☆EARTH ANGEL☆ - 23 By Dingdi Pachuau

 ☆EARTH ANGEL☆ - 23 By Dingdi Pachuau

Mipa fel tak ka ni lo va, zu ka la in zauh zauh bawk; mahse, Remruati bulah hi chuan ka in ngai lo, bâkah, a bula in chu ka duh tehchiam lo bawk. Kan ţhianhoa kan in a nih loh chuan keimah chauh chuan kan in ngai tawh lo, inah pawh ka kawl tawh lo, tlêmin inthlahrun nachâng ka hre ve tawh bawk a, ka pawisa thawh chhuah ve chhun zu lei nân han hman ngawt mai chu ho ka ti ta riau.

Joseph-a hna thawh tùr hriatah khân thla hnih lai ka thawk ve ta. Damdawi dàwr a ni a, hna a vàn êm avàng leh kan in ațanga a hlat tehchiam loh avàngin ka thawk chho ve ta kha a ni a, a tìrah chuan ka ning khawp mai. Ka kal hmasak ber nîa a neitunuin min ei loh hmel zeta min han ner khum zauh zauh leh chîk zeta min en chu ka hmu fo, min rin loh hmel ka ti lutuk a, thawh lawka haw vang vang mai ka duh hial  a; mahse, hmeichhe rilru ang lek put chu ka duh leh ta lo va, an mamawh vànga min chhawr ni mah se anni min mamawhna ai hian hna thawh tùr ka mamawhna a sâng zâwkin ka hria a, keiin peih lo pawh ni ila mi dang chhawr tùr an hmu awlsam leh mai dáwn tih ka hriat avàng chuan ka tuar ta hrâm a, hei thla hnih a lo vei meuh chuan a hma ang ngawt kha chuan min en ta bîk lo chu a nih hi. Nèlawm lo viau mah se pawi ka ti lo, pawisa ka hlawh chhuak tho alawm, tam phei chu a ni lo; mahse, mahni thawh chhuah ngei mai pawisa han hmuh chu a nawm dàn a danglam ka ti, hman pawh ka hmang phal meuh lo chu a nih hi.

Remruati pawhin pawisa ka han thawk chhuak ve chu min lawmpui thiam khawp mai a," I thawk chhuak thei ngei ang tih hi ka ring tlat alawm, nakinah phei chuan hei aia tam hi a nia i la thawh chhuah dáwn ni," tia min fak pah chuan a nui leh nghâl a, chutah," Hlawh i nei tawh sia, thil min lei thei," a'n ti nghâl zat bawk a, kei pawh chuan,"Nu ber i nia, i tân vek alawm ka thawh," tiin ka fiam zui ve zat bawk a.

Ka pawisa thawh chhuah ve hi ka nu pêk ka tum a, ani'n ka pa pe tùrin min lo ti a, ka pa kher pêk chu ka hreh ve ngàng ngàng khawp mai. Pêk loh ka tum zet a; mahse, a pawisa kha ka ei ru tam tawh si a, rulh lêtna hun a ni mai tiin ka rilru ka tikhauh lui a, ka han pe a; mahse, min lo lâksak duh hauh lo. Mak tak mai hian," Tikhân, pawisa hi amah maiin a lo awm ngawt lo va, thawh chhuah a ngai a ni tih i zir chhuak ve ta a, a țha tawh hrim hrim. A țûla hman atân dah țha la, i mamawh lei nân chauh hmang ang che," a lo ti thên a, mak ka tihzia mai chuh! Min lâksak vek ka ring a nia, ka pa hian ka pawisa thawh chhuah ve hi tlêm a ti lutuk ang a, bâkah, a fapa tak tak pawh ka ni lo bawk nèn, min lâksak duh lo hial zâwk a niang tih ka ngaihtuah thleng hial mai. A pawi lo, duh leh la lo tawp rawh se, ka nei vek ang!

Ni tinin dàwr chu ka nghâk ve ta a, a awmna a laili bawk a, damdawi dàwr tlar tuar mah se ni tin mai chuan kan dàwr chu a lùn ëm êm reng a, mak ka lo ti hial zâwk țhìn. Damdawi mamawh kan lo tamzia ka ngaihtuah phah a, 'Mizote hi hnam hrisêl lo tak kan lo nih dáwn hi' te ka ti thùl, kan bul vêla dàwr pawh chu a lùn êm êm reng tih ka hre tho bawk, Hospital bul hnai a lo ni deuh bawk nèn, a àwm ve tho mai. Aizawl te zawng, Mizoram hmun hrang hrang ațangin an rawn pan khâwm ve bawk a, hmunpui a nihna laiah rawn dàwr berah an neih loh theih loh a ni.

