☆EARTH ANGEL☆ - 22 By Dingdi Pachuau

 ☆EARTH ANGEL☆ - 22 By Dingdi Pachuau

Mut hmunah chuan ka khi suk suk reng a, muthilh lam pawh a lang meuh lo. Kan boruak kha ka ngaihtuah lêt a, min hnial bîk miah lo a nih kha, chuti a nih chuan tlêm chuan min duhna a nei ve tih a a ni a, ințhian ni mah ila, nula leh tlangvâl kan ni tho a, kan inkârah induhtawnnna a lo piang a ni ve mai. Mipa leh hmeichhia kan ni miau a, kan induhtawn pawh a thiang ve tho alawm le.

Muthilh tumin ka inlet kual a; mahse, a chhuak thei mawlh lo a ni. Mu peih lo chuan ka tho chhuak leh ta law law a, rilru lâk pèn nân Mami lehkhabu chu ka en kual leh a, chutah, ka drawer-a pen chu la chhuakin 'Engkim hriat chhuah a ni tawh a, thlamuang takin chàwl tawh rawh aw; mahse, i duh angin ka awm thei ta si lo a nih hi, min ngaidam hrâm dâwn nia'  tiin ka ziak a, ka thlêk vang vang hnu chuan khup thakin pen leh lehkhabu chu ka dah ţha a, khum lam chu ka pan leh ta nghâl a.

College-ah khân result țha tak neiin ka pass chhuak a; mahse, ka result pawh hre hman lovin jail-ah ka lût ta daih kha a ni a, ka tum aia rei daih kha ka awm lehnghâl si a, zirna han chhunzawm leh tùr pawhin kum  a laklawhin a buai zo ta a ni. Zirna lam chhunzawm tawh lova eng emaw thawh tùr dap ve mai ka ngaih hmel, hetia tlangvâl ve pui nu leh pa thlazàr hnuaia awma an thawh chhuah ringa han khawsak ngawt chu a fuh lêm lo, mahni kea din dàn ngaihtuah a ngai. 

Ka rilru a hria em maw ni tih tùrin tûkțhuan kîl laiin ka pa chuan," I awm dànin zir ta hek lo, thawh tùr i ngaihtuah ve a ngai a nih hi, damsen ve lul chuan thawh chhuah neih tum tùr, nu leh pa thawh chhuah sa rin ringawt hi a fuh ngai lo," a ti chhuak ta chiah a, ka en hâ nghe nghe. 

Ka nu pawh chuan," Ni e, zirna i zawm thei ta lo rau rau, inhlawhna emaw tal i zawn a țha. Lehkha zir bawk si loh chuan awm mai mai loh tùr, i duh hunah zirna chu i zawm leh thei tho a, i zawm hma chu mi ningkhãwng hriat nân tal pawh thawk ve chhin teh, hlawh ngawr ngawr lam a ni lo, mi zeizia hriat hi a ţha ngai, nei tùra mi lo thawhrimzia pawh i hre thei ang a," a lo ti ve duah a, ka chhâng lêm lo nain hna thawh tùr chu ka zawng ngei ang, kei pawhin hetia awm ringawtte chu ka duh bîk lo, ka pa chàwm nih reng hi ka tum bîk teuh lo.

Mahse, eng ber nge ka thawh ve tâk ang? Hmel hriat han biak tùr lah chu ka vàn ve nasa mai si, țhianteho hian an hre mial maithei a ni, bia ila a țha ang; mahse, tlêm chuan nuam tih lohna ka nei deuh, anni chuan an zir zawm vek si a, kei chu ka tàn vàng liau liau khân ka zawm ve thei ta si lo va; mahse, kawng lehlam takah erawh chuan hlawhtling ka inti ve tho.

Kan ina țhiante nèn an rawn lèn zàna ka fawh vàng kha a niang chu, Remruati chuan min zah thar ta deuh tlatin ka hria, zan tin min rawn be hmasa ziah țhìn kha a nia, min rawn be tawh lovin min rawn text ve thung a, chu pawh chu zan tin a ni lo, ka lo nghâkhlel țhìn a ni ang, min rawn text har ka ti a, a hma ang ngawt khân ka rilru ka control thei tawh bîk si lo, a message thar hmuh hlàn ka nghâkhlel zek zek tawh mai a ni.

Zan khat chu țhianho chu Muanate inah kan inhmu khâwm ve ta thung a, Joseph-a pawh a rawn lang ve nawlh mai a; mahse, kan inbe hran lo. Kan free deuh bawk a, Muana nu a awm lo bawk nèn, no kan dawm leh far tawh a.

