☆EARTH ANGEL☆ - 25 By Dingdi Pachuau

 ☆EARTH ANGEL☆ - 25 By Dingdi Pachuau

Remruatite lo haw chu ka lo hmuak ve ta ngei mai. Ka tih țhin dàn ni miah lovin car ka la chhuak a, ka pa pawh ka hrilh chuang lo, ka nu erawh a thuphungin ka hrilh a, Lengpui lam panin ka chhuak ta vang vang a.

Nghâktu nih hian hun hi a rei hma viau mai a, kei pawhin Remruati hmuh thlahlel viau lo ila chuan ka ning khawp ang le; mahse, amah ber ka kal chhan a ni bawk a, nghâk rei pawh ka inti phal meuh lo, kan inhmu leh thei tawh dâwn miau si a.

A u chu car hnungah an bungruate nèn a țhu a, a phone-ah hla play-in earphone a bengah a vuah daih a, chance min pe ve a nih ka ring. Remruati chuan thlawhna a rui deuh a, a lang nguai ve deuh; mahse, hlim hmêl puin min nuih sêng tho,  zaninah a mu ang a, naktûkah chuan a nguai hmêl hi chu a reh vek mai ang chu maw, a awm a nawm loh chuan kan lêng chhuak thei dâwn si lo va, zanin pawh lèn duh viau mah ila, ka insûm mai ang.

Han titipui pawh chu ka duh viau a; mahse, ka khawngaih deuh si a, a țawng loh chuan ka țawng duh vak bîk lo. Ka khawngaih reuh êm avàng chuan a rui tihreh nân ei tùr thûr lam ka leisak a, kan tlàn rei deuh hnuah chuan a rawn titi peih ve ta a; mahse, chuti chung pawh chuan keimah zâwk chuan ka țawngpui vak duh lo, thlawhna ruih hi a hrehawm viau em tih ka hre ve hauh lo, ka la rui ve lo miau mai si a; mahse, a nawm viau chu ka ring lo.

"Zaninah i lo lêng ang em?" a rawn tih chuan," Rawn lêng lo ta ila i thin a rim ang em?" tiin ka zâwt lêt a, ani chuan,"Engah ngawt maw?" tiin min zâwt lêt ve leh a.

"Naktûka lèn chhuah dun ka duh zâwk si a, zanin chu hma taka mua hahdam tùrin ka duh che, rawn lêng lo tùrin ka insûm thei mai ang," tia ka chhàn chuan a chal dawma hmet neuh neuh pah chuan," I thu thu le, vawiin chu, nia, ka dik lo deuh tlat a nih hi, thil ka ei loh lutuk vàng kha a ni ngei ang," a lo ti sap sap a.

Zànah chuan ka lêng ta lo, phone-in ka be tho a, mu hma turin ka chah leh a, ani pawh chuan mu chunga min biak thu a rawn sawi a, rei be lovin muhìl thuai turin ka hrilh leh a, ka mangțha ta nghâl thuai a. 

A tûk chawhnua lêng chhuak tùra ka insiam lai chuan min rawn bia a," Ka rawn pangchang thei ang em?" a rawn ti phawt a, ka mitko ka sàn ãk a," Pangchang theihtàwpin le," nui chungin ka ti a, ani pawh chu a rawn nui ve hak a, chutah," Ih maw, vawiin chu scooty khalh ka peih chiah lo deuh a, car kha rawn keng mai la, a remchàn chuan," a rawn ti ta a, a aw chhuak chu a inthlahrung reuh dai dai khawp mai.

"Aw le, i la nuamsam vak nange a?" ka tih chuan," A, ka pangchang ve châk rih alawm," a rawn ti mai a, ka nui suk a," I nawmsam chuan a țha e, ka rawn chhuak thei țêp aw," tiin kan inbe tàwp deuh nghâl mai a. Car ka ken dâwn avàng chuan ka sam chu ka han siam uluk leh deuh a, ka pa a chhuak lo hlauh bawk a, a tihzia khawp e.

