☆EARTH ANGEL☆ - 24 By Dingdi Pachuau

 ☆EARTH ANGEL☆ - 24 By Dingdi Pachuau

Ni khat chu dàwrah damdawi ka zawn laiin ka hnár chu a rawn thî leh ta ringawt a, chhùn lama a thì ngai lêm loh avàng chuan ka lo inring lo bawk nèn, min dàwrtunuin," E, i hnár a thî a nih kha," a rawn tih chuan ka en deuh hau a, chutah, rang zet hian ka hnâr chu ka hup ta nghâl a, ngaihdam dîlin inthiarnaah chuan ka lût ta nghâl a.

Vànneihthlâk takin a thî rei lutuk lo ve, a inthlahrunawm duh viau nain ka piin min ngaihtuah tih hriat taka páwn lam ațanga chanchin min rawn 

zawh chuan tlêm chuan ka awm a nuam deuh hlek. Inthiarna ațanga ka chhuah chuan ka pi chu a lo buai viau tih ka hmu thei nghâl a, ka lu a hai deuh avànga lu thing deuh nak chung chuan ka va zawm ta thuai a, ani chuan," I zia tawh em ni?" tiin min lo en zawk a, min dàwrtute chu pawisa a kìr nghâl bawk a.

A hnu deuha min dawrtu an awm loh lai tak chuan," A thî țhin em ni? I inentír tawh em?" a ti leh a, a thî zauh zauh tih thu ka hrilh chuan," Naktûkah inentîr nghál ang che, duh leh i inentîr zawh hnuah i rawn kal leh mai ang a," a ti leh a, ka lo bu nghat ringawt a. Ka pi hi ka thawh tìrha nèlawm loh lutuk kha a ni a, ka hrawn rei telh telh a, țawng duh tehchiam lo mah se mi sual a ni lo tih ka hre chiang ve tawlh tawlh bawk. Dàwr nghâk ka nih miau avàngin kei hi chu mi lo biak lûmlàm a ngai a, ka țawng duh ve viau tawh bawkin ka hria. Remruati pawhin," Dàwr i nghah ațang hian i țawng duh ta sawt, a hma pawh khân i țawng duh ve tho nain tunah chuan ka biak hmasak kher che ngai lovin nangmah zâwkin min be ve zauh zauh ta," a ti hial a ni, ka lo danglam sâwt a ni ngei ang; mahse, kan chhûngkuaah chuan ka ni chuang lo, ka ngai reng.

Kâr tàwpah, chu pawh Pathianniah chauh tih tak takin kan inhmu thei a, zàna nula ina lèn hi ka ti ngai lo ka tih tawh kha, ka inentîr hnuah phei chuan lèn chhuah chu sawi loh, zànah hrim hrim pawh ka meng rei ngai tawh lo, chuvàng chuan  Pathianni chawhnuah hi chuan ngei ngeiin inhmuh ka duh thung. Ka hnár a thî zauh zauh tih lohah chuan ka dam țha a, inhmuh hun hi chu pelh ka tum ngai lo. Ka inentîr khân damdawi min chawh a, zàn lam meng rei lo tùr leh ei tùr țha tak tak ei tùr min hrilh țeuh bawk a, ka damdawi ei chu ka zia phah em tih pawh ka hre chuang lo.

Pathianni chawhnuah kan spot (ti tawh mai ang, a spot ni țhìn kha tunah chuan kan spot a lo ni ta a nih hi) lam pan chuan kan tlãn leh vang vang a, vawiin phei chu ka incheina pawh ka uluk ve khawp mai a, ni dang zawng aiin ka inuluk. Mi dang an lo awm ve hlauh erawh chuan ka inchei ulukna pawh hi a flop vek ngei ang chu.

A la hma deuh bawk a niang, kan thlen chuan tu mah an lo la awm lo. Thing buk hnuaiah chuan thlahlel takin a hnunglam ațang chuan ka kuah chial a, ani pawh chuan ka kuahna bân chu a lo chûl ve hoh hoh a, kan țawng lêm lo, kan rilru erawh a inhmu viauin ka ring. A hnu deuhah chuan a nghâwngah chuan ka fawhsak zoh a, a lo tawm chãih thung a.