"Inhlawhna tùr țha deuh in hre lo maw?" tiin ka zâwt ta hlawm a, ka han zawng kual ve deuh nain ka duh ang ka hmu lo va, mi hnuaia han thawh deuh țawk țawk lah chu ka peih mang meuh si lo.

"Thawh duh deuh bîk i nei em?" C-a chuan a lo ti a, a maimichhîng pah diar diar a, a thil inin hna a thawk țan tawh tih ka hre mai.

"Nei chuang lo a; mahse, hna rum han thawh țawk țawk lam hi chu, a nuam lo ve a, bâkah, hmel hriat hmuh fuh phei chuan a zahthlâk ve deuh bawk a," ka ti a, ka nui pah a.

Muana chuan," Chutianga thawh tùr hna i duh zâwng i la thlang thei a nih chuan i la mamawh tâwk lo a nih chu," a lo ti sup a, ka en phei a, vawk a lo ang leh tawh khawp mai! A hmui a lo tipawrh a, a hnâr a lo ti-arh pah bawk a, a nuihzatthlâk duh viau a ni.

"Mamawh ve tho e, hna rum lam thawk kher lo pawhin sum chu a hmuh theih tho ang chu maw le. Mi hnuaia inhlawh țheuh țheuhah pawh ni sa tuar lova thawh chu a nuam daih zâwk a," ka ti ve thung a, Mapuia chuan a lu a lo bu nghat nghat a, ka thu sawi min pawmpui tihna a ni.

"Nuam daih zâwk e a, hna thawh tùr duh zâwng thlang theia i la awm kha lãwm viau mai teh, duh thlang thei lo, thawh ngei ngei ngaiin han awm ve chhin la, ka sawi hi dik i la ti viau mai ang," Muana chuan a lo ti leh sup sup a, a hmaa no awm chu a ban leh nghâl zat a.

"Ka hriain ka ring; mahse, i duh leh duh loh a niang chu," rin loh deuh hian Joseph-a chuan a lo ti a, ka en phei a, ani pawh C-a ang maiin a lo maimichhîng a, dawhkàna a no dah tlâng chu a lo zût kual pah bawk a.

"Nangni pahnih hi inrem tawh rawh u, a rei ve thawkhat ta bawk. A hma ang khân inkàwm ngeih leh vek tawh teh ang u, a hrehawm êm mai," Muana'n a tih chuan Joseph-a chuan a rawn meng chhuak nghâl a, min rawn en kual a," Ni e, a bul ber chu keimah hi ka nia, ka thiam loh a ni, hmeichhe pakhat vàng maiin kan inkâr ka tichhia a," tiin a thle deuh lãk lãk a, a rui viau tawh a ni maithei, kei erawh chu rui hnâpa in ka duh loh avàngin ka la rui lo hrim hrim.

"Dik chiah!" Muana chuan a lo ti nghut a, chutah, Joseph-a chuan," Ka zak viau nghe nghe a ni, ka duh êm avàngin khua ka hmu lo va, ani lah chuan a anpui min la pansan zui a," tiin a no chu a'n tlâk nghâl piap a, a dinglama țhu Mapuia chuan," A thinrimthlâkin a intham loh thlâk ka ti ngawt mai, hmeichhe lê lo tak a ni," a lo ti ve zat a. Joseph-a vêk chuan," Hmeichhia vàngin kan țhianho inkâr hi tihchhiat ka duh tawh lo, theihnghilh hmak ka duh. Roddick, kan pahnih inkâra thil thleng kha theihnghilh vek ang aw, min ngaidam hrâm dâwn nia," irhfiak ak ak pah chuan a ti a, C-a chuan kut lo bêngin," A ţha lutuk! Hmeichhiain kan țhianho inkâra a tibuai tawh tùr a ni lo," a lo ti ve a.

Chutia ti na nâ nâ chu lo ngaihdam duh loh bîk thu awm suh," Ni e, theihnghilh vek ang, țhian inkârah chuan ngaihdam indìl pawh a ngai lo," ka lo ti ve a, Muana chuan," Țha lutuk! A fel vek tawh e, tunah chuan a ngai angin kan kal leh thei ta. Zanin chu in inkâr țha leh ta lawm nân, no khat dang leh aw ni ang," a ti a, ding chhuakin kan no phai tawh leh a țhen ruak tawh chu a rawn tikhat leh ta diat diat a, kei pawhin tûn țum chu ka thâwkkhat ve ta pawp mai.