An in ka va thlen chuan a lo inpeih ve tawh a, a hmêl pawh nimin lam ai chuan a lo harh țha tawh; mahse, a lang dâng deuhin ka hria, a makeup hman vàng pawh chu a ni thei tho mai. Ina awm rei lo chuan kan chhuak ta thuai a, bag lian lutuk lo hi a khai a, a chhûngah chuan ei tùr a dah leh nual a ni ngei ang.

Kan pahniha hâk tùr couple t-shirt a rawn lei haw ve ngei niin, a nalh ve reuh reng. Min teh pah chuan," I ha tâwk ang chu maw. Mi tih dàn hi thil țha lam a nih chuan tih ve zauh zauh pawh a pawi lo, hawh, ha chhin ang? Thla pawh kan la dun ang a," a ti a, dik tak chuan hnialna hun min pe lo rêng rêng, hetiang hâk hi ka duh ngai lo, bâkah, a pà loh thlâk ka ti ţhìn; mahse, ka hâk tùra a rawn lei ve liau liau a nih bâkah a rawng hi a dum a nia, tlêmin a zia deuh chuan ka hria. 

"Ka duh lo," ka tih chuan a rilru ka tina ang tih ka hlau ve bawk sia, motor chhûngah lüta a inthlâk hlàn chuan phûr lo zet hian ka thawmhnaw chu ka phelh ve a, ka han inthawlh ve ta chhin a, rin aiin hâk a lo nuam phian mai. Ka han phar kual vêl a, min phuar miah lo, a puan a țha reuh a, a man pawh a tlâwm vak lo ang.

"Khawi maw, lo hawi teh, Umm,  ka mitthla dàn che nèn a dang lo, i inhmeh lutuk aw," tiin a kutzungpir tipir vahin min rawn pan a, a nui pah sâng bawk a, ani pawh chu a inhmeh takzet mai, a sam chu dul zet hian a phiar a, a hma lamah tlêm a tiuai bawk a, a kawr hâk rawng chuan a vun a tilang noin a lang duhawm kher mai.

"I inhmeh," tiin kan infak ve ve a, thla pawh kan la dun țeuh mai, mi dang lo awm vein min hmu dùn ta se min nuih viau maithei a ni, a duh dàn ang angin ka awm kual a, ka hnial duh lo, vawiin chu a duh dàn ang takin hun hmang teh ang.

A hnuah erawh innghèng riala țhuin a zin chhûnga min ngaihzia chu hmaichhanah ngei chuan min hrilh leh ta a, phone-a kan inbiak pawhin min ngaih thu kha chu min hrilh tawh a; mahse, hmaichhanah ngei hian a fiah bîkin a hria a niang, kei pawhin ka ngaih thu chu ka zêp duh bîk lo.

"Nizàna chaw kan ei laiin ka uin min fiam a, a chhan chu ka ngai che a ni tih a hre ve tho sia; mahse, chhûngte bula min fiam chuan ka zak ve tho, thlawhna kha rui lo phei ila chuan min fiam nasa ngawt ang," a ti sap sap a, a țawng zâwnga hmui che sawn țhìn chu ngun zet hian ka lo en chhuk reng a, a lipgloss sèrthlum rawng lam deuh a hnawih chu a inhmeh viau bawk.

"Nimina kan titi khân eng vak mah kan sawi lo kha a nia, en teh, thil ni àwm deuh deuh a sawi chhuak a, kan thu sawi kha hriat ve a duh vàngin earphone kha a lo vuah der mai mai a nih ka ring ta alawm," a tih chuan ka nui sak a," Thil pawi tùr kan sawi lo va, bâkah, biahthu di pawh kan inhlan hran loh kha a," ka lo ti a, ani pawh chuan," Ka ngei reuh tak tak a ni, a bialpa lo lèn leh hunah ka lo ngaithla ru ve tawh ang maw le," a ti nang nang a, ka nuih ru suk suk a.