"A zã ka ti a nia," ti sapin ka bekah chuan a fâwp vei zoh a, a thil sawi chu haiderin a nghâwng chu ka fâwp nawn leh a, fâwp chho zêlin a irah, a khabeah, a bengkâwmah, chutiang chuan ka fâwp chho zêl a, a tawm chãih chãih ta bîk lo.

"Roddick-?"

"Umm..." tiin a țawng leh tùr hmuiah tak chuan ka fawhsak leh ta a, a țawng zawm lo chiang khawp mai. Ni e, hetia fâwp tùr pawh hian kár khat chhûng nghah a ngai țhìn si a, ka fawh theih hun lai hi chuan ãm taka fawh vawng vawng hi ka duh a ni.

A hnu deuhah chuan a ke a kham tawh ringin ka kapkârah ka țhuttîr a," Ka deh theih lai che hi chuan ka taksa si chêta i awm hi ka duh a ni," ka ti a, a lo nui ve mai a," En teh, insi chêta awm hian thil țha lo a thleng duh a nia aw," te chu a lo ti deuh deuh a.

"Induhte inkârah chuan thil țha lo thleng tùr a awm hleinem," ka lo ti thung a, a kokiah chuan ka khabe chu ka nghat a. Ani chuan,"Nula leh tlangvâl tán phei chuan fianrial ngainat viau pawh hian thil țha lo a thlen fo bawk," a ti leh a, a sawi awmzia chu ka hre chiang khawp mai; mahse, ka haider lui tlat thung a.

"Fianriala țawngțai pawh tiamin maw?" ka tih chuan ka mal chu na lo tê hian a chùm a,"Chu chu ka sawi tel lo aw, i hre ve reng sia," a ti nang nang a, ka lo nui hak a," Engah nge chûngte chu i sawi rêng rêng a? Min hlau em ni?" ka ti leh a.

"Hlau nâng, thil țha lo min tihpui dâwn lo tih ka hria alawm, ka ring tâwk che," confi zeta a tih chuan ka ngaihtuahna a hriat phâk lohzia chu ka ngaihtuah a, chutih rualin a rilru thianghlimzia leh min rinzia chu ka ngaihtuah tel nghâl bawk a, ka zah rûk viau rualin ka lãwm viau bawk, ani hi chu ni kher lo se chuan 'thil țha lo' a tih ngei hi ka tihpui daih tawh ang chu. Dik tak chuan kan awm dun apiang hian hetiang lam rilru hi ka pu fo va; mahse, ka țhulh ziah, a rilru thianghlimna leh a rûk taka a zahawmna hian min țhulhtîr leh nge nge țhin ni berin ka hria.

"Vawiin hi i nalh ka ti," a tih chuan," Nalh min tih loh ka hlau alawm," ka lo ti vat a, a nui hak hak a,"Hmuh i nuam; mahse, hmelțha hi chu engtin pawhin inchei ula, hmuh in nuam zêl tho, ka hmuh loh chhûng che hian kan inhmuh hunah engtin nge i inchei ang aw tih ka ngaihtuah ziah a nih chu, a ho thei tiraw?" tiin a nui leh a.

"Ho nâng, min ngaihtuah tih hriat chu a nuam ve hrim hrim bawk," tiin a kawr chhanah chuan a koki chu ka fâwp zoh a, ani pawh chuan ka tih dàn thîkin ka kut chu la kãngin a fâwp zoh a, a hnuah chuan hnai set sawta inenin kan hmui pawh a inhnaih leh ta, kan inthlahlel ve a ni mai, kan inhmu khât ve bawk ém a ni.

Zan danga ka chhuah loh pawhin Pathianni zànah hi chuan țhiante bulah ka chhuak ziah; mahse, ka meng rei ngai lo. In tùr an dawm pawhin kei chuan ka in ta meuh lo, ka hnâr thî țhin hi ka thil in vàngah ka puh deuh tlat a, ka buaipui nasat hmain a theihna apianga insùm mai ka duh tawh, Remruati min zilh ngai lova a phû tâwka nun chhoh ve ka duh, a bulah hlim taka rei tak hun hman ka duh si a.