Ka rim a nat deuh avàngin kawngka pângngaiah pawh lût duh lo chuan ka 'kawngka' bîkah chuan ka lût a, ka in khât ta deuh  a ni, tlêmin ka dik lo, ka luak a chhuak êm êm zui. Bathroom-ah ka lût vat a, ka va uak tuar tuar a, a hnuah chuan ka luak ta țeuh a, tlêma ka zia deuh hnu chuan ka luak chhuah chu ka han en kher a, thisen nèn a lo inchiahpiah nuai ka hmuh chuan ka phu zawk mai! Thîin ka luak ta tihna em ni? Ka rilruah hlauhthàwnna a lo lût nghâl vat a, hetiang hian ka awm ngai hauh si lo, engtizia nge ni ang? Ka harh deuh kâwk kâwkin ka hria.

Ka hmui ka khawih vat a, ka kut ka en leh chuan thisen a lo kai a, kei hi ka hnâr a lo thî a nih záwk hmel, dârthlalang lian puiah chuan ka han inen a, ummm, a lo nih chiah hi, ka hnâr hi a thî khât ve tawh asin le, ka uakna khân hnathawh a lo nei a ni ngei ang.

Rei fê chu bathroom-ah chuan ka awm reng a, a reh hnuah chuan ka hnuhma chu tifaiin ka intleuh pah bawk a, ka thawmhnaw pawh ka thlâk vek, lu hai deuh chhuihin khumah chuan ka țhu thla hnawk a. Zanin zet chu a fuh lo kher mai, ruih tum lo zet kha ka rui a, ka luak hrep a, ka hnâr a la thî zui, inhremna chi khat chu a va ni chiang tak!

Ka phone nghawr dat chu peih lo zet hian ka han ban a, message a lo ni a, chu pawh Rinawmi message, ka chhiar hman thuak a, lu thing nar narin a number chu ka block ta nghâl a. Mipa han tih atân êm chuan a ho lutuk a ni tih pawh ka ngaihtuah lo, he nu hi a ninawm tlat, Joseph-a nèn kan inkár pawh a chhiat phah, ani hi chu hmuh tawh loh vang vang ka duh, a message hmuh pawh ka duh tawh lo.

Remruati ka ngaihtuah kai a, tunah tak hian eng nge a tih ang? A mu tawh ang em? Engati nge min rawn biak khàt êm êm ni? Min ngai ve lo a ni ngei ang, keiin ka ngaihtuah nasat nèn, a hmel hmuh bâkah a hmui kha fawh leh ka châk bawk.  Ka phone chu ban lehin a number chu ka hmet chhuak a, min rawn biak duh loh chuan keiman ka be mai ang. Kan inhmu khât tawh a, ka ngai ve tawh alawm.

"Hello?" A aw ka han hriat leh tâkah phei chuan min tizauthau vekin ka hria, ni tin deuhthawa inhmu deuh zut kha kan ni si a, a àwm ve viau asin, hetiang hian hmeichhia hi ka ngai thei ang tih pawh ka lo hre lo, zanin hian ka ngaih a zual.

"I mu tawh elo?" ka tih chuan," Aw, ka mu mai mai a," tiin min chhâng a,  sawi tùr chu a vâng ruih maiin ka hria, sawi tùr chu ka hre țeuh a; mahse, a bo deuh duak mai, a aw han hriat meuh chuan.

"I dam țha maw?" ka ti leh ringawt a, tlêmin ka la hai deuh chhalh bawk a, mipa hi hmeichhe lakah ka zãm mai mai lo ang.

"Aw, dam e, i hnâr thî țhin kha a zia chho zêl tiraw?" a rawn tih chuan," Aw, nichîn khân a thî a; mahse, a reh tawh," ka ti a, ani chuan," A va zia lo ve, inenkawl țha rawh, badam kha lei leh la?" a rawn ti leh a, kei chuan,"Kan inhmu khât tawh sia, naktûk chu, min leipui la?" ka ti a.

"Naktûk chu Sunday alawm."

Ka nui hawk a, Sunday a ni tih pawh ka lo hre hauh lo, zanin chu ka ngaihtuahna a tâwi a nih àwm hi, ka thil in leh vàng vek a ni, khatiang êma in tam kha chu ka tum bîk lo asin le, ka nãwi  nuai mai.

"Naktûk chu lêng ila, rawn lêng la?" ka ti leh tâwng a, ani chuan," Inkhâwm ka ngai alawm, nang pawh i inkhâwm ve ang chu," a rawn ti thung a, kei chuan," Inkhâwm bànah pawh a theih tho alawm, kan inhmuh khàt tawh êm hi, ka ngai tawh teh che a nia, engati nge min hmuh hi i hreh tâk tlat a? I țhianpa kha ka la ni reng, i țhianpa Roddick-a kha," ka ti leh a.