Chutah, thil dang sawiin,"Vawiin chu ka inkhâwm peih hrâm hrâm chauh a ni, han inkhâwm loh ngawt kha ka hreh ve deuh a," a ti leh a, kei chuan," I taima ngawt mai, in biak ina ka rawn inkhâwm bâk kha chu biak in ka rap leh tawh hleinem," ka lo ti a. Ka kut hmer salh pah chuan," Mak thei! Inkhâwm leh inbual hi chu a inchhìrawm loh asin, han inkhâwm leh chhin mah teh, i inkhâwm loh ai khân nuam i ti daih zâwk ang, next sunday chu inkhâwm tùrin ka rawn sâwm leh ang che," a ti leh sap sap a.

"Pianthar chuan si loh chuan inkhâwm hian awmzia a nei lo êm mai, a ninawm thlàwn mai niin ka hria," ka lo tihsak a, a awm dàn siam remin min rawn en a," Chutiang a ni ringawt lo, piangthar chauh inkháwm tùr ni ta se chuan biak in tam tak hi a thâwl viau maithei asin, kan inkhâwm ang a, Pathian thute kan ngaithla tam ang, kan ngaihthlâk tam chuan kan hriat pawh a lo tam nge nge ang a, hriatna ațangin rinna kan nei thei bawk dâwn a ni. Biak ina kan inkhâwm hian thil sual kan ti lo deuh nge nge a, Pathian thu ngaithlain kan zir a, kan zaiin Amah kan fak bawk a, a hlûin a nuam bawk alawm, ka rawn sâwm ve ziah tawh dâwn che, " a ti ta duah a.

"Okay, ka tlâwm," tiin nui chung hian ka bân chu ka phar a, ani erawh chuan thutak zet hian," Kan pahnih tân hian ka țawngțai ziah asin, a bîk takin i tân liau liau zîngah hian ka țawngțai țhìn, Pathian hnénah nang min pêk avàng pawh hian làwmthu ka hrilh ziah bawk," a ti leh a, a thutak êm avàng chuan ka nui ngam tawh bîk lo.

A hnuah chuan,"Ka lâwm e, nangmah chauh hi min țawngțaisak țhintu i nih ka ring, țawngțaisaktu neih chu hlu deuh mai asin," ka ti ve a, ka rilru tak tak ka sawi a ni. Ani chuan," Ka tih theih tâwk a nia, mahni hma ka sial vàng pawh a lo ni maithei, nang nèna hlim taka hun hman chhoh zêl ka duh si a, rilru hrehawm taka i lo awm te hi ka hlau a, " a ti leh sap sap a, eng mah ka sawi ve tawh lo, a kut chu ka hmersak vawng vawng ringawt.

Kan ngawih leh vang vang hnuah chuan thil dang sawiin a zin hlàna ka hun hman dàn chu min zâwt leh a, a hriat tawh hnu ni mah se ka hrilh nawn leh tho, chipchiar takin a zin hlàna ka țhiante nèn Mapuia bialnu birthday lawmnaa kan kal chanchinte chu ka hrilh ve a, Muana min rawn thawn thlalâkte chu ka entîr ve bawk a, ka rin ang ngeiin thlalâk a en chuan a nui ve nasa mai.

"A nuihzatthlâkin a hmuhnawm hlawm hle mai, Muana chuan a lo veh nasa àwm hle mai che ka ti," a ti a, a en nawn kual leh a, ka partner chu thîk ang pawhin a awm lo. Tlëma a thîk ve deuh ka ring a nia, chutiang lam sawi lo chuan,"I partner hi a fel reuh ngawt lo maw? A chhe lo reuh phian lehnghâl a," a ti daih a.

"A țawng duh khawp mai, a lu pawh a zo viau," tia chhângin a hmel chu ngun takin ka thlêk reng a, thîkna mitmeng ka hmuin ka hre lo, thîkna tùr a awm lo bawk a, min ring tâwk viau a nih ka ring. Nia, ani bâk hi duh leh melh ka nei lo miau a.

"Hmeichhe lu zo veh vawh hi chu an awhawm ngawt mai, nih ve ka châk țhìn," a tih chuan," I nih dàn kha a tâwk chiah, lu zo leh lutuk hi mipate hian kan duh vak hran lo a nia," ka lo ti a, chutah," Tlêm tê pawhin i thîk nange?" tiin ka zâwt chhuak ta nge nge a.