Ni khat chu kan dàwrah chuan Remruati a rawn lang ve nawlh mai, min rawn hrilh lâwk si lo va, polite zet hian ka lo chhàwn a, a rawn nui sâng a. A mamawh ka lâk khâwmsak lai chuan dàwr neitunu hnênah chuan damdawi hming eng eng emaw hi sawiin an neih ngai leh ngai lohte chu a zâwt a, ani chuan an kawl ngai tawh loh thu a lo hrilh ve mai bawk a. Han biak lûmlàm viau pawh tum mah ila hun ka nei lo, min rawn dàwr tùr an rawn lang leh nghâl zat si a, ka thin a rim deuh lek lek mai. 

A hahthlâk miah loh na hian a châng chuan a ninawm ve lek lek țhìn ka ti, ni tina class kal bâk eng mah ti ngai hlei lo kha ka ni ve si a, mi tirh kala awm tâk reng mai chu eng emaw chenah chuan a hrehawm ve deuh; mahse, pawisa ka duh chuan ka ngaihtheih a ngai bawk si, Remruati ngaihtuahna hun pawh ka nei thei meuh lo. Kár tàwpa kan hmuh bâk hi hmuh pawh ka hmu hman meuh tawh lo, zàna an ina va lèn lah hi ka tih loh lam tak a ni si a, nula ina lèn hi ka hreh tlat, Rinawmi ka ngaihzàwn lai pawh khân zànah chuan an inah vawi khat mah ka lêng lo, inhmuh kan duh chuan a rawn chhuak ve mai țhìn, chutianga koh chhuah ve mai theih chi a ni mang meuh si lo. Pastor fanu chu ni lo se chuan a dàn a dang deuh mahna; mahse, ka ring leh meuh lo. Amah hrim hrim hi zuam theih deuh ang tùr chi a ni lo ve tlat, ka sawi thiam chiah lo, eng emaw zahawmna riau hi a nei tlat.

Ka thawh rei ve deuh hnu chuan damdawi chi hrang hrang hming ka hre hlur tawh a, eng damdawi nge a nih tih chenin ka hre ve ta, ka hnâr a thì leh zauh țhin avàngin damdawi țha ber tùra ngaih kei ngei pawhin ka lei a, ka ei mêk bawk; mahse, a thawk chak vak lo a niang, zàn lamah a la thî zauh zauh tlat; mahse, a hma anga zing a nih tawh loh vàng erawh chuan ka vei vak tawh lo.

Sunday zàna C-a room-a kan inhmuh khâwm leh chuan Muana chuan," Roddick, zanin chu han show la?" nui chung hian a ti a, dàwrah ka thawk a ni tih an hre ve kar bawk si a, țhiante an ni bawk a, an tân ka ui hran lo. Ka theh chhuak ve mai bawk a; mahse, kei chuanin ka tum lo, naktûka hrehawm ti tak leh a țhing rim nam chunga dàwr kal ka peih lo, a inthlahrunawm.

An in tliar tliar a, a hnuah phei chuan an țawng duh ta khawp mai. Muana'n nuam a ti fâl leh bîk a, min kuah thuak thuak mai.

"Hmeichhia ka nih loh hi, min kuah tawh suh, ka bialnu tân min khêk ve ta che," fiamthu hian ka ti a, a nui huk huk a, a hmel chuan vawk a ang leh tawh khawp mai.

"Bialnu pawh i neih loh kha, i hmu zo tawh rih lo aw," tiin a nui leh huk huk a, min rawn hnaih leh chuan,"Ka nei alawm le aw, ani tân chuan min zuah hrâm teh," ka ti leh a, mi dang chu an lo nui a.

"Lalmuan, i bialnu emaw i ti a nih kha, hmeichhia leh mipa hre hrang ta che," C-a chuan nui var var chung hian a lo ti a, Mapuia pawh chuan," I bialnu leh bialnu lo pawh i hre hrang tawh lo chu a ni si a, i va râwp tak!" a lo ti ve a, ani chuan," Ka hre ve bawk aw! Ka râwp viau pawh a ni lo, zan tin deuhthawa inhmuh chuan ka râwp viau in ring em maw ni? Zanin pawh kan inhmuh khâwm vàng chauh tak taka hmu lo mai ka nih hi," a ti ngul ngul a.