"A, ka hria che alawm le aw... zanin hi, i dang e, i țawng duh bawk si," a rawn tih chuan," Ka ngaih tawh vàng che a nih hi, natna țha lo vei ang maia min hmu țih ta tlat hi ka duh lo, ka fawh vàng che kha a ni tiraw?  A ni chiang, nula leh tlangvâl kan nia, kan infâwp ve bawk ang chu, thil dik lo pawh a ni lo, mi pângngai kan ni tihna a ni mai," ka ti leh duah a, sawi tùr chu a rawn inpâng-aw-zial tup tup ta maiin ka hria.

A tûk chawhnuah chuan lêng chhuak tùrin ka va sâwm ta ngei a, ka sàwm a phût tlat si a ni, ka hreh alawm, jail-ah ka tâng tih kha an hre ve vek ngei ang a, Remruati hian a zêpin ka ring hauh lo, chuvàng tak chuan a chhûngte hmel hmuh ka huphurh a ni, uluk erawh ka inuluk ve khawp thung. Ka va thleng a, a pa a lo awm lo hlauh chu tihzia ka ti kher mai, a unaute pawh an lo awm lo, a nuin min lo chiau-au a, min hmu khât ve tawh bawk nèn, min lo hre tawh lo țêpin ka hria.

"Khawiah nge kan lèn ang?" pâwna kan chhuah hnua a tih chuan," I spot-ah khân," ka lo ti mai a, min en zauh pah chuan," A, a hla si," a lo ti leh a.

"Chu lo hmun dang kalna tùr ka hre lo, thil hrilh che ka duh alawm, lo hlau ringawt suh, a hlauhawm dâwn loh," a hmela hlauthâwng hmel ka hmuh chuan ka ti vat a, ani lah chuan," Ka hlau ngawt ngawt lo, engah nge hlaua min rin ngawt a?" a lo ti a, a hmel ka hmuh theih loh nân a hawi sawn leh daih a.

"Min hlau a nih loh chuan min hmuh i duh tawh lo a niang ka ti mai," ka ti charh a, ani chuan," Engah ngawt chuan maw? I va ho tak!" tiin a helmet chu a khum nghâl mawlh mawlh a, kei pawh chuan khum ve nghâlin," A țha a nih chu, ngai kan awh leh ta," tiin Dusty chungah chuan ka țhu ta nghâl a.

Kan lènna tùr hmun kan thlena kan țhut fel hnu chuan,"Kan va kal khât tawh tak!" a ti chhuak sap a, kei chuan," Jail ka tàn chhûng khân i tlawh ngai lo a ni maw?" ka lo ti vat a, ani chuan," Vawi hnih khat chu tlawh ve e," a lo ti mai a, chutah," Mahse, a reh lutuk a," a tih chhunzawm leh a.

"I kal khàt chuan reh ve bawk ang chu, a neitunu ber lahin i tlawh khât bawk si a," ka lo ti a, chutah,"Engati nge min hmuh i hreh êm êm a?" tiin ka zâwt leh zat a, a lam chu hawiin ka en ràn bawk a, ani erawh chuan min rawn en lo chuan a hmalam chu a thlîr vang vang a.

"Ka hreh pawh ka hre lo, i hriat dàn mai mai a nih chu," a ti sap a, ka duh khawp lo viau mai.

"Chuti, engati nge min rawn biak ngai tâk loh a?  Vawiin chu sawi fiah vek teh ang, ka duh che tih hi ka phâ lo ang, ka duh vàng chea fâwp che ka ni bawk. Pastor fanu i ni tih ka hria, kei ve mai hian hetianga ti ngam tùr che ka ni lo tih thlengin; mahse, tuin nge  duhna chu thunun thei ang?  Ka thunun hrâm hrâm tawh țhìn zâwk a; mahse, tunah chuan thunun ka duh tawh lo," ka ti ta hmiah hmiah a, engtin nge a lo ngaih ang tih lam pawh ka ngaihtuah duh tawh lo. Kan inkâra kan ințhian țhatna hian a chhiat phah maithei; mahse, sawi loh chuan ka chân mai thei si a, bâkah, ka duh thu ka hrilh a ni ve mai, eng nge tlangvâl ka ni ve alawm.

"Roddick, ngun takin ngaihtuah la, ka țhian țha ber i ni a, ka ngaina chein ka kàwm ngeih êm êm che a, i bulah chuan ka duh zâwng engkim pawh ka sawi hmiah hmiah țhìn, ka țhian i nih miau avàngin-" a tih lai chuan," Țhian ang chauhin maw min lo en a? Ka fawh hnuah che pawh khân maw?" tiin a thu sawi chu ka lo pawt chat a.