Ka mita min rawn en vang vangin a nui ta sak a, chutah, meng hnuai ta deuhin," Thîk theih tùrin in awm em ni? Birthday party atân, zan khat atân chauh i partner a nia, chu pawh ka awm loh vàng liau liauin," a ti charh a, chutah, min rawn en lehin," Mihring chuan kan hma lam hun kan hre hauh lo, țawng thuchhe lovah, tunah pawh hian ka nunna hi a tàwp thut thei, kan nunna chunga thu kan neih loh êm avàngin tu pawh mai hi inhmangaih dial dial ila a țha mai," a ti leh duah a.

"I thîk miah lo maw?!" tiin ka zâwt țha leh a, thîktîr ka tum pawh a ni hran lo; mahse, thîkthu chu a nei ve tùrah ka ngai, min duh tak tak a nih si chuan. Ka awm loh hlànin mipa dangin zànah bike-in phur ta se ka thin a rim viau loh pawhin ka thin a tâwt up up ang chu, ani hian thîk miah lovin min en liam mai mai chu a nih si hi.

"I duh loh kha, keimah alawm min duh, ni lo'm ni?" a lo tih leh chuan," Ni e, nangmah kha a ni ka duh chu, ani kha chu engah mah ka ngai lo," ka ti a, a nui var var a,"Chu, ka thík a ngai hleinem, i sawi vek chu. Bâkah, ka ring tâwk che, ka ring che ka tih tawh kha, a la ngai reng,"a ti leh zat bawk a.

Zànah message min rawn thawn a, a rawn sawi chiang ta viauin ka hria.

*Ka duha ka pan hmasak leh be hmasatu che ka ni a, i lakah hian thîkthu sawi thei ka ni lo, hmeichhia i be thei, i duh chuan i phur thei bawk, i chungah hian a zawng zawngin thu neih ka tum lo va, thunun tlat che pawh ka tum lovin ka duh hek lo. Ka ring tâwk che a, dâwt min hrilh lah ka ring hek lo. Mi rinawm leh fel tak i ni miau a*   tiin.

Thu zêp nei lova khami zàna thil awm dàn ka hrilh ta kha ka inchhîr lo kher mai, min rin phahin mi fel leh rinawmah min chhuah phah a nia, ka phû loh fakna hlu tak a ni.

Mahse, ka inkhâwmpui ngai chuang lo, min rawn sâwm ziah a, peih loh thua lo chhàn ka hreh ve deuh si chuan chhuanlam ka dap nasa thei khawp mai. A châng chuan ka khawngaih a, min rawn sâwm ve vang vang si a tiin vawi hnih khat chu ka han kalpui leh lâwp lâwp  bawk a, ka inkháwm ve chhunah pawh chuan a lãwm thei khawp mai. "I inkhâwm loh khân eng mah i ti chuang lo, i inkhâwm avàng khân chàn i nei chuang lo," a ti ve ziah a, hnial reng leh chhuanlam siam reng mai chu har ve duh tak a ni.

Zêp reng theih ni bîk lo chu, ka țhiante pawh chuan Remruati nèn kan inzui tih chu an hre ta rêng a, min chhaih ve nasa. A hnua Mapuia ka ațanga Pastor fanu a ni tih an hriat leh phei chuan mak an ti a, a hnuah min hlauhthàwnpui leh ta a. Mapuia chu ka hrilh miah si lo va, engtin nge a lo hriat ni? Ti ila, a u Biaki pasal kha pastor a ni ve miau mai a, chuta țang chuan a hria pawh a ni mahna.

"I duh tak tak lo ang?"

"I chhaih mai mai lo tiraw? I duh ang type a ni si lo va, nge i lo kalpui thui viau tawh? Pastor fanu a ni sia, i fîmkhur viau a ngai dãwn a nih chu."

"A, in buai thui hmain țhen daih teh."

"A chhûngte'n an hria em? Eng angin nge an ngaih che?"

"In mualpho hmain ințhen thuai teh u."

"A nihna hre sain i nihpui a, i kawp mai mai thei dâwn miah lo a nia, i fîmkhur loh chuan a pa thlengin hmingchhe thei an ni dâwn a nia."