"A hlui hnawk țhin che a ni maw?" Joseph-a'n a lo tih chuan kan lo nui dar dar a, Muana chuan," Nangni bialnu hma pãwng pawh khawih tham nei mang hlei lo ai chuan ka duh fê, ka lung a tiâwi tâwk êm!" a lo ti duah a, kut kan lo bêng dar dar a.

"Ka neih loh lai a ni sia, zan khat chu min rìmpui ve la, a țhat dâwn chu," Joseph-a'n a tih chuan keini pawh chuan," Kei pawh," nui chung hian kan lo ti tliar tliar a, ani lah chuan," Teuh lo! Ka roh êm! In duh leh in bialnute rîm ve mai rawh u," a lo ti leh a, amah pawh chu a nui huah huah pah a.

Ina ka haw chuan Remruati ka bia a, a lo la mu bîk lo," Ka lêng ka haw chiah a," ka tih chuan ka lènna a lo hre nghâl a niang," I țhianteho chu an dam maw? Ka hmu châk leh hlawm tawh khawp mai, next sunday-ah chuan lêngho ila?"  a rawn ti nghâl var a. Kei chuan," Min lo zui ru a ni lo maw? Nula inah pawh ka lêng ve maithei asin," ka ti a, ani lah chuan,"Kan ina i rawn lèn loh chuan khawi nula inah mah i lêng lo tawp ang," confi zet hian a rawn ti a.

A lakah hian thîkthu ka pe chhe hran lo va, ani pawh hian thîk tùr thlâwt a hre lo a ni maithei, a confi thei reuh lutuk a, min ring ngam ve niah ka ngai mai. Kan la inzui rei loh vàng pawh a ni mahna; mahse, a lêrh lo a ni tih ka hre ve tlat a, han thîk tùr ka hre tlat rih lo a ni. Mipa a kalpui lai ka la hmu bawk si lo, a mitmeng leh a khawsazia ațang lahin rinhlelhna tùr a awm bawk si lo.

"Vawiin khân thil ka pêk theihnghilh daih che a," a rawn tih leh chuan," Eng thil maw?" ka lo ti vat a. Nui chung hian," I hre châk viau em?" a rawn ti leh a, kei chuan rang zet hian," Châk! Han sawi teh," ka lo ti leh vat a.

Muang deuh raih hian," Chuti a nih chuan, nak zànah rawn lêng mai la, chuti a nih loh chuan i hmu har dáwn sia, kârleh sunday-ah daih kan inhmu leh àwm sia?" a rawn tih chuan," Zanina rawn lèn rum rum mai a nia ka nâp ni," ka lo ti a.

"Hmmm...vêl a che aw, zàn a rei tawh hi, nak zànah ti zâwk ang, i rawn lêng ang a, rei tak pawh lèn a ngai nâng, bâkah, ka pa pawh i hmu khât ve tawh a," nui chung hian a rawn ti a, ka ner deuh sak ringawt. A pa ka nèl lohzia a hre chiang a, min fiam nân a hmang țhìn a ni.

A thil min pêk tùr chuan ka rilru a luah a, nilêngin eng thil nge ni ang tiin ka ngaihtuahna ka sèn phah a, ni pawh ka hre rei ngang mai.Tlai dâr 5 a ri thei dâwn ta lo emaw ka tih hnuah chuan a rawn her chhuak ve ta țâwk a, phûr zet hian ka inkhalh haw a, ka helhhawlh chiang khawp mai.

Vànneihthlâk takin a pa a lo awm lo va, a u chiah leh a nu nèn an lo awm a, min biak luam hnuah a u phei chu a kal sawn nghâl daih, a nu chuan," Bawihte, Roddick-a chu thingpui han siam phawt la, a lo lèn khàt êm hi," a lo ti a, ngai ka ti lêm lo nain ka lo hnial hran lo, bâkah, a thingpui siam pawh ka in khât alawm.

A hnua kan pahniha kan awm dun theih tâk hnuah chuan a thil min pêk tùr chu rawn la chhuakin ka jacket ipteah chuan a rawn dah nghâl a.

"En rih âwih loh aw, in i thlen hunah chauh i en dâwn nia, thil hlu tak leh man to tak a ni lo bawk; mahse, a hlu tho tho," tiin ka bân chu a rawn vuan nghâl a, kei chuan," Eng thil nge ni rêng rêng a? Min hrilh ve tal la?" ka ti țâlh a.

