a rawn ban vat a, ka lo pe mai bawk a, a helmet a ban leha a la chiah tihah chuan a káwngah ka kuah leh thut a, hnung lama a ãwn deuh dâwrh tur chu nghet zet hian ka kuah ding a.

"Roddick...!" 

Kan inmelh hnai bawk a, a mitmenga hlauhthàwnna lo lang chu ka hmu thei, light-in a hmel a chhun chiang bawk a, a hlauthâwng hmel pawh chu a țha kher mai.

"I hmel hi a țha ka ti."

Mit khap lo lêk chuan kan inen a, a chêt sawn bîk loh avàng chuan min dan a tum lo niah ka ngai mai, ka kûn hniam a, eng thil dang mah ka ngaihtuah thei tawh lo, fawh ka tum a ni tawp mai. Pastor fanu a ni a, ka țhiannu niin a țhianpa a kawm ngeih êm êm ka ni tih lam a lang tawh lo, nula ka duh leh țha ka tih deuh, a rûka ka duh êm êm, hun remchâng hmua fawh tumah ka inngai hmiah.

"Roddick, ti s..." a sawi zo hman lo, ka fâwp hman tawh, sawi zawhtîr hman ka tum lo hrim hrim, a thu hnial ka ni dâwn si a, a duh loh zâwng tihte chu ka duh bîk lo.

A tâl sawn bîk lo va, a lo thle sawn bîk lo, chuvàng chuan ka thlâ a ngam deuh sawt a, min chhâng lêt ve lo mah se ka fâwp uar sauh a, a hma khân vawi khat ka fâwp tawh a, min chhâng lo a nih kha, tunah hi chuan min chhàn ngei a ngai tawh, min chhàn lêt ngei theih dàn tùr chuan ka fãwp a. A hnu deuhah chuan min chhâng lêt ve ta, ka uar sauh a, min hnial lovin min chhâng lêt a ni tih ka hriatna chuan min tiphûrin min tihlim bawk a, duhthawh zetin ka fâwp zui zêl a, ani pawhin a thiam dàn ang ang chuan min chhâng lêt zél, chu chuan ka ngaih a ti țha viau a ni, ka hlim veng veng.

Eng emaw a tlâk rîk tâk chhawkah chuan kan tàwp dùn chiang khawp mai, helmet a lo thlauh niin, a tãl pît ta vat a, leia a helmet tla chu a chhar ta nghâl a.

"A keh em?" ka tih chuan min en lo hian," Ka hre lo," a ti sap a, ka ensak vat vat a, a lo keh lo ve. A scooty lam a pan ta vat a, kei pawh chuan pan ve vatin a helmet chu ka khumtîr a," I tlãi ta hret a nih kha," ka ti a, min en lo chuan," Bye," a ti sap a, ka chhàn hun pawh nghâk tawh lo chuan a tlãn chhuak ta nghâl a. 

*MI DANG NUN SIAM ȚHAT KAN TUM HMAIN MAHNI NUN INSIAM ȚHA PHAWT ILA, CHU CHUAN MI NUNAH THU A SAWI ȚEUH NGEI ANG*