Kan țhianhoah hi chuan thu zêp hi a awm lêm lo a, bâkah, kan frank-in thil nihna dik tak hi kan sawi mai țhìn, Remruati hi ka hmeichhe duh ang chi ni mawlh hek lo le, kan nungchang leh awmphung kan inhre chiang tawn hlawm bawk a, pastor fanu tân chuan min hlauhthàwnpui  a ni, a àwm viau tho, ka dem rêng rêng lo. Ka nun dàn, ka thil tih țhin leh ka țhat bîk lohzia hriain Remruati chhûngte lakah min hlauhthàwnpui bawk. Ka țhiante an nia, min hmangaih a, min hlauhthàwnpui ve bawk ang chu, ka nun dàn hre chiang bertute ni miau hek.

Min han zilh vein min hlauhthàwnpui a ni mai a; mahse, țhen ka tum teuh lo. Hun a lo kal deuh hnuah phei chuan anni pawh chuan ka rilru chu an hre chiang a, min fuihin Remruati chu kan awm khâwmnaah pawh hruai ve tùrin min ti ta hial a, ka hrilh chuan ani chu a lo phûr nasa mai. "Ka hmu khât tawh hlawm a, ka hmu chák tawh hlawm khawp mai, bâkah, an bula titi leh kha ka châk tawh bawk," a ti siam siam a, ani hi zawng țawng duh ngang hi a ni ve a, an bulah a tlângnêlin a hmu khât mah se a kàwm nêl leh êm êm vek ang tih pawh ka hria a ni.

Hun kan neih leh hmasak berah ka hruai ve ta a, ka bialnu ang chuan ka hruai tho nain an ţhian ang a ni ve tho a, han tekrek hranpui viau pawh ka tum chuang lo. An bula a awm phei chuan min ngaihsak hman teuh lo, a țawng duh si a, Muana nèn fiamthu an thawh a, kan nui dar dar reng mai. Ka nuin min rawn biak teh tlat avàngin ka kal sawn ta rih zâwk a, ka pa nèn dam lo kanin Durtlâng lamah an chho zawk dáwn a ni àwm e.

Ka lêt leha ka luh dâwn lai chuan Joseph-a'n Remruati chu zawhna a lo zâwt ve mêk a, lût nghâl mai lo chuan ka tàwi ta rih a." Roddick-a nèn in lo inzui ve reng a, kan lawmpui chein amah pawh kan lawmpui khawp mai. In la inzui rei lutuk lo a ni maithei, chutih lai chuan amahah hian duh khawp lohna emaw tling tâwk lo tihna emaw  i nei ve ngei ang a, mihring chu kan perfect si lo va, a tlin tâwk lohna han sawi la, tling tâwk i tihna nèn, kan lo ngaithla ang e," a ti duah a. Engtin tak min sawi ang maw tiin a chhànna hriat châk chuan ka beng chu ka dawh țha sauh sauh a.

"A tlin tâwk lohna chu arsi ang zât vêl hi a ni ang," a rawn tih chuan ka hre sual emaw ka ti hial mai! Nia, ka tling tâwk lo tih chu ka hre chiang ve khawp mai, a lakah hian ka tlin tâwkna sawi tur rêng ka hre lo, nu leh pa tak tak ni lo bula sei lian niin ka lo sual pah ve bawk nen,  tlêmin ka zak ve deuh hlek bawk.

"A nih, a tlin tâwkna lam ve thung?" C-a chuan a lo ti zauh a, ani chuan," A tlin tâwkna han tihah chuan a țhatna tihna nèn a inang reng ang chu maw, Thla ang vêl hi a ni ang," a lo ti leh a, Muana ta pek chuan," Chu chu eng nge a awmzia?" a lo ti vat a, ani hi thil awmzia hre thiam har chi hi a ni ve a; mahse, tûn țum chu kei pawhin Remruati thil sawi hi ka hre thiam bîk chiah lo.