Remruati bula lehkha zir zawm leh lam ka sawipui chuan," Kei chu zawm pawh ka lo tum tawh hleinem, nang chu zawm rawh, mipa i nih kha, nupui fanau chãwm tùr i nia, bâkah,  i u Mami duhthusàm hnuhnung pawh i hriat kha," a lo ti a, a zir zawm tum loh chhan ka zawh chuan lehkha zir a tui loh thuin min chhâng mai a, ka ring chiah lo deuh a, eng vàng nge ni ang aw ka ti rilru a; mahse, ka zâwt nawn tawh chuang lo. Hun remchâng  hmasa bera zir zawm leh tùrin min fuih sauh sauh a, ka tum sa tho a ni a; mahse, a tum ve ta lo erawh chuan tlêmin min tihnual deuh.

Ka nu bula ka sawi chuan țha a lo tiin min fuih sauh sauh a, kum hnih lai ang hun ka chàn tawh avànga beidawng miah lo tùr chuan min hrilhin," I zir chhuah hunah phei chuan i pa pawhin i thawh tùr pawh a ngaihtuahpui thei chein ka ring. A, han zawm phawt la, a fel vek mai ang," hlim tih hriat tak hian a ti a, ka u thih hnua a hlim ber țum a nih hial ka ring.

Ka ţhianteho zir chhuah vek hnuah ka han zir ve leh țan leh dáwn chu a ni a; mahse, zirnaah tlai luat a awm thei chuang lo va, ka hnual phah hran lo, ka la upa êm êm hran lo bawk nèn, Remruati tel ve ta lo tùr erawhin tlêmin min tihnual deuh a ni mai a; mahse, hun thâwl ka nei ve thung tawh dâwn a, ka hmu zing thei deuh tawh ang chu.

Mahse, ka rin aiin hun ãwl ka nei mang miah lo nia! Thil tih tùr neuh neuh neiin, lei tùr lah a kuh țul mai. Ka inhlawhna pawisa ka khâwl kha thil țangkaiah ka hmang chho thei ta chiah e, ka pain min lâksak duh loh azârah amah dìl buai ngai miah lovin ka mamawh lei nân ka pawisa chu inthlahrung hauh lovin ka hmang thei ta zar zar a, chuti chung pawh chuan ka nu erawhin pocket money tùr min pai ziah tho. A hrin ka ni lo tih hi rin a har ka ti hial țhìn, ka sual zual laia min hauh ziah laite kha, ka sual vàng vek a lo ni tih ka hre chiang chho zêl a, ka sual lêm loh chuan tunah pawh min duat êm êm mai si a, sual miau kha chuan duat kha ka har ve dâwn êm bawk a lo ni, ka thiam lo ta miah lo.

Nikum hmasaa Jail-a ka luh chhan tak Pu Thlenga boral thu chu ka hre nawlh mai. Thla khat lai a lo liam tawh nghe nghe, amaha intihlum a lo ni àwm a, nun hrehawm a lo ti ve a ni chiang. Dam chhûnga jail tâng tùr a nih loh vêk pawhin a rei lo berah kum 10 tal a tàn rin kha a ni a, a nghâk chhuak thei ta ngang lo a nih dâwn chu. A nuam tih zâwng takin a dam lai hun a hmang a, a vaubeh theihte lakah a inluling a, an chungah a duh tâwkin a chê a, a chunga thuneitute an han awm ve tâkah chuan ani pawh chuan a nun chu hrehawm a ti ve ta a nih hmel, khawngaihna rilru pawh ka pu lo, ka duh aiin a thi hma zâwk, hrehawm ti tak khân rei ve tak dam se ka ti asin.

Inrinnia kan ina Remruati a rawn lèn chuan ka nu chuan hlim takin a lo chhàwn a, sitting room-a thingpui kan in lai takin ka pa chu rin loh takin a rawn haw ve tlat mai a, ka duh lo viau nain tihngaihna dang awm tawh hek lo le, kan bulah chuan a rawn țhu ve a, Remruati chu enin," Hei, khawilam nula nge ni?" tiin ka nu chu a en leh zat a, ani chuan," Bawiha țhiannu Remruati a nih hi, a lo kal ve zauh zauh alawm; mahse, i awm loh lai a ni ang," a lo ti vat a. Nèlawm takin ka pa chuan Remruati chu a be nghâl bawrh bawrh a, kei erawh chuan vawi khat pawh ka be lo, ani pawhin min be lo bawk a, nêl taka Remruati a bia pawh chu ka lo duh vak lo, ani hi chu ka bialnu a ni a, ani lo inrawlh ve hi ka duh lo.