"Țhî a nia, i tâ tùr liau liauin ka chhertîr a," a tih chuan," Chuti, ka en nghâl ang aw, min awrhtîr nghe nghe la maw le," ka lo ti vat a, ani chuan,"I duh loh zâwng a lo nih hlauh chuan..." a lo ti sap a, kei erawh chuan," Min pêk a nih phawt chuan a hlû tih ka hria, min pêk duhna thinlung kha a hlu êm asin," ka lo ti vat thung a.

Min awrhtîr hnu chuan min thlêk vang vang a," I inhmeh phian mai, i inhmeh kha chu ka ring sa tho a; mahse, ka mitthla aiin a takah i nalhpui zâwk a," nui sen sen chung chuan a ti a, min rawn țhut hnaih leh lai chuan a inring lo hmuiah ka lo fawhsak zauh a, a hawi phâwk nasa mai.

"Ka nute'n min hmu hlauh ang asin," tiin ka bânah chuan a rawn sik hlawk a, min huat vàng a ni lo tih ka hre chiang a, chutianga a nute a han hlau der zâwk chuan min tihlim daih zâwk. Han tihnawn leh sak pawh min tihchâk phah, ka ti leh chiang ang.

"Kâr tàwpa inhmuh leh țâwk ringawt hi chu, a rei duh ngar ngar e tiraw?" ka tih chuan," Rei viau pawhin ka lo hre hleinem, i buai theih êm kha maw, min ngaihtuah hman tak tak teuh lo mai," a lo ti thung a, kei chuan," Min ngaihtuah hman loh vàng a ni zâwk lo maw? A ni chiang mai," ka lo ti a.

"Kei chu ka buai ve hleinem, inah ka awm a, ngaihtuah nân che hun ka ngah lutuk," a ti phawt a, chutah," Ka sawi ang khân sunday lo awm tùr chu aw, țhianho lêng khâwm ang u, Muanate pawh ka hmu châk tawh, anni pawhin min ngai ve tawh tho ang," a tih zawm leh a.

"Anni ai chuan kei hian ka hmu châk daih zâwk che."

*******

Vawiin chu Rinawmi leh a kawppuinu chu ka hmu dùn ve ta. A hmaa ka lo hmuh tawh kha a ni tih ka hai lo, dàwrah an rawn lût ve a, Rinawmi erawh chuan min rawn hmu lo, phone-in mi a be daih a, páwn lam deuhah a ding bawk, a kawpppuinu chuan damdawi a rawn lei ve a, a inla pà ve angreng si a, a hmuhnawm ka ti. An chhuah hnu chuan Pii chuan," Kan tûnlai khawvêl hi chu a mak tawh teh mang e," a ti vang vang a, a sawi chhan ni àwm chu ka hre mai; mahse, ka lo chhunzawmpui hran lo. 

Zànah Pàpâri phone call ka dawng nawlh mai a, vawiin lama ka vei tam deuh avànga mut hma ka tum ve zàn tak a la ni zui, ka phone chu ka en vang vang phawt a,  eng atân nge maw min rawn biak a tum ni ti rilru chung chuan ka chhâng ve ta hrâm a.

"Roddick, Pàpári ka nia, min la hria maw? I buai lai a ni em?" a rawn tih chuan ka buai loh thuin ka chhâng vat a, ani pawh chuan," A nih tak chu, hei kan pa hian a be duh che a, inbe r'u aw," a ti a, ban deuh charh hian 'aw' chu ka pawh ve bawk a, biak erawh ka peih lo kher mai, ka thâ a tho lo, thil kal tawh chu ngaihtuahin ka mitthlaah a rawn lang nghâl chuai chuai a.

Mahse, ka huphurh ang a lo ni miah lo, ngaihdam min rawn dîl duh hi a lo ni a, hun kal tawh mah ni se tûn thlenga a inthiam theih loh thu leh hrehawm a tih țhinzia leha mumang lam thlenga  a thil tihin a ûm zui thute chu rawn sawiin, kha thil thlen zàn ațanga thinthîa a mut theih tawh loh thu thlenga rawn sawi lehin ngaihdam min dîl nghâl mawlh mawlh bawk a. 