"A tlin tâwk lohna chu a lo tam a ni maithei; mahse, chûng zawng zawng chu a tlin tâwkna khân a hliah khuh vek a ni. Arsi chu lo êngin lo tam viau mah se Thla pakhat chauh pawhin an ènna a hliah khuh vek thei si a," a ti a, maimichhîng vang vang chung chuan ka kut chu ka hûm ruh a," Ka lãwm e," tiin ka phun pah sap bawk a, chutih lai chuan Muana chuan," Wow, Wow!!! A va țha tak êm! I sawi țha takzet a ni," tiin kut chu ring zet hian a bêng a, mi dang pawh chuan an lo bêng ve a, chutih lai tak chuan an awmnaah chuan lût ve nghâlin," Eng nge in sawi a in lo rîk hlut a? Kut benna tùr thil làwmawm a awm em ni?" hlim ru zet si, a langa nuih duh rih si lo chuan ka ti lût pah a.

"In nu hi, a sawi țha lutuk!" tiin Muana chuan min lo chhâng a, kei chuan," Eng chu maw?" tiin Remruati chu ka'n melh ralh  a, ani chuan," Sawi chi loh," nui sâng chung hian a lo ti thung a. Muana vêk chuan," Ințhen miah suh ang che u, in ințhen vaih!" a lo ti leh ringawt a.

"Inţhen thu kan sawi em ni? Kan la sawi miah lo tiraw?" tiin Remruati lam bawk chu ka hawi leh a, ani chuan," Sawi miah lo," a lo ti ve leh vat a, Muana chu enin ka dàr chu ka sàn ãk ringawt a.

"Ințhen lam chungchâng sawi tâkah chuan, ințhen tawh chuan ințhen vang vang a țha ber. Kan duh takte hi chu kan theihtâwpin kan duatin kan hmangaih tùr a ni; mahse, chutiang rilru an lo put ve si loha mi dangah hlimna an hmuh chuan thlah zalèn hmiah mai ila a țha ber. I duhin duh dang a lo neiha i hmangaihin hmangaih dang a lo neih si chuan in hlim dùn thei ngai lo ang, in inhrem tawn tihna a ni a, chutiangah chuan inthlah zalèn ve ve ila rilru pawh a dam hma ber," Mapuia, nula-tlangvâl inlaichìnna lama inti-expert zet chuan a lo ti duah a, Muana chu a lo bu nghat a, kei pawh chuan ka han ngaihtuah zui a, dik ka ti ve khawp mai.

"Expert nge nge," Muana chuan a ti sup a, C-a chuan," Inti-expert zâwk maw le," rang zet hian a lo ti ve a, kan nui ta dar dar a. Mapuia chuan," Muana hi chuan min ngaisang thei teh tak e; mahse, ka thil sawi kha chu a dik vek a nia, i bialnuin duh dang a neih chuan thlah hmiah mai rawh, i chelh reng chuan mahni hma i sial tihna, a duh thlang thei tura a zalènna i hup behsak tihna a ni bawk, induh ve ve inkârah chutiang chu a thleng thei lo, inngaihzàwnna, induh tawnna hi mi pahnih inkár tùr a nih laiin pakhat dang a lo tel ve tawh chuan a buai nghâl vek a ni mai, ni lo'm ni, Joseph?" tiin Joseph-a chu awmze nei zet hian a va melh a, ani pawh chuan," Ni chiang e, kei phei chu sawi sawi pawh a zahthlâk, a tlàwmthlâk, ka tlâwm takzet a ni," a lo ti ve sup a.

"Sawi lo teh ang u, ka ten a nia," Muana chuan a ti ta hluk a, Mapuia chuan nui hawk hawk chung chuan," Engah ngawt maw? A duh zâwng a dang ve a ni mai a," a lo ti a, nui chung hian min rawn en kual a, Muana chuan," A nikhua loh thlâk êm mai a... a mi pângngai loh thlâk," a lo ti leh hluk a, an sawi chhunzawm ta bík lo. 

Ka hnâr a thî khât ta deuh a, ka ngaih pawh a ngam ve leh ta deuh e. Damdawi ka ei țhain badam lah ka nghei ngai lo bawk nèn, a result ka hre ta niah ka ngai mai. Remruati bulah erawh ka sawi chhuak ngai lo, a lo thî khât ta deuh bawk nèn, min ngaihtuah leh viau tùr kha ka duh lo. 