A hnua kan pahnih chauha kan awm hnu chuan," I pa chu a nèlawm hle mai, a țawng duh bawk a," a ti a, kei erawh chuan," Hnaih tam miah suh, a fapaa min ngai lotu a nih bâkah, ka thawh chhuah ve pawisa pawh min lâksak duh lo a nia, pêk pawh ka tum chhin ngai tawh lo ang," ka ti rilru a; mahse, a hriatah erawh chuan," A nih àwm kha," ka lo ti ringawt thung a.

"I nu bula awm pawh hi a nuam ka ti, a țawng duhin min nêl ve tho bawk sia, min titipui dàn a thiamin a duat hmel bawk che sia, kei ai pawh hian a duat hmel che ka ti," a tih duah chuan ka lo nui suk a," Duat ve bawk ang chu, a fapa neihchhun ka nia, nang lah chu a fapa neihchhun duhlai i lo ni bawk a. Chuan, ani min duat dàn leh nanga min duat dàn chu a dang daih alawm, a inang thei lo bawk, nangmahin min duat hian nuam ka ti daih zâwk," ka lo ti ve a. 

"I naupangchhia eee..."

Ka nui hawk a," Chutiang chuan ti miah suh aw, puitling taka chêt ka duh a, 'thil țha lo' tiin min khap leh daih a," ka tih nang nang chuan," I puitling viau ka ti țhin tho bawk," a lo ti leh a, a thil sawi dàn tak hi a nia naupangchhia chu ni; mahse, a lawmawm ka ti leh tlat.

"Thil dang daih, kárlehah khian kan zin leh lawk dâwn a; mahse, kan rei lo ang, khatin lungngai hmel lo pu duh suh, kan rei dâwn lo ka tih chu," ka huphurh hmel a lo hmu a ni ngei mai, nia, ka huphurh, kan inhmuh theih loh pawhin khua hmuna kan awm tih hriat chuan a zia, hmun hran daiha a awm chuan ka ngai ngawt ang, tunah phei chuan ka bialnu a ni tawh lehnghâl a, ka bialnu a nih hnu hian min la zinsan miah si lo va, ka ngai reuh ngawt ang.

'Zin miah suh' tih thu awm hek lo le, min zinsan ta ngei a, a zin a ni tih han hriat chuan mal ta riauin ka inhre pek a, zàna ka mu tùrte hi ka lung a lêng ta riau mai a nih chu, a zin hma pawhin ka mu reng reng tho a, ka lung a lêng ngai tawp si lo, a zawngchhangthlâk loh khawp ang le.

Pathianniah ka chhuak lo hrim hrim a, chawhnu lamah erawh min rawn biak avàngin rei zet chhûng chu kan inbia a," Ka âwm hi a na deuh ringawt  a nih chu," tiin a khuh leh kharh kharh țhìn a, ka ngaih deuh vàng nge ni, a khuh ri pawh chu mawi ka ti ta tlat mai. Khuh ri mawi ka hriat vawi khatna!

"Engtikah nge in lo haw dâwn? Ka lo hmuak ang che aw, i duh em?" ka tih chuan," Inrinni khian a niang," a tih chuan," A va la rei dâwn ve!" ka lo ti hluai a, "'Kan rei lo ang' kha a ti ve si a, an rei dâwn hle si," ka ti rilru nauh nauh a, ani chu a rawn nui hak hak a," Min ngai viau lo teh, Inrinni chu class kal loh ni a ni bawk a, min rawn hmuah hman chuan, a nuam viau ang chu," a lo ti ve leh mai a, min ngai ve a niang, min hnial bîk miah lo, hmuah chu ka tum ngei bawk ang, Dusty hi chu a khalh chi loh ang, bungrua an nei ngei dâwn si a, amah chauh a la ni lo zui, ka pa motor ka la chhuak mai ang.