Chutia mahni rualpui pawh ni lova kei aia kum 7 vêl zeta upa lehnghâlin tlàwm leh zah pawh dâwn lova ngaihdam min rawn dìl tâk mawlh mawlhah chuan tih theih dang ka nei lo,  ngaihdamna thu hrilh mai loh chu. Mami khân a ngaidam kher ang em? Nge jail-ah a khung zâwk ang? Ka chhàn dàn chu a rilrem zâwng a ni kher lo maithei; mahse, thil kal tawh, ka siam țhat theih tawh loh, a tuartu lah mitthi mai a ni tawh a, keini a dam laite hi kan inngaihdam tawn mai loh chuan,  ani lah thlàn ațangin a rawn tho thei tawh si lo. Ngaihdam theih hi mi puitling zia a ni ngai e, ka ngaidam emaw ngaidam lo emaw  thil kal tawh a ni a, siam țhat theih a ni tawh lo. 

Chanchin Remruati ka hrilh ve chuan a lo lãwm khawp mai a," A chunga kut i thlâk miah lo kha ka lãwm a, kha khân result țha tak a rawn nei ve leh chiah a, a làwmawm tak tak a ni, i tân a harsat tùrzia ka hria asin, a harsa dáwn lutuk! Mahse, ringtu nunzia tùr dik tak hmangin i ngaihdam thu i lo hrilh a, ka lãwm takzet a ni, ani aia ka làwm lohna tùr bîk ka hre lo, i ngaidam thei chu i chungah ka lâwm a, amah ka lawmpui êm êm bawk," a lo ti duah a, a lâwm tih chu a hmêlah a lang vek bawk, a mitmeng chu hlimna chuan a kâp nung sar mai a, hmuh a nuam takzet a ni.

Lalhriata thil sawite chu chipchiar deuha ka hrilh chuan," Ka rin dàn chiah a ni, Pathian hian thil tisualte hi a en liam mai mai hauh lo a nia, zàna lungmuang taka i mut siai siai theih lai khân ani chu thinthi miah lovin a mu țhìn tihna a nia, a râpthlâkin a hrehawm ngawt ang," a ti leh a, ka kut chu vuan chialin min rawn en chho leh țhìn a, a hlim hmel hmuh nawmzia chu a hre pek lo a ni chiang.

Hun remchâng hmasa berah Remruati țhi tùr chu ka leisak ve a, ka pêk chuan a lo lãwm thiam khawp mai a, ka bianga min fawh zoh pah hian," Ka lâwm e, ka awrh reng tawh ang," a ti a, a țhi awrh lai chu a khawih pah nap nap a, chutah, thil hre chhuak thut ni àwm tak hian," En teh, vawiinah Rinawmi kha ka hmu a, mak ka ti tak tak! Ka sawi tùr a ni em chu ka hre lo nain ngaihzâwng a nei a," a tih zawm leh a.

"Nei ve bawk ang chu, hei keini pawh kan inzui reng hi," ka lo ti mai a, ani chuan," Ni lo, chutiang a ni lo, a ngaihzâwng kha hmeichhia a niin ka hria," a lo ti leh a, a țawng zawih dàn ațang chuan a thil sawi chu mi dangin an hria ang tih a hlau tih ka hre mai.

"A duh duh chu lo ngaizâwng mai mai ang hmiang, a thu alawm," ka tih leh chuan," Nia, ka sawi mai mai a nih kha, lo sawi tùr a awm lo e tiraw?" a ti leh lawi a, chutah," A chhe lo ka tia, ka ui ngawt mai," a ti leh sap a.

"I chhe lo daih zâwk!" ka lo ti vat a, min rawn enin," Tlëm tein i rilru ka tinâ em? Ka sawi chhe deuh sia," a ti leh sap a, a hmel pawisawi lo zet chu enin," Engah chuan maw? Theihnghilh daih rawh, hriat pawh ka lo hre tawh hleinem, rawn sawi chhuak lo phei la chuan ka theihnghilh hmin dèr tawh ang chu," ka lo ti a.

"Nang hi chu ka rilru tihhrehawm loh dan tùr hi i hre ve ngawt mai, i thil sawi apiang hi ka âwih ziah lehnghâl, dâwt pawh min hrilh ta ni la ka âwih vekin ka ring hial a ni," a tih chuan ka lama kuah hnaih pah hian," Dâwt ka hrilh phal teuh lo che," ka ti sap a.

*MAHNI NUN AIA MI NUNA KAN LA BUAI CHHÛNG CHUAN KEIMAHNIAH CHINFEL NGAI A LA AWM TIHNA, MI TÂN RIMTUI KAN NI THEI LO*