"A...hetianga min en hi ka lo ring ngai miah lo va," a tih sap tâkah chuan," Nia, kei pawhin ka ring ngai bîk lo, a lo thleng thut a ni ber ang chu, ka duh thu ka hrilh loh che chuan ka tlai ang tih ka hlau bawk si a, mahni hma ka sial ve bawk tihna a nih chu; mahse, pawi pawh ka ti chuang lo, mahni hmasialna țha tak a ni ve bawk a," ka lo ti a, a nui hak a.

"Min duh theih hi ka ring chhin ngai lo," a rawn tih leh tâkah chuan hnaih sauh pah hian," Ka duh che, ka duh thu ka hrilh tawh che a, tunah chuan nangma lam kha a ni tawh, nawr luih che chu ka duh lo; mahse, min huat loh hrâm ka beisei thung ang," ka ti leh a, tlêmin beiseina ka nei deuh bawk a, ka huaisen sawtin ka hre bawk.

"Kei chu, i hriata i hmuh ang chauh hi ka ni, kawm ngeih tlâk loh leh țhian atân pawh-" ka tih lai chuan a rawn hawi thutin ka hmui chu a rawn hup chat a," Chutiang chuan sawi suh, pastor fanu ka nih vàng maiin mi țha ka ni lo, ka nihna chu i hriat ve vek kha, țawngkam mawi lo deuh deuh pawh ka sawi ve fo va, bâkah, ka rilru pawh hian thil țha lo tak tak a ngaihtuahin a suangtuah ve fo bawk," a ti malh malh a. Kan inen tawn ràn a, a kutin ka hmui a hup miau avàngin eng mah ka sawi thei lo, chutah, zah vànga nui deuh sek hian," Ka tihpalh," tiin a kut chu a la sawn ta nghâl a; mahse, ka mansak leh chat a.

"Min duh ve em?" tiin ka zâwt nghâl chawt a, a lamah chuan ka thle hnai deuh bawk a, ani erawh chuan min rawn melh chho hau mai a, a mitmenga hlauhthàwnna lo lang chu ka hmuh hmaih hauh lo, chuvàng chuan," Min hlau suh ka tih tawh kha," ka ti leh zat a, ani pawh chuan," Ka hlau lo che," a lo ti leh mai bawk a.

Kan inen leh rân tawh. Min hua leh min duh lo  chu ni se chuan hetiang hian a awmin ka ring bîk lo, min thawhsan loh vêk leh min nam sawn tawh ang, țawngkaa min chhàn a hreh ve pawh a ni thei. Ka ngaihtuahna avàng chuan ka nui deuh sak a, a lama thle hnai zêlin," Min hlauh loh chuan..." ka ti a, a inrin hmain ka kûn hniam thut a, a chal leh ka chal a intauh bawp mai.

"A ná," a tih chûl chuan," Khawi maw, ka lo en chhin ang e," tiin a kut chu thlahin ka chùlsak ta nghâl a, ka chùlsak zawh chuan fawhsak zohin," Dam vang vang rawh se, zei lo tliat tluat êm mai tiraw?" ka ti leh a, a nui deuh hmel ka hmuh chuan insûm zo lovin ka kûn hniam leh zat a, a hmuiah chuan ka zu fâwp ta chat a, tûn țum zawng kan intauh ta lo ve.

Țawng kan tum lo va, kan ngawi dùn reng mai. Kan rilru erawh a inhmu a niang, a nui sak sak ringawt a, keiin hmuhnawm ka lo ti viau thung. A hnu daihah chuan," Hetiang hi kan inkârah a thlen ka lo ring miah lo asin," a ti chhuak ta sap a, kei chuan," Kan rin phâk loh hi kan chungah a thleng fo țhìn alawm, Mami chunga thil thlengte kha ngaihtuah la, kan pahnih inkâra thil thleng hi chu thil pângngai tak a ni zâwk alawm," ka lo ti vat a, ka kuah vang vang a. Tunah chuan ka rilru a hlim veng veng tawh, țawngkain sawi chhuak kher lo mah se min duh ve tho tih ka hre tawh si a, awm a nuam veng veng mai a ni.

*HUN HLIMAWM LEH NUN AWLSAM HIAN CHAKNA A PE LO CHE A, HUN HARSA HIAN CHAKNA PE CHEIN  I NUN A HRUAL PUITLING ZÂWK ȚHIN A NI*