Krismas kan hnaih ve leh ta bawk a, ka exam zo tawh bawk nèn, rilru a zângkhai haih tawh mai a, ni tin Remruati hmu tùra chhuah chu ka hna pui ber a ni leh tawh mai; mahse, an ina lènchilh tlut tlut chu ka duh bîk lo, an chhúngkua hi fel viau mah se an fanu pasal êm ka la ni bîk lo va, bâkah, a pa hi ka zah tlat a, lèn luh zut ka duh lo. A châng chuan chhuahpuiah ka sáwm mai țhìn. Ni khat chu kan inah kan awm dùn a, tih tur a vàn êm avàng chuan movie ka enpui a, hmeichheho en duh țhin nia ka hriat 'A walk to remember' chu ka enpui a, ka khumah inkuah riala țhuin dawhkàn kan hûng hnai a, țawng miah lo chuan kan en dùn ta ràn a. 

A rilru a pein a boruakah chuan a chêng ngang a ni ang, a mittui chuan ka kawrbân a rawn far thla ta zãih a, chutah chuan a mittui a tla a ni tih ka hre ve chiah. Insût hraih pah chuan,"An awm dàn khi kan nih duh hmel e," a ti sep a, nghet zeta kuah pah chuan,"Hmeichhia pastor fanu ve ve leh a mipate pahnih mi țha lo ve ve," ka lo ti ve thung a, ani chuan," Mi țha lo in ni lo ve ve, mi țha lo inti ziah tawh suh," a ti a, chutah," Hawh, en chhunzawm leh tawh ang," a ti a, hmeichhia damdawi in ațanga a chhuah lai vêl ațang khân kan en chhunzawm leh ta a.

A tàwp thleng chu kan en ngei mai; mahse, ani erawh chu a tàwp tak tak

hmain rawn inher deuhin nghet tak hian min rawn kuah a, ka âwmah chuan a hmai a phûm ta daih a, dik taka sawi chuan kei pawh he movie hi chuan min hneh thei khawp mai, bawi thum lai ka en chhuak tawh rêng bawk a.

Rawn dâk chhuak chuang lo hian," Ka khawngaihin ka rilru an tihrehawm êm mai," a ti țiak a, a aw chhuak hnâr ping aw tih hriat deuh mai ațang chuan a țap a ni tih ka hria. Ni e, hmeichhia hi chu an rilru hi a no a, an mittui pawh hi a tla hma deuh bîk chu a nih hi. 

"I țap leh dâwn a nih chuan ni dangah chuan khatiang movie kha chu ka enpui tawh lo ang che," ka lo ti thung a, duat tak chuan ka la kuah hlà hlá a, ani chuan," A hmeichhia kha ka khawngaih rualin mipa kha ka khawngaih lutuk ringawt, amah chauhin, an sùlhnu kha a chhui a chhui tawh dáwn asin, eng ang pawhin ngaiin ko nasa mah se chhàn a ni ngai tawh dâwn si lo," a ti leh sep sep a.

"Kan tawng ve lo tùrah ngai ang, kha kha chu chan chawp mai mai a nia, a tak a ni chuang lo. Lehkha ka zir sauh sauh ang a, ka inchàwm theih hunah i chhûngte bulah inchhuang takin ka rawn lêng ve thei tawh ang, kha movie ang deuh khân kan inneih theih ngei ka beisei bawk ang," ka tih chuan a hma aia nghet hian min kuah a," Ka lâwm e, ni e, Pathianin zah a ngai ang a, i duhthusàm chu tipuitling ngei rawh se," a ti leh a, kan inkuah vawng vawng a.

*THU ȚHA TAK TAK HI MI DANG HRIATA SAWI CHHÀWN LEH MAI MAI ATÂN NI LOVIN MAHNI NUNAH HIAN SENG LÛT VEK THEI ILA, KAN NUN PAWH HIAN HMA A SÂWN PHAH NGEI ANG*