Zànah erawh peih lo deuh chung chuan ka țhiante hmu tùrin ka chhuak ve leh ta poh a, Mapuia bialnu birthday zàn a lo la ni zui a, min tihluih tlat avàngin kawppui pawh nei chuang lo chuan ka kal ve a, birthday girl chhungkua an awmthei bawk a, an làwm mai mai bîk miah lo. An in hnuai room zau nuam hek hawk, mawi zeta an chei ngeiah chuan birthday chu lawm a ni, a remchâng viau mai.  Remruati chu awm ve se chuan nuam ka ti ve viauin ka ring, tunah hi chuan ka rilru a kim lo tlat mai a, nuam ti tak pawhin a hman theih loh. Joseph-a nèn kawppui kan neih loh avàngin kan hnial lui chungin Mapuia pek chuan zanin atân chauha kawppui tùr min pawh chawpsak a, anni lah chu an lo la polite êm êm zui a, fiamthu nèn an ri bawrh bawrh reng a, kan mal ta bîk lo ve. Ka kawppuinu phei chu kan vêng mi a lo ni ve zui a, a insawi hmangin, ka lo hre ngai miah lo, ani pawh chuan min lo la hre ngai bík lo a ni àwm e.

Zàn ka men rei duh loh avàngin dár 9 pelhah haw tùrin ka chhuak a, ka kawppuinu tê chuan min zui chhuak a, páwn kan thlen chuan," Ka haw ve nghâl daih dâwn em maw ni le? Kei pawh men rei vak ka duh lo va," a ti ve a, kei chuan,"Kan vêng a inang tho a, i thu thu a ni mai," ka ti ve mai a, a inngaihtuah deuh vang vang hnuah chuan," Khawngaihin, min lo nghâk lawk aw, ka bag ka'n la lawk ang e," tiin in hnuaiah chuan a lût leh rih a.

A rawn chhuah chuan jacket ni àwm tak pawh a rawn ha chhuak tawh a, Dusty hnungah chuan a rawn lâwn kai nghâl zat a, bike hnungah a chuang țhang tih ka hre nghâl mai, a zei êm mai. A inpeih hnu chuan kan tlãn chhuak ta nghâl a," I kâwngah ka lo kuah mai che aw," tih leh ka kâwnga a kut pahniha min rawn kuah chu a rual nghâl a, hnial tum pawh ni ila hnialna hman pawh a awm lo, ka lo tlãn chak deuh hlek a ni, chuti chu ni lo se chuan ani pawh hian min rawn kuah kher lo ang.

An in kawt thleng ka thlah a, làwmthu a sawi a, eng dang sawi lêm lo chuan kei chuan ka mangțha a, ka tlân zui leh ta nghâl a, in thlen thuaia  Remruati biak ka duh, a lo la muthilh hman loh hrâm ka beisei. In ka thlen veleh chuan ka phone ka la chhuak hmasa ber a, a missed call a lo la awm zui, hei chu music ring zeta an play hun lai vêl kha a nih dâwn hi, ka han call back ta zat a.

Mahse, min chhâng lo, a buai rih a niang, a muthilh êm chu ka la ring lo deuh sia, ka tihnawn leh pawh chuan min chhâng chuang lo, ka text ta ringawt a, a hmuh hunah min rawn chhâng ve mai a niang chu.

A tûkah chuan Muana hnén ațangin nizàn lama ka thlalâk țhenkhat ka dawng nawlh mai a, engtik laiin nge a lo hmeh rûk ka hre miah lo, ka posi a lai thei khawp mai; mahse, a eng emawti nalh ru phian lawi a, ka en dan dan a, ka kawppuinu erawh chu a lang pângngai hlawm khawp mai. A tàwp bera mi chu ka thlêk deuh reng a, he pa hian min lo zui ru zêl a ni ngei ang, kan haw tùr Dusty chunga kan chuang tawh thlalâk a nia, han en mai chuan tu nge kan nih tih pawh hriat a harsa, kei pawhin Dusty hi hre chiang fê lo ila chuan keimah ngei ka ni tih ka inhre mai lo ang. 

Muana chu text-in *Eka, engtin nge hêng hi i lo  hmeh hman a? Min veh ru a ni maw?*  ka va ti a, ka posi lai zet zet chu en lehin ka nui suk suk a. Remruati'n hmu ve se min nuih nasa khawp ang, ka lang mak hlawm si a.

*In inhmeh reuh ka tia, ka hmet lo thei lo a ni, Mapuia khân a thlansak thiam khawp mai che u, Joseph-a pawh a lungawi hmel khawp kha*  tiin  Muana chuan min rawn chhâng a.

*A DIK A DAWK PAWH THLU  LOVA HRIAT APIANG SAWI HMIAH HMIAH MI CHUAN A TÀWPAH HARSATNA A TÂWK ȚHÌN, ȚAWNG INSÙM NACHÂNG HRIAT  HI A NGAI VE FO A